ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ಏಕ್
ಜಿವಿತ್ ತುಕಾ ಆಪಯ್ತಾ
ಆವಸ್ವರ್ ಇಕ್ರಾ: ಮಿಶೇಲ್
"ಮಿಶೇಲ್...?"
"ಹುಂ......!"
"ಏಕ್ ವಿಶಯ್ ಸಾಂಗೊಂ ತುಕಾ...?"
"ಕಿತೆಂ.........?"
"ತುಂ ಮಸ್ತ್ ಸೊಭಿತ್! ವೆರ್ರಿ ಪ್ರಿಟಿ ಲೈಕ್.... ಲೈಕ್ ಎ ಪ್ರಿನ್ಸೆಸ್!"
ರಾಯನಾಚಿಂ ಉತ್ರಾಂ ಆಪ್ಲ್ಯಾ ಮಾತ್ಯಾ ವಯ್ರ್ ಕಳ್ಯಾಂಚೊ ಶಿಂವೊರ್ ವೊತ್ತಾತ್ ತಶೆಂ ಮಿಶೇಲಾಕ್ ಭೊಗ್ಲೆಂ. ತ್ಯಾ ಉತ್ರಾಂಕ್ ತೆಂ ಪರ್ತ್ಯಾಕ್ ಪರ್ತ್ಯಾಕ್ ಆಯ್ಕೊಂಕ್ ಆಶೆಲೆಂ. ಮತಿಂತ್ಲ್ಯಾ ಆಶೆಕ್ ರಾಯನಾ ಮುಕಾರ್ ಉಗ್ತ್ಯಾನ್ ಪಾಚಾರುಂಕ್ ಮಿಶೇಲಾಚಾ ಪೊಲ್ಯಾಂನಿ ಫುಲೊನ್ ರಾವ್ಲೆಲ್ಯಾ ಲಜೆಕ್ ಸಾದ್ಯ್ ಜಾಲೆಂ ನಾ. ಪುಣ್ ಲಜೆಕ್ ಸಾಂಡ್ಲೆಲ್ಯಾ ತಾಚ್ಯಾ ಮತಿನ್ ಆಪ್ಲ್ಯಾ ಆಂಗ್ಣಾಂತ್ ತ್ಯಾ ರಾಯನಾಚಾ ಮೊವಾಳ್ ಉತ್ರಾಂಚಿ ಆಶಾ ಕೆಲ್ಲಿ. ರಾಯನಾನ್ ಉಚಾರ್ಲೆಲ್ಯಾ ಉತ್ರಾಂ ಸವೆಂ ಮಿಶೇಲ್ ತಾಚ್ಯಾ ಹ್ಯಾ ಪ್ರಸ್ತುತ್ ಸಂಸಾರಾಕ್ ಸೊಡುನ್ ಮೊಗಾಚಾ ಸಂಸಾರಾಂತ್ ಉಪ್ಯೆಂವ್ಕ್ ಲಾಗ್ಲ್ಲೆಂ.
ರಾಯನಾಚೊ ಉಭಾಳ್ ಶ್ವಾಸ್ ಮಿಶೇಲಾಚಾ ಪೊಲ್ಯಾಂಚಿ ತಾಂಬ್ಸಾಣ್ ಚಡವ್ನ್ ರಂಗ್ ಬದ್ಲುಂಚ್ಯಾ ತ್ಯಾ ಪೊಲ್ಯಾಂನಿ ಮಿಶೇಲಾಚಾ ಮಧುರ್ ಸಪ್ಣಾಂಕ್ ರಂಗಯ್ತಾಲೊ. ಕಿತ್ಲೊ ಸೊಭಿತ್! ರಾಯನಾ ಸಂಗಿಂ ಆಪ್ಣಾಚೊ ಸಂಸಾರ್ ಮಸ್ತ್ ಸೊಭಿತ್! ಫಕತ್ತ್ ಹಾಂವ್ ಆನಿ ರಾಯನ್! ತ್ಯಾ ಭಂಧ್ ಕುಡಾಂತ್, ಮುಕ್ಲ್ಯಾ ವೊಣ್ತಿಕ್ ಉಭೊ ಆಸ್ಲ್ಲ್ಯಾ ವಾರ್ಡ್ರೊಬಾಚ್ಯಾ ಡ್ರೆಸ್ಸಿಂಗ್ ಟೇಬಲಾ ವಯ್ಲ್ಯಾ ರೂಂದ್ ಉಭಾರ್ ಆರ್ಶ್ಯಾಂತ್ ಮಿಶೇಲ್ ಆಪ್ಣಾಕ್ಚ್ ರಾಯನಾ ಸವೆಂ ಪಳೆತಾಲೆಂ.
ಪಾಟಿಂ ಉಗಯಿಲ್ಲೆ ಮಿಶೇಲಾಚ್ಯಾ ಮಾತ್ಯಾಚೆ ಕೇಸ್ ಮುಕಾರ್ ಪೊಲ್ಯಾಂ ವಯ್ಲ್ಯಾನ್ ಗಳೊನ್ ತೆ ತಾಚ್ಯಾ ಹರ್ಧ್ಯಾರ್ ರಾವ್ಲ್ಲೆ. ತ್ಯಾ ಕೆಸಾಂಕ್ ಮೊವಾಳಾಯೆನ್ ಆಪ್ಲ್ಯಾ ಹಾತಿಂ ಧರ್ಲ್ಲ್ಯಾ ರಾಯನಾನ್ ತಶೆಂಚ್ ತ್ಯಾ ಕೆಸಾಂಕ್ ಮಿಶೇಲಾಚಾ ಪಾಟಿರ್ ಬಸಯ್ಲೆ. ತ್ಯಾ ಕೆಸಾಂಕ್ ಪಾಟಿಂ ಕರ್ತಾನಾ ರಾಯನಾಚೊ ಹಾತ್ ಮಿಶೆಲಾಚಾ ಗೊಮ್ಟೆಕ್ ಪೊಶೆವ್ನ್ ಗೆಲ್ಲೊ. ರಾಯನಾಚೊ ಹಾತ್ ತಾಚ್ಯಾ ಪೊಲ್ಯಾಂಕ್ ಆಶೆಂ ಪೊಶೆವ್ನ್ ವೆತಾನಾ ಎಕಾ ಥರಾಚಿ ಎಕ್ ವೀಜ಼್ ಸಕತ್ ಆಪ್ಲ್ಯಾ ಕಾಳ್ಜಾಂತ್ ಧಾಂವ್ಲ್ಲ್ಯಾ ಪರಿಂ ಜಾವ್ನ್ ಸವ್ಕಾಸ್ ದೊಳೆ ದಾಂಪ್ಲ್ಲೆಂ ಮಿಶೇಲ್ ಸಂಸಾರಾಕ್ ವಿಸ್ರಾಲೆಂ.
"ಹ್ಯಾ ಸಂಸಾರಾಂತ್ಲೆಂ ಸಗ್ಳೆಂ ಭಾಂಗಾರ್ ತುಜೆ ಕೇಸ್ಚ್ ಜಾಲ್ಲೆ ಜಾಲ್ಯಾರ್.....?" ಮಿಶೇಲಾಚಾ ಕಾನಿಂ ವ್ಹಳೂ ರಾಯನ್ ಪುಸ್ಪುಸ್ಲೊ.
"ಜಾಲ್ಲೆ ಜಾಲ್ಯಾರ್.....?" ಲಜೆನ್ ದೊಡ್ಲ್ಲೆಂ ಮಿಶೇಲ್ ಕಾಳ್ಜಾ ಭಿತರ್ಚ್ ಉಲಯ್ಲೆಂ.
"ಹ್ಯಾ ತುಜ್ಯಾ ಮಾತ್ಯಾರ್ ತಾಂಕಾ ಸೊಭವ್ನ್ ತಾಂಚಾ ಸಾವ್ಳೆ ಪಂದಾ ತುಜ್ಯಾ ಉಸ್ಕ್ಯಾರ್ ನಿದೊನ್ ಸಾಸ್ಣಾಚೊ ವಿಶೆವ್ ಘೆತೊಂ!"
ರಾಯನಾಚಿಂ ಉತ್ರಾಂ ಆಪ್ಲ್ಯಾ ಕಾನಾಂಕ್ ಪಡ್ತಾನಾ ಖಂಯ್ಚರ್ಗೀ ಪಯ್ಶಿಲ್ಯಾ ದೆವಾಳಾಚ್ಯೊ ಘಾಂಟಿ ವ್ಹಾಜೊನ್, ತ್ಯಾ ಘಾಂಟಿಂಚಾ ನಾದಾಂತ್ ಸಗ್ಳಿ ಪೃಥ್ವಿಚ್ ಪವಿತ್ರ್ ಜಾಲ್ಲ್ಯಾ ಪರಿಂ ಜಾವ್ನ್ ತ್ಯಾ ಉಟೊನ್ ಯೆಂವ್ಚ್ಯಾ ಅಗರಬತ್ತಿಚ್ಯಾ ಸುವಾಧಾಂತ್ ಮತ್, ಅತ್ಮೊ ಆನಿ ಕೂಡ್ ಪ್ರಶಾಂತ್ ಜಾವ್ನ್ ಆಪುಣ್ ಹ್ಯಾ ಸೃಶ್ಟೆಕ್ ಸೊಡುನ್ ವಾರ್ಯಾರ್ ಉಭ್ತಾಂ ತಶೆಂ ಮಿಶೇಲಾಕ್ ಜಾಲೆಂ.
ಶಾಂತ್.....!
ಸಗ್ಳೆಂಚ್ ಪ್ರಶಾಂತ್....!!
ತೃಪ್ತೆಕ್ ಪ್ರಾಪ್ತ್ ಕೆಲ್ಲ್ಯಾ ಭಾಶೆನ್....!!!
ಹ್ಯಾ ತೃಪ್ತೆ ಮಧೆಂಚ್ ದೊಳ್ಯಾಂಚಾ ದಿಶ್ಟೆ ಥಾವ್ನ್ ಭಂಧ್ಮುಕ್ತ್ ಜಾಲ್ಲೆ ವಿವಿಧ್ ರಂಗ್ ವಾರ್ಯಾರ್ ಉಭೊನ್ ಆಪ್ಣಾ ಭೊಂವಾರಿ ಏಕ್ ರಂಗ್ ರಂಗೀನ್ ಸಂಸಾರ್ ರಚುನ್ ತ್ಯಾ ಸಂಸಾರಾಂತ್ ಉಭ್ಚ್ಯಾ ಲ್ಹಾನ್ ಲ್ಹಾನ್ ಸಪ್ಣಾಂಕ್ ಪಳವ್ನ್ ಸಂತೊಸಾನ್ ಉಭೊನ್ ಯೆಂವ್ಚೆಂ ರಾಯ್ ಕುಂವರಿ ಮಿಶೇಲ್!
ಮಿಶೇಲಾಕ್ ಆಪ್ಲೊ ಸಂಸಾರ್ ಖುದ್ದ್ ಆಪ್ಲ್ಯಾ ದೊಳ್ಯಾಂಕ್ ದಿಸ್ತಾಲೊ. ತೆಂ ಮಸ್ತ್ ಖುಶ್ ಜಾಲ್ಲೆಂ! ತಾಚ್ಯ್ ಜಿಬೆರ್ ಥಾವ್ನ್ ಉತ್ರಾಂ ಸುಟಾನಾತ್ಲ್ಲಿಂ.
"ಮಿಶೇಲ್.....?" ರಾಯನಾಚೊ ತೊಚ್ಚ್ ಮಧುರ್ ತಾಳೊ.
"ಹುಂ......!" ಮಿಶೇಲ್ ಕಸಲ್ಯಾಗೀ ಉನ್ಮಾದಾನ್ ಮ್ಹಳ್ಳ್ಯಾಪರಿಂ ಪಿಂರ್ಗಾಲೆಂ.
"ಕಾಂಯ್ ಉಲಯ್ನಾಂಯ್......?"
ರಾಯನಾಚಾ ಸವಾಲಾಕ್ ತೆಂ ವೋಂಟ್ಭರ್ ಹಾಸ್ಲೆಂ ಮಾತ್ರ್ ಶಿವಾಯ್ ತೆಂ ಕಾಂಯ್ ಉಲಯ್ಲೆಂ ನಾ. ತೆಂ ಉಲಯ್ತೆಲೆಂ ಜಾಲ್ಯಾರ್ಯ್ ಕಿತೆಂ? ಮಿಶೇಲಾಕ್ ತಾಚಿಂ ಸಗ್ಳಿಂ ಸಪ್ಣಾಂ ಸತ್ ಜಾಲ್ಲ್ಯಾ ಪರಿಂ ದಿಸ್ತಾಲೆಂ.
ತೆಂ ಹ್ಯಾಚ್ ದಿಸಾಕ್ ರಾಕೊನ್ ಆಸ್ಲ್ಲೆಂ.
ಸಂಸಾರಾಂತ್ಲ್ಯಾ ಸರ್ವ್ ಚಿಂತ್ನಾಂ ಥಾವ್ನ್ ಪಯ್ಸ್...... ಚಡ್ ಪಯ್ಸ್...... ಆಪ್ಲ್ಯಾಚ್ ಸಂಸಾರಾಂತ್..... ಹ್ಯಾ ತೆಂ ಜಲ್ಮಾಲ್ಲ್ಯಾ ಸಂಸಾರಾಕ್ ವಿಸ್ರೊಂಕ್ ಆಶೆತಾಲೆಂ.
ರಾಯನಾನ್ ಮಿಶೆಲಾಚಾ ಜಿವಿತಾಂತ್ ಹ್ಯಾ ದಿಸಾಕ್ ಉದೆಂವ್ಚ್ಯಾ ಪರಿಂ ಕೆಲ್ಲೆಂ. ಆನಿಂ ರಾಯನಾ ವರ್ವಿಂಚ್ ಆಜ್ ಸಗ್ಳೆಂ ಜ್ಯಾರಿ ಜಾತಾ ತಶೆಂ ತಾಕಾ ಭೊಗ್ಲೆಂ.
ಮಿಶೇಲಾಕ್, ಆಪ್ಣೆಂ ಆಶೆಲ್ಲೊ ದೀಸ್ ಹೊಚ್ಚ್ ಮ್ಹಳ್ಳ್ಯಾ ಪರಿಂ ಜಾಲೆಂ!
"ಮಿಶೇಲ್.....! ಇತ್ಲೆಂಯ್ ಲಜೆನಾಕಾ ಡಾರ್ಲಿಂಗ್!"
ಆಪ್ಣಾಕ್ ತೆಂಕೊನ್ ಆಪ್ಣಾಚ್ಯಾ ಪಾಟ್ಲ್ಯಾನ್ ರಾವ್ಲೆಲ್ಯಾ ರಾಯನಾನ್ ಮಿಶೇಲಾಚಾ ಖಾಂದಾರ್ ಆಪ್ಲಿ ತಕ್ಲಿ ದವರುನ್ ವ್ಹಳೂ ಆಪ್ಲ್ಯಾ ಗಾಲಾಂಕ್ ಮಿಶೇಲಾಚಾ ಪೊಲ್ಯಾಂಕ್ ಚಿಡ್ಕಾವ್ನ್ ಧರ್ತಾನಾ ತ್ಯಾ ಗಾಲಾ ಆನಿ ಪೊಲ್ಯಾ ಮಧೆಂ ಶಿರ್ಕಾಲ್ಲೆ ತೆ ಮಿಶೇಲಾಚೆ ಪಾತಳ್ ಕೇಸ್ ದೋನ್ ಜಿವಾಂಚಾ ಊಭೆ ಮದ್ಲ್ಯಾ ನಾಜೂಕ್ ಸ್ಪಂದನಾಕ್ ರಸ್ಮಾಚಿ ಮೊವಾಳಾಯ್ ದೀವ್ನ್ ಆಪ್ಣಾಕ್ ಸರ್ಗಾಚ್ಯಾ ದಾರಾಕ್ ಲೊಟುನ್ ವರ್ತಾತ್ ತಶೆಂ ಮಿಶೇಲಾಕ್ ದಿಸ್ಲೆಂ. ತ್ಯಾ ವಯ್ರ್ ಪಯ್ಲೆ ಪಾವ್ಟಿಂ ರಾಯನಾಚಾ ತೊಂಡಾ ಥಾವ್ನ್ ’ಡಾರ್ಲಿಂಗ್’ ಮ್ಹಳ್ಳೊ ಸಬ್ದ್ ಆಯ್ಕೊನ್ ಪರ್ತ್ಯಾಕ್ ಪರ್ತ್ಯಾಕ್ ತ್ಯಾಚ್ ಸಬ್ದಾಕ್ ಆಯ್ಕೊಂವ್ಕ್ ತಾಚೆಂ ಮನ್ ಆಶೆಲೆಂ.
"ಜಾಣಾಯ್ ಮಿಶೇಲ್? ...... ಆಜ್ ತುಂ ಕಿತ್ಲೆಂ ಸೊಭಿತ್ ದಿಸ್ತಾಯ್ ತೆಂ?"
ವ್ಹಯ್! ಮಿಶೇಲಾನ್ ಆತಾಂ ಆಪ್ಣಾಕ್ಚ್ ತ್ಯಾ ಆರ್ಶ್ಯಾಂತ್ ಪಳೆಲೆಂ.
