ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ಏಕ್
ಜಿವಿತ್ ತುಕಾ ಆಪಯ್ತಾ
ಆವಸ್ವರ್ ಭಾರಾ: ಆಲಿಯಾ
ತೊ ನಿಳ್ಸೊ ನಿಳ್ಸೊ ಮೊಳಾಬ್!
ತ್ಯಾ ಮೊಳಾಬಾ ಪಂದಾ ದಾಟ್ ದಾಟ್ ಕಾಪ್ಸಾ ಗುಡ್ಯಾ ಸಾರ್ಕಿಂ ಕುಪಾಂ!
ಆಪ್ಲ್ಯಾ ಬಸ್ಕೆಚೆರ್ ಬಸೊನ್ ಭಾಯ್ರ್ ಪಳಂವ್ಚ್ಯಾ ಆಲಿಯಾಕ್ ಸಗ್ಳೆಂಚ್ ಶಾಂತ್ ದಿಸ್ಲೆಂ.
ಸಗ್ಳೆಂಚ್ ಪ್ರಶಾಂತ್!
ಕೊಣಾಯ್ಕಿಯ್ ಕೊಣಾಯ್ಚಿ ಪರ್ವಾ ನಾ ಮ್ಹಳ್ಳ್ಯಾ ತಿತ್ಲೆಂ ಪ್ರಶಾಂತ್!
ಆಸಲೆಂ ಪ್ರಶಾಂತ್ಪಣ್ ತ್ಯಾ ದಿಸಾಯ್ ಆಸ್ಲ್ಲೆಂ. ಆಪುಣ್ ಜಿವಿತಾಂತ್ ಪಯ್ಲ್ಯಾ ಪಾವ್ಟಿಂ ಏರ್ಹೊಸ್ಟೆಸ್ ಜಾವ್ನ್ ಹ್ಯಾ ವಿಮಾನಾರ್ ಚಡ್ತಾನಾ ಹ್ಯಾ ಮೊಳಾಬಾ ವಯ್ಲಿ ಸೃಶ್ಟಿ ಇತ್ಲಿಚ್ ಶಾಂತ್ ಆಸ್ಲ್ಲಿ. ಪುಣ್ ಆಜ್ ಕಿತ್ಯಾಕ್ಗೀ ಹೆಂ ಶಾಂತ್ಪಣ್ ಚಡ್ಚ್ ಪ್ರಶಾಂತ್ ಮ್ಹಳ್ಳ್ಯಾ ಪರಿಂ ಆಲಿಯಾಕ್ ದಿಸ್ಲೆಂ.
ಆಲಿಯಾನ್ ಪಯ್ಲ್ಯಾ ಪಾವ್ಟಿಂ ಏರ್ಹೊಸ್ಟೆಸ್ ಜಾವ್ನ್ ವಿಮಾನಾರ್ ಪಾಂಯ್ ದವರ್ಲ್ಲ್ಯಾ ತಾಚ್ಯಾ ಪಯ್ಲ್ಯಾ ಪಯ್ಣಾಂತ್ ತಾಕಾ ಹಿಚ್ಚ್ ಸೊಭಾಯ್ ಪಳೆಂವ್ಕ್ ಮೆಳ್ಲ್ಲಿ. ಆನಿ ಆಜ್ ಪರ್ತ್ಯಾಕ್ ತಿಚ್ ವಾಟ್... ತೆಂಚ್ ಪಯ್ನ್... ಆನಿ ತಿಂಚ್ ಕುಪಾಂ!
ಮಂಗ್ಳುರ್!
ಆಲಿಯಾಕ್ ಆಯ್ಚಿ ಸೊಭಾಯ್ ತ್ಯಾ ಆದ್ಲ್ಯಾ ಸೊಭಾಯೆ ಪ್ರಾಸ್ ಚಡ್ ಸೊಭಿತ್ ದಿಸ್ಲಿ.
ಆಪ್ಣೆ ಸದಾಂ ಪಳವ್ನ್ ಖುಶಿ ಪಾಂವ್ಚಿಂ ತಿಂ ಮೊಡಾಂ, ತೊ ಮೊಳಾಬ್, ತಿಂ ಕುಪಾಂ, ಆನಿ....
ವ್ಹಯ್! ತಿಂ ಸುಕ್ಣಿಂ ಮಾತ್ರ್ ನಾತ್ಲ್ಲಿಂ!
ತಿಂ ಸುಕ್ಣಿಂ ನಾಂತ್ ಜಾಲ್ಯಾರ್ ಕಿತೆಂ? ಆಜ್ ತ್ಯಾ ಸುಕ್ಣ್ಯಾಂ ಬದ್ಲಾಕ್ ಹಾಂವ್ ಆಸಾಂ! ಮ್ಹಾಕಾ ಪಾಕಾಟೆ ನಾಂತ್ ಜಾಲ್ಯಾರ್ ಕಿತೆಂ? ಮ್ಹಜಿ ದೀಶ್ಟ್ ಹ್ಯಾ ಕುಪಾಂ ಮಧೆಂ ಮ್ಹಾಕಾ ಉಭಯ್ತಾ!
ತ್ಯಾಚ್ ಸುಕ್ಣ್ಯಾಂ ಪರಿಂ!
ಸ್ವತಂತ್ರ್ ಜೀವಿ ಪರಿಂ!
ಆತಾಂ ಹಾಂವ್ ಉಭ್ತಾಂ! ಹಾಂವ್ ಆತಾಂ ಸ್ವತಂತ್ರ್ ಜಾಲ್ಯಾಂ!
ಭಂಧಡೆ ಥಾವ್ನ್ ಮುಕ್ತ್!
ಸರ್ವ್ ಆಪ್ಣಾ ಪೆಲ್ಯಾ ಥಾವ್ನ್ ಮುಕ್ತ್!
ಹ್ಯಾ ಫುಡೆಂ....
ಆಲಿಯಾ......!
ಫಕತ್ತ್ ಆಲಿಯಾ....!!
ತ್ಯಾ ನಿಳ್ಶ್ಯಾ ಮೊಳಾಬಾ ಪಂದಾ, ತ್ಯಾ ದೊವ್ಶ್ಯಾ ಕುಪಾಂಚಾ ಪಾಂಯಾಂ ಥಳಾರ್, ಫಕತ್ತ್ ಆಲಿಯಾ....!!!
ಆಲಿಯಾಚಿ ಮತ್ ಆಲಿಯಾಕ್ಚ್ ಆಪ್ಣೆ ಪಳೆಲ್ಲಿಂ ಸಪ್ಣಾಂ ದಾಖಯ್ತಾಲಿ.
ತೆಂ ಆತಾಂ ಸಂಪೂರ್ಣ್ ಬದ್ಲಾಲ್ಲೆಂ. ತಾಣೆಂ ಸಾಂಡುನ್ ಆಯಿಲ್ಲ್ಯಾ ತ್ಯಾ ಜೀವನಾಕ್ ದುಸ್ರ್ಯಾ ಪಾವ್ಟಿಂ ಆಲಿಯಾನ್ ಚಿಂತ್ಲ್ಲೆಂ ನಾ. ತ್ಯಾ ವಿಶಯಾಂತ್ ಮಹತ್ವ್ ದೀಂವ್ಕ್ ಜಾಯ್ ಮ್ಹಣೊನ್ ತಾಕಾ ಭೊಗ್ಲ್ಲೆಂಯ್ ನಾ.
ಮತಿಚ್ಯಾ ಚಿಂತ್ನಾಂನಿ ಆಲಿಯಾ ಆಪ್ಣಾ ವಯ್ರ್ಚ್ ಭರ್ವಸೊ ಜೊಡುನ್ ಘೆತಾಲೆಂ ಜಾಲ್ಯಾರ್ಯ್ ಕಾಳ್ಜಾಚಾ ಕೊನ್ಶ್ಯಾಂತ್ ಖಂಯ್ಚರ್ಗೀ ಉಡ್ಚಿ ಉಡಿ ಮಾತ್ರ್ ತಾಚಾ ಜಿವಿತಾಕ್ ನಿಯಾಳ್ಚೆಂ ಪ್ರಯತ್ನ್ ಕರುನ್ ಸಲ್ವಾತಾಲಿ.
ಆಜ್ ತಾಣೆಂ ಸೆವಾ ದಿಂವ್ಚೆಂ ಪ್ಲೈಟ್ ಪರ್ತ್ಯಾಕ್ ಮಂಗ್ಳುರ್ಚ್ಯಾ ವಾಟೆರ್ ಧಾಂವ್ತಾಲೆಂ.
ಆಪ್ಲ್ಯಾ ಬಸ್ಕೆರ್ ಬಸೊನ್ ತಶೆಂಚ್ ಭಾಯ್ರ್ ಪಳಂವ್ಚ್ಯಾ ತಾಕಾ ತಾಚ್ಯಾ ಜಿವಿತಾಚೊ ಸವ್ಕಾಸ್ ಉಡಾಸ್ ಯೇಂವ್ಕ್ ಲಾಗ್ಲೊ.
ಥೊಡ್ಯಾಚ್ ದಿಸಾಂ ಪಯ್ಲೆಂಚೊ ಉಡಾಸ್!
"ಹಾಂವ್ ತಸಲ್ಯಾ ಜಾತಿಚೆಂ ಚೆಡುಂ ನ್ಹಯ್ ಅಭಿಲಾಶ!" ಖಡಾಖಂಡಿತ್ ಉಲಯ್ತಾಲೆಂ ಆಲಿಯಾ. "ಹೆಂ ಚಲಿಯೆಚೆಂ ದುರ್ಭಾಗ್ಯ್! ತೆಂಯ್ ಮ್ಹಜ್ಯಾ ಹ್ಯಾ ದೇಶಾಂತ್! ಹಾಂಗಾಸರ್ ಚಲಿ ಆಪ್ಣಾಚಿಂ ಭಗ್ಣಾಂ ಕಾಳ್ಜಾ ಭಿತರ್ಚ್ ದಾಂಬುನ್ ದರ್ತಾ. ಮತಿಂತ್ಚ್ ತಾಂಕಾ ಜಿರಯ್ತಾ. ಆನಿ.... ಆನಿ ಖಂಯ್ಚರೀ ಕೊನ್ಶ್ಯಾಕ್ ವಚೊನ್ ಹುಸ್ಕಾರೊನ್ ರಡ್ತಾ ಆನಿ ನಿಮಾಣೆಂ ಆಪ್ಲೊ ಜೀವ್ಘಾತ್ ಕರ್ತಾ!" ಆಲಿಯಾ ಚಲಿಯೆಚಾ ಜಿವಿತಾಂತ್ಲೆಂ ಕೊಡುಕ್ ಸತ್ ಉಚಾರ್ತಾಲೆಂ. "ಕಿತ್ಯಾಕ್? ಚಲಿ ಆಪ್ಲ್ಯಾ ಹಕ್ಕಾ ಖಾತಿರ್ ಕಿತ್ಯಾಕ್ ಆವಾಜ್ ಕಾಡಿನಾ?"
ಆಲಿಯಾಚಾ ಸವಾಲಾಕ್ ಅಭಿಲಾಶಚಿ ಕಾಂಯ್ಚ್ ಜವಾಬ್ ನಾತ್ಲ್ಲಿ. ಆತಾಂ ತೆಂಯ್ ಏಕ್ ಕಾಜಾರಿ ಬಾಯ್ಲ್. ಆತಾಂ ತಾಕಾಯ್ ಏಕ್ ಘೊವ್ ಆಸ್ಲ್ಲೊ. ಆತಾಂ ತಾಚೆಂಯ್ ಏಕ್ ಕುಟಾಮ್ ಮ್ಹಳ್ಳೆಂ ತೆಂ ಜಾಲ್ಲೆಂ. ಆಂಕ್ವಾರ್ ಜಿವಿತಾಕ್ ಆನಿ ಹ್ಯಾ ಜಿವಿತಾಕ್ ಕಿತ್ಲೊ ವ್ಯತ್ಯಾಸ್ ಆಸಾ ಮ್ಹಳ್ಳೆಂ ತೆಂ ತಾಕಾ ಆತಾಂ ಸಮ್ಜಾಲ್ಲೆಂ. ಹ್ಯಾಚ್ ಖಾತಿರ್ ತೆಂ ಆತಾಂ ಆಲಿಯಾಚಾ ವಿಚಾರಾಂಚಾ ಸತಾಕ್ ಮಾಂದುಕ್ ಲಾಗ್ಲ್ಲೆಂ.
"ಹಾಂವ್ ಹೆಂಯ್ ಮಾಂದ್ತಾ ಅಭಿಲಾಶ!" ಆಲಿಯಾಚ್ ಪರ್ತ್ಯಾಕ್ ಉಲಯ್ಲೆಂ. "ಚಲಿಯೆಕ್ ಚಲ್ಯಾಚಿ ಆನಿ ಚಲ್ಯಾಕ್ ಚಲಿಯೆಚಿ ಗರ್ಜ್ ಖಂಡಿತ್ ಆಸಾ. ಹಿ ಗರ್ಜ್ ದೊಗಾಂಯ್ಕ್ಯ್ ಎಕಾಚ್ ಮಾಫಾಚಿ ಆಸ್ತಾನಾ ಹಾಂಗಾಸರ್ ಊಂಚ್ ಆನಿ ನೀಚ್ ಮ್ಹಳ್ಳೊ ಭೇದ್ಭಾವ್ ಕಸೊ?"
"ತುವೆಂ ಸಾಂಗ್ಚೆಂ ಸಾರ್ಕೆಂ ಆಲಿಯಾ. ಪುಣ್......" ಕಿತ್ಯಾಕ್ಗೀ ಅಭಿಲಾಶ ಆಲಿಯಾಕ್ಚ್ ಪಳವ್ನ್ ಮೌನ್ ಜಾಲೆಂ.
"ಹಾಂ ಸಾಂಗ್!"
"ಪುಣ್, ತುಕಾ ಆತಾಂ ಆಶೆಂ ಭೊಗಾನಾ? .....ಕೀ ತುಂ ಜಿವಿತಾಂತ್ ಸಲ್ವಾಲಾಂಯ್ ಮ್ಹಳ್ಳ್ಯಾಪರಿಂ!"
"ಸಲ್ವಣ್!" ಆಲಿಯಾಚಾ ವೊಂಟಾನಿಂ ಸವ್ಕಾಸ್ ಮಂದ್ ಹಾಸೊ ಉದೆಲ್ಯೊ. "ಸಲ್ವಣ್ ಮಾಂದುನ್ ಘೆತ್ಲ್ಯಾರ್ ಮಾತ್ರ್ ಸಲ್ವಣ್!" ತೆಂ ಉಲಯ್ಲೆಂ.
"ಮಾಂದುನ್ ಘೆನಾಸ್ತಾನಾಂಯ್ ಸಲ್ವಾಲ್ಲೆಂ.....?" ಅಭಿಲಾಶಚಿಂ ಉತ್ರಾಂ ಆಯ್ಕೊನ್ ಆಲಿಯಾನ್ ಏಕ್ ಲಾಂಭ್ ಶ್ವಾಸ್ ಸೊಡ್ಲೊ. ಜಶೆಂ ಕಸಲೊಗೀ ಆಪ್ಣಾಕ್ ನಾಕಾ ಜಾಲ್ಲೊ ಭೊರೊ! ಆಪ್ಣಾಕ್ ನಾಕಾ ಜಾಲ್ಲೆಂ ವೊಜೆಂ! ಸಕಯ್ಲ್ ದೆಂವಯಿಲ್ಲ್ಯಾ ಪರಿಂ.
ಆಲಿಯಾಕ್ ಎಕಾ ಪಾಟ್ಲ್ಯಾನ್ ಏಕ್ ತಾಚ್ಯಾ ಜಿವಿತಾಂತ್ಲಿಂ ಘಡಿತಾಂ ಉಡಾಸ್ ಯೇಂವ್ಕ್ ಲಾಗ್ಲಿಂ.
ತಾಚ್ಯಾ ಭುರ್ಗ್ಯಾಪಣಾರ್ ಥಾವ್ನ್ ಧರುನ್ ಹ್ಯಾ ಘಡಿಯೆ ಪಾಸೊನ್ ಘಡ್ಲ್ಲಿಂ ಸಗ್ಳಿಂ ಘಡಿತಾಂ!
ಸಗ್ಳೆಂ ಆಲಿಯಾಚೆಂ ಜಿವಿತ್ಚ್ ತಾಚ್ಯಾ ಮತಿಚ್ಯಾ ಪಡ್ದ್ಯಾರ್ ಧಾಂವೊಂಕ್ ಲಾಗ್ಲೆಂ. ತೆಂ ಆತಾಂ ಕಾಂಯ್ಚ್ ಉಲಯ್ಲೆಂ ನಾ. ಬಗಾರ್ ಮೌನ್ ಜಾಲೆಂ.
ತ್ಯಾ ತಾಚ್ಯಾ ಮೌನತಾ ಮಧೆಂಯ್ ಏಕ್ ಝುಜ್ ಆರಂಭ್ ಜಾಲ್ಲೆಂ.
ಹ್ಯಾ ಝುಜಾಂತ್ ಆಲಿಯಾನ್ ಝುಜೊಂಕ್ ಆಸ್ಲ್ಲೆಂ.
ಹೆಂ ಜಿವಿತಾಂತ್ಲ್ಯಾ ವಿಚಾರಾಂಚೆ ಝುಜ್! ಹ್ಯಾ ಝುಜಾಂತ್ ಆಲಿಯಾನ್ ತಾಚ್ಯಾ ಭಿತರ್ಲ್ಯಾ ಆಲಿಯಾ ಲಾಗಿಂ ಝುಜೊಂಕ್ ಆಸ್ಲ್ಲೆಂ.
ಹ್ಯಾ ಝುಜಾಂತ್ ಕೋಣ್ ಜಿಕ್ತಾ ತೆಂ ಪಳಂವ್ಕ್ ಆಸ್ಲ್ಲೆಂ. ಹ್ಯಾ ಖಾತಿರ್ ತೆಂ ಝುಜಾಕ್ ದೆಂವ್ಲೆಂ.
ತೆಂ ಝುಜ್ಲೆಂ ಆನಿ ಝುಜ್ಲೆಂ!
ಜೆದ್ನಾಂ ಪಾಸೊನ್ ಜಯ್ತ್ ಕೊಣಾಚೆಂ ಮ್ಹಳ್ಳೆಂ ತೆಂ ರುಜು ಜಾತಾ ತೆದ್ನಾಂ ಪಾಸೊನ್!
ಹ್ಯಾ ತಾಚ್ಯಾ ಝುಜಾಂತ್ ತಾಚ್ಯಾ ವಿಚಾರಾಂನಿಚ್ ಜಯ್ತ್ ಆಪ್ಣಾಯಿಲ್ಲೆಂ!
ಪುಣ್ ಆತಾಂ?
ಆಜ್ ಹೆಂ ಝುಜ್ ನಾತ್ಲ್ಲೆಂ.
ಸಗ್ಳೆಂಚ್ ಶಾಂತ್ ಜಾಲ್ಲೆಂ!
ವಿಮಾನಾಚಾ ಜನೆಲಾ ಥಾವ್ನ್ ಭಾಯ್ರ್ ದಿಸ್ಚ್ಯಾ ತ್ಯಾ ಧವ್ಯಾ ಕುಪಾಂ ಪರಿಂ!
ಹಿ ಶಾಂತತಾ ಆಜ್ ಆಲಿಯಾಚಾ ಮುಖಮಳಾರ್ ಸ್ಪಶ್ಟ್ ಜಳ್ಕಾತಾಲಿ!
ಜಿವಿತಾಂತ್ ತಾಣೆಂ ಘೆತ್ಲ್ಲ್ಯಾ ನಿರ್ಧಾರಾಂತ್ ತೆಂ ಸಲ್ವೊಂಕ್ಚ್ ನಾ ಮ್ಹಣೊನ್ ತಾಚಿ ಮತ್ ತಾಕಾ ಸಾಂಗ್ತಾಲಿ. ಆಪುಣ್ ಸಲ್ವೊಂಕ್ ನಾ ಅಭಿಲಾಶಾ ಮ್ಹಣೊನ್ ಸಾಂಗೊಂಕ್ ಹ್ಯಾ ವಗ್ತಾರ್ ಅಭಿಲಾಶಾ ಆಲಿಯಾಚಾ ತಾಚ್ಯಾ ಸಾಂಗಾತಾ ನಾತ್ಲ್ಲೆಂ ಪುಣ್ ಆಲಿಯಾ ಮಾತ್ರ್ "ಆಪುಣ್ ಸಲ್ವೊಂಕ್ ನಾ ಅಭಿಲಾಶ!" ಆಪ್ಲ್ಯಾ ಮನಾಂತ್ಚ್ ಉದ್ಗಾರ್ಲೆಂ.
ಪ್ಲೈಟ್ ಮಂಗ್ಳುರ್ ಥಾವ್ನ್ ಪಾಟಿಂ ಮುಂಬಯಿ ಪಾವ್ಲ್ಲೆಂಚ್ ಆಯ್ಚಿ ತಾಚಿ ಡ್ಯೂಟಿ ಸಂಪ್ತಾಲಿ. ಎದೊಳ್ಚ್ ಮಂಗ್ಳುರಾಕ್ ಪಾಟಿಂ ಸೊಡ್ಲೆಲೆಂ ವಿಮಾನ್ ಮುಂಬಯಿಕ್ ಲಾಗಿಂ ಲಾಗಿಂ ಜಾತಾಲೆಂ.
