ಅಸ್ಥಿರ್ ಮೆಟಾಂ
ಸ್ಟೇನ್ ಅಗೇರಾ
ದುಭಾಯ್ ಥಾವ್ನ್ ಉಬೊನ್ ಆಯಿಲ್ಲೆಂ ವಿಮಾನ್ ಮುಂಬೈ ವಿಮಾನ್ ಥಳಾಕ್ ಉಮೊ ದಿತಾನಾ ಎದೊಳ್ ಪರ್ಯಾಂತ್ ಜೆಮೆವ್ನ್ ಆಸ್ಲ್ಲ್ಯಾ ಅಗ್ನೆಲಾಚಿ ನೀದ್ ತಾತ್ಕಾಲಿಕ್ ಸುಟ್ಲಿ. ವೊರಾಂ ರಾತಿಚಿಂ ದೋನ್. ರನ್ವೇಚೆರ್ ಹಳೂ ಚಲೊನ್ ಆಸ್ಚೆಂ ವಿಮಾನ್ ಅಪ್ಲೆ ಜಾಗ್ಯಾರ್ ಸ್ಥಿರ್ ಜಾತಾನಾ ಸರ್ವ್ ಪಯ್ಣಾರಿ ದಡ್ಬಡೊನ್ ಅಪಾಪ್ಲಿಂ ಹೇಂಡ್ ಬೇಗಾಂ ಆರಾಂವ್ಕ್ ಲಾಗ್ಲೆ. ಅಗ್ನೆಲಾನ್ ಉಬೊ ಜಾವ್ನ್ ಮಾತ್ಯಾ ವಯ್ಲೆಂ ಕಂತ್ರಾಳ್ ಉಗ್ತೆಂ ಕೆಲೆಂ. ಅಪ್ಲಿ ಬ್ರೀಫ್ ಕೇಜ್ ಆನಿ ಡ್ಯೂಟಿ ಫ್ರಿ ದುಕಾನಾಂ ಥಾವ್ನ್ ಘೆತ್ಲ್ಲ್ಯಾ ಮಾಲಾಚಿಂ ಪ್ಲಾಸ್ಟಿಕ್ ಬೇಗಾಂ ಜೊಗಾಸಾಣೆನ್ ಸ್ವಾಧೀನ್ ಕೆಲಿಂ. ಸಹ-ಪಯ್ಣಾರ್ಯಾಂ ಸಂಗಿಂ ತೊ ಸುರಂಗಾ ಸಾರ್ಕ್ಯಾ ದ್ವಾರಾ ಥಾವ್ನ್ ಭಾಯ್ರ್ ನಿಕಾಳ್ಳೊ. ದ್ವಾರಾ ಥಾವ್ನ್ ವಿಮಾನ್ ಸ್ಥಳಾಕ್ ಪಯ್ಲೆಂ ಮೇಟ್ ದವರ್ತಾನಾ ತಾಕಾ ಪಾಂಯಾಂತ್ ಅಸ್ಥಿರತಾ ಭೊಗ್ಲಿ.
ಘರ್ ಆನಿ ಕುಟ್ಮಾಚೆಂ ಸ್ಥಿರ್ ಭವಿಶ್ಯ್ ಆಶೆವ್ನ್ ತೊ ಗಲ್ಪ್ ರಾಷ್ಟ್ರಾಕ್ ಪಾವ್ಲ್ಲೊ, ಸ ವರ್ಸಾಂ ಉದ್ಯೋಗ್ ಕರ್ನ್ ಆಜೂನ್ ಹಿ ಅಸ್ಥಿರತಾ ಕಿತ್ಯಾಕ್? ಅಸ್ಕತ್ಕಾಯೆಚೆ ಉದ್ವೇಗಾಂ ಥಾವ್ನ್ ಬಚಾವಿ ನಾ?
ತಾಕಾ ಆವ್ಚಿತ್ ದುಭಾಯಾಂತ್ ತಾಚೆ ಸವೆಂ ವಾವರ್ಚೊ ಆಪ್ತ್ ಮಿತ್ರ್ ಡೇವಿಡಾಚೊ ಉಡಾಸ್ ಮತಿಂತ್ ಉಪ್ಯೆವ್ನ್ ಆಯ್ಲೊ. ಅಗ್ನೆಲಾಚೊ ಗಾಂವ್ ಶಿರ್ವಾಂ ತರ್ ಡೇವಿಡ್ ಗಾಂವಾಂತ್ ಬಂಟ್ವಾಳ್ಚೊ. ತೆ ಏಕಾಚ್ ಕಂಪೆನಿಂತ್ ಸಾಂಗಾತಾ ಕಾಮ್ ಕರ್ತಾಲೆ. ರಶೀದಿಯಾ ಜಾಗ್ಯಾರ್ ಕಂಪೆನಿಚಾ ಕೆಂಪಾಂತ್ ತಾಂಚೊ ನಿವಾಸ್. ಏಕಾ ಕುಡಾ ಭಿತರ್ ಆಟ್ ಜಣ್, ಪಾಂಚ್ ಭಾರಾತಾಚೆ, ಬಾಕಿಚೆ ತೇಗ್ ನೆಪಾಲಿ. ವಿವಿಧ್ ಧಿಕ್ಕಾಂ ಥಾವ್ನ್ ತಾಂಚೆಂ ಯೆಣೆ ಜಾಲ್ಲೆಂ. ಹೆರಾಂ ಸಂಗಿಂ ಅಗ್ನೆಲಾಕ್ ವಿಶೇಸ್ ಸಳಾವಳ್ ನಾತ್ಲ್ಲಿ. ಮಂಗ್ಳುರ್ಚೆ ಆಸ್ಪಾಸ್ ಗಾಂವ್, ಕೊಂಕ್ಣಿ ಉಲೊಣೆ ಆನಿ ಪ್ರತ್ಯೇಕ್ ಜಾವ್ನ್ ಕ್ರೀಸ್ತಾಂವ್ ಮ್ಹಣ್ತಾನಾ ತಾಣಿ ಎಕಾಮೆಕಾಚೊ ಸಾಂಗಾತ್ ಸೊಧುಲ್ಲ್ಯಾನ್ ವಿಶೇಶತಾ ನಾತ್ಲ್ಲಿ. ಆಸ್ಪಾಸ್ ಮೊಗಾಚಿಂ ಕೊಣ್ಯಿಂ ನಾತ್ಲ್ಲ್ಯಾ ತಾಕಾ ತಾಚೆ ಆತ್ಮೀಯಿ ಮಳ್ಯಾರ್ ಎಕ್ಲೊಚ್ ಡೇವಿಡ್. ಏಕಾಮೆಕಾಚಾ ಗರ್ಚೆಂಕ್ ಪಾಂವ್ಚಾಂತ್ ತಾಂಕಾಂ ಆಳ್ಸಾಯಿ ನಾತ್ಲ್ಲಿ. ದಿಸ್ಪೊಡ್ತ್ಯಾ ಜಿಣ್ಯೆಚಾ ಮಾಮುಲಿ ಆಧಾರಾ ಥಾವ್ನ್ ಪಯ್ಶಾಂಚಾ ಗರ್ಜಾಂ ಪರ್ಯಾಂತ್ ತಾಂಚೊ ಸಾಂಗಾತ್ ಚುಕಾನಾತ್ಲ್ಲೊ.
ಇಮ್ಮಿಗ್ರೇಶನಾಂತ್ ಲಾಯ್ನಿರ್ ಉಬೊ ಜಾಲ್ಲ್ಯಾ ಅಗ್ನೆಲಾಚೆಂ ಕಾಳಿಜ್ ದಡ್ದಡ್ಲೆಂ. ಅಸಹನೀಯ್ ಕಳ್ವಳ್ಯಾಂಚೆಂ ಕಾರಣ್ ಸೊಧುಂಕ್ ತೊ ಚಡ್ಪಡ್ಲೊ. ಇಮ್ಮಿಗ್ರೇಶನ್ ಉತ್ರೊನ್ ಕಸ್ಟಮ್ಸಾಚೊ ಧೊಶಿ ಚಿಂತುನ್ ಯಾ ಶಿರ್ವಾಂ ರಾಕೊನ್ ಆಸ್ಚಾ ಘರ್ಚಾಂಕ್ ಭೆಟ್ಚಾ ಅತ್ರೇಗಾನ್ ಯಾ ದುಭಾಯಾಂತ್ ಡೇವಿಡಾಕ್ ಸಾಂಡುನ್ ಆಯ್ಲಾಂ ಮ್ಹಣ್ಚಾ ಖಂತಿನ್?
ಇಮ್ಮಿಗ್ರೇಶನ್ ಪಾಶಾರ್ ಜಾವ್ನ್ ಲಗ್ಗೇಜ್ ಟ್ರೊಲಿರ್ ಘಾಲ್ನ್ ಪಾಚ್ವಿ ವಾಟ್ ವಿಂಚ್ತಾನಾ ತಾಂಬ್ಡ್ಯಾ ನಿಶಾನೆ ಥಾವ್ನ್ ಎಕ್ಲೊ ಕಸ್ಟಮ್ಸ್ ಅಧಿಕಾರಿ ಆಡ್ ಆಯ್ಲೊ. ಆಶೆಂ ಆದಿಂಯಿಂ ಘಡ್ಲ್ಲೆಂ. ಶಿಕ್ಪಿ, ಅನ್ಕೂಲ್ ಯಾ ಕುಟ್ಮಾ ಸವೆಂ ಕಿತೆಂಯಿ ದಾಸ್ತಾನ್ ವಾವೊನ್ ಹಾಡ್ಲ್ಯಾರ್ ಕಸ್ಟಮ್ಸ್ ಅಧಿಕಾರಿ ತ್ಯಾ ಪಂಗ್ಡಾಕ್ ಧೊಶಿನಾಂತ್. ತಾಣಿಂ ರಾಕೊನ್ ಆಸ್ಚೆಂ ಅಸ್ಕತ್ ಪಾಂಯಾಂನಿ ಅಸ್ಥಿರ್ ಮೆಟಾಂ ಕಾಡ್ಚಾ ಮಾಮುಲಿ ಶಿಕ್ಲ್ಲ್ಯಾ ಪಾಪ್ ವರ್ಗಾಚಾಂಕ್.
