ಆಟ್:

ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್‍ಯಾಂತ್, ಕೊಂಕಣಿ ಖಾತಿರ್.

ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್‌ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್‌ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್‌ಯೀ ಹೊ ಜಾವ್ನಾಸಾ.

ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.

ಪುಸ್ತಕ್ ಏಕ್
ಜಿವಿತ್ ತುಕಾ ಆಪಯ್ತಾ

ಆವಸ್ವರ್ ಆಟ್: ಆಲಿಯಾ

ಆಲಿಯಾ!

’ಆಲಿಯಾ’ ಮ್ಹಳ್ಳ್ಯಾ ನಾಂವಾಂತ್ ತಿ ವೀಜ್ ಸಕತ್ ಆಸ್‌ಲ್ಲಿ ವಾ ಹೆಂ ನಾಂವ್ ಘೆತ್ಲೆಲ್ಯಾ ಚಲಿಯೆಚ್ಯಾ ಕುಡಿಂತ್ ವೀಜ್ ಸಕತ್ ಆಸ್ಲೆಲಿ ತಿ ನಾಸಿರಾಕ್ ಪಾರ್‍ಕುಂಕ್ ಕಶ್ಟ್ ಮಾರ್‍ಲೆ.

’ಆಲಿಯಾ ಮ್ಹಳ್ಯಾರ್ ಸುಖಾಚಿ ಸಕತ್’ ತೊ ದ್ರಡ್ ಪಾತ್ಯೆಲ್ಲೊ.

ಆಲಿಯಾ ಸಾಂಗಾತಾ ಆಪ್ಣಾಚೆಂ ನಿಖಾ ಜಾಲ್ಲ್ಯಾ ತ್ಯಾ ಪಯ್ಲ್ಯಾ ದಿಸಾಂನಿ, ಆಲಿಯಾ ಸಾಂಗಾತಾ ಆಪ್ಣೆ ಜೊಡ್ಲೆಲ್ಯಾ ಎಕ್ವಟಾಂತ್, ಚಲಿ ಮ್ಹಳ್ಯಾರ್ ಕಿತೆಂ ಮ್ಹಣೊನ್, ನಾಸಿರಾನ್ ಆಪ್ಲ್ಯಾ ಮತಿಂತ್ ತಾಚ್ಯಾ ಜಲ್ಮಾ ಥಾವ್ನ್ ಚಿಂತುನ್ ಆಯಿಲ್ಲ್ಯಾ ತಿತ್ಲೆಂ ಮಾತ್ರ್ ಮ್ಹಳ್ಳೆಂ ಸ್ಪಶ್ಟ್ ರಿತಿನ್ ಸಮ್ಜೊನ್ ಘೆತ್‌ಲ್ಲೆಂ. ಪುಣ್ ತ್ಯಾ ಉಪ್ರಾಂತ್ಲ್ಯಾ, ತಾಂಚಾ ಹನಿಮೂನಾಚಾ ಮೊರಿಶಸಾಂತ್ಲ್ಯಾ ದಿಸಾಂ ಥಾವ್ನ್ ಹರ್ಯೆಕ್ ದೀಸ್ ಆಲಿಯಾ ಸಾಂಗಾತಾ ಏಕ್ ನವೊಚ್ ದೀಸ್ ಮ್ಹಳ್ಳ್ಯಾ ಪರಿಂ!

ಏಕ್ ನವೊಚ್ ಆನ್ಭೋಗ್!

ಹರ್ಯೆಕ್ ಪಾವ್ಟಿಂ ಎಕಾ ಥಾವ್ನ್ ಎಕಾಕ್ ನವೆಂಸಾಂವ್. ಆಲಿಯಾಚಾ ವೆಂಗೆಂತ್ ನಾಸಿರ್ ನಿಜಾಯ್ಕ್‌ಯ್ ತಾಣೆಂ ಮತಿಂತ್ ಚಿಂತ್‌ಲ್ಲ್ಯಾಚ್ಯಾಕ್‌ಯ್ ಚಡ್ ಅನುಭವಾಕ್ ಭೊಗುಂಕ್ ಪಾವ್‌ಲ್ಲೊ. ಆಲಿಯಾಕ್ ಆಪ್ಲ್ಯಾ ದೊಳ್ಯಾಂ ಮುಕಾರ್ ದೆಖ್ತಾನಾ ತೊ ಸಗ್ಳೊಚ್ ಮೆಣಾಚಿ ವಾತ್ ಪಿಗ್ಳೊನ್ ಗೆಲ್ಲ್ಯಾ ಪರಿಂ ಪಿಗಳ್ತಾಲೊ. ದುಸ್ರ್ಯಾ ಚಲಿಯಾಂ ಮುಕಾರ್ ಆಲಿಯಾ ಥಂಯ್ ಏಕ್ ವಿಚಿತ್ರ್ ಸಕತ್ ಆಸಾ ತಿ ತೊ ಜಾಣಾಂ ಜಾಲ್ಲೊ. ತಶೆಂ ನಿಖಾ ಜಾಲ್ಲ್ಯಾ ಜಿವಿತಾಂತ್ ತ್ಯಾ ಜಿವಿತಾಚೆಂ ಸುಖ್ ಜೊಡ್ಚಾಂತ್ ಕೊಣ್‌ಯ್ ಆಡ್ಕಳ್ ಕರುಂಕ್ ಸಕಾನಾ ತಶೆಂ ಆಲಿಯಾ ಆನಿ ನಾಸಿರಾ ಮಧೆಂ ಕಾಂಯ್ ಭಂಧಡ್ ನಾತ್‌ಲ್ಲಿ.

ಆಲಿಯಾಚಾ ಬಾವ್ಳ್ಯಾಂನಿ, ಕಾಲ್ಚ್ಯಾ ಧನ್ಫರಾಂ ನಾಸಿರಾಕ್ ಉಕ್ಲುನ್ ವೆಲ್ಲ್ಯಾ ಸರ್ಗಾರ್, ನಾಸಿರ್ ಕಾಲ್ಚಾ ದಿಸಾಕ್ ಸಂಪೂರ್ಣ್ ವಿಸ್ರಾಲ್ಲೊ. ಆಲಿಯಾಚಾ ವೆಂಗೆಂತ್ ತಾಕಾ ಕಾಂಯ್ಚ್ ಉಡಾಸ್ ಆಯಿಲ್ಲೊ ನಾ. ಬಾಪಾಯ್ನ್ ಸಾಂಗ್ಲೆಲಿಂ ಜಾಗ್ರುತ್ಕಾಯೆಚಿಂ ಉತ್ರಾಂ ಪಾಸೊನ್!

ಆಲಿಯಾನ್ ಅಚಾನಕ್ ಸಕಾಳಿಂ ಪೋನ್ ಕೆಲ್ಲೆಂ ಜಾಂವ್, ಆಪ್ಣಾಕ್ ಘರಾ ಆಪಯಿಲ್ಲ್ಯಾಂತ್ ತಾಣೆಂ ಚಲಯಿಲ್ಲಿ ಹುಕುಮ್ ಜಾಂವ್, ಆಲಿಯಾ ಎರ್‍ವೇಸಾಚಾ ಆಫೀಸಾಕ್ ವಚೊನ್ ಆಯಿಲ್ಲೆಂ ಜಾಂವ್, ಕಾಂಯ್ಚ್ ನಾಸಿರಾಕ್ ಉಡಾಸಾಕ್ ಆಯ್ಲೆಂ ನಾ. ಆಲಿಯಾ ವಿಶಿಂ ಚಿಂತ್ಚೆಂ ಪ್ರಯತ್ನ್‌ಯ್ ತಾಣೆಂ ಕೆಲ್ಲೆಂ ನಾ. ಆಲಿಯಾನ್ ದಾಕಯಿಲ್ಲ್ಯಾ ಸುಖಾಚಾ ಮುಕಾರ್ ನಾಸಿರ್ ಸಗ್ಳ್ಯಾ ಸಂಸಾರಾಕ್‌ಚ್ ವಿಸ್ರಾಲ್ಲೊ. ತಾಚ್ಯಾ ದೊಳ್ಯಾಂ ಮುಕಾರ್ ಆತಾಂಯ್ ತ್ಯಾಚ್ ಸುಖಾಚ್ಯೊ ಮಧುರ್ ಘಡಿಯೊ ಉಡಾಸ್ ಯೆತಾಲ್ಯೊ. ಆಲಿಯಾ ಆಪ್ಣಾಕ್ ಫಾವೊ ಜಾಲ್ಲ್ಯಾಕ್ ತೊ ಆಪ್ಣಾಕ್‌ಚ್ ಭಾಗಿ ಮ್ಹಣೊನ್ ಪಾತ್ಯೆಲ್ಲೊ.

ಪುಣ್ ಆಜ್!

ಆಜ್ ಸಕಾಳಿಂ ಉಟ್‌ಲ್ಲೆಂ ಆಲಿಯಾ ಆಪ್ಲೆಂ ಏರ್‍ವೇಸಾಚೆ ನ್ಹೆಸಾಣ್ ನ್ಹೆಸೊನ್ ನಾಸ್ಟ್ಯಾಚಾ ಮೆಜಾರ್ ಹಾಜರ್ ಜಾತಾನಾಂಚ್ ಸಗ್ಳ್ಯಾಂಕ್ ವಿಜ್ಮಿತ್ ಜಾಲ್ಲೆಂ. ಏರ್‍ಹೊಸ್ಟೆಸಾಚಾ ನ್ಹೆಸ್ಣಾಚೆರ್ ಆಲಿಯಾ ತಾಂಚಾ ಮುಕಾರ್ ಯೇವ್ನ್ ನಾಸ್ಟ್ಯಾಚಾ ಮೆಜಾ ಮುಕ್ಲಿ ಬಸ್ಕಾ ಪಾಟಿಂ ವೊಡುನ್ ತೆಂ ತ್ಯಾ ಬಸ್ಕೆರ್ ಬಸ್ತಾನಾ ಸಗ್ಳಿಂ ಆಲಿಯಾಕ್‌ಚ್ ಪಳಂವ್ಕ್ ಪಡ್ಲಿಂ. ಥೊಡ್ಯಾ ವೆಳಾಕ್ ನಾಸ್ಟ್ಯಾ ಮೆಜಾ ಮುಕಾರ್ ಹಾಜಾರ್ ಜಾಲ್ಲ್ಯಾ ಸರ್ವಾಂಕ್ ವೀಜ್ ಸಕ್ತೆನ್ ವೆಡೊ ಮಾರ್‍ಲೆಲ್ಯಾ ಪರಿಂ ಜಾಲ್ಲೆಂ.

"ಬಹೂ.....!" ಆಪ್ಣಾಚೆಂಉಗ್ತೆಂ ಜಾಲ್ಲೆಂ ತೋಂಡ್ ಧಾಂಪುಂಕ್ ಸುಲೇಮಾನ್ ವಿಸ್ರಾಲೊ ಜಾಲ್ಯಾರ್ ನಾಸಿರ್ ಆಪ್ಲ್ಯಾ ಬಾಯ್ಲೆಕ್ ಪಳಂವ್ಚಾರ್‍ಚ್ ಪಡ್ಲೊ.

ಥೊಡ್ಯಾಚ್ ಖಿಣಾಂ ಭಿತರ್ ಹ್ಯಾ ಸಂಸಾರಾಕ್ ಆಯಿಲ್ಲ್ಯಾ ಸುಲೇಮಾನಾನ್ ಆಪ್ಲ್ಯಾ ಸುನೆಚಾ ವಯ್ರ್ ಖಂಚಯಿಲ್ಲ್ಯಾ ಆಪ್ಲ್ಯಾ ನದ್ರೆಕ್ ಪಾಟಿಂ ಕಾಡುನ್ ನಾಸಿರಾಕ್ ಪಳೆಲೆಂ. ನಾಸಿರಾನ್ ಆಪ್ಲ್ಯಾ ಬಾಯ್ಲೆಕ್ ತಾಚ್ಯಾ ಏರ್ ಹೊಸ್ಟೆಸಾಚಾ ಕಾಮಾಕ್ ಅಡ್ಕಳ್ ಹಾಡುಂಕ್ ನಾ? ಆಪ್ಣಾಕ್‌ಚ್ ವಿಚಾರ್‌ಲ್ಲ್ಯಾ ಸುಲೇಮಾನಾಕ್ ತಾಚೊ ಪೂತ್ ತಾಚ್ಯಾ ಬಾಯ್ಲೆ ಮುಕಾರ್ ಸಲ್ವೊನ್ ರಾವ್‌ಲ್ಲೊ ತೆಂ ಕಳೊನ್ ಯೆತಾನಾ ಪೂತ್ ಸಲ್ವೊನ್ ರಾವ್ಲ್ಯಾರ್‍ಯ್ ಸುಲೇಮಾನ್ ಮಾತ್ರ್ ಆಪ್ಲ್ಯಾ ಸಲ್ವಣೆಕ್ ಮಾಂದುನ್ ವೊಗೊ ರಾವ್ಲೊ ನಾ. ಎಕಾ ಕುಶಿನ್, ತಾಕಾ, ಆಪ್ಲ್ಯಾ ಘರಾಚಿ ಮರ್ಯಾದ್ ಉಭಿ ರಾವ್‌ಲ್ಲ್ಯಾ ಪರಿಂ ದಿಸ್ಲಿ ಜಾಲ್ಯಾರ್ ದುಸ್ರ್ಯಾ ಕುಶಿನ್ ಆಪ್ಲ್ಯಾ ಪುತಾಚಾ ದಾದ್ಲ್ಯಾಪಣಾ ವಯ್ರ್ ಲಜ್ ದಿಸ್ಲಿ.

"ಬಹೂ..... ಹೆಂ ಕಿತೆಂ?" ಸುಲೇಮಾನಾನ್ ಆಪ್ಲ್ಯಾ ತಾಳ್ಯಾಂತ್ ಥೊಡಿ ದ್ರಡತಾ ಹಾಡುನ್ ಉಲಯ್ತಾನಾ ನಾಸ್ಟ್ಯಾಚಾ ಮೆಜಾರ್ ಸಗ್ಳ್ಯಾಂಚಿ ದೀಶ್ಟ್ ಸುಲೇಮಾನಾ ತೆವ್ಶಿಂ ಗೆಲಿ. ಹೆಂ ಪಳೆಲ್ಲೊ ನಾಸಿರ್,

"ಅಬೂ.... ಆಲಿಯಾಕ್ ಹಾಂವ್ ಸಮ್ಜಾಯ್ತಾಂ!" ನಾಸ್ಟ್ಯಾಚ್ಯಾ ಮೆಜಾರ್ ಬೆಶ್ಟೆಂ ಕಾಂಯ್ ಉಲೊಣೆಂ ಚಲೊನ್ ತಕರಾರ್ ಜಾಂವ್ಚೆ ನಾಕಾತ್ ಮ್ಹಳ್ಳ್ಯಾ ಚಿಂತ್ಪಾನ್ ತೊ ಮಧೆಂ ಉಲಯ್ಲೊ.

"ಆಮ್ಚ್ಯಾ ಘರಾಣ್ಯಾಕ್ ಹೆಂ ಬರೆಂ ದಿಸಾನಾ. ಹ್ಯಾ ವಿಶಿಂ ಸಾರ್‍ಕೆಂ ಚಿಂತುನ್ ಪಳೆ ಬಹೂ!" ಸುಲೇಮಾನಾನ್ ಆಪ್ಲ್ಯಾ ಪುತಾಚಾ ಉತ್ರಾಂಕ್ ಕಾನಾರ್ ಘಾಲೆಂ ನಾ.

"ಅಬೂ...., ಹಾವೆಂ ಸಾಂಗ್ಲೆಂನೆ ಸಗ್ಳೆಂ ಸಮಾ ಜಾತೆಲೆಂ..... ಆಲಿಯಾಕ್ ಹ್ಯಾ ವಿಶಯಾಂತ್ ಕಾಂಯ್ ಕಳಿತ್ ನಾ!" ನಾಸಿರಾಕ್ ಆಪ್ಲ್ಯಾ ಬಾಪಯ್ಚೊ ಕಾಲ್ಚೊ ನಿರ್ಧಾರ್ ಉಡಾಸ್ ಆಯ್ಲೊ. ಚೂಕ್ ತಾಚಿಚ್. ತಾಣೆಂ ಹ್ಯಾ ವಿಶಿಂ ಆಲಿಯಾಕ್ ಸಾಂಗೊಂಕ್ ಜಾಯ್ ಆಸ್‌ಲ್ಲೆಂ. ಪುಣ್ ಆಲಿಯಾಚಾ ವೆಂಗೆಂತ್ ತೊ ಆಪ್ಲ್ಯಾ ಬಾಪಾಯ್ಚಾ ವಿಚಾರಾಕ್ ವಿಸ್ರಾಲ್ಲೊ.

"ನಿಖಾ ಕರುಂಕ್ ಆಯ್ತೆಂ ಜಾಲ್ಲ್ಯಾ ಚಲಿಯೆನ್ ನಿಖಾ ಕರ್‍ಚ್ಯಾ ಪಯ್ಲೆಂ ಜಿವಿತಾಕ್ ಸಗ್ಳೆಂ ಜಾಣಾಂ ಜಾಂವ್ಚೆಂ ಗರ್ಜ್ ಆಸಾ ನಾಸಿರ್!" ಸುಲೇಮಾನ್ ಪುತಾಚೆರ್ ಬಡ್ಬಡ್ಲೊ.

"ಅಬೂ, ಚೂಕ್ ಮ್ಹಜಿಚ್. ಹ್ಯಾ ವಿಶಿಂ ಆಲಿಯಾ ಲಾಗಿಂ ಉಲಂವ್ಕ್ ಹಾಂವ್ ವಿಸ್ರಾಲೊಂ!" ನಾಸಿರಾನ್ ಆಪ್ಲಿ ಚೂಕ್ ವಳ್ಕೊನ್ ಘೆತ್ಲಿ.

"ಉಲಂವ್ಕ್ ವಿಸ್ರಾಲ್ಲಿ ಚೂಕ್ ತುಜಿ ನ್ಹಯ್ ನಾಸಿರ್! ಆಪ್ಲ್ಯಾ ಘೊವಾಕ್ ಆನಿ ಮಾಂಯ್ ಮಾಂವಾಂಕ್ ವಿಸ್ರಾಲ್ಲಿ ಚೂಕ್ ತುಜ್ಯಾ ಬಾಯ್ಲೆಚಿ!" ಸುಲೇಮಾನಾಚೊ ತಾಳೊ ಘಡ್ಗಡ್ಯಾ ಪರಿಂ ಆಲಿಯಾಚಾ ಕಾನಾಂತ್ ಸಾದ್ಲೊ. ಸುಲೇಮಾನಾಚಾ ತಾಳ್ಯಾಂತ್ ರಾಗ್ ಉಮಾಳ್ತಾಲೊ.

ಅಚಾನಕ್ ಆಪ್ಲ್ಯಾ ದೊಳ್ಯಾಂ ಮುಕಾರ್‍ಚ್ ಆಪ್ಣಾಕ್ ಕಳಿತ್ ನಾತ್ಲೆಲ್ಯಾ ವಿಶಯಾಂತ್ ಜಾಂವ್ಚೆ ತೆಂ ತರ್ಕ್ ಪಳವ್ನ್ ಆಲಿಯಾಕ್ ಕಾಂಯ್ ಸಮ್ಜಾಲೆಂ ನಾ. ತೆಂ ಏಕ್ ಪಾವ್ಟಿಂ ಆಪ್ಲ್ಯಾ ಘೊವಾಕ್ ಏಕ್ ಪಾವ್ಟಿಂ ಆಪ್ಲ್ಯಾ ಮಾಂವಾಂಕ್ ಪಳೆಲಾಗ್ಲೆಂ. ನಾಸ್ಟ್ಯಾ ಮೆಜಾರ್ ಆಪ್ಲೊ ಮಾಂವ್ ಆಪ್ಣಾ ವಯ್ರ್ ಇತ್ಲೊ ರಾಗಾರ್ ಕಿತ್ಯಾಕ್ ಜಾಲಾ ಮ್ಹಳ್ಳ್ಯಾಚೆಂ ಕಾರಾಣ್ ಆಲಿಯಾಕ್ ಕಳ್ಳೆಂ ನಾ.

"ಅಬೂ......? ಆಲಿಯಾನ್ ಜಾಯ್ ಮ್ಹಣೊನ್ ಕಿತೆಂಯ್......!" ನಾಸಿರಾಕ್ ಆಪ್ಲ್ಯಾ ಬಾಪಾಯ್ ಮುಕಾರ್ ಆಪ್ಲ್ಯಾ ಬಾಯ್ಲೆಚ್ಯಾ ತರ್ಫೆನ್ ಉಭೊ ಜಾಂವ್ಚೆಂ ಧಯ್ರ್ ನಾತ್‌ಲ್ಲೆಂ. ಹೆಂ ತಾಚ್ಯಾ ಉತ್ರಾಂನಿಂಚ್ ಸ್ಪಶ್ಟ್ ಕಳ್ತಾಲೆಂ.

"ಏಕ್ ಮಿನಿಟ್!" ನಾಸಿರಾಚೆಂ ಉಲೊಣೆಂ ಆಲಿಯಾನ್ ಮಧೆಂಚ್ ರಾವಯ್ಲೆಂ.

"ವಿಶಯ್ ಕಿತೆಂ ನಾಸಿರ್?" ಆಲಿಯಾಚಾ ತೊಂಡಾರ್ ಕಾಂಯ್ಚ್ ಭಿರಾಂತ್ ನಾತ್ಲೆಲಿ. ತಾಣೆಂ ಧಯ್ರಾನ್ ವಿಚಾರ್‍ಲೆಂ.

"ಆಲಿಯಾ.... ತುಂ ಘರಾಚ್ ರಾವ್ತೆಲೆಂಯ್! ತುಂ ಏರ್‍ವೇಸಾಕ್ ವೆಚೆಂನಾಂಯ್!" ನಾಸಿರ್ ಉಲಯ್ಲೊ.

"ಮ್ಹಳ್ಯಾರ್....?" ಆಲಿಯಾಕ್ ನಾಸಿರಾಚೆಂ ಉಲೊಣೆಂ ಸಮ್ಜಾಲೆಂ ನಾ.

"ತುಂ ಏರ್‍ಹೊಸ್ಟೆಸಾಚಾ ಕಾಮಾಕ್ ವೆಚೆಂ ನಾಂಯ್!"

"ಕಿತ್ಯಾಕ್?" ಆಲಿಯಾಕ್ ಆಶ್ಚರ್ಯ್ ಜಾಲೆಂ.

"ಹ್ಯಾ ಘರಾಂತ್ ತುಂ ಆಸ್ತಾನಾ ತುಕಾ ಭಾಯ್ರ್ ಘೊಳೊಂಕ್ ವೆಚಿ ಗರ್ಜ್ ನಾ ಆಲಿಯಾ! ಹಾಂಗಾಸರ್ ತುಕಾ ಸಗ್ಳೆಂ ಆಸಾ. ತುಕಾ ಕಾಂಯ್ ಉಣೆಂಪಣ್ ಜಾಲ್ಯಾರ್‍ಯ್ ತೆಂ ಹಾಂವ್ ಭರುನ್ ದಿತಾಂ!"

"ಉಣೆಂಪಣ್ ಮ್ಹಾಕಾ ಮ್ಹಜ್ಯಾ ಬಾಪಾಯ್ಚಾ ಘರಾಯ್ ನಾತ್‌ಲ್ಲೆಂ ನಾಸಿರ್! ಪುಣ್ ಮ್ಹಾಕಾ ದಿಸ್ತಾ ಉಣೆಂಪಣ್ ತುಜ್ಯಾ ಚಿಂತ್ಪಾಂತ್ ಆಸಾ. ತೆಂ ತುಂ ಕಶೆಂ ಭರ್‍ತಾಯ್? ಹಾಂವ್ ಮ್ಹಜಿ ವಳೊಕ್ ಸಂಸಾರಾಕ್ ದಾಕಯ್ತಾಂ ಶಿವಾಯ್ ತುಜ್ಯೆಲಾಗಿಂ ಕಾಂಯ್ ಉಣೆಂ ಆಸಾ ಮ್ಹಣೊನ್ ತ್ಯಾ ಉಣ್ಯಾಪಣಾಕ್ ಹಾಂವ್ ಸಂಸಾರಾಕ್ ದಾಖಯ್ನಾ. ಫಾಲ್ಯಾಂ ಹೆಂಚ್ ದುಸ್ರಿ ಖಂಯ್ಚಿಯ್ ಚಲಿ ಕರುಂಕ್ ಸಕ್ತಾ. ಹಾಂತುಂ ವಾಯ್ಟ್ ಕಿತೆಂ ಆಸಾ? ತ್ಯಾ ವಯ್ರ್ ತುಂ ಜಾಣಾಂಯ್ ಹಾಂವ್ ಪಯ್ಲೆಂ ಥಾವ್ನ್ ಏರ್‍ಹೊಸ್ಟೆಸಾಚೆಂ ಕಾಮ್ ಕರ್‍ತಾಂ!" ಆಲಿಯಾನ್ ಕಾಂಯ್ ಸೊಡುನ್ ದಿಲೆಂ ನಾ.

"ಜಾಂವ್ಕ್ ಪುರೊ ಬಹೂ....! ಪುಣ್ ತೆಂ ತುಜ್ಯಾ ಅಬ್ಬುಚ್ಯಾ ಘರಾ ಆಸ್ತಾನಾ!

"ಮ್ಹಳ್ಯಾರ್ ಏಕ್ ಚಲಿ ಆಪ್ಲ್ಯಾ ಬಾಪಾಯ್ಚಾ ಘರಾ ದುಸ್ರಿ ಆನಿ ಆಪ್ಲ್ಯಾ ಘೊವಾಚಾ ಘರಾ ದುಸ್ರಿ ಜಾತಾ?" ಆಲಿಯಾನ್ ಆತಾಂ ಆಪ್ಲಿ ನದರ್ ಆಪ್ಲ್ಯಾ ಮಾಂವಾ ವಯ್ರ್ ಧಾಂವ್ಡಾಯ್ಲಿ.

ನಾಸಿರಾಚಿ ಆವಯ್ ಮೌನ್ ಬಸೊನ್ ಆಪ್ಲ್ಯಾ ಘೊವಾಕ್ ಆನಿ ಆಪ್ಲ್ಯಾ ಸುನೆಕ್ ಆಯ್ಕಾತಾಲಿ. ನಾಸ್ಟ್ಯಾಚಾ ಮೆಜಾರ್ ಆಪ್ಲೊ ಘೊವ್ ಆಪ್ಲಿಂಚ್ ಉತ್ರಾಂ ಸುನೆಚಾ ಮುಕಾರ್ ದವರ್‍ತಾ ಮ್ಹಳ್ಳೆಂ ತಿ ಜಾಣಾಂ.

"ತ್ಯಾ ತ್ಯಾ ಪರಿಸರಾಂತ್ ತಶೆಂ ಜಾತಾ!" ಸುಲೇಮಾನ್ ಉಲಯ್ಲೊ.

"ತರ್ ಚಲಿಯೆನ್ ಆಪ್ಲ್ಯಾ ಪರಿಸರಾಕ್ ಹೊಂದೊನ್ ಜಿಯೆಂವ್ಕ್ ಜಾಯ್?" ಆಲಿಯಾನ್ ಆಪ್ಲ್ಯಾ ಮಾಂವಾಂಕ್ ದೊಳೆ ಜೊಕುನ್ ಪಳೆಲೆಂ.

"ದುಸ್ರ್ಯಾ ಚಲಿಯಾಂಚೆಂ ಮ್ಹಾಕಾ ಪಡೊನ್ ವಚೊಂಕ್ ನಾ! ಮ್ಹಜ್ಯಾ ಘರಾ ಹಾಂಗಾ ಹಾವೆಂ ಆಶೆಂವ್ಚ್ಯಾ ಪರಿಂ ಹ್ಯಾ ಘರ್‍ಚ್ಯಾ ಚಲಿಯಾಂನಿ ಚಲೊಂಕ್ ಜಾಯ್!" ಸುಲೇಮಾನಾಚ್ಯಾ ತಾಳ್ಯಾಂತ್ ಹುಕುಮ್ ಆಸ್‌ಲ್ಲಿ.

ಆಪ್ಲ್ಯಾ ಮಾಂವಾಂಚಾ ಉತ್ರಾಂಕ್ ಆಯ್ಕಾಲ್ಲೆಂ ಆಲಿಯಾ ಕಾಂಯ್ಚ್ ಉಲಯ್ನಾಸ್ತಾನಾ ಥೊಡ್ಯಾ ವೆಳಾಕ್ ಮೌನ್ ಜಾಲೆಂ.

ಹ್ಯಾ ವೆಳಾರ್ ತಾಕಾ ಆಪ್ಲ್ಯಾ ಘೊವಾಚ್ಯಾ ಘರಾಂತ್ ಆಪ್ಣಾಕ್ ಕೊಣ್‌ಯ್ ಸಾಂಗಾತ್ ದಿಂವ್ಚಿಂ ನಾಂತ್ ಮ್ಹಳ್ಳೆಂ ಕಳಿತ್ ಜಾಲೆಂ. ತಾಚೊ ಘೊವ್ ನಾಸಿರ್ ಜಾಲ್ಯಾರ್‍ಯ್ ಆಪ್ಲ್ಯಾ ಬಾಪಾಯ್ ಮುಕಾರ್ ಸಲ್ವೊನ್ ರಾವ್‌ಲ್ಲೊ. ತಶೆಂಯ್ ಆಪ್ಣೆಂ ಕಿತೆಂ ಚೂಕ್ ಕೆಲ್ಯಾ? ಆಪ್ಣಾಕ್ ಪಸಂದ್ ಆಸ್‌ಲ್ಲ್ಯಾ ಕಾಮಾಂತ್ ಹಾವೆಂ ಮೆತೆರ್ ಜಾಲ್ಯಾರ್ ಕಿತೆಂ ವಾಯ್ಟ್ ಆಸಾ? ಆಲಿಯಾಚಾ ಮೌನತಾಯೆಂತ್ ತಾಚಿ ಮತ್ ಸವಾಲಾಂ ಉಡಯ್ತಾಲಿ.

ಹ್ಯಾ ತಾಚ್ಯಾ ಮೌನ್ ಜಾಲ್ಲ್ಯಾ ವೆಳಾ ಭಿತರ್ ತಾಣೆಂ ಏಕ್ ನಿರ್ಧಾರ್ ಘೆಂವ್ಕ್ ಜಾಯ್ ಆಸ್‌ಲ್ಲೊ. ಚಲಿಯೆ ಜಾತಿಕ್ ಶಿರಾಪ್ ಹೊ! ತಾಣೆಂ ಚಿಂತ್ಲೆಂ. ಹ್ಯಾ ನಿರ್ಧಾರಾಂತ್ ಕಿತೆಂಯ್ ಜಾಂವ್ಕ್ ಸಕ್ತಾ. ಭುರ್ಗ್ಯಾಪಣಾರ್ ಥಾವ್ನ್ ಆಪ್ಣೆ ಪಾಳುನ್ ಆಯಿಲ್ಲ್ಯಾ ಥೊಡ್ಯಾ ವಿಚಾರಾಂಕ್ ವೆಂಗ್ಚೆಂ ಯಾ ಸಾಂಡ್ಚೆಂ; ಆಪ್ಲ್ಯಾ ಜಿವಿತಾಂತ್ ರಾಜಿ ಕರ್‍ಚಿ ವಾ ಝುಜ್ಚೆಂ; ಆಪ್ಲೊ ನಿರ್ಧಾರ್ ಕಿತೆಂಯ್ ಪರಿಣಾಮ್ ಹಾಡುಂಕ್ ಸಕ್ತಾ. ಕಿತೆಂ ಹಾಂವ್ ಹ್ಯಾ ನಿರ್ಧಾರಾಕ್ ತಯಾರ್ ಆಸಾಂ? ಮ್ಹಜ್ಯಾ ಜಿವಿತಾಂತ್ಲ್ಯಾ, ಹಾವೆಂ ಮಾಂದ್ಲೆಲ್ಯಾ ನಿಯಮಾ ಮುಕಾರ್ ಕಸಲೊಯ್ ನಿರ್ಧಾರ್ ಘೆತಾನಾ ಹಾವೆಂ ಹಾಚ್ಯಾ ಆದಿಂ ಚಿಂತ್ಲಾಂ? ತರ್, ಆಜ್ ಕಿತ್ಯಾಕ್....?

"ಬರೆಂ....!" ಥೊಡ್ಯಾಚ್ ವೆಳಾ ಭಿತರ್ ಎಕಾ ನಿರ್ಧಾರಾಕ್ ಆಯಿಲ್ಲೆಂ ಆಲಿಯಾ ಶಾಂತ್‌ಪಣಿ ಉಲಯ್ಲೆಂ. "......ಹಾಂವ್ ತುಜ್ಯಾ ಪರಿಸರಾಕ್ ಹೊಂದೊನ್ ಜಿಯೆತಾಂ ನಾಸಿರ್. ಕಿತೆಂ ತುಂಯ್ ಮ್ಹಜ್ಯಾ ಪರಿಸರಾಕ್ ಹೊಂದೊನ್ ಜಿಯೆಂವ್ಕ್ ಸಕ್ತಾಯ್? ಹಾವೆಂ ಮ್ಹಾಕಾ ಮಾತ್ರ್ ತುಕಾ ಒಪ್ಸುನ್ ದೀಂವ್ಕ್ ನಾ.....! ತುವೆಂಯ್ ತುಕಾಚ್ ಮ್ಹಾಕಾ ಒಪ್ಸುನ್ ದಿಲಾಂಯ್!"

ಆಲಿಯಾಚಾ ಜವಾಬೆಕ್ ಆನಿ ತ್ಯಾ ಜವಾಬೆ ಪಾಟ್ಲ್ಯಾ ಸವಾಲಾಕ್ ಕೊಣಾಯ್ ಥಾವ್ನ್ ಕಾಂಯ್ ಉತಾರ್ ಭಾಯ್ರ್ ಪಡ್ಲೆಂ ನಾ.

"ಸಮಾಜೆಂತ್ಲಿಂ ಕಸಲಿಂಯ್ ನಿಯಮಾ ಫಕತ್ತ್ ಚಲಿಯೆಕ್ ಮಾತ್ರ್ ಲಾಗು ಜಾಯ್ನಾಂತ್. ನಿಯಮಾ ತಿಂ ಸಗ್ಳ್ಯಾಂಕ್ ಎಕಾಚ್ ಮಾಫಾನ್ ಲಾಗು ಜಾತಾತ್. ಪುಣ್ ಚಲಿಯೆನ್ ಆಪ್ಲೆಂ ಅಬಲ್‌ಪಣ್ ವಳ್ಕೊನ್ ಘೆತ್‌ಲ್ಲ್ಯಾನ್ ಆಜ್ ಹಿ ಸಮಾಜ್ ತಿಂ ಸಗ್ಳಿಂ ನಿಯಮಾ ಫಕತ್ತ್ ಚಲಿಯೆಚಾ ಮಾತ್ಯಾರ್ ಮಾತ್ರ್ ಥಾಪ್ತಾ!"

"ಚಲಿಯೆವಿಣೆ ಚಲ್ಯಾಚೆಂ ಆಸ್ಥಿತ್ವ್ ಖಂಯ್ಚರ್‍ಯ್ ಆಸಾ?"

"ಚಲಿಯೆವಿಣೆ ಚಲೊ ಆಪ್ಲ್ಯಾ ಪಾಂಯಾರ್ ಉಭೊ ಜಾಂವ್ಕ್ ಸಕ್ತಾ?"

"ಚಲಿಯೆವಿಣೆ ಚಲೊ ಆಪ್ಣೆಂಚ್ ರಚ್‌ಲ್ಲ್ಯಾ ಹ್ಯಾ ಸಮಾಜೆಕ್ ಫುಡ್ ಕರುನ್ ರಾವೊಂಕ್ ಸಕ್ತಾ?"

ಆಲಿಯಾಚಿಂ ಸವಾಲಾಂ ನಾಸ್ಟ್ಯಾ ಮೆಜಾರ್ ಬಸ್ಲೆಲ್ಯಾ ಸಗ್ಳ್ಯಾಂಚಾ ಕಾನಾಂಕ್ ಘಡ್ಗಡೊ ಮಾರ್‍ತಾ ತಶೆಂ ಮಾರ್‍ತಾಲಿಂ. ಕೊಣಾಯ್ಚಾ ತೊಂಡಾ ಥಾವ್ನ್ ಕಾಂಯ್ಚ್ ಸವಾಲ್ ವಾ ಪಾಟಿಂ ಜವಾಬ್ ಆಯ್ಲಿ ನಾ.

"ಆತಾಂ ತುಂ ಮ್ಹಜೊ ನಿರ್ಧಾರ್ ಆಯ್ಕ್ ನಾಸಿರ್!" ಆಲಿಯಾ ಆಪ್ಲ್ಯಾ ವಿಚಾರಾಂಚೆರ್ ಆಚಲ್ ಜಾಲ್ಲೆಂ. ತಾಕಾ ಆತಾಂ ತಾಚ್ಯಾ ದೊಳ್ಯಾಂ ಮುಕಾರ್ ಆಪ್ಲ್ಯಾ ಚಲಿಯೆಪಣಾಚೊ ಮಾನ್ ರಿಸ್ಕೆರ್ ಆಸಾ ತಶೆಂ ಭೊಗ್ಲೆಂ. ಹೊ ಆಪ್ಲೊ ಮಾನ್ ಉರಂವ್ಚಾ ಖಾತಿರ್ ಆಪುಣ್ ಕಸಲೊಯ್ ನಿರ್ಧಾರ್ ಘೆಂವ್ಕ್ ತಯಾರ್! ಚಿಂತ್ಲೆಲ್ಯಾ ಆಲಿಯಾನ್ ಆಪ್ಲೊ ನಿರ್ಧಾರ್ ಪಾಚಾರ್‍ಲೊ.

"ನಾಸಿರ್......? ಏಕ್ ಚಲಿ ಜಾವ್ನ್ ಹಾಂವ್ ತುಜ್ಯೆ ಪ್ರಾಸ್ ಚಡ್ ತುಜ್ಯಾ ಆನಿ ತುಜ್ಯಾ ಘರಾಚ್ಯಾ ವಿಶಿಂ ಚಿಂತಾಂ. ಆನಿ ಹಾಂವ್ ಜಾಣಾಂ ಹಾಂವ್ ಕಿತೆಂ ಕರ್‍ತಾಂ ಪಳೆ ತೆಂ. ಮ್ಹಜ್ಯಾ ವಿಚಾರಾಂನಿ ಮ್ಹಾಕಾ ಜಾಯ್ ಜಾಲ್ಲ್ಯಾ ಪರಿಂ ಹಾಂವ್ ಬದ್ಲಾವಣ್ ಹಾಡಿನಾ. ಮ್ಹಜ್ಯಾ ವಿಚಾರಾಂಪರಿಂ ಹಾಂವ್ ಚಲ್ತಾಂ. ಆನಿ ಹಾಂವ್ ಖಂಯ್ಚಾಯ್ ವಿಶಯಾಂತ್ ಭಿಯೆನಾ. ಮ್ಹಜ್ಯಾ ಖುಶೆ ಪರ್ಮಾಣೆ ಮ್ಹಜೆಂ ಜಿವಿತ್ ಹಾವೆಂ ಮಾಂಡುನ್ ಹಾಡ್ಲಾಂ. ತೆದಾಳಾ ಹಾಂವ್ ಭಿಯೆಂವ್ಕ್ ನಾ ತರ್ ಆತಾಂ ಭಿಯೆಂವ್ಚೆಂ ಸವಾಲ್‌ಚ್ ಉದೆನಾ. ಆತಾಂ ನಿರ್ಧಾರ್ ತುಜೊ.....! ಕಿತ್ಯಾಕ್ ಮ್ಹಳ್ಯಾರ್ ತುಂ ಮ್ಹಜೊ ಘೊವ್! ಆನಿ ಹಾಂವ್‌ಯ್ ಮ್ಹಾಕಾ ಜಿಣಿಭರ್ ಎಕ್‌ಚ್ ಘೊವ್ ಪುರೊ ಮ್ಹಣೊನ್ ಮಾಗ್ತಾಂ. ತುಕಾ ಮಾತ್ರ್ ಮ್ಹಜ್ಯೆರ್ ಹಕ್ಕ್ ಆನಿ ಮ್ಹಾಕಾ ಮಾತ್ರ್ ತುಜ್ಯೆರ್ ಹಕ್ಕ್ ಶಿವಾಯ್ ಮ್ಹಾಕಾ ದುಸ್ರ್ಯಾ ಕೊಣೆಂಯ್ ಘೊವ್ ಜಾಂವ್ಚೆ ಪ್ರಯತ್ನ್ ಕರ್‍ಚೆಂ ನಾಕಾ!" ಆಲಿಯಾಚೊ ಹಿಶಾರೊ ನಾಸಿರಾಚಾ ಬಾಪಾಯ್ ವಯ್ರ್ ಆಸ್‌ಲ್ಲೊ.

"ಬಹೂ.....!" ಆಪ್ಲ್ಯಾ ಸುನೆಚಾ ಉತ್ರಾಂಕ್ ಆಯ್ಕಾಲ್ಲೊ ಸುಲೇಮಾನ್ ಘರ್ಜಾಲೊ.