ಥೊಡ್ಯಾ ವೆಳಾನ್ ವಿಮಾನ್ ಮುಂಬಯಿ ಏರ್ಪೊರ್ಟಾಂತ್ ದೆಂವೊನ್ ಪ್ಲೈಟಾವಯ್ಲೆಂ ಆಪ್ಣಾಚೆಂ ಕಾಮ್ ಸಂಪಯಿಲ್ಲೆಂ ಆಲಿಯಾ ಪ್ಲೈಟಾವಯ್ಲ್ಯಾ ತ್ಯಾ ಉಡಾಸಾಕ್ ಆನಿ ಅಭಿಲಾಶಾ ಮಧ್ಲ್ಯಾ ತರ್ಕಾಕ್ ಆಪ್ಣಾ ಬರಾಬರ್ ಘೆವ್ನ್ ವಿಮಾನಾರ್ ಥಾವ್ನ್ ದೆಂವ್ಲೆಂ.
ಸಾಕಾಳಿಂ ಡ್ಯೂಟೆಕ್ ಜಾಯ್ನ್ ಕರ್ತಾನಾಂಚ್ ತಾಕಾ ತಾಚ್ಯಾ ಆಫೀಸಾ ಥಾವ್ನ್ ಮೆಳ್ಲ್ಲ್ಯಾ ಆರ್ಡರಾಚೊ ಉಡಾಸ್ ಆಯ್ಲೊ. ಆಪ್ಲೆಂ ವ್ಯಾನಿಟಿ ಬ್ಯಾಗ್ ಉಗ್ತೆಂ ಕರುನ್ ಬ್ಯಾಗಾಂತ್ ಎದೊಳ್ ಭಂಧ್ ಆಸ್ಲ್ಲೆಂ ಸೆಲ್ಪೋನ್ ತಾಣೆಂ ಆನ್ ಕೆಲೆಂ. ತೆಂ ಆತಾಂ ಪ್ಲೈಟ್ ಕ್ರೂ ಮೆಂಬರಾಂಚಾ ಅಸಿಸ್ಟಂಟ್ ಮ್ಯಾನೇಜರ್ ಮನೋಜ್ ಕುಮಾರಾಚಾ ಆಫೀಸಾ ತೆವ್ಶಿಂ ಚಮ್ಕಾಲೆಂ.
ಥೊಡ್ಯಾ ವೆಳಾನ್ ಆಲಿಯಾ ಮನೋಜ್ ಕುಮಾರಾಚಾ ಆಫೀಸಾ ಮುಕಾರ್ ಹಾಜರ್ ಜಾಲ್ಲೆಂ.
"ಮೇ ಐ ಕಮಿನ್ ಸರ್!"
ಅಸಿಸ್ಟಂಟ್ ಮ್ಯಾನೇಜರ್ ಆಪ್ಲ್ಯಾ ಕ್ಯಾಬಿನಾಂತ್ ಬಸೊನ್ ಆಸ್ಲ್ಲೊ ಪಳೆಲ್ಲ್ಯಾ ಆಲಿಯಾನ್ ಆಫೀಸಾಚಾ ದಾರಾರ್ ರಾವೊನ್ ವಿನತಿ ಕೆಲಿ.
"ಕಮಿನ್!"
ಕಸಲ್ಯಾಗೀ ಫೈಲಾ ವಯ್ರ್ ತೀಕ್ಷ್ಣ್ ನದರ್ ಮಾರುನ್ ಆಸ್ಲ್ಲೊ ಮನೋಜ್, ತಾಳೊ ಆಯ್ಕೊನ್, ತೊ ತಾಳೊ ಆಯ್ಕಾಲ್ಲ್ಯಾ ಕುಶಿನ್ ಪಳವ್ನ್ ತ್ಯಾ ತಾಳ್ಯಾಕ್ ಮನೋಜಾನ್ ಪರ್ವಣ್ಗಿ ದಿಲಿ.
ಆಲಿಯಾ ಆತಾಂ ಕ್ಯಾಬಿನಾಂತ್ ಭಿತರ್ ಸರ್ಲೆಂ.
"ಎಸ್....?" ಮನೋಜ್ ಕುಮಾರಾನ್ ಆಲಿಯಾಕ್ಚ್ ಪಳೆಲೆಂ.
"ಸರ್! ಹಾಂವ್ ಆಲಿಯಾ....! ಆಲಿಯಾ ಶಬೀರ್!"
"ಓಹ್....!" ಕಿತೆಂಗೀ ಉಡಾಸ್ ಆಯಿಲ್ಲ್ಯಾ ಪರಿಂ ಜಾವ್ನ್ ಆಲಿಯಾಕ್ಚ್ ಪಳವ್ನ್ ಉಲಯಿಲ್ಲೊ ಮನೋಜ್,
"ಸಿಟ್ ಡೌನ್!" ತಾಣೆಂ ಆಲಿಯಾಕ್ ಫರ್ಮಾಯ್ಲೆಂ.
ಆಲಿಯಾ ಆತಾಂ ಸವ್ಕಾಸ್ ಅಸಿಸ್ಟಂಟ್ ಮ್ಯಾನೇಜರಾಚಾ ಮುಕ್ಲ್ಯಾ ಬಸ್ಕೆಚೆರ್ ಬಸ್ಲೆಂ. ತಿತ್ಲ್ಯಾರ್ ಮನೋಜ್ ಆಪ್ಲ್ಯಾ ಫೈಲಾಂ ಮಧೆಂ ಕಿತೆಂಗೀ ಸೊಧುಂಕ್ ಲಾಗ್ಲೊ.
ಥೊಡ್ಯಾ ವೆಳಾನ್ ತಾಣೆಂ ಸೊಧುನ್ ಆಸ್ಲ್ಲೆ ತೆಂ ತಾಚ್ಯಾ ಹಾತಾಕ್ ಲಾಭ್ಲೆಂ ಮ್ಹಣ್ತಾನಾ ಮನೋಜಾನ್ ತ್ಯಾ ಫೈಲಾಂತ್ಲಿ ಆಪ್ಣೆಂ ಸೊಧುನ್ ಕಾಡ್ಲ್ಲಿಂ ಪೇಪರಾಂ ಕಾಡುನ್ ಆಪ್ಲ್ಯಾ ಹಾತಾಂತ್ ಧರ್ಲಿಂ.
ತೀನ್ ಪೆಪರಾಂ!
ಏಕ್.... ದೋನ್... ತೀನ್.....! ಸಗ್ಳ್ಯಾಂ ವಯ್ರ್ ಏಕ್ ಪಾವ್ಟಿಂ ಮನೋಜನ್ ನದರ್ ಮಾರ್ಲಿ.
ಆತಾಂ ತೊ ಸವ್ಕಾಸ್ ಆಲಿಯಾಚಾ ತೆವ್ಶಿಂ ಘುಂವ್ಲೊ.
ಆಲಿಯಾಕ್ ಕಾಂಯ್ಚ್ ಮಿಸ್ತೆರ್ ಸಮ್ಜಾಲೊ ನಾ. ತೆಂ ಮೌನ್ ಆಸ್ಲ್ಲೆಂ.
"ಹಾಂ ಮಿಸ್.... ಆಲಿಯಾ ಶಬೀರ್!" ಆತಾಂ ಉಲಯಿಲ್ಲೊ ಮನೋಜ್ ಆಪ್ಲ್ಯಾ ಬಸ್ಕೆಕ್ ವೊಣ್ಕೊನ್ ಆಪ್ಲ್ಯಾ ಹಾತಾಂತ್ಲ್ಯಾ ತ್ಯಾ ಪೇಪರಾಂಚೆರ್ ದೀಶ್ಟ್ ಭೊಂವ್ಡಾಯ್ತಾನಾ,
"ಎಸ್ ಸಾರ್....!"
"ತುಜೆಂ ಕಾಜಾರ್ ಜಾಲಾಂ? ಐ ಮೀನ್ ನಿಖಾ....!"
"ಎಸ್ ಸಾರ್!"
"ಐ ಥಿಂಕ್..... ತುಂ ಆತಾಂ ಏಕ್ ಜವಾಬ್ದಾರಿಯುತ್ ಚಲಿ. ಯಾಮ್ ಐ ರೈಟ್ ಆಲಿಯಾ....?"
"ಎಸ್ ಸಾರ್! ನಿಜಾಯ್ಕ್ಯ್!"
"ಪುಣ್ ಆಲಿಯಾ....." ಮನೋಜ್ ಆತಾಂ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಮುಕಾರ್ ಬಾಗ್ವಾಲೊ ಆನಿ ಆಪ್ಲ್ಯಾ ಹಾತಾಂತ್ಲ್ಯಾ ಪೇಪರಾಂಕ್ ಆಲಿಯಾಚಾ ಮುಕಾರ್ ತಾಣೆಂ ದವರ್ಲಿಂ.
"ತುಂ ಚಿಂತಾಯ್? ಆಮ್ಚ್ಯಾ ಆರ್ಗನೈಜೇಶನಾಕ್ ಕಮಿಟ್ಮೆಂಟಾಚಿ ಚಡ್ ಗರ್ಜ್ ಆಸಾ?" ಆಲಿಯಾಕ್ ತಾಚ್ಯಾ ಮುಕಾರ್ ದವರ್ಲೆಲ್ಯಾ ಪೇಪರಾಂ ವಯ್ರ್ ನದರ್ ಮಾರುಂಕ್ ಮನೋಜಾನ್ ಆವ್ಕಾಸ್ ದಿಲೊ ನಾ.
"ಖಂಡಿತ್ ಸಾರ್!"
"ದೆನ್....! ಸಾಂಗ್ ಮ್ಹಾಕಾ..... ತುಂ ಆಮ್ಚ್ಯಾ ಆರ್ಗನೈಜೇಶನಾಚಾ ಪ್ರೈಮರಿ ಪ್ರಿನ್ಸಿಪಲ್ಸಾಂಕ್ ಕಶೆಂ ವಿಸ್ರಾಲೆಂಯ್?"
"ಖಂಯ್ಚೆ ಪ್ರಿನ್ಸಿಪಲ್ಸ್ ಸಾರ್....?" ಆಲಿಯಾಕ್ ದುಬಾವ್ ಜಾಲೊ.
"ಹೊಸ್ಪಿಟಾಲಿಟಿ.....!"
"ಮ್ಹಜ್ಯಾ ಡ್ಯೂಟೆಚ್ಯಾ ವೆಳಾರ್ ಹಾವೆಂ ಹೆ ಶಿಸ್ತೆನ್ ಪಾಳ್ಳ್ಯಾತ್ ಸಾರ್!"
"ಶೂವರ್.....!"
"ಎಸ್ ಸಾರ್!" ಆಲಿಯಾ ಧಯ್ರಾನ್ ಉಲಯ್ಲೆಂ.
"ದೋನ್ ದಿಸಾ ಪಯ್ಲೆಂ..... ಐ ಮೀನ್....." ಆಪ್ಲ್ಯಾ ಟೇಬಲಾ ವಯ್ಲ್ಯಾ ಕ್ಯಾಲೆಂಡರಾಕ್ ಪಳೆಲ್ಲೊ ಮನೋಜ್ "ವ್ಹಯ್..... ಶನ್ವಾರಾ! ಶನ್ವಾರ್ ತುಂ ಮ್ಯಾಂಗಲೋರ್ಚಾ ಪ್ಲೈಟಾರ್ ಡ್ಯೂಟೆರ್ ಆಸ್ಲ್ಲೆಂಯ್! ಯಮ್ ಐ ರೈಟ್!"
"ಎಸ್ ಸಾರ್! ಪೊರ್ವಾಂ ಮಂಗ್ಳಾರಾ ಮ್ಹಣಾಸರ್ ಮ್ಹಜಿ ಡ್ಯೂಟಿ ಆಶಿಚ್ ಆಸ್ತೆಲಿ!"
"ಫೊರ್ಗೆಟ್ ಎಬೌಟ್ ದಿ ಫ್ಯೂಚರ್....!" ಮನೋಜಾಚೊ ತಾಳೊ ಗಡುಸ್ ಜಾಲೊ.
"ಎಸ್ ಸಾರ್!"
"ತ್ಯಾ ಪ್ಲೈಟಾರ್ ತೀಸ್ ವಿ.ಐ.ಪಿ. ಸೀಟ್ಸ್ ಬುಕ್ಕಿಂಗ್ ಜಾಲ್ಲ್ಯೊ!"
"ಎಸ್ ಸಾರ್!"
"ತ್ಯಾ ಭಾಯ್ರ್ಯ್ ತ್ಯಾ ಪ್ಲೈಟಾರ್ ಚಡಾವತ್ ಜಣ್ ವಿ.ಐ.ಪಿ ಆಸ್ಲ್ಲೆ!"
"ಎಸ್ ಸಾರ್! ಚಡಾವತ್ ಜಣ್ ಬಾಲಿವುಡಾ ಥಾವ್ನ್! ತೆ ಮಂಗ್ಳುರಾಕ್ ಕಸಲ್ಯಾಗೀ ಫಂಕ್ಶನಾಕ್ ಅಟೆಂಡ್ ಕರುಂಕ್ ಗೆಲ್ಲೆ!"
"ತ್ಯಾ ದೀಸ್ ತುಜ್ಯಾ ವಯ್ರ್ ಕಂಪ್ಲೇಂಟ್ ಆಯ್ಲಾಂ ಮಿಸ್..... ಸಾರ್ರಿ! ಮಿಸೆಸ್ ಆಲಿಯಾ!"
ಅಸಿಸ್ಟಂಟ್ ಮ್ಯಾನೇಜರಾಚಿಂ ಉತ್ರಾಂ ಆಯ್ಕೊನ್ ಆಲಿಯಾಕ್ ಎಕ್ಚ್ಚ್ ಪಾವ್ಟಿಂ ಶಾಕ್ ಲಾಗ್ಲ್ಲ್ಯಾ ಪರಿಂ ಜಾಲೆಂ.
"ಹ್ಯಾ ವಿಶಿಂ ತುಂ ಕಿತೆಂ ಸಾಂಗ್ತಾಯ್?" ಮನೋಜ್ ಪರ್ತ್ಯಾಕ್ ಆಪ್ಲ್ಯಾ ಬಸ್ಕೆಕ್ ವೊಣ್ಕಾಲೊ.
"ಪುಣ್ ಕಂಪ್ಲೇಂಟ್ ಕೊಣೆ ದಿಲಾಂ ಸರ್?" ಆಪ್ಣಾ ಮುಕಾರ್ ಅಸಿಸ್ಟಂಟ್ ಮ್ಯಾನೇಜರಾನ್ ದವರ್ಲೆಲ್ಯಾ ಪೇಪರಾಂ ವಯ್ರ್ ದೀಶ್ಟ್ ವರ್ಚೆಂ ಆಲಿಯಾನ್ ಪ್ರಯತ್ನ್ ಕೆಲೆಂ ಪುಣ್ ತಾಕಾ ಸಾದ್ಯ್ ಜಾಲೆಂ ನಾ.
"ವಿಶು ಕುಮಾರ್!"
"ವಿಶು ಕುಮಾರ್?" ಆಲಿಯಾ ಮತಿಂತ್ಚ್ ಉದ್ಗಾರ್ಲೆಂ. ತಾಣೆ ಹೆಂ ನಾಂವ್ ಆಜ್ ಪಯ್ಲ್ಯಾ ಪಾವ್ಟಿಂ ಆಯ್ಕಾಲ್ಲೆಂ.
"ರೀಸನ್.....?"
"ನಾಟ್ ಕೋ ಆಪರೇಟಿವ್, ಅರ್ರೋಗಂಟ್ ಎಂಡ್ ಪ್ರೌಡ್.....!"
"........" ಆಲಿಯಾನ್ ಫಕತ್ತ್ ಅಸಿಸ್ಟಂಟ್ ಮ್ಯಾನೇಜರಾಕ್ ಪಳೆಲೆಂ ಶಿವಾಯ್ ತೆಂ ಕಾಂಯ್ ಉಲಯ್ಲೆಂ ನಾ.
"ಆಶೆಂ ಆಮ್ಚೆಂ ಏರ್ವೇಸ್ ಚಲೊಂಕ್ ಸಾದ್ಯ್ ನಾ ಮಿಸೆಸ್ ಆಲಿಯಾ!"
"ಹಾಂವ್ ನೆಣಾಂ ಸರ್ ಹೊ ವಿಶು ಕುಮಾರ್ ಮ್ಹಳ್ಯಾರ್ ಕೋಣ್ ತೊ.....?"
"ಹಾಚ್ಯಾ ಪಯ್ಲೆಂಯ್ ಏಕ್ ಪಾವ್ಟಿಂ ತುಜೆಂ ಕಂಪ್ಲೇಂಟ್ ಆಯ್ಲಾಂ ಆಲಿಯಾ!" ಆತಾಂ ಮ್ಯಾನೇಜರ್ ಮರ್ಯಾದ್ ದೀಂವ್ಕ್ ವಿಸ್ರಾಲೊ.
"ಪುಣ್....."
"ಯು ಆರ್ ಫಾಯರ್ಡ್!"
ಕಿತೆಂಗೀ ಉಲಂವ್ಕ್ ವೆಚ್ಯಾ ಆಲಿಯಾಕ್ ಉಲಂವ್ಕ್ ದೀನಾಸ್ತಾನಾಚ್ ಅಸಿಸ್ಟಂಟ್ ಮ್ಯಾನೇಜರ್ ಮನೋಜ್ ಕುಮಾರ್ ಉಲಯ್ಲೊ.
ಆಲಿಯಾ ಆತಾಂ ಮೌನ್ ಜಾಲೆಂ. ಸವ್ಕಾಸ್ ತಾಣೆಂ ಆಪ್ಲ್ಯಾ ಹಾತಾಂನಿ ಅಸಿಸ್ಟಂಟ್ ಮ್ಯಾನೇಜರಾನ್ ಆಪ್ಣಾ ಮುಕಾರ್ ದವರ್ಲೆಲ್ಯಾ ಪೇಪರಾಂಕ್ ಆಪ್ಲ್ಯಾ ಹಾತಿಂ ಘೆತ್ಲಿಂ.
"ಯು ಆರ್ ಫಾಯರ್ಡ್ ಆಲಿಯಾ! ಫಾರ್ ದಿ ಬೆಟರ್ ಫ್ಯೂಚರ್ ಆಫ್ ಅವರ್ ಏರ್ವೇಸ್!" ಅಸಿಸ್ಟಂಟ್ ಮ್ಯಾನೇಜರ್ ಪರ್ತ್ಯಾಕ್ ಉಲಯ್ಲೊ.
"ಸೈನ್ ಹಿಯರ್!"
ಅಸಿಸ್ಟಂಟ್ ಮ್ಯಾನೇಜರಾನ್ ಏಕ್ ಫೈಲ್ ಕಾಡುನ್ ಆಲಿಯಾಚಾ ಮುಕಾರ್ ಉಗ್ತೆಂ ಕರುನ್ ದವರ್ಲೆಂ.
ಥೊಡಿಂಚ್ ಕ್ಷಣಾಂ!
ಹ್ಯಾ ಕ್ಷಣಾಂ ಭಿತರ್ ಆಲಿಯನ್ ಆಪ್ಲ್ಯಾ ಮತಿಕ್ ಸಮ್ಜಾಯ್ಲೆಂ.
ತಿತ್ಲೆಂಚ್!
ಆಲಿಯಾನ್ ಆಪ್ಲೆಂ ವ್ಯಾನಿಟಿ ಬ್ಯಾಗ್ ಉಗ್ತೆಂ ಕರುನ್ ತಾಂತ್ಲೆಂ ಪೆನ್ನ್ ಭಾಯ್ರ್ ಕಾಡುನ್ ತ್ಯಾ ಫೈಲಾಂತ್ಲ್ಯಾ ಪೇಪರಾಂಕ್ ಸೈನ್ ಕೆಲಿ. ತೆಂ ಕಾಂಯ್ಚ್ ಉಲಯ್ಲೆಂ ನಾ. ತ್ಯಾ ಪೇಪರಾರ್ ಸೈನ್ ಕರುನ್ ಜಾವ್ನ್, ತೆಂ ಪೈಲ್ ಮನೋಜ್ ಕುಮಾರಾಚಾ ಮುಕಾರ್ ಲೊಟುನ್ ತಾಣೆಂ ಪಯ್ಲೆಂ ದಿಲ್ಲಿಂ ಟರ್ಮಿನೇಶನ್ ಪೇಪರಾಂ ಹಾತಿಂ ಘೆತ್ಲ್ಲೆಂ ಆಲಿಯಾ ಆತಾಂ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೆಂ.
"ಹ್ಯಾ ವಿಶಯಾಂತ್ ತುವೆಂ ತುಕಾಚ್ ಡಿಫೆಂಡ್ ಜಾವ್ನ್ ಕಾಂಯ್ ಸಾಂಗೊಂಕ್ ಆಸ್ಲ್ಯಾರ್ ಸಾಂಗ್ಯೆತ್! ಮ್ಯಾನೇಜಿಂಗ್ ಕಮಿಟಿ ವಿಲ್ ಡಿಸೈಡ್ ದೆನ್....!" ಆಲಿಯಾ ಉಟ್ಲ್ಲೆಂ ಪಳವ್ನ್ ಮನೋಜಾನ್ ಸಾಂಗ್ಲೆಂ.
