Kavyadorxon - 2:
Doreak uzo pettla? - Cha. Fra. DeCosta-chea bonddai kovitechem kallatit Dorxon
Doreak Uzo Pettla
Suxegachea amchea gamvant
az akant suttla
kallzak gham' futtla
ekoch boball uttla
doreak uzo pettla!
Dotor saib, vokil saib
montri saib, tontri saib
padri saib, bip saib
markittantolo motton saib
thorthoryamni attla.
Madri bai, vhoddli bai
ofisantoli aputt bai
mukri bai, mestirnn bai
add poddla tancho pai
penktta naddo tuttla.
Akantak voddko na
penkttar tanchea kuddko na
gamvcho suxeg luttla
az akant suttla
ekoch boball uttla
doreak uzo pettla.
Hamvga konn, koddchem menn
gamvak sangunk bhimyavinn
zolltta jinn kortit mhonn
saib, saibinn rag xinn
rogta xeller attla.
Doreak uzo pettonanga
sangunk utor suttonanga
toroi tanchea agttea fuddem
mhozo dhumvor uttonanga.
Dekun monko ghottla
razamv pelean lottla
atmo pimrgot suttla
doreak uzo pettla !
Soschem puryan puro soslam
atam doreaveller boslam
xintid taslam, soirann laslam
monant mekllem chintop poslam
vokta unddo vattla.
Roddun roddun roddun roddun
dolleantulim dukam tanddun
dorea matear vot'tam vot'tam
doreauzo palvounko sodhtam
saibababa, saibinn mana
mhonnunaka mona mona
firkis amkam bhettla
dubavo tumkam uttla
kallzak gham' futtla
doreak uzo pettla?
(Kurpa: Sonxache kan kovita pustok, Cha.Fra. DeCosta)
Kall aplo itihas ghoddta; kauyem taka sakxi zata. Chafrachea kovitenk tanchea kallachea samajik, samskritik oni itihasik vastovikotanchea pattbhumycher somzon gheunko zai. Punn tancho atmo tea pattbhumyt bond zaunko na. Monxachea mullbhut onbhogank – duk, bhirant, axa atreg oni bonddayak sporx korn cha. Fracheo thoddeo kovita kallacheo mero utron kallatit avaz zatat
Cha. Fra DeCosta-chi (1932–2012) ‘doreak uzo pettla’ oxich kallatit jivit zoddleli ek bonddai kovita. Panch doxokam poilem aplea kallachea samskritik pokollponnak ani samsthik ddongiponnak virodh bonddayachi bobatt zaun udel'li hi kovita azy amchea somazachea kallzak gham' futtoita. Tichea vollimni tea kallacho okrox asa; tichea protimant azy uzo zollta. Kovin pettoyil'lo doreacho uzo eka ghodditant simit urona. To onyai, odhikaracho ohonkar, amchem moun ani amchea ontorongant dambun dourol'lo protirodh - hea soglleanchem rupok zata.
Suxeg - souy zal'li bhirant!
kovitechi survat amchea vollkichea chitrant zata – suxegachea amchea gamvant’. Gamv xant asa. Munis suxegat dista. Hea soukasayechea nident ochanak -
suxegachea amchea gamvant
az akant suttla
kallzak gham' futtla
ekoch boball uttla
doreak uzo pettla!
ho suxeg khorench xanti? va bhirantin ghoddlelem moun?
nyainit, vixvas ani porospor man hanchea bhomvarant niz xanti fulon rauta. Bhirant, gulam'giri ani onyai dambun dorchea tannant moun pugon rauta. ‘sorv borem asa’ mhonn discho bhrom' somazak suxeg dita. ho suxeg khotto ani nokli. probhutv hea bhrantecho faido gheta. Lok sovalam vicharlear suxeg pidd'ddear zata mhonn bhietat oni oneaya sangata jieunko xiktat.
Monis zolmak gulam' zaina. To svotontr osta. Tachea ostitvauyr okromonn korn taka gulam' kortat. Hea zulumacho itihas pillgi-pillgin fuddem sorta: poili pillgi zulum' sosta, dusri pillgi taka souy korta, tisri pillgi taka somskriti mhonn manan svikar korta. Az bhroxttachar osoch man sonman gheun ‘amchoch’ zala! kovitentlo suxeg hea khottea samajik vastovachem chitr zata.