ಆಲಿಯಾಚಾ ಉತ್ರಾಂನಿ ಘಡ್ಗಡೊ ಮಾರ್‍ತಾಲೊ. ಜಗ್ಲಾಣೆ ಉಟ್ತಾಲೆಂ ತರ್‍ಯ್ ತಾಚ್ಯಾ ಉತ್ರಾಂನಿ ಸತ್ ಆಸ್‌ಲ್ಲೆಂ. ಹ್ಯಾ ಸತಾ ಮುಕಾರ್ ಖುದ್ದ್ ತಾಚೊ ಘೊವ್ ತೊಂಡಾಂತ್ ಜೀಬ್ ನಾತ್ಲೆಲ್ಯಾಪರಿಂ ಮೊನೊ ಜಾಲ್ಲೊ ತರ್ ಸುಲೇಮಾನಾಕ್ ಆಲಿಯಾಚಿಂ ಉತ್ರಾಂ ಭಾಲಿಯೆ ಪರಿಂ ತೊಪ್‌ಲ್ಲಿ.

"ಮ್ಹಜ್ಯಾ ಆಸ್ಥಿತ್ವಾಚಾ ರುಪಾಕ್ ಕೊನ್ಶ್ಯಾಕ್ ಲೊಟ್ಚೆಂ ಪ್ರಯತ್ನ್ ಹಾಂವ್ ಭಿಲ್ಕುಲ್ ಕರಿನಾ!" ಆಲಿಯಾನ್ ಸುಲೇಮಾನಾಚಾ ಬೊಬೆಕ್ ಗಣ್ಣೆ ಕೆಲೆಂ ನಾ. ಖಡಾ ಖಂಡಿತ್ ಉಲಯಿಲ್ಲೆಂ ಆಲಿಯಾ ಆತಾಂ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೆಂ. ತಾಚಿ ದೀಶ್ಟ್ ನಾಸಿರಾ ವಯ್ರ್ ಕೇಂದ್ರೀಕ್ರತ್ ಜಾವ್ನ್ ಆಸ್‌ಲ್ಲಿ.

"ತುಜೊ ನಿರ್ಧಾರ್ ತುವೆಂ ಕೆದಾಳಾಯ್ ಸಾಂಗ್ಯೆತ್ ನಾಸಿರ್! ತುಜೊ ನಾಸ್ಟೊ ಜಾಲೊ ಜಾಲ್ಯಾರ್...., ತುಂ ಮ್ಹಾಕಾ ಏರ್‍ಪೊರ್ಟಾಕ್ ಡ್ರಾಪ್ ಕರ್‍ತಾಯ್ ಜಾಲ್ಯಾರ್.....!?"

"ಆಲಿಯಾ ಹಾವೆಂ ಸಾಗ್‌ಲ್ಲೆಂ ಆಯ್ಕ್. ಪ್ಲೀಸ್....!" ನಾಸಿರಾಚಾ ತಾಳ್ಯಾಂತ್ ದೀನ್‌ಪಣ್ ಉಟೊನ್ ಆಯ್ಲೆಂ.

"ನಾಸಿರ್, ತುಕಾ ಹಾವೆಂ ಮ್ಹಜ್ಯಾ ನಿರ್ಧಾರಾ ವಿಶಿಂ ಸಾಂಗ್ಲೆಂ. ತುಂ ಮ್ಹಜೊ ಘೊವ್! ಜರ್ ತರ್ ತುಜ್ಯೆ ಖಾತಿರ್ ಮ್ಹಜೊ ಜೀವ್ ಮ್ಹಾಕಾ ದೀಂವ್ಕ್ ಪಡಾತ್ ಜಾಲ್ಯಾರ್ ಹಾಂವ್ ಖಂಡಿತ್ ದಿತೆಲಿಂ. ಪುಣ್ ತುಂ ತುಜ್ಯಾ ಆಲಿಯಾಕ್, ತಾಚ್ಯಾ ಜಿವಿತಾಚ್ಯಾ ಝುಜಾಂತ್ ಝುಜಾನಾಸ್ತಾನಾಂಚ್ ಆಪ್ಲಿ ಸಲ್ವಣಿ ಮಾಂದುನ್ ಘೆ ಮ್ಹಣ್ತಾಯ್ ತರ್ ಹೆಂ ಹಾಂವ್ ಹೆಂ ಕಶೆಂ ಮಾಂದುನ್ ಘೆಂವ್? ಮ್ಹಜ್ಯಾ ಭಿತರ್‍ಲ್ಯಾ ಮ್ಹಾಕಾ ಹಾಂವ್ ಆಶೆಂಚ್ ಉಕ್ಲುನ್ ರಸ್ತ್ಯಾ ದೆಗೆಚ್ಯಾ ವ್ಹಳಾಂತ್ ವ್ಹಾಳೊಂಕ್ ಕಶೆಂ ಸೊಡುಂ....? ಬೋವ್ಶ್ಯಾ ಹೆಂ ತುಜಿ ಆವಯ್ ಯಾ ತುಜೆಂ ಭಯ್ಣ್ ಕರುಂಕ್ ಸಕ್ತೆಲಿಂ. ಪುಣ್ ಹಾಂವ್ ನ್ಹಯ್!"

ಆಲಿಯಾ ಆತಾಂ ಕೊಣಾಚಾಚ್ ಜವಾಬೆಕ್ ರಾಕಾನಾಸ್ತಾನಾ ಆಪ್ಲ್ಯಾ ಬೆಡ್‌ರೂಮಾ ತೆವ್ಶಿಂ ಚಮ್ಕಾಲೆಂ. ಚಾರ್‍ಜಿಂಗಾರ್ ದವರ್‍ಲ್ಲೆಂ ಆಪ್ಲೆಂ ಸೆಲ್‌ಪೊನ್ ಆಪ್ಲ್ಯಾ ವ್ಯಾನಿಟಿ ಬ್ಯಾಗಾಂತ್ ಗಳವ್ನ್ ತಾಚೆಂ ಜಿಪ್ಪ್ ವೊಡುನ್ ತೆಂ ಬ್ಯಾಗ್ ಆಪ್ಲ್ಯಾ ಖಾಂದ್ಯಾರ್ ವೊಡ್ತಾನಾ ಬೆಡ್‌ರುಮಾಚಾ ದಾರಾರ್ ನಾಸಿರ್ ಉಭೊ ಜಾಲೊ.

"ಆಲಿಯಾ....! ಪ್ಲೀಸ್ ಮ್ಹಾಕಾ ಆಯ್ಕ್! ಐ ಲವ್ ಯು....! ಥೊಡ್ಯಾ ದಿಸಾಂನಿ ಸಗ್ಳೆಂ ಸಮಾ ಜಾತೆಲೆಂ. ಐ ಪ್ರಾಮಿಸ್ ಯು!"

"ನಾಸಿರ್....! ಚಲಿಯೆಕ್ ಆಪ್ಲೆಂ ಜಿವಿತ್ ಭಿರಾಂತೆ ವಿಣೆ ಸಾರುಂಕ್, ಹ್ಯಾ ಸಮಾಜೆಂತ್ ತಾಕಾ ಎಕಾ ಚಲ್ಯಾಚಿ ಗರ್ಜ್ ಆಸಾ. ಪುಣ್ ಚಲ್ಯಾವಿಣೆ ತಿಚ್ಯಾ ತ್ಯಾ ಜೀವನಾಕ್, ಹ್ಯಾ ಸಮಾಜೆಂತ್ ಭಿರಾಂತೆನ್ ತರ್‍ಯ್ ತಿ ಸಾರುಂಕ್ ಸಕ್ತಾ! ಪುಣ್ ಕೆದ್ನಾಂ ಎಕಾ ಚಲ್ಯಾಕ್ ಚಲಿಯೆಚಿ ಗರ್ಜ್ ಉದೆತಾಗೀ ತೆದ್ನಾಂ ತೊ ಚಲಿಯೆವಿಣೆ ಕಾಂಯ್ಚ್ ಕರುಂಕ್ ಸಕಾನಾ, ಧಯ್ರಾನ್ ಹಾಸೊಂಕ್‌ಯ್ ಸಕಾನಾ! ಭಿರಾಂತೆನ್ ರಡೊಂಕ್‌ಯ್ ಸಕಾನಾ!" ಆಲಿಯಾ ಆಪ್ಲ್ಯಾ ಖಾಟಿಯೆರ್ ಬಸ್ಲೆಂ.

"ತರ್ ತುಂ ಮ್ಹಜೆಂ ಆಯ್ಕಾನಾಂಯ್.......!?"

"ಆಯ್ಕಾನಾ? ಆಯ್ಕಾನಾ ಕಿತೆಂ.......?"

"ತುಂ ತುಜ್ಯಾ ಎಕಾ ಹಟಾಕ್ ಲಾಗೊನ್......!"

"ಹೆಂ ಮ್ಹಜೆಂ ಹಟ್ ನ್ಹಯ್ ನಾಸಿರ್! ಹೆಂ ತುಮ್ಚೆಂ ಹಟ್! ಹಾವೆಂ ಪಯ್ಲೆಂಯ್ ಏರ್‍ಹೊಸ್ಟೆಸಾಚೆಂ ಕಾಮ್ ಕೆಲಾಂ. ಹೆಂ ತುಂ ಆನಿ ತುಜ್ಯಾ ಘರ್‍ಚಿಂ ಜಾಣಾಂ ಆಸಾತ್! ಹೆಂ ಜಾಣಾಂ ಆಸೊನ್‌ಯ್ ತುಮಿ ಮ್ಹಜ್ಯೆ ಸಾಂಗಾತಾ ಸಂಭಂಧ್ ಜೊಡ್ಲಾ. ಆಶೆಂ ಆಸ್ತಾನಾ ಆತಾಂ ತುಮಿಚ್ ಸಾಂಗ್ತಾತ್, ಮ್ಹಜ್ಯಾ ಕಾಮಾ ಥಾವ್ನ್ ತುಮ್ಚಿ ಮರ್ಯಾದ್ ಉಣಿಂ ಜಾತಾ....? ಹಾಂವ್ ಮ್ಹಜ್ಯಾ ಮರ್ಯಾದೆ ಖಾತಿರ್ ಹೆಂ ಕಾಮ್ ಕರಿನಾ. ಮ್ಹಜ್ಯಾ ಮತಿಚಾ ತೃಪ್ತೆ ಖಾತಿರ್ ಹೆಂ ಕಾಮ್ ಕರ್‍ತಾಂ. ಮ್ಹಜ್ಯಾ ಮತಿಕ್ ತೃಪ್ತಿ ನಾಸ್ತಾನಾ ಹಾವೆಂ ಕಶೆಂ ಜಿಯೆಂವ್ಚೆ? ತುಕಾ ಬೋವ್ಶ್ಯಾ ಹಾವೆಂ ಕರ್‍ಚೆಂ ತೆಂ ಫಕತ್ತ್ ಏಕ್ ಕಾಮ್ ಮ್ಹಳ್ಳ್ಯಾಪರಿಂ ದಿಸ್ತಾ ಆಸ್ತೆಲೆಂ. ಪುಣ್ ಮ್ಹಾಕಾ ಹೆಂ ಫಕತ್ತ್ ಏಕ್ ಕಾಮ್ ನ್ಹಯ್! ಹೊ ಮ್ಹಜೊ ಸಂತೊಸ್! ಮ್ಹಜ್ಯಾ ಸಂತೊಸಾಕ್ ತುಮ್ಚಿ ಮರ್ಯಾದ್ ಜಾವ್ನ್ ತುಮಿ ಕಶೆಂ ಘೆಂವ್ಕ್ ಸೊಧ್ತಾತ್?"

"ಸವಾಲ್ ಮರ್ಯಾದೆಚೆಂ ನ್ಹಯ್ ಆಲಿಯಾ....! ಸವಾಲ್, ತುಕಾ ಕಾಮ್ ಕರ್‍ಚಿ ಕಸಲಿ ಗರ್ಜ್?" ಆಲಿಯಾನ್ ಉಚಾರ್‍ಲೆಲ್ಯಾ ಉತ್ರಾಂನಿ ಲಿಪೊನ್ ಆಸ್ಲೆಲೆಂ ತಾಚ್ಯಾ ಜಿವಿತಾಚೆಂ ಸತ್ ನಾಸಿರ್ ಪಾರ್‍ಕುಂಕ್ ಸಕ್ಲೊ ನಾ. ತಾಕಾ ಹೆಂ ಆಲಿಯಾನ್ ಕರ್‍ಚೆಂ ಕಾಮ್ ಚಿಲ್ಲರಾಯೆಚೆಂ ಕಾಮ್ ಮ್ಹಳ್ಳ್ಯಾಪರಿಂ ದಿಸ್ತಾಲೆಂ.

ಆತಾಂ ಆಲಿಯಾನ್ ಆಪ್ಲ್ಯಾ ಖಾಂದ್ಯಾರ್ ಚಡಯಿಲ್ಲ್ಯಾ ವ್ಯಾನಿಟಿ ಬ್ಯಾಗಾಕ್ ಕಾಡುನ್, ತ್ಯಾ ಬ್ಯಾಗಾಕ್ ತಾಣೆಂ ಥಂಯ್ಚ್ ಬೆಡ್ಡಾರ್ ಗಳಯ್ಲೆಂ. ಆಪ್ಲೊ ಘೊವ್ ತಾಚ್ಯಾ ಆವಯ್ ಬಾಪಾಯ್ಚಾ ಮರ್ಯಾದೆ ಖಾತಿರ್ ಆಪ್ಣಾಕ್ ಏರ್‍ಹೊಸ್ಟೆಸಾಚಾ ಕಾಮಾಕ್ ವಚಾನಾಶೆಂ ಆಡಾಯ್ತಾ ಮ್ಹಣೊನ್ ತೆಂ ಸಾರ್‍ಕೆಂ ಸಮ್ಜಾಲ್ಲೆಂ. ನಾಸಿರ್ ಆಪ್ಲ್ಯಾ ಜಿವಿತಾಚೊ ನಿರ್ಧಾರ್ ಖುದ್ದ್ ಘೆಂವ್ಕ್ ಸಕಾನಾತ್‌ಲ್ಲೊ ತೆಂ ತಾಚ್ಯಾ ವ್ಯಕ್ತಿತ್ವಾಚೆಂ ಉಣೆಂಪಣ್ ಶಿವಾಯ್ ಆಪ್ಣಾಚೆಂ ನ್ಹಯ್. ನಾಸಿರ್, ತಾಚ್ಯಾ ಜಿವಿತಾಚ್ಯಾ ಹರ್ಯೆಕಾ ನಿರ್ಧಾರಾಂತ್ ತಾಚ್ಯಾ ಕುಟ್ಮಾಚೊ ಮಹತ್ವ್ ಪಯ್ಲೊ ಮಾಂದುನ್ ಘೆತಾ ತೆಂ ತಾಚ್ಯಾ ಚಿಂತ್ಪಾಚೆಂ ಉಣೆಂಪಣ್ ಶಿವಾಯ್ ಆಪ್ಣಾಚೆಂ ನ್ಹಯ್. ಆಶೆಂ ಆಸ್ತಾನಾ ಆಪ್ಲ್ಯಾ ಘೊವಾ ಪರಿಂ ಹಾವೆಂಯ್ ಚಲೊಂಕ್ ಜಾಯ್ ಆನಿ ಮ್ಹಜ್ಯಾ ಸ್ವಖುಶೆ ವಿರೋಧ್ ಚಲೊಂಕ್ ಜಾಯ್ ಮ್ಹಳ್ಯಾರ್ ಕಶೆಂ ಸಾದ್ಯ್ ಜಾತೆಲೆಂ? ನಾಸಿರಾಕ್ ಜಾಲ್ಯಾರ್ ಜಿವಿತಾಂತ್ ಏಕ್ ಸಾರ್‍ಕೊ ನಿರ್ಧಾರ್ ಘೆಂವ್ಚಿ ಶಾಥಿ ನಾತ್‌ಲ್ಲಿ ಜಾಲ್ಲ್ಯಾನ್ ತಾಕಾ ತೆಂ ಸುಲಭ್. ಪುಣ್ ಮ್ಹಾಕಾ....?

"ಆಪ್ಣೆ ಘೆತ್‌ಲ್ಲ್ಯಾ ನಿರ್ಧಾರಾಕ್ ಮೊಡುನ್ ಹಾಂವ್ ಎಕ್ಸುರೆಂ ಹ್ಯಾ ಘರಾಂತ್ ......?" ಆಲಿಯಾ ಚಿಂತಾಲೆಂ. ಖಂಯ್ಚಾಯ್ ದಿಶೆನ್ ಚಿಂತ್ಲ್ಯಾರ್‍ಯ್ ಆಪುಣ್ ಆಪ್ಣಾಕ್ ಸಾರ್‍ಕಿಂ ಅಸಾಂ ತೆಂ ತಾಕಾ ಸ್ಪಶ್ಟ್ ಕಳ್ಳೆಂ.

"ಪಳೆ ನಾಸಿರ್....! ಮ್ಹಾಕಾ ಹ್ಯಾ ಘರಾಂತ್ ಎಕ್ಸುರೆಂ ರಾವೊಂಕ್ ಜಾಯ್ನಾ. ತುಜ್ಯಾ ಚಿಂತ್ನಾಂನಿ ಮ್ಹಜಿ ತಕ್ಲಿ ಪಿಶಿ ಜಾತಾ. ಕಾಲ್ಚೊ ದೀಸ್ ಕಸೊ ಕಾಡ್ಲೊ ತೊ ಹಾಂವ್‌ಚ್ ನೆಣಾಂ. ಹಾಂವ್ ಕಾಮ್ ಕರುನ್ ಹಾಂವ್ ಕೊಣಾಯ್ಕ್‌ಯ್ ಪೊಸಿನಾ ತೆಂ ಸಾರ್‍ಕೆಂ. ಪುಣ್ ಮ್ಹಜ್ಯಾ ಭಿತರ್‍ಲ್ಯಾ ಆಲಿಯಾಕ್ ಹಾವೆಂಚ್ ಪೊಸುಂಕ್ ಆಸಾ. ತಾಕಾ ಹಾವೆಂಚ್ ಮ್ಹಜ್ಯಾ ಹಾತಾಂನಿ ತೊಂಡಾಕ್ ದೀಂವ್ಕ್ ಆಸಾ. ನಾ ಜಾಲ್ಯಾರ್ ಮ್ಹಜ್ಯಾ, ಮ್ಹಜ್ಯಾಪಣಾಚಿ ಬೋಬ್ ಹಾಂವ್ ಆಯ್ಕೊಂಕ್ ಸಕ್ಚಿಂ ನಾ. ತುಕಾ ಹೆಂ ಸಮ್ಜಾನಾ ಕಿತ್ಯಾಕ್.....?" ಆಲಿಯಾ ವಿರಾರ್ ಜಾಲ್ಲ್ಯಾ ಪರಿಂ ಜಾಲೆಂ.

"ಬರೆಂ...! ಬರೆಂ ತರ್! ಆಮಿಂ ಏಕ್ ಕಾಮ್ ಕರಿಯಾಂ. ತುಂ ಮ್ಹಜ್ಯಾಚ್ ಆಫೀಸಾಂತ್ ಕಾಮ್ ಕರ್. ಕಾಂಯ್ ಪ್ರಾಬ್ಲೆಮ್ ನಾಂತ್!"

’ಸಟ್ಟ್’ ಕರುನ್ ನಾಸಿರಾನ್ ಆಪ್ಲಿ ಸಲಾಹಾ ಬದ್ಲಿತಾನಾ ಆಲಿಯಾನ್ ಏಕ್ ಪಾವ್ಟಿಂ ಆಪ್ಲ್ಯಾ ಘೊವಾಕ್‌ಚ್ ಪಳೆಲೆಂ.

ಕಶೆಂ ತರ್‍ಯ್, ಹ್ಯಾ ಘರ್‍ಚಿಂ ಹಾಂವ್ ಏರ್‍ಹೊಸ್ಟೆಸ್ ಜಾವ್ನ್ ವಿಮಾನಾರ್ ವೆಚೆಂ ಮಾಂದುನ್ ಘೆಂವ್ಕ್ ತಯಾರ್ ನಾಂತ್ ಮ್ಹಳ್ಳೆಂ ತೆಂ ತಾಕಾ ಕಳ್ಳೆಂ.

"ಹಾಂ ಆಲಿಯಾ! ತುಕಾ ಆಮ್ಚ್ಯಾಚ್ ಆಫೀಸಾಂತ್ ಹಾಂವ್....."

"ಕಿತೆಂ ಉಲಯ್ತಾಯ್ ತುಂ ನಾಸಿರ್? ತುಮ್ಚ್ಯಾ ಪ್ಯಾಮಿಲಿ ಬಿಜ್ನೆಸಾ ಮಧೆಂ ಹಾವೆಂ ಯೇಂವ್ಕ್ ಜಾತಾ? ಜರ್ ತರ್ ಹೆಂ ಬಿಜ್ನೆಸ್ ಫಕತ್ತ್ ತುಜೆಂ ಜಾಲ್ಲೆಂ ಜಾಲ್ಯಾರ್..... ಕಾಂಯ್....! ನಾ. ಮ್ಹಾಕಾ ಹೆಂ ಪಸಂದ್ ನಾ. ತುಜೆಂ ಬಿಜ್ನೆಸ್ ಫಕತ್ತ್ ತುಜೆಂ ಜಾತಾ ವರೇಗ್ ಹಾಂವ್ ತುಮ್ಚ್ಯಾ ಕುಟ್ಮಾ ಮಧೆಂ ಯೇಂವ್ಕ್ ತಯಾರ್ ನಾ. ಆನಿ ತುಜೆಂ ಬಿಜ್ನೆಸ್ ತುಜೆಂ ಜಾಲೆಂ ಜಾಲ್ಯಾರ್‍ಯ್ ಮ್ಹಾಕಾ ಹ್ಯಾ ಬಿಜ್ನೆಸಾಂತ್ ಕಾಂಯ್ ಇಂಟ್ರೆಸ್ಟ್ ನಾ! ಇತ್ಲ್ಯಾ ವೆಳಾರ್ ಥಾವ್ನ್ ಹಾಂವ್ ತುಕಾ ಸಮ್ಜಾಯ್ತಾನಾ ತುಕಾ ಸಮ್ಜಾನಾ ಕಿತ್ಯಾಕ್? ಮ್ಹಾಕಾ ಕಾಮ್ ಕರುಂಕ್ ಜಾಯ್ ಮ್ಹಳ್ಳ್ಯಾ ಇರಾದ್ಯಾ ಖಾತಿರ್ ಹಾಮ್ವ್ ಹೆಂ ಕಾಮ್ ಕರಿನಾ ನಾಸಿರ್. ಟ್ರೈ ಟು ಅಂಡರ್‍ಸ್ಟ್ಯಾಂಡ್ ಮಿ! ತುಂಚ್ ಮ್ಹಾಕಾ ಸಮ್ಜಾನಾಂಯ್ ಜಾಲ್ಯಾರ್......!?" ಆಲಿಯಾಚಾ ತಾಳ್ಯಾಂತ್ ಎಕಾ ಥರಾಚಿ ವಿನತಿ ಆಸ್‌ಲ್ಲಿ. ಹ್ಯಾ ವಿನತೆಂತ್ ಖಾಲ್ತೆಂಪಣ್ ನಾತ್‌ಲ್ಲೆಂ. ಪುಣ್ ಹ್ಯಾ ಏರ್‍ಹೊಸ್ಟೆಸಾಚಾ ಕಾಮಾ ಶಿವಾಯ್ ಆಪ್ಣಾಕ್ ದುಸ್ರೆಂ ಕಾಂಯ್ಚ್ ನಾ ಮ್ಹಳ್ಳ್ಯಾ ಭಾಶೆಚೆಂ ಚಿಂತಾಪ್ ಆಸ್‌ಲ್ಲೆಂ.

ತಿತ್ಲ್ಯಾರ್!

"ಬೇಟಾ ನಾಸಿರ್.....?"

ಆಪ್ಲ್ಯಾ ರೂಮಾಚಾ ದಾರಾ ಭಾಯ್ರ್ ಬಾಪಯ್ಚೊ ತಾಳೊ ಆಯ್ಕೊನ್ ದೊಗಾಂಯ್ನಿ ದಾರಾ ತೆವ್ಶಿಂ ನದರ್ ಘುಂವ್ಡಾಯ್ಲಿ.

"ಬೇಟಾ....! ಹ್ಯಾ ವಿಶಿಂ ಎಕ್‌ಚ್ ಪಾವ್ಟಿಂ ಅಚಾನಕ್ ನಿರ್ಧಾರ್ ಘೆಂವ್ಕ್ ಕೊಣಾಯ್ಕ್‌ಯ್ ತಿತ್ಲೆಂ ಸುಲಭ್ ನ್ಹಯ್. ಬಹೂ ಹ್ಯಾ ವಿಶಿಂ ಚಿಂತುನ್ ಪಳಂವ್ದಿ. ಬೋವ್ಶ್ಯಾ ಕಿತೆಂ ಬರೆಂ ಮ್ಹಳ್ಳೆಂ ತಾಚ್ಯಾ ಮತಿಕ್ ಖಂಡಿತ್ ಕಳ್ತೆಲೆಂ.....!" ನಾಸಿರಾಕ್ ತಾಚ್ಯಾ ಬಾಪಾಯ್ನ್ ಸಾಂಗ್ತಾನಾ ಆಲಿಯಾನ್ ತಾಚಿಂ ಉತ್ರಾಂ ಕಾನಾಂನಿ ಆಯ್ಕಾಲ್ಯಾರ್‍ಯ್ ತಿಂ ಕಾಂಯ್ ಮತಿಂತ್ ಜಿರಯ್ಲಿಂ ನಾಂತ್. ತಾಕಾ ತಾಚೆಂ ಮ್ಹಳ್ಳೆಂ ಏಕ್ ಸ್ವತಂತ್ರ್ ಆಸ್ಥಿತ್ವ್ ಸೊಡ್ಲ್ಯಾರ್ ದುಸ್ರೆಂ ಕಾಂಯ್ ತಾಚ್ಯಾ ದೊಳ್ಯಾಂಕ್ ದಿಸಾನಾತ್‌ಲ್ಲೆಂ. ತಾಚ್ಯಾ ಕಾನಾಂಕ್ ದುಸ್ರೆಂ ಕಾಂಯ್ ಆಯ್ಕಾನಾತ್‌ಲ್ಲೆಂ.

"ಅಬೂ.... ಆಜ್ ಹಾಂವ್ ಆಫೀಸಾಕ್ ಯೇನಾ. ತುಂ ಆಜ಼ಾದಾ ಸಂಗಿಂ ವಚ್!" ನಾಸಿರಾನ್ ಆಜ್ ಆಪ್ಲ್ಯಾ ಆಫೀಸಾಕ್ ವಚೊಂಕ್ ಇನ್ಕಾರ್ ಕೆಲೆಂ.

ಆಪ್ಲೊ ಪೂತ್ ಆಪ್ಣಾ ಆನಿ ಬಾಯ್ಲೆ ಮಧೆಂ ಉದೆಲ್ಲ್ಯಾ ವಾತಾವರಾಣಾಕ್ ನಿತ್ಳಾಂವ್ಕ್ ಸಕಾನಾ ತೆಂ ಕಳ್‌ಲ್ಲೊ ಸುಲೆಮಾನ್,

"ಬೇಟಾ....., ತುಂ ಕುಟ್ಮಾ ಜಿವಿತಾಂತ್ ನವೊ ಮ್ಹಳ್ಳ್ಯಾ ಖಾತಿರ್ ಮಾತ್ರ್ ತುಕಾ ಸಾಂಗ್ತಾಂ. ಬಿಜ್ನೆಸಾಕ್ ಆನಿ ಜಿವಿತಾಕ್ ಕೆದ್ನಾಂಯ್ ಎಕಾಮೆಕಾ ಲಾಗಿಂ ಹಾಡ್ಚೆಂ ನ್ಹಯ್. ಸಿಂತಿಮೆಂತಾಂ ಆನಿ ಬಿಜ್ನೆಸ್ ಕೆದ್ನಾಂಚ್ ಸಾಂಗಾತ್ ದೀಂವ್ಕ್ ಸಕಾನಾಂತ್. ದೆಕುನ್ ಘರ್‍ಚೊ ವಿಶಯ್ ಘರಾಚ್ ದವರ್. ಬಿಜ್ನೆಸಾಚೊ ವಿಶಯ್ ಬಿಜ್ನೆಸಾಂತ್ ದವರ್!"

ನಾಸಿರಾಕ್ ಬಾಪಾಯ್ನ್ ಉಪದೆಸ್ ದಿತಾನಾ ತಾಕಾ ಕಿತೆಂ ಕರ್‍ಚೆಂ ತೆಂ ಕಳೊಂಕ್ ನಾ. ತಾಚ್ಯಾ ಮತಿಕ್ ಕಾಂಯ್ಚ್ ಸಮ್ಜಾನಾತ್‌ಲ್ಲೆಂ. ಎಕಾ ಕುಶಿನ್ ಬಾಯ್ಲ್ ತರ್ ಎಕಾ ಕುಶಿನ್ ತಾಚೆಂ ಕುಟಾಮ್. ತಾಣೆಂ ಆತಾಂ ಏಕ್ ವಿಂಚವ್ಣ್ ಕರುಂಕ್ ಆಸ್‌ಲ್ಲಿ!

ಆಪ್ಲ್ಯಾ ಬಾಯ್ಲೆಚಿ ವಾ ಆಪ್ಲ್ಯಾ ಕುಟ್ಮಾಚಿ!

"ತರ್ ಕಿತೆಂ ಕರ್‍ತಾಯ್ ಆಲಿಯಾ....?" ನಾಸಿರಾನ್ ಮೌನ್ ಬಸ್ಲೆಲ್ಯಾ ಆಲಿಯಾಕ್ ಪಳೆಲೆಂ.

"ತುಂಚ್ ಸಾಂಗ್ ನಾಸಿರ್ ಹಾಂವ್ ಕಿತೆಂ ಕರುಂ? ಆಜ್ ಹಾಂವ್ ತುಜೆಂ ಬಾಯ್ಲ್ ಮ್ಹಳ್ಳ್ಯಾ ಎಕಾಚ್ ಕಾರಾಣಾಕ್ ಲಾಗೊನ್ ಹಾವೆಂ ಮ್ಹಜೆಂ ಸ್ವತಂತ್ರ್ಪಣ್ ಸೊಡುನ್ ದೀವ್ನ್ ತುಕಾ ಮ್ಹಜೆರ್ ಹಕ್ಕ್ ಚಲಂವ್ಕ್ ಆಪ್ಣಾಕ್‌ಚ್ ತುಜ್ಯಾ ಹಾತಿಂ ಹಾಂವ್ ಒಪ್ಸುನ್ ದೀಂವ್ ಯಾ ಮ್ಹಜ್ಯಾ ವಿಚಾರಾಂನಿ ಹಾಂವ್ ಅಚಲ್ ರಾವೊಂ.....?"

ಆಲಿಯಾಚಾ ಸವಾಲಾಕ್ ನಾಸಿರಾಚಾ ಜಿಬೆರ್ ಜವಾಬ್ ನಾತ್‌ಲ್ಲಿ.

"ತುಂ ಮ್ಹಜ್ಯೆಲಾಗಿಂ ನಿಖಾ ಜಾತಾನಾ ಜಾಣಾಂ ಆಸ್‌ಲ್ಲೊಯ್ ನಾಸಿರ್. ತ್ಯಾ ವೆಳಾರ್ ತುವೆಂ ಮ್ಹಜ್ಯೆಲಾಗಿಂ ಹ್ಯಾ ವಿಶಿಂ ಕಾಂಯ್ ಸಾಂಗೊಂಕ್ ನಾಂಯ್. ತರ್ ಆತಾಂ ಆಚಾನಕ್ ಕಿತೆಂ ಜಾಲೆಂ? ಮ್ಹಜ್ಯಾ ಮತಿಚ್ಯಾ ಖುಶೆ ಖಾತಿರ್ ಹಾವೆಂ ಮೆಡಿಕಲಾಚೆಂ ಶಿಕಾಪ್ ರಾವಯಿಲ್ಲೆಂ. ಜರ್ ತರ್ ಮ್ಹಜ್ಯಾ ಬಾಪಾಯ್ಚಾ ಖುಶೆ ಪರ್ಮಾಣೆ ಹಾಂವ್ ದಾಕ್ತೆರ್ ಜಾಲ್ಲಿಂ ಜಾಲ್ಯಾರ್ ಆಜ್ ತುಮಿ ಮ್ಹಾಕಾ ಆಡಾಯ್ತ್ಯಾತ್?"

ಆಲಿಯಾಚಾ ಸವಾಲಾಕ್ ನಾಸಿರಾ ಲಾಗಿಂ ಕಾಂಯ್ ಜವಾಬ್ ನಾತ್‌ಲ್ಲಿ.

"ಮ್ಹಜ್ಯಾ ಚಲಿಯೆಪಣಾಕ್ ಹಾಂವ್ ಕೊಣಾಯ್ ಮುಕಾರ್ ಬಾಗಾಂವ್ಕ್ ತಯಾರ್ ನಾತ್ಲೆಲ್ಯಾ ಕಾರಾಣಾಕ್ ಲಾಗೊನ್ ಆಜ್ ಹಾಂವ್ ವಿಮಾನಾಚೊ ಪೈಲೆಟ್ ಜಾಂವ್ಕ್ ಸಕೊಂಕ್ ನಾ. ಎಕಾದಾ ವೆಳಾರ್ ಹಾವೆಂ ಕ್ಯಾಪ್ಟನ್ ರಾಣಾ ಮುಕಾರ್ ಆಪ್ಲಿ ತಕ್ಲಿ ಬಾಗಾಯಿಲ್ಲಿ ಜಾಲ್ಯಾರ್ ಹಾಂವ್ ಆಜ್ ಪೈಲೆಟ್ ಜಾತಿಂ ಆನಿ ತುಮಿಂ ಮ್ಹಾಕಾ ಆಡಾಯ್ತ್ಯಾತ್?"

ಆಪ್ಲ್ಯಾ ಜಿಬೆಕ್ ಆರ್ ಮಾರ್‍ಲ್ಲ್ಯಾ ಭಾಶೆನ್ ನಾಸಿರ್ ಫಕತ್ತ್ ಆಲಿಯಾಕ್ ಆಯ್ಕಾತಾಲೊ ಮಾತ್ರ್.

"ಮ್ಹಜ್ಯಾ ಮತಿಕ್ ಜರ್ ತರ್ ಮ್ಹಜ್ಯಾ ಕಾಮಾ ಥಾವ್ನ್ ಖುಶಿ ಮೆಳ್ತಾ ತರ್ ತಿ ಖುಶಿ ಹಾವೆಂ ಕಿತ್ಯಾಕ್ ಆಪ್ಣಾಂವ್ಕ್ ನಜೊ?"

ಆಲಿಯಾಚಾ ಹ್ಯಾ ಸಕ್ತೆ ಭರಿತ್ ಸವಾಲಾಂಕ್ ನಾಸಿರಾ ಲಾಗಿಂ ಕಾಂಯ್ ಜವಾಬ್ ನಾತ್‌ಲ್ಲಿ. ಆಪ್ಣಾಚಿ ಬಾಯ್ಲ್ ಸ್ವಾಭಿಮಾನಾಚೆಂ ಚಲಿ ಮ್ಹಣೊನ್ ತೊ ಜಾಣಾಂ ಜಾಲ್ಲೊ. ಪುಣ್ ತಾಚ್ಯಾ ಸ್ವಾಭಿಮಾನಾ ಮಾರಿಫಾತ್ ಆಪ್ಲ್ಯಾ ಆವಯ್ ಬಾಪಾಯ್ಚಾ ಮರ್ಯಾದೆಕ್ ಉಣೆಂಪಣ್ ಜಾತಾ ತೆಂ ಚಿಂತಾನಾ ನಾಸಿರಾಕ್ ಮಾತ್ರ್ ಆಲಿಯಾಚ್ ಗುನ್ಯಾಂವ್‌ಕಾರ್ ಮ್ಹಳ್ಳ್ಯಾ ಪರಿಂ ದಿಸ್ತಾಲೆಂ.

ಹ್ಯಾ ವೆಳಾರ್ ಹ್ಯಾ ವಿಶಯಾಂತ್ ಕಾಂಯ್ಚ್ ನಿರ್ಧಾರ್ ಘೆಂವ್ಕ್ ಜಾಂವ್ಚೆಂ ನಾ ತೆಂ ಕಳೊನ್,

"ಆಲಿಯಾ...! ತುಂ ಏಕ್ ದೀಸ್ ಬರೆಂ ಕರುನ್ ಬಸೊನ್ ಚಿಂತುನ್ ಪಳೆ. ಆತಾಂ ತುಜ್ಯಾ ಮತಿಂತ್ ರಾಗ್‌ಯ್ ಆಸ್ತಲೊ. ಮತಿಕ್ ಚಿಕ್ಕೆ ಶಾಂತ್ ಕರುನ್ ಚಿಂತುನ್ ಪಳೆ. ಉಪ್ರಾಂತ್ ತುಜಿ ಖುಶಿ.....!"

ನಾಸಿರ್ ಆತಾಂ ಆಪ್ಲ್ಯಾ ಕುಡಾ ಥಾವ್ನ್ ಭಾಯ್ರ್ ವಚೊಂಕ್ ತಯಾರ್ ಜಾಲೊ. ಭಾಯ್ರ್ ವಚೊಂಕ್ ದೋನ್ ಮೆಟಾಂ ಕಾಡ್‌ಲ್ಲೊ ತೊ ಕಿತೆಂಗೀ ಚಿಂತುನ್ ರಾವ್‌ಲ್ಲೊ ಪಾಟಿಂ ಘುಂವೊನ್,

"ಪಳೆ ಆಲಿಯಾ...., ಎಕೇಕ್ ಪಾವ್ಟಿಂ ಜಿವಿತಾಂತ್ ಸಮ್ಜಣಿ ನಾಸ್ತಾಂ ಕಾಡ್ಲೆಲೆಂ ಎಕ್‌ಚ್ ಏಕ್ ಮೇಟ್ ಸಾಸ್ಣಾಚಾ ಸಾಸ್ಣಾಕ್ ಜೀವನ್ ಪರ್ಯಾಂತ್ ದುಖಾಚೆಂ ಜಾಂವ್ಕ್ ಪಾವ್ತಾ!" ನಾಸಿರ್ ಆತಾಂ ಆಪ್ಲ್ಯಾ ಕುಡಾ ಥಾವ್ನ್ ಭಾಯ್ರ್ ಗೆಲೊ.

ನಾಸಿರಾನ್ ಆಪ್ಲಿ ವಿಂಚವ್ಣ್ ಕೆಲ್ಲಿ!

ಆಪ್ಲ್ಯಾ ಬಾಯ್ಲೆ ಆನಿ ಆಪ್ಲ್ಯಾ ಕುಟ್ಮಾ ಮಧ್ಲ್ಯಾ ವಿಂಚವ್ಣೆಂತ್ ನಾಸಿರಾನ್ ಆಪ್ಲ್ಯಾ ಬಾಯ್ಲೆಕ್ ಸೊಡುನ್ ದಿಲೆಂ.

"ಹಾಂ ನಾಸಿರ್! ತುವೆಂ ಸಾಂಗ್ಚೆಂ ಸಾರ್‍ಕೆಂ! ಪುಣ್ ಎಕೇಕ್ ಪಾವ್ಟಿಂ ಜೊಕ್ತ್ಯಾ ವೆಳಾರ್ ಕಾಡುಂಕ್ ಜಾಯ್ ಜಾಲ್ಲೆಂ ಮೇಟ್ ಕಾಡಿನಾಸ್ತಾನಾ ಜಿಣಿಭರ್ ಆಪ್ಲ್ಯಾ ಆಪ್ಣಾ ಮುಕಾರ್ ತಕ್ಲಿ ಭಾಗಾವ್ನ್ ಚಲೊಂಕ್ ಪಡ್ತಾ! ಹಾಕಾ ಹಾಂವ್ ತಯಾರ್ ನಾ!"ಆಲಿಯಾ ಮತಿಂತ್‌ಚ್ ಉಲಯ್ಲೆಂ. ತಾಚಿಂ ಉತ್ರಾಂ ಕೊಣೆಂಯ್ ಆಯ್ಕೊಂಕ್ ಜಾಯ್ ಆನಿ ವ್ಹಾರಾವ್ನ್ ಪಳಂವ್ಕ್ ಜಾಯ್ ಮ್ಹಣೊನ್ ತೆಂ ಆಶೆನಾತ್‌ಲ್ಲೆಂ. ತಾಚ್ಯಾ ಆಶೆಚೆಂ ತಾಚ್ಯಾ ಖುಶೆಚೆಂ ಬರೆಂ ವಾಯ್ಟ್ ಸಗ್ಳೆಂ ತೆಂ ಜಾಣಾಂ ಆಸ್‌ಲ್ಲೆಂ.

ಜಿವಿತಾಂತ್ ಕಾಂಯ್ ಆಶಾ ಕೆಲ್ಲೆಂ ಚಲಿ ಆಲಿಯಾ ನ್ಹಯ್. ಆಶೆಚಾ ಜಲ್ಮಾಕ್ ಆನಿ ಮರ್ಣಾಕ್ ಮೂಳ್ ಕಾರಾಣ್ ಕಿತೆಂ ಮ್ಹಳ್ಳ್ಯಾ ವಿಶಿಂ ತೆಂ ಜವಾಬ್ ಸೊಧ್ತಾಲೆಂ ಶಿವಾಯ್ ಆಶೆಚೆಂ ಗುಲಾಮ್ ಜಾಂವ್ಕ್ ತೆಂ ತಯಾರ್ ನಾತ್‌ಲ್ಲೆಂ.

