(25 ಸೆಪ್ಟೆಂಬ್ರ್ 1897 -
6 ಜುಲಾಯ್ 1962)
ವಿಲಿಯಮ್ ಫಾಕ್ನರ್ (William Cuthbert Faulkner) ನೋಬೆಲ್ ಪುರಸ್ಕಾರ್ ಜೊಡ್ಪಿ ಅಮೆರಿಕಾಚೊ ಸಾಹಿತಿ. ಕಾದಂಬರಿ, ಮಟ್ವ್ಯೊ ಕಾಣ್ಯೊ, ಕವಿತಾ, ನಾಟ್ಕುಳೆ, ಫಿಲ್ಮಾಂಕ್ ಉತ್ರಾಂ ತಶೆಂಚ್ ಲೇಕನಾಂ ತಾಣೆಂ ಬರಯ್ಲ್ಯಾಂತ್.
ಮೂಳ್ ಕಾಣಿ: The Tall Men. ಕೊಂಕಣಿಂತ್: ದೀಗ್ ಮಾನಾಯ್
ತೆ ವ್ಹಡ್ ಜಯ್ತ್ ಕಾಳ್ಕ್ಯಾ ಕಾಪ್ಸಾ ಜಿನ್ನಚ್ಯಾ ಬಗ್ಲೆನ್ ಪಾಶಾರ್ ಜಾಲೆ. ಥಂಯ್ಸರ್ ತಾಣಿ ಲಾಂಪ್ಯಾಂವಾ ಉಜ್ವಾಡಾಚೆ ಘರಾನಿ ಏಕ್ ದಾಕ್ತೆರಾಚೆಂ ’ಕುಪೆ’ ಗೇಟಿಲಾಗಿಂ ರಾವಂವ್ಚೆಂ ಪಳೆಲೆಂ ಆನಿ ಶಿಕಾರೆ ಪೆಟ್ಯಾನಿಂ ಘೊಂಕ್ಚೇಯ್ ಆಯ್ಕಾಲೆಂ.
"ಆಮಿಂ ಪಾವ್ಲ್ಯಾಂವ್!" ಪ್ರಾಯ್ವಂತ್ ಡಿಪ್ಟಿ ಮಾರ್ಶಲಾನ್ ಮ್ಹಳೆಂ.
"ತೆಂ ಕೊಣಾಚೆಂ ಕಾರ್?" ವಿಚಾರ್ಲೆಂ ಮಾರ್ಶಲಾ ಪ್ರಾಸ್ ಉಣ್ಯಾ ಪ್ರಾಯೆಚ್ಯಾ, ಹ್ಯಾ ಜಾಗ್ಯಾರ್ ನವೊ ಜಾವ್ನಾಸ್ಚ್ಯಾ ಸರಕಾರಿ ಕಡ್ಡಾಯ್ ಸೈನ್ ಸೆವೆಚ್ಯಾ ತಪಾಸಣಾಧಿಕಾರಿನ್.
"ಡಾಕ್ಟರ್ ಶೋಫಿಲ್ಡಾಚೆಂ" ಮಾರ್ಶಲ್ ಸಾಂಗಾಲಾಗ್ಲೊ. "ಲೀ ಮೆಕಲಮ್ ಹಾಣೆ ಆಮಿಂ ಯೆತಾಂವ್ ಮ್ಹಣ್ ಫೊನ್ ಕೆಲ್ಲ್ಯಾ ವೆಳಾರ್ ತಾಕಾ ಧಾಡುಂಕ್ ಸಾಂಗ್ಲ್ಲೆಂ".
"ಮ್ಹಳ್ಯಾರ್ ತುಂವೆ ತಾಕಾ ಮುನ್ಸೂಚನ್ ದಿಲ್ಲೆಂಯ್?" ತಪಾಸಣಾಧಿಕಾರಿ ವಿಚಾರಿಲಾಗ್ಲೊ.
"ತುಂವೆ ಪಯ್ಲೆಂಚ್ ತ್ಯಾ ದೊಂಗಾಯ್ ಚೊರಾಂಕ್ ಹಾಂವ್ ವಾರಂಟ್ ಘೆವ್ನ್ ಯೆತಾಂ ಮ್ಹಣ್ ಫೊನ್ ಕೆಲ್ಲೆಂಯ್? ಆಶೆಂಗೀ ತುಂವೆ ಸಂಯುಕ್ತ್ ಆಮೇರಿಕಾ ಸರ್ಕಾರಾಚೊ ಆದೇಶ್ ಪಾಳ್ಚೊ?"
ಮಾರ್ಶಲ್ ಶಿರ್ಪುಟೊ, ನಿತಳ್ ಮಾತಾರೊ, ದುಮ್ಟಿ ತೋಂಡಾಂತ್ ಘೊಳಾವ್ನ್ ಆಸ್ಚೊ, ಹ್ಯಾಚ್ ಗಾಂವಾಂತ್ ಜಲ್ಮೊನ್ ವಾಡ್ಲ್ಲೊ.
"ಮಾಕಾ ಸಮ್ಜಾಲ್ಲೆ ಪರ್ಮಾಣೆ ಹ್ಯಾ ದೊಗೀ ಮೆಕಲಮ್ ಚೆರ್ಕ್ಯಾಂಕ್ ಬಂದಿ ಕರ್ನ್ ಶಹರಾಕ್ ವರ್ಚಿಚ್ ತುಜಿ ಆಲೋಚನ್" ತೊ ಮ್ಹಣಾಲೊ.
"ವ್ಹಯ್!" ತಪಾಸಣಾಧಿಕಾರಿನ್ ಮ್ಹಳೆಂ. "ಪುಣ್ ಆತಾಂ ತುಂವೆ ತಾಂಕಾ ಜಾಗ್ರುತ್ ಕರ್ನ್ ಪೊಳಾಪೊಳ್ ಕರ್ನ್ ಘೆಂವ್ಚೊ ಆವ್ಕಾಸ್ ದಿಲಾಯ್. ಹಾಚೆ ವರ್ವಿಂ ಸೈನಾಕ್ ಧಾಡ್ನ್ ತಾಂಕಾ ಕೈದ್ ಕರ್ನ್ ವರ್ಚೊ ಖರ್ಚ್ ತುಂವೆ ಸರ್ಕಾರಾಚೆರ್ ಘಾಲೊಯ್. ತುಂ ಖುದ್ದ್ ಎಕಾ ಕರಾರಾಖಾಲ್ ಆಸಾಯ್ ತೆಂ ತುಂ ವಿಸರ್ಲಾಯ್ ಕಿತೆಂ?"
"ನಾ, ಹಾಂವ್ ವಿಸ್ರೊಂಕ್ ನಾ" ಮಾರ್ಶಲಾನ್ ಮ್ಹಳೆಂ. "ಆನಿ ಜೆಫರ್ಸನ್ ಥಾವ್ನ್ ಭಾಯ್ರ್ ಸರ್ಲ್ಲೆ ಘಡಿಯೆ ಥಾವ್ನ್ ತುಂವೆಂಯ್ ವಿಸ್ರೊಂಕ್ ನ್ಹಜೊ ಜಾಲ್ಲೆ ತಸಲಿ ಸಂಗತ್ ಸಾಂಗ್ಚೆಂ ಪ್ರಯತ್ನ್ ಹಾಂವ್ ಕರಿತ್ತ್ ಆಸಾಂ. ಮಾಕಾ ದಿಸ್ತಾ, ಹೆ ಮೆಕಲಮ್ಚ್ ತುಜೆರ್ ಪರಿಣಾಮ್ ಘಾಲುಂಕ್ ಸಕ್ತೆಲೆ..... ತುಜೆಂ ಕಾರ್ ತ್ಯಾ ಕಾರಾ ಪಾಟ್ಲ್ಯಾನ್ ರಾವಯ್. ಪಯ್ಲ್ಯಾ ಸುವಾತೆರ್ ಕೋಣ್, ಕಿತ್ಲೊ ಅಸ್ವಸ್ಥ್ ಆಸಾ ತೆಂ ಪಳೆವ್ಯಾಂ".
ತಪಾಸಣಾಧಿಕಾರಿನ್ ಆಪ್ಲೆಂ ಕಾರ್ ತ್ಯಾ ದುಸ್ರ್ಯಾ ಕಾರಾ ಮ್ಹಣಾಸರ್ ವೆಲೆಂ. ಸ್ವಿಚ್ ಆಫ್ ಕರುನ್ ಲಾಯ್ಟ್ಯ್ ಬಂದ್ ಕೆಲೆ. "ಹೆ ಮನಿಸ್" ತಾಣೆ ಆಪ್ಲ್ಯಾ ಇತ್ಲ್ಯಾಕ್ ಮ್ಹಳೆಂ. ಉಪ್ರಾಂತ್ ತಾಣೆ ಚಿಂತ್ಲೆಂ; ಪುಣ್ ಹೊ ಅಶಕ್ತ್, ದುಮ್ಟಿ ಚಾಬೊನ್ ಆಸ್ಚೊ ಮಾತಾರೊಯ್ ತಾಂಚೆ ಪಯ್ಕಿ ಎಕ್ಲೊ, ತಾಚಾ ಹುದ್ದ್ಯಾಚೊ ಗೌರವ್ ಆನಿ ಅಭಿಮನಾ ವರ್ವಿಂ ತಾಣೆ ವಿಭಿನ್ನ್ ಆಸಾಜಾಯ್ ಆಸ್ಲ್ಲೆಂ. ದೆಕುನ್ ತೊ ವ್ಹಡ್ಲ್ಯಾನ್ ಉಲಯ್ಲೊ ನಾ. ಕಾರಾಚ್ಯೊ ಚಾವಿಯೊ ಕಾಡ್ನ್, ಕಾರಾ ಭಾಯ್ರ್ ಯೇವ್ನ್ ಜನೆಲಾಂ ವಯ್ರ್ ಕರ್ನ್ ಬೀಗ್ ಘಾಲ್ತಾನಾ ಚಿಂತುಂಕ್ ಲಾಗ್ಲೊ. ಹೆ ಮನಿಸ್, ಪರಿಹಾರ್ ರುಪಾರ್ ಮೆಳ್ಚ್ಯಾ ಕಾಮಾಖಾತಿರ್, ಜಾಗ್ಯಾ ಆನಿ ಆಸ್ತಿಚ್ಯಾ ಮಾಲಕ್ಪಣಾ ವಿಶಾಂತ್ ಫಟ್ ಮಾರ್ತಾತ್ ಯಾ ಲಿಪಯ್ತಾತ್. ಪರಿಹಾರ್ ಕಾರ್ಯೆಂ ಕರ್ಚೆ ವಿಶಾಂತ್ ಹಾಂಕಾ ಕಾಂಯ್ಚ್ ಹುಮೆದ್ ನಾ. ಅನಿ ಹೆ ತಾಂಚ್ಯಾಚ್ ಕಾಮೆಲಿ ಸಂವಿಧಾನಿಕ್ ಹಕ್ಕಾ ವಿರೋಧ್, ಕ್ಷುಲ್ಲಕ್ ಆನಿ ಪಾರದರ್ಶಕ್ ಅಪ್ರಾಮಾಣಿಕ್ಪಣಾನ್ ಇಲ್ಲೆಶಾ ಲಾಭಾಖಾತಿರ್ ಆಪಾಯಕ್ ಒಳಗ್ ಜಾಂವ್ಕ್ ತಯಾರ್ ಆಸಾತ್ ಆನಿ ಥೊಡ್ಯಾಚ್ ಫುಕ್ಕಟ್ ಖಾಣ್ ಆನಿ ಉಂದ್ರಾಚ್ಯಾ ಬಿಳಾ ಸಾರ್ಕೊ ಜಾಗೊ ಶಹರಾಂತ್ ಮೆಳ್ಚೆ ಖಾತಿರ್ ಆಸಲೆಂ ಕಾಮ್ ಸೊಡುಂಕ್, ಕ್ರಷಿಕ್ ಜಾಂವ್ನಾಸೊನ್ಯ್ ಆದಾಯ್ ಆನಿ ಖರ್ಚಾಚೆಂ ಚೂಕ್ ಲೇಖ್ ದೀವ್ನ್, ವೊಂಪಿಯಾಂ ಲೋನ್ ಘೆವ್ನ್ ಉಪ್ರಾಂತ್ ದುರುಪಯೋಗ್ ಕರ್ನ್, ಶಿರ್ಕೊನ್ ಪಡ್ತಾನಾ ಆಜಾಪ್ ಜಾಲ್ಲೆಪರಿಂ ವ್ಹಡ್ ತಾಳ್ಯಾನ್ ಗಾಳಿ-ಸೊವ್ಯಾನಿಂ ಪ್ರತಿಕ್ರೀಯಾ ದಾಕಾಯ್ತಾತ್. ಆನಿ ಉಪ್ರಾಂತ್ ಹ್ಯಾ ವರ್ವಿ ಕಷ್ಟಾರ್ ಪಡ್ಲ್ಲ್ಯಾ ಸರ್ಕಾರಾನ್ ತಾಂಚೆಲಾಗಿಂ ಭೆಷ್ಟಿ ಏಕ್ ಲ್ಹಾನ್ ಸಂಗತ್, ಮ್ಹಣ್ಜೆ ತಾಂಚಿ ನಾಂವಾಂ ಸೈನಾಕ್ ಭರ್ತಿ ಜಾಂವ್ಚ್ಯಾ ಲಿಸ್ಟಿರ್ ಘಾಲುಂಕ್ ವಿಚಾರ್ಲ್ಯಾರ್ ತೆ ನೆಗಾರ್ತಾತ್.
ಪ್ರಾಯ್ವಂತ್ ಮಾರ್ಶಲ್ ಚಲತ್ತ್ ಆಸ್ಲ್ಲೊ. ತಪಾಸಣಾಧಿಕಾರಿ ತಾಚಾ ಪಾಟ್ಲ್ಯಾನ್ ವೊಯೆ ಮಧೆಂ ಆಸ್ಚ್ಯಾ ಗೇಟಿ ಭಿತರ್ ದೋನ್ ದುರ್ಬಲ್ ದೇವದಾರ್ ರೂಕಾಚೆ ಸಾಲಿ ಮಧೆಂ ಆಸ್ಚ್ಯಾ ಮೊಟ್ಯಾ ಇಟ್ಯಾಂಚೆ ವೊಣದಿ ಥಾವ್ನ್ ಅವ್ಯವಸ್ಥಿತ್ ತಸೆಂಚ್ ಪೈಂಟ್ ನಾತ್ಲ್ಲ್ಯಾ ವಿಸ್ತಾರ್ ದೋನ್ ಮಾಳಿಯೆಂಚ್ಯಾ ಮಂದ್ ಉಜ್ವಾಡ್ ಆಸ್ಚ್ಯಾ ಉಗ್ತ್ಯಾ ಹೊಲಾಕ್ ಪಾವ್ಲೆ. ಸಕಯ್ಲಿ ಮಾಳಯ್ ರೂಕಾ ಕುಡ್ಕ್ಯಾನಿಂ ಬಾಂದ್ಲ್ಲೆಬರಿಂ ತಾಕಾ ದಿಸ್ಲೆಂ. ತಾಣೆ ಮೊಟ್ಯಾ ರಂಗ್ ನಾತ್ಲ್ಲ್ಯಾ ಗ್ಯಾಲರಿಚ್ಯಾ ತಿಶಿಲ್ಯಾ ಪೊಂತಾರ್ ಲಾಪ್ಯಾಂವಾ ಉಜ್ವಾಡಾನ್ ಭರ್ಲ್ಲೆಂ ಏಕ್ ಹಾಲ್ ಪಳೆಲೆಂ. ಅನಿ ಸಕಯ್ಲ್ ಥಾವ್ನ್ ತಾಣಿ ಪಳೆಲ್ಲೊ ತೊ ಶಿಕಾರೆ ಪೆಟೊ ಘೊಂಕಿತ್ತ್ ತಾಂಚೆ ಮುಖಾರ್ ಯೇವ್ನ್ ರಾವ್ಲೊ. ಘರಾ ಭಿತರ್ ಯೇವ್ನ್ ಎಕಾ ವ್ಯಕ್ತಿಚೊ ತಾಳೊ ತಾಚೆಲಾಗಿಂ ಉಲಯ್ತಾ ಮ್ಹಣಾಸರ್ ತಾಣೆಂ ತಾಂಕಾ ಆಡಾವ್ನ್ ಧರ್ಲೆಂ.
