ಕವಿತಾकविताPoem

आत्मनिर्भर (- ग्वादलूप डायस)

[कविता] आत्मनिर्भर (- ग्वादलूप डायस)

मेटां मेटांक विडंबनां आनी ह्या विडंबनांक पाटिंबो दितलो धेंक काडचो लोक. विकाळ वारें आडावंक लाचार मनीस अपलीं तोंडां धांप्ताना ह्या धेंक काडच्या लोकांनी अपल्या दोळ्यांचेर न्हेस‌ल्ल्या मासकांत कितेंच दिसाना; दोळ्यां समोर मोडीं पडून आसात, गत आधार नातलो लोक अपलें काम, अपलो दीस्पडतो ग्रास सक्कड होगडावन, ऊर‌ल्ल्या तुटकर फुटकर स्वपणांक वोजीं घेवून त्या फत्राट्या रसत्यांनी रित्या पांयांनी चलून चलून पांयाच्यो काती झरोन वेताना हे धेंक काडतेले दिसाक एकेक नवीं भाशणां दितात आनी हांकां जै-जैकार घाल्चे दळदीर भडवे खरेंच जावन गरीब मनशाच्या मतिंत सवाल उदेता हें आत्म‌निर्भर वा आत्म‌निरबल?

[कविता] आत्मनिर्भर (- ग्वादलूप डायस)

आत्मनिर्भर

संवसार माथ्यार, भुरगीं खांदार

धरल्या आमी घरची वाट

तळव्यांक फोड, जिवीत जड

वोतांत आमची भाजल्या फाट

पोटाक खळी, रिती झोळी

दोळ्यांत दुकां जाल्यात दाट

हालोवन हात, 'मन की बात'

कितलें सोंपें न्हय

'आत्मनिर्भर' दिवंक पाठ???

आमी जातात, तेन्नाच मरतात

जगूंक फक्त मडीं बाकी

तुमचे वांटे, भांगरा गोटे

आमची मात चुलूय दुखी

लाख कोटी, जीण खोटी

आमचो न्हय हो शब्द 'सुखी'

कितलें सोंपें न्हय

'आत्मनिर्भर' दिवंक देखी???

आमची भूख, आमचीच चूक

आतां तरी आयलां कळून

आमचें मरण, आमचें सरण

जल्मतांच आयल्यात दाळून

आमची जीण, व्हडलो शीण

तुमीय आमकां काडल्यात पिळून

'आत्मनिर्भर' म्हणचे पयलीं

एकदां तरी पळोवशी वळून???

- ग्वादलूप डायस. [माय, २०२०]