आंकडो १२

खुन ऎक कला - हांगासर हि कस्लि खुन? बौद्दिक उत्रांनि खुन उत्राचो अर्थ जाव्नासा ’संप्णि’, वा ’नास’. हि कस्लि खुन? सिद्दांतिक खुन? तार्किक खुन? हें त्या त्या वाच्प्याचेर सोडुन वेतास्तां कवितेचि सोभाय वाडुन वेता.

बि.ए. ममता अरसीकेरे वृत्तेन शिक्षकि, पाट्ल्य धा-भारा वर्सां थाव्न सराग रितिन कानडिंत कविता व्हाळंव्च्या हिच्यो चड्ताव कविता समाजिक काळ्जेचेर तशेंच समाजिक स्पंदनाचेर आस्तात. हि कविता हिच्या आय्लेवार पर्गट जाल्ल्या ’संते सरकु’ कविताजम्यांत्लि विंच्ल्या. भॊव संप्या उत्रांनि विण्ल्या तर्‌य़ी हि कविता सादि जांव्क साध्य ना; ’संसारांत सामाजिक क्रूर्‌पणाचि खुन कर्चें चिंतप’ केदिंच सलीस न्हय.

आंकडो १२

खुन्‌यी ऎक कला

हांवें खुन करुंक

थराय्लां

कित्याक खुन कर्चि

ऎक कला

एकाच्च माराक

खुनि कर्चोना

हंता हंतानि

मोराजय तुंवें

खुन्‌यी इत्लि

सलीस म्हणुन

भगुंक्‌न्हजो पळे

कितेंच सलीसायेन

लाभुंक न्हजो

आनि मार्ल्यारी साक्स

मेळुंक्‌न्हजो

तुजो पात्तोय

लाभुंक्‌न्हजो

तीय ऎक चलाकि

देकुनंच सांग्लें

खुन्‌यी ऎक कला

हॆय पिश्या

अत्याचारी

खुन कर्तलों

क्रूर्‌पणाक

तुका चुकोन काण्गेंव्क

जाय्तिं निबां आसात

म्हाका मारुंक

जाय्तिं तर्कां आसात.

***

[कानडि मूळ: बि. ए. ममता अरसीकेरे, कोंकणीक: व्यालि क्वाड्रस]

ममता अरसीकेरे: बि.ए. ममता अरसीकेरे वृत्तेन शिक्षकि, पाट्ल्या धा-भारा वर्सां हिणे कांय शेंभोरां वय्र कविता बरय्ल्यांत, कविगॊश्टिंनि वाच्ल्यांत, कवितास्पर्ध्यांनि इनामां सय्त आप्णाय्ल्यांत. हिच्या कवितेंचो जमो ’संते सरकु’ आय्लेवार पर्गट जाला.