ದಾಯ್ಜ್ ತೆಸಾಂವ್: "ಕೊಂಕ್ಣಿ ಉಲಯ್, ಕೊಂಕ್ಣಿ ಉರಯ್, ಕೊಂಕ್ಣಿ ಆಮ್ಚಿ ಆವಯ್"
ನಿರ್ಭಾಗ್ಯಾಚೆಂ ಸ್ವಪಾಣ್
ಅವಸ್ವರ್ 17
ಸಾಂಜೆಚೊ ವೇಳ್.ಮಾಹಿಮ್ ದರ್ಯಾ ತಡ್..
ತೊ ದೀಸ್ ಆಯ್ತಾರ್. ಗಿಮೆಚೊ ಕಾಳ್ ಜಾಲ್ಲ್ಯಾನ್ ಆನಿಂ ಆಯ್ತಾರ್ ಜಾಲ್ಲ್ಯಾ ವರ್ವಿಂ ದರ್ಯಾ ತಡಿರ್ ಜಾಯ್ತೊ ಲೋಕ್ ಕುಡ್ಸಾಲ್ಲೊ. ಸಾಂಜೆಚ್ಯಾ ಮಧುರ್ ಹವ್ಯಾಕ್ ಮನ್ ಖುಶಾಲ್ ಜಾತಾಲೆಂ. ದರ್ಯಾಚ್ಯಾ ತ್ಯಾ ಅಪರಿಮಿತ್ ಗಂಭೀರಾಯೆಕ್ ಗಿನ್ಯಾನ್ ವಿಜ್ಮಿತ್ ಜಾತಾಲೆಂ. ಆನಿಂ ಬುಡ್ಚ್ಯಾ ಸುರ್ಯಾಚಿ ತಾಂಬ್ಡಿಂ ಕೀರ್ಣಾಂ ಅಂತ್ರಳ್ ಆನಿಂ ಭುಮಿ ಏಕ್ ಸಾರ್ಕೆಂ ತಾಂಬ್ಡೆಂ ರಂಗಯ್ತಾನಾ, ವಿಚಿತ್ರ್ ಸೊಭಾಯ್ ಉದೆತಾಲಿ.
ರಾಜುಚ್ಯಾ ವತ್ತಾಯೆಕ್, ಮೆಲ್ವಿನ್ಯಿ ದರ್ಯಾ ತಡಿಕ್ ಆಯಿಲ್ಲೊ. ಪೆಂಟಾಳೆರ್ ಬಸೊನ್ ತೆ ದರ್ಯಾಚ್ಯಾ ಲಾರಾಂಚೆರ್ ನದರ್ ದಿತಾಲೆ.
ಮೆಲ್ವಿನ್ ಬೊಂಬಯ್ ಯೇವ್ನ್ ಏಕ್ ಮಹಿನೊ ಉತರ್ನ್ ಗೆಲ್ಲೊ. ಶೀನಾಕ್ ತ್ಯಾ ಅವ್ದೆಂತ್ ಪೊಲಿಸಾಂನಿ ಮಂಗ್ಳೂರಾಕ್ ಪಾಟಿಂ ಧಾಡ್ಲ್ಲೆಂ. ರಾಜುಕ್ ಅನಿಂ ಮೆಲ್ವಿನಾಕ್ ದೋನ್ ಪಾವ್ಟಿಂ ಪೊಲಿಸಾಂನಿ ಆಪವ್ನ್ ಧಾಡ್ಲ್ಲೆಂ. ಇನ್ಸ್ಪೆಕ್ಟರ್, ಗಾಂವ್ಚೊಚ್ ಜಾಲ್ಲ್ಯಾನ್, ತಾಂಕಾಂ ದೊಗಾಂಕ್ ಶೀನಾಚ್ಯಾ ಲಫ್ಡ್ಯಾಂತ್ ತಾಣೆಂ ವೊಡ್ಲೆಂನಾ ನ್ಹಂಯ್ ತರ್, ಚೊರಿ ಕೆಲ್ಲ್ಯಾ ಮನ್ಶಾಂ ಸಾಂಗಾತಾ ಹೆಯಿ ಅಸ್ಲ್ಲೆ ಮ್ಹಣ್, ತಾಂಕಾಯಿ ಕೊಡ್ತಿಚೆಂ ದಾರಾಂ ಪಳೆಂವ್ಕ್ ಪಡ್ತಿಂ.
"ಮೆಲ್ವಿನ್.....ಸಾಂಜೆಚೆಂ ವಾರೆಂ ತುಜ್ಯಾ ಶರೀರಾಕ್ ಲಾಗ್ತಾನಾ ತುಕಾ ಮತಿಕ್ ಹಾಳ್ವಾಯ್ ಭೊಗ್ತಾ ಆಸ್ತೆಲಿ. ದರ್ಯಾ ತಡಿರ್ ಬಸ್ಲ್ಯಾರ್ ಕಸಲಿಯ್ ಬೆಜಾರಯ್ ಪಯ್ಸ್ ಸರ್ತಾ..." ರಾಜು ಉಲೈಲೊ.
"ವೊಯ್......ರಾಜು...ನಿಜಾಯ್ಕಿ ಸುಂದರ್ ದರ್ಯಾ ತಡ್ ಹಿ...." ಯಂತ್ರಾಬರಿ, ಚಿಂತಿನಾಸ್ತಾಂ ತೊ ಸಾಂಗಾಲಾಗ್ಲೊ. ತ್ಯಾ ವೆಳಾರ್ ದರ್ಯಾ ತಡಿಚ್ಯಾ ಮೋವ್ ರೆಂವೆರ್ ಬಸೊನ್ ವಿಶ್ರಾಂತ್ ಘೆಂವ್ಚ್ಯಾ ಸಬಾರ್ ತರ್ನ್ಯಾ ಜೊಡ್ಯಾಂಕ್ ತೊ ದೆಖ್ತಾಲೊ.
ತಾಚಿಂ ಚಿಂತ್ನಾಂ ಜಾಣಾಂ ಜಾಲ್ಲ್ಯಾಬರಿ ರಾಜು ಮ್ಹಣಾಲೊ - "ಹುಂ....ಮೋಗ್ ಕರ್ಣಾರಾಂಚಿ ಜೊಡಿಂಯಿ ಸಬಾರ್ ಅಸಾತ್ ಹಾಂಗಾ. ಜೀವನಾಂತ್ಲೊ ದೋನ್ ದಿಸಾಂಚೊ ಖೆಳ್......ಹಾಂವ್ ಚಿಂತ್ತಾಂ, ತುಜ್ಯಾ ಆದ್ಲ್ಯಾ ಜಿಣಿಯೆ ವಿಷ್ಯಾಂತ್ ಉಲವ್ನ್. ಹಾಂವ್ ತುಕಾ ದುಕೈನಾ ಮ್ಹಣ್...
"ನಾ ರಾಜು.... ತೆಂ ಹಾಂವ್ ವಿಸ್ರೊಂಕ್ ಸಾಧನ್ ಕರ್ತಾಂ."
"ಪುಣ್ ತುಂ ಸಲ್ವಾಲಾಯ್!"
"ಕಿತ್ಯಾಕ್....?"
"ತುಜೆಂ ತೊಂಡ್ ಆರ್ಶ್ಯಾಂತ್ ಪಳೆವ್ನ್ ಮಾಗಿರ್ ಸಾಂಗ್. ತುಜೊ ಜಿನೊಸ್ ಆಜ್, ಆಸೊ ಕಿತ್ಯಾಕ್ ಜಾಲಾ ಸಾಂಗ್. ತುಜ್ಯಾ ತೊಂಡಾರ್ ಸ್ವಾಭಾವಿಕ್ ಹಾಸೊ ಆನಿಂ ಚುರ್ಕಾಂಯ್ ನಾ. ಕಿತ್ಯಾಕ್? ದುಃಖಿ ಮನಿಸ್ ಸಂಸಾರಾಕ್ಚ್ ರಡೈತಾ ಮೆಲ್ವಿನ್. ಆನಿಂ ಹಾಸ್ತೊಲೊ ತೊ ಆಪ್ಣಾ ಸಂಗಿಂ ಸಂಸಾರಾಕ್ ಹಾಸಯ್ತಾ."
"ಬಹುಶಃ ತುಕಾಯಿ ಹಾಂವ್ ಬೆಜಾರಾಯೆಕ್ ಕಾರಣ್ ದಿತಾಂ.." ಕಳ್ವಳ್ಳೊ ಮೆಲ್ವಿನ್.
ಕಿತೆಂ ಉಲಂವ್ಚೆಂ ಕಳಾನಾಸ್ತಾಂ ರಾಜು ಏಕ್ ಕ್ಷಣ್ ವೊಗೊ ರಾವ್ಲೊ. ’ಮೆಲ್ವಿನ್...." ನಿರ್ಧಾರ್ ಭರ್ಲ್ಲ್ಯಾ ತಾಳ್ಯಾನ್ ತೊ ಉಲೈಲೊ "ಹಾಂವ್ ಶೀದಾ ಉಲೈಲ್ಯಾರ್. ತುಂ ವಾಯ್ಟ್ ಮಾಂದ್ಚೊನಾಂಯ್ ಮ್ಹಣ್ ಚಿಂತ್ತಾಂ..."
"ಪಳೆ, ತುವೆಂ ಅಶೆಂಚ್ ಸದಾಂನಿತ್ ಕರ್ಗೊನ್ ರಾಂವ್ಚೆಂ ಮ್ಹಾಕಾ ಬರೆಂ ದಿಸಾನಾ. ತುಜ್ಯಾ ಬರ್ಯಾ ಫಾಲ್ಯಾಂತ್ ಮ್ಹಾಕಾಯಿ ಅತ್ರೆಗ್ ಆನಿಂ ಉಮೆದ್ ಆಸಾ. ಕಿತ್ಯಾಕ್, ತುಂ ಮ್ಹಜೊ ಮಿತ್ರ್. ಹಾಂವೆಂ ಸಕ್ಡಾಂವರ್ನಿಂ ಪಯ್ಲೆಂ ತುಕಾ ಸಾಂಗ್ಚೆಂ- ತುವೆಂ ಖಂಯ್ ಮುಣಿ ಕಾಮಾಕ್ ಲಾಗಾಜಾಯ್"
ಮೆಲ್ವಿನಾನ್ ಜಾಪ್ ದಿಲಿನಾ. ತೊ ಧರ್ಣಿಕ್ ದೀಷ್ಟ್ ಲಾವ್ನ್ ವೊಗೊ ರಾವ್ಲೊ.
"ಮೆಲ್ವಿನ್. ಮ್ಹಜ್ಯಾ ಕಸಲ್ಯಾ ಸ್ವಾರ್ಥಾನ್ ಹೆಂ, ಹಾಂವ್ ತುಕಾ ಸಾಂಗಾನಾ. ತುಜ್ಯಾಚ್ ಬರ್ಯಾಚ್ಯಾ ದಿಷ್ಟಿನ್ ಹಾಂವೆಂ ತುಕಾ ಸಾಂಗ್ಚೆಂ. ಪಳೆ, ತುವೆಂ ಮನ್ ಕೆಲ್ಯಾರ್ ಫಾಲ್ಯಾಂ ಸಕಾಳಿ ತುಕಾ ಎಕಾ ’ಕೆಮಿಕಲ್ ಫರ್ಮಾಂತ್’ ಕಾಮ್ ಲಾಗೊವ್ನ್ ಘಾಲ್ತಾಂ ಹಾಂವ್"
ಮೆಲ್ವಿನಾಕ್ ಸಂತೊಸ್ಯಿ ಜಾಲೊನಾ. ಬೆಜಾರಾಯ್ ತರೀ ಬೊಗ್ಲಿನಾ. ಭಾರಾಧಿಕ್ ಸ್ವರಾನ್ ತಾಣೆಂ ವಿಚಾರ್ಲೆಂ - "ಹಾಂವೆಂ ಕಾಮಾಕ್ ವೊಚಾಜಾಯ್ಚ್ಗಿ?"
ರಾಜುಕ್ ಖರೆಂಚ್ ವಿಜ್ಮಿತ್ ಜಾಲೆಂ ತೆಂ ಸವಾಲ್ ಆಯ್ಕಾತಾನಾ. ದುಸ್ರ್ಯಾ ಘಡಿಯೆ, ತೊ ಮ್ಹಣಾಲೊ - "ತುಂ ಆಶೆಂ ಕಿತ್ಯಾಕ್ ಸವಾಲ್ ಕರ್ತಾಯ್ ಮ್ಹಾಕಾ ಸಮ್ಜಾನಾ. ತುಜ್ಯಾ ಮನಾಚಿ ಸ್ಥಿತಿ ಹಾಂವ್ ಜಾಣಾ. ತುಜ್ಯಾ ದುಃಖಾಂತ್ ಹಾಂವೀ ದುಃಖ್ ಪಾವ್ತಾಂ. ತರೀ ಹಾಂವೆಂ ಮ್ಹಣ್ಚೆಂ, ಘರಾಚ್ ತುಂ ಬಸೊನ್ ಖಂತ್ ಕರ್ಚಿ ಜಾಲ್ಯಾರ್ ತುಜೆಂ ದುಃಖ್ ತುಂ ವಿಸ್ರೊಂಕ್ ಸಕ್ತಾಯ್ಗಿ?"
ಮೆಲ್ವಿನಾ ಥಾವ್ನ್ ಜಾಪ್ ಆಯ್ಲಿನಾ.