ತೊ ಗ್ಯಾಲರಿಚ್ಯಾ ಮೆಟಾಂ ಮ್ಹಣಾಸರ್ ಮಾರ್ಶಲಾಚ್ಯಾ ಪಾಟ್ಲ್ಯಾನ್ ಗೆಲೊ. ಥಂಯ್ ಸುಮಾರ್ ೪೦-೪೫ ವರ್ಸಾಂಚೊ ವ್ಯಕ್ತಿ ಬಾಗ್ಲಾಲಾಗಿಂ ತಾಂಕಾ ರಾಕೊನ್ ಆಸ್ಲ್ಲೊ ತಾಕಾ ದಿಸ್ಲೊ. ಹೊ ಮನಿಸ್ ಲಾಂಬ್ ದೀಗ್ ನ್ಹಯ್ ತರೀ, ಘಟ್ಮೂಟ್, ಕಂದು ರಂಗಾಚೊ, ಶಾಂತ್ ಮುಖಾಮಳಾಚೊ ಕಾಮೆಲಿ ಜಾವ್ನಾಸ್ಲ್ಲೊ. ತಾಣೆಂ ಹಾಕಾ ಮಟ್ವ್ಯಾನ್, ತೀಕ್ಷ್ಣ್ ದಿಷ್ಟಿನ್ ಪಳೆಲೆಂ ಆನಿ ಮಾರ್ಶಲಾ ಲಾಗಿಂ "ಕಿತೆಂಗಾ, ಗೋಂಬಾಲ್ಟ್, ಭಿತರ್ ಯೆ" ಮ್ಹಣಾಲೊ.
"ಕಿತೆಂಗಾ, ರಾಫೆ" ಮಾರ್ಶಲಾನ್ ವಿಚಾರ್ಲೆಂ "ಕೋಣ್ ಅಶ್ವಸ್ಥ್ ಆಸಾ?"
"ಬಡ್ಡಿ" ದುಸ್ರ್ಯಾನ್ ಮ್ಹಳೆಂ "ಆಜ್ ದೊನ್ಪರಾಂ ನಿಸ್ರೊನ್ ಹ್ಯಾಮ್ಮರ್ ಮಿಲ್ಲಾಂತ್ ತಾಚೊ ಪಾಯ್ ಶಿರ್ಕಾಲೊ"
"ಸ್ಥಿತಿ ಪಾಡ್ ಆಸಾಗೀ?" ಮಾರ್ಶಲ್ ವಿಚಾರಿ.
"ಮಾಕಾ ಪಾಡ್ ಆಸಾ ತಸೆಂ ದಿಸ್ತಾ" ದುಸ್ರ್ಯಾನ್ ಮ್ಹಳೆಂ "ದೆಕುನ್ ಆಮಿಂ ತಾಕಾ ಶಹರಾಕ್ ವರ್ಚ್ಯಾ ಬದ್ಲಾಕ್ ದಾಕ್ತೆರಾಕ್ಚ್ ಆಪಯ್ಲೆಂ. ರಗಾತ್ ರಾವಂವ್ಕ್ ಆಮ್ಚ್ಯಾನ್ ಜಾಲೆನಾಂ".
"ಹೆಂ ಆಯ್ಕೊನ್ ಮಾಕಾ ಬೆಜಾರ್ ಜಾತಾ", ಮಾರ್ಶಲ್ ಮ್ಹಣಾಲೊ. "ಹೊ ಮಿಸ್ಟರ್ ಪಿಯರ್ಸನ್" ಪರ್ತುನ್ ತಪಾಸಣಾಧಿಕಾರಿಕ್ ತ್ಯಾ ಮನ್ಶ್ಯಾನ್ ಆಪ್ಣಾಕ್ ಪಳೆಂವ್ಚೆಂ ದಿಸ್ಲೆಂ. ತ್ಯಾ ಮನ್ಶ್ಯಾಚೆ ಕಂದು ರಂಗಾಚೆ ಶಾಂತ್ ತರೀ ಸೌಜನ್ಯಶೀಲ್ ದೊಳೆ, ಹಾತ್ ಘಟ್ ತರೀ ಧರ್ತಾನಾ ದುರ್ಬಲ್ ಅನಿ ಥಂಡ್. ಮಾರ್ಶಲ್ ಉಲಯಿತ್ತ್ ಆಸ್ಲ್ಲೊ, "ಜಾಕ್ಸನಾ ಥಾವ್ನ್, ಕಡ್ಡಾಯೆಚ್ಯಾ ಸೈನ್ ಸೆವೆ ಬೋರ್ಡಾ ಥಾವ್ನ್ ಆಯ್ಲಾ", ಆಶೆಂ ಮ್ಹಣ್ತಾನಾ ಮಾರ್ಶಲಾಚ್ಯಾ ತಾಳ್ಯಾಂತ್ ಫರಕ್ ಆಸಾ ಮ್ಹಣ್ ತಪಾಸಣಾಧಿಕಾರಿಕ್ ಸುಸ್ತಾಲೆನಾ.
ತಪಾಸಣಾಧಿಕಾರಿಕ್ ಖಂಯ್ಸರ್ಯ್ ಕಸಲಿಚ್ ಬದ್ಲಾವಣ್ ದಿಸ್ಲಿನಾ. ತಾಚಾ ಹಾತಾಂತ್ ಆಸ್ಲ್ಲೊ ದುರ್ಬಲ್ ಹಾತ್ ತ್ಯಾ ವ್ಯಕ್ತಿನ್ ಪಾಟಿಂ ಕಾಡ್ಲೊ. ಆತಾಂ ತೆಂ ಶಾಂತ್ ಮುಖಮಳ್ ಮಾರ್ಶಲಾ ಕುಶಿನ್ ಘುಂವ್ಲೆಂ.
"ಮ್ಹಣ್ಜೆ ಝುಜ್ ಸುರುಗೀ"?
"ನಾ", ಮಾರ್ಶಲಾನ್ ಮ್ಹಳೆಂ.
"ಸವಾಲ್ ತೆಂ ನ್ಹಯ್ ಮಿ. ಮೆಕಲಮ್" ತಪಾಸಣಾಧಿಕಾರಿ ಉಲಯ್ಲೊ. "ತಾಣಿ ನೊಂದುಕ್ ಕರ್ಚೆಂ ಗರ್ಜೆಚೆಂ. ಹ್ಯಾ ಪಾವ್ಟಿಂ ತಾಂಚಿ ನಾಂವಾಂ ಯೆಂವ್ಚಿ ಸಾಧ್ಯತಾ ಉಣಿ. ಸರಾಸರ್ ನಿಯಾಮಾಂ ಪರ್ಮಾಣೆ ನೊಂದುಕ್ ಕರುಂಕ್ ಇನ್ಕಾರ್ ಕೆಲ್ಲ್ಯಾನ್ ತೆ ಸಲ್ವಲೆ".
"ವ್ಹಯ್ಗೀ?" ದುಸ್ರ್ಯಾನ್ ಮ್ಹಳೆಂ. ತೊ ತಪಾಸಣಾಧಿಕಾರಿ ಕುಶಿನ್ ಪಳೆನಾತ್ಲೊ. ಮಾರ್ಶಲಾ ಲಾಗಿಂ ಉಲಯ್ತಾಲೊ ತರೀ, ಮಾರ್ಶಲಾ ಕುಶಿನ್ ಪಳೆತಾಗೀ, ಮ್ಹಳ್ಳೆಂ ಸಾಂಗೊಂಕೀ ತಪಾಸಣಾಧಿಕಾರಿಕ್ ಸಾಧ್ಯ್ ನಾತ್ಲ್ಲೆಂ. "ಬಡ್ಡಿಕ್ ಪಳೆಂವ್ಕ್ ಜಾಯ್ಗೀ? ಆತಾಂ ತಾಚೆಲಾಗಿಂ ದಾಕ್ತೆರ್ ಅಸಾ".
’ರಾವ್’, ತಪಾಸಣಾಧಿಕಾರಿ ಮ್ಹಣಾಲೊ "ತುಜ್ಯಾ ಭಾವಾಚಾ ಆವ್ಘಡಾ ವಿಶಾಂತ್ ಮಾಕಾ ದೂಕ್ ಭಗ್ತಾ; ಪುಣ್ ಹಾಂವ್....." ಮಾರ್ಶಲಾನ್ ಆಪ್ಲ್ಯೊ ದಾಟ್ ಭಿಸುಳ್ಯೊ ಭವ್ಯೊ ಪಾಪ್ಡುನ್, ವಿನಯ್ಪೂರ್ವಕ್ ತರೀ, ಸಹನ್ ನಾತ್ಲ್ಲ್ಯಾ ದಿಷ್ಟಿನ್ ತಪಾಸಣಾಧಿಕಾರಿಕ್ ಏಕ್ ಘಡಿ ಪಳೆಲೆಂ. ಆನಿ ತಪಾಸಣಾಧಿಕಾರಿಕ್ ತ್ಯಾ ದುಸ್ರ್ಯಾ ಮನ್ಶಾಚ್ಯಾ ಕ್ಷಣಿಕ್ ದಿಷ್ಟಿ ಪಾಟ್ಲ್ಯಾನ್ ಉರ್ಲ್ಲ್ಯಾಂಚ್ಯಾ ಮುಖಮಳಾರ್ ಆಸ್ಲ್ಲೊಚ್ ಭಾವ್ ಝಳ್ಕಲೊ. ತಪಾಸಣಾಧಿಕಾರಿ ಸರಾಸರ್ ಥಾವ್ನ್ ಥೊಡೊ ಚಡ್ ಬುದ್ವಂತ್ ಆಸ್ಲ್ಲೊ ಜಾಲ್ಲ್ಯಾನ್, ತಾಕಾ ಹಾಂಗಾಸರ್ ಆಸ್ಚೆಂ ವಾತಾವರಣ್ ಆಪ್ಣೆಂ ಚಿಂತ್ಲ್ಲ್ಯಾ ಪ್ರಾಸ್ ವಿಂಗಡ್ ಆಸಾ ತೆಂ ಸುಸ್ತಾಲೆಂ. ಪೂಣ್ ಸಭಾರ್ ವರ್ಸಾಂ ಥಾವ್ನ್ ಸರ್ಕಾರಿ ಪರಿಹಾರ್ ಕಾರ್ಯಾಂತ್ ಆಸೊನ್ ಗಾಂವ್ಟಿ ಮನ್ಶ್ಯಾಂ ಲಾಗಿಂ ಹೆಳ್ಲ್ಲ್ಯಾ ವರ್ವಿಂ, ಆಪುಣ್ ತಾಂಕಾ ಸಮಾ ವೊಳ್ಕತಾಂ ಮ್ಹಳ್ಳಿ ತಾಚಿ ಪಾತ್ಯೆಣಿ. ದೆಕುನ್, ಮಾತಾರ್ಯಾ ಮಾರ್ಶಲಾ ಕೂಶಿನ್ ಘುಂವೊನ್ ತೊ ಚಿಂತಿಲಾಗ್ಲೊ; ವ್ಹಯ್, ಸಗ್ಳೆ ಎಕಾಚ್ ಕಾಸ್ತಾಚೆ, ಹುದ್ದ್ಯಾಚೊ ಅಧಿಕಾರ್ ಆನಿ ಜವಾಬ್ದಾರಿ ಮಾರ್ಶಲಾಕ್ ಬದ್ಲುಂಕ್ ಸಕ್ಲಿನಾ. ಪರ್ತುನ್ ಚಿಂತುನ್, ಹೆ ಮನಿಸ್, ಹೆ ಮನಿಸ್, "ಆಜ್ ಜಾಕ್ಸನಾಕ್ ವೆಚೆಂ ರಾತಿಂಚೆ ಟ್ರೈನ್ ಘೆಂವ್ಚೊ ಮ್ಹಜೊ ನಿರ್ಧಾರ್" ತೊ ಮ್ಹಣಾಲೊ. "ಮ್ಹಜಿ ಸಿಟ್ ಯೆದೊಳ್ಚ್ ಆಮಾನತ್ ಜಾಲ್ಯಾ, ವಾರಂಟ್ ದಿ ಅನಿ ಆಮಿಂ ಚಲ್ಯಾಂ".
"ಮ್ಹಜೆ ಸಾಂಗಾತಾ ಯೆ" ಪ್ರಾಯ್ವಂತ್ ಮಾರ್ಶಲ್ ಮ್ಹಣಾಲೊ, "ಆಮ್ಚೆಲಾಗಿಂ ಮೊಸ್ತು ವೇಳ್ ಆಸಾ".
ತಾಣೆ ಪಾಟ್ಲಾವ್ ಕೆಲೊ. ಆಪ್ಣಾ ವಯ್ರ್ ಯಾ ಪರಿಸ್ಥಿತೆ ವಯ್ರ್ ನಿಯಂತ್ರಣ್ ಕರ್ಚೆ ಖಾತಿರ್ ರಾಗ್ ಕರ್ನ್, ಬೊಬಾಟ್ ಘಾಲ್ನ್ ಪ್ರಯೊಜನ್ ನಾ. ಆನಿ ಎಕಾವೆಳಾ ಪರಿಸ್ಥಿತಿ ಸಾಂಬಾಳಿಜಾಯ್ ತರ್ ತಾಣೆಂಚ್ ಕ್ರಮ್ ಹಾತಿಂ ಘೆಜಾಯ್; ಕೈದಿಂಕ್ ವೆಗಿಂಚ್ ಥಂಯ್ ಥಾವ್ನ್ ವರಿಜಾಯ್ ಜಾಲ್ಯಾರ್ ಆಪ್ಲ್ಯಾಚ್ ಅಧಿಕಾರಾನ್ ಶಿವಾಯ್, ಮಾತಾರೊ ಮಾರ್ಶಲ್ ಹ್ಯಾ ದಿಶೆನ್ ಕಿತೆಂಚ್ ಕರ್ಚೊನಾ ಮ್ಹಳ್ಳಿ ಸಮ್ಜೊಣಿ ತಾಕಾ ಎದೊಳ್ಚ್ ಆಯಿಲ್ಲಿ. ಹೊ ದುರ್ಬಲ್ ಪ್ರಾಯ್ವಂತ್ ಅಫಿಸರ್ ಹಾಂಚೆ ಪಯ್ಕಿ ನಿಮಾಣೊ ಮಾತ್ರ್ ನ್ಹಯ್, ಹ್ಯಾ ಘರಾ ಭಿತರ್ ರಿಗ್ಲ್ಲೆ ವರ್ವಿಂಚ್ ಆಪ್ಲಿ ಆದ್ಲಿ ಸ್ವಾಭಾವಿಕ್ ಆಳ್ಸಾಯ್ ಆನಿ ಆವಿಸ್ವಾಸ್ಪಣಾಚಾ ಭ್ರಷ್ಟಾಚಾರಾಕ್ ಸಾಂಪ್ಡಾಲ್ಲೊ ತಶೆಂ ದಿಸ್ತಾಲೆಂ. ಆಶೆಂ ತಾಚಾ ಪಾಟ್ಲ್ಯಾನ್ಂಚ್ ಸಕಯ್ಲ್ಯಾ ಹೊಲಾಂತ್ಲ್ಯಾ ಬೆಡ್ರೂಮಾಕ್ ಪಾವೊನ್ ಆಜಾಪಾನ್ ಆನಿ ಎಕಾ ರಿತಿಚ್ಯಾ ಭಿಂಯಾನ್ ತಾಣೆ ಭಂವ್ತಿಂ ಪಳೆಲೆಂ - ವ್ಹಡ್ಲೆಂ ಸಯ್ತ್ ಕೂಡ್, ಖಾಲಿಚ್ ಪೈಂಟ್ ನಾತ್ಲ್ಲಿ ಧರ್ಣ್, ಖಾಟಿಯೆಲಾಗಿಂ ಏಕ್ ಯಾ ದೋನ್ ಕದೆಲಾಂ, ಸಾಂಗಾತಾ ಆನ್ಯೇಕ್ ಪರ್ನ್ಯಾ ಜಿನ್ಸಾಚಿ ರುಕಾಡಾಚಿ ವಸ್ತ್. ಪುಣ್ ತಪಾಸಣಾಧಿಕಾರಿಕ್ ಥಂಯ್ಸರ್ ಎದೊಳ್ಚ್ ಭೆಟ್ಲ್ಲ್ಯಾ ಮನ್ಶ್ಯಾ ಸಾರ್ಕೆ ಆಸಾಧರಣ್ ಮನಿಸ್ ಭರೊನ್ ವೊಣ್ತಿ ಫುಗ್ತಾತ್ ತಸೆಂ ಭಗ್ಲೆಂ. ತೆ ಲಾಂಬ್ದೀಗ್, ಬಳ್ವಂತ್ ಯಾ ಉತ್ಸಾಹ್ಪೂರ್ಣ್ ನಾತ್ಲ್ಲೆ. ಕಾಂಯ್ ಆವಾಜ್ನಾಸ್ತಾಂ ಶಾಂತ್ ಸ್ವಭಾವಾನ್ ಬಾಗ್ಲಾರ್ ಆಸ್ಚ್ಯಾ ತಾಕಾಚ್ ಪಳೆತಾಲೆ. ತಾಂಚಿ ತೋಂಡಾ ತದ್ರೂಪ್, ರಗ್ತಾ ಸಂಬಂಧಾಚಿ ಮ್ಹೊರ್ ಮಾರ್ಲ್ಲ್ಯಾ ಭಾಸೆನ್ ದಿಸ್ತಾಲಿಂ. ಎಕ್ಲೊ ಬಾರಿಕ್, ಅಶಕ್ತ್ ಸತ್ತರ್ ವರ್ಸಾಂಚೊ ಮಾತಾರೊ, ಸಕ್ಡಾಂ ಪ್ರಾಸ್ ಇಲ್ಲೊ ಲಾಂಬ್; ದುಸ್ರೊ ಕೇಸ್ ಪಿಕೊಂಕ್ ನಾಂತ್ ತರೀ, ಬಾಗ್ಲಾರ್ ಮೆಳ್ಲ್ಲ್ಯಾ ವ್ಯಕ್ತಿಬರಿಂಚ್ ದಿಸ್ಚೊ, ತಿಸ್ರೊ ತಾಂಕಾ ಪಯ್ಲೆಂ ಮೆಳ್ಲ್ಲ್ಯಾ ಮನ್ಶ್ಯಾ ಸಾರ್ಕೊ; ತೊಂಡಾರ್ ನಾಜೂಕ್ ತರೀ ತಾಚಾ ತ್ಯಾ ದೊಳ್ಯಾನಿಂ ಕಿತೆಂಗೀ ದುರಂತ್ ಆನಿ ಉದ್ರಿಕ್ತ್; ಆನಿ ದೋಗ್ ಖರ್ಯಾನ್ ತದ್ರೂಪ್ ನಿಳ್ಶ್ಯಾ ದೊಳ್ಯಾಂಚೆ ತರ್ನಾಟೆ; ಆನಿ ಅಕ್ರೇಕ್ ಖಾಟ್ಯೆ ವಯ್ರ್ ಆಸ್ಲ್ಲೊ ನಿಳ್ಶ್ಯಾ ದೊಳ್ಯಾಂಚೊ ವ್ಯಕ್ತಿ; ಜಾಚೆ ವಯ್ರ್ ಬರೊ ಸೂಟ್ ನೆಸ್ಲ್ಲೊ ಶಹರಾಚೊ ದಾಕ್ತೆರ್ ಬಾಗ್ವೊನ್ ಆಸ್ಲ್ಲೊ. ತಾಣಿ ಸರ್ವಾಂನಿ ತಪಾಸಣಾಧಿಕಾರಿ ಆನಿ ಮಾರ್ಶಲ್ ಭಿತರ್ ರಿಗ್ತಾನಾ ಘುಂವೊನ್ ಪಳೆಲೆಂ. ದಾಕ್ತೆರಾ ಬಗ್ಲೆನ್ ಬೆಡ್ಡಾವಯ್ರ್ ಪಿಂಜ್ಲ್ಲ್ಯಾ ಪೆಂಟಾ ಮಧೆಂ ಭೆಸಾಂ ಜಾಲ್ಲೊ, ರಗ್ತಾನ್ ಬುಡ್ಲ್ಲೊ ಪಾಯ್ ಪಳೆವ್ನ್ ತಾಕಾ ಆಡ್ವಳೊನ್ ಆಯಿಲ್ಲೆಬರಿ ಭಗ್ಲೆಂ. ತಪಾಸಣಾಧಿಕಾರಿ ಬಾಗ್ಲಾ ಭಿತರ್ ಸರ್ನ್ ಥಂಯ್ಚ್ ರಾವ್ಲೊ. ಮಾರ್ಶಲ್ ಖಾಟ್ಯೆರ್ ನಿದ್ಲ್ಲ್ಯಾ ಮನ್ಶ್ಯಾ ಸರ್ಶಿಂ ಗೆಲೊ- ತೊ ಮನಿಸ್ ಪೈಪ್ ವೊಡ್ತಾಲೊ. ಆನಿ ತಾಚಾ ಖಾಟ್ಯೆಲಾಗ್ಸಿಲ್ಯಾ ಮೆಜಾರ್ ತಪಾಸಣಾಧಿಕಾರಿನ್ ಆಪ್ಲ್ಯಾ ಆಬಾನ್ ದವರ್ಚೆ ವಿಸ್ಕೆಚಾ ಬೊತ್ಲಿಬರಿಂ ವೋಳ್ಲ್ಲ್ಯಾ ವಾಲಿನಿಂ ಗುಟ್ಲಾಯಿಲ್ಲಿ ಬೊತ್ಲ್ ಪಳೆಲಿ.