"ನೊ ಥ್ಯಾಂಕ್ ಯು! ಬಟ್... ಸಿಂಪ್ಲಿ ಐ ವಾಂಟ್ ಟು ಸೇ ಸಮ್ಥಿಂಗ್!" ಬಸ್ಕೆರ್ ಥಾವ್ನ್ ಉಟ್ಲ್ಲೆಂ ಆಲಿಯಾ ಉಲಯ್ಲೆಂ.
"ಎಸ್.... ಪ್ರೊಸೀಡ್!"
"ಆಲ್ ದಿ ಬೆಸ್ಟ್ ಫಾರ್ ಯು ಆಂಡ್ ಫಾರ್ ಯುವರ್ ಆರ್ಗನೈಜೇಶನ್!" ಆಲಿಯಾನ್ ಅಸಿಸ್ಟಂಟ್ ಮ್ಯಾನೇಜರಾಕ್ಚ್ ಪಳೆಲೆಂ. ತಾಚ್ಯಾ ಉತ್ರಾಂಚೊ ಮತ್ಲಾಬ್ ತಾಕಾ ಸಮ್ಜಾಲೊ ನಾ.
"ಆಲಿಯಾ ಆತಾಂ ಥಂಯ್ ರಾವ್ಲೆಂ ನಾ. ತೆಂ ಶೀದಾ ತ್ಯಾ ಕ್ಯಾಬಿನಾ ಥಾವ್ನ್ ಭಾಯ್ರ್ ಆಯ್ಲೆಂ.
ಮನೋಜ್ ಕುಮಾರ್ ಮಾತ್ರ್ ವಿಜ್ಮಿತ್ ಜಾವ್ನ್ ಆಲಿಯಾಚಾ ಪಾಟಿಕ್ಚ್ ಪಳಂವ್ಕ್ ಪಡ್ಲ್ಲೊ. ತಾಚ್ಯಾ ಜಿವಿತಾಂತ್ ತಾಣೆ ಪಳೆಲ್ಲೆಂ ಪಯ್ಲೆಂ ಚಲಿ ಆಲಿಯಾ ಜೆಂ ಇತ್ಲ್ಯಾ ಧಯ್ರಾನ್ ಆನಿ ಇತ್ಲ್ಯಾ ಶಾಂತ್ಪಣಿ ಆಪ್ಲ್ಯಾ ಟರ್ಮಿನೇಶನ್ ಆರ್ಡರಾಕ್ ಘೆವ್ನ್ ತಾಚ್ಯಾ ಕ್ಯಾಬಿನಾ ಥಾವ್ನ್ ಭಾಯ್ರ್ ಚಮ್ಕಾಲ್ಲೆಂ!
**************
ಏರ್ಪೊರ್ಟಾ ಥಾವ್ನ್ ಟ್ಯಾಕ್ಸಿ ಧರ್ಲ್ಲೆಂ ಆಲಿಯಾ ಆಪ್ಲ್ಯಾ ಘರಾಚಾ ವಾಟೆರ್ ಆಸ್ಲ್ಲೆಂ. ತಾಕಾ ಖಂಡಿತ್ ಕಳಿತ್ ಆಸ್ಲ್ಲೆಂ ಆಯ್ಚಾ ಉಪ್ರಾಂತ್ ಆಪ್ಣಾಕ್ ಆನಿ ತ್ಯಾ ವಿಮಾನಾಂಕ್ ಸಂಭಂಧ್ ನಾ. ತಾಕಾ ಹೆಂ ನಖ್ಖಿ ಜಾಲ್ಲೆಂ ಕೀ ಫಾಲ್ಯಾಂ ಥಾವ್ನ್ ತ್ಯಾ ನಿಳ್ಶ್ಯಾ ಮೊಳಾಬಾಕ್ ತೆಂಕೊನ್ ತ್ಯಾ ಕುಪಾಂ ಮಧ್ಲ್ಯಾನ್ ತಾಣೆಂ ಧಾಂವೊಂಕ್ ಸಾದ್ಯ್ ನಾ. ಭುರ್ಗ್ಯಾಪಣಾರ್ ಥಾವ್ನ್ ತಾಚ್ಯಾ ಕಾಳ್ಜಾಂತ್ ವ್ಹಾಡೊನ್ ಆಯಿಲ್ಲಿ ಆಶಾ ಆನಿ ತಾಚ್ಯಾ ಮತಿಂತ್ಲೆಂ ಸಪಾಣ್ ಸಾಸ್ಣಾಕ್ ತಾಕಾ ಸಾಂಡುನ್ ಗೆಲ್ಲೆಂ. ಆಜ್ ಥಾವ್ನ್ ಕಿತೆಂ ಜಾಲ್ಯಾರ್ಯ್ ಆಪ್ಣೆ ಹ್ಯಾ ಧರ್ತೆಚೆರ್ಚ್ ಚಲೊಂಕ್ ಜಾಯ್. ಟ್ಯಾಕ್ಸೆರ್ ಥಾವ್ನ್ ಭಾಯ್ರ್ ಪಳಂವ್ಚ್ಯಾ ಆಲಿಯಾಕ್ ಆಪ್ಣೆ ಬಸ್ಲೆಲ್ಯಾ ಟ್ಯಾಕ್ಸೆ ಭಾಯ್ಲೊ ಸಂಸಾರ್ ಪಾಟಿಂ ಧಾಂವ್ತಾ ಆನಿ ಆಪುಣ್ ಮುಕಾರ್ ವೆತಾಂ ತಸೆಂ ದಿಸ್ಲೆಂ. ಆಜ್ ಥಾವ್ನ್ ಕಿತೆಂ ಜಾಲ್ಯಾರ್ಯ್ ಆಪ್ಣಾಚೊ ಹೊಚ್ ಸಂಸಾರ್! ಆಪ್ಣಾಚೆಂ ತ್ಯಾ ಮೊಳಾಬಾರ್ ಆನಿ ಕಾಂಯ್ ನಾ. ಕಿತೆಂಯ್ ಆಸಾ ಜಾಲ್ಯಾರ್..... ಆಲಿಯಾ ಮನಾಂತ್ಚ್ ಉಲಂವ್ಕ್ ಲಾಗ್ಲೆಂ.
ಹ್ಯಾಚ್ ಧರ್ತೆ ವಯ್ರ್!
ಹ್ಯಾಚ್ ರಸ್ತ್ಯಾಂನಿ!!
ಹ್ಯಾಚ್ ಫುಟ್ಪಾತಿಚೆರ್!!!
ತೆದ್ನಾಂ ಹಾಂವ್ ಪಳೆತೆಲಿಂ.......
ತೊ ನಿಳ್ಸೊ ಮೊಳಾಬ್ ನ್ಹಯ್....
ತಿಂ ಧವಿಂ ಧವಿಂ ಕುಪಾಂ ನ್ಹಯ್....
ಸ್ವತಂತ್ರಾಕ್ ಆಪ್ಲ್ಯಾ ಪಾಕಾಟ್ಯಾ ವಯ್ರ್ ಸೊಭವ್ನ್ ಉಭೊನ್ ವೆಚ್ಯಾ ಸುಕ್ಣ್ಯಾಂಕ್ ನ್ಹಯ್...
ಹಾಂಯ್ ಪಳೆತೆಲಿಂ ತರ್......!
ತಿಂಚ್, ಸಿಗ್ನಲಾಂ!
ತಿಂಚ್, ಕಾರಾಂಚಾ ಆರ್ಶ್ಯಾಕ್ ಹಾತ್ ಮಾರುನ್ ಹಾತ್ ವೊಡ್ಡಾಂವ್ಚಿಂ ನೆಣ್ತಿಂ ಭುರ್ಗಿಂ!!
ತಿಂಚ್, ವಿಣ್ಗ್ಯಾ ಕುಡಿರ್ ತ್ಯಾ ಫುಟ್ಪಾತಿರ್ ಖೆಳ್ಚಿಂ ನಿಶ್ಚಿಂತ್ ಬಾಳಾಂ!!!
ಟ್ಯಾಕ್ಸಿ ಭಿತರ್ ಬಸ್ಲ್ಲ್ಯಾ ಆಲಿಯಾಚಿ ಮತ್ ಫುಡಾರಾಚಾ ಚಿಂತ್ನಾಂನಿ ರೊಂಬೊನ್ ವೆತಾಲಿ.
ತಿತ್ಲೆಂಚ್!
ಸವ್ಕಾಸ್ ಆಲಿಯಾಕ್ ತಿಂಚ್ ತಾಚ್ಯಾ ಭುರ್ಗ್ಯಾಪಣಾ ವಯ್ಲಿಂ ಪಿಂತುರಾಂ ಉಡಾಸಾಕ್ ಯೇಂವ್ಕ್ ಲಾಗ್ಲಿಂ.
ಆಜ್ಯ್ ತೆಂ ತ್ಯಾಚ್ ಟ್ಯಾಕ್ಸಿ ಮ್ಹಳ್ಳ್ಯಾ ಕಾರಾರ್ ಆಸ್ಲ್ಲೆಂ! ತೆದ್ನಾಂಯ್ ತೆಂ ಕಾರಾರ್ ಆಸ್ಲ್ಲೆಂ!
ಪುಣ್ ಫರಕ್ ಮಾತ್ರ್ ಆಸ್ಲ್ಲೊ. ತೆಂ ಕಾರ್ ತಾಚ್ಯಾ ಬಾಪಾಯ್ಚೆಂ! ನಿಳ್ಶ್ಯಾ ರಂಗಾಚೆಂ! ತೊ ರಂಗ್ಯ್ ಆಪ್ಣಾಚಾ ಪಸಂದೆಚೊಚ್! ಆಪ್ಣೆ ಹಾತ್ ದಾಖಯಿಲ್ಲ್ಯಾ ರಂಗಾಚಾ ಕಾರಾಕ್ಚ್ ಆಪ್ಲ್ಯಾ ಬಾಪಾಯ್ನ್ ವಿಂಚ್ಲ್ಲೆಂ! ಭಿತರ್ಲ್ಯಾನ್ ಸೊಭಿತ್ ದಿಸೊನ್, ಆರಾಮಾಯೆರ್ ಪಯ್ಣ್ ಕರುಂಕ್ ಆಧಾರ್ ದಿಂವ್ಚೆಂ ತೆಂ ಕಾರಾ ಭಿತರ್ಲೆಂ ಕುಶನ್! ಇಂಪೋರ್ಟಡ್ ಸ್ಟೀರಿಯೊ! ಮನ್ ಪಸಂದ್ ಸಂಗೀತಾಕ್ ಮನ್ ಪಸಂದ್ ಜಾಂವ್ಚ್ಯಾ ಪರಿಂ ವಾಜ್ಚೆಂ ಸಂಗೀತ್!
ಹೆಂ ಕಾರ್! ಹೆಂ ಕಾರ್ ಆಪ್ಣಾಚೆಂಯ್ ನ್ಹಯ್ ಆಪ್ಣಾಚಾ ಕೊಣಾಯ್ಚಾಂಚೆಯ್ ನ್ಹಯ್! ಹಾಚೊ ರಂಗ್ ಕಾಳೊ ಆನಿ ಹಳ್ದುವೊ! ಮ್ಹಜ್ಯಾ ಪಸಂದೆಚೊ ನ್ಹಯ್! ಹ್ಯಾ ಕಾರಾ ಭಿತರ್ ಸೊಭಾಯ್ ನಾ! ಕುಶನಾಕ್ ಉಂಚ್ಲ್ಯಾಪಣಾಚೊ ಲೇಪ್ ನಾ! ಲೋಕಲ್ ಸ್ಟೀರಿಯೊ! ಕರ ಕರ ವಾಜ್ಚೆಂ ಕಸಲೆಂಗೀ ಡಿಸ್ಕೊ ಸಂಗೀತ್!
ಕಿತ್ಲೊ ಫರಕ್.....!
ಕಿತ್ಲೊ ಅಂತರ್.......!!
ಕಿತ್ಲೊ ವ್ಯತ್ಯಾಸ್.......!!!
ಎಕಾ ಖಿಣಾಕ್ ಹ್ಯಾ ಕಾರಾಚೆ ಆರ್ಶೆ ಸಗ್ಳೆ ಉಗ್ತೆ ಕರುನ್ ವ್ಹಡ್ಲ್ಯಾನ್ ಏಕ್ ಬೋಬ್ ಮಾರ್ಯಾಂ ಮ್ಹಳ್ಳ್ಯಾ ಪರಿಂ ಆಲಿಯಾಕ್ ಜಾಲೆಂ.
ಆಪ್ಣಾಚಿ ಬೋಬ್ ಕೋಣ್ ಆಯ್ಕಾತೆಲೆಂ?
ಹ್ಯಾ ಧರ್ತೆ ವಯ್ಲ್ಯಾ ಸಗ್ಳ್ಯಾ ಸಂಭಂಧಾ ಥಾವ್ನ್ ಆಲಿಯಾ ಮುಕ್ತ್ ಜಾವ್ನ್ ಮಸ್ತ್ ಪಯ್ಸ್ ಪಾವ್ಲ್ಲೆಂ!
ತಾಚ್ಯಾ ಜಿವಿತಾಂತ್ಲೊ ನಿಮಾಣೊ ಸಂಭಂಧ್ ಜಾವ್ನ್ ಆಸ್ಲ್ಲ್ಯಾ ತ್ಯಾ ಮೊಳಾಬಾ ವಯ್ಲ್ಯಾ ಸಂಭಂಧಾನ್ಯ್ ಆಜ್ ತಾಚೊ ಹಾತ್ ಸೊಡ್ಲ್ಲೊ!
ತರ್ ಆಪ್ಣೆ ಆಶೆಲ್ಲೆಂ ಜಿವಿತ್?
ಆಲಿಯನ್ ಪಯ್ಣ್ ಕರ್ಚಿ ಟ್ಯಾಕ್ಸಿ ಸಿಗ್ನಾಲಾರ್ ಥಾಂಬ್ಲಿ. ತ್ಯಾ ಟ್ಯಾಕ್ಸಿಚ್ಯಾ ಥಾಂಬವ್ಣೆಂತ್ ಖಂಯ್ಚರ್ಗೀ ಆಪ್ಣಾಚೆಂ ಜಿವಿತ್ ಥಾಂಬ್ಲ್ಲ್ಯಾ ಪರಿಂ ತಾಕಾ ಜಾಲೆಂ.
ಪಯ್ಲೆ ಪಾವ್ಟಿಂ!
ಜಿವಿತಾಂತ್ ಪಯ್ಲೆ ಪಾವ್ಟಿಂ ಕಸಲಿಂಗೀ ಕಾಳಿಂ ಮೊಡಾಂ ಆಪ್ಣಾಕ್ ಗ್ರಾಸಿತಾತ್ ಮ್ಹಳ್ಳ್ಯಾ ಪರಿಂ ತಾಕಾ ಜಾಲೆಂ.
ಆಲಿಯಾನ್ ಟ್ಯಾಕ್ಸಿರ್ ಥಾವ್ನ್ ಭಾಯ್ರ್ ದೀಶ್ಟ್ ವೆಲಿ.
ತೆಂಚ್ ಸಿಗ್ನಲ್!
ತೆಚ್ ಹಾತ್!!
ತಿಂಚ್ ಮುಖಮಳಾಂ!!!
ಪುಣ್ ಆಜ್ ಕಿತ್ಯಾಕ್ಗೀ ವೇಳ್ ಮಾತ್ರ್ ತೊಚ್ಚ್ ನ್ಹಯ್ ಮ್ಹಳ್ಳ್ಯಾಪರಿಂ ತಾಕಾ ದಿಸ್ಲೆಂ. ತ್ಯಾ ವೆಳಾಕ್ ಆನಿ ಹ್ಯಾ ಆಯ್ಚಾ ವೆಳಾಕ್ ಮಸ್ತ್ ಅಂತರ್ ಆಸ್ಲ್ಲೊ.
ತ್ಯಾ ವೆಳಾರ್ ಹ್ಯಾ ದ್ರಶ್ಯಾಂನಿ ಆಪ್ಣೆ ವಳ್ಕಾನಾತ್ಲೆಲಿಂ ಮುಖಮಳಾಂ!
ಹ್ಯಾ ವೆಳಾರ್......?
ಖುದ್ದ್ ಆಲಿಯಾ!
ಆಲಿಯಾಚಿಂಚ್ ಮುಖಮಳಾಂ!
ಹ್ಯಾ ಆಯ್ಚಾ ವೆಳಾರ್ ಆಪುಣ್ ಖುದ್ದ್ ಜಾವ್ನ್.....!
ತ್ಯಾಚ್ ಸಿಗ್ನಲಾರ್.....!
ಹ್ಯಾಚ್ ಹಾತಾಂನಿ.....!!
ಹೆಂಚ್ ಮುಖಮಳಾಕ್......!!!
ಆಪ್ಣಾಕ್ ಆಪುಣ್ಚ್ ಭಾಯ್ರ್ ದಿಸ್ಲೆಲ್ಯಾ ಪರಿಂ ಆಲಿಯಾಕ್ ಜಾತಾನಾ ತೆಂ ಬಸ್ಲೆಲ್ಯಾ ಕಡೆಚ್ ಚಡ್ಸಡ್ಲೆಂ. ತಾಚ್ಯಾ ಆಂಗಾಚಾ ಎಕಾ ಎಕಾ ಲೊಂವೆ ಥಾವ್ನ್ ಘಾಮಾಚಿ ಝರ್ ಫುಟೊಂಕ್ ಲಾಗ್ಲಿ. ತಾಚ್ಯಾ ಪಾಂಯಾಂಥಳಾ ಥಾವ್ನ್ ಚಡ್ಲೆಲಿ ಉಜ್ಯಾಚಿ ಧಾವ್ ತಾಚ್ಯಾ ಶಿರಾಂ ಶಿರಾಂನಿ ಧಾಂವೊಂಕ್ ಲಾಗ್ಲಿ.
ತಿತ್ಲೆಂಚ್!
ಆತಾಂ ಆಪ್ಣಾಕ್ ಕಿತೆಂ ಜಾತಾ ತೆಂ ಆಲಿಯಾ ಜಾಣಾಂ ಜಾಲೆಂ.
ತಾಚ್ಯಾ ಕಾನಾಂಕ್ ಪಯ್ಸ್ ಥಾವ್ನ್ ಝುಜಾಚ್ಯಾ ತಂಬೂರಿಚೊ ಆವಾಜ್ ಆಯ್ಕೊಂಕ್ ಲಾಗ್ಲೊ.
ಆಲಿಯಾನ್ ಆಪ್ಲ್ಯಾ ಮತಿಕ್ ಧಯ್ರ್ ಆರಾಯ್ಲೆಂ.
ಆಪ್ಣಾ ಮುಕಾರ್ ಉಭೆಂ ಜಾಂವ್ಕ್ ಯೆಂವ್ಚ್ಯಾ ಝುಜಾಕ್ ಫುಡ್ ಕರುನ್ ರಾಂವ್ಚೆಂ ಧಯ್ರ್ ತಾಣೆಂ ಆರಾಯ್ಲೆಂ.
’ಆಲಿಯಾ ತುಂ ಹ್ಯಾ ಪಾವ್ಟಿಂ ಸಲ್ವಾಲೆಂಯ್’ ಆಲಿಯಾಚಾ ಕಾನಾಂತ್ ತಾಚ್ಯಾಚ್ ಸಲ್ವಣೆಚ್ಯೊ ಹಾಸೊ ಘಾಜ್ಲ್ಯೊ.
’ನಾ’ ತಾಣೆಂ ಆಪ್ಲ್ಯಾ ಮತಿಂತ್ಚ್ ಬೋಬ್ ಮಾರ್ಲಿ.
’ತುಂ ಸಲ್ವಾಲೆಂಯ್ ಆಲಿಯಾ’
’ನಾ’
ತಿತ್ಲೆಂಚ್!
ಆತಾಂ ಆರಂಭ್ ಜಾಲೆಂ ಝುಜ್!
ಸಲ್ವಣೆಚೆಂ ಆನಿ ಜಯ್ತಾಚೆಂ!
ಆಲಿಯಾ ಟ್ಯಾಕ್ಸೆರ್ ಬಸ್ಲೆಲ್ಯಾ ಕಡೆನ್ ಚಡ್ಸಡ್ಲೆಂ. ಆಪುಣ್ ಉಜ್ಯಾರ್ ಬಸ್ಲ್ಯಾಂ ಮ್ಹಳ್ಳ್ಯಾಪರಿಂ ತಾಕಾ ಆನ್ಭೋಗ್ ಜಾಲೊ.
’ಹಿ ತುಜಿ ಸಲ್ವಣ್ ಆಲಿಯಾ’ ’ತುಜ್ಯಾ ಜಿವಿತಾಂತ್ ತುಂ ಕಸಲ್ಯಾ ಸಪ್ಣಾ ಖಾತಿರ್ ಝುಜ್ಲೆಂಯ್ ತ್ಯಾಚ್ ಸಪ್ಣಾನ್ ತುಕಾ ಆಜ್ ಸಲ್ವಯ್ಲೆಂ’ ಆಲಿಯಾಚಾ ಕಾನಾಂತ್ ಪರ್ತ್ಯಾಕ್ ತೊಚ್ಚ್ ತಾಳೊ.
