ಕಥಾಪಾಠ್ - 1: ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ

ಕಥಾಪಾಠ್ - 1

ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ.

ಬೂಕ್: ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ.

ಲೇಖಕ್: ವಲ್ಲಿ ಕ್ವಾಡ್ರಸ್, ಅಜೆಕಾರ್.

ಪ್ರಸ್ತಾವನ್: ಮಿಕ್‌ಮ್ಯಾಕ್ಸ್.

ಪ್ರಕಾಶಕ್: - ಆಶಾವಾದಿ ಪ್ರಕಾಶನ್

ಮುಖ್‌ಪಾನ್: ಎಡ್ಡಿ ಸಿಕೇರ್, ಖತಾರ್.

ವಿಮರ್ಶ್ಯಾ/ಸಮೀಕ್ಶಾ/ಅಭಿಪ್ರಾಯ್ ಲೇಖನಾಂ

ಮೆಲ್ವಿನ್ ಜೆ. ವಾಸ್ ಕೆಲರಾಯ್/ಕುವೇಯ್ಟ್ [ವಿಮರ್ಸೊ: ಖಣ್]

ಪ್ರಿಯಾ ಸಿಕ್ವೇರಾ ಫೆರಾರ್/ಕುವೇಯ್ಟ್ [ಸಮೀಕ್ಶಾ: ಖಣ್]

ಆಸ್ಟಿನ್ ಡಿ’ಸೋಜ್ ಪ್ರಭು ನಂತೂರ್/ಚಿಕಾಗೊ [ಸಮೀಕ್ಶಾ]

ಅಶುಂತಾ ಪಿರೇರಾ ಗಂಟಾಲ್‌ಕಟ್ಟೆ/ಯುಕೆ [ಸಮೀಕ್ಶಾ: ಕುಡ್ಡೊ]

ಎಚ್ಚೆಮ್ [ವಿಮರ್ಸೊ: ಜಾಂಬ್ಳಾಂಚೊ ರೂಕ್]

ಕ್ಲೆರೆನ್ಸ್ ಕೈಕಂಬ/ಮಸ್ಕತ್ [ವಿಮರ್ಸೊ: ಬಾಂಯ್]

ಗಿಬ್ಬಾ ಕುಲ್ಶೇಕರ್/ಕುವೇಯ್ಟ್ [ಅಭಿಪ್ರಾಯ್]

ಸ್ಟೇನ್ ಅಗೇರಾ ಮುಲ್ಕಿ/ದುಭಾಯ್ [ವಿಮರ್ಸೊ: ಏಕ್ ಕ್ರಿಕೆಟ್ ಹೀರೊ]

ಎಡ್ವಿನ್ ಜೆ. ಎಫ್. ಡಿ’ಸೋಜ್, ಮಂಗ್ಳುರ್ [ಅಭಿಪ್ರಾಯ್]

ಸಿಜ್ಯೆಸ್ ತಾಕೊಡೆ, ಖತಾರ್ [ಅಭಿಪ್ರಾಯ್]

ಬರವ್ಪ್ಯಾಚಿಂ ಉತ್ರಾಂ - ವಲ್ಲಿ ಕ್ವಾಡ್ರಸ್, ಅಜೆಕಾರ್

ಕಥಾಪಾಠ್ - 1. ಕಾಣಿ: ಖಣ್ [ವಿಮರ್ಸೊ] - ಮೆಲ್ವಿನ್ ಜೆ. ವಾಸ್ ಕೆಲರಾಯ್

ಕಥಾಪಾಠ್ - 1: ಸಾಹಿತ್ಯ್ ಆನಿ ಸಮಾಜೆ ಮಧ್ಲಿ ’ಖಣ್’ [ವಿಮರ್ಸೊ] - ಮೆಲ್ವಿನ್ ಜೆ. ವಾಸ್

ಲೇಖನ್: ಮಟ್ವ್ಯಾ ಕಾಣ್ಯಾಂಚೆಂ ಅಧ್ಯಯನ್/ವಿಮರ್ಸೊ.

ಆಧಾರ್: ’ಖಣ್’ 
ಬೂಕ್: ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ (ಆಶಾವಾದಿ ಪ್ರಕಾಶನ್)
ಬರಯ್ಣಾರ್: ವಲ್ಲಿ ಕ್ವಾಡ್ರಸ್, ಅಜೆಕಾರ್

ಗುಲೊಬಾಚೊ ದೋನ್ ಪಾಕ್ಳ್ಯೊ ಸಾಂಗಾತಾ ಘುಂತ್ಲ್ಯಾರ್ ಏಕ್ ಗುಲೊಬ್ ಜಾತಾ?
ದೋನ್ ಕೊಡ್ಶ್ಯಾಂ ಮಧೆಂ ದವರ್‌ಲ್ಲೆಂ ಪಾಂಪಾಳೆಂ ದೋನ್ ಗಾಂವಾಕ್ ಏಕ್ ಕರ್ತಾ?

’ಕಂಗಾಲ್ ಆನಿ ಕುಕ್ಕೆಹಳ್ಳಿ’ ಕಥಾ ಸಾಹಿತ್ಯಾಕ್ ವಾಚ್‌ಲ್ಲ್ಯಾ ವಾಚ್ಪ್ಯಾಕ್ ಭೋವ್ಶಾ ಹಿಂ ಸವಲಾಂ ಕಿತ್ಯಾಕ್‌ಗೀ ಗರ್ಜೆಭಾಯ್ಲಿಂ ಮ್ಹಣ್ ದಿಸೊಂಕ್ ಪುರೊ. ಹೊ ತಾಚೊ ಅವ್ಗುಣ್ ಮ್ಹಣೊನ್ ಮ್ಹಾಕಾ ತರ್‌ಯೀ ಸಾಂಗೊಂಕ್ ಜಾಯ್ನಾಂ. ತಾಚ್ಯಾ ಫಯ್ಸಲಾ ಮುಖಾರ್ ಹಾವೆಂ ಖಾಲ್ತಿಮಾನ್ ಘಾಲುಂಕ್ ಪಡ್ತಾ. ಕಿತ್ಯಾಕ್ ಮ್ಹಳ್ಯಾರ್ ತೊ ಮ್ಹಜೊ ವಾಚ್ಪಿ. ತೊ ನಾಂ ತರ್ ಮ್ಹಜೆಂ ಸಾಹಿತ್ಯ್ ನಾ. ಮ್ಹಜೆಂ ಸಾಹಿತ್ಯ್ ನಾಂ ತರ್ ಎಕಾ ಸಾಹಿತ್ಯ್‌ಕಾರಾಚೆಂ ಅಸ್ಥಿತ್ವ್ ನಾ. ಅಶೆಂ ಮ್ಹಣ್ತಾನಾ ಮ್ಹಾಕಾ ವಾಚ್ಪಿ ಚಡ್ ಗರ್ಜೆಚೊ. ಹಿ ಗರ್ಜ್ ಹಾಂವ್ ಯಾ ತೊ ವಾಚ್ಪಿ ಕಶೆಂ ಗಳ್ಸಿತಾಂವ್ ಮ್ಹಳ್ಳೊ ತೊ ವೆಗ್ಳೊ ವಿಶಯ್. ಪುಣ್ ಪ್ರಮುಖ್ ವಿಶಯ್ ಕಿತೆಂಗೀ ಮ್ಹಳ್ಯಾರ್ ಹಾಂವ್ ಆನಿ ಮ್ಹಜೆಂ ಸಾಹಿತ್ಯ್ ವಾಚ್ಪ್ಯಾಲಾಗಿಂ ಸಂಬಂಧ್ ಜೊಡ್ತಾ ವಾ ನಾ. ಅಶೆಂ ಆಸ್ತಾಂ ವಯ್ಲ್ಯಾ ಸವಾಲಾಂಕ್ ಪಳೆಲೆಂ ತರ್ ದೋನ್ ಪಾಕ್ಳ್ಯಾಂಕ್ ಘುಂತುನ್ ಏಕ್ ಗುಲೊಬ್ ಆಕಾರ್ ಯೇನಾ. ತಶೆಂಚ್ ದೋನ್ ಕೊಡ್ಶ್ಯಾಂ ಮಧ್ಲೆಂ ಪಾಂಪಾಳೆಂ ದೋನ್ ಗಾಂವಾಕ್ ಏಕ್ ಕರ್ತಾ ವ ನಾ ತೊ ಉಪ್ರಾಂತ್ಲೊ ವಿಶಯ್, ಪುಣ್ ತೆಂ ಪಾಂಪಾಳೆಂ ಕಿತ್ಲೆಂ ಮಜ್ಬೂತ್ ಆಸಾ ತೆಂ ಪ್ರಾಥಮಿಕ್ ಯಾ ಪ್ರಮುಖ್ ವಿಶಯ್.

ಹ್ಯಾ ಪ್ರಾಥಮಿಕ್ ವಿಶಯಾಂತ್ ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಕಿತ್ಲಿ ಯಶಸ್ವಿ ಜಾಲ್ಯಾ ತೆಂ ಪಳೆವ್ಯಾಂ;

’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ವಿಶಿಂ ವಯಕ್ತಿಕ್ ಥರಾನ್ ಸಮ್ಜಂವ್ಚೆಂ ತರ್, ಪುಸ್ತಕಾಚಾ ಸುರ್ವಿಲ್ಲ್ಯಾ ಉತ್ರಾಂನಿ ಬರಯ್ಣಾರಾನ್ ಸವಿಸ್ತಾರ್ ರಿತಿರ್ ಹ್ಯಾ ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿವಿಶಿಂ ವಿವರ್ ದಿಲಾ. ವಾಚ್ಪ್ಯಾಕ್ ಸಮ್ಜೊಂಚಾ ಖಾತಿರ್ ಹಾಂವ್ ಹಾಂಗಾ ಮಟ್ವ್ಯಾನ್ ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿಚಿ ವಳೊಕ್ ಕರುನ್ ದಿತಾಂ. ಭೋವ್ಶಾ ಹಿ ವಳೊಕ್ ಹೆಂ ಪುಸ್ತಕ್ ವಾಚಿನಾತ್‌ಲ್ಲ್ಯಾ ಖಂಯ್ಚಾಯ್ ವಾಚ್ಪ್ಯಾಕ್ ಹೆಂ ಪುಸ್ತಕ್ ವಾಚ್ಚೆಂ ಮನ್ ಹಾಡಂವ್ಕ್ ಪುರೊ. ಅಶೆಂ ಮ್ಹಣ್ತಾನಾ ಹೊ ಮ್ಹಜೊ ಉದ್ದೇಶ್ ಖಂಡಿತ್ ನ್ಹಂಯ್. ಆಮ್ಚೆ ಉದ್ದೇಶ್ ವೆವೆಗ್ಳೆ. ಹ್ಯಾ ವೆವೆಗ್ಳ್ಯಾ ಉದ್ದೇಶಾಂಕ್ ಎಕಾ ಸತ್ರೆಂತ್ ಕುಡಾಯ್ಲ್ಯಾರ್ ಆಮ್ಚಾ ಮಿಸಾಂವಾಚೊ ಖರೊ ಉದ್ದೇಶ್ ದುಬ್ಳೊ ಆನಿ ಲಾಚಾರ್ ಜಾಯ್ತ್.

ಬರವ್ಪ್ಯಾಚಾ ಉತ್ರಾಂನಿ ಕಂಗಾಲ್ ಕೊಣ್‌ಯ್ ಜಾವ್ಯೆತಾ, ಹಾಂವ್, ತುಂ, ಯಾ ತೊ. ಕುಕ್ಕೆಹಳ್ಳಿ ಕೊಣಾಯ್ಚೊಯ್ ಗಾಂವ್ ಜಾವ್ಯೆತಾ, ಮ್ಹಜೊ, ತುಜೊ ಯಾ ತಾಚೊ. ತರ್, ಹೊ ಎಕಾ ಗಾಂವಾ ಆನಿ ಮನ್ಶಾ ಮಧ್ಲೊ ಸಂಬಂಧ್? ಹೆಂ ವೊರಾವ್ನ್ ಪಳೆಲೆಂ ತರ್;

"ಕಂಗಾಲಾಚೆಂ ಖರೆಂ ನಾಂವ್ ಮಂಗಲ್‌ದಾಸ್ ಶಾಸ್ತ್ರಿ. ಪುಣ್ ಪಳೆಂವ್ಕ್ ಸಾವ್ಳೊ ಆನಿ ವಿದ್ರೂಪ್ ಜಾವ್ನ್ ಲಾಂಬ್ ಜಿವಾಚೊ ತೊ ಜಾಲ್ಲೆವರ್ವಿಂ ತಾಚ್ಯಾ ಇಷ್ಟಾಂನಿ ತಾಕಾ ಕಂಗಾಲ್ ಮ್ಹಣ್ ವೊಲಾವ್ನ್, ತೊ ಆತಾಂ ಕಂಗಾಲ್ ಮ್ಹಳ್ಳ್ಯಾ ನಾಂವಾರ್‌ಚ್ ಫಾಮಾದ್" (ಕಾಣಿ: ’ಏಕ್ ಕ್ರಿಕೆಟ್ ಹೀರೊ’ - ಪಾನ್ 20)

ಮ್ಹಾಕಾ ವಯಕ್ತಿಕ್ ಜಾವ್ನ್ ಹೆಂ ನಾಂವ್ ಕಿತ್ಯಾಕ್‌ಗೀ ಪಸಂದ್ ಜಾಯ್ನಾಂ. ಜಶೆಂ ಮ್ಹಾರಾಂಕ್ ’ಮ್ಹಾರ್’ ಆನಿ ಕೊರ್ಗ್ಯಾಂಕ್ ’ಕೊರ್ಗೊ’ ಮ್ಹಣೊನ್ ಆಪಂವ್ಚೆಂ ಮ್ಹಾಕಾ ಕಿತ್ಯಾಕ್‌ಗಿ ಪಸಂದ್ ಜಾಯ್ನಾಂ ತಶೆಂ. ದೆಖುನ್ ಹ್ಯಾ ಕಂಗಾಲಾಚೆಂ ನಾಂವ್ ಸೊಧ್ಚೆಂ ಪ್ರೇತನ್ - ತರ್ ಕಿತೆಂ ಕಂಗಾಲ್ ಮನಿಸ್ ಪಳೆಂವ್ಕ್ ವಿದ್ರೂಪ್, ಬಾರಿಕ್, ಲಾಚಾರ್ ಆಸ್‌ಲ್ಲೊ ಕಂಗಾಲ್ ಜಾತಾ? ಆಸೊಂ! ಅಶೆಂ ವ್ಹಯ್ ತರ್, ಬರವ್ಪ್ಯಾನ್ ಖುದ್ದ್ ಉಚಾರ್‌ಲ್ಲ್ಯಾ ಕಂಗಾಲಾಚ್ಯಾ ಚಿತ್ರೀಕರಣಾಕ್ ಆನಿ ಹ್ಯಾ ಕಾಣಿಯೆಂತ್ಲ್ಯಾ ಚಿತ್ರೀಕರಣಾಕ್ ಕಾಂಯ್ ಸಂಬಂಧ್ ಜಾತಾ? ಹಾಂಚೆ ಮಧ್ಲೊ ಕಂಗಾಲ್ ಕೊಣ್ ಖರೊ ಕಂಗಾಲ್. ಜೊ, ಪುಸ್ತಕಾಚಾ ಮುಖ್‌ಪಾನಾಚೆರ್ ಅಪ್ಲೆಂ ಚಿತ್ರೀಕರಣ್ ವಾಚ್ಪ್ಯಾಕ್ ದಿವಯ್ತಾ?

