ಆಂಕರ್ (- ಉದಯ್ ಮಾಂಬ್ರೊ)

[ಕವಿತಾ] ಆಂಕರ್ (- ಉದಯ್ ಮಾಂಬ್ರೊ)

ದೀಸ್ ಗೆಲ್ಲೆಪರಿಂಚ್ ಆಮಿ ಚಮ್ಕೊನ್ ಆಯಿಲ್ಲಿ ವಾಟ್ ಲೆಗೂನ್ ಪರ್ಕಿ ಜಾಲ್ಲೆಪರಿಂ ಭಗ್ತಾಸ್ತಾಂ, ಫುಡ್ಲಿ ವಾಟ್ ಖರಿಚ್ ಕಾಳೊಕ್ ಆನಿ ಅಶ್ಪಶ್ಟತೆಚ್ಯಾ ದಿಶೆಕ್ ದಾಕಯ್ತಾ. ಆಮಿ ಆಮ್ಚೆಮಧೆಂಚ್ ಪರ್ಕಿ ಜಾಂವ್ಚಿ ಪರಿಗತ್ ಖರೆಂಚ್ ಆಮ್ಕಾಂ ಚಿಂತ್ನಾಂ ಗೊಂದೊಳಾಕ್ ಪಾವಯ್ತಾ.

ಕವಿತೆಂತ್ ಸಮಾಜಿಕ್ ಪರಿಗತೆಚೆರ್ ಆರ್ಸೊ ಧರ್ಲಾ ದೆಕುನ್ ಹ್ಯಾ ಆರ್ಸ್ಯಾಂತ್ ಆಮ್ಚೆಂ ಮುಳಾವೆಂ ಚಿಂತಪ್, ಆಮ್ಚೆ ವಿಚಾರ್, ಆಮ್ಚೆಂ ಜಿವಿತ್ ತಶೆಂಚ್ ಆಮಿ ಚಮ್ಕೊನ್ ವೆಚಿ ದಿಶಾ ಪುರ್ತಿ ನಾಗ್ಡಿ ದಿಸ್‌ಲ್ಲೆಪರಿಂಚ್ ಹ್ಯಾ ಬದಲ್ಚ್ಯಾ ಮನ್ಶಾಕ್ ಪಳೆವ್ನ್ ಮೊಳೊಕ್ ಸಯ್ತ್ ರಡ್ಟಾ ಮ್ಹಣುನ್ ಕವಿ ಸಾಂಗ್ತಾ. ಪುಣ್ ಇತ್ಲೆಂ ಸರ್ವ್ ಜಾಲಾಂ/ಜಾತಾ ಪುಣ್ ತ್ಯಾ ಉದಕ್ ವ್ಹಾಳೊನ್ ಆಯಿಲ್ಲ್ಯಾ ಸುವಾತೆರ್ ಪುಣಿ ನವಿ ಆಂಕರ್ ಕಿರ್ಲತಾಕಾಯ್ ಮ್ಹಳ್ಳೊ ಆಶಾವಾದ್ ಪಾಚಾರ್ತಾ.

[ಕವಿತಾ] ಆಂಕರ್ (- ಉದಯ್ ಮಾಂಬ್ರೊ)

ಆಂಕರ್

ಟವ್ಟವೀತ್ ರುಕಾ ಪಾನಾಂ

ಚಂವ್ರಲಿ ಸಗ್ಳಿಂ ರಾನಾಂ

ಧೊವಾನ್ ವಠಾರ್ ಧುಂವ್ರೆಲಾ

ದೆಂಟಾಕ್ ಫಳ್ ಧರ್ಚೆ ನಾ

ಭಿಂ ನಾತ್‌ಲ್ಲೆಂ ಭಾತ್ ತೆಂ

ರೊಯ್ಲೆಂ ತರಿ ಕಿರ್ಲುಂಚೆಂ ನಾ

ಪತ್ರಾವಳಿ ಮಾಂಡ್ಲ್ಯೊ ಜರಿ

ಶಿತ್ ಪಾನಾರ್ ಪಡ್ಚೆಂ ನಾ

ಮಳಬ್ ಹಾಂಗಾ ಆಯ್ಲಾಂ ದಾಟೂನ್

ಕಿರಣ್ ಕಾಳೊಕ್ ಪಾತಳ್ಳಾ

ದಾಟ್ಲಾ ರೆಬೊ ಆಟ್ಲ್ಯಾ ನ್ಹಂಯ್

ಮಳಬ್ ತರಿ ರಡತ್ ಕಾಯ್?