"ತತ್ವಜ್ಞಾನಾಂತ್ ಆಶೆಂ ಆಸಾ ಮೆಲ್ವಿನ್...." ರಾಜುನ್ ಮುಖಾರ್ಸಿಲೆಂ, "ಪಯ್ಲೆಂ ಕಸಲಿಯ್ ಸಂಗತ್ ಮನಿಸ್ ಮತಿಂತ್ಚ್ ಆಟೈತಾ - ಆಪುಣ್ ನಿಜಾಯ್ಕಿ ತಿ ಪಾತ್ಯೆನಾತ್ಲ್ಯಾರೀ, ಉಪ್ರಾಂತ್ ಆಪ್ಲೆಸ್ಥಕಿಂ ವೊಡ್ಲ್ಯಾನ್ ತಿ ಉಚಾರ್ತಾ. ಆನಿಂ ನಿಮಾಣೆಂ ದುಸ್ರ್ಯಾಲಾಗಿಂ ತಿಚ್ ಸಂಗತ್ ಸಾಂಗ್ತಾಂ. ಆನಿಂ ದುಸ್ರ್ಯಾಂಕೀ ಪಾತ್ಯೆಂವ್ಕ್ ಕರ್ನ್, ಆಪುಣ್ಯಿ ಪಾತ್ಯೆತಾ. ಆತಾಂ, ತುಜೆಥಂಯ್ ಜಾಲಾಂ ತಶೆಂಚ್. ತುಜೆಥಂಯ್ ಏಕ್ ಅನ್ವಾರ್ ಆಯ್ಲೆಂ ಖರೆಂ, ತಾಂತ್ಲೆಂ ತುಕಾ ಸಾಂಬಾಳೊನ್ ಉಟೈತೆಂ. ತುಂ ಕಬೂಲ್ ಜಾಲೊನಾಂಯ್. ಮತಿಂತ್ ತುವೆಂ ಚಿಂತ್ಲೆಂಯ್, ಸಂಸಾರ್ ಕಾಬಾರ್ ಜಾಲೊ ಮ್ಹಣ್. ಉಪ್ರಾಂತ್ ತುವೆಂ ಘರ್ ಸೊಡ್ಲೆಂಯ್ ಆನಿಂ ಬೊಂಬಯ್ ಆಯ್ಲೊಯ್. ಹಾಂಗಾಸರ್ ತುಜಿ ತಿಂಚ್ ಚಿಂತ್ನಾಂ ತುಕಾ ಧೊಸುಂಕ್ ಲಾಗ್ಲಿಂ. ತುಜೆ ಜೀವನ್ ಪಿಡ್ಡ್ಯಾರ್ ಜಾಲಾಂ ಮ್ಹಣ್. ಸಾಂಗ್, ತುಂ ತರ್ ಬೊಂಬಯ್ ಕಿತ್ಯಾಕ್ ಆಯಿಲ್ಲೊಯ್?"
ಹ್ಯಾ ಸವಲಾಕ್ಯಿ ಮೆಲ್ವಿನಾಚಿ ಜಾಪ್ ಆಯ್ಲಿನಾ.
"ಮೆಲ್ವಿನ್, ಮನ್ಶಾಚೆಂ ಧ್ಯಾನ್ ಜರ್ ಎಕಾಚ್ ಸಂಗ್ತಿರ್ ಆಸಾತ್, ತಾಕಾ ದುಸ್ರ್ಯಾ ಖಂಯ್ಚ್ಯಾಯಿ ಸಂಗ್ತಿ ಥಂಯ್ ಮನ್ ಆಸನಾ. ತುಂ ಜರ್, ಆದ್ಲಿಂ ಘಡಿತಾಂಚ್ ವೊರವ್ನ್ ನೆರಾಯ್ಶಿ, ತುಜ್ಯಾ ಕಷ್ಟಾಂಕ್ ಆಂತ್ಯ್ಚ್ ಆಸ್ಚೆಂನಾ ತೆಂ ಖಂಡಿತ್. ದೆಕುನ್ ಹಾಂವೆಂ ತುಕಾ ಸಾಂಗ್ಚೆಂ, ತುಂ ಖಂಯ್ ತರಿ, ಕಾಮಾಕ್ ರಿಗ್ಲೊಯ್, ತೊ ಆದ್ಲೊ ಆಡೂಕ್ ಉಗ್ಡಾಸ್ ವಿಸ್ರೊಂಕ್ ತುಕಾ ಸುಲಭ್ ಜಾತೆಲೆಂ. ಹಾಂವೆಂ ಸಾಂಗ್ಚೆಂ ಸಮಾ ನಹಿಂಗಿ?"
"ಖರೆಂ....." ನಿಮಾಣೆಂ ತೊ ಸುಸ್ಕಾರ್ಲೊ.
"ಮೆಲ್ವಿನ್, ತುಂ ಮ್ಹಜೊ ಖರೊ ಮಿತ್ರ್. ಶೀನಾ ಮುಖಾಂತ್ರ್ ಇಷ್ಟಾಗತೆಚ್ಯಾ ಬಾಂದಾಂತ್ ಆಮಿಂ ಎಕ್ವೊಟ್ಲ್ಯಾಂವ್. ತುಕಾ ಸಾಂಬಾಳ್ನ್ ಚಲಂವ್ಚೆಂ, ತುಜ್ಯಾ ದುಃಖಾಂತ್ ತಶೆಂ ಆನಂದಾಂತ್ಯಿ ವಾಂಟೆಲಿ ಜಾಂವ್ಚೆಂ ಕರ್ತವ್ಯ್ ಮ್ಹಜೆಂ. ಮ್ಹಾಕಾ, ಶೀನಾಯಿ ತ್ಯಾಚ್ ಪರಿಂ ಸಾಂಗೊನ್ ಗೆಲಾ - ತುಕಾ ಕೆದಿಂಚ್ ಸೊಡಿನಾಕಾ ಮ್ಹಣ್. ತುಜಿ ಮ್ಹಾಕಾ ಉಬ್ಗೊಣ್ ಆಯಿಲ್ಲ್ಯಾನ್ ತುಜ್ಯಾ ಪೊಟಾಚಿ ಬಂದಾಬಸ್ತ್ ತುಂಚ್ ಪಳೆ ಮ್ಹಳ್ಳ್ಯಾ ಇರಾದ್ಯಾನ್ ತುಕಾ ಹಾಂವ್ ಆಶೆಂ ಸಾಂಗಾನಾ. ಹಾಂವೆಂ ಉಲಂವ್ಚೆಂ ತುಜ್ಯಾಚ್ ಬರ್ಯಾಕ್,. ತುಜ್ಯಾ ದುಃಖಿ ಕಾಳ್ಜಾಕ್ ಥೊಡೊ ವಿಶೆವ್ ಆನಿಂ ಸಮಾಧಾನ್ ಮೆಳ್ಚ್ಯಾ ಖಾತಿರ್.."
"ವ್ಹಯ್...... ರಾಜುಚ್ಯಾ ಉತ್ರಾಂನಿ ಮೆಲ್ವಿನಾಥಂಯ್ ಪುಷ್ಕಳ್ ಪರಿಣಾಮ್ ಹಾಡ್ಲೊ. ತಾಚ್ಯಾ ದೊಳ್ಯಾಂಕ್ ಮಾಂಡ್ಲೆಲಿಂ ಖೊವ್ಳಾಂ, ರಾಜುನ್ ಕಾಡ್ನ್ ಉಡೈಲಿಂ. ಚಿಂತ್ತಾಮಗ್ನ್ ಜಾವ್ನ್, ಕರ್ತವ್ಯ್ ಭ್ರಷ್ಟ್ ಜಾಲ್ಲ್ಯಾ ಮೆಲ್ವಿನಾ ಥಂಯ್ ಜಾಗ್ರತೆಚೆಂ ಕೀರ್ಣ್ ತಾಣೆಂ ಫಾಂಕೈಲೆಂ. ಮೆಲ್ವಿನಾಚೆಂ ಪೌರುಷ್, ಆಪ್ಲ್ಯಾ ಬಳ್ವಂತ್ ಉತ್ರಾಂಚ್ಯಾ ಹಾತೆರಾನ್ ತಾಣೆಂ ಜಿವೆಂ ಕೆಲೆಂ. ’ ನಾ......ಸ್ತ್ರೀಯೆಬರಿ ಘರಾಚ್ ಬಸೊನ್, ಆನಿಂ ಮುಖಾರ್ ರಡ್ಚೊಂನಾ’ ಷೆಂ ನಿಚೆವ್ ಕೆಲೊ ಮೆಲ್ವಿನಾನ್. ಆಫುಣ್ ವೆತೆಲೊಂ, ವಿಶಾಲ್ ವೊ ಸಂಸಾರ್ ಪಳೆತೊಲೊಂ ಆನಿಂ ಕಸಲ್ಯಾಯ್ ವಿರೋಧಾಚೆರ್ ಝುಜ್ತೊಲೊಂ.
"ರಾಜು, ಪಾಲ್ಯಾಂ ಥಾವ್ನ್ ಹಾಂವ್ ಕಾಮಾಕ್ ವೆತಾಂ..." ಮೆಲ್ವಿನ್ ಮ್ಹಣಾಲೊ.
"ಹಾಂ..." ಸಂತೊಸಾಚ್ಯಾ ಉದ್ವೇಗಾನ್ ಮೆಲ್ವಿನಾಚೊ ಹಾತ್ ರಾಜುನ್ ದಾಂಬುನ್ ಧರ್ಲೊ. ತ್ಯಾ ಎಕಾ ಘಡಿಯೆ ವ್ಹಡ್ಲ್ಯಾ ಭಾವಾನ್, ಆಪ್ಲ್ಯಾ ಧಾಕ್ಟ್ಯಾ ಭಾವಾಕ್ ಪೊಶೆಂವ್ಚ್ಯಾ ಭಾಷೆನ್ ತಾಣೆಂ ಮೆಲ್ವಿನಾಕ್ ಪೊಶೆಲೆಂ. ರಾಜುಕ್ ಅಪರಿಮಿತ್ ಸಂತೊಸ್ ಜಾಲ್ಲೊ.
ರಾಜುಚ್ಯಾ ಪ್ರಯತ್ನಾನ್ ಮೆಲ್ವಿನಾಕ್ ತೀನ್ ದಿಸಾಂ ಬಿತರ್ ಕಾಮ್ ಮೆಳ್ಳೆಂ. ಬ್ರಿಟಿಷ್ ಕೆಮಿಕಲ್ ಫರ್ಮ್ ತೆಂ. ಥಾನಾಂತ್ ತಾಚೆಂ ’ಫ್ಲೆಂಟ್’ (Pಟಚಿಟಿಣ) ಸ್ಥಾಪಿತ್ ಜಾಲ್ಲೆಂ ತರೀ, ಆಫೀಸ್ ಪೊರ್ಟಾಂತ್ ಆಸ್ಲ್ಲೆಂ. ಮೆಲ್ವಿನಾಕ್ ಆಫಿಸಾಂತ್ಚ್ ಕ್ಲಾರ್ಕಾಚೆಂ ಕಾಮ್ ಮೆಳ್ಲ್ಲೆಂ. ದೊನ್ಶಿಂ ರುಪಯ್ ಸಾಂಬಾಳ್ ತಾಕಾ ಠರಾಯಿಲ್ಲೊ.
ಮೆಲ್ವಿನ್ ದುಸ್ರ್ಯಾ ದೀಸ್ ಥಾವ್ನ್ ಕಾಮಾಕ್ ವಚೊಂಕ್ಲಾಗ್ಲೊ. ಆಪ್ಲ್ಯಾ ಕಾಮಾಂತ್ ಶಾಂತಿ ದೆಖೊಂಕ್ ತಾಣೆಂ ಪ್ರಯತ್ನ್ ಕೆಲೆಂ. ಸಕಾಳಿಂ ಧಾ ಥಾವ್ನ್ ಏಕ್ ವೋರ್ ಪರ್ಯಾಂತ್ ಕಾಮ್, ಉಪ್ರಾಂತ್ ಜೆವ್ಣಾಕ್ ವೊರಾಚಿ ಪುರ್ಸತ್. ತೊ ಸರ್ಶಿಲ್ಯಾ ಹೊಟೆಲಾಂತ್ ಜೆವಾಣ್ ಕರ್ತಾಲೊ. ದನ್ಪರಾಂ ದೋನ್ ಥಾವ್ನ್ ಸಾಡೆ-ಪಾಂಚ್ ಪರ್ಯಾಂತ್ ದುಸ್ರೊ ಆದೇಸ್. ಸಾಡೆ-ಪಾಂಚಾಂಕ್ ಕಾಮ್ ಸುಟ್ಲ್ಲೆಂಚ್ ತೊ ಹೆಣೆ ತೆಣೆ ಭೊಂವೊನ್ ಆಟ್ ಜಾತಾನಾ ಘರಾ ಪಾವ್ತಾಲೊ.