ಆಪ್ಲ್ಯಾ ದೋನ್ಯ್ ಹಾತಾಂಕ್ ಘಟ್ ಧರುನ್ ತ್ಯಾ ಹಾತಾಚಾ ತಾಳುವೆಂಕ್ ತಾಣೆಂ ಮುರ್ಡಿಲೆಂ. ತಾಚ್ಯಾ ಹಾತಾಚಿಂ ಬೊಟಾಂ ಪಿಟೊ ಜಾಲ್ಲ್ಯಾಪರಿಂ ಜಾಲಿಂ.
’ಮಾಂದುನ್ ಘೆ ಆಲಿಯಾ! ಆಪ್ಣಾಚಿ ಸಲ್ವಣಿ ಮಾಂದುನ್ ಘೆ!’
’ನಾ!’
ತಿತ್ಲ್ಯಾರ್!
ಸಿಗ್ನಲ್ ಆನ್ ಜಾಲೆಂ ಆನಿ ಟ್ಯಾಕ್ಸಿ ಮುಕಾರ್ ಧಾಂವ್ಲಿ. ಪುಣ್ ಆಪ್ಣಾಚಾ ಜಿವಿತಾಚಿ ಧಾಂವ್ಣಿ ಖಂಯ್ ಪಾವ್ಲಿ ತೆಂ ಆಲಿಯಾಕ್ ಸಮ್ಜಾಲೆಂ.!
ಮತಿಚಾ ಧಯ್ರಾಕ್ ವೆಡೊ ಮಾರುನ್ ಭಿರಾಂತೆಚಿಂ, ಖಂತಿಚಿಂ ಮೊಡಾಂ ಹಾಡಂವ್ಕ್ ಪ್ರಯತ್ನ್ ಕರ್ಚ್ಯಾ ಚಿಂತ್ನಾಂ ಥಾವ್ನ್ ಆಲಿಯಾನ್ ಆತಾಂ ಧಾಂವೊಂಕ್ ಪಳೆಲೆಂ. ಆಪ್ಣಾಚ್ಯಾ ಮತಿಕ್ ಕಶೆಂ ತರ್ಯ್ ಕರುನ್ ಹ್ಯಾ ಸಲ್ವಣೆ ಥಾವ್ನ್ ಜಯ್ತಾಚಿಂ ಕಿರ್ಣಾಂ ಫಾಂಕಂವ್ಕ್ ಜಾಯ್! ಆಪುಣ್ ಸಲ್ವೊಂಕ್ ನಾ ಮ್ಹಳ್ಳೆಂ ರುಜು ಕರುಂಕ್ ಜಾಯ್! ಕಿತೆಂ ಕರುಂ? ಹಾಂವ್ ಕಿತೆಂ ಕರುಂ?
ಚಿಂತ್ಚ್ಯಾ ಆಲಿಯಾನ್ ಟ್ಯಾಕ್ಸೆರ್ ಥಾವ್ನ್ ಭಾಯ್ರ್ ದೀಶ್ಟ್ ಧಾಂವ್ಡಾಯ್ಲಿ. ತೆಂ ಆಪ್ಣಾಕ್ಚ್ ವಿಸ್ರೊಂಕ್ ಆಶೆಲೆಂ. ಪುಣ್ ಆಪ್ಲ್ಯಾ ಸಲ್ವಣೆಕ್ ಮಾಂದುನ್ ಘೆಂವ್ಕ್ ಕಬೂಲ್ ಜಾಲೆಂ ನಾ.
ಟ್ಯಾಕ್ಸೆರ್ ಥಾವ್ನ್ ಭಾಯ್ರ್ ಪಳಂವ್ಚ್ಯಾ ಆಲಿಯಾಚಾ ದೊಳ್ಯಾಂಕ್ ಆತಾಂ ಭಾಯ್ಲೊ ಸಂಸಾರ್ ದಿಸ್ತಾಲೊ.
ತಿಚ್ ಫುಟ್ಪಾತ್.....!
ತಿಂಚ್ ಭುರ್ಗಿಂ........!!
ತೊಚ್ ಖೆಳ್............!!!
ನಾ! ಆಲಿಯಾಚಾ ಮತಿಕ್ ದಾಂಬುನ್ ಧರುಂಕ್ ತಾಕಾಚ್ ಜಾಲೆಂ ನಾ. ಆಪ್ಲ್ಯಾ ಸಲ್ವಣೆಕ್ ಪಳವ್ನ್ ಸಗ್ಳೊ ಸಂಸಾರ್ ಆಪ್ಣಾ ವಯ್ರ್ ಹಾಸ್ತಾ ತಶೆಂ ತಾಕಾ ಜಾಲೆಂ. ವಯ್ಲ್ಯಾನ್ ತಾಚಿ ಮತ್ ತಾಕಾ ತಾಚ್ಯಾ ಸಲ್ವಣೆಕ್ ಮಾಂದುನ್ ಘೆಂವ್ಕ್ ಲಾಯ್ತಾಲಿ.
’ತುಜ್ಯಾ ಹ್ಯಾ ಝುಜಾ ಥಾವ್ನ್ ಹ್ಯಾ ಸಂಸಾರಾಕ್ ಕಾಂಯ್ಚ್ ಫರಕ್ ಪಡೊಂಕ್ ನಾ ಆಲಿಯಾ. ಹೊ ಸಂಸಾರ್ ತಸೊಚ್ ಆಸಾ. ಪಳೆ ಹೊ ಸಂಸಾರ್ ತಸೊಚ್ ಆಸಾ ಕಾಂಯ್ಚ್ ಬದ್ಲಾವಣ್ ಜಾಮ್ವ್ಕ್ ನಾ. ತುಜ್ಯಾ ಝುಜಾ ವರ್ವಿಂ ತುಂಚ್ ಆಜ್ ತುಜ್ಯಾ ಸಪ್ಣಾ ಥಾವ್ನ್ ಶೆವ್ಟಾಲೆಂಯ್. ಹ್ಯಾ ಸಂಸಾರಾನ್ ತುಕಾ ಸಲ್ವಯ್ಲೆಂ! ತುಜ್ಯಾ ಸಲ್ವೊಣೆಕ್ ಮಾಂದುನ್ ಘೆವ್ನ್ ತುಂ ಹ್ಯಾ ವಾಸ್ತವಾಚಾ ಸಂಸಾರಾಕ್ ಪಾಟಿಂ ವಚ್!’ ಆಲಿಯಾಚಾ ಮತಿನ್ ಆಲಿಯಾಕ್ ವಿನತಿ ಕೆಲಿ.
’ನಾ! ಕೆದ್ನಾಂಚ್ ನಾ!’
ಆಲಿಯಾ ಕಬೂಲ್ ಜಾಲೆಂ ನಾ. ತಾಣೆ ಆತಾಂ ಆಪ್ಲಿ ದೀಶ್ಟ್ ಉಭಾರುನ್ ತ್ಯಾ ವ್ಹಡ್ಲ್ಯಾ ವ್ಹಡ್ಲ್ಯಾ ಉಭಾರ್ ಭಾಂದ್ಪಾಂಕ್ ಪಳೆಲೆಂ.
ತೆಂಚ್ ವಿನ್ಯಾಸ್.....!
ತಿಚ್ಚ್ ಏರ್ .........!!
ತೊಚ್ಚ್ ಶೆಳೊ.......!!!
ಹರ್ಯೆಕಾ ಭಾಂದ್ಪಾಕ್ಯ್ ತ್ಯಾ ಶೆಳ್ಯಾನ್ ಆಪ್ಲಿ ಮ್ಹೊರ್ ಮಾರ್ಲ್ಲಿ. ಹಿ ಮ್ಹೊರ್ ತ್ಯಾ ಶೆಳ್ಯಾಚ್ಯಾ ಜಯ್ತಾಚಿ! ಆಲಿಯಾಚಾ ಮತಿಕ್ ಹೊಚ್ಚ್ ಶೆಳೊ ಸವ್ಕಾಸ್ ಆಪ್ಣಾಚಾ ಅಧೀನ್ ಕರುನ್ ಘೆತಾ ಮ್ಹಳ್ಳ್ಯಾ ಪರಿಂ ಜಾಲೆಂ! ಆಲಿಯಾ ಉಡ್ಡಾಲೆಂ. ಆಪ್ಲ್ಯಾ ಮತಿಕ್ ಆಪ್ಲ್ಯಾ ಹಾತಾಂತ್ ಧರುಂಕ್ ತೆಂ ಉಡ್ಡಾಲೆಂ.
’ತುಕಾ ಜಾಂವ್ಚೆಂ ನಾ ಆಲಿಯಾ!’ ಪರ್ತ್ಯಾಕ್ ಆಲಿಯಾಚಿ ಮತ್ ಬೊಬಾಟ್ಲಿ. ’ಹ್ಯಾ ಶೆಳ್ಯಾನ್ ತುಕಾ ನಿಸ್ರಾಯ್ಲಾಂ. ತುಜ್ಯಾ ವಿಚಾರಾಂಕ್ ಲಿಪಯ್ಲಾಂ. ತುಜ್ಯಾ ಜಿವಿತಾಕ್ ಧಾಂಕಣ್ ಘಾಲಾಂ. ತುಕಾ ಆತಾಂ ಕಾಂಯ್ ಕರುಂಕ್ ಸಾದ್ಯ್ ನಾ. ಹ್ಯಾ ಶೆಳ್ಯಾ ವಯ್ಲ್ಯಾನ್ ಚಲೊಂಕ್ ತುಕಾ ಸಾದ್ಯ್ ನಾ. ಮೆಟಾಂ ಮೆಟಾಂಕ್ ತುಂ ಶೆವ್ಟಾತಾಯ್. ತುಜ್ಯಾ ದೊಳ್ಯಾಂಕ್ಯ್ ಹೊ ಶೆಳೊ ಮಾಂಡ್ಚ್ಯಾ ಪಯ್ಲೆಂ ಆಪ್ಲಿ ಸಲ್ವಣಿ ಮಾಂದುನ್ ಘೆವ್ನ್ ತುಂ ಹ್ಯಾ ಸಂಸಾರಾಕ್ ಪಾಟಿಂ ವಚ್!’ ಆಪ್ಲಿಚ್ ಮತ್ ಆಪ್ಣಾಕ್ ಸಾಂಗ್ತಾ ತಶೆಂ ಆಲಿಯಾಕ್ ಜಾಲೆಂ.
’ನಾ ನೆವರ್!’ ಆಲಿಯಾನ್ ಮಾಂದುನ್ ಘೆತ್ಲೆಂ ನಾ.
ಆತಾಂ ತಾಚಿ ದೀಶ್ಟ್ ತ್ಯಾ ಟ್ಯಾಕ್ಸೆ ಭಾಯ್ರ್ ತ್ಯಾ ಬಾಂದ್ಪಾಂಕ್ ಸೊಡುನ್ ಆನಿಕ್ಯ್ ವಯ್ರ್ ಗೆಲಿ. ವಯ್ಲ್ಯಾ ಮೊಳಾಬಾರ್ ತಿ ಭೊಂವ್ಲಿ. ಅನಂತಾಚಾ ಅನಂತಾಕ್ ಸೊಧುನ್ ತಿ ಧಾಂವ್ಲಿ.
ಸಂಸಾರಾರ್ ಸಾವ್ಳಿ ಪಡ್ಲ್ಲಿ!
ಹ್ಯಾ ಧನ್ಫರಾಂಚಾ ವಗ್ತಾರ್ ಮೊಡಾಂಚಿ ಸಾವ್ಳಿ.....!
ತ್ಯಾ ಮೊಳಾಬಾಚೊ ನಿಳ್ಸೊ ರಂಗ್ ಮಾಜ್ವಾಲ್ಲೊ!
ತಿಂ ಧವಿಂ ಧವಿಂ ಕುಪಾಂ ನಪಂಯ್ಚ್ ಜಾಲ್ಲಿ!!
ಆನಿ ತ್ಯಾ ಭಾಯ್ರ್.....
ಆಲಿಯಾಚಾ ಸ್ವತಂತ್ರಾಚೊ ಸಂಕೇತ್ ಜಾವ್ನ್ ತ್ಯಾ ಮೊಳಾಬಾರ್ ಉಬ್ಚಿಂ ಸುಕ್ಣಿಂ ಖಯ್ಚರ್ಗೀ ರುಕಾ ಫಾಂಟ್ಯಾಂನಿ ತಾಂಚ್ಯಾ ಘೊಂಟೆರಾಂತ್ಲ್ಯಾ ವಿಶೆವಾಕ್ ಸೊಧುನ್ ಮಾಯಾಗ್ ಜಾಲ್ಲಿಂ!!!
’ಹ್ಯಾ ವಯ್ರ್ ಖಂಯ್ ದೀಶ್ಟ್ ವರ್ತಾಯ್ ಆಲಿಯಾ?’ ಆಲಿಯಾಕ್ ಕೊಣಾಚ್ಯೊಗೀ ಹಾಸೊ ಆಯ್ಕಾಲ್ಯೊ. ತ್ಯಾ ಮೊಳಾಬಾಚ್ಯಾ ವಯ್ರ್ ಕಿತೆಂ ಆಸಾ ಮ್ಹಣೊನ್ ಪಳಂವ್ಕ್ ವೆಚ್ಯಾ ತಾಚ್ಯಾ ಮುಕಾರ್ ನಿಮಾಣೆಂ ಜಾವ್ನ್ ಆತಾಂ ಆಪ್ಣಾಚಿ ಸಲ್ವಣಿ ಮಾಂದುನ್ ಘೆಂವ್ಚೆಂ ಸೊಡ್ಲ್ಯಾರ್ ದುಸ್ರೆಂ ಕಾಂಯ್ಚ್ ದಿಸ್ಲೆಂ ನಾ.
ಕೋಣ್ಗೀ ಆಪ್ಣಾಕ್ ಸಲ್ವವ್ನ್ ತಾಚ್ಯಾ ಜಯ್ತಾಚೊ ಹಾಸೊ ಹಾಸ್ತಾ ತಶೆಂ ಆಲಿಯಾಕ್ ಜಾಲೆಂ.
"ತರ್ ಆಪ್ಣೆ ಆಪ್ಲ್ಯಾ ಜಿವಿತಾಂತ್ ಎದೊಳ್ ಪಾಸೊನ್ ಪಾಳುನ್ ಆಯಿಲ್ಲೆ ವಿಚಾರ್? ತ್ಯಾ ವಿಚಾರಾಂಕ್ ಭಳ್ ನಾತ್ಲ್ಲೆಂ?" ಆಲಿಯಾನ್ ಆಪ್ಣಾಕ್ಚ್ ಸವಾಲ್ ಕೆಲೆಂ.
ತಿತ್ಲೆಂಚ್!
ತಾಚ್ಯಾ ದೊಳ್ಯಾಂ ಮುಕಾರ್ ತ್ಯಾ ಸಿಗ್ನಲಾ ವಯ್ಲ್ಯಾ ನೆಣ್ತ್ಯಾ ಚೆಡ್ವಾಚೆಂ ಪಿಂತುರ್ ಉದೆವ್ನ್ ಆಯ್ಲೆಂ.
ಆಪ್ಲ್ಯಾ ಹಾಂಡಿಯೆರ್ ಲ್ಹಾನ್ ಭುರ್ಗ್ಯಾಕ್ ಘೆವ್ನ್ ಭಿಕ್ ಮಾಗ್ಚೆಂ ನೆಣ್ತೆಂ ಚೆಡುಂ!
ತಾಚ್ಯಾ ಪಾಟ್ಲ್ಯಾನ್,
’ಚಟ್’ ’ಚಟ್’ ಆಪ್ಲ್ಯಾಚ್ ಕಾನ್ಸುಲಾರ್ ಕೊಣೆಂಗೀ ಥಾಪ್ಡಾಂ ಮಾರ್ಲ್ಲೊ ಆನ್ಭೋಗ್ ತಾಕಾ ಜಾಲೊ. ಆಪ್ಣಾಕ್ ಕಳಿತ್ ನಾತ್ಲೆಲ್ಯಾ ಪರಿಂಚ್ ಆಲಿಯಾಚೆ ಹಾತ್ ಉಟೊನ್ ತ್ಯಾ ತಾಚ್ಯಾ ಪೊಲ್ಯಾಂ ವಯ್ರ್ ಚರ್ಲೆ.
ತ್ಯಾ ಸಿಗ್ನಲಾರ್ ಭಿಕ್ ಮಾಗ್ಚ್ಯಾ ಚೆಡ್ವಾಚಾ ಕಾನ್ಸುಲಾರ್ ಮಾರ್ಲೆಲ್ಯಾ ಮಾರಾಂಚಿ ದೂಖ್ ಆತಾಂ ಹ್ಯಾ ವಗ್ತಾರ್ ಟ್ಯಾಕ್ಸೆರ್ ಬಸ್ಲೆಲ್ಯಾ ಆಲಿಯಾಕ್ ಭೊಗ್ಲಿ.
"ನೆವರ್! ಹೆಂ ಆಲಿಯಾ ಆಪ್ಲೊ ಜೀವ್ ಜಾಲ್ಯಾರ್ಯ್ ದಿತೆಲೆಂ ಪುಣ್ ಕೆದಿಂಚ್ ಸಲ್ವಣೆಕ್ ಮಾಂದುನ್ ಘೆಂವ್ಚೆಂ ನಾ!" ಆಲಿಯಾ ತಯಾರ್ ಜಾಲೆಂ ನಾ.
ಆಜ್..... ಹ್ಯಾ ಘಡಿಯೆ ಸಗ್ಳೊ ಸಂಸಾರ್ಚ್ ಆಪ್ಣಾಕ್ ಸಾಂಗಾತ್ ದೀಂವ್ಕ್ ಸಕಾನಾ ತೆಂ ಕಳೊನ್ ಆಪ್ಣೆ ಸಲ್ವೊಣಿ ಮಾಂದ್ಚ್ಯಾ ಪಯ್ಲೆಂ ಕಶೆಂ ತರ್ಯ್ ಆಪ್ಣಾಚಾ ಕಾಳ್ಜಾಕ್ ಧಯ್ರ್ ಭಾಸಾಂವ್ಕ್ಚ್ ಜಾಯ್ ಮ್ಹಳ್ಳ್ಯಾ ಇರಾದ್ಯಾನ್ ಹೆವ್ಶಿಂ ತೆವ್ಶಿಂ ಪಳೆಲ್ಲ್ಯಾ ಆಲಿಯಾನ್ ಮತಿಕ್ ಕಾಂಯ್ಚ್ ಜಳ್ಕಾನಾಸ್ತಾನಾ ವೆತಾನಾ, ತಾಣೆಂ ಆಪ್ಲೆಂ ವ್ಯಾನಿಟಿ ಬ್ಯಾಗ್ ಉಗ್ತೆಂ ಕೆಲೆಂ.
ಉಗ್ತೆಂ ಜಾಲ್ಲ್ಯಾ ಬ್ಯಾಗಾಂತ್ ಪಯ್ಲೆಂಚ್ ತಾಚ್ಯಾ ನದ್ರೆಕ್ ಸಾಂಪಡ್ಲೊ ಆರ್ಸೊ! ತಾಣೆಂ ಸದಾಂ ಆಪ್ಲ್ಯಾ ಮುಖಮಳಾಕ್ ಪಳಂವ್ಚೊ ಆರ್ಸೊ!
ಆಲಿಯಾನ್ ತ್ಯಾ ಆರ್ಶ್ಯಾಂತ್ ಆಪ್ಲ್ಯಾ ಮುಖಮಳಾಕ್ ಪಳೆಲೆಂ.
ಆಪ್ಲ್ಯಾ ಮುಖಮಳಾರ್ ಕಸಲೆಂಗೀ ಮೋಡ್ ಮಾಂಡುನ್ ಯೇವ್ನ್ ತಾಚ್ಯಾ ಸೊಭಾಯೆ ವಯ್ರ್ ಧಾಂಪಣ್ ಪಡ್ತಾ ಮ್ಹಳ್ಳ್ಯಾ ಪರಿಂ ತಾಕಾ ದಿಸ್ಲೆಂ.
’ನಾ! ಹೆಂ ಸಾದ್ಯ್ ನಾ!’ ಆಲಿಯಾನ್ ತ್ಯಾ ಆರ್ಶ್ಯಾಕ್ ಆಪ್ಲ್ಯಾ ಸ್ಕರ್ಟಾಚೆರ್ ಘೆಶ್ಟಿಲೆಂ. ತ್ಯಾ ಆರ್ಶ್ಯಾ ವಯ್ಲಿಂ ಖತಾಂ ತಾಣೆಂ ಪುಶೆಲಿಂ.
ಪರ್ತ್ಯಾಕ್ ತಾಣೆಂ ಆಪ್ಲೆಂ ಮುಖಮಳ್ ತ್ಯಾ ಆರ್ಶ್ಯಾಂತ್ ಪಳೆಲೆಂ.
ತ್ಯಾ ಆರ್ಶ್ಯಾಂತ್ಲ್ಯಾ ಮುಖಮಳಾರ್ ಏಕ್ ಭಯಾನಕ್ ಝುಜ್ ಚಲ್ತಾ ಆನಿ ತ್ಯಾ ಝುಜಾಂತ್ ಆಪ್ಲ್ಯಾ ಸಲ್ವಣೆಚಿಂ ಖುಣಾಂ ಜಾವ್ನ್ ಆಪ್ಲ್ಯಾ ಮುಖಮಳಾಚೆಂ ರಗಾತ್ ಜಿರೊನ್ ತ್ಯಾ ತೊಂಡಾರ್ ಸಲ್ವಣ್ ಆಪ್ಲ್ಯಾ ಜಯ್ತಾಕ್ ಖೆಳಯ್ತಾ ತಶೆಂ ದಿಸ್ತಾನಾ,
ಆಪ್ಲ್ಯಾ ಹಾತಾಂತ್ಲ್ಯಾ ಆರ್ಶ್ಯಾಕ್ ಆಲಿಯಾನ್ ಆಪ್ಲ್ಯಾ ವ್ಯಾನಿಟಿ ಬ್ಯಾಗಾಂತ್ ಉಡಯ್ಲೊ.
