[ಖಬರ್] ಕೊಂಕ್ಣಿ ವಾಚನ್ ವಿಶ್ವಾಂತ್ಲ್ಯಾನ್ ನವೆ ವಾಚ್ಪಿ ಆನಿ ಬರೊವ್ಪಿ ತಯಾರ್ ಜಾತ್ಲೆ - ಜುಜೆ ಲೊರೆನ್ಸೊ
ಕೊಂಕ್ಣಿ ವಾಚನ್ ವಿಶ್ವಾಂತ್ಲ್ಯಾನ್ ನವೆ ವಾಚ್ಪಿ ಆನಿ ಬರೊವ್ಪಿ ತಯಾರ್ ಜಾತ್ಲೆ - ಜುಜೆ ಲೊರೆನ್ಸೊ
ಕೊಂಕ್ಣಿ ಭಾಶಾ ಮಂಡಳ್, ಗೊಂಯ್ಚ್ಯಾ ಕೊಂಕ್ಣಿ ವಾಚನ್ ವಿಶ್ವಾಚೆಂ ಉಕ್ತಾವಣ್.
“ಪುಸ್ತಕ್ ಹೆಂ ಆಯ್ದನ್, ತಾತೂಂತ್ ವಿಚಾರಾಂಚೆಂ ರಾಂದಪ್ ಜಾತಾ. ಆಯ್ದನಾಂ ಪೊನ್ನಿ ಜಾತಾತ್ ಪೂಣ್ ವಿಚಾರ್ ನ್ಹಯ್. ಹ್ಯಾ ವ್ಯಾಸ್ಪಿಠಾ ವರ್ವಿಂ ವಾಚ್ಪಿ ಆನಿ ಬರೊವ್ಪಿ ತಯಾರ್ ಜಾತ್ಲೆ ಆನಿ ಅಶೆಂ ಕೆಲ್ಯಾರ್ ಕೊಂಕ್ಣೀಚೊ ದರ್ಜೊ ವಯ್ರ್ ಸರ್ತಲೊ ಅಶಿ ಆಸ್ತ್ ಲೆಖಕ್ ಜುಜೆ ಲೊರೆನ್ಸೊ ಹಾಂಣಿ ಉಕ್ತಾಯಲಿ. ಕೊಂಕ್ಣಿ ಭಾಶಾ ಮಂಡ್ಳಾಚ್ಯಾ ಕೊಂಕ್ಣಿ ವಾಚನ್ ವಿಶ್ವಾಚೆಂ ಉಕ್ತಾವಣ್ ಕೆಲೆ ಉಪ್ರಾಂತ್ ತೆ ಉಲಯ್ತಾಲೆ. ಆಪ್ಲ್ಯಾ ಉಲೊವ್ಪಾಂತ್ ಪುಸ್ತಕಾಂಚ್ಯಾ ವಾಚ್ನಾಚೆಂ ಮ್ಹತ್ವ್ ಆನಿ ಪುಸ್ತಕಾಂಚೆರ್ ಚರ್ಚಾ ಜಾವ್ಪಾಕ್ ಜಾಯ್ ಅಶೆಂ ಮತ್ ತಾಂಣಿ ಮಾಂಡ್ಲೆಂ. 8 ಸಪ್ಟೆಂಬರ್ 2020, ಆಂತರರಾಷ್ಟ್ರೀಯ್ ಸಾಕ್ಷರತಾಯ್ ದಿಸಾ ನಿಮ್ತಾನ್ ಕೊಂಕ್ಣಿ ಭಾಶಾ ಮಂಡ್ಳಾನ್, ಕೊಂಕ್ಣಿ ವಾಚನ್ ವಿಶ್ವಾಚೆಂ ಉಕ್ತಾವಣ್ ಕೆಲೆಂ.