ಅಧಿಕಾರಿಲಾಗಿಂ ತರ್ಕ್ ಕರ್ಚೆ ತಿತ್ಲೆಂ ಶಿಕಾಪ್ ಅಗ್ಲೆಲಾ ಲಾಗಿಂ ನಾತ್ಲ್ಲೆಂ. ಕೊನ್ಶಾಕ್ ಅಪವ್ನ್ ವರ್ನ್ ಬೊಕ್ಸ್ ಆನಿ ಸೂಟ್ಕೇಜ್ ಉಗ್ತೆಂ ಕರ್ ಮ್ಹಣ್ತಾನಾ ಆದ್ಲ್ಯಾ ಭೆಟೆರ್ ವಿಚಾರ್ಲ್ಲಾಪರಿಂ ಕಿತ್ಲೆ ಘೆತಾಯಿ ಮ್ಹಣ್ ಅಗ್ನೆಲಾನ್ ಶೀದಾ ವಿಚಾರ್ಲೆಂ. ಅಧಿಕಾರಿನ್ ದಾಕ್ಷೇಣ್ ದಾಕಯ್ನಾಸ್ತಾನಾ ದೋನ್ ಬೊಟಾಂ ದಾಕಯ್ತಾನಾ ಅಗ್ನೆಲಾಕ್ ದೋನ್ ಹಜಾರ್ ದೀವ್ನ್ ಸುಟ್ಕಾ ಜೊಡ್ಚೆಂ ಅವಶ್ಯ್ ದಿಸ್ಲೆಂ.
ದೋನ್ ಹಜಾರ್ ಪಾಂಚ್ ಮಿನುಟಾಂ ಭಿತರ್ ರಾಜಾಂವ್ ನಾತ್ಲ್ಲ್ಯಾ ಕಾರಾಣಾನ್ ಹೊಗ್ಡಾಯ್ತಾನಾ ತೊ ನಿಜಾಯ್ಕಿ ಚುರ್ಚುರ್ಲೊ. ಹೆರ್ ವಾಟ್ ನಾತ್ಲ್ಲಿ. ದೋನ್ ವರ್ಸಾಂ ಉಪ್ರಾಂತ್ ಕುಟ್ಮಾಕ್ ಭೆಟ್ಚಾ ಸಂತೊಸಾನ್ ಹೊಗ್ಡಾಯಿಲ್ಲ್ಯಾ ಪಯ್ಶಾಂ ಥಾವ್ನ್ ತಾಚೆಂ ಧ್ಯಾನ್ ನಿಸ್ರೊನ್ ಗೆಲೆಂ.
ಶಿರ್ವಾಂತ್ ರಾಕೊನ್ ಆಸ್ಚಿಂ ತಾಚಿ ಮಾಂಯ್, ಪಪ್ಪಾ, ಭಯ್ಣ್ ರುಬಿ, ಭಾವ್ ಅನಿಲ್, ಭಾಯ್ಲ್ ಸುನೀತಾ, ಭುರ್ಗಿಂ ರಶ್ಮಿ ಆನಿ ರೆನ್ನಿ. ಚಾರ್ ವರ್ಸಾಂ ಆದಿಂ ಗಾಂವಾಂಕ್ ಆಯಿಲ್ಲ್ಯಾ ಸಂದರ್ಭಿಂ ಆವಯಿ ಬಾಪಯ್ಚಾ ವತ್ತಾಯೆಕ್ ತೊ ಕಾಜಾರ್ ಜಾಲ್ಲೊ. ಆಶೆಂ ಪಯ್ಲೆಂ ರಶ್ಮಿಚೆಂ ಜನನ್ ಜಾಲ್ಲೆಂ. ದೋನ್ ವರ್ಸಾಂ ಆದಿಂ ರಜಾ ತಿರ್ಸಾತಾನಾ ಸುನೀತಾನ್ ಪರತ್ ಗುರ್ವಾರ್ ಜಾವ್ನ್ ಬಾಳಾಂತ್ ಜಾಲ್ಲ್ಯಾ ರೆನ್ನಿಚೆಂ ತೋಂಡ್ ಅಗ್ನೆಲಾನ್ ಆಜೂನ್ ಪಳೆಂವ್ಕ್ ನಾತ್ಲ್ಲೆಂ. ಮುಕ್ಲೆ ದೋನ್ ಮಹಿನೆ ಕುಟ್ಮಾಸವೆಂ ರಾಯಾಪರಿಂ ದೀಸ್ ಕಾಡ್ಯೆತ್ ಮ್ಹಣ್ಚಾ ಸಂತೊಸಾನ್ ತ್ವರಿತ್ ಶಿರ್ವಾಂ ಪಾವೊಂಕ್ ತೊ ಆತುರಿತ್ ಜಾಲೊ.
ತ್ವರಿತ್ ಮಂಗ್ಳುರಾಕ್ ಪಾವೊಂಕ್ ತೊ ವಿಮಾನಾರ್ ಪಯ್ಣ್ ಕರ್ಚಾ ತಿತ್ಲೆ ಅನ್ಕೂಲ್ ನ್ಹಂಯ್. ಅಂತರಾಷ್ರೀಯಿ ನಿಲ್ದಾಣಾ ಥಾವ್ನ್ ಜಾಯ್ತೆ ಭಿತರ್ಲ್ಯಾ ಭಿತರ್ ರಾಷ್ಟ್ರೀಯಿ ವಿಮಾನ್ ಸ್ಥಳಾಕ್ ವೆಚೆಂ ತಾಣೆ ಪಳೆಯಿಲ್ಲೆಂ. ತಸಲ್ಯಾಂಕ್ ಅಪ್ಲಿ ಲಗ್ಗೇಜ್ ದೀವ್ನ್ ಪಾಶಾರ್ ಜಾಂವ್ಕ್ ಅಲಗ್ ವಾಟ್ ಆನಿ ಸವ್ಲತಾ ಆಸ್ಲ್ಲಿ. ಅಪ್ಣಾಕ್ ತೆಂ ಹಕ್ಕ್ ನಾ ಮ್ಹಣ್ ಚಿಂತುನ್ ತಾಕಾ ವೆತೆಲ್ಯಾಂಚೊ ಮೊಸೊರ್ ಜಾಲೊ ಆನಿ ತೋಂಡ್ ಬಾವ್ಲೆಂ. ಮುಂಬೈ ಥಾವ್ನ್ ಮಂಗ್ಳುರಾಕ್ ತಾಣೆ ವಿಮಾನಾರ್ ಎದೊಳ್ ಪಯ್ಣ್ ಕರುಂಕ್ ನಾತ್ಲ್ಲೆಂ. ತಾಣೆ ದುಭಾಯ್ ಕಾಮ್ ಕರ್ಚಿ ಕಂಪೆನಿ ತಾಕಾ ಫಕತ್ ಮುಂಬೈ ಪರ್ಯಾಂತ್ ದೋನ್ ವರ್ಸಾಂಕ್ ಏಕ್ ವಿಮಾನಾಚಿ ಟಿಕೇಟ್ ದಿತಾಲಿ. ಗಾಂವಾಂಕ್ ಪಾವೊಂಕ್ ತೊ ಸರ್ಕಾರಿ ಬಸ್ಸಾಚೊ ಆಧಾರ್ ಘೆತಾಲೊ.
ಅಗ್ನೆಲಾಕ್ ತಾಚೆ ಕಷ್ಟಾಂಚಾ ಪಯ್ಣಾಚಿ ಪರಿಚಯಿ ಆಸ್ಲ್ಲಿ. ಏರ್-ಪೋರ್ಟಾಚೊ ಕೋಚ್ ನಿಲ್ದಾಣಾ ಥಾವ್ನ್ ಶಹರಾ ಪರ್ಯಾಂತ್ ವೆತಾಲೊ. ತೊ ಕೋಚಾಕ್ ರಾಕೊನ್ ರಾವ್ಲೊ. ತಾಚೆ ಪರಿಂ ಹೆರ್ ಜಾಯ್ತೆ ಆಸ್ಲ್ಲೆ. ಕೋಚ್ ಯೆತಾಚ್ ತೊ ಲಗ್ಗೇಜ್ ಸಾಂಬಾಳ್ನ್ ಚಡ್ಲೊ. ಉಪ್ರಾಂತ್ ಥೊಡ್ಯಾ ವೇಳಾನ್ ಬೋಂಬೆ-ಸೆಂಟ್ರಲ್ ದೆಂವ್ಲೊ. ಸರ್ಕಾರಿ ಬಸ್ಸ್ ನಿಲ್ದಾಣಾ ಪರ್ಯಾಂತ್ ತಾಣೆ ಟೆಕ್ಸಿ ಭಾಡ್ಯಾಕ್ ಘೆತ್ಲಿ. ಚಡ್ ಪಯ್ಸ್ ನಾತ್ಲ್ಲೆಂ. ಲಗ್ಗೇಜ್ ನಾತ್ಲ್ಲಿ ತರ್ ತೊ ಚಲೊನ್ ವೆತಾ ಆಸ್ಲ್ಲೊ. ತಾಣೆ ಗಾಂವಾಂಕ್ ವೆಚಿ ಟಿಕೇಟ್ ಘೆತ್ಲಿ. ಅಪ್ಲಿ ಸೂಟ್ಕೇಜ್ ಆನಿ ಬೊಕ್ಸ್ ಬಸ್ಸಾರ್ ಚಡಯ್ಲೊ. ಬ್ರಿಫ್ಕೇಜ್ ಆನಿ ಪ್ಲಾಸ್ಟಿಕ್ ಬೇಗಾಂ ಬಸ್ಕೆಲಾಗಿಂ ದವರ್ಲಿಂ. ಬಸ್ಕೆರ್ ಘಳ್ತಾಚ್ ಥೊಡ್ಯಾ ಮಿನುಟಾಂನಿ ಬಸ್ಸ್ ಮುಕಾರ್ ಸರ್ತಾನಾ ತಾಚೆ ದೊಳೆ ಕುರ್ವಾಲೆ.