ಕಾಮಾಂತ್, ದೀಸ್ಭರ್ ತಾಕಾ ಶಾಂತಿ ಲಾಭ್ಲ್ಲಿ ಖರಿ. ತರೀ ನಿಜಾಯ್ಕಿ ತಾಚೆ ಥಂಯ್ ಉಲ್ಲಾಸ್ ನಾತ್ಲ್ಲೊ. ಕಾಮಾಚ್ಯಾ ವೆಳಾರ್ ಕಸಲ್ಯಾಚ್ ಚಿಂತ್ನಾವಿಣೆಂ, ತಾಚೊ ವೆಳ್ ಪಾಶಾರ್ ಜಾತಾಲೊ. ಪುಣ್ ಹೆರಾ ಸಂದರ್ಭಾರ್ ತಾಕಾ ಸಮಧಾನ್ ನಾತ್ಲ್ಲೆಂ. ಜೆಸ್ಸಿಚೊ ಉಗ್ಡಾಸ್ ತಾಕಾ ಖಳ್ಮಿತ್ನಾಸ್ತಾಂ ದೊಸ್ತಾನಾ, ತಾಚಿ ತಕ್ಲಿ ಇರಾರ್ ಜಾತಾಲಿ. ಪ್ರತ್ಯೇಕ್ ಜಾವ್ನ್ ಸಾಂಜೆರ್ ಕಾಮ್ ಸುಟ್ಲ್ಯಾ ನಂತರ್, ತಾಚಿಂ ಚಿಂತ್ನಾಂ ಜೆಸ್ಸಿ ವಿಷ್ಯಾಂತ್ಚ್ ಆಸ್ಲ್ಲಿಂ. ಗೇಟ್ವೇ ಒಫ್ ಇಂಡಿಯಾ ಲಾಗಿಂ ವಚೊನ್, ದರ್ಯಾಕ್ ದೀಷ್ಟ್ ವರ್ತಾನಾ, ಚೌಪಾಟಿಚ್ಯಾ ಮೋವ್ ರೆಂವೆರ್ ಬಸೊನ್ ಬುಡ್ಚ್ಯಾ ಸುರ್ಯಾಕ್ ದೆಖ್ತಾನಾ, ಮಲಬಾರ್ ಹಿಲ್ಲ್, ಹೆಂಗಿಂಗ್ ಗಾರ್ಡನಾಂತ್ ಉಬೊ ರಾವೊನ್, ಸಕೈಲ್ಯಾ ಓಂಚ್ ಕಟ್ಟೋಣಾಂಚೆರ್ ದೀಷ್ಟ್ ಲಾಯ್ತಾನಾ....ಕಾಳಿಜ್ ತಾಚೆಂ ರಡ್ತಾಲೆಂ. ಜೆಸ್ಸಿವಿಣೆ ಹೊ ಸಂಸಾರ್ ಕಿತ್ಲೊ ರಿತೊ ದಿಸ್ತಾ! ತಾಕಾ ಸಾಂಡುನ್ ಏಕ್ ಘಡಿ ತರೀ ಜಿಯೆಂವ್ಕ್ ಆಪ್ಣಾಕ್ ಸಾಧ್ಯ್ನಾ. ಆಪ್ಣೆಂ ಸೊದ್ಚಿಂ ತಿ ಶಾಂತಿ ಆನಿಂ ಸಮಾಧಾನ್ ಖಂಯ್ ಮೆಳಾತ್? ನಾ.....ಸಾಡೆ-ಪಾಂಚ್ ಜಾಲ್ಯಾ ಉಪ್ರಾಂತ್ಯಿ ಆಪ್ಣೆಂ ಕಸಲೆಂ ಪುಣಿ ಕಾಮ್ ಕರುಂಕ್ ಜಾಯ್. ಆಶೆಂಚ್ ಭೊಂವ್ಚ್ಯಾ ವಗ್ತಾ, ಮತಿಂತ್ ಧಲ್ಚಿಂ ಚಿಂತ್ನಾಂ ಘೆವ್ನ್ ಫಾಯ್ದೊ ಕಿತೆಂ? ಆಪ್ಣೆಂ ಚಡ್ ಆನಿಂ ಚಡ್ ಕಾಮಾಂತ್ ಮಗ್ನ್ ಜಾವ್ನ್ ಖಂತ್ ಬೆಜಾರಾಯ್ ವಿಸ್ರೊಂಕ್ ಜಾಯ್.
ಮೆಲ್ವಿನ್ ಓವರ್ಟಾಯ್ಮ್ ಕರುಂಕ್ ಲಾಗ್ಲೊ. ಆಫಿಸಾಂತ್ ಕಾಮಾಕ್ ಕಾಂಯ್ ಉಣೆಂಪಣ್ಂಚ್ ನಾತ್ಲ್ಲೆಂ. ಮೆಲ್ವಿನಾಚೊ ಆಫಿಸರ್, ತಾಚ್ಯಾ ಕಾಮಾ ಥಂಯ್ ಮೆಚ್ವಾಲ್ಲ್ಯಾನ್, ತಾಕಾ ಸರಾಗ್ ಓವರ್ ಟಾಯ್ಮ್ ಮೆಳೊಂಕ್ ಸುರುಜಾಲೊ. .ಆಟ್....ನೋವ್...ಅಖ್ರೇಕ್ ಧಾ ವೊರಾಂ ಪರ್ಯಾಂತ್ಯಿ ಮೆಲ್ವಿನ್ ಘರಾ ಪಾವಾನಾತ್ಲ್ಲೊ ಪಳೆವ್ನ್, ರಾಜು ಘಡ್ಬದ್ಲೊ. ಸುರ್ವೆರ್ ತಾಣೆಂ ಗಣ್ಣೆ ಕೆಲೆಂನಾ. ತರೀ, ತ್ಯಾ ಎಕಾ ಆಯ್ತಾರಾ ದೀಸ್ ತಡ್ವುಂಕ್ ತಾಂಕಾನಾಸ್ತಾಂ ವಿಚಾರ್ಲೆಂ-
"ಮೆಲ್ವಿನ್, ತುಕಾ ಹ್ಯಾ ಥರಾನ್ ಓವರ್ ಟಾಯ್ಮ್ ಕರ್ನ್ ಪಯ್ಶೆ ಪುಂಜಾಂವ್ಕ್, ಖಾಂವ್ಚಿಂ ಬಾಯ್ಲ್ ಭುರ್ಗಿಂ ಕೋಣ್ ಆಸಾತ್?"
"ಹಾಂವ್ ಓವರ್ ಟಾಯ್ಮ್ ಕರ್ತಾಂ, ಪಯ್ಶ್ಯಾಂಖಾತಿರ್ ನ್ಹಂಯ್" ಹಾಸೊನ್ ಮೆಲ್ವಿನಾನ್ ಮ್ಹಳೆಂ.
"ತರ್ ಕಿತೆಂ ಕಂಪೆನಿಕ್ ಫಾಯ್ದೊ ಕರುಂಕ್ಗಿ?"
"ಮ್ಹಜ್ಯಾ ಮತಿಕ್ ಸಮಾಧಾನ್ ಮೆಳೊಂಕ್" ಸ್ವಷ್ಟ್ ಮ್ಹಣಾಲೊ ತೊ.
"ಮೀತ್ ಮಿರ್ವೊನ್ ಕಾಮ್ ಕೆಲ್ಯಾರ್ ಸಮಾಧಾನ್ ಮೆಳ್ತಾಗಿ ಮೆಲ್ವಿನ್? ಸಮಾಧಾನ್ ನ್ಹಂಯ್, ಕರಂದಾಯ್ ಉಬ್ಜಾತಾ. ಲೆಕಾವೊರ್ತೆಂ ಕಾಮ್ ಕರ್ನ್, ಸಮಾಧಾನ್ ಸೊಧುಂಕ್ ಆಶೆಂವ್ಚೆಂ ಪಿಶೆಂಪಣ್. ಪಳೆ, ತ್ಯಾ ಆರ್ಸ್ಯಾ ಮುಖಾರ್ ರಾವೊನ್ ತುಜೆಂ ಕಾಂತಿ ವಿಹೀನ್ ಮುಖ್ ಪಳೆ. ತುಜ್ಯಾ ಬಾಗೊನ್ ಗೆಲ್ಲ್ಯಾ ಕುಡಿಚೆರ್ ದೀಷ್ಟ್ಯ್ ಲಾಯ್. ಬಿತರ್ಲ್ಯಾ ಸಮಾಧಾನೆಚೊ ಭಾಯ್ಲೊ ಘುರ್ತ್ಗಿ ವ್ಹೊ ಮೆಲ್ವಿನ್?" ರಾಜುನ್ ಕಠೋರ್ ತಾಳ್ಯಾನ್ ಸವಾಲ್ ಕೆಲೆಂ. ತಾಕಾ ರಾಗ್ ಆಯ್ಲಾ ಮ್ಹಣ್ ಸುಸ್ತಾಲೆಂ.
ಮೆಲ್ವಿನಾಚ್ಯಾ ಜಾಪಿಕ್ ರಾಕನಾಸ್ತಾಂ, ರಾಜು ಭಾಯ್ರ್ ಗೆಲೊ. ಗ್ರಾದಿಕ್ ಕೊಂಪೊರ್ ತೆಂಕುನ್, ರಸ್ತ್ಯಾಕ್ ಪಳೆತ್ತ್ ಉಬೊ ರಾವ್ಲೊ. ಆತಾಂ, ಮೆಲ್ವಿನಾಯಿ ತಾಚ್ಯಾ ಪಾಟ್ಲ್ಯಾನ್ ಗೆಲೊ. ರಾಜುಚ್ಯಾ ಭುಜಾರ್ ಹಾತ್ ದವರ್ನ್ ತಾಣೆಂ ವಿಚಾರ್ಲೆಂ.
"ರಾಗ್ ಆಯ್ಲೊಗಿ ರಾಜು?"
ರಾಜುನ್ ಜಾಪ್ ಕಾಡ್ಲಿನಾ.
"ಹಾಂವೆಂ ತುಕಾ ರಾಗ್ ಹಾಡೈಲೊ ಜಾಲ್ಯಾರ್ ಮ್ಹಾಕಾ ಮಾಫ್ ಕರ್." ಮೆಲ್ವಿನಾಚೊ ತಾಳೊ ಕಾಂಪ್ಲೊ ಆಶೆಂ ಸಾಂಗ್ತಾನಾ.
ರಾಜು ಥಟ್ಟ್ ಕರ್ನ್ ಘುಂವ್ಲೊ. "ಮೆಲ್ವಿನ್...." ಮ್ಹಳೆಂ ರಾಜುನ್, ತಾಕಾ ಫುಡ್ ಕರ್ನ್, "ರಡ್ಚೆಂ ಚೆಡ್ವಾಂನಿ, ವೊಂಟಾರ್ ಮಿಶಿಯೊ ಆಸ್ಲ್ಲ್ಯಾ ಚೆಡ್ಯಾಂನಿ ನ್ಹಂಯ್. ಹಾಂವೆಂ ತುಕಾ ಸಾಂಗ್ಚೆಂ ತೆಂ ಸಾಂಗ್ಲೆಂ. ತೆಂ ಆಯ್ಕೊಂಚಿ ವ ನಿರಾಕರ್ಸುಂಚಿ ಖುಶಿ ತುಜಿ. ಮ್ಹಾಕಾ ಕಿತೆಂ ತುಜೆರ್ ರಾಗ್ ಆಯ್ಲಾ ಮ್ಹಣ್ ಸಮ್ಜಾನಾಕಾ"
ಮೆಲ್ವಿನ್ಯಿ ಗ್ರಾದಿರ್ ಹಾತ್ ತೆಂಕುನ್, ರಸ್ತ್ಯಾಕ್ ಪಳೆವ್ನ್ ಚಿಂತುಂಕ್ ಪಡ್ಲೊ. ರಾಜುಚಿಂ ಉತ್ರಾಂ, ತಾಚೆಂ ಅಂತಸ್ಕರ್ನ್ ಕಾಂತೈತಾಲಿಂ ತರೀ, ಕಸಲ್ಯಾಚ್ ನಿರ್ಧರಾಕ್ ತೊ ಆಯ್ಲೊನಾ.
ಸಾಂಜೆಚೊ ವೇಳ್ ಜಾಲ್ಲ್ಯಾನ್ ಲೊಕಾಚಿ ಖೆಟ್ ವಿಶೇಷ್ ಜಾಲ್ಲಿ. ವಾಹನಾಂ, ಕ್ಷಣಾಕ್ ಎಕಾ ಲೆಕಾನ್ ಪಾಶಾರ್ ಜಾತಾಲಿಂ. ರಾಜುಚೆಂ ಕೂಡ್ ಕಟ್ಟೋಣಾಚ್ಯಾ ಪೊಂತಾರ್ ಆಸ್ಲ್ಲ್ಯಾನ್, ಕುಶಿಕ್ಚ್ ಅಸ್ಲ್ಲೆಂ ದುಸ್ರೆಂ ಏಕ್ ಕಂಪಾಂವ್ಡ್ ದಿಸ್ತಾಲೆಂ. ತಾಂತುಂ ಮದ್ಗಾತ್ ಉಬೆಂ ಅಸ್ಚೆಂ ಎಕಾ ಮಾಳಿಯೆಚೆಂ ಸುಂದರ್ ಘರ್ ಆನಿಂ ಮುಖಾರ್ ಸೊಬ್ತಾಲೆಂ ಥರಾ ಥರಾಂಚ್ಯಾ ಫುಲಾಂನಿ ರಂಗೈಲ್ಲೆಂ ಉದ್ಯಾನ್. ಮೆಲ್ವಿನ್ ಖುಶಾಲ್ಭಾರಿತ್ ಜಾವ್ನ್ ತ್ಯಾ ಉದ್ಯಾನಾಕ್ ಆನಿಂ ತ್ಯಾ ಸೊಭಿತ್ ಫುಲಾಂಕ್ ಪಳೆಂವ್ಕ್ ಪಡ್ಲೊ.