ತಾಣೆಂ ತಶೆಂಚ್ ಆಪ್ಲ್ಯಾ ಬ್ಯಾಗಾ ಭಿತರ್ ಆಪ್ಲೊ ಹಾತ್ ಸಾಸ್ಪಿಲೊ.
’ಹೆಂ ಆಲಿಯಾ ಕೆದ್ನಾಂಚ್ ಆಪ್ಲಿ ಸಲ್ವಣ್ ಮಾಂದುನ್ ಘೆಂವ್ಚೆಂ ನಾ! ನೋ.... ನೆವರ್!’ ಆಲಿಯಾ ಮತಿಂತ್ಚ್ ಬೊಬಾಟ್ಲೆಂ
ಆಪ್ಲ್ಯಾ ಬ್ಯಾಗಾ ಭಿತರ್ ಸಾಸ್ಪಿಲ್ಲ್ಯಾ ತಾಕಾ, ಆತಾಂ ತಾಚ್ಯಾ ಹಾತಾಕ್ ಸಾಂಪಡ್ಲೆಂ ತಾಚೆಂ ಸೆಲ್ಪೋನ್!
ಕೊಣಾ ಲಾಗಿಂ ಉಲಂವ್ಚೆಂ? ಖಂಯ್ ಥಾವ್ನ್ ಧಯ್ರ್ ಆರಾಂವ್ಚೆಂ? ಪಯ್ಲ್ಯಾ ಪಾವ್ಟಿಂ ಆಜ್ ಆಲಿಯಾಕ್ ಆಪ್ಣಾಚ್ಯಾ ಝುಜಾಂತ್ ಅಪ್ಣಾಕ್ ಎಕ್ಲ್ಯಾಚಿ ಗರ್ಜ್ ಆಸಾ ಮ್ಹಳ್ಳ್ಯಾಪರಿಂ ತಾಕಾ ದಿಸ್ಲೆಂ.
ಆಲಿಯಾ ಆಪ್ಣಾಚೆಂ ಮ್ಹಣೊನ್ ತಾಕಾ ಸಮ್ಜೊಂಚೆ ಕೊಣ್ಯ್ ನಾತ್ಲ್ಲೆಂ.
ತಾಚ್ಯಾ ಘೊವಾ ಥಾವ್ನ್ ತಾಣೆಂ ಎದೊಳ್ಚ್ ಸುಟ್ಕಾ ಜೊಡ್ಲ್ಲಿ.
ತಾಚ್ಯಾ ಬಾಪಾಯ್ಚಾ ಘರ್ಚಿಂ.....? ನಾಂ! ಆಲಿಯಾ ಆನಿ ನಾಸಿರಾಚೆಂ ಡೈವರ್ಸ್ ಜಾಲ್ಯಾ ಉಪ್ರಾಂತ್ ತಾಣಿಂ ಆಲಿಯಾಕ್ ಬೂದ್ಬಾಳ್ ಸಾಂಗ್ಚಿಚ್ ಬಂದ್ ಕೆಲ್ಲಿ.
’ಹ್ಯಾ ವೆಳಾರ್ ಮ್ಹಜ್ಯಾ ಜಯ್ತಾಚ್ಯಾ ವಾಟೆಕ್ ಉಜ್ವಾಡ್ ದಾಕಂವ್ಚೆಂ ಕಿರಣ್ ಖಂಯ್ ಥಾವ್ನ್ ಉದೆತೆಲೆಂ? ಖಂಯ್ ಥಾವ್ನ್....? ಕೊಣಾ ಥಾವ್ನ್....?’
ಅಭಿಲಾಶ....? ತಾಣೆಂ ವಾಸ್ತವೀಕ್ ಸಮಾಜೆಕ್ ಮಾಂದುನ್ ಘೆತ್ಲ್ಲೆಂ.
ನಮಿತಾ......? ಅಭಿಲಾಶಚಾ ವಾಟೆರ್ ತೆಂಯ್ ಚಲೊಂಕ್ ತಯಾರ್ ಜಾಲ್ಲೆಂ.
ಸಮೀರ್........? ತಾಣೆಂ ಎದೊಳ್ಚ್ ಆಪ್ಲ್ಯಾ ಜಿವಿತಾಚಿ ವಾಟ್ ವಿಂಚ್ಲ್ಲಿ.
ತರ್.....?
ಕಶೆಂ ಹಾಂವ್ ಹ್ಯಾ ವೆಳಾಕ್ ಪಾಶಾರ್ ಕರುಂ?
ಕೋಣ್ ಆಸಾ? ಮ್ಹಜೆಂ ಮ್ಹಳ್ಳೆಂ ಕೋಣ್ ಆಸಾ? ಆಪ್ಣಾಕ್ ಸಮ್ಜಾಲ್ಲೆಂ...! ಆಪ್ಣಾಕ್ ಸಮ್ಜೊಂಚೆಂ....?
ಆಲಿಯಾನ್ ಪೊನಾ ವಯ್ಲ್ಯಾ ತಾಚ್ಯಾ ಡೈರಿಂತ್ ಸೊಧ್ನಾಂ ಆರಂಭ್ ಕೆಲಿಂ.
A....B....C...., F....., K...., P....Q....R....!
ತಿತ್ಲೆಂಚ್!
ಆಲಿಯಾಚಾ ಮತಿಕ್ ಭರ್ವಶ್ಯಾಚಿಂ ಆನಿ ಧಯ್ರಾಚಿಂ ಕಿರ್ಣಾಂ ಸಾಂಗಾತಾ ಫಾಂಕ್ಲಿ.
ತಾಚ್ಯಾ ಮತಿಕ್ ದಾಡ್ ಮಾರುನ್ ರಾವ್ಲೆಲಿ ಸಲ್ವಣ್ ಖಿಣಾ ಭಿತರ್ ಪೊಳುನ್ ಧಾಂವ್ಲಿ.
ಆಲಿಯಾಚಾ ತೊಂಡಾರ್ ಹಾಸೊ ಉಡೊನ್ ಆಯ್ಲ್ಯೊ. ಜಯ್ತಾಚ್ಯೊ ಹಾಸೊ!
ಆಪ್ಣಾಕ್ ಆಪ್ಲಿ ಸಲ್ವಣಿ ಮಾಂದುನ್ ಘೆಂವ್ಕ್ ಲಾಂವ್ಚ್ಯಾ ಮತಿಕ್ ಆಪ್ಣೆ ಸಲ್ವಯಿಲ್ಲ್ಯೊ ಹಾಸೊ!
ಆಲಿಯಾ ಆಜ್ ನವ್ಯಾನ್ ಜಯ್ತ್ ಆಪ್ಣಾಂವ್ಕ್ ಸಕ್ಲ್ಲೆಂ!
ಸಲ್ವಣ್ ಆನಿ ಜಯ್ತಾ ಮಧ್ಲ್ಯಾ ಝುಜಾಂತ್ ಆಲಿಯಾ ಆಜ್ ಜಯ್ತೆವಂತ್ ಜಾಲ್ಲೆಂ!
**************
ಸದಾಂ ಆಪ್ಣೆ ರಾಂವ್ಚ್ಯಾ ಆಪಾರ್ಟ್ಮೆಂಟಾಚಾ ಲಿಫ್ಟಾ ಮುಕಾಂತ್ರ್ಚ್ ಆಪ್ಲ್ಯಾ ಪ್ಲ್ಯಾಟಾಕ್ ಯೆಂವ್ಚ್ಯಾ ಆಲಿಯಾಕ್ ಆಜ್ ಕಿತ್ಯಾಕ್ಗೀ ತ್ಯಾ ಲಿಫ್ಟಾಚಾ ದೆಗೆಚಾ ಶಿಡಿಯೆ ವಯ್ಲ್ಯಾನ್ ಚಲೊನ್ ವೆಚೆಂ ಮನ್ ಜಾಲೆಂ.
ಆಲಿಯಾ ಕಾಳ್ಜಾ ಮನಾನ್ ಭಿವ್ಕುರೆಂ ಚಲಿ ಭಿಲ್ಕುಲ್ ನ್ಹಯ್! ಜಾಲ್ಯಾರ್ಯ್ ಹ್ಯಾ ಶಿಡಿಯೆ ವಯ್ಲ್ಯಾನ್ ತೆಂ ಚಲೊನ್ ಗೆಲ್ಲೆಂ ನಾ. ಅಪ್ರೂಪ್ ಕೆದ್ನಾಂಯ್ ಲಿಫ್ಟ್ ಪಾಡ್ ಜಾಲ್ಯಾರ್ ಮಾತ್ರ್ ದುಸ್ರೊ ನಿರ್ವೊಗ್ ನಾಸ್ತಾಂ ತೆಂ ಶಿಡಿಯೆ ವಯ್ಲ್ಯಾನ್ ಚಲೊನ್ ವೆತಾಲೆಂ.
ಆಜ್ ಲಿಫ್ಟ್ ಚಾಲು ಆಸ್ಲ್ಲಿ! ಜಾಲ್ಯಾರ್ಯ್ ಆಲಿಯಾನ್ ಶಿಡಿಯೆ ವಯ್ರ್ ಪಾಂಯ್ ದವರ್ಲೆ!
ತ್ಯಾ ಶಿಡಿಯೆಚಿಂ ಎಕೇಕ್ಚ್ ಮೆಟಾಂ ಚಡ್ತಾನಾ ಆಪ್ಣೆಂ ಆಪ್ಲ್ಯಾ ಜಿವಿತಾಚಾ ಎಕೇಕ್ ವರ್ಸಾಂಕ್ ಚಲೊನ್ ಆಯಿಲ್ಲ್ಯಾ ತ್ಯಾ ವೆಳಾಕ್ ಚಿಂತುನ್ ಆಲಿಯಾ ಮೆಟಾಂ ಚಡಾಲಾಗ್ಲೆಂ.
ಜಿವಿತಾಚ್ಯಾ ತ್ಯಾ ಮೆಟಾಂನಿಯ್ ಆಲಿಯಾನ್ ಧಯ್ರ್ ಸಾಂಡುಂಕ್ ನಾತ್ಲ್ಲೆಂ.
ತಿಂ ಮೆಟಾಂ ತಾಚ್ಯಾ ಬಾಪಾಯ್ಚಾ ಘರಾಂತ್ಲಿಂ ಜಾಂವ್ ವಾ ತಿಂ ಮೆಟಾಂ ತಾಚ್ಯಾ ಘೊವಾಚ್ಯಾ ಘರಾಂತ್ಲಿ!
ತಿಂ ಮೆಟಾಂ ತಾಚ್ಯಾ ಭುರ್ಗ್ಯಾಪಣಾಚಿಂ ಜಾಂವ್ ವಾ ತಿಂ ತಾಚ್ಯಾ ತರ್ನಾಟ್ಪಣಾಚಿಂ!
ತಿಂ ಮೆಟಾಂ ತಾಚ್ಯಾ ಆಂಕ್ವಾರ್ ಜಿವಿತಾಚಿಂ ಜಾಂವ್ ವಾ ತಿಂ ತಾಚ್ಯಾ ಕಾಜಾರಿ ಜಿವಿತಾಚಿಂ!
ಆಲಿಯಾನ್ ಕೆದ್ನಾಂಯ್ ಧಯ್ರಾಕ್ ಸಾಂಡುಂಕ್ ನಾ! ತಾಚ್ಯಾ ದೊಳ್ಯಾಂ ಮುಕಾರ್ ತಾಚೆಂ ಮರಣ್ ಯೇವ್ನ್ ಉಭೆಂ ಜಾಲ್ಲ್ಯಾ ವಗ್ತಾರ್ ಸಯ್ತ್ ಆಲಿಯಾ ಭಿಯೆಲ್ಲೆಂ ಚೆಡುಂ ನ್ಹಯ್!
ಆಶೆಂ ಆಸ್ತಾಂ....., ಆಜ್.....?
ಸವ್ಕಾಸ್ ಶಿಡಿಯೆಚಿಂ ಮೆಟಾಂ ಚಡೊನ್ ಆಲಿಯಾ ಆಪ್ಲ್ಯಾ ಪ್ಲ್ಯಾಟಾಕ್ ಪಾವ್ಲೆಂ.
ಆಪ್ಲ್ಯಾ ಖಾಂದಾರ್ ಭೊರ್ ಘೆವ್ನ್ ಉಮ್ಕಾಳ್ಚ್ಯಾ ವ್ಯಾನಿಟಿ ಬ್ಯಾಗಾಕ್ ಮುಕ್ಲ್ಯಾ ಸಾಲಾಂತ್ಲ್ಯಾ...., ತಾಣೆಂ ಜೆವ್ಣಾಕ್ ಬಸ್ಚ್ಯಾ ಮೆಜಾ ವಯ್ರ್ ತಾಣೆಂ ಉಡಯ್ಲೆಂ.
ಭಿತರ್ ಕುಜ್ನಾಂ ಥಾವ್ನ್ ಕಸಲೊಗೀ ಆವಾಜ್ ಆಯ್ಕೊನ್ ಯೆತಾಲೊ.
ಬೋವ್ಶಾ ನಮಿತಾ ರಾತಿಚಾ ಜೆವ್ಣಾಕ್ ಕಾಂಯ್ ರಾಂದ್ತಾ ಆಸ್ತೆಲೆಂ. ಚಿಂತ್ಲೆಂ ತಾಣೆಂ.
ನಾಸಿರಾಚೆಂ ಆನಿ ಆಲಿಯಾಚೆಂ ಡೈವರ್ಸ್ ಜಾಲ್ಯಾ ಉಪ್ರಾಂತ್ ಆಲಿಯಾ ನಮಿತಾ ಸಂಗಿಂ ರಾವ್ತಾಲೆಂ. ನಮಿತಾ ಎಕ್ಸುರೆಂ ಆಸ್ಲ್ಲ್ಯಾನ್ ತಾಣೆಂ ಅಲಿಯಾಕ್ ಆಪ್ಣಾ ಸಾಂಗಾತಾ ಯೆವ್ಕಾರ್ ದಿಲ್ಲೊ. ತಶೆಂ ಆಲಿಯಾ ಆಪ್ಣಾಚಿ ವಸ್ತಿ ಆಪುಣ್ಚ್ ಕರುಂಕ್ ಸಕ್ತಾಲೆಂ. ಪುಣ್ ಎಕ್ಸುರೆಂ ಜಿವಿತ್ ಸಾರ್ಚ್ಯಾಕ್ಯ್ ನಮಿತಾನ್ ದಿಲ್ಲ್ಯಾ ಆಪವ್ಣ್ಯಾ ಥಾವ್ನ್ ಸಾಂಗಾತಾ ಜೀವನ್ ಕಾಡುಂಕ್ ಸುಲಭ್ ಮ್ಹಣ್ ಚಿಂತ್ಲ್ಲ್ಯಾ ಆಲಿಯಾನ್ ನಮಿತಾ ಸಂಗಿಂ ರಾಂವ್ಚೆಂ ಮನ್ ಕೆಲ್ಲೆಂ.
ಪ್ಲ್ಯಾಟಾ ಭಿತರ್ ಆಯಿಲ್ಲ್ಯಾ ಆಲಿಯಾಕ್ ಆಜ್ ಹರ್ಶೆಂಚಾ ಪರಿಂ ನಮಿತಾ ಲಾಗಿಂ ವಚೊನ್ ಉಲವ್ನ್ ತಾಚೆ ಸಾಂಗಾತಾ ಕಾಫಿ ಪಿಯೆವ್ನ್ ಉಪ್ರಾಂತ್ ಆಪ್ಲೆಂ ಯೂನಿಫಾರಮ್ ನಿಕ್ಳಾಂವ್ಚೆಂ ಮನ್ ಯೇನಾಸ್ತಾನಾ ವೆತಾನಾ ಆಲಿಯಾ ಭಾಯ್ಲ್ಯಾ ಸಾಲಾ ಥಾವ್ನ್ ಭಿತರ್ ಆಯಿಲ್ಲೆಂ ತೆಂ ನಿಟ್ಟ್ ಬಾತ್ರುಮಾ ತೆವ್ಶಿಂ ಗೆಲೆಂ. ಬಾತ್ರುಮಾ ಭಿತರ್ ಆಯಿಲ್ಲ್ಯಾ ತಾಣೆಂ ಏಕ್ ಪಾವ್ಟಿಂ ತ್ಯಾ ವಾಶ್ ಬೇಸಿನಾ ವಯ್ಲ್ಯಾ ಆರ್ಶ್ಯಾಂತ್ ಆಪ್ಣಾಚೆಂಚ್ ಪ್ರತಿರೂಪ್ ಪಳವ್ನ್, ವಾಶ್ ಬೇಸಿನಾಚೊ ಟ್ಯಾಪ್ ಉಗ್ತೊ ಕೆಲೊ. ದೊನ್ಯ್ ಹಾತಾಂನಿ ತ್ಯಾ ಟ್ಯಾಪಾ ಥಾವ್ನ್ ದೆಂವ್ಚ್ಯಾ ಉದ್ಕಾಕ್ ಧರುನ್ ಆಪ್ಲ್ಯಾ ತೊಂಡಾಕ್ ಹಳ್ತಾರ್ ತಾಣೆಂ ಮಾರ್ಲೆಂ. ಉಭಾಳ್ ತೊಂಡಾಕ್ ಟ್ಯಾಪಾಚಾ ಥಂಡ್ ಉದ್ಕಾನ್ ಮೊಗಾನ್ ವೆಂಗ್ತಾನಾ ಜಿವಾಂತ್ ಕಸಲೊಗೀ ಏಕ್ ನವೊ ಹುರುಪ್ ಆಯಿಲ್ಯಾಪರಿಂ ತಾಕಾ ಜಾಲೊ. ತಾಚೆಂ ಮುಖಮಳ್ ಥಂಡ್ ಜಾವ್ನ್ ತ್ಯಾ ಮುಖಮಳಾರ್ ಉಲ್ಲಾಸ್ ಖೆಳೊಂಕ್ ಲಾಗ್ಲೊ.
ಕುಜ್ನಾಂತ್ ಕಾಮಾರ್ ಆಸ್ಲ್ಲ್ಯಾ ನಮಿತಾಕ್ ಆಜ್ ಆಲಿಯಾಚೊ ಭರ್ತಾವ್ ಕಿತ್ಯಾಕ್ಗೀ ವಿಚಿತ್ರ್ ದಿಸ್ಲೊ. ಆಪ್ಣಾಲಾಗಿಂ ಕಾಂಯ್ ಏಕ್ ಸಬ್ದ್ ಉಲಯ್ನಾಸ್ತಾನಾ ಬಾತ್ ರುಮಾ ಭಿತರ್ ಘುಸ್ಲ್ಲ್ಯಾ ಆಲಿಯಾಕ್ ತೆಂ ಸಮ್ಜೊಂಕ್ ಸಕ್ಲೆಂ ನಾ. ಆಲಿಯಾನ್ ಕೆದ್ನಾಂಯ್ ಆಶೆಂ ಕೆಲ್ಲೆಂ ನಾ.
"ಆಲಿಯಾ...!" ಕುಜ್ನಾ ಥಾವ್ನ್ಚ್ ನಮಿತಾನ್ ಆಲಿಯಾಕ್ ಉಲೊ ದಿಲೊ.
ಆಲಿಯಾಕ್ ನಮಿತಾನ್ ಆಪಯಿಲ್ಲೆಂ ಆಯ್ಕಾಲೆಂ ಜಾಲ್ಯಾರ್ಯ್ ನಮಿತಾಚಾ ಉಲ್ಯಾಕ್ ತಾಣೆಂ ಕಾಂಯ್ ಜವಾಬ್ ದಿಲಿ ನಾ. ತೆಂ ತಶೆಂಚ್ ತೊ ವಾಶ್ ಬೇಸಿನಾಚೊ ಟ್ಯಾಪ್ ಭಂಧ್ ಕರುನ್ ದೆಗೆನ್ ಉಮ್ಕಾಳ್ಚ್ಯಾ ತುವಾಲ್ಯಾನ್ ತೋಂಡ್ ಪೊಶೆವ್ನ್ ಆಪ್ಣಾಚಾ ಬೆಡ್ರೂಮಾಕ್ ರಿಗ್ಲೆಂ.
ತಿತ್ಲೆಂಚ್!
ಆಪ್ಣಾಚಾ ಕುಡಿ ವಯ್ಲೆಂ ಆಪ್ಣಾಚೆಂ ಯೂನಿಫಾರಮ್ ಕಾಡ್ಚ್ಯಾ ಪಯ್ಲೆಂ ಆಪ್ಣಾಕ್ಚ್ ಏಕ್ ಪಾವ್ಟಿಂ ಆರ್ಶ್ಯಾಂತ್ ಪಳಂವ್ಕ್ ತಾಕಾ ಮನ್ ಜಾಲೆಂ. ತೆಂ ಆತಾಂ ತ್ಯಾ ಬೆಡ್ರೂಮಾಂತ್ಲ್ಯಾ ಕಬಟಾಕ್ ಚಿಡ್ಕಾಯಿಲ್ಲ್ಯಾ ಆರ್ಶ್ಯಾ ಮುಕಾರ್ ಉಭೆಂ ಜಾಲೆಂ.