ಸ ವರ್ಸಾಂ ಆದಿಂ ಮಂಗ್ಳುರ್ಚಾ ಏಕಾ ಏಜೆಂಟಾಕ್ 35000 ಯೆಟುನ್ ದುಬಾಯ್ಚಿ ವೀಜಾ ಯೆತಾನಾ ತೊ ತಾಕಾ ಸರ್ಗ್ ಭೋವ್ ಲಾಗಿಂ ದಿಸ್ಲ್ಲೊ. ಗಲ್ಫಾ ಥಾವ್ನ್ ರಜೆರ್ ಯೆಂವ್ಚೆ ಜಾಯ್ತೆ ಸಯ್ರೆ-ಈಷ್ಟ್-ಗಾಂವ್ಚೆ-ಸೆಜಾರಿ ಜೀನ್ಸ್-ಟೀಶರ್ಚ್-ರೇಬನಾಚಿ ಸೊಭಾಯಿ ದಾಕವ್ನ್ ಭಂವ್ತಾನಾ ಹೆರಾಂ ಪರಿಂ ಅಗ್ನೆಲ್ ಪಿಶ್ಯಾರ್ ಪಡ್ಲ್ಲ್ಯಾಂತ್ ನವಾಲ್ ನಾತ್ಲ್ಲೆಂ. ೩೫೦೦೦ ರುಪಯಿ ಏಜೆಂಟಾಕ್ ತರ್ ಪ್ರಥಮ್ ಟಿಕೇಟಿಚೆ ಪಯ್ಶೆ ಖುದ್ಧ್ ಭರುಂಕ್. ದುಭಾಯ್ ವೆತಾಚ್ ದೊಡ್ಯಾನ್ ಭಾಂಗಾರ್ ದಿತೊಲೊಂ ಮ್ಹಣ್ಚಿ ಭಾಸ್ ದೀವ್ನ್ ಆವಯ್ಕ್ ಅಪ್ಲೆ ನಗ್ ವಿಕುಂಕ್ ತಾಣಿ ರಾಜಿ ಕೆಲ್ಲೆಂ. ವೆಗಿಂಚ್ ನವೆಂ ಘರ್, ಬಾಪಾಯ್ಕಿ ಸ್ಕೂಟರ್, ಆವಯ್ಕ್ ದರಬಸ್ತ್ ಭಾಂಗಾರ್, ಭಾವ್ ಆನಿ ಭಯ್ಣಿಕ್ ಸೊಭಿತ್ ವಿದೇಶಿ ವಸ್ತುರ್, ಖುದ್ಧ್ ಅಪ್ಣಾಕ್ ಮೊಟೆಂ ಬೇಂಕ್ ಬೆಲೆನ್ಸ್, ಸದಾಂ ಜೀನ್ಸ್-ಟೀಶರ್ಟ್-ರೇಬನ್-ರಿಬೊಕ್ ಮೊಚೆ ಆನಿ ಮೀಸಾ ಉಪ್ರಾಂತ್ ಮಿತ್ರಾಂಕ್ ಘೆವ್ನ್ ರೆಸ್ಟೊರೆಂಟಾಂಚೆಂ ಬಿಲ್ಲ್ ದಿತಾನಾ ಅಪ್ಣಾಚೆ ಹಾತ್ ಕಾಂಪ್ಚೆನಾಂತ್ ಮ್ಹಣ್ ತೊ ಸಪ್ಣೆಲ್ಲೊ.
ಗಾಂವಾಂತ್ ಸ್ಥಳಿಯಿ ಸಂಸ್ಥ್ಯಾಂತ್ ಲಾನ್ಸೊ ಇಲೆಕ್ತ್ರಿಕಲ್ ಕೋರ್ಸ್ ಕರ್ನ್ ವೀಜ್ಸಕತ್ ಸಂಬಂಧಿತ್ ಕಂತ್ರಾಟಾಂ ಘೆವ್ನ್ ತೊ ಅಪ್ಲೊ ದಂದೊ ಚಲಯ್ತಾಲೊ ತರೀ ಸಮಧಾನ್ ನಾತ್ಲ್ಲೆಂ. ತ್ಯಾ ಜಿಣ್ಯೆಂತ್ ರಂಗ್ ನಾತ್ಲ್ಲೊ. ಮಾರ್ಯಾದ್ ಉಣೆ. ಗಾಂವ್ಚಾ ಸಮಾಜೆಂತ್ ಅಂತಸ್ಥ್ ನಾತ್ಲ್ಲೆಂ. ಸೈಕಲಾರ್ ಭಂವೊನ್ ಪುರೊ ಜಾಲ್ಲೆಂ. ಬೈಕಾಚಿ ಆಶಾ ಉದೆಲ್ಲಿ.
ದುಭಾಯ್ಚಿ ಏಕ್ ವೀಜಾ ಹಾಡಯಿ ಮ್ಹಣ್ ತಾಣೆ ಹೆರಾಂಕ್ ಮಾಗೊನ್ ಪರಾತಿಲ್ಲ್ಯಾಕ್ ಲೇಕ್ ನಾ. ಅಕ್ರೇಕ್ ಏಜೆಂಟಾಚಾ ಪಾಂಯಾ ಮುಳಾಕ್ ತೊ ಪಾವ್ಲ್ಲೊ. ತಾಕಾ ಹೆಲ್ಪರಾಚಿ ವೀಜಾ ಪ್ರಾಪ್ತ್ ಜಾಲಿ. ಏಕ್ ಪಾವ್ಟಿಂ ಹೆಲ್ಪರ್ ಜಾವ್ನ್ ದುಬಾಯ್ಕ್ ಪ್ರವೇಶ್ ಕಾಣ್ಗೆ, ಉಪ್ರಾಂತ್ ಮೆಂದು ವಾಪರ್ಲ್ಯಾರ್ ದೊಳೆ ಧಾಂಪುನ್ ಉಗ್ತೆಂ ಕರ್ಚಾ ಭಿತರ್ ’ಮ್ಹಾಲಕ್’ ಜಾಂವ್ಕ್ ಸಕ್ತಾಯಿ ಮ್ಹಣ್ ಏಜೆಂಟಾನ್ ತಾಕಾ ರಂಗೋಲಿ ದಾಕಯಿಲ್ಲೆಂ. ದುಭಾಯ್ ಪಾವೊನ್ ಏಕಾ ಹಫ್ತ್ಯಾ ಭಿತರ್ ತಾಕಾ ಹುನೊನಿ ವಾರ್ಯಾಚಿ, ತೊಪ್ಚಾ ಗರ್ಮೆಚಿ, ತಾಪ್ಲ್ಲ್ಯಾ ರೆಂವೆಚಿ ಆನಿ ಖತ್ಕತ್ಯಾ ಜಿಣ್ಯೆಚಿ ಪರಿಚಯಿ ಜಾಲಿ.
ಗಾಂವಾಂತ್ ವೀಜ್ಸಕ್ತೆಚಿ ಕಂತ್ರಾಟಾಂ ಘೆತಾನಾ ತೊ ಅಪ್ಲ್ಯಾ ಮರ್ಜೆಚೊ ಮಾಲಿಕ್ ತರ್ ಹಾಂಗಾಸರ್ ’ಪೇಪರ್ ಟಿಶ್ಯೂ’ ತಯಾರ್ ಕರ್ಚಾ ಏಕಾ ಮಾಮುಲಿ ಕಂಪೆನಿಂತ್ ಹೆಲ್ಪರ್. ರಾವೊಂಕ್ ಗಾಂವ್ಚಾ ಸರ್ಕಾರಿ ಆಸ್ಪತ್ರೆ ತಸಲೆಂ ಕೂಡ್. ಕೂಡಾಂತ್ ವೆವೆಗ್ಳ್ಯಾ ಜಾತಿ-ಕಾತಿಚೆ ಆಟ್ ಕಾರ್ಮಿಕ್. ಗಾಂವಾಂತ್ ಅಪ್ಲೆ ಘರಾ ತೊ ಕುಜ್ನಾಕ್ ಪಾಂಯ್ ದವರಿನಾತ್ಲ್ಲೊ. ಪುಣ್ ಹಾಂಗಾಸರ್ ಕಂಪೆನಿಚಾ ಬೊಸಾಕ್ ಆನಿ ಕಾಮೆಲ್ಯಾಂಕ್ ಉದಾಕ್ ಆನಿ ಚಾ-ಕೊಫಿ ದಿಂವ್ಚೆಂ ತಾಚೆಂ ಕಾಮ್. ಜಾಡು ಮಾರ್ಚೆಂ ಮೆಜಾಂ ನಿತಳ್ ಕರ್ಚೆಂ ತಾಚೆಂ ಸದಾಂಚೊ ವಾವ್ರ್. ಕಂಪೆನಿಚಾ ಪಾಲೇಸ್ತಿನಿ ಬೊಸಾಕ್ ಫಾಸ್ಟ್-ಫ್ಹುಡ್ ಖಾವ್ನ್ ಕೆದಾಳಾಯಿ ಉದ್ಕಾಡೆ ತರ್ ತಾಣೆ ಹರ್ಯೆಕ್ ಪಾವ್ಟಿಂ ಕಾಕ್ಸಾಕ್ ವೆಚಾ ಫುಡೆಂ ಕೊಮೊಡ್ ನಿತಳ್ ಕರ್ನ್ ದಿಂವ್ಚಿ ತಾಚಿ ಡ್ಯೂಟಿ. ಸಕಾಳಿಂ ಸಾಂಜೆರ್ ಬೊಸಾಚೆಂ BMW ಕಾರ್ ಧುಂವ್ಚೆಂ ತಾಚೆ ದಿನಚಾರಿಚೊ ಏಕ್ ವಾಂಟೊ.
