Maddtir Jinni (- Sirivont)

Maddtir Jinni!

Play the video

Watch on YouTube

Play the video

Watch on YouTube

Sirivont

To monis ya monzat?
tea sovalank zovab diunk ti soklina!
tichea asdder udel'le don duHkham thembe
mukhar zollchye chimnnechea mosok ujvaddant,
ticha komol otmeachye nitllayechem protirup zaun
motiancha zhollkan ujllon sokoil goll'lle!
tori, tea monxa thoim kosloch porinnam' zalona.

Tem rod ghumvtalem, aplyech ’goti’no.

Ti sut reuddaitali.

Udeun yemvcha sureacha kirnnamni atam ub choron ayil'li anim bhailea vatouronnant, vaura khatir apaplea ghorantolo bhair podd‌l'lo lok, soraram mettam kaddtalo. Toxench ticho poti.Titlear tichem bhorgem roddonk laglem - duda khatir.

Punn dud?

tichi kudd bhagonayil'leabori temyi maik zal'lem!

sokallinchi ur‌l'li il'li putti kafi aplea ballak bhoroili tinnem. Ballxeacha nistez dolleancheo asddeo ugteo asonk trann nastana soukas dhampleo anim thoinch padd zaun ayil'lea bholaikechi, piddesot nid poddli taka.

Tichea pottak‌yi tich ek kop futti kafi matr podd‌l'li.

Ti bhair aili.

Sopear ordhi mati khel'lye sorier umkallon aschem kapadd bitor vhorun tinnem vostur bodlilem.

Adlea disa modhean rat poreant jhemchea dolleamni dambun dourolelea nident reuddayil'lem tera lott'tti sut gheun ti bhair sorli. Dar add korun margar pai dourolo. Tera lott'tti! magagaran tika ek rupoi tis poise dilem.

Triptecho barik haso udelo ticha vontthar. Dusrea disak sut gheun thoinchi ti bhair poddli.

Il'lem mukhar ascha jinsachye ongddik rigon ordho kilo tandull, il'li mitt-mirsang, anim kitem bhovo gorjechem tinne ghetlem. Ek rupoi tis poise tinnem dilem.

"oniki tis poise zaizai. Tea xivai, poilencho ek rupoi, axem zumla don rupoi satt poise". Ongddigar sangon‌cho gelo.

"bakiche faleam ditam", togosl'lea tallean ti mhonnali.

"tem zaina".

"faleam಼cho ditam......"

tem zaina mhollem nohimve......!" ongddigar tapon uloilo. "adlea pauttim baki korun gel'li-i az aili-i".

"hamv borim nat‌l'lim....."

"tum bori asai kedalla? ek rupoi adlo kaddtam; ur‌l'lea tis poiseanchi mirsang vhor".

"te tis poise pattim di", tichea asddemr duHkha udeli.

"dhor, vhor," angddigaran dha poiseancho tin pauleo ticha hata ghaleo.

Marog utron virodh kusik geli ti. Thoim ascha hottelant tea poiseanche golliboje kannghele tinnem anim ghorchye vattek lagli. Ghorak lagim pautana, ballxeanchi bob aikatali!

unnea bhaddeacha ticha futtkor biddarant lamb jivachi ti il'li bagvon'nch bitor sorli. Tallo sukon ballxeachem roddnnem atam, kiddincha kimbhrabori korkox zal'lem. Tinnem taka ukl'lem.

’ballxeak az il'lo nis bhoroitelim,’ mhonn tinnem chint‌l'lem; punn......... Angddigaran poilenche rinn voza korun tika pattim dhadd‌l'lem.

Tichem kallich kxonnan dharunn zalem; bhurgeancho mog tantlo ghoddyen liplo.

Bhurgeak tinnem pattim dhornnir uddoilem. Tachea roddnneacho avaz ghor bhoron bhailea as‌pasant bhorsalo. Palvant tondd pusun ti bosli. Tem rod ghumvonk laglem; anim sut ek sarkem reuddonk laglem. Bara vorancho nad aikalo bauttea guddea thaun.

Bhurgeanchem roddnnem atam ravo‌l'lem; taka nid podd‌l'li.