"ಬಡ್ಡಿ" ಮಾರ್ಶಲ್ ಮ್ಹಣಾಲೊ "ಹಿ ಸಂಗತ್ ಪಾಡ್".
"ಹಾಂ ನ್ಹಯ್, ಹಿ ಮ್ಹಜಿಚ್ ಚೂಕ್" ಖಾಟ್ಯೆ ವಯ್ಲ್ಯಾ ಮನ್ಶ್ಯಾನ್ ಮ್ಹಳೆಂ "ಸ್ಟುವರ್ಟಾನ್ ಮಾಕಾ ಹಾಂವೆ ವಾಪಾರ್ಚ್ಯಾ ಫ್ರೇಮಾವಿಶಿಂ(ನಕ್ಷ್ಯಾ ಸೊಡೊಂವ್ಕ್ ವಾಪಾರ್ಚೆಂ ಪೊಳೆಂ) ವಿಶಾಂತ್ ಸಾಂಗ್ಲ್ಲೆಂ".
"ಹೆಂ ಖರೆಂ" ದುಸ್ರ್ಯಾ ಪ್ರಾಯ್ವಂತಾನ್ ಮ್ಹಳೆಂ. ತರೀ ಉರ್ಲ್ಲ್ಯಾನಿಂ ಕಾಂಯ್ಚ್ ಸಾಂಗ್ಲೆನಾ. ತೆ ಏಕ್ ಸಾರ್ಕೆ, ಶಾಂತ್ ರಿತಿನ್ ತಪಾಸಣಾಧಿಕಾರಿಕ್ ಪಳೆವ್ನ್ ಆಸ್ಲ್ಲೆ. ಮಾರ್ಶಲ್ ಇಲ್ಲೊ ಘುಂವೊನ್ ಮ್ಹಣಾಲೊ "ಹೊ ಪಿಯರ್ಸನ್, ಜಾಕ್ಸನಾ ಥಾವ್ನ್ ಆಯ್ಲಾ. ತಾಚೆಲಾಗಿಂ ಚೆಡ್ಯಾಂಕ್ ವಾರಂಟ್ ಆಸಾ".
ತವಳ್ ಖಾಟ್ಯೆರ್ ಆಸ್ಲ್ಲ್ಯಾನ್ ವಿಚಾರ್ಲೆಂ "ವಾರಂಟ್ ಕಿತ್ಯಾಕ್?"
"ಕಡ್ಡಾಯ್ ಸೈನ್ ಸೆವೆ ವಿಶಾಂತ್ ಬಡ್ಡಿ" ಮಾರ್ಶಲ್ ಮ್ಹಣಾಲೊ.
"ಆಮಿಂ ಆತಾಂ ಝುಜಾ ಸ್ಥಿತೆರ್ ಆಸಾಂವ್ವೇ?" ಖಾಟ್ಯೆ ವಯ್ಲ್ಯಾ ವ್ಯಕ್ತಿನ್ ವಿಚಾರ್ಲೆಂ.
"ನಾ", ಮ್ಹಣಾಲೊ ಮಾರ್ಶಲ್ "ಹೆಂ ಆತಾಂಚೆ ನವೆಂ ಕಾನೂನ್, ತಾಣಿ ನೋಂದಣ್ ಕರುಂಕ್ ನಾ".
"ತಾಂಕಾ ತುಮಿಂ ಕಿತೆಂ ಕರ್ತಾತ್?"
"ಹೆಂ ವಾರಂಟ್ ಬಡ್ಡಿ"
"ತಸೆಂ ಮ್ಹಳ್ಯಾರ್ ಜಯ್ಲ್"
"ಹೆಂ ಏಕ್ ವಾರಂಟ್ ಮಾತ್ರ್" ಪ್ರಾಯ್ವಂತ್ ಮಾರ್ಶಲ್ ಮ್ಹಣಾಲೊ. ತೆದ್ನಾಂ ತಪಾಸಣಾಧಿಕಾರಿನ್ ಪೈಪ್ ವೋಡ್ನ್ ಆಸ್ಚೊ ಖಾಟ್ಯೆ ವಯ್ಲೊ ವ್ಯಕ್ತಿ ಆಪ್ಣಾಕ್ ಪಳೆವ್ನ್ ಆಸಾ ತೆಂ ದೆಕ್ಲೆಂ.
"ಮಾಕಾ ಥೊಡಿ ವಿಸ್ಕಿ ವೋತ್ ಜಾಕ್ಸನ್" ತಾಣೆ ಮ್ಹಳೆಂ.
"ನಾಕಾ" ದಾಕ್ತೆರ್ ಸಾಂಗಾಲಾಗ್ಲೊ "ತುಂವೆ ಎದೊಳ್ಚ್ ಚಡ್ ಘೆತ್ಲ್ಯಾಯ್".
"ಮಾಕಾ ಇಲ್ಲಿ ವಿಸ್ಕಿ ವೋತ್ ಜಾಕ್ಸನ್" ಖಾಟ್ಯೆ ವಯ್ಲ್ಯಾ ವ್ಯಕ್ತಿನ್ ತಿಕ್ಕೆ ಜೋರಾನ್ ಮ್ಹಳೆಂ.
ತೊ ತಪಾಸಣಾಧಿಕಾರಿಕ್ ಪಳೆವ್ನ್ ಪೈಪ್ ವೊಡಿತ್ತ್ ಆಸ್ಲ್ಲೊ, "ತುಂ ಸರ್ಕಾರಾ ತರ್ಫೆನ್ ಆಯ್ಲಾಯ್"? ತಾಣೆಂ ವಿಚಾರ್ಲೆಂ.
"ವ್ಹಯ್" ತಪಾಸಣಾಧಿಕಾರಿನ್ ಮ್ಹಳೆಂ "ತಾಣಿಂ ನೋಂದಣ್ ಕರಿಜಾಯ್ ಅಸ್ಲ್ಲೆಂ, ತಿತ್ಲೆಂಚ್ ಸದ್ದ್ಯಾಕ್ ಪುರೊ ಆಸ್ಲ್ಲೆಂ, ಪುಣ್ ತಾಣಿಂ ಕೆಲೆನಾ....". ಆಕಸ್ಮಾತ್ ತಾಚೊ ತಾಳೊ ರಾವ್ಲೊ ಕಿತ್ಯಾಕ್ ಸಾತ್ ಜೊಡಿ ದೊಳೆ ತಾಚೆ ವಯ್ರ್ಚ್ ಖಂಚೊನ್ ಆಸ್ಲ್ಲೆ ಆನಿ ಖಾಟ್ಯೆವಯ್ಲೊ ವ್ಯಕ್ತಿ ಪೈಪ್ ವೊಡಿತ್ತ್ ಆಸ್ಲ್ಲೊ.
"ಆಮಿಂ ಥಂಯ್ಸರ್ ಯೆತೆ ಆಸ್ಲ್ಲ್ಯಾಂವ್" ಖಾಟ್ಯೆವಯ್ಲ್ಯಾ ವ್ಯಕ್ತಿನ್ ಮ್ಹಳೆಂ "ಆಮಿಂ ಪೊಳಾಪೊಳ್ ಕರ್ತೆನಾಂವ್" ತಾಣೆ ತಕ್ಲಿ ಘುಂವ್ಡಾಯ್ಲಿ. ತೆ ದೋಗ್ ತರ್ನಾಟೆ ಖಾಟ್ಯೆಚ್ಯಾ ಪಾಂಯಾಲಾಗಿಂ ಎಕ್ಲ್ಯಾಚಾ ಬಗ್ಲೆನ್ ದುಸ್ರೊ ರಾವೊನ್ ಆಸ್ಲ್ಲೆ.
"ಅನ್ಸೆ ಲುಸಿಯಸ್" ತಾಣೆ ಮ್ಹಳೆಂ.
ತಪಾಸಣಾಧಿಕಾರಿಕ್ ತಾಣಿಂ ದೊಗಾಯ್ನಿಂ ಸಾಂಗಾತಾ "ವ್ಹಯ್ ಬಾಪಾ" ಮ್ಹಳ್ಳೆಬರಿಂ ಭಗ್ಲೆಂ.
"ಹೊ ಮಾನೆಸ್ತ್ ಜಾಕ್ಸನಾ ಥಾವ್ನ್ ಹಾಂಗಾ ಮ್ಹಣಾಸರ್, ಸರ್ಕಾರ್ ತುಮ್ಚೆ ಖಾತಿರ್ ಆಯ್ತೊ ಆಸಾ ಮ್ಹಣ್ ಸಾಂಗೊಂಕ್ ಆಯ್ಲಾ. ಮ್ಹಜೆ ಪರ್ಮಾಣೆ ಮೆಂಫಿಸಾಂತ್ ಸೆನಾಕ್ ಸೆರ್ವೊಂಕ್ ಸಲೀಸ್ ಜಾತೆಲೆಂ. ಮಾಳಿಯೆರ್ ವಚೊ ಸಾಮಾನ್ ಬಾಂದಾ".
ತಪಾಸಣಾಧಿಕಾರಿ ಮುಖಾರ್ ಯೇವ್ನ್ ’ರಾವಾ’ ಮ್ಹಣ್ ಬೊಬಾಟ್ಲೊ. ಪುಣ್ ಸಕ್ಡಾಂ ಪ್ರಾಸ್ ವ್ಹಡ್ಲೊ ಜಾಕ್ಸನ್ ತಪಾಸಣಾಧಿಕಾರಿಚ್ಯಾ ಫುಡೆಂ ಪಾವ್ಲೊ. ತಾಣೆಂಯ್ ’ರಾವಾ’ ಮ್ಹಳೆಂ. ಆತಾಂ ತೆ ತಪಾಸಣಾಧಿಕಾರಿಚಾ ಕುಶಿನ್ ಪಳೆನಾತ್ಲ್ಲೆ, ತೆ ದಾಕ್ತೆರಾಕ್ ಪಳೆತಾಲೆ.
"ತಾಚೊ ಪಾಯ್ ಕಿತೆಂ ಕರ್ಚೊ?" ಜಾಕ್ಸನ್ ವಿಚಾರಿ.
"ಪಾಂಯಾಂಕ್ ಪಳೆ" ದಾಕ್ತೆರ್ ಮ್ಹಣಾಲೊ "ತಾಣೆ ತೊ ಖುದ್ದ್ ಕಾತರ್ಲಾ, ಆನಿ ವೇಳ್ ಕಾಡುಂಕ್ ಜಾಯ್ನಾ. ಹಾಂಗಾ ಥಾವ್ನ್ ತಾಕಾ ವರುಂಕ್ಯ್ ಕಷ್ಟ್. ಮಾಕಾ ಕುಮ್ಕೆಕ್ ಏಕ್ ನರ್ಸ್, ಇಲ್ಲೆಶೆಂ ಈತರ್ ಆನಿ ತಾಣೆ ಚಡ್ ವಿಸ್ಕಿ ಸೆಂವ್ಕ್ ನಾ ತರ್ ’ಅನಸ್ತೆಟಿಕ್’ ಜಾಯ್ ಪಡ್ತೆಲೆಂ. ತುಮ್ಚೆ ಪಯ್ಕಿ ಎಕ್ಲೊ ಮ್ಹಜ್ಯಾ ಕಾರಾರ್ ಶಹರಾಕ್ ವಚಾ, ಹಾಂವ್ ಫೊನ್ ಕರ್ತಾಂ"
"ಈತರ್?" ಖಾಟ್ಯೆವಯ್ಲ್ಯಾ ಮ್ಹಳೆಂ "ಕಿತ್ಯಾಕ್?", ತುಂವೆಂಚ್ ಆತ್ತಾಂ ಮ್ಹಳೆಂಯ್ ಪಾಯ್ ಎದೊಳ್ಚ್ ಕಾತರ್ನ್ ಜಾಲ್ಲೆಬರಿಂ ದಿಸ್ತಾ. ಹಾಂವ್ಚ್ ಆನಿ ದೋನ್ ಪೆಗ್ಗ್ ಘಾಲ್ನ್ ಪಾಜ್ಲ್ಲ್ಯಾ ಜಾಕ್ಸಾನಾಚೆ ಕಸಾಯಿ ಸುರ್ಯೆನ್ ಖುದ್ದ್ ಕಾತರ್ತೊಂ ಆಸ್ಲ್ಲೊಂ. ಚಲ್... ಪೂರ್ಣ್ ಕರ್...
"ತುಂ ಆನಿ ಕಸಲೊಚ್ ಶಾಕ್ ಸೊಸುಂಕ್ ಸಕ್ಚೊನಾಂಯ್ ದಾಕ್ತೆರಾನ್ ಮ್ಹಳೆಂ.