ಗಾಂವಾಂತ್ ಅಂತಸ್ತ್ ಆನಿ ರಂಗಾಳ್ ಜಿಣ್ಯೆಚಾ ಆಶೆನ್ ಅಪುಣ್ ಸಲ್ವಲೊಂ ಮ್ಹಣ್ಚೆಂ ತಾಚೆ ಗಿನ್ಯಾನಾಕ್ ಆಯ್ಲೆಂ ತರೀ ಏಜೆಂಟಾಕ್ ಆನಿ ಟಿಕೇಟಿಕ್ ಹೊಗ್ಡಾಯಿಲ್ಲೆ ಪಯ್ಶೆ ಪಾಟಿಂ ಕಾಡ್ಯಾಂ ಮ್ಹಣ್ಚಾ ಹಟ್ಟಾನ್ ರಾವ್ಲೊ. ವಾಹನ್ ಲೈಸನ್ಸ್ ಕಾಡ್ಲ್ಯಾರ್ ಅಪುಣ್ ಬಚಾವ್ ಜಾಂವ್ಕ್ ಸಕ್ತೊಲೊಂ ಮ್ಹಣ್ ತಾಚೆ ಗಮನಾಕ್ ಗೆಲೆಂ. ಪುಣ್ ಕಂಪೆನಿನ್ ಆವ್ಕಾಸ್ ದಿಲೊನಾ. ಧೊವ್ಯಾ ಕೊಲ್ಲರಾಚೆಂ ಉದ್ಯೋಗಾ ಸವೆಂ ಎಪಾರ್ಟ್ಮೆಂಟಾಂನಿ ರಾವೊನ್ ಕಾರಾಂನಿ ಭಂವ್ಚೊ ಜಾಯ್ತೊ ಮಂಗ್ಳುರ್ಚೊ ಲೋಕ್ ಆಸ್ಲ್ಲೊ ತರೀ ಭಿಕೆಚಾ ಪಾಗಾನ್ ಕಷ್ಟೊಂಚಾ ತಾಚೆ ತಸಲೆ ಉಣೆ ನಾತ್ಲ್ಲೆ.
ತಾಚೊ ಪಾಗ್ 900 ದಿರಾಮ್. ಖರ್ಚಾಂತ್ ವಿಶೇಸ್ ಸುರಾತ್ ದಾಕಯ್ಲ್ಯಾರೀ ಜೆವಾಣ್, ಖಾಣ್, ನೆಸಾಣ್ ಆನಿ ಇತರ್ ಗರ್ಜೊ ಮ್ಹಣೊನ್ ದೊನ್ಶಿಂ-ಅಡೇಶಿಂ ದಿರಾಮ್ ಖರ್ಚಾತಾಲೆ. ಮಹಿನ್ಯಾಕ್ ಏಕ್ ಪಾವ್ಟಿಂ ’ಮುಜ್ರಾ’ ಮ್ಹಣ್ಚೊ ನಾಚ್, ಸೊರೊ, ಸಿನೆಮಾ ಮ್ಹಣೊನ್ ಶೆಂಭೊರ್ ದಿರಾಮ್ ನಿಸ್ರೊನ್ ವೆತಾಲೆ. ಸುರ್ವೆರ್ ತೊ ದೊನ್ಶಿಂ ಧಿರಾಮ್ ಘರಾ ಧಾಡ್ತಾಲೊ. ಪುಣ್ ಕಾಜಾರಾ ಉಪ್ರಾಂತ್ ತಿನ್ಶಿಂ ಧಿರಾಮ್ ಹರ್ಯೆಕ್ ಮಹಿನ್ಯಾಂತ್ ತಾಣೆ ಚುಕಾನಾಸ್ತಾನಾ ಧಾಡ್ಲ್ಲೆ. ಉರ್ತಾಲೆ ಫಕತ್ತ್ ದೊನ್ಶಿಂ-ಅಡೇಶಿಂ ಧಿರಾಮ್. ಹೆ ಭಾರಾತೀಯಿ ಕರೆನ್ಸಿಕ್ ಪರವರ್ತನ್ ಕೆಲ್ಯಾರ್ ಸುಮಾರ್ ತೀನ್ ಹಜಾರ್ ರುಪಯಿ.
ಸ ವರ್ಸಾಂ ಆದಿಂ ತೊ ದುಭಾಯ್ ಪಾವೊನ್ ತೀನ್ ಮಹಿನ್ಯಾ ಭಿತರ್ ತಾಕಾ ಪಪ್ಪಾಚಿ ಚೀಟ್ ಆಯಿಲ್ಲಿ. ಘರ್ ಪರ್ನೆಂ ಜಾಲಾಂ, ಮೋಡ್ನ್ ದುರುಸ್ತೆಚಿ ಇಛ್ಚಾ ವ್ಯಕ್ತ್ ಕೆಲ್ಲಿ. ವೀಜಾ ಖಾತಿರ್ ಆವಯ್ನ್ ವಿಕ್ಲ್ಲೆಂ ಭಾಂಗಾರ್ ಪಾಟಿಂ ದೀಂವ್ಕ್ ಆಸ್ಲ್ಲೆಂ. ದೋನ್ ವರ್ಸಾಂನಿ ತೊ ರಜೆರ್ ಗಾಂವಾಂಕ್ ಆಯ್ಲೊ. ವೆತಾನಾ ಸರ್ವಾಂ ಪರಿಂ ಶೊಪಿಂಗ್ ಕೆಲೆಂ, ಆವಯ್ಕ್ ಭಾಂಗಾರ್ ಹಾಡ್ಲೆಂ ಆನಿ ಪಾವಾನಾತ್ಲ್ಲ್ಯಾಕ್ ಕಾಜಾರ್ ಜಾಲೊ. ರಜೆರ್ ವೆಚಾಂತ್ ಏಕ್ ಫಾಯ್ದೊ ಆಸ್ಲ್ಲೊ. ಉರವ್ಣೆ ಶಿವಾಯಿ ರಜೆಚೊ ದೋನ್ ಮಹಿನ್ಯಾಚೊ ಸಾಂಬಾಳ್ ಎಡ್ವಾನ್ಸ್ ಮೆಳ್ತಾಲೊ. ಸುನೀತಾ ಜಿಣ್ಯೆಂತ್ ಆಯ್ಲೆಂ. ಭುರ್ಗಿಂ ಜಾಲ್ಲಿಂ. ಖರ್ಚ್ ಚಡ್ಲ್ಲೊ. ಸಾಂಗಾತಾಚ್ ಆವಯ್-ಬಾಪಾಯ್ಚಾ ಪಿಡೆಂಚೆಂ ಬಿಲ್ಲ್ ಆನಿ ರುಬಿ-ಅನಿಲಾಚೆಂ ಶಿಕಾಪ್. ಗರ್ಜಾಂಚೊ ವತ್ತಡ್ ದೊಡೊ ಜಾಲ್ಲೊ. ಗರ್ಜಾಂಕ್ ಪಯ್ಶೆ ಖಂಯ್ ಥಾವ್ನ್ ಯೆತಾತ್ ಹಾಚಿ ಫಿಕಿರ್ ಕೋಣಾಕ್ಚ್ ನಾತ್ಲ್ಲಿ. ಕಾಮ್ ಆನಿ ಪಾಗಾಂತ್ ಬದ್ಲಾವಣ್ ನಾತ್ಲ್ಲಿ. ಉರವ್ಣಿ ಅಸ್ಕತ್ ಜಾಲ್ಲಿ.
ಅಗ್ನೆಲಾಕ್ ಅಪ್ಲಿಂ ಅಸ್ಠಿರ್ ಮೆಟಾಂ ಪೊಕೊಳ್ ಜಾವ್ನ್ ಕೆದಾಳ್ ಕೊಸ್ಳಾತೆಲಿಂ ಮ್ಹಣ್ಚೆಂ ಅಪಧೈರ್ ಬಳ್ ಜಾಲ್ಲೆಂ.
ಸರ್ಕಾರಿ ಬಸ್ಸ್ ಲೊನಾವಾಲಾ ಬಸ್ಸ್ ನಿಲ್ದಾಣಾಂತ್ ರಾವ್ತಾನಾ ಅಗ್ನೆಲಾಕ್ ಜಾಗ್ ಜಾಲಿ. ವೀಸ್ ಮಿನುಟಾಂಚೊ ಸುಶೆಗ್ ಮ್ಹಣೊನ್ ಕಂಡಕ್ಟರಾನ್ ತಿಳ್ಸಿಲೆಂ. ಬಗ್ಲೆಚಾ ಸ್ರೀಯೆಕ್ ಅಪ್ಲ್ಯಾ ಬೇಗಾಂಚಿ ಜತನ್ ಘೆಂವ್ಕ್ ವಿನಂತಿ ಕರ್ನ್ ತೊ ದೆಂವೊನ್ ರೆಸ್ಟೊರೆಂಟಾಚಾ ಕಾಕ್ಸಾಕ್ ಗೆಲೊ. ಕುಡಿಚಿ ಗರ್ಜ್ ತಿರ್ಸುನ್ ತಾಣೆ ನಾಸ್ಟೊ ಕೆಲೊ. ದನ್ಪರಾಂಚಾ ಜೆವ್ಣಾಕ್ ಪುಣೆ ನಿಲ್ದಾಣಾಕ್ ಬಸ್ಸ್ ಪಾವ್ಲ್ಲೆಂ. ರಾತಿಚೆಂ ಜೆವಾಣ್ ಬೆಳ್ಗಾಂವಾಂತ್ ತಿರ್ಸಿಲೆಂ. ಆತಾಂ ಬಾಕಿ ಆಸ್ಲ್ಲಿ ಫಕತ್ ಏಕ್ ರಾತ್. ಸಕಾಳ್ ಜಾತಾನಾ ಗಾಂವಾಂಕ್ ಪಾವ್ತಲೊಂ ಮ್ಹಣ್ಚಾ ಚಿಂತ್ಪಾನ್ ತಾಕಾ ಧಾದೊಸ್ಕಾಯಿ ದಿಲಿ.