Tinnem pottli ugti keli. Tantum as‌l'le boje tonddant ghalon, ek gobllo udak pieli ti. Hi niros anim ardhea pottachi jinni sodanchi! kazari bandhant auycho mog sanddun yetana eklo doya nat‌l'lo monis ticho poti zal'lo.

Sokallim to vetalo; sanjer pattim yetalo.

Sobar pauttim bebdo zaun!

thoim dhornnir podd‌l'lea bhurgeak pollelem tinnem.

Dimkure pai anim tachi tokli thoim thoim simentt vochon xenn kadd‌l'lea dhornnir vixevo getali. Choutem tem. Adlim moronn pavo‌l'lim! favotem anim purtem khann mellanat‌l'lea auychem dudh, prosut zal'lea toddeachch disamni suktalem!

potichi kumok?

tachi kumok, ghorantoli virrai matr! potinnen uloilear, tinnem koslem-i vicharlear, tika mar! dekun ti moun rautali; anim takayi moun ravonk poddtalem.

Rat paxar zatali......Dis udetalo......

To utthon choltalo.

Anim ti?

potta khatir sut reuddaitali anim hem panch vorsam thaun!

bhurgem roddonk laglem. Bhair till'llem; sanz zaun yetali. Utthon il'li kafi keli. Sezarcha ghora vochon il'lem dodh haddlem. Kafi pietoch bhurgem il'lem churuk zalem; mond haso tacha guli zal'lea mukhmollar udelo. Auyn ek umo damblom tea rogtachi sai nat‌l'lea hollduvea polear. Il'lem khell'lli ti tachelagim. Tochch ticho sontos; tench tichem monoronzon, sinema, nattok, klob, bhomvddi, ttrippam anim nach!

kallok poddon ailo. Zollarincho ’rum-i rum-i’ avaz aikalo anim tancheo suveo topunk lagleo. Ballxem portean roddlem. Chimnnim zolloili tinnem. Kuddant mosok ujvadd fanklom. Pott bob martalem; punn......Koslem randchem?

faleam khonddit tandull haddizai. Poilenchem rinn edoll‌chch farik kelam. Az ratim upaxim nidchem!
taka?

to jevina! ratim taka jevann naka.

Sokallim to hottelant kafi pieta; donporam hottelant jeuta; sanjer soro pieta! ballxeak thamboun nidailem tinnem.

Uprant? dusrea disacho bhorvoso zaun tem rod portean vixevo nastana ghumvonk laglem. Sumar ikra zatna to ailo. Ek pauttim loklo anim bitor sorlo. Portean bhair vochon vhannom sopear soddun bitor riglo.

"bhurgem khoim asa?"

"nidlam............"

"hanga hadd!"

"ni............."idlam mhonn portean sangonk ugtem kel'lem tichem tondd, adlea marancha adduk onubhovan, ordhem ugtench urlem. Ti soukas utthon bhurgeak haddon aili anim tacha hatant taka dilem. Tiyi laginch bosli; ek pauttim tannem bhurgeak sokoil ghal'lo ugddas yeun!

"zo...Yo ba....Llalla zoi", dorog tallean gannam ghalun bhurgeak dholoilem tannem. Bhurgeak punean bori nid podd‌l'li. Tinnem taka pollelem. Tache dolle tambdde disle tika; sangatach bhoron nilemvchi kotthinnai! eka disacho mog sohit tachem thaun tika mellonk natlo.

"bhurgeak ka.....Nnghe...."

tannem tem purtem mhonncha adinch tinnem hat vistarn vegim bhurgeak hotagot kelem anim vochonk utthli.

"ravo.......Go’ tannem tiche baulle damble. Ti thoinch bosli.

"hamv ......Az so......Ro.....Pi.....Yelam......."

ti vogem rauli.

"hamv ........A....Zo so....Ro...Piel'lam.....Tuzo ka.......Kaim sermamv asa...Gi sagi?

tichye asdder udel'le don duHkham thembe mukhar zollchye chimnnecha ujvaddak motiancha zhollkan sokoil goll'lle; tichea komol atymanche nitllayechem protirup zaun!

tori......

"sermamv.......Asa....Gi?" tacho denknno aikalo.