ಹ್ಯಾ ವಯ್ಲ್ಯಾ ವಿಚಾರಾಂಕ್ ಆನಿಕ್‌ಯ್ ಸ್ವಷ್ಟ್ ಕರ್ಚೆಂ ತರ್;

’ಅಚಾನಕ್ ಎಕಾ ದಿಸಾ, ಮಾಗ್ಗಿಚಾ ಹರ್ಧ್ಯಾಂತ್ ಕಸ್ಲಿಗೀ ದೂಕ್ ಆಯ್ಲಿ. ದೊತೊರಾಕ್ ಆಪಯ್ಲೊ, ಪುಣ್ ತೊ ಯೆಂವ್ಚಾಧಿಂಚ್ ತಿಣೆಂ ಸೊಡ್ಲೊ. ಬಾಲ್ತಾಜಾರ್ ಕಂಗಾಲ್ ಜಾಲೊ’ (ಕಾಣಿ: ’ಬಾಂಯ್’ - ಪಾನ್ 47)

’ಏಕ್ ಕ್ರಿಕೆಟ್ ಹೀರೊ’ ಕಾಣಿಯೆಂತ್, ಮನ್ಶಾಚೆಂ ಭಾಯ್ಲೆಂ ರೂಪ್, ಮನ್ಶಾಚೆಂ ಭಾಯ್ಲೆಂ ವೆಕ್ತಿತ್ವಾಚೆಂ ಚಿತ್ರಣ್, ಖಂಯ್ಚಾಯ್ ಮನ್ಶಾಕ್ ಬರಯ್ಣಾರಾಚಾ ನದ್ರೆನ್ ಕಂಗಾಲ್ ಮ್ಹಣೊನ್ ವಳ್ಕೊನ್ ಘೆತಾ ಜಾಲ್ಯಾರ್,

’ಬಾಂಯ್’ ಕಾಣಿಯೆಂತ್ ಘಟ್‌ಮೂಟ್ ಮನಿಸ್, ಆಪ್ಲ್ಯಾ ಭಿತರ್ಲ್ಯಾ ವೆಕ್ತಿತ್ವಾಂತ್ ಲಾಚಾರ್ ಜಾತಾನಾ ತೊ ಕಂಗಾಲ್ ಜಾತಾ.

ಅಶೆಂ ಖುದ್ದ್ ಬರಯ್ಣಾರ್ ಮಾಂಧ್ತಾ ಜಾಲ್ಯಾರ್, ತಾಚ್ಯಾ ಕಾಣಿಯೆಂತ್ಲ್ಯಾ ಕಂಗಾಲಾಚಿ ಖರಿ ವಳೊಕ್ ತಾಣೆಂ ತಾಚ್ಯಾ ಸುರ್‍ವಿಲ್ಲ್ಯಾ ಉತ್ರಾಂನಿ ದಿಲ್ಲ್ಯಾಪರಿಂ ನ್ಹಂಯ್ ಮ್ಹಣೊನ್ ಜಾಲೆಂ. ಹಾಕಾ ಅನಿಕ್‌ಯೀ ಸ್ವಷ್ಟ್ ಕರ್ಚೆಂ ತರ್;

’ಕಸೊ ತೊ ಕುಕ್ಕೆಹಳ್ಳೆಂತ್ ಪಡ್ಲೊ, ಮಾತ್ರ್ ನ್ಹಂಯ್, ಕಶೆಂ ತಾಚೆಂ ನಾಂವ್‌ಯೀ ತಾಚೆರ್ ಪಡ್ಲೆಂ ಮ್ಹಳ್ಳೆಂ ಕುಕ್ಕೆಹಳ್ಳೆಂತ್ಲೊ ಏಕ್ ಮಿಸ್ತೆರ್‌ಚ್ ಜಾವ್ನಾಸ್‌ಲ್ಲೊ’ (ಕಾಣಿ: ’ಖಣ್’ - ಪಾನ್: 7)

ತರ್, ನಿಜಾಯ್ಕೀ ಹೊ ಕಂಗಾಲ್ ಮ್ಹಳ್ಳೆಂ ವೆಕ್ತಿತ್ವ್ ಏಕ್ ಮಿಸ್ತೆರ್? ಜರ್ ತರ್ ಹೆಂ ಮಿಸ್ತೆರ್ ಜಾಲ್ಯಾರ್ ಪುಸ್ತಕಾಚಾ ಮಾತಾಳ್ಯಾನ್ ಸ್ವಷ್ಟ್ ಚಿತ್ರಣ್ ದಿಂವ್ಚಿ ಕಂಗಾಲ್ ಕಿತ್ಯಾಕ್ ಲಿಪ್ಲಾ? ಕಂಗಾಲ್ ಮ್ಹಳ್ಳ್ಯಾ ಉತ್ರಾಂ ಪಾಟ್ಲ್ಯಾನ್ ಬರಯ್ಣಾರಾನ್ ಪ್ರಸ್ತುತ್ ಕೆಲ್ಲೊ ವಿವಿಧ್ ರುಪಾಂಚೊ ವಿಚಾರ್ ವಾಚ್ಪ್ಯಾಕ್ ಗುಸ್ಪಡಾಯ್ನಾ?

ಅಶೆಂ ಸಾಂಗ್ತಾನಾ, ಹಾಂವ್ ಖಂಡಿತ್ ಹೆಂ ಸಾಂಗೊಂಕ್ ಆಶೆತಾಂ ಕಿ ಬರಯ್ಣಾರ್ ಹಾಂಗಾಸರ್ ಖಂಯ್ಚಾಯ್ ಕಂಗಾಲಾವಿಶಿಂ ಉಲಯ್ನಾಂ. ಅಶೆಂ ಉಲಂವ್ಕ್ ಜಾಯ್ ತರ್ ತಾಕಾ ಖಬ್ರೊ ಕರ್ಚೊ ಆವ್ಕಾಸ್‌ಯ್ ಆಸಾ. ಖಬ್ರೊ ಕರುಂಕ್ ತಾಕಾ ನಾಕಾ. ತೊ ಸಮಾಜ್ ಆನಿ ಮ್ಹಜ್ಯಾ ವಿಶಿಂ ಉಲಯ್ತಾ ಮ್ಹಳ್ಯಾರ್, ವಿಚಾರ್ ಆನಿ ವೆವಸ್ತಾವಿಶಿಂ ಉಲಯ್ತಾ. ಅಶೆಂ ಆಸ್ತಾನಾ ಕುಕ್ಕೆಹಳ್ಳೆಕ್ ವೆವಸ್ತಾ ಹರ್‍ಯೆಕ್ ಮಾಪಾಕ್ ಸಾಂಗಾತ್ ಜೊಡುಂಕ್ ಸಕ್ತಾ. ಹೆಂ ಹಾಂವ್ ಖರೆಂಚ್ ವೊಪ್ವತಾಂ. ಹಿ ಕುಕ್ಕೆಹಳ್ಳಿ ಏಕ್ ಗಾಂವ್ ಜಾಂವ್ ಯಾ ಶೆರ್ ಜಾಂವ್ ಏಕ್ ಸಮಾಜ್ ಜಾಂವ್ ಯಾ ಏಕ್ ಘರಾಣೆಂ ಜಾಂವ್, ಆಪ್ಲ್ಯಾ ಪಾತ್ರಾಕ್ ಬರೆಂಚ್ ಖೆಳ್ತಾ. ಅಶೆಂ ಮ್ಹಣ್ತಾನಾ ಕಂಗಾಲ್ ಕಿತ್ಯಾಕ್‌ಗಿ ಹಾಂಗಾ ಸಲ್ವಲ್ಲ್ಯಾಪರಿಂ ದಿಸಾನಾ?

ಎಕಾ ಕುಶಿನ್ ವಯಕ್ತಿಕ್ ಚಿತ್ರಣ್! ದುಸ್ರ್ಯಾ ಕುಶಿನ್ ಜೆರಾಲ್ ವಿಚಾರ್!! ಹ್ಯಾ ದೊನಾಂ ಮಧೆಂ ಕಂಗಾಲ್ ಆಪ್ಲ್ಯಾ ನೀಜ್ ಅಸ್ತಿತ್ವಾಕ್ ನಿಜಾಯ್ಕ್‌ಯೀ ವಳ್ಕೊನ್ ಘೆಂವ್ಚಾಂತ್ ಉಡ್ಡಾತಾ.

ಬರವ್ಪ್ಯಾಚಾ ಉತ್ರಾನಿಂಚ್ ಕುಕ್ಕೆಹಳ್ಳಿಚೊ ಕಂಗಾಲ್, ಹಾಂವ್, ತುಂ, ತೊ, ಯಾ ತೆಂ (’ತೆಂ’ ಹಾಂಗಾಸರ್ ಬರವ್ಪ್ಯಾನ್ ಉಚಾರುಂಕ್ ನಾ ಜಾಲ್ಯಾರ್‌ಯೀ ಹಾವೆಂ ಉಚಾರ್‌ಲ್ಲ್ಯಾಂತ್ ಕಾಂಯ್ ವಾಯ್ಟ್ ಜಾಯ್ತ್ ಮ್ಹಣ್ ಚಿಂತಿನಾ) ಅಶೆಂ ಮ್ಹಣ್ತಾನಾ, ವಾಸ್ತವಿಕ್ ಸಮಾಜೆಂತ್ ಜಿಯೆಂವ್ಚೊ ಹರ್‍ಯೆಕ್ಲೊ ಕಂಗಾಲ್‌ಚ್. ಹೆಂ ಜೆರಾಲ್ ವಿಚಾರಾಂನಿ ಮಾಂಧುನ್ ಘೆಂವ್ಚಾ ತಸಲೆಂ ಹ್ಯಾ ವಾದಾಕ್ ಪ್ರತಿವಾದ್ ಮಾಂಡ್ಲ್ಯಾರ್ ತೆಂ ರುಜು ಕರುನ್ ಧಾಖಂವ್ಕ್ ಆಯ್ಚಾ ಪರಿಗತೆಂತ್ ಕಾಂಯ್ಚ್ ಕಷ್ಟ್ ನಾಂತ್. ಹಾಂ! ಪುಣ್ ವಯಕ್ತಿಕ್ ಚಿತ್ರಣಾಚಾ ಕಂಗಾಲಾಕ್ ಫುಡೆಂ ಧರ್ಲ್ಯಾರ್ ಭೋವ್ಶಾ ಪ್ರತಿವಾದ್ ಮಾಂಡ್‌ಲ್ಲೊ ಜಿಕೊಂಕ್ ಚಡ್ ಸುಲಭ್.

ಅಶೆಂ ಆಸ್ತಾನಾ, ಕಂಗಾಲ್ ಮ್ಹಳ್ಳ್ಯಾ ನಾಂವಾ ಪಾಟ್ಲ್ಯಾನ್ ವಿಚಾರ್ ಮಾತ್ರ್ ಸ್ವಷ್ಟ್ ಕರ್ಚೊ ಉದ್ದೇಶ್ ಜರ್‌ತರ್ ಬರವ್ಪ್ಯಾಚೊ ವ್ಹಯ್ ತರ್, ಕಂಗಾಲಾಚಾ ಪಾತ್ರಾಚೆಂ ವಯಕ್ತಿಕ್ ಚಿತ್ರಣ್ ಕಿತ್ಯಾಕ್? ವಯಕ್ತಿಕ್ ಚಿತ್ರಣಾಂತ್ ಕಂಗಾಲ್ ಮ್ಹಳ್ಳ್ಯಾ ಪಾತ್ರಾಕ್ ಸಿಂತಿಮೆಂತಾಚೊ ತುರೊ ಕಿತ್ಯಾಕ್?

ಹ್ಯಾವಿಶಿಂ ಸ್ವಷ್ಟ್ ಅಭಿಪ್ರಾಯ್ ಭೋವ್ಶಾ ಮುಖಾರ್ ಮುಖ್ಲ್ಯಾ ಪಾನಾಂನಿ ಸ್ವಷ್ಟ್ ಜಾತೆಲಿ.

ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿಚಿ ಏಕ್ ವೋಳ್ ಜಾವ್ನ್ ’ಖಣ್’ ಕಥಾ ಅಧ್ಯಯನಾಕ್ ಘೆತ್ಲಿ ತರ್, ಕುಕ್ಕೆಹಳ್ಳೆಚಾ ಎಕಾ ಖಣಿಯೆಂತ್ ಪಡ್ಲೆಲ್ಯಾ ಕಂಗಾಲಾಚಿ ಕಥಾ. ಸೆಜಾರ್ಚಾ ಗಾಂವ್ಚಾ ಜಾತ್ರ್ಯಾ ಥಾವ್ನ್ ಪಾಟಿಂ ಯೆಂವ್ಚಾ ಹರ್‍ಯೆಕ್ಲ್ಯಾಚಿ ನದರ್ ಮ್ಹಳ್ಯಾರ್ ವಾಟ್ಸುರ್‍ಯಾಂಚಿ, ಪೊಕ್ರಿ ಚಲ್ಯಾಂಚಿ, ಮುಖ್ರಿ, ಮೆಸ್ತ್ರಿ, ಪುಜಾರಿ, ಭೊಟ್, ಬ್ರದರ್, ಕ್ರಿಸ್ತಾಂವ್ ಟಿಚೆರ್ ಹ್ಯಾ ಸರ್ವಾಂಚಿ ನದರ್ ಕಂಗಾಲಾ ವಯ್ರ್ ಗೆಲಿ ತರ್‌ಯೀ, ಎಕ್ಲ್ಯಾ ಥಾವ್ನ್ ಎಕ್ಲ್ಯಾಚಾ ವಿಚಾರಾಂ ವರ್ವಿಂ ಕಂಗಾಲ್ ಬಾವ್ಡೊ ಖಣಿಯೆಂತ್‌ಚ್ ಉರ್ಲೊ. 

ಸಗ್ಳ್ಯಾ ಕುಕ್ಕೆಹಳ್ಳೆನ್‌ಚ್ ಕಂಗಾಲಾಕ್ ಖಣಿಯೆಂತ್ ಪಳೆಲೊ ತರೀ ಕೊಣೆಂಯ್ ಕಂಗಾಲಾಕ್ ಖಣಿಯೆಂತ್ಲೊ ವಯ್ರ್ ಕಾಡಿನಾಸ್ತಾನಾ ಕಂಗಾಲ್ ಬಾವ್ಡೊ ಕಂಗಾಲ್ ಜಾವ್ನ್ಂಚ್ ಖಣಿಯೆಂತ್ ಉರ್ಲೊ ಆನಿ ನಿಮಾಣೆಂ ಆಯಿಲ್ಲ್ಯಾ ಪಾರ್ಪೊಳ್ ಚೆಡ್ಯಾಂನಿ ’ರಸ್ತ್ಯಾರ್ ಪಡ್‌ಲ್ಯಾ ಕಂಗಾಲಾಕ್ ಖಣಿಯೆಂತ್ ದೆಂವೊನ್ ಉಕಲ್ಲೊ’. ಮ್ಹಳ್ಯಾರ್ ಸಗ್ಳಿ ರಾತ್ ರಸ್ತ್ಯಾ ದೆಗಾಂತ್ಲ್ಯಾ ಖಣಿಂತ್ ಪಡೊನ್ ಆಸ್‌ಲ್ಲೊ ಕಂಗಾಲ್ ಫಾಂತೆ ಜಾತೆಚ್ಚ್ ಅಪ್ಣಾನ್ ಖಣಿಂತ್ ಪಡ್‌ಲ್ಲ್ಯಾ ಮಿಸ್ತೆರಾಕ್ ನಿಯಾಳ್ಣ್ ಕುಕ್ಕೆಹಳ್ಳೆಕ್ ಪಾಟಿಂ ಪರ್ತಾಲೊ.