’ಎಕಾ ಚಲಿಯೆನ್ ಎಕಾ ಚಲಿಯೆಚಿ ಸೊಭಾಯ್ ವರ್ಣುಂಕ್ ಸಾದ್ಯ್? ತೆಂಯ್ ಮ್ಹಜಿಚ್ ಸೊಭಾಯ್ ಹಾವೆಂ.......?’ ಮಿಶೇಲಾನ್ ಚಿಂತ್ಲೆಂ ಜಾಲ್ಯಾರ್ಯ್ ಹರ್ಶೆಂಚಾ ಮಿಶೇಲಾಕ್ ಸರಿ ಕರ್ತಾನಾ ತಾಕಾಚ್ ಆಜ್ ತೆಂ ಕಿತ್ಯಾಕ್ಗೀ ಚಡ್ಚ್ ಸೊಭಿತ್ ಮ್ಹಳ್ಳ್ಯಾಪರಿಂ ದಿಸ್ಲೆಂ.
"ಹೊ ಹಾರ್ ತುಕಾ ಪಸಂದ್ ಜಾಲೊ......?"
"ಹಾರ್....!?"
ರಾಯಾನಚಿಂ ಮೊಗಾಳ್ ಉತ್ರಾಂನಿ ಕಾನಾಂತ್ ಪುಸ್ಪುಸ್ತಾನಾ, ಮಿಶೆಲಾನ್ ಆಪ್ಲ್ಯಾ ಗಳ್ಯಾ ವಯ್ರ್ ಆಪ್ಲೊ ಹಾತ್ ಚರಯ್ಲೊ. ತ್ಯಾ ತಾಚ್ಯಾ ಮೊವಾಳ್ ಭಾರೀಕ್ ಬೊಟಾಂಕ್, ತ್ಯಾ ತಾಚ್ಯಾ ಗಳ್ಯಾರ್ ಥೊಡ್ಯಾಚ್ ವೆಳಾ ಪಯ್ಲೆಂ ರಾಯನಾನ್ ಖುದ್ದ್ ನ್ಹೆಸಯಿಲ್ಲೊ ಭಾಂಗಾರಾಚೊ ಹಾರ್ ಆದಾಳ್ಳೊ.
ಸೊಭಿತ್ ಹಾರ್!
ಡ್ರೆಸ್ಸಿಂಗ್ ಟೇಬಲಾಚಾ ಲೈಟಾಚಾ ಉಜ್ವಾಡಾಂತ್ ಮಿಶೇಲಾಚಾ ಗಳ್ಯಾಂತ್ಲೊ ಹಾರ್ ಸಾಂಜೆಚಾ ಸುರ್ಯಾ ಪರಿಂ ಉಜ್ವಳ್ತಾಲೊ. ತ್ಯಾ ಹಾರಾಚಾ ಪೆಂಡೆಂಟಾ ವಯ್ರ್ ಚಿಡ್ಕಾಯಿಲ್ಲಿಂ ಭಾರೀಕ್ ಡೈಮಂಡಾಂ ತ್ಯಾ ಹಾರಾಚಾ ಉಜ್ವಳಾಕ್ ಆನಿ ಲೈಟಾಚಾ ಉಜ್ವಾಡಾಕ್ ಘೆವ್ನ್ ತಾಂಚೆ ಥಾವ್ನ್ ಭಾಯ್ರ್ ಯೆಂವ್ಚ್ಯಾ ತ್ಯಾ ನಿಳ್ಶ್ಯಾ ಪಾಚ್ವ್ಯಾ ಬಣಾಚಾ ಉಜ್ವಾಡಾಕ್ ಡ್ರೆಸ್ಸಿಂಗ್ ಟೆಬಲಾಚಾ ವಯ್ಲ್ಯಾ ಆರ್ಶ್ಯಾಂತ್ ಪ್ರಚಲಿತ್ ಜಾತಾನಾ ಮಿಶೇಲಾಕ್ ನಿಜಾಯ್ಕ್ಯ್ ತೊ ಹಾರ್ ಮಸ್ತ್ ಪಸಂದ್ ಜಾಲೊ.
"ತುಜೆಂ ಚಾಯ್ಸ್ ಮಸ್ತ್ ಬರೆಂ ಆಸಾ!" ಖುಶಿಯೆಚಾ ಆಮಾಲಾರ್ ಮಿಶೇಲ್ ತ್ಯಾ ಹಿಂದ್ಳ್ಯಾರ್ ಧಲ್ಚ್ಯಾಪರಿಂ ಧಲೊಂಕ್ ಲಾಗ್ಲೆಂ.
ಚಲಿ ಆನಿ ಶ್ರಂಗಾರ್! ಹ್ಯಾ ದೊನಾಂ ಮಧೆಂ ಜಲ್ಮಾ ಜಲ್ಮಾಚೊ ಸಂಭಂಧ್ ಆಸಾ. ಶ್ರಂಗಾರಾ ವಿಣೆ ಚಲಿ ಕೆದ್ನಾಯ್ ಅಧುರಿ! ಆನಿ ಚಲಿಯೆವಿಣೆ ಶ್ರಂಗಾರ್ ಕೆದ್ನಾಂಯ್ ಅಧುರೆಂ! ತಶೆಂಚ್ ಆಜ್!
"ಹಾಂವ್ ಬರೊಂ ನಾ?"
ಮಿಶೇಲ್ ರಾಯನಾಕ್ ತ್ಯಾ ತಾಚ್ಯಾ ಮುಕ್ಲ್ಯಾ ಆರ್ಶ್ಯಾಂತ್ ಪಳೆತಾಲೆಂ.
"ತುಂ.....?"
ರಾಯನಾಕ್ ಕೊಣಾಯ್ಕ್ಯ್ ಸರಿ ಕರುಂಕ್ ಮಿಶೇಲಾಕ್ ಜಾಲೆಂ ನಾ.
"ತುವೆಂ ಜವಾಬ್ ದೀಂವ್ಕ್ ನಾಂಯ್!"
ಮಿಶೇಲಾಚಿ ಮೌನತಾ ಪಳವ್ನ್ ರಾಯನಾನ್ ಮಿಶೇಲಾಕ್ ಆಪ್ಣಾ ತೆಂವ್ಶಿ ಭಳಾನ್ ವೊಡುನ್ ಧರ್ಲೆಂ. ಮಿಶೇಲಾನ್ ಉಲಂವ್ಕ್ ಜಾಯ್ ಮ್ಹಳ್ಳೆಂ ತೊ ಆಶೆತಾಲೊ.
"ಕಸಲಿ ಜವಾಬ್?"
"ತೆಂಚ್! ಹಾಂವ್ ತುಕಾ ಬರೊ ಲಾಗ್ತಾಂ?"
"ಹಾಂತುಂ ಆನಿ ಸಾಂಗೊಂಕ್ ಕಿತೆಂ ಆಸಾ?"
"ತುಜ್ಯಾ ತೊಂಡಾ ಥಾವ್ನ್ ಆಯ್ಕೊಂಕ್ ಆಶಾ ಜಾಲ್ಯಾ!" ರಾಯನಾನ್ ತಶೆಂಚ್ ಆಲಿಯಾಚಾ ಪೊಲ್ಯಾಕ್ ಆಪ್ಲ್ಯಾ ಗಾಲಾನ್ಚ್ ಪೊಶೆಲೆಂ.
ಎಕಾ ಖಿಣಾಕ್ ಮಿಶೇಲಾಚಾ ಆಂಗಾಂತ್ ಭಾರೀಕ್ ಜಗ್ಲಾಣೆಂ ಉಟೊನ್ ತೆಂ ತಾಚ್ಯಾ ಶಿರಾಂ ಶಿರಾಂಕ್ ಸೊಧುನ್ ಧಾಂವ್ತಾ ತಶೆಂ ಜಾಲೆಂ. ವ್ಹಳೂ ತಾಣೆ ಆಪ್ಲೆ ದೊಳೆ ದಾಂಪ್ಲೆ.
ದಾಂಪ್ಲೆಲ್ಯಾ ದೊಳ್ಯಾಂಕ್ ಕಾಂಯ್ಚ್ ದಿಸಾನಾತ್ಲ್ಲೆಂ! ಪುಣ್ ಮಿಶೇಲಾಕ್ ಸಗ್ಳೆಂ ರೂಪ್ ರೂಪ್ ದಿಸ್ತಾಲೆಂ! ದೊಳ್ಯಾಂಕ್ ದೀಶ್ಟ್ ನಾ....! ಪುಣ್ ಮಿಶೇಲಾಕ್ ದೀಶ್ಟ್ ಆಸ್ಲ್ಲಿ. ತೆಂ ತಶೆಂಚ್ ಪಳವ್ನ್ ರಾವ್ಲೆಂ.
"ಸತ್ ಸಾಂಗೊಂ?" ಥೊಡ್ಯಾ ವೆಳಾಚಾ ದೊಗಾಂಯ್ಚಾ ಮೌನಾ ಉಪ್ರಾಂತ್ ರಾಯನ್ಚ್ ಉಲಯ್ಲೊ. "ಸತ್ ಸಾಂಗ್ಚೆಂ ಜಾಲ್ಯಾರ್ ಹ್ಯಾ ದೊಳ್ಯಾಂಕ್ ಆಜ್ ಪಾಸೊನ್ ತುಜ್ಯೆ ತಸಲೆಂ ಕೊಣ್ಯ್ ಭೆಟೊಂಕ್ ನಾಂತ್!"
ಮಿಶೇಲ್ ಆತಾಂ ತ್ಯಾ ಮೊಳಾಬಾರ್ ಉಭೊಂಕ್ ಲಾಗ್ಲೆಂ.
ಆಪ್ಲ್ಯಾ ಮತಿಂತ್ಲ್ಯಾ ತ್ಯಾ ರಂಗ್ ರಂಗೀನ್ ನಮುನ್ಯಾವಾರ್ ಬಣಾ ಮಧೆಂ ತೆಂ ಉಪ್ಯೆಂವ್ಕ್ ಲಾಗ್ಲೆಂ.
ರಾಯ್ ಕುಂವರಿಚಾ ನೆಸ್ಣಾರ್ ತೆಂ ವ್ಹಳೂ ವ್ಹಳೂ ತಾಚ್ಯಾ ಪಾಟಾರ್ ಚಡೊಂಕ್ ಲಾಗ್ಲೆಂ.
"ಮಿಶೇಲ್...!" ಮಿಶೇಲ್ ಕಾಂಯ್ ಉಲಂವ್ಕ್ ನಾ ತೆಂ ಪಳವ್ನ್ ರಾಯನ್ ವ್ಹಳೂ ಪಿಂರ್ಗಾಲೊ.
"ತ್ಯಾ ಬಾಲಿವುಡಾಂತ್ಯ್.....?" ಮಿಶೇಲಾನ್ ದೊಳೆ ದಾಂಪ್ಲ್ಲೆ. ತೆಂ ರಾಯನಾಚಾ ಸಂಸಾರಾಂತ್ ಆಸ್ಲ್ಲೆಂ.
"ಬಾಲಿವುಡಾಂತ್....? ಬಾಲಿವುಡಾಂತ್ ಹಾಂವ್ ಫಕತ್ತ್ ಬಿಜ್ನೆಸ್ಮ್ಯಾನ್!"
"ಆನಿ..... ಹಾಂಗಾ?"
"ಹಾಂಗಾ.....!?" ರಾಯನ್ ಮೌನ್ ಜಾಲೊ. ಥೊಡ್ಯಾ ವೆಳಾ ಉಪ್ರಾಂತ್,
"ಮುಂಬಯಿಂತ್ ಮ್ಹಜೆಂ ಬಿಜ್ನೆಸ್ ಆನಿ ಹಾಂಗಾ ಮ್ಹಜೆಂ ಲೈಫ್..... ಐ ಮೀನ್ ಜಿವಿತ್! ಆನಿ ಮ್ಹಜೆಂ ಜಿವಿತ್ ತುಂ ಮಿಶೇಲ್!"
ತಿತ್ಲೆಂಚ್!
ರಾಯನಾಚಿಂ ಉತ್ರಾಂ ಆಯ್ಕೊನ್, ಮಿಶೇಲಾಚಾ ದಾಂಪ್ಲ್ಲ್ಯಾ ದೊಳ್ಯಾಂ ಆಸ್ಡೆಂಚೆರ್ ಮಿರಿಯೊ ಪಡ್ಲ್ಯೊ. ತೆಂ ಆತಾಂ ತಾಚ್ಯಾ ಪಾಟಾರ್ ಬಸ್ಲೆಂ.
ಹ್ಯಾ ಪಾಟಾರ್ ಥಾವ್ನ್ ಪಳೆತಾನಾ ತಾಕಾ ಸಂಸಾರ್ ದುಸ್ರೊಚ್ ದಿಸ್ಲೊ.
ತ್ಯಾ ಆದ್ಲ್ಯಾ ಮಿಶೇಲಾನ್ ಜಿಯೆಲ್ಲ್ಯಾ ಸಂಸಾರ್ ಅನಿ ಹ್ಯಾ ಆತಾಂ ಪಾಟಾರ್ ಚಡ್ಲ್ಲ್ಯಾ ಮಿಶೇಲಾನ್ ರಾಜ್ವಟ್ ಚಲಂವ್ಚೊ ಸಂಸಾರ್ ತಾಕಾ ವೆಗ್ಳೊಚ್ ದಿಸ್ಲೊ.
ತಿತ್ಲ್ಯಾರ್!
ಎಕಾಚ್ಚ್ಫರಾ ಕಸಲೊಗೀ ಆವಾಜ್ ಆಯ್ಕೊನ್ ಯೆತಾನಾ ಮಿಶೇಲಾನ್ ದೊಳೆ ಉಘಡ್ಲೆ. ಉಗ್ತೆ ಕೆಲ್ಲ್ಯಾ ತಾಚ್ಯಾ ದೊಳ್ಯಾಂಕ್ ಮುಕ್ಲ್ಯಾ ತ್ಯಾ ಆರ್ಶ್ಯಾಂತ್ ತಾಚೆಂ ಪ್ರತಿರೂಪ್ ಮಾತ್ರ್ ದಿಸ್ಲೆಂ ಶಿವಾಯ್ ದುಸ್ರೆಂ ಕಾಂಯ್ ದಿಸ್ಲೆಂ ನಾ.
ವಾರ್ಡ್ರೊಬಾಚಾ ಡ್ರೆಸ್ಸಿಂಗ್ ಟೇಬಲಾ ಮುಕಾರ್ ಮಿಶೇಲ್ ಎಕ್ಲೆಂಚ್ ಉಭೆಂ ಆಸ್ಲ್ಲೆಂ!
ತಾಚ್ಯೆ ಶಿವಾಯ್ ಥಂಯ್ಚರ್ ಕೊಣ್ಯ್ ನಾ!
"ರಾಯನ್.....!" ವ್ಹಳೂ ಪಿಂರ್ಗಾಲ್ಯಾ ಮಿಶೇಲಾನ್ ಆಪ್ಲ್ಯಾಚ್ ಖಾಂದಾರ್ ಹಾತ್ ಚರಯ್ಲೊ.
ನಾ!
ಆತಾಂ ತಾಣೆಂ ತೊ ಹಾತ್ ಆಪ್ಲ್ಯಾ ಪೊಲ್ಯಾರ್ ವೆಲೊ.
ನಾ!
ನಿಮಾಣೆ ಜಾವ್ನ್ ತಾಚೊ ಹಾತ್ ತಾಚ್ಯಾ ಗಳ್ಯಾರ್ ದೆಂವ್ಲೊ.
ವ್ಹಯ್!
ಗಳ್ಯಾರ್ ಸೊಭೊನ್ ಆಸ್ಲ್ಲ್ಯಾ ಸೊಭಿತ್ ನೆಕ್ಲೆಸಾ ವಯ್ರ್ ತಾಚಿಂ ಬೊಟಾಂ ಚರ್ಲಿಂ.
ಹೆಂ ಸಗ್ಳೆಂ ಮುಕ್ಲ್ಯಾ ಆರ್ಶ್ಯಾಂತ್ ಮಿಶೇಲಾಚ್ಯಾ ದೊಳ್ಯಾಂಕ್ ದಿಸ್ತಾಲೆಂ.
ತೆಂ ಆತಾಂ ಹಾಸ್ಲೆಂ!
ತಿತ್ಲೆಂಚ್!
"ಟೆಲಿಪೋನ್!"
ಮಿಶೇಲಾಚಾ ಮತಿನ್ ತಾಕಾ ಜಾಗಂವ್ಕ್ ಇತ್ಲೊ ವೇಳ್ ಘೆತ್ಲ್ಲೊ.
"ಟೆಲಿಪೋನ್....?" ಮತಿಂತ್ ಚಿಂತ್ಲ್ಲ್ಯಾ ಮಿಶೇಲಾನ್ ಆಪ್ಲ್ಯಾ ಖಾಟಿಯೆರ್ ವ್ಹಾಜೊನ್ ಆಸ್ಲ್ಲ್ಯಾ ಆಪ್ಲ್ಯಾ ಸೆಲ್ಪೋನಾಕ್ ವೆವೆಗ್ಗಿಂ ಹಾತಿಂ ಘೆತ್ಲೆಂ.
"ಹಲೋ....!"