ತಾಚ್ಯಾ ಲ್ಹಾನ್‌ಪಣಾರ್ ತಾಣೆಂ ಪಳೆಲ್ಲ್ಯಾ ತ್ಯಾ ರಸ್ತ್ಯಾ ದೆಗೆಚ್ಯಾಜಿವಿತಾಕ್ ತೆಂ ವಿಸ್ರೊಂಕ್ ನಾತ್‌ಲ್ಲೆಂ.

"ಕಾಂಯ್ಚ್ ನಾತ್ಲಲೊ ತ್ಯಾ ರಸ್ತ್ಯಾ ದೆಗೆಚೊ ಲೋಕ್ ಇತ್ಲೊ ಖುಶ್ ಆಸಾ ಜಾಲ್ಯಾರ್ ಆಪ್ಲ್ಯಾ ಖುಶೆ ಖಾತಿರ್ ಇತ್ಲಿಂ ಸಪ್ಣಾಂ ಕಿತ್ಯಾಕ್?"

ಸಪ್ಣಾಂಕ್ ಪಳಂವ್ಚೆಂ ಆಲಿಯಾನ್ ಸೊಡ್‌ಲ್ಲೆಂ. ಪುಣ್ ಸಂಭಂಧಾನ್ ಜೊಡುನ್ ಘೆತ್‌ಲ್ಲ್ಯಾ ಘೊವಾಕ್ ತೆಂ ಸಮ್ಜಾಯ್ತೆಲೆಂ ಕಶೆಂ? ಘೊವಾಚಿ ತಾಕಾ ಗರ್ಜ್ ಆಸ್‌ಲ್ಲಿ. ಆನಿ ಘೊವಾಕ್ ತಾಚಿ. ಘೊವ್ ಆನಿ ಬಾಯ್ಲ್ ದೊಗಾಂಯ್ ಎಕಾಮೆಕಾಕ್ ಖುಶಿ ದೀಂವ್ಕ್ ನಿಖಾ ಕರುನ್ ಘೆತಾತ್ ಶಿವಾಯ್ ಎಕಾಮೆಕಾಚಾ ಖುಶಿಯೆಕ್ ದೆಸ್ವಾಟಾಂವ್ಕ್ ನ್ಹಯ್. ಪರಸ್ಪರ್ ಎಕಾಮೆಕಾಚ್ಯಾ ಖುಶಿಯೆಂತ್ ಜರ್ ತರ್ ಸಂತೊಸ್ ನಿಖಾ ಜಾಲ್ಲ್ಯಾ ಜಿಣ್ಯೆಂತ್ಲೆಂ ಖಂಯ್ಚೆಯ್ ಜೊಡೆಂ ಜೊಡುನ್ ದೀಂವ್ಕ್ ಆನಿ ಘೆಂವ್ಕ್ ಸಲ್ವಾತ್ ಜಾಲ್ಯಾರ್ ತೆಂ ಖಂಡಿತ್ ಖರೆಂ ನಿಖಾ ಜಾಲ್ಲೆಂ ಜೊಡೆಂ ನ್ಹಯ್ ಮ್ಹಣೊನ್ ಆಲಿಯಾ ಪಾತ್ಯೆತಾಲೆಂ.

ಆಪ್ಲ್ಯಾ ಬಾಪಾಯ್ಚಾ ಘರಾ ಆಪ್ಲ್ಯಾ ವಿಚಾರಾಂಕ್ ಆಪ್ಲ್ಯಾ ಹಟ್ಟಾನ್ ಜೀಕ್ ತೆಂ ದಾಖಯ್ತಾಲೆಂ ಆಸ್ತಾಂ ಘೊವಾಚ್ಯಾ ಘರಾ ತೆಂ ತಾಚೆಂ ಸಂಯ್ಬಿಕ್ ಹಟ್ಟ್ ಕಿತ್ಲೆಂ ತಾಕಾ ಸಾಂಗಾತ್ ದೀಂವ್ಕ್ ಪಾವ್ತೆಲೆಂ ಮ್ಹಳ್ಳೆಂ ಖುದ್ದ್ ಆಲಿಯಾಚ್ ನೆಣಾಂ ಆಸ್‌ಲ್ಲೆಂ.

ಆಶೆಂ ಮ್ಹಣೊನ್ ಅಲಿಯಾ ಭಿವ್ಕುರೆಂ ಚೆಡುಂ ಭಿಲ್ಕುಲ್ ನ್ಹಯ್. ಜಿವಿತಾಚ್ಯಾ ಖಂಯ್ಚಾಯ್ ಪಾಂವ್ಡ್ಯಾರ್ ಧಯ್ರಾಕ್ ಸಾಂಬಾಳುನ್ ವರ್ಚಿ ಶಾಥಿ ತಾಕಾ ಆಸ್‌ಲ್ಲಿ. ತೆಂ ಧಯ್ರಾನ್ ಆಪ್ಲೆಂ ಸೈರಣ್ ಸಾಂಡುಂಕ್ ಸಕಾತ್ ಪುಣ್ ಭಿಯೆವ್ನ್ ಆಪ್ಲೆಂ ಸೈರಣ್ ಸಾಂಡ್ಚೆಂ ತಸಲೆಂ ನ್ಹಯ್.

ಎದೊಳ್ ವರೇಗ್ ಆಲಿಯಾಚಾ ಜಿವಿತಾಂತ್ ಸಭಾರ್ ಬದ್ಲಾವಣ್ ಹಾಡುಂಕ್ ಪಾವ್‌ಲ್ಲೊ ತಾಚೊ ಸ್ವಭಾವ್ ಹ್ಯಾ ತಾಚ್ಯಾ ಆತಾಂಚಾ ಪ್ರಸ್ತುತ್ ಸಂಭಂಧಾಂತ್ ಕಸಲೆಂ ಬದಾವಣ್ ಹಾಡುಂಕ್ ಪಾವಾತ್ ಮ್ಹಳ್ಳ್ಯಾ ವಿಶಿಂ ತಾಕಾ ಖಂತ್ ನಾತ್‌ಲ್ಲಿ. ಜಿವಿತಾಂತ್ ಕಸಲಿ ಘಡಿ ಆಯ್ಲ್ಯಾರ್‍ಯ್ ಆಪುಣ್ ತ್ಯಾ ಘಡಿಯೆಕ್ ಫುಡ್ ಕರುನ್ ರಾವ್ತೆಲಿಂ ಮ್ಹಳ್ಳೊ ಭರ್ವಸೊ ಆಲಿಯಾಕ್ ಆಸ್‌ಲ್ಲೊ.

ಹ್ಯಾಚ್ ಭರ್ವಸ್ಯಾಚಾ ಭಳಾನ್ ಆಜ್ ಆಲಿಯಾನ್ ಮತಿಂತ್ ಏಕ್ ನಿರ್ಧಾರ್ ಕೆಲ್ಲೊ. ಆಪ್ಲ್ಯಾ ನಿರ್ಧಾರಾಕ್ ಕೊಣಾಯ್ಚಿ ಸಲಹಾ ಗರ್ಜ್ ಆಸಾ ಮ್ಹಣೊನ್ ತಾಕಾ ಭೊಗ್ಲೆಂ ನಾ. ಹ್ಯಾಚ್ ಖಾತಿರ್ ಆಜ್ ಆಪ್ಣಾ ಮುಕಾರ್ ಉಭೆಂ ಜಾಲ್ಲ್ಯಾ ಹ್ಯಾ ಸಂಕಶ್ಟಾಚಾ ಘಡಿಯೆಕ್‌ಯ್ ಆಪ್ಲ್ಯಾ ಮಧೆಂಚ್ ತೀರ್ಮಾನ್ ಕರುಂಕ್ ತಾಣೆಂ ಚಿಂತ್ಲೆಂ. ಆಪ್ಲ್ಯಾ ಘರ್‍ಚ್ಯಾಂಕ್‌ಯ್ ಆಲಿಯಾನ್ ಹ್ಯಾ ವಿಶಿಂ ಕಾಂಯ್ಚ್ ಖಬಾರ್ ದಿಲ್ಲಿ ನಾ.

"ಆಪ್ಣಾಚೆಂ ನಿಖಾ ಜಾಲ್ಲ್ಯಾ ದಿಸಾ ಥಾವ್ನ್ ಆಪ್ಣಾಚೊ ಆನಿ ಆಪ್ಲ್ಯಾ ಘರ್‍ಚ್ಯಾಂಚೊ ತೊ ಪಯ್ಲೆಂಚೊ ಸಂಭಂಧ್ ತುಟ್ಲಾ. ಆತಾಂ ಹಾಂವ್ ಘೊವಾಕ್ ತಾಚಿಂ ಆಪ್ಲಿಂ ಆನಿ ಮ್ಹಜ್ಯಾ ಘರ್‍ಚ್ಯಾಂಕ್ ಪರ್‍ಕಿ ಜಾಲ್ಯಾಂ. ತಶೆಂ ಪಳಂವ್ಕ್ ಗೆಲ್ಯಾರ್ ಆತಾಂ ಹಾಂವ್ ಪಯ್ಲೆಂಚ್ಯಾಕ್‌ಯ್ ಚಡ್ ಸ್ವತಂತ್ರ್ ಜಾಲ್ಯಾ.....!"

ಆಲಿಯಾಚಿಂ ಚಿಂತ್ನಾಂ ತಾಕಾಚ್, ತೆಂಚ್ ಸಾರ್‍ಕೆಂ ಮ್ಹಳ್ಳ್ಯಾ ವಿಶಿಂ ರುಜ್ವಾತ್ ದೀಂವ್ಕ್ ಲಾಗ್ಲಿಂ. ತಾಚ್ಯಾ ಮತಿಚೆಂ ಆನಿ ತಾಚ್ಯಾ ಕಾಳ್ಜಾಚೆಂ ತಾಣೆಂ ಆಯ್ಕಾಲೆಂ ಆನಿ ತೆಂ ಉಟ್ಲೆಂ.

ಆಪ್ಲ್ಯಾ ಬೆಡ್‌ರೂಮಾ ಥಾವ್ನ್ ಭಾಯ್ರ್ ಯೆತಾನಾ ಘರ್‍ಚಾ ಸಾಲಾಂತ್ ತಾಚಿ ಸಾಸುಮಾಂಯ್ ನಾಸಿರಾಚಿ ಆವಯ್ ಮಾತ್ರ್ ಬಸೊನ್ ಆಸ್‌ಲ್ಲಿ ಶಿವಾಯ್ ಉರ್‍ಲೆಲಿಂ ಸಗ್ಳಿಂ ಕೋಣ್ ತಾಂಚಾ ಬಿಜ್ನೆಸಾಚಾ ವಹಿವಾಟಾ ಖಾತಿರ್ ತಾಂಚಾ ಆಫೀಸಾಕ್ ಗೆಲ್ಲಿಂ ತರ್ ಕೋಣ್ ತಾಂಚಾ ಶಿಕ್ಪಾಚಾ ವಾಟೆರ್ ಚಮ್ಕಾಲ್ಲಿಂ.

ಆಲಿಯಾನ್‌ಯ್ ಆಜ್ ಆಪ್ಲ್ಯಾ ವಾಟೆರ್ ಚಲೊಂಕ್ ಆಸ್‌ಲ್ಲೆಂ. ಹ್ಯಾ ಖಾತಿರ್ ತೆಂ ತಯಾರ್ ಜಾಲೆಂ.

"ಅಮ್ಮೀ ಜಾನ್...!" ಸಾಲಾಂತ್ ಬಸೊನ್ ಆಸ್‌ಲ್ಲ್ಯಾ ಸಾಸುಮಾಂಯ್ಕ್ ಆಲಿಯಾನ್ ಆಪಯ್ತಾನಾ ತಿ ಆಲಿಯಾಚಾ ಕುಶಿನ್ ಘುಂವ್ಲಿ.

"ಹಾಂವ್ ಜಾಣಾಂ......! ಮ್ಹಜ್ಯಾ ಹ್ಯಾ ನಿರ್ಧಾರಾನ್ ತುಮ್ಕಾಂ ದೂಖ್ ಭೊಗ್ತೆಲೆಂ. ಬೋವ್ಶಾ ತುಮ್ಕಾಂ ತುಮ್ಚೆಂ ಹೆಂ ಲ್ಹಾನ್‌ಪಣ್ ಮ್ಹಳ್ಳ್ಯಾಪರಿಂ ಜಾತೆಲೆಂ. ಪುಣ್ ಹಾಂವ್ ಹ್ಯಾ ಘರಾಚಿ ಸುನ್ ಜಾವ್ನ್ ಇತ್ಲೆಂ ಖಂಡಿತ್ ಜಾಣಾಂ ಕೀ ಮ್ಹಜ್ಯಾ ಹ್ಯಾ ನಿರ್ಧಾರಾ ವರ್ವಿಂ ಸಮಾಜೆಂತ್ ತುಮಿಂ ಲ್ಹಾನ್ ಜಾಂವ್ಚಿಂ ನಾಂತ್. ಹ್ಯಾ ಖಾತಿರ್ ಹಾಂವ್ ಆತಾಂ ಭಾಯ್ರ್ ಸರ್‍ಲ್ಯಾಂ. ತುಮ್ಕಾಂ ತುಮ್ಚ್ಯಾ ಸಮಾಜೆಚೊ ಹುಸ್ಕೊ ಆಸಾ. ಪುಣ್ ಮ್ಹಾಕಾ ಮ್ಹಜೊ ಹುಸ್ಕೊ ಆಸಾ. ಹಾಂವ್ ಮ್ಹಾಕಾಚ್ ಖುಶ್ ದವರುಂಕ್ ಪ್ರಯತ್ನ್ ಕರ್‍ತಾಂ ತರ್ ತುಮಿ ತುಮ್ಚ್ಯಾ ಸಮಾಜೆಕ್ ಖುಶ್ ಕರುಂಕ್ ಪ್ರಯತ್ನ್ ಕರ್‍ತಾತ್. ಸಮಾಜೆಕ್ ಖುಶ್ ಕರ್‍ಚ್ಯಾ ಪಯ್ಲೆಂ ಖುದ್ದ್ ಆಪ್ಣೆಂ ಖುಶ್ ಆಸೊಂಕ್ ಜಾಯ್. ನಾ ತರ್.....? ಮ್ಹಜೊ ಆನಿ ತುಮ್ಚೊ ವಿಚಾರ್ ವಿಂಗಡ್. ಬೋವ್ಶಾ ಹ್ಯಾಚ್ ಖಾತಿರ್ ಆಮ್ಚಿ ವಾಟ್‌ಯ್ ವಿಂಗಡ್ ಜಾಂವ್ಕ್ ಸಕಾತ್. ದೆಕುನ್ ಹಾವೆಂ ಮ್ಹಜ್ಯಾ ಖುಶೆಚ್ಯಾ ಕಾಮಾಕ್ ವೆಚೊ ನಿರ್ಧಾರ್ ಕೆಲಾ!"

ಆಲಿಯಾ ಆಪ್ಲ್ಯಾ ಸಾಸು ಮಾಂಯ್ಕ್ ಸಾಂಗ್ತಾನಾ ತಿ ಕಾಂಯ್ಚ್ ಉಲಯ್ಲಿ ನಾ. ತಿಚ್ಯೆಲಾಗಿಂ ಉಲಂವ್ಕ್‌ಯ್ ಕಾಂಯ್ ನಾತ್‌ಲ್ಲೆಂ. ಎಕಾ ವಾಟೆನ್ ಆಲಿಯಾ ಸಾರ್‍ಕೆಂ ಆಸ್‌ಲ್ಲೆಂ. ಆಲಿಯಾ ವಯ್ರ್ ತಾಚ್ಯಾ ನೊವ್ರ್ಯಾಚಾ ಘರ್‍ಚ್ಯಾಂನಿ ದಬಾವ್ ಘಾಲ್ಚೆಂ ಪ್ರಯತ್ನ್ ಕೆಲ್ಲೆಂ ಶಿವಾಯ್ ಆಲಿಯಾನ್ ತಾಚ್ಯಾ ಘರ್‍ಚ್ಯಾಂಚಾ ಮರ್ಯಾದಿ ವಯ್ರ್ ಕಾಳೆಂ ಮೋಡ್ ವೊಡ್ಚೆಂ ಪ್ರಯತ್ನ್ ಕರುಂಕ್ ನಾತ್‌ಲ್ಲೆಂ.

ಆಪ್ಲ್ಯಾ ಮತಿಚ್ಯಾ ಖುಶೆ ಪರ್ಮಾಣೆಂ ಆಪ್ಲ್ಯಾ ಮಾಂಯ್ ಮಾಂವ್ ಆನಿ ಘೊವಾಚಾ ಖುಶೆ ವಿರುದ್ದ್ ಆಲಿಯಾ ಆಜ್ ಆಪ್ಲ್ಯಾ ಏರ್‍ಹೊಸ್ಟೆಸಾಚಾ ಕಾಮಾಕ್ ಭಾಯ್ರ್ ಸರ್‍ಲೆಂ.

"ಹಾಂವ್ ವೆತಾಂ ಅಮ್ಮೀಜಾನ್!"

ಆಲಿಯಾ ಆಪ್ಲ್ಯಾ ನೊವ್ರ್ಯಾಚಾ ಘರಾಚಿಂ ಮೆಟಾಂ ದೆಂವೊಕ್ ಲಾಗ್ಲೆಂ. ತೆಂ ಆಜ್ ಪರ್ತ್ಯಾಕ್ ತ್ಯಾ ಮೊಳಾಬಾರ್ ಉಭೊಂಕ್ ತಯಾರ್ ಜಾಲ್ಲೆಂ.

ಸಂಪೂರ್ಣ್ ಸ್ವತಂತ್ರ್ಪಣಿ!

************

ಆಲಿಯಾ ಆತಾಂ ಸದಾಂ ಪ್ಲೈಟಾರ್ ವೆತಾಲೆಂ. ತಾಚ್ಯಾ ಮತಿಕ್ ಸಮಾಧಾನ್ ದಿಂವ್ಚ್ಯಾ ಕಾಮಾಂತ್ ತೆಂ ಖುಶ್ ಆಸ್‌ಲ್ಲೆಂ. ಪುಣ್ ತಾಚಿ ಖುಶಿ ಕಿತ್ಯಾಕ್‌ಗೀ ತಾಕಾಚ್ ದುರ್‍ಸುಭಾಣಾಚಾ ತ್ಯಾ ತೀಕ್ಷ್ಣ್ ಭಾಣಾ ಪರಿಂ ತಾಚ್ಯಾ ವಿರುದ್ಧ್ ಘುಂವೊನ್ ರಾವ್‌ಲ್ಲಿ.

ಆಲಿಯಾಚಾ ನಿರ್ಧಾರಾ ಥಾವ್ನ್ ತಾಚ್ಯಾ ಘರ್‍ಚಿಂ ಕೊಣ್‌ಯ್ ಖುಶಿ ನಾತ್‌ಲ್ಲಿಂ. ನಿಖಾ ಜಾವ್ನ್ ಪುರ್‍ತ್ಯಾ ತೀನ್ ಮಹಿನ್ಯಾಂನಿಚ್ ಆಲಿಯಾಚಾ ವಿಶಿಂ ತಾಚ್ಯಾ ಘೊವಾಚ್ಯಾ ಕುಟ್ಮಾಂಚ್ಯಾಂಚಿ ಅಭಿಪ್ರಾಯ್ ಬದ್ಲುನ್ ಆಯ್ಲಿ. ಸುಲೇಮಾನ್, ಆಲಿಯಾಚೊ ಮಾಂವ್ ಆಪ್ಲ್ಯಾ ಚಿಂತ್ಪಾ ಸಕ್ತೆಂತ್ ಜಾಂವ್ ಯಾ ಪ್ರಸ್ತುತ್ ಸಮಾಜೆಚಾ ವಿಚಾರಾಂ ಥಂಯ್ ಜಾಂವ್ ಸುಡಾಳ್ ಆಸ್‌ಲ್ಲ್ಯಾನ್ ತಾಣೆಂ ಆಲಿಯಾಕ್ ಸಮ್ಜೊಂಚೆಂ ಮಸ್ತ್ ಪ್ರಯತ್ನ್ ಕೆಲೆಂ. ಪುಣ್ ಖಂಯ್ಚೆಂಯ್ ತಾಚೆಂ ಪ್ರಯತ್ನ್ ಫಳಾಧೀಕ್ ಜಾಲೆಂ ನಾ. ಕಾರಾಣ್ ತೊ ಆಪ್ಲ್ಯಾ ವಿಶಿಂ ಚಿಂತಾಲೊ ಶಿವಾಯ್ ಆಲಿಯಾಚಾ ಜಾಗ್ಯಾರ್ ರಾವೊನ್ ಚಿಂತ್ಚ್ಯಾಂತ್ ಸಲ್ವಾಲ್ಲೊ.

ನಾಸಿರ್, ಆಪ್ಲ್ಯಾ ಬಾಯ್ಲೆಚಾ ನಿರ್ಧಾರಾ ಮುಕಾರ್ ಅಸಹಾಯಕ್ ಜಾಲ್ಲೊ. ತಾಚ್ಯಾ ಕುಟ್ಮಾಚಾ ಸಾಂದ್ಯಾಂ ಮುಕಾರ್ ಆತಾಂ ತಾಕಾಚ್ ಎಕಾ ಥರಾಚೆಂ ಲ್ಹಾನ್‌ಪಣ್ ಭಗ್ತಾಲೆಂ. ತಾಣೆಂ ಜಿಯೆಂವ್ಚ್ಯಾ ಘರಾಂತ್ ಚಲಿಯೆಕ್ ಏಕ್ ಪ್ರತ್ಯೇಕ್ ಸ್ಥಾನ್ ಆಸ್‌ಲ್ಲೊ. ತ್ಯಾ ಸ್ಥಾನಾ ಭೊಂವಾರಿ ಏಕ್ ಮರ್ಯಾದಿಚಿ ವೋಂಯ್ ಆಸ್‌ಲ್ಲಿ. ತ್ಯಾ ವೋಂಯ್ ಭಿತರ್ ಚಲಿ ಆನಿ ತಿಚೆಂ ಘರಾಣೆಂ ದೋನ್‌ಯ್ ಸುರಕ್ಶಿತ್ ಮ್ಹಳ್ಳಿ ಪಾತ್ಯೆಣಿ ನಾಸಿರಾಚಾ ಆವಯ್ ಬಾಪಾಯ್ಕ್ ಆಸ್‌ಲ್ಲಿ. ಪುಣ್ ಆಲಿಯಾ ಆಜ್ ತಿ ವೋಂಯ್ ಉಡ್‌ಲ್ಲೆಂ. ಆಪ್ಲ್ಯಾಚ್ ಆಶೆ ಆನಿ ಖುಶೆ ಖಾತಿರ್ ಆಲಿಯಾನ್ ಆಪ್ಲ್ಯಾಚ್ ಸಂಭಂಧಾಂ ಮುಕಾರ್ ಆಪ್ಣಾಕ್‌ಚ್ ವರ್ತೆಂ ಮ್ಹಣೊನ್ ದಾಖಯಿಲ್ಲೆಂ.

ಆಲಿಯಾಚ್ಯಾ ಬದ್ಲಾನಾತ್‌ಲ್ಲ್ಯಾ ಇರಾದ್ಯಾ ವರ್ವಿಂ ತ್ಯಾ ಇರಾದ್ಯಾಂಚೊ ಪ್ರಭಾವ್ ಸವ್ಕಾಸ್ ತಾಚ್ಯಾ ಖಾಸ್ಗಿ ಜಿವಿತಾಂತ್ ದಿಸೊನ್ ಯೇಂವ್ಕ್ ಲಾಗ್ಲೊ. ಆಪ್ಣೆಂ ಕಾಮಾಕ್ ಭಾಯ್ರ್ ಸರ್‍ಲ್ಲ್ಯಾ ಪಯ್ಲ್ಯಾ ದಿಸಾ, ಸಾಂಜೆರ್ ಆಲಿಯಾ ಆಪ್ಲ್ಯಾ ಕಾಮಾ ಥಾವ್ನ್ ಪಾಟಿಂ ಘರಾ ಆಯಿಲ್ಲ್ಯಾ ವೆಳಾರ್, ಹ್ಯಾಚ್ ತಾಚ್ಯಾ ಕಾಮಾಕ್ ವೆಚ್ಯಾ ತಾಚ್ಯಾ ನಿರ್ಧಾರಾಕ್ ಲಾಗೊನ್ ತಾಕಾ ಆನಿ ತಾಚ್ಯಾ ಘೊವಾಕ್ ಸಾದಾರ್ಣಾಚೆಂ ಝಗ್ಡೆಂಚ್ ಜಾಲ್ಲೆಂ. ತಾಂಚಾ ಝಗ್ಡ್ಯಾ ಮಧೆಂ ನಾಸಿರಾಚೊ ಬಾಪಯ್ ಮಧೆಂ ಆಯಿಲ್ಲ್ಯಾನ್ ಘರಾಂತ್ ವಾತಾವರಣ್ ಶಾಂತ್ ಜಾಲೆಂ ತರ್‍ಯ್ ಆಲಿಯಾಚಾ ಮತಿಕ್ ಶಾಂತಿ ಮೆಳೊಂಕ್ ನಾ. ಕಾರಾಣ್, ಆಲಿಯಾಚಾ ನಿಖಾ ಜಾಲ್ಲ್ಯಾ ಜಿವಿತಾಂತ್ಲಿ ಹಿ ಪಯ್ಲಿ ರಾತ್, ಜ್ಯಾ ರಾತಿಂ ಆಲಿಯಾ ಸವೆಂ ಝಗ್ಡೆಂ ಕೆಲ್ಲೊ ನಾಸಿರ್, ಆಪ್ಲ್ಯಾ ಬಾಯ್ಲೆ ಆಲಿಯಾಕ್ ಎಕ್ಲ್ಯಾಕ್‌ಚ್ ಆಪ್ಲ್ಯಾ ಖಾಟಿಯೆರ್ ಸೊಡುನ್ ಪಯ್ಸ್ ಧರ್ಣಿರ್ ನಿದ್‌ಲ್ಲೊ.

ಹ್ಯಾ ರಾತಿಂ ಆಲಿಯಾಕ್ ನೀದ್ ಪಡೊಂಕ್ ನಾ. ವೆಳಾಚೊ ಕಾಂಟೊ ಜಶೆಂ ಧಾಂವ್ತಾ ತಶೆಂ ತಾಕಾ ತಾಚ್ಯಾ ಜಿವಿತಾಚ್ಯೊ ಸರ್‍ಲೆಲ್ಯೊ ಘಡಿಯೊ ಉಡಾಸ್ ಯೇಂವ್ಕ್ ಲಾಗ್ಲ್ಯೊ.

ಎಕಾ ಪಾಟ್ಲ್ಯಾನ್ ಏಕ್!

ಧರ್‍ತೆಚ್ಯಾ ಬಂಜರ್‍ಪಣಾ ಥಾವ್ನ್ ಮೊಳಾಬಾಚಾ ಎಕ್ಸುರ್‍ಪಣಾ ವರೇಗ್!!

ಜಿವಿತಾನ್ ದಾಖವ್ನ್ ದಿಲ್ಲ್ಯಾ ಕೊಡು ಸತಾಂ ಥಾವ್ನ್ ಆಪ್ಣೆ ಪಿಯೆಂವ್ಕ್ ಆಸ್ಚ್ಯಾ ಆಂಬೊಟ್ ಶಿರ್ಕ್ಯಾ ಪಾಸೊನ್!!!

ಹ್ಯಾ ರಾತಿಂ ಆಲಿಯಾಕ್ ತಾಚ್ಯಾ ಘೊವಾನ್ ಸಾಂಡ್‌ಲ್ಲ್ಯಾ ಪರಿಂ ನಿದೆನ್‌ಯ್ ತಾಕಾ ಸಾಂಡ್‌ಲ್ಲೆಂ. ನಿಖಾ ಜಾಲ್ಲ್ಯಾ ಜಿವಿತಾಚ್ಯಾ ವಾಟೆರ್ ಪಯ್ಲೆ ಪಾವ್ಟಿಂ ತಾಕಾ ಅಪುಣ್ ಎಕ್ಸುರಿಂ ಮ್ಹಳ್ಳ್ಯಾ ಪರಿಂ ಭಗ್ಲೆಂ. ತಾಚ್ಯಾ ಮತಿಚೆಂ ಸ್ಥಿಮಿತ್ ಇತ್ಲೆಂ ಪ್ರಭಲ್ ಆಸ್‌ಲ್ಲೆಂ ಕೀ ಆಪ್ಲ್ಯಾ ಘೊವಾಕ್ ರಾಜಿ ಕರಂವ್ಕ್ ತಾಚೆಂ ಮನ್ ಒಪ್ವಾಲೆಂ ನಾ. ಖಾಟಿಯೆ ವಯ್ರ್ ನೀದ್ ಯೇನಾಸ್ತಾನಾ ಹೆವ್ಶಿಂ ತೆವ್ಶಿಂ ಕೂಸ್ ಬದ್ಲುಂಚಾ ಆಲಿಯಾಚಾ ದೊಳ್ಯಾಂ ಮುಕಾರ್ ತಾಚ್ಯಾ ಜಿವಿತಾಚ್ಯೊ ಎಕೇಕ್‌ಚ್ ರಾತಿ ಪಾಶಾರ್ ಜಾವ್ನ್ ಗೆಲ್ಯೊ. ನಿದೆ ವಿಣೆ ಪಾಶಾರ್ ಜಾವ್ನ್ ಗೆಲ್ಲ್ಯಾ ಹ್ಯಾ ರಾತಿಂನಿ ತಾಂಚಾ ಆಸ್ಥಿತ್ವಾಚಿಂ ಖುಣಾಂ ಆಲಿಯಾಚಾ ಮತಿಂತ್ ಸೊಡುನ್ ವೆತಾನಾ ತೆಂ ಪಯ್ಲೆಂಚಾ ಪ್ರಾಸ್ ಚಡ್ ಮತಿಚಾ ಸಂತುಲನಾಂತ್ ಪ್ರಭಲ್ ಜಾಲೆಂ ಶಿವಾಯ್ ಜಿವಿತಾಕ್ ಚಿಂತುನ್ ರಡ್ಚೆಂ ಅಭಲ್ ಜಾಲೆಂ ನಾ.

ಹ್ಯಾ ರಾತಿಂ ಥಾವ್ನ್, ಆಪ್ಲ್ಯಾ ಘರ್‍ಚ್ಯಾಂ ಖಾತಿರ್ ಆಪ್ಣಾಕ್ ಸೊಡುನ್ ಪಯ್ಸ್ ಗೆಲ್ಲ್ಯಾ ನಾಸಿರಾಚಾ ಲಾಗಿಂ ಯೆಂವ್ಚೆಂ ಪ್ರಯತ್ನ್ ಉದೆವ್ನ್ ಆಯಿಲ್ಲ್ಯಾ ದುಸ್ರ್ಯಾ ರಾತಿಂನಿ ಆಲಿಯಾನ್ ಕೆಲೆಂ ನಾ. ಹ್ಯಾ ಮಧೆಂ ಆಲಿಯಾಚಾ ಬದ್ಲಾಲ್ಲ್ಯಾ ಭರ್‍ತಾವಾ ವಿಶಿಂ ನಾಸಿರಾನ್ ಆಪ್ಲ್ಯಾ ಮಾಂಯ್ ಮಾಂವಾಂಕ್ ಖಬಾರ್ ದಿಲಿ.

"ಹ್ಯಾಚ್ಚ್ ವಿಶಯಾ ವಯ್ರ್ ಮ್ಹಾಕಾ ಭ್ಯೆಂ ಆಸ್‌ಲ್ಲೆಂ!"

ಆಪ್ಲ್ಯಾ ಧುವೆಚೊ ವಿಶಯ್ ಆಯ್ಕೊನ್ ಕಂಗಾಲ್ ಜಾಲ್ಲಿ ಸಾರಾ, ಆಲಿಯಾಚಿ ಆವಯ್ ಖಂತಿನ್ ಬುಡೊನ್ ಗೆಲಿ.

"ಸಗ್ಳೆಂ ಜಾಲೆಂ ತುಜ್ಯೆ ಥಾವ್ನ್! ಲ್ಹಾನ್ ಥಾವ್ನ್ ತುವೆಂ ದಿಲ್ಲ್ಯಾ ಸಳ್ಗೆನ್ ಆಜ್ ತೆಂ ಆಶೆಂ ಜಾಂವ್ಕ್ ಕಾರಾಣ್! ಚೆಡ್ವಾಕ್ ಆನಿಕ್‌ಯ್ ಬೂದ್ ಯೇನಾ ಮ್ಹಳ್ಯಾರ್.....!?" ತಿ ಆಪ್ಲ್ಯಾ ಘೊವಾ ವಯ್ರ್ ರಾಗಾನ್ ಶಿಣ್ಲಿ. ಆಪ್ಲ್ಯಾ ಘೊವಾಕ್‌ಚ್ ತಿಣೆಂ ಆಲಿಯಾಚಾ ಹ್ಯಾ ವರ್ತನಾಕ್ ಕಾರಾಣ್ ಜಾವ್ನ್ ಘೆತ್ಲೆಂ.

ಆಲಿಯಾ ಲ್ಹಾನ್ ನೆಣ್ತೆಂ ಭುರ್ಗೆಂ ಆಸ್ತಾನಾ ಜಾಲ್ಯಾರ್‍ಯ್ ಆಶೆಂಚ್ ಜಾತಾಲೆಂ. ಸಗ್ಳ್ಯಾಂನಿ ಮೆಳೊನ್ ಆಲಿಯಾಕ್ ದುರ್ಸಾತಾನಾ ಶಬೀರಾನ್, ಆಲಿಯಾಚಾ ಬಾಪಾಯ್ನ್ ಮೊಗಾನ್ ಆಪ್ಲ್ಯಾ ಧುವೆನ್ ಸಾಂಗ್ಲೆಲೆಂ ಸಗ್ಳೆಂ ಮಾಂದುನ್ ಘೆವ್ನ್ ದೀಸ್ ಕಾಡ್ಲೆಲೆ. ತೆದ್ನಾ ತಾಕಾ ದುಸ್ರಿ ವಾಟ್ ನಾತ್ಲೆಲಿ. ಪುಣ್ ಆತಾಂ......?

ಆತಾಂ ಆಲಿಯಾ ಎಕ್ಲ್ಯಾಚೆಂ ಬಾಯ್ಲ್ ಆನಿ ಎಕ್ಲ್ಯಾಚೆಂ ಸುನ್ ಜಾವ್ನ್ ಗೆಲ್ಲೆಂ. ಮನಿಸ್ ಆಪ್ಲ್ಯಾ ವಿಚಾರಾಂತ್ ಕಿತ್ಲೊಯ್ ಸುಡಾಳ್ ಆನಿ ಸಮಾಜೆಕ್ ತೊ ಕಿತ್ಲೊಯ್ ಮೊವಾಳ್ ಜಾಲ್ಯಾರ್‍ಯ್, ತಾಚ್ಯಾ ಘರಾ ಆಯಿಲ್ಲ್ಯಾ ತಾಚ್ಯಾ ಸುನೆಕ್ ಧುವೆಚ್ಯಾ ಜಾಗ್ಯಾರ್ ದವರುನ್ ಜಿವಿತ್ ಸಾರ್‍ಚ್ಯಾಂತ್ ತೊ ಆಪ್ಲ್ಯಾ ಸಮಾಜೆ ಮುಕಾರ್ ಸಫಲ್ ಜಾಲ್ಯಾರ್‍ಯ್, ತ್ಯಾ ಸುನೆಕ್ ಧುವೆಚೊ ಸಂಭಂಧ್ ದೀಂವ್ಕ್ ಖಂಯ್ ನಾ ತರ್ ಖಂಯ್ ತೊ ಸಲ್ವಾತಾಲೊ. ಹೆಂಚ್ ಆಲಿಯಾಚಾ ಜಿವಿತಾಂತ್‌ಯ್ ಘಡ್ಲೆಂ.

ಶಬೀರಾನ್ ಆಪ್ಲ್ಯಾ ಧುವೆಕ್ ತಾಚ್ಯಾ ಸರ್ವ್ ವಾಟೆನಿ ಸಾಂಗಾತ್ ದಿಲ್ಲೊ.ಕಾರಾಣ್ ತೆಂ ತಾಚೆಂ ಧುವ್! ಹೊಚ್ಚ್ ಸಾಂಗಾತ್ ಆಲಿಯಾಕ್ ತಾಚ್ಯಾ ಜಿವಿತಾಂತ್ ಆಯಿಲ್ಲೆ ಸಗ್ಳೆ ದಿತಲೆ ಮ್ಹಳ್ಳ್ಯಾಕ್ ಕಿತೆಂ ಸಾಕ್ಸ್? ಕಾಂಯ್ ನಾ! ಆಶೆಂಚ್ ಜಾಲ್ಲೆಂ ಆಲಿಯಾಚಾ ಜಿವಿತಾಂತ್. ಆಲಿಯಾಕ್ ಸುನ್ ಜಾವ್ನ್ ಗೆಲ್ಲ್ಯಾ ಘರ್‍ಚ್ಯಾಂನಿ ಆಲಿಯಾಕ್ ತಾಂಚಾ ಧುವೆ ಪರಿಂ ಸಾಂಬಾಳ್ಳೆಂ ನಾ. ಜಶೆಂ ಶಬೀರಾನ್ ಆಪ್ಲ್ಯಾ ಧುವೆಕ್ ಸಾಂಬಾಳ್‌ಲ್ಲೆಂ ತಶೆಂ ಸುಲೇಮಾನಾನ್ ಆಲಿಯಾಕ್ ಆಪ್ಲ್ಯಾ ಧುವೆಚಾ ಜಾಗ್ಯಾರ್ ದವರುನ್ ಸೊಭಯ್ಲೆಂ ನಾ!

"ಬೇಟಾ...., ಹಾಂವ್ ಆಲಿಯಾಕ್ ಸಮ್ಜಾಯ್ತಾಂ. ತೆಂ ಖಂಡಿತ್ ಮ್ಹಜೆಂ ಆಯ್ಕಾತೆಲೆಂ!" ಶಬೀರಾನ್ ನಾಸಿರಾಕ್ ಭರ್ವಸೊ ದಿಲ್ಲೊ. ಪುಣ್ ಹೊ ಭರ್ವಸೊ ಕಿತ್ಲ್ಯಾ ಪಾತ್ಯೆಣೆಚೊ ಮ್ಹಳ್ಳೆಂ ಶಬೀರ್ ಸಾರ್‍ಕೆಂ ಜಾಣಾಂ ಆಸ್‌ಲ್ಲೊ.

"ತುಮಿ ತರ್‍ಯ್ ತಾಕಾ ಥೊಡೆಂ ಸಮ್ಜಾಯಾ. ಆಲಿಯಾಕ್ ಕಾಮಾಕ್ ವೆಚಿ ಗರ್ಜ್ ತರ್‍ಯ್ ಕಿತೆಂ? ತಾಚ್ಯಾ ವಿಶಯಾ ಥಾವ್ನ್ ಘರಾಂತ್ ಕೊಣಾಯ್ಕ್‌ಯ್ ಸಮಾಧಾನ್ ನಾ. ತೆಂ ತರ್‍ಯ್ ಆಯ್ಕೊಂಕ್ ತಯಾರ್ ನಾ!" ನಾಸಿರ್ ಆಪ್ಲ್ಯಾ ಬಾಯ್ಲೆಕ್ ಸಮ್ಜಾವ್ನ್ ಸಮ್ಜಾವ್ನ್ ಸಲ್ವಾಲ್ಲೊ. ತಾಚ್ಯಾ ಮುಕಾರ್ ಆತಾಂ ನಿಮಾಣೊ ಜಾವ್ನ್ ಹೊ ಎಕ್‌ಚ್ ಉಪಾಯ್ ಆಸ್‌ಲ್ಲೊ. ಹ್ಯಾ ಖಾತಿರ್ ತಾಣೆಂ ಆಲಿಯಾಚಾ ಆವಯ್ ಬಾಪಯ್ಕ್ ಸಮ್ಜಾಂವ್ಚೆಂ ಪ್ರಯತ್ನ್ ಕೆಲೆಂ.

"ಬೇಟಾ....! ತುಮ್ಕಾಂ ವೇಳ್ ಮೆಳ್ತಾನಾ ದೊಗಾಂಯ್ ಥೊಡ್ಯಾ ವೆಳಾಕ್ ಹಾಂಗಾ ಯೆಯಾ. ಹಾಂವ್ ಆಲಿಯಾಕ್ ಸಗ್ಳೆಂ ಸಮ್ಜಾಯ್ತಾಂ!" ನಾಸಿರಾ ಮುಕಾರ್ ಶಬೀರಾನ್ ಭರ್ವಸೊ ಉಚಾರ್‍ಲೊ.

"ಮ್ಹಾಕಾ ಯೇಂವ್ಕ್ ಜಾಯ್ನಾಂ. ತಾಕಾ ತುಮಿ ಎಕ್ಲ್ಯಾಕ್‌ಚ್ ಸಮ್ಜಾಯ್ಲ್ಯಾರ್ ಚಡ್ ಬರೆಂ. ಹಾಂವ್ ಆಸ್ಲ್ಯಾರ್ ತೆಂ ಆಯ್ಕೊಂವ್ಚೆಂ ನಾ. ತುಮಿಚ್ ತಾಕಾ ತಾಚ್ಯಾ ಪುರ್ಸತೆ ಪರ್ಮಾಣೆ ಆಪವ್ನ್ ಸಮ್ಜಾಯಾ!"

