ಆವಯ್ಚೊ ಮಾರ್ [ ಅಮೇಯ್ ನಾಯ್ಕ್, ಗೊಂಯ್]

ಹೆ ಮಾರ್ ಹಾಸವ್ನ್ ಸುರು ಕರ್ತಾತ್, ಮಧೆಂಚ್ ರಡಯ್ತಾತ್, ಕಾಳ್ಜಾಕ್ ಪಿಗ್ಳಯ್ತಾತ್ ಆನಿ ಕವಿತಾ ವಾಚುನ್ ಗೆಲ್ಲೆಪರಿಂಚ್ ಕೊಶೆಡ್ದಾಂತ್ ಸಿಂತಿಮೆಂತಾಂಚಿ ಪಿಂರ್ಗೊಣ್ ಸಯ್ತ್ ಪಿಂರ್ಗಶೆಂ ಕರಯ್ತಾತ್. ಕಿತೆಂ ಕವಿತಾ ಎಕಾ ತರ್ನ್ಯಾ ಕವಿಥಾವ್ನ್.

ಅಜೀಕ್ ತೀನ್ ವರ್ಸಾಧಿಂ ಎಕಾ ಕವಿಗೋಶ್ಟಿಂತ್ ಬಾಬ್ ಅಮೇಯ್ ನಾಯ್ಕ್ ಹಾಚಿ ಏಕ್ ಕವಿತಾ ವಾಚುನ್ ತಾಚ್ಯಾ ಸೊಧ್ನೆರ್ ಹಾಂವ್ ಆಸ್ಲೊಂ. ಪುಣ್ ಮ್ಹಾಕಾ ತೊ ಮೆಳ್ಳೊಚ್ ಆಯ್ಲೆವಾರ್ ಗೊಂಯಾಂತ್ ಚಲ್‌ಲ್ಲ್ಯಾ ಸಾಹಿತಿಕ್ ಸಮ್ಮೇಳನಾಂತ್. ಜಿತ್ಲೊ ಪ್ರತಿಭಾವಂತ್ ತೊ ಕೀ, ತಿತ್ಲೆಂಚ್ ಖಾಲ್ತೆಂಪಣ್ ತಾಚೆಂ. ಹಿ ಕವಿತಾ ಥಂಯ್ಚರ್ ತಾಣೆಂ ಪ್ರಸ್ತುತ್ ಕೆಲ್ಲಿ ಆನಿ ಆಯ್ಕೊವ್ಪಿ ಜಾಯ್ತ್ಯಾಂಚ್ಯಾ ತೊಂಡಾರ್ ಬಿಗಾಂ ಘಾಲುಂಕ್ ಸಕ್‌ಲ್ಲಿ ಕವಿತಾ. ಗೊಂಯಾಂತ್ ತರ್‌ಯೀ ಉತ್ರಾಂವಿಣೆಂ ಫಕತ್ ಸಾಹಿತಿಕ್ ಪ್ರತಿಭಾ ಅಪುರ್ಭಾಯೆನ್ ಉಲಂವ್ಚಿ ಪಳೆತಾನಾ ಖರೆಂಚ್ ಭಗ್ತಾ; ಕೊಂಕಣೆಂತ್ ಬರೆ ಕವಿ ವೆಗಿಂಚ್ ಯೆತಲೆ. ಆನಿ ತೆ ಬರೆ ದೀಸ್ ವೆಗಿಂಚ್ ಯೇಂವ್ ಮ್ಹಣುನ್ ರಾಕೊನ್ ರಾವ್ತಾಂ ಆನಿ ಸದ್ದ್ಯಾಕ್ ಹಿ ಕವಿತಾ ವಾಚುಂಕ್ ತುಕಾ ಉಲೊ ದಿತಾಂ.

[ಕವಿತಾ] ಆವಯ್ಚೊ ಮಾರ್ [ಅಮೇಯ್ ನಾಯ್ಕ್, ಗೊಂಯ್]

ಆವಯ್ಚೊ ಮಾರ್

ಭುರ್ಗೆಪಣಾಂತ್ ಆವಯ್ ಮ್ಹಾಕಾ

ಖೂಬ್ ಮಾರ್ತಾಲಿ,

ತಿಚೆ ಕಡೆನ್ ತಸೊ

ತರೆತರೆಚೊ

ಮಾರ್ ಆಸ್ಲೆಲೊ.

ಜಸೊ,

ಎಕ್ ದೊನ್ ವರ್ಸಾಂಚೊ ಆಸ್ತನಾ,

ಕಸ್ಲೀಂಯ್ ಮಸ್ತೆಪಣಾಂ ಕರ್ತನಾ,

'ಧಾಯ್' ಕರ್ತಾಲಿ

ಮೊಗಾನ್.

ಪಿರಾಯ್ ವಾಡ್ಲಿ

ತಶಿ

ಮಸ್ತೆಪಣಾಂಯ್ ವಾಡ್ಲಿಂ.