"ಆತಾಂ ವಿಸ್ಕಿ ಉಲವ್ನ್ ಆಸಾ"
"ಛೆತ್ತ್" ದುಸ್ರ್ಯಾನ್ ಮ್ಹಳೆಂ "ಏಕ್ ಪಾವ್ಟಿಂ ಫ್ರಾನ್ಸಾಂತ್ ಆಮಿಂ ಎಕಾ ಗೊಂವಾಚ್ಯಾ ಗಾದ್ಯಾಂತ್ ಧಾಂವೊನ್ ಆಸ್ತಾನಾ ಹಾಂವೆ ಏಕ್ ಮಶೀನ್ ಗನ್ನ್, ಗೊಂವಾ ಬೆಳ್ಯಾ ಮಧ್ಲ್ಯಾನ್ ಯೇಂವ್ಚಿ ಪಳೆಲಿ. ತಿ ಚುಕಂವ್ಕ್ ಹಾಂವೆ ಉಡಿ ಮಾರ್ಲಿ ತರೀ ಹಾಂವ್ ಸುಫಳ್ ಜಾಲೊನಾ, ಆನಿ ಹಾಂವ್ ಧರ್ಣಿರ್ ಶೆವ್ಟಾಲೊಂ. ಸಾಂಜ್ ಜಾತಾನಾ ದೂಕ್ ಚಡ್ಲಿ ಆನಿ ತ್ಯಾಚ್ ವೆಳಾರ್ ಹೆಲ್ಮೆಟಾ ಪಾಟ್ಲ್ಯಾನ್ ವ್ಹಡ್ ಸುತ್ತ್ಯಾನ್ ಆಸ್ವೆಲಾಕ್ ಮಾರ್ಚೆ ಬರಿಂ ಜಾವ್ನ್ ಜಾಗ್ ಜಾತಾ ಮ್ಹಣಾಸರ್ ಮಾಕಾ ಕಿತೆಂಚ್ ಕಳ್ಳೆಂನಾ. ಮಯ್ದಾನಾಚಾ ತ್ಯಾ ಕುಶಿನ್ ಆಮಿಂ ಏಕ್ ರಾಸ್ ಜಾವ್ನ್ ಪಡ್ಲ್ಲ್ಯಾಂವ್. ದಾಕ್ತೆರಾಕ್ ಯೇಂವ್ಕ್ ವೇಳ್ ಲಾಗ್ಲ್ಲ್ಯಾನ್ ಆಮಿಂ ದೂಕಿನ್ ವಳ್ವಳ್ತಾಲ್ಯಾಂವ್. ಆಯ್ಚಿ ದೂಕ್ ತ್ಯಾ ದಿಸಾಚೆ ದೂಕಿ ಮುಖಾರ್ ಕಾಂಯ್ಚ್ ನ್ಹಯ್, ಕಿತ್ಯಾಕ್ ಮಾಕಾ ವಿಸ್ಕಿ ಪಿಯೆಂವ್ಕ್ ಮೆಳ್ಳ್ಯಾ. ತೂಂ ತುಜೆಂ ಕಾಮ್ ಕರ್. ಸ್ಟುವರ್ಟ್ ಆನಿ ರಾಫೆ ಕುಮೊಕ್ ಕರ್ತೆಲೆ... ಮಾಕಾ ಏಕ್ ಪೆಗ್ಗ್ ವೋತ್ ಜಾಕ್ಸನ್"
ಆತಾಂ ದಾಕ್ತೆರಾನ್ ಬೋತ್ಲ್ ಉಕ್ಲುನ್ ಸೊರ್ಯಾಚೆಂ ಲೆವೆಲ್ ಪಳೆಲೆಂ. "ಕಾಲ್ದಿ ಬೋತ್ಲ್ ಖಾಲಿ ಜಾಲ್ಯಾ" ತಾಣೆ ಮ್ಹಳೆಂ. "ಚಾರ್ ವರಾಂ ಥಾವ್ನ್ ತುಂ ಕಾಲ್ದಿ ಬೋತ್ಲ್ ವಿಸ್ಕಿ ಪಿಯೆಲಾಯ್ ತರ್, ’ಅನಸ್ತೆಟಿಕ್’ ಲಾಗಾತ್ಗೀ ಮ್ಹಳ್ಳೊ ದುಬಾವ್ ಮಾಕಾ ಆಸಾ. ಆತಾಂ ಹಾಂವೆ ತುಜೊ ಪಾಯ್ ಕಾತರ್ಲ್ಯಾರ್ ತುಕಾ ಸೊಸುಂಕ್ ಜಾಯ್ತ್ ಮ್ಹಣ್ ತುಂ ಚಿಂತಾಯ್ಗೀ?"
"ವ್ಹಯ್, ಕರ್ನ್ ಸೊಡ್, "ಹಾಂವೆ ವಿಭಾಡ್ಲಾಂ, ಮಾಕಾಚ್ ತೆಂ ಸಾರ್ಕೆಂ ಕರುಂಕ್ ಜಾಯ್".
ದಾಕ್ತೆರಾನ್ ಹೆರಾಂ ಕುಶಿನ್ ಪಳೆಲೆಂ, ಸ್ತಬ್ದ್, ತದ್ರೂಪ್ ಮುಖಮಳಾಂ ತಾಕಾ ಪಳೆವ್ನ್ ಆಸ್ಲ್ಲಿಂ. "ತಾಕಾ ಶಹರಾಚಾ ಆಸ್ಪತ್ರೆಂತ್ ದವ್ರುಂಕ್ ಮಾಕಾ ಜಾಲ್ಲೆಂ ತರ್, ಏಕ್ ನರ್ಸ್ ಪಳೆಂವ್ಕ್ ಆಸ್ತಿ ತರ್, ತಾಚಾ ಪಯಿಲ್ಲ್ಯಾ ’ಶಾಕಾ’ ಥಾವ್ನ್ ಆನಿ ವಿಸ್ಕಿ ಭಾಯ್ರ್ ಕಾಡ್ತಾ ಮ್ಹಣಾಸರ್ ಹಾಂವ್ ರಾಕ್ತೊಂ ಆಸ್ಲ್ಲೊಂ. ಪುಣ್ ಆತಾಂ ತಾಕಾ ವರುಂಕ್ ಜಾಂವ್ಚೆನಾ. ಆನಿ ಆಶೆಂ ತಾಚೆಂ ರಗಾತ್ ರಾವೊಂವ್ಕ್ಯ್ ಜಾಯ್ನಾ ಆನಿ ಮ್ಹಜೆಲಾಗಿಂ ಈತರ್ ಯಾ ಸ್ಥಾನೀಯ್ ಅನಸ್ತೆಟಿಕ್ ಆಸ್ಲ್ಯಾರ್ಯೀ.... ".
"ಛೆತ್ತ್", ಖಾಟಿಯೆ ವಯ್ಲ್ಯಾ ವ್ಯಕ್ತಿನ್ ಮ್ಹಳೆಂ, "ದೆವಾನ್ ಬೊತ್ಲಿಂತ್ ಆಸ್ಲ್ಲ್ಯಾ ಪ್ರಾಸ್ ವರ್ತೆಂ ಸ್ಥಾನೀಯ್ ಯಾ ಜೆರಾಲ್ ’ಅನಸ್ತೆಟಿಕ್’ ರಚುಂಕ್ ನಾ. ಆನಿ ಹೊ ಪಾಯ್ ಜಾಕ್ಸನಾಚೊ, ಸ್ಟುವರ್ಟಾಚೊ, ರಾಫೆಚೊ ಯಾ ಲೀ-ಚೊ ನ್ಹಯ್, ಹೊ ಪಾಯ್ ಮ್ಹಜೊ. ಹಾಂವೆ ಹೆಂ ಬಿಜಿನೆಸ್ ಸುರು ಕೆಲಾಂ, ಆತಾಂ ಮಾಕಾ ಜಾಯ್ ತಸೆಂ ಹಾಂವೆ ಕಾತರ್ನ್ ಸೊಡ್ಯೆತ್".
ಪೂಣ್ ದಾಕ್ತೆರ್ ಆಜೂನ್ ಜಾಕ್ಸನಾಕ್ ಪಳೆವ್ನ್ ಆಸ್ಲ್ಲೊ. "ಮಿ. ಮೆಕಲಮ್" ತಾಣೆ ಮ್ಹಳೆಂ "ತುಂ ಸಕ್ಡಾಂ ಪ್ರಾಸ್ ವ್ಹಡ್ಲೊ".
ಪೂಣ್ ಸ್ಟುವರ್ಟಾನ್ ಜಾಪ್ ದಿಲಿ. "ವ್ಹಯ್" ತಾಣೆ ಮ್ಹಳೆಂ "ಪೂರ್ಣ್ ಕರ್, ತುಕಾ ಕಿತೆಂ ಜಾಯ್? ಥೊಡೆಂ ಹುನ್ ಉದಾಕ್ ಜಾಯ್ ಮ್ಹಣ್ ಮಾಕಾ ದಿಸ್ತಾ".
"ವ್ಹಯ್", ದಾಕ್ತೆರ್ ಮ್ಹಣಾಲೊ, ಆನಿ ಥೊಡೆ ನಿತಳ್ ಲುಗ್ಟಾ ಕುಡ್ಕೆ. ಹಾಕಾ ವರ್ನ್ ನಿದಾಂವ್ಕ್ ತುಮ್ಚೆಲಾಗಿಂ ವ್ಹಡ್ ಮೇಜ್ ಆಸಾವೇ?’
"ರಾಂದ್ಪಾ ಕುಡಾಂತ್ಲೆ ಮೇಜ್", ಬಾಗ್ಲಾರ್ ಭೆಟ್ಲ್ಲೊ ವ್ಯಕ್ತಿ ಸಾಂಗಾಲಾಗ್ಲೊ, "ಹಾಂವ್ ಆನಿ ಚೆಡೆ...."
’ರಾವ್’ ಖಾಟ್ಯೆ ವಯ್ಲೊ ಉಲಯ್ಲೊ, "ತುಕಾ ಕುಮೊಕ್ ಕರುಂಕ್ ಚೆಡ್ಯಾಂಲಾಗಿಂ ವೇಳ್ ಆಸ್ಚೊನಾ"
ತಾಣೆ ತಾಂಕಾ ಪರ್ತುನ್ ಪಳೆವ್ನ್ ’ಅನ್ಸೆ ಲುಸಿಯಸ್’ ಮ್ಹಣಾಲೊ, ಪರ್ತುನ್ ತಪಾಸಣಾಧಿಕಾರಿಕ್ ತಾಣಿ ದೊಗಾಯ್ನಿಂ ಸಾಂಗಾತಾ ’ಹಾಂ ಬಾಪಾ’ ಮ್ಹಳ್ಳೆಬರಿ ಭಗ್ಲೆಂ.
"ಹಾಂಗಾಸರ್ ಆಸ್ಚ್ಯಾ ಮಾನಾಯಾಕ್ ಕಿರಿಕಿರಿ ಜಾತಾ ತಸೆಂ ದಿಸ್ತಾ. ತುಮಿಂ ಭಾಯ್ರ್ ಸರ್ಚೆಂ ಬರೆಂ, ಸಮಾ ಚಿಂತ್ಲ್ಯಾರ್ ತುಮಿ ಪ್ಯಾಕ್ ಕರ್ಚಿಯ್ ಗರ್ಜ್ ದಿಸಾನಾ. ಏಕ್ ದೋನ್ ದಿಸಾನಿಂ ತುಮ್ಕಾಂ ಯುನಿಫೊರ್ಮ್ ಮೆಳ್ತೆಲೆಂ. ಟ್ರಕ್ಕ್ ಘೆವ್ನ್ ವಚಾ. ತುಮ್ಕಾಂ ಮೆಂಫಿಸಾ ಮ್ಹಣಾಸರ್ ಪಾವವ್ನ್ ಟ್ರಕ್ಕ್ ಪಾಟಿಂ ಹಾಡುಂಕ್ ಹಾಂಗಾಸರ್ ಕೋಣ್ಂಚ್ ನಾ. ಕೊಣಾಯ್ಕೀ ಧಾಡ್ತಾಂ ಮ್ಹಣಾಸರ್ ಗಯೋಸೊ ಫೀಡ್ ಕಂಪೆನಿಂತ್ ತೆಂ ಸೊಡಾ. ಹಾಂವ್ ಆಸ್ಲ್ಲ್ಯಾ ಸವ್ಯಾ ಇಂನ್ಫೆಂಟ್ರಿಂತ್ ತುಮಿಂ ದಾಖಲ್ ಜಾಯ್ಜಾಯ್ ಮ್ಹಳ್ಳಿ ಮ್ಹಜಿ ಇಚ್ಚಾ. ಪೂಣ್ ಮಾಕಾ ದಿಸ್ತಾ, ತಿತ್ಲಿ ಆಶಾ ದವರ್ಚಿ ಸಮಾ ನ್ಹಯ್; ತುಮಿಮ್ ತಾಣಿ ಧಾಡ್ಲ್ಲ್ಯಾ ಕಡೆನ್ ವಚಾಜಾಯ್. ಪೂಣ್ ಏಕ್ ಪಾವ್ಟಿಂ ಭಿತರ್ ರಿಗ್ಲ್ಯಾ ಉಪ್ರಾಂತ್ ಫರಕ್ ಪಡಾನಾ. ಸರ್ಕಾರಾನ್ ಮ್ಹಜ್ಯಾ ವೆಳಾರ್ ನ್ಯಾಯ್ ಕೆಲಾ, ತುಮ್ಕಾಂಯ್ ಬರೆಂಚ್ ಜಾತೆಲೆಂ. ತೆ ತುಮ್ಕಾಂ ಖಂಯ್ಸರ್ ಧಾಡ್ತಾತ್ ಯಾ ತುಮ್ಚಿಂ ಖಂಯ್ಸರ್ ಗರ್ಜ್ ಆಸಾ ಥಂಯ್ ದಾಖಲ್ ಜಾಯಾ. ಸೈನಿಕ್ ಕಸೆ ಜಾಯ್ಜಾಯ್ ಮ್ಹಳ್ಳೆಂ ಕಳ್ತಾ ಮ್ಹಣಾಸರ್ ಸಾರ್ಜೆಂಟ್ ಆನಿ ಅಧಿಕಾರಿಂಕ್ ಖಾಲ್ ಜಾಯಾ. ಖಾಲ್ತೆ ಜಾಯಾ ಪೂಣ್ ಕುಟ್ಮಾಚೆಂ ನಾಂವ್ ಆನಿ ಮರ್ಯಾದ್ ಉಡಾಸಾಂತ್ ದವರ್ನ್. ಕೊಣಾಯ್ಕೀ ದುಗ್ಗು ಸಲಾಮ್ ಮಾರ್ಚಿ ಗರ್ಜ್ ನಾ. ಆತಾಂ ತುಮಿಂ ವಚ್ಯೆತ್".
"ರಾವಾ" ತಪಾಸಣಾಧಿಕಾರಿ ಪರತ್ ಬೊಬಾಟ್ಲೊ ಆನಿ ಕುಡಾಚ್ಯಾ ಮದ್ಗತ್ ವಚೊನ್ "ಹಾಂವ್ ಹಾಚೊ ವಿರೋಧ್ ಕರ್ತಾಂ, ಮಿ. ಮೆಕಲಮಾಚಾ ಆವ್ಘಡಾ ವಿಶಾಂತ್ ಮಾಕಾ ಬೆಜಾರ್ ಆಸಾ; ಹ್ಯಾ ಸರ್ವ್ ಘಡಿತಾಂ ವಿಶಾಂತೀಯ್ ಹಾಂವ್ ಬೆಜಾರ್ ಪಾವ್ತಾಂ. ಪೂಣ್ ಹೆಂ ಸರ್ವ್ ಮ್ಹಜ್ಯಾ ಹಾತಾಂತ್ ಜಾಂವ್ ತಾಚಾ ಹಾತಾಂತ್ ಜಾಂವ್ ನಾ. ಕಾನೂನಾ ಪ್ರಕಾರ್ ನೊಂದಣ್ ಕರುಂಕ್ ಚುಕ್ಲ್ಲ್ಯಾ ವರ್ವಿಂ ಆರೋಪ್ ಆಯ್ಲೊ ಆನಿ ವಾರಂಟ್ಯ್ ಮೆಳ್ಳಾಂ. ಆತಾಂ ಆಶೆಂ ಚುಕವ್ನ್ ಘೆಂವ್ಕ್ ಜಾಯ್ನಾ. ಖಿಂಚೇಯ್ ದುಸ್ರೆಂ ಮೇಟ್ ಕಾಡ್ಚ್ಯಾ ಆದಿಂ, ಹಾಂವ್ ಆಯಿಲ್ಲೆಂ ಕಾಮ್ ಜಾಯ್ಜಾಯ್. ಚೆಡ್ಯಾನಿಂ ನೊಂದಣ್ ಕರುಂಕ್ ಚುಕ್ಲ್ಲ್ಯಾ ವೆಳಾರ್ಚ್ ತಾಣಿಂ ಹ್ಯಾ ವಿಶಾಂತ್ ಚಿಂತಿಜಾಯ್ ಆಸ್ಲ್ಲೆಂ. ಮಿ. ಗೊಂಬಲ್ಟ್ ವಾರಂಟ್ ದೀಂವ್ಕ್ ಇನ್ಕಾರ್ ಕರ್ತಾಸರ್, ಹಾಂವ್ಂಚ್ ದಿತಾಂ ಆನಿ ಆರೋಪಾಚಿ ಜಾಪ್ ದಿಂವ್ಚೆ ಖಾತಿರ್ ಹಾಂವ್ ಖುದ್ದ್ ಹಾಂಕಾಂ ಜೆಫರ್ಸನಾಕ್ ಪಾಟಿಂ ವರ್ತಾಂ. ಆನಿ ಆದೇಶಾಚಿ ನಿಂದಾ ಕೆಲ್ಯಾ ಮ್ಹಳ್ಳೊ ಉಲ್ಲೇಕ್ ಕರ್ತಾಂ ಮ್ಹಣ್ ಹಾಂವ್ ಗೊಂಬಲ್ಟಾಕ್ ಜಾಗ್ವಣ್ ದಿತಾಂ".