"ಹಾಯ್!" ತ್ಯಾ ಕುಶಿನ್ ರಾಯನಾಚೊ ತಾಳೊ ಆಯ್ಕೊನ್ ಥಂಯ್ಚ್ ಖಾಟಿಯೆರ್ ಬಸ್ಲೆಂ ತೆಂ.
"ಕಶೆಂ ಆಸಾಯ್...?" ತೊಚ್ಚ್ ರಾಯನಾಚೊ ಮಧುರ್ ತಾಳೊ. ಆಪ್ಣೆ ಆಯ್ಕೊಂಕ್ ಆಶೆಲ್ಲೊ ತಾಳೊ.
ತಿತ್ಲ್ಯಾರ್!
"ಕೊಣಾಚೆಂಗೊ ಪುತಾ ಟೆಲಿಪೋನ್? ಮಿಶೇಲ್.....?"
ಸುಮಾರ್ ವೇಳ್ ಮಿಶೇಲಾಚಾ ಕುಡಾಂತ್ ತಾಚೆಂ ಸೆಲ್ಪೋನ್ ವ್ಹಾಜೊನ್ ಆಸ್ಲ್ಲೆಂ ಪಳವ್ನ್ ಎಸ್ತೆಲಾಕ್ ಆಪ್ಲ್ಯಾ ನಾತಿಚೆರ್ ದುಬಾವ್ ಉದೆಲೊ. ನಾತ್ ಕುಡಾಂತ್ ನಾ ಆಸ್ತೆಲೆಂ ಮ್ಹಣೊನ್ ಚಿಂತ್ಲ್ಲ್ಯಾ ತಿಣೆ ಹೆವ್ಶಿಂ ಮೆಟಾಂ ಕಾಡ್ಲ್ಲಿಂ.
ಮಿಶೇಲಾಚಾ ನಿದ್ಚ್ಯಾ ಕುಡಾಚಾ ದಾರಾರ್ ಉಭಿ ಜಾಲ್ಲ್ಯಾ ತಿಕಾ ತಿಚೆಂ ನಾತ್ ಆಪ್ಲ್ಯಾ ಖಾಟಿಯೆರ್ ಬಸೊನ್ ಪೊನಾರ್ ಉಲಯ್ತಾ ತೆಂ ದಿಸ್ತಾನಾ,
"ಕಿತ್ಲೊ ವೇಳ್ ಗೊ ತುಕಾ ಪೋನ್ ಕಾಡುಂಕ್.....?"
ಮಿಶೇಲಾನ್ ಏಕ್ ಪಾವ್ಟಿಂ ಆಪ್ಲ್ಯಾ ಆಜಿಯೆಕ್ ಪಳಯ್ಲೆಂ. ತ್ಯಾ ಉಪ್ರಾಂತ್ ತೆಂ ಪೊನಾರ್ ರಾಯನಾ ಲಾಗಿಂ ಉಲಂವ್ಕ್ ಲಾಗ್ಲೆಂ.
ಎಸ್ತೆಲ್ ಆಪ್ಲ್ಯಾ ಕಾಮಾನ್ ಭಿತರ್ ಘೆಲಿ. ಭಿತರ್ ವೆಚ್ಯಾ ತಿಚ್ಯಾ ತೊಂಡಾರ್ ಹಾಸೊ ಸ್ಪಶ್ಟ್ ದಿಸ್ತಾಲ್ಯೊ.
ಮಿಶೇಲಾಕ್ ಪಳಯಿಲ್ಲ್ಯಾ ತಿಚ್ಯಾ ದೊಳ್ಯಾಂಕ್ ಮಿಶೇಲಾಚಾ ಗಳ್ಯಾಂತ್ ರಾಯನಾನ್ ಮಿಶೇಲಾಕ್ ದಿಲ್ಲೆಂ ನೆಕ್ಲೆಸ್ ಸೊಭ್ಚೆಂ ದಿಸ್ಲ್ಲೆಂ.
"ರಾವ್ ಹಾಂ....!"
ಪೊನಾರ್ ಉಲಯಿಲ್ಲೆಂ ಮಿಶೇಲ್ ಉಟೊನ್ ವೆವೆಗ್ಗಿಂ ಭಾಯ್ರ್ ಆಯ್ಲೆಂ.
"ಅಬಾ......!" ಆಜ್ಯಾಕ್ ಸೊಧಿಲಾಗ್ಲೆಂ ತೆಂ.
ಜೆರೊಮ್ ಭಾಯ್ಲ್ಯಾ ಸೊಪ್ಯಾರ್ ಬಸೊನ್ ಆಸ್ಲ್ಲೊ ದಿಸ್ತಾನಾ,
"ಅಬಾ, ರಾಯನಾಕ್ ತುಜ್ಯೆ ಲಾಗಿಂ ಉಲಂವ್ಕ್ ಜಾಯ್ ಖಂಯ್!" ಮಿಶೇಲಾನ್ ಪೊನ್ ಜೆರೊಮಾಕ್ ದಿಲೆಂ.
"ಹಲೋ...? ರಾಯನ್...!" ಜೆರೊಮಾನ್ ಉಲಂವ್ಕ್ ಆರಂಭ್ ಕೆಲೆಂ.
ಪೊನಾರ್ ಉಲಯ್ತಾಂ ಉಲಯ್ತಾಂ ಜೆರೊಮಾಚಿ ನದರ್ ಆಪ್ಲ್ಯಾ ನಾತಿ ವಯ್ರ್ ಖಂಚ್ಲಿ. ತೊ ಪೊನಾರ್ ಉಲಯ್ತಾಲೊ ಜಾಲ್ಯಾರ್ಯ್ ತಾಚ್ಯಾ ತೊಂಡಾರ್ ಎಕಾ ಥರಾಚೊ ಪ್ರಕಾಸ್ ಫಾಂಕ್ಲ್ಲ್ಯಾ ಪರಿಂ ಜಾಲೊ. ತೊ ತಸೊಚ್ ಆಪ್ಲ್ಯಾ ನಾತಿಕ್ ಪಳವ್ನ್ ರಾಯನಾಲಾಗಿಂ ಉಲಂವ್ಕ್ ಲಾಗ್ಲೊ.
ರಾಯನಾ ಲಾಗಿಂ ಪೊನಾರ್ ಉಲವ್ನ್ ಜಾವ್ನ್ ಜೆರೊಮಾನ್ ಪೋನ್ ಭಂಧ್ ಕೆಲೆಂ. ತೊ ಆತಾಂ ಆಪ್ಲ್ಯಾ ನಾತಿಕ್ಚ್ ಪಳ್ಂವ್ಕ್ ಲಾಗ್ಲೊ. ತಾಚ್ಯಾ ತೊಂಡಾರ್ ಹಾಸೊ ಉದೆಲ್ಯೊ.
ಮಿಶೇಲಾಕ್ ಆಪ್ಲ್ಯಾ ಆಜ್ಯಾಚಾ ತೊಂಡಾರ್ ಉಟೊನ್ ರಾವ್ಲೆಲ್ಯಾ ಹಾಸ್ಯಾಂಚೊ ಮತ್ಲಾಬ್ ಸಮ್ಜಾಲೊ ನಾ. ತಾಣೆಂ ತಶೆಂಚ್ ಆಪ್ಲ್ಯಾ ಆಜ್ಯಾಕ್ ಪಳೆಲೆಂ. ರಾಯನಾನ್ ಆಪ್ಲ್ಯಾ ಆಜ್ಯಾಲಾಗಿಂ ಕಿತೆಂ ಸಾಂಗ್ಲೆಂ ಜಾವ್ಯೆತ್? ಜ್ಯಾ ಕಾರಾಣಾಕ್ ಲಾಗೊನ್ ಆಪ್ಲೊ ಆಜಿ ಮ್ಹಾಕಾ ಪಳವ್ನ್ ಹಾಸ್ತಾ! ಮಿಶೇಲಾಚಾ ಮತಿಂತ್ ಚಿಂತ್ನಾಂ ಧಾಂವ್ಲಿ.
"ಘೆ ಮಿಶೇಲ್!" ಜೆರೊಮಾನ್ ಆಪ್ಲ್ಯಾ ಹಾತಾಂತ್ಲ್ಯಾ ಪೊನಾಕ್ ಮಿಶೇಲಾಚಾ ತೆವ್ಶಿಂ ವೊಡ್ಡಾಯ್ಲೆಂ.
ಚ್ಯಾರ್ ದಿಸಾಂ ಪಯ್ಲೆಂ ರಾಯನಾನ್ ತಾಚಿ ಪಸಂದ್ ಜೆರೊಮಾ ಮುಕಾರ್ ದವರ್ತಾನಾ ಜೆರೊಮಾಕ್ಯ್ ತೆಂ ಸಾರ್ಕೆಂಚ್ ದಿಸ್ಲ್ಲೆಂ. ಆಜ್ ನಾ ತರ್ ಫಾಲ್ಯಾಂ ತಾಣೆಂ ಮಿಶೇಲಾಕ್ ತಾಚೊ ಫುಡಾರ್ ದಾಖಂವ್ಕ್ ಜಾಯ್ ಆಸ್ಲ್ಲೊ. ಆಶೆಂ ಆಸ್ತಾನಾ, ಆಜ್ ರಾಯನ್ ಖುದ್ದ್ ಜಾವ್ನ್ ಮಿಶೇಲಾಕ್ ಪಸಂದ್ ಕರುನ್ ಮಿಶೇಲಾಚೊ ತೊ ಹಾತ್ ಮಾಗ್ತಾ ಜಾಲ್ಯಾರ್, ಆನಿ ಹಾಕಾ ಮಿಶೆಲ್ ಜರ್ ವೊಪ್ತಾ ಜಾಲ್ಯಾರ್ ಬರೆಂಚ್...! ಚಿಂತ್ಲ್ಲ್ಯಾ ಜೆರೊಮಾನ್ ಆಪ್ಲ್ಯಾ ನಾತಿಚ್ಯಾ ಫುಡಾರಾಕ್ ರಾಯನಾಚಾ ಹಾತಿಂ ದೀಂವ್ಕ್ ಚಿಂತ್ಲ್ಲೆಂ.
ಹೊ ಸಂಭಂಧ್ ನಿಜಾಯ್ಕ್ಯ್ ಮಿಶೇಲಾಕ್ ಕಿತ್ಲೊ ಸಂತೊಸ್ ದೀಂವ್ಕ್ ಪಾವ್ಲಾ ಮ್ಹಳ್ಳ್ಯಾಚಿ ರುಜ್ವಾತ್ ಜಾವ್ನ್ ಮಿಶೇಲಾನ್ ಆಪ್ಲ್ಯಾ ಗಳ್ಯಾರ್ ಸೊಭಯಿಲ್ಲ್ಯಾ, ರಾಯನಾನ್ ಮುಂಬಯಿ ವೆಚ್ಯಾ ಪಯ್ಲೆಂ ಮಿಶೇಲಾಕ್ ಕಾಣಿಕ್ ಜಾವ್ನ್ ದಿಲ್ಲ್ಯಾ ತ್ಯಾ ನೆಕ್ಲೆಸಾಕ್ ಅಚಾನಕ್ ಆತಾಂ ರಾತಿಚಾ ಹ್ಯಾ ವೆಳಾರ್ ಮಿಶೇಲಾಚಾ ಗಳ್ಯಾರ್ ಪಳವ್ನ್ ಜೆರೊಮಾಕ್ ಆಪ್ಲೆಂ ನಾತ್ ಹ್ಯಾ ರಾಯನಾಚಾ ಸಂಭಂಧಾ ಥಾವ್ನ್ ಖುಶ್ ಆಸಾ ಮ್ಹಳ್ಳೆಂ ಕಳಿತ್ ಜಾಲೆಂ.
"ಮಿಶೇಲ್.....!"
ಆಪ್ಣೆಂ ನಾತಿಕ್ ವೊಡ್ಡಾಯಿಲ್ಲೆಂ ಆಪ್ಲ್ಯಾ ಹಾತಾಂತ್ಲೆಂ ಸೆಲ್ಪೋನ್ ಘೆತ್ಲಲೆಂ ಮಿಶೇಲ್ ತೆಂ ಪೋನ್ ಘೆವ್ನ್ ಭಿತರ್ ವೆಚ್ಯಾ ವಗ್ತಾರ್ ಜೆರೊಮಾನ್ ನಾತಿಕ್ ಉಲೊ ದಿಲೊ.
ಭಿತರ್ ವೆಚೆಂ ಮಿಶೇಲ್ ತಶೆಂಚ್ ರಾವೊನ್ ಪಾಟಿಂ ಘುಂವ್ಲ್ಲೆಂ ತೆಂ ’ಕಿತೆಂ’ ಮ್ಹಳ್ಳ್ಯಾ ನದ್ರೆನ್ ಆಪ್ಲ್ಯಾ ಆಜ್ಯಾಕ್ ಪಳಂವ್ಕ್ ಲಾಗ್ಲೆಂ. ಅಚಾನಕ್ ಬದ್ಲಾಲ್ಲ್ಯಾ ಆಪ್ಲ್ಯಾ ಆಜ್ಯಾಚಾ ಜಿನೊಸಾಕ್ ತೆಂ ಸಮ್ಜೊಂಕ್ ಸಕ್ಲೆಂ ನಾ.
"ಹಾಂಗಾ ಯೇ ಬಸ್...!" ಜೆರೊಮಾನ್ ಆಪ್ಲ್ಯಾ ಬಗ್ಲೆಕ್ ಸೊಫಾಚೆರ್ ಹಾತ್ ಚರಯ್ಲೊ.
"ಹಾಂ ಅಬಾ!" ಮಿಶೇಲ್ ಆಜ್ಯಾ ಸರ್ಶಿನ್ ಯೇವ್ನ್ ಉಭೆಂ ಜಾಲೆಂ.
"ಬಸ್ಗೋ.....!" ಜೆರೊಮಾಚಾ ತೊಂಡಾರ್ ತ್ಯೊಚ್ಚ್ ಸಂತೊಸಾಚೊ ಹಾಸೊ.
ಮಿಶೇಲ್ ಜೆರೊಮಾಚ್ಯಾ ಬಗ್ಲೆಕ್ ಬಸ್ಲೆಂ. ಎಕಾಚ್ಚಣೆ ಆಜ್ಯಾಚೆಂ ಹೆಂ ಅಸಲೆಂ ವರ್ತನ್ ತಾಕಾ ಕಶೆಂ ಮ್ಹಳ್ಳೆಂ ಸಮ್ಜಾಲೆಂ ನಾ.
"ಮಿಶೇಲ್! ತುಂ ಖುಶ್ ಆಸಾಯ್ ಪುತಾ....?" ಜೆರೊಮಾನ್ ಆಪ್ಲ್ಯಾ ನಾತಿಕ್ಚ್ ಪಳೆಲೆಂ.
ಆತಾಂ ಜೆರೊಮಾಚಾ ತೊಂಡಾ ವಯ್ಲೊ ತೊ ಪಯ್ಲೆಂಚೊ ಸಂತೊಸ್ ಸವ್ಕಾಸ್ ಮಾಜ್ವೊನ್ ಯೇಂವ್ಕ್ ಲಾಗ್ಲೊ. ತಾಚ್ಯಾ ಪಾಟ್ಲ್ಯಾನ್ ತಾಚ್ಯಾ ತೊಂಡಾರ್ ಎಕಾ ಥರಾಚ್ಯಾ ಖಂತಿಚೊ ಛಾರೊ ಉದೆವ್ನ್ ರಾವ್ಲೊ.
ಆಪ್ಣಾಚಾ ದೊಳ್ಯಾಂ ಮುಕಾರ್ಚ್ ಆಪ್ಲ್ಯಾ ಆಜ್ಯಾಚಾ ತೊಂಡಾರ್ ಜಾಂವ್ಚಿ ಬದ್ಲಾವಣ್ ಪಳವ್ನ್ ಮಿಶೇಲಾಕ್ ಆಶ್ಚರ್ಯ್ ಜಾಲೆಂ. ಆಜ್ಯಾಚಾ ತೊಂಡಾ ವಯ್ಲ್ಯಾ ನಿರಾಶೆಚ್ಯಾ ಭಾವನಾಂಕ್ ಪಳೆತಾನಾ ಕಿತ್ಯಾಕ್ಗೀ ಮಿಶೇಲಾಚೆಂ ಕಾಳಿಜ್ ಹಾಲೊಂಕ್ ಲಾಗ್ಲೆಂ. ತೆಂ ಫಕತ್ತ್ ಆಜ್ಯಾಕ್ ಪಳಂವ್ಚ್ಯಾರ್ ಪಡ್ಲೆಂ.
"ರಾಯನ್ ಬರೊ ಚೆಡೊ ಪುತಾ!" ಜೆರೊಮ್ ಆತಾಂ ಆಪುಣ್ ಬಸ್ಲೆಲ್ಯಾ ಸೊಫಾಕ್ ವೊಣ್ಕಾಲೊ.
ಆಪ್ಲ್ಯಾ ಆಜ್ಯಾಚ್ಯಾ ತೊಂಡಾ ವಯ್ಲ್ಯಾ ಭಾವನಾಂಕ್ ಪಳೆಲ್ಲ್ಯಾ ಮಿಶೇಲಾಕ್, ಆಪ್ಲೊ ಆಜೊ ಆಪ್ಲ್ಯಾ ಜಿವಿತಾ ವಿಶಿಂ ಉಲಯ್ತಾ ಮ್ಹಣೊನ್ ಖಚಿತ್ ಜಾಲೆಂ.