ರಾತ್ ಪಾಶಾರ್ ಜಾವ್ನ್ ಸಕಾಳ್ ಜಾತಾನಾ ತೊ ಉಡ್ಪಿಂತ್ ದೆಂವ್ಲೊ. ತಾಣೆ ಸರ್ವ್ ಬ್ಯಾಗೆಜ್ ಏಕಾ ಟೆಕ್ಸೆರ್ ಘಾಲಿ. ತೊ ಟೆಕ್ಸೆರ್ ಶಿರ್ವಾಂ ಪಾವ್ತಾನಾ ವೊರಾಂ ಸಕಾಳಿಂಚಿಂ ಸಾಡೆ-ನೋವ್ ಜಾಲ್ಲಿಂ. ಅಗ್ನೆಲಾಚಿ ತಕ್ಲಿ ಫಡ್ತಾಲಿ. ಪುರಾಸಾಣೆನ್ ಜೀವಾಂತ್ ಸಕತ್ ಕುಸ್ಕಾಲ್ಲಿ. ಘರ್ಚಾ ಗೇಟಿ ಲಾಗಿಂ ಟೆಕ್ಸಿ ಸ್ತಬ್ಧ್ ಜಾತಾನಾ ಘರ್ಚೆ ಸರ್ವ್ ಸದಸ್ಯ್ ಸಂತೊಸಾಚಾ ಉಮಾಳ್ಯಾನ್ ದಾಂವೊನ್ ಆಯ್ಲೆ. ಸೆಜಾರ್ಚಿಂ ದಾರ್ ಉಗ್ತೆಂ ಕರ್ನ್ ಲಾಂಬ್ ಗೊಮ್ಚಿ ಭಾಯ್ರ್ ಕಾಡ್ತಾನಾ ತಾಕಾ ಫಿಲ್ಮ್ ಹೀರೊಚಿ ಮರ್ಯಾದ್ ಲಾಭ್ಲ್ಲೆ ಪರಿಂ ಭೊಗ್ಲೆಂ.
ಟೆಕ್ಸೆಚೆಂ ಭಾಡೆಂ ದಿತಾಚ್ ತೊ ಪುರ್ಶಾಂವಾರ್ ಭಿತರ್ ಗೆಲೊ. ಚಾಲಕಾಚಾ ಮಜತೆನ್ ಅನಿಲ್ ಆನಿ ರುಬಿನ್ ತಾಚಿ ಲಗ್ಗೇಜ್ ಘರಾ ಭಿತರ್ ವಾವಯ್ಲಿ. ರಶ್ಮೀ ಲಜೆನ್ ಆವಯ್ಚಾ ಕಾಪ್ಡಾ ಪಾಟ್ಲೆನ್ ಲಿಪ್ಲೆಂ. ರೆನ್ನಿಕ್ ಮೊಗಾನ್ ಉಕಲ್ಚೆಂ ಪ್ರಯತನ್ ಕರ್ತಾನಾ ತೆಂ ಹುಸ್ಕಾರ್ನ್ ರಡ್ಲೆಂ.
"ಸಕಾಳಿಂಚಾ ಫ್ಲೈಟಾರ್ ಆಯ್ಲೊಯಿ?" ಬಾಪಯ್ನ್ ಮಿಶಿಯೊ ವೊಳಾಯ್ಲ್ಯೊ.
"ಹಾಂ..." ಸರ್ಕಾರಿ ಬಸ್ಸಾರ್ ಆಯಿಲ್ಲೊ ಮ್ಹಣ್ ಸಾಂಗೊಂಕ್ ನರ್ಗಾಲೊ ಅಗ್ನೆಲ್.
"ಮಜೆ ನೈಕಿ ಮೊಚೆ ಹಾಡ್ಲ್ಯಾಯಿ ದಾಟ್ಟೂ?" ಅನಿಲಾಕ್ ಬೊಕ್ಸ್ ಉಗ್ತೆಂ ಕರುಂಕ್ ಅಮ್ಸೊರ್.
"ಹಾಂವೆ ಸಾಂಗ್ಲ್ಲ್ಯಾ ಡ್ರೆಸ್ಸಾಚೊ ರಂಗ್ ಮೆಳ್ಳೊ ದಾಟ್ಟೂ?" ರುಬಿನ್ ಕುಡ್ಸಿಲೆಂ.
"ಬಾವ್ಡೊ ಪುರಾಸಾಣೆನ್ ಥಕ್ಲ್ಲ್ಯಾ ಪರಿಂ ದಿಸ್ತಾ. ನಾವ್ನ್ ನಾಸ್ಟೊ ಕರ್ನ್ ಇಲ್ಲೆಶೆಂ ವಿರಾಮ್ ಕರುಂದಿ." ಆವಯ್ನ್ ಬಿರ್ಮೊತ್ ಉಚಾರ್ಲಿ.
"ವಿಮಾನಾರ್ ಭಂವ್ತೆಲ್ಯಾಂಕ್ ಪುರಾಸಾಣ್ ಖಂಚಿ?" ಸುನೀತಾಕ್ ಅಪ್ಲೊ ಘೊವ್ ವಿಮಾನಾರ್ ಪಯ್ಣ್ ಕರ್ತಾ ಮ್ಹಣ್ಚೆಂ ವ್ಹಡ್ಪಣ್.
"ಬ್ಲೆಕ್ ಲೇಬಲ್ ಹಾಡ್ಲ್ಯಾಯಿರೆ?" ಬಾಪಾಯ್ನ್ ವಿಚಾರ್ ಕೆಲೊ. "ಆದ್ಲೆ ಪಾವ್ಟಿಂ ತುಂವೆ ದಿಲ್ಲಿ ರೆಡ್ ಲೇಬಲ್ ಪಿಯೊನ್ ತಕ್ಲಿ ಫಡ್ತಾಲಿ. ಹಾಂವೆ ತುಕಾ ರೊತ್ಮೆನ್ಸ್ ಹಾಡುಂಕ್ ಸಾಂಗ್ಲ್ಲೆಂ ಉಡಾಸ್ ಆಸಾಮೂ?"
"ಆಸಾ ಪಪ್ಪಾ." ಅನಿಲಾನ್ ಪುರಾಸಾಣ್ ವಿಸ್ರೊನ್ ಡ್ಯೂಟಿ ಫ್ರೀ ಬೇಗಾಂತ್ಲಿಂ ಚೊಕ್ಲೆಟಾಂ, ಸೊರೊ ಆನಿ ಸಿಗ್ರೇಟಿಚೊ ಕಂರ್ಡೊ ಭಾಯ್ರ್ ಕಾಡ್ಲೊ. ಸರ್ವಾಂಚಿ ನದರ್ ಬೊಕ್ಸಾಚೆರ್ ಆಸ್ಲ್ಲಿ ಜಾಲ್ಲ್ಯಾನ್ ಅನಿಲಾಕ್ ತಾಣೆ ಉಗ್ತೆಂ ಕರುಂಕ್ ಹಿಶಾರೊ ದಿಲೊ. ಹ್ಯಾಚ್ ಹಿಶಾರ್ಯಾಕ್ ರಾಕೊನ್ ಆಸ್ಲ್ಲ್ಯಾ ಅನಿಲಾನ್ ಬೊಕ್ಸ್ ಉಗ್ತೆಂ ಕರ್ನ್ ವಿದೇಶಿ ಸಾಮಾನ್ ಭಾಯ್ರ್ ದವರುಂಕ್ ವೇಳ್ ಕಾಡ್ಲೊ ನಾ. ಸಿಡಿ ಪ್ಲೇಯರ್, ಮಿಕ್ಸರ್, ಡ್ರೆಸ್ಸ್, ಲುಗ್ಟಾಂಚೆ ಕುಡ್ಕೆ, ಸಾಬೂ, ಪೌಡರ್, ಕ್ಕ್ರೀಮ್, ಶಾಂಪೂ, ಪರ್ಫ್ಯೂಮ್, ಪೆನ್ನಾಂ, ಪಿಸ್ಟಾ-ಬಾದಾಮ್, ಮೊಚೆ, ವಾಣೊ, ಕಾಪ್ಡಾಂ, ನೈಟಿ, ಭಿತರ್ಲೆಂ ವಸ್ತುರ್ ಆನಿ ಹೆರ್ ನಾನಾಂತ್ಯೊ ಪರ್ಜಳಿಕ್ ವಸ್ತು ಮ್ಹಣ್ತಾನಾ ಘರ್ಚಾ ಸರ್ವ್ ಸಾಂದ್ಯಾಂಕ್ ಫೆಸ್ತಾ ಸಾರ್ಕೊ ದೀಸ್ ಜಾಲ್ಲೊ.
ಸುನೀತಾಕ್ ಸಂಬಂಧ್ ಜಾಲ್ಲ್ಯೊ ಪ್ರತ್ಯೇಕ್ ವಸ್ತು ಸೂಟ್ಕೇಜಿಂತ್ ಆಸ್ತಾಲ್ಯೊ ಜಾಲ್ಲ್ಯಾನ್ ತೆಂ ಸೂಟ್ಕೇಜ್ ಲೊಟುನ್ ಅಪ್ಲೆ ರುಮಾಕ್ ಗೆಲೆಂ. ಅಗ್ನೆಲಾಕ್ ನಾವ್ನ್ ಬೆಡ್ಡಾರ್ ಪರ್ತಾತಾನಾ ಕ್ಷಣಾ ಭಿತರ್ ನಿದೆನ್ ಗ್ರಾಸಿಲೊ. ದನ್ಪರಾಂ ದುಕೊರ್-ಸನ್ನಾ ಮಾಸಾಚೆಂ ಜೆವಾಣ್ ಜೇವ್ನ್ ಪರತ್ ತೊ ನಿದ್ರಾಸ್ತ್ ಜಾಲೊ. ರಾತಿಂ ಜೆವ್ಣಾ ಪಯ್ಲೆಂ ಬಾಪಯಿ ಸಂಗಿಂ ಬ್ಲೆಕ್ ಲೇಬಲ್ ಉಗ್ತೆಂ ಕೆಲಿ.