ಪ್ರಾಯ್ವಂತ್ ಮಾರ್ಶಲ್ ಘುಂವ್ಲೊ, ತಾಚ್ಯೊ ದಾಟ್ ಭವಿಯೊ ಫಡ್ಪಡ್ಲ್ಯೊ. ತಪಾಸಣಾಧಿಕಾರಿಕ್ ಲ್ಹಾನ್ ಭುರ್ಗೊ ಮ್ಹಣ್ ಲೆಕ್ಲ್ಲ್ಯಾಭಾಶೆನ್, "ಹಾಂವ್ ಯಾ ತುಂ ದೊಗೀ ಖಂಯೀ ವಚಾನಾಂವ್ ಮ್ಹಳ್ಳೆಂ ತುಕಾ ಅಜೂನೀ ಕಳೊಂಕ್ ನಾಂಗೀ?" ಮ್ಹಣಾಲೊ.
"ಕಿತೆಂ?’, ತಪಾಸಣಾಧಿಕಾರಿ ಬೊಬಾಟ್ಲೊ. ಥಂಯ್ಸರ್ ಆಸ್ಲ್ಲ್ಯಾ ಗಂಭೀರ್ ಮುಖಮಳಾಂಕ್ ಪಳೆತಾನಾ, ತೆ ಸರ್ವ್ ತಾಕಾ ಪಯ್ಶಿಲಿ ಆನಿ ಕ್ರತಕ್ ಮರ್ಯಾದ್ ದಿತಾತ್ ತಶೆಂ ತಾಕಾ ಭಗ್ಲೆಂ. "ಮಾಕಾ ಭೆಷ್ಟಾವ್ನ್ ಆಸಾತ್ಗೀ?" ತಾಣೆ ಬೋಬ್ ಘಾಲಿ.
"ತುಜೆ ಕುಶಿನ್ ಕೊಣೀ ಲಕ್ಷ್ಯಚ್ ದೀವ್ನ್ ನಾಂತ್", ಮಾರ್ಶಲ್ ಮ್ಹಣಾಲೊ, ಆತಾಂ ತುಂ ಥೊಡೊ ವೇಳ್ ವಗೊಚ್ಚ್ ರಾವ್; ಸರ್ವ್ ಸಾರ್ಕೆಂ ಜಾತೆಲೆಂ. ಥೊಡ್ಯಾ ವೇಳಾನ್ ಆಮಿಂ ಶಹರಾಕ್ ವಚೊಂಕ್ ಸಕ್ತೆಲ್ಯಾಂವ್".
ತಾಣೆಂ ಆಪ್ಲೆಂ ಪ್ರಯತ್ನ್ ರಾವಯ್ಲೆಂ. ಆತಾಂ ತಾಕಾ ಸಂಬಂಧ್ ನಾತ್ಲ್ಲ್ಯಾ ಆನಿ ಸೊಸುಂಕ್ ಜಾಯ್ನಾತ್ಲ್ಯಾ ತ್ಯಾ ಮರ್ಯಾದೆನ್ ಪಳೆಂವ್ಚ್ಯಾ, ಘಂಬೀರ್ ಚಿಂತ್ನಾನಿಂ ಬುಡ್ಲ್ಲ್ಯಾ ಮುಖಮಳಾ ಥಾವ್ನ್ ಸುಟ್ಕಾ ಮೆಳ್ಲ್ಲೆ ಬರಿಂ ಭಗ್ಲೆಂ. ತಾಚೆ ವಯ್ರ್ ದೀಷ್ಟ್ ಸಯ್ತ್ ಘಾಲಿನಾಸ್ತನಾ ದೊಗಾಂ ತರ್ನಾಟ್ಯಾನಿಂ ಖಾಟಿಯೆಲಾಗಿಂ ವೆಚೆಂ, ಬಾಗ್ವೊನ್ ಬಾಪಯ್ಕ್ ವೊಂಟಾವಯ್ರ್ ಕೀಸ್ ದಿಂವ್ಚೆ, ಸಾಂಗಾತಾ ಕೂಡ್ ಭಾಯ್ರ್ ವೆಚೆಂ ತಾಣೆಂ ಪಳೆಲೆಂ. ಥಂಯ್ಸರ್ ಲಾಂಪ್ಯಾಂವಾಚಾ ಉಜ್ವಾಡಾನ್ ಭರ್ಲ್ಲ್ಯಾ ಹೊಲಾಂತ್ ಮಾರ್ಶಲಾ ಬಗ್ಲೆನ್ ಬಸೊನ್ ಆಸ್ತಾನಾ, ತಾಕಾ ಏಕ್ ಟ್ರಕ್ಕ್ ಚಾಲು ಜಾವ್ನ್ ಘುಂವೊನ್ ಮಾರ್ಗಾರ್ ಸಕಯ್ಲ್ ವೆಚೆಂ, ಪಯ್ಸ್ ವೆತಾನಾ ಆವಾಜ್ ಉಣೊ ಜಾಲ್ಲೆಂ, ಸಿಕಾಟಾ ಕೀಡಿಂಚಾ ಕಿಂದ್ರಿ ಆವಾಜಾನ್ ಅರ್ಧ್ಯಾ ನವೆಂಬರ್ ಮಹಿನ್ಯಾ ಉಪ್ರಾಂತ್ಲ್ಯಾ ಮಿಸಿಸಿಪಿ ಇಂಡಿಯನ್ ಗರ್ಮೆ ದಿಸಾಂಚಾ ತ್ಯಾ ಸ್ತಬ್ದ್ ರಾತಿಂ ತಶೆಂ ತ್ಯಾ ಕಿಡಿಂಕೀ ಯೆಂವ್ಚಾ ಹಿಂವಳ್ಯಾ ದಿಸಾಂಚೊಂ ಆನಿ ಮರ್ಣಾಚೊ ಉಡಾಸ್ ಯೆತಾ ತಶೆಂ ದಿಸ್ಲೆಂ.
"ಮಾಕಾ ಮಾತಾರ್ಯಾ ಅನ್ಸೆಚೊ ಉಡಾಸ್ ಯೆತಾ" ಮಾರ್ಶಲಾನ್ ಗಜಾಲಿ ಕರ್ಚ್ಯಾ ಬರಿಂ ಖುಶಾಲಾಯೆನ್ ಮ್ಹಳೆಂ. ತಾಚೊ ತಾಳೊ ವಿಲಕ್ಷಣ್ ಭುರ್ಗ್ಯಾಲಾಗಿಂ ಉಲಂವ್ಚ್ಯಾ ವಯಸ್ಕಾ ಬರಿಂ ಆಸ್ಲ್ಲೊ.
"ತೊ ಸರೊನ್ ಪಂದ್ರಾ-ಸೊಳಾ ವರ್ಸಾಂ ಜಾಲಿಂ. ಆದ್ಲೆಂ ಝುಜ್ ಸುರು ಜಾತಾನಾ ತೊ ಸೊಳಾ ವರ್ಸಾಂಚೊ ಆಸ್ಲ್ಲೊ ಜಾಯ್ಜೆ; ಆನಿ ತೊ ತ್ಯಾ ಝುಜಾಂತ್ ಭಾಗ್ ಘೆಂವ್ಕ್ ವರ್ಜೀನಿಯಾ ಮ್ಹಣಾಸರ್ ಚಲೊನ್ ಗೆಲ್ಲೊ. ಹಾಂಗಾಸರ್ಚ್ ನೊಂದಣ್ ಕರ್ನ್ ಗಾಂವಾಂತ್ಚ್ ಝುಜ್ಯೆತೆಂ. ಪೂಣ್ ತಾಚಿ ಆವಯ್ ಕಾರ್ಟರ್ ಕುಟ್ಮಾಚಿ ಜಾವ್ನಾಸ್ಲ್ಲ್ಯಾನ್ ಝುಜಾಕ್ ತಾಣೆ ವರ್ಜೀನಿಯಾ ಪಾಟಿಂ ವಚಾಜಾಯ್ ಮ್ಹಳ್ಳಿ ತಿಚಿ ಆಪೇಕ್ಷಾ ಆಸ್ಲ್ಲಿ. ಎದೊಳ್ ತಾಣೆ ವರ್ಜೀನಿಯಾ ಪಳೆಂವ್ಕ್ ನಾತ್ಲ್ಲೆಂ ತರೀ ಥಂಯ್ಸರ್ ಪಾಯ್ವಾಟೆನ್ ವಚೊನ್ ಸ್ಟೋನ್ವಾಲ್ ಜಾಕ್ಸನಾ ಸೈನಾಂತ್ ಸೆರ್ವಾಲೊ ಆನಿ ಥಂಯ್ಚ್ ಫಾಲ್ಕ್ಯಾಂತ್ ಚಾನ್ಸ್ಲರ್ಸ್ ವಿಲ್ಲಾ ಮ್ಹಳ್ಳೆಕಡೆನ್, ಕಾರೊಲಿನಾ ತರ್ನಾಟ್ಯಾನಿಂ ಫರಾಮಸೆನ್ ಜಾಕ್ಸನಾಕ್ ಮಾರ್ತಾ ಮ್ಹಣಾಸರ್, 65 ಚ್ಯಾ ತ್ಯಾ ಸಕಾಳಿಂ ಶೆರಿಡನಾಚೆ ಘೊಡ್ಯಾ ಸವಾರಾಂಚಾ ಸೈನಾಂತ್ ಅಪ್ಪೊಮೆಟ್ಟೋರ್ಸಾ ಥಾವ್ನ್ ಘಾಟ್ಯೆ ವಯ್ಲೊ ರಸ್ತೊ ಬಂಧ್ ಕರ್ತಾ ಮ್ಹಣಾಸರ್ ಚುಕೊನ್ ಧಾಂವ್ಚೊ ಆವ್ಕಾಸ್ ಆಸ್ಲ್ಯಾರೀ, ರಾವ್ಲ್ಲೊ. ಜೆಂ ಕಿತೆಂ ಆಪ್ಣಾ ಸಾಂಗಾತಾ ಘೆವ್ನ್ ಗೆಲ್ಲೊಗೀ ತಾಚೆ ಸಂಗಿ ತೊ ಮಿಸ್ಸಿಸಿಪ್ಪಿಕ್ ಚಲೊನ್ಂಚ್ ಪಾಟಿಂ ಆಯಿಲ್ಲೊ. ಕಾಜಾರ್ ಜಾವ್ನ್ ಮಾಳಿಯೆಚೆಂ ಘರ್ ಬಾಂದ್ಲೆಂ. ತ್ಯಾಚ್ ರುಕಾಡಾಚಾ ಮಾಳಿಯೆರ್ ಆತಾಂ ಆಮಿಂ ಉಭೆ ಆಸಾಂವ್. ತಾಚೆ ಭುರ್ಗೆ ಜಾಕ್ಸನ್, ಸ್ಟುವರ್ಟ್, ರಾಫಾಯೆಲ್, ಲೀ ಆನಿ ಬಡ್ಡಿ ಜಲ್ಮಾಲೆ. ಬಡ್ಡಿ ಥೊಡೊ ಅಂತರ್/ವೇಳ್ ಘೆವ್ನ್ ಜಲ್ಮಾಲ್ಲ್ಯಾನ್ ಫ್ರಾನ್ಸಾಚಾ ಝುಜಾಂತ್ ಭಾಗ್ ಘೆಂವ್ಕ್ ತಾಕಾ ಸಾಧ್ಯ್ ಜಾಲೆಂ, ತುಂವೆ ತೆಂ ಆಯ್ಕಾಲಾಂಯ್. ಥಂಯ್ ಥಾವ್ನ್ ದೋನ್ ಮೆಡ್ಲಾಂ ಏಕ್ ಆಮೇರಿಕನ್, ಆನ್ಯೇಕ್ ಫ್ರಾನ್ಸಾಚೆಂ ತಾಣೆ ಕೆಲ್ಲ್ಯಾ ಕಾಮಾ ಖಾತಿರ್ ತಾಕಾ ಮೆಳ್ಳಿಂ. ಮಾಕಾ ದಿಸಾನಾ ತಾಣೆ ಹ್ಯಾ ವಿಶಾಂತ್ ಜಾಕ್ಸನ್, ಸ್ಟುವರ್ಟ್ ಆನಿ ಹೆರಾಂಕ್ಯ್ ಸಾಂಗ್ಲಾಂ ಮ್ಹಣ್. ಯುನಿಫೊರ್ಮಾಚೆರ್ ನಂಬರ್, ಘಾಯಾಂಚೆ ಗುರ್ತ್, ಆನಿ ದೋನ್ ಮೆಡ್ಲಾಂ ಘೆವ್ನ್ ಘರಾ ಪಾವ್ಲಾ ತಿತ್ಲೊಚ್, ತಾಣೆ ಆಪ್ಣಾಕ್ ಏಕ್ ಚೆಡುಂ ಸೊದ್ಲೆಂ ಆನಿ ಕಾಜಾರ್ ಜಾಲೊ. ಆನಿ ಎಕಾ ವರ್ಸಾ ಉಪ್ರಾಂತ್ ಅನ್ಸೆ, ಮೆಕಲಮಾಚ್ಯಾಚ್ ಸಾರ್ಕ್ಯಾ ಆನಿ ಸುರ್ಪಾಯೆಚೆ ಜೊವ್ಳೆ ಭುರ್ಗೆ ಜಲ್ಮಾಲೆ. ಮಾತಾರೊ ಅನ್ಸೆ ಸತ್ತರ್ ಆನಿ ಪಾಂಚ್ ವರ್ಸಾಂ ಲ್ಹಾನ್ ಆಸ್ಲ್ಲೊ ತರ್ ಹ್ಯಾ ತೆಗಾಂಕೀ ’ತೆವ್ಳೆ’ ಮ್ಹಣ್ಯೆತೆಂ. ಮಾಕಾ ಉಡಾಸ್ ಆಸಾ ಹೆ ದೊಗೀ ಜೀವಿ(ಕಿಡೆ) ಏಕ್ ಸಾರ್ಕೆ ಉಪ್ರಾಳಿ. ಶಿಂಗಾಂಚಾ ಚಿತ್ಳಾ ಸಾರ್ಕೆ, ಶಿಕಾರೆ ಪೆಟ್ಯಾಂಚಾ ಹಿಂಡಾ ಸಾಂಗಾತಾ ದೀಸ್ ರಾತ್ ಹೆಣೆ ತೆಣೆ ಧಾಂವ್ಚೆ ಜೊವ್ಳೆ. ವ್ಹಡ್ ಜಾವ್ನ್ ಯೆತಾನಾ ಬಡ್ಡಿ, ಸ್ಟುವರ್ಟ್ ಆನಿ ಲೀಕ್ ತೋಂಟಾಂತ್ ಆನಿ ಕಾಪ್ಸಾ ವ್ಯವಸಾಯಾಂತ್, ರಾಫೆಕ್ ಘೊಡ್ಯಾ, ಗಾಡ್ವಾಂಕ್ ವಾಗಾಂವ್ಚ್ಯಾಂತ್ ತರ್ಬೆತ್ ಕರ್ನ್ ಮೆಂಫಿಸಾಕ್ ವಿಕುಂಕ್ ವರ್ಚ್ಯಾಂತ್ ತೆ ಕುಮೊಕ್ ಕರ್ತಾಲೆ. ಆತಾಂ ತೀನ್ ಚಾರ್ ವರ್ಸಾಂ ಆದಿಂ ತಾಣಿ ಕ್ರಷಿ ವಿಶ್ವವಿದ್ಯಾಲಯಾಕ್ ವಚೊನ್ ಬೀಫಾಚ್ಯಾ ಗೊರ್ವಾಂ ವಿಶಾಂತ್ ಶಿಕಾಪ್ ಜೊಡ್ಲ್ಲೆಂ.