ಭುರ್ಗ್ಯಾಂಕ್ ಆಪ್ಲೆ ಆವ್ಯ್ಭಾಶೆನ್ ಶಿಕೊವಂಕ್ ಜಾಯ್ ಜಾಲ್ಯಾರಚ್ ತೆ ಭಾಶೆಚಿ ಉದ್ರಗತ್ ಜಾತ್ಲಿ: ಕಮಲ್ ಕಿಶೊರ್ ಶರ್ಮಾ
ಉಕ್ತಾವಣಾ ಉಪ್ರಾಂತ್ ರಾಜ್ಸ್ಥಾನಾಚೆ ಲೆಖಕ್ ಆನಿ ಶಿಕ್ಷಣವೀದ್ ಕಮಲ್ ಕಿಶೊರ್ ಶರ್ಮಾ ಹಾಂಣಿ ಅಧ್ಯಾಪನ್ ಆನಿ ಲೆಖ್ನಾ ಖಾತೀರ್ ಸಾಹಿತ್ಯ್ ವಾಚ್ನಾಚೆಂ ಮ್ಹತ್ವ್ ಹ್ಯಾ ವಿಶ್ಯಾಚೆರ್ ವ್ಯಾಖ್ಯಾನ್ ದಿಲೆಂ. ಕೊಂಕ್ಣಿ ಭಾಶಾ ಮಂಡ್ಳಾ ವರಿ ಹೆರಾಂನಿ ಲೆಗೀತ್ ಆಪ್ಲೆ ಮಾಯ್ಭಾಶೆ ಖಾತೀರ್ ಸದಾಂಚ್ ವಾವ್ರೂಂಕ್ ಜಾಯ್. ಭುರ್ಗ್ಯಾಂಕ್ ಆಪ್ಲೆ ಆವ್ಯ್ಭಾಶೆನ್ ಶಿಕೊವಂಕ್ ಜಾಯ್ ಜಾಲ್ಯಾರಚ್ ತೆ ಭಾಶೆಚಿ ಉದ್ರಗತ್ ಜಾತ್ಲಿ ಅಶೆಂ ತಾಂಣಿ ಸಾಂಗ್ಲೆಂ.
ಖಂಯ್ಚ್ಯಾಯ್ ಝಾಡಾಚೆಂ ಮೂಳ್ ಕಾಪೂನ್ ಉಡಯ್ಲೆಂ ಜಾಲ್ಯಾರ್ ತಾಚಿಂ ಪಾನಾಂ ಫಕತ್ ಥೊಡ್ಯಾಚ್ ದಿಸಾ ಖಾತೀರ್ ಬರಿಂ ಪಾಚ್ವೀಂಚಾರ್ ಆಸ್ತಲಿಂ, ಕಾಂಯ್ ದಿಸಾಂನಿ ತಿಂ ಗಳೂನ್ ಪಡ್ಟಲಿಂ. ಹೆಚ್ ತರೆನ್ ಭುರ್ಗ್ಯಾಂಚೆ ಬಾಬ್ತೀಂತ್ ಆನಿ ಭಾಶೆಚೆ ಬಾಬ್ತೀಂತ್ ಜಾತಾ.
ಭುರ್ಗ್ಯಾಂಚಿ ಆಪ್ಲಿ ಸ್ವತಾಚಿ ಲಾಯ್ಬ್ರರಿ ಆಸೂಂಕ್ ಜಾಯ್. ತಾಂಕಾಂ ಲ್ಹಾನ್ಪಣಾ ಸಾವ್ನ್ ವಾಚ್ನಾಚಿ ಸಂವ್ಯ್ ಲಾವಂಕ್ ಜಾಯ್. ಸಾಹಿತ್ಯ್ ವಾಚ್ಲ್ಯಾರಚ್ ಜಿವ್ನಾಚೆಂ ಸಾರ್ಥಕ್ ಜಾತ್ಲೆಂ ಅಶೆಂ ಮತ್ ತಾಂಣಿ ಮಾಂಡ್ಲೆಂ.