"na"

"ham ......Cho....Lo"

ti geli.

Bhurgeak nidailem.

Umallon yemvchem duHkh dambun dhorunk aplea vontthar jib gholloili tinne. Il'lea vellan to add poddtoch tinnem chimnni palouyoli. Kallok bhorlo. Purasonn zal'li tori, tika nid poddlina. Tichye motint, "aplo fuddar koslo? mholl'llem soval udelem vhoi, tichi mukhli jinni? edoll paxar zal'leabori nohim zalear anim kosli?

"kaim bodlaunn aschi na’, niraxechye toddir as‌l'lye tichye motichi nirdhari zovab.

Aplo santiponn vaddomvche sondrbhochch tika melltale. Ticho deva mukhar himabori dhovo korche koxott matr choddtale. Chilipili suknneancho avaz. Tika lamb nid podd‌l'li zaizai. Dolle gosttun amvosori utthli ti.
Hottelacho ugddas ayil'lo ticho poti, edoll‌cho mayak zal'lo. Tinnem tondd dhulem, uzo korun kafi keli.

"az tum'mche poise khonddit ditam.......Sutache melltat.... Ardhem kuddte dud chodd zai...." dudhak gel'le kodde poratolem tinnem.

"az‌cho dizai"

"khonddit ditam". Sontosan ti pattim aili.

Bhurgem utth‌l'lem. Jivo kolla dis vetam vetam unnim zaun yemvche tachem nistez tondd polletana tika sor‌l'lea bhurgeancho ugddas ailo. Kallzak suri romb‌l'le pori bhognnam udelim. Daktera sorxim gelear, panch - so rupoi punni zai. Potilagim vicharlear tika mellche sove anim xirap matr!

bhangar.....?

as‌l'lem il'lem soro piel'lea khatir tovoll tovoll dhor‌l'lea taka soddoun haddunk addvar as‌l'lem.
To monis ya monzat? tea soulank zovab diunk ti soklina! bhurgeank tinnem kafi dili.

Rod ghumvddailem; ur‌l'lem il'lem sut reuddaun ballxak nidaun ti chol'li. Tem rod ghumvtalem dekun tiche dis dhamvtale. To matr suxegat astalo.

’asle monis‌yi asat‌gi? vicharolem tinnem tikach/khonddit! ticho potich tanchem modlo eklo. Teoyi asat! dorbosot asat!!

"devo‌cho tankam rakondi" suskaroli ti. Dis dhamvtale apleach niyman. Eka aitara......

Il'lem himv khaun tika tap ailo. Aspotrek vochon tinnem il'lem ’miks‌chor’ haddlem.Tap raulo; punn.....

Khonkli suru zali; pottant dukh udeli!

dhormachem injekxonam melltalim tori, dukh choddon'nch geli.

Potilagim sanglem tinnem.

"tuka kedallayi sonkodd chuklemna; tum mornam-i kitea?!"

"mornam-i kitea?"

vhoi tench borem; tench sukh!"

’punn ballxem?’

’tachea khatir hamvem vanchazai; tem jivo asta poreant punnim, hamvem mhozo prann samballizai!’

tori, tem ’miks‌chor’ tika vokonk kortalem xivai, koslich soukasai dinatolem.

Atam rod ravon.......Ravon.....Ghumvtalem anim tem ghumvddamvchye hat ghoddye......Ghoddye.......Sokla poddtale!

poixe unnem melltale zal'lean, futti kafi matr tika pieunk melltali anim donpar yetana sogllea disachem tem ek pejechem jevann tichea pottant servatalem.

Tantum pez unnim; nis chodd!

sanjer portean futti kafi!

kallok poddon zollarincho to sodancho avaz aikatana chimnni haloili tinne; tel‌yi mugdon ayil'lem.

Sezara konnachogi zonma divs.

Nach, podam, anim kitem gom'mot; mozha!

to aniki yeunk natlo; ti taka raktali.

Punn..... Sosnnikayechi godd mirval'li koxttancho hat voir zal'lo!

tori, devache kakllut tea mosok ujvaddant zhoglabheak zhollkonchebori disli tika.

Titlear.......