"ದುಡ್ವಾಂತ್ ಇತ್ಲೊ ಭಳಾದೀಕ್ ಜಾಲ್ಯಾರ್ಯ್ ಕಾಂಯ್ ದಳ್ಬಾರ್ ತಾಚ್ಯೆಲಾಗಿಂ ನಾ. ಸಗ್ಳ್ಯಾಂ ವರ್ನಿಂ ಚಡ್ ಜಾವ್ನ್ ತೊ ಆಪ್ಲ್ಯಾ ಬಾಪಾಯ್ಕ್ ಅಜೂನ್ ಗೌರವ್ ದಿತಾ ಮ್ಹಣ್ತಾನಾ ತಾಚೆಂ ಚಿಂತಾಪ್ ಕಸಲೆಂ ತೆಂ ಪಾರ್ಕಿಯೆತ್. ಸಾದೆಂ ಉಲೊಣೆಂ ತಶೆ ತೊ ಮೊಗಾಳ್ ಮನಿಸ್. ಆಸಲೆ ಮನಿಸ್ ಅಪ್ರೂಪ್ ದಿಶ್ಟಿಕ್ ಪಡ್ತಾತ್. ತುಕಾ ತೊ ಖಂಡಿತ್ ಸುಖಾನ್ ದವರ್ತಲೊ ಪುತಾ!"
ಜೆರೊಮಾಚಾ ಉಲೊಣ್ಯಾಂತ್ ಆನಿ ಚಿಂತ್ಪಾಂತ್ ತೊ ಆಪ್ಲ್ಯಾ ಜಿವಿತಾಚಾ ಫುಡಾರಾ ವಿಶಿಂ ಕಿತ್ಲೆಂ ಚಿಂತಾ ತೆಂ ಮಿಶೇಲಾಕ್ ಸ್ಪಶ್ಟ್ ಕಳ್ಳೆಂ.
"ಪುಣ್ ಅಬಾ....!" ಮಿಶೇಲ್ ಮೌನ್ ಜಾಲೆಂ. ತಾಣೆಂ ಕಿತೆಂಗೀ ಸಾಂಗೊಂಕ್ ಚಿಂತ್ಲ್ಲೆಂ. ಪುಣ್ ತಾಚಿ ಮತ್ ಘುಸ್ಪಡ್ಲ್ಲ್ಯಾ ಪರಿಂ ಜಾತಾನಾ ತೆಂ ಉಲಂವ್ಕ್ ಸಕ್ಲೆಂ ನಾ.
" ಹಾಂ ಮಿಶೇಲ್.... ಸಾಂಗ್ ಪುತಾ ಕಿತೆಂ ಸಾಂಗೊಂಕ್ ಸೊಧ್ತಾಯ್?" ನಾತಿಚಾ ಹಾತಾಕ್ ಜೆರೊಮಾನ್ ಆಪ್ಲ್ಯಾ ಹಾತಾಂತ್ ಘೆತ್ಲೆಂ.
"ಮುಂಬಯಿ ಹಾಂವ್ ಕಶೆಂ ವಚೊಂ? ಮ್ಹಾಕಾ ಜಾಂವ್ಚೆಂ ನಾ!"
ನಾತಿಚ್ಯಾ ನೆಣ್ತ್ಯಾ ಉತ್ರಾಂ ಮುಕಾರ್ ಜೆರೊಮ್ ಹಾಸ್ಲೊ.
"ಪಳೆ ಪುತಾ....!" ಉಲಯ್ಲೊ ತೊ ".....ತುಂ ಆತಾಂ ತೆಂ ತೀನ್ ವರ್ಸಾಂಚೆಂ ಮಿಶೇಲ್ ನ್ಹಂಯ್! ತುಂ ಆತಾಂ ವ್ಹಡ್ ಜಾಲಾಂಯ್! ತುವೆಂ ತುಜೊ ಫುಡಾರ್ ಬಾಂದುಂಕ್ ಆಸ! ತುಜೆಂ ಮ್ಹಳ್ಳೆಂ ಕುಟಾಮ್ ಘಡೊಂಕ್ ಆಸಾ!"
"ಪುಣ್.... ಮುಂಬಯಿ ವಚೊನ್!" ಮಿಶೇಲಾಚಿ ಖಂತ್ ತಾಚ್ಯಾ ಮುಖಮಳಾರ್ ಸ್ಪಶ್ಟ್ ದಿಸ್ತಾಲಿ.
"ರಾಯನಾಚೆಂ ಸಗ್ಳೆಂ ಬಿಜ್ನೆಸ್ ಮುಂಬಯಿ ಆಸಾ ಮ್ಹಣ್ತಾನಾ ತುವೆಂ ತಾಕಾ ಸಾಂಗಾತ್ ದಿಂವ್ಚೊ ತುಜೊ ಧರ್ಮ್ ಮಿಶೇಲ್! ತಶೆಂಯ್ ಮುಂಬಯಿ ಮ್ಹಳ್ಯಾರ್ ಚಡ್ ಕಾಂಯ್ ಪಯ್ಸ್ ನಾ. ತುಕಾ ಕೆದ್ನಾಂ ಆಮ್ಕಾಂ ಪಳಂವ್ಚೆಂ ಮನ್ ಜಾತಾ ತೆದಾಳಾ ತುಕಾ ಆಮ್ಕಾಂ ಪಳಂವ್ಕ್ ಯೆವ್ಯೆತ್!"
"ವ್ಹಯ್! ಶೀತಲ್ಯ್ ಆಶೆಂಚ್ ಸಾಂಗ್ತಾಲೆಂ! ತೆಂ ಮುಂಬಯಿ ವಚೊನ್ ಇತ್ಲೆ ದೀಸ್ ಜಾಲೆ.... ಕಾಂಯ್ ಖಬಾರ್ ಆಸಾ ತಾಚಿ? ಜಿಮ್ಮಿನ್ಯ್ ತ್ಯಾ ದೀಸ್ ಸಾರ್ಕೆಂಚ್ ಸಾಂಗ್ಲ್ಲೆಂ! ವೇಳ್ ಆನಿ ಘಡಿತ್.....!" ಮಿಶೇಲಾಕ್ ಆವ್ಚಿತ್ತ್ ಜಿಮ್ಮಿಚ್ಯಾ ಉತ್ರಾಂಚೊ ಉಡಾಸ್ ಆಯ್ಲೊ.
"ತಶೆಂ ಸಗ್ಳೆಂ ಆಮಿಂ ಚಿಂತ್ಲೆಲ್ಯಾ ಪರಿಂ ಜಾತಾಯೆಪುತಾ? ಸಗ್ಳ್ಯಾಕ್ ವೇಳ್ ಲಾಗ್ತಾ....!"
ಜೆರೊಮ್ ಆಪ್ಲ್ಯಾ ನಾತಿಚ್ಯಾ ಸಿಂತಿಮೆಂತಾಕ್ ಸಮ್ಜೊಂಕ್ ಸಕ್ತಾಲೊ. ಆಪ್ಣಾಕ್ ಆನಿ ಎಸ್ತೆಲಾಕ್ ಸೊಡುನ್ ವಚೊಂಕ್ ಮಿಶೇಲ್ ತಿತ್ಲ್ಯಾ ಸುಲಾಭಾಯೆನ್ ರಾಜಿ ಜಾಂವ್ಚೆಂ ನಾ ಮ್ಹಳ್ಳೆಂ ತೆ ತೊ ಜಾಣಾಂ. ಪುಣ್ ದುಸ್ರ್ಯಾ ವಾಟೆನ್, ತಾಚೆಂ ನಾತ್ ರಾಯನಾಕ್ ಪಸಂದ್ ಕರ್ತಾ ಮ್ಹಳ್ಳೆಂಯ್ ತೊ ಜಾಣಾಂ. ತಾಕಾ ಫಕತ್ತ್ ಮಿಶೇಲಾಕ್ ಖುಶಿ ಖುಶಿಯೆನ್ ರಾಜಿ ಕರುಂಕ್ ಜಾಯ್ ಆಸ್ಲ್ಲೆಂ. ತಿತ್ಲೆಂಚ್!
"ಹಾಂವ್ ತುಮ್ಕಾಂ ಸೊಡುನ್ ಗೆಲ್ಯಾರ್ ತುಮ್ಕಾಂ ಹಾಂಗಾ ಕೋಣ್ ಆಸಾ ಆಬಾ? ತುಮ್ಕಾಂ ಸೊಡುನ್ ವೆಚೆಂ ಮ್ಹಾಕಾ ಚಿಂತುಂಕ್ ಜಾಯ್ನಾ!" ಮಿಶೇಲಾಚೆ ದೊಳೆ ಸವ್ಕಾಸ್ ಗಯ್ರೆ ಜಾವ್ನ್ ಯೆತಾಲೆ.
"ಫಾಲ್ಯಾಂ ಹಾಂವ್ ತುಕಾ ಸೊಡುನ್ ಗೆಲೊಂ ಜಾಲ್ಯಾರ್ ತುಕಾ ಉಪ್ರಾಂತ್ ಕೋಣ್ ಗತ್ ಆಸಾ ಪುತಾ......?"
ಜೆರೊಮಾಚಾ ಸವಾಲಕ್ ಆಯ್ಕೊನ್ ಮಿಶೇಲಾನ್ ಜೆರೊಮಾಕ್ಚ್ ಪಳೆಲೆಂ. ಆಪ್ಲ್ಯಾ ನಾತಿಚಾ ದಿಶ್ಟಿಕ್ ಆಪ್ಲಿ ನದರ್ ಜೊಕ್ಲ್ಲ್ಯಾ ಜೆರೊಮಾಕ್ ಚಡ್ ವೇಳ್ ತ್ಯಾ ನದ್ರೆ ಸಾಂಗಾತಾ ಝುಜೊಂಕ್ ಜಾಲೆಂ ನಾ.
ಜಿವಿತಾಂತ್ ಪಯ್ಲೆ ಪಾವ್ಟಿಂ ಮಿಶೇಲಾನ್ ಎಕಾ ದಾದ್ಲ್ಯಾಚಾ ನದ್ರೆಕ್ ಸಲ್ವಯಿಲ್ಲೆಂ!
ತಿತ್ಲೆಂಚ್!
ತೆಂ ’ಸಟ್ಟ್’ ಕರುನ್ ಸೊಫಾ ವಯ್ಲೆಂ ಉಟ್ಲೆಂ.
ಆಜ್ಯಾ ಮುಕಾರ್ ಉಭೆಂ ಜಾವ್ನ್ ತೆಂ ತಶೆಂಚ್ ಆಜ್ಯಾಕ್ ಪಳಂವ್ಕ್ ಲಾಗ್ಲೆಂ.
ಜಶೆಂ ತೀನ್ ವರ್ಸಾಂಚೆಂ ಮಿಶೇಲ್!
ಮಿಶೇಲ್ ಕಾಳ್ಜಾ ಮನಾಂತ್ ತಳ್ಮಳ್ತಾಲೆಂ! ತಾಚ್ಯಾ ಕಾನಾಂತ್ ತಿಂಚ್ ತಾಚ್ಯಾ ಆಜ್ಯಾಚಿಂ ಆತಾಂ ಉಚಾರ್ಲ್ಲಿಂ ಉತ್ರಾಂ ಆವಾಜುಂಕ್ ಲಾಗ್ಲಿಂ.
ಆಪ್ಲ್ಯಾ ನಾತಿಕ್ ಆಪ್ಲ್ಯಾ ಉತ್ರಾಂನಿ ಪಾಪ್ಸಿಲೆಂ ತೆಂ ಕಳ್ಲ್ಲೊ ಜೆರೊಮ್,
"ಮಿಶೇಲ್! ನಾ ಪುತಾ... ತುಕಾ ಸೊಡುನ್ ಹಾಂವ್ ಖಂಯ್ ವಚೊಂ?" ತಾಣೆಂ ಸೊಫಾ ವಯ್ಲೆಂ ಉಟ್ಚೆಂ ಪ್ರಯತ್ನ್ ಕೆಲೆಂ. ಮಿಶೇಲಾಚಾ ಹಾತಾಕ್ ಘಟ್ ಧರುನ್ ತೊ ಉಟ್ಲೊ.
"ತುಕಾ ಸೊಡ್ಲ್ಯಾರ್ ಆಮ್ಕಾಂ ಕೋಣ್ಯ್ ನಾಂತ್ ಪುತಾ!" ಜೆರೊಮಚೊ ತಾಳೊ ಗದ್ಗದೀತ್ ಜಾಲೊ. "ಜಾಲ್ಯಾರ್ಯ್ ಆಮ್ಚಿಂ ಮೆಟಾಂ ಆಮಿಂ ಕಾಡುಂಕ್ ಜಾಯ್! ತುಂ ಆಮ್ಚೆ ವಿಶಿಂ ಕಾಂಯ್ ಚಿಂತಿನಾಕಾ. ಹಾಂಗಾ ಮ್ಹಾಕಾ ತುಜಿ ಆಜಿ ಆಸಾ. ತುಜ್ಯಾ ಆಜಿಯೆಕ್ ಹಾಂವ್ ಆಸಾಂ. ಹಾಚ್ಯಾ ವರ್ತೆಂ ಕಿತೆಂ ಜಾಯ್! ಹೆಂಚ್ ಆಮ್ಚೆಂ ಭಳ್! ತಶೆಂಯ್ ಕಿತೆಂಯ್ ಜಾಲ್ಯಾರ್ ಆಮ್ಚ್ಯಾ ಪುತಾ ಸಾರ್ಕೊ ಪೂತ್ ಜಾವ್ನ್ ಜಿಮ್ಮಿ ಆಸಾ!" ಜೆರೊಮ್ ನಾತಿ ಮುಕಾರ್ ಆಪ್ಲ್ಯಾ ಕಾಳ್ಜಾಂತ್ಲೆ ಕಳ್ವಳೆ ದಾಂಬುನ್ ದರುನ್ ಹಾಸೊಂಕ್ ಪ್ರಯತ್ನ್ ಕರ್ತಾಲೊ. ಪುಣ್ ತಾಕಾ ಸಾದ್ಯ್ ಜಾಲೆಂ ನಾ.
"ಹ್ಯಾ ಮನ್ಶ್ಯಾಚೆಂ ಜಿವಿತ್ಯ್ ಕಸಲೆಂ ಜಿವಿತ್ ಆಬಾ....? ಪಳಂವ್ಕ್ ಗೆಲ್ಯಾರ್...!" ಥೊಡೊ ವೇಳ್ ಮೌನ್ ಜಾಲ್ಲೆಂ ಮಿಶೇಲ್ ಭಾಯ್ರ್ ಜಾಲಾ ತೆವ್ಶಿಂ ಪಳಂವ್ಕ್ ಲಾಗ್ಲೆಂ. ಭಾಯ್ಲ್ಯಾ ಕಾಳೊಕಾಂತ್ ತಾಕಾ ಘರ್ಚ್ಯಾ ಲೈಟಾಚಾ ಉಜ್ವಾಡಾಕ್ ತ್ಯಾ ಘರಾಚಾ ಜಾಲಾ ಲಾಗ್ಶಿಲೆಂ ಮಾತ್ರ್ ದಿಸ್ಲೆಂ ಶಿವಾಯ್ತೆಂ ಉತ್ರೊನ್ ಗೆಲ್ಲ್ಯಾ ತಾಚ್ಯಾ ದಿಶ್ಟಿಕ್ ಫುಡೆಂ ಕಾಂಯ್ ದಿಸ್ಲೆಂ ನಾ. ತಾಚ್ಯಾ ದೊಳ್ಯಾಂ ಮುಕಾರ್ ಆತಾಂ ದೋನ್ ಜಿವಿತಾಂ ಉಭಿಂ ಜಾಲ್ಲಿಂ. ಏಕ್ ತಾಚ್ಯಾ ಆಜ್ಯಾ ಆಜಿಯೆಚೆಂ ಆನಿ ಏಕ್ ಖುದ್ದ್ ತಾಚೆಂ!
ದೊನಾಂಯ್ಕ್ಯ್ ಥಾರೊ ನಾತ್ಲ್ಲೊ!
ಏಕ್ ಉತರ್ಪಣಾಚೆಂ ತರ್ ದುಸ್ರೆಂ ತರ್ನಾಟ್ಪಣಾಚೆಂ!
ತಿತ್ಲೆಂಚ್!
ಮಿಶೇಲಾಚಾ ದೊಳ್ಯಾಂ ಫುಡೆಂ ತಾಚ್ಯಾ ಜಿವಿತಾನ್ ತಾಕಾ ದಾಖಯಿಲ್ಲಿಂ ಘಡಿತಾಂ ಉಡಾಸ್ ಯೇಂವ್ಕ್ ಲಾಗ್ಲಿಂ.
ದುಸ್ರ್ಯಾಚಾ ತೊಟಾಂತ್ ನಿಶ್ಚಿಂತ್ ಖೆಳೊನ್ ಆಸ್ಲ್ಲಿಂ ಲಾಯ್ಡ್ ಆನಿ ಲವೀನಾ!