ಸುರ್ವಾತೀಕ್ ಕೊಂಕ್ಣಿ ಭಾಶಾ ಮಂಡ್ಳಾಚಿ ಅಧ್ಯಕ್ಷ್ ಅನ್ವೆಷಾ ಸಿಂಗ್ಬಾಳ್ ಹಾಂಣಿ ಪ್ರಾಸ್ತಾವೀಕ್ ಕರ್ತನಾ ಮಂಡ್ಳಾಚೊ ಉದ್ದೆಶ್ ಸಾಂಗ್ಲೊ. ಮಾಧ್ಯಮಾಂ ಬದ್ಲ್ಲ್ಯಾತ್ ಪೂಣ್ ವಾಚನ್ ಉಣೆಂ ಜಾವಂಕ್ ನಾ, ಆನಿ ತಾಕಾ ಬಳ್ಗೆಂ ದಿವ್ಪಾಕ್ ಕೊಂಕ್ಣಿ ಭಾಶಾ ಮಂಡ್ಳಾನ್ ವಾಚನ್ ವಿಶ್ವ್ ಸುರು ಕೆಲಾ. ಕೊಂಕ್ಣಿ ವಾಚನ್ ವಿಶ್ವ್ ವ್ಯಾಸ್ಪಿಠಾ ಖಾಲಾ ಸಾದ್ರೀಕರಣ್, ಚರ್ಚಾ ಸತ್ರಾಂ, ಲೆಖ್ಕಾಂಚ್ಯೊ ಮುಲಾಖತಿ ಜಾತ್ಲ್ಯೊ ಅಶೆಂ ತಾಂಣಿ ಸಾಂಗ್ಲೆಂ.
ಹೆ ಕಾರ್ಯಾವಳೀಕ್ 180 ಪರಸ್ ಚಡ್ ಪ್ರೆಕ್ಷಕ್ ಗುಗಲ್ ಮೀಟ್ ವರ್ವಿಂ ಜೊಡಿಲ್ಲೆ, ತೆ ಭಾಯ್ರ್ ಫೆಸ್ಬೂಕಾಚೆರ್ ಪ್ರೆಕ್ಷಕ್ ಲಾಯ್ವ್ಹ್ ಆಶಿಲ್ಲೆ.
ಕಾರ್ಯಾವಳೀಚೆಂ ಸಂಯೊಜನ್ ಸೊನಿಯಾ ಗಡ್ಕಾರ್ ಜಾಲ್ಯಾರ್ ಉಪ್ಕಾರಾಚೆಂ ಉಲೊವ್ಪ್ ಪುರ್ವಾ ಗುಡೆ ಹಾಂಣಿ ಕೆಲೆಂ. ಶಲಾಕಾ ದೆಸಾಯ್ ಹಾಂಣಿ ಮುಖೆಲ್ ಸೊಯ್ರೆ ಜುಜೆ ಲೊರೆನ್ಸೊ ಹಾಂಚಿ ವಳಖ್ ಕೆಲಿ ಆನಿ ಸಬಿನಾ ಮುಲ್ಲಾ ಹಾಂಣಿ ವ್ಯಾಖ್ಯಾತೆ ಕಮಲ್ ಶರ್ಮಾ ಹಾಂಚಿ ವಳಖ್ ಕರೂನ್ ದಿಲಿ.
‘ವಜ್ರಲಿಖಣಿ’ ಚೆರ್ ಚರ್ಚಾ ಸತ್ರ್ 22 ಸಪ್ಟೆಂಬರಾಕ್ 2020 ದಿಸಾ ವಾಚನ್ ವಿಶ್ವಾಚಿ ಪಯ್ಲಿ ಕಾರ್ಯಾವಳ್ ಗುಗಲ್ ಮೀಟಾಚೆರ್ ಜಾತ್ಲಿ. ಕೊಂಕ್ಣೀಚೆ ಮ್ಹಾಪುರಸ್ ಶಣೈ ಗೊಂಯ್ಬಾಬ್ ಹಾಂಚ್ಯಾ ಬರ್ಪಾಂಚೆರ್ ಭಾಸಾಭಾಸ್ ಜಾತ್ಲಿ. ಲೆಖಕ್ ಶಾಂತಾರಾಮ್ ವಾಲಾವ್ಲೀಕಾರ್ ಹಾಂಣಿ ಸಂಪಾದೀತ್ ಕೆಲ್ಲ್ಯಾ ವಜ್ರಲಿಖಣಿ ಹ್ಯಾ ಪುಸ್ತಕಾಚೆರ್ ಹಿ ಕಾರ್ಯಾವಳ್ ಜಾತ್ಲಿ.