ನಾಸಿರಾಚಾ ಉತ್ರಾಂನಿ ಶಬೀರಾಕ್ ಆಪ್ಲ್ಯಾ ಮರ್ಯಾದೆಂತ್ ಉಣೆಂಪಣ್ ಭೊಗ್ಲೆಂ. ಧುವೆ ಖಾತಿರ್ ತೊ ನಾಸಿರಾ ಮುಕಾರ್ ಕಾಂಯ್ಚ್ ಉಲಂವ್ಚ್ಯಾ ಸ್ಥಿತೆರ್ ನಾತ್‌ಲ್ಲೊ. ಧುವೆಚ್ಯಾ ಪಾಡ್ತಿನ್ ಕಾಂಯ್ ಆಪ್ಣೆಂ ಉಲಯ್ಲ್ಯಾರ್ ತ್ಯಾ ಕುಶಿನ್ ಆಪ್ಲ್ಯಾಚ್ ಹಾತಾಂನಿ ಒಪ್ಸುನ್ ದಿಲ್ಲೆಂ ಆಪ್ಲ್ಯಾ ಧುವೆಚೆಂ ಜಿವಿತ್ ಪಿಡ್ಡ್ಯಾರ್ ಜಾಯ್ತ್ ಮ್ಹಳ್ಳಿ ಭಿರಾಂತ್ ತಾಕಾ ಆಸ್‌ಲ್ಲಿ.

ಆಪ್ಲೊ ಬಾಪಯ್ ಆಪ್ಣಾಕ್ ಘರಾ ಯೇವ್ನ್ ವಚೊಂಕ್ ಆಹ್ವಾನ್ ದಿತಾನಾ ಆಲಿಯಾಚಾ ಮತಿಕ್ ಮಿಸ್ತೆರ್ ಸಮ್ಜಾನಾಸ್ತಾನಾ ಗೆಲೊ ನಾ. ಶಬೀರಾಚಾ ಉತ್ರಾಂನಿ ಆಸ್‌ಲ್ಲಿ ಖಂತ್ ಆಲಿಯಾಚಾ ಕಾಳ್ಜಾಕ್ ಲಾಗಾನಾಸ್ತಾನಾ ಗೆಲಿ ನಾ. ಆಪ್ಣಾ ವಿಶಿಂ ನಾಸಿರಾನ್ ಯಾ ತಾಚ್ಯಾ ಘರ್‍ಚ್ಯಾಂನಿ ಖಂಡಿತ್ ಆಪ್ಲ್ಯಾ ಬಾಪಾಯ್ಕ್ ಖಬಾರ್ ದಿಲ್ಯಾ ಮ್ಹಳ್ಳೆಂ ಆಲಿಯಾ ಸಮ್ಜಾಲೆಂ. ಪೊನಾ ವಯ್ರ್ ತೆಂ ಕಾಂಯ್ ಉಲಂವ್ಕ್ ಗೆಲೆಂ ನಾ ತರ್‍ಯ್ ಪೊರ್‍ವಾಂ ಮಂಗ್ಳಾರಾ ಆಪುಣ್ ಘರಾ ಯೆತಾಂ ಮ್ಹಣೊನ್ ತಾಣೆಂ ಆಪ್ಲ್ಯಾ ಬಾಪಾಯ್ಕ್ ಸ್ಪಶ್ಟ್ ಸಾಂಗ್ಲೆಂ.

"ಮ್ಹಜ್ಯಾ ಆನಿ ತುಚ್ಯಾ ಪ್ರಾಬ್ಲೆಮಾ ಮಧೆಂ ತುವೆಂ ಆಮ್ಚಾ ಘರ್‍ಚ್ಯಾಂಕ್ ಮಧೆಂ ಹಾಡ್ಚಿ ಗರ್ಜ್ ನಾತ್‌ಲ್ಲಿ.!" ರಾತಿಚೆಂ ಜೆವಾಣ್ ಜಾವ್ನ್ ನಿದ್ಚ್ಯಾ ಕುಡಾಂತ್ ಆಡ್ ಪಡ್‌ಲ್ಲ್ಯಾ ನಾಸಿರಾಕ್ ಉದ್ದೇಶುನ್ ಆಲಿಯಾ ಉಲಯ್ಲೆಂ.

ಬಾಯ್ಲೆಚಿಂ ಉತ್ರಾಂ ನಾಸಿರಾಕ್ ಆಯ್ಕಾಲಿಂ ಜಾಲ್ಯಾರ್‍ಯ್ ತೊ ಮೌನ್ ಸಾಂಬಾಳುನ್ ರಾವ್ಲೊ.

"ತುಕಾ ಕಿತೆಂ ಸಾಂಗೊಂಕ್ ಆಸಾ ತೆಂ ಮ್ಹಾಕಾಚ್ ಸಾಂಗ್ಯೆತೆಂ! ಆಮ್ಚೆ ಮಧೆಂ ಕಿತೆಂ ಸಾರ್‍ಕೆಂ ನಾ ತೆಂ ಆಮಿಂಚ್ ಸಾರ್‍ಕೆಂ ಕರುನ್ ಘೆವ್ಯೆತೆಂ....!"

ಮಾತ್ಯಾಚೆ ಕೇಸ್ ಸೊಡವ್ನ್ ತ್ಯಾ ಕೆಸಾಂಕ್ ತೊಪ್‌ಲ್ಲ್ಯಾ ಹೇರ್‍ಪಿನ್ನಾಂಕ್ ಕಾಡುನ್ ಡ್ರೆಸ್ಸಿಂಗ್ ಟೇಬಲಾ ವಯ್ರ್ ದವರ್‍ತಾನಾ ತ್ಯಾ ಟೇಬಲಾ ಮುಕ್ಲ್ಯಾ ಆರ್ಶ್ಯಾಂತ್ ದಿಸ್ಚ್ಯಾ ಖಾಟಿಯೆರ್ ನಿದ್‌ಲ್ಲ್ಯಾ ಆಪ್ಲ್ಯಾ ಘೊವಾಕ್ ತ್ಯಾ ಆರ್‍ಶ್ಯಾಂತ್‌ಚ್ ಆಲಿಯಾ ಪಳೆತಾಲೆಂ.

ಆರ್‍ಶ್ಯಾಂತ್ ದಿಸ್ಚಾ ಬಾಯ್ಲೆಚಾ ತೊಂಡಾಕ್ ಪಳೆಲ್ಲೊ ನಾಸಿರ್ ಆಲಿಯಾಚಾ ಖಂಯ್ಚಾಯ್ ಉತ್ರಾಂಕ್ ಗುಮಾನ್ ಕರಿನಾಸ್ತಾನಾ ಆಪ್ಲಿ ಕೂಸ್ ಬದ್ಲುನ್ ನಿದ್ಲೊ. ಏಕ್ ಪಾವ್ಟಿಂ ತಶೆಂಚ್ ಆರ್‍ಶ್ಯಾಂತ್ ಆಪ್ಲ್ಯಾ ಘೊವಾಕ್ ಪಳೆಲ್ಲೆಂ ಆಲಿಯಾ, ಏಕ್ ಲಾಂಬ್ ಶ್ವಾಸ್ ಸೊಡುನ್ ಪಾಟಿಂ ಘುಂವ್ತಾ ಮ್ಹಣ್ತಾನಾ ಡ್ರ್ರೆಸ್ಸಿಂಗ್ ಟೇಬಲಾ ವಯ್ಲೆಂ ನಾಸಿರಾಚೆಂ ಸೆಲ್‌ಪೋನ್ ವ್ಹಾಜೊಂಕ್ ಲಾಗ್ಲೆಂ. ಆಲಿಯಾ ಥಂಯ್ಚ್ ಆಸ್‌ಲ್ಲ್ಯಾನ್, ತಾಕಾ ಕಳಿತ್ ನಾತ್‌ಲ್ಲ್ಯಾ ಪರಿಂಚ್ ಅಪ್ರಯತ್ನಾನ್ ಮ್ಹಳ್ಳ್ಯಾ ಪರಿಂ ತಾಚಿ ದೀಶ್ಟ್ ತ್ಯಾ ವಾಜ್ಚ್ಯಾ ಸೆಲ್‌ಪೊನಾರ್ ಗೆಲಿ.

"ಅಮೀನಾ ಕಾಲಿಂಗ್!" ಸೆಲ್‌ಪೊನಾಚಾ ಡಿಸ್‌ಪ್ಲೇಚೆರ್ ಆಯಿಲ್ಲೆಂ ನಾಂವ್ ಆಲಿಯಾನ್ ವಾಚ್ಲೆಂ.

"ಹ್ಯಾ ರಾತಿಕ್? ನಿದೊಂಕ್ ವೆಚ್ಯಾ ಹ್ಯಾ ವೆಳಾರ್....!?" ಆಲಿಯಾನ್ ಮತಿಂತ್ ಚಿಂತ್‌ಲ್ಲೆಂ ಮಾತ್ರ್.

ತಿತ್ಲ್ಯಾರ್!

ಆಪ್ಣಾಚೆಂ ಪೊನ್ ವ್ಹಾಜ್‌ಲ್ಲೊ ಆವಾಜ್ ಆಯ್ಕೊನ್ ನಿದ್ಲೆಲ್ಯಾ ಕಡೆನ್ ಥಾವ್ನ್ ಉಟ್‌ಲ್ಲೊ ನಾಸಿರ್ ಪೋನಾ ಲಾಗಿಂ ಯೇವ್ನ್, ತೆಂ ಪೋನ್ ತಾಣೆಂ ಹಾತಿಂತ್ ಧರ್‍ಲೆಂ. ಪೋನ್ ಆನ್ ಕೆಲ್ಲೊ ತೊ ಪೊನಾರ್ ಉಲಂವ್ಕ್ ಲಾಗ್ಲೊ.

ಆಲಿಯಾಕ್ ನಾಸಿರಾಚೆಂ ಪೊನಾ ವಯ್ಲೆಂ ಸಗ್ಳೆಂ ಸಂಭಾಶಣ್ ಆಯ್ಕಾತಾಲೆಂ. ಆಪ್ಣಾಕ್ ತೆಂ ಕಾಂಯ್ ಪಡೊನ್ ವಚೊಂಕ್ ನಾ ಮ್ಹಳ್ಳ್ಯಾ ಪರಿಂ ತೆಂ ಕರ್‍ತಾಲೆಂ ತರ್‍ಯ್ ದುಸ್ರ್ಯಾ ಕುಶಿನ್ ಅಮೀನಾ ವಿಶಿಂ ತೆಂ ಚಿಂತಾಲೆಂ.

ಆಪ್ಲ್ಯಾ ಘೊವಾಕ್ ಆನಿ ತಾಚ್ಯಾ ಕುಟ್ಮಾಕ್ ತೆದಾಳಾ ತೆದಾಳಾ ಪೋನ್ ಕರ್‍ಚೆಂ ಹೆಂ ಅಮೀನಾ ಮ್ಹಳ್ಯಾರ್ ಕೋಣ್? ಆಲಿಯಾಚಾ ಮತಿಂತ್ ಸವಾಲ್ ಉದೆಲೆಂ. ಅಮೀನಾ ಲಾಗಿಂ ಥೊಡೊ ವೇಳ್ ಉಲಯಿಲ್ಲೊ ನಾಸಿರ್ ಉಪ್ರಾಂತ್ ಪೋನ್ ಭಂದ್ ಕರುನ್ ಪರ್ತ್ಯಾಕ್ ಖಾಟಿಯೆರ್ ಯೇವ್ನ್ ಆಡ್ ಪಡ್ಲೊ. ಎಕಾಚ್ ಖಾಟಿಯೆರ್ ತಿಂ ನಿದ್ತಾಲಿಂ ತರ್‍ಯ್ ತಾಂಚೆ ಮಧೆಂ ಥೊಡ್ಯಾ ದಿಸಾಂ ಥಾವ್ನ್ ಏಕ್ ಗಡ್ ಪಡ್‌ಲ್ಲಿ. ನಾಸಿರಾನ್ ಜಾಂವ್ ಆಲಿಯಾನ್ ಜಾಂವ್ ತಿ ಗಡ್ ಮೊಡುಂಕ್ ವೆಚೆಂ ಪ್ರಯತ್ನ್ ಕರುಂಕ್ ನಾ.

"ಭಾಯ್ಲ್ಯಾಂ ಕಡೆನ್ ಉಲಂವ್ಕ್ ಮಾತ್ರ್ ಬರೀ ಜೀಬ್ ಸುಟ್ತಾ. ತೊಂಡಾರ್ ಬರ್‍ಯೊ ಹಾಸೊಯ್ ಉದೆತಾತ್. ಬಾಯ್ಲ್ ಮ್ಹಳ್ಯಾರ್ ಮಾತ್ರ್ ಸಸಾರ್!"

ಆಲಿಯಾ ಆತಾಂ ಖಾಟಿಯೆರ್ ಯೇವ್ನ್ ಬಸ್ಲೆಂ. ತಾಣೆ ಆಪ್ಲಿ ಬ್ಲ್ಯಾಂಕೆಟ್ ಸೊಡಯ್ಲಿ.

"ಆತಾಂ ಬರಿ ನೀದ್ ಪಡ್ತೆಲಿ...!" ತೆಂ ಪುಸ್ಪುಸ್ಲೆಂ.

ಬಾಯ್ಲೆಚಿಂ ಪುಸ್ಪುಸ್ಯಾಂಚಿಂ ಉತ್ರಾಂ ಆಯ್ಕಾಲ್ಲೊ ನಾಸಿರ್ ಎದೊಳ್ ಉದಾರೊ ಆಸ್‌ಲ್ಲೊ ತೊ ಆತಾಂ ತ್ಯಾ ಕುಶಿಕ್ ಪರ್‍ತಾಲೊ.

"ತಿತ್ಲೆಂ ಕರುಂಕ್ ಜಾಣಾಂ ಆಸ್ಲ್ಯಾರ್ ಪುರೊ. ಉರ್‍ಲೆಲೆಂ ಕಾಂಯ್.......!"

"ತೋಂಡ್ ದಾಂಪುನ್ ವೊಗೆಂಚ್ ಚುಪ್ ಚಾಪ್ ನಿದ್ತಾಯ್ ಜಾಲ್ಯಾರ್ ನಿದೆ. ನಾಂ ಜಾಲ್ಯಾರ್.....!?" ಆಲಿಯಾಚಿಂ ಉತ್ರಾಂ ಆಖೇರ್ ಜಾಂವ್ಚ್ಯಾ ಪಯ್ಲೆಂಚ್ ನಾಸಿರ್ ಬಡ್ಬಡ್ಲೊ.

"ತಿತ್ಲೆಂ ವ್ಹಡ್ಲೆಂ ಕಿತೆಂ ಜಾಲಾಂ ಮ್ಹಣೊನ್ ತುಂ ಆಶೆಂ ಕರ್‍ತಾಯ್?"

"ತುಕಾ ಸಾಂಗ್ಲ್ಯಾರ್ ಸಮ್ಜಾತಾ ವಾ ನಾ.....?" ನಾಸಿರ್ ಪರ್‍ತ್ಯಾಕ್ ಖಾಟಿಯೆರ್ ಉದಾರೊ ಜಾಲೊ.

"ಅಮೀನಾಲಾಗಿಂ ಶೇಲೆ ಕರುಂಕ್ ಮಾತ್ರ್ ತುಕಾ ಜಾತಾ. ತೆದಾಳಾ ಕಾಂಯ್ ಜಾಯ್ನಾಂ....!" ಆಲಿಯಾನ್ ’ಸಟ್ಟ್’ ಕರುನ್ ನಾಸಿರಾಚಿ ಬ್ಲ್ಯಾಂಕೆಟ್ ವೊಡ್ಲಿ.

"ತುಕಾ ಸಾಂಗ್ಲೆಲೆಂ ಆಯ್ಕಾನಾ?" ನಾಸಿರ್ ಆತಾಂ ಖಾಟಿಯೆರ್ ಉಟೊನ್ ಬಸ್ಲೊ.

"ಆನಿ ಕಿತೆಂ.....? ತುಕಾ ಉರ್‍ಲೆಲಿಂ ಸಗ್ಳಿಂ ಜಾಯ್. ಮ್ಹಜ್ಯಾ ಲಾಗಿಂ ಮಾತ್ರ್....!"

ಹ್ಯಾ ಉಪ್ರಾಂತ್ ಆಲಿಯಾ ಕಾಂಯ್ ಉಲಂವ್ಕ್ ಗೆಲೆಂ ನಾ. ಖಾಟಿಯೆರ್ ಆಡ್ ಪಡ್‌ಲ್ಲ್ಯಾ ತಾಣೆಂ ಆಪ್ಲ್ಯಾ ಆಂಗಾರ್ ಬ್ಲ್ಯಾಂಕೆಟ್ ವೊಡ್ಲಿ. ತೆಂ ಹೆವ್ಶಿಂ ಘುಂವೊನ್ ನಿದ್ಲೆಂ. ಹೆಂ ಪಳೆಲ್ಲೊ ನಾಸಿರ್‍ಯ್ ಖಾಟಿಯೆರ್ ಆಡ್ ಪಡ್ಲೊ. ತೊ ಆಲಿಯಾಚಾ ದುಸ್ರ್ಯಾ ಕುಶಿಕ್ ಲೊಳ್ಳೊ.

ತ್ಯಾ ಹಪ್ತ್ಯಾಚಾ ಮಂಗ್ಳಾರಾ ಆಲಿಯಾಕ್ ಡ್ಯೂಟೆಕ್ ಸುಟಿ ಆಸ್ಲೆಲ್ಯಾನ್ ಆನಿ ಆಪ್ಣೆ ಪಯ್ಲೆಂಚ್ ಆಪ್ಲ್ಯಾ ಆವಯ್-ಬಾಪಾಯ್ಕ್ ಸಾಂಗ್ಲೆಲ್ಯಾನ್ ತಾಂಕಾ ಮೆಳೊಂಕ್ ತೆಂ ಭಾಯ್ರ್ ಸರ್‍ಲೆಂ. ಆಪ್ಲ್ಯಾ ಮಾಂವಾಂಕ್ ತಾಣೆಂ ಆಪುಣ್ ಕುಳಾರಾ ವಚೊನ್ ಯೆತಾಂ ಮ್ಹಣೊನ್ ಸಾಂಗ್ಲೆಂ ತರ್‍ಯ್ ತಾಚ್ಯಾ ಸಾಂಗ್ಣೆಂತ್ ಆನಿ ನಾ ಸಾಂಗ್ಣೆಂತ್ ಕಾಂಯ್ ವ್ಯತ್ಯಾಸ್ ಆಸಾ ಮ್ಹಳ್ಳೆಂ ಆಲಿಯಾಕ್ ದಿಸೊನ್ ಆಯ್ಲೆಂ ನಾ. ಆಪ್ಣೆ ಆಪ್ಲ್ಯಾ ಮಾಂಯ್ ಮಾಂವಾಂಚಾ ಖುಶೆ ವಿರೋಧ್ ಏರ್‍ಹೊಸ್ಟೆಸಾಚಾ ಕಾಮಾಕ್ ವಚೊಂಕ್ ಶುರು ಕೆಲ್ಲ್ಯಾ ದಿಸಾ ಥಾವ್ನ್ ಘರ್‍ಚ್ಯಾಂನಿ ಆಪ್ಣಾ ವಿಶಿಂ ಚಿಂತ್ಚೆಂ ಆನಿ ಪಳಂವ್ಚಿ ರೀತ್ ಬದ್ಲಿಲ್ಯಾ ಮ್ಹಣೊನ್ ತೆಂ ಜಾಣಾಂ. ಆಶೆಂ ಆಸ್ತಾನಾ ಆಲಿಯಾಕ್‌ಯ್ ಆತಾಂ ಕೊಣಾಯ್ಚಾ ’ಹಾಂ’ ಯಾ ’ನಾ’ ವಿಶಿಂ ತಕ್ಲಿ ಆಟಯ್ಜಾಯ್ ಮ್ಹಳ್ಳಿ ಖಂತ್ ನಾತ್ಲೆಲಿ.

ಹ್ಯಾಚ್ ಶುಕ್ರಾರಾ ದಿಸಾ ಅಕ್ಬರಾಕ್ ಪಾಟಿಂ ಅಮೇರಿಕಾ ವಚೊಂಕ್ ಆಸ್ಲೆಲೆಂ. ಆಪ್ಲೆಂ ಭಯ್ಣ್ ಹ್ಯಾ ಉಪ್ರಾಂತ್ ಆಪ್ಣಾಕ್ ಪಳಂವ್ಕ್ ಮೆಳ್ಚೆಂ ನಾ ಮ್ಹಣೊನ್ ಚಿಂತ್‌ಲ್ಲೊ ತೊ ಆಜ್ ಘರಾಚ್ ರಾವ್‌ಲ್ಲೊ. ಸಾಕಾಳಿಂಚಾ ಆದೇಸಾಕ್ ಆಫೀಸಾಕ್ ಗೆಲ್ಲೊ ಶಬೀರ್ ’ದನ್ಫರಾಂ ಯೆತಾಂ’ ಮ್ಹಣೊನ್ ಸಾಂಗೊನ್ ಗೆಲ್ಲೊ ತೊ ಧನ್ಫರಾಂಚಾ ಹ್ಯಾ ವಗ್ತಾರ್ ಆಲಿಯಾಕ್ ಮೆಳೊಂಕ್ ಆತ್ರೆಗೊನ್ ಆಯಿಲ್ಲೊ. ಕಿತ್ಲೆಂ ಮ್ಹಳ್ಯಾರ್‍ಯ್ ತಾಚ್ಯಾ ಮೊಗಾಚೆಂ ಧುವ್ ತೆಂ!

ಸಾರಾನ್ ಕುಜ್ನಾಂತ್ ಆಪ್ಲ್ಯಾ ಕಾಮಾರ್ ಆಸ್ತಾನಾಂಚ್ ಆಲಿಯಾಚಾ ವಿಶಯಾಂತ್ ಉಲೊಣೆಂ ಆರಂಭ್ ಕೆಲ್ಲೆಂ ತೆಂ ತೆದಾಳಾ ತೆದಾಳಾ ಅಕ್ಬರಾನ್ ಆನಿ ತಾಚ್ಯಾ ಬಾಪಾಯ್ನ್ ಮುಖಾರುನ್ ವೆಲೆಂ ತರ್‍ಯ್ ಆಲಿಯಾಚಾ ವಿಚಾರ್‍ವಂತ್ ಆನಿ ಸಕ್ತೆವಂತ್ ಸವಾಲಾಂ ಮುಕಾರ್ ಕೊಣಾಯ್ಚಾಯ್ ತೊಂಡಾ ಥಾವ್ನ್ ಕಾಂಯ್ ಜವಾಬ್ ಸುಟ್ಲಿ ನಾ.

"ಅಬ್ಬೂ...., ಚಲಿ ಕಿತೆಂ ಹ್ಯಾಚ್ ಖಾತಿರ್ ಜಲ್ಮ್ ಘೆತಾ? ತಿಚ್ಯಾ ಮಾತ್ರ್ ಜಿವಿತಾಚ್ಯಾ ಹರ್ಯೆಕಾ ಮೆಟಾಂನಿ ಕಾನೂನ್ ಕಾಯ್ದೆ ಲಾಗು ಜಾತಾತ್? ಚಲಿಯೆನ್ ಮಾತ್ರ್ ಹೆರಾಂ ಖಾತಿರ್ ಜಿಯೆಂವ್ಕ್ ಜಾಯ್? ತಿಕಾ ತಿಚೆಂ ಮ್ಹಳ್ಳೆಂ ಕಾಂಯ್ ಆಸ್ಥಿತ್ವ್ ನಾ?" ಆಲಿಯಾಚಾ ಸವಾಲಾಂ ಮುಕಾರ್ ಶಬೀರಾಕ್ ಜವಾಬ್ ಜಳ್ಕಾನಾತ್‌ಲ್ಲಿ. ಆಲಿಯಾಚಿಂ ಸವಾಲಾಂಯ್ ತಶಿಂಚ್ ಆಸ್‌ಲ್ಲಿ. ಹ್ಯಾ ಸವಾಲಾಂಕ್ ತಿಚ್ ಪಾರಂಪರಿಕ್ ಚಿಂತ್ಪಾಚಿ ಜವಾಬ್, ಶಬೀರಾಚಾ ಜಿಬೆರ್ ಆಸ್‌ಲ್ಲಿ ಜಾಲ್ಯಾರ್‍ಯ್ ತ್ಯಾ ಜವಾಬೆಕ್ ಭಾಯ್ರ್ ಉಚಾರುಂಕ್ ತೊಚ್ ಕಾವ್ಜೆತಾಲೊ. ಕಿತ್ಯಾಕ್..., ಏಕ್ ಚಲೊ ಜಾವ್ನ್ ತಾಣೆಂ ಆಪ್ಲ್ಯಾ ಘರಾಂತ್ ಚಲಿಯೆಕ್ ದಾಂಬುನ್ ದವರ್‍ಚೆಂ ಪ್ರಯತ್ನ್ ಕೆದ್ನಾಂಚ್ ಕೆಲ್ಲೆಂ ನಾ. ಮನ್ಶ್ಯಾ ಜೀವ್ ತೊ ಚಲ್ಯಾ ಜಾತಿಚೊ ಜಾಂವ್ ಯಾ ಚಲಿಯೆ ಜಾತಿಚೊ.....! ಸಂಸಾರಾರ್ ಪುನರ್‍ಸೃಶ್ಟೆ ಖಾತಿರ್ ಮಾತ್ರ್ ಮನ್ಶ್ಯಾ ಜಿವಾಂತ್ ಚಲೊ ಆನಿ ಚಲಿ ಮ್ಹಳ್ಳಿ ಬದ್ಲಾವಣ್ ಆಸಾ ಶಿವಾಯ್ ಸೃಶ್ಟೆಂತ್ ಜಿಯೆಂವ್ಚ್ಯಾ ಖಾತಿರ್ ಹಿ ನ್ಹಯ್. ಜಿವಿತ್ ತೆಂ ಹರ್ಯೆಕಾ ಜಿವಾಚೆಂ ಎಕ್‌ಚ್! ಆಶೆಂ ತೊ ಪಾತ್ಯೆತಾಲೊ. ಜಾಲ್ಯಾರ್‍ಯ್ ಕುಟ್ಮಾಂತ್ ಆನಿ ಮನ್ಶ್ಯಾ ಜಿವಿತಾಚಾ ಸಮಾಜೆಂತ್ ಚಲಿಯೆಚೊ ಪಾತ್ರ್ ಕಸಲೊ ಮ್ಹಳ್ಳೆಂ ಶಬೀರಾನ್ ಆಲಿಯಾಕ್ ಸಮ್ಜಾಂವ್ಚೆಂ ಪ್ರಯತ್ನ್ ಕೆಲೆಂ.

"ತಶೆಂ ನ್ಹಯ್ ಬೇಟಾ..... ತುಂ ತುಕಾಚ್ ಏಕ್ ಚಲಿ ಮ್ಹಣೊನ್ ಕಿತ್ಯಾಕ್ ಮಾಂದುನ್ ಘೆನಾಂಯ್? ತುಜ್ಯಾ ಅಮ್ಮಿಕ್ ಪಳೆ...!ಫಾಲ್ಯಾಂ ತುಕಾಯ್ ತಿಚ್ಯಾ ವೆಳಾಂತ್ಲ್ಯಾನ್ ಪಾಶಾರ್ ಜಾಂವ್ಕ್ ಆಸಾ. ತುವೆಂ ತುಜೆಂ ಕುಟಾಮ್ ಬಾಂದುನ್ ಹಾಡ್ಚ್ಯಾ ವಿಶಿಂ ಚಡ್ ಚಿಂತುಂಕ್ ಜಾಯ್!" ಶಬೀರಾನ್ ಆಪ್ಲ್ಯಾ ಧುವೆಕ್ ಸಮ್ಜಂವ್ಚೆ ಪ್ರಯತ್ನ್ ಕೆಲೆಂ.

"ತರ್, ತುಮಿ ಮ್ಹಾಕಾ ಸಾಂಗ್ತಾತ್ ಕೀ ಹಾಂವ್ ನಾಸಿರಾ ವಿಶಿಂ ಕಾಂಯ್ ಚಿಂತಿನಾ?"

"ಕುಟಾಮ್ ಮ್ಹಳ್ಯಾರ್ ಫಕತ್ತ್ ನಾಸಿರ್ ಮಾತ್ರ್ ನ್ಹಯ್ ಬೇಟಾ! ತುಕಾ ಒಪ್ಸುನ್ ದಿಲ್ಲೆಂ ಘರ್‍ಯ್ ತುಜೆಂ ಕುಟಾಮ್ ಆಸ್‌ಲ್ಲ್ಯಾ ಪರಿಂಚ್. ತುವೆಂ ತಾಂಚೆ ವಿಶ್ಯಾಂತ್‌ಯ್ ಚಿಂತುಂಕ್ ಆಸಾ. ತಾಂಚಾ ಮಾನ್ ಮರ್ಯಾದೆ ವಿಶಿಂ ಚಿಂತುಂಕ್ ಆಸಾ. ತುಜ್ಯಾ ಘೊವಾಚ್ಯಾ ವಿಶಿಂ ಚಿಂತುಂಕ್ ಆಸಾ....!"

"ಆನಿ ಮ್ಹಜ್ಯಾ ವಿಶ್ಯಾಂತ್...?" ಶಬೀರಾಚಿಂ ಉತ್ರಾಂ ಆಖೇರ್ ಜಾಂವ್ಚ್ಯಾ ಪಯ್ಲೆಂಚ್ ಆಲಿಯಾನ್ ಆಪ್ಲ್ಯಾ ಬಾಪಾಯ್ಕ್ ಸವಾಲ್ ಕೆಲೆಂ.

"ತುಜ್ಯಾ ವಿಶ್ಯಾಂತ್....?" ಶಬೀರಾನ್ ಆತಾಂ ಆಪ್ಲ್ಯಾ ಮುಕಾರ್ ಬಸ್ಲೆಲ್ಯಾ ಆಪ್ಲ್ಯಾ ಬಾಯ್ಲೆಕ್ ಪಳೆಲೆಂ. ಎಕಾ ಖಿಣಾಕ್ ಆಪ್ಲ್ಯಾ ಧುವೆನ್ ವಿಚಾರ್ಲೆಲೆಂ ಸವಾಲ್ ಆಪ್ಲಿ ಬಾಯ್ಲ್ ಆಪ್ಣಾಕ್ ವಿಚಾರ್‍ತಾ ತಶೆಂ ತಾಕಾ ಜಾಲೆಂ.

ಥೊಡಿಂಚ್ ಕ್ಷಣಾಂ!

ಶಬೀರಾನ್ ಜಿಣಿಭರ್ ಚಿಂತುಂಕ್ ನಾತ್ಲೆಲೆಂ ಆತಾಂ ತಾಚ್ಯಾ ದೊಳ್ಯಾಂ ಮುಕಾರ್ ಆಯ್ಲೆಂ.

ಆಪ್ಲ್ಯಾ ಬಾಯ್ಲೆನ್ ಕೆದ್ನಾಂ ತರ್‌ಯ್ ಆಪ್ಲ್ಯಾ ಸ್ವ ಖುಶೆ ವಿಶಿಂ ಚಿಂತ್ಲಾ? ತಿ ಆಪ್ಣಾಚಿ ಬಾಯ್ಲ್ ಮ್ಹಳ್ಳೊ ಏಕ್ ಬಿಲ್ಲೊ ಮಾತ್ರ್ ಆಪ್ಣೆ ತಿಕಾ ಲಾಯ್ಲಾ ನ್ಹಯ್ ಆಸ್ತಾಂ ಕೆದ್ನಾಂ ತರ್‍ಯ್ ತಿಚ್ಯಾ ಮತಿಕ್ ವಾಚ್ಚೆಂ ಪ್ರಯತ್ನ್ ಹಾವೆಂ ಕೆಲಾಂ? ಸರ್ವ್ ಮ್ಹಜ್ಯಾ ಖುಶೆ ಪರ್ಮಾಣೆ ತಿ ಚಲ್ತಾನಾ ಮ್ಹಾಕಾ ಸಗ್ಳೆಂಚ್ ಸುಲಭ್ ಜಾಲ್ಲೆಂ. ಮ್ಹಾಕಾ ಕಾಂಯ್ಚ್ ತಿಚ್ಯೆ ಥಾವ್ನ್ ರಗ್ಳೆ ಜಾಂವ್ಕ್ ನಾಂತ್. ತರ್ ತಿಕಾ....? ಮ್ಹಜ್ಯಾ ಖುಶೆ ಪರ್ಮಾಣೆ ಚಲೊಂಕ್ ತಿಕಾ ಕಿತ್ಲೆ ಕಶ್ಟ್ ಜಾಲ್ಯಾತ್ ಆಸ್ತೆಲೆ? ಮ್ಹಜ್ಯೆ ಖಾತಿರ್ ತಿಣೆಂ ಆಪ್ಣಾಚ್ಯಾ ಕಿತ್ಲ್ಯಾ ಸಪ್ಣಾಂಕ್ ಮುಡ್ಡುನ್ ತ್ಯಾ ಕಚ್ರ್ಯಾಂತ್ ಉಡಯ್ಲಾಂ ಆಸ್ತೆಲೆಂ....? ಶಬೀರಾಚ್ಯಾ ಮತಿಂತ್ ಚಿಂತ್ನಾಂ ಧಾಂವ್ತಾನಾ ತೊ ಸಗ್ಳೊಚ್ ಹಾಲ್ಲೊ. ತಾಚೆಂ ಕಾಳಿಜ್ ಭರೊನ್ ಆಯ್ಲೆಂ. ತಾಣೆಂ ಚಿಂತುಂಕ್‌ಚ್ ನಾತ್ಲೆಲ್ಯಾ, ಸಗ್ಳ್ಯಾಂ ವರ್ನಿಂ ವರ್ತ್ಯಾ ವಿಚಾರಾಕ್ತಾಚ್ಯಾ ಧುವೆನ್ ತಾಚ್ಯಾ ಮತಿಂತ್ ಜಾಗಯಿಲ್ಲೆಂ. ಆಪ್ಣೆಂ ಎದೊಳ್ ಪಾಸೊನ್ ಆಧಾರುನ್ ಆಯಿಲ್ಲಿ ಚೂಕ್ ತಾಚ್ಯಾ ದೊಳ್ಯಾಂ ಮುಕಾರ್ ಉಭಿ ಜಾಲ್ಲಿ. ಹ್ಯಾ ತಾಣೆಂ ಆಧಾರ್‍ಲ್ಲ್ಯಾ ಚೂಕಿ ಥಾವ್ನ್ ಶಬೀರಾಕ್ ಆಪ್ಣಾ ವಯ್ರ್ಚ್ ಲಜ್ ಭೊಗ್ಲಿ ಜಾಲ್ಯಾರ್ ಜಿವಿತಾಂತ್ ಪಯ್ಲೆ ಪಾವ್ಟಿಂ ತಾಕಾ ಆಪ್ಲ್ಯಾ ಬಾಯ್ಲೆ ವಯ್ರ್ ಗೌರವ್ ಉದೆಲೊ. ಬಾಯ್ಲೆಕ್ ತೊ ಮಾನ್ ಮರ್ಯಾದೆನ್ ಲೆಕ್ತಾಲೊ ವ್ಹಯ್ ತರ್‍ಯ್ ಗೌರವ್ ಆನಿ ಮಾನ್ ಮರ್ಯಾದೆ ಮಧೆಂ ಕಿತ್ಲೊ ಅಂತರ್ ಆಸಾ ತೆಂ ತೊ ಆತಾಂ ಸಮ್ಜಾಲೊ.

"ಕಿತೆಂ ಜಾಲೆಂ ಅಬ್ಬೂ? ಹಾಂವ್ ಕಾಂಯ್ ಚುಕೊನ್ ಉಲಯ್ಲಿಂ...?" ಆಪ್ಲೊ ಬಾಪಯ್ ಆಪ್ಲ್ಯಾ ಸವಾಲಾಕ್ ಲಾಗೊನ್ ಚಿಂತೇಸ್ತ್ ಜಾಲ್ಲ್ಯಾ ಪರಿಂ ಆಲಿಯಾಕ್ ದಿಸ್ಲೊ.

"ನಾ ಬೇಟಾ... ತಶೆಂ ಕಾಂಯ್ ನಾ!" ಶಬೀರಾನ್ ಆತಾಂ ಆಪ್ಲ್ಯಾ ಧುವೆಕ್ ಪಳಯ್ಲೆಂ.

ತಾಚ್ಯಾ ದೊಳ್ಯಾಂ ಮುಕಾರ್ ಎಕಾ ಕುಶಿನ್ ತಾಚೆಂ ಧುವ್ ಆನಿ ಎಕಾ ಕುಶಿನ್ ತಾಚಿ ಬಾಯ್ಲ್ ಉಭಿ ಜಾಲ್ಲಿ.

ಜೆಂ ಕಿತೆಂ ತಾಚ್ಯಾ ಬಾಯ್ಲೆನ್ ಸಾಕ್ರಿಫಿಸ್ ಕೆಲ್ಲೊ ತ್ಯಾ ಸಾಕ್ರಿಫಿಸಾಕ್ ತಾಚೆಂ ಧುವ್ ಪಾಟಿಂ ಮಾಗ್ತಾಲೆಂ!

ದೊಗಾಂಯ್ಚಿ ತಿಚ್ಚ್ ಚಲಿಯೆ ಜಾತ್!

ದೊಗಾಂಯ್ಚೊ ತೊಚ್ ಜೀವ್!!

ದೊಗಾಂಯ್ಚಿ ತಿಚ್ ಆಶಾ!!!

ಪುಣ್ ವಿಚಾರ್.....?

ಎಕ್ಲ್ಯಾನ್ ವಿಸ್ರಾಲ್ಲೆ! ಎಕ್ಲ್ಯಾನ್ ಜಾಗಯಿಲ್ಲೆ!

ಶಬೀರಾಕ್ ಆತಾಂ ಆಪ್ಲ್ಯಾ ಚಿಂತ್ಪಾಚಿ ಬುನ್ಯಾದ್ ಹಾಲ್‌ಲ್ಲ್ಯಾ ಪರಿಂ ಜಾಲಿ. ಆಪ್ಲ್ಯಾ ಧುವೆಚ್ಯಾ ಚಿಂತ್ಪಾ ವಯ್ರ್ ತಾಕಾ ಅಭಿಮಾನ್ ಉದೆತಾನಾ ಆಪ್ಲ್ಯಾ ಬಾಯ್ಲೆ ವಯ್ರ್ ತಾಕಾ ಗೌರವ್ ಉದೆಲೊ. ಪುಣ್ ಆಲಿಯಾಚಾ ಹ್ಯಾ ಚಿಂತ್ಪಾ ಥಾವ್ನ್ ತಾಚೊ ಫುಡಾರ್ ಶಾಭೀತಾಯೆನ್ ಜಯ್ತಾಕ್ ಪಾವೊಂಕ್ ಸಕ್ತಲೊ? ಮ್ಹಳ್ಳ್ಯಾ ವಿಶಿಂ ಚಿಂತಾನಾ ಮಾತ್ರ್ ಶಬೀರಾಕ್ ಆಪ್ಲ್ಯಾ ಧುವೆಕ್ ಕಶೆಂ ಸಮ್ಜಾಂವ್ಚೆಂ ತೆಂ ಕಳ್ಳೆಂ ನಾ.

"ಬೇಟಾ.... ಜೆಂ ಕಿತೆಂ ತುಂ ಚಿಂತಾಯ್ ತೆಂ ತುಜ್ಯಾ ದೊಳ್ಯಾಂಕ್ ಸಾರ್ಕೆಂ ದಿಸ್ತಾ. ಕಿತ್ಯಾಕ್ ಮ್ಹಳ್ಯಾರ್ ತುಂ ಎಕಾ ಚಲಿಯೆಚಾ ನದ್ರೆನ್ ಹ್ಯಾ ಸಂಸಾರಾಕ್ ಪಳಯ್ನಾಯ್. ತುಂ ಫಕತ್ತ್ ಎಕಾ ಜಿವಾಚಾ ನದ್ರೆನ್ ಹ್ಯಾ ಸಂಸಾರಾಕ್ ಪಳಯ್ತಾಯ್!"

"ವ್ಹಯ್ ಅಬ್ಬೂ! ಹಾಂವ್ ಏಕ್ ಜೀವ್ ಜಾವ್ನ್ ಹ್ಯಾ ಸಂಸಾರಾಂತ್ ಪಯ್ಲೆಂ! ಆನಿ ಏಕ್ ಚಲಿ ಜಾವ್ನ್ ಹ್ಯಾ ಸಮಾಜೆಂತ್ ಉಪ್ರಾಂತ್! ಹ್ಯಾಚ್ ಖಾತಿರ್ ಹಾಂವ್ ಮ್ಹಜ್ಯಾ ಜಿವಾಕ್ ಪಯ್ಲೆಂ ಚಿಂತಾಂ. ಮ್ಹಜ್ಯಾ ಚಲಿಯೆಪಣಾಕ್ ಉಪ್ರಾಂತ್ ಚಿಂತಾ!" ಆಲಿಯಾಚಾ ಹರ್ಯೆಕಾ ಜವಾಬೆಂತ್ ಸತ್ ಉಮಾಳುನ್ ಮ್ಹಳ್ಳ್ಯಾ ಪರಿಂ ದಿಸ್ತಾಲೆಂ.