ಸುಂದರ್ ಫುಲಾಂಕ್ ಆನಿಂ ರಂಗೀತ್ ಗಾಯನಾಕ್ ಪಿಸ್ವಾನಾತ್ಲ್ಲೊ ಮನಿಸ್, ಮನಿಸ್ಚ್ ನ್ಹಂಯ್ ಮ್ಹಣ್ಯೆತ್. ಗಾಯನಾಕ್ ಕಾಂಟಾಳ್ಚ್ಯಾ ಆನಿಂ ಫುಲಾಂಕ್ ಕೆಂಡ್ಚ್ಯಾ ಮನ್ಶಾಕ್ ಬಿಲ್ಕುಲ್ ಪಾತ್ಯೆಂವ್ಕ್ ನಜೊ ಮ್ಹಣ್ತಾತ್. ಆನಿಂ ಮೆಲ್ವಿನಾಕ್ ತ್ಯಾ ರಾನಾಂತ್ಲ್ಯಾ ರಂಗಾಚ್ಯಾ ಆನಿಂ ಜಾತಿಚ್ಯ ಫುಲಾಂನಿ ಭುಲ್ ಘಾಲಿ ಆನಿಂ ತೊ ಆಪ್ಣಾಕ್ಚ್ ವಿಸರ್ಲೊ. ಡೇಲಿಯಾ, ಝೀನಿಯಾ, ಗುಲೊಬ್ ಆನಿಂ ಇತರ್ ಜಾತಿಂವಾರ್ ಫುಲಾಂ ಸೊಭಾಯ್ ಆನಿಂ ಸುಗಂಧ್ ಥಂಯ್ ಫಾಂಕ್ತಾಲಿಂ
ತೆಂ ಘರ್ ಬಹುಶಃ ಎಕಾ ವ್ಹಡ್ಲ್ಯಾ ಮನ್ಶಾಚೆಂ ಜಾಯ್ಜಾಯ್. ತಾಂಕಾ ಕಾರ್ಯಿ ಆಸಾ. ಗೆಟಿರ್ ಆಸ್ಚೊ ಬೋರ್ಡ್ ಪಳೆಲ್ಯಾರ್ ಕೋಣ್ ಮ್ಹಣ್ ಕಳಾತ್. ಇತ್ಲೆ ದೀಸ್ ಗೆಲ್ಯಾರ್ಯಿ ಮೆಲ್ವಿನಾನ್ ತ್ಯಾ ವಿಷ್ಯಾಂತ್ ಗಮನ್ ವೆಲ್ಲೆಂನಾ. ರಾಜು ಪುಣಿ ತಾಂಚಿ ಖಬಾರ್ ಜಾಣಾಂಗಾಯ್? ಛೆ..ಆಪುಣ್ ಕಿತೆಂ ಚಿಂತ್ತಾಂ? ಕೊಣಾಚ್ಯಾ ವಿಶ್ಯಾಂತ್ ಖಬಾರ್ ಕಾಡ್ನ್ ಆಪ್ಣಾಕ್ ಕಿತೆಂ ಫಾಯ್ದೊ?
ಪುಣ್ ತ್ಯಾಚ್ ಘಡಿಯೆ, ತಾಚಿ ದೀಷ್ಟ್ ತ್ಯಾ ಉದ್ಯಾನಾಂತ್ ಪ್ರವೇಶ್ ಜಾಲ್ಲ್ಯಾ ಎಕಾ ವ್ಯಕ್ತಿಚೆರ್ ಪಡ್ಲಿ. ತೊ ವಿಜ್ಮಿತ್ ಜಾಲೊ. ಸಾಧಾರ್ಣ್ ವೀಸ್ ವರ್ಸಾಂಚಿ ಎಕ್ಲಿ ಚಲಿ, ಎಕಾ ಲ್ಹಾನ್ ಭುರ್ಗ್ಯಾಕ್ ಘೆವ್ನ್ ಉದ್ಯಾನಾಂತ್ ಆಯ್ಲಿ. ತಿ ಉದ್ಯಾನಾಂತ್ ಭೊಂವ್ತಾನಾ, ಮೆಲ್ವಿನಾನ್ ತಿಚೆಂ ಮುಖ್ ದೆಖ್ಲೆಂ ಅನಿಂ ತೊ ಆಜಾಪ್ ಜಾಲೊ. ಕಸಲೆಂ ಸುಂದರ್ ರೂಪ್........ಜೆಸ್ಸಿಚೆಂ ಸಾರ್ಕೆಂ ತಾಚೆಥಂಯ್ ದಿಸ್ತಾ. ನವೀನ್ ಕಾಂತಿ ಪಾಚಾರ್ಚ್ಯಾ ತ್ಯಾ ಫುಲಾಂ ಸಂಗಿಂ, ತಿ ಚಲಿ ಫುಲಾಂ-ರಾಣಿಯೆಬರಿ ತಳ್ಯಾಂತ್ಲ್ಯಾ ಕಮಳಾಬರಿ, ಸಾಗೊರಾಂತ್ಲ್ಯಾ ಮೊತಿಯಾ ಬರಿ ಸೊಭಾಯೆನ್ ಪರ್ಜಳ್ತಾಲಿ. "ಹೆಂಯಿ.....ಫುಲ್ ಉದ್ಯಾನಾಂತ್ಲೆಂ..’ ಆಪ್ಲೆಸ್ಥಕ್ತಿಂ ಮೆಲ್ವಿನ್ ಮ್ಹಣಾಲೊ.
"ರಾಜು...." ಆತುರಾಯ್ ತಡ್ವುಂಕ್ ನಾಸ್ತಾಂ ವಿಚಾರ್ಲೆಂ ತಾಣೆಂ. "ತ್ಯಾ ಕುಶಿಚ್ಯಾ ವೊಡ್ತಾಂತ್ ಉಬಿ ಅಸ್ಚಿ ಚಲಿ ಕೋಣ್?"
ರಾಜುನ್ಯಿ ತಾಕಾ ಪಳೆಲೆಂ. ಉಪ್ರಾಂತ್ ತೊ ಹಾಸ್ಲೊ. "ತೆಂ ತುಜೆಬರಿಚ್ ಎಕ್ ದುಃಖಿ ಚೆಡುಂ....."
"ಹಾಂ.....ಕೋಣ್ ತೆಂ?" ಹಾಂಕ್ರೆಲೊ ಮೆಲ್ವಿನ್.
"ತೆಂ, ತ್ಯಾ ಘರ್ಚ್ಯಾ ಶ್ರೀಮಂತಾಚಿ ಎಕ್ಲಿಚ್ ಧುವ್. ತಾಚೆಂ ನಾಂವ್ ಸಿಲ್ವಿಯಾ. ತಾಚಿ ಖಬಾರ್ ಆಯ್ಕ್. ತಾಚೊ ಬಾಪುಯ್ ಎಕ್ಲೊ ರಿಟಯಾರ್ಡ್ ಬ್ಯಾರಿಸ್ಟರ್. ಅಧಿಕ್ ಗ್ರೆಸ್ತ್ ಮನಿಸ್ ತೊ. ಆನಿಂ ಮೊವಾಳ್ ತಸೊ ಉದ್ಧಾರ್ ಮನಿಸ್. ತಿಂಯ್ ಮಂಗ್ಳೂರ್ಗಾರಾಂ ಮೆಲ್ವಿನ್. ತ್ಯಾ ಶಿವಾಯ್, ಕ್ರಿಸ್ತಾಂವ್..."
"ಕ್ರಿಸ್ತಾಂವ್....?" ಉದ್ಗಾರ್ ಸೊಡ್ಲೊ ಮೆಲ್ವಿನಾನ್.
"ವ್ಹಯ್. ಬ್ಯಾರಿಸ್ಟರ್ ಜೊನ್ ಪ್ರಭು ಗಾಂವಾನ್ ಮಂಗ್ಳೂರ್ಚೊ. ಶಿಕ್ಲ್ಲೊ ಬೊಂಬಯ್ ಆನಿಂ ಲಂಡನಾಂತ್. ತಾಣೆಂ ಪ್ರ್ಯಾಕ್ಟಿಸ್ ಚಾಲು ಕೆಲ್ಲೆಂ ಬೊಂಬೈತ್. ತಾಚ್ಯಾ ಹುಶಾರ್ಗಾಯೆನ್ ತೊ ಥೊಡ್ಯಾಚ್ ಕಾಳಾ ಬಿತರ್ ಗಾಂವಾರ್ ಸಗ್ಳ್ಯಾ ನಾಂವಾಡ್ಲೊ. ಹಾತಿಂ ಘೆತ್ಲ್ಲಿ ಎಕೀ ಕೇಸ್ ತಾಚೆ ’ಫೇಯ್ಲ್’ ಜಾಯ್ನಾತ್ಲ್ಲಿ. ತಾಚಿ ಲಾಗ್ಶಿಲಿಂ ಕುಟ್ಮಾದಾರಾಂ ಕೊಣೀ ಬೊಂಬಯ್ ನಾಂತ್. ಆನಿಂ ತೊ ಬೊಂಬೈತ್ಚ್ ಕಾಜಾರ್ ಜಾಲೊ - ಎಕ್ಲ್ಯಾ ಗ್ರೇಸ್ತ್ ಕುಟ್ಮಾಂತ್ಲ್ಯಾ ಚಲಿಯೆಲಾಗಿಂ. ಆನಿಂ ಕಾಜಾರಾಚೊ ಫಳ್ ಜಾವ್ನ್ ತಾಂಕಾಂ ಜಲ್ಮಾಲ್ಲೆಂ ಏಕ್ಚ್ ಭುರ್ಗೆಂ - ತೆಂಚ್ ಸಿಲ್ವಿ"
ಮೆಲ್ವಿನ್ ರಾಜುಚಿ ಕಾಣಿ ಚೀತ್ ದೀವ್ನ್ ಆಯ್ಕಾತಾಲೊ. ರಾಜುನ್ ಮುಖಾರ್ಸಿಲೆಂ -
"ಪುಣ್ ಥೊಡ್ಯಾಚ್ ತೆಂಪಾನ್ ತಾಚಿ ಪತಿಣ್ ಅಂತರ್ಲಿ ಮೆಲ್ವಿನ್. ಪ್ರಭ್ಹುನ್ ಸಿಲ್ವಿಕ್ ವರ್ತ್ಯಾ ಮೊಗಾನ್ ಆನಿಂ ಜತ್ನೆನ್ ವ್ಹಡ್ ಕೆಲೆಂ..ದುಸ್ರೆಪಣಿಂ ಕಾಜಾರಾಕ್, ಜಯ್ತ್ಯೊ ಸೈರಿಕ್ ತಾಚ್ಯಾ ಪಾಂಯಾಲಾಗಿಂ ಆಯ್ಲ್ಯೊ ತರೀ ತಾಣೆಂ ನಿರಾಕರ್ಸಿಲೆಂ - ಕಿತ್ಯಾಕ್ ಮಾವ್ಶಿ ಆಪ್ಲ್ಯಾ ಧುವೆಕ್ ಮಯ್ಪಾಸಾನ್ ಪಳೆನಾ ಜಾಯ್ತ್ ಮ್ಹಳ್ಳ್ಯಾ ಭಿಂಯಾನ್. ಆಶೆಂ, ಸಿಲ್ವಿ ಬಾಪಾಯ್ಚ್ಯಾ ತಾಬೆಂತ್ಚ್ ವಾಡ್ಲೆಂ ಆನಿಂ ತಾಣೆಂ ಬಿ.ಎಸ್.ಸಿ. ಶಿಕೊನ್ ಕಾಬಾರ್ ಕೆಲೆಂ. ಉಪ್ರಾಂತ್ ಸಿಲ್ವಿಚೆಂ ಕಾಜಾರ್ ಸಂಭ್ರಮಾನ್ ಎಕ್ಲ್ಯಾ ದಾಕ್ತೆರಲಾಗಿಂ ಜಾಲೆಂ"
"ಓ ..ಸಿಲ್ವಿಚೆಂ ಕಾಜಾರ್ ಜಾಲಾಂಗಿ!" ಆಶೆಂ ಮ್ಹಣೊನ್ ಮೆಲ್ವಿನ್ ಸಿಲ್ವಿಕ್ಚ್ ಪಳೆಂವ್ಕ್ ಪಡ್ಲೊ. ಸಿಲ್ವಿ ಏಕ್ ಡೇಲಿಯಾ ಕಾಡ್ನ್, ಆಪ್ಲ್ಯಾ ಕುಶಿಂ ಆಸ್ಚ್ಯಾ ಭುರ್ಗ್ಯಾಕ್ ದಾಕವ್ನ್ ಖೆಳಯ್ತಾಲೆಂ. ತಿ ದ್ರಶ್ಯಾ ಪಳೆತಾನಾ ಆಪುರ್ಬಾಯ್ ದಿಸ್ಲಿ ಮೆಲ್ವಿನಾಕ್. ಸಿಲ್ವಿಕ್ ವ್ಹಡ್ಲೊ, ದಾಕ್ತೆರ್ಗಿ ಶಿಕ್ಲ್ಲೊ ನವ್ರೊ ಮೆಳ್ಳಾ. ಬಾಪುಯ್ ಗ್ರೇಸ್ತ್ ಆನಿಂ ನಾಂವಾಡ್ದಿಕ್. ತೆಂ ಲ್ಹಾನ್ ಭುರ್ಗೆಂಯಿ ತಾಚೆಂಚ್ ಮ್ಹಣ್ ದಿಸ್ತಾ. ತಶೆಂ ಆಸ್ತಾಂ ರಾಜು ಸಾಂಗ್ತಾ, ಸಿಲ್ವಿ ದುಃಖಿ ಮ್ಹಣ್. ಖಂಯ್ಚ್ಯಾ ಸಂಗ್ತಿಂತ್ ತೆಂ ದುಃಖಿ ಗಾಯ್?
’ಮೆಲ್ವಿನ್, ಇತ್ಲೆಂ ಹಾಂವೆಂ ಸಾಂಗ್ತಾನಾ, ಸಿಲ್ವಿಚ್ಯಾ ವಿಷ್ಯಾಂತ್ ತುಂ ಕಿತೆಂ ಚಿಂತ್ತಾಯ್ ಕೊಣ್ಣಾ. ತಾಚೆ ತಿತ್ಲೆಂ ಭಾಗಿ ಕೊಣ್ಂಚ್ ನಾ ಮ್ಹಣ್ತಾಯ್ ಕೊಣ್ಣಾ. ಪುಣ್, ಆಯ್ಕ್ ಮೆಲ್ವಿನ್.....ಮನ್ಶಾಚ್ಯಾ ಜೀವನಾಂತ್ ಥೊಡೆ ಪಾವ್ಟಿಂ ವಿಕಾಳ್ ಘಡಿತಾಂ ಘಡ್ತಾತ್ - ಆನಿಂ ಥಂಯ್ಸರ್ ಆಶಾ, ಉಲ್ಲಾಸ್ ಪಾಲ್ವತಾ. ಜಿಣಿಂಚ್ ವ್ಯರ್ಥ್ ದಿಸ್ತಾ. ಸಿಲ್ವಿಚ್ಯಾ ಜೀವನಾಂತ್ಯಿ ತಶೆಂಚ್ ಘಡ್ಲೆಂ.....ಏಕ್ ಮಹಾ ಆನಾಹುತ್. ಆನಿಂ ಥಂಯ್ ಪಾಲ್ವಾಲೊ ತಾಚಾ ಜೀವನಾಚೊ ದಿವೊ....."