ಹಿಂ ಘಡಿತಾಂ ಜಾಲ್ಲಿಂ ಬಡ್ಡಿನ್ ಆನಿ ತಾಣಿಂ ಕಾಪ್ಸಾ ಬೆಳೆಂ ಕರ್ಚೆಂ ರಾವಯ್ಲ್ಯಾ ಉಪ್ರಾಂತ್ ಮಾಕಾ ತೇಂಯ್ ಉಡಾಸ್ ಆಸಾ. ಎಕಾ ವ್ಯಕ್ತಿನ್ ಆಪ್ಲೊಚ್ ಜಾಗೊ ವಾಪಾರ್ನ್ ಕಾಪ್ಸಾಚೆಂ ಬೆಳೆಂ ಕಾಡ್ನ್; ತಾಚೆಂ ಏಕ್ ಮೋಲ್ ನಿಗದಿತ್ ಕರ್ನ್, ಉರ್ಲ್ಲ್ಯಾಚೊ ಬರೊ ಉಪಯೇಗ್ ಕರ್ನ್ ಆಸ್ತಾನಾ ತಾಕಾ ತಾಂಕಾಂ ಜಾಯ್ ಆಸೊಂ ಯಾ ನಾ ಆಸೊಂ, ಸರ್ಕಾರಾನ್ ಮೆತೆರ್ ಜಾವ್ನ್ ಸಲಹಾ ಸೂಚನಾ ದೀಂವ್ಕ್ ಸುರು ಕೆಲ್ಲೆಂ. ತುಂವೆ ಆಜ್ ತ್ಯಾ ಚೆಡ್ಯಾಂಕ್ ಪಳೆಲಾಂಯ್, ತಾಂಕಾಂ ಕಿತೆಂ ತರೀ ಶಿಕಾಜಾಯ್, ನವೆಂ ಕರಿಜಾಯ್ ಮ್ಹಳ್ಳಿ ಉರ್ಬಾ ಆಸಾ. ತ್ಯಾ ಪಯ್ಲ್ಯಾ ವರ್ಸಾ ಸರ್ಕಾರಿ ಏಜಂಟಾನಿಂ ಯೇವ್ನ್, ಬಡ್ಡಿ, ಲೀ ಆನಿ ಸ್ಟುವರ್ಟಾಕ್ ತಾಣಿಂ ಬೆಳೆಂ ಕಶೆಂ ಲೂಂವಾಜಾಯ್, ಸರ್ಕಾರ್ ಕಸೊ ತಾಂಕಾ ಮೋಲ್ ದಿತೊಲೊ, ಹಾಚೆವರ್ವಿಂ ಖುದ್ದ್ ಕ್ರಷಿ ಕರ್ಚ್ಯಾ ಪ್ರಾಸ್ ಕಿತೆಂ ಬರೆಪಣ್ ಜಾತೆಲೆಂ, ಹ್ಯಾ ವಿಶಾಂತ್ ಸಮ್ಜೊಣಿ ದಿಲ್ಲಿ.
"ಆಮಿಂ ಆಭಾರಿ ಜಾವ್ನಾಸಾಂವ್" ಬಡ್ಡಿನ್ ಮ್ಹಳ್ಳೆಂ, "ಪೂಣ್ ಆಮ್ಕಾಂ ತುಮ್ಚ್ಯಾ ಕುಮ್ಕೆಚಿ ಗರ್ಜ್ ನಾ. ಆಮಿಂ ಆದ್ಲೆಬರಿಚ್ ಕಾಪ್ಸಾ ವ್ಯವಸಾಯ್ ಕರ್ತೆಲ್ಯಾಂವ್. ಬೆಳೆಂ ಬರೆಂ ಜಾಯ್ನಾಸ್ತಾನಾ ನಷ್ಟ್ ಜಾಲೊ ತರ್ ಆಮ್ಚಿಂ ಜವಾಬ್ದಾರಿ. ಆಮಿಮ್ ಖುದ್ದ್ ಪರ್ತುನ್ ಪ್ರಯತ್ನ್ ಕರ್ತೆಲ್ಯಾಂವ್".
ತಶೆಂ ತೆ ಖಿಂಚಾಯ್ ಪೇಪರ್ ಯಾ ಕಾರ್ಡಾಂಕ್ ದಸ್ಕತ್ ಘಾಲಿನಾತ್ಲೆ. ಮಾತಾರ್ಯಾ ಅನ್ಸಿನ್ ಶಿಕಯಿಲ್ಲೆ ಬರಿಚ್ ಕಾಪ್ಸಾ ಬೆಳೆಂ ಕರ್ತಾಲೆ. ತಾಂಕಾ ಕುಮೊಕ್ ಜಾಯ್ ಯಾ ನಾಕಾ ಮ್ಹಳ್ಳೆಂ ಲೆಖಿನಾಸ್ತನಾ ಕುಮೊಕ್ ಕರ್ಚೆಂ, ಆಪ್ಲ್ಯಾಚ್ ಜಾಗ್ಯಾರ್ ಪರಿಶ್ರಮ್ ಕರ್ನ್ ಬೆಳೆಂ ಕರ್ತಾನಾ ಮೆತೆರ್ ಜಾಂವ್ಚೆಂ. ಆಪ್ಲ್ಯಾಚ್ ಫ್ಯಾಕ್ಟರಿಂತ್ ಕಾಪ್ಸಾ ಬಿಯೊ ಮೆಕ್ಳ್ಯೊ ಕರ್ನ್, ನಿತಳ್ ಕರ್ನ್ ಸದಾಂಚೆ ಬರಿಂ ಕಾಪುಸ್ ಜೆಫರ್ಸನ್ ಶಹರಾಕ್ ಸಾಗ್ಸುನ್, ಥಂಯ್ ವಿಕುಂಕ್ ಜಾಯ್ನಾಸ್ತಾಂ ಪಾಟಿಂ ಹಾಡ್ಚೆಂ - ಹೆಂ ಸಗ್ಳೆಂ ಪಾತ್ಯೆಂವ್ಕ್ ಕಷ್ಟ್ ಮಾರ್ತಾಲೆ. ಪಯ್ಲ್ಯಾ ಸುವಾತೆರ್ ತಾಂಚೊ ಮ್ಹಾಲ್ ಲೆಕಾವರ್ತೊ ಆಸ್ಲ್ಲ್ಯಾನ್, ದುಸ್ರೆಂ ತಾಂಚೆಲಾಗಿಂ ವಿಕ್ರಾಪಾಕ್ ಜಾಯ್ ತೆಂ ಕಾರ್ಡ್ ನಾತ್ಲ್ಲ್ಯಾನ್ ತಾಂಚೊ ಮ್ಹಾಲ್ ವಿಕೊನ್ ವಚಾನಾತ್ಲೊ. ಹ್ಯಾ ವರ್ವಿಂ ಮ್ಹಾಲ್ ಪಾಟಿಂ ಸಾಗ್ಸಿಜಾಯ್ ಪಡ್ತಾಲೊ. ಸಗ್ಳ್ಯಾ ಪಾವ್ಸಾಕ್ ಜಿನ್ನ್ ಪಾವಾನಾತ್ಲೆಂ, ದೆಕುನ್ ಥೊಡೊ ರಾಫೆಚಾ ಗಾಡ್ವಾ ಶೆಡ್ಡಾಂತ್, ಆನಿ ಥೊಡೊ ಹಾಂಗಾ ಹ್ಯಾ ಹೊಲಾಂತ್ ರಾಸ್ ಕರ್ತಾಲೆ. ಹಿಂವೆ ದಿಸಾನಿಂ ಹಾಂಗಾಸರ್ ಆಸ್ಚ್ಯಾ ಮನ್ಶಾನಿಂ, ತ್ಯಾ ರಾಶಿ ಭಂವ್ತಿ ಚಲ್ತಾನಾ, ಆನ್ಯೇಕ್ ಪಾವ್ಟಿಂ ಕಾರ್ಡ್ ಭರಿಜಾಯ್ ಮ್ಹಳ್ಳೆಂ ತಾಂಚಾ ಉಡಾಸಾಕ್ ಯೇಶೆಂ ಕರ್ತಾಲೆಂ.
ಜಾಲ್ಯಾರೀ ಫುಡ್ಲ್ಯಾ ವರ್ಸಾ ತಾಣಿಂ ಪೇಪರಾಂ ಭರ್ಲಿನಾಂತ್, ಮನ್ಶಾಕ್ ಆಪ್ಲಿ ತಾಂಕ್ ಆನಿ ಕಾಮ್ ಕರ್ಚೆಂ ಮನ್ ಆಸ್ಲ್ಯಾರ್ ಹರ್ಯೆಕ್ಲ್ಯಾಕ್ ಸ್ವಾತಂತ್ರ್ ಆಸಾ ಮ್ಹಳ್ಳ್ಯಾ ಪಾತ್ಯೆಣೆನ್ ತೆ ಆಸ್ಲ್ಲೆ. ಮಾತಾರ್ಯಾ ಅನ್ಸೆನ್, ಬಡ್ಡಿಕ್ ಝುಜಾಕ್ ಧಾಡ್ಲ್ಲೊ. ತಾಕಾ ಮೆಡಲ್ ಮೆಳ್ಲ್ಲೆಂ ಆನಿ ಘರಾ ಪಯ್ಸ್ ತಾಚೊ ಪೋಸ್ಯ್ ಜಾಲ್ಲೊ. ತರೀ ಅಪರಿಚಿತ್ ಗಾಂವಾಂತ್ ಬಡ್ಡಿ ಘಾಯೆಲ್ಲೊ ತೆಂ ತಾಕಾ ಉಡಾಸಾಂತ್ ಆಸ್ಲ್ಲೆಂ. ಆಶೆಂ ತಾಚಿ ಪಾತ್ಯೆಣಿ ಆಪ್ಲ್ಯಾ ಸ್ವಾತಂತ್ರ್ ಆನಿ ಸ್ವಾಭಿಮಾನಾಂತ್ ಆಸ್ಲ್ಲಿ.
ಆಶೆಂ ತಾಣಿ ದುಸ್ರೆಂ ಬೆಳೆಂಯ್ ಕೆಲೆಂ. ತಾಂಚೆ ಲಾಗಿಂ ಕಾರ್ಡ್ ನಾತ್ಲ್ಲ್ಯಾನ್ ಕೊಣಾಯ್ಕೀ ತೆಂ ವಿಕುಂಕ್ ಸಾಧ್ಯ್ ಜಾಲೆನಾ. ಹ್ಯಾ ಪಾವ್ಟಿಂ ದಾಸ್ತಾನಾ ಖಾತಿರ್ ತಾಣಿ ಆನ್ಯೆಕ್ ಶೆಡ್ಡ್ ಬಾಂದ್ಲೆಂ. ದುಸ್ರ್ಯಾ ಹಿಂವಾಳೆ ವೆಳಾರ್ ಬಡ್ಡಿ, ಗೇವಿನ್ ಸ್ಟೀವನ್ಸಾಕ್ ಮೆಳೊಂಕ್ ಆಯಿಲ್ಲೊ ಮಾಕಾ ಉಡಾಸ್ ಆಸಾ. ಕಾನೂನಿ ಸಲಹಾ ಖಾತಿರ್ ಯಾ ಸರ್ಕಾರಾನ್ ಆನಿಂ ಹೆರಾನಿಂ ಕಾರ್ಡ್ ನಾತ್ಲ್ಯಾರೀ ಕಾಪುಸ್ ಮೊಲಾಕ್ ಘೆಜಾಯ್ ಮ್ಹಣ್ ಮನವಿ ಕರುಂಕ್ಯೀ ನ್ಹಯ್, ಬಗಾರ್ ಹಾಚೆಂ ಕಾರಣ್ ಕಿತೆಂ ತೆಂ ವಿಚಾರುಂಕ್. "ಹಿ ನವಿ ರೂಲ್ ತರ್ ಆಪುಣ್ ಮುಕಾರ್ ಸರ್ನ್ ದಸ್ಕತ್ ಕರುಂಕೀ ತಯಾರ್ ಜಾಲ್ಲೊಂ", ಬಡ್ಡಿ ಸಾಂಗಾಲಾಗ್ಲೊ. "ಪೂಣ್ ಆಮಿಂ ವಿಚಾರ್ ವಿಮರ್ಸೊ ಕೆಲೊ. ಜಾಕ್ಸನ್ ರಯ್ತ್ ನ್ಹಯ್ ತರೀ ಆಮ್ಚ್ಯಾ ಬಾಪಾಯ್ಕ್ ಆಮ್ಚೆ ಪ್ರಾಸ್ ಚಡ್ ಕಾಳಾಕ್ ಜಾಣಾ ಆಸ್ಲ್ಲೊ ಜಾಲ್ಲ್ಯಾನ್ ಬಾಪ್ ಹಾಕಾ ಒಪ್ವತೊನಾ ಮ್ಹಣಾಲೊ, ಆನಿ ಮಾಕಾಯೀ ತಾಣೆ ಸಾಂಗ್ಲ್ಲೆಂ ಸಾರ್ಕೆಂ ತಶೆಂ ಭಗ್ತಾ".
ತಾಚೆ ಉಪ್ರಾಂತ್ ತಾಣಿಂ ಕಾಪ್ಸಾ ಬೆಳೆಂ ಕೆಲೆಂನಾ. ಮಾಕಾ ದಿಸ್ತಾ ತಾಂಚೆ ಲಾಗಿಂ ಸುಮಾರ್ ವೀಸ್ ಕಾಟ್, ಸಭಾರ್ ತೆಂಪಾಕ್ ಪಾಂವ್ಚೆ ತಿತ್ಲೊ ಕಾಪುಸ್ ಆಸ್ಲ್ಲೊ. ಹ್ಯಾಚ್ ವೆಳಾರ್ ತಾಣಿಂ ಬೀಫಾ ಗೊರ್ವಾಂಚಾ ಚರೊವಾ ಖಾತಿರ್ ಮಾತಾರ್ಯಾ ಅನ್ಸೆಚೊ ಕಾಪ್ಸಾ ಬೆಳ್ಯಾಚೊ ಜಾಗೊ ಉಪಯೋಗ್ ಕರುಂಕ್ ಸುರು ಕೆಲೊ. ಸರ್ಕಾರಾಚ್ಯಾ ಆದೇಶಾಖಾಲ್ ಇತ್ಲೊಚ್ ಕಾಪುಸ್ ಉತ್ಪನ್ನ್ ಕರಿಜಾಯ್, ಇತ್ಲೊಚ್ ವಿಕಿಜಾಯ್, ಖಂಯ್ಚ್ಯಾ ಜಾಗ್ಯಾರ್ ಕೆದಾಳಾ ವಿಕಿಜಾಯ್ ಆನಿ ತಾಣಿ ಬೆಳೆಂ ಕರಿನಾ ತರೀ ತಾಂಕಾ ಪಯ್ಶೆ ಫಾರಿಕ್ ಜಾತೆಲೆ - ಅಸಲ್ಯಾ ಪರಿಸ್ಥಿತೆಂತ್ ಮಾತಾರೊ ಅನ್ಸೆ ಖಂಡಿತ್ ಜಾವ್ನ್ ಆಪ್ಲ್ಯಾ ಭುರ್ಗ್ಯಾನಿಂ ಘೆತ್ಲ್ಲೊ ನಿರ್ಧಾರ್ ಸಮಾ ಆಸಾ ಮ್ಹಣ್ ಮಾಂದ್ತಾಲೊ. ತಾಣಿ ಕಾಪ್ಸಾ ವ್ಯವಸಾಯ್ ಕೆಲಿನಾ ತರೀ, ಹರ್ಯೆಕಾ ವರ್ಸಾ ಏಕ್ ತರ್ನಾಟೊ ಕೌಂಟಿ ಏಜಂಟ್ ಥಂಯ್ಸರ್ ಯೇವ್ನ್ ತಣಾಚೊ ಜಾಗೊ ಘೆವ್ನ್ ಮೋಲ್ ದಿಂವ್ಚ್ಯಾ ಇರಾದ್ಯಾನ್ ಮೆಜ್ತಾಲೊ. ತಾಂಚೆ ಲಾಗಿಂ ಕಾಪ್ಸಾ ಬೆಳೆಂ ನಾತ್ಲ್ಲೆಂ. "ಆಮಿಂ ಕಿತೆಂ ಕರ್ತಾಂವ್ ತೆಂ ಪಳೆಂವ್ಕ್ ತುಕಾ ಸ್ವಾಗತ್ ಆಸಾ, ಪೂಣ್ ತುಜ್ಯಾ ನಕ್ಷ್ಯಾರ್ ಆಮ್ಕಾಂ ಸೆರ್ವಿನಾಕಾ" ಬಡ್ಡಿ ಮ್ಹಣ್ತಾಲೊ.
"ಪೂಣ್ ತುಮ್ಕಾಂ ಪಯ್ಶೆ ಮೆಳ್ತೆಲೆ", ತರ್ನಾಟೊ ಮ್ಹಣಾಲೊ "ತಣ್ ಲಾಯಿಲ್ಲ್ಯಾಕ್ ಸರ್ಕಾರ್ ತುಮ್ಕಾಂ ಕಾಂಯ್ ಇಲ್ಲೆಂ ಫಾರಿಕ್ ಕರುನ್ ಆಶೆತಾ".
"ಆಮಿಂಯ್ ಪಯ್ಶೆ ಮೆಳಾಜಾಯ್ ಮ್ಹಳ್ಳ್ಯಾ ಉದ್ದೇಶಾನ್ ಆಸಾಂವ್" ಬಡ್ಡಿ ಮ್ಹಣ್ತಾ. "ಆಮ್ಚ್ಯಾನ್ ಜಾಯ್ನಾತ್ಲ್ಯಾ ವೆಳಾರ್ ಆಮಿಂ ದುಸ್ರಿ ವಾಟ್ ಪಳೆತಾಂವ್. ಪೂಣ್ ಸರ್ಕಾರಾ ಥಾವ್ನ್ ಕಿತೆಂಚ್ ನಾಕಾ. ಕೊಣಾಕ್ ಜಾಯ್ ತೆಂ ತಾಂಕಾ ದಿಯಾ, ಆಮಿಂ ಸಮರ್ಥ್ ಆಸಾಂವ್".
