ಕವಿತಾकविताPoem

ಆಯೀ (- ಉದಯ್ ಮಾಂಬ್ರೊ)

[ಕವಿತಾ] ಆಯೀ (- ಉದಯ್ ಮಾಂಬ್ರೊ)

ಹ್ಯಾ ಸಂಸಾರಾಂತ್ ಆವಯ್ ಮ್ಹಳ್ಯಾರ್ ಏಕ್ ವೆಗಳೊ ಸಂಸಾರ್. ಹಾಂಗಾಸರ್ ಸೂತ್ರಾಂಚ್ ವಿಚಿತ್ರಾಂ. ಆವಯ್ ಮ್ಹಳ್ಯಾರ್ ಮೊಗಾಚೊ ಏಕ್ ದರಯೊ ದೆಕುನ್ ಹಾಂಗಾಸರ್ ಫಕತ್ ಮೊಗಾಚಿಂಚ್ ಲ್ಹಾರಾಂ. ಆವಯ್ ಮ್ಹಳ್ಯಾರ್ ದಯೆಚೊ ಸುರಯೊ ದೆಕುನ್ ಹಾಂಗಾಸರ್ ಫಕತ್ ದಯೆಚಿಂ ಕಿರಣಾಂ. ಆವಯ್ ಮ್ಹಳ್ಯಾರ್ ಏಕ್ ಕೋಡ್ತ್, ಹಾಂಗಾಸರ್ ಭುರಗ್ಯಾಂನಿ ಕಸಲ್ಯೊಚ್ ಚುಕಿ ಕೆಲ್ಯಾರ್, ತ್ಯಾ ಚುಕಿಂಕ್ ಕೆದಿಂಚ್ ಶಿಕ್ಷಾ ಮ್ಹಳ್ಳಿ ನಾ.

ಕಾಂಯ್ ಥೊಡ್ಯಾ ವಳಿಂನಿ ಭೋವ್ ಅಪುರ್ಭಾಯೆಚಿಂ ಭಾವನಾಂ ಅಪ್ಲ್ಯಾ ಕವಿತೆಂನಿ ಉತ್ರಾಂವ್ಚ್ಯಾ ಕವಿ ಬಾಬ್ ಉದಯ್ ಮ್ಹಾಂಬ್ರೊಚ್ಯಾ ಹ್ಯಾ ಕವಿತೆಚೆಂ ಅಸ್ವಾದನ್ ಕರುಂಕ್ ತುಕಾಚ್ ಆತಾಂ ಉಲೊ ದಿತಾಂ

[ಕವಿತಾ] ಆಯೀ (- ಉದಯ್ ಮಾಂಬ್ರೊ)

ಆಯೀ

ಭರ್ಭರುನ್ ಮೆಳ್ಳೆಂ ಜರಿ ಸಂವ್ಸಾರಾತಲೆಂ ಸುಖ್

ವಸವ್ಸಲಾ ಹಾಂವ್ ಪಳೊವಂಕ್ ಆಯೀ ತುಜೆಂ ಮುಖ್

ಅಪುರಬಾಯ್ ಕರ್ಚಿ ಕಶಿ ತುಂವೆಚ್ ಶಿಕಯ್ಲಿ

ಮಸ್ತೆಪಣಾಕ್ ಖ್ಯಾಸ್ತ್ ದಿವ್ನ್ ದೆಖ್ ದಾಖಯ್ಲಿ

ಪುತ್ ಜರಿ ಜಾಲೊ ತುಜೊ ಭೊಗ್ಶಿಲಿ ನಾ ಚೂಕ್

ವಸವ್ಸಲಾ ಹಾಂವ್ ಪಳೊವಂಕ್ ಆಯೀ ತುಜೆಂ ಮುಖ್

ಉಣೀದುಣಿ ಉತ್ರಾಂ ತುಂವೆ ಕೊಣಾ ದಿಲಿ ನಾ

ದಾರಾಂತಲೊ ಸೊಯ್ರೊ ರೀತ್ಯಾ ಹಾತಿ ಗೆಲೊ ನಾ

ತಾನ್ಭುಕೆ ವಿಸರ್ ಘಾಲಿ, ಸಾವ್ಳಿ ತುಜಿ, ತುಂ ಗೆ ರುಖ್

ವಸವ್ಸಲಾ ಹಾಂವ್ ಪಳೊವಂಕ್ ಆಯೀ ತುಜೆಂ ಮುಖ್

ಥಂಡ್ಶಿತಳ್ ವ್ಹಾಂವ್ತಿ ವಾರೆಂ, ಮ್ಹಾಕಾ ನಾಸ್ಲೊ ಭಂಯ್

ವೆಂಗೆನ್ ಮೊಗಾಉಬ್ ದಿತ್ ತುಂ ಗೆ ಮ್ಹಣ್ಟಾಲಿ ಆಲಯ್

ಆಯೀ ಮ್ಹಾಕಾ ಸೊಡೂನ್ ಗೆಲಿ ಕಾಳ್ಜಾ ಮ್ಹಜ್ಯಾ ದುಖ್

ವಸವ್ಸಲಾ ಹಾಂವ್ ಪಳೊವಂಕ್ ಆಯೀ ತುಜೆಂ ಮುಖ್

ಭರ್ಭರುನ್ ಮೆಳ್ಳೆಂ ಜರಿ ಸಂವ್ಸಾರಾತಲೆಂ ಸುಖ್

ವಸವ್ಸಲಾ ಹಾಂವ್ ಪಳೊವಂಕ್ ಆಯೀ ತುಜೆಂ ಮುಖ್

- ಉದಯ್ ಮಾಂಬ್ರೊ. [ಮಾರ್ಚ್, 2023]