ಏಕ್ಚ್ ಕ್ಷಣ್!
"ಆಲಿಯಾ..... ಯು ಹ್ಯಾವ್ ಎ ಸ್ಟ್ರಾಂಗ್ ವಿಲ್ ಪವರ್!" ಆರ್ಶ್ಯಾ ಭಿತರ್ಲ್ಯಾ ಆಪ್ಲ್ಯಾಚ್ ರುಪ್ಣ್ಯಾಕ್ ಪಳವ್ನ್ ಆಲಿಯಾಚಾ ತೊಂಡಾರ್ ಹಾಸೊ ಉದೆಲ್ಯೊ.
"ಆಜ್ ಥಾವ್ನ್ ತುಕಾ ಆನಿ ಮ್ಹಾಕಾ ಕಾಂಯ್ಚ್ ಸಂಭಂಧ್ ನಾ!" ಆರ್ಶ್ಯಾ ಭಿತರ್ಲೆಂ ಆಲಿಯಾ ಆಪ್ಣಾಕ್ ಸಾಂಗ್ತಾ ತಶೆಂ ಆಲಿಯಾಕ್ ಭೊಗ್ಲೆಂ.
ವ್ಹಯ್! ಆರ್ಸೊ ಕೆದ್ನಾಂಯ್ ಸತ್ಚ್ ಉಲಯ್ತಾ! ತಶೆಂ ಆಜ್! ಆಜ್ಯ್ ಆರ್ಸೊ ಸತ್ಚ್ ಉಲಯಿಲ್ಲೊ. ಆಲಿಯಾನ್ ತ್ಯಾ ಆದ್ಲ್ಯಾ ಆಲಿಯಾಕ್ ತ್ಯಾ ಮೊಳಾಬಾ ವಯ್ಲ್ಯಾ ಕುಪಾಂ ಮಧೆಂ ಉಭಯಿಲ್ಲೆಂ! ತೆಂ ಆಲಿಯಾ ಉಭೊನ್ ಗೆಲ್ಲೆಂ ಜಶೆಂ ದಾಗೊ ತುಟೊನ್ ಉಭೊನ್ ವೆಚ್ಯಾ ಸೊಂರ್ಗ್ಯಾ ಪರಿಂ! ಆನಿ ತೆಂ ನಪಂಯ್ಚ್ ಜಾಲ್ಲೆಂ.
ಕಬಟಾ ವಯ್ಲ್ಯಾ ಆರ್ಶ್ಯಾಂತ್ ಆಪ್ಣಾಕ್ಚ್ ದೊಳೆ ಭರ್ ಪಳೆವ್ನ್ ರಾವ್ಲೆಲ್ಯಾ ಆಲಿಯಾಚಾ ಮತಿಕ್ ತೃಪ್ತಿ ಜಾವ್ನ್ ಯೆತಾನಾ ಸವ್ಕಾಸ್ ಆಪ್ಲ್ಯಾ ಯೂನಿಫಾರಮಾಚೆರ್ ತಾಣೆಂ ಹಾತ್ ವೆಲೊ. ತೆಂ ಆತಾಂ ಆಪ್ಲೆಂ ಯೂನಿಫಾರಮ್ ನಿಕ್ಳಾಂವ್ಕ್ ಲಾಗ್ಲೆಂ.
ತಿತ್ಲ್ಯಾರ್!
"ಆಲಿಯಾ....!"
ಆಪ್ಲೆಂ ಯೂನಿಫಾರಮ್ ನಿಕ್ಳಾಂವ್ಚ್ಯಾ ಆಲಿಯಾಕ್ ಆಪ್ಣಾ ಪಾಟ್ಲ್ಯಾನ್ ಥಾವ್ನ್ ನಮಿತಾಚೊ ತಾಳೊ ಆಯ್ಕಾಲೊ. ಪುಣ್ ಆಲಿಯಾ ಪಾಟಿಂ ಘುಂವ್ಲೆಂ ನಾ. ತೆಂ ತಶೆಂಚ್ ತಾಚ್ಯಾ ಆಂಗಾ ವಯ್ಲೆಂ ಯೂನಿಫಾರಮ್ ಕಾಡ್ಚ್ಯಾ ಕಾಮಾರ್ಚ್ ಮಗ್ನ್ ಜಾಲೆಂ.
ಆಜ್ ಆಪ್ಣೆಂ ಆಲಿಯಾಕ್ ಆಪಯಿಲ್ಲೆಂ ಆಪ್ಣಾಕ್ ಆಯ್ಕಾನಾತ್ಲೆಲ್ಯಾಪರಿಂ ಕರ್ಚ್ಯಾ ಆಲಿಯಾಚೊ ಭರ್ತಾವ್ ನಮಿತಾಕ್ ಸಮ್ಜಾಲೊ ನಾ. ತೆಂ ತಶೆಂಚ್ ತ್ಯಾ ಬೆಡ್ರೂಮಾಚಾ ದಾರ್ವಾಟ್ಯಾರ್ ರಾವೊನ್ ಆಲಿಯಾಕ್ ಪಳಂವ್ಕ್ ಲಾಗ್ಲೆಂ.
ನಮಿತಾಚಿ ಕಾಂಯ್ ಪರ್ವಾ ನಾತ್ಲೆಲ್ಯಾ ಆಲಿಯಾಚೆ ಹಾತ್ ವ್ಹಳೂ ತಾಚ್ಯಾ ಬ್ಲೌಸಾಚಾ ಬುಂತಾಂವಾಚೆರ್ ಚರ್ಲೆ!
ಹೆಂ ಪಳೆಲ್ಲೆಂ ನಮಿತಾ,
"ಆಲಿಯಾ.....!" ತಾಣೆಂ ಪರ್ತ್ಯಾಕ್ ಆಲಿಯಾಕ್ ಉಲೊ ದಿಲೊ. ಪುಣ್ ಕಾಂಯ್ ಫಾಯ್ದೊ ಜಾಲೊ ನಾ. ಆಲಿಯಾ ಥಾವ್ನ್ ಕಾಂಯ್ ಜವಾಬ್ ಆಯ್ಲಿ ನಾ.
ಬ್ಲೌಸಾಚೆ ಬುತಾಂವ್ ಕಾಡುನ್ ಉಗ್ತಿ ಜಾಲ್ಲ್ಯಾ ಬ್ಲೌಸಾಕ್ ಆಲಿಯಾನ್ ಆಪ್ಲ್ಯಾ ಕುಡಿರ್ ಥಾವ್ನ್ ನಿಕ್ಳಾವ್ನ್ ಸಕಯ್ಲ್ ಗಳಯ್ಲಿ. ತೆಂ ಆತಾಂ ಬ್ರೇಜಿಯರಾಚೆರ್ ಆನಿ ಯೂನಿಫಾರಮಾಚಾ ಸ್ಕರ್ಟಾಚೆರ್ ಆಸ್ಲ್ಲೆಂ.
ತಿತ್ಲೆಂಚ್!
ತಶೆಂಚ್ ಆರ್ಶ್ಯಾಂತ್ ಆಪ್ಣಾಕ್ ಪಳವ್ನ್ ಆಲಿಯಾನ್ ಆತಾಂ ಆಪ್ಲ್ಯಾ ಸ್ಕರ್ಟಾಚಾ ಜಿಪ್ಪಾಚೆರ್ ಹಾತ್ ವೆಲೊ. ತೆಂ ಜಿಪ್ಪ್ ವೊಡುನ್ ಸ್ಕರ್ಟಾಚೊ ಬಟನ್ ಸುಟಯ್ತಾ ಮ್ಹಣ್ತಾನಾ ತೊ ಬಟನ್ ತುಟ್ಲೊ! ತಶೆಂಚ್ ತ್ಯಾ ಸ್ಕರ್ಟಾಕ್ ಆಪ್ಲ್ಯಾ ಹಾತಾನ್ ತಾಣೆಂ ಸಕಯ್ಲ್ ಗಳಯ್ಲೊ. ಆಲಿಯಾ ಆತಾಂ ಫಕತ್ತ್ ಬ್ರೇಜಿಯರಾಚೆರ್ ಆನಿ ಪ್ಯಾಂಟಿಚೆರ್ ಆಯ್ಲೆಂ.
ಆಲಿಯಾಕ್ ಪಾಟ್ಲ್ಯಾನ್ ಥಾವ್ನ್ ಪಳವ್ನ್ಚ್ ಆಸ್ಲ್ಲೆಂ ನಮಿತಾ ತಾಕಾ ಕಾಂಯ್ಚ್ ಸಮ್ಜಾನಾಸ್ತಾನಾ ತೆಂ ಬೆಡ್ರೂಮಾ ಥಾವ್ನ್ ಭಾಯ್ರ್ ಚಲೊನ್ ಪರ್ತ್ಯಾಕ್ ಕುಜ್ನಾಕ್ ಆಯ್ಲೆಂ. ಹ್ಯಾ ಚೆಡ್ವಾಕ್ ಆಜ್ ಕಿತೆಂ ಜಾಲಾಂ? ನಮಿತಾಚಾ ಜಿಬೆರ್ ಸವಾಲ್ ಉಟೊನ್ ಉಭೆಂ ಜಾಲ್ಲೆಂ.
ಥೊಡಿಂ ಕ್ಷಣಾಂ ತಶೆಂಚ್ ಆಪ್ಣಾಕ್ ಆರ್ಶ್ಯಾಂತ್ ಪಳವ್ನ್ ರಾವ್ಲ್ಲೆಂ ಆಲಿಯಾ,
"ದಿಸ್ ಇಸ್ ವಾಟ್ ರಿಯಲ್ಲಿ ಯು ಆರ್! ಮೈ ಡಿಯರ್ ಆಲಿಯಾ.....!" ಉದ್ಗಾರ್ಲ್ಲ್ಯಾ ಆಲಿಯಾನ್ ಕಬಾಟಾಕ್ ಉಗ್ತೆಂ ಕರುನ್ ಆಂಗ್ ಪುಸ್ಚೊ ತುವಾಲೊ ಹಾತಿಂ ಘೆತ್ಲೊ. ಎಕಾ ಹಾತಾನ್ ತುವಾಲೊ ಆನಿ ದುಸ್ರ್ಯಾ ಹಾತಿನ್ ಸಕಯ್ಲ್ ಧರ್ಣಿರ್ ಪಡ್ಲೆಲೆಂ ತೆಂ ಅತ್ತಾಂ ಆಪ್ಣೆ ನಿಕ್ಳಾಯಿಲ್ಲೆಂ ಆಪ್ಣಾಚೆಂ ಯೂನಿಫಾರಮ್ ಆರಾವ್ನ್ ಹಾತಿಂ ಘೆವ್ನ್ ಬೆಡ್ರೂಮಾಚಾ ಕೊನ್ಶ್ಯಾಕ್ ಆಸ್ಲ್ಲ್ಯಾ ಉಂಬೊಳ್ಚ್ಯಾ ವಸ್ತುರಾ ಸಾಂಗಾತಾ ಉಡಯ್ನಾಸ್ತಾನಾ ತಶೆಂಚ್ ತ್ಯಾ ಯೂನಿಫಾರಮಾಕ್ ಮುದೊ ಕರುನ್ ಘೆವ್ನ್ ಬೆಡ್ರೂಮಾ ಥಾವ್ನ್ ಭಾಯ್ರ್ ಯೇವ್ನ್ ನಿಟ್ಟ್ ಕಿಚನ್ ರೂಮಾಚಾ ದಾರಾ ಭಿತರ್ಲ್ಯಾನ್ ಆಸ್ಲ್ಲ್ಯಾ ಕಚ್ರ್ಯಾಚಾ ದೊಬ್ಯಾಂತ್ ತೆಂ ಉಡವ್ನ್ ಬಾತ್ರುಮಾ ಭಿತರ್ ರಿಗ್ಲೆಂ.
ಆಲಿಯಾಚೊ ಹೊ ಭರ್ತಾವ್ ನಮಿತಾಕ್ ಏಕ್ ಮಿಸ್ತೆರ್ ಮ್ಹಳ್ಳ್ಯಾ ಪರಿಂ ಜಾಲೊ. ತಾಕಾ ಕಾಂಯ್ಚ್ ಸಮ್ಜಾನಾತ್ಲ್ಲೆಂ. ಹ್ಯಾ ಆದಿಂ ಆಲಿಯಾಕ್ ತಾಣೆಂ ಆಶೆಂ ಕೆದ್ನಾಂಚ್ ಪಳೆಲ್ಲೆಂ ನಾ. ಕುಜ್ನಾಂತ್ ಕಾಮಾರ್ ಆಸ್ಲ್ಲೆಂ ನಮಿತಾ ಆಲಿಯಾನ್ ಕಚ್ರ್ಯಾ ದೊಬ್ಯಾಂತ್ ಉಡಯಿಲ್ಲ್ಯಾ ತ್ಯಾ ತಾಚ್ಯಾ ಯೂನಿಫಾರಮಾಕ್ ಪಳಂವ್ಚ್ಯಾರ್ ಪಡ್ಲೆಂ.
ಕೆದ್ನಾಂ ಕೆದ್ನಾಂ ಆಲಿಯಾ ವಸ್ತುರ್ ನ್ಹೆಸ್ತಾನಾ ಆನಿ ವಸ್ತುರ್ ಕಾಡ್ತಾನಾ ನಮಿತಾಚಾ ಮುಕಾರ್ ಉಗ್ತೆಂ ಪಡ್ತಾಲೆಂ ತೆಂ ಕಾಂಯ್ ವಿಶೇಶ್ ನ್ಹಯ್ ಆಸ್ಲ್ಲೆಂ! ತಿಂ ದೊಗಾಂಯ್ ಸಾಂಗಾತಾ ನ್ಹೆಸ್ತಾಲಿಂ. ಸಾಂಗಾತಾ ವಸ್ತುರ್ ಕಾಡ್ತಾಲಿಂ. ಹಾಂತುಂ ಕಾಂಯ್ ನವಾಲ್ ನಾತ್ಲ್ಲೆಂ. ತೆಂ ವಾತಾವರಣ್ಚ್ ದುಸ್ರೆಂ! ಆನಿ ಆಲಿಯಾಚೆಂ ಆಯ್ಚೆಂ ಹೆಂ ಆರ್ಶ್ಯಾ ಮುಕ್ಲೆಂ ವಾತಾವರಣ್ಚ್ ದುಸ್ರೆಂ!
ತ್ಯಾ ಭಾಯ್ರ್ ಆಲಿಯಾನ್ ತಾಚ್ಯಾ ತ್ಯಾ ಯೂನಿಫಾರಮಾಕ್ ಕಾಡುನ್ ಕಚ್ರ್ಯಾ ದೊಬ್ಯಾಂತ್ ಉಡಯಿಲ್ಲೆಂ! ಆಶೆಂ ಕಿತ್ಯಾಕ್?
ಕುಜ್ನಾಂತ್ ರಾಂದ್ಚಾ ನಮಿತಾಕ್ ಕಾಂಯ್ಚ್ ಸಮ್ಜಾನಾತ್ಲ್ಲೆಂ. ಸಗ್ಳ್ಯಾಂ ವರ್ನಿಂ ತಾಕಾ ಚಡ್ ಆಶ್ಚರ್ಯ್ ಜಾಲ್ಲೆಂ ಮ್ಹಳ್ಯಾರ್ ಆಜ್ ಆಲಿಯಾ ಪ್ಲ್ಯಾಟಾಕ್ ಆಯ್ಲ್ಯಾ ಉಪ್ರಾಂತ್ ಏಕ್ ಸಬ್ದ್ಯ್ ತಾಚೆಲಾಗಿಂ ತೆಂ ಉಲಂವ್ಕ್ ನಾತ್ಲ್ಲೆಂ. ಆಪ್ಣಾನ್ ಉಲಂವ್ಚೆಂ ಪ್ರಯತ್ನ್ ಕೆಲ್ಯಾರ್ಯ್ ಆಲಿಯಾ ಉಲಂವ್ಕ್ ನಾ. ಕಾಂಯ್ ಪುಣಿ ಆಲಿಯಾ ಪರ್ತ್ಯಾಕ್ ಕಸಲ್ಯಾಯ್ ಪ್ರಾಬ್ಲೆಮಾಂತ್ ಪಡೊಂಕ್ ನಾ? ನಮಿತಾ ಫಕತ್ತ್ ಚಿಂತಾಲೆಂ ಮಾತ್ರ್.
ತಿತ್ಲ್ಯಾರ್!
ಭಾಯ್ಲಾ ಸಾಲಾಂತ್ ನಮಿತಾಚೆಂ ಸೆಲ್ಪೋನ್ ವ್ಹಾಜೊಂಕ್ ಲಾಗ್ಲೆಂ.
ಕುಜ್ನಾ ಥಾವ್ನ್ ಭಾಯ್ರ್ ಸಾಲಾಕ್ ಆಯಿಲ್ಲ್ಯಾ ನಮಿತಾನ್ ಆಪ್ಲೆಂ ಪೋನ್ ಹಾತಿಂ ಘೆವ್ನ್ ಪೊನಾಕ್ ಪಳೆತಾನಾ,
"ಅಭಿಲಾಶ!" ಮನಾಂತ್ಚ್ ಉದ್ಗಾರ್ಲ್ಲ್ಯಾ ನಮಿತಾನ್ ಪೋನ್ ಆನ್ ಕೆಲೆಂ.
"ಹಲೋ.....!" ನಮಿತಾ ಉಲಯ್ಲೆಂ.
"........."
"ವಾಟ್?" ಉದ್ಗಾರ್ಲ್ಲ್ಯಾ ನಮಿತಾಚ್ಯಾ ದೊಳ್ಯಾಂಚೊ ಆಸ್ಡ್ಯೊ ರುಂದಾಲ್ಯೊ.
".........."
"ಓಹ್ ನೋ...!" ನಮಿತಾಕ್ ಆಪುಣ್ ಕೊಸ್ಳೊನ್ ಗೆಲ್ಲೊ ಆನ್ಭೋಗ್ ಜಾಲೊ.
"........"
"ಓ.ಕೆ.... ಬಾಯ್!" ನಮಿತಾನ್ ಪೋನ್ ಭಂಧ್ ಕೆಲೆಂ.
"ಆಲಿಯಾ....? ಯು ಆರ್ ಫಾಯರ್ಡ್?"
ಪೋನ್ ಹಾತಿಂತ್ ಧರುನ್ ರಾವ್ಲೆಲೆಂ ನಮಿತಾ ವ್ಹಳೂ ಉದ್ಗಾರ್ಲೆಂ. ತಾಚ್ಯಾ ತಾಳ್ಯಾಂತ್ ಆಶ್ಚರ್ಯ್ ಉಟೊನ್ ರಾವ್ಲೆಂ.
ನಮಿತಾಕ್ ಆತಾಂ ಆಪ್ಲ್ಯಾ ಮತಿಂತ್ಲೆಂ ಸಗ್ಳೆಂ ನಿತ್ಳಾತಾ ತಶೆಂ ದಿಸ್ಲೆಂ. ಥೊಡ್ಯಾಚ್ ವೆಳಾ ಪಯ್ಲೆಂ ಆಲಿಯಾಚೊ ಭರ್ತಾವ್ ಪಳವ್ನ್ ಉದೆಲ್ಲ್ಯಾ ತಾಚ್ಯಾ ಮತಿಂತ್ಲ್ಯಾ ಸರ್ವ್ ಸವಾಲಾಂಕ್ ಜಾಪ್ ಮೆಳ್ಳಿ ತಶೆಂ ಭೊಗ್ಲೆಂ. ಪುಣ್ ಹೆಂ ಕಶೆಂ ಆನಿ ಕಿತ್ಯಾಕ್ ಜಾಲೆಂ?
ಹ್ಯಾ ಸವಾಲಾಕ್ ಫಕತ್ತ್ ಆಲಿಯಾ ಮಾತ್ರ್ ಜವಾಬ್ ದೀಂವ್ಕ್ ಸಕ್ತಾಲೆಂ. ಆಲಿಯಾನ್ ಹ್ಯಾ ಸವಾಲಾಕ್ ಜವಾಬ್ ದೀಂವ್ಕ್ ಜಾಯ್ ತರ್ ತಾಣೆಂ ಬಾತ್ರುಮಾ ಥಾವ್ನ್ ಭಾಯ್ರ್ ಯೇಂವ್ಕ್ ಜಾಯ್. ತೆದ್ನಾಂ ಪಾಸೊನ್ ಹಾವೆಂ ತಾಕಾ ರಾಕೊಂಕ್ ಜಾಯ್. ಮತಿಂತ್ಚ್ ಚಿಂತ್ಲ್ಲೆಂ ನಮಿತಾ ತಶೆಂಚ್ ಕುಜ್ನಾ ತೆವ್ಶಿಂ ಚಮ್ಕಾಲೆಂ.
ಬಾತ್ರುಮಾ ಥಾವ್ನ್ ಆಲಿಯಾ ಭಾಯ್ರ್ ಯೆತಾನಾ ನಮಿತಾನ್ ಸಾದರ್ಣ್ ತಾಚೆಂ ಕುಜ್ನಾಂತ್ಲೆಂ ಕಾಮ್ ಸಂಪಯಿಲ್ಲೆಂ. ತ್ಯಾ ಶಿವಾಯ್ ದೊಗಾಂಯ್ಕ್ಯ್ ಹರ್ಶೆಂಚಾ ಪರಿಂ ತಾಣೆಂ ಕಾಫಿ ತಯಾರ್ ಕೆಲ್ಲಿ.