Otam tea suxegacha doreakch uzo pett'tana, vyousthechea xoxonnachi mitmer tuttlea mholl'llo krantikari dhoddboddo suru zata. Az gham' futtla angak nhoi, gamvchea kallzak! kallzak oghat zamvchea poilem, okant sutton gamv nid moddn utt'ta! tea zagint ekoch boball utt'ta. Ekleachem dhoir dusreanchea bhirantek soval korta. Avaz avazak sangat dita. Soglleancho avaz ekoch zaun samuhik sokot zaun utt'tana kovi sangta -
’Doreak uzo pettla'
(image by AI)
Ho akant suttomvcho gham' ani ek upratti boball odhikarachea kopottak thorthoramvcho ostitvvadi protirod.
Doreo ani Uzo
doreo ani uzo - prokritint ekamekak virodhi don ghottokam. Doreak uzo pettchem prokritichea niyomak ulttem. Punn heach osombhoutent kovitechem sogllem bonddai asa.
Kovi orth ugoddun sangina. To amkam pettchea dorea mukhar ube korta. Somaz jea bodolak osadhy mhonnta, jea krantik osombhou mhonnta tea bodlapachem chitronn to hea osombhou protiment korta. Doreachi ogadhota ani ujeacho upratto svobhavo eka pontar bhett'tat. Suxegachea doreak uzo pettlear to zago zata. Hoch songhorx - hoch protirodh.
Saibancho pongodd ani bayancho naddo
dotor saib, vokil saib
montri saib, tontri saib
padri saib, bif saib
markittantolo motton saib
thorthoryamni attla.
Ho pongodd mhollear ek pour-sttrokchor, sot'techem ek zallem! sot'ta eka mhonxan cholana. Ti ek sankllechea rupant cholta. gineanache, bholaikeche, kanun vyousteche, razoki-i ani dharmik rokxok ani tanche songi rogta hatache veaparist he soglle odhikarachea zallant ekamekak zoddlelim asat. . Somazachea sorv promukh somsthanchem protinidhitv korche vhoddil bhroxttacharachea mattvant ek zaun gamvchea sadea monxak gulam' korn suxeg lutt'tat.
Probhutvak khud'd zaun kitench sokot na; lokan dil'lo odhar ani bhirantoch tachem boll!
hea sankllentlo vhoddlo gulam' khoim sampoddta? ami ani amcho ‘suxegacho gamv’. kovi arso somazachea mukhar dourta; tantu amkam amchem protibimb disunki puro!.
Kovi odhikarachea horyeka mukheleak ani horyeka somsthak oplea noitik koddtint ubem korta: hanga ‘saib’ mholl'llea sobda pattlean kovichea voiyoktik onbhoganchi sai zhollkota. Tacho ghai dista. Punn, bodlol'lea kallak cha.Fran ubarol'lo tallo khoincheach eka dhormak va vyoktik simit nhoi, to upratt'ta sadea loka monant "sorv borem asa" mholl'llea bhroment dourchea, hikmoten ’kopotti som'moti’ toyar korchea probhutv soktek.
Saib soglle thorthortat kiteak? kovin veapari somskritichea mullakch dhadd ghalea. Doreo zoll'llo tor tanchi saibgiri zolltoli. Tanchi markett mortoli!
Madri bai, vhoddli bai
ofisantoli aputt bai
mukri bai, mestirnn bai
add poddla tancho pai
penktta naddo tuttla.
Odhikarachea zallant purux-prodhan vyousthecho probhavo asa; tachea porinnamant bailanchem jivity sampoddta. Tancho pai add poddta; penkttacho naddo tutt'ta. Hea protimant adhar hogddamvchem, somotol bhigoddchem ani svabhimanak dhoko pauchem — hea orthanchim podoram ugoddtat.
Akantak voddko na
penkttar tanchea kuddko na
gamvcho suxeg luttla.
Penkttacho kuddko sanddchem – hea protiment kosolem xoxonn dambun urlam? striyecho man, svatontr ani ostitvacher zamvcho okromonn hanga dista. ’gamvcho suxeg luttla’ hea vollint kovi voddko natol'lea okantak ek samuhik oyam' dita. “luttla” mholl'll'llea sobdantlean gamvchea suxega pattlean dambun dourlelo omanux onyai bair poddla.
Kallokachem raz ani koddchem menn
vyousthelagim zhuzonk kovi ayudham gheun yena. Tachea hatant osat sobd; tachea usvasant osa sotacho umallo. Kovi himsek prochodon korna, punn oneaya mukhar aplem noitik jid'd ani dhoir uttoun dhorta. Tachem zhuz tatvik. To sangta:
“hamvga konn, koddchem menn”.