ಭಾಟಾಂತಲೆ ಪುರವ್ಲೆ ಚರ್

ಕೊಸ್ಳೊಂಕ್ ಲಾಗ್ಲೆ ಬಾಂದ್

ಉಸ್ಪಿಲ್ಯಾರ್ ಚರ್ ನಿದಾನ್

ಆಂಕರ್ ತರಿ ಕಿರ್ಲತ್ ಕಾಯ್?

ಮೂಳ್ ಬೊಲಿ: ಆಂತ್ರುಜ್

ಟವ್ಟವೀತ್ = ನವೆಂ (ಫ್ರೆಶ್)

ಚಂವ್ರಲಿ = ಫಳ್ ಜಾಂವ್ಚ್ಯಾಧ್ಲಿ ಸ್ಥಿತಿ

ಪತ್ರಾವಳಿ = ಪೊಣ್ಸಾಖೊಲ್ಯಾಕ್ ದೆಂಟಾನ್ ಗುಂತುನ್ ಕೆಲ್ಲೆಂ ಪಾನ್

ಪಾತಳ್ಳಾ = ಪಾಚಾರ್ಲಾ

ರೆಬೊ = ಚಿಕೊಲ್

ಚರ್ = ಉದ್ಕಾಚಿ ಖಣ್/ತೋಡ್

- ಉದಯ್ ಮಾಂಬ್ರೊ. [ದಸೆಂಬರ್, 2023]

ಉದಯ್ ಮಾಂಬ್ರೊ: ಗೊಂಯ್ಚೊ ಏಕ್ ನಾಮ್ಣೆಚೊ ಲೇಕಕ್, ಕವಿ, ವಾವ್ರಾಡಿ ತಶೆಂಚ್ ಪದಾಂ ಘಡ್ಣಾರ್. ’ಹಾಯ್ ಸಾಯ್ಭಾ’, ’ಮನ್ಶಾಚ್ಯಾ ಸೋಧಾಂತ್’, 'ಇಂದ್ರಧೊಣು' ಹಾಚೆ ಎದೊಳ್ ಪರ್ಗಟ್ ಜಾಲ್ಲೆ ಬೂಕ್. ಕವಿತಾ, ಕಥಾ, ಅಣ್ಬವ್ ಸಾಹಿತ್ ಬರಂವ್ಚೊ ಹೊ ಏಕ್ ಕೊಂಕಣಿ ವಾವ್ರಾಡಿ ತಶೆಂಚ್ ಚಿಂತ್ಪಿ ಜಾವ್ನಾಸ್ಚ್ಯಾ ಹಾಚ್ಯಾ ಕವಿತೆಂಚೆರ್ ಮುಂಬಂಯ್ತ್ ’ಕವಿತಾಪಾಠ್’ ಕಾಮಾಸಾಳಾಂತ್ ಅಧ್ಯಯನ್ ಚಲ್ಲಾಂ.  ಇಂದ್ರಧೊಣು ಪುಸ್ತಕಾಕ್ 2021 ಇಸ್ವೆಚೊ ವಿಶ್ವ್ ಕೊಂಕಣಿ ಕೇಂದ್ರಚೊ ’ವಿಮಲಾ ವಿ. ಪೈ. ಪುರಸ್ಕಾರ್’ ಲಾಭ್ಲಾ. ಹೆಂ ಪುಸ್ತಕ್ ಕನ್ನಡ್ ಲಿಪಿಯೆಂತ್ ಡಿಜಿಟಲ್ ರುಪಾರ್ ಆಶಾವಾದಿ ಪ್ರಕಾಶನಾನ್ ಪರ್ಗಟ್ಲಾಂ.