"ಆನಿ ಹಾಂವ್ ತುಕಾ ಕಶೆಂ ಸಮ್ಜಾಂವ್ ಬೇಟಾ....!" ಶಬೀರ್ ದುಖಿನ್ ಮ್ಹಳ್ಳ್ಯಾಪರಿಂ ಪಿಂರ್ಗಾಲೊ. "ಹೆಂ ತುಜ್ಯಾ ಫುಡಾರಾಚೆಂ ಸವಾಲ್! ತುಜೊ ಫುಡಾರ್ ಕಸೊ ಬರೊ ಕರುಂಕ್ ಜಾತಾ ತ್ಯಾ ವಿಶಿಂ ತುವೆಂ ಚಿಂತುಂಕ್ ಜಾಯ್ ಶಿವಾಯ್......!" ಆಲಿಯಾಚೆಂ ಚಿಂತಾಪ್ ಆಲಿಯಾಚಾ ಫುಡಾರಾಕ್ ಖಂಯ್ ವರುನ್ ಪಾವಯ್ತ್ ಮ್ಹಳ್ಳ್ಯಾ ವಿಶಿಂ ಶಬೀರಾಕ್ ಆತಾಂ ಖಂತ್ ಉಬ್ಜಾಲಿ. "ಸಾರಾ.... ತುಂ ಜಾಲ್ಯಾರ್‍ಯ್ ತಿಕ್ಕೆ ಆಲಿಯಾಕ್ ಸಮ್ಜಯ್!" ನಿರಾಶೆನ್ ಮ್ಹಳ್ಳ್ಯಾ ಪರಿಂ ತೊ ಆಪ್ಲ್ಯಾ ಬಾಯ್ಲೆಚಾ ಕುಶಿನ್ ಘುಂವ್ಲೊ.

"ಮ್ಹಕಾಚ್ ಕಳಾನಾ ಆಲಿಯಾ ಹಾಂವ್ ತುಕಾ ಕಶೆಂ ಸಮ್ಜಾಂವ್? ತುಜ್ಯಾ ಅಬ್ಬೂನ್ ತುಕಾ ಇತ್ಲೆಂ ಸಮ್ಜಂವ್ಚೆಂ ಪ್ರಯತ್ನ್ ಕರ್‍ತಾನಾಂಯ್....?"

"ತುಂ ಭಿಯೆತಾಯ್ ಅಮ್ಮಿ!" ಆಲಿಯಾನ್ ಆಪ್ಲ್ಯಾ ಆವಯ್ಕ್ ಪಳೆಲೆಂ. ".... ಚಲಿಯೆಚಾ ಜಿವಿತಾ ಥಾವ್ನ್ ಭಾಯ್ರ್ ಯೇವ್ನ್ ಪಳಂವ್ಕ್ ತುಂ ಭಿಯೆತಾಯ್! ಹ್ಯಾಚ್ಚ್ ಕಾರಾಣಾಕ್ ಲಾಗೊನ್ ತುಕಾ ಕಾಂಯ್ ಉಲಂವ್ಚೆಂ ಧಯ್ರ್ ಯೇನಾ!"

"ತಶೆಂ ನ್ಹಯ್ ಆಲಿಯಾ! ಆಮ್ಮಿ ತಶಿ ನ್ಹಯ್!" ಆತಾಂ ಅಕ್ಬರ್ ಉಲಯ್ಲೊ. "ತುಂ ಚಲಿ ವ್ಹಯ್! ತುಕಾ ತುಜೆಂ ಜಿವಿತ್ ಜಿಯೆಂವ್ಕ್ ಜಾಯ್ ವ್ಹಯ್! ಪುಣ್ ತುಂ ಎಕಾ ಕುಟ್ಮಾಚ್ಯಾ ಎಕ್ವಟಾಂತ್ ರಿಗ್ಲಾಂಯ್ ಮ್ಹಣ್ತಾನಾ ಹಾಂಗಾಸರ್ ತುಜೆಂ ಮ್ಹಳ್ಳೊ ವಿಚಾರ್ ಉಬ್ಜಾನಾ. ತುಜ್ಯಾಂಚೊ ಮ್ಹಳ್ಳೊ ವಿಚಾರ್ ಉಬ್ಜಾತಾ. ಅಮ್ಮಿನ್‌ಯ್ ತಿಚೆಂ ಮ್ಹಳ್ಳೆಂ ಕಾಂಯ್ ಚಿಂತುಂಕ್ ನಾ. ತಿಣೆಂ ಚಿಂತ್ಲಾಂ ಜಾಲ್ಯಾರ್ ಫಕತ್ತ್ ತಿಚ್ಯಾಂಚಾ ವಿಶಿಂ!" ಅಕ್ಬರ್ ಆಪ್ಲ್ಯಾ ಆವಯ್ಕ್ ಗೌರವಾನ್ ಪಳೆತಾಲೊ. ಅಕ್ಬರಾಚಾ ಹ್ಯಾ ಉತ್ರಾಂನಿ ಎಕಾ ಖಿಣಾಕ್ ಸಾರಾಕ್ ಆಪ್ಲೆಂ ಜಿವಿತ್ ಸಾರ್ಥಕ್ ಜಾಲ್ಲೊ ಆನುಭವ್ ಜಾಲೊ. ತಿಣೆಂ ಕೆಲ್ಲ್ಯಾ ಸಾಕ್ರಿಫಿಸಾಕ್ ಸಮ್ಜಾಲ್ಲ್ಯಾ ಆಪ್ಲ್ಯಾ ಭುರ್ಗ್ಯಾಂ ವಯ್ರ್ ತಿಕಾ ಅಭಿಮಾನ್ ಭಗ್ಲೊ.

"ಹೆಂ ಫಕತ್ತ್ ಚಲಿಯೆಕ್ ಮಾತ್ರ್ ಕಿತ್ಯಾಕ್? ಚಲ್ಯಾಕ್ ಕಿತ್ಯಾಕ್ ನಜೊ?" ಆಲಿಯಾನ್ ಅಕ್ಬರಾಕ್ ಸವಾಲ್ ಕೆಲೆಂ. "ಮ್ಹಜ್ಯಾ ಘೊವಾಚಿ ಮ್ಹಾಕಾ ಗರ್ಜ್ ಆಸಾ ವ್ಹಯ್. ಪುಣ್ ಘೊವ್‌ಚ್ ಮ್ಹಜಿ ಗರ್ಜ್ ನ್ಹಯ್ ಅಕ್ಬರ್! ಘೊವಾ ಶಿವಾಯ್ ಕಿತೆಂ ಬಾಯ್ಲ್ ಆಪ್ಲೆಂ ಜಿವಿತ್ ಕಾಡಿನಾ. ಕುಟ್ಮಾ ಶಿವಾಯ್ ಕಿತೆಂ ಏಕ್ ಬಾಯ್ಲ್ ಆಪ್ಲ್ಯಾ ಸಂಸಾರಾಂತ್ ಜಿಯೆನಾ? ತಾಂಚೆಂ ತಾಂಚೆಂ ಜಿವಿತ್ ಸಗ್ಳ್ಯಾಂಕ್‌ಯ್ ಕಾಡುಂಕ್ ಆಸಾ! ತರ್ ಮ್ಹಾಕಾ ಮಾತ್ರ್ ಹೆಂ ಚಲಿ ಮ್ಹಳ್ಳೆಂ ಅಭಲ್‌ಪಣ್ ಕಿತ್ಯಾಕ್?"

"ಪಳೆ ಬೇಟಾ....." ಸಾರಾನ್ ಆತಾಂ ಆಪ್ಲ್ಯಾ ಧುವೆಕ್ ಸಮ್ಜಂವ್ಕ್ ಜಾಯ್ ಆಸ್‌ಲ್ಲೆಂ. "..... ತುವೆಂ ತುಜೆಂ ಕಾಮ್ ಸೊಡ್‌ಲ್ಲ್ಯಾಂತ್ ಕಿತೆಂ ವಾಯ್ಟ್ ಆಸಾ? ತುಜ್ಯಾ ಘೊವಾಕ್ ಜರ್ ಪಸಂದ್ ನಾ ತುಕಾ ತೆಂ ಕಾಮ್ ಕರ್‍ಚಿ ಗರ್ಜ್ ತರ್‍ಯ್ ಕಿತೆಂ?" ತಿಣೆಂ ಥೊಡೆಂ ಧಯ್ರ್ ಆರಾಯ್ಲೆಂ.

"ತರ್ ಮ್ಹಾಕಾ ಮ್ಹಜ್ಯಾ ಖುಶಿಯೆಚಾ ವಿಶಿಂ ಚಿಂತ್ಚೆಂ ಕಾಂಯ್ ಹಕ್ಕ್ ನಾ ಅಮ್ಮೀ...?"

ಸಾರಾಕ್ ಆಪ್ಲ್ಯಾ ಧುವೆ ತಿತ್ಲಿ ಬುದ್ವಂತ್ಕಾಯ್ ನಾತ್‌ಲ್ಲಿ. ತಿ ತಾಚ್ಯೆ ತಿತ್ಲಿ ಶಿಕೊಂಕ್ ನಾತ್‌ಲ್ಲಿ. ಫಕತ್ತ್ ತಿ ಚಲಿಯೆಚೆಂ ಜಿವಿತ್ ಮ್ಹಳ್ಯಾರ್ ಕಿತೆಂ ಮ್ಹಣೊನ್ ಆಪ್ಲ್ಯಾ ಆವಯ್ ಥಾವ್ನ್ ಶಿಕ್‌ಲ್ಲಿ. ತ್ಯಾ ಪರ್ಮಾಣೆ ತಿಣೆಂ ಆಪ್ಲೆಂ ಜೀವನ್ ಸಾಗ್ಸಿಲ್ಲೆಂ. ಪುಣ್ ಆಲಿಯಾ ತಿಚೆಂ ಧುವ್ ತಿಚ್ಯಾ ಸಮ್ಜಣೆ ಭಾಯ್ರ್ ಆಸ್‌ಲ್ಲೆಂ. ಆಲಿಯಾಕ್ ಸವಾಲ್ ಕರುಂಕ್ ಜಾಂವ್ ಯಾ ತಾಚ್ಯಾ ಸವಾಲಾಂಕ್ ಜವಾಬ್ ದೀಂವ್ಕ್ ತಿಕಾ ಕಾಂಯ್ಚ್ ಸಮ್ಜಾನಾತ್‌ಲ್ಲೆಂ.

ಆಲಿಯಾಕ್ ತಾಚ್ಯಾ ಆವಯ್ ಬಾಪಾಯ್ನ್ ಕಿತ್ಲೆಂ ಸಮ್ಜಾಯ್ಲ್ಯಾರ್‍ಯ್ ತ್ಯಾ ಸಮ್ಜಣೆಕ್ ಮಾಂದುನ್ ಘೆಂವ್ಕ್ ಆಲಿಯಾ ತರ್‍ಯ್ ಒಪ್ವಾಲೆಂ ನಾ.

ಆಪ್ಲ್ಯಾ ಒಪ್ವಣೆಂತ್ ಆನಿ ಆಪ್ಣೆ ಮಾಂದುನ್ ಘೆಂವ್ಚ್ಯಾಂತ್ ಫಕತ್ತ್ ಆಪ್ಲಿ ಸಲ್ವಣ್ ಮಾತ್ರ್ ನ್ಹಯ್ ಬಗಾರ್, ಸಗ್ಳ್ಯಾ ಚಲಿಯೆ ಕುಳಿಯೆಚಿ ಸಲ್ವಣ್ ಆಟಾಪುನ್ ಆಸಾ. ಚಲಿ ಚಲ್ಯಾ ಖಾತಿರ್ ಕಸೊಲೊಯ್ ತ್ಯಾಗ್ ಕರುಂಕ್ ತಯಾರ್ ಆಸಾ. ಪುಣ್ ಆಪ್ಲ್ಯಾ ಅಂತಃಕರಣಾಚೊ ತ್ಯಾಗ್ ಮ್ಹಳ್ಯಾರ್ ಆಪ್ಲ್ಯಾಪಣಾಚೊ ತ್ಯಾಗ್. ಹ್ಯಾ ತ್ಯಾಗಾ ವರ್ವಿಂ ಚಲಿ ಮಹಾನ್ ಜಾಯ್ನಾ ಬಗಾರ್ ದೀಸ್ ವೆತಾಂ ವೆತಾಂ ತಿ ಚಡ್ ಆನಿ ಚಡ್ ಚಲ್ಯಾಚಾ ಪಾಂಯಾಥಳಾರ್ ದಪ್ಟೊನ್ ವೆತಾ ಮ್ಹಣೊನ್ ಆಲಿಯಾ ಜಾಣಾಂ ಜಾಲ್ಲೆಂ.

ಆಲಿಯಾಚಾ ರಾಜಿ ಜಾಯ್ನಾತ್‌ಲ್ಲ್ಯಾ ತಾಚ್ಯಾ ವಿಚಾರಾಂ ವರ್ವಿಂ ತಾಚ್ಯಾ ಆನಿ ತಾಚ್ಯಾ ಘೊವಾ ಮಧ್ಲೊ ದೈಹಿಕ್ ಆನಿ ಆತ್ಮಿಕ್ ಸಂಭಂಧ್ ಜೆಮೆಂವ್ಕ್ ಲಾಗ್ಲೊ. ಹ್ಯಾ ಜೆಮೆವ್ಣೆಂತ್, ಹಾಂಚಾ ದೊಗಾಂ ಮಧ್ಲ್ಯಾ ಮೊಗಾ ದಿವ್ಯಾಕ್ ಜಳೊಂಕ್ ಜಾಯ್ ಆಸ್ಚಾ ತೆಲಾ ಥಂಯ್ ತಾಂಕಾ ವಿಸರ್ ಪಡ್ಲಿ. ದಿಸಾ ವಯ್ರ್ ದೀಸ್ ಧಾಂವ್ತಾನಾ ತೆಂ ತಾಂಕಾ ಸವಯೆರ್ ಪಡ್ಲೆಂ. ಹ್ಯಾ ವರ್ವಿಂ ನಾಸಿರಾಕ್ ಆತಾಂ ಆಪ್ಲ್ಯಾ ಬಾಯ್ಲೆಚಿ ಗರ್ಜ್ ಆಸಾ ಮ್ಹಣ್ ತಾಕಾ ಭೊಗಾನಾತ್‌ಲ್ಲೆಂ.

ದುಸ್ರ್ಯಾ ವಾಟೆನ್......

ಆಪ್ಲ್ಯಾ ಘರಾಚೆಂ ವಾತಾವರಣ್ ಆಲಿಯಾ ಥಾವ್ನ್ ಪಾಡ್ ಜಾಲಾಂ ತೆಂ ಸಮ್ಜಾಲ್ಲೊ ಸುಲೇಮಾನ್ ಘೊವಾ ಬಾಯ್ಲೆ ಮಧೆಂ ಉಣೆಂ ಜಾಲ್ಲ್ಯಾ ಸಂಭಂಧಾಕ್ ನಿಯಾಳುನ್ ತಾಚ್ಯಾ ಘರಾಚಿ ಪರಿಸ್ಥಿತಿ ಸುಧಾರುಂಕ್ ಚಿಂತಿಲಾಗ್ಲೊ. ಬೋವ್ಶಾ ಘೊವ್ ಆನಿ ಬಾಯ್ಲ್ ಸಾಂಗಾತಾ ಜಿಯೆಂವ್ಕ್ ಲಾಗ್ಲಿಂ ತರ್ ತಾಂಕಾ ಎಕಾಮೆಕಾಚಿ ಗರ್ಜ್ ಕಿತೆಂ ಮ್ಹಳ್ಳೆಂ ತಿಂ ಸಮ್ಜತೆಲಿಂ ಆನಿ ತಿಂ ದೊಗಾಂಯ್ ಪರ್‍ತ್ಯಾನ್ ಏಕ್ ಜಾತೆಲಿಂ ಮ್ಹಳ್ಳೆಂ ತಾಚೆಂ ಚಿಂತಾಪ್. ಹ್ಯಾ ಖಾತಿರ್ ಸುಲೇಮಾನಾನ್ ನಾಸಿರಾಕ್ ಆನಿ ಆಲಿಯಾಕ್, ತಾಂಚ್ಯಾ ವಿಂಗಡ್ ವಸ್ತೆಚೆಂ ಘರ್ ಕರುನ್ ದಿಲೆಂ. ಹಾಚ್ಯೆ ಥಾವ್ನ್ ಆಲಿಯಾ ಆನಿ ನಾಸಿರ್ ಆತಾಂ ತಾಂಚ್ಯಾ ಮಾಲ್ಗಡ್ಯಾ ಘರಾ ಥಾವ್ನ್ ವಿಂಗಡ್ ರಾವೊಂಕ್ ಲಾಗ್ಲಿಂ. ಪುಣ್ ಬಿಜ್ನೆಸ್ ಮಾತ್ರ್ ಸುಲೇಮಾನಾ ಅಜೂನ್ ಆಪ್ಲ್ಯಾ ಹಾತಾಂತ್‌ಚ್ ಸಾಂಬಾಳುನ್ ದವರ್‍ಲೆಂ. ಆಪ್ಲ್ಯಾ ಬಿಜ್ನೆಸಾಕ್ ಇತ್ಲ್ಯಾ ವೆಗ್ಗಿ ವಾಂಟುನ್ ದೀಂವ್ಕ್ ತೊ ತಯಾರ್ ನಾತ್‌ಲ್ಲೊ.

ಹ್ಯಾ ಉಪ್ರಾಂತ್ ಆಲಿಯಾ ಆನಿ ನಾಸಿರ್ ದೊಗಾಂಯ್ ವಿಂಗಡ್ ಜಿಯೆಂವ್ಕ್ ಲಾಗ್ಲಿಂ. ತಾಂಕಾಂ ಆತಾಂ ತಿಂಚ್ ಎಕಾಮೆಕಾ ಪಾವೊಂಕ್ ಜಾಯ್ ಶಿವಾಯ್ ದುಸ್ರೆಂ ಪಾಂವ್ಚೆಂ ಕೊಣ್‌ಯ್ ನಾ ತೆಂ ಸಮ್ಜೊನ್ ಸವ್ಕಾಸ್ ಎಕಾ ಮೆಕಾ ತಿಂ ಲಾಗಿಂ ಆಯ್ಲಿಂ ಜಾಲ್ಯಾರ್‍ಯ್ ನಾಸಿರ್ ಆನಿ ತಾಚ್ಯಾ ಕುಟ್ಮಾ ಮಧೆಂ ನಾಸಿರಾಚೊ ತೊಚ್ ಆದ್ಲೊ ಸಂಭಂಧ್ ಅಜೂನ್ ಘಟ್ ಆಸ್‌ಲ್ಲೊ. ಎಕೇಕ್ ಪಾವ್ಟಿಂ ತೊ ಆಪ್ಲ್ಯಾ ಬಾಯ್ಲೆನ್ ಸಾಂಗ್‌ಲ್ಲೆಂ ಸೊಡುನ್ ಆಪ್ಲ್ಯಾ ಘರ್‍ಚ್ಯಾಂಕ್ ಚಡ್ ಆಯ್ಕಾತಾಲೊ. ಹ್ಯಾ ವಿಶಯಾಂತ್ ಆಲಿಯಾಕ್ ಬೆಜಾರ್ ಖಂಡಿತ್ ಜಾತೆಂ ನಾ ಜರ್ ತರ್ ನಾಸಿರಾಚಾ ಘರ್‍ಚ್ಯಾಂನಿಯ್ ಆಲಿಯಾ ಸಾಂಗಾತಾ ತೊಚ್ ಪಯ್ಲೆಂಚೊ ಸಂಭಂಧ್ ದವರ್‍ಲ್ಲೊ ಜಾಲ್ಯಾರ್! ಪುಣ್ ತಿಂ ಆಪ್ಲ್ಯಾ ಸುನೆಚ್ಯಾ ಸಾಂಗಾತಾ ಹೊ ಸಂಭಂಧ್ ದವರುಂಕ್ ತಯಾರ್ ನಾತ್‌ಲ್ಲಿಂ. ಆಪ್ಲ್ಯಾ ಕುಟ್ಮಾಂತ್ ಆಜ್ ಜರ್ ತರ್ ಫಾಂಟೆ ಫುಟ್ಲ್ಯಾತ್ ಜಾಲ್ಯಾರ್ ತಾಕಾ ಆಲಿಯಾಚ್ ಕಾರಾಣ್ ಮ್ಹಣೊನ್ ತಿಂ ಮಾಂದ್ತಾಲಿಂ.

ತ್ಯಾ ಭಾಯ್ರ್....!

ಹ್ಯಾ ದಿಸಾಂನಿ ಅಮೀನಾ ನಾಸಿರಾಕ್ ಚಡ್ ಲಾಗಿಂ ಜಾತಾಲೆಂ. ಪಯ್ಲೆಂ ತರ್‍ಯ್ ಆಲಿಯಾ ಹ್ಯಾ ಅಮೀನಾ ವಿಶ್ಯಾಂತ್ ತಿತ್ಲೆಂ ಕಾಂಯ್ ಚಿಂತುಂಕ್ ವಚಾನಾತ್‌ಲ್ಲೆಂ. ಪುಣ್ ಆತಾಂ...! ಆತಾಂ ಆಲಿಯಾ ಹ್ಯಾ ಅಮೀನಾಚಾ ವಿಶ್ಯಾಂತ್‌ಯ್ ಮೆತೆರ್ ಜಾಂವ್ಕ್ ಲಾಗ್ಲೆಂ. ಕಾರಾಣ್, ಎದೊಳ್ ವರೇಗ್ ಟೆಲಿಪೊನಾರ್ ಆಸ್‌ಲ್ಲೊ ಸಂಭಂಧ್ ಆತಾಂ ಘರ್‍ಚ್ಯಾ ದಾರಾರ್ ಪಾವ್‌ಲ್ಲೊ. ಅಮೀನಾನ್ ಆಲಿಯಾಚಾ ಘರಾಚಿಂ ಮೆಟಾಂ ಚಡ್ಚೆಂ ಪ್ರಯತ್ನ್ ಕೆಲ್ಲೆಂ.

"ನಾಸಿರ್.....?, ಹೆಂ ಘರ್ ಮ್ಹಜೆಂ ಆನಿ ತುಜೆಂ. ಹ್ಯಾ ಘರಾಂತ್ ಪರ್‍ಕಿ ಚಲಿ ತುಕಾ ಸೊಧುನ್ ಯೆತಾ ತೆಂ ಮ್ಹಾಕಾ ಪಸಂದ್ ಜಾಯ್ನಾ!" ಆಲಿಯಾ ಉಸ್ಮೊಡ್ತಾಲೆಂ. ಜೆದ್ನಾಂ ಜೆದ್ನಾಂ ಅಮೀನಾ ಆಲಿಯಾಚಾ ಘರಾ ಯೆತಾ ತ್ಯಾ ದೀಸ್ ಆಲಿಯಾ ಆನಿ ನಾಸಿರಾ ಮಧೆಂ ಮನಸ್ತಾಪ್ ಜಾತಾಲೊ. ಪುಣ್ ಹರ್ಯೆಕ್ ಪಾವ್ಟಿಂ ನಾಸಿರ್ ಆಲಿಯಾಕ್ ಫಕತ್ತ್ ಸಮ್ಜಾಂವ್ಕ್ ಮಾತ್ರ್ ಪ್ರಯತ್ನ್ ಕರ್‍ತಾಲೊ ಶಿವಾಯ್ ತಾಚ್ಯಾ ಆನಿ ಅಮೀನಾಚಾ ಮಧ್ಲೊ ಸಂಭಂಧ್ ಕಾಂಯ್ ಉಣೊ ಜಾಂವ್ಕ್ ನಾತ್‌ಲ್ಲೊ.

"ಪಳೆ ಆಲಿಯಾ! ತುಕಾ ಹಾಚ್ಯಾ ಪಯ್ಲೆಂಯ್ ಹಾವೆಂ ಸಭಾರ್ ಪಾವ್ಟಿಂ ಸಾಂಗ್ಲಾಂ. ಅಮೀನಾ ಕಾಂಯ್ ಪರ್‍ಕಿ ನ್ಹಯ್.ಆಮ್ಚೆ ಮಧೆಂ ಕುಟ್ಮಾ ಸಂಭಂಧ್ ಆಸಾ. ಹ್ಯಾಚ್ ಸಂಭಂಧಾನ್ ತೆಂ ಹಾಂಗಾ ಯೆತಾ ಶಿವಾಯ್....., ತುವೆಂ ಚಿಂತ್ಚ್ಯಾ ಪರಿಂ ಕಾಂಯ್ ನಾ!" ನಾಸಿರ್ ಶಾಂತ್‌ಪಣಿಂ ಜವಾಬ್ ದಿತಾಲೊ.

"ಸಂಭಂಧ್ ಆಸ್ಲ್ಯಾರ್ ತೊ ಕುಟ್ಮಾ ಮಧೆಂ! ಅಮೀನಾ ಥಂಯ್ ತುಜೊ ಸಂಭಂಧ್ ಮ್ಹಾಕಾ ಪಸಂದ್ ಜಾಯ್ನಾ!" ಆಲಿಯಾ ಖಡಾ ಖಂಡಿತ್ ಉಲಯ್ತಾಲೆಂ.

ಖಂಯ್ಚಾಯ್ ವಿಶಯಾಂತ್ ಆಲಿಯಾ ನಿರ್ಧಾರ್ ಘೆತಾನಾ ತೆಂ ವೆಳಾಕ್ ಚಿಂತುನ್ ರಾವಾನಾ. ತಶೆಂಚ್ ತೊ ನಿರ್ಧಾರ್ ಉಗ್ಡಾಪೊ ಕರುಂಕ್‌ಯ್ ತೆಂ ಪಾಟಿಂ ಮುಕಾರ್ ಪಳೆನಾ. ಮತಿಂತ್ ಉದೆಲ್ಲೆಂ ತೆಂ ತಾಚ್ಯಾ ಜಿಬೆರ್ ವ್ಹಾಳೊಂಕ್ ವೆಳಾಚಿ ಗರ್ಜ್‌ಚ್ ನಾತ್ಲೆಲ್ಯಾನ್ ತಾಚೊ ಸ್ವಭಾವ್ ಬೋವ್ಶಾ ನಾಸಿರಾಕ್‌ಯ್ ಬರೊ ಲಾಗಾನಾತ್‌ಲ್ಲೊ.

ಆಜ್ ಜಾಲ್ಯಾರ್‍ಯ್ ಜಾಲ್ಲೆಂ ತೆಂಚ್!

ಅಮೀನಾ ಕಸಲ್ಯಾಗೀ ತಾಚ್ಯಾ ಕಾಮಾನ್ ನಾಸಿರಾಕ್ ಮೆಳೊಂಕ್ ತಾಚ್ಯಾ ಘರಾ ಆಯಿಲ್ಲೆಂ. ಹ್ಯಾ ಖಾತಿರ್ ಆಲಿಯಾನ್ ವ್ಹಡ್ಲೆಂ ರಂಪಾಟಾಚ್ ಕೆಲ್ಲೆಂ.

"ತುಂ ಜಾಣಾಂಯ್ ಆಲಿಯಾ....?" ಆಲಿಯಾಚಾ ಬಡ್ಬಡ್ಣೆಕ್ ನಾಸಿರ್ ಉಲಯ್ಲೊ.

".........?" ನಾಸಿರಾಚ್ಯಾ ಸವಾಲಾಕ್ ಆಲಿಯಾನ್ ಆಪ್ಲ್ಯಾ ಘೊವಾಕ್ ರಾವ್ಲೆಲ್ಯಾ ಕಡೆನ್ ಥಾವ್ನ್ ಘುಂವೊನ್ ಪಳೆಲೆಂ ಮಾತ್ರ್ ಶಿವಾಯ್ ತೆಂ ಕಾಂಯ್ ಉಲಯ್ಲೆಂ ನಾ.

"ತುಂ ಆಸಾಯ್ ಪಳೆ ವೆರ್ರಿ ಸೆಲ್ಫಿಶ್!" ನಾಸಿರಾಚಿ ನದರ್ ಆಲಿಯಾಕ್ ಜೊಕ್‌ಲ್ಲಿ. "......ತುಂ ತುಜ್ಯೆ ವಿಶಿಂ ಮಾತ್ರ್ ಚಿಂತಾಯ್ ಶಿವಾಯ್ ಹೆರಾಂ ವಿಶಿಂ ಚಿಂತಿನಾಂಯ್! ಕೆದಾಳಾಯ್ ತುಕಾ ತುವೆಂ ಕೆಲ್ಲೆಂಚ್ ಸಾರ್‍ಕೆಂ. ತುವೆಂ ಚಿಂತ್‌ಲ್ಲೆಂಚ್ ಬರೆಂ! ಏಕ್ ಪಾವ್ಟಿಂ ಹೆರಾಂಚಾ ವಿಶಿಂ ಚಿಂತುನ್ ಪಳೆ. ಅಮೀನಾ ಆಮ್ಚ್ಯಾಚ್ ಆಫೀಸಾಚಾ ಕಾಮಾನ್ ಮ್ಹಾಕಾ ಮೆಳೊಂಕ್ ಆಯಿಲ್ಲೆಂ ಶಿವಾಯ್ ದುಸ್ರ್ಯಾ ಕಸಲ್ಯಾಯ್ ಕಾರಾಣಾಕ್ ಲಾಗೊನ್ ನ್ಹಯ್! ತುಂ ಆತಾಂ ತೆಂ ಹಾಂಗಾ ಆಯಿಲ್ಲ್ಯಾಚೊ ವಿಶಯ್ ಕಾಡುನ್ ಬೆಶ್ಟೆಂ ಝಗಡ್ತಾಯ್ ಪಳೆ ಹಾಕಾ ಕಾಂಯ್ ಪುಣಿಂ ಕಾರಾಣ್ ಆಸಾ?" ರಾಗಾನ್ ಉಲಯಿಲ್ಲೊ ನಾಸಿರ್ ಸೊಫಾ ವಯ್ಲೊ ಉಟೊನ್ ಭಿತರ್ ಗೆಲೊ.

ಆಪ್ಲೊ ಘೊವ್ ಗೆಲ್ಲ್ಯಾ ತೆವ್ಶಿಂಚ್ ಪಳೆಲ್ಲೆಂ ಆಲಿಯಾ, ತೊ ಆಪ್ಲ್ಯಾ ನಿದ್ಚ್ಯಾ ಕುಡಾಕ್ ರಿಗೊನ್ ಆಲಿಯಾಚಾ ದೊಳ್ಯಾಂ ಮುಕ್ಲೊ ಮಾಯಾಗ್ ಜಾತಾನಾ,

"ಫ್........." ಶ್ವಾಸ್ ಸೊಡ್‌ಲ್ಲೆಂ ಆಲಿಯಾ ಸೊಫಾಕ್ ವೊಣ್ಕಾಲೆಂ.

"ಹಾಂವ್ ಸೆಲ್ಫಿಶ್....?"

"ಹಾಂವ್ ಮ್ಹಜ್ಯಾ ಸ್ವಾರ್ಥಾಚೆಂ ಮಾತ್ರ್ ಚಿಂತಾಂ.....?"

ಆಲಿಯಾಚಾ ಮತಿಂತ್ ಸವಾಲಾಂ ಉದೆಲಿಂ.

"ಹಾಂವ್ ಜರ್ ಸ್ವಾರ್ಥಿ ಜಾಲ್ಯಾರ್ ನಾಸಿರ್ ಕಿತ್ಯಾಕ್ ಮ್ಹಜ್ಯಾ ವಿಶಿಂ ಚಿಂತಿನಾ? ತೊ ಜಾಣಾಂ ಹಾಂವ್ ತಾಚೊ ಕಿತ್ಲೊ ಮೋಗ್ ಕರ್‍ತಾಂ ತೆಂ!"

ಆಲಿಯಾಚಾ ಮತಿಂತ್ ಪಯ್ಸ್ ಖಂಯ್ಚರ್‍ಗೀ ಏಕ್ ಬಂಜರ್ ಗುಡೊ ದಿಸೊನ್ ಯೇವ್ನ್ ತ್ಯಾ ಬಂಜರ್ ಗುಡ್ಯಾಚಾ ಶಿಖರಾರ್ ವ್ಹಡ್ಲ್ಯಾ ನಾದಾನ್ ಜಯ್ತ್ ಘಾಂಟ್ ವ್ಹಾಜ್ತಾ ತಶೆಂ ಜಾಲೆಂ. ತ್ಯಾ ಘಾಂಟಿಚೊ ನಾದ್ ತಾಚ್ಯಾ ಮತಿಕ್ ಕೆಪ್ಪೆಂ ಕರ್‍ತಾ ತಶೆಂ ತಾಕಾ ಭೊಗ್ತಾನಾ ಸೊಫಾ ವಯ್ಲೆಂ ತೆಂ ಉಟ್ಲೆಂ ಆನಿ ಭಿತರ್‍ಲ್ಯಾ ನಿದ್ಚಾ ಕುಡಾಕ್ ಗೆಲೆಂ.

ನಿದ್ಚಾ ಕುಡಾಂತ್ ನಾಸಿರ್ ಖಾಟಿಯೆರ್ ಬಸೊನ್ ಕಸಲೆಂಗೀ ತಾಚ್ಯಾ ಬಿಜ್ನೆಸಾಚೆಂ ಫೈಲ್ ಪಳೆತಾಲೊ. ತಾಚ್ಯಾ ದಾವ್ಯಾ ಕುಶಿಕ್ ತಾಚಿ ಬ್ರೀಫ್ ಕೇಸ್ ಉಗ್ತಿ ಆಸ್‌ಲ್ಲಿ.

ಸವ್ಕಾಸ್ ನಾಸಿರಾಲಾಗಿಂ ಆಯಿಲ್ಲೆಂ ಆಲಿಯಾ ಆಪ್ಲ್ಯಾ ಘೊವಾ ಲಾಗಿಂಚ್ ಉಭೆಂ ಜಾಲೆಂ.

ಆಪ್ಣಾ ಸಾಮ್ಕಾರ್ ಉಭೆಂ ಜಾಲ್ಲ್ಯಾ ಆಲಿಯಾ ತೆವ್ಶಿಂ ಧ್ಯಾನ್ ದಿಂವ್ಚೆಂ ಪ್ರಯತ್ನ್ ನಾಸಿರಾನ್ ಕೆಲೆಂ ನಾ. ತೊ ಆಪ್ಲ್ಯಾ ಕಾಮಾರ್‍ಚ್ ಮಗ್ನ್ ಜಾಲೊ. ಅಶೆಂಚ್ ತೊ ಫೈಲ್ ಪರ್‍ತುಂಕ್ ಲಾಗ್ತಾನಾ,

"ಟಪ್ಪ್...!"

ಎಕ್‌ಚ್ಚ್ ಪಾವ್ಟಿಂ ಆಲಿಯಾನ್ ಆಪ್ಲೊ ಹಾತ್ ವಿಸ್ತರಾವ್ನ್ ಬ್ರೀಫ್ ಕೇಸಿಕ್ ಭಂಧ್ ಕೆಲೆಂ.

ಆಪ್ಲ್ಯಾ ಬಾಯ್ಲೆಚೆಂ ವರ್‍ತನ್ ಪಳೆಲ್ಲ್ಯಾ ನಾಸಿರಾನ್ ಕಾಂಯ್ಚ್ ಪ್ರತಿಕ್ರಿಯಾ ದಾಕಯ್ಲಿ ನಾ. ತೊ ತಶೆಂಚ್ ಆಪ್ಲ್ಯಾ ಫೈಲಾಕ್ ಪಳಂವ್ಚ್ಯಾರ್ ಪಡ್ಲೊ. ಆಲಿಯಾಚಾ ಹ್ಯಾ ಸದಾಂಚಾ ರಾಗಾಕ್ ತೊ ಬರೆಂ ಕರುನ್ ಜಾಣಾಂ ಆಸ್‌ಲ್ಲೊ.

ತಿತ್ಲೆಂಚ್!

ಎಕ್‌ಚ್ಚ್ ಪಾವ್ಟಿಂ ಬಾಗ್ವಾಲ್ಲ್ಯಾ ಆಲಿಯಾನ್ ನಾಸಿರಾಚಾ ಹಾತಾಂತ್ಲೆಂ ಫೈಲ್ ದಾಂಪ್ಲೆಂ.

ನಾಸಿರಾನ್ ಆತಾಂ ಆಪ್ಲಿ ತಕ್ಲಿ ಉಭಾರುನ್ ಆಪ್ಲ್ಯಾ ಬಾಯ್ಲೆಕ್ ಪಳಯ್ಲೆಂ. ತೊ ಕಾಂಯ್ ಉಲಯ್ಲೊ ನಾ. ಪರ್‍ತ್ಯಾಕ್ ತಾಣೆಂ ಫೈಲ್ ಉಗ್ತೆಂ ಕೆಲೆಂ.

ಆಲಿಯಾಚೊ ತೊಚ್ ಭರ್ತಾವ್!ಪರ್ತ್ಯಾಕ್ ತಾಣೆ ಫೈಲ್ ಭಂಧ್ಕೆಲೆಂ.

ಆತಾಂ ಏಕ್ ಲಾಂಭ್ ಶ್ವಾಸ್ ವೊಡ್ಲೆಲ್ಯಾ ನಾಸಿರಾನ್ ತಕ್ಲಿ ಉಕೊಲ್ನ್ ಆಪ್ಲ್ಯಾ ಬಾಯ್ಲೆಕ್ ಪಳಯ್ಲೆಂ.

ಆಲಿಯಾಚಾ ದೊಳ್ಯಾಂಕ್ ದೊಳೆ ಮೆಳಂವ್ಕ್ ತಾಚೆ ಥಾವ್ನ್ ಸಾದ್ಯ್ ಜಾಲೆಂ ನಾ. ಆಲಿಯಾಚಾ ದೊಳ್ಯಾಂನಿ ಏಕ್ ವಿಚಿತ್ರ್ ಪ್ರಕಾಸ್ ವ್ಹಾಳ್ತಾ ತಸೊ ತಾಕಾ ದಿಸ್ಲೊ. ತಾಣೆ ಆಪ್ಲಿ ದೀಶ್ಟ್ ಘುಂವ್ಡಾಯ್ಲಿ. ಆಲಿಯಾಚಾ ತ್ಯಾ ತೀಕ್ಷ್ಣ್ ಮಿಸ್ತೆರಾಭರಿತ್ ನದ್ರೆ ಮುಕಾರ್ ತೊ ಸಲ್ವಾತಾಲೊ.

ನಾಸಿರಾನ್ ಆಪ್ಲ್ಯಾ ಹಾತಾಂತ್ಲೆಂ ಫೈಲ್ ಬ್ರೀಫ್ ಕೇಸಿಚಾ ವಯ್ರ್ ಉಡಯ್ಲೆಂ. ತೊ ಆತಾಂ ಥಂಯ್ಚ್ ಖಾಟಿಯೆರ್ ಉದಾರೊ ಪಡ್ಲೊ.

ಹೆಂ ಪಳೆಲ್ಲೆಂ ಆಲಿಯಾ ಸವ್ಕಾಸ್ ತಾಚೆ ವಯ್ರ್ ಬಾಗ್ವಾಲೆಂ.

"ಮ್ಹಾಕಾ ಡಿಸ್ಟರ್ಬ್ ಕರಿನಾಕಾ ಆಲಿಯಾ! ತುಂ ತುಜೆಂ ಕಾಮ್ ಪಳೆ....!" ನಾಸಿರಾಚಿಂ ಉತ್ರಾಂ ಆಲಿಯಾಚಾ ಕಾನಾರ್ ಪಡ್ಲಿಂ ತರ್‍ಯ್ ತ್ಯಾ ಉತ್ರಾಂಚೊ ಪ್ರಭಾವ್ ಆಲಿಯಾಚೆರ್ ಜಾಲೊ ನಾ. ಆಪ್ಲ್ಯಾ ಘೊವಾ ವಯ್ರ್ ಗಳ್‌ಲ್ಲ್ಯಾ ತಾಣೆಂ ಆಪ್ಲ್ಯಾ ಹಾತಾನ್ ನಾಸಿರಾಚಾ ತೊಂಡಾಕ್ ಧರುನ್ ಹೆವ್ಶಿಂ ಘುಂವ್ಡಾಯ್ತಾನಾ,

ಭಳಾನ್ ಆಲಿಯಾಕ್ ಆಪ್ಣಾ ಥಾವ್ನ್ ತೆವ್ಶಿಂ ಲೊಟುನ್ ನಾಸಿರ್ ಹೆವ್ಶಿಂ ಘುಂವ್ಲೊ.

"ಆಲಿಯಾ ತುಂ ಆತಾಂ ಹಾಂಗಾ ಅಬತರ ಕರಿನಾಕಾ! ಹಾಂವ್ ಪಯ್ಲೆಂಚ್ ಸಾಂಗ್ತಾಂ.....! ಮಾಗಿರ್......!?" ನಾಸಿರಾನ್ ಸಾಂಗ್ತಾನಾ ಆಲಿಯಾ ತೆವ್ಶಿಂ ಘುಂವ್ಲೆಂ.

ಸುಮಾರ್ ವೇಳ್ ದೊಗಾಂಯ್ ಮಧೆಂ ಕಾಂಯ್ಚ್ ಚಲ್ಲೆಂ ನಾ.