ತಶಿ

ಆವ್ಯ್ಚಿ ಮಾರ್ಪಾಚಿ

ತರಾಯ್ ವಾಡ್ಲಿ.

ಪೂಣ್

ಸಂವ್ಯ್ ಮಾತ್ತೂಯ್ ಸುಟೂಂಕ್ ನಾ ಮ್ಹಜಿ

ಮಾರ್ ಖಾವ್ಪಾಚಿ.

ಫುಡೆಂ, ಆವ್ಯ್ಚ್ಯಾ ಹಾತಾಂತ್

'ಶಿಟ್ಟಿ' ಆಸ್ತಾಲಿ

ಸಾದಿ ಸರಳ್

ಅಶೀಟ್ಟ್ ಹಾತಾರ್ ಪಡ್ಟಾಲಿ

ಕೆನ್ನಾ ಕೆನ್ನಾ ಚುಕ್ತಾಲಿ

ವಾ

ಹಾಂವ್ ಚುಕಯ್ತಾಲೊಂ...

ತಿಚೆರ್ 'ಭಾರ್' ಬೀನ್ ಯೆತ್ಕಚ್

ಕುಲ್ಯಾರ್ ಪಡ್ಟಕಚ್

ಖೂಬ್ ದುಖ್ತಾಲಿ.

ಹಾಂವ್

ಆನೀಕ್ ಮಾತ್ಸೊ ವ್ಹಡ್ ಜಾಲೊಂ.

ಶಿಟ್ಟೆಚೊ ಮಾರ್ ಖಾವ್ನ್ ಖಾವ್ನ್,

ಕುಲೊಯ್ ಮ್ಹಜೊ ಘಟ್ ಜಾಲೊಂ.

ಮಾಗೀರ್ ಹಾಂವೆಂ

ಸಾನ್ನಿ ಮುಣ್ಯಾಂಚೊ,

ಚಪ್ಪಲಾಂಚೊಯ್ ಖಾಲ್ಲೊಂ ಮಾರ್.

ತ್ಯಾ ದಿಸಾ...

ತ್ಯಾ ದಿಸಾ ಮ್ಹಜ್ಯಾಯ್

ಸೊಶೀಕತಾಯೆಚೊ ಬಾಂಧ್ ಫುಟ್ಲೊಂ.

ಕಾನ್ಸುಲಾರ್ ತಿಚ್ಯಾ

ದೊನ್ ಫುಲಯ್ಲಿ...

ಚೆಡೊ ತಿಚೊ ವ್ಹಡ್ ಜಾಲ್ಲೊ

ತಿಕಾ ಸಮ್ಜಲೆಂ.

ಬಾಬ್ಡಿ ಒಗ್ಗಿ ಪಡ್ಲಿ

ಜೀಬ್ ಶೆಣಿಲ್ಲೆವರಿ.

ತ್ಯಾ ದಿಸಾ ಸಾವ್ನ್

ಆಜುನೂಯ್ ಖಾತಾಂ ಹಾಂವ್

ತಿಚೊ

ಮೊನೆಪಣಾಂ ಮಾರ್...

ಸಗ್ಳೆ ಮಾರ್ ಸೊಸ್ಲೆ

'ಹೊ' ಮಾತ್

ಮಾತ್ತೂಯ್ ಸೊಸೂಂಕ್ ಜಾಯ್ನಾ.

ದಿಸ್ತಾಂ ಮ್ಹಾಕಾ

ಸಾಂಗ್ಚೆಂ ಕಶೆಂ ತಿಕಾ...

" ವಾಜಯ್ ಗೆ...

ವಾಜಯ್ ಗೆ, ಮ್ಹಜ್ಯಾ ಪೊಲ್ಯಾರ್...

ಹಾತಾರ್

ವಾ ಕುಲ್ಯಾರ್...

ಪಳಯ್...

ಪಳಯ್... ಹಾಂವ್ ಲಾಗೀಂಚ್ ಆಸಾಂ

ಲಾಗೀಂಚ್

ತುಜ್ಯಾ ಉಲ್ಯಾರ್."

ಕಿತ್ಲೆಯ್ ಕೆಲೆ ಪ್ರಯ್ತ್ನ್ ತರಿ

ತಿಕಾ

ಭುರ್ಗೆಪಣ್ ಮ್ಹಜೆಂ ಮೆಳ್ನಾ,

ಮ್ಹಾಕಾಯ್ ಆತಾಂ ಮ್ಹಜ್ಯಾ

'ತ್ಯಾ'

ಭುರ್ಗೆಪಣಾಂತ್ ವಚೂಂಕ್ ಕಳ್ನಾ...

'ತ್ಯಾ'

ಭುರ್ಗೆಪಣಾಂತ್ ವಚೂಂಕ್ ಕಳ್ನಾ.

- ಅಮೇಯ್ ನಾಯ್ಕ್, ಗೊಂಯ್ [ಮಾರ್ಚ್, 2019]