ಕಂಗಾಲ್ ಖಣಿಯೆಂತ್ ಪಡ್‌ಲ್ಲೊ ಮಿಸ್ತೆರ್ ಸಮ್ಜಾನಾತ್‌ಲ್ಲ್ಯಾ ಯಾ ಸಮ್ಜೊಂಕ್ ನಾಕಾಸ್‌ಲ್ಲ್ಯಾ ಕುಕ್ಕೆಹಳ್ಳೆಗಾರಾಂಕ್ ಹ್ಯಾ ಮಿಸ್ತೆರಾಚೆಂ ಕಾಣ್ಯೆಚಾ ಅಖ್ರೇಕ್ ಉಗ್ಡಾಪಣ್ ಕೆಲ್ಲೆಂ ದಿಸೊನ್ ಯೆತಾ. ಮಿಸ್ತೆರ್ ಹೊ ಕೀ ಇಕ್ರಾ ವರ್ಸಾಂಧಿಂ ಕುಕ್ಕೆಹಳ್ಳೆಕ್ ಉದ್ಕಾಚೊ ನಳ್ ಘಾಲಯ್ತಾಂ ಮ್ಹಣ್ ಭಾಸ್ ದಿಲ್ಲ್ಯಾ ಮಂತ್ರಿನ್ ರಸ್ತ್ಯಾ ದೆಗೆನ್ ಖಣ್ ಖೊಂಡಂವ್ಕ್ ಸುರು ಕೆಲ್ಲೆಂ. ಕಂಗಾಲಾಕ್ ಲುಟ್ಕಾರಾಂನಿ ಮಾರುನ್ ಖಣಿಯೆಂತ್ ನಿದಾವ್ನ್ ಪೊಳಾಪೊಳ್ ಘೆತ್‌ಲ್ಲಿ.

ವಯ್ಲೆಭಾರ್ ಹ್ಯಾ ಕಾಣಿಯೆಕ್ ವಾಚ್ತಾನಾ ಖಂಯ್ಚರ್‌ಗೀ ಹ್ಯಾ ಕಾಣಿಯೆನ್ ವಾಂಜೆಲಾಂತ್ಲ್ಯಾ ’ಬರೊ ಸಾಮಾರಿಯಾಗಾರ್’ ಹಾಚೊ ಆಧಾರ್ ಘೆತ್ಲಾ ಜಾವ್ಯೆತ್ ಮ್ಹಣ್ ಸುಸ್ತಾತಾ. 

ಕಥಾವಸ್ತುಚಿ ವಿಂಚವ್ಣ್:

ಹ್ಯಾ ’ಖಣ್’ ಕಾಣಿಯೆಂತ್ ಕಥಾವಸ್ತುಕ್ ಪಳೆಲ್ಯಾರ್ ಅಸಲಿಚ್ಚ್ ಕಥಾವಸ್ತ್ ವಾಂಜೆಲಾಂತ್ಲ್ಯಾ ನವ್ಯಾ ಸೊಲ್ಲ್ಯಾಂತ್ ವಾಚುಂಕ್ ಮೆಳ್ತಾ. ಹಾಂಗಾಸರ್‌ಯೀ ತಿಚ್ಚ್ ವಿನ್ಯಾಸಾಚಿ ಕಥಾವಸ್ತ್ ಪುಣ್ ವೊಪಾರಿಚೆಂ ನಾಂವ್ ಮಾತ್ರ್ ’ಬರೊ ಸಾಮಾರಿಯಾಗಾರ್’.

’ಖಣ್’ ಕಾಣ್ಯೆಚಿ ಕಥಾವಸ್ತ್ ಆಮಿ ಎದೊಳ್ ಪಳೆಲಿ ಆಸ್ತಾಂ ’ಬರೊ ಸಾಮಾರಿಯಾಗಾರ್’ ವೊಪಾರಿಚಾ ಕಥಾವಸ್ತ್ ಇಲ್ಲಿ ಗುಂಡಾಯೆನ್ ಪಳೆಲಿ ತರ್; ಬರೊ ಸಾಮಾರಿಯಾಗಾರ್ ವೊಪಾರೆಂತ್ ವ್ಯಾಪಾರಾಕ್ ವೆಚೊ ಏಕ್ ಜುದೆವ್, ಜೆರುಜಲೆಮಾ ಥಾವ್ನ್ ಜೆರಿಕೊಚಾ ವಾಟೆರ್ ಚೊರಾಂಚಾ ಹಾತಿಂ ಸಾಂಪ್ಡೊನ್ ಅರ್ಧ್ಯಾ ಜಿವಾರ್ ವಾಟೆರ್ ಪಡ್ತಾ. ತ್ಯಾಚ್ ವಾಟೆರ್ ಏಕ್ ಯಾಜಕ್, ಏಲ್ ಲೆವಿತ್, ಚಲೊನ್ ಯೆತಾನಾ ಹ್ಯಾ ಘಾಯೆಲ್ಲ್ಯಾಕ್ ಪಳೆವ್ನ್ ತೆ ಪಳೆನಾತ್‌ಲ್ಲೆಪರಿಂ ಕರುನ್ ತಾಮ್ಚಿಂ ವಾಟ್ ಧರುನ್ ವೆತಾತ್. ಪುಣ್ ಏಕ್ ಸಾಮಾರಿಯಾಗಾರ್ ತ್ಯಾಚ್ ವಾಟೆರ್ ವೆಚೊ ತಾಚಿ ತ್ಯಾ ಪಡ್ಲೆಲ್ಯಾಚಿ ಭಿರ್ಮತ್ ಪಾವೊನ್ ತಾಕಾ ಚಿಕಿತ್ಸಾ ದಿವಯ್ತಾ ಆನಿ ತ್ಯಾ ಜುದೆವಾಕ್ ಅಪುಣ್ ಕೊಣ್ ಮ್ಹಳ್ಳೆಂ ತೆಂ ಕಳಿತ್ ಕರಿನಾಸ್ತಾನಾಂಚ್ ತಾಚಿ ವಾಟ್ ಧರುನ್ ವೆತಾ.

ಆತಾಂ ಹ್ಯಾ ಕಥಾವಸ್ತುಕ್ ಪಳೆಲ್ಯಾರ್ ಕಂಗಾಲಾಕ್ � ಹ್ಯಾ ಜುದೆವಾಕ್ ಸಂಬಂಧ್ ಕಥಾಂತ್ ದಿಸ್ತಾ. ಹಾಂಗಾಸರ್ ವೊಪಾರಿಂತ್ಲೊ ಘಾಯೆಲ್ಲೊ ಜುದೆವ್ ಮ್ಹಣ್ಚಾಕ್ ಕಾಂಯ್ ರುಜ್ವಾತ್ ನಾಂತ್ ಜಾಲ್ಯಾರ್‌ಯೀ ತ್ಯಾ ವೊಪಾರಿಚೆಂ ಅಧ್ಯಯನ್ ಚಲಯ್ಲ್ಯಾರ್ ತೊ ಜುದೆವ್‌ಚ್ ಮ್ಹಣೊನ್ ಹಾಂವ್ ರುಜು ಕರುಂಕ್ ಸಕ್ತಾಂ. ಪುಣ್ ಹ್ಯಾ ಕಂಗಾಲ್ ಆನಿ ತಾಚ್ಯಾ ಕುಕ್ಕೆಹಳ್ಳೆಂತ್ಲ್ಯಾ ’ಖಣ್’ ಕಾಣ್ಯೆಚಾ ಕಥಾವಸ್ತುಂತ್ ಏಕ್ ಪಾತ್ರ್ (Character) ವಾ ವ್ಯಕ್ತಿತ್ವ್ ದಿಸೊನ್ ಯೇನಾ ಮ್ಹಳ್ಯಾರ್ ಬರ್‍ಯಾ ಸಾಮಾರಿಯಾಗಾರಾಚೆಂ. ಅಶೆಂ ಮ್ಹಣ್ತಾನಾ ಹಾಂಗಾ ನಿರಾಸ್ ನಾಕಾ. ಖಣ್ ಕಾಣ್ಯೆಂತ್ ನಿಮಾಣೆ ಕಂಗಾಲಾಕ್ ಪಳೆಲ್ಲೆ ತೆ ಪಾರ್ಪೊಳ್ ಚೆಡೆ ಕಂಗಾಲಾಕ್ ಖಣಿಯೆಂತ್ಲೊ ಉಕ್ಲುನ್ ರಸ್ತ್ಯಾರ್ ನಿದಾಂವ್ಚೆಂ ಪ್ರೇತನ್ ತರೀ ಕರ್ತಾತ್ ಮ್ಹಣ್ತಾನಾ ಹೆ ಸಾಮಾರಿಯಾಗಾರಾಚಾ ಪಯ್ಕಿಲ್ಯಾ ಕುಟ್ಮಾಂತ್ಲೆ ಜಾಂವ್ಕ್‌ಯ್ ಸಕ್ತಾತ್.

ಹಿ ಜಾಲಿ ಕಥಾವಸ್ತ್. ಕಥಾವಸ್ತ್ ಕಿತ್ಲಿ ಬರಿ ಆಸ್ಲ್ಯಾರ್‌ಯೀ ಜೆದ್ನಾಂ ವರೇಗ್ ತಿ ಕಥಾವಸ್ತ್ ಪ್ರತ್ಯಕ್ಶ್ ಆನಿ ಪರೊಕ್ಷ್ ರುಪಿಂ ಆಪ್ಲ್ಯಾ ಮುಳಾವ್ಯಾ ವಿಚಾರಾಂಕ್ ಸಾಂಗಾತ್ ದೀಂವ್ಕ್ ಗಳಾಯ್ ಕರ್ತಾ ತೆದ್ನಾಂ ವರೇಗ್ ತಿ ಕಥಾ ಅಧುರಿ ಜಾವ್ನ್ ಉರ್ತಾ.

ಕಥಾವಸ್ತುಂತ್ಲೊ ಮುಳಾವೊ ವಿಚಾರ್ ಯಾ ಕಥಾವಸ್ತುಕ್ ಉಭಾರ್‌ಲ್ಲ್ಯಾ ಥಳಾಚೊ ವಿಚಾರ್:

"ಕುಕ್ಕೆಹಳ್ಳೆಕ್ ಉದ್ಕಾಚೊ ನಳ್ ಘಾಲಯ್ತಾಂ ಮ್ಹಣ್.. ಮಂತ್ರಿನ್ ಖಣ್ ಖೊಂಡುಂಕ್ ಸುರು ಕೆಲೆಂ. ಕಂಗಾಲ್ ಮಾತ್ರ್ ಅಪ್ಲೇಸ್ತಕಿಂ ಹಾಸ್ತಾಲೊ. ಖಂಡಿತ್ ಜಾವ್ನ್.. ಕೊಣಾಕ್ ತರೀ ಮಾರುನ್ ಖಣಿಂತ್ ಘಾಲುನ್ ವೆತೆಲೆ.."

ಹೊ ’ಖಣ್’ ಕಥಾಂತ್ಲೊ ಮುಳಾವೊ ವಿಚಾರ್. ವಿಸ್ತಾರಾವ್ನ್ ಸಾಂಗ್ಚೆಂ ತರ್ ತರ್ ಮಂತ್ರಿಬಾಬಾಚೊ ಪೊಕೊಳ್ ಭಾಸೊ, ಹ್ಯಾ ಭಾಸೆಚೊ ಫಾಯ್ದೊ ಜೊಡುನ್ ಲೊಕಾಂಕ್ ಬಾನಾಂವ್ಚೆಂ, ತ್ಯಾ ಉಪ್ರಾಂತ್ ವಿಸ್ರೊಂವ್ಚೆಂ ದೆಖಿಕ್ ಥೊಡೆಂ ಧಾಖಂವ್ಚೆಂ, ರಸ್ತ್ಯಾಚಿ ವೀದ್ ವಾವ್ಳಿ, ಪಾಪಾರಿ ಕಂಗಾಲಾ ತಸಲ್ಯಾ ಲೊಕಾಂನಿ ಹಾಚೆಥಾವ್ನ್ ಭೊಗ್ಚೆ ತ್ರಾಸ್, ಹೊ ವಿಚಾರ್‌ಯೀ ಅಧುರೊಚ್ ಮ್ಹಣ್ಯೆತ್. ಕಿತ್ಯಾಕ್ ಮ್ಹಳ್ಯಾರ್ ಹ್ಯಾ ವಿಚಾರಾಂಕ್ ಸಮಾಜೆಚ್ಯಾ ಪ್ರತಿಕ್ರಿಯಾ ದರ್ಶನ್ ಕಥಾಂತ್ ನಾ. ಹಾಂಗಾಸರ್ ಏಕ್ ವಿಶಯ್ ಉಡಾಸ್ ದವರ್ಚೊ ಖಂಡಿತ್ ಗರ್ಜೆಚೊಕೀ ಹರ್‍ಯೆಕ್ ಕ್ರಿಯಾಚಿ ಪ್ರತಿಕ್ರಿಯಾ ಖಂಡಿತ್ ಉಮಾಳೊನ್ ಯೆತಾ. ಆಜ್ ನಾಂ ಜಾಲ್ಯಾರ್ ಫಾಲ್ಯಾಂ. ಪುಣ್ ಹೆಂ ’ಖಣ್’ ಕಥಾಂತ್ ಸ್ಪಶ್ಟ್ ಆಸಾ.