ರಾಗಾಕ್ಮೊಗಾಂತ್ ಬದ್ಲುಂಕ್ ಮುಕ್ಲಿ ಸರ್ಥಿ ಆಪ್ಣಾಚಿ ಮ್ಹಳ್ಳೆಂ ನಾಸಿರಾಕ್ ಕಳ್ತಾಚ್ ಥೊಡ್ಯಾ ವೆಳಾನ್ ತೊಚ್ ಖುದ್ದ್ ಜಾವ್ನ್ ಆಲಿಯಾ ತೆವ್ಶಿಂ ಘುಂವ್ಲೊ. ಹೆಂ ದೊಗಾಂಯ್ಕ್‌ಯ್ ಸದಾಂಚೆಂ ಜಾಲೆಂ. ಝಗ್ಡೆಂ ಆನಿ ಮೋಗ್ ಮ್ಹಣ್ತಾನಾ ಹ್ಯಾ ದೊನಾಂಯ್ ಮಧೆಂ ತಿಂ ಯಾಂತ್ರೀಕ್ರತ್ ಜಾಲಿಂ ಶಿವಾಯ್ ತಿಂ ಎಕಾಮೆಕಾ ಖಾತಿರ್ ಏಕ್ ಜೀವ್ ಆನಿ ಏಕ್ ಅತ್ಮೊ ಜಾಲಿಂ ನಾಂತ್.

*****************

ಆಲಿಯಾ ಹರ್ಶೆಂಚಾ ಪರಿಂಚ್ ಆಜ್ ಆಪ್ಲ್ಯಾ ಡ್ಯೂಟೆಕ್ ಭಾಯ್ರ್ ಸರ್‍ಲೆಂ ಜಾಲ್ಯಾರ್‍ಯ್ ತಾಚ್ಯಾ ಮತಿಕ್ ಆಜ್ ಸುಶೆಗ್ ನಾತ್‌ಲ್ಲೊ. ತೆಂ ವಿಪರೀತ್ ಚಿಂತ್ಚ್ಯಾರ್ ಪಡ್‌ಲ್ಲೆಂ. ತಾಚ್ಯಾ ಚಿಂತ್ಪಾಕ್ ಕಾರಾಣ್ ದುಸ್ರ್ರೆಂ ಕೊಣ್‌ಯ್ ನ್ಹಯ್, ಬಗಾರ್ ಅಮೀನಾ!

ಅಮೀನಾ ಹ್ಯಾ ದಿಸಾಂನಿ ನಾಸಿರಾಕ್ ಚಡ್‌ಚ್ ಲಾಗಿಂ ಆಸಾ ತಶೆಂ ಆಲಿಯಾಕ್ ಭೊಗ್ತಾಲೆಂ. ಆಪ್ಲ್ಯಾ ಘೊವಾಚ್ಯಾ ಹರ್ಯೆಕ್ ಉತ್ರಾಂನಿ, ತಾಚ್ಯಾ ಕಾರ್ಯಾಂನಿ, ಆನಿ ತಾಚ್ಯಾಕ್‌ಯ್ ಚಡ್ ಜಾವ್ನ್ ನಾಸಿರಾಚ್ಯಾ ಕುಡಿ ವಯ್ಲ್ಯಾ ವಸ್ತುರಾಕ್ ಆಲಿಯಾ ಆಪ್ಲ್ಯಾ ಹಾತಿಂ ಧರ್‍ತಾನಾ, ತ್ಯಾ ವಸ್ತುರಾಂತ್ ಅಮೀನಾಚೊ ಘಾಮ್ ಜಿರೊನ್ ಗೆಲಾ ತಶೆಂ ತಾಕಾ ಭೊಗ್ತಾಲೆಂ. ತಾಚ್ಯೆ ಪಾಟ್ಲ್ಯಾನ್ ಆಲಿಯಾಚಾ ದೊಳ್ಯಾಂ ಮುಕಾರ್ ತ್ಯಾ ಸಿನೇಮಾಚಾ ಪರ್‍ದ್ಯಾರ್ ಸಿನೇಮಾ ಚಲ್‌ಲ್ಲ್ಯಾ ಪರಿಂ ನಾಸಿರ್ ಆನಿ ಅಮೀನಾಚೊ ರಂಗಾಳ್ ಖೆಳ್ ರೂಪ್ ರೂಪ್ ದಿಸ್ತಾ ತಶೆಂ ಜಾತಾಲೊ.

ಮತಿಂತ್ಲಿಂ ಚಿಂತ್ನಾ ಗಡ್ ಉತ್ರೊನ್ ತಾಚ್ಯಾ ದೊಳ್ಯಾಂಕ್ ಕಿತೆಂ ಕಿತೆಂ ದಾಖಂವ್ಕ್ ಲಾಗ್ತಾನಾ, ಆಪುಣ್ ವಿಶಾಲ್ ಸಾಗೊರಾಚಾ ಉದ್ಕಾ ಭಿತರ್ ಬುಡೊನ್ ವೆತಾಂ ತಶೆಂ ಆಲಿಯಾಕ್ ದಿಸ್ಲೆಂ. ತಾಚಿ ಮತ್ ಹರ್ಯೆಕ್ ವಗ್ತಾರ್ ನಾಸಿರಾಕ್‌ಚ್ ಚಿಂತಾನಾ ಏರ್ ಹೊಸ್ಟೆಸಾಚಾ ಕಾಮಾಂತ್ ತೆಂ ಯಾಂತ್ರಿಕ್ ರಿತಿನ್ ಚಲೊಂಕ್ ಲಾಗ್ಲೆಂ. ಸಭಾರ್ ಚುಕಿ ತಾಚ್ಯೆ ಥಾವ್ನ್ ಘಡ್ಲ್ಯೊ ತರ್‍ಯ್ ಆಲಿಯಾಚೊ ಸ್ವಭಾವ್ ಜಾಣಾಂ ಆಸ್‌ಲ್ಲ್ಯಾ ಸಗ್ಳ್ಯಾಂನಿ ತ್ಯಾ ಚುಕಿಂಕ್ ಸುದಾರ್ಸುನ್ ಘೆವ್ನ್ ತ್ಯಾ ಚುಕಿಂಚೊ ಪರಿಣಾಮ್ ಕೊಣಾಯ್ಚೆರ್ ಪಡಾನಾಶೆಂ ಪಳೆಲೆಂ.

ಹಾಕಾ ಕಾರಾಣ್‌ಯ್ ಆಸ್‌ಲ್ಲೆಂ.

ಆಲಿಯಾಕ್ ಕಾಂಯ್ ಹೆಂ ಕಾಮ್ ತಾಚ್ಯಾ ಗರ್ಜೆಚೆಂ ಮ್ಹಣೊನ್ ನಾತ್‌ಲ್ಲೆಂ. ಆಲಿಯಾ ಕೋಣ್ ಆನಿ ಕಿತೆಂ ತೆಂ ತಾಚ್ಯಾ ಏರ್‍ವೇಸಾಚಿಂ ಸಗ್ಳಿಂ ಜಾಣಾಂತ್. ಆಲಿಯಾಚಾ ಖಂಯ್ಚಾಯ್ ವಿಶಯಾಂತ್ ಮೆತೆರ್ ಜಾಲ್ಯಾರ್‍ಯ್ ತಾಚೊ ಪ್ರಭಾವ್ ಆಲಿಯಾ ವಯ್ರ್ ನ್ಹಯ್ ಬಗಾರ್ ಆಪ್ಣಾ ವಯ್ರ್ ಪಡ್ತಲೊ ಆನಿ ಆಪ್ಣೆ ಹ್ಯಾ ಏರ್‍ವೇಸಾ ಥಾವ್ನ್ ಹಾತ್ ಧುಂವ್ಕ್ ಪಡ್ತೆಲೆ ಮ್ಹಳ್ಳೆಂ ತಾಚಿಂ ಸಾಂಗಾತಿ ಭಾಗಿದಾರಾಂ ಜಾಣಾಂ ಆಸ್‌ಲ್ಲಿಂ.

ಪುಣ್ ವೇಳ್ ಮ್ಹಳ್ಳೊ ತೊ, ಮನ್ಶ್ಯಾಕ್ ಹರ್ಯೆಕ್ ಪಾವ್ಟಿಂ ಎಕಾಚ್ ಮಾಫಾನ್ ಆಪ್ಲೊ ಸಾಂಗಾತ್ ದಿಂವ್ಚ್ಯಾಂತ್ ಸಲ್ವಾತಾ. ವೆಳಾ ಸಾಂಗಾತಾ ಮನ್ಶ್ಯಾನ್ ತಾಚೊ ಸಂಭಂಧ್ ಎಕಾಚ್ ಮಾಫಾನ್ ದವರುಂಕ್ ಪಡ್ತಾ.

ಬೋವ್ಶ್ಯಾ ಆಲಿಯಾಚಿಂ ಆಂತರಿಕ್ ಭಗ್ಣಾಂ ಆನಿ ಸಂಸಾರಾಚಿಂ ಚಿಂತ್ನಾ ತಾಕಾ ತಾಚ್ಯಾ ವೆಳಾ ಸಾಂಗಾತಾ ರಾಜಿ ಕರುನ್ ಚಲೊಂಕ್ ಕುಮಕ್ ಕರುಂಕ್ ಸಕೊಂಕ್ ನಾತ್‌ಲ್ಲ್ಯಾ ವರ್ವಿಂ ತೆಂ ಹ್ಯಾ ದಿಸಾಂನಿ ಮತಿಚಾ ಸಂತುಲನಾಂತ್ ಥೊಡೆಂ ಥೊಡೆಂ ಲಾಚಾರ್ ಜಾವ್ನ್ ಯೇಂವ್ಕ್ ಲಾಗ್ಲೆಂ.

ಚಲಿ ಆನಿ ಚಿಂತ್ಚಿ ಮತ್ ಸಮಾಜೆಚ್ಯಾ ಉದರ್ಗತಿಚೆಂ ಲಕ್ಷಣ್. ಚಲಿ ಕೆದ್ನಾಂ ಚಿಂತುಂಕ್ ಸಕ್ತಾ ತೆದ್ನಾಂ ತಿ ತಿಚ್ಯಾ ಉದರಾಂತ್ ಫಕತ್ತ್ ಎಕಾ ಜಿವಾಕ್ ಮಾತ್ರ್ ನ್ಹಯ್ ಬಗಾರ್ ಹ್ಯಾ ಸಂಸಾರಾಂತ್ ನವ್ಯಾ ಭಲಾಯ್ಕೆಭರಿತ್ ಸಮಾಜೆಕ್ ಜಲ್ಮ್ ದೀಂವ್ಕ್ ಸಕ್ತಾ!

ಸಭಾರ್ ಥೆಂಪಾ ಉಪ್ರಾಂತ್ ಆಲಿಯಾಕ್ ಆಪ್ಲ್ಯಾ ಮತಿಕ್ ಸಮಾಧಾನ್ ದಿಂವ್ಚ್ಯಾ ದುಸ್ರ್ಯಾ ಸಮ್ಜಣೆಚ್ಯಾ ಮತಿಚಿ ಗರ್ಜ್ ಆಸಾ ತಶೆಂ ಭೊಗ್‌ಲ್ಲೆಂ. ಹ್ಯಾ ತಾಚ್ಯಾ ಭಗ್ಣಾಂಕ್ ಸಾಂಗಾತ್ ದಿಂವ್ಚ್ಯಾ ತಸಲಿಂ ಕೊಣ್‌ಯ್ ತಾಚ್ಯಾ ಜಿವಿತಾಂತ್ ಯೇವ್ನ್ ರಾವೊಂಕ್ ನಾತ್‌ಲ್ಲಿ ಜಾಲ್ಯಾರ್‍ಯ್ ಆಲಿಯಾ ಕೊಣಾಯ್ಕ್‌ಯ್ ಜಾಯ್ ಜಾಲ್ಯಾರ್ ಆಪ್ಲೆಂ ಸಾಂಗತಿ ಯಾ ಸಾಂಗಾತಿಣ್ ಜಾವ್ನ್ ಘೆಂವ್ಕ್ ಸಮರ್ಥಿ ಆಸ್‌ಲ್ಲೆಂ ತಸಲೆಂ ಚಲಿ.

ಹ್ಯಾ ಸಮರ್ಥೆ ವರ್ವಿಂ ಪರ್‍ತ್ಯಾಕ್ ಅಭಿಲಾಶಕ್ ತಾಣೆಂ ಲಾಗಿಂ ಘೆತ್ಲೆಂ. ಅಭಿಲಾಶ ತರ್‍ಯ್ ದುಬ್ಳ್ಯಾ ಕುಟ್ಮಾಂತ್ಲೆಂ ಚಲಿ. ತಾಚ್ಯಾ ಸೊಭಾಯೆಕ್, ತಾಚ್ಯಾ ಮ್ಹಿನತೆಕ್, ಆನಿ ತಾಚ್ಯಾ ಮೊವಾಳ್ ಉಲವ್ಣ್ಯಾಕ್ ಲಾಗೊನ್ ಪ್ಲೈಟಾ ವಯ್ಲ್ಯಾ ಏರ್‍ಹೊಸ್ಟೆಸಾಂಕ್ ತೆಂ ಮುಖೆಲ್ನ್ ಜಾಲ್ಲೆಂ. ಆಲಿಯಾಚಾ ಗೂಣಾಂಕ್ ಕಳಿತ್ ಆಸ್ಲ್ಯಾರ್‍ಯ್ ಆಲಿಯಾ ಥಂಯ್ ಕಾಂಯ್ ಘಾತ್ಕಿ ಗೂಣ್ ನಾತ್ಲೆಲ್ಯಾನ್ ಅಭಿಲಾಶ ಪರ್‍ತ್ಯಾಕ್ ಆಲಿಯಾಚಾ ಜಿವಿತಾಂತ್ ಆಯ್ಲೆಂ.

ಪಯ್ಲ್ಯಾ ಪಾವ್ಟಿಂ ಆಪ್ಲ್ಯಾ ಮತಿಂತ್ಲಿ ಭಿರಾಂತ್ ಅಭಿಲಾಶಲಾಗಿಂ ಆಲಿಯಾನ್ ಉಚಾರ್‍ತಾನಾ ಚಲಿಯೆಚೆಂ ಜಿವಿತ್ ಮ್ಹಳ್ಯಾರ್ ಕಿತೆಂ ಮ್ಹಣೊನ್ ಅಭಿಲಾಶನ್ ತಾಕಾ ಬರ್‍ಯಾನ್‌ಚ್ ಸಮ್ಜಯ್ಲೆಂ.

"ಪಳೆ ಆಲಿಯಾ....! ತುಂ ಎಕಾ ಚಲಿಯೆನ್ ಚಿಂತ್ಚ್ಯಾ ಪ್ರಾಸ್ ಚಡ್ ಚಿಂತಾಯ್! ಜಶೆಂ ಸಾಕಾಳಿಂಚಾ ಉಜ್ವಾಡಾಂತ್ ಉಭೊನ್ ಗೆಲ್ಲೆಂ ಸುಕ್ಣೆಂ ಸಾಂಜ್ ಜಾತಾನಾ ತಾಚ್ಯಾ ಘೊಂಟೆರಾಕ್ ಉಭೊನ್ ಪಾಟಿಂ ಯೆತಾ ತಶೆಂ ಚಲಿಯೆಚೆಂ ಜಿವಿತ್! ಮೆಳ್‌ಲ್ಲ್ಯಾ ಮೆಳ್‌ಲ್ಲ್ಯಾ ರುಕಾಂನಿ ದಿಸಾಕ್ ಏಕ್ ಘೊಂಟೆರ್ ಬಾಂದುಂಕ್ ಚಲಿಯೆಕ್ ಸಾದ್ಯ್ ನಾ!" ಆಲಿಯಾಚಾ ವಿಶಿಂ ಆಯ್ಕಾಲ್ಲೆಂ ಅಭಿಲಾಶಾ ಸುಮಾರ್ ವೆಳಾ ಉಪ್ರಾಂತ್ ಉಲಯ್ಲೆಂ.

"ಪುಣ್ ತ್ಯಾಚ್ ಘೊಂಟೆರಾಕ್ ಆಶೆವ್ನ್ ದುಸ್ರೆಂ ಸುಕ್ಣೆಂ ಯೇತ್ ಜಾಲ್ಯಾರ್.....?" ಆಲಿಯಾಚಾ ದೊಳ್ಯಾಂ ಮುಕಾರ್ ಅಮೀನಾಚೆಂ ರುಪ್ಣೆಂ ಉಭೆಂ ಜಾಲ್ಲೆಂ.

"ತುಜೊ ಆನಿ ತುಜ್ಯಾ ಘೊವಾಚೊ ಸಂಭಂಧ್ ಜರ್ ತರ್ ಘಟ್ ಆಸಾ, ತುಮ್ಚ್ಯಾ ಘೊಂಟೆರಾಚೊ ರೂಕ್ ಕಾತ್ರುನ್ ಉಡಯ್ಲ್ಯಾರ್‍ಯ್ ತುಮ್ಕಾಂ ಕಾಂಯ್ ವಾಯ್ಟ್ ಜಾಂವ್ಚಾ ಪರಿಂ ನಾ!" ಆಲಿಯಾಚಾ ಸಮಸ್ಯಾಕ್ ಅಭಿಲಾಶ ಸಮ್ಜಾಲ್ಲೆಂ.

"ರೂಕ್ ಕಾತ್ರುನ್ ಉಡಯ್ಲೊ ತರ್ ಭಿಯೆಂವ್ಚೆಂ ಚಲಿ ಹಾಂವ್ ನ್ಹಯ್ ಅಭಿಲಾಶ! ಪುಣ್, ಮ್ಹಜ್ಯಾ ಘೊಂಟೆರಾ ಭಂವ್ತಿಂ ಆಜ್ ಎಕ್ ಪರ್‍ಕಿ ಸುಕ್ಣೆಂ ಉಭೊಂಕ್ ಲಾಗ್ಲಾಂ ಮ್ಹಳ್ಳಿಚ್ ಭಿರಾಂತ್ ಮ್ಹಾಕಾ!"

"ಪಳೆ ಆಲಿಯಾ! ಹಾಂವ್ ಸಾಂಗ್ತಾಂ ಮ್ಹಣ್ ಬೆಜಾರ್ ಕರಿನಾಕಾ!" ಅಭಿಲಾಶ ಆಲಿಯಾಕ್‌ಚ್ ಪಳವ್ನ್ ಉಲಯ್ಲೆಂ ".... ತುಂ ತುಜ್ಯಾ ಚಿಂತ್ಪಾ ಸಕ್ತೆಕ್ ಕಿತ್ಲೆಂಯ್ ತತ್ವ್‌ಶಾಸ್ತ್ರಚಾ ವಾಟೆರ್ ಭೊಂವ್ಡಾಯ್...... ಪುಣ್, ಹ್ಯಾ ಸಂಸಾರಾಂತ್ ಏಕ್ ಚಲಿ ಜಾವ್ನ್ ಜಲ್ಮ್ ಘೆತ್ಲೆಲ್ಯಾ ತುವೆಂ, ಖಂಯ್ ನಾ ತರ್ ಖಂಯ್ ಪುಣಿ ಜಿವಿತಾಂತ್ ರಾಜಿ ಕರುನ್ ದೀಸ್ ಕಾಡುಂಕ್ ಪಡ್ತಾಚ್!" ಆಭಿಲಾಶಚ್ಯಾ ಉತ್ರಾಂನಿ ತಾಣೆಂ ಮಾಂದುನ್ ಘೆತ್ಲೆಲಿ ಸಲ್ವೊಣಿ ಆಸಾ ಮ್ಹಳ್ಳ್ಯಾ ಪರಿಂ ಆಲಿಯಾಕ್ ದಿಸ್ಲೆಂ. ಜಶೆಂ ಆಲಿಯಾಚಿ ಆವಯ್ ಸಾರಾ!

"ತರ್ ಚಲಿಯೆಚಾ ಅಸ್ಥಿತ್ವ್ ವಾದಾಂತ್ ಹೆಂ.......!" ಆಲಿಯಾ ಮುಕಾರ್ ಉಲಯ್ಲೆಂ ನಾ.

"ಹ್ಯಾ ಸಮಾಜೆಂತ್ ಚಲಿಯೆಚೆಂ ಅಸ್ಥಿತ್ವ್ ತಿಣೆಂ ಕರ್‍ಚ್ಯಾ ತ್ಯಾಗಾಂತ್ ಮಾತ್ರ್ ಪಳಂವ್ಕ್ ಮೆಳ್ತಾ ಆಲಿಯಾ. ಜರ್ ತರ್ ತುಂ ಕಿತೆಂಯ್ ತುಜೆಂ ತ್ಯಾಗ್ ಕರ್ಶಿ ಜಾಲ್ಯಾರ್ ತುಕಾ ಚಲಿಯೆಪಣಾಚೊ ಮಾನ್ ಆಸಾ. ಜರ್ ತರ್ ತುಂ ತುಜ್ಯೆ ಖಾತಿರ್ ಕೊಣಾಯ್ಚೊ ತ್ಯಾಗ್ ಆಶೆಂವ್ಕ್ ಲಾಗ್ಶಿ ತರ್ ತುಂ ಚಲಿ ನ್ಹಯ್. ಚಲಿಯೆಚಾ ನಾಂವಾರ್ ಹ್ಯಾ ಸಮಾಜೆಂತ್ ಏಕ್.....!" ಅಭಿಲಾಶಾನ್ ಆಪ್ಲಿಂ ಉತ್ರಾಂ ತುಟಯ್ಲಿಂ ಜಾಲ್ಯಾರ್‍ಯ್ ತೆಂ ಮುಕಾರ್ ಕಿತೆಂ ಸಾಂಗೊಂಕ್ ಆಶೆತಾಲೆಂ ತೆಂ ಆಲಿಯಾಕ್ ಕಳಾನಾಸ್ತಾನಾ ಗೆಲೆಂ ನಾ.

"ಹ್ಯಾಚ್ ಪಾಸೊನ್......." ಅಭಿಲಾಶಚ್ ಉಲಯ್ಲೆಂ ".......ಏಕ್ ಚಲಿ ಜಾವ್ನ್ ಜಲ್ಮ್ ಘೆತ್ಲಾ ಮ್ಹಳ್ಯಾ ಉಪ್ರಾಂತ್ ತ್ಯಾಗ್ ಜಾಂವ್ ದೂಖ್ ಜಾಂವ್ ಹ್ಯಾ ಸಮಾಜೆನ್ ಅಪ್ಣಾ ಮುಕಾರ್ ದವರ್‍ಲ್ಲೆಂಚ್ ಪಿಯೆಂವ್ಚೆಂ ಚಲ್ಕಿಯೆ ಧರ್ಮ್!"

"ಹೆಂ ಹಾಂವ್ ಪಾತ್ಯೆನಾ ಅಭಿಲಾಶ! ಚಲಿಯೆಚಾ ಅಸ್ಥಿತ್ವಾಕ್ ಆನಿ ತಿಣೆ ಕರ್‍ಚ್ಯಾ ತ್ಯಾಗಾಕ್ ಕಾಂಯ್ ಸಂಭಂಧ್ ನಾ. ಅಸ್ಥಿತ್ವ್, ಚಲಿಯೆಕ್ ಸಮಾಜೆಂತ್ ತಿಚ್ಯಾ ಜಲ್ಮಾಚಿ ವ್ಹಳಕ್ ಕರುನ್ ದಿತಾ ಆಸ್ತಾನಾ, ಜಲ್ಮಾ ಥಾವ್ನ್ ಮರ್ಣಾ ಪರ್ಯಾಂತ್ ಹ್ಯಾ ತಿಚ್ಯಾ ಅಸ್ಥಿತ್ವಾಂತ್ ಬದ್ಲಾವಣ್ ಕಶಿ ಜಾಂವ್ಚಿ? ಜರ್ ತರ್ ಮೆಟಾಂ ಮೆಟಾಂಕ್ ಬದ್ಲಾವಣ್ ಜಾಲ್ಯಾರ್, ತಿಚೆಂ ತೆಂ ಖರೆಂ ಆಸ್ಥಿತ್ವ್ ಖಂಯ್ ಆಸಾ?" ಆಲಿಯಾನ್ ಆಪ್ಣೆ ಜಿಯೆಂವ್ಚಾ ಸಮಾಜೆಕ್ ಸಂಪೂರ್ಣ್ ಸೊಡ್‌ಲ್ಲೆಂ. ತೆಂ ಆಪ್ಲ್ಯಾ ವಿಚಾರಾಂಕ್ ಮಾತ್ರ್ ಪಾತ್ಯೆತಾಲೆಂ.

"ತುಂ ಆಸಾಯ್ ಪಳೆ ಆಲಿಯಾ..... ಫಕತ್ತ್ ಥಿಯೋರಿಟಿಕಲ್ ಮಾತ್ರ್ ಚಿಂತಾಯ್ ಶಿವಾಯ್ ಪ್ರಾಕ್ಟಿಕಲ್ ನ್ಹಯ್! ಥಿಯೋರಿಟಿಕಲ್ ಜಾವ್ನ್ ತುಂ ಏಕ್ ಚಲಿ ಜಾವ್ನ್ ಆಸಾಯ್ ತೆಂ ಸಾರ್‍ಕೆಂ. ಪುಣ್ ಪ್ರಾಕ್ಟಿಕಲ್ ಜಾವ್ನ್ ತುಂ ಏಕ್ ಧುವ್, ಭಯ್ಣ್, ಬಾಯ್ಲ್, ಆನಿ ಫುಡಾರಾಕ್ ಆವಯ್, ಆಜಿ, ಸಾಸು ಜಾಂವ್ಚೆಂ ಆಸಾಯ್ ಮ್ಹಳ್ಳೆಂ ಕಿತ್ಯಾಕ್ ವಿಸ್ರಾತಾಯ್?"

"ಹೆಂಚ್ ಆಮಿಂ ಚಿಂತ್ಚಿ ವ್ಹಡ್ಲಿ ಚೂಕ್!" ಆಲಿಯಾ ಉಸ್ಮಡ್ಲೆಂ. "ಕಿತೆಂ ಚಲಿ ಮಾತ್ರ್ ವೆಳಾ ಕಾಳಾಚಾ ಸ್ಪಂದನಾಂತ್ ಧುವ್, ಬಾಯ್ಲ್, ಭಯ್ಣ್, ಆವಯ್ ಜಾತಾ? ಚಲೊ ಪೂತ್, ಘೊವ್, ಭಾವ್, ಬಾಪಯ್ ಜಾಯ್ನಾ.....?"

"ಜಾತಾ ಆಲಿಯಾ! ......ಖಂಡಿತ್ ಜಾತಾ! ಪುಣ್ ಚಲ್ಯಾಚೆ ಹೆ ಸಂಭಂಧ್, ತಾಕಾ ತಾಚ್ಯಾ ಸಮಾಜೆಂತ್ ಜಿತ್ಲೆಂ ಪವಿತ್ರ್ ಕರಿನಾಂತ್ ಜಿತ್ಲೆ ಚಲಿಯೆಕ್ ತೆ ಸಂಭಂಧ್ ಪವಿತ್ರ್ ಕರ್‍ತಾತ್!"

"ತರ್ ಫಕತ್ತ್ ಆಪ್ಲೆ ಸಂಭಂಧ್ ಪವಿತ್ರ್ ಕರ್‍ಚ್ಯಾ ಖಾತಿರ್ ಚಲಿ ಹ್ಯಾ ಸಮಾಜೆಚಾ ದಾಂತ್ಯಾ ಫಾತ್ರಾ ಮಧೆಂ ಆಡ್ಚಾತಾ?"

"ಚಲಿ ಆಡ್ಚಾನಾ! ತಾಚೆ ಸಂಭಂಧ್ ತಾಕಾ ಆಡ್ಚಯ್ತಾತ್!"

"ಸಾರ್‍ಕೆಂ ಸಾಂಗ್ಲೆಂಯ್ ತುವೆಂ! ವಿಶಯ್ ಥಂಯ್ಚ್ ಆಯ್ಲೊ ನೆ!" ನಿಮಾಣೆಂ ತರ್‍ಯ್ ಆಲಿಯಾಚ್ ಜಿಕ್‌ಲ್ಲೆಂ.

ಆಲಿಯಾಚಾ ತತ್ವಾಂ ಮುಕಾರ್ ಅಭಿಲಾಶಾಚಾ ಜಿಬೆರ್ ಉತಾರ್ ಸುಟ್ಲೆಂ ನಾ. ಎಕಾ ವಾಟೆನ್ ಆಲಿಯಾನ್ ಸಾಂಗ್ಚೆಂ ಸಾರ್‍ಕೆಂ ತರ್‍ಯ್ ದುಸ್ರ್ಯಾ ವಾಟೆನ್ ಆಜ್ ಆಲಿಯಾ, ತಾಣೆಂಚ್ ಪಾಳುನ್ ಆಯಿಲ್ಲ್ಯಾ ತಾಚ್ಯಾ ತತ್ವಾಂ ಮುಕಾರ್ ಜಿವಿತಾಚಾ ಪಾಂವ್ಡ್ಯಾರ್ ಸುಖ್ ಜೊಡುಂಕ್ ಪಾವ್ಲೆಂ ನಾ. ತೆಂ ಸುಖಿ ಜಿವಿತ್ ಕಾಡುಂಕ್ ಸಕೊಂಕ್ ನಾ. ತರ್....? ಆಭಿಲಾಶ ಹೆಂ ಜಾಣಾಂ.

"ಆಲಿಯಾ.....? ತುಂ, ಚಲಿಯೆಚಾ ಆಸ್ಥಿತ್ವಾ ವಯ್ರ್ ಕಸಲೊಯ್ ವಾದ್ ಮಾಂಡ್. ಪುಣ್ ತುಕಾ ಏಕ್ ಸವಾಲ್ ವಿಚಾರ್‍ತಾಂ..... ತುಂ ಜಾಣಾಂ ಆಸಾಯ್ ಚಲಿ ಮ್ಹಳ್ಳ್ಯಾ ಸಬ್ದಾಚೊ ಅರ್ಥ್ ಕಿತೆಂ ತೊ?"

ಅಭಿಲಾಶಾಚಾ ಸವಾಲಾಕ್ ಆಯ್ಕೊನ್ ಆಲಿಯಾನ್ ಆಪ್ಲ್ಯಾ ತೀಕ್ಷ್ಣ್ ನದ್ರೆನ್ ಅಭಿಲಾಶಕ್‌ಚ್ ಪಳೆಲೆಂ. ಪುಣ್ ತಾಣೆಂ ಕಾಂಯ್ ಜವಾಬ್ ದಿಲಿ ನಾ.

" ಚಲಿ ಮ್ಹಳ್ಯಾರ್...." ಅಭಿಲಾಶಾಚ್ ಉಲಯ್ಲೆಂ ".....ತ್ಯಾಗ್, ದೂಖ್, ಬಲಿದಾನ್.....! ಜೆಂ ಕಿತೆಂ ನಾಂವ್ ತುಂ ದೀಂವ್ಕ್ ಸಕ್ತಾಯ್ ತೆಂ! ಹ್ಯಾಚ್ ನಾಂವಾನ್ ಚಲಿ ಹ್ಯಾ ಸಮಾಜೆಂತ್ ಅತೀ ಉಂಚ್ಲ್ಯಾ ಪಾಂವ್ಡ್ಯಾರ್ ಮಾನ್ ಘೆತಾ. ಆಸಲೊ ಮಾನ್ ಎಕಾ ಚಲ್ಯಾಕ್ ಮೆಳಾನಾ!" ಅಭಿಲಾಶಾಕ್ ಆಪ್ಲ್ಯಾ ಚಲಿಯೆಪಣಾ ವಯ್ರ್ ಗೌರವ್ ಆಸ್‌ಲ್ಲೊ.

"ಮಾನ್ ಮೆಳ್ತಾ ತರ್ ಫಕತ್ತ್ ಚಲಿಯೆಚಾ ಚಲಿಯೆಪಣಾಕ್ ಮಾತ್ರ್! ಪುಣ್ ಚಲಿಯೆಕ್ ಖಂಯ್ ಮಾನ್ ಮೆಳ್ತಾ? ತಿಚ್ಯಾ ಹಕ್ಕಾಚಾ ಸುಖಾಂತ್ ಪಾಸೊನ್ ತಿಣೆಂ ದೂಖ್‌ಚ್ ಭೊಗುಂಕ್ ಪಡ್ತಾ. ಆನಿ ಹ್ಯಾ ದೂಖಿಂತ್ ತೊ ಚಲೊ ಸುಖ್ ಭೊಗ್ತಾ!"

"ತಿ ಚಲಿಯೆಚಿ ಸೃಶ್ಟಿ! ಸೃಶ್ಟೆಕ್ ತುಂ ಬದ್ಲುಂಕ್ ಸಕಾನಾಂಯ್!"

"ಹ್ಯಾ ಸಮಾಜೆಚಿ ಸೃಶ್ಟಿ ಹಾಂವ್!"

"ತುಜಿಯ್ ಸೃಶ್ಟಿ ಹಿ ಸಮಾಜ್‌ಚ್!"

ಅಭಿಲಾಶಕ್ ಆಯ್ಕೊವ್ನ್ ಆಲಿಯಾ ಮೌನ್ ಜಾಲೆಂ. ತಾಚ್ಯಾ ಜಿಬೆರ್ ಜವಾಬ್ ನಾತ್‌ಲ್ಲಿ ಮ್ಹಣೊನ್ ನ್ಹಯ್. ತೆಂ ಅಭಿಲಾಶಚಾ ಮುಕಾರ್ ಸಲ್ವಾಲೆಂ ಮ್ಹಣೊನ್‌ಯ್ ನ್ಹಯ್. ಹ್ಯಾ ಜವಾಬೆ ಥಾವ್ನ್ ಅಭಿಲಾಶಾ ವಯ್ರ್ ಕಾಂಯ್ಚ್ ಫರಕ್ ಪಡ್ಚೊ ನಾ ಮ್ಹಣೊನ್ ಆಲಿಯಾ ಜಾಣಾಂ ಜಾಲ್ಲೆಂ. ಪುಣ್... ತ್ಯಾ ತಾಚ್ಯಾ ಮತಿಂತ್ಲ್ಯಾ ಜವಾಬೆಕ್ ಆಪ್ಲ್ಯಾ ಮತಿಂತ್‌ಚ್ ಉದ್ಗಾರ್‍ನಾಸ್ತಾನಾ ತೆಂ ರಾವ್ಲೆಂ ನಾ.

"ಹ್ಯಾ ಸಮಾಜೆಕ್ ಹಾಂವ್ ನವ್ಯಾನ್ ಸೃಶ್ಟಿ ಕರ್‍ತಾಂ!"

ಮೌನ್ ಜಾಲ್ಲೆಂ ಆಲಿಯಾ ಆಪ್ಲ್ಯಾ ದೊಳ್ಯಾಂ ದಿಶ್ಟೆನ್‌ಚ್ ಆಪ್ಲ್ಯಾ ಜವಾಬೆಕ್ ವಾರ್‍ಯಾರ್ ಉಬಯ್ತಾನಾ ತಾಚ್ಯಾ ದೊಳ್ಯಾಂಚಿ ದೀಶ್ಟ್ ಅನಂತಾಕ್ ಪಳವ್ನ್ ತ್ಯಾ ಅನಂತಾಂತ್ ಕಿತೆಂ ತರ್‍ಯ್ ಸೊಧುನ್ ಆಸಾ ತಶೆಂ ದಿಸ್ತಾಲಿ.

"ಪಳೆ ಆಲಿಯಾ.....! ಹ್ಯಾ ವಿಶಯಾಂತ್ ಆಮಿಂ ಕಿತ್ಲೆಂ ಚರ್ಚೆ ಕೆಲ್ಯಾರ್‍ಯ್ ಕಾಂಯ್ ಜಾಂವ್ಚೆಂ ನಾ. ಹಾವೆಂ ಆನಿ ತುವೆಂ ಹ್ಯಾ ಸಂಸಾರಾಕ್ ಬದ್ಲುಂಕ್ ಸಾದ್ಯ್ ನಾ. ಆನಿ ತ್ಯಾ ಅಮೀನಾಚಾ ವಿಶ್ಯಾಂತ್ ಸಾಂಗ್ಚೆಂ ಜಾಲ್ಯಾರ್ ಮ್ಹಜ್ಯಾ ಸಮ್ಜಣೆ ಪರ್ಮಾಣೆಂ... ಘರ್‍ಚ್ಯಾ ಖಾಣಾನ್ ಆಪ್ಲಿ ರೂಚ್ ಹೊಗ್ಡಾಯ್ಲ್ಯಾರ್ ಮಾತ್ರ್ ಕೊಣ್‌ಯ್ ಭಾಯ್ಲ್ಯಾ ಖಾಣಾಕ್ ಸೊಧ್ತಾ ಶಿವಾಯ್ ಬೆಶ್ಟೆಂ ಭಾಯ್ಲೆಂ ಖಾಣ್ ಕೊಣಾಯ್ಕ್‌ಯ್ ಪಸಂದ್ ಜಾಯ್ನಾ!" ಅಭಿಲಾಶಾನ್ ಪಯ್ಲೆಂಚೊ ವಿಶಯ್ ಬದ್ಲುನ್ ತೆಂ ಆತಾಂ ಆಲಿಯಾಚಾ ಅಸ್ಲಿ ವಿಶಯಾಚೆರ್ ಆಯ್ಲೆಂ.

"ತುಂ ಆಜೂನ್ ಆಂಕ್ವಾರ್ ಅಭಿಲಾಶಾ! ತುಕಾ ತೆಂ ತಿತ್ಲ್ಯಾ ಸುಲಾಭಾಯೆನ್ ಕಳಾನಾ. ತುವೆಂ ಸುಣ್ಯಾಕ್ ಪಳೆಲಾಂಯ್.....? ಸುಣ್ಯಾ ಜಾತಿಕ್ ಘರ್‍ಚೆಂ ಆನಿ ಭಾಯ್ಲೆಂ ಮ್ಹಳ್ಳೆಂ ಕಿತೆಂ? ಖಂಯ್ ನಾಕಾಕ್ ರುಚಿಚೊ ಪರ್ಮಳ್ ಆದಾಳ್ಳೊ..... ಥಂಯ್ಚರ್ ಖಾಂವ್ಕ್ ತಯಾರ್!"

"ಜಾಂವ್ಕ್ ಪುರೊ ಆಲಿಯಾ! ಪುಣ್ ಆತಾಂ ತುಜ್ಯಾ ಮುಕಾರ್ ತುಕಾ ದುಸ್ರಿ ಕಾಂಯ್ ವಾಟ್‌ಯ್ ನಾ. ತುವೆಂ ಆತಾಂ ತುಜ್ಯಾ ಘೊವಾಕ್ ತುಜ್ಯೆ ಥಂಯ್ ವೊಡುನ್ ಧರ್‍ಚ್ಯಾ ವಿಶಿಂ ಮಾತ್ರ್ ಚಿಂತುಂಕ್ ಜಾಯ್ ಶಿವಾಯ್ ತ್ಯಾ ಅಮೀನಾ ವಿಶಯಾಂತ್ ತುಂ ಚಿಂತಿನಾಕಾ. ತುಜ್ಯಾ ಘೊವಾನ್ ತುಕಾ ಸೊಡ್ನ್ ದುಸ್ರ್ಯಾ ಕೊಣಾಯ್ ವಿಶ್ಯಾಂತ್ ಚಿಂತಿನಾತ್ಲೆಲ್ಯಾ ಪರಿಂ ತಾಕಾ ಜರ್ ತುಂ ಖುಶಿ ದವರ್‍ಶಿ ತುಂ ಖಂಡಿತ್ ಜಿಕ್ತೆಲೆಂಯ್!"

ಅಭಿಲಾಶಾನ್ ಸಲಹಾ ದಿಲ್ಲಿ. ಹ್ಯಾ ಉಪ್ರಾಂತ್ ಆಲಿಯಾನ್ ಆಪ್ಲ್ಯಾ ಘೊವಾಕ್ ಹರ್ಯೆಕಾ ವಾಟೆನ್ ಖುಶ್ ದವರುಂಕ್ ಪ್ರಯತ್ನ್ ಕೆಲೆಂ. ಆಪ್ಲ್ಯಾ ಉತ್ರಾಂನಿ, ಆಪ್ಲ್ಯಾ ಕರ್‍ನ್ಯಾಂನಿ, ಆಪ್ಲ್ಯಾ ಮೊಗಾಂತ್, ಕಾಂಯ್ಚ್ ಉಣೆಂಪಣ್ ತಾಚ್ಯಾ ಘೊವಾಕ್ ಭೊಗುಂಕ್ ಆವ್ಕಾಸ್ ಕರುನ್ ತಾಣೆಂ ದೀಂವ್ಕ್ ನಾ.

ಆಪ್ಲ್ಯಾ ಕುಟ್ಮಾಕ್ ಸರ್ವಯ್ ರಿತಿನ್ ಸಾಂಬಾಳುಂಕ್ ತೆಂ ತಯಾರ್ ಆಸ್‌ಲ್ಲೆಂ. ಪುಣ್ ತಾಚ್ಯಾ ಅಸ್ಥಿತ್ವಾಕ್ ಮಾತ್ರ್ ತೆಂ ಹೊಗ್ಡಾಂವ್ಕ್ ತಯಾರ್ ನಾತ್‌ಲ್ಲೆಂ. ಹ್ಯಾಚ್ ಎಕಾ ಕಾರಾಣಾಕ್ ಲಾಗೊನ್ ಅಮೀನಾ ನಾಸಿರಾಕ್ ಮಸ್ತ್ ಲಾಗಿಂ ಜಾಲ್ಲೆಂ. ಅಮೀನಾ, ನಾಸಿರಾಚಾ ಘರ್‍ಚ್ಯಾಂಚೆಂ ಮನ್ ಜಿಕ್ಚ್ಯಾಂತ್ ಸುಫಳ್ ಜಾಲ್ಲ್ಯಾನ್ ತಾಚ್ಯಾ ಆನಿ ನಾಸಿರಾ ಮಧ್ಲೊ ಸಂಭಂಧ್ ವಾಡೊಂಕ್ ಕಾರಾಣ್ ಜಾಲೆಂ. ಆಲಿಯಾ ಪ್ರಾಸ್ ಅಮೀನಾ ನಾಸಿರಾಚಾ ಕುಟ್ಮಾಚ್ಯಾಂಕ್ ಚಡ್ ಲಾಗಿಂ ಜಾಲ್ಲೆಂ.