ಆಪ್ಲ್ಯಾಚ್ ಶೆತಾಕ್ ಚರ್ಚಿ ಗಾಯ್!
ಭುರ್ಗ್ಯಾಕ್ ಹಾಂಡಿಯೆರ್ ಘೆವ್ನ್ ಆಸ್ಲ್ಲೆಂ ನೆಣ್ತೆಂ ಚೆಡುಂ!
ತೊ ಪ್ರಾಯ್ವಂತಾಂಚೊ ಆಸ್ರೊ!
ಎಕಾ ವಯ್ರ್ ಏಕ್ ಮಿಶೇಲಾಚ್ಯಾ ದೊಳ್ಯಾಂ ಮುಕಾರ್ ಯೇವ್ನ್ ರಾವ್ತಾನಾ ಮಿಶೇಲ್ ಸಗ್ಳೆಂಚ್ ಗಳ್ಳೆಂ! ತಾಚ್ಯಾ ಕುಡಿಂತ್ಲೆಂ ಭಳ್ ಸಗ್ಳೆಂ ಗಳೊನ್ ಗೆಲ್ಲ್ಯಾ ಪರಿಂ ತಾಕಾ ಜಾಲೆಂ.
ಆನಿ ಆತಾಂ!
ಎಕಾ ಕುಶಿನ್ ಥಾವ್ನ್ ತಾಕಾ ಭುರ್ಗ್ಯಾಂಚಾ ಖೆಳಾಚೊ ಹಾಸೊ ಆಯ್ಕೊನ್ ಆಯ್ಲ್ಯೊ ತರ್ ದುಸ್ರ್ಯಾ ಕುಶಿನ್ ಥಾವ್ನ್ ತ್ಯಾ ಪ್ರಾಯ್ವಂತಾಂಚೆ ರುದಾನ್ ತಾಚ್ಯಾ ಕಾನಾಂಕ್ ಕೊರ್ವೊಂತಾನ್ ಚಿರುಂಕ್ ಲಾಗ್ಲೆಂ. ತಾಚ್ಯಾ ದೊಳ್ಯಾಂನಿ ದುಖಾಂ ಉದೆಲಿಂ. ತಾಚೊ ಗಳೊ ಪುಮಾರುನ್ ಆಯ್ಲೊ.
ತಿತ್ಲೆಂಚ್!
ಮಿಶೇಲಾನ್ ಆಪ್ಲ್ಯಾ ಹಾತಾಂನಿ ಆಪ್ಲ್ಯಾ ತೊಂಡಾಕ್ ಘಟ್ ದರ್ಲೆಂ.
ಹೆಂ ಕಳ್ಲ್ಲೊ ಜೆರೊಮ್,
"ಪುತಾ ಮಿಶೇಲ್! ಕಿತೆಂ ಜಾಲೆಂ?" ಛೆ...!" ತಾಣೆಂ ಮಿಶೇಲಾಕ್ ಆಪ್ಣಾ ಲಾಗಿಂ ವೊಡುನ್ ದರ್ಲೆಂ.
ಮಿಶೇಲ್ ಹುಸ್ಕಾರೊಂಕ್ ಲಾಗ್ಲೆಂ.
"ಮಿಶೇಲ್....! ರಡಾನಾಂತ್ ಪುತಾ! ಆಳೆ ಹಾಂಗಾ ಆಯ್ಕ್....! ತುಂ ಫಾಲ್ಯಾಂ ಕಾಜಾರ್ ಜಾವ್ನ್ ವೆಚೆಂ ಚೆಡುಂ.... ಅಶೆಂ ರಡ್ಲ್ಯಾರ್....!" ಜೆರೊಮಾನ್ ನಾತಿಕ್ ಧರುನ್ ತಾಚಿ ಪಾಟ್ ಪೊಶೆಲಿ.
ಮಿಶೇಲಾಕ್ ಸವ್ಕಾಸ್ ಸಮಾಧಾನ್ ಜಾಲೆಂ.
"ಚಲಿಯೆಚ್ಯಾ ಜಿವಿತಾಕ್ ಖಂಯ್ಚರ್ಯ್ ಥಾರೊ ನಾ!" ಆಜ್ಯಾಚಾ ವೆಂಗೆಂತ್ ಮಿಶೇಲ್ ಹುಸ್ಕಾರ್ಲೆಂ. ತಾಕಾ ಆತಾಂ ಸಮಾಧಾನ್ ಜಾಲ್ಲೆಂ.
"ತಶೆಂ ನ್ಹಂಯ್ ಪುತಾ! ಚಲಿಯೆನ್ ಕಾಡ್ಚೆಂ ಜಿವಿತ್ ಎಕಾ ಚಲ್ಯಾಕ್ ಕಾಡುಂಕ್ ಸಾದ್ಯ್ ನಾ. ತಿಚೆಂ ಜೀವನ್ ಪವಿತ್ರ್ ಜೀವನ್. ತಿಚಿ ಜಿಣಿ ತ್ಯಾಗಾಚಿ ಜಿಣಿ. ತಿಚೆಂ ಜಿವಿತ್ ಬಲಿದಾನಾಚೆಂ ಜಿವಿತ್!"
ಆಜ್ಯಾಚಿಂ ಉತ್ರಾಂ ಆಯ್ಕೊನ್ ತೆಂ ಆತಾಂ ಜೆರೊಮಾಚ್ಯಾ ವೆಂಗೆ ಥಾವ್ನ್ ಸುಟ್ಲೆಂ.
"ಬಸ್ ಆಬಾ!" ಆಜ್ಯಾಕ್ ತಾಣೆಂ ಬಸೊಂಕ್ ಸಾಂಗ್ಲೆಂ.
ದೊಗಾಂಯ್ ಮಧೆಂ ಕಾಂಯ್ ಉಲೊಣೆ ಜಾಲೆಂ ನಾಂ. ಪುಣ್ ಮಿಶೇಲ್....!?
ಎಕಾ ಕುಶಿನ್ ಆಪ್ಣೆ ಜಿವಿತಾಚೆಂ ಪಯ್ಣ್ ಕರುನ್ ಆಯಿಲ್ಲಿ ವಾಟ್! ದುಸ್ರ್ಯಾ ಕುಶಿನ್ ಆಪ್ಣೆ ಫುಡಾರಾಚೆಂ ಪಯ್ಣ್ ಕರುಂಕ್ ಆಯ್ತಿ ಜಾಲ್ಲಿ ವಾಟ್!
ಹ್ಯಾ ದೋನ್ಯ್ ವಾಟೆ ಮಧೆಂ ಖಂಯ್ಚರ್ಗೀ ಏಕ್ಸಾಂಖೊವ್ ಆಸಾ. ತ್ಯಾ ಸಾಂಖೊವಾಕ್ ಆಪ್ಣೆ ಉತ್ರೊನ್ ವಚೊಂಕ್ ಆಸಾ. ತ್ಯಾ ಸಾಂಖೊವಾಕ್ ಉಭಾರ್ಲ್ಲ್ಯಾ ಖಾಂಬ್ಯಾಕ್ ಪಾಟ್ ಕರುನ್ ಆಪ್ಣೆ ಚಲೊಂಕ್ ಆಸಾ...... ಆಪುಣ್ ಚಲೊಂಕ್ ಸಕ್ತೆಲಿಂ?
ಜಿಣಿಭರ್ ಹ್ಯಾ ಸಾಂಖೊವಾಕ್ ಆಧಾರ್ ಜಾವ್ನ್ ರಾವ್ಲೆಲ್ಯಾ ಹ್ಯಾ ಖಾಂಬ್ಯಾಕ್ ಆಜ್ ತೆ ಲಾಚಾರ್ ಜಾವ್ನ್ ತಾಂಕಾ ಮ್ಹಜ್ಯಾ ಸಾಂಗಾತಾಚಿ ಗರ್ಜ್ ಆಸ್ತಾನಾ ಮ್ಹಜೆ ವಿಣೆ ಹೆ ಖಾಂಬೆ ಹ್ಯಾ ಸಾಂಖೊವಾಕ್ ಕಶೆ ವ್ಹಾವೊಯ್ತೆಲೆ?
ಹೊ ಸಾಂಖೊವ್ ಜರ್ ತುಟೊನ್ ಪಡ್ಲೊ......? ಹ್ಯಾ ದೊನ್ಯ್ ವಾಟೆ ಮಧ್ಲೊ ಗಾಂಚ್ ತುಟೊನ್ ಘೆಲೊ! ನಾ ಆಶೆಂ ಜಾಂವ್ಚೆ ನಾ. ಚಿಂತ್ಚ್ಯಾ ಮಿಶೇಲಾಚಾ ಮತಿಂತ್ ತಾಚ್ಯಾ ಆವಯ್ ಬಾಪಾಯ್ಚಿ ತಸ್ವೀರ್ ಉದೆವ್ನ್ ಆಯ್ಲಿ.
"ತುಂ ಇತ್ಲೆಂ ಕಿತೆಂ ಚಿಂತಾಯ್ ಮಿಶೇಲ್?" ಜೆರೊಮಾನ್ ಮಿಶೆಲಾಚಾ ಪಾಂಯಾಕ್ ಧರುನ್ ತಾಕಾ ಹಾಲಯ್ಲೆಂ.
"ಮ್ಹಜ್ಯಾ ಆವಯ್ನ್ ಆನಿ ಬಾಪಾಯ್ನ್ ಮ್ಹಜ್ಯಾ ದೊಳ್ಯಾಂನಿ ತೆಂ ಸಪಾಣ್ ಕಿತ್ಯಾಕ್ ಪಳೆಲೆಂ ಜಾವ್ಯೆತ್...?"
"ಸಾರ್ಕೆಂ ಸವಾಲ್ ಕೆಲೆಂಯ್ ಮಿಶೇಲ್ ತುವೆಂ!" ಜೆರೊಮ್ ಉಲಯ್ಲೊ. "ಹಾಂವ್ ನೆಣಾಂ ತಾಣಿಂ ತುಜ್ಯಾ ದೊಳ್ಯಾಂನಿ ತೆಂ ಸಪಾಣ್ ಕಶೆಂ ಪಳೆಲೆಂ ತೆಂ. ಪುಣ್ ಆತಾಂ ತುವೆಂಯ್ ತುಜ್ಯಾಂಚಾ ದೊಳ್ಯಾಂನಿ ಸಪ್ನಾಂ ಪಳಂವ್ಚೊ ವೇಳ್ ಆಯ್ಲಾ. ತುಜ್ಯಾ ಜಿವಿತಾಕ್ ಸೊಭಂವ್ಚೊ ವೇಳ್ ಆಯ್ಲಾ. ತುಜ್ಯಾ ಆವಯ್ ಬಾಪಯ್ಚ್ಯಾ ಸಪ್ಣಾಂಕ್ ಸಾಕಾರ್ ಕರ್ಚಿ ಘಡಿ ಆಯ್ಲ್ಯಾ!"
************
’ರಾಯನ್-ಮಿಶೇಲ್’
ಮುಂಬಯಿ ಶ್ಹೆರಾಂತ್ಲೊ Born Business Man ಆಲ್ಫ್ರೆಡ್ ರಾಯನ್!
ಮ್ಯಾಂಚೆಸ್ಟರಾಂತ್ ಜಲ್ಮಾಲ್ಲೆಂ Born To Be A Princess ಮಿಶೇಲ್ ಆಂಡ್ರಿಯಾ!
ದೊಗಾಂಯ್ ಆಜ್ ಕಾಜಾರಾಚಾ ಭೆಸಾಂತ್ ಎಕ್ವಟ್ಲಿಂ.
ಆಪ್ಲ್ಯಾ ಧುವೆ ಸಾರ್ಕ್ಯಾ ನಾತಿಕ್, ಆಪ್ಲ್ಯಾ ಫುಡಾರಾಚಾ ಎಕಾಚ್ ಎಕಾ ಭರ್ವಸ್ಯಾಕ್ ಆಪ್ಲ್ಯಾಚ್ ಗಾಂವಾಂತ್ ರಾಯನಾಚಾ ಹಾತಿಂ ಒಪ್ಸುನ್ ದಿಂವ್ಚಿ ಎಕ್ಚ್ ಏಕ್ ಆಶಾ ಜೆರೊಮಾನ್ ರಾಯನಾಚಾ ಮುಕಾರ್ ಪರ್ಗಟ್ ಕೆಲ್ಲಿ.
ಜೆರೊಮಾಚಾ ಸಿಂತಿಮೆಂತಾಕ್ ವಳ್ಕಾಲ್ಲ್ಯಾ ರಾಯನಾನ್ ಜೆರೊಮಾಚ್ಯಾ ಆಶೆಕ್ ನಿರಾಶಾ ಕರುಂಕ್ ನಾ. ತಾಚ್ಯಾ ಆಶೆ ಆನಿ ಖುಶೆ ಪರ್ಮಾಣೆಂ ರಾಯನ್ ಆನಿ ಮಿಶೇಲಾಚೆಂ ಕಾಜಾರ್ ವ್ಹಡಾ ದಬಾಜಾನ್ ಚಲ್ಲೆಂ. ಬೋವ್ಶ್ಯಾ ಮಂಗ್ಳುರಾಂತ್ ಹಾಚ್ಯಾ ಆದಿಂ ಇತ್ಲ್ಯಾ ಸಂಭ್ರಮಾಚೆಂ ಕಾಜಾರ್ ಕೊಣೆಚ್ ಸಂಭ್ರಮುಂಕ್ ನಾ.
ಮಿಶೇಲಾಚಾ ಕಾಜಾರಾಕ್ ತಾಚ್ಯಾ ಬಾಪಾಯ್ಚಾ ಕುಟ್ಮಾ ಥಾವ್ನ್ ಆಸ್ಟ್ರೇಲಿಯಾಚಿಂ ಆನಿ ಕೆನಡಾಚಿಂ ಸಗ್ಳಿಂ ಕುಟ್ಮಾದಾರಾಂ ಹಾಜರ್ ಜಾಲ್ಲಿಂ.
ರಾಯನಾಚಾ ತರ್ಫೆನ್ ಬಾಲಿವುಡಾ ಥಾವ್ನ್ ಕಲಾಕಾರಾಂಚಿ ವ್ಹಡ್ಲಿ ಸಯ್ತ್ ಪಟ್ಟಿ ಹಾಜರ್ ಜಾಲ್ಲಿ.
ಶೀತಲ್ ಆಪ್ಲ್ಯಾ ನೊವ್ರ್ಯಾ ಸಂಗಿಂ ಆಯಿಲ್ಲೆಂ.
ಮಿಶೇಲಾಕ್ ರಾಯನಾ ಲಾಗಿಂ ಕಾಜಾರ್ ಜಾಂವ್ಚೆಂ ಮನ್ ಆಸ್ಲ್ಲೆಂ ಜಾಲ್ಯಾರ್ಯ್ ತಿತ್ಲ್ಯಾ ಸುಲಾಭಾಯೆನ್ ತೆಂ ಆಪ್ಲ್ಯಾ ಮತಿಕ್ ಆನಿ ಕಾಳ್ಜಾಕ್ ರಾಜಿ ಕರುಂಕ್ ಸಕೊಂಕ್ ನಾತ್ಲ್ಲೆಂ.
ಆಪುಣ್ ಆಪ್ಲ್ಯಾ ಆಜ್ಯಾ ಆನಿ ಆಜಿಯೆಕ್ ಸೊಡುನ್ ಗೆಲಿಂ ಜಾಲ್ಯಾರ್ ತಾಂಚೊ ಫುಡಾರ್ ಕಿತೆಂ ಜಾತಲೊ? ಮ್ಹಳ್ಳೆಂಚ್ ಏಕ್ ಭಳಾಧೀಕ್ ಸವಾಲ್ ಜಾವ್ನ್ ಮಿಶೇಲಾಚಾ ಮುಕಾರ್ ಉಭೆಂ ಜಾಲ್ಲೆಂ.
ಹ್ಯಾ ಸವಾಲಾಕ್ ಸಾಕ್ಸ್ ಜಾವ್ನ್ ಭಿಗಡುನ್ ಆಯಿಲ್ಲಿ ಜೆರೊಮಾಚಿ ಭಲಾಯ್ಕಿ ಮಿಶೇಲಾಚ್ಯಾ ಸವಾಲಾಕ್ ಸಾಂಗಾತ್ ದಿತಾಲಿ ಜಾಲ್ಯಾರ್ ಉತ್ರಾಲ್ಲ್ಯಾ ಪ್ರಾಯೆನ್ ಬೊಕೊರ್ನ್ ಖೆಲ್ಲ್ಯಾ ತಾಚ್ಯಾ ಆಜ್ಯಾ ಆಜಿಯೆಚಾ ಜಿವಾಚಿ ಸಕತ್ ತಾಂಚಾ ಪಾಂಯಾಂಕ್ ದಾಖವ್ನ್ ದಿಂವ್ಚಿ ಪ್ರಾಯ್ವಂತಾಚಾ ಆಸ್ರ್ಯಾಚಿ ವಾಟ್ಯ್ ಮಿಶೇಲಾಚಾ ತ್ಯಾಚ್ ಸವಾಲಾಕ್ ಸಾಂಗಾತ್ ದಿತಾಲಿ.