’ಬರೊ ಸಾಮಾರಿಯಾಗಾರ್’ ಕಥಾಂತ್ ಕಥಾವಸ್ತುಚೊ ಮುಳಾವೊ ವಿಚಾರ್ ಸ್ಪಶ್ಟ್ ಆಸಾ. ಭೋವ್ಶಾ ಹೆಂ ಜಾಣಾಂ ಜಾಂವ್ಕ್ ಚಡಿತ್ ಅಧ್ಯಯನಾಚೊ ಗರ್ಜ್ ಆಸಾ. ಹಾಂಗಾಸರ್ ಮುಳಾವೊ ವಿಚಾರ್ ಅಪ್ಲೊ ’ಪೆಲೊ’ ಮ್ಹಳ್ಯಾರ್ ಕೊಣ್ ಮ್ಹಣೊನ್ ಶಿಕಂವ್ಚೆಂ. ಜೆಜುನ್ ಬರೊ ಸಾಮಾರಿಯಾಗಾರ್ ವೊಪಾರಿಂತ್ ಎಕಾ ಸಾಮಾರಿಯಾಗಾರಾಕ್‌ಚ್ ಕಿತ್ಯಾಕ್ ವಿಂಚ್ಲೆಂ? ಜೆರುಜಲೆಮಾ ಥಾವ್ನ್ ಜೆರಿಕೊಕ್ ವೆಚಾ ವಾಟೆರ್ ಫಕತ್ತ್ ಸಾಮಾರಿಯಾಗಾರ್ ಮಾತ್ರ್ ನ್ಹಂಯ್ ತ್ಯಾ ವಾಟೆನ್ ಜುದೆಯಾಗಾರ್, ಸಾಮಾರಿಯಾಗಾರ್, ಗಾಲೆಲಿಯಾಗಾರ್, ಇದುಮೆಯಾಗಾರ್‌ಯ್ ವೆತಾಲೆ. ಅಶೆಂ ಆಸ್ತಾಂ ಹಾಂಗಾಸರ್ ಅಖ್ಖ್ಯಾ ಪ್ಯಾಲೆಸ್ತಿನಾಂತ್ ಫಕತ್ತ್ ಸಾಮಾರಿಯಾಗಾರ್ ಮಾತ್ರ್ ಬರೆ ಮ್ಹಣೊನ್ ಜೆಜುಕ್ ದಿಸ್ಚೆಂ ಕಾರಾಣ್ ಕಿತೆಂ? ಜರೀ ಹ್ಯಾ ಸಾಮಾರಿಯಾಗಾರಾಂನಿ ಜೆಜುಕ್, ಜೆರುಜಲೆಮಾಚ್ಯಾ ವಾಟೆರ್ ಆಸ್ತಾಂ ತಿರಸ್ಕಾರ್ ಕೆಲ್ಲೊ ತರೀ! ಹ್ಯಾ ಮಿಸ್ತೆರಾಚೆಂ ನೀಜ್ ಕಾರಾಣ್ ಕಿತೆಂ?

ಹಾಕಾ ಕಾರಾಣ್ ಕಿತೆಂ ಮ್ಹಳ್ಯಾರ್ ಜೆಜು ಜುದೆವ್. ಆನಿ ಜುದೆವಾಂಕ್ ಸಾಮಾರಿಯಾಗಾರ್ ಮ್ಹಳ್ಯಾರ್ ಅಸ್ಪ್ರಶ್ಯ್. ಜುದೆವ್ ಸಾಮಾರಿಯಾಗಾರಾಂಕ್ ಕಾಂಠಾಳ್ತಾಲೆ. ತಾಂಚೆ ಮುಖಾರ್ ಜುದೆವ್ ಉಂಚ್ಲ್ಯಾಪಣಾಚಾ ಪಾಂವ್ಡ್ಯಾರ್ ಆಸ್‌ಲ್ಲೆ. ಅಶೆಂ ದೊಗಾಂಯ್ ಮಧೆಂ ಧ್ವೇಷ್ (ಸಾಮಾಜಿಕ್) ಆಸ್‌ಲ್ಲೊ. ಹ್ಯಾಚ್ಚ್ ಖಾತಿರ್ ಜೆಜು ತಾಣೆಂ ದಿಂವ್ಚಾ ಲಿಸಾಂವಾಕ್ ಸಾಮಾರಿಯಾಗಾರಾಕ್ ವಿಂಚ್ತಾ ಆನ್ ಇಜುದೆವಾಕ್ ವಿಂಚ್ತಾ. ಹ್ಯಾ ಮುಳಾವ್ಯಾ ವಿಚಾರಾಂತ್ ಕಿತ್ಲಿ ಸಕತ್ ಆಸಾ ಪಳೆಯಾ. ’ಅಸ್ಪ್ರಶ್ಯತಾ’? ತೀಯ್ ದೋನ್ ಹಜಾರ್ ವರ್ಸಾಧಿಂ? ಅಶೆಂ ಮ್ಹಣ್ತಾನಾ ಹಾಚೊ ಪ್ರಭಾವ್ ಅಂದಾಜ್ ಕರ್‍ಯೆತ್.

ಕಥಾವಸ್ತುಚಾ ಮುಳಾವ್ಯಾ ವಿಚಾರಾಂಕ್ ಆನಿ ಕಥಾವಸ್ತುನ್ ಉತಂವ್ಚಾ ವಿಚಾರಾಂಚೊ ಸಂಬಂಧ್:
’ಖಣ್’ ಕಾಣ್ಯೆಚಾ ಕಥಾವಸ್ತುಚೆ ಮುಳಾವೆ ವಿಚಾರ್ ಆನಿ ಕಾಣಿಯೆಕ್ ಉಭಾರ್‌ಲ್ಲ್ಯಾ ಥಳಾಚೆ ವಿಚಾರ್ ಕಿತ್ಲೆ ತಾಳ್ ಪಡ್ತಾತ್? ಹೆಂ ಪಳೆಂವ್ಚ್ಯಾ ಪಯ್ಲೆಂ ದೊನ್‌ಯೀ ಕಥಾವಸ್ತುಂನಿ ಉಟಂವ್ಚೊ ವಿಚಾರ್ ಪಳೆವ್ಯಾಂ;

ಕಥಾವಸ್ತುಂನಿ ಉಟಂವ್ಚೊ ವಿಚಾರ್:
’ಖಣ್’ ಕಾಣ್ಯೆಚಾಕಥಾವಸ್ತುನ್ ಉಟಂವ್ಚಾ ವಿಚಾರಾಂಕ್ ಕಥಾವಸ್ತುಚಿ ಸ್ಪಶ್ಟ್ ವಿಚಾರ್ ಮ್ಹಣೊಂಕ್ ಜಾಯ್ನಾ. ಕಿತ್ಯಾಕ್ ಮ್ಹಳ್ಯಾರ್ ತೆ ಪ್ರತ್ಯಕ್ಶ್ ರುಪಾನ್ ತ್ಯಾ ಕಂಗಾಲಾಸವೆಂ ಯಾ ತ್ಯಾ ಖಣಿಯೆಸವೆಂ (ಮಾತಾಳೆಂ ಸ್ಪಶ್ಟ್ ಕರ್ಚಾಪರಿಂ) ಯಾ ತ್ಯಾ ಖಣ್ ಖೊಂಡಯಿಲ್ಲ್ಯಾಸವೆಂ ಸಂಬಂಧ್ ಜೊಡಿನಾಂತ್. ಅಶೆಂ ಆಸ್ತಾಂ ಹ್ಯಾ ವಿಚಾರಾಂಕ್ ಬರಯ್ಣಾರ್ ಹ್ಯಾ ಕಾಣಿಯೆಂತ್ ವ್ಹಾಳಂವ್ಚಾ ಖಾತಿರ್ ತೊ ಖುದ್ದ್ ಕಾಣ್ಯೆಗಾರ್ (Narrator) ಜಾಲಾ. ಜರೀ ಕಂಗಾಲಾಕ್ ಕಥಾನಾಯಕ್ ಕೆಲಾ ತರೀ ತಾಚ್ಯಾ ವಿವರಣಾಂತ್ ತೊ ರಸ್ತ್ಯಾಕ್ ಪ್ರಮುಖ್ ಕರುನ್ ಘೆತಾ. ನ್ಹಂಯ್ ತ್ಯಾ ಕಂಗಾಲಾಕ್ ನ್ಹಂಯ್ ತ್ಯಾ ಜಾತ್ರ್ಯಾಕ್ ನ್ಹಂಯ್ ತ್ಯಾ ಖಣೀಯೆಕ್. ಅಶೆಂ ರಸ್ತ್ಯಾರ್ ಚಲೊನ್ ಯೆಂವ್ಚಾ ತ್ಯಾ ಇಕ್ರಾ ವೊರಾಂ ಉಪ್ರಾಂತ್ಲ್ಯಾ ವೆಳಾಕ್ ತೊ ಪ್ರಮುಖ್ ಕರುನ್ ಘೆತಾ. ಆನಿ ಅಪ್ಲೆ ವಿಚಾರ್ ಉಗ್ಡಾಪೆ ಕರ್ತಾ ವಿವರಣಾಧ್ವಾರಿಂ. ಹ್ಯಾ ವಿಚಾರಾಂತ್ ಪ್ರಮುಖ್ ಜಾವ್ನ್ ಸಮಾಜೆಂತ್ ಉಂಚ್ಲೆ ಯಾ ಪ್ರಮುಖ್ ಮ್ಹಣೊನ್ ಚಿಂತ್‌ಲ್ಲ್ಯಾ ಲೊಕಾಂಚೆಂ ಪೊಕೊಳ್‌ಪಣ್ ತೊ ಉಗ್ಡಾಪೆಂ ಕರ್ತಾ.

ಬಒ ಸಾಮಾರಿಯಾಗಾರ್ ವೊಪಾರಿಂತ್ ವೊಪಾರಿನ್ ಉಟಯಿಲ್ಲೊ ವಿಚಾರ್ ಸ್ಪಶ್ಟ್ ಆಸಾ, ಪಯ್ಲೆಂ ಜಾವ್ನ್ ತಿ ವೊಪಾರ್ ಶಿಕಯ್ತಾ ಆಪ್ಣಾಚೊ ಪೆಲೊ ಮಹ್ಳ್ಯಾರ್ ಕೊಣ್? ಆಪ್ಣಾಚೊ ಮೋಗ್ ಕರ್ಚೊ ಅಪ್ಣಾಚೊ ಪೆಲೊ ವಾ ಅಪ್ಣಾಕ್ ಕಾಂಠಾಳ್ಚೊ ಆಪ್ಣಾಚೊ ಪೆಲೊ?
ದುಸ್ರೆಂ ಎಕಾಮೆಕಾಚೊ ಮೊಗ್ ಕರ್ಚೆಂ ಮ್ಹಳ್ಯಾರ್ ಸಮಾಜೆಂತ್ ಸಮಾನತಾ, ಭಾವ್ ಭಾಂದವ್‌ಪಣ್, ವಾಯ್ಟ್ ಕೆಲ್ಲ್ಯಾಂಕ್ ಭಗ್ಸಾಣೆ, ಪ್ರತಿಫಳಾಚಿ ಆಶಾ ಕರಿನಾಸ್ತಾಂ ರಾಂವ್ಚೆಂ ನಿಸ್ವಾರ್ಥ್ ಸೆವಾ ಇತ್ಯಾದಿ..

ಕಥಾವಸ್ತುಚೊ ಮುಳಾವೊ ವಿಚಾರ್ ಆನಿ ಕಥಾವಸ್ತುನ್ ಉಟಯಿಲ್ಲ್ಯಾ ವಿಚಾರಾಂ ಮಧ್ಲೊ ಸಂಬಂಧ್:

’ಖಣ್’ ಕಾಣಿಯೆಂತ್ ಕಥಾವಸ್ತುಕ್ ಉಭಾರ್‌ಲ್ಲ್ಯಾ ಥಳಾಂತ್ಲ್ಯಾ ವಿಚಾರಾಂಕ್ ಆನಿ ಬರಯ್ಣಾರಾನ್ ವಿವರಣಾತ್ಮಕ್ ರಿತಿನ್ ವ್ಹಾಳಯಿಲ್ಲೆ ವಿಚಾರ್ ದೊನ್‌ಯ್ ತದ್ವಿರುದ್ದ್ ಜಾವ್ನಾಸಾತ್. ಪ್ರತ್ಯಕ್ಶ್ ರುಪಾನ್ ಸಂಬಂಧ್ ಜೊಡುಂಕ್ ಯಾ ಪ್ರಭಾವ್ ಘಾಲುಂಖ್ ತಿತ್ಲೆ ಯಶಸ್ವಿ ಜಾಂವ್ಕ್ ನಾಂತ್. ವಿಚಾರಾಂಚೆಂ ವಿವರಣ್ ರಸ್ತ್ಯಾರ್ ಉದೆತಾ ಜಾಲ್ಲ್ಯಾನ್ ಪರೋಕ್ಶ್ ರುಪಾನ್ ಸಂಬಂಧ್ ಜೊಡುಂಕ್ ಸಕ್ತಾತ್ ಜಾಲ್ಯಾರೀ ’ಬರೊ ಸಾಮಾರಿಯಾಗಾರ್’ ವೊಪಾರಿಂತ್ಲ್ಯಾ ತಿತ್ಲಿ ಯಶಸ್ವಿ ಜಾಂವ್ಕ್ ನಾಂತ್. ಅಶೆಂ ಜಾಂವ್ಕ್‌ಯೀ ಸಕ್ತೆಂ. ಅಶೆಂ ಜಾಯ್ನಾತ್‌ಲ್ಲ್ಯಾಚೆಂ ಕಾರಣ್ ದಿಂವ್ಚೆಂ ಜಾಲ್ಯಾರ್;

ಪಯ್ಲೆಂ: ಕಥಾ ವಸ್ತುಕ್ ಆನಿ ಕಥಾವಸ್ತು ಥಾವ್ನ್ ಉಟಂವ್ಚಾ ವಿಚಾರಾಂಕ್ ಬರಯ್ಣಾರಾನ್ ವೆಗ್ಳ್ಯಾಚ್ ರಿತಿನಿ ಪಳೆಲಾಂ.
ದುಸ್ರೆಂ: ಥೊಡ್ಯಾಚ್ ಆವ್ದೆಂತ್ ಕಾಣ್ಯೆಗಾರಾನ್ ಜಾಯ್ತೆ ವಿಚಾರ್ ಆರಾಂವ್ಕ್ ಪ್ರೇತನ್ ಕೆಲಾಂ.
ತಿಸ್ರೆಂ: ಬುಕಾಚೆ/ಕಾಣ್ಯೆಚೆಂ ಮಾತಾಳೆಂ ಹ್ಯಾ ವಯ್ರ್ ಚಡಿತ್ ಧ್ಯಾನ್ ದಿಲ್ಲೆಂ ನಾ. ಹ್ಯಾಚ್ ಖಾತಿರ್, ಖಣ್, ಕಂಗಾಲ್, ಕುಕ್ಕೆಹಳ್ಳಿ, ರಸ್ತೊ ಆನಿ ಜಾತ್ರೊ ಹ್ಯಾ ಸರ್ವಾಂಚೆಂ ವ್ಯಕ್ತಿ ಚಿತ್ರಣ್ ಎಕಾಮೆಕಾ ಸಂಬಂಧ್ ಜೊಡುಂಕ್ ಪಾವೊಂಕ್ ನಾಂತ್. 
ಚೊವ್ತೆಂ: ವಿಚಾರಾಂಕ್ ಸಾಂಗ್ಚ್ಯಾ ಪ್ರಮುಖ್ ಉದ್ದೇಶಾನ್ ಕಾಣ್ಯೆಗಾರಾನ್ ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಮ್ಹಳ್ಳ್ಯಾ ಸೊಭಿತ್ Concept ತೆವ್ಶಿಂ ಮಾಲ್ವೊಂವ್ಚಾಂತ್ ಗಳಾಯ್ ಕೆಲ್ಯಾ.