ಫಕತ್ತ್ ಆಪ್ಲ್ಯಾ ಕುಡಿಕ್ ತ್ಯಾ ಆಂಗ್ ಪುಸ್ಚ್ಯಾ ತುವಾಲ್ಯಾನ್ ರೆವೊಡ್ ಮಾರುನ್ ಭಾಯ್ರ್ ಆಯಿಲ್ಲ್ಯಾ ಆಲಿಯಾನ್ ಜೆಂ ಕಿತೆಂ ತಾಚೆಂ ಪರ್ನೆಂ ಮ್ಹಳ್ಳೆಂ ತೆಂ ಆಸ್ಲ್ಲೆಂ ತಾಕಾ ತ್ಯಾ ಬಾತ್ರುಮಾಂತ್ಚ್ ಸಾಂಡ್ಲ್ಲೆಂ. ಬೆಡ್ರುಮಾಕ್ ಆಯಿಲ್ಲ್ಯಾ ತಾಣೆಂ ಅಜೂನ್ಯ್ ಥಂಡ್ ಆಸ್ಲೆಲ್ಯಾ ಆಪ್ಲ್ಯಾ ಕೆಸಾಂಕ್ ಪಾತಳ್ ಕಾಟನಾಚೆಂ ಬೈರಸ್ ರೆವ್ಡಾವ್ನ್, ತೊಂಡಾಕ್ ಕ್ರೀಮ್ ಸಾರವ್ನ್, ಸುಕ್ಚ್ಯಾ ವೊಂಟಾಂಕ್ ವ್ಯಾಸಲೀನ್ ಶೆಳ್ ದೀವ್ನ್, ಕುಡಿರ್ ವಸ್ತುರ್ ವೊಡ್ಲೆಂ.
ಬೆಡ್ರೂಮಾ ಥಾವ್ನ್ ತೆಂ ಭಾಯ್ರ್ ಆಯಿಲ್ಲೆಂ ಕಿಚನಾಂತ್ ಏಕ್ ದೀಶ್ಟ್ ಭೊಂವ್ಡಾವ್ನ್ ಥಂಯ್ಚರ್ ನಮಿತಾ ತಾಕಾ ದಿಸೊಂಕ್ ನಾತ್ಲ್ಲೆಂ ಪಳವ್ನ್ ಭಾಯ್ರ್ ಸಾಲಾಕ್ ಆಯ್ಲೆಂ.
ನಮಿತಾ ಭಾಯ್ಲ್ಯಾ ಸಾಲಾಂತ್ಲ್ಯಾ ಮೆಜಾಚಾ ಕದೆಲಾರ್ ಬಸ್ಲ್ಲೆಂ. ಮುಕಾರ್ಚ್ ಮೆಜಾರ್ ದೋನ್ ಕಪ್ಪಾಂನಿ ಕಾಫಿ ತಯಾರ್ ಆಸ್ಲ್ಲಿ.
"ಹಾಯ್!" ಆತಾಂ ಆಲಿಯಾಚ್ ಉಲಯ್ಲೆಂ.
ಆಲಿಯಾಚಿ ಮತ್ ಆತಾಂ ತಾಚ್ಯಾ ಸಂತುಲನಾರ್ ಪಾವ್ಲ್ಲಿ. ತಾಚ್ಯಾ ಜಿವಾಂತ್ಲಿ ಚಡ್ಸಣಿಂ ನಪಂಯ್ಚ್ ಜಾಲ್ಲಿ. ಆಂಗಾಚಾ ಲೋಂವೆ ಥಾವ್ನ್ ಸುಟೊನ್ ಪಾಜಾರ್ಲ್ಲೊ ಘಾಮ್ ಬಾತ್ರುಮಾಚಾ ಶಾವರಾ ಉದ್ಕಾಂತ್ ವ್ಹಾಳೊನ್ ಗೆಲ್ಲೊ. ಪಾಂಯಾಂಥಳಾ ಥಾವ್ನ್ ಚಡ್ಲ್ಲಿ ಊಭ್ ಶಿರಾಂ ಶಿರಾಂನಿ ರಿಗ್ಲ್ಲಿ ತಿ, ತ್ಯಾ ಥಂಡ್ ಉದ್ಕಾಚಾ ಥಂಡಾಯೆಕ್ ಖಾಲ್ ಜಾವ್ನ್ ಬಾತ್ರುಮಾಚಾ ಜನೆಲಾಂತ್ಲ್ಯಾನ್ ಭಾಯ್ರ್ ಉಭ್ಲ್ಲಿ.
ಆಲಿಯಾ ಆತಾಂ ಶಾಂತ್ ಜಾಲ್ಲೆಂ!
ತ್ಯಾಚ್ ಶಾಂತ್ಪಣಾಂತ್ ತೆಂ ಆತಾಂ ನಮಿತಾಚಾ ಮುಕಾರ್ ಉಭೆಂ ಆಸ್ಲ್ಲೆಂ.
"ಅಭಿಲಾಶನ್ ಪೋನ್ ಕೆಲ್ಲೆಂ!" ವ್ಹಳೂ ನಮಿತಾ ಉಲಯ್ಲೆಂ.
"ಕಿತ್ಯಾಕ್....?" ಆಲಿಯಾನ್ ಶಾಂತ್ಪಣಿಂ ಸವಾಲ್ ಕೆಲೆಂ.
"ಕಾಫಿ ಪಿಯೆ....! ಥಂಡ್ ಜಾತಾ!"
ಕಾಫಿಯೆಚೆಂ ಏಕ್ ಕಪ್ಪ್ ಆಪ್ಣೆ ಘೆವ್ನ್ ನಮಿತಾನ್ ತ್ಯಾ ದುಸ್ರ್ಯಾ ಕಾಫಿಯೆಚಾ ಕಪ್ಪಾಕ್ ಆಲಿಯಾಚಾ ಮುಕಾರ್ ಲೊಟ್ಲೆಂ.
"ಕಿತ್ಯಾಕ್ ಪೋನ್ ಕೆಲ್ಲೆಂ.....?" ಆಲಿಯಾಚೆಂ ಸವಾಲ್.
ಆಲಿಯಾನ್ ವಿಚಾರ್ಲ್ಲೆಂ ಸವಾಲ್ ಆಪ್ಣಾಕ್ ಆಯ್ಕೊಂಕ್ ನಾ ಮ್ಹಳ್ಳ್ಯಾಪರಿಂ ನಮಿತಾ ತ್ಯಾ ಮೆಜಾ ವಯ್ಲ್ಯಾ ಕಾಫಿಯೆಚಾ ಕಪ್ಪಾಕ್ಚ್ ಪಳೆತಾಲೆಂ.
"ಹಾಂಗಾಸರ್ ಆಮಿ ದೊಗಾಂ.....! ಆನಿ ಆಮ್ಚ್ಯಾ ಮುಕಾರ್ ಕಾಫಿಯೆಚಿ ಕಪ್ಪಾಂಯ್ ದೋನ್! ರೈಟ್...?" ಮತಿಕ್ ಕಿತೆಂಗೀ ಜಳ್ಕಾಲ್ಲ್ಯಾ ಪರಿಂ ನಮಿತಾ ಉಲಯ್ಲೆಂ.
ಆಲಿಯಾಚಿ ಕಾಂಯ್ ಜವಾಬ್ ನಾ. ತೆಂ ಏಕ್ ಪಾವ್ಟಿಂ ನಮಿತಾಕ್ ಏಕ್ ಪಾವ್ಟಿಂ ಕಾಫಿಯೆಚ್ಯಾ ಕಪ್ಪಾಕ್ ಪಳಂವ್ಕ್ ಪಡ್ಲೆಂ.
"ಹಾಂಗಾಸರ್ ಖಂಯ್ಚಾ ಕಪ್ಪಾಕ್ ಕೊಣಾಚಾ ವೊಂಟಾಚೊ ಮೋಗ್ ತೆಂ ಹಾಂವ್ಯ್ ನೆಣಾಂ ಆನಿ ತುಂಯ್ ನೆಣಾಯ್!" ನಮಿತಾ ಉಲಯ್ಲೆಂ. "ಜಾಲ್ಯಾರ್ಯ್ ತ್ಯಾ ಕಪ್ಪಾಂಚಾ ಖುಶೆ ವಿರೋಧ್ ಹಾಂವ್ ಆನಿ ತುಂ ತಾಂಚೆರ್ ಆಮ್ಚೆ ವೋಂಟ್ ಚರಯ್ತಾಂವ್ ಆನಿ ತಾಂಕಾ ಆಮಿಂ ಖಾಲಿ ಕರ್ತಾಂವ್!"
ಆಲಿಯಾ ನಮಿತಾಕ್ಚ್ ಪಳೆತಾಲೆಂ.
"ಆಮಿಂ ಕೆದ್ನಾಂಯ್ ತಾಂಚೆ ವಿಶಿಂ ಚಿಂತ್ಚೆಂ ಪ್ರಯತ್ನ್ ಕೆಲಾಂ?" ನಮಿತಾಚಿ ದೀಶ್ಟ್ ತ್ಯಾ ಕಾಫಿಯೆಚ್ಯಾ ಕಪ್ಪಾಂಚೆರ್ಚ್ ಖಂಚ್ಲ್ಲಿ.
"ಕಿತೆಂ.....?"
"ಹೆಂಚ್ ಕೀ ತ್ಯಾ ಕಾಫಿಯೆಚಾ ಕಪ್ಪಾಂಕ್ ಕೊಣಾಚಿ ಆಶಾ?"
"ತುವೆಂ ತ್ಯಾ ಕಾಫಿಯೆಚಾ ವಿಶಿಂ ಚಿಂತ್ಲಾಂಯ್?" ನಮಿತಾಚಾ ಸವಾಲಾಕ್ ಜವಾಬ್ ದೀನಾಸ್ತಾನಾ ಆಲಿಯಾನ್ ಪ್ರತಿ ಸವಾಲ್ ಕೆಲೆಂ.
ಆತಾಂ ಆಲಿಯಾಕ್ ಪಳಂವ್ಚಿ ಸರ್ಥಿ ನಮಿತಾಚಿ.
"ಹ್ಯಾ ಕಾಫಿಯೆಕ್ ತುಂ ತುಜ್ಯಾ ತಾನೆ ಖಾತಿರ್... ತುಜ್ಯಾ ಮತಿಚ್ಯಾ ಉಲ್ಲಾಸಾ ಖಾತಿರ್.... ಕೆದ್ನಾಂ ಕೆದ್ನಾಂ ಆಶೆಂಚ್.... ಪಿಯೆತಾಯ್ ವಾ ನಾ?"
"ಹಾಂ!"
"ತುಜ್ಯಾ ಖಂಯ್ಚಾಯ್ ಗರ್ಜೆ ಖಾತಿರ್ ತುವೆಂ ಪಿಯೆವ್ನ್ ಮಜಾ ಕರ್ಚ್ಯಾ ಹ್ಯಾ ಕಾಫಿಯೆಚಾ ವಿಶಿಂ ತುವೆಂ ಚಿಂತ್ಲಾಂಯ್? ಹೊ ಪಿಟೊ ಎಕಾ ಥೆಂಪಾರ್ ಪೃಥುವೆರ್ ತ್ಯಾ ಪಾಚ್ವ್ಯಾ ಜಡಾರ್ ನವ್ಯಾ ಜಿವಾಚಿ ಆಶಾ ಘೆವ್ನ್ ಫುಲ್ಲ್ಲೆಂ ಏಕ್ ಭಿಂ! ತುಜ್ಯಾ ಸ್ವಾರ್ಥಾ ಖಾತಿರ್ ತುವೆಂ ಹ್ಯಾ ಭಿಂಯಾಕ್ ಹುಮ್ಟುನ್ ತಾಕಾ ತ್ಯಾ ವೊತಾಂತ್ ಸುಕವ್ನ್, ತ್ಯಾ ಮೆಶಿನಾಂತ್ ತಾಕಾ ಪಿಟೊ ಕರುನ್, ತಾಚಿ ಆಶಾ ತಾಚಿಂ ಸಪ್ಣಾಂ ಸಾಣ್ಯಾಕ್ ಧರುನ್ ಹ್ಯಾ ಹುನ್ ಉದ್ಕಾಂತ್ ಕಿರಯ್ಲಾಂಯ್! ತುಕಾ ದಿಸಾನಾ ಹೊ ಕಾಫಿಯೆಚೊ ರಂಗ್ ತ್ಯಾ ನೆಣ್ತ್ಯಾ ಭಿಂಯಾಳ್ಯಾಚಾ ಶಿರಾಂನಿ ವ್ಹಾಳ್ಚ್ಯಾ ರಗ್ತಾಚೊ ಮ್ಹಳ್ಳೆಂ ತೆಂ?"
ಆಲಿಯಾ ಆಪ್ಲ್ಯಾ ತೀಕ್ಷ್ಣ್ ನದ್ರೆನ್ ನಮಿತಾಕ್ಚ್ ಪಳಯ್ತಾಲೆಂ.
"ಹ್ಯಾ ರಗ್ತಾ ಮುಕಾರ್ ತ್ಯಾ ಕಪ್ಪಾಂಚಾ ಆಶೆಚೆಂಯ್ ಮೋಲ್ ಕಿತ್ಲೆಂ......?" ಆಲಿಯಾಚಾ ಸವಾಲಾಕ್ ನಮಿತಾಚಾ ಜಿಬೆರ್ ಕಾಂಯ್ ಜವಾಬ್ ನಾತ್ಲ್ಲಿ.
"ಹಾಂವ್ ಜಾಣಾಂ ನಮಿತಾ! ತುಂ ಮ್ಹಾಕಾ ಕಿತೆಂಗೀ ಸಮ್ಜಾಂವ್ಕ್ ಪ್ರಯತ್ನ್ ಕರ್ತಾಯ್. ತುವೆಂ ಅಭಿಲಾಶಚೆಂ ಪೋನ್ ಆಯಿಲ್ಲೆಂ ಮ್ಹಣ್ ಮ್ಹಾಕಾ ಸಾಂಗ್ತಾನಾಚ್ ಕಳ್ಳೆಂ! ಕಾಫಿ ಥಂಡ್ ಜಾತಾ! ಪಿಯೆ......!" ಆಲಿಯಾನ್ ಕಾಫಿ ಆಪ್ಲ್ಯಾ ಹಾತಿಂ ಘೆವ್ನ್,
"ಥ್ಯಾಂಕ್ ಯು!" ಆಪ್ಣಾಚಾ ಕಾಫಿಯೆಕ್ ತೊಂಡಾಕ್ ತಾಣೆಂ ವೆಲಿ.
ನಮಿತಾನ್ಯ್ ಆತಾಂ ಕಾಫಿ ತೊಂಡಾಕ್ ವೆಲಿ.
ಥೊಡಿ ಕಾಫಿ ಪಿಯೆಲ್ಲೆಂ ನಮಿತಾ ಕಪ್ಪ್ ಮೆಜಾರ್ ದವರುನ್,
"ಹೆಂ ಆಶೆಂ ಕಶೆಂ ಜಾಲೆಂ?" ನಮಿತಾ ಆಲಿಯಾಕ್ ಆಯ್ಕೊಂಕ್ ತಯಾರ್ ಜಾಲೆಂ.
"ಹಿ ಸಗ್ಳಿ ಚಾಲ್ ನಮಿತಾ! ಎಕಾ ಥಾವ್ನ್ ಎಕಾಕ್ ಸಗ್ಳೆಂ ಕನೆಕ್ಷನ್ ಆಸಾ. ಐ ಡೋಂಟ್ ನೋ.... ಹು ಇಸ್ ದಿಸ್ ವಿಶು ಕುಮಾರ್!" ಆಲಿಯಾಚ್ಯಾ ತಾಳ್ಯಾಂತ್ ತಾತ್ಸಾರ್ ಆಸ್ಲ್ಲೊ.
"ವಿಶು ಕುಮಾರ್....? ಹೊ ಕೋಣ್?" ನಮಿತಾಕ್ ಹ್ಯಾ ನಾಂವಾಕ್ ಆಯ್ಕೊನ್ ಆಶ್ಚರ್ಯ್ ಜಾಲೆಂ. ಆಲಿಯಾ ಆಜ್ ಪರ್ತ್ಯಾಕ್ ಹ್ಯಾ ವ್ಯಕ್ತಿಲಾಗಿಂ ಝಗಡ್ಲೆಂ? ಹೊ ವಿಶು ಕುಮಾರ್ ಕೋಣ್?
"ಮ್ಹಜ್ಯೆರ್ ಕಂಪ್ಲೆಂಟ್ ಕೆಲ್ಲೊ!"
"ಕಂಪ್ಲೆಂಟ್....? ಕಿತ್ಯಾಕ್?"
"ಐ ಡೋಂಟ್ ನೋ.....!"
ಆಲಿಯಾನ್ ಆತಾಂ ಥಂಯ್ಚ್ ಮೆಜಾರ್ ಆಸ್ಲ್ಲ್ಯಾ ಆಪ್ಲ್ಯಾ ವ್ಯಾನಿಟಿ ಬ್ಯಾಗಾಕ್ ಹೆವ್ಶಿಂ ವೊಡುನ್ ತ್ಯಾ ಬ್ಯಾಗಾ ಭಿತರ್ ದೊಡಿ ಕರುನ್ ದವರ್ಲೆಲಿಂ ಪೇಪರಾಂ ಭಾಯ್ರ್ ಕಾಡುನ್,
"ಹೆಂ ಪಳೆ... ಮ್ಹಜೆಂ ಟರ್ಮಿನೇಶನ್ ಆರ್ಡರ್!"
ಆಲಿಯಾನ್ ತ್ಯಾ ಪೇಪರಾಂಕ್ ನಮಿತಾಚಾ ಮುಕಾರ್ ದವರ್ಲಿಂ.
ನಮಿತಾ ತ್ಯಾ ಮೇಪರಾಂಕ್ ಆಪ್ಲ್ಯಾ ಹಾತಿಂ ಘೆವ್ನ್ ತಾಂಚೆರ್ ಆಪ್ಲಿ ದೀಶ್ಟ್ ಭೊಂವ್ಡಾಂವ್ಕ್ ಲಾಗ್ಲೆಂ.
"ತೊ ದೀಸ್ ಮ್ಹಾಕಾ ಉಡಾಸ್ ಆಸಾ! ಪುಣ್ ಹ್ಯಾ ಟರ್ಮಿನೇಶನ್ ಲೆಟರಾಂತ್ ಬರಯಿಲ್ಲ್ಯಾ ರೀಸನಾಕ್..... ಆನಿ ತ್ಯಾ ದಿಸಾಕ್....."
"ಹೆಂ ತುಜ್ಯಾ ಕಾಂಡಕ್ಟಾ ವಯ್ರ್ ರೀಸನ್ ದಿಲಾಂ!" ನಮಿತಾಕ್ ಆಶ್ಚರ್ಯ್ ಜಾಲೆಂ.
"ಎಕ್ಸಾಕ್ಟ್ಲೀ ತ್ಯಾ ದೀಸ್ ಕಿತೆಂ ಜಾಲ್ಲೆಂ? ತುವೆಂ ಕಾಂಯ್ ಮ್ಹಾಕಾ ಸಾಂಗೊಂಕ್ ನಾಂಯ್. ತುಂ ಹಾಚ್ಯೆಲಾಗಿಂಯ್ ಝಗಡ್ಲೆಂಯ್....?"
"ನಾ ನಮಿತಾ! ಹಾಂವ್ಚ್ ನೆಣಾಂ ಹೊ ವಿಶು ಕುಮಾರ್ ಕೋಣ್ ಮ್ಹಣೊನ್!"
"ಓ.ಕೆ..... ನಥಿಂಗ್ ಟು ವರ್ರಿ! ಆಮಿ ಇನ್ಕ್ವಾಯರಿ ಡಿಮಾಂಡ್ ಕರಿಯಾಂ!"
"ಹಾವೆಂ ಎದೊಳ್ಚ್ ಹ್ಯಾ ಟರ್ಮಿನೇಶನಾಕ್ ಸಿಗ್ನೇಚರ್ ಕೆಲ್ಯಾ!"
"ವಾಟ್!" ನಮಿತಾನ್ ಆಪ್ಲ್ಯಾ ಹಾತಾಂತ್ಲ್ಯಾ ತ್ಯಾ ಪೇಪರಾಂಕ್ ಘುಂವ್ಡಾವ್ನ್ ಪಳೆಲೆಂ. "ಯು ಮೀನ್ ಯು ಆರ್ ಟರ್ಮಿನೇಟಡ್.....?"
"ಎಸ್!"
"ತುವೆಂ ಹೆಂ ಕಶೆಂ ಎಕ್ಸೆಪ್ಟ್ ಕೆಲೆಂಯ್.....?"