"ವ್ಹಯ್, ಗಜಾಲ್ ಇತ್ಲಿಚ್, ೨೨ ಕಾಟ್ ಕಾಪುಸ್ ಆನಾಥ್ ಮ್ಹಳ್ಳೆ ಬರಿಂ ಮಿಲ್ಲಾಂತ್(ಜಿನ್ನಾಂತ್)ಆಸಾ. ಕಿತ್ಯಾಕ್ ತೆಂ ಜಿನ್ನ್ ಆತಾಂ ಉಪಯೋಗಾಂತ್ ನಾ. ಚೆರ್ಕೆಯೀ ವಾಡ್ಲೆ ಆನಿ ಬೀಫಾಚೆ ಗೊರ್ವಾಂ ವಿಶಾಂತ್ ಶಿಕ್ಚಾ ಉದ್ದೇಶಾನ್ ಎಕಾ ವರ್ಸಾಚೆ ಆವ್ದೆಕ್ ಕ್ರಷಿ ವಿದ್ಯಾಲಯಾಕ್ ವಚೊನ್ ಪಾಟಿಂ ಆಯ್ಲೆ ಆನಿ ಹೆರಾಂ ಸಾಂಗಾತಾ ಜಿಯೆಂವ್ಕ್ ಲಾಗ್ಲ್ಯಾತ್. ಹೆ ಉತ್ಸುಕ್ ವ್ಯಕ್ತಿ ದೀಸ್ ರಾತ್ ನಿಯೋನ್ ಉಜ್ವಾಡಾಂತ್, ಸಲಿಸಾಯೆನ್ ಮೆಳ್ಲ್ಲೆ ಪಯ್ಶೆ ಅರಾವ್ನ್, ನವೆಂಚ್ ವಾಹನ್ ಚಲವ್ನ್, ಪಯ್ಲೆಂಚೆ ಪರ್ನೆಂ ಜಾಂವ್ಚಾ ಪಯ್ಲೆಂಚ್ ಪಯ್ಶೆ ಫಾರಿಕ್ ಕರಿನಾಸ್ತಾನಾ AAA (American Automobile Asociation) ಥಾವ್ನ್ ಮೆಳ್ಚೆಂ ವಾಹನ್ ಆಪ್ಣಾವ್ನ್ WPA (Work Progress Administration) ಆನಿ ಹೆರ್ ಅಸಲ್ಯಾ ’ತೀನ್’ ಅಕ್ಷರಾಂಚಾ ವಿಭಾಗಾಂಚಾ ದಯೆನ್ ಕಾಮ್ ಕರಿನಾಸ್ತನಾಂಚ್ ಜೀವನ್ ಸಾರ್ಚ್ಯಾ ಆಸ್-ಪಾಸ್ಚ್ಯಾ ಮನ್ಶಾಂ ಸಂಗಿ ಜಿಯೆತಾಲೆ. ಆನಿ ಆತಾಂ ಹಿ ಡ್ರಾಫ್ಟ್ ಆಯ್ಲಿ. ಆನಿ ಹೆ ವಿಚಿತ್ರ್ ವ್ಯಕ್ತಿ ಹಾಕಾಯ್ ದಸ್ಕತ್ ಘಾಲುಂಕ್ ತಯಾರ್ ನಾಂತ್. ಆನಿ ತುಂ ಹಾಚೆ ಖಾತಿರ್ ದುರುಸ್ತ್ ಕಾಗ್ದಾಂ ತಯಾರ್ ಕರ್ನ್ ಜಾಕ್ಸನಾ ಥಾವ್ನ್ ಆಯ್ಲೊಯ್, ಆನಿ ಆಮಿಂ ಹಾಂಗಾಸರ್ ಆಯ್ಲ್ಯಾಂವ್. ಆನಿ ಥೊಡ್ಯಾ ವೆಳಾನ್ ಆಮಿಂ ಶಹರಾಕ್ ವಚ್ಯೆತ್".
"ವ್ಹಯ್", ತಪಾಸಣಾಧಿಕಾರಿ ಮ್ಹಣಾಲೊ, "ಆತಾಂ ಪುಣಿ ಆಮಿಂ ಶಹರಾಕ್ ಪಾಟಿಂ ವಚ್ಯೆತ್ಗೀ?"
"ನಾಂ", ಮಾರ್ಶಲಾನ್ ತ್ಯಾಚ್ ಮೊವಾಳ್ ತಾಳ್ಯಾನ್ ಮ್ಹಳೆಂ. "ಆತಾಂಚ್ ನ್ಹಯ್, ಪುಣ್ ಆನಿ ಥೊಡ್ಯಾ ವೆಳಾ ಉಪ್ರಾಂತ್ ವಚ್ಯೆತ್. ತುಜೆಂ ಟ್ರೈನ್ ಚುಕ್ತೆಲೆಂ ತೆಂ ಖರೆಂ, ಪೂಣ್ ಫಾಲ್ಯಂ ಆನ್ಯೇಕ್ ಆಸ್ತೆಲೆಂ".
ತೊ ಉಟ್ಲೊ, ತಪಾಸಣಾಧಿಕಾರಿಕ್ ಕಿತೆಂಚ್ ಆಯ್ಕಾಲಾಂ ತಶೆಂ ದಿಸೊಂಕ್ ನಾ.
ತಪಾಸಣಾಧಿಕಾರಿನ್, ಮಾರ್ಶಲಾಕ್ ಸಕಯ್ಲ್ ವಚೊನ್, ಬೆಡ್ಡ್ ರೂಮಾಂಚೆ ದಾರ್ ಉಗಡ್ನ್, ಭಿತರ್ ಸರ್ನ್ ದಾರ್ ಬಂಧ್ ಕೆಲ್ಲೆಂ ದೆಕ್ಲೆಂ. ತೊ ರಾತಿಚೆ ಆವಾಜ್ ಆಯ್ಕೊನ್ ಥಂಡ್ ಬಸ್ಲ್ಲೊ. ತಿತ್ಲ್ಯಾನ್ ಮಾರ್ಶಲ್ ಜಾಗ್ರುತ್ಕಾಯೆನ್ ಏಕ್ ರಗ್ತಾಳಿ ವೋಲ್ ಘೆವ್ನ್ ಭಾಯ್ರ್ ಆಯ್ಲೊ.
"ಹಾಂಗಾ", ತಾಣೆ ಮ್ಹಳೆಂ "ಏಕ್ ಘಡಿ ಧರ್".
"ರಗ್ತಾನ್ ಬುಡ್ಲ್ಯಾ", ತಪಾಸಣಾಧಿಕಾರಿ ಮ್ಹಣಾಲೊ.
"ವ್ಹಡ್ ನ್ಹಯ್" ಮಾರ್ಶಲ್ ಸಾಂಗಾಲಾಗ್ಲೊ. "ಕಾಮ್ ಸಂಪವ್ನ್ ತಿ ಧುವ್ಯೆತ್", ತಪಾಸಣಾಧಿಕಾರಿನ್ ತಿ ಪೊಟ್ಲಿ ಘೆತ್ಲಿ ಆನಿ ಮಾರ್ಶಲ್ ಸಕಯ್ಲ್ ವಚೊನ್ ಜಳ್ಚೊ ಲಾಂಪ್ಯಾಂವ್ ಆನಿ ಶೊವೆಲ್(ಚಟ್ಟೆ ಖೊರೆಂ) ಹಾಡ್ನ್ ಯೆತಾ ಮ್ಹಣಾಸರ್ ಧರ್ನ್ ರಾವ್ಲೊ. "ಆಮಿಂ ಯಾ", ತಾಣೆ ಮ್ಹಳೆಂ "ಆಮ್ಚೆಂ ಕಾಮ್ ಪೊಂತಾಕ್ ಪಾಂವ್ಚ್ಯಾರ್ ಆಸಾ".
ತಪಾಸಣಾಧಿಕಾರಿ ಜಾಗ್ರುತ್ಕಾಯೆನ್ ತಿ ರಗ್ತಾಳಿ, ಜಡ್, ಆಜೂನ್ ಜೀವ್ ಆಸಾ ತಸಿ ದಿಸ್ಚಿ, ತಿ ಪೊಟ್ಲಿ ಘೆವ್ನ್ ಘರಾ ಭಾಯ್ಲ್ಯಾ ಆಂಗ್ಣಾಂತ್ ಮಾರ್ಶಲಾ ಪಾಟ್ಲ್ಯಾನ್ಂಚ್ ಗೆಲೊ. ಮಾರ್ಶಲಾಚಾ ಹಾತಾಂತ್ಲೊ ಲಾಂಪ್ಯಾಂವ್ ಹಾಲ್ತಾನಾ, ತಾಚಾ ಪಾಂಯಾಂಚಿ ವ್ಹಡ್ ಕಾತ್ರಿ ಸಾರ್ಕಿ ಸಾವ್ಳಿ ಧರ್ಣಿರ್ ದಿಸ್ತಾಲಿ ಆನಿ ತೊ ಖುಶಾಲಾಯೆನ್ ಗಜಾಲಿ ಕರ್ತಾಲೊ. "ವ್ಹಯ್ ಸರ್ ಏಕ್ ಮನಿಸ್ ಜಿಯೆತಾನಾ ಏಕ್ ರಾಸ್ ಮನ್ಶಾಂಕ್, ಏಕ್ ರಾಸ್ ಪರಿಸ್ಥಿತೆಂತ್ ಪಳೆತಾ. ಸಮಸ್ಯೆಂ ಕಿತೆಂಗಿ ಮ್ಹಳ್ಯಾರ್, ಆಮ್ಕಾಂ ಸನ್ನಿವೇಶ್ (ಪರಿಸ್ಥಿತಿ) ಆನಿ ವ್ಯಕ್ತಿ ಮಧೆಂ ಗೊಂದೊಳ್ ಕರ್ಚಿ ಸವಯ್ ಜಾಲ್ಯಾ. ಅತಾಂ ತುಕಾಚ್ ಘೆವ್ಯಾಂ", ತಾಣೆ ತ್ಯಾಚ್ ಮೊವಾಳ್, ಖುಶಾಲ್ಕಾಯೆನ್ ಮ್ಹಳೆಂ. "ತುಜೊ ಉದ್ದೇಶ್ ಬರೊಚ್; ಪುಣ್ ನಿಯಮ್ ಕಾನೂನಾಂತ್ ಪಡೊನ್ ಸಗ್ಳೆಂ ಅಸ್ಪಷ್ಟ್ ಜಾಲೆಂ. ಆಮ್ಚೆಂ ಸಮಸ್ಯೆಂ ತೆಂಚ್. ಆಮಿಂ ಇತ್ಲಿ ಆಕ್ಷರಾಂ, ನಿಯಮಾ ಆನಿ ಸೂತ್ರಾಂ ಸೊದುನ್ ಕಾಡ್ಲ್ಯಾಂತ್ಗೀ ಹೆರ್ ಕಿತೆಂಚ್ ಆಮ್ಕಾಂ ಸುಸ್ತಾನಾ. ಖಿಂಚಾಯ್ ಎಕಾ ಅಕ್ಷರಾಕ್(ಉಪಾಯ್) ಯಾ ನಿಯಮಾಕ್ ಆಮಿಂ ಹೊಂದಾನಾಂವ್; ಆನಿ ನಿರಾಶಿ ಜಾತಾಂವ್. ದಾಕ್ತೆರಾನಿಂ ಲ್ಯಾಬೋರೆಟರಿಂತ್ ತಯಾರ್ ಕೆಲ್ಲಿ ಏಕ್ ಜೀವಿ, ಹಾಡಾಂ ಆನಿ ಅನ್ಕಿಟಿ ಕಾಡ್ನ್ ಉಡಂವ್ಕ್ ಶಿಕ್ಲ್ಲಿ, ಪುಣ್ ಹಾಡಾಂ ಆನಿ ಅನ್ಕಿಟಿ ಗೆಲ್ಯಾ ಮ್ಹಳ್ಳೆಂ ಕಳಿತ್ ನಾಸ್ತಾನಾ ಜಿಯೆಂವ್ಚ್ಯಾ ತಸಲ್ಯಾ ಜೀವಿಬರಿಂ ಆಮಿಂ ಜಾಲ್ಯಾಂವ್. ಆಮ್ಚಾ ಪಾಟಿಚೊ ಕಣೊ ಆಮಿಂ ಕಾಡ್ನ್ ಉಡಯ್ಲಾ. ಮನ್ಶಾಕ್ ಪಾಟಿಚೊ ಕಣೊ ಗರ್ಜ್ ನಾ ಆನಿ ತೊ ಆಸ್ಚೆಂಚ್ ಅಪ್ರಚಲಿತ್ ಮ್ಹಣ್ ಆಮಿಂ ಪಾತ್ಯೆಂವ್ಚಾ ಸ್ಥಿತೆಕ್ ಪಾವ್ಲ್ಯಾಂವ್. ಪೂಣ್ ಪಾಟಿಚ್ಯಾ ಕಣ್ಯಾಚಿ ಚಾಡಿ( groove ) ಆತಾಂಯ್ ಆಸಾ ಆನಿ ಏಕ್ ನಾ ಎಕಾ ದಿಸಾ ಪಾಟಿಚೊ ಕಣೊ ತ್ಯಾಚ್ ಜಾಗ್ಯಾರ್ ಬಸ್ತಾ. ಪೂಣ್ ಹಿ ಸಂಗತ್ ಆಮ್ಕಾಂ ಶಿಕಂವ್ಕ್ ಕಿತ್ಲೊ ವೇಳ್ ಲಾಗ್ತೊಲೊ ಆನಿ ಕಿತ್ಲೆ ಕಷ್ಟ್ ಆಸ್ತೆಲೆ ತೆಂ ಹಾಂವ್ ನೆಣಾ".
ತೆ ಅಂಗಣ್ ಉತರ್ಲೆ, ಚಡ್ನಿ ಚಡಾಲಾಗ್ಲೆ, ಆಪ್ಲ್ಯಾ ಮುಖಾರ್ ದೇವ್ದಾರ್ ರುಕಾಂಚೊ ಏಕ್ ಲ್ಹಾನ್ ಮಳೊ, ನೆಕೆತ್ರಾಂ ಭರ್ಲ್ಲ್ಯಾ ಆಕಾಸಾ ಸಕಯ್ಲ್ ಭವ್ಯ್ ದಿಸ್ಲೊ. ಮಾರ್ಶಲ್ ತಾಚೆ ಭಿತರ್ ರಿಗೊನ್ ರಾವ್ಲೊ. ತಾಣೆ ಲಾಂಪ್ಯಾಂವ್ ಧರ್ಣಿರ್ ದವರ್ಲೊ. ತಪಾಸಣಾಧಿಕಾರಿ ತಾಚಾ ಪಾಟ್ಲ್ಯಾನ್ ವೊಲಿಚಿ ಪೊಟ್ಲಿ ಘೆವ್ನ್ ವೆತಾಲೊ. ತಾಣಿ ಏಕ್ ಇಟ್ಯಾಂಚಿ ಗಡ್ ಆಸ್ಲ್ಲೊ ಚೌಕ್ ಜಾಗೊ ಪಳೆಲೊ. ಉಪ್ರಾಂತ್ ಥಂಯ್ಸರ್ ದೋನ್ ಫೊಂಡ್ ಸಾದ್ಯಾ ಗ್ರೇನೈಟ್ ಫಾತ್ರಾನ್ ಧಾಂಪ್ಲ್ಲೆ ದೆಕ್ಲೆ.