ಆಲಿಯಾನ್ ಕಿತ್ಲೆಂ ಪ್ರಯತ್ನ್ ಕೆಲ್ಯಾರ್‍ಯ್ ಅಮೀನಾಕ್ ತಾಚ್ಯಾ ಕುಟ್ಮಾಚಾ ಝಳ್ಕೆ ಥಾವ್ನ್ ಪಯ್ಸ್ ಕರುಂಕ್ ತೆಂ ಸಕ್ಲೆಂ ನಾ. ಪಯ್ಲೆಂ ಪಯ್ಲೆಂ ಸರ್ವ್ ಆಪ್ಲ್ಯಾ ಸಂಭಂಧಾಕ್ ವಾಡಂವ್ಚ್ಯಾ ಖಾತಿರ್ ಕೆಲ್ಲ್ಯಾ ಆಲಿಯಾನ್ ಉಪ್ರಾಂತ್ ಆಪ್ಲೊ ಸಂಭಂಧ್ ಉರಂವ್ಚ್ಯಾ ಖಾತಿರ್ ಕೆಲೆಂ. ಹ್ಯಾ ಸಂಭಂಧ್ ಉರಂವ್ಚ್ಯಾ ಪ್ರಯತ್ನಾಂತ್ ಆಲಿಯಾಚಾ ಕಾಳ್ಜಾಂತ್ ಮೋಗ್ ನಾತ್‌ಲ್ಲೊ. ಹ್ಯಾ ಮೊಗಾ ವಿಣೆ ಆಪ್ಲ್ಯಾ ಘೊವಾಚೆಂ ಮನ್ ಜಿಕ್ಚ್ಯಾ ಎಕಾಚ್ ಎಕಾ ಉದ್ದೇಶಾಂತ್ ತಾಣೆಂ ಸಗ್ಳೆಂ ಆಪ್ಣಾಚೆಂ, ಆಪ್ಲ್ಯಾ ಘೊವಾ ಮುಕಾರ್ ವೇಳ್, ಘಡಿ ಪಳಯ್ನಾಸ್ತಾನಾ ಉಗ್ತೆಂ ದವರ್‍ಲೆಂ. ಘೊವಾ ಮುಕಾರ್ ಆಪ್ಣಾಚೆಂ ಉಗ್ತೆಂ ದವರ್‍ಚ್ಯಾ ಹ್ಯಾ ಪ್ರಯತ್ನಾಂತ್ ಆಲಿಯಾಕ್ ಮತಿಕ್ ಜಾಂವ್ ಯಾ ತಾಚ್ಯಾ ಕುಡಿಕ್ ಜಾಂವ್ ಕಾಂಯ್ಚ್ ಸಮಾಧಾನ್ ಯಾ ಸುಖ್ ಮೆಳ್ಳೆಂ ನಾ. ಭಲಾತ್ಕಾರೆನ್ ಮ್ಹಳ್ಳ್ಯಾ ಪರಿಂ ತೆಂ ಆಪ್ಲ್ಯಾ ಘೊವಾ ಮುಕಾರ್ ಉಗ್ತೆಂ ಜಾಂವ್ಕ್ ಲಾಗ್ಲೆಂ. ಹೆಂ ಸರ್ವ್ ಫಕತ್ತ್ ತ್ಯಾ ಅಮೀನಾಕ್ ನಾಸಿರಾಚಾ ಜೀವನಾ ಥಾವ್ನ್ ಪಯ್ಸ್ ಕರ್‍ಚ್ಯಾ ಪಾಸೊನ್! ತೆಂ ಆತಾಂ ಜಾಣಾಂ ಜಾಲ್ಲೆಂ ಕೀ ಘರಾಂತ್ಲ್ಯಾ ಝಗ್ಡ್ಯಾ ಥಾವ್ನ್ ನಾಸಿರ್ ಆಲಿಯಾಚಾ ಹಾತಾ ಥಾವ್ನ್ ಪಯ್ಸ್ ವೆತಾ ಶಿವಾಯ್ ತೊ ಲಾಗಿಂ ಜಾಯ್ನಾತ್‌ಲ್ಲೊ. ದೆಕುನ್ ಆಪ್ಣಾಕ್‌ಚ್ ನಾಸಿರಾಚಾ ಮುಕಾರ್ ಕಾಂಯ್ಚ್ ಉಲಯ್ನಾಸ್ತಾನಾ ತೆಂ ಪ್ರದರ್ಶಿತ್ ಕರುಂಕ್ ಲಾಗ್ಲೆಂ.

ಆಲಿಯಾಚಾ ಹ್ಯಾ ಪ್ರಯತ್ನಾಂತ್ ತೆಂ ಆತಾಂ ಪಯ್ಲೆಂಚಾ ಪ್ರಾಸ್ ಚಡ್ ಮಾನಸಿಕ್ ದಗ್ದೊಣೆಕ್ ವಳಗ್ ಜಾಲೆಂ. ಆಪ್ಲ್ಯಾಚ್ ಮತಿಕ್ ಆಪ್ಣೆಚ್ ಭಲಾತ್ಕಾರೆನ್ ವೊಡುನ್ ಖಂಯ್ಚಾ ಎಕಾ ವಾಟೆನ್ ಉಭೆಂ ಕರ್‍ಚೆಂ ನಿಜಾಯ್ಕ್‌ಯ್ ಆಲಿಯಾಕ್ ಮಾನಸಿಕ್ ಬಲತ್ಕಾರ್ ಜಾಂವ್ಕ್ ಪಾವ್ಲೆಂ. ಕಿತ್ಲೆಚ್ ಪಾವ್ಟಿಂ ಥಕ್ಲೆಲ್ಯಾ ಕುಡಿಕ್ ವಿಶೆವ್ ಜಾಯ್ ಮ್ಹಣೊನ್ ಭೊಗ್ಲ್ಯಾರ್‍ಯ್, ಪರ್‍ಕಿ ಚಲಿಯೆಚಾ ಭಿಯಾನ್ ಆಪ್ಲ್ಯಾ ಕುಡಿಕ್ ನಾಸಿರಾಚಾ ಮುಕಾರ್ ಆಲಿಯಾಕ್ ವಿಣ್ಗೆಂ ಘಾಲುಂಕ್ ಪಡ್ಲೆಂ. ಕಾಂಯ್ ಆಪ್ಲೊ ನಾಸಿರ್ ಆಪ್ಲ್ಯಾ ಬಾಯ್ಲೆ ಥಾವ್ನ್ ಮೆಳಾನಾತ್‌ಲ್ಲ್ಯಾ ಸುಖಾಕ್ ಆಶೆವ್ನ್ ಅಮೀನಾ ಸವೆಂ ತೆಂ ಸುಖ್ ಸೊಧುನ್ ವಚಾತ್ ಜಾಲ್ಯಾರ್? ಕಶೆಂ ತರ್‍ಯ್ ಆಲಿಯಾಕ್ ಆತಾಂ ಆಪ್ಲೊ ಸಂಭಂಧ್ ಉರಂವ್ಕ್ ಜಾಯ್ ಆಸ್‌ಲ್ಲೊ. ಪುಣ್ ನಾಸಿರ್ ಆಪ್ಲ್ಯಾ ಹಕ್ಕಾಚೆಂ ಸುಖ್ ಘೆತಾಲೊ ತರ್‍ಯ್ ಮಾನಸಿಕ್ ಪಿಡೆಕ್ ವಳಗ್ ಜಾವ್ನ್ ವಳ್ವಳ್ಚ್ಯಾ ಆಲಿಯಾಕ್ ತೆಂ ಸುಖ್ ಮೆಳಾನಾಸ್ತಾನಾ ಗೆಲೆಂ. ಸಾಂಗಾತ್ ದೀನಾತ್‌ಲ್ಲ್ಯಾ ಮತಿ ವರ್ವಿಂ ಆಲಿಯಾಚಿಂ ಭಗ್ಣಾಂ ಉಮಾಳುಂಕ್ ಜಾಯ್ ಜಾಲ್ಲ್ಯಾ ವೆಳಾರ್ ಉಮಾಳಿನಾಸ್ತಾನಾ ತಾಚ್ಯಾ ಕುಡಿ ಭಿತರ್‍ಚ್ ಚಿರ್ಮುಟೊನ್ ಗೆಲಿಂ. ಘೊವಾ ಥಾವ್ನ್ ಜೊಡ್ಚೆಂ ತೆಂ ಸುಖ್ ತಾಕಾ ಮೆಳಾನಾಸ್ತಾನಾ ಗೆಲೆಂ.

ಕುಡಿಕ್ ಕೊಣ್‌ಯ್ ಕಶೆಂಯ್ ಉಪಯೋಗ್ ಕರುಂಕ್ ಸಕ್ತಾ. ಪುಣ್ ಮತಿಚಾ ಸ್ಪಂದನಾಕ್ ಕೊಣ್‌ಯ್ ಕಶೆಂಯ್ ಉಪಯೋಗ್ ಕರುಂಕ್ ಸಕಾನಾಂತ್. ಮತಿಚ್ಯಾ ಸ್ಪಂದನಾಕ್ ಮೋಗ್ ಮಾತ್ರ್ ಜಿಕೊಂಕ್ ಸಕ್ತಾ!

ಹೊ ಮೋಗ್ ಆಲಿಯಾಚಾ ಜಿವಿತಾಂತ್ ಉಣೊ ಜಾಲ್ಲ್ಯಾ ಪರಿಂ ಜಾವ್ನ್ ಯೆತಾನಾ ವಯ್ಲ್ಯಾಭಾರ್ ಪಳಂವ್ಕ್ ಸಗ್ಳೆಂ ಸಾರ್‍ಕೆಂ ದಿಸ್ತಾಲೆಂ ತರ್‍ಯ್ ಭಿತರ್‍ಲ್ಯಾನ್ ಆಲಿಯಾ ಜಳ್ಚ್ಯಾ ಉಜ್ಯಾ ವಯ್ಲಿ ಮಾತಿಯೆಚಿ ಮೊಡ್ಕಿ ಜಾಲ್ಲೆಂ. ಹ್ಯಾ ಮಾತಿಯೆಚಾ ಮೊಡ್ಕೆಂತ್ ಉದಾಕ್ ವೊತ್ಚ್ಯಾ ಪರಿಂಯ್ ನಾತ್‌ಲ್ಲೆಂ ತೊ ಉಜೊ ಪಾಲ್ವೊಂಚಾ ಪರಿಂಯ್ ನಾತ್‌ಲ್ಲೊ. ಉಜ್ಯಾಚಾ ಧಾವೆಂತ್ ಲಾಸ್ಚ್ಯಾ ಮೊಡ್ಕೆ ಪರಿಂ ಆಲಿಯಾ ಉಜ್ಯಾಂತ್ ಲಾಸ್ಲೆಂ ತರ್‍ಯ್ ಜಯ್ತಾಚಿ ವಾಟ್ ತಾಕಾ ಲಾಭ್ಲಿ ನಾ. ಆಲಿಯಾಚಾ ಸಲ್ವಣೆಕ್ ನಾಸಿರಾನ್ ಆಪ್ಣಾಚೊಚ್ ಫಾಯ್ದೊ ಕರುನ್ ಘೆತ್ಲೊ ಶಿವಾಯ್, ಆಲಿಯಾ ಥಂಯ್ ತೊ ನವ್ಯಾನ್ ಎಕ್ವಟೊಂಕ್ ಸಕ್ಲೊ ನಾ. ಆಪ್ಲ್ಯಾ ಬಾಯ್ಲೆಕ್ ತೊ ಸಮ್ಜೊಂಕ್ ಸಕ್ಲೊ ನಾ. ಹ್ಯಾ ವರ್ವಿಂ ಆತಾಂ ಆಲಿಯಾ ಕುಡಿ ಮನಾಂತ್ ದೆದೆಸ್ಪರ್ ಜಾಲೆಂ.

ಆಲಿಯಾಚಾ ಮತಿಚ್ಯಾ ದೆದೆಸ್ಪರ್‍ಪಣಾಚೊ ಪ್ರಭಾವ್ ದೀಸ್ ವೆತಾಂ ವೆತಾಂ ಆಲಿಯಾಚಾ ಉಲೊವ್ಣ್ಯಾಂತ್ ಆನಿ ತಾಚ್ಯಾ ಕರ್‍ನ್ಯಾಂನಿ ಪರ್‍ತ್ಯಾಕ್ ದಿಸೊನ್ ಯೇಂವ್ಕ್ ಲಾಗ್ಲೊ. ನಾಸಿರಾಕ್ ಅಮೀನಾ ಪಸಂದ್ ಜಾತಾಲೆಂ ಯಾ ಅಮೀನಾ ನಾಸಿರಾಕ್ ವೊಡುಂಕ್ ಪ್ರಯತ್ನ್ ಕರ್‍ತಾಲೆಂ ತೆಂ ಸಮ್ಜೊಂಕ್ ಆಲಿಯಾನ್ ಕೆಲ್ಲೆಂ ಪ್ರಯತ್ನ್ ತರ್‍ಯ್ ಫಳ್ ದೀಂವ್ಕ್ ಸಕ್ಲೆಂ ನಾ. ಬಗಾರ್ ತ್ಯಾ ತಾಚ್ಯಾ ಪ್ರಯತ್ನಾ ವರ್ವಿಂ ಆಲಿಯಾ ಆತಾಂ ಸಂಪೂರ್ಣ್ ಹತಾಶ್ ಜಾಲೆಂ. ಹಾಚೊ ಪರಿಣಾಮ್ ಜಾವ್ನ್ ನವ್ಯಾನ್ ಆಲಿಯಾ ಆನಿ ನಾಸಿರಾಚೆಂ ಘರ್ ಝುಜಾಚೆಂ ಮಯ್ದಾನ್ ಜಾಲೆಂ. ಆಲಿಯಾ ಆಪ್ಣಾಕ್ ಫಕತ್ತ್ ಏಕ್ ತಕ್ಲಿ ವಿರಾರಾಯೆಚಿ ವಸ್ತ್ ಮ್ಹಣ್ ಕಳೊನ್ ಆತಾಂ ನಾಸಿರ್‍ಯ್ ಅಮೀನಾಕ್ ಚಡ್ ಲಾಗಿಂ ಜಾಲೊ.

*************

’ಅಹ್ಮದಾಬಾದ್-ಮುಂಬಯಿ’

ಆಜ್ ಆಲಿಯಾ ಪರ್‍ತ್ಯಾಕ್ ತ್ಯಾ ಮತಿಚ್ಯಾ ವಿರಾರಾಯೆಕ್ ಪೃಥ್ವೆರ್‍ಚ್ ಸಾಂಡುನ್ ವಾರ್‍ಯಾರ್ ಉಭ್‌ಲ್ಲೆಂ.

ಸೃಶ್ಟೆ ಥಾವ್ನ್ ಭೋವ್ ಪಯ್ಸ್ ತ್ಯಾ ಮೊಳಾಬಾರ್ ಪಾವ್ತಾನಾ ಆಲಿಯಾ ಆಪ್ಣಾಚಾ ಸರ್ವ್ ಮತಿಚ್ಯಾ ಬೆಜಾರಾಯೆ ಥಾವ್ನ್ ಮುಕ್ತಿ ಜೊಡುನ್ ಪ್ರಶಾಂತ್ ದಿಸ್ಚ್ಯಾ ತ್ಯಾ ಕುಪಾಂ ಸಾಂಗಾತಾ ಆಪ್ಣಾಕ್‌ಚ್ ವಿಸ್ರಾತಾಲೆಂ.

ಆಲಿಯಾಕ್ ಘೆವ್ನ್ ಮುಂಬಯಿ ಥಾವ್ನ್ ಅಹ್ಮದಾಬಾದ್ ಉಭ್‌ಲ್ಲೆಂ ಪ್ಲೈಟ್ ಪಾಟಿಂ ಮುಂಬಯಿಕ್ ಯೇಂವ್ಕ್ ತಯಾರ್ ಜಾಲ್ಲೆಂ.

ಆಲಿಯಾಕ್ ಹೆಂ ಅಹ್ಮದಾಬಾದ್ ಕಾಂಯ್ ನವೆಂ ನ್ಹಯ್. ಹಾಚ್ಯಾ ಪಯ್ಲೆಂ ತೆಂ ಸಭಾರ್ ಪಾವ್ಟಿಂ ಹ್ಯಾ ಅಹ್ಮದಾಬಾದಾಕ್ ಆಯ್ಲಾಂ. ಮುಂಬಯಿ ಥಾವ್ನ್ ಆಯಿಲ್ಲ್ಯಾ ಪ್ಲೈಟಾಕ್ ಅಹ್ಮದಾಬಾದ್ ಚಡ್ ವೇಳ್ ರಾವೊಂಕ್ ಪಡಾನಾ. ಫಕತ್ತ್ ಥೊಡೊಚ್ ವೇಳ್! ಜಶೆಂ ಮುಂಬಯಿ ಥಾವ್ನ್ ಆಯ್ಲೆಲೆ ಪಯ್ಣಾರಿ ದೆಂವ್ಲೆ ಮ್ಹಣ್ತಗಾಚ್ ಮುಂಬಯಿಕ್ ವೆಚ್ಯಾ ಪಯ್ಣಾರ್‍ಯಾಂಕ್ ಘೆವ್ನ್ ವಿಮಾನಾನ್ ಉಭೊಂಕ್ ಆಸ್‌ಲ್ಲೆಂ.

ಪಯ್ಣಾರ್‍ಯಾಂಚಿ ಲಗೇಜ್ ವಿಮಾನಾರ್ ಚಡವ್ನ್ ನವ್ಯಾ ಪಯ್ಣಾರ್‍ಯಾಂಕ್ ಏರ್‍ಹೊಸ್ಟೆಸಾಂನಿ ವಿಮಾನಾರ್ ಹಾಸ್ತ್ಯಾ ತೊಂಡಾಚೊ ಯೆವ್ಕಾರ್ ಮಾಗ್ಲೊ. ಪಯ್ಣಾರ್‍ಯಾಂಕ್ ತಾಂಚಿ ತಾಂಚಿ ಬಸ್ಕಾ ದಾಖವ್ನ್ ಹ್ಯಾಂಡ್ ಲಗೇಜಿಚೆಂ ಕ್ಯಾಬಿನ್ ಲಾಕ್ ಕರುನ್ ವಿಮಾನಾಚಾ ಕ್ಯಾಪ್ಟನಾಕ್ ಆಫೀಶಿಯಲ್ ಸಿಗ್ನಲ್ ಮೆಳ್ತಾನಾ ವಿಮಾನ್ ಪರ್‍ತ್ಯಾಕ್ ವಾರ್‍ಯಾರ್ ಉಭೊಂಕ್ ತಯಾರ್ ಜಾಲೆಂ. ಸಿಗ್ನಲ್ ಟವರಾ ಥಾವ್ನ್ ಸಿಗ್ನಲ್ ಮೆಳ್‌ಲ್ಲೆಂಚ್ ವಿಮಾನ್ ಆತಾಂ ವ್ಹಳೂ ತ್ಯಾ ರನ್‌ವೇಚೆರ್ ಧಾಂವೊಂಕ್ ಲಾಗ್ಲೆಂ. ಥೊಡೆಂ ಮುಕಾರ್ ಗೆಲ್ಲೆಂ ತೆಂ ಸವ್ಕಾಸ್ ಥಾಂಬ್ಲೆಂ. ತಾಣೆಂ ಆತಾಂ ವೇಗ್ ಆರಾಂವ್ಕ್ ಆಸ್‌ಲ್ಲೊ.

ಥೊಡೊಚ್ ವೇಳ್!

ಪರ್ತ್ಯಾಕ್ ವಿಮಾನಾನ್ ಧಾಂವೊಕ್ ಆರಂಭ್ ಕೆಲೆಂ. ವೇಗ್ ಆರಾವ್ನ್ ಧಾಂವ್‌ಲ್ಲೆಂ ತೆಂ ಧರ್ಣಿಕ್ ಸೊಡುನ್ ವಾರ್‍ಯಾರ್ ಉಭ್ಲೆಂ.

ವಿಮಾನ್ ಆತಾಂ ಕೊಣಾಚಿಚ್ ಪರ್ವಾ ನಾಸ್ತಾನಾ ಅಹ್ಮದಾಬಾದಾಕ್ ಸೊಡುನ್ ಮುಂಬಯಿಚಾ ಆಪ್ಲ್ಯಾ ದಿಶೆ ತೆವ್ಶಿಂ ಧಾಂವೊಕ್ ಲಾಗ್ಲೆಂ. ವಿಮಾನಾ ಭಿತರ್ ಸೀಟ್ ಬೆಲ್ಟಾಚೊ ಹಿಶಾರೊ ಪಾಲ್ವಾತಾನಾ ಎದೊಳ್ ವರೇಗ್ ಬಸೊನ್ ಆಸ್‌ಲ್ಲಿಂ ಏರ್‍ಹೊಸ್ಟೆಸಾಂ ಆನಿ ಏರ್‍ಹೋಸ್ಟ್ ಆಪ್ಲ್ಯಾ ಕಾಮಾಕ್ ಲಾಗ್ಲಿಂ. ತಾಂಕಾ ಪಯ್ಣಾರ್‍ಯಾಂಚಿ ಸೆವಾ ಕರುಂಕ್ ಆಸ್‌ಲ್ಲಿ.

ರಿಫ್ರೆಶ್ ಜಾಂವ್ಚ್ಯಾಕ್ ಸಗ್ಳ್ಯಾ ಪಯ್ಣಾರ್‍ಯಾಂಕ್ ತಾಣಿಂ ಜ್ಯೂಸ್ ದಿಲೊ. ಹೆಂ ತಾಂಚೆಂ ಸದಾಂಚೆಂ ಕಾಮ್.

"ಥೊಡೆಂ ಉದಾಕ್ ಹಾಡ್...!"

ಜ್ಯೂಸ್ ಟ್ರೇ ವೊಡ್ಡಾಯಿಲ್ಲ್ಯಾ ಆಲಿಯಾಕ್‌ಚ್ ಪಳವ್ನ್ ಸಾಂಗ್ಲೆಲ್ಯಾ ವ್ಯಕ್ತಿಚ್ಯಾ ಬಸ್ಕೆಚೆಂ ನಂಬರ್ ಆಲಿಯಾನ್ ಪಳೆಲೆಂ.

’ಅಟ್ರಾ!’ ತಾಣೆಂ ಆಪ್ಲ್ಯಾ ಮತಿಂತ್ ಹ್ಯಾ ನಂಬರಾಕ್ ಉಡಾಸ್ ದವರ್‍ಲೆಂ.

ಏಕ್ ಪಾವ್ಟಿಂಚ್ಯಾಕ್ ಸಗ್ಳ್ಯಾಂಕ್ ಜ್ಯೂಸ್ ಭೊಂವ್ಡಾವ್ನ್ ಜಾಲ್ಯಾ ಉಪ್ರಾಂತ್ ಕೊಣೆ ಕಿತೆಂ ಮಾಗ್ಲಾಂ ತೆಂ ಆಲಿಯಾ ಉಡಾಸ್ ಕರಿಲಾಗ್ಲೆಂ.

ಎಕ್ಲ್ಯಾನ್ ನಿವ್ಸ್ ಪೇಪರ್ ಮಾಗ್‌ಲ್ಲೆಂ. ತಾಕಾ ತೆಂ ಇಂಡಿಯನ್ ಎಕ್ಸ್‌ಪ್ರೆಸ್ ದಿಸಾಳೆಂ ಪತ್ರ್ ತಾಣೆಂ ದಿಲೆಂ. ದೊಗಾಂ ಜಾಣಾಂನಿ ಉದಾಕ್ ವಿಚಾರ್‍ಲೆಲೆಂ. ಆಲಿಯಾ ಆತಾಂ ಉದಾಕ್ ಘೆವ್ನ್ ಗೆಲೆಂ. ಏಕ್ ಅಟ್ರಾ ನಂಬರ್ ಆನ್ಯೇಕ್...... ಉಡಾಸ್ ಕೆಲೆಂ ತಾಣೆಂ. ಪುಣ್ ಆಲಿಯಾಕ್ ಉಡಾಸ್ ಆಯ್ಲೆಂ ನಾ. ಅಟ್ರಾ ನಂಬ್ರಾಚ್ಯಾ ಬಿ ಬಸ್ಕೆಚೆರ್ ಬಸ್ಲೆಲ್ಯಾಕ್ ಉದಾಕ್ ದೀವ್ನ್ ದುಸ್ರ್ಯಾಕ್ ತೆಂ ಸೊಧುನ್ ಗೆಲೆಂ. ಮತಿಂತ್ಲ್ಯಾ ಉಡಾಸಾಕ್ ಜಾಗಯ್ತಾನಾ ಉದಾಕ್ ವಿಚಾರ್‍ಲೆಲ್ಯಾ ಮನ್ಶಾಚೆಂ ರೂಪ್ ಸಾರ್‍ಕೆಂ ತಾಚ್ಯಾ ಮತಿಕ್ ಆಯ್ಲೆಂ ನಾ.

"ತುವೆಂ ಉದಾಕ್ ವಿಚಾರ್‍ಲೆಲೆಂಯ್?" ಬಾರಾ ನಂಬ್ರಾಚಾ ಎ ಬಸ್ಕೆಚೆರ್ ಬಸ್ಲೆಲ್ಯಾಕ್ ಆಲಿಯನ್ ವಿಚಾರ್‍ಲೆಂ. ತಾಣೆಂ ಕಾಂಯ್ಚ್ ಉಲಯ್ನಾಸ್ತಾನಾ ಆಲಿಯಾಚಾ ಹಾತಾಂತ್ಲೆಂ ಉದಾಕ್ ಘೆತ್ಲೆಂ. ಆಪ್ಣಾಲಾಗಿಂ ಉದಾಕ್ ವಿಚಾರ್‍ಲೆಲಿ ವ್ಯಕ್ತಿ ವಿಮಾನಾಚಾ ಜನೆಲಾ ಕುಶಿಕ್ ಬಸೊನ್ ಆಸ್‌ಲ್ಲಿ ಮ್ಹಣೊನ್ ಆಲಿಯಾಕ್ ಉಡಾಸ್ ಆಸ್‌ಲ್ಲೊ. ಪುಣ್ ತ್ಯಾ ಬಸ್ಕೆಚೆಂ ನಂಬರ್ ಮಾತ್ರ್ ಸಾರ್‍ಕೆಂ ಉಡಾಸ್ ದವರುಂಕ್ ತೆಂ ವಿಸ್ರಾಲ್ಲೆಂ. ಹರ್ಶೆಂ ಕೆದಾಳಾಯ್ ತೆಂ ಬಸ್ಕೆಚ್ಯಾ ವಯ್ರ್ ಆಸ್ಚ್ಯಾ ಇಂಡಿಕೇಟರ್ ಲಾಯ್ಟಾಕ್ ದಾಂಬ್ತಾಲೆಂ. ಪುಣ್ ಆಜ್....! ತಾಕಾಚ್ಚ್ ಕಳಿತ್ ನಾತ್ಲೆಲ್ಯಾಪರಿಂ ತೆಂ ವಿಸ್ರೊನ್ ಗೆಲ್ಲೆಂ. ಉದಾಕ್ ತ್ಯಾ ಪಯ್ಣಾರ್‍ಯಾಚಾ ಹಾತಿಕ್ ದೀವ್ನ್ ತಾಕಾ ಹಾಸೊ ಪಾಟಯಿಲ್ಲೆಂ ಆಲಿಯಾ ಪಾಟಿಂ ಗೆಲ್ಲೆಂ ತೆಂ ಪಾಟ್ಲ್ಯಾ ಪ್ಯಾಂಟ್ರಿ ಕಿಚನ್ ಕ್ಯಾಬಿನಾಂತ್ ರಿಗ್ಲೆಂ.

ಥೊಡ್ಯಾ ವೆಳಾನ್ ಬೆಲ್ಲ್ ವಾಜ್ಲಿ.

ನಂಬರ್ ಪಳೆಲೆಂ ಆಲಿಯಾನ್.

ಚವ್ದಾ ಎ!

ತೆಂ ಆತಾಂ ಚವ್ಕಾಸ್ ಚವ್ದಾ ನಂಬ್ರಾಚ್ಯಾ ಬಸ್ಕೆ ತೆವ್ಶಿಂ ಚಮ್ಕಾಲೆಂ.

"ತುಕಾ ಹಾವೆಂ ಉದಾಕ್ ಹಾಡುಂಕ್ ಸಾಂಗ್‌ಲ್ಲೆಂ!" ಚವ್ದಾ ನಂಬ್ರಾಚಾ ಬಸ್ಕೆಚಾ ಮುಕಾರ್ ಆಯಿಲ್ಲ್ಯಾ ಆಲಿಯಾಕ್ ಪಳವ್ನ್ ತ್ಯಾ ಬಸ್ಕೆಚೆರ್ ಬಸ್ಲೆಲೊ ಸಾದಾರ್ನ್ ತರ್ನಾಟೊ ಉಲಯ್ಲೊ. ತಾಚ್ಯಾ ತಾಳ್ಯಾಂತ್ ದ್ರಡಾತಾ ಆಸ್‌ಲ್ಲಿ. ದಿಶ್ಟೆಂತ್ ತಾತ್ಸಾರ್ ಆಸ್‌ಲ್ಲೊ. ತೊಂಡಾರ್ ಹುಕುಮ್ ಆಸ್‌ಲ್ಲಿ.

ಪಾಟಿಂ ಪ್ಯಾಂಟ್ರಿಕ್ ಆಯಿಲ್ಲ್ಯಾ ಆಲಿಯಾನ್ ಮಿನರಲ್ ಉದ್ಕಾಚೊ ಗ್ಲಾಸ್ ವರುನ್ ತ್ಯಾ ಚವ್ದಾ ನಂಬ್ರಾಚ್ಯಾಕ್ ದಿಲೊ. ಆತಾಂ ಆಲಿಯಾಚಾ ತೊಂಡಾರ್ ತೊಚ್ ತ್ಯಾ ವ್ಯಕ್ತಿನ್ ಪಯ್ಲೆಂ ಆಪ್ಣಾಕ್ ಪಾಟಾಯಿಲ್ಲೊ ಛಾರೊ ರಾಜ್ ಕರ್‍ತಾಲೊ.

"ಅನ್ಯೇಕ್ ಹಾಡ್!" ತ್ಯಾ ವ್ಯಕ್ತಿನ್ ಆಲಿಯಾಚಾ ಹಾತಿಂತ್ಲೊ ಗ್ಲಾಸ್ ಘೆತ್ಲೊ ಆನಿ ಆಪ್ಲ್ಯಾ ಬಗ್ಲೆಕ್ ಬಸೊನ್ ಆಸ್‌ಲ್ಲ್ಯಾ ತಾಚ್ಯಾ ಸಾಂಗಾತ್ಯಾಕ್ ದಿಲೊ.

ಆಲಿಯಾ ತ್ಯಾ ವ್ಯಕ್ತಿಕ್‌ಚ್ ಪಳವ್ನ್ ತಶೆಂಚ್ ರಾವ್ಲೆಂ. ತಾಚೆಂ ವರ್‍ತನ್ ಕಿತ್ಯಾಕ್‌ಗೀ ಆಲಿಯಾಕ್ ಬರೆಂ ಲಾಗ್ಲೆಂ ನಾ. ತೊ ವ್ಯಕ್ತಿ ಆಪ್ಣಾ ಸವೆಂ ಜಾಣಾಂ ಆಸೊನ್ ಆಶೆಂ ಕರ್‍ತಾಂ ಮ್ಹಳ್ಳ್ಯಾ ಪರಿಂ ಆಲಿಯಾಕ್ ದಿಸ್ಲೆಂ.

"ಅನ್ಯೇಕ್ ಉದಾಕ್......!" ತ್ಯಾ ವ್ಯಕ್ತಿನ್ ಆತಾಂ ಆಪ್ಲ್ಯಾ ಹಾತಾ ಬೊಟಾಂನಿ ಉದ್ಕಾಚಾ ಗ್ಲಾಸಾಚಿ ಸೈಜ್ ದಾಕವ್ನ್ ವಿಚಾರ್‍ಲೆಂ.

"ಏಕ್ ಪುರೊ? ಯಾ.....!" ಆಲಿಯಾನ್ ತಾಕಾಚ್ಚ್ ಪಳವ್ನ್ ಪಾಟಿಂ ಸವಾಲ್ ಕೆಲೆಂ.

"ಸದ್ದ್ಯಾಕ್ ಏಕ್ ಪುರೊ! ಉಪ್ರಾಂತ್ ಜಾಯ್ ಜಾಲ್ಯಾರ್ ಸಾಂಗ್ತಾಂ!" ತೊ ಹಾಸ್ಲೊ. ತಾಚ್ಯಾ ಹಾಸ್ಯಾಂನಿ ಎಕಾ ಥರಾಚೆಂ ಇನ್‌ಸಲ್ಟ್ ಆಸಾ ಮ್ಹಳ್ಳ್ಯಾಪರಿಂ ದಿಸ್ತಾಲೆಂ.

ಆಲಿಯಾ ಆತಾಂ ಪಾಟಿಂ ಘೆಲೆಂ ಆನಿ ಉದಾಕ್ ಹಾಡುನ್ ತ್ಯಾ ವ್ಯಕ್ತಿಕ್ ದೀವ್ನ್ ಪಾಟಿಂ ಗೆಲೆಂ.

"ಹಾಕಾ ಮಸ್ತ್ ಹಂಕಾರ್ ಆಸಾ!" ತ್ಯಾ ವ್ಯಕ್ತಿನ್ ಉಚಾರ್‍ಲ್ಲಿ ಉತ್ರಾಂ ಆಲಿಯಾಚಾ ಕಾನಾಂಕ್ ಪಡಾನಾಸ್ತಾನಾ ಗೆಲಿಂ ನಾಂತ್.

ತಿತ್ಲೆಂಚ್!

ಪಾಟಿಂ ಪ್ಯಾಂಟ್ರಿಕ್ ವೆಚೆಂ ಆಲಿಯಾ ’ಸಕ್ಕ್’ ಕರುನ್ ಆಪ್ಲ್ಯಾ ಪಾಂಯಾಂಕ್ ಬ್ರೇಕ್ ಮಾರುನ್ ಉಭೆಂ ಜಾಲೆಂ. ತಾಣೆಂ ಪಾಟಿಂ ಘುಂವೊನ್ ತ್ಯಾ ’ಆಪ್ಣಾಕ್ ಹಂಕಾರ್ ಆಸಾ’ ಮ್ಹಣೊನ್ ಸಾಂಗ್ಲೆಲ್ಯಾ ವ್ಯಕ್ತಿಕ್‌ಚ್ ಪಳೆಲೆಂ. ಪುಣ್ ಆಲಿಯಾ ತಾಚ್ಯಾ ಪಾಟ್ಲ್ಯಾನ್ ಆಸ್‌ಲ್ಲ್ಯಾ ಆಲಿಯಾಚೆಂ ಹೆಂ ವರ್‍ತನ್, ವಿಮಾನಾಚಾ ಬಸ್ಕೆರ್ ಬಸ್ಲೆಲ್ಯಾ ತ್ಯಾ ವ್ಯಕ್ತಿಕ್ ದಿಸ್ಲೆಂ ನಾ. ತೊ ತಸೊಚ್ಚ್ ಆಪ್ಲ್ಯಾ ಸಾಂಗಾತ್ಯಾ ಸವೆಂ ಹಾಸೊನ್ ಆಸ್‌ಲ್ಲೊ.

ಥೊಡೊ ವೇಳ್ ತಶೆಂಚ್ ತ್ಯಾ ವ್ಯಕ್ತಿಕ್ ರಾಗಾನ್ ಪಳವ್ನ್ ರಾವ್ಲೆಲೆಂ ಆಲಿಯಾ, ಉಪ್ರಾಂತ್ ಪ್ಯಾಂಟ್ರಿ ತೆವ್ಶಿಂ ಚಮ್ಕಾಲ್ಲೆಂ ತೆಂ ಉದ್ಕಾಚೊ ಏಕ್ ಗ್ಲಾಶಾಡುನ್ ತ್ಯಾ ಉದಾಕ್ ಮಾಗ್ಲೆಲ್ಯಾ ವ್ಯಕ್ತಿಕ್ ದೀವ್ನ್ ಪಾಟಿಂ ಚಮ್ಕಾಲೆಂ.

ಆತಾಂ ಪಯ್ಣಾರ್‍ಯಾಂಕ್ ನಾಸ್ಟೊ ದಿಂವ್ಚೊ ವೇಳ್ ಆಯಿಲ್ಲೊ. ನಾಸ್ಟೊ ಭರ್ಲೆಲಿ ಟ್ರಾಲಿ ಲೊಟುನ್ ಸಗ್ಳಿಂ ತಯಾರ್ ಜಾತಾನಾ ಎಕಾ ಟ್ರಾಲಿಕ್ ಧರುನ್ ಆಲಿಯಾ ತಯಾರ್ ಜಾಲೆಂ.

ಪರ್‍ತ್ಯಾಕ್ ತೊಚ್ ವ್ಯಕ್ತಿ!

ತೊ ಆಪ್ಲ್ಯಾ ಬಸ್ಕೆಚೆರ್ ಪಾಂಯ್ ಸೊಡುನ್ ಬಸ್‌ಲ್ಲೊ ಶಿವಾಯ್ ತಾಚ್ಯಾ ಮುಕಾರ್ ಆಸ್‌ಲ್ಲ್ಯಾ ತ್ಯಾ ಫೋಲ್ಡಿಂಗ್ ಟ್ರೇಯಾಕ್ ತಾಣೆಂ ಸೊಡಂವ್ಚೆಂ ಪ್ರಯತ್ನ್ ಕೆಲೆಂ ನಾ. ಆಲಿಯಾನ್‌ಚ್ ತ್ಯಾ ಟ್ರೇಯಾಚೆಂ ಲಾಕ್ ಕಾಡುನ್ ತಾಕಾ ಸೊಡವ್ನ್ ತ್ಯಾ ಟ್ರೇಯಾಚೆರ್ ನಾಸ್ಟೊ ದವರುನ್ ತೆಂ ಮುಕಾರ್ ಗೆಲೆಂ. ನಾಸ್ಟೊ ಸಗ್ಳ್ಯಾಂಕ್ ದೀವ್ನ್ ಜಾವ್ನ್ ಖಾಲಿ ಟ್ರಾಲಿ ಪಾಟಿಂ ಲೊಟುನ್ ತೆಂ ಆಯ್ಲೆಂ.

ಥೊಡ್ಯಾ ವೆಳಾನ್ ಚ್ಹಾ ಆನಿ ಕಾಫಿ ಭೊಂವ್ಡಾಯ್ಲಿ.

ಆತಾಂ ಪರ್‍ತ್ಯಾಕ್ ತಿಂ ಏರ್‍ಹೊಸ್ಟೆಸಾಂ ತ್ಯಾ ಟ್ರಾಲಿಕ್ ಲೊಟುನ್ ಆಯ್ಲಿಂ. ಪಯ್ಣಾರ್‍ಯಾಂಕ್ ನಾಸ್ಟೊ ದಿಲ್ಲ್ಯಾ ಟ್ರೇಯಾಂಕ್ ಪರ್‍ತ್ಯಾಕ್ ಪಾಟಿಂ ಟ್ರಾಲಿಚೆರ್ ಭರುಂಕ್ ಆಸ್‌ಲ್ಲೆಂ.

ಥೊಡ್ಯಾಂನಿ ಆಪ್ಣೆ ನಾಸ್ಟೊ ಖೆಲ್ಲ್ಯಾ ಟ್ರೇಯಾಂಕ್ ಆಪ್ಲ್ಯಾ ಹಾತಾಂನಿ ಉಕ್ಲುನ್ ದಿಲೆಂ. ಥೊಡೆ ಪೋಟ್ಭರುನ್ ಥಂಡ್ ಜಾಲ್ಲೆ. ಥೊಡ್ಯಾಂನಿ ’ಥ್ಯಾಂಕ್ ಯು’ ತೊಂಡಾರ್ ಹಾಸೊ ಹಾಡ್ಲ್ಯೊ. ಆಲಿಯಾಕ್ ಹೆಂ ಕಾಂಯ್ ಫರಕ್ ಪಡಾನಾತ್‌ಲ್ಲೆಂ. ತಾಚೆಂ ಕಾಮ್ ತೆಂ ಕರ್‍ತಾಲೆಂ.

ತೆಂ ಆತಾಂ ಚವ್ದಾ ನಂಬ್ರಾಚ್ಯಾ ಬಸ್ಕೆಕ್‌ಯ್ ಆಯ್ಲೆಂ. ನಾಸ್ಟ್ಯಾಚಿ ಟ್ರೇ ಸಗ್ಳಿ ಚೆಲ್ಲಾಪಿಲ್ಲಿ ಜಾಲ್ಲಿ. ಜಶೆಂ ದಾಕ್ಟ್ಯಾ ಭುರ್ಗ್ಯಾನ್ ನಾಸ್ಟೊ ಕೆಲಾ ಮ್ಹಳ್ಳ್ಯಾ ಭಾಶೆನ್. ಆಲಿಯಾನ್ ತೆಂ ಸಗ್ಳೆಂ ತ್ಯಾ ಟ್ರೇಯಾಂತ್ ಘಾಲೆಂ ಆನಿ ತಿ ಟ್ರೇ ಆಪ್ಲ್ಯಾ ಟ್ರಾಲಿಂತ್ ಲೊಟ್ಲಿ. ತಶೆಂಸ್ ತಾಚ್ಯಾ ಬಗ್ಲೆಕ್ ಆಸ್‌ಲ್ಲ್ಯಾಚಿಯ್ ಆಲಿಯಾನ್ ಟ್ರೇ ಕಾಡ್ಲಿ.