Menn satvik teagachem protik. Menn svotak koddoun gollta. Svotacho akar hogddaun gheta. Aplem ostitv ujvaddant vilin korta. Kallokacher zoit zoddta. Kallokachem raz hea lhan ujvaddak thorthorta. Menn koddta—ponn kallokachem raz zolloita!
mennachi protima kovichea svont ostitvachery ek soval ubem korta. Kallokachea probhutvant ujvadd divcho monis aplem ostitv zollonk toyar asa. “zollta jinn” mhonnta to. Tacho ujvadd tachea svont jinnye audi mottvi mottvi korta. Hea protiment kovichem bonddai, tachem noitik dhoir ani teagachi toyari ek zatat.
Roddun roddun roddun roddun - punornirmannachi survat
Cha. Fra. Roddnneacho paromporik orth bodlun choddta:
“Roddun roddun roddun roddun
dolleantulim dukam tanddun
dorea matear vot'tam vot'tam
doreauzo palvounko sodhtam
Samany zaun roddnnem mhollear osohaik udgar mhonn omi somzotamv. punn cha. Fra. Cho, ‘roddun roddun roddun roddun’ mholl'llem kaveatmok aurton odhikarak bhieun kel'lo villap khonddit nhoi!. rogta xeller att'tana jivachea gunddaye thaun uttol'lea protirodhocho chhond zaun osa hem roddnnem. Kovichem ek unchlem kolatmok prokottonn.
Kovi dolleantulim dukam tanddta. Hea protiment dukhachem rupantor disun yeta. Him dukam veyoktik nhoi; tantun vorsamvorsam sosol'lo okman, onyai, ghayel'lo svabhiman ani dambun dourol'lea avazancho khotkoto asa. Katt tutton vallchea hea dukancho lott ‘dotor, vokil montri, tontri, saibanchea’ samsthik bhodrotek kosllamvchi zovabdari zatananch kranti survat'ta.
Kovi uzo pettoun dhvoms korunk sodhina, to doreachea matear aplim dukam vot'tam vot'tam “dorea uzo palvounko” sodhta. Hi protima kovitek ani ek novo tatvik ayam' dita.
Hanga roddnnem punornirmannachea poilea paulank pauta. Dolleantulim dukam doreak pautat; dorea uzo palvounko sodchem monxacha noitik dhoirachem protik zata. Veyoktik dukh samuhik zagritint rupantor zaun, protirodhachi sokot zata. hich kovitechi khori sokot.
Kitlem roddchem? roddnneakyi onty osa. Dukam sukon roddnnem rautana bhirant pollun dhamvta. Urta ujvadd, novem dhoir. Ani tedna, tea povitr mounant, kallokak dhamvddaun novo somsar bandcho ochol sonkolp zolm' gheta!
Firkisachem soval - doreak uzo pettla?
kovitechea nimannea vollint udgar na. Bodlak ek proxn chinh (?) ghalta: ’doreak uzo pettla?’ hi cha. Fra. Chi budhontkai. Ho bodol otyont mohotvacho. Poilem tannm sanglem – doreak uzo pettla (ek ghoddit). atam to vicharta – doreak uzo pettla? ek soval soval amchea gamvak, dexak, somazak, vyousthenk, dhormak, razkaronnak ani sogllea poilem amchea kallzak - doreak uzo pettla?
omor, zagrit ani solvonk toyar natol'lea monxeaponnachea itihasacho proxnochinh ho. Dekun kovi apnnakch “firkis” mhonn apoita.! to zanna, somaz tachea vicharank, sovalank ani bonddayachea organttak pixemponn mhonnta. Kovi tem lebol opnnyaita!
ho firkis vachpeak aram' ani viram' mholl'llem dimvcho na. somazan svikar kel'lelea mounak ani souy zal'lea suxegak inkar korn'nch osta. vachpeak to haloun vicharta—khorench uzo pettla? khorench samuhik zagriti udelea? khorench ami aichea kallacho okant aikaleamv. Tacheaki poilem, ani amcheasvont kallzachea akantak ami ollkoleamv?.
Doreak uzo pettla?
he soval horyeka yugachea monxachea ostitvak kovin dhorl'lo arso. Kall bodolta, vyousthechem rup bodolta, saibanchem namv bodolta. Punn bhirant, moun ani gulam'giri novea rupant porot zolm' ghetat. Tanka virodh ubo raucho uzo mond zamvchoch nhoi. To nirontor petton uronk zai.
Suttka sodche tollmolle raunant, mhonxaponn magchi bobatt thambana. Kovichea gamvant suxeg mholl'lloch na!
Comments
No comments yet. Be the first to say what you thought of it.
Leave a comment