Kalliz bhedun mukhar sorchem bhurgeachem roddnnem!

tin char dis thaun kotthinn osvosthy zaun as‌l'lea bhurgeak tinnem ukl'lem.

"kitem zalem balla mhoza?" godgodit tallean vicharolem tinnem.

Bhurgeache dolle ek pauttim ugte zaun dhample!

"balla, balla.....Mhoza raya....." taka hordeak dambun dhorun ti roddli! "jezu mhoji birmot pavo!"

uprant ?

moun!

to rigtana kuddant posrun ascha ardhea ondhkarant pinjkor kapddar aschi ti disnatleari, tem rod ghumvchem taka distalem.

Az tem ravo‌l'lem!

dolle gosttile tannem.

Vhanno nikllaun to eka kodman bitor sorlo. Tachi potinn add nid‌l'li. To lagim gelo. Bagvalo. Kalliz tachem dhodd'doddolem. Chimnnim lagim voddun, tichem mukhmoll tannem don‌yi hatamni ful apddocha jinsar lovo ujvaddak lagim kelem.

Titlea moipsan anim nazukayen tannem tika edoll opddunk na! tachi dixott ticha mukhmollar chorlim.
Az to soro pieunk natlo; tachi mot nitoll asli. Tiche dolle fonddant demvon bhomvtonnim kallbann chor‌l'li. Pole poddon tache voilim kusichim haddam, porvotam bhaxen voir chodd‌l'lim. Kes sukon zhanttam zal'le! hye sthiter itlo temp ti vanchon ur‌l'li vhodd mhonn dislem taka.

Tea nirjivo mukhmollacho, kiteagi, tannem ek umo ghetlo anim tichem namv poyil'le pauttim mogan apoitana, tacho tallo bhoron ailo. Anim ballxem?

tichi tokli sokoil dourun tannem chimnnim lagim vheli. Anim aplo anyek hat tye lhan kuddir choroilo.

Thondd ois apoddlleabori zalem taka!

jivo‌kolla uddon gel'lo rong; soglli kudd dhovi....Dhovi....!

vhodd tondea sarkem pott;

gudd bandh‌l'lem hordem;

udak ayil'le hat-pai anim pole!

"ba...Lla...." titlear tacho tallo bondh poddllo.

Kampchea payancher to ubo raulo.

Ek kanni tacha dolleam mukhar paxar zali!

ekye striyechi hrodyongom'. Korunn rosabhorit kanni!

moronn poreant maddtir jinniechi duHkhabhorit kotha!!

tea dis, to eka nattkak gel'lo; kazar zalea uprant poyil'le pauttim.

Thoim ek birmotichi kotha polleun, to movall‌l'lo. Ti kotha aplyech striyechiyi mhonn taka kollonk vell gelona.

Tichem lagim mogan ek utar ulvonk nattok mogdotach tannem soraram mettam kadd‌l'lim.

Aplea samballachem poixe zogasannen samballun, soro piemvchi vot'tayechi voddnni dambun dhorun, dhamvam dhamvim to ayil'lo..

Punn......

Tannem bolsak hat ghalo.

Tika voktak diunk mhonn chintun tannem hadd‌l'le te nott thoinch vixevo ghetale.

Titlear .......

Tacha dolleamni duHkham bhoron sat att chimnneo pettyil'leabori taka dislem.

Tim sokoil golltoch.....

Dhornnir ek kallench anim tache boglek ek dhovem rup sasnnacho vixevo ghemvche dislem taka.

Tachi potinn anim tachem bhurgem!

to yetana ghumvon aschem tem rod ravo‌l'lem. Taka virar korchem ballxeachem tem roddnnem bondh podd‌l'lem. Hatamni aplem muskor dhampun vhoddlean roddlo to, hamv dharunn zal'lom; mhojea kallzant soitani kotthorai raz kortali - kuddkea utramni villap kelo tannem.

Anim toull.......

Tel mugdon ayil'li chimnni ek‌cho pauttim vixex prokas diun palouli.

Andhkar pasarolo.

Punn.....

Tachabori as‌l'lea itor sobar ghoramni ti aniki pett'tali anim tantum maddtir jinni jiemvcheo striyo, bebdo zaun yemvcha apaplea potik rakon ravo‌l'lim!