"ತುಮ್ಚೆಂ ನಶೀಬ್, ಇತ್ಲ್ಯಾ ಬೊರೊ ಸೊರೊ ತುಮ್ಕಾಂ ಗಲ್ಫಾಂತ್ ಫಾವೊ ಜಾತಾ." ಬಾಪಾಯ್ನ್ ರೊತ್ಮೆನ್ಸ್ ಸಿಗ್ರೇಟ್ ಜಳಯ್ಲಿ.
ತಶೆಂ ನ್ಹಂಯ್, ಹೊ ಫಕತ್ ಏಕ್ ಶೋ, ಅಸಲೊ ಸೊರೊ ಫಕತ್ ದೋನ್ ಬೊತ್ಲಿ ಗಾಂವಾಂಕ್ ಯೆತಾನಾ ಹಾಡ್ಚೊ, ಸದಾಂ ದುಭಾಯಾಂತ್ ವಿಂಚ್ಣಾರ್ ವಿಸ್ಕಿ ಪಿಯೊಂಚಿ ತಾಂಕ್ ಅಪ್ಣಾಕ್ ನಾ, ಹಫ್ತ್ಯಾಕ್ ಏಕ್-ದೋನ್ ಪಾವ್ಟಿಂ ಭಾರತೀಯಿ ವಿಸ್ಕಿ ಪಿಯೊನ್ ಸುಧಾರ್ಸಿತಾಂವ್ ಮ್ಹಣ್ ಸಾಂಗೊಂಕ್ ತೊ ಪ್ರೇರಿತ್ ಜಾಲೊ. ತಾಣೆ ಸತ್ ಸಾಂಗ್ಲೆಂ ನಾ.
"ಕಿತೆಂ ನೀದ್ ತುಕಾ?" ರಾತಿಂ ಆಮಾಲಾರ್ ಬೆಡ್ಡಾರ್ ಕುರ್ವೊಂಚಾ ಅಗ್ನೆಲಾಕ್ ಪಳೆವ್ನ್ ಸುನೀತಾ ತಾಪ್ಲೆಂ.
"ಅಸಲೊ ವಿರಾಮ್ ಮೆಳಾನಾಸ್ತಾನಾ ದೋನ್ ವರ್ಸಾಂ ಜಾಲಿಂ." ತಾಣೆ ಭಾಯ್ಲೆಚಾ ಉಸ್ಕ್ಯಾರ್ ತಕ್ಲಿ ಆಧಾರ್ಸಿಲಿ.
"ಪುರೊ ತುಜೊ ನಾಟಕ್." ಸುನೀತಾನ್ ಅಗ್ನೆಲಾಚಾ ಕೇಸಾಂತ್ ಅಪ್ಲಿಂ ಬೊಟಾಂ ರಿಗಯ್ಲಿಂ. "ಸತ್ತ್ ಸಾಂಗ್ತಾಂ ಮ್ಹಾಕಾ ತುಜೆವಿಣೆ ಗಾಂವಾಂತ್ ರಾವೊನ್ ಪುರೊ ಜಾಲೆಂ. ರಶ್ಮೀ, ರೆನ್ನಿ ಆನಿ ಮಜಿ ತುಂ ವೀಜಾ ಕಾಡ್. ಆಮಿಯಿಂ ತುಜೆ ಸಂಗಿಂ ದುಬಾಂಯ್ತ್ ಯೇವ್ನ್ ರಾವ್ತಾಂವ್. ಭುರ್ಗ್ಯಾಂಕ್ ಥಂಯ್ಚ್ ಇಸ್ಕಾಲಾಕ್ ಘಾಲ್ಯೆತ್."
"ತಾಚೆ ಬದ್ಲಾಕ್ ಹಾಂವೆ ದುಭಾಯ್ ಸೊಡ್ನ್ ಗಾಂವಾಂತ್ ಯೇವ್ನ್ ರಾವ್ಲ್ಯಾರ್ ಕಶೆಂ?" ಅಗ್ನೆಲ್ ಪಿಂರ್ಗಾಲೊ.
"ಚುಕೊನ್ಯಿಂ ತಶೆಂ ಚಿಂತಿನಾಕಾ." ಸುನೀತಾನ್ ತಾಕಿದ್ ದಿಲಿ. "ತುಂವೆ ದುಬಾಯ್ ಆಸ್ಲ್ಲ್ಯಾ ಆಮ್ಕಾಂ ಗಾಂವಾಂತ್ ಕಿತೆಂ ಮಾನ್ ಫಾವೊ ಜಾತಾ ಮ್ಹಣ್ ತುಂ ನೆಣಾಂಯಿ. ತುಂವೆ ಆಜೂನ್ ದುಬಾಂಯ್ತ್ ಕಾರ್ ಲೈಸನ್ಸ್ ಕಿತ್ಯಾಕ್ ಕಾಡುಂಕ್ ನಾಂಯಿ? ಆಮ್ಚೊ ಜೊಸ್ಸಿ ವರ್ಸಾ ಆದಿಂ ಬಾಹ್ರೇನ್ ಗೆಲ್ಲೊ, ಸ ಮಹಿನ್ಯಾ ಭಿತರ್ ಲೈಸನ್ಸ್ ಪಾಸ್ ಜಾವ್ನ್, ಕಾರ್ ಘೆವ್ನ್, ಫ್ಲೆಟ್ ಕರ್ನ್ ಆತಾಂ ಫೆಮಿಲಿ ಗೆಲ್ಯಾ."
ಸುನೀತಾಚೊ ನಿಮಾಣೊ ಭಾವ್ ಜೊಸ್ಸಿ.
"ಹರ್ಯೆಕಾಕ್ ದೆವಾಚಿ ಖುಶಿ ಜಾಯ್." ಉಲೊಂಕ್ ಕಷ್ಟಾಲೊ ಅಗ್ನೆಲ್.
ಸಕಾಳಿಂ ರಾಯಾಳ್ ನಾಸ್ಟೊ ಆನಿ ದನ್ಪರಾಂ-ಸಾಂಜೆರ್ ಮ್ಹಣೊನ್ ಏಕ್ ಹಪ್ತೊ ಪಾಶಾರ್ ಜಾಲೊ. ಏಕಾ ಹಫ್ತ್ಯಾ ಉಪ್ರಾಂತ್ ಬಂಟ್ವಾಳ್ ವೆತಾಂ ತಾಣೆ ಡೇವಿಡಾಕ್ ಆಶ್ವಾಸನ್ ದಿಲ್ಲೆಂ. ಡೇವಿಡಾಚೆಂ ಏಕ್ ಲಾನ್ಶೆಂ ಪಾರ್ಸೆಲ್-ಯಿ ಆಸ್ಲ್ಲೆಂ. ಪಾರ್ಸೆಲ್ ಹಾತಿಂ ಘೆವ್ನ್ ತಾಣೆ ಸಕಾಳಿಂಚಾ ಬಸ್ಸಾರ್ ಬಂಟ್ವಾಳ್ಚಿ ವಾಟ್ ಧರ್ಲಿ.
ಡೇವಿಡಾಚಾ ಘರಾ ಅಂಗ್ಣಾಕ್ ಮೇಟ್ ದವರ್ತಾನಾ ಲೊಕಾಚೊ ಜಮೊ ಪಳೆವ್ನ್ ಅಗ್ನೆಲ್ ಘುಸ್ಪಡ್ಲೊ. ಸಾಲಾಂತ್ ಏಕ್ ಮೋರ್ನ್ ದವರ್ಲ್ಲೆಂ. ಕಳಾನಾಸ್ತಾನಾ ಮಾಗ್ಣೆ ಜ್ಯಾರಿ ಆಸ್ಲ್ಲೆಂ. ಮಧೆಂ ಮಧೆಂ ಲ್ಹಾನಾಂ-ವ್ಹಡಾಂಚಿ ಬೊಬಾಟ್. ಸೂಟಾಚೆರ್ ನಿದೊನ್ ಆಸ್ಚಾ ಮೊಡ್ಯಾಚೆರ್ ತಾಣೆ ನದರ್ ಘಾಲಿ. ಜಿಣ್ಯೆಂತ್ ಇತ್ಲ್ಯಾ ವಡ್ ಆಘಾತ್ ತಾಕಾ ಎದೊಳ್ ಭೊಗ್ಲ್ಲೊ ನಾ ಯಾ ತಾಣೆ ಅಪೇಕ್ಷಿಲ್ಲೊಯಿ ನಾ. ತಾಚೆ ಅಸ್ಥಿರ್ ಪಾಂಯಾಂಚೆಂ ಬೊಳ್ ಚುಕ್ಲೆಂ. ಕಷ್ಟಾಂನಿ ಸಾಂಬಾಳ್ನ್ ತೊ ಬಾಂಕಾರ್ ಬೊಸ್ಲೊ.
ಡೇವಿಡಾಚಿ ನಿರ್ಜೀವ್ ಕುಡ್!
ಹೆಂ ಕಶೆಂ ಸಂಭವ್? ತಾಣೆ ಡೇವಿಡಾಕ್ ಅಕ್ರೇಕ್ ಪಳೆಯಿಲ್ಲೆಂ ದುಬಂಯ್ತ್. ಅಗ್ನೆಲ್ ರಜೆರ್ ವೆತಾನಾ ಸೊಡುಂಕ್ ತೊ ಏರ್ಪೋರ್ಟಾಕ್ ಆಯಿಲ್ಲೊ. ಹಫ್ಯ್ತಾ ಭಿತರ್ ತಾಚೆಂ ನಿರ್ಜೀವ್ ಶರೀರ್ ಗಾಂವಾಂಕ್ ಪಾವ್ಲ್ಯಾ? ಹೆಂ ಕಶೆಂ ಘಡ್ಲೆಂ? ತಾಕಾ ಪಾತ್ಯೆಂವ್ಕ್ ತ್ರಾಸ್ ಜಾಲೆ. ದೂಕ್ ಉಮಾಳೊನ್ ಭಾಯ್ರ್ ನಿಕಾಳ್ಳೆಂ. ಡೇವಿಡಾಚಾ ಮಾವ್ಳ್ಯಾಕ್ ಅಗ್ನೆಲ್ ವಳ್ಕಾತಾಲೊ. ವಿವರ್ ದಿತಾನಾ ತೊ ಉಲೊಂಕ್ ಕಷ್ಟಾಲೊ.