"ಹೆಂ ಆಲಿಯಾ ಸತ್ತಿ ಜಾವ್ನ್ ಕೊಣಾಯ್ ಮುಕಾರ್ ಬಾಗ್ವೊಂಕ್ ತಯಾರ್ ನಾ!" ಆಲಿಯಾನ್ ಕಾಫಿಯೆಚಾ ಕಪ್ಪಾಕ್ ಹಾತ್ ವೆಲೊ. ಥೊಡಿ ಕಾಫಿ ಪಿಯೆವ್ನ್ "ತುಂ ಮ್ಹಾಕಾ ಸಾಂಗ್ ನಮಿತಾ.... ಹಾವೆಂ ತ್ಯಾ ಅಸಿಸ್ಟಂಟ್ ಮ್ಯಾನೇಜರಾ ಮುಕಾರ್ ದಿಂಬಿಯೆರ್ ಪಡೊಂಕ್ ಜಾಯ್ ಆಸ್ಲ್ಲೆಂ? ನೆವರ್...! ತೆಂಯ್ ಅಸತಾ ಮುಕಾರ್...? ಮ್ಹಜೊ ಜೀವ್ ಗೆಲ್ಯಾರ್ಯ್ ನಾ!"
"ಪುಣ್ ಹೆಂ ತುಜ್ಯಾ ಕ್ಯಾರಿಯರಾಚೆಂ ಅಂತ್ಯ್ ಆಲಿಯಾ!"
"ಜಾಂವ್ಕ್ ಪುರೊ! ತುವೆಂ ಸಾಂಗ್ಚ್ಯಾ ಪರಿಂ ಹಾವೆಂ ಭುರ್ಗ್ಯಾಪಣಾರ್ ಥಾವ್ನ್ ಆಶೆಲ್ಲ್ಯಾ ಮ್ಹಜ್ಯಾ ಕ್ಯಾರಿಯರಾಚೆಂ ಹೆಂ ಅಂತ್ಯ್! ಪುಣ್ ಮ್ಹಜೆಂ ಅಂತ್ಯ್ ನ್ಹಯ್! ಆಜ್ ಥಾವ್ನ್ ಏಕ್ ನವೆಂ ಆರಂಭ್ ಜಾತೆಲೆಂ!"
"ನವೆಂ?" ನಮಿತಾಕ್ ಕಾಂಯ್ ಸಮ್ಜಾಲೆಂ ನಾ.
"ಹಾಂ! ನವೆಂ....!"
"ಪುಣ್ ವಿಮಾನಾರ್ ಉಭ್ಚೆಂ ತುಜೆಂ ಪಸಂದ್ಪಣ್.....!?"
"ತುಂ ವಿಮಾನಾಚೆಂ ಚಿಂತಾಯ್! ಬೋವ್ಶಾ ಹಾವೆಂ ಕೋನ್ಕೋರ್ಡಾಕ್ ಪಸಂದ್ ಕೆಲ್ಲೆಂ!
"ಕೋನ್ಕೋರ್ಡ್ ಆತಾಂ ಹಿಸ್ಟರಿ ಆಲಿಯಾ! ತೆಂ ಫಕತ್ತ್ ಮ್ಯೂಸಿಯಮಾಂತ್ ವಿಶೆವ್ ಘೆತಾ!"
"ಹುಂ!" ಆಲಿಯಾ ಸವ್ಕಾಸ್ ಹಾಸ್ಲೆಂ. ತಾಚ್ಯಾ ವೊಂಟಾಂನಿ ಮಂದ್ ಹಾಸೊ ಖೆಳೊನ್ ಧಾಂವ್ಲ್ಯೊ. ತಾಚಿ ಮತ್ ಕೋನ್ಕೋರ್ಡಾಚಾ ವೆಗಾನ್ ಚಿಂತಾಲಿ.
"ಚಲ್ ತುಂ ಕಾಫಿ ಪಿಯೆ. ಆಮ್ಕಾಂ ಆತಾಂ ಬಜಾರಾಕ್ ವಚೊಂಕ್ ಆಸಾ!"
"ಬಜಾರಾಕ್.....? ಕಿತ್ಯಾಕ್?"
"ತುಂ ಕಾಫಿ ಪಿಯೆ! ಥಂಡ್ ಜಾವ್ನ್ ಉದಾಕ್ ಜಾಲಿ ಆಸ್ತೆಲಿ. ತಾಕಾ ದೋನ್ ಐಸ್ಕ್ಯೂಬ್ ಗಾಲ್ಯಾರ್ ಐಸ್ ಕಾಫಿ ಜಾತೆಲಿ!"
ಆಲಿಯಾನ್ ಆಪ್ಲ್ಯಾ ಕಪ್ಪಾಂತ್ಲಿ ಸಗ್ಳಿ ಕಾಫಿ ಪಿಯೆವ್ನ್ ಕಾಬಾರ್ ಕೆಲಿ.
ಆಲಿಯಾಕ್ ಪಳವ್ನ್ ನಮಿತಾಕ್ಯ್ ವಿಚಿತ್ರ್ ದಿಸ್ಲೆಂ. ಆಜ್ಚ್ ಹಾಚೆಂ ಟರ್ಮಿನೇಶನ್ ಜಾಲಾಂ. ಸಗ್ಳ್ಯಾ ಏರ್ಹೊಸ್ಟೆಸಾಂಕ್ ಹೆ ಖಬಾರ್ ಪಾವ್ತೆಲಿ. ಜಾಲಾರ್ಯ್ ಆಲಿಯಾ ಮಾತ್ರ್ ಕಾಂಯ್ಚ್ ಜಾಂವ್ಕ್ ನಾ ಮ್ಹಳ್ಳ್ಯಾ ಪರಿಂ ಆಸ್ಲ್ಲೆಂ. ದುಸ್ರೆಂ ಕೊಣ್ಯ್ ಚಲಿ ಜಾಲ್ಯಾರ್ ತಾಚೆಂ ಕಾಮ್ ಗೆಲ್ಲ್ಯಾ ಹ್ಯಾ ಘಡಿಯೆರ್ ಚಿಂತೇಸ್ತ್ ಆನಿ ಖಂತೀಶ್ಟ್ ಜಾವ್ನ್ ಬಸ್ತೆಂ. ಪುಣ್ ಆಲಿಯಾ.....?
ನಿಜಾಯ್ಕ್ಯ್ ಆಲಿಯಾ ಹೆರಾಂ ಚಲಿಯಾಂ ಪರಿ ನ್ಹಯ್ ಆಸ್ಲ್ಲೆಂ!
ಕಾಫಿ ಪಿಯೆವ್ನ್ ದೊಗಾಂಯ್ ಬೆಡ್ರೂಮಾಕ್ ರಿಗ್ಲಿಂ.
"ತುಕಾ ಆತಾಂ ಬಜಾರಾಕ್ ಕಿತ್ಯಾಕ್ ವಚೊಂಕ್ ಜಾಯ್ ಆಲಿಯಾ? ಹ್ಯಾ ತುಜ್ಯಾ ಪ್ರಾಬ್ಲೆಮಾಕ್ ಸಾಲ್ವಾರ್ ಕರುಂಕ್ ಆಮಿಂ ಕಿತೆಂಯ್ ವಾಟ್ ಪಳಯ್ಲ್ಯಾರ್ ಚಡ್ ಬರೆಂ ಆಸ್ತೆಂ!"
ನಮಿತಾನ್ ಪರ್ತ್ಯಾಕ್ ಸಾಂಗ್ಲೆಂ ಜಾಲ್ಯಾರ್ಯ್ ಆಲಿಯಾ ನ್ಹೆಸೊಂಕ್ ಲಾಗ್ಲೆಂ.
"ತುಂ ನ್ಹೆಸ್ತಾಯ್ ಜಾಲ್ಯಾರ್ ನ್ಹೆಸ್!"
ಆಲಿಯಾಚಿಂ ಉತ್ರಾಂ ಕಾನಾಂಕ್ ಪಡ್ತಾನಾ ನಮಿತಾನ್ ನ್ಹೆಸೊಂಕ್ ಆರಂಭ್ ಕೆಲೆಂ. ದೊಗಾಂಯ್ ನ್ಹೆಸೊನ್ ಭಾಯ್ರ್ ಆಯ್ಲಿ.
"ಆಜ್ ಮ್ಹಾಕಾ ಥೊಡೆಂ ಬರ್ಯಾಂತ್ಲೆಂ ಬರೆಂ ಘೆಂವ್ಕ್ ಜಾಯ್! ಖಂಯ್ಚಾ ಮಾರ್ಕೆಟಿಕ್ ವೆಚೆಂ?" ಆಲಿಯಾನ್ ವಿಚಾರ್ಲೆಂ.
"ಲಿಂಕಿಂಗ್ ರೋಡ್ ಜಾಯ್ತ್.....?"
"ನೋ!" ಆಲಿಯಾಕ್ ಪಸಂದ್ ಜಾಂವ್ಕ್ ನಾ.
"ಕ್ರಾಪರ್ಡ್.....?"
"ಎಸ್!"
ಪ್ಲ್ಯಾಟಾಕ್ ಲಾಕ್ ಕರುನ್ ದೊಗಾಂಯ್ ಅಪಾರ್ಟ್ಮೆಂಟಾಚಾ ಸಕಯ್ಲ್ ಆಯಿಲ್ಲಿಂ ತಿಂ ಟ್ಯಾಕ್ಸಿ ಥಾಂಬವ್ನ್ ಟ್ಯಾಕ್ಸಿಚೆರ್ ಬಸ್ಲಿಂ.
"ಕ್ರಾಪರ್ಡ್ ಮಾರ್ಕೆಟ್!"
ಆಲಿಯಾನ್ ಸಾಂಗ್ತಾನಾ ಟ್ಯಾಕ್ಸಿ ಡ್ರೈವರಾನ್ ಟ್ಯಾಕ್ಸೆಚೆಂ ಮೀಟರ್ ಡೌನ್ ಕೆಲೆಂ!
ಕ್ರಾಪರ್ಡ್ ಮಾರ್ಕೆಟಿಕ್ ಆಯಿಲ್ಲ್ಯಾ ಆಲಿಯಾಚೆ ದೊಳೆ ಕಾಸ್ಮಟಿಕ್ ಶೊಪಾಕ್ ಸೊಧುಂಕ್ ಲಾಗ್ಲೆ. ಕಾಸ್ಮಟಿಕ್ ಶೊಪಾ ಥಾವ್ನ್ ಆಪ್ಣಾಕ್ ಜಾಯ್ ಜಾಲ್ಲೆಂ ಮೊಲಾಧೀಕ್ ಕಾಸ್ಮೆಟಿಕ್ಸ್ ಘೆತ್ಲಿಂ. ಕ್ರೀಮ್, ಪೌಡರ್, ನೇಯ್ಲ್ ಪಾಲಿಶ್, ಲಿಫ್ಸ್ಟಿಕ್, ಐ ಬ್ರೊ ಪೆನ್ಸಿಲ್, ಹೇರ್ ರಿಮೂವರ್, ಜೆಲ್, ಲೋಶನ್, ಆನಿ ಭಾರಿಕ್ ಭಾರೀಕ್ ಜಾಯ್ ಜಾಲ್ಲ್ಯೊ ಸಗ್ಳ್ಯೊ ವಸ್ತು ಘೆವ್ನ್ ಫರ್ಫ್ಯೂಮಾಚಾ ಶಾಪಾಕ್ ಗೆಲೆಂ. ಬರಿ ಸುಗಂಧಿತ್ ಪ್ರೆಂಚ್ ಫರ್ಫ್ಯೂಮಾಂ ಘೆತಚ್,
ಬೂಟಿಕಾ ಭಿತರ್ ಗೆಲಿಂ.
"ಆಲಿಯಾ.... ತುಂ ಹಿಂ ವಸ್ತ್ರಾಂ ನ್ಹೆಸ್ತಾಯ್?"
"ಕಿತ್ಯಾಕ್ ಹಾವೆಂ ನ್ಹೆಸೊಂಕ್ ನಜೊ.....?"
ಆಪ್ಣೆ ಪಸಂದ್ ಕೆಲ್ಲಿಂ ವಸ್ತ್ರಾಂ ಆಲಿಯಾನ್ ಪ್ಯಾಕ್ ಕರಯ್ಲಿಂ. ಥಂಯ್ ಥಾವ್ನ್ ತಿಂ ಫುಟ್ವೇರಾಚಾ ಶೊಪಾಕ್ ಗೆಲಿಂ.
ಹೈ ಹೀಲ್ಡ್ ಬರ್ಯೊ ಸೊಭಿತ್ ವ್ಹಾಣೊ ಘೆತ್ಲ್ಯೊ.
ಬ್ಯೂಟಿ ಪಾರ್ಲರಾಕ್ ಪೋನ್ ಕರುನ್ ನವನೀತಲಾಗಿಂ ಫಾಲ್ಯಾ ಸಾಕಾಳಿಂಚೆಂ ಆಪಾಂಯ್ಟ್ಮೆಂಟ್ ಬುಕ್ ಕೆಲೆಂ.
"ಚಲ್ಯಾಂ ಆಜ್ ಆಮಿ ಭಾಯ್ರ್ ಜೆವ್ಯಾಂ!" ಖುಶಿ ಜಾಲ್ಲ್ಯಾ ಆಲಿಯಾನ್ ಫರ್ಮಾಯ್ಲೆಂ.
"ಆರ್ ಯು ಗೋನ್ ಮ್ಯಾಡ್.....?" ನಮಿತಾ ಉದ್ಗಾರ್ಲೆಂ.
"ಎ ಮ್ಯಾಡ್ ವುಮನ್ ಕ್ಯಾನ್ ನಾಟ್ ಬಿ ಬೋಲ್ಡ್ ಎಂಡ್ ಬ್ಯೂಟಿಫುಲ್! ಬಟ್.... ಎ ಬೋಲ್ಡ್ ಎಂಡ್ ಬ್ಯೂಟಿಫುಲ್ ವುಮನ್ ಕ್ಯಾನ್ ಬಿ!" ಆಲಿಯಾ ಉದ್ಗಾರ್ಲೆಂ.
ಆಲಿಯಾಚೆಂ ಉಲೊಣೆಂ ನಮಿತಾಕ್ ಕಾಂಯ್ಚ್ ಸಮ್ಜಾಲೆಂ ನಾ. ಆಲಿಯಾನ್ ಉಲಂವ್ಚಿ ರೀತ್ ಪಯ್ಲೆಂ ಥಾವ್ನ್ ನಮಿತಾಕ್ ಮಿಸ್ತೆರಾಂತ್ಚ್ ದವರ್ತಾಲಿ. ಹೊ ಆಲಿಯಾಚೊ ಸ್ವಭಾವ್! ಸ್ವಭಾವಾಕ್ ಕೊಣಾಯ್ ಥಾವ್ನ್ ಕಾಂಯ್ ಬದ್ಲುಂಕ್ ಜಾಯ್ನಾಂ. ತಶೆಂ ನಮಿತಾ ಜಾಲ್ಯಾರ್ಯ್ ಆಲಿಯಾಕ್ ಕಾಂಯ್ ಆಪ್ಲೆ ವಿಚಾರ್ ಮಾತ್ರ್ ಉಗ್ಡಾಪೆಂ ಕರ್ತಾಲೆಂ ಶಿವಾಯ್ ಆಲಿಯಾಚಾ ಸ್ವಭಾವಾಕ್ ಬದ್ಲುಂಕ್ ಪ್ರಯತ್ನ್ ಕರಿನಾತ್ಲ್ಲೆಂ. ಆಸಲೆಂ ಪ್ರಯತ್ನ್ ಜಾಲ್ಯಾರ್ಯ್ ಫಳಾಧೀಕ್ ಜಾಂವ್ಚಾ ಪರಿಂ ನಾ. ಹೆಂ ನಮಿತಾಯ್ ಜಾಣಾಂ. ಹ್ಯಾಚ್ ಖಾತಿರ್ ನಮಿತಾನ್ ಹೊ ವಿಶಯ್ ಹಾಂಗಾಚ್ ಸಂಪಯ್ಲೊ.
"ಚಲ್ಯಾಂ ಯಾ....!" ನಮಿತಾ ಆಲಿಯಾಚಾ ಜೆವ್ಣಾಚಾ ವಿನತೆಕ್ ತಯಾರ್ ಜಾಲೆಂ.
ದೊಗಾಂಯ್ ರೆಸ್ಟೋರ್ಂಟಾಕ್ ಆಯ್ಲಿಂ.
ಆಲಿಯಾ ಮಾತ್ರ್ ಹ್ಯಾ ವಗ್ತಾರ್ ಕಿತ್ಯಾಕ್ಗೀ ಎಕಾ ವಿಚಿತ್ರ್ ಧಯ್ರಾರ್ ಆಸಾ ಮ್ಹಳ್ಳ್ಯಾ ಪರಿಂ ನಮಿತಾಕ್ ದಿಸ್ಲೆಂ.
ತ್ಯಾ ಧಯ್ರಾಚೆಂ ಕಾರಾಣ್ ಮಾತ್ರ್ ತಾಕಾ ಝಳ್ಕಾಲೆಂ ನಾ.
ಜೆವ್ಣಾಚಾ ಮೆಜಾರ್ ದೊಗಾಂಯ್ನ್ಯ್ ಜೆವ್ಣಾಕ್ ಆರ್ಡರ್ ಕೆಲೆಂ.
ಜೆವಾಣ್ ಯೇಂವ್ಕ್ ಥೊಡೊ ವೇಳ್ ಆಸ್ಲ್ಲೊ.
"ಆತಾಂ ಘರಾ ರಾಂದ್ಲೆಲೆಂ ಕಿತೆಂ ಕರ್ಚೆಂ...?" ನಮಿತಾನ್ ಖಂತ್ ಉಚಾರ್ಲಿ.
ಆಲಿಯಾ ನಮಿತಾಚಾ ಸವಲಾಕ್ ಆಯ್ಕೊನ್ ಮಂದ್ ಹಾಸೊನ್,
"ಸದಾಂಯ್ ಕೋಣ್ಯ್ ಭಾಯ್ರ್ ಜೆವ್ತಾ? ಆಜ್ ಭಾಯ್ರ್ ಆಯ್ಲ್ಯಾಂವ್ ಮ್ಹಣೊನ್ ಮನ್ ಜಾಲೆಂ. ಘರಾ ರಾಂದ್ಲ್ಲೆಂ ಫಾಲ್ಯಾಂಕ್....!"
"ಫಾಲ್ಯಾಂ ಮ್ಹಾಕಾ ನ್ಹಯ್ ತುಕಾಚ್!" ನಮಿತಾ ಸಾಂಗೊನ್ ಮೌನ್ ಜಾಲೆಂ.
ತಿತ್ಲ್ಯಾರ್ ಆಲಿಯಾನ್ ಆಪ್ಲೆಂ ಸೆಲ್ಪೋನ್ ಭಾಯ್ರ್ ಕಾಡ್ಲೆಂ.
ತಾಚ್ಯಾ ತೊಂಡಾರ್ ಎಕಾ ಥರಾಚ್ಯೊ ಮಂದ್ ಹಾಸೊ ಪರ್ತ್ಯಾಕ್ ಉದೆವ್ನ್ ಮಾಯಾಗ್ ಜಾಲ್ಯೊ.
ಸೆಲ್ಪೋನಾ ವಯ್ಲ್ಯಾ ಟೆಲಿಪೋನ್ ಡೈರಿಕ್ ಆಲಿಯಾನ್ ಉಗ್ತಿ ಕೆಲಿ.
ಆತಾಂ ಆರಂಭ್ ಜಾಲಿಂ ತಾಚಿಂ ಸೊಧ್ನಾಂ!
A...B...C...D...
ತೆಂ ಡೈರಿಂತ್ಲ್ಯಾ ಪಾನಾಂಕ್ ಪರ್ತಿತಾಲೆಂ.
P...Q...R!
ಆಲಿಯಾಚೆಂ ಬೋಟ್ ಸ್ತಬ್ದ್ ಜಾಲೆಂ!
ತಾಚಿ ದೀಶ್ಟ್ ಪರ್ಜಳ್ಳಿ!
"ರಾ....ಯ....ನ್...!"
ಟೆಲಿಪೊನಾ ವಯ್ಲ್ಯಾ ನಾಂವಾಕ್ ಆಲಿಯಾನ್ ವ್ಹಳೂ ಆಪ್ಲ್ಯಾ ಮತಿಂತ್ಚ್ ವಾಚ್ಲೆಂ. ತಾಚ್ಯೆ ಸವೆಂ ಆಪುಣ್ ಮೆಡಿಕಲ್ ಕಾಲೇಜಿಂತ್ ಶಿಕ್ತಾನಾ ತ್ಯಾ ಮಹಾಬಲೇಶ್ವರಾಕ್ ಪಿಕ್ನಿಕಾಕ್ ಗೆಲ್ಲ್ಯಾ ವೆಳಾರ್ ಭೆಟ್ಲ್ಲ್ಯಾ ತ್ಯಾ ಫಿಲ್ಮ್ ಶೂಟಿಂಗಾಚಾ ಭೆಟೆಂತ್ಲ್ಯಾ ರಾಯನಾಚೆಂ ಅಸ್ಪಶ್ಟ್ ಪಿಂತುರ್ ಆಲಿಯಾಚಾ ದೊಳ್ಯಾ ಮುಕಾರ್ ಉಭೆಂ ಜಾಲೆಂ.
**************
[ಹಾಂಗಾಸರ್ ಪಯ್ಲೊ ಭಾಗ್ ಸಂಪ್ತಾ. ಪುಣ್ ದುಸ್ರ್ಯಾ ಭಾಗಾಂತ್ ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: 1, 2, 3, 4, 5, 6, 7, 8, 9, 10, 11
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
