ಆಬಾಚಿ ಸತ್ರಿ (- ಎಲಿಜಾ ಫೆರ್ನಾಂಡಿಸ್ ಪಾಂಗ್ಳಾ)

ಜಿವಾಚಿ ಗಾಂಟ್ ಹಾಂವ್ ತಾಚೊ

ಪುಡ್ವೆಂ-ಜಿಬ್ಬೊ-ಮುಂಡಾಸ್ ಹಾತಾಂತ್ ಸತ್ರಿ

ವಿಸ್ರನಾಸ್ತಾಂ ಘೆವ್ನ್ ಬಗ್ಲೆಕ್ ಕರಿ ಸವಾರಿ

ಭಗ್ತಾ ಖುಶಾಲಾಯ್ ತಾಚೆ ಸಂಗಿ

ಸವಾರಿ ಕರುಂಕ್ ಗಾಂವಾ ಭಂವಾರಿಂ

ಸಗ್ಳೆ ಬಾಗಯ್ತಾತ್ ಮಾನ್ ಆಬಾಕ್

ಉಸ್ವೊನ್ ಧರುನ್ ಮರ್ಜೆನ್ ಚಲ್ತಾನಾ

ಭೆಟ್ ತಾಚಿ ಸಭಾರ್ ಘರಾಂಕ್

ಪಿಡೆ ಶಿಡೆಂತ್ ಆಸ್‍ಲ್ಲ್ಯಾಂಕ್ ಆಧಾರ್

ಕುಮೊಕ್ ಕರುಂಕ್ ಕರಿನಾ ಘಳಾಯ್

ಗತ್-ಆಧಾರ್ ನಾತ್ಲೆಲ್ಯಾಂಕ್ ತೊಚ್ ಜಾಯ್

ಪಾವ್ಸಾ-ವೊತಾಂತ್ ಹಾಂವ್ ತಾಚೊ ಆಧಾರ್

ಪುರಾಸಣೆಂತ್ ಬಸ್ತಾ ಘೆವ್ನ್ ಉಸ್ಕ್ಯಾರ್

ಅಸಲೆಂ ಭಾಗ್ ಮೆಳಾತ್ ತರೀ ಕೊಣಾಕ್

ದೆಕುನ್ ಸದಾಂ ಆಭಾರಿ ಹಾಂವ್ ಆಬಾಕ್

ಕಾಜಾರ್-ಸೊಭಾಣಾಂ ಫೆಸ್ತಾಂ-ಪರ್ಬೆಂಕ್

ಗಾಂವ್ಚೊ ಲೋಕ್ ಸೊದುನ್ ಯೆತಾ ಆಬಾಕ್

ಮ್ಹಜಿಯ್ ನಾಂ ಕೊಣಾಕ್ ಆಜ್ ಗರಜ್

ಕಿತ್ಯಾಕ್... ಆಬ್ ನಾಂ ಆತಾಂ ಘರಾಂತ್

ರಡ್ತಾಂ ಹಾಂವ್ ಖಂತಿನ್ ಆಬಾಚ್ಯಾ

ನಾಕಾ ಜಾಲಾಂ ಹಾಂವ್‍ಯ್ ಆಜ್ ಘರಾಂತ್ ತಾಚ್ಯಾ

ಪಿಂದ್ಕರ್ ವಸ್ತುರ್ ಬಾಗ್ವೊಲ್ಲೊ ದಾಂಡೊ

ಕೊಣಾಕ್ ನಾಕಾ ಪೊಡ್ಲಾಂ ಕೊನ್ಶ್ಯಾಕ್ ಘರಾಚ್ಯಾ.

- ಎಲಿಜಾ ಫೆರ್ನಾಂಡಿಸ್ ಪಾಂಗ್ಳಾ. [ಜ್ಯೂನ್, 2020]

ಎಲಿಜಾ ಫೆರ್ನಾಂಡಿಸ್ ಪಾಂಗ್ಳಾ: ವೃತ್ತೆನ್ ಶಿಕ್ಷಕಿ ಜಾವ್ನಾಸ್ಚ್ಯಾ ಹಿಣೆಂ ಶಿಕ್ಷಣ್, ಸಮಾಜ್ ಸೆವಾ ಅಶೆಂ ವೆವೆಗಳ್ಯಾ ಪ್ರಕಾರಾಂತ್ ವಾವ್ರ್ ಕರುನ್ ಆಸ್ಚಿ ಹಿ 2013-14 ಇಸ್ವೆಚಿ ಉತ್ತೀಮ್ ಸಾಧಕ್ ಶಿಕ್ಷಕಿ ಪುರಸ್ಕಾರ್ ಜೊಡ್ಪಿ. ಭುರ್ಗ್ಯಾಂಕ್ ಕೊಂಕಣಿ ಪದಾಂ, ವೊವಿಯೊ, ಕಾಣಿಯೊ ತಶೆಂಚ್ ನಾಚ್ ಶಿಕಯ್ತಾ. ಸದ್ದ್ಯಾಕ್ Inner Wheal Club, Shankerpura ಸಂಸ್ಥ್ಯಾಂತ್ ವಾವುರ್ನ್ ಆಸಾ.