"ಕಾಲ್ ಸಾಂಜೆರ್ ಡೇವಿಡಾಚೆಂ ಮೋರ್ನ್ ಹಾಂಗಾಸರ್ ಪಾವ್ಲೆಂ." ಮಾವ್ಳ್ಯಾನ್ ತಿಳ್ಸಿಲೆಂ. "ತಾಚೆ ಕಂಪೆನಿನ್ ಪೋಲಿಸಾಂ ಥಾವ್ನ್ ಮೊಡೆಂ ಘೆವ್ನ್ ಹಾಂಗಾಸರ್ ಧಾಡ್ಚಿ ವ್ಯವಸ್ತಾ ಕೆಲ್ಲಿ. ಮೊರ್ನಾಚೆಂ ಕಾರಣ್ ಜೀವ್ಗಾತ್ ಮ್ಹಣ್ ಕಳಯ್ಲಾಂ. ಕೂಡಾಂತ್ ಫೆನಾಕ್ ಉಮ್ಕಾಳೊನ್ ಪ್ರಾಣ್ ಗೆಲಾ ಮ್ಹಣ್ ರಿಪೋರ್ಟ್ ದಿಲಾ. ಸ ಮಹಿನ್ಯಾ ಆದಿಂ ಕಾಜಾರ್ ಜಾವ್ನ್ ಪಾಟಿಂ ಗೆಲ್ಲೊ ಮಾತ್ರ್. ಭಾಯ್ಲ್ ಗುರ್ವಾರ್. ತಾಂಚಿ ಕಿತೆಂ ಗತ್-ಗಿ?"
ಜೀವ್ಗಾತ್? ಡೇವಿಡ್ ಜೀವ್ಗಾತ್ ಕರ್ಚಾ ವರ್ಗಾಚೊ ನ್ಹಂಯ್. ಕೋಣೆಂಯಿ ತಾಚಿ ಖುನ್ ಕೆಲ್ಯಾ? ಡೇವಿಡಾಕ್ ತೊ ಲಾಗ್ಶಿಲ್ಯಾನ್ ವಳ್ಕಾತಾಲೊ. ಲಗಾಡ್ ಕಾಡ್ಚಾ ತಸಲಿ ದುಸ್ಮಾನ್ಕಾಯಿ ತಾಣೆ ದೆಕೊಂಕ್ ನಾತ್ಲ್ಲಿ. ಹ್ಯಾ ಮೊರ್ನಾಂತ್ ಸುಲೇಮಾನಾಚೊ ಹಾತ್ ಆಸೊಂಕ್ ಸಾಧ್ಯ್? ಅಗ್ನೆಲಾಚಾ ಕಾಳ್ಜಾಂತ್ ಶಿರ್ಶಿರೊ ಧಾಂವ್ಲೊ.
ಸುಲೇಮಾನ್?
ಸಾಂಜೆರ್ ಮೋರ್ನ್ ಮಾತ್ಯೆಕ್ ಪಾವಯ್ತಾಚ್ ಅಗ್ನೆಲ್ ಪಾಟಿಂ ಶಿರ್ವಾಂ ಗೆಲೊ. ಘರಾ ಪಾವ್ತಾನಾ ಕಾಳೊಕ್ ಜಾಲ್ಲೊ. ಘರ್ಚಿಂ ಸರ್ವ್ ಆಕಾಂತಾನ್ ರಾಕೊನ್ ಆಸ್ಲ್ಲಿಂ.
"ಮ್ಹಜೊ ಎಕ್ಲೊಚ್ ಈಷ್ಟ್ ಡೇವಿಡ್ ದೆವಾಧೀನ್ ಜಾಲೊ." ಸಾಂಗ್ತಾನಾ ಗಳ್ಗಳ್ಯಾಂ ರಡ್ಲೊ ಅಗ್ನೆಲ್. "ಡೇವಿಡ್ ನಾ ತರ್ ಮ್ಹಾಕಾ ದುಬಂಯ್ತ್ ರಾವೊಂಕ್ ನಾಕಾ. ಹಾಂವ್ ಪಾಟಿಂ ದುಬಾಯ್ ವಚಾನಾ!"
ಸರ್ವ್ ಥಟಾಕ್ಲಿಂ. ಡೇವಿಡಾಚಾ ಮೊರ್ನಾಕ್ ಆನಿ ಪಾಟಿಂ ದುಬಯಿ ವೆಚಾಕಿ ಕಿತೆಂ ಗಾಂಚ್? ಹೆಂ ರಾಜಾಂವ್ ತಾಂಚೆ ಮತಿಕ್ ಗೆಲೆಂ ನಾ. ಮುಕ್ಲೆ ಚಾರ್-ಪಾಂಚ್ ದೀಸ್ ತಾಕಾ ಕೋಣೆಂಯಿ ಧೊಸ್ಲೆನಾ.
"ತುಂವೆ ಪಾಟಿಂ ವಚಾನಾ ತರ್ ಆಮ್ಕಾಂ ಕಿತೆಂ ಭವಿಶ್ಯ್?" ಮುಕ್ಲ್ಯಾ ಹಫ್ತ್ಯಾಂತ್ ಸುನೀತಾನ್ ತಾಕಾ ಸಮ್ಜಾಯ್ಲೆಂ.
"ಹಾಂವ್ ಹಾಂಗಾಸರ್ ಕಾಮ್ ಕರ್ನ್-ಯಿಂ ದೀಸ್ ಕಾಡುಂಕ್ ಸಕ್ತಾಂ." ಅಗ್ನೆಲಾನ್ ತರ್ಕ್ ಕೆಲೆಂ.
"ಹಾಂಗಾಚಾ ಕಾಮಾಕ್ ಗಲ್ಫಾಚಿ ಮರ್ಯಾದ್ ನಾ." ಸುನೀತಾನ್ ಪ್ರಭಾವ್ ಘಾಲೊ. "ಆಮ್ಕಾಂ ಸರ್ವಾಂಕ್ ಭಾಯ್ಲ್ಯಾ ವಸ್ತುಂಚಿ ಸವೊಯಿ ಪಡ್ಲ್ಯಾ. ಭುರ್ಗ್ಯಾಂಚೆಂ ಭವಿಶ್ಯ್ ಚಿಂತುನ್ ತರೀ ತುಂವೆ ಪಾಟಿಂ ವಚಾಜಾಯಿ."
"ತುಂವೆ ಪಾಟಿಂ ವೊಚಾಜಾಯಿ ಪುತಾ." ಬಾಪಾಯ್ನ್ ಪುತಾಚೆರ್ ವತ್ತಡ್ ಘಾಲೊ. "ರುಬಿಚೆಂ ಕಾಜಾರ್ ಕರುಂಕ್ ಆಸಾ. ಅನಿಲ್ ಆಜೂನ್ ಕೊಲೇಜಿಂತ್ ಶಿಕ್ತಾ."
"ರಾಂದ್ಪಾ ಕೂಡ್ ದುರುಸ್ತಿ ಕರುಂಕ್ ಆಸಾ." ಆವಯ್ನ್ ಕಳಿತ್ ಕೆಲೆಂ.
"ಘರಾಕ್ ಏಕ್ ಸ್ಕೂಟರ್ ಹಾಡ್ತಾಂ ಮ್ಹಣ್ ತುಂವೆ ಆದ್ಲೆ ಪಾವ್ಟಿಂ ಸಾಂಗ್ಲ್ಲೆಂಯಿ." ಅನಿಲ್ ಮ್ಹಣಾಲೊ. "ತುಂ ವಿಸ್ರಾಲೊಯಿ ಮ್ಹಣ್ ದಿಸ್ತಾ."
"ಮುಕ್ಲೆ ಪಾವ್ಟಿಂ ಗಾಂವಾಂಕ್ ಯೆತಾನಾ ತುಂವೆ ಮಜಿ ಆನಿ ಭುರ್ಗ್ಯಾಂಚಿ ವೀಜಾ ಹಾಡಿಜಾಯಿಚ್." ಸುನೀತಾನ್ ಸ್ಪಷ್ಟ್ ಕೆಲೆಂ. "ಮ್ಹಾಕಾ ಗಾಂವಾಂತ್ ರಾವೊಂಕ್ ನಾಕಾ."
ಅಗ್ನೆಲಾಕ್ ನಿಜಾಯ್ಕಿ ಪಾಟಿಂ ವೆಚೆಂ ಕಾಳಿಜ್ ನಾತ್ಲ್ಲೆಂ. ಪುಣ್ ಘರ್ಚಾ ಜವಾಬ್ದರೆ ಹುಜ್ರಿಂ ತಾಕಾ ಹೆರ್ ಉಪಾವ್ ಝಳ್ಕಾಲೊ ನಾ. ದೋನ್ ಮಹಿನ್ಯಾಚಿ ರಜಾ ಅಕೇರ್ ಜಾಲಿ. ತೊ ಪಾಟಿಂ ವಚೊಂಕ್ ಟೆಕ್ಸೆರ್ ಬೊಸ್ತಾನಾ ಸರ್ವಾಂಚೆ ದೊಳೆ ದುಕಾಂನಿ ಭಿಜ್ಲೆ.