"ಕಿತೆಂ ಜಾಲೆಂ ರಾಜು? ಬ್ಯಾರಿಸ್ಟರ್ ಸರ್ಲೊಗಿ?" ಕಳ್ವಳೊನ್ ಮೆಲ್ವಿನಾನ್ ವಿಚಾರ್ಲೆಂ.
"ನಾ.....ಸಿಲ್ವಿಚೊ ಪತಿ ಅಂತರ್ಲೊ..." ರಾಜುಚೊ ತಾಳೊಯಿ ಚಿಕ್ಕೆಶೆ ಕಾಂಪ್ಲೊ.
ಮೆಲ್ವಿನ್ ಥಟಾಕ್ಲೊ. ಸಬ್ದ್ ಉಚಾರುಂಕ್ ಜೀಬ್ ತಾಚಿ ಘುಂವ್ಲಿನಾ. ದೊಳೆ ವಾಟಾರ್ನ್, ರಾಜುಕ್ ತೊ ಪಳೆಂವ್ಕ್ ಪಡ್ಲೊ. ರಾಜುಚಿಂ ಉತ್ರಾಂ ಪಾತ್ಯೆಂವ್ಕ್ ಕಷ್ಟ್ ಮಾರ್ಲಿ ತಾಕಾ. ಹೆಂ....ರಾಜುನ್ ಸಾಂಗ್ಚೆಂ ಸತ್..!?
"ವ್ಹಯ್ ಮೆಲ್ವಿನ್, ಹಿ ಖಬಾರ್ ಆಯ್ಕಾಲ್ಲೊ ತುಂ ಇತ್ಲೊ ಚುರ್ಚುರ್ಲೊಯ್. ಪುಣ್, ತರ್ನ್ಯಾ ಸಿಲ್ವಿಚ್ಯಾ ಕಾಳ್ಜಾಕ್ ಲಾಗ್ಲ್ಲಿ ಭಾಲಿ ತುಂಚ್ ನಿಯಾಳ್. ಕಾಜಾರ್ ಜಾವ್ನ್ ಸ ಮಹಿನ್ಯಾಂನ್ ಈ.ಖ.ಅ.S ಕರುಂಕ್ ತಾಚೊ ಪತಿ ಲಂಡನಾಕ್ ಗೆಲ್ಲೊ. ಮೆಜೂನ್ ತೀನ್ ಮಹಿನ್ಯಾಂ ಬಿತರ್ ಮೋಟರ್ ಅವ್ಘಡಾಂತ್ ತೊ ಮೊರಾತ್ ಮ್ಹಣ್ ಕೊಣೆಂ ಚಿಂತ್ಲ್ಲೆಂ? ಸಿಲ್ವಿಕ್ ಖಂಯ್ಚ್ಯಾ ಪಾತ್ಕಾಕ್ ಹಿ ಶಿಕ್ಷಾ ಭೊಗುಂಕ್ ಮೆಳ್ಳಿ?
ಖಂಯ್ಚ್ಯಾ ಪಾತ್ಕಾಕ್.....? ಮೆಲ್ವಿನ್ ಚಿಂತುಂಕ್ಲಾಗ್ಲೊ. ಕ್ರೂರ್ ವಿಧಿನ್ ಸಿಲ್ವಿಚ್ಯಾ ನವ್ರ್ಯಾಕ್ ಹ್ಯಾ ಸಂಸಾರಾಂತ್ಲೆಂ ನಪೈಂಚ್ ಕರಿಜಾಯ್ ಜಾಲ್ಯಾರ್, ಸಿಲ್ವಿನ್ ಕಿತೆಂ ವಾಯ್ಟ್ ಕೆಲ್ಲೆಂ? ತಾಚ್ಯಾ ಶರೀರಾಂತ್ಲೊ ಖಣ್ಖಣ್ ಹೆಂ ಸವಾಲ್ ವಿಚಾರ್ತಾಂ ಶೆಂ ಬೊಗ್ಲೆಂ. ಸಗ್ಳೊ ಸಂಸಾರ್ಚ್ ಹೆಂ ಸವಾಲ್ ತಾಕಾ ಕರ್ತಾಶೆಂ ದಿಸ್ಲೆಂ. ಸಿಲ್ವಿನ್ ಕಿತೆಂ ಆಕ್ರಮ್ ಕೆಲ್ಲೆಂ ಆನಿಂ ಜೆಸ್ಸಿ ಆಪ್ಣಾ ಥಾವ್ನ್ ಪಯ್ಸ್ ಸರಾಜಾಯ್ ಜಾಲ್ಯಾರೀ, ಜೆಸ್ಸಿನ್ ವ ಆಪ್ಣೆ ಕಿತೆಂ ವಾಯ್ಟ್ ಕೆಲ್ಲೆಂ?"
"ಕಠೋರ್ ನಶಿಬ್ ಮೆಲ್ವಿನ್..." ರಾಜು ಉದ್ವೇಗಾನ್ ಉಲೈತಾಲೊ, " ಕಠೋರ್ ನಶಿಬ್ ಹೆಂ. ಮನ್ಶಾನ್ ಚಿಂತ್ಚೆಂ ಏಕ್ ಆನಿಂ ದೆವಾನ್ ಕರ್ಚೆಂ ಏಕ್. ಜೀವನಾಂತ್ಲ್ಯಾ ವಸಂತ್ ಕಾಲಾಚೆರ್, ಪತಿಕ್ ಹೊಗ್ಡಾಯಿಲ್ಲ್ಯಾನ್ ಸಿಲ್ವಿನ್ ಮುಖಾರ್ ಕರ್ಚೆಂ ಕಿತೆಂ? ತಾಚೆಂ ಜೀವನ್ ಧ್ವಂಸ್ಗಿ? ತಾಕಾ ಆನಿಂ ಫುಡಾರ್ ನಾಂಗಿ? ಎಕಾ ಕ್ರೂರ್ ಘಡಿತಾವರ್ವಿಂ ತಾಚೆಂ ಸಗ್ಳೆಂ ಜೀವನ್ಂಚ್ ಪಿಡ್ಡ್ಯಾರ್ ಜಾಯ್ಜಾಯ್ಗಿ? ವಿಧವ್ ಸ್ತ್ರೀಯೆಕ್ ಆಮ್ಚಿಂ ಸಮಾಜ್ ಪುನರ್. ಕಾಜಾರಾಕ್ ಉತ್ತೇಜನ್ ದೀನಾ ಮೆಲ್ವಿನ್. ಪುಣ್ ತಿ ಸಮಾಜ್ ತ್ಯಾ ವಿಧ್ವಿಕ್ ಕಸಲಿಚ್ ವಾಟ್ ದಾಕವ್ನ್ ದೀನಾ. ಪಳೆ, ತ್ಯಾ ಉದ್ಯಾನಾಂತ್ ಆಸ್ಚೆಂ ತೆಂ ಕಿತ್ಲೆಂ ತರ್ನೆಂ ಆನಿಂ ನೆಣ್ತೆಂ ದಿಸ್ತಾ ಪಳೆ. ತಾಚ್ಯಾ ಪಾಸ್ಳೆಕ್ ಆಸಾ ತೆಂ ಸುಂದರ್ ಬಾಳ್ ತಾಂಚ್ಯಾ ಕಾಜಾರಾಚಿ ನಿಶಾನಿ ತರೀ ಆಡೂಕ್. ಪತಿಚ್ಯಾ ಆಕಸ್ಮಿಕ್ ಮೊರ್ನಾನ್, ಆಪುಣ್ಯಿ ಮೊರ್ನಾಕ್ ಲಾಗಿಂ ಜಾಲ್ಲೆಂ ಸಿಲ್ವಿ, ಆಪ್ಲ್ಯಾ ಬಾಳಾಚೆಂ ತೊಂಡ್ ಪಳೆವ್ನ್ ಮಾತ್ರ್ ವಾಂಚ್ಲಾಂ. ತರೀ ತೆಂ ಸದಾಂಚ್ ದುಃಖಿ. ಭುಜಾವಣೆಚಿ ಅತ್ಯಂತ್ ಗರ್ಜ್ ಆಸ್ಚ್ಯಾ ಸಿಲ್ವಿಕ್ ತಾಚ್ಯಾ ಪಾಪಾನ್ಂಚ್ ಹ್ಯಾ ಮನೋಸ್ಥಿತೆಕ್ ಪಾಯ್ಲಾಂ. ನಹಿಂ ತರ್, ಸಿಲ್ವಿ ಎದೊಳ್ ಮಾತಿಯೆಕ್ ಸಾರೆಂ ಜಾತೆಂ ಆಸ್ಲ್ಲೆಂ. ಸಿಲ್ವಿ ಆತಾಂ ಸಾಂಜೆಚೆಂ ಮ್ಯೂಜಿಕ್ ಶಿಕೊಂಕ್, ಶಾತ್ರೀಯ್ ಸಂಗೀತ್ ಆಭ್ಯಾಸ್ ಕರುಂಕ್ ವೆತಾ. ಕಾರ್ ಡ್ರಾಯ್ವಿಂಗ್ ಕರ್ತಾ ಆನಿಂ ಸಮಾಜ್ ಸೆವೆಂತ್ ಪಾತ್ರ್ ಘೆತಾ. ಪುಣ್ ವ್ಹೊ ಲೋಕ್ ಕಿತೆಂ ಉಲೈತಾ ಜಾಣಾಂಯ್ಗಿ? ಸಿಲ್ವಿ ವಿಷ್ಯಾಂತ್ ನಾಕಾ ಜಾಲ್ಲ್ಯೊ ಖಬ್ರೊ ಸಾಂಗ್ತಾ ಆನಿಂ ತಾಚ್ಯಾ ನಡ್ತ್ಯಾಕ್ ಹಾಸ್ತಾ. ಲೊಕಾಕ್ ತಕ್ಲಿ ಸಾರ್ಕಿನಾ ಮೆಲ್ವಿನ್. ’ಖಂಯ್ ಸಮಾಜೆಕ್, ಎಕಾ ವ್ಯಕ್ತಿಕ್ ಬರ್ಯಾಪಣಾಚಿ ವಾಟ್ ದಾಕಂವ್ಕ್ ಪುರ್ಸತ್ ನಾ ವ ಕಳಾನಾ. ತರ್ ತ್ಯಾ ವ್ಯಕ್ತಿಕ್ ಕೆಂಡ್ಚೊ ಅಧಿಕಾರ್ ಸಮಾಜೆಕ್ ಕೊಣೆಂ ದಿಲಾ?’ ಕ್ರೂರ್ ಹಿ ಸಮಾಜ್, ರೀತ್-ನೀತ್ ನಾತ್ಲ್ಲಿ ಹಿ ಸಮಾಜ್. ಆಜ್ ಸಿಲ್ವಿ ಥಂಯ್ ಚುಕಿ ಸೊದ್ಚಿ ಹಿ ಸಮಾಜ್, ಫಾಲ್ಯಾಂ ತುಕಾ ಆನಿಂ ಮ್ಹಾಕಾಯಿ ಸೊಡ್ಚಿನಾ. ಪಳೆ ಮೆಲ್ವಿ, ಘರಾ ಬಸೊನ್ ದುಃಖಿ ಚಿಂತ್ನಾಂ ಚಿಂತುನ್ ಕುರ್ವೊಂಚ್ಯಾ ಬದ್ಲಾಕ್ ಧೈರಾನ್ ಹ್ಯಾ ಸಂಸಾರಾಕ್ ಹರ್ಧೆಂ ದಿಲ್ಲ್ಯಾ ಸಿಲ್ವಿಚೆಂ ಧೈರ್ ನಿಯಾಳ್. ಪುಣ್ ತುಂ.. ತುಂ ದೀಸ್ ರಾತ್ ಕರ್ಗಾತಾಯ್. ಚಿಂತ್ನಾಂನಿಂಚ್ ಕಸಲೆಂಯ್ ಸಮಸ್ಯೆಂ ಪರಿಹಾರ್ ಕರುಂಕ್ ಸಾಧ್ಯ್ನಾ. ಮನ್ಶಾನ್ ಹಾಸಾಜಾಯ್, ಆನಿಂ ಆಪ್ಣಾ ಸಂಗಿಂ ಸಂಸಾರಾಕ್ ಹಾಸೈಜಾಯ್."
"ರಾಜು...ತುವೆಂ ಸಾಂಗ್ಲ್ಲಿಂ ಉತ್ರಾಂ ಮ್ಹಜ್ಯಾ ಕಾಳ್ಜಾಂತ್ ರೊಂಬ್ಲಿಂ" ಕ್ರತಜ್ಞತೆಚಿಂ ದುಃಖಾಂ ಗಳೊವ್ನ್ ಮೆಲ್ವಿನ್ ಉಲೈಲೊ, "ಆನಿಂ ಮುಖರ್ ತುಜೆಂ ಮನ್ ಹಾಂವ್ ದುಕೈಸೊನಾ. ಏಕ್ ಹಾಂವ್ ತುಜೆಲಾಗಿಂ ವಿಚಾರ್ತಾಂ. ತುವೆಂ ಶಾಸ್ತ್ರೀಯ್ ಸಂಗೀತಾ ವಿಷ್ಯಾಂತ್ ಉಲೈತಾನಾ ಮ್ಹಾಕಾ ಏಕ್ ಉಗ್ಡಾಸಾ ಯೆತಾ. ಮ್ಹಾಕಾ ದೆವಾನ್ ಸಂಗೀತಾಚೆಂ ದೆಣೆಂ ದಿಲಾಂ. ಹ್ಯಾ ವರ್ಸಾ ಇಂಟರ್ ಕೊಲೆಜಿಯೆಟ್ ಪಂದ್ಯಾಟಾಂತ್ ಮ್ಹಾಕಾ ಫಸ್ಟ್ ಪ್ರಾಯ್ಜ್ ಮೆಳ್ಲ್ಲೆಂ. ಹಾಂವ್...... ತುಜಿ ಪರ್ವಣ್ಗಿ ಆಸ್ಲ್ಯಾರ್, ಮ್ಹಜ್ಯಾ ಓಫಿಸಾಲಾಗಿಂ ಆಸ್ಚ್ಯಾ ’ಬೊಂಬಯ್ ಕಲಾ ಪ್ರಸಾರ್ ಸಂಘಾಂತ್ ಮ್ಹಜೆಂ ನಾಂವ್ ದಾಖಲ್ ಕರ್ತಾಂ ಆನಿಂ ಸಂಗೀತ್ ಶಿಕ್ತಾಂ, ಜಾಯ್ತ್ಗಿ?"
