Rund Ani Oxir Dar

[Kovita] Rund Ani Oxir Dar

Monis hea somsarant jietastam zaitem xikota. Kaim thoddem vhoddilam thaun, kaim thoddem iskolant, kaim thoddem vachun tor zaitem svotachea jivitant. Ani bori, zoitachi vatt kednam-i oxir asta. Hea kovitent soit ek kanninch asa ani kovita vachun gel'leporinch vevegolleo kanneo motint udetat.

Bab Vincy Quadrosacheo choddotavo kovitemni noitik molam parokunk mellotat. Hea kovitench soit aschem osolench chintop parokunk tuka soddotam.

[Kovita] Rund Ani Oxir Dar 

Mhojea tornea jivitant

Ayuxyachi novich komri fuli’li tednam

Mhojea doivotachem dorxon ghoddlem

Sottie rati boroil’lie pormannem

Chear ollincho ek provocheon dil’lem

Puta, mhoje koddem asat don daram

Ek rund, duddu-girestkayen bhorlolem

Sonvsarantlea sogllea sukhanchem

Dusrem dar oxir, otmik girestkayechem

‘Choice is yours’, provocheon sompoil’lem

Hanvem kelem durlokx provocheonacher

Cholot ravlom rosto sukhacho

Avoi-bapai kustarchea folgacho

Maddoit sonvsar chear disancho

Anonduch anond melloit jivitacho

Mhojem sorvost omplem tea rund darak

Chearitreachem mhaka naslem bhan

Girestkayechea pakhamni uddot

Marlem xevttun monisponn

Dakhoilem dhoniponn, thoddem dadleponn

Hat haloi, yetalo sonvsar mhojie fattlean

Stree lingak dilo nam kednanch respet

Sodanch hanvponnan jiyelom

Kiteak mhoje koddem doivot aslem

Rund dar anik zhogzhogpak laglem

Ek dis mhaka holmolem zanntteponn

Bondhon ailem mhojea halchalincher

Sol’lo divpak nam avoi-bapai, nam konn

Vhanvon geli hatantli ramponn

Kelem tizoriechi chavienui locheann

Ghoddlem porthun Teach doivotachem dorxon

Tannem aiz mhaka dilem nam provocheon

Punn apoilo bhitor oxir darantlean

Khuxalkayen keli toyari novsornniechea monan

Zainam zalem mhoje koddem vochonk utthon

Chintlem, tacheach hatak dhorunk

Mon pavtalem punn hat koxttotale

Girestkayecho zainaslo kainch faido

Yenaslo konnuch mhojea adharak

Soirannaui naslem mhojea sangatak

Doivotan oxir dar dhampunk suru kelem

Thoddea vellan tem bondui zalem

Teach khinnak rund darantlean ek killanch

Kan foddttale tori thoim konnuch naslo

Ornotolea golleant ghalunk udkacho themboi naslo

Konnak tori apounk hanvem hat haloilo

Mhojem konnak aikonk yenaslem

Arddopacho yotn kortalom punn nirfoll

Rogtacho dab vaddlo, ang xirxirlem

Konnachoch adhar nastanam mathem bhirbhirlem

Khuim gelem mhojem tornatteponn?

Mhojie bhitorlem tez ani hanvponn?

Dhoniponn ani tem doivot?

Bond korun oxir xasvot dar?

Ugtem soddun polkem rund dar?

[March, 2020]