ಟೆಕ್ಸೆರ್ ತೊ ಉಡ್ಪಿ ಗೆಲೊ. ಉಡ್ಪಿ ಥಾವ್ನ್ ಬೊಂಬಯಿ ಪರ್ಯಾಂತ್ ಸರ್ಕಾರಿ ಬಸ್ಸ್. ರಾತಿಚಾ ವಿಮಾನಾರ್ ತೊ ಪಾಟಿಂ ದುಬಯಿ ಪಾವ್ಲೊ. ಮೆಟಾಂನಿ ಮಿಸ್ಳಾಲ್ಲಿ ಅಸ್ಥಿರತಾ ಚಡ್ಲ್ಲಿ ಶಿವಾಯಿ ಉಣೆ ಜಾಂವ್ಕ್ ನಾತ್ಲ್ಲಿ. ಕೂಡಾಂತ್ ಜಿಯೆಂವ್ಚಾ ಸಾಂಗಾತ್ಯಾಂನಿ ಡೇವಿಡಾಚಾ ಮೊರ್ನಾ ವಿಶಿಂ ನಾನಾಂತ್ಯೊ ಕಾಣಿಯೊ ಸಾಂಗ್ಲ್ಯೊ. ಹರ್ಯೆಕಾ ಕಾಣ್ಯೆಂತ್ ಏಕ್ ಸಾಮಾನ್ಯ್ ವಿಷಯಿ ಉಟೊನ್ ದಿಸ್ತಾಲೊ.
ಡೇವಿಡಾನ್ ಜೀವ್ಗಾತ್ ಕರ್ತಾನಾ ರೂಮಾಂತ್ ಸಕಾಳಿಂ ಸರ್ವ್ ಕಾಮಾಕ್ ಗೆಲ್ಲೆ. ತೊ ಎಕ್ಲೊ ಪಾಟಿಂ ರಾವ್ಲ್ಲೊ. ಪುಣ್ ಆದ್ಲೆ ರಾತಿಂ ಸುಲೇಮಾನ್ ತಾಕಾ ಭೆಟೊಂಕ್ ಆಯಿಲ್ಲೊ ಆನಿ ತಾಣೆ ಡೇವಿಡಾಕ್ ಕೊಲ್ಲರ್ ಧರ್ನ್ ಭೆಷ್ಟಾಯಿಲ್ಲೆಂ. ಹೆಂ ಆಯ್ಕಾತಾನಾ ಅಪ್ಣೆ ಪಾಟಿಂ ದುಬಯಿ ಯೇವ್ನ್ ಬ್ರಹತ್ ಚೂಕ್ ಆಧಾರ್ಲಿ ಮ್ಹಣ್ ಭೊಗ್ಲೆಂ ಅಗ್ನೆಲಾಕ್.
ಸುಲೇಮಾನ್ ಅಪ್ಣಾಕ್ ಸೊಧುನ್ ಕೆದಾಳಾಯಿ ಯೇಂವ್ಕ್ ಪುರೊ. ಅಪುಣ್ ಪಾಟಿಂ ಆಯ್ಲಾಂ ಮ್ಹಣ್ಚಿ ಖಬರ್ ಎದೊಳ್ಚ್ ಸುಲೇಮಾನಾಕ್ ಪಾವ್ಲ್ಯಾ ಆಸ್ತೆಲಿ. ತಾಚೆ ದೋಸ್ತ್ ಹ್ಯಾ ರುಮಾಂತ್ಯಿ ಲಿಪೊನ್ ಆಸಾತ್.
ಸಕಾಳಿಂ ಉಟೊನ್ ತೊ ಕಾಮಾಕ್ ಗೆಲೊ. ತಾಚೊ ಪಾಸ್ಪೋರ್ಟ್ ಕಂಪೆನಿನ್ ಪಾಟಿಂ ಘೆತ್ಲೊ. ಸಾಂಜೆರ್ ನಾವ್ನ್ ಸಾಂಗಾತ್ಯಾಂ ಸವೆಂ ಕೂಡಾಂತ್ ರಾಂದ್ಲ್ಲೆಂ ಜೆಂವ್ಲೊ. ರಾತಿಚಿಂ ನೋವ್ ಉತ್ರಾತಾನಾ ಸುಲೇಮಾನಾಚೆಂ ಆಗಮನ್ ಜಾಲೆಂ. ಸುಲೇಮಾನಾನ್ ತಾಕಾ ಭಾಯ್ರ್ ಅಪವ್ನ್ ವೆಲೊ.
ಸುಲೇಮಾನ್ ಲೇಬರ್ ಕೇಂಪಾಚಾ ಕಾರ್ಮಿಕಾಂತ್ ರೀಣ್ ದೀವ್ನ್ ದೊಡ್ಯಾನ್ ವಸೂಲಿ ಕರ್ಚೊ ಲೋನ್-ಶಾರ್ಕ್!
"ತುಕಾ ಜೀವಾಚಿ ಆಶಾ ಆಸಾ ಯಾ ನಾ? ಆಮ್ಚೆ ಪಯ್ಶೆ ಕೆದಾಳಾ ಪಾಟಿಂ ದಿತಾಯಿ?" ಸುಲೇಮಾನಾನ್ ರಾಗಾನ್ ತಾಕಾ ಪಾಟಿಂ ಲೊಟ್ಲೊ. "ತುಂವೆ ಆದಿಂ ಘೆತ್ಲ್ಲೆಂ ಧಾ ಹಜಾರ್ ರೀಣ್ ಪಾಟಿಂ ದಿಲ್ಯಾ ಶಿವಾಯಿ ಗಾಂವಾಕ್ ವಚೊಂಕ್ ನಜೊ ಮ್ಹಣ್ ತುಕಾ ಆಮಿ ತಾಕಿದ್ ದಿಲ್ಲಿ. ಇತ್ಲೆಂ ಮಾತ್ರ್ ನಯ್ ಬಿಚಾರಾ ಡೇವಿಡಾ ದ್ವಾರಿಂ ಧಾ ಹಜಾರ್ ಚಡಿತ್ ಆಮ್ಚೆ ಥಾವ್ನ್ ಘೆವ್ನ್ ತುಂ ಇಂಡಿಯಾಕ್ ಗೆಲೊಯಿ. ಆಮ್ಚೆ ಥಾವ್ನ್ ರಖಂ ಘೆವ್ನ್ ಅಗ್ನೆಲ್ ಭಾಯಿಕ್ ಕಿತ್ಯಾಕ್ ದಿಲೆಯಿ, ಏಕಾ ಹಫ್ತ್ಯಾ ಭಿತರ್ ಪಾಟಿಂ ದೀನಾ ತರ್ ಅಮ್ಚೆ ಮನಿಸ್ ಇಂಡಿಯಾಂತ್ ತಾಚೆ ಘರಾ ವೆತೆಲೆ ಮ್ಹಣ್ ಭೆಷ್ಟಾಯಿಲ್ಲೆಂ ಮಾತ್ರ್, ಬಿಚಾರಾನ್ ಆತ್ಮ್ಹತ್ತ್ಯಾ ಕೆಲಿ. ಆತಾಂ ಸಾರ್ಕೆಂ ಆಯ್ಕ್..... ತುಂವೆ ಆದಿಂ ಘೆತ್ಲ್ಲೆಂ ರೀಣ್, ಡೇವಿಡ್ ಭಾಯಿಚೆಂ ಖಾಸ್ಗಿ ರೀಣ್ ಆನಿ ಡೇವಿಡ್ ಭಾಯಿನ್ ಅಪ್ಲೆ ನಾಂವಾರ್ ಘೆವ್ನ್ ತುಕಾ ದಿಲ್ಲೆಂ ರೀಣ್ ಸಾಂಗಾತಾ ಬಾಕಿ ಆಸ್ಚಿ ವಾಡ್ ಮ್ಹಣೊನ್ 27125 ದಿರಾಮ್ ಜಾತಾತ್. ಹೆ ಆಮ್ಕಾಂ ಸ ಮಹಿನ್ಯಾಂನಿ ಸಂಪೂರ್ಣ್ ಪಾಟಿಂ ಮೆಳಾಜಾಯಿ. ಕಂಪೆನಿಚೆ ರೀಣ್ ಕಾಣ್ಗೆ ಯಾ ಗಾಂವಾಂತ್ ಆಸ್ತ್ ವಿಕುನ್ ಹವಲಾ ಹಾಡಯಿ. ಸಲ್ವಲೊಯಿ ತರ್ ಆಮಿ ತುಕಾ ಬಾಕಿ ದವರ್ಚೆನಾಂವ್. ತುಂ ಮೆಲ್ಯಾರ್ ಆಮ್ಕಾಂ ಪರ್ವಾ ನಾ. ವಸೂಲಿ ಕರುಂಕ್ ಮಜೆ ಮನಿಸ್ ಇಂಡಿಯಾಂತ್ ತುಜಾ ಕುಟ್ಮಾಕ್ ವಚೊನ್ ಭೆಟ್ತೆಲೆ! ಯೆ ಸುಲೇಮಾನ್ ಕಾ ವಾದಾ ರಹಾ!!"
27125 ದಿರಾಮ್ ಮಳ್ಯಾರ್ ಆಸ್ಪಾಸ್ ತೀನ್ ಲಾಕ್ ಆನಿ ತೀಸ್ ಹಜಾರ್ ಭಾರಾತಾಚೆ ರುಪಯಿ!
ಪಾಟಿಂ ರುಮಾಕ್ ಯೇವ್ನ್ ಬಿಚಾಣ್ಯಾರ್ ಪರ್ತಾಲೊ ಅಗ್ನೆಲ್. ಅಸ್ಥಿರ್ ಮೆಟಾಂಚೆಂ ಬೊಳ್ ಸರ್ವ್ ಮಾಜ್ವಾಲ್ಲೆಂ. ಫೆನಾಕ್ ಉಮ್ಕಾಳ್ಚೊ ಡೇವಿಡ್ ಅಪ್ಣಾಕ್ ಅಪಯ್ತಾಚೆಂ ಭಾಸ್ ಜಾಲೆಂ ತಾಕಾ.