"ಖುಶೆನ್ ಮ್ಹಜ್ಯಾ ಇಶ್ಟಾ. ಮ್ಹಜಿ ಕಿತ್ಯಾಕ್ ಆಡ್ಕಳ್?" ಸಂತೊಸಾನ್ ಹಾಸ್ಲೊ ರಾಜು, "ಹುಂ, ಆಖ್ರೇಕ್ ತರೀ ತುಕಾ ಬೂದ್ ಆಯ್ಲಿ. ತುಜೆಂ ಭವಿಷ್ಯ್ ಕಶೆಂ ಸುಗಮ್ ಜಾತಾಗಿ ಪಳೆ"
"ತುಜ್ಯಾ ದಯಾಳ್ ಮನಾಕ್, ಆನಿಂ ತುವೆಂ ಮ್ಹಾಕಾ ಕೆಲ್ಲ್ಯಾ ಸಬಾರ್ ಉಪ್ಕಾರಾಂಕ್, ಹಾಂವ್ ತುಕಾ ಆಭಾರಿ ರಾಜು. ಉಜೊ ಉಪ್ಕರ್ ಖಂಯ್ಚ್ಯಾ ಮಾಫಾನ್ ಹಾಂವೆಂ ಪಾಟಿಂ ದಿಂವ್ಚೊ ಕಳಾನಾ ಮ್ಹಾಕಾ. ಮ್ಹಜ್ಯಾ ತಾಂಕಿ ಭಾಯ್ಲಿ ಗಜಾಲ್ ಹಿ..."
"ಪ್ರತ್ಯುಪ್ಕಾರಾಚ್ಯಾ ದಿಷ್ಟಿನ್, ಕಸಲೆಂಯ್ ಕಾಮ್ ಹಾಂವ್ ಕರಿನಾ ಮೆಲ್ವಿ. ತುಜೊ ಮೋಗ್ ಆನಿಂ ವಿಶ್ವಾಸ್ ತುವೆಂ ಮ್ಹಜೆರ್ ದವರ್ತಾಯ್. ವ್ಹೊಚ್ ಮ್ಹಾಕಾ ಮೆಳ್ಲ್ಲೊ ವರ್ತೊ ಪ್ರತಿಫಳ್" ಮೆಲ್ವಿನಾಚಿ ಪಾಟ್ ಥಾಪುಡ್ನ್ ತೊ ಮ್ಹಣಾಲೊ.
ಎಪ್ರಿಲ್ ಸರೊನ್ ಮೇ ಮಹಿನೊ ಲಾಗ್ಲ್ಲೊ. ಗಾವಾಂತ್ ಮನ್ವೆಲಾಬಾಗೆರ್ ಗೊವ್ಜಿಚ್ ಗೊವ್ಜಿ. ಕಿತ್ಯಾಕ್, ಸಿಂತಿಚೆಂ ಕಾಜಾರ್ ಹೆರಿಲಾಗಿಂ ನಿಶ್ಚಯ್ ಜಾಲ್ಲೆಂ. ಆಖ್ರೇಕ್ಯಿ ಸಿಂತಿಚ್ಯಾ ಗಳ್ಯಾಕ್ ಏಕ್ ಕುದಾಂಟಿ ಪಡ್ಚಿ ಆಸ್ಲ್ಲಿ. ಯೆಂವ್ಚ್ಯಾಚ್ ಆಯ್ತಾರಾ, ರೋಸ್ ಮ್ಹಣ್ ಠರಾಯಿಲ್ಲೆಂ. ಸೈರ್ಯಾಂ-ಧಯ್ರ್ಯಾಂಕ್ ಅಮಂತ್ರಣಾಂ ದೀವ್ನ್ ಜಾಲ್ಲಿಂ. ಸೆಜ್-ಸಮಾರಾಂ ಮನ್ವೆಲಾಬಾಗೆರ್ ಯೇವ್ನ್ ಕಾಜಾರಾಚ್ಯಾ ತಯಾರಾಯೆಕ್ ವಾವುರ್ತಾಲಿಂ. ಜಾಯ್ತೆ ಹಿತ - ಚಿಂತಕ್ ಆನಿಂ ಲಾಗ್ಶಿಲೆ, ಥೊಡಿ ಥೊಡಿ ಜವಾಬ್ದಾರ್ ಆಪ್ಣಾಚೆರ್ ವೋಡ್ನ್ ಘೆವ್ನ್, ಕಾಜಾರಾಕ್ ಆಶೆಂ ಕರಿಜಾಯ್, ತಶೆಂ ಕರಿಜಾಯ್ ಮ್ಹಣ್ ಮನ್ವಲಾಬಾಕ್ ಹಿಶಾರೆ ದಿತಾಲೆ. ಬಾಯ್ಲೊ, ಘರ್ಚೆ ಕಾಮ್ ಮಾಲ್ಘಡ್ಯಾ ಧುವೆಚ್ಯಾ ಮಾತ್ಯಾರ್ ಘಾಲ್ನ್, ಕಾಜಾರಾಚ್ಯಾ ಘರಾಂತ್ ಮಿರ್ಸಾಂಗ್ ಪಿಟೊ ಕರ್ತಾಲ್ಯೊ. ಭಾಂಗಾರಾಚಿ ಆನಿಂ ಕಾಪ್ಡಾಂಚಿ ತಯಾರಾಯ್ ಜಾಲ್ಲಿ. ಖಂಯ್ ಪಯ್ಶಿಲ್ಯಾ ಘರಾ, ಘುಡಾಂತ್ ದುಕ್ರಾಕ್ ಹ್ಯಾ ದಿಸಾಂನಿ ನೀಸಾ ಬದ್ಲಾಕ್, ಶಿತ್ಚ್ ಮೆಳ್ತಾಲೆಂ. ಹಂಪನ್ಕಟ್ಟಾ ಮಾರ್ಕೆಟೆಂತ್ಲೊ ಹುಸನ ಬ್ಯಾರಿ, ಆಯಿಲ್ಲ್ಯಾ ಗ್ರಾಯ್ಕಾಂಕ್ ಬೊಕ್ರ್ಯಾಚೆಂ ಸುಮಾರಾಚೆಂಚ್ ಮಾಸ್ ದಿತಾಲೊ. ಕಿತ್ಯಾಕ್, ಕಾಜಾರಾಕ್ ಮ್ಹಣ್ ತಾಣೆಂ ಪಾಂಚ್ ಬೊಕ್ರೆ ಬರೆಚ್ ವಿಂಚುನ್ ದವರ್ಲೆಲೆ. ಆನಿಂ ತಿ ಕಾಜಾರಾಚಿ ಗೊವ್ಜಿ ಆನಿಂ ತಯಾರಾಯ್ ವರ್ಣುನ್ ತುದಿ ಕರ್ಚಿ ನ್ಹಂಯ್. ಕಿತ್ಯಾಕ್ ಮನ್ವೆಲಾಬ್ ನಾಂವಾಡ್ದಿಕ್ ಮನಿಸ್ ಆನಿಂ ಗ್ರೇಸ್ತ್. ಕಾಜಾರಾಕ್ ನಹಿಂಚ್ ಮಾತ್ಬಾರಿ ಆನಿಂ ನಾಂವಾಡ್ದಿಕ್ ಮನಿಸ್. ಪಾದ್ರಿ ಬಗಾರ್ ಭಿಸ್ಪ್ ಸಾಯ್ಬ್ಯಿ ಖುದ್ಧ್ ರೆಸ್ಪೆರಾಚೆಂ ಮೀಸ್ ಸಾಂಗ್ತೊಲೊ ಮ್ಹಣ್ ಲೋಕ್ ಉಲೈತಾಲೊ. ಸಕ್ಡಾಂಚ್ಯಾ ತೊಂಡಾತ್ಯಿ ಮನ್ವೆಲಾಬ್. ಆನಿಂ ಹರ್ಯೆಕ್ಲೊ ಚಿಂತ್ತಲೊ, ಆಪ್ಣೆಂ ಕಾಂಯ್ ತರೀ ಕಾಮ್ ಕರಿಜಾಯ್ ಆನಿಂ ಮನ್ವೆಲಾಬಾಚಿ ಶಿಫಾರಾಸ್ ಜೊಡಿಜಾಯ್ ಮ್ಹಣ್.
ಆನಿಂ ಸಿಂತಿ.........ಸಿಂತಿಕ್, ಕಾಜಾರ್ ಮ್ಹಳ್ಯಾರ್ ದುಃಖ್ಯಿ ನಾತ್ಲ್ಲೆಂ ಆನಿಂ ಸಂತೊಸ್ಯಿ ಜಾವ್ನಾತ್ಲ್ಲೊ. ಪಯ್ಲೆಂ ಬಾಪಾಯ್ನ್ ಆಪ್ಣಾಕ್ ಸೈರಿಕ್ ಪಳೆಲ್ಯಾ ಮ್ಹಣ್ತಾನಾ, ಸಗ್ಳೆಂಚ್ ಕಳ್ವಳ್ಲ್ಲೆಂ ತೆಂ. ಬಾಪಾಯ್ಚ್ಯಾ ಪಾಂಯಾಕ್ ಪಡ್ಲೆಂ ತೆಂ ಆಪುಣ್ ಕಾಜಾರ್ ಜಾಯ್ನಾಂ ಮ್ಹಣ್. ಪುಣ್, ಮನ್ವೆಲಾಬಾಚೆಂ ಏಕ್ಚ್ ಹಟ್.....ತಾಣೆಂ ಧುವೆಚ್ಯಾ ರಡ್ಣ್ಯಾಕ್ ಗಣ್ಣೆಂಚ್ ಕೆಲೆಂನಾ. ಉಪ್ರಾಂತ್.....ಸಿಂತಿಕ್ ವಾಟ್ಚ್ ನಾತ್ಲ್ಲಿ. ಫಲಾಣ್ಯಾಂ ದಿಸಾ, ಆಪ್ಣಾಕ್ ಪಳೆಂವ್ಕ್ ನವ್ರೊ ಯೆತೊಲೊ ಮ್ಹಣ್ ಖಬಾರ್ ಮೆಳ್ತಾನಾ ಆಪುಣ್ ಭೋವ್ ವಿಕಾಳ್ ದಿಸಾಕ್ ಉಟ್ಲ್ಯಾಂ ಮ್ಹಣ್ ಭೊಗ್ಲೆಂ ಸಿಂತಿಕ್.
ವಾರ್ಯಾರ್ ಉಬ್ಚೆಂ ಸ್ವತಂತ್ರ್ ಸುಕ್ಣೆಂ ತೆಂ. ಭಾಂಗಾರಾಚೊ ಪಿಂಜ್ರೊ ತರೀ, ತಾಚ್ಯಾ ವಾಂಟ್ಯಾಕ್ ಸ್ವತಂತ್ರ್ ಚುಕ್ತಾ. ಆಪುಣ್ ನೆಣಾಸ್ಲ್ಲ್ಯಾ ಘರ್ಕಾರಾ ಸಾಂಗಾತಾ, ಜೀವನ್ ಕಶೆಂ ಸಾರ್ಚೆಂ? ತೊ ಕಸಲೊಗಾಯ್..... ಸುಂದರ್ ಆಸಾಗಿ? ಕಠಿಣ್ ಮನಿಸ್ಗಿ ? ಶಿಕ್ಪಿ ಮ್ಹಣ್ ಆಯ್ಕಾಲಾಂ....ಪುಣ್ ಸಮಾಜೆಂತ್ ಚ್ಯಾರ್ ಜಣಾಂ ಮುಖಾರ್ ಆಪ್ಣಾಕ್ ಪ್ರದರ್ಸುಂಚಿ ತಿತ್ಲಿ ಯೋಗ್ಯತ ತಾಕಾ ಆಸಾಗಾಯ್? ನಾ.....ಕಾಜಾರ್ ಮ್ಹಳ್ಯಾರ್ ಏಕ್ ಬಂದನ್. ದುಸ್ರ್ಯಾಚ್ಯಾ ಖಾಲ್ ದೀಸ್ ಸಾರ್ಚ್ಯಾಂತ್ ಅರ್ಥ್ ನಾ. ಆಪುಣ್ ಖಂಡಿತ್ ಕಾಜಾರ್ ಜಾಂವ್ಚಿನಾ. ಕೊಣೀ ತೊ ಜಾಂವ್ದಿ, ಆಪ್ಣಾಕ್ ತೊ ಪಳೆಂವ್ಕ್ ಆಯಿಲ್ಲ್ಯಾ ದೀಸ್, ತ್ಯಾ ನವ್ರ್ಯಾಕ್ ಹಾಂವ್ ನಿರಾಕರ್ಸಿತೆಲಿಂ.