"ದೆವಾಧಿನ್ ಆನ್ಸೆ ಆನಿ ಶ್ರೀಮತಿ ಅನ್ಸೆ" ಮಾರ್ಶಲ್ ಮ್ಹಣಾಲೊ, "ಬಡ್ಡಿಚಾ ಬಾಯ್ಲೆಕ್ಯ್ ಆಪ್ಲ್ಯಾ ಸಂಗಿ ಹಾಂಗಾಸರ್ ಪುರಿಜಾಯ್ ಮ್ಹಳ್ಳಿ ಇಚ್ಚಾ ಆಸ್ಲ್ಲಿ. ಪೂಣ್ ತಿ ಹಾಂಗಾ ಫಕತ್ತ್ ಮೆಕಲಮಾ ಸಾಂಗಾತಾ ಎಕ್ಸುರ್ಪಣ್ ಭಗ್ತಿ ಕೊಣ್ಣಾ. ಆಸೊಂ... ಪಳೆಯಾಂ...". ತೊ ಏಕ್ ಘಡಿಭರ್ ಆಪ್ಲಿ ಖಾಡ್ಕಿ ಧರ್ನ್ ರಾವ್ಲೊ. ಹೆಂ ಪಳೆತಾನಾ ತಪಾಸಣಾಧಿಕಾರಿಕ್ ಏಕ್ ಮಾತಾರಿ ಸ್ತ್ರೀ ಝಡ್ ಖಂಯ್ಸರ್ ಲಾಂವ್ಚೆ ಮ್ಹಳ್ಳೊ ನಿರ್ಣಯ್ ಕರ್ನ್ ಆಸ್ಚೆ ಬರಿಂ ದಿಸ್ಲೆಂ. "ಜಾಕ್ಸನಾ ಥಾವ್ನ್ ಸುರು ಕರ್ನ್ ಹೆ ಫೊಂಡ್ ದಾವ್ಯಾ ಥಾವ್ನ್ ಉಜ್ವ್ಯಾಕ್ ಅಸಾತ್. ಪೂಣ್ ಚೆರ್ಕ್ಯಾಂಚ್ಯಾ ಜಲ್ಮಾ ಉಪ್ರಾಂತ್ ಜಾಕ್ಸನ್ ಆನಿ ಸ್ಟುವರ್ಟ್ ಹಾಂಗಾ ವಯ್ರ್ ’ಪಾ’ ಆನಿ ’ಮಾ’ ಲಾಗಿಂ ಆಯ್ಲೆ. ಅಶೆಂ ಬಡ್ಡಿಕ್ ಇಲ್ಲೊ ಜಾಗೊ ವಯ್ರ್ ಮೆಳ್ಳಾ ತಶೆಂ ತೊ ಹಾಂಗಾಸರ್ ಆಸ್ತೊಲೊ", ತಾಣೆ ಲಾಂಪ್ಯಾಂವ್ ಲಾಗಿಂ ವೊಡ್ಲೊ ಆನಿ ಖೊರೆಂ ಘೆತ್ಲೆಂ. ತಪಾಸಣಾಧಿಕಾರಿ ಆಜೂನೀ ತಿ ಪೊಟ್ಲಿ ಹಾತಾಂತ್ ಧರ್ನ್ ಆಸ್ಲ್ಲೆಂ ಪಳೆವ್ನ್, "ಸಕಯ್ಲ್ ದವರ್" ತಾಣೆ ಸಾಂಗ್ಲೆಂ. "ಹಾಂವೆ ಪಯ್ಲೆಂ ಖೊಂಡುಂಕ್ ಆಸಾ".
"ಹಾಂವ್ ಕಾಣ್ಗೆವ್ನ್ ರಾವ್ತಾಂ" ತಪಾಸಣಾಧಿಕಾರಿ ಮ್ಹಣಾಲೊ.
"ನಾನ್ಸೆನ್ಸ್, ಸಕಯ್ಲ್ ದವರ್" ಮಾರ್ಶಲಾನ್ ಮ್ಹಳೆಂ, ಬಡ್ಡಿಕ್ ಬೆಜಾರ್ ಜಾಯ್ನಾ.
ತಪಾಸಣಾಧಿಕಾರಿನ್ ಪೊಟ್ಲಿ ಇಟ್ಯಾಂಚಿ ಗಡ್ ಆಸ್ಲ್ಲ್ಯಾ ತ್ಯಾ ಜಾಗ್ಯಾರ್ ದವರ್ಲಿ. ಮಾರ್ಶಲಾನ್ ನಿಪುಣಾಯೆನ್ ವೆಗಿಂ ವೆಗಿಂ ಖೊಂಡುಂಕ್ ಸುರು ಕೆಲೆಂ ಆನಿ ಆಪ್ಲೆಂ ದೀರ್ಘ್ ಉಲೊಣೆ ಮುಂದರ್ಸುನ್ "ವ್ಹಯ್ ಸರ್, ಆಮಿಂ ಮನ್ಶಾಂಕ್ ವಿಸರ್ಲ್ಯಾಂವ್. ಆಮಿಂ ಮನ್ಶಾಂನಿಂ ಜಿಣಿ ಸಸಾರ್ ಮ್ಹಣ್ ಚಿಂತ್ಲ್ಯಾ ತರೀ ಜಿಣಿ ಸಸಾರ್ ಜಾಯ್ನಾ. ಜಿಣಿ ಬೋವ್ ಮೊಲಾಧಿಕ್ ಜಾವ್ನಾಸಾ. ಮ್ಹಜಾ ಪರ್ಮಾಣೆ WPA ಥಾವ್ನ್ ಪರಿಹಾರ್ ರೂಪಾರ್ ಪಯ್ಶೆ ಘೆವ್ನ್ ಜಿಣಿ ಸಾರ್ಚೆ ಪ್ರಾಸ್ ಅಭಿಮಾನ್, ಮರ್ಯಾದ್ ಆನಿ ಶಿಸ್ತೆನ್ ಜಿಯೆಲ್ಲ್ಯಾ ಮನ್ಶಾಚಾ ಜಿಣ್ಯೆಚೆಂ ಮೋಲ್ ಉಂಚ್ಲೆಂ ಜಾವ್ನಾಸಾ. ಹೆಂಚ್ ಆಮಿಂ ಪರ್ತ್ಯಾನ್ ಶಿಕೊಂಕ್ ಆಸಾ. ಕಷ್ಟ್ ಆಸ್ತೆಲೆ, ಅಸಲೆಂ ಶಿಕಾಪ್ ಬೋವ್ ಚಡ್ ಕಷ್ಟಾಚೆಂ - ಜಾಂವ್ಕ್ ಪುರೊ ವರ್ಜೀನಿಯಾ ಮ್ಹಣಾಸರ್ ಪಾಯ್ ವಾಟೆನ್ ವೆಚೆಂ, ಕಿತ್ಯಾಕ್ ತಾಚಿ ಆವಯ್ ಥಂಯ್ ಥಾವ್ನ್ ಆಯಿಲ್ಲಿ. ಜಾಂವ್ಕ್ ಪುರೊ ಝುಜಾಂತ್ ಸಲ್ವೊನ್ ಪಾಟಿಂ ಯೆಂವ್ಚೆಂ - ಮಾತಾರ್ಯಾ ಅನ್ಸೆಕ್ ಹೆ ಅನುಭವ್ ಏಕ್ ಲಿಸಾಂವ್ ಜಾಲ್ಲೆಂ. ಕಿತೆಂಯ್ ಜಾಂವ್, ತೊ ಹೆಂ ಬರ್ಯಾನ್ ಶಿಕ್ಲೊ ಆನಿ ಕಿತ್ಲ್ಯಾ ಬರ್ಯಾನ್ ಶಿಕ್ಲೊಗೀ, ಆಪ್ಲ್ಯಾ ಚೆರ್ಕ್ಯಾಂಕೀ ತಾಣೆ ಹೆಂಚ್ ಶಿಕಯ್ಲೆಂ. ತುಂವೆಂಚ್ ಪಳೆಲೆಂ ನ್ಹಯ್, ಬಡ್ಡಿನ್ ಆಪ್ಲ್ಯಾ ಚೆರ್ಕ್ಯಾಂಕ್ ವೆಚೊ ವೇಳ್ ಆಯ್ಲೊ ಮ್ಹಣ್ ಸಾಂಗ್ತಾನಾ, ಸರ್ಕಾರಾನ್ ಆಪಂವ್ಕ್ ಧಾಡ್ಲಾಂ ಮ್ಹಳ್ಳ್ಯಾ ಅರ್ಥಾನ್ ನ್ಹಯ್. ಆನಿ ಕಸೊ ತಾಣಿ ತಾಕಾ ಆದೇವ್ಸ್ ಮಾಗ್ಲೊ?. ಪ್ರಬುದ್ಧ್ ಮನಿಸ್ ಕಿತೆಂಚ್ ಲಿಪಯ್ನಾಸ್ತಾಂ, ಲಜ್ ಮ್ಹಳ್ಳಿ ಲೆಖಿನಾಸ್ತಾಂ ಎಕಾಮೆಕಾ ಉಮೊ ದೀವ್ನ್ ಭಾಯ್ರ್ ಸರ್ಲ್ಲೆ. ಹಾಂವ್, ತುಕಾ ಹೆಂ ಸರ್ವ್ ಸಮ್ಜೊಂವ್ಚೆ ಪ್ರಯತ್ನ್ ಕರ್ನ್ ಆಸಾಂ... ಜಾಲೆಂ" ತಾಣೆ ಮ್ಹಳೆಂ "ಇತ್ಲೊ ವ್ಹಡ್ ಪುರೊ ದಿಸ್ತಾ".
ತೊ ಫಟಾಫಟ್ ಸಲೀಸಾಯೆನ್ ಉಟ್ಲೊ. ತಪಾಸಣಾಧಿಕಾರಿ ಉಟ್ಚ್ಯಾ ಪಯ್ಲೆಂಚ್ ತಾಣೆ ತಿ ಪೊಟ್ಲಿ ತ್ಯಾ ಬಾರಿಕ್ ಖಂದ್ಕಾಂತ್ ದವರ್ಲಿ, ಆನಿ ವೆವೆಗ್ಗಿಂ ಖೊರ್ಯಾನ್ ತಾಚೆ ವಯ್ರ್ ಮಾತಿ ಘಾಲಿಲಾಗ್ಲೊ. ಉಪ್ರಾಂತ್ ತೊ ಉಬೊ ಜಾಲೊ - ಏಕ್ ದೀಗ್, ಶಿರ್ಪುಟೊ ಮಾತಾರೊ ಸವ್ಕಾಸಾಯೆನ್ ಉಸ್ವಾಸ್ ಸೊಡಿತ್ತ್.
"ಆತಾಂ ಆಮಿಂ ಶಹರಾಕ್ ಪಾಟಿಂ ವಚ್ಯೆತ್ ಮ್ಹಣ್ ದಿಸ್ತಾ" ತೊ ಮ್ಹಣಾಲೊ.
ಡೊ. ಜೂಡಿ ಪಿಂಟೊ
ಡೊ. ಜೂಡಿ ಪಿಂಟೊ (ವೆರೊನಿಕಾ ಜುಡಿತ್ ಕಾರ್ಲೊ)
ಟೀಚರ್ ಜಾವ್ನ್ ಸೈಂಟ್ ಜೆರೊಸಾ ಇಂಗ್ಲಿಶ್ ಪ್ರಾಯ್ಮರಿ ಸ್ಕೂಲ್ (1975-1991)
ರಿಟಾಯರ್ಡ್ ಸಹ ಪ್ರಿನ್ಸಿಪಾಲ್ ಆನಿ ಪ್ರೊಫೆಸರ್ ಹಿಂದಿ
ವಿಭಾಗ್, ಸೈಂಟ್ ಎಲೋಸಿಯಸ್ ಕಾಲೆಜ್, ಮಂಗ್ಳುರ್. (1991-2016)
ಪತಿಣ್: ಮಾನೆಸ್ತ್ ಜೆ. ಬಿ. ಪಿಂಟೊ (ರಿಟಾಯರ್ಡ್ ಎಯರ್ಪೋರ್ಸ್ ಆನಿ ಎಸ್ ಬಿ ಐ) ಆನಿ ಆವಯ್ ದೊಗಾಂ ಚೆಡ್ವಾಂ ಭುರ್ಗ್ಯಾಂಚಿ, ಎಕ್ಲೆಂ ಯು ಎಸ್ ಎ, ಆನಿ ದುಸ್ರೆಂ ಬೆಂಗ್ಳುರ್ ಅಪ್ಲ್ಯಾ ಕುಟ್ಮಾ ಸವೆಂ ವಸ್ತಿ ಕರುನ್ ಆಸಾತ್.
ಶಿಕಪ್: ಎಮ್.ಎ (ರಾಜ್ಶಾಸ್ತ್ರ್), ಎಮ್.ಎ, ಪಿ ಎಚ್ಡಿ(ಹಿಂದಿ) ಎಮ್.ಎಸ್ಸಿ (ಅಪ್ಲಾಯ್ಡ್ ಸಾಯ್ಕೊಲೊಜಿ) ಟೆಕ್ ಆನಿ ಬಿಎಡ್.
ಸಾಹಿತಿಕ್ ವಾವ್ರ್ : ’ಸಲ್ವಣೆಚಿ ಜೀಕ್’, ಹಿಂದಿ ಥಾವ್ನ್ ಕೊಂಕ್ಣೆಂತ್ ತರ್ಜಣ್ ಕೆಲ್ಲೊ ಕಾಣ್ಯೆ ಬೂಕ್ - ಸೆವಕ್ ಪ್ರಕಾಶನ್ 2006 - ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಥಾವ್ನ್ ವಿಶೇಷ್ ಪುರಸ್ಕಾರ್ ಲಾಭ್ಲಾ-2007
’ಸಮಶ್ಯಾಂಕ್ ಪರಿಹಾರ್’ ಲೇಖನಾ ಜಮೊ - ಸೆವಕ್ ಪ್ರಕಾಶನ್ 2017
ಕೊಂಕಣಿ ಸಾಹಿತ್ಯ ಅಕಾಡೆಮಿ (2000)- ಜೂರಿ ಮೆಂಬರ್ ಜಾವ್ನ್ ಸೆವಾ.
’ಸ್ಪುಟ್ಸ್ರಿಜನಾ ಪ್ರಕಾಶನ ಥಾವ್ನ್ ಉದೆಲ್ಲ್ಯಾ ವಿತೊರಿ ಕಾರ್ಕಳ್ ಹಾಚ್ಯಾ ಸಂಪಾದಕ್ಪಣಾರ್ ’ಕೊಂಕ್ಣೆಚ್ಯಾ ವಾಡಾವಳಿಂತ್ ಸ್ತ್ರೀಯಾಂಚೊ ಪಾತ್ರ್’ ಹಾಂತು ಲೇಖನ್.
’ಬಹುಭಾಷಿಕ್ ಅನುವಾದ್ - ಕೊಂಕಣಿ ಸ್ತ್ರೀ ಬರಯ್ಣಾರಾಂಚೊ ವಾವ್ರ್’ ಹಾಚೆರ್ ಸಂಶೋಧನ್ ಪತ್ರ್ ಮಂಡನ್, ಯುನಿವರ್ಸಿಟಿ ಕಾಲೆಜ್, ಮಂಗ್ಳುರ್.
’ಅಮರ್ ಕೊಂಕಣಿ’ ಅಧ್ಯಾಯನ್ ಪುಸ್ತಕ್ ಸಂಪಾದಕೀಯ್ ಮಂಡಳಿಂತ್ ವಾವ್ರ್ (1994-1999)
’ಮಾಣಿಕ್’ -ಭುರ್ಗ್ಯಾಂಲೆ ಕೊಂಕಣಿ ಮಾಸಿಕ್ ಸಂಪಾದಕೀಯ್ ಮಂಡಳಿಚೊ ಸಾಂಧೊ (1998-2002)
’ಜೆಜು ರಾಯ್’ -ಭುರ್ಗ್ಯಾಂಲೆ ಕೊಂಕಣಿ ಮಾಸಿಕ್ ಸಂಪಾದಕೀಯ್ ಮಂಡಳಿಚೊ ಸಾಂಧೊ (2011-2016)
ಕರ್ನಾಟಕ್ ರಾಜ್ಯ್ ತಿಸ್ರ್ಯಾ ವರ್ಗಾಚ್ಯಾ ಕೊಂಕಣಿ ಪಾಠ್ಯ್ ಪುಸ್ತಕ್ ಬರವ್ಪಿ ಪಂಗ್ಡಾಚೊ ಚೆಯಾರ್ಪಾರ್ಸನ್ (2010-2011).
ಕರ್ನಾಟಕ್ ರಾಜ್ಯ್ ಹಿಂದಿ ಪಾಠ್ಯ್ ಪುಸ್ತಕ್ ಬರವ್ಪಿ ಪಂಗ್ಡಾಚೊ ಸಾಂದೊ (2011-2012).
2011-ಂತ್ ಅಂತರ್ ಧರ್ಮ್ ಸಮ್ಮೇಳನಾಂತ್ ಭಾಗ್ ಘೆತ್ಲಾ.
AIR ಮಂಗ್ಳುರ್ ಹಾಚೆರ್ ಕೊಂಕಣಿ, ಕನ್ನಡ, ಇಂಗ್ಲಿಷ್ ಆನಿ ಹಿಂದಿ ಭಾಷೆಂಚ್ಯಾ ಸಂವಾದ್ ಆನಿ ಉಲವ್ಪ್ ಕಾರ್ಯಕ್ರಮಾನಿಂ ಪಾತ್ರ್.
ಬೆಂಗಾಲಿ ನಾಟಕ್ "ಆನಂದ್ ಮಠ್" ಕನ್ನಡಾಂತ್ ಸಾರಂಗ್ ರೆಡಿಯೊರ್ ಸಾದರ್ ಕೆಲಾ.
ತಸೆಂಚ್ ವಿವಿಧ್ ಕೊಂಕಣಿ ಪತ್ರಾನಿಂ- ರಾಕ್ಣೊ, ಸೆವಕ್, ಕಾಣಿಕ್, ದಿವೊ ಇತ್ಯಾದಿನಿಂ ಸರಾಗ್ ಲೆಖನಾವಳ್ ಪ್ರಸಾರ್ ಜಾಲ್ಯಾತ್.
ಹಿಂದಿ ಆನಿ ಕನ್ನಡಾಂತ್ಲ್ಯೊ ಸಭಾರ್ ಮಟ್ವ್ಯೊ ಕಾಣ್ಯೊ ಕೊಂಕ್ಣೆಕ್ ತರ್ಜುಮೊ ಕೆಲ್ಯಾತ್.
