[khobor] Konknni vachon vixvantlean nove vachpi ani boroupi toyar zatle - zuje lorenso
Konknni vachon vixvantlean nove vachpi ani boroupi toyar zatle - zuje lorenso
Konknni bhaxa monddoll, gõychea konknni vachon vixvachem uktaunn.
“pustok hem aidon, tatunt vicharanchem randop zata. Aidonam pon'ni zatat punn vichar nhoi. Hea veaspittha vorvim vachpi ani boroupi toyar zatle ani oxem kelear konknnicho dorzo voir sortolo oxi ast lekhok zuje lorenso hamnni uktaili. Konknni bhaxa monddllachea konknni vachon vixvachem uktaunn kele uprant te uloitale. Aplea uloupant pustokanchea vachnachem mhotv ani pustokancher chorcha zaupak zai oxem mot tamnni manddlem. 8 sopttembor 2020, antororaxttri-i sakxorotai disa nimtan konknni bhaxa monddllan, konknni vachon vixvachem uktaunn kelem.
Bhurgeank aple auybhaxen xikounk zai zalearoch te bhaxechi udrogot zatli: komol kixor xorma uktaunna uprant rajsthanache lekhok ani xikxonnovid komol kixor xorma hamnni odheapon ani lekhna khatir sahity vachnachem mhotv hea vixeacher veakhean dilem. Konknni bhaxa monddlla vori heramni legit aple maibhaxe khatir sodanch vaurunk zai. Bhurgeank aple auybhaxen xikounk zai zalearoch te bhaxechi udrogot zatli oxem tamnni sanglem.
Khoinchyai zhaddachem mull kapun uddoilem zalear tachim panam fokot thoddeach disa khatir borim pachvinchar astolim, kaim disamni tim gollun poddttolim. Hech toren bhurgeanche babtint ani bhaxeche babtint zata.
Bhurgeanchi apli svotachi laibrori asunk zai. Tankam lhanponna saun vachnachi somvy launk zai. Sahity vachlearoch jivnachem sarthok zatlem oxem mot tamnni manddlem.
Survatik konknni bhaxa monddllachi odhyokx onvexa singball hamnni prastavik kortona monddllacho ud'dex sanglo. Madhyomam bodl'leat punn vachon unnem zaunk na, ani taka bollgem divpak konknni bhaxa monddllan vachon vixv suru kela. Konknni vachon vixv veaspittha khala sadrikoronn, chorcha sotram, lekhkancheo mulakhoti zatleo oxem tamnni sanglem.
He kareavollik 180 poros chodd prekxok gugol mitt vorvim zoddil'le, te bhair fesbukacher prekxok laivh axil'le.
Kareavollichem somyozon sonia goddkar zalear upkarachem uloup purva gudde hamnni kelem. Xolaka desai hamnni mukhel soire zuje lorenso hanchi vollokh keli ani sobina mul'la hamnni veakheate komol xorma hanchi vollokh korun dili.
‘vojrolikhonni’ cher chorcha sotr 22 sopttemborak 2020 disa vachon vixvachi poili kareavoll gugol mittacher zatli. Konknniche mhapuros xonnoi gõybab hanchea borpancher bhasabhas zatli. Lekhok xantaram' valaulikar hamnni sompadit kel'lea vojrolikhonni hea pustokacher hi kareavoll zatli.