ಪುಣ್, ವ್ಹೊ ನಿಚೆವ್ ಸಾಂಬಾಳುಂಕ್ ಸಿಂತಿಕ್ ಜಾಲೊನಾ. ತ್ಯಾ ಎಕಾ ಆಯ್ತಾರಾ, ಕಾಮಿಲ್ ಶೆಣಯ್, ರೊಫಿನ್ ಬಾಯ್, ಹೆರಿ, ಶಾಬಿಯಾಮ್ ಆನಿಂ ಲಾಗ್ಶಿಲೆಂ ಸಂಬಂಧಿಕ್ ಥೊಡೆ ಸಿಂತಿಕ್ ಪಳೆಂವ್ಕ್ ಆಯ್ಲೆ. ಆಯಿಲ್ಲ್ಯಾ ಸೈರ್ಯಾಂಕ್ ಬರೊ ಸತ್ಕಾರ್ ಲಾಭ್ಲೊ. ಉಪ್ರಾಂತ್ ಬಾಪಾಯ್ಚಾ ವತ್ತಾಯೆಕ್ ಆನಿಂ ಭೆಷ್ಟಾವ್ಣ್ಯಾಂಕ್, ಟ್ರೇಂತ್ ಪೀವನ್ ಘೆವ್ನ್ ಸಿಂತಿಚ್ ಭಾಯ್ರ್ ಆಯ್ಲೆಂ. ಹೆರಿಲಾಗಿಂ ಪಾವ್ತಾನಾ, ಸಿಂತಿಚೆಂ ಪಾಂಯ್ ಕಾಂಪ್ತಾಲೆಂ. ಏಕ್ಚ್ ಘಡಿ ಸಿಂತಿನ್ ಹೆರಿಕ್ ದೆಖ್ಲೆಂ......ದುಸ್ರ್ಯಾ ಕ್ಷಣಾ ಸಿಂತಿಚಿಂ ಚಿಂತ್ನಾಂಚ್ ದುಸ್ರಿಂ ಜಾಲ್ಲೆಂ.
ಹಾಸ್ತೆಂ ಮುಖ್, ಶಿಕ್ಪಾಚೊ ಭರ್ಮ್ ತೊಂಡಾರ್ ನಿಶೆತಾ. ಕಾಜುಲೆ ದೊಳೆ, ಪರ್ಜಳಿಕ್ ರೂಪ್...ಹೆರಿ ಪಳೆಂವ್ಕ್ ಸೊಭಿತ್ ದಿಸ್ತಾ. ದಾಕ್ತೆರ್ಗಿಚೆಂ ಶಿಕಾಪ್ ಶಿಕ್ಲಾ. ತಾಕಾ ನಿರಾಕರ್ಸುಂಚ್ಯಾಂತ್ ಅರ್ಥ್ ನಾ. ತಸಲೊ ಶಿಕ್ಪಿ, ಸುಂದರ್ ಆನಿಂ ಗ್ರೇಸ್ತ್ ನವ್ರೊ ಮೆಳೊಂಕ್ ಸುಲಭಾಯೆಚೆಂ ಕಾಮ್ ನ್ಹಂಯ್.
ಸಿಂತಿಚೊ ನಿಚೆವ್ ಧಂಡಳ್ಳೊ. ಆಯಿಲ್ಲ್ಯಾ ನವ್ರ್ಯಾಕ್ ನಿರಾಶಿ ಕರ್ತೆಲಿಂ ಮ್ಹಣ್ ಚಿಂತ್ಲ್ಲ್ಯಾ ಸಿಂತಿನ್, ತಾಚೆಲಾಗಿಂ ಕಾಜಾರಾಕ್ ಒಪ್ಪಿಗಿ ದಿಲಿ. ಆನಿಂ ಹೆರಿಯಿ ಸಿಂತಿಕ್ ಪಳೆವ್ನ್ ಭುಲ್ಲ್ಲೊ. ಸುಂದರ್ ಚೆಡುಂ, ತಶೆಂಚ್ ಗುಣೇಸ್ತ್ಯಿ ಆಸ್ತೆಲೆಂ. ಶಾಬಿಯಾಮಾನ್ ಸಿಂತಿ ವಿಷ್ಯಾಂತ್ ಪುಷ್ಕಳ್ ಶಿಫಾರಸ್ ಉಚಾರ್ಲ್ಯಾ ತ್ಯಾ ಶಿವಾಯ್, ಗ್ರೇಸ್ತ್ ಬಾಪಾಯ್ಕ್ ಎಕ್ಲಿಚ್ ಧುವ್.
ಆನಿಂ ಕಾಮಿಲ್ ಶೆಣಯ್ ಆನಿಂ ರೊಫಿನ್ ಬಾಯೆಚಿಂ ಚಿಂತ್ನಾಂಯ್ ತಿಂಚ್ ಜಾವ್ನಾಸ್ಲ್ಲಿಂ. ತಿಂ, ಕಾಂಯ್ ಆಡ್ಕಳ್ ನಾಸ್ತಾಂ ಸಿಂತಿಕ್ ಆಪ್ಲಿ ಸುನ್ ಕರುಂಕ್ ಕಬೂಲ್ ಜಾಲಿಂ. ದೊತಿ ಬಾಬ್ತಿನ್ ಧಾ ಹಜಾರ್ ರುಪಯ್ ದೀಂವ್ಕ್ ಮನ್ವೆಲಾಬ್ ಒಪ್ಲೊ. ಆಶಿ ಸೈರಿಕ್ ಫಟ್ ಜಾಲಿ. ತ್ಯಾ ವೆಳಾರ್, ಶಾಬಿಯಾಮ್ ಆಪ್ಣೆ ಕೆಲ್ಲೆಂ ಕಾಮ್ ಸುಫಳ್ ಜಾಲೆಂ ಮ್ಹಣ್ ವೊಂಟಾರ್ ಹಾತ್ ಹಾಲೈತಾಲೊ.
ಖರಾರ್ ಜಾಲೆಂ, ಆನಿಂ ಚಿಟಿ ವಾಚ್ಲ್ಯೊ. ಆನಿಂ ಕಾಜಾರಾಕ್ ದೀಸ್ಯಿ ಲಾಗಿಂ ಆಯ್ಲೆ. ಕಾಜಾರ್ ಸಿಂತಿ ಆನಿಂ ಹೆರಿಚೆಂ ನಹಿಂ, ಸಾಂಗಾತಾ ರಿಜಾಕ್ಯಿ ಸೈರಿಕ್ ಘಟ್ ಜಾಲಿ. ಬೆಂದೂರ್ ಲಾಂಕ್ಡಾಂ ಡಿಪೊ ದವರ್ನ್ ವ್ಯಾಪಾರ್ ಚಲಂವ್ಚ್ಯಾ ರಾಸ್ಕಿಞ್ಮಾಚೊ ಪೂತ್ ಇಂತ್ರು ಮೆಟ್ರಿಕ್ ವರೇಗ್ ಶಿಕೊನ್ ಬಾಪಾಯ್ಚೆಂಚ್ ಕಾಮ್ ಚಲೈತಾಲ್. ಆಶೆಂ ಕಾರ್ಕಳಾಂತ್ ಜೊವ್ಳೆಂ ಕಾಜಾರ್. ಪುಣ್, ಗಾಂವ್ ಪಯ್ಸ್ ಆಸ್ಲ್ಲ್ಯಾನ್, ಆನಿಂ ಕೊಡಿಯಾಳ್ಚ್ ಫಾವೊ ತೆಂ ಮ್ಹಣ್ ದಿಸ್ಲ್ಲ್ಯಾನ್ ಕಾರ್ಕಳ್ಚ್ಯಾಂನಿ, ಮಂಗ್ಳೂರ್ ಯೆಂವ್ಚೆಂ ಆನಿಂ ರೆಸ್ಪೆರ್ ಉರ್ವಾ ಫಿಗೆಜೆಂತ್ ಜಾಂವ್ಚೆಂ ಮ್ಹಣ್ ನಿರ್ಣಾಯ್ಸಿಲೆಂ. ತೆರೆಜ್ ಬಾಯೆಗೆರ್ ಮಾಟೊವ್ ಕರ್ಚೊ ಮ್ಹಣ್ ಕಾಮಿಲ್ ಶೆಣೈನ್ ಆಲೋಚನ್ ಕೆಲಿ.
ಹ್ಯಾ ವೆಳಾರ್ ಗಿಬ್ಬಾ.....! ತಾಕಾ ಸ್ವಪಾಣ್ಯಿ ಪಡೊಂಕ್ನಾತ್ಲೆಂ, ರಿಜಾಕ್ ಸೈರಿಕ್ ಜಾಲ್ಯಾ ಆನಿಂ ಕಾಜಾರಾಕ್ ಏಕ್ಚ್ ಹಪ್ತೊ ಉರ್ಲಾ ಮ್ಹಣ್. ರಿಜಾಚಿಂ ತಾಕಾ ಹ್ಯಾ ದಿಸಾಂನಿ ಪತ್ರಾಂಯಿ ನಾತ್ಲ್ಲಿ. ಆನಿಂ ತಾಣೆಂಯಿ ಚಡಿತ್ ಬರೈಲ್ಲ್ಲಿಂ ನಾಂತ್. ಕಿತ್ಯಾಕ್ ಮೆಲ್ವಿನಾಚಾ ಖತಿಂತ್ಚ್ ಆಸ್ಲ್ಲೊ ತೊ. ಬೊಂಬಯ್ ಆಸ್ಲ್ಲ್ಯಾ ಇಷ್ಟಾಕ್ ಬರವ್ನ್ ಜಾಲ್ಲೆಂ, ಪುಣ್ ಮೆಲ್ವಿನಾಚಿ ಝಳಕ್ಚ್ ನಾತ್ಲ್ಲಿ. ತಶೆಂಚ್ ನಿರಾಶಿ ಜಾಲ್ಲೊ ತೊ ಏಕ್ ದೀಸ್ ಜಿಲ್ಲಿಬಾಯೆಗೆರ್ ಆಯ್ಲೊ.
"ಓ....ಯೆ ಗಿಬ್ಬಾ. ತ್ಯಾ ದಿಸಾ ಯೆತಾಂ ಮ್ಹಣ್ತಾಲೊಯ್.....ತುಂ....ಆಜ್ ಘರಾ ಪಾಂಯ್ ದವರ್ತಾಯ್. ಯೆ..." ಜಿಲ್ಲಿಬಾಯೆನ್ ಸ್ವಾಗತ್ಸಿಲೆಂ.
"ಮೆಲ್ವಿನಾಚಿ ಕಾಂಯ್ ಖಬಾರ್ ಆಸಾಗಿ?" ತಾಣೆಂ ಸೊಪ್ಯಾಚಿಂ ಮೆಟಾಂ ಚಡ್ತಾನಾ ವಿಚಾರ್ಲೆಂ.
"ಹುಂ.....ಖಬಾರ್ ಆಯ್ಲ್ಯಾ" ಹಾಸೊನ್ ತಿ ಮ್ಹಣಾಲಿ, "ಬೊಂಬಯ್ ಥಾವ್ನ್ ಕಾಗದ್ ಆಯ್ಲಾಂ, ಮೆಲ್ವಿನಾಕ್ ಕಾಮ್ ಜಾಲಾಂ ಖಂಯ್. ಧಾಡ್ಲ್ಲೆ ಪನ್ನಾಸ್ ರುಪಯ್ಯಿ ಪಾವ್ಲ್ಯಾತ್"
ರಾಜುಚ್ಯಾ ಸಾಂಗ್ಣೆ ಪ್ರಕಾರ್, ಆವಯ್-ಬಾಪಾಯ್ಕ್ ದುಕೈನಾಯೆ ಮ್ಹಣ್ ಮೆಲ್ವಿನಾನ್ ಘರಾ ಕಾಗ್ದಾಂ ಬರಂವ್ಕ್ ಸುರು ಕೆಲ್ಲಿಂ. ಆನ್ಂ ಸರಾಗ್ ಪಯ್ಶೆಯಿ ಧಾಡ್ತಾಲೊ.
"ಓ....ಕಾಮಾರ್ ಪಾವ್ಲಾ ತರ್...!" ಆಜಾಪ್ ಜಾಲೊ ಗಿಬ್ಬಾ. "ಹಾಂವ್ ಕಾಮಾಕ್ ಪಾವೊಂಕ್ ಆನಿಕೀ ತೀನ್ ವರ್ಸಾಂ ಉರ್ಲ್ಯಾಂತ್ ಮಾವ್ಶೆ. ಕಸೊ ಆಸಾ ಖಂಯ್ ಮೆಲ್ವಿನ್?"
"ಬರೊ ಆಸಾ ಖಂಯ್ ಪುತಾ. ಕಾಂಯ್ ಖಂತ್ ಕರಿನಾಯೆ ಮ್ಹಣ್ ಬರೈತಾ. ತುಕಾ ಕಾಗಾದ್ ಯೇಂವ್ಕ್ ನಾವೇ?"
"ಮ್ಹಜೊ ಉಗ್ಡಾಸ್ ತೊ ವಿಚಾರ್ಲಾ ಆಸ್ತೊಲೊ ಮಾವ್ಶೇ" ಕೊಡ್ಸಣೆನ್ ಗಿಬ್ಬಾ ಮ್ಹಣಾಲೊ.
"ಬರೈತಾಲೊ ಗಿಬ್ಬಾ....ಕಾಂಯ್ ಪುರ್ಸತ್ ನಾತ್ಲ್ಲಿ ಕೊಣ್ಣಾ. ಹಾಂವ್ ತಾಕಾ ಕಾಗದ್ ಬರೈತಾನಾ ತುಜಿ ಖಬಾರ್ ಬರೈತಾಂ. ತುಂ ಘರಾ ಆಯಿಲ್ಲೊಯ್ ಆನಿಂ ತುಜೆ ರೆಕಾದ್ ದಿಲ್ಯಾಯ್ ಮ್ಹಣ್"
"ತಶೆಂಚ್ ಕರ್......ಮಾವ್ಶೇ" ಗಿಬ್ಬಾನ್ ಸಾಂಗ್ಲೆಂ.