ಆಲಿಯಾನ್ ಆತಾಂ ಟ್ರಾಲಿ ಮುಕಾರ್ ಲೊಟ್ಲಿ.

ತಿತ್ಲೆಂಚ್!

"ಹೆಂ ಕೋಣ್ ಸಾರ್‍ಕೆಂ ಕರ್‍ತಾ?" ತೊಚ್ಚ್ ದೊರಗ್ ತಾಳೊ ಆಯ್ಕೊನ್ ಆಲಿಯಾ ಪಾಟಿಂ ಘುಂವ್ಲೆಂ.

ಚವ್ದಾ ನಂಬ್ರಾಚಾ ವ್ಯಕ್ತಿಚಿ ನದರ್ ತಾಚ್ಯಾ ಮುಕ್ಲ್ಯಾ ತ್ಯಾ ಆಲಿಯಾನ್ ನಾಸ್ಟೊ ದವರುಂಕ್ ಸೊಡಯ್ಲೆಲ್ಯಾ ಫೋಲ್ಡಿಂಗ್ ಟ್ರೇಯಾಚೆರ್ ಖಂಚ್‌ಲ್ಲಿ. ತಾಚ್ಯಾ ನದ್ರೆಂತ್‌ಚ್ ತೊ ಹ್ಯಾ ತುವೆಂ ಸೊಡಯ್ಲೆಲ್ಯಾ ಟ್ರೇಯಾಕ್ ಕೋಣ್ ಫೋಲ್ಡ್ ಕರುನ್ ದವರ್‍ತಾ ಮ್ಹಳ್ಳೆಂ ಸವಾಲ್ ಆಸ್‌ಲ್ಲೆಂ

ತ್ಯಾ ತಾಣೆಂ ಉಚಾರ್‍ಲೆಲ್ಯಾ ತಾಳ್ಯಾಂತ್ ಕಾಂಯ್ಚ್ ಮೊವಾಳಾಯ್ ನಾತ್‌ಲ್ಲಿ. ಬದ್ಲಾಕ್ ಆಲಿಯಾಕ್ ಹುಕುಮ್ ಆಸ್‌ಲ್ಲಿ.

ತ್ಯಾ ವ್ಯಕ್ತಿಚಾ ಸವಾಲಾನ್ ಆಲಿಯಾಕ್ ನಿಜಾಯ್ಕ್‌ಯ್ ಲಜೆಕ್ ಘಾಲೆಂ. ಜಶೆಂ ಆಲಿಯಾ ತಾಚ್ಯಾ ಕಾಮಾಚೆಂ ಮ್ಹಳ್ಳ್ಯಾ ಪರಿಂ!

"ವಾಟ್ ಡು ಯು ಮೀನ್?" ಆಲಿಯಾನ್ ರಾಗಾನ್ ವಿಚಾರ್‍ಲೆಂ.

"ಕಿತೆಂ ಮ್ಹಳೆಂಯ್ ತುವೆಂ...?" ಬೋವ್ಶಾ ತ್ಯಾ ವ್ಯಕ್ತಿಕ್ ಇಂಗ್ಲಿಶ್ ಸಮ್ಜೊಂಕ್ ನಾ.

"ಐ ಯಾಮ್ ನಾಟ್ ಯುವರ್ ಸರ್ವಂಟ್..... ದೇಟ್ ಯು ಆರ್ ಆರ್‍ಡರಿಂಗ್ ಮಿ ಲೈಕ್ ದಿಸ್!" ಪರ್‍ತ್ಯಾಕ್ ಆಲಿಯಾ ಉಲಯ್ಲೆಂ.

"ಯೇ.... ತುಂ ಇಂಗ್ಲಿಶಾಂತ್ ಉಲಯ್ನಾಕಾ! ಹಿಂದಿಂತ್ ಉಲಯ್! ......ಕಿತೆಂ ಉಲಯ್ಲೆಂ ಹೆಂ....?" ತ್ಯಾ ವ್ಯಕ್ತಿನ್ ಆಪ್ಲ್ಯಾ ಬಗ್ಲೆಚ್ಯಾ ವ್ಯಕ್ತಿಕ್ ಥೊಡ್ಯಾ ಹಿಂದಿ ಥೊಡ್ಯಾ ಮರಾಠಿ ಫುಟ್ಕುರ್ ಭಾಶೆನ್ ವಿಚಾರ್‍ಲೆಂ.

ಆಲಿಯಾಚಾ ಉತ್ರಾಂಚೊ ಮತ್ಲಾಬ್ ತ್ಯಾ ಬಗ್ಲೆಚ್ಯಾ ವ್ಯಕ್ತಿನ್ ತಾಕಾ ಸಾಂಗ್ಲೊ.

"ಕಾಮಾಚೆಂ ತುಂ........! ಕಾಮಾಚೆಂ! ಆಪ್ಣಾಕ್‌ಚ್ ಕಿತೆಂ ವ್ಹಡ್ಲೆಂ ಮಾಧುರಿ ಸಮ್ಜಾತಾಯ್?"

ತಾಚ್ಯಾ ಉತ್ರಾಂನಿ ಆಲಿಯಾಕ್ ಘಡ್ಗಡೊ ಮಾರ್‍ಲ್ಲ್ಯಾ ಪರಿಂ ಜಾಲೆಂ. ವಿಮಾನಾ ವಯ್ಲೆ ಸಗ್ಳೆ ಪಯ್ಣಾರಿ ಹೆವ್ಶಿಂ ಘುಂವೊನ್ ಆಲಿಯಾಕ್ ಪಳಂವ್ಕ್ ಲಾಗ್ಲೆ. ಆಲಿಯಾಕ್ ಕಿತೆಂ ಜವಾಬ್ ದಿಂವ್ಚಿ ತಿ ಕಳ್ಳಿ ನಾ. ತಾಣೆಂ ಚಿಂತಿ ನಾತ್‌ಲ್ಲೆಂಚ್ ಘಡ್‌ಲ್ಲೆಂ ಆನಿ ಸಗ್ಳ್ಯಾ ಮುಕಾರ್ ತಾಕಾ ಹ್ಯಾ ವ್ಯಕ್ತಿನ್ ಆಲಿಯಾ ಆಪ್ಲ್ಯಾ ಕಾಮಾಚೆಂ ಮ್ಹಳ್ಳ್ಯಾ ಪರಿಂ ವೊಲಾಯಿಲ್ಲೆಂ.

ತಿತ್ಲ್ಯಾರ್ ಪಾಟ್ಲ್ಯಾನ್ ಆಸ್‌ಲ್ಲೊ ಚಲೊ ಏರ್‍ಹೋಸ್ಟ್ ಮುಕಾರ್ ಆಯಿಲ್ಲೊ,

"ಕಿತೆಂ ಜಾಲೆಂ ಸರ್!" ತ್ಯಾ ಚಲ್ಯಾ ಏರ್‍ಹೊಸ್ಟೆಸಾನ್ ಆಲಿಯಾಕ್ ಮುಕಾರ್ ವಚೊಂಕ್ ಹಿಶಾರೊ ಕೆಲೊ.

"ತುಕಾ ಹಾವೆಂ ಆಪಯ್ಲೆಂ?" ಮ್ಹಳ್ಳೊ ತೊ ಬಸ್ಕೆ ವಯ್ಲೊ ವ್ಯಕ್ತಿ "ತ್ಯಾ ಮಾಧುರಿಕ್ ಸಾಂಗ್ ಹೆಂ ಸಾರ್‍ಕೆಂ ಕರುಂಕ್!"

"ಇಟ್ಸ್ ಓ.ಕೆ. ಐ ವಿಲ್ ಡೂ ದೇಟ್!" ತೊ ತರ್ನಾಟೊ ಏರ್‍ಹೋಸ್ಟ್ ತಿ ಟ್ರೇ ದೊಡುಂಕ್ ಬಾಗ್ವಾಲೊ.

"ನಾ....... ತುಂ ಹಾಕಾ ಹಾತ್ ಲಾಂವ್ಚೊ ನಾಂಯ್! ತಾಕಾ ಸಾಂಗ್.... ಸಾಂಗ್ ತಾಕಾ!" ತೊ ಬಸ್ಕೆ ವಯ್ಲೊ ವ್ಯಕ್ತಿ ಗರ್ಜಾಲೊ.

"ರೋಶನ್ ಡೋಂಟ್ ಡು ದೇಟ್! ಲೀವ್ ಹಿಮ್!" ಆಲಿಯಾ ರಾಗಾನ್ ಬೊಬಾಟ್ಲೆಂ.

"ಲುಕ್ ಮಿಸ್ಟರ್!" ಆಲಿಯಾ ರಾಗಾನ್ ವಾಗಿಣ್ ಜಾಲ್ಲೆಂ. "ತುವೆಂ ಫಕತ್ತ್ ಎಕಾ ವೊರಾ ಖಾತಿರ್ ಹ್ಯಾ ಬಸ್ಕೆಚೆ ಪಯ್ಶೆ ಭರ್‍ಲ್ಯಾಯ್. ತಿತ್ಲೆಂಚ್! ತುವೆಂ ಪಯ್ಶೆ ಭರ್‍ಲಲೊ ತುಜೊ ವೇಳ್ ಜಾತಾನಾ ವಿಮಾನಾ ವಯ್ಲೊ ತುಂ ಚುಪ್ ಚಾಪ್ ಉಟೊನ್ ವಚ್. ತುಜಿ ಹುಕುಮ್ ಕಿತೆಂಯ್ ಆಸಾ ಜಾಲ್ಯಾರ್ ತಿ ತುಜ್ಯಾ ಘರಾ ಚಲಯ್! ಹಾಂಗಾಸರ್ ಕೊಣ್‌ಯ್ ತುಜಿಂ ಕಾಮಾಚಿಂ ನ್ಹಯ್!" ಆಲಿಯಾನ್ ತಿ ಟ್ರೇ ದೊಡ್ಲಿ ನಾ. ತೆಂ ಆತಾಂ ಮುಕಾರ್ ಚಲ್ಲೆಂ.

"ಕಾಮಾಚೆಂ......! ತುಂ ಮ್ಹಜ್ಯಾ ಕಾಮಾಚೆಂ! ಸಾಂಗ್ತಾಯ್ ಕಿತೆಂ....? ತುಕಾ ಹಾಂವ್ ಮ್ಹಜ್ಯಾ ಕಾಮಾಚೆಂ ಕರಿನಾ ಜಾಲ್ಯಾರ್....?" ತೊ ವ್ಯಕ್ತಿ ಘರ್ಜಾಲೊ.

"ಹ್ಯಾ ಸುಣ್ಯಾಕ್ ಆತಾಂಚಾ ಆತಾಂಚ್ ಹಾಂಗಾ ಎಕಾಚ್ ಮಾರಾನ್ ಮಾರುನ್ ಉಡಯ್ತೊಂ. ಹಾಂವ್ ಕೋಣ್ ಮ್ಹಣೊನ್ ಹೆಂ ನೆಣಾಂ. ಚಲ್ ತುಂ ಏರ್‍ಪೋರ್ಟಾ ಥಾವ್ನ್ ಭಾಯ್ರ್ ಯೇ.... ತುಕಾ ಶಿಕಯ್ತಾಂ! ಏರ್ ಪೊರ್‍ಟಾಚಾ ದಾರಾರ್ ಥಾವ್ನ್ ತುಕಾ ಉಕ್ಲಿನಾ ಜಾಲ್ಯಾರ್ ಹಾಂವ್ ಇಕ್ಬಾಲ್ ಭಾಯಿಚೊ ಭಾಯಿಚ್ ನ್ಹಯ್!" ತೊ ಪರ್‍ತ್ಯಾಕ್ ಬೊಬಾಟ್ಲೊ.

"ಇಕ್ಬಾಲ್ ಭಾಯಿ.....!" ಎಕಾ ಖಿಣಾಕ್ ವಿಮಾನಾ ವಯ್ಲ್ಯಾ ಹರ್ಯೆಕ್ಲ್ಯಾ ಪಯ್ಣಾರ್‍ಯಾಚಾ ತೊಂಡಾರ್ ಮಿರಿಯೊ ಪಡ್ಲ್ಯೊ.

ಅಚಾನಕ್ ಹ್ಯಾ ಇಕ್ಬಾಲ್ ಭಾಯಿಚೆಂ ನಾಂವ್ ಆಯ್ಕೊನ್ ಸಗ್ಳ್ಯಾಂಕ್ ದುಬಾವ್ ಉದೆಲೊ.

"ತುಂ ನೆಣಾಂಯ್ ತುಜ್ಯೆ ತಸಲ್ಯಾ ಕಿತ್ಲ್ಯಾ ಜಣಾಂಕ್ ಹಾವೆಂ ಮ್ಹಜ್ಯಾ ಘರ್‍ಚ್ಯಾ ಸಾಲಾಂತ್ ನಾಚಯ್ಲಾಂ ಮ್ಹಳ್ಳೆಂ ತೆಂ. ತುಂ ಯೇ.... ತುಂ ಏರ್‍ಪೋರ್ಟಾ ಥಾವ್ನ್ ಭಾಯ್ರ್ ಯೇ....!" ತೊ ವ್ಯಕ್ತಿ ರಾಗಾನ್ ಪುಸ್‌ಪುಸ್ತಾಲೊ.

"ತುಂ ಪ್ಲೈಟಾರ್ ಥಾವ್ನ್ ಕಸೊ ದೆಂವ್ತಾಯ್ ಪಳಯ್ತಾಂ! ತುಕಾ ಪೊಲಿಸ್ ಸ್ಟೇಶನಾಂತ್ ಹಾಂವ್ ಐಟಮ್ ಬಾಯ್ ಕರಿನಾ ಜಾಲ್ಯಾರ್?" ಆಲಿಯಾ ರಾಗಾನ್ ವಾಗಿಣ್ ಜಾಲ್ಲೆಂ.

ಆಲಿಯಾನ್ ಜರ್‍ಯ್ ತ್ಯಾ ವ್ಯಕ್ತಿಚಾ ಮುಕಾರ್ ತಕ್ಲಿ ಬಾಗಾಂವ್ಚೆಂ ಪ್ರಯತ್ನ್ ಕೆಲೆಂ ನಾ. ತೆಂ ಆಪ್ಲ್ಯಾ ತ್ಯಾಚ್ ಧಯ್ರಾನ್ ತ್ಯಾ ವ್ಯಕ್ತಿ ಮುಕಾರ್ ಉಭೆಂ ಜಾಲ್ಲೆಂ. ಆತಾಂ ತ್ಯಾ ಇಕ್ಬಾಲಾಚಾ ಭಾವಾಕ್‌ಚ್ ಮೌನ್ ರಾಂವ್ಚೆಂ ಪಡ್ಲೆಂ.

ಪ್ಲೈಟ್ ಕ್ಯಾಪ್ಟನಾನ್ ಏರ್‍ಪೋರ್ಟ್ ಅಥೋರಿಟಿಕ್ ಪ್ಲೈಟಾ ವಯ್ಲ್ಯಾ ವಿಶಯಾಕ್ ತಿಳ್ಸಿತಾನಾ ಹ್ಯಾ ಪ್ಲೈಟಾ ವಯ್ಲ್ಯಾ ವ್ಯಕ್ತಿನ್ ಆಪ್ಲ್ಯಾ ಭಾಯಿಕ್ ಪೋನ್ ಘುಂವ್ಡಾಯಿಲ್ಲೆಂ.

ಪ್ಲೈಟ್ ಮುಂಬಯಿ ಏರ್‍ಪೋರ್ಟಾಂತ್ ದೆಂವ್ಲೆಂ. ಸಗ್ಳೆ ಪಯ್ಣಾರಿ ದೆಂವೊಂಕ್ ತಯಾರ್ ಜಾತಾನಾ ಪೊಲಿಸಾಂಚೆಂ ಜೀಪ್ ಭಾಯ್ರ್ ತಯಾರ್ ಆಸ್‌ಲ್ಲೆಂ.ಸಗ್ಳೊ ಲೋಕ್ ದೆಂವೊಂಕ್ ಲಾಗ್ಲೊ.

ಆಲಿಯಾ ಫುಡ್ಯಾನ್‌ಚ್ ಉಭೆಂ ಆಸ್‌ಲ್ಲೆಂ.

"ತುಂ ಭಾಯ್ರ್ ಯೇ. ಖಂಯ್ಚಾನ್ ಭಾಯ್ರ್ ಯೆತಾಯ್ ಮ್ಹಣೊನ್ ಪಳೆತಾಂ. ಏರ್‍ಪೋರ್ಟಾಚಾ ದಾರಾರ್ ಥಾವ್ನ್ ತುಕಾ ಹಾಂವ್ ಉಕ್ಲುನ್ ವರಿನಾ ಜಾಲ್ಯಾರ್....!?" ತ್ಯಾ ವ್ಯಕ್ತಿಚಾ ಬೆಶ್ಟಾವ್ಣೆಕ್ ಆಲಿಯಾನ್ ಕಾಂಯ್ ಜಾಪ್ ಕಾಡ್ಲಿ ನಾ.

ಪಯ್ಣಾರಿ ಸಗ್ಳೆ ದೆಂವೊನ್ ವೆತಾನಾ ಏರ್‍ಹೊಸ್ಟೆಸಾಂ ವಿಮಾನಾರ್ ಥಾವ್ನ್ ಸಕಯ್ಲ್ ದೆಂವ್ಲಿಂ. ಆಲಿಯಾಕ್ ಆಫೀಸಾ ಥಾವ್ನ್ ಆಪವ್ಣೆ ಆಯ್ಲೆಂ.

ವಿಮಾನಾರ್ ಥಾವ್ನ್ ದೆಂವ್‌ಲ್ಲ್ಯಾ ಆಲಿಯಾಕ್ ಭಾಯ್ರ್ ತಾಚ್ಯೆ ಸಾಂಗಾತಾ ಪ್ಲೈಟಾರ್ ಝಗಡ್ಲೆಲ್ಯಾ ವ್ಯಕ್ತಿಕ್ ಪೊಲಿಸಾಂನಿ ಆಪ್ಲ್ಯಾ ಜಿಪಾರ್ ಬಸಯಿಲ್ಲೆಂ ದಿಸ್ಲೆಂ.

ಆಪ್ಲ್ಯಾ ಆಫೀಸಾ ಥಾವ್ನ್ ಆಪ್ಣಾಕ್ ಆಪವ್ಣೆ ಆಯಿಲ್ಲ್ಯಾನ್ ತೆಂ ಏರ್‍ವೇಸಾಚಾ ಆಫಿಸಾಕ್ ಗೆಲೆಂ. ಪೊಲಿಸಾಂನಿ ವಿಚಾರ್ ಕೆಲೊ. ತ್ಯಾ ಮಧೆಂ ಏರ್‍ವೇಸಾಚಾ ಸ್ಟಾಫ್ ಮೆಂಬರಾಂಚಾ ಮ್ಯಾನೆಜರಾನ್ ವಿಮಾನಾರ್ ಘಡ್ಲೆಲ್ಯಾ ಘಟನಾಕ್ ರಾಜಿಯೆರ್‍ಚ್ ತಿರ್‍ಸುಂಕ್ ಪಳೆಲೆಂ.

"ಪಳೆ ಆಲಿಯಾ! ಮ್ಹಾಕಾ ದಿಸ್ತಾ ಹ್ಯಾ ವಿಶಯಾಕ್ ತುಂ ಹಾಂಗಾಚ್ ವಿಸ್ರೊನ್ ಸೊಡ್. ತೊ ಇಕ್ಬಾಲ್ ಭಾಯಿಚೊ ಭಾವ್ ಖಂಯ್. ಮ್ಹಾಕಾಯ್ ವಯ್ರ್ ಥಾವ್ನ್ ಪೋನ್ ಆಯ್ಲಾಂ. ಮ್ಹಾಕಾ ಯಾ ಹ್ಯಾ ಏರ್‍ವೇಸಾಕ್ ಕಾಂಯ್ ಪ್ರಾಬ್ಲೆಮ್ ನಾಂತ್. ಪುಣ್ ತುಂ...! ತುವೆಂ ತುಜ್ಯಾ ವಿಶಿಂ ಚಿಂತುಂಕ್ ಜಾಯ್.....!" ಮ್ಯಾನೆಜರಾಚಾ ಮುಕಾರ್ ಬಸ್ಲೆಲ್ಯಾ ಅಲಿಯಾಕ್ ಮ್ಯಾನೇಜರಾನ್ ಸಮ್ಜಾಯ್ಲೆಂ.

"ಹೊ ಇಕ್ಬಾಲ್ ಭಾಯಿ ಮ್ಹಳ್ಯಾರ್ ಕೋಣ್ ಸರ್?" ವಿಚಾರ್‍ಲೆಂ ಆಲಿಯಾನ್. "ಸಗ್ಳ್ಯಾ ಸ್ಟಾಫಾ ಮುಕಾರ್ ಹಾಣೆಂ ಮ್ಹಾಕಾ ಹಾಂವ್ ತಾಚೆಂ ಕಾಮಾಚೆಂ ಮ್ಹಣೊನ್ ವೊಲಾಯ್ಲಾಂ ಸರ್! ಆನಿ ತುಮಿ ಸಾಂಗ್ತಾತ್ ಕೀ.....! ಐ ಡೋಂಟ್ ಕೇರ್ ಸರ್. ಅಸಲ್ಯಾ ವ್ಯಕ್ತಿಕ್ ಹಾಂವ್ ಭಿಲ್ಕುಲ್ ಭೊಗ್ಸುಂಕ್ ತಯಾರ್ ನಾ!"

"ಬೊವ್ಶಾ ತುಂ ನೆಣಾಂಯ್ ಆಲಿಯಾ. ಹ್ಯಾ ಮನ್ಶ್ಯಾಕ್ ತ್ಯಾ ಅಂಡರ್ ವರ್ಲ್ಡಾ ಸವೆಂ ಸಂಭಂಧ್ ಆಸಾ!"

"ತ್ಯಾ ಖಾತಿರ್ ತೊ ಮ್ಹಾಕಾ ದಮ್ಕಿ ದಿತಾ? ಹೌ ಡೇರ್ ಹಿ ಇಸ್...!"

"ತುಂ ಆತಾಂ ಕಿತೆಂ ಕರ್‍ತಾಯ್? ಪಾಟಿಂ ಪ್ಲೈಟಾಕ್ ವೆತಾಯ್ ವಾ.....!"

"ಹಾಂವ್ ಪ್ಲೈಟಾಕ್ ವೆತಾಂ ಸರ್! ಪುಣ್ ತುಮಿ ಹ್ಯಾ ವಿಶಯಾಕ್ ಆಶೆಂಚ್ ಸೊಡುನ್ ದೀನಾಕಾತ್!" ಆಲಿಯಾ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೆಂ.

"ಪಳಯ್ತಾಂ ಹಾಂವ್ ಕಿತೆಂ ಜಾತಾ ತೆಂ. ಸಾಂಜೆರ್ ತುಂ ಮ್ಹಾಕಾ ಯೇವ್ನ್ ಮೇಳ್!" ಮ್ಯಾನೆಜರಾನ್ ಸಾಂಗ್ತಾನಾ ಆಲಿಯಾ ಮ್ಯಾನೆಜರಾಚಾ ಕ್ಯಾಬಿನಾ ಥಾವ್ನ್ ಭಾಯ್ರ್ ಆಯ್ಲೆಂ. ತೆಂ ಆತಾಂ ತಾಚ್ಯಾ ಮುಕ್ಲ್ಯಾ ಉಭವ್ಣೆಕ್ ತಯಾರ್ ಜಾಲೆಂ.

************

ಸಾಂಜೆಚಾ ಚ್ಯಾರ್ ಜಾವ್ನ್ ಚಾಳೀಸ್ ಮಿನುಟಾಂಕ್ ಆಪ್ಲ್ಯಾ ನಿಮಾಣ್ಯಾ ಉಭವ್ಣೆ ಥಾವ್ನ್ ದೆಂವ್‌ಲ್ಲ್ಯಾ ಅಭಿಲಾಶಕ್ ಆಲಿಯಾಚಿ ಖಬಾರ್ ಮೆಳ್ಳಿ. ಆಲಿಯಾಚೆಂ ಪ್ಲೈಟ್ ಮುಂಬಯಿಕ್ ಪಾವೊಂಕ್ ಅಜೂನ್ ಅರ್ಧೆಂ ವೊರ್ ಬಾಕಿ ಆಸ್‌ಲ್ಲೆಂ. ಪ್ಲೈಟಾರ್ ಆಲಿಯಾನ್ ಝಗ್ಡೆಂ ಕೆಲ್ಲೊ ವ್ಯಕ್ತಿ ಅಂಡರ್ ವರ್ಲ್ದಾಂತ್ ಸಂಭಂಧ್ ದವರ್‍ತಾ ಮ್ಹಣ್ ಅಭಿಲಾಶಕ್ ಕಳ್ತಾನಾ ತೆಂ ಸಂಪೂರ್ಣ್ ಭಿಯೆಲ್ಲೆಂ. ತೆಂ ಆಲಿಯಾಕ್ ರಾಕೊನ್ ಬಸ್ಲೆಂ.

ಆಪ್ಲ್ಯಾ ಠರಾಯಿಲ್ಲ್ಯಾ ವೆಳಾಚ್ಯಾಕ್‌ಯ್ ಧಾ ಮಿನುಟಾಂ ವೇಳ್ ಕರುನ್ ಆಲಿಯಾಚೆಂ ಪ್ಲೈಟ್ ಆಯಿಲ್ಲೆಂ.

"ಹೆಂ ಕಶೆಂ ಜಾಲೆಂ ಆಲಿಯಾ?" ಅಭಿಲಾಶಚಾ ಉತ್ರಾಂನಿ ಆತುರಾಯ್ ಆನಿ ಭಿರಾಂತ್ ಆಸ್‌ಲ್ಲಿ.

"ತೊ ಆಪ್ಣಾಕ್ ಸಮ್ಜಾತಾ ಕಿತೆಂ? ಆಮ್ಚ್ಯಾ ಏರ್‍ವೇಸಾಚೊ ಓನರ್?" ಆಲಿಯಾ ಅಜೂನ್ ರಾಗಾರ್ ಆಸ್‌ಲ್ಲೆಂ.

"ತೆಂ ಸೊಡ್! ಆಫೀಸಾಂತ್ ಕಾಂಯ್ ಪ್ರಾಬ್ಲೆಮ್ ಜಾಲೆ....?"

"ನಾ! ಕಾಂಯ್ ನಾ! ಎಕ್ಟುವಲ್ಲೀ ಮ್ಹಜಿ ಕಾಂಯ್ ಚೂಕ್ ನಾ. ತೊ ಆಶೆಂ ಆಕ್ಟಿಂಗ್ ಕರ್‍ತಾಲೊ ಕೀ ಆಮಿಂ ಏರ್‍ಹೊಸ್ಟೆಸ್ ನ್ಹಯ್ ಬಗಾರ್ ತಾಚ್ಯಾ ಕಾಮಾಚಿಂ ಮ್ಹಳ್ಳ್ಯಾಪರಿಂ! ತ್ಯಾ ವಯ್ರ್....!"

"ತ್ಯಾ ವಯ್ರ್ ಕಿತೆಂ?" ಅಭಿಲಾಶನ್ ವಿಚಾರ್‍ಲೆಂ.

"ತ್ಯಾ ವಯ್ರ್ ತೊ ಮ್ಹಕಾ ಸಾಂಗ್ತಾ.... ಹಾಂವ್ ಕಶೆಂ ಏರ್‍ಪೊರ್ಟಾ ಥಾವ್ನ್ ಭಾಯ್ರ್ ಯೆತಾಂ ತೆಂ ತೊ ಪಳೆತಾ ಖಂಯ್!"

"ಮ್ಹಳ್ಯಾರ್...!" ಅಭಿಲಾಶಾಕ್ ಕಾಂಯ್ ಸಮ್ಜಾಲೆಂ ನಾ.

"ತುಂ ಜಣಾಯ್ ತಾಣೆ ಕಿತೆಂ ಸಾಂಗ್ಲೆಂ ತೆಂ?"

"ಕಿತೆಂ?"

"ಏರ್‍ಪೊರ್ಟಾಚಾ ದಾರಾ ಥಾವ್ನ್ ಮ್ಹಾಕಾ ಉಕೊಲ್ತಾ ಖಂಯ್ ತೊ! ಬಾಸ್ಟರ್ಡ್!"

"ಕಿತೆಂ?" ಅಭಿಲಾಶಾಕ್ ವೀಜ಼್ ಸಕ್ತೆನ್ ದರ್‍ಲೆಲ್ಯಾ ಪರಿಂ ಜಾಲೆಂ. "ಇತ್ಲೆಂ ವ್ಹಡ್ ಝಗ್ಡೆಂ ಜಾಲಾಂ?" ಅಭಿಲಾಶಾಕ್ ಪಾತ್ಯೆಂವ್ಕ್ ಕಶ್ಟ್ ಜಾಲೆ.

"ಮ್ಹಾಕಾಚ್ ಖಬಾರ್ ನಾ ಹೊ ಕೋಣ್ ಇಕ್ಬಾಲ್ ಭಾಯಿಚೊ ಭಾವ್ ಮ್ಹಣೊನ್?" ಆಲಿಯಾ ಕಾಂಯ್ ಹ್ಯಾ ಝಗ್ಡ್ಯಾಚಾ ವಿಶಯಾ ಥಾವ್ನ್ ಖಂತಿಶ್ಟ್ ಜಾಲ್ಲ್ಯಾ ಪರಿಂ ದಿಸ್ಲೆಂ ನಾ.

"ಕೋಣ್ ಇಕ್ಬಾಲ್ ಭಾಯಿಚೊ ಭಾವ್.....?" ಅಭಿಲಾಶಾಕ್ ಎಕಾ ಪಾಟ್ಲ್ಯಾನ್ ಏಕ್ ಆಶ್ಚರ್ಯಾಚೆಂ ಜಾಂವ್ಕ್ ಪಾವ್ಲೆಂ.

"ತೊಚ್.....! ಪ್ಲೈಟಾರ್ ಮ್ಹಜ್ಯಾ ಸಾಂಗಾತಾ ಝಗಡ್ಲಲೊ.....!" ಆಲಿಯಾಚಾ ತಾಳ್ಯಾಂತ್ ಎಕಾ ನಮುನ್ಯಾಚೊ ತಾತ್ಸಾರ್ ಆಸ್‌ಲ್ಲೊ.

"ಇಕ್ಬಾಲ್ ಭಾಯಿಚೊ ಭಾವ್?" ಅಭಿಲಾಶಾಕ್ ಕಾಂಯ್ ಸಮ್ಜಾಲೆಂ ನಾ.

"ಹೊ ಕಾಂಯ್ ಗೂಂಡಾ ಪುಣಿಂ ನ್ಹಯ್......?"

"ಗೂಂಡಾಚ್ ಆಸ್ತಲೊ. ಹಲ್ಕಟ್! ಉಲಂವ್ಚಿ ರೀತ್ ಕಳಿತ್ ನಾತ್ಲೆಲ್ಯಾಕ್ ಬರೊ ಮನಿಸ್ ಮ್ಹಣೊಂಕ್ ಜಾತಾ.....?" ಆಲಿಯಾ ಸಗ್ಳ್ಯಾ ವಿಶಯಾಕ್ ಸುಲಾಭಾಯೆರ್ ಘೆತಾಲೆಂ. ಆಲಿಯಾಚಾ ಚಾಲಿಂತ್ ಜಾಂವ್ ತಾಚ್ಯಾ ಉಲವ್ಣ್ಯಾಂತ್ ಜಾಂವ್ ಭಿಯಾಚಿ ಶೆಳ್ ಪಾಸೊನ್ ಅಭಿಲಾಶಾಕ್ ಜಳ್ಕಾಲಿ ನಾ.

ಉಲವ್ನ್ ಆಸ್‌ಲ್ಲ್ಯಾ ಪರಿಂಚ್ ದೊಗಾಂಯ್ ಸ್ಟಾಫ್ ಮೆಂಬರಾಂಚಾ ಮ್ಯಾನೇಜರಾಚಾ ಕ್ಯಾಬಿನಾಕ್ ಗೆಲಿಂ.

"ಕಿತೆಂ ಜಾಲಾಂ ಸರ್?" ಆಲಿಯಾನ್ ವಿಚಾರ್‍ಲೆಂ.

"ಹ್ಯಾ ವಿಶಯಾಂತ್ ತುವೆಂ ತಿಕ್ಕೆ ಜಾಗ್ರುತ್ ರಾವ್ಲ್ಯಾರ್‍ಚ್ ಬರೆಂ ಆಲಿಯಾ!" ಮ್ಯಾನೇಜರಾನ್ ಜಾಗ್ರುತ್ಕಾಯ್ ದಿಲಿ.

"ಕಿತ್ಯಾಕ್ ಸರ್......?" ಆಲಿಯಾಕ್ ಕಾಂಯ್ ಸಮ್ಜಾಲೆಂ ನಾ.

"ಆಮಿಂ ಹಿ ಕೇಸ್ ರಿಜಿಸ್ಟರ್ಡ್ ಕರುಂಕ್ ನಾ ಆಲಿಯಾ! ತುವೆಂ ಚಿಂತ್ಚ್ಯಾ ಪರಿಂ ತೊ ಲ್ಹಾನ್ ಮನಿಸ್ ನ್ಹಯ್! ತಾಚ್ಯಾ ಹಜಾರ್ ಜಣಾಂ ಬಾಪಾಂಯ್ನಿಂ ಹಾಂಗಾ ಪೊನಾ ಕೆಲ್ಯಾಂತ್! ವಯ್ಲ್ಯಾನ್ ತುವೆಂ ಹ್ಯಾ ಕಾಮಾ ಥಾವ್ನ್ ರಿಸೈನ್ ದಿಂವ್ಚ್ಯಾ ಪರಿಂ ಕರುಂಕ್ ಜಾಯ್ ಖಂಯ್!" ಆಲಿಯಾಕ್ ಪಳವ್ನ್ ಉಲಂವ್ಚ್ಯಾ ಮ್ಯಾನೇಜರಾಚಾ ತಾಳ್ಯಾಂತ್ ಭಿರಾಂತ್ ಸ್ಪಶ್ಟ್ ಝಳ್ಕಾತಾಲಿ.

"ಮ್ಹಾಕಾ ಮ್ಹಜ್ಯಾ ಕಾಮಾ ಥಾವ್ನ್ ಕಾಡಂವ್ಕ್ ಜಾಯ್......?" ಆಲಿಯಾಕ್ ಆಶ್ಚರ್ಯ್ ಜಾಲೆಂ

"ಹಾಂ! ಹ್ಯಾ ಭಾಯ್ರ್....." ಮ್ಯಾನೇಜರ್ ಮುಕಾರ್ ಉಲಯ್ಲೊ ನಾ. ಥೊಡೊ ವೇಳ್ ತೊ ಮೌನ್ ಜಾಲೊ.

ಆಲಿಯಾಚಾ ಸಾಂಗಾತಾ ಆಸ್‌ಲ್ಲೆಂ ಅಭಿಲಾಶಾ ಕಾಂಯ್ಚ್ ಸಮ್ಜಾನಾಸ್ತಾನಾ ಏಕ್ ಪಾವ್ಟಿಂ ಆಲಿಯಾಕ್ ಏಕ್ ಪಾವ್ಟಿಂ ಮ್ಯಾನೇಜರಾಕ್ ಪಳಯ್ತಾಲೆಂ.

"ಹ್ಯಾಚ್ ಖಾತಿರ್ ಹಾವೆಂ ಹಿ ಕೇಸ್ ಆಮ್ಚ್ಯಾ ತರ್ಫೆನ್ ರಿಜಿಸ್ಟರ್ಡ್ ಕರುಂಕ್ ನಾ!" ಮ್ಯಾನೇಜರ್‍ಚ್ ಪರ್ತ್ಯಾಕ್ ಉಲಯ್ಲೊ.

"ಮ್ಹಳ್ಯಾರ್ ತುಮಿಂ ತಾಕಾ ತಶೆಂಚ್ ವಚೊಂಕ್ ದಿಲೆಂ......?" ಆಲಿಯಾನ್ ಆಶ್ಚರ್ಯಾನ್ ಆಪ್ಲೆಂ ತೋಂಡ್ ಉಗ್ತೆಂ ಕೆಲೆಂ.

"ಹ್ಯಾ ಮನ್ಶ್ಯಾಂ ವಿಶಿಂ ತುಂ ಕಾಂಯ್ ನೆಣಾಂಯ್ ಆಲಿಯಾ. ಜಾಲ್ಲೆಂ ಜಾಲೆಂ ತೆಂ ಸೊಡ್ ತುಂ. ಹಾವೆಂ ಆತಾಂ ಸಗ್ಳೆಂ ಥಂಯ್ಚಾ ಥಂಯ್ಚ್ ಶಾಂತ್ ಕೆಲಾಂ. ಪುಣ್ ತುಂ ತಿಕ್ಕೆ ಜಾಗ್ರುತ್ ಕರ್!"

"ದಿಸ್ ಇಸ್ ನಾಟ್ ಫೇರ್!" ಆಲಿಯಾನ್ ಆಪ್ಲಿ ತಕ್ಲಿ ಹಾಲಯ್ಲಿ.

ಆಫೀಸಾಚಾ ನಿರ್ಧಾರಾ ಮುಕಾರ್ ಆಪ್ಣಾಕ್ ಆನಿ ಕಾಂಯ್ ಕರುಂಕ್ ಸಾದ್ಯ್ ನಾ ಮ್ಹಣೊನ್ ಚಿಂತ್‌ಲ್ಲೆಂ ಆಲಿಯಾ,

"ಬರೆಂ ಸರ್! ಹಾಂವ್ ವೆತಾಂ." ಆಲಿಯಾ ಪಾಟಿಂ ವಚೊಂಕ್ ಘುಂವ್ಲೆಂ. ತಾಚ್ಯಾ ಮುಕಾರ್ ಆತಾಂ ದುಸ್ರಿ ಕಾಂಯ್ ವಾಟ್ ನಾತ್‌ಲ್ಲಿ.

"ಆಲಿಯಾ....?"

ಮ್ಯಾನೇಜರಾನ್ ಆಪಯಿಲ್ಲೆಂ ಆಯ್ಕೊನ್ ಪರ್‍ತ್ಯಾಕ್ ಆಲಿಯಾ ಪಾಟಿಂ ಘುಂವ್ಲೆಂ.

"ನಾ ಕಾಂಯ್ ನಾ! ತುಂ ವಚ್!"

ಆಲಿಯಾ ಆನಿ ಅಭಿಲಾಶಾ ದೊಗಾಂಯ್ ಮ್ಯಾನೇಜರಾಚಾ ಆಫೀಸಾ ಥಾವ್ನ್ ಭಾಯ್ರ್ ಆಯ್ಲಿಂ.

ಮ್ಯಾನೇಜರಾನ್ ಉಲಯಿಲ್ಲೆಂ ಪಳವ್ನ್ ಪರಿಸ್ಥಿತಿ ಆಲಿಯಾನ್ ಸಮ್ಜಾಲ್ಲ್ಯಾ ತಿತ್ಲಿ ಸುಲಭ್ ನಾ ಮ್ಹಳ್ಳೆಂ ಅಭಿಲಾಶಕ್ ಕಳ್ಳೆಂ. ಏರ್‍ಪೋರ್ಟಾ ಥಾವ್ನ್ ಭಾಯ್ರ್ ವಚೊಂಕ್ ಆನಿ ಆಮ್ಕಾಂ ಥೊಡಿಚ್ ವಾಟ್. ಆಲಿಯಾನ್ ಸಾಂಗ್ಚ್ಯಾ ಪರಿಂ ನಿಜಾಯ್ಕ್‌ಯ್ ಭಾಯ್ರ್ ವೆತಚ್ಚ್ ಕಾಂಯ್ ಜಾಲ್ಯಾರ್....? ಪ್ಲೈಟಾರ್ ಆಲಿಯಾ ಸಾಂಗಾತಾ ತ್ಯಾ ವ್ಯಕ್ತಿನ್ ಇತ್ಲೆಂ ವ್ಹಡ್ಲೆಂ ಝಗ್ಡೆಂ ಕೆಲಾಂ ಮ್ಹಳ್ಯಾರ್ ತಾಕಾಯ್ ಕಾಂಯ್ ತರ್‍ಯ್ ಧಯ್ರ್ ಆಸೊಂಕ್‌ಚ್ ಜಾಯ್. ಹ್ಯಾಚ್ ಧಯ್ರಾನ್ ಆಮಿ ಭಾಯ್ರ್ ವೆತಾನಾ ತಾಣೆಚ್ ಸಾಂಗ್ಲೆಲ್ಯಾ ಪರಿಂ....? ಅಭಿಲಾಶಾ ಚಿಂತುಂಕ್ ಪಡ್ಲೆಂ. ತಾಂಕಾ ಆನಿ ಏರ್‍ಪೊರ್ಟಾ ಥಾವ್ನ್ ಭಾಯ್ರ್ ವೆಚ್ಯಾ