"ಪಳೆ ಪುತಾ! ತುಂ ಜರ್ ಆಮಿಂ ಸಾಂಗ್ಲ್ಲೆಂ ಆಯ್ಕಾನಾಯ್ ಜಾಲ್ಯಾರ್ ತುವೆಂ ಚಿಂತ್ಚ್ಯಾ ಪ್ರಾಸ್ ಪಯ್ಲೆಂ ಆಮಿಂ ಖರ್ಗೊನ್ ಖರ್ಗೊನ್ ಮೊರ್ಚೆಂ ಪಡ್ತೆಲೆ! ಆಜ್ ಫಾಲ್ಯಾಂ ಜಡೊನ್ ವೆಚ್ಯಾ ಹ್ಯಾ ಪಿಕ್ಯಾ ಖೊಲಿಯಾಂಕ್ ತುಂ ತುಜೆಂ ಪಾಚ್ವೆಂಪಣ್ ಲಾಭಂವ್ಕ್ ಸೊಧ್ತಾಯ್ ತೆಂ ಸಾದ್ಯ್ ನಾ ಪುತಾ! ಜಿವಿತ್ ಕಶೆಂ ಚಲ್ತಾ ತಶೆಂ ಚಲೊಂದಿ! ಜ್ಯಾ ವೆಳಾರ್ ಕಿತೆಂ ಜಾಂವ್ಕ್ ಆಸಾ ತೆಂ ಜಾಂವ್ಕ್ಚ್ ಜಾಯ್! ಹೆಂ ಸೃಶ್ಟೆಚೆಂ ನಿಯಮ್!"
ಜೆರೊಮಾಕ್ ಆನಿ ಎಸ್ತೆಲಾಕ್, ಮಿಶೇಲಾಕ್ ಕಾಜಾರಾಕ್ ತಯಾರ್ ಕರ್ಚೊಚ್ ಏಕ್ ವ್ಹಡ್ಲೊ ಸಮಸ್ಸೊ ಜಾಲ್ಲೊ.
ಹ್ಯಾ ದಿಸಾಂ ಮಧೆಂ ಮಿಶೇಲ್ ಆಪ್ಲ್ಯಾ ಮತಿಕ್ ಧಯ್ರ್ ಸೊಧುನ್ ಸಭಾರ್ ಪಾವ್ಟಿಂ ಒಮ್ಜೂರ್ ವಚೊನ್ ಆಯಿಲ್ಲೆಂ.
ಕಿತ್ಯಾಕ್ಗೀ ಮಿಶೇಲಾಕ್ ತ್ಯಾ ಪೃಕೃತಿಚ್ಯಾ ಸೊಭಾಯೆಂತ್ ಶಾಂತಿ ಆಸಾ ಮ್ಹಣೊನ್ ಭೊಗ್ತಾಲೆಂ. ಏಕ್ ಪಾವ್ಟಿಂ ಹಾಂವ್ ಹ್ಯಾ ಪೃಕೃತಿಕ್ ಸೊಡುನ್ ಗೆಲಿಂ ಜಾಲ್ಯಾರ್ ಪರ್ತ್ಯಾಕ್ ಆಪ್ಣೆ ಹಾಂಗಾ ಯೆಂವ್ಚೆಂ ಕೆದಾಳಾ ತೆಂ ಕೋಣ್ ಜಾಣಾಂ? ಹ್ಯಾ ಸವಾಲಾಕ್ ಭಳಾಧೀಕ್ ಸಾಕ್ಸ್ ಜಾವ್ನ್ ಶೀತಲ್ ಉಭೆಂ ಜಾಲ್ಲೆಂ. ಕಾಜಾರ್ ಜಾವ್ನ್ ಮಂಗ್ಳುರಾಕ್ ಸೊಡುನ್ ಗೆಲ್ಲೆಂ ತೆಂ ಹ್ಯಾ ತಾಚ್ಯಾ ಸಂಸಾರಾಕ್ ಸಂಪೂರ್ಣ್ ವಿಸ್ರೊನ್ ಗೆಲ್ಲೆಂ. ತಾಚೆ ಪರಿಂ ಹಾಂವ್ಯ್ ಕಾಂಯ್ ಫಾಲ್ಯಾಂ......?
ಆಪ್ಣೆ ಲ್ಹಾನ್ಪಣಾರ್ ಥಾವ್ನ್ ಆಜ್ಯಾಚೊ ಹಾತ್ ಧರುನ್ ಭೊವ್ಲೆಲ್ಯಾ ಹ್ಯಾ ತಾಚ್ಯಾ ಪೂರ್ವಜಾಂಚಾ ದಾಯ್ಜಾಚಾ ಕೊನ್ಶ್ಯಾ ಕೊನ್ಶ್ಯಾಕ್ ವಚೊನ್ ಮಿಶೇಲಾನ್ ಆಪ್ಣಾಚೊ ಆನಿ ತಾಂಚಾ ಮಧ್ಲೊ ಸಂಭಂಧ್ ನಿಯಾಳ್ಳೊ.
ತ್ಯಾ ತಳ್ಯಾ ಲಾಗಿಂ, ತಾಂತ್ಲ್ಯಾ ತ್ಯಾ ಧವ್ಯಾ ಸಾಳ್ಕಾಂಲಾಗಿಂ, ಆಗಸಾಕ್ ತೆಂಕುನ್ ರಾವ್ಲೆಲ್ಯಾ ತ್ಯಾ ಮಾಡಾಂಲಾಗಿಂ, ಪಾಚ್ವ್ಯಾ ಸಾಡ್ಯಾಕ್ ಆಂಗ್ಭರ್ ನ್ಹೆಸೊನ್ ರಾವ್ಲೆಲ್ಯಾ ತ್ಯಾ ಶೆತಾಂಲಾಗಿಂ, ತ್ಯಾ ಓಣಿಂತ್ಲ್ಯಾ ಪೊಡ್ಕೊಳಿಂಚಾ ಫುಲಾಂಲಾಗಿಂ, ತ್ಯಾ ಕಾಟ್ಯಾ ವಯ್ಲ್ಯಾ ರುಮ್ಡಾ ರುಕಾಲಾಗಿಂ, ಸಾಂಪೆರಾಚಾ ರುಕಾ ಲಾಗಿಂ, ಮಾಡಿಯೆರ್ ಫುಟ್ಲ್ಲ್ಯಾ ಪಿಂಗಾರಿಲಾಗಿಂ, ವ್ಹಳಾಂತ್ ಭೊಂವ್ಚ್ಯಾ ಮಾಸ್ಳೆಲಾಗಿಂ, ವಯ್ಲ್ಯಾನ್ ಉಭ್ಚ್ಯಾ ಧವ್ಯಾ ಡೊಂಕಾಂಲಾಗಿಂ, ಸರೊಪ್ ಆಸ್ತಾತ್ ಮ್ಹಣೊನ್ ಆಪ್ಣೆ ವಚೊಂಕ್ ಭಿಯೆಂವ್ಚ್ಯಾ ತ್ಯಾ ಚಾಂಪ್ಯಾಚಾ ರುಕಾಲಾಗಿಂ.... ಮಿಶೇಲಾನ್ ವಚಾನಾತ್ಲ್ಲೊ ಜಾಗೊ ನಾ. ತಾಣೆಂ ನಿಯಾಳಿನಾತ್ಲ್ಲೊ ವೇಳ್ ನಾ.
ತೊಟಾಂತ್ಲ್ಯಾ ಕಾಮಾಗಾರಾಂಲಾಗಿಂ ತೆಂ ಹಾಸ್ಲೆಂ ಉಲಯ್ಲೆಂ. ತಾಂಚೆ ಸವೆಂ ತೆಂ ಉಟ್ಲೆಂ ಬಸ್ಲೆಂ. ಲಾಯ್ಡ್ ಆನಿ ಲವೀನಾ ಸಂಗಿಂ ತೆಂ ಖೆಳ್ಳೆಂ ಆನಿ ಧಾಂವ್ಲೆಂ.
ಆಲ್ವಿನಾನ್ ಪಿಂತ್ರಾಯಿಲ್ಲ್ಯಾ ಆಪ್ಣಾಲಾಗಿಂ ಆಸ್ಲ್ಲ್ಯಾ ಪಿಂತುರಾಂಕ್ ತಾಣೆಂ ಪಳೆಲೆಂ. ತಾಂತುಂ ಸೊಧ್ಲೆಂ. ತಾಂತುಂ ಉಸ್ತಿಲೆಂ. ತಾಂತುಂ ಆರಾಯ್ಲೆಂ.
ಕ್ಯಾಥರೀನಾನ್ ದಾಡುನ್ ದಿಲ್ಲ್ಯಾ ತಸ್ವೀರೆಂ ಸಾಂಗಾತಾ ಮಿಶೆಲ್ ಉಲಯ್ಲೆಂ. ಹಾಸ್ಲೆಂ. ಆನಿಂ ಆವಯ್ ಬಾಪಾಯ್ಕ್ ಚಿಂತುನ್ ಕಳ್ವಳೊನ್ ರಡ್ಲೆಂ.
ಪ್ರಾಯ್ವಂತಾಂಚಾ ಆಸ್ರ್ಯಾಕ್ ಹರ್ಶೆಂಚಾ ಪರಿಂ ಭೆಟ್ ದೀವ್ನ್ ಆಯ್ಲೆಂ. ತಾಂಚ್ಯಾಚ್ ಭುರ್ಗ್ಯಾ ಪರಿಂ ತಾಂಚೆಲಾಗಿಂ ರಾವ್ಲೆಂ. ತಾಂಕಾಂ ಭುಜಯ್ಲೆಂ.ತಾಂಚೊ ಆಶೀರ್ವಾದ್ ಘೆವ್ನ್ ಘರಾ ಪಾಟಿಂ ಪರ್ತಾತಾನಾ ಗಳ್ಗಳ್ಯಾಂ ರಡೊನ್ ರಾವ್ಲೆಂ.
ಮಿಶೇಲಾನ್ ಹ್ಯಾ ಸರ್ವಾಂ ಮಧೆಂ ಸೊಧ್ಲ್ಲೆಂ ಎಕ್ಚ್ ಏಕ್!
ಫಕತ್ತ್ ಆಪ್ಣಾಕ್!
ಎಕಾ ವಯ್ರ್ ಏಕ್, ಮಿಶೇಲಾಕ್ ಭರ್ವಸೊ ದಿಂವ್ಚ್ಯಾ ವಾಟೆರ್ ಸಲ್ವೊನ್ ಯೆತಾನಾ ತಾಕಾ ಫುಡಾರಾಚೆಂ ಧಯ್ರ್ ಜಾವ್ನ್ ಉಭೊ ಜಾಲ್ಲೊ ಮ್ಹಳ್ಯಾರ್ ಜಿಮ್ಮಿ ಮಾತ್ರ್!
ಜಿಮ್ಮಿನ್ ಮಿಶೇಲಾಕ್ ಸಮ್ಜಯಿಲ್ಲೆಂ! ನಿಮಾಣೆ ಜಾವ್ನ್ ಮಿಶೇಲಾಚಾ ಆಜ್ಯಾ ಆಜಿಯೆಕ್ ತಾಂಚಾ ನಿಮಾಣ್ಯಾ ಘಡಿಯೆ ಪರ್ಯಾಂತ್ ಆಪುಣ್ ಸಾಂಬಾಳ್ತಾಂ ಮ್ಹಣೊನ್ ತಾಣೆಂ ಮಿಶೇಲಾಕ್ ಭಾಸ್ ದಿಲ್ಲಿ!
ಆಪ್ಣಾಕ್ ಕಾಂಯ್ಚ್ ಸಂಭಂಧ್ ನಾತ್ಲೆಲ್ಯಾ ಎಕಾ ಮನ್ಶ್ಯಾ ಥಾವ್ನ್ ಆಪ್ಲ್ಯಾಂಚಿ ಜತನ್ ಘೆಂವ್ಚಿ ಭಾಸ್!
"ಮಿಶೇಲ್ ತುಜ್ಯಾ ಆಬಾಚೆಂ ೠಣ್ ಮ್ಹಜ್ಯಾ ಮಾತ್ಯಾರ್ ಆಸಾ! ತುಂ ಕಿತೆಂ ಸಾಂಗ್ತಾಯ್ ತೆಂ ಹಾಂವ್ ಕರ್ತಾಂ!"
"ಪ್ರಾಮಿಸ್!"
"ಪ್ರಾಮಿಸ್!" ಜಿಮ್ಮಿನ್ ಮಿಶೇಲಾಕ್ ಭಾಸ್ ದಿಲ್ಲಿ.
ಹ್ಯಾಚ್ ಭಾಸೆ ವರ್ವಿಂ ಮಿಶೇಲ್ ಆಜ್ ಕಾಜಾರಾಕ್ ಆಯ್ತೆಂ ಜಾಲ್ಲೆಂ. ಹ್ಯಾ ಮಿಶೇಲಾನ್ ಕಾಜಾರಾಕ್ ಆಯ್ತೆಂ ಜಾಂವ್ಚ್ಯಾಂತ್ ಜಿಮ್ಮಿಚೊಚ್ ವಾಂಟೊ ಅಧಿಕ್!
ವಾಂಟೊ ತಾಚ್ಯಾ ಧಯ್ರಾಚೊ! ವಾಂಟೊ ತಾಚ್ಯಾ ಭಾಸೆಚೊ!
ಮಂಗ್ಳುರಾಂತ್ ರಾಯನ್ ಆನಿ ಮಿಶೇಲಾಚೆಂ ಕಾಜಾರ್ ಜಾಲ್ಯಾ ಉಪ್ರಾಂತ್ ದೋನ್ ದೀಸ್ ಮಂಗ್ಳುರಾಂತ್ ರಾವ್ಲ್ಲೊ ರಾಯನ್ ತಿಸ್ರ್ಯಾ ದಿಸಾ ಆಪ್ಲ್ಯಾ ಹೊಕ್ಲೆಕ್ ಘೆವ್ನ್ ಮುಂಬಯಿ ಭಾಯ್ರ್ ಸರ್ಲೊ.
ರಾಯನಾಚೊ ಸಂಸಾರ್ ಮುಂಬಯಿ ಜಾಲ್ಲ್ಯಾನ್ ಮುಂಬಯಿಂತ್ ಆಪ್ಲ್ಯಾ ಕಾಜಾರಚಿ ಪಾರ್ಟಿ ತಾಣೆಂ ದವರ್ಲಿ. ಹ್ಯಾ ಪಾರ್ಟೆಕ್ ಬಿಜ್ನೆಸಾಚಾ ಸಂಸಾರಾಂತ್ಲೆ ವ್ಹಡ್ಲೆ ವ್ಹಡ್ಲೆ ಮನಿಸ್ ಹಾಜರ್ ಜಾಲ್ಲೆ ಆಸ್ತಾಂ ತಾಂಚಾ ಮಧೆಂ ಬಾಲಿವುಡಾಚಾ ಸಿನೇಮಾ ಸಂಸಾರಾಂತ್ಲಿಂ ಪರಿಚಿತ್ ಮನ್ಶ್ಯಾಂಯ್ ಹಾಜರ್ ಜಾಲ್ಲಿಂ.
ರಾಯನಾಕ್ ಹೊ ತಾಚೊಚ್ ಸಂಸಾರ್ ಜಾಲ್ಯಾರ್ ಮಿಶೇಲಾಕ್ ಮಾತ್ರ್ ಹೊ ಏಕ್ ನವೊ ತಸೊ ದುಸ್ರೊಚ್ ಸಂಸಾರ್!
ರಾಯನಾ ಸಂಗಿಂ ಕಾಜಾರ್ ಜಾವ್ನ್ ತಾಚ್ಯಾ ಜಿವಿತಾಚೊ ವಾಂಟೊ ಜಾಲ್ಲ್ಯಾ ಮಿಶೇಲಾನ್ ಆತಾಂ ರಾಯನಾಚಾ ಸಂಸಾರಾಚೊಯ್ ಏಕ್ ವಾಂಟೊ ಜಾಂವ್ಕ್ ಜಾಯ್ ಆಸ್ಲ್ಲೆಂ.
ಮುಂಬಯಿಚ್ಯಾ, ದೀಸ್ ಆನಿ ರಾತ್ ಮ್ಹಳ್ಳೊ ಫರಕ್ ನಾತ್ಲೆಲ್ಯಾ ಹ್ಯಾ ಸಂಸಾರಾಂತ್ ಮಿಶೇಲ್ ಪಯ್ಲ್ಯಾ ಪಾವ್ಟಿಂ ಪಾಂಯ್ ದವರ್ತಾ ತಶೆಂ ಜಾಲ್ಲೆಂ ತಾಕಾ.
ಮಂಗ್ಳುರ್ಚ್ಯಾ ಗಾಂವಾಂತ್ ಇತ್ಲೆ ದೀಸ್ ಲಿಪೊನ್ ಗೆಲ್ಲೆಂ, ತೆಂ ತಾಣೆಂ ಪಳೆಲ್ಲೆಂ ಮ್ಯಾಂಚೆಸ್ಟರಾಚೆಂ ರಾತಿಂಚೆಂ ಪಿಂತುರ್ ಮುಂಬಯಿಚ್ಯಾ ಪಾರ್ಟೆಂತ್ ಮಿಶೇಲಾಕ್ ಉಡಾಸ್ ಆಯ್ಲೆಂ.
ಉಡಾಸ್ ಗಯ್ರೊ ಗಯ್ರೊ ಜಾಲ್ಯಾರ್ಯ್ ತಿಂ ಮತಿಂತ್ಲಿಂ ಪಿಂತುರಾಂ ಅಸ್ಪಶ್ಟ್ ಜಾಲ್ಯಾರ್ಯ್ ತಾಂಕಾಂ ಎಕಾಮೆಕಾ ಸಂಭಂಧ್ ಆಸಾ ಮ್ಹಳ್ಳ್ಯಾಪರಿಂ ದಿಸ್ಚಿಂ ಪಿಂತುರಾಂ, ತಾಂಚಾ ಪರ್ದ್ಯಾ ಪಾಟ್ಲ್ಯಾನ್ ಲಿಪ್ಲ್ಲ್ಯಾ ತ್ಯಾ ರಂಗ್ ರಂಗೀನ್, ನಮುನ್ಯಾವಾರ್, ಆಪ್ಣೆ ಆಪ್ಲ್ಯಾ ನೆಣ್ತ್ಯಾ ದೊಳ್ಯಾಂನಿ ಮ್ಯಾಂಚೆಸ್ಟರಾಚಾ ತ್ಯಾ ದಿಸಾಂನಿ ಪಳೆಲ್ಲೆ ರಂಗ್ ಮಿಶೇಲಾಕ್ ಉಡಾಸಾಕ್ ಆಯ್ಲೆ.
ಹೆ ಜಿವಿತಾಚೆ ರಂಗ್? ವಾ ಸಂಸಾರಾಚೆ?
ತ್ಯಾ ದಿಸಾಂನಿ ಮಿಶೇಲಾನ್ ಪಳೆಲ್ಲೆ ತೆ ವೀಜ಼್ ದಿವ್ಯಾಂಚೆ ರಂಗ್ ಆಜ್ ಪಾಸೊನ್ ತಾಚ್ಯಾ ಜಿವಿತಾಂತ್ ಮಾಜ್ವೊಂಕ್ ನಾತ್ಲ್ಲೆ. ತ್ಯಾ ರಂಗಾ ಸಾಂಗಾತಾ ಆನಿ ತ್ಯಾ ತ್ಯಾ ಸಪ್ಣಾಂ ಸಾಂಗಾತಾ ತಾಣೆಂ ಆಪ್ಲೆಂ ಜಿವಿತ್ ಸಾರ್ಲ್ಲೆಂ. ತ್ಯಾ ಸಾರ್ಲೆಲ್ಯಾ ಜಿವಿತಾಂತ್ ತೆ ರಂಗ್ ಫಕತ್ತ್ ರಂಗ್ ಜಾವ್ನ್ ಆಸ್ಲ್ಲೆ.
ಜೀವ್ ನಾಸ್ಲೆಲೆ ರಂಗ್!
ಖಂಯ್ ಜಾಯ್ ಥಂಯ್ ಉಡ್ಚೆ ರಂಗ್!
ದಿಶಾ ನಾಸ್ತಾನಾ ಉಭೊನ್ ವೆಚೆ ಮತಿಕ್ ಸೊಭಾಯ್ ದಿಂವ್ಚೆ ರಂಗ್!
ಪುಣ್ ಹಾಂಗಾ?
"ಕಿತೆಂ ಮಿಶೇಲ್? ತುಂ ಖುಶಿ ನಾಂಯ್?" ರಾಯನಾನ್ ಮಿಶೇಲಚಾ ತೊಂಡಾರ್ ಎಕಾ ಥರಾಚಾ ನಿರಾಶೆಚೊ ಛಾರೊ ಪಳೆಲ್ಲೊ.
"ಹೆಂ ಸಗ್ಳೆಂ ತುಕಾ ಆತಾಂ ನವೆಂ ಡಾರ್ಲಿಂಗ್..... ಸವ್ಕಾಸ್ ದೀಸ್ ಗೆಲ್ಲ್ಯಾ ಪರಿಂ ಸಗ್ಳೆಂ ಸಾರ್ಕೆಂ ಜಾತೆಲೆಂ!" ತಾಕಾ ಮಿಶೇಲಾಚಾ ಹ್ಯಾ ನಿರಾಶೆಚಾ ವರ್ತನಾಚೆಂ ಕಾರಾಣ್ ಕಿತೆಂ ಮ್ಹಳ್ಳೆಂ ಕಳಿತ್ ಆಸ್ಲ್ಲೆಂ.
"ಹಾಂವ್ ಜಾಣಾಂ ಮಿಶೇಲ್! ತುಜೆಂ ಕಾಳಿಜ್ ರಸ್ಮಾಚಾ ದಾಗ್ಯ ಪರಿಂ ಚಡ್ಚ್ ನಾಜೂಕ್! ತುಕಾ ಕಶ್ಟ್ ಜಾತೆಲೆ ಪುಣ್ ತುವೆಂ ಸಾಂಬಾಳ್ಚೆಂ ಪಡ್ತೆಲೆಂ!"
ಹ್ಯಾ ವೆಳಾರ್ ಮಿಶೇಲಾಕ್ ಜಿಮ್ಮಿನ್ ಸಾಂಗ್ಲೆಲಿಂ ಉತ್ರಾಂ ಉಡಾಸ್ ಆಯ್ಲಿಂ. ತೆದ್ನಾಂ ತಿಂ ಉತ್ರಾ ಮಿಶೇಲಾಕ್ ಮಿಸ್ತೆರ್ ಮ್ಹಳ್ಳ್ಯಾ ಪರಿಂ ಜಾಲ್ಲಿಂ. ಜಾಲ್ಯಾರ್ಯ್ ತ್ಯಾ ಉತ್ರಾಂನಿ ಬರ್ಪೂರ್ ಸತ್ ಆಸಾ ತೆಂ ಮಿಶೇಲಾಕ್ ಆಜ್ ಹ್ಯಾ ತಾಚ್ಯಾ ಕಾಜಾರಾಚಾ ಪಾರ್ಟೆಂತ್ ಕಳೊನ್ ಆಯ್ಲೆಂ.
"ಆಜ್ ಪಾಸೊನ್ ಮ್ಹಾಕಾ ಹೆಂ ಸಮ್ಜಾನಾ ಜಿಮ್ಮಿ..... ತುಂ, ಚಲಿಯೆಕ್ ಇತ್ಲ್ಯಾ ಲಾಗಿಂ ಥಾವ್ನ್ ಕಸೊ ವಳ್ಕಾತಾಯ್?" ತ್ಯಾ ದಿಸಾ ಮಿಶೇಲಾನ್ ಕೆಲ್ಲೆಂ ಸವಾಲ್ ಆಜ್ ಪರ್ತ್ಯಾಕ್ ಮಿಶೇಲಾಚಾ ವೊಂಟಾರ್ ಉದೆಲೆಂ.
"ಹಾಂವ್!" ಮಿಶೇಲಾಚಾ ಸವಾಲಾಕ್ ತೊ ಫಕತ್ತ್ ಹಾಸ್ಲ್ಲೊ ಮಾತ್ರ್. ತ್ಯಾ ಹಾಸ್ಯಾಂ ಪಾಟ್ಲ್ಯಾನ್ಯ್ ಏಕ್ ಭಾಂಧ್ ಆಸಾ ಆನಿ ತ್ಯಾ ಭಾಂಧಾ ಪಾಟ್ಲ್ಯಾನ್ಯ್ ಎಕಾ ನಮುನ್ಯಾಚೆಂ ಸಮ್ಜಣೆಚೆಂ ಜಿವಿತ್ ಆಸಾ. ತೆಂ ಜಿವಿತ್ ಗೊಡ್ಸಾಣೆಚೆಂ ವಾ ಕೊಡ್ಸಾಣೆಚೆಂ? ಹೆಂ ಸಮ್ಜೊಂಕ್ ಜಾಯ್ ಜಾಲ್ಯಾರ್ ತೊ ಭಾಂಧ್ ತುಟೊಂಕ್ ಜಾಯ್! ಹೊ ಭಾಂಧ್ ಕೆದ್ನಾಂ ತುಟ್ತಲೊ? ಆನಿ ಹ್ಯಾ ಸಂಸಾರಾಕ್ ಕಶೆಂ ಸಮ್ಜಾತೆಲೆಂ? ಮಿಶೇಲಾನ್ ಚಿಂತ್ಲ್ಲೆಂ ಮಾತ್ರ್.
ಜಿಮ್ಮಿನ್ ತ್ಯಾ ದಿಸಾ ಮ್ಹಾಕಾ ಮ್ಹಜ್ಯಾ ಭವಿಶ್ಯಾ ವಿಶಿಂ ಸಾಂಗ್ಲ್ಲಿ ಉತ್ರಾಂ ಖಂಡಿತ್ ವಜನ್ ಭರಿತ್! ಪುಣ್ ತಾಕಾ ಹಿ ದೂರ್ದ್ರಶ್ಟಿ ಖಂಯ್ ಥಾವ್ನ್ ಆಯ್ಲಿ?
ತಾಚ್ಯಾ ಸಂಯ್ಬಾಸೊ ಗೂಣ್? ವಾ ಜಿವಿತಾಚಿ ಶಿಕವ್ಣ್?
ಹೊ ವಿಶಯ್ ಮಿಶೇಲಾಕ್ ಆನಿ ಶೀತಲಾಕ್ ಮಿಸ್ತೆರ್ಚ್ ಜಾವ್ನ್ ಉರ್ಲ್ಲೊ ಜಾಲ್ಯಾರ್ಯ್ ಜಿಮ್ಮಿನ್ ಉಚಾರ್ಲ್ಲೆಂ ಮಾತ್ರ್ ಮಿಸ್ತೆರ್ ಜಾವ್ನ್ ಉರೊಂಕ್ ನಾತ್ಲ್ಲೆಂ.
ರಾಯನಾನ್ ಸಾಂಗ್ಚೆಂಯ್ ಸಾರ್ಕೆಂ! ಮಂಗ್ಳುರಾಂತ್ಲ್ಯಾ ಜಿವಿತಾಂತ್ ಆನಿ ಮುಂಬಯಿಚ್ಯಾ ಜಿವಿತಾಂತ್ ಮಸ್ತ್ ಅಂತರ್ ಆಸ್ಲ್ಲೊ. ಹ್ಯಾ ಅಂತರಾಕ್ ಉಣೊ ಕರುಂಕ್ ಎಕಾನ್ ಏಕ್ ಮಿಶೇಲ್ ತಯಾರ್ ನಾತ್ಲ್ಲೆಂ. ತಾಕಾ ಖಂಡಿತ್ ವೆಳಾಚಿ ಗರ್ಜ್ ಆಸ್ಲ್ಲಿ.
ಜಿತ್ಲೆಂ ಮಿಶೇಲಾನ್ ರಾಯನಾಚಾ ವಿಶಿಂ ತ್ಯಾ ಚಾರ್ ದಿಸಾಂನಿ ತೊ ಮಂಗ್ಳುರಾಂತ್ ಆಸ್ತಾನಾ ಆಯ್ಕಾಲ್ಲೆಂ ತಾಚ್ಯಾಕ್ಯ್ ಸಭಾರ್ ವಾಂಟ್ಯಾಂನಿ ಚಡ್ ರಾಯನ್ ಮುಂಬಯಿಚ್ಯಾ ಸಂಸಾರಾಂತ್ ಮೆತೆರ್ ಆಸ್ಲ್ಲೊ. ಹೆಂ ಮಿಶೇಲಾಕ್ ಆಜ್ಚ್ ಕಳ್ಲ್ಲೆಂ.
ಜಶೆಂ ವೇಳ್ ರಾವಾನಾ ತಶೆಂ ಜಿವಿತ್ಯ್ ರಾವಾನಾ. ತೆಂ ಚಲೊನ್ಚ್ ಆಸ್ತಾ. ಹ್ಯಾ ಚಲ್ಚ್ಯಾ ಜಿವಿತಾಕ್ ಮನ್ಶ್ಯಾನ್ ಮಾತ್ರ್ ಸಾಂಗಾತ್ ದೀಂವ್ಕ್ ಪಡ್ತಾ. ಜಶೆಂ ಮಿಶೇಲ್ ಆಜ್ ಸಾಂಗಾತ್ ದೀಂವ್ಕ್ ಆಯ್ತೆಂ ಜಾಲ್ಲೆಂ ತಶೆಂ.
ಆಯ್ಚ್ಯಾ ಹ್ಯಾ ತಾಚ್ಯಾ ಕಾಜಾರಾಚ್ಯಾ ಪಾರ್ಟೆಂತ್ ಮಿಶೇಲಾಕ್ ಚಡ್ ಲಾಗ್ಶಿಲ್ಯಾನ್ ವಳ್ಕೊಂಚೆಂ ಆನಿ ಸಂಭಂಧ್ ದವರ್ಲ್ಲೆಂಆಸ್ಲ್ಲೆಂ ಮ್ಹಳ್ಯಾರ್ ಶೀತಲ್ ಮಾತ್ರ್! ಪುಣ್ ರಾಯನಾಚಾ ಸಂಸಾರಾಂತ್ ಮಿಶೇಲ್ ಆನಿ ಶೀತಲ್ಯ್ ಎಕಾಮೆಕಾ ಪರಿಚಿತ್ ಆಸೊನ್ ಅಪರಿಚಿತ್ ಮ್ಹಳ್ಳ್ಯಾ ಪರಿಂ!
ದೊಗಾಂಯ್ಚಾ ನವ್ಯಾ ಸಂಭಂಧಾನ್ ತಾಂಚೊ ತೊ ಪರ್ನೊ ಸಂಭಂಧ್ ತುಟಂವ್ಕ್ ನಾತ್ಲ್ಲೊ. ಕಾಳ್ಜಾ ಭಿತರ್ಚ್ ತೊ ಮುರ್ಮುರೊನ್ ಆಸ್ಲ್ಲೊ. ಕಾರಾಣ್, ತಾಂಚಾ ದೊಗಾಂಯ್ಚಾ ತ್ಯಾ ಆದ್ಲ್ಯಾ ಸಂಭಂಧಾಂತ್ ಅಚಾನಕ್ ಪ್ರವೇಶ್ ಜಾವ್ನ್ ಆಯಿಲ್ಲ್ಯಾ ನವ್ಯಾ ಖಾಸ್ಗಿ ಸಂಭಂಧಾನ್ ಜಿವಿತಾಚಾ ಪಯ್ಣಾಂತ್ ಚಡ್ ಮಹತ್ವ್ ಘೆತ್ಲ್ಲೊ.
ಹ್ಯಾಚ್ ಕಾರಾಣಾಕ್ ಲಾಗೊನ್ ಶೀತಲ್ ತಾಚ್ಯಾ ನೊವ್ರ್ಯಾ ಸಾಂಗಾತಾ ರಾಯನಾಚಾ ಪಾರ್ಟೆಂತ್ ಹಾಜರ್ ಆಸ್ಲ್ಲೆಂ ಜಾಲ್ಯಾರ್ಯ್ ತೆಂ ಆಪ್ಲ್ಯಾ ಘೊವಾ ಸಾಂಗಾತಾ ನವ್ಯಾಸಾಂವಾಂತ್ ಮೌನ್ ಆಸ್ಲ್ಲೆಂ!
"ಯೇ ಮಿಶೇಲ್! ತುಕಾ ಹಾಂವ್ ಥೊಡ್ಯಾಂಚಿ ವಳಕ್ ಕರುನ್ ದಿತಾಂ!" ಖುದ್ದ್ ರಾಯನಾನ್ಚ್ ಮಿಶೇಲಾಕ್ ಪಾರ್ಟೆಕ್ ಆಯಿಲ್ಲ್ಯಾಂಚಿ ವಳಕ್ ಕರುನ್ ದಿಲಿ.
ಮಿಶೇಲಾನ್ ಕಾಂಯ್ ಉಲಂವ್ಚ್ಯಾ ಪರಿಂಯ್ ನಾತ್ಲ್ಲೆಂ. ಹ್ಯಾ ತಾಚ್ಯಾಆಯ್ಚ್ಯಾ ನವ್ಯಾ ಪರಿಸರಾಂತ್ ತಾಣೆಂ ಸಂಪೂರ್ಣ್ ಆಪ್ಲ್ಯಾ ಘೊವಾಕ್ ಆಯ್ಕೊಂಕ್ ಜಾಯ್ ಆಸ್ಲ್ಲೆಂ. ತಾಚ್ಯಾ ಘೊವಾ ಶಿವಾಯ್ ತೆಂ ಕಾಂಯ್ಚ್ ನೆಣಾಂ! ತೆಂ ಫಕತ್ತ್ ರಾಯನಾಕ್ ಸಾಂಗಾತ್ ದೀಂವ್ಕ್ ಲಾಗ್ಲೆಂ.
"ಮಿಸ್ಟರ್ ರಾಜೀವ್ ಮಲ್ಹೋತ್ರಾ!" ಹ್ಯಾ ವರ್ಸಾಚಾ ಬೆಸ್ಟ್ ಡೈರಕ್ಟರಾಂಚಾ ನಾಂವಾಂತ್ ಹಾಚೆಂ ನಾಂವ್ ಆಸಾ!
"ಮಿಸ್ಟರ್ ಪ್ರಕಾಶ್ ಬಜಾಜ್!" ಬಾಲಿವುಡಾಚೊ ಫೈನೆಸ್ಟ್ ಆರ್ಟ್ ಮೂವಿ ಮೇಕರ್!
"ಜನಾಬ್ ಸಾಜಿದ್!" ಆದ್ಲ್ಯಾ ವರ್ಸಾಚಾ ಬೆಸ್ಟ್ ಲಿರಿಕ್ಸಾಕ್ ಆವಾರ್ಡ್ ಆಪ್ಣಾಯಿಲ್ಲೊ!
"ಮಿಸ್ಟರ್ ರಬೀಂದರ್!" ಹ್ಯಾ ವರ್ಸಾಚೊ ಹಿಟ್ ಮ್ಯೂಸಿಕ್ ಡೈರೆಕ್ಟರ್!
"ಮಿಸ್ಸ್ ಮಾಳವೀಕಾ! ಬೋವ್ಶಾ ತುಂ ಜಾಣಾಂಯ್ ವನ್ ಆಫ್ ದಿ ಬೆಸ್ಟ್ ಸಿಂಗರ್!
ರಾಯನ್ ಎಕೇಕ್ಲ್ಯಾಂಚಿಚ್ ವ್ಹಳಕ್ ಕರವ್ನ್ ದಿತಾಲೊ. ಮಿಶೇಲ್ ಫಕತ್ತ್ ರಾಯನಾಕ್ ಆಯ್ಕಾತಾಲೆಂ ಆನಿ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡುನ್ ರಾಯನಾನ್ ಕರವ್ನ್ ದಿಂವ್ಚ್ಯಾ ವಳ್ಕೆಕ್ ಆಪ್ಲ್ಯಾ ಮತಿಂತ್ ದವರುಂಕ್ ಪೆಚಾಡ್ತಾಲೆಂ.
ಹೆಂ ಮಿಶೇಲಾಕ್ ತಿತ್ಲೆಂ ಸುಲಾಭಾಯೆಚೆಂ ನ್ಹಂಯ್ ಜಾವ್ನಾಸ್ಲ್ಲೆಂ!
ಖುದ್ದ್ ಮಿಶೇಲ್ ಮಂತನಾಚಾ ಕುಟ್ಮಾಂತ್ ಜಲ್ಮೊನ್ ವಾಡೊನ್ ಆಯಿಲ್ಲೆಂ ಜಾಲ್ಯಾರ್ಯ್ ಅಸಲ್ಯಾ ಹ್ಯಾ ಲೊಕಾಂ ಮಧೆಂ ಉಟೊನ್ ಬಸ್ಲ್ಲೆಂ ಚೆಡುಂ ತೆಂ ನ್ಹಂಯ್ ಆಸ್ಲ್ಲೆಂ.
ಹೆಣೆ ತೆಣೆ ಆಪ್ಣೆ ಆಯ್ಕಾಲ್ಲೆ, ಆಪ್ಣೆ ವಾಚ್ಲ್ಲೆ, ಪಿಂತುರಾಂನಿ ಪಳೆಲ್ಲೆ ಮನಿಸ್ ಆಜ್ ತಾಚ್ಯಾ ದೊಳ್ಯಾಂ ಮುಕಾರ್ ಹಾಜರ್ ಆಸ್ಲ್ಲೆ!
ಜಶೆಂ ಆಪ್ಲ್ಯಾಚ್ ದಿಶ್ಟೆಚಾ ಅನಂತಾಯೆಂತ್ ಆಪ್ಣೆ ಪಳಂವ್ಕ್ ಖುಶಿ ವೆಲ್ಲೆ ಆನಿ ಖುಶಿ ವರ್ಚೆ, ತೆಚ್ ರಂಗ್ ರಂಗೀನ್ ನಮುನ್ಯಾವಾರ್ ರಂಗ್!
ತರ್, ಹಾಂವ್ ಹ್ಯಾ ವರ್ಣಾಳ್ ರಂಗಾಂಚಾ ಸಂಸಾರಾಂತ್ ಪಾವ್ಲ್ಯಾಂ?
ಹರ್ಯೆಕ್ಲ್ಯಾನ್ ಆಪುಣ್ ಜಾಂವ್ಕ್ ಆಶೆಂವ್ಚೆ ಹೆ ಪರ್ದ್ಯಾ ವಯ್ಲೆ ರಂಗ್..... ಕಿತೆಂ ಹೆಚ್ ಹೆ ರಂಗ್?
"ಮಿಶೇಲ್! ತುಕಾ ಆತಾಂ ಹಾಂವ್ ಬಾಲಿವುಡಾಚಾ ಟಾಪ್ ಹಿರೋಯಿನಾಕ್ ಮೆಳಯ್ತಾಂ. ಕಮಾನ್....!" ಮಿಶೇಲಾಚಾ ಹಾತಾಕ್ ಧರುನ್ ರಾಯನ್ ತಾಕಾ ಆಪವ್ನ್ ವರುನ್ ಗೆಲೊ.
ಸಗ್ಳ್ಯಾಂಚಿ ದೀಶ್ಟ್ ಮಿಶೇಲಾಚೆರ್ಚ್ ಖಂಚ್ಲ್ಲಿ! ಮಿಶೇಲಾಕ್ ಪಳವ್ನ್ ಕೋಣ್ ವೋಂಟ್ ಉಸವ್ನ್ ಹಾಸ್ತಾ ತರ್ ಕೋಣ್ ಫಕತ್ತ್ ವೋಂಟ್ ರುಂದಾವ್ನ್ ಹಾಸ್ತಾ!
"ತುಂ ಜಾಣಾಯ್ ಮಿಶೇಲ್?" ಚಲೊನ್ ಆಸ್ಲ್ಲ್ಯಾ ಪರಿಂಚ್ ರಾಯನ್ ಮಿಶೇಲಾಚಾ ಕುಶಿಕ್ ಘುಂವ್ಲೊ "ಆಜ್ ಹಾಂಗಾಸರ್ ತುಜಿಚ್ ಚರ್ಚಾ ಚಲ್ತಾ!"
ಮಿಶೇಲ್ ಮೌನ್ ಆಸ್ಲ್ಲೆಂ. ತಾಕಾ ಹ್ಯಾ ವಿಶಯಾಂತ್ ಚಡ್ ಮೆತೆರ್ ಜಾಂವ್ಚಿ ಇಚ್ಚಾ ನಾತ್ಲ್ಲಿ. ವಳಕ್ ನಾತ್ಲೆಲ್ಯಾ ಹೆವ್ಶಿಲ್ಯಾ ತೆವ್ಶಿಲ್ಯಾ ಸಗ್ಳ್ಯಾಂಕ್ ಹಾಸೊ ಪಾಟವ್ನ್ ತಾಕಾ ಪುರಾಸಣ್ ಜಾಲ್ಲಿ. ಹೆಂ ಸಗ್ಳೆಂ ಫಕತ್ತ್ ಭಾಯ್ಲ್ಯಾ ದೆಖಿಚೆಂ ಆಡಂಬರ್ ಮ್ಹಣೊನ್ ತೆಂ ಪಾತ್ಯೆಲ್ಲೆಂ.
"ಕಿತ್ಯಾಕ್ ಮ್ಹಣೊನ್ ವಿಚಾರಿನಾಂಯ್?" ಮಿಶೇಲ್ ವೊಗೆಂಚ್ ಆಸ್ಲ್ಲೆಂ ಪಳವ್ನ್ ರಾಯನಾನ್ಚ್ ವಿಚಾರ್ಲೆಂ.
ರಾಯನಾಚಾ ಸವಾಲಾಕ್ ಮಿಶೇಲಾನ್ ಫಕತ್ತ್ ರಾಯನಾಕ್ ಪಳೆಲೆಂ ಮಾತ್ರ್ ಶಿವಾಯ್ ತೆಂ ಕಾಂಯ್ಚ್ ಉಲಯ್ಲೆಂ ನಾ.
"ತುಂ ಆಜ್ ಆಂಜಾಪರಿಂ ದಿಸ್ತಾಯ್ ಮಿಶೇಲ್!"
ರಾಯನಾನ್ ಸಾಂಗ್ತಾನಾ ಕಿತ್ಯಾಕ್ಗೀ ಮಿಶೇಲಾಚಿ ಮತ್ ಪ್ರಫುಲ್ಲಾತಾಯೆನ್ ಭರ್ಲಿ. ಹ್ಯಾ ಸಗ್ಳ್ಯಾ ಅಪರಿಚಿತ್ ಲೊಕಾಂ ಮಧೆಂ ಆಪುಣ್ ಖಂಯ್ಚರ್ಗೀ ಲ್ಹಾನ್ ಮ್ಹಳ್ಳ್ಯಾ ಪರಿಂ ಭೊಗೊನ್ ಆಸ್ಲ್ಲ್ಯಾ ಮಿಶೇಲಾಚಾ ಕಾಳ್ಜಾಕ್ ರಾಯನಾಚಿಂ ಉತ್ರಾಂ ನವೊ ಹುರುಪ್ ದೀಂವ್ಕ್ ಪಾವ್ಲಿಂ.
ಬಾಲಿವುಡ್ ಮ್ಹಳ್ಯಾರ್ ದುಸ್ರೊಚ್ ಏಕ್ ಸಂಸಾರ್ ಮ್ಹಳ್ಳೊ ಅಭಿಪ್ರಾಯ್ ಮತಿಂತ್ ಪಿಂತ್ರಾಯಿಲ್ಲ್ಯಾ ಮಿಶೇಲಾಕ್, ಹೊ ಆಪ್ಣೆ ವಿಂಗಡ್ಚ್ ಮ್ಹಣೊನ್ ಚಿಂತ್ಚೊ ಸಂಸಾರ್ಯ್ ಮ್ಹಜ್ಯಾಚ್ ಸಂಸಾರಾಚೊ ಏಕ್ ವಾಂಟೊ ಮ್ಹಳ್ಳ್ಯಾ ಪರಿಂ ಜಾಂವ್ಕ್ ಲಾಗ್ಲೊ.
"ಅಮ್ರತಾ.....!"
ಸಾದಾರ್ಣ್ ಎಕಾ ಪ್ರಾಯೆಸ್ತ್ ವ್ಯಕ್ತಿ ಲಾಗಿಂ ಉಲವ್ನ್ ಆಸ್ಲ್ಲೆಂ ಅಮ್ರತಾ ಆಪ್ಣಾಕ್ ಆಪಯಿಲ್ಲೆಂ ಆಯ್ಕೊನ್ ಹೆವ್ಶಿಂ ಘುಂವ್ಲೆಂ.
"ರಾಯನ್....! ಕಾಂಗ್ರಾಜುಲೇಶನ್ಸ್!" ರಾಯನಾಕ್ ಪಳವ್ನ್ ಉದ್ಗಾರ್ಲ್ಲ್ಯಾ ಅಮ್ರತಾನ್ ರಾಯನಾಕ್ ಹಾತ್ ಮೆಳಯ್ಲೊ. "ತುವೆಂ ಸಗ್ಳ್ಯಾ ಇಂಡಸ್ಟ್ರಿಕ್ಚ್ ಶಾಕ್ ದಿಲೊಯ್!" ಅಮ್ರತಾ ವ್ಹಡ್ಲ್ಯಾನ್ ಹಾಸಾಲಾಗ್ಲೆಂ.
"ಮಿಶೇಲ್! ಹೆಂ ಅಮ್ರತಾ! ದಿ ಬೋಲ್ಡ್ ಇಂಡಿಯನ್ ಐಡಲ್ ಆಫ್ ಬಾಲಿವುಡ್!"
"ಓ...... ನೋ ಯಾರ್!" ಅಮ್ರತಾನ್ ಆಪ್ಲ್ಯಾ ಹಾತಾನ್ ರಾಯನಾಚಾ ಬಾವ್ಳ್ಯಾಕ್ ಧರುನ್ ಲೊಟುನ್ ತೆಂ ಹಾಸೊಂಕ್ ಲಾಗ್ತಾನಾ ರಾಯನ್ ಥೊಡೊ ಮಾಲ್ವಾಲ್ಲೊ ಮಾತ್ರ್! ಕಿತ್ಯಾಕ್......, ಅಮ್ರತಾಚಾ ವ್ಹಾಣಾಂಚಿ ಪಕತ್ತ್ ಚಾರ್ಶಿಂ ಗ್ರಾಮ್ ವಜನ್ ಮಾತ್ರ್ ತ್ಯಾ ಧರ್ಣಿರ್ ಉರೊನ್ ಉರ್ಲೆಲಿ ಸಗ್ಳಿ ತಾಚಿ ವಜನ್ ರಾಯನಾಚಾ ಆಂಗಾರ್ ಮಾಲ್ವಾಲ್ಲಿ.
ಪಯ್ಲ್ಯಾಚ್ ನದ್ರೆಂತ್ ಅಮ್ರತಾ ಕಿತ್ಯಾಕ್ಗೀ ಮಿಶೇಲಾಕ್ ಬರೆಂ ಲಾಗ್ಲೆಂ ನಾ. ಹಾಂಗಾ ಸಗ್ಳೆಂ ಕೃತಕ್ ಮ್ಹಳ್ಳ್ಯಾ ಪರಿಂ ತಾಕಾ ಜಾಲೆಂ.
"ಹಾಯ್!" ಅಮ್ರತಾನ್ ಮಿಶೇಲಾಕ್ ಹಾತ್ ದಿಲೊ.
"ಜಿತ್ಲೆಂ ಹಾವೆಂ ಆಯ್ಕಾಲ್ಲೆಂ ತಾಚ್ಯಾಕ್ಯ್ ಚಡ್ ತುಜೆಂ ಹೊಕಾಲ್ ಸೊಭಿತ್!" ಮಿಶೇಲಾಕ್ ವಯ್ರ್ ಥಾವ್ನ್ಸಕಯ್ಲ್ ಪಾಸೊನ್ ಪಳವ್ನ್ ಅಮ್ರತಾ ಉದ್ಗಾರ್ಲೆಂ.
"ತ್ಯಾಚ್ ಖಾತಿರ್ ತೆಂ ಮ್ಹಜೆಂ ಹೊಕಾಲ್!" ಉದ್ಗಾರ್ಲ್ಲ್ಯಾ ರಾಯನಾನ್ ಆಪ್ಲ್ಯಾ ದಾವ್ಯಾ ಹಾತಾನ್ ಮಿಶೇಲಾಕ್ ಆರಾವ್ನ್ ಧರ್ಲೆಂ.
"ಕ್ಯಾರಿ ಆನ್!"
ಮಿಶೇಲಾಕ್ ಘೆವ್ನ್ ರಾಯನ್ ಆತಾಂ ಮುಕಾರ್ ಚಲ್ಲೊ.
ಹ್ಯಾಚ್ ಘಡಿಯೆಕ್ ರಾಕೊನ್ ರಾವ್ಲ್ಲ್ಯಾ ಪರಿಂ ದಿಸ್ಲ್ಲೊ, ಪಯ್ಸ್ ಥಾವ್ನ್ ರಾಯನಾಕ್ಚ್ ಪಳವ್ನ್ ಆಸ್ಲ್ಲೊ ಏಕ್ ವ್ಯಕ್ತಿ ವೆವೆಗ್ಗಿಂ ಆಪ್ಲೆಂ ಸೆಲ್ಪೋನ್ ಭಾಯ್ರ್ ಕಾಡುನ್ ತೊ ಪೋನ್ ಡಯಲ್ ಕರುಂಕ್ ಲಾಗ್ಲೊ.
ತಿತ್ಲೆಂಚ್!
ತ್ಯಾ ವ್ಯಕ್ತಿನ್ ಟೆಲಿಪೋನಾರ್ ಉಲಂವ್ಕ್ ಜಾಯ್ ಆಸ್ಲ್ಲೆಂ ಉಲವ್ನ್ ಜಾವ್ನ್ ಪೋನ್ ಭಂಧ್ ಕರುನ್ ತ್ಯಾ ಪೊನಾಕ್ ತಾಚ್ಯಾ ಬೊಲ್ಸಾಂತ್ ಗಳಯ್ಲಾಂ ಮಾತ್ರ್!
ತಿತ್ಲ್ಯಾರ್!
ಹ್ಯಾ ಕುಶಿನ್ ರಾಯನಾಚೆಂ ಸೆಲ್ಪೋನ್ ಆವಾಜುಂಕ್ ಲಾಗ್ಲೆಂ.
"ಶಾದೀ ಮುಬಾರಕ್ ಹೋ ಜನಾಬ್!"
ಆಪ್ಲ್ಯಾ ಪೊನಾಕ್ ಆನ್ ಕರುನ್ ತೆಂ ಕಾನಾಂಕ್ ಲಾಯಿಲ್ಲ್ಯಾ ರಾಯನಾಕ್ ತ್ಯಾ ಕುಶಿಚೊ ತಾಳೊ ಆಯ್ಕಾಲೊ.
"ಇಕ್ಬಾಲ್ ಮಿಯಾ! ಸಲಾಮ್ ಮಾ ಆಲೇಕ್ಕುಮ್!"
ಪರಿಚಿತ್ ತಾಳ್ಯಾಕ್ ರಾಯನ್ ವಳ್ಕಾಲೊ.
***************
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: 1, 2, 3, 4, 5, 6, 7, 8, 9, 10
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