ತ್ಯಾ ದೀಸ್, ಜಿಲ್ಲಿಬಾಯೆಚ್ಯಾ ವತ್ತಾಯೆನ್ ದನ್ಪರಾಂ ಜೆವ್ಣಾಕ್ ರಾವೊಂಕ್ ಪಡ್ಲೆಂ ಗಿಬ್ಬಾಕ್. ಜೇವ್ನ್, ಘರಾ ವೆಚೆಂ ಆಟ್ಟಾಣೆಂ ಕರ್ತಾಲೊ ತೊ. ತಿತ್ಲ್ಯಾರ್ ತಾಚಿ ದೀಷ್ಟ್ ಸಟ್ಟ್ ಕರ್ನ್ ರಸ್ತ್ಯಾರ್ ಪಡ್ಲಿ ಮನ್ವೆಲಾಬಾಚ್ಯಾ ಘರಾ ಮುಖಾರ್ ಏಕ್ ಕಾರ್ ಉಬೆಂ ಜಾಲೆಂ, ಆನಿಂ, ಸಿಂತಿ ಆನಿಂ ತಾಚ್ಯಾ ಸಾಂಗಾತಾ ಎಕ್ಲೊ ತರ್ನಾಟೊ ಸಕ್ಲಾ ದೆಂವ್ಲೆ. ಏಕ್ಚ್ ಕ್ಷಣ್....ಗಿಬ್ಬಾಕ್ ತ್ಯಾ ತರ್ನ್ಯಾಟ್ಯಾಚಿ ವಳೊಕ್ ಮೆಳೊಂಕ್ ವೇಳ್ ಗೆಲೊನಾ. "ಹೆರಿ.." ವ್ಹಡ್ಲ್ಯಾನ್ ತೊ ಘುಣ್ಗುಣ್ಲೊ.
ಜಿಲ್ಲಿಬಾಯ್ ಭಾಯ್ರ್ ಆಸ್ಲ್ಲಿ, ಆನಿಂ ಗಿಬ್ಬಾಚೊ ಉದ್ಗಾರ್ ತಿಕಾಯಿ ಆಯ್ಕಾಲೊ. "ತುಂ ತಾಕಾ ವಳ್ಕಾತಾಯ್ವೇ ಗಿಬ್ಬಾ?" ವಿಚಾರ್ಲೆಂ ತಿಣೆಂ.
"ಖಂಡಿತ್ ಜಾವ್ನ್.....ಪುಣ್....ಪುಣ್ ತೊ ಹಾಂಗಾ ಕಸೊ ಪಾವ್ಲೊ? ಸಿಂತಿಗೆಲ್ಯಾಂಕ್ ಸೈರೊ ಲೆಕ್ತಾಗಿ ತೊ?"
"ಓ...ತುಂ ತರ್ ಕಾಂಯ್ಚ್ ಖಬಾರ್ ನೆಣಾಂಯ್. ಸಿಂತಿಕ್ ಸೈರೊ ಲೆಕಿನಾ ಬಗಾರ್ ಸಿಂತಿಲಾಗಿಂ ಸೈರಿಕ್ ಜಾಲ್ಯಾ ತಾಕಾ. ಪೊರ್ವಾಂ ಆಯ್ತಾರಾ ರೋಸ್.."
"ಸಿಂತಿಕ್ ಕಾಜಾರ್..?" ಗಿಬ್ಬಾಕ್ ಆಜ್ಯಾಪ್ಚ್ ಜಾಲ್ಲೆಂ. ಉಪ್ರಾಂತ್ ತೊ ಹಾಸೊನ್ ಮ್ಹಣಾಲೊ - "ಹುಂ.....ಸಿಂತಿ ತಸಲ್ಯಾ ಚೆಡ್ವಾಂಕ್ ವೆಗಿಂಚ್ ಕಾಜಾರ್ ಕರ್ಚೆಂಯಿ ಬರೆಂಚ್. ಪುಣ್ ಹಾಂವೆಂ ಸ್ವಪ್ಣಾಂತ್ಯಿ ಲೆಕ್ಲೆಂನಾ, ಸಿಂತಿಲಾಗಿಂ, ಹೆರಿಕ್ ಸೈರಿಕ್ ಜಮಾತ್ ಮ್ಹಣ್. ಹೆರಿಕ್ ಹಾಂವ್ ಬರೊ ವಳ್ಕಾತಾಂ"
"ತಿ ಕಾಜಾರ್ ಜಾತೆಲ್ಯಾಂಚಿ ಖುಶಿ ಪುತಾ. ಘಡಿತ್ ಆಸ್ಲ್ಲ್ಯಾ ಥಂಯ್ ವೊಡಿತ್ ಮ್ಹಣ್ತಾತ್. ದೊನೀ ಘರಾಣಿಂ ಗ್ರೇಸ್ತ್ ಆನಿಂ ನಾಂವಾಡ್ಲೆಲಿಂ. ಆನಿಂ ಥಂಯ್ ದೊಡೆಂ ಕಾಜಾರ್ ಮ್ಹಣ್ ಖಬಾರ್ ......ಬರಿಚ್ ಗೊವ್ಜಿ ಆಸ್ತೆಲಿ"
"ದೊಡೆಂ ಕಾಜಾರ್!" ಗಿಬ್ಬಾಚೆಂ ದೊಳೆ ರುಂದಾಲೆ. ಹರ್ದೆಂ ಕಾಂಪೊಂಕ್ ಸುರು ಜಾಲೆಂ.
"ವ್ಹಯ್, ದೊಡೆಂ ಕಾಜಾರ್.. ಹೆರಿಚಿ ಧಾಕ್ಟಿ ಭಯ್ಣ್ ಎಕ್ಲೆಂ ರಿಜಾ ಅಸಾ. ತಾಕಾಯಿ ಮಂಗ್ಳೂರ್ಚೊಚ್ ನವ್ರೊ."
ಗಿಬ್ಬಾಚ್ಯಾ ತಕ್ಲೆಕ್ ತೊಣ್ಕ್ಯಾನ್ ವ್ಹಾಜೈಲ್ಲ್ಯಾಬರಿ ಭೊಗ್ಲೆಂ. ತಾಚೆಂ ಂಉಖ್ ವರ್ಣಾಂತರ್ ಜಾಲೆಂ. ತಾಳ್ಯಾಚಿ ಶೆಳ್ ಸೊಕೊನ್ ಗೆಲಿ. ರಿಜಾಕ್ ಕಾಜಾರ್....ಆಪ್ಲೊ ಮೋಗ್ ಕರ್ತಾಂ, ಆಪ್ಣಾಲಾಗಿಂಚ್ ಕಾಜಾರ್ ಜಾತಾ ಮ್ಹಣ್ ಭಾಸ್ ದಿಲ್ಲ್ಯಾ ರಿಜಾನ್ ಆತಾಂ ದುಸ್ರ್ಯಚಿ ಪತಿಣ್ ಜಾಂವ್ಕ್ ಕಬ್ಲಾತ್ ದಿಲ್ಯಾ!
ಥೂ.....ದಳ್ದಿರಿಂ ಚೆಡ್ವಾಂ......ಕಾಂಟಾಳ್ಚೆಂ ಗಿಬ್ಬಾಚೆಂ ಮನ್. ಆಜ್ ಮೊಗಾಚ್ಯಾ ಗೊದಾಂನಿ ಉತ್ರಾಂನಿ ಭುಲೈತಾತ್. ಫಾಲ್ಯಾಂ ಘಾತಾಚ್ಯಾ ವ್ಹಡ್ ಗುಂಡಿಯೆಂತ್ ಲೊಟುನ್ ಘಾಲ್ತಾತ್......ಆನಿಷ್ಟ್ ಹಿಂ ಚೆಡ್ವಾಂ. ಕೊಣಾಕ್ ಪಾತ್ಯೆಲ್ಯಾರೀ, ಸ್ತ್ರೀ ಜಾತಿಕ್ ಪಾತ್ಯೆಂವ್ಕ್ ನೊಜೊ.
"ಹಾಂವ್ ವೆತಾಂ ಮಾವ್ಶೇ.." ಬಾರಾಧಿಕ್ ತಾಳ್ಯಾನ್ ಗಿಬ್ಬಾ ಮ್ಹಣಾಲೊ. ತಾಚೆಂ ಅಂತಸ್ಕರ್ನ್ ಕೊಡು ಜಾಲ್ಲೆಂ.
"ಬರೆಂ ಗಿಬ್ಬಾ......ಆನಿಂ ಕೆದಾಳಾ ಯೆತಾಯ್?"
"ಖಂಯ್ಚಾಯ್ ದಿಸಾ ಯೆತಾಂ..." ಆಶೆಂ ಜಾಪ್ ದೀವ್ನ್ ತೊ ಚಲ್ಲೊ.
"ದುಸ್ರೆ ಪಾವ್ಟಿಂ ಸಲ್ವಣಿ. ಮೋಗ್....ಸುಣ್ಯಾಕ್ ಕಾಂತ್ಳಿ ದಾಕೈಲ್ಯಾಬರಿ ಚ್ಯಾರ್ ದೀಸ್ ಖೆಳೊವ್ನ್, ಉಪ್ರಾಂತ್ ಭಾಲಿ ಮಾರ್ಚ್ಯಾ ತಸಲ್ಯಾ ಕರ್ತುಬಾಕ್ ಮೋಗ್ ಮ್ಹಣ್ತಾತ್ಗಿ?
ತೊ ಚೆಡ್ವಾಂಚೆರ್ಚ್ ಕಾಂಟೊಳೊಂಕ್ ಲಾಗ್ಲೊ. ಆನಿಂ ಮುಖಾರ್ ಚೆಡ್ವಾಂಚ್ಯಾ ಪಾಸಾಂತ್ ಶಿರ್ಕೊಂಚೊಂನಾ ಮ್ಹಣ್ ದುಸ್ರೆ ಪಾವ್ಟಿಂ ನಿಚೆವ್ ಕೆಲೊ ತಾಣೆಂ. ಸಾಂಗತಾಚ್ ರಿಜಾಚ್ಯಾ ಕಾಜಾರಾಕ್ ವೆತೊಲೊಂ....ಆನಿಂ ತೆಂ ಮೊರಾಸರ್ ವಿಸರ್ನಾ ತಸಲೆಂ ಇನಾಮ್ ತಾಕಾ ಆಯೆರ್ ದಿತೊಲೊಂ ಮ್ಹಣ್ ಚಿಂತ್ಲೆಂ ತಾಣೆಂ.
ತ್ಯಾಪರಿಂ ಚಿಂತ್ತಾ ಚಿಂತ್ತಾಂ ಏಕ್ ಫಾವೊ ತೆಂ ಇನಾಮ್ ತಾಚ್ಯಾ ಮತಿಕ್ ಝಳ್ಕಾಲೆಂ. ತೊ ಘರಾ ಪಾವ್ಲ್ಲೊಚ್ ಸರ್ಶಿಲ್ಯಾ ಸೊನೊರಾ ಲಾಗಿಂ ಗೆಲೊ ಆನಿಂ ತಕಾ ಥೊಡಿಂ ಸೂಚನಾಂ ದಿಲಿಂ.
ದೀಸ್ ಸರ್ಲೆಂ ಆನಿಂ ಕಾಜಾರಾಚೊ ದೀಸ್ ಆಯ್ಲೊ. ಗಿಬ್ಬಾನ್ ಸಾಂಗ್ಲ್ಲಿ ವಸ್ತ್ ಸೊನಾರಾನ್ ತಯಾರ್ಸಿಲ್ಲಿ. ತ್ಯಾ ದೀಸ್ ಸುದೀರ್ಘ್ ಏಕ್ ಕಾಗಾದ್ ಗಿಬ್ಬಾನ್ ಬರೈಲೆಂ. ಆಶೆಂ ಸಾಂಜೆಚ್ಯಾ ವೆಳಾರ್ ತೊ ಬೆಂದೂರ್ ವಚೊಂಕ್ ಭಾಯ್ರ್ ಸರ್ಲೊ.
ದೊಡೆಂ ರೆಸ್ಪೆರ್ ಜಾಲ್ಲೆಂ. ಆನಿಂ ರಿಜಾಕ್ ಬೆಂದೂರ್ ನವ್ರ್ಯಾಗೆರ್ ಪಾಂವ್ಕ್ ಹಾಡ್ಲ್ಲೆಂ. ಮಾಟ್ವಾಂತ್ ವ್ಹೊಕ್ಲೆ-ನವ್ರ್ಯಾಕ್ ಆಯೆರ್ ದಿತಾಲೆ. ಸಟ್ಟ್ ಕರ್ನ್ ಗಿಬ್ಬಾಯಿ ಬಿತರ್ ಸರ್ಲೊ. ರಿಜಾಚಿ ದೀಷ್ಟ್ ತಾಚೆರ್ ಪಡ್ತಾನಾ ತೆಂ ಖರೆಂಚ್ ಕಾಂಪ್ಲೆಂ.
(ಗಿಬ್ಬಾನ್ ಕಿತೆಂ ಆಯೆರ್ ಕೆಲೆಂ? ತ್ಯಾ ಕಾಗ್ದಾರ್ ಕಿತೆಂ ಬರೈಲ್ಲೆಂ? ಸಿಂತಿ - ಹೆರಿಚೆಂ ಕಾಜಾರ್ ಸುಫಳ್ ಜಾಲೆಂಗಿ? ಇತ್ಯಾದಿ ಯೆಂವ್ಚ್ಯಾ ಅಂಕ್ಯಾಂತ್ ಪಳೆಯಾ)
ನಿರ್ಭಾಗ್ಯಾಚೆಂ ಸ್ವಪಾಣ್: ಪ್ರಸ್ತಾವನ್. ಅವಸ್ವರ್ 1, 2, 3, 4, 5, 6, 7, 8, 9, 10, 11, 12, 13, 14, 15, 16
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
