Konknnint Kotha Odhyoinachem Mohtv (- Shailendra Mehta)
loghukothechi tulla chodd korun ghoraporos zonelakodden kortat. Kaim panam bhitor ti ek somvsar ugddotta, songhrx ukto korta, patrancher ujvadd ghalta ani vachpeakhatir prosn soddtta. Bori kotha purai jivit, itihas ani totvoginean mutthbhor drixeamni ani zotnayen venchun kaddil'lea utramni manddtta. Sahity somikxek lagun kothechea orthachi hi ghontai vollkhupak ani tichi kodor korpak melltta.
Lekhkan ek khaxelem kothon kiteak venchun kaddlam? tatunt yeupi protima va dispi ghoddnnukanchem mhotv kitem? kotha koxi sompta? oxe prosn vachnak fokot monrizounne poros fuddem vhorun tachem rupantor sokri-i boudhdik ani kolpok somlgnotayent korta.
Sahity somikxentlean kothechi kolakusor ukti zata. Kannyentlea dor ek utrak vozon asta. Vistaran vornnon ani zaitea upkothanank porvanogi divpi kadombori poros kotha veglli. Ti sukxmotai, suchounni ani utranchi orthoveustha hancher adarun asta. Kothanok, choritrochitronn, protikovad, viddombon, protima, somvad, nodor ani kothatmok rochnnuk ekttham-i yeun bhaunik ani soundryoxastri-i porinnam' koxe toyar kortat hacher somikxa ujvadd ghalta.
Titlench mhotvachem mhonnlear sahity somikxa kothek tichea itihasik, somajik, rajki ani somskritik sondrbha bhitor sthapon kortat. Dorek kotha eka khasa kallantlean ani suvatevelean udeta. Xar, gamv, lokjinn thollantor va anik koslem-i chitronn asum , tatumlean dhorm', zat, vorg, ling, vosahotovad, osmitai, poreavoronnoxastr va zagtikikoronn hanche prosn protyokx va oprotyokx ritin disunk xoktat. Marksovadi, narivadi, ut'tor vosahotovadi, monovixlexonnatmok, poreavoronni-i somikxatmok va upvimrxik somikxatmok pod'dotimni he khol thor ukte zatat ani sahity somazaposun vegllem korpak mellna hem dakhoita.
Lekhkam khatir somikxa ek harso ani margodrxok. barikosannin vimrxik vachon kelear kuxoll lekhok vatauronn koxe toyar kortat, patranchi udrogot koxi kortat, tann koso tigoun dourotat, protikatmokotai koxe vaprotat ani xeutt koso kortat hem spoxtt zata.
Dorek yug sahity kriti vegvegolle toren vachta karonn dorek pillgi novea somajik vastovak tondd dita ani nove prosn vicharota. Doskam adim boroil'li kanni poreavoronnachi unnivo, thollantor , tontrik bodol va somskritik osmitai oxe somkalin huske ujvaddak haddum yeta. Mojkur ani vachpeam'modim somvadachem sotot nove orth kaddun somikxa sahity jivem dourota.
Arvil'lea Konknni sahiteant Edwin J.F. Dsouza-n sumar so doskanche sahityik karkirdint xombram poros chodd loghukotha boroileat. tatunt sadaronn monxanchem jivit, akankxa, songhrx, noitik duvidha hanchem chitronn kelam. Tachea kothamni vastouvadi choritrochitronn, akrxok kothon ani monxachea mansoxastrachi barikosannin somzut asa. Disoptt'tte jinnecho adar gheun to kuttumbik sombond, somajik bodol, xrodhda, mog, eksureponn, noitik songhrx hea vixeancher sonxodhon korta. Tachem gody suspoxtt ani sulobh asun, chodd korun soumy vinod, viddombon ani bhaunik ub hamnni somridhd kel'lem asa.
Dr.Chandralekha Dsouza, Dr.Reshma A Kholkar ani Bab Dharma Chodankar hannim kothapatthant sador kel'lea proptrantolean hatuntole borech ayam' ukte zatat. Tinuy proptram tachea kothamvixinchim somzut vaddoita.
Ho obheas sahiteachea videartheam khatir bhovo mhotvacho. Hatuntlean vimrxik vichar zata. Videartheank kothanoka bhair vochun vixoi, protikovad, kothon tontr, choritrochitronn, bhas, vicharosoronni ani itihasik sondrbh hanchi topasonni korunk melltta. Kothent fokot kitem ghoddtta tem vicharoche poros ti eke khaxele pod'dotin kiteak boroilea oxem vicharopak te xiktat. Videartheank somikxeuyolim pustokam, nemalleanche lekh, gronthsongroh, ul'lekh pod'dot ani xikxonnik ddettabes hanchi vollokh zata. Mhaiti axil'li ttika ani adar naxil'lim motam hancho bhed xikum yeta.
Podvyut'tor obheas, xikoup va sahity somikxa korpacho het axil'lea videartheam khatir proptr sadrikoronn vidvan choukoxichea pod'dotincho ani mankancho porichoi mhunn kam' korta.
Shailendra Mehta
Sompadok, Varnamudra