ಪಾಂಚ್ವೆಂ: ಕಾಣಿಯೆಚಾ ಸುರ್ವಿಲ್ಲ್ಯಾ ಹಂತಾರ್ ವ್ಹಾಳಯಿಲ್ಲ್ಯಾ ತಾಂತ್ರಿಕ್ ಶೈಲೆಕ್ ಕಾಣಿಯೆಚಾ ಮಧೆಂಚ್ ಹಾತ್ ಸೊಡ್ಲಾ. ಹಾಂಗಾಸರ್ ಕಾಣ್ಯೆಗಾರ್ ಕಂಗಾಲಾಕ್ ಆನಿ ಖಣಿಯೆಕ್ ಸೊಡುನ್ ಸಮಾಜೆಚಾ ಪೊಕೊಳ್ ಮನಾಚಾ ಮನ್ಶಾಂಚ್ಯಾ ಹಿಪೊಕ್ರೆಸಿವಯ್ರ್ ಕ್ರಾಂತಿಕಾರಿ ಜಾಲ್ಲೆಂ ಕಾರಾಣ್‌ಯ್ ಜಾವ್ಯೆತಾ. ಪುಣ್ ಅಸಲೊ ಅಮ್ಚೊರ್ ಸಾಹಿತ್ಯಾಕ್ ತಾಚಾ ಫುಡಾರಾಕ್ ತಿತ್ಲೊ ಬರೊ ನ್ಹಂಯ್.
ಸವೆಂ: ರಸ್ತ್ಯಾ ವಯ್ಲ್ಯಾ ಮಿಸ್ತೆರ್ ಆನಿ ಖಣೀಯೆಂತ್ಲೊ ಮಿಸ್ತೆರ್ ಎಕಾಮೆಕಾ ಸಂಬಂಧ್ ಜೊಡುಂಕ್ ಪಾವೊಂಕ್ ನಾಂತ್. ಹಾಂಗಾಸರ್ ಹಾಂವ್ ಚಿಂತಾಂ ಹಿಚ್ಚ್ ವ್ಹಡ್ಲಿ ಸಲ್ವಣಿ. ಬರೊ ಸಾಮಾರಿಯಾಗಾರ್ ರಸ್ತ್ಯಾ ವಯ್ಲೊ ಮಿಸ್ತೆರ್ ಅಸ್ಪಶ್ಟ್ ಆಸ್ಲ್ಯಾರ್‌ಯೀ ಖಣಿಯೆಂತ್ಲೊ ಮಿಸ್ತೆರ್ ಸ್ಪಶ್ಟ್ ಆಸ್‌ಲ್ಲ್ಯಾನ್ ದೊನಾಂಯ್ ಮಧೆಂ ಉಭ್ಜಾಲ್ಲೊ ಸಂಬಂಧ್ ಪ್ರಭಾವಿತ್ ಆಸಾ.

ಹ್ಯಾ ಸಂಗ್ರಹಾಂತ್ಲ್ಯಾ ಹೆರ್ ಕಾಣ್ಯಾಂಚೆರ್ ಮಟ್ವಿ ನದರ್:

’ಖಣ್’ ಕಾಣ್ಯೆಕ್ ಅಧ್ಯಯನಾಕ್ ಘೆತಾನಾ, ಸಗ್ಳ್ಯಾ ಕಾಣ್ಯಾಂನಿ ವ್ಹಾಳಯಿಲ್ಲ್ಯಾ ವಿಚಾರಾಂಕ್ ಅಧ್ಯಯನ್ ಕರ್ತಾನಾ ಹ್ಯಾಚ್ ಕಾಣ್ಯೆಕ್ ಪೂರಕ್ ಅಧ್ಯಯನ್ ಕಾಣಿ ಜಾವ್ನ್ ಹಾಂವ್ ’ಘಾಯ್’, ’ಜಾಂಬ್ಳಾಂಚೊ ರೂಕ್’ ಆನಿ ’ಸಕ್ಸೆಸ್ ಫಾರ್ಮುಲಾ’ ಘೆತಾಂ. ಹ್ಯಾ ತಿನ್‌ಯೀ ಕಾಣ್ಯಾಂನಿ ಕಾಣ್ಯೆಗಾರ್ ಸ್ಪಶ್ಟ್ ಕೆಲ್ಲೆ ವಿಚಾರ್, ವಿಂಚ್‌ಲ್ಲಿ ಕಥಾವಸ್ತ್ ಆನಿ ತಾಕಾ ಉಭಾರ್‌ಲ್ಲ್ಯಾ ಥಳಾಚೆ ವಿಚಾರ್ ಆನಿ ಬರಯ್ಣಾರಾನ್ ವಿವರಣ್ ದಿಂವ್ಚೆ ಸಮಾಜೆಚಾ ಸುಧಾರಾಣಾಚೆ ಕ್ರಾಂತಿಕಾರಿ ವಿಚಾರ್ ಎಕಾಮೆಕಾ ಸಂಬಂಧ್ ಜೊಡುನ್ ತೆ ಸ್ಪಶ್ಟ್ ಆಸಾತ್. ಅಶೆಂ ವ್ಹಯ್ ತರ್ ಹ್ಯಾಚ್ ಫಾರ್ಮುಲಾಕ್ ಕಾಣ್ಯೆಗಾರಾನ್ ಅಪ್ಲೆಂ ಹಾತೆರ್ ಕರುನ್ ಕಿತ್ಯಾಕ್ ಘೆಂವ್ಕ್ ನ್ಹಜೊ? ಹ್ಯಾ ಭಳಾಧಿಕ್ ಫಾರ್ಮುಲಾ ಥಾವ್ನ್ ಹ್ಯಾ ಜಮ್ಯಾಂತ್ ಅಸ್ವಾಭಾವಿಕ್ ಮ್ಹಣ್ ರುಜು ಕರ್‍ಯೆತ್ ತರ್ ’ಅದ್ರಶ್ಯ್ ಸಕತ್’ ವಿಚಾರಾಂನಿ ಆನಿ ಕಥಾವಸ್ತು ದೊನೀಂ ಅಸ್ವಾಭಾವಿಕ್. ಜರೀ ಲಿಸಾಂವ್ ದಿಂವ್ಚೊ ವಿಚಾರ್ ಚಡ್ ಭಾಳಾಧಿಕ್ ಜಾವ್ನ್ ಆಸಾ ತರೀ ’ಕುಡ್ಡೊ’ ಕಾಣಿ ವಿಚಾರಾಂತ್ ಚಡ್ ಶ್ಯಾಥಿವಂತ್ ಮ್ಹಣ್ ದಿಸ್ತಾ ಜಾಲ್ಯಾರ್‌ಯೀ ಕಥಾವಸ್ತ್ ಅಸ್ವಾಭಾವಿಕ್.

’ಗೂಂಡಾ’, ’ಗಲ್ಫಾಂತ್ಲ್ಯಾ ಕುಕ್ಕೆಹಳ್ಳಿಗಾರಾಂಚೊ ಎಕ್ತಾರ್’ ಸರ್ವ್‌ಯೀ ವಾಟಾಂನಿ ಜಿಕೊನ್ ಆಯ್ಲ್ಯಾತ್ ಆಸ್ತಾಂ ’ಏಕ್ ಕ್ರಿಕೆಟ್ ಹೀರೊ’ ವಿಭಿನ್ನ್ ಶೈಲೆರ್ ವ್ಹಾಳೊನ್ ಆಯಿಲ್ಲಿ. ಕಾಣಿಯೆಕ್ ಲಾಂಬ್ ಕರುನ್ ವಿಚಾರಾಂಕ್ ಮಟ್ವೆಂ ಕರುನ್ ಧಾಖಯ್ತಾ ಜಾಲ್ಯಾರ್‌ಯೀ, ಲಿಸಾಂವಾಂತ್ ಮಾತ್ರ್ ಅಖ್ಖ್ಯಾ ದೇಶಾಚಾ ಖಬ್ರಾಂ-ಮಾಧ್ಯಮಾಂಕ್ ಬೋಟ್ ಜೊಕ್ಚಾಂತ್ ಜಯ್ತೆವಂತ್ ಜಾಲ್ಯಾ.

ಜೆರಾಲ್ ಸಮೀಕ್ಶಾ: ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ ಕಾಣಿಯೆ ಜಮ್ಯಾಂತ್ಲಿ ಕಾಣಿ ’ಖಣ್’ ವಿಚಾರಾಂಚಾ ನದ್ರೆನ್ ಖಂಡಿತ್ ಏಕ್ ಶಾಥಿವಂತ್ ಕಾಣಿ. ವಾಚ್ಪ್ಯಾಕ್ ತಿ ಬರಿಚ್ ರುಚ್ತೆಲಿ ಆನಿ ವಿಚಾರಾಂಕ್ ಜಾಗಯ್ತೆಲಿ ಮ್ಹಳ್ಳೊ ಭರ್ವಸೊ ಆಸಾ. ಪುಣ್ ಹೊಚ್ ಭರ್ವಸೊ ಮ್ಹಾಕಾ ಫುಡಾರಾಚ್ಯಾ ಕೊಂಕಣೀ ಸಾಹಿತ್ಯಾ ವಯ್ರ್‌ಯೀ ಆಸಾ. ಅಶೆಂ ಆಸ್ತಾನಾ ಹಾವೆಂ ಫಕತ್ತ್ ಎಕಾ ಸಾಹಿತಿಚಾ ನದ್ರೆನ್ ಯಾ ಎಕಾ ವಾಚ್ಪ್ಯಾಚಾ ನದ್ರೆನ್ ಹ್ಯಾಸವೆಂ ತ್ಯಾ ಕುಕ್ಕೆಹಳ್ಳೆಸವೆಂ ಆನಿ ತ್ಯಾ ರಸ್ತ್ಯಾರ್ ಚಲೊನ್ ಆಯಿಲ್ಲ್ಯಾ ಲೊಕಾಂ ಸವೆಂ ಭರ್ಸಾಲಾಂ. ಉಲಯ್ಲಾಂ ಆನಿ ಆಯ್ಕಾಲಾಂ. ಕಿತ್ಯಾಕ್ ಮ್ಹಳ್ಯಾರ್ ಹ್ಯಾ ಕುಕ್ಕೆಹಳ್ಳೆಕ್ ಹಾಂವ್ ಮ್ಹಜೊಚ್ ಗಾಂವ್ ಮ್ಹಣೊನ್ ಚಿಂತಾಂ ಆನಿ ತೊ ಕಂಗಾಲ್ ಹಾಂವ್ಂಚ್ ಮ್ಹಣೋನ್ ಖಣಿಯೆಕ್ ದೆಂವ್ಲಾಂ.

ಅಶೆಂ ಆಸ್ತಾನಾ ಹ್ಯಾ ಖಣೀಯೆಂತ್ಲ್ಯಾ ಕಥಾವಸ್ತುಚಿ ಸೊಭಾಯ್ ವಾ ತಾಚೆಂ ಉಂಚ್ಲೆಂಪಣ್ ಭಾಶೆಚೊ ಪ್ರಯೋಗ್ ಆನಿ ತಾಚೆಂ ಜಯ್ತ್. ತಾಂತ್ರಿಕ್ ಶೈಲಿ ಆಣಿ ತಾಚಿ ವ್ಹಾಡಾವಳ್, ದಿಂವ್ಚಾ ಲಿಸಾಂವಾಚೆ ವಿಚಾರ್ ಆನಿ ತಾಚೊ ಪ್ರಭಾವ್. ಹ್ಯಾ ವಿಶ್ಯಾಂವಯ್ರ್ ಎಕಾ ಸ್ಪರ್ಧ್ಯಾಕ್ ಬಸ್‌ಲ್ಲ್ಯಾ ವೊರಾಯ್ಣಾರಾಪರಿಂ ಮ್ಹಜಿ ನದರ್ ಹಾವೆಂ ಮಾರುಂಕ್ ನಾ. ಅಶೆಂ ಕೆಲ್ಯಾರ್ ಹೆಂ ಲೇಖನ್ ಅನಿಕ್‌ಯ್ ಲಾಂಬ್ತೆಂ. ಮ್ಹಾಕಾಯ್ ಕೊಂಕಣಿಚೆಂ ಸಾಹಿತ್ಯ್ ಗ್ರೇಸ್ತ್ ಕರ್ಚೊ ಹುಸ್ಕೊ ಆಸಾ. ಪುಣ್ ತೆಂ ಮಟ್ಟ್ ಕಶೆಂ ವ್ಹಾಡಾವ್ಯೆತ್ ಮ್ಹಳ್ಳೋ ಹುಸ್ಕೊ ನಾ. ವಲ್ಲಿ ಕ್ವಾಡ್ರಸ್ ಹ್ಯಾ ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಕಥಾಜಮ್ಯಾಚೊ ಬರಯ್ಣಾರ್ ಮ್ಹಜಾ ಕಾಳ್ಜಾಕ್ ಲಾಗ್ಸಿಲೊ ಮಿತ್ರ್, ಹೆಚ್ಚ್ ಖಾತಿರ್ ತಾಚಾ ಹ್ಯಾ ಸಾಹಿತ್ಯಾಚಾ ಖಣಿಯೆಂತ್ ಭೋವ್ಶಾ ಹಾಂವ್ ಚಡ್ ಗುಂಡಾಯೆಕ್ ದೆಂವೊಂಕ್ ಸಕ್ಲೊಂ. ಫುಡಾರಾಕ್ ತಾಕಾ ಆನಿ ತಾಚಾ ಸಾಹಿತ್ಯಾಕ್ ಸರ್ವ್ ಬರೆಂ ಮಾಗ್ತಾನಾ ಮೊಗಾಳ್ ವಾಚ್ಪ್ಯಾ ತುಕಾಯ್ ದೇವ್ ಬರೆಂ ಕರುಂ ಮ್ಹಣ್ತಾಂ.

ಕಥಾಪಾಠ್ - 1. ಕಾಣಿ: ’ಖಣ್’ [ಅಭಿಪ್ರಾಯ್] - ಪ್ರಿಯಾ ಸಿಕ್ವೇರಾ ಫೆರಾರ್/ಕುವೇಯ್ಟ್

ಹಾಂವ್ ಏಕ್ ವಿಮರ್ಶಕಿ ನ್ಹಂಯ್, ಹಾವೆಂ ಮ್ಹಜಾ ಜಿಣ್ಯೆಂತ್ ಬರಯಿಲ್ಲಿ ಮಟ್ವಿ ಕಾಣಿ ಏಕ್‌ಚ್. ಪುಣ್ ಏಕ್ ವಾಚ್ಪಿಣ್ ಜಾವ್ನ್, ಜಶೆಂ ಜಾಯ್ತ್ಯಾ ಹೆರಾಂಚಾ ಕೊಂಕ್ಣಿ ಕಾಣ್ಯಾಂಕ್ ವಾಚುನ್ ಆಯ್ಲ್ಯಾಂ ತೆಚ್ಚ್‌ಪರಿಂ ’ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ’ ಬುಕಾಂತ್ಲ್ಯೊ ಕಾಣ್ಯೊ ಸಯ್ತ್ ವಾಚ್ಲ್ಯೊ ಆನಿ ತಾಂತ್ಲಿ ಏಕ್ ಕಾಣಿ ’ಖಣ್’ ಕಿತ್ಯಾಕ್‌ಗೀ ಮ್ಹಜಾ ಮತಿಕ್ ಚಡ್ ರುಚ್ಲಿ.

ಖಣ್ ಚಡಾವತ್ ಆಸ್ತಾ ರಸ್ತ್ಯಾಚಾ ದೆಗೆನ್, ಆನಿ ರೂಂದ್ ರಸ್ತ್ಯಾಚಿ ಅಶೀರ್ ವೋಣ್- ಜಾವ್ನಾಸಾ ಖಣ್! ಮ್ಹಣ್ಜೆ ಹ್ಯಾ ’ಖಣ್’ ನಾಂವಾಂತ್ ದೋನ್ ಮನೋವರ್ಗ್ ಮಿಸ್ಳಾತಾತ್ - ಏಕ್; ವಿಶಾಲ್ ಮನೋಗತ್ (ಸಾಂಕೇತಿಕ್ - ರಸ್ತೊ) ಆನಿ ದುಸ್ರಿ ಅಶೀರ್ ಮನೋಗತ್ (ಸಾಂಕೇತಿಕ್ - ಖಣ್).

’ಖಣ್’ ಕಾಣಿ ವಾಚ್ತಾನಾ ಮ್ಹಾಕಾ ವಾಂಜೆಲಾಂತ್ಲ್ಯಾ ಬರ್‍ಯಾ ಸಾಮಾರಿಯಾಗಾರಾಚಿ ವೊಪಾರ್ ಉಡಾಸಾಕ್ ಆಯ್ಲಿ. ತ್ಯಾ ವೊಪಾರಿಂತ್ ಏಕ್ ಸಾಮಾರಿಯಾಗಾರ್ ತರಿ ಆಸ್‌ಲ್ಲೊ ಘಾಯೆಲ್ಲ್ಯಾ ತ್ಯಾ ಮನ್ಶಾಕ್ ಕುಮಕ್ ಕರುಂಕ್. "ಖಣ್" ಕಾಣಿಯೆಂತ್ ತ್ಯಾ ಕಂಗಾಲಾಕ್ ಕೋಣ್ಂಚ್ ಪಾವ್ಲೊನಾ ಕುಮಕ್ ಕರುಂಕ್. ಆನಿಂ ಆಶೆಂ ಹ್ಯಾ ಕಾಣಿಯೆಚೆಂ ಅಂತ್ ಕರ್ನ್ ಹ್ಯಾ ಪ್ರಸ್ತುತ್ ಸಮಾಜೆಚೆಂ ಚಿತ್ರಣ್ ರೂಪ್ ರೂಪ್ ಪಿಂತ್ರಾಂವ್ಕ್ ಬಾಬ್ ವಲ್ಲಿ ಕ್ವಾಡ್ರಾಸ್ ಯಶಸ್ವಿ ಜಾಲಾ.

ಮನಿಸ್ ಏಕ್ ಸ್ವಾರ್ಥಿ ಜೀವಿ. ’ಆಪುಣ್ ಆಪ್ಣಾಕ್’ ಮ್ಹಳ್ಳ್ಯಾಂ ಚಿಂತ್ನಾಂನಿಂ ಜಿಯೆತಾ. ಮಾಗ್ಣೆಂ ಕರ್ತಾ, ರಜಾರ್ ಕರ್ತಾ. ಆಪ್ಲ್ಯಾ ವಿಚಾರಾಂನಿ, ಉತ್ರಾಂನಿ ತೊ ಸಾಂತ್‌ಚ್. ಪುಣ್ ಕರ್ನ್ಯಾಂನಿ ನ್ಹಂಯ್. ದುಸ್ರ್ಯಾಂಚೆಂ ಗರ್ಜೆಕ್ ಪಾಂವ್ಚೆಂ ತಿತ್ಲೆ ಮನ್ಶಾಪಣ್ ಆಮ್ಚೆಂ ಥಂಯ್ ನಾಂ. ಪಯ್ಸ್ ರಾವೊನ್ ತಾಳಿಯೊ ಪೆಟೊನ್ ಹಾಸೊಂಕ್ ಆಮಿಂ ತಯಾರ್. (ಅಶೀರ್ ಚಿಂತಾಪ್) ಆಮ್ಚಾ ಜಿಣ್ಯೆಂತ್ ಗರ್ಜೆಕ್ ಅಸ್ಚಾಂಕ್ ಪಾಂವ್ಚೆಂ ಅವ್ಕಾಸ್ ಸಭಾರ್. ಪುಣ್ ಹಾಂವ್ ಯಾ ತುಂ ಕಿತ್ಲೆ ತಯಾರ್. ಅಸಲಿಚ್ ಕಾಣಿ ಕಾಣ್ಯೆಗಾರಾನ್ ಸಭಾರ್ ದ್ರಷ್ಟಾಂತ್ ದೀವ್ನ್ ಬೋವ್ ಅರ್ಥಾಭರಿತ್ ರಿತಿನ್ ವಾಳಯ್ಲ್ಯಾ. ಹಿ ಏಕ್ ಸಾಮಾಜಿಚ್ಯಾ ನಿತಿ ನಿಯಾಮಾಂಕ್ ಅರ್ಸೊ ಧರ್ಚಿ ಕಾಣಿ.

ತಾಕಾ ಆಪ್ಲ್ಯಾ ಮಾನಾಚೆ, ಮರ್ಯಾದಿಚೆಂ, ಪಡೊನ್ ಗೆಲಾಂ ಶಿವಾಯ್ ಮನ್ಶಾಪಣ್ ಕಿತೆಂ ಮ್ಹಳ್ಳೆಂ ವಿಸರ್ಲಾ ತಶೆಂ ಭಗ್ತಾ. ಮನಿಸ್ ತೊ ಮಾಸ್ ಖಾಂವ್ದಿ, ಯಾ ಸೊರೊ ಪಿಯೆಂವ್ದಿ ತೊ ಆಪ್ಣಾ ಬರಿಚ್ಚ್ ರಗ್ತಾ ಮಾಸಾಚಿ ಕೂಡ್ ಮ್ಹಳ್ಳೆಂ ಕಿತ್ಯಾಕ್ ಸಮ್ಜಾನಾ? ಕಂಗಲಾಚೆ ವಸ್ತುರ್ ಅಸ್ತ್ ವ್ಯಸ್ತ್ ಜಾಲಾಂ, ತೊ ಕಸೊ ಪಡ್ಲಾ ಪಳೆ ಹೆಂ ಸರ್ವ್ ಗಮನಾಕ್ ವರುಂಕ್ ತ್ಯಾ ವಾಟ್ಸುರ್‍ಯಾಂಕ್ ಅಸಕ್ತ್ ಅಸಲ್ಲಿ, ಪುಣ್ ತೊ ಕಸೊ ಪಡ್ಲೊ, ಕಿತ್ಯಾ ಪಡ್ಲೊ ಮ್ಹಳ್ಳೆಂ ಕೊಣೆಂಯಿ ಚಿಂತುಂಕ್ ನಾ ಯಾ ತಾಕಾ ಕುಮೊಕ್ ಕರುಂಕ್ ಗೆಲೊನಾ. ಹೆಂ ಸದಾಂ ಆಮ್ಚೆಂ ಭಂವಾರಿಂ ಘಡೊನ್ ಆಸ್ಚೆಂ ಸತ್. ತ್ಯಾ ವಾಟ್ಸುರ್‍ಯಾನ್ ಅಖ್ರೇಚೊ ಸೊರ್‍ಯಾಚೊ ಘೊಟ್ ಕಾಡ್ನ್ ತಿ ಸಿಸ್ಲಿ ಕಂಗಲಾ ಸರ್ಶಿಂ ಉಡವ್ನ್ ಮನ್ಶಾಪಣಾಚಿಂ ಖೆಳ್ಕುಳಾಂ ಕೆಲಿಂ. 

ಮಸೀದಿಚೊ ಮುಖ್ರಿ... ಧಾರ್ಮಿಕ್ ವ್ಹಡಿಲ್. ದುಸ್ರ್ಯಾಂಚೊ ಆದರ್ಶ್. ಜಾಂವ್ದಿ ತಾಣೆಂಯ್ ಕೆಲ್ಲೆಂಯ್ ಸಮಾ ಮ್ಹಣ್ಯಾಂ. ನಾಂ ತರ್ ಕೊಣಾಚಿಗಿ ಚೂಕ್ ತಾಚಾ ಮಾತ್ಯಾರ್ ಘೆಂವ್ಕ್ ತೊ ಕಿತ್ಯಾಕ್ ತಯಾರ್. ಹ್ಯಾ ಸಂಸರಾಂತ್ ಜಿಯೆಜಾಯ್ ತರ್ ಮನ್ಶಾನ್ ಬುದ್ವಂತ್ಕಾಯೆನ್ ಜಿಯೆಜಾಯ್ ಮ್ಹಳ್ಳೆಂ ಆಮ್ಚೆಂ ಚಿಂತಾಂಪ್. ಇಸ್ಕೊಲಾಂತ್ ಭುರ್ಗ್ಯಾಂಕ್ ಬರಿ ಶಿಕವ್ಣ್ ದಿಂವ್ಚೊ ಮೆಸ್ತ್ರಿ ಕೇವಲ್ ಆಪ್ಣಾಚೆಂ ಫುಡ್ವೆಂ ಮೆಳೆಂ ಜಾತಾ, ಆಪ್ಣಾಚಿ ಮರ್ಯಾದ್ ವೆತೆಲಿ ಮ್ಹಣ್ ಚಿಂತುನ್ ಕಂಗಾಲಾಕ್ ಸೊಡ್ನ್ ಚಲ್ತಚ್ಚ್ ರಾವ್ತಾ. ದುಸ್ರ್ಯಾಂಕ್ ಶಿಕವ್ಣ್ ದೀಂವ್ಕ್ ಸುಲಭ್ ಪುಣ್ ತಿಚ್ಚ್ ಶಿಕವ್ಣ್ ಕಿತ್ಲೆ ಜಣ್ ಪಾಳ್ತಾತ್. 

ಜಾಂವ್ದಿ ತೊ ಧಾರ್ಮಿಕ್ ವ್ಹಡಿಲ್ ಯಾ ದಿವ್ಳಾಚೊ ಪುಜಾರಿ ಯಾ ಮುಖ್ರಿ, ದೆವಾಚೊ ಮೋಗ್ ತಾಚೆಂ ಥಂಯ್ ಆಸೊನ್, ದೆವಾಚಿ ಸೆವಾ ಕೆಲ್ಯಾರ್‌ಯಿ ಜರ್‌ತರ್ ತಾಚೆ ಥಂಯ್ ಹೆರಾಂಚೊ ಮೋಗ್ ನಾಂ ತರ್, ಹ್ಯೊ ಪೂರಾ ನಾಟಕ್ ಕಿತ್ಯಾಕ್ ಉಪ್ಕಾರ್ತಾ? ಹಾಂವೆಂ ಯಾ ತುಂವೆಂ ಸದಾಂ ದೆಖ್ಚೊ ಮನಿಸ್ ಅಚಾನಕ್ ಗುರಿಯೆಂತ್ ಯಾ ಖಣಿಯೆಂತ್ ಪಡ್ಲ್ಯಾರ್ ತಾಕಾ ಉಕಲ್ನ್ ವಯ್ರ್ ಹಾಡ್ನ್ ತಾಚಿ ಚಾಕ್ರಿ ಕರ್ಚಿ ಬರಿಗಿ ಯಾ ಫುಡ್ವ್ಯಾಚಿ, ಮಾನ್ ಮಾರ್ಯಾದೆಚಿ ಪರ್ವಾ ಕರ್ಚಿ ಅಧಿಕ್ ಗರ್ಜೆಚೆಂ? ಸಮಾಜೆಚಿ ಸೆವಾ ಕರ್ಚಿ ಏಕ್ ಮಾನೆಸ್ತಿಣ್ ಕಂಗಾಲಾ ಖಾತಿರ್ ತೇರ್ಸ್ ಭೆಟಯ್ತಾ. ತರ್ ತಿಚೆಂ ಸಮಾಜ್ ಸೆವಾ ಕೇವಲ್ ಭಾಯ್ಲ್ಯಾ ದೆಖಿಕ್ ಆನಿಂ ಹೆರಾಂಕ್ ದಾಕಂವ್ಕ್. ಅಸಲೆಂ ಸಬಾರ್ ದೃಷ್ಟಾಂತ್ ಆಮ್ಚೆಂ ಭಂವ್ತಿಂ ಘಡೊನ್ ಆಸಾತ್ ಆನಿಂ ಆಮಿಂ ಕೇವಲ್ ಪ್ರೇಕ್ಶಕ್. ಅಸಲೆಂ ಏಕ್ ದೃಷ್ಟಾಂತ್ ಹಾಂಗಾಸರ್ ದೀವ್ನ್ ಕಾಣ್ಯೆಗಾರಾನ್ ಹ್ಯಾ ಕಾಣಿಯೆಕ್ ಜೀವ್ ದಿಲಾ.

ನಿಜಾಯ್ಕೀ ಹಿ ಕಾಣಿ ಸತಾಚಿ ಅನ್ಯೇಕ್ ಕೂಸ್. ಅಸಲಿ ಕಾಣಿ ಸತ್ ಪಳೆವ್ನ್ ದೊಳೆ ದಾಂಪುನ್ ಚಲ್ಚಾಂ ಮನ್ಶಾಂಕ್ ಖಂಡಿತ್ ದೊಳೆ ಉಡಡುಂಕ್ ಪಾವ್ತೆಲಿ.

ಕಥಾಪಾಠ್ - 1. ಕಂಗಾಲ್ ಆನಿ ತಾಚಿ ಕುಕ್ಕೆಹಳ್ಳಿ [ಅಭಿಪ್ರಾಯ್] - ಆಸ್ಟಿನ್ ಡಿ’ಸೋಜ್ ಪ್ರಭು, ನಂತೂರ್

"ಕುಡ್ಡೊ"

’ಕುಡ್ಡೊ’ ನಿಜಾಕೀ ದೊಳೆ ಆಸೊನ್ ಹ್ಯಾ ಸಂಸಾರಾಂತ್ಲೆಂ ತೆಂ ಮ್ಹೆಳೆಂ/ಕುಸ್ಡೆಂ (ವಾಯ್ಟ್) ಪಳೆವ್ನ್ ಕಿತೆಂಚ್ ಗುಮಾನ್ ಕರಿನಾಸ್ತಾಂ ರಾವ್ಚ್ಯಾ ಮನ್ಶಾಂಕ್ ಏಕ್ ಜಾಗ್ವಣ್ ಕಶಿ ದಿತಾ.

ಕಾಣ್ಯೆಂತ್ ಸಂಸಾರಾಚಿ ಸೊಭಾಯ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳೆಂಚ್ ನೆಣಾಸ್‌ಲ್ಲೊ ’ಕಂಗಾಲ್’ ಜಲ್ಮಾ ಥಾವ್ನ್ಂಚ್ ಕುಡ್ಡೊ. ಆಪ್ಣಾಕ್ ತಿ ಸೊಭಾಯ್ ಪಳೆಂವ್ಚೊ ಅವ್ಕಾಸ್ ದೆವಾನ್ ದೀನಾಸ್‌ಲ್ಲ್ಯಾಕ್ ತೊ ಆಪ್ಲ್ಯಾ ಜೀವನಾಂತ್ ಸಂಪೂರ್ಣ್ ಕಂಗಾಲ್ ಜಾತಾ ಆನಿಂ ನಿಮಾಣೆಂ ತಪಸ್ಸ್ ಕರುನ್ ಆಪ್ಲಿ ದೀಷ್ಟ್ ಪಾಟಿಂ ಮೆಳ್ಚ್ಯಾ ಪಾಸತ್ ತಪಸ್ಸ್ ಕರ್ತಾ. ಶೆವ್ಟಿಂ ಎಕಾ ಬರ್‍ಯಾ ದಿಸಾ ತಾಕಾ ಆಪ್ಲಿ ದೀಶ್ಟ್ ಮೆಳ್‌ಲ್ಲಿ ಪಳೆವ್ನ್ ತಾಕಾ ಖಂಯ್ ನಾಸ್‌ಲ್ಲೊ ಸಂತೊಸ್ ಜಾತಾ. ತೊ ಸರ್ವೇಸ್ಪರಾಕ್ ವಾಖಣ್ತಾ ಆನಿ ಸೃಷ್ಟೆಚಿ ಸೊಭಾಯ್ ಚಾಕೊಂಕ್ ಲಾಗ್ತಾ. 

ದೀಸ್ ಪಾಶಾರ್ ಜಾತಾಂ ಜಾತಾಂ, ಕಂಗಾಲ್ ಹ್ಯಾ ಸಂಸಾರಾಂತ್ಲಿಂ ತಿಂ ಮಾರೆಕಾರ್ ದುರಂತಾಂ; ಆಪ್ಲ್ಯಾ ಜಿವ್ಯಾ ದೊಳ್ಯಾಂನಿ ಪಳೆತಾನಾ ತಾಕಾ ಹ್ಯಾ ಸಂಸಾರಾಚೊ ಕಾಂಠಾಳೊಚ್ ಯೆತಾ. ಆಪ್ಣೆಂ ಹೆಂ ಹ್ಯಾ ಜಿವ್ಯಾ ದೊಳ್ಯಾಂನಿ ಕಶೆಂ ಪಳೆಂವ್ಚೆಂ ಮ್ಹಣ್ ತೊ ರಡ್ತಾ ಆನಿ ನಿಮಾಣೆಂ ’ಅಪ್ಣಾಕ್ ದೀಶ್ಟ್ ನಾತ್ಲೆಲ್ಯಾ ವೆಳಾರ್ ಅಪ್ಣಾಕ್ ದೀಶ್ಟ್ ಮಾತ್ರ್ ನಾ ಮ್ಹಳ್ಳಿ ದೂಕ್ ಆಸ್‌ಲ್ಲಿ, ಪುಣ್ ತಿ ದೀಶ್ಟ್ ಲಾಭ್‌ಲ್ಲಿಚ್ಚ್ ಸಂಸಾರಾಚೆರ್ ಚಲ್ಚಾ ಅನೀತ್/ಅನ್ನ್ಯಾಯಾಂಕ್ ಪಳೆಂವ್ಕ್ ಸೊಸುನ್ ಜಿಯೆಂವ್ಚಿ ದೂಕ್ ಮಾರೆಕಾರ್ ಮ್ಹಣ್ ಭೊಗುನ್’ ಆಪ್ಲ್ಯಾಚ್ ದೊಳ್ಯಾಂಕ್ ಆಪುಣ್ಂಚ್ ದೀಕ್ ಘಾಲ್ನ್ ಪರತ್ ತೊ ಕುಡ್ಡೊ ಜಾತಾ. 

ಹ್ಯಾ ಭುಮಿವಯ್ಲೆಂ ತೆಂ ಕುಸಡ್‌ಪಣ್, ಚೊರಿ, ಬೇವಾರಿಸ್‌ಪಣ್, ಫಟ್ಟಿಂಗ್‌ಪಣ್ ಪಳೆವ್ನ್ ಸೊಸುಂಕ್ ತಾಂಕಾನಾಸ್‌ಲ್ಲೊ ಕಂಗಾಲ್ ಆಪುಣ್ ಪರತ್ ಹ್ಯಾ ಕಾಣ್ಯೆಂತ್ ಕುಡ್ಡೊ ಜಾತಾ ತರೀ, ವಾಚ್ಪ್ಯಾಕ್ ಏಕ್ ಸವಾಲ್ ಉದೆತಾ - ಆಪುಣ್ ಆಪ್ಣಾಕ್‌ಚ್ಚ್ ಕುಡ್ಡೊ ಕರ್ನ್ ಘೆಂವ್ಚ್ಯಾ ಬದ್ಲಾಕ್ ಜರ್ ಕಂಗಾಲ್ ಹ್ಯಾ ಸಂಸಾರಾಂತ್ಲ್ಯಾ ಕುರ್ಡೆಪಣಾ ವಿರೋಧ್ ಝುಜೊನ್ ಥೊಡಿ ಶಾಂತಿ ಹಾಡುಂಕ್ ಪ್ರಯತ್ನ್ ಕರುನ್ ರಾವ್‌ಲ್ಲೊ ತರ್, ಹ್ಯಾ ಕಾಣ್ಯೆಕ್ ಇಲ್ಲಿ ಚಡೀತ್ ಸೊಭಾಯ್ ಯೆತಿ. ಬದ್ಲಾ ಕಂಗಾಲ್ ಪುರ್ತೊ ಕಂಗಾಲ್ ಜಾವ್ನ್ ಹ್ಯಾ ಸಂಸಾರಾ ಥಾವ್ನ್ಂಚ್ ಪಯ್ಸ್ ವಚೊಂಕ್ ಪಳೆತಾ; ತೇಂಯ್ ಆಪುಣ್ ಪರತ್ ಕುಡ್ಡೊ ಜಾವ್ನ್. ಜಲ್ಮಾ ಥಾವ್ನ್ಂಚ್ ಕುಡ್ಡೊ ಜಾಲ್ಲ್ಯಾ ಕಂಗಾಲಾಕ್ ದೊಳ್ಯಾಂನಿ ಪಳೆಂವ್ಕ್ ಆಶಾ ಆಸ್‌ಲ್ಲಿ. ತಾಣೆ ಆಪ್ಣಾಕ್ ದೀಷ್ಟ್ ಮೆಳ್ಳ್ಯಾ ಉಪ್ರಾಂತ್ ಹ್ಯಾ ದಿಶ್ಟಿಚೊ ಪರಿಪೂರ್ಣ್ ಪ್ರಯೋಗ್ ಕೆಲ್ಲೊ ತರ್ ಹ್ಯಾ ಕಾಣ್ಯೆಕ್ ದುಸ್ರೆಂಚ್ ರೂಪ್ ಯೆತೆಂ.

"ಗೂಂಡಾ"

’ಗೂಂಡಾ’ ಕಾಣಿ ಮ್ಹಾಕಾ ಭೋವ್ ಪಸಂದ್ ಜಾಲಿ. ಬಡ್ಗಾ ಕನ್ನಡಾಂತ್ಲ್ಯಾ ಫಿರ್ಗಜ್ಯಾಂನಿ ಘಡ್ಚೆಂ ತೆಂ ಆಸ್‌ಲ್ಲ್ಯಾಪರಿಂಚ್ ಕಾಣ್ಯೆಗಾರಾನ್ ಹ್ಯಾ ಕಾಣ್ಯೆಂತ್ ವಿವರಿಲಾಂ. 

ಹಾಂವ್ ಮಂಗ್ಳುರಾಂತ್ಲ್ಯಾ ಬೆಂದುರ್ ಫಿರ್ಗಜೆಂತ್ ಜಲ್ಮಾಲ್ಲೊಂ ತರೀ ಹಾಂಗಾಸರ್‌ಯೀ ಘಡ್ತಾಲೆಂ ತಸೆಂಚ್. ಜೆದ್ನಾಂ ಪಯ್ಲ್ಯೆ ಪಾವ್ಟಿಂ ಹಾಂವ್ ಫಿರ್ಗಜ್ ಸಲಹಾ ಮಂಡಳೆಕ್ ವಿಂಚುನ್ ಆಯಿಲ್ಲ್ಯಾ ವೆಳಾರ್ ಹಾಂವ್ ಮಾತ್ಶೆಂ ವೆಗಿಂಚ್ ಹೊಲಾಕ್ ಪಾವ್‌ಲ್ಲೊಂ. ಥಂಯ್ಸರ್ ಆಮ್ಚೊ ಆದ್ಲೊ ಆಡಳ್ತೆದಾರ್ ಆನಿ ಪಾದ್ರ್ಯಾಬ್ ಆಸ್‌ಲ್ಲೆ. ಆಡಳ್ತೆದಾರಾನ್ ’ಹೊ ಕೋಣ್ ತರ್ನಾಟೊ?’ ಮ್ಹಣ್ ಸವಾಲ್ ವಿಚಾರ್ತಾನಾ ಪಾದ್ರ್ಯಾಬಾಚಿ ಜವಾಬ್ ತುರ್ಥಾನ್ ಆಯ್ಲಿ. "ತೋಗಿ, ತೊ ತ್ಯಾ ಬಲ್ಮಠಾಚ್ಯಾ ಟೇಯ್ಲರಾಚೊ ಪೂತ್, ಓಸ್ಟಿನ್". 

ತೆನ್ನಾಂ ಹಾಂವ್ ತೀನ್ ಕೊಂಕ್ಣಿ ಪತ್ರಾಂ ಚಲವ್ನ್ ಆಸ್‌ಲ್ಲೊಂ, ತರೀ ಹ್ಯಾ ಪಾದ್ರಿಕ್ ಮ್ಹಾಕಾ ಇಲ್ಲೆಂ ಹಿಣ್ಸುನ್ಂಚ್ ಮ್ಹಳ್ಳ್ಯಾಪರಿಂ ವಳೊಕ್ ಕರುನ್ ದೀಂವ್ಕ್ ಆಸ್‌ಲ್ಲಿ! ಹಾಂವೆ ತಕ್ಷಣ್ ಜವಾಬ್ ದಿಲಿ - "ಮ್ಹಾಕಾ ಮ್ಹಜೊ ಪಾಪ್ಪಾ ಟೇಯ್ಲರ್ ಮ್ಹಣ್ ಬೆಜಾರ್ ನಾ ಫಾದರ್; ಸಾಂಗ್‌ಲ್ಲ್ಯಾಪರಿಂ ಹಾಂವ್ ಓಸ್ಟಿನ್ ಪ್ರಭು, ಮಿತ್ರ್, ಝೆಲೊ ಆನಿ ಕಾಣಿಕ್ ಪತ್ರಾಂಚೊ ಸಂಪಾದಕ್ ತಶೆಂಚ್ ದಿಯೆಸೆಜಿಚ್ಯಾ ಕಥೊಲಿಕ್ ಯುವ ಸಂಚಲನಾಚೊ ಅಧ್ಯಕ್ಷ್, ಕೊಂಕ್ಣಿ ಭಾಶಾ ಮಂಡಳ್ ಕರ್ನಾಟಕ್ ಹಾಚೊ ಕಾರ್ಯದರ್ಶಿ ಆನಿಂ ಕೊಂಕ್ಣಿ ನಾಟಕ್ ಸಭಾ ಮಂಗ್ಳುರ್ ಹಾಚೊಯ್ ಕಾರ್ಯದರ್ಶಿ" ಅಶೆಂ ಮ್ಹಳೆಂ ಆನಿ ಆಡಾಳ್ತೆದಾರಾಸವೆಂ ಹಾತ್ ಮೆಳಯ್ಲೊ.

ವಲ್ಲಿನ್ ಹ್ಯಾ ಕಾಣ್ಯೆಂತ್ ಸಾಗ್ಚೆಪರಿಂ ’ಆಮ್ಚಿ ಕಥೊಲಿಕ್ ಸಮಾಜ್ ಯಾಜಕಾಂಚ್ಯಾ ಹಾತಾಂನಿ ಖೆಳ್ತಾ. ತೆ ಬಸ್ ಮ್ಹಣ್ತಾನಾ ಬಸ್ತಾ ಆನಿ ಊಟ್ ಮ್ಹಣ್ತಾನಾ ಉಟ್ತಾ!’ ದೆವಾಚ್ಯಾ ನಾಂವಾನ್ ಹ್ಯಾ ಮಣಿಯಾರಿಂನಿ ಕಥೊಲಿಕ್ ಸಮಾಜ್ ತಾಂಚ್ಯಾ ಮುಟಿ ಭಿತರ್ ದವರ್ಲ್ಯಾ. ಹಾಂವ್ ಸರ್ವ್‌ಯ್ ಯಾಜಕ್ ಹ್ಯಾಚ್ಚ್ ಕಾಸ್ತಾಚೆಂ ಮ್ಹಣ್ ವಾದ್ ಮಾಂಡಿನಾ. ಪುಣ್ ಸಭಾರ್ ಆಸಾತ್ ಅಸಲೆ, ಜ್ಯಾಣಿಂ ಫಿರ್ಗಜೆಂತ್ಲಿ ಸಮಾಜ್ ತಾಂಚ್ಯಾಚ್ ಫಾಯ್ದ್ಯಾಕ್ ವಾಪರ್ಲ್ಯಾ ಆನಿ ತರುಣಾಂಚೊ ತಿರಾಸ್ಕಾರ್ ಕೆಲಾ. ಯುವಜಣಾಂಚಿ ಅಭಿವೃದ್ಧಿ ಪಳೆಂವ್ಚ್ಯಾ ಬದ್ಲಾಕ್ ತಾಣಿಂ ತಾಂಚ್ಯಾಚ್ ಘರಾಚಿ, ಫಿರ್ಗಜ್ ಭವನಾಂಚಿ ಅಭಿವೃದ್ಧಿ ಕರುನ್ ಪಯ್ಶೆ ಜಮಂವ್ಕ್‌ಚ್ಚ್ ಪಳೆಲಾಂ. ಸಭಾರಾಂನಿ ತರ್ನ್ಯಾಂಚೆರ್ ಹಾತ್ ಘಾಲುನ್, ತಾಂಚೆಂ ನಿಸ್ಕಳ್ಪಣ್ ಫಾರುನ್ ಜೀವನಾಚಿ ದೆಸ್ವಾಟ್‌ಯ್ ಕೆಲ್ಯಾ. ಹ್ಯಾ ವಿಶ್ಯಾಂತ್ ಉಲಂವ್ಕ್ ತರುಣಾಂಕ್ ಅವ್ಕಾಸ್ ನಾ. ವ್ಹಡಿಲಾಂ ಲಾಗಿಂ ಸಾಂಗ್ಲ್ಯಾರ್, ತಾಂಚೆಂ ಲೇಖ್ ತೆಚ್ಚ್ ದೆವಾಕ್ ದಿತೆಲೆ, ತುಕಾ ಹೆಂ ಸರ್ವ್ ಕಿತ್ಯಾ ಮ್ಹಳ್ಳೆಂ ಉಳ್ಟೆಂ ಸವಾಲ್ ಯೆತಾ.

ಆಮ್ಚಿ ಸಮಾಜ್ ಕೆನ್ನಾಂ ಸುಧಾರ್ತೆಲಿ? ಹೆಂ ಸವಾಲ್ ವಿಚಾರ್ಚ್ಯಾ ಸರ್ವ್ ಸಮಾಜ್ ಪ್ರೇಮಿಂನಿ ಹಿ ಕಾಣಿ ದೋದೋನ್ ಪಾವ್ಟಿಂ ವಾಚುಂಕ್ ಫಾವೊ ಆನಿ ಹ್ಯಾ ಕಥೆಂತ್ಲೊ ನಾಯಕ್ ರೊನಿ ತಸಲ್ಯಾಂಕ್ ಆಪ್ಲೊ ಸಂಪೂರ್ಣ್ ಸಹಕಾರ್ ದೀಂವ್ಕ್ ಫಾವೊ. 

"ಗಲ್ಫಾಂತ್ಲ್ಯಾ ಕುಕ್ಕೆಹಳ್ಳೆಗಾರಾಂಚೊ ಎಕ್ತಾರ್"

ಹಾಕಾ ಫಕತ್ ಕಥಾ ಮ್ಹಣ್ಚ್ಯೆಪ್ರಾಸ್, ಕಥಾ ರೂಪಾಚೆಂ ವಿಮರ್ಶಾತ್ಮಕ್ ಲೇಖನ್ ಮ್ಹಳ್ಯಾರ್ ಕಾಂಯ್ ಚೂಕ್ ಜಾಂವ್ಚಿ ನಾ. 

ಕಾಣ್ಯೆಗಾರಾಕ್ ಆಪ್ಲ್ಯೆ ಸಮಾಜೆವಯ್ರ್ ಕಿತ್ಲೊ ಮೋಗ್ ಆಸಾ, ತೊ ಸಮಾಜಿಕ್ ಸುಧಾರಣ್ ಕಿತ್ಲೆಂ ಆಶೆತಾ ಆನಿಂ ಬರ್‍ಯಾ-ಖರ್‍ಯಾ ಸಂಘ್ ಸಂಸ್ಥ್ಯ್ಂಕ್ ತೊ ಆಪ್ಲೊ ಪಾಟಿಂಬೊ ದಿತಾ ಮ್ಹಳ್ಳೆಂ ಗಲ್ಫಾಂತ್ಲ್ಯಾ ಕುಕ್ಕೆಹಳ್ಳೆಗಾರಾಂಚೊ ಎಕ್ತಾರ್ ಉಕ್ಲುನ್ ದಾಖಯ್ತಾ. ಸಮಾಜೆ ಮುಖಾರ್ ಮಾತ್ಯಾರ್ ಬೃಹತ್ ಶೆಂಡೊ ಮೆಳ್ತಾ ಜಾಲ್ಯಾರ್ ಕಿತ್ಲೆಂ ಬಿಕ್ಕೊನ್‌ಯ್ ವ್ಹಡ್ಲೊ ಲೆಂಡೊ ಘಾಲ್ಚೆ ಆಮ್ಚ್ಯಾ ಸಮಾಜೆಂತ್ ಕಾಂಯ್ ಉಣೆಂ ನಾಂತ್. ತಸೆಂಚ್ ಕೋಣ್ ಎಕ್ಲೊ ಕಾಂಯ್ ಆಪ್ಲ್ಯಾ ಸಮಾಜೆಂತ್ ಬರೆಂ ಕರುಂಕ್ ಮುಖಾರ್ ಯೇವ್ನ್ ಚಿಂತ್ತಾ ಜಾಲ್ಯಾರ್ ತಾಣೆಂ ಕರ್ಚ್ಯೆ ಪ್ರಾಸ್ ಪಯ್ಲೆಂಚ್ ಆಪುಣ್ ಮೈದಾನಾರ್ ಉಡೊನ್ ಸರ್ಕಸ್ ದಾಖಯ್ತೆಲೆಯ್ ಕಾಂಯ್ ಉಣೆಂ ನಾಂತ್. 

ಹಾಂತ್ಲಿ ವಾಸ್ತವಿಕತಾ ಚಾಲು ಸಮಾಜೆಂತ್ಲೆಂ ಪ್ರಚಲಿತ್ ಘಡಿತ್ ಮುಖಾರ್ ಹಾಡ್ತಾ. ಮ್ಹಾಕಾಚ್ಚ್ ದೀ, ತಾಕ್ ದೀನಾಕಾ ಮ್ಹಣ್ಚೆಯ್ ಬರ್ಪೂರ್ ಆಸಾತ್. ಥೊಡೆ ಚಿಂತಾತ್ ಸರ್ವ್ ತಾಂಚ್ಯೊ ಬಾಯ್ಲೊ ಮ್ಹಣ್!

ಸಮಾಜಿಕ್ ಸಮಸ್ಯಾ ಉಸ್ತುನ್ ಆಪ್ಲ್ಯೆ ಲಿಖ್ಣೆ ಮುಖಾಂತ್ರ್ ಜಾಗೃತಾ ಹಾಡ್ಚ್ಯಾಂತ್ ವಲ್ಲಿ ಹೆಳ್‌ಲ್ಲೆಂ ನಾಂವ್ ಮ್ಹಣ್ಯೆತ್. ಅಶೆಂ ಕೆಲ್ಲ್ಯಾನ್ ತಾಕಾ ಅಪ್ಲೆ ಭಂವಾರಿಂ ಸಭಾರ್ ದುಸ್ಮಾನ್ ರೆಂವೊಡ್ ಘಾಲ್ತೆಲೆ ಮ್ಹಳ್ಳ್ಯಾಕ್ ದುಬಾವ್ ನಾ; ತರೀ ಆಪ್ಲ್ಯೆ ಮತಿಂತ್ ಆಸ್‌ಲ್ಲೆಂ ಆಸಾ ತಶೆಂ ಬರಂವ್ಚ್ಯಾ ಭಾರಿಚ್ ವಿರಳ್ ಲೇಖಕಾಂ ಪಯ್ಕಿ ವಲ್ಲಿಕ್ ಏಕ್ ಸ್ಥಾನ್ ಆಸಾ, ಮಾನ್ ಆಸಾ.

"ಏಕ್ ಕ್ರಿಕೆಟ್ ಹೀರೊ"

ಆಯ್ಚೊ ಸಂಸಾರ್‌ಚ್ಚ್ ತಸೊ. ಭಳ್ ಆಸ್ಲ್ಯಾರ್ ಸದ್ದಾಮ್ ಜಾವ್ಯೆತ್ ತಸೆಂಚ್ ಪಯ್ಶೆ ಆಸ್ಲ್ಯಾರ್ ಜೋರ್ಜ್ ಬುಶ್ ಜಾವ್ಯೆತ್. ಹ್ಯಾ ಸಂಸಾರಾಂತ್ಲಿ ವ್ಹಡ್ವಿಕ್ ತಾತ್ಕಾಲಿಕ್. ಆತ್ತಾಂ ಫಾಮಾದ್ ಜಾಲ್ಲೊ ಘಡ್ಯೆನ್ ತಾಕಾ ಸುಣೆಂಯ್ ಹುಂಕಿನಾ ಜಾತಾ. ತಸೆಂಚ್ ಎಕ್ಲ್ಯಾನ್ ಸಾಲಾಂತ್ ಪಾತಾಳ್ ಉದ್ಕಾಡೆ ಕೆಲೆಂ ತರೀ ತಾಣೆಂ ಝಾಲಾಂತ್ ರೊಕೆಟ್ ಸೊಡ್ಲೆಂ ಮ್ಹಣ್ತೆಲ್ಯಾಂಚೊ ಸಂಖೊಯ್ ಕಾಂಯ್ ಉಣೊ ನಾ.

ಜಸಿ ಏಕ್ ವಸ್ತ್ ಕಾಯ್ಲಿರ್ ಆಸ್ತಾಂ ಪರ್ಯಾಂತ್ ಮಾತ್ರ್ ಹುನ್‌ಗೀ ತಸೆಂಚ್ ಹ್ಯಾ ಸಮಾಜೆಂತ್ ಮಾನ್ ತಾತ್ಕಾಲಿಕ್. ಆದಿಂ ಕಿತೆಂ ಕೆಲ್ಲೆಂ ತೆಂ ಲೋಕ್ ಸಂಪೂರ್ಣ್ ವಿಸರ್ತಾ ಆನಿಂ ಆತಾಂಚ್ಯಾಂಕ್ ಮಾತ್ರ್ ತೊ ಮಾನ್ ಮೆಳ್ತಾ; ಹೆಂ ಸದಾಂಚೆಂ ಹ್ಯಾ ಸಂಸಾರಾಂತ್. ಸಾಸಾಣ್ ಮಾನ್ ಮೆಳಾಜಾಯ್ ಜಾಲ್ಯಾರ್ ತಾಣೆಂ ಏಕ್‌ಚ್ಚ್ ಸಾಂತ್ ಜಾಂವ್ಕ್ ಜಾಯ್ ವ ಫಾಮಾದ್ ರಾಜ್‌ಕಾರಣಿ ಜಾಂವ್ಕ್ ಜಾಯ್. 

ಹ್ಯಾಚ್ ಪರಿಂ ವಲ್ಲಿಚೊ ಕ್ರಿಕೆಟ್ ಹೀರೊ ತೊ ರನ್ನಾಂ ಮಾರ್ತಾನಾ ಭಾರಿಚ್ ನಾಂವಾಡ್ದಿಕ್ ಜಾತಾ ಆನಿ ಬೊಲ್ತೊಚ್ ಎಕ್ಲೊ ತಾಚ್ಯೇಪ್ರಾಸ್ ಚಡೀತ್ ರನ್ನಾಂ ಜೊಡ್ತಾನಾ ಹ್ಯಾ ಕಾಣ್ಯೆಂತ್ಲ್ಯಾ ಕಂಗಾಲಾಕ್ ಕೋಣ್ಂಚ್ ಹುಂಗಾನಾಂತ್. ಆಮ್ಚಿಂ ಮಾಧ್ಯಮಾಂ ಭಾರಿಚ್ ಚಿಲ್ಲರ್ ಜಾಲ್ಯಾಂತ್; ಥೊಡೆ ಪಾವ್ಟಿ ಖರ್‍ಯಾ ವಾವ್ರಾಕ್ ಹಾಂಗಾ ಸ್ಥಾನ್ ನಾ; ಫಕತ್ ಮಾರ್, ಚೊರಿ, ಆವ್ಘಡಾಂ, ಜೀವ್ಘಾತ್, ಝುಜಾಂ, ಉಜ್ಯಾ ಹುಲ್ಪೊಣ್ ಅಸಲ್ಯಾ ವಿನಾಶಕ್ ಸಂಗ್ತಿಂಕ್‌ಚ್ ಚಡೀತ್ ಮಹತ್ವ್ ಮೆಳ್ತಾ.

ಕಾಣ್ಯೆಗಾರಾನ್ ಆಪ್ಲ್ಯಾ ಕಾಣ್ಯೆಂತ್ ಹೆಂ ಬರೆಂಚ್ ಕರುನ್ ವಿವರಿಲಾಂ ಆನಿಂ ಹ್ಯಾ ಸಮಸ್ಯೆಚಿಂ ದಾರಾಂ ಉಗ್ತಾಯ್ಲ್ಯಾಂತ್. ಹಾಚೆ ಭಿತರ್ ವಚೊನ್ ಹಾಚೊ ಸ್ವಾದ್ ಚಾಕ್ಚೆಂ ಆಮ್ಚೆಂ ಕರ್ತವ್ಯ್ ಜಾಂವ್ ಹಿಚ್ಚ್ ಮ್ಹಜಿ ಆಶಾ.

ಕಥಾಪಾಠ್ - 1. ಕಾಣಿ: ಕುಡ್ಡೊ [ಅಭಿಪ್ರಾಯ್] - ಅಶುಂತಾ ಪಿರೇರಾ ಗಂಟಾಲ್ಕಟ್ಟೆ/ಯುಕೆ

ಕಾಣ್ಯೆಚೆಂ ನಾಂವ್ ’ಕುಡ್ಡೊ’ ಕಾಣ್ಯೆಕ್ ಭೋವ್ ಅರ್ಪುರ್ಭಾಯೆನ್ ಸೊಭ್ತಾ. ಸಗ್ಳಿ ಕಾಣಿ ಹ್ಯಾ ಸಬ್ಧಾಚೆರ್ ಉಭಿ ಕೆಲ್ಯಾ ಮ್ಹಣ್ಚಾಂತ್ ಕಸೊಲೊಚ್ಚ್ ದುಭಾವ್ ನಾ.

ಕಾಣಿಯೆಚೊ ನಾಯಕ್ ಅನಿಂ ತಾಚೆಂ ನಾಂವ್ ’ಕಂಗಾಲ್’ ವಾಚ್ಪ್ಯಾಕ್ ಕಾಣಿಯೆಂತ್ ಕಿತೆಂ ತರೀ ಸೊಧುಂಕ್ ಉರ್ಭಾ ಧಾಖಯ್ತಾ. ಇತ್ಲೆಂ ಮಾತ್ರ್ ನ್ಹಂಯ್ ಅಸ್ತಾಂ ಹಿ ಕಾಣಿ ಧಾಖಯ್ತಾ ಹಿಮಾಲಾಚೊ ಮಹತ್ವ್ ಅನಿ ಎಕಾ ಮನ್ಶಾಕ್ ಸನ್ಯಾಸಿ ಜಾಂವ್ಕ್ ಜಿಣಿಯೆಂತ್ ಕಿತೆಂ ಗರ್ಜ್? ಜಿಣಿಯೆಂತ್ ಕಿತೆಂಚ್ಚ್ ಅಸಾಧ್ಯ್ ನಾ ಕೊಣಾಕ್‌ಚ್ಚ್ ಜೊ ಕುಡ್ಡೊ ಯಾ ಥೊಂಟೊ ಯಾ ಅನಿ ಕೊಣ್.........

ಕುಡ್ಡೊ ಜಾವ್ನ್ ಅಸೊನ್ ಸಂಸಾರ್ ಪಳೆವ್ಚೆಂಖಾತಿರ್ ಇತ್ಲಿಂ ವರ್ಸಾಂ ತಪಸ್ಸ್ ಕರುನ್ ಸಂಸಾರಾಚಿ ಸೊಭಾಯ್ ಪಳೆವ್ಚೆಖಾತಿರ್ ಪಾಟಿಂ ಯೆತಾನಾ ಸಂಸಾರಾಚೆಂ ನೀಜ್ ರೂಪ್ ತಾಕಾ ಪರತ್ ಕಂಗಾಲ್ ಕರ್ತಾ. ಪುಣ್ ಹೆಂ ಅಸ್ಲೀಯತ್ ಜಾವ್ನಾಸಾ ಅನಿ ಕಾಣೆಯೆಚಾ ನಾಯಕಾನ್ ಹೆಂ ಒಪುನ್ ಘೆಂವ್ಚೆಂ ಭೋವ್ ಗರ್ಜೆಚೆಂ ಜಾವ್ನಾಸಾ.

ಹ್ಯಾ ಕಾಣಿಯೆಂತ್ ಕಂಗಾಲಾಚೆಂ ನಿರಾಸ್‌ಪಣ್ ವಾಚ್ಯಾಕ್ ಇಲ್ಲೆಶೆಂ ನಿರಾಸ್ ಕರ್ತಾ. ಜೆದ್ನಾಂ ಕುಡ್ಡೊ ಅಸ್ತಾ ಹೆಂ ಸಗ್ಳೆಂ ಭೊಗ್ಲಾ ಆನಿ ಜೆದ್ನಾಂ ದೆಕ್ಲೆಂ ನಿರಾಸ್ ಜಾವ್ಚಾ ಬದ್ಲಾಕ್ ಅಸ್ಲೀಯತ್ ಅಪ್ಣಾಯಿಲ್ಲಿ ತರ್ ಭೋವ್ಶಾ ಹಿ ಕಾಣಿ ಅನಿಕ್‌ಯ್ ಸೊಭ್ತಿ.