सोबीत- म्होवे दीस [मनॊज कामत]

जिवीत मुकार गेल्लेपरिंच कवितेच्या थोड्याच उत्रांनी पाटीं ऊर‌ल्ल्या तेंपादल्या यादिंक संगीं व्हरुंक जायना तर‌यी एक बरो नियाळ काडची सकत ह्या कवितेंत दिसता. तो गांव ते गादे बेटां आनी कोसचीं जोतां घोळचे शेत्कार, कुल्कार आनी भाटकार सर्व दीस गेल्लेपरिंच हळतार माज्वोन वचोन आसा तें सर्व ह्या कवितेंत जिवें कर्चें प्रेतन कवीन केल्लें दिसून येता.

वृत्तेन शिक्षक जावनासचो बाब मनोज कामत ह्या कलेंत माहीर म्हणून ताचीं कविता वाचताना गमता. २०१८ इस्वेंत पयणारी आनी वीज हाणीं मांडून हाड‌ल्ल्या दे|विलफी रेबिंबस स्मारक राश्ट्रीय द्विलिपी कोंकणी साहितीक स्पर्ध्यांत हुमेदिचें इनाम आपणायिल्ली ही कविता वाचुंक आनी ताचो स्वाद चाकुंक तुका आपोवणें दितां.

[कविता] सोबीत- म्होवे दीस  [मनॊज कामत]

सोबीत- म्होवे दीस

म्हज्या गांवची याद

शेणिल्ल्या उगडासांचो सांगात

तरतरिल्ल्या शेतां- भाटांत

कुळवाड्यांचो कश्टी हात

पेटिल्लें आंगण

सारतल्लें शेण , शितोडो

विणिल्ली दाळी - हांतोर

उकड्या भातांत मारिल्लो चाळो

हांबेर घालपी गोरवां

तणाचे कुडे , भरे

रंवथ करतना

दुदाचे फुटपी झरे

हाण्यांतलें कडकडीत उदक

पेटिल्ल्या इंगळ्यांची भर

भाजिल्लीं कणगां ,धोणसां

काजूचे हुनहुनीत गर

अडुळशाच्या पाल्यान

देवपी ताप

कोडुलिंबू , किरायत्याची गुळी

थंडेक बसता चाप

शेतांतले दिफळे

किल्लल्लो तरवो-भात

रोपिल्ले थाम

पांचवेंचार ल्हारेवपी शेत

गाळींतले म्हुट्टे रोसाळ

गुंथिल्ली माळ हुसके देठार

साळीचे कांटे ,म्हातारे केंस

मोराचें पांख , हांसो ओंठार

सुपांतले आसडिल्ले तांदूळ

पाटले , करे, सुपल्यो

अोज्यानी भरिल्ले नाल्ल

आडसरांक मारिल्ल्यो तवल्यो

कोयते, कोयतुलां, व्हिळे

खोरीं, तासकुदळी, कुराडीं

माडा मुळांतलीं आळीं

उदका लोटांत बुडील्ली माडी

न्हयेंत मारिल्ल्यो बुचकळ्यो

गरयल्ल्यो खर्ची, मुड्डशो

सोदिल्लो थाव

नुस्त्यान तरतरील्ल्यो मानशो

माडाची पोंय

शेवकांक लायील्ली काती

व्हांवपी सूर, भरपी मडकें

कमराक दाबणो, कांतरां आनी जती

घरांचीं दारां

आडांब्यांचो आडोस

गांवांतले पसरे

पितुळच्या चावयांचो घोंस

कोंकायल्ले आंबे

कापे - रसाळ पणस

साकरिनाची गोडी

रसाळ म्होवाचें शिजता धोणस

पिकिल्ल्यो चिंचो

भाजील्ले चिंचारे

शिणशिणपी दांत

कांगांचो, ताबुलफळ्याचो सांगात

साननधापण्यांतलीं सान्नां

व्हिरांनी दोणे शिविल्लेे

उकडील्ले हीट, कालवांचें तोंडाक

रांदनीर सुरबूस शिजिल्लें

सुकत घाल्लीं आगळांतलीं सोलां

गुठयाचें काडिल्लें भिंडेल

आयककूंक उणें येतल्याक ओपार

नुस्तें तळपाक हेंच तेल

आंबे काडपी कोबलें

शेलावणें, शेल

आफोंस, कुलास, शावेर फेर्नांद

रुचीक तशेंच ते गोडा मेल

भुरगेपणांतले दीस

म्होंवे तशेंच सोबीत

गांवान सांबाळील्ली

गिरेस्त, उर्बेन भरील्ली रीत

- मनॊज कामत [अगॊस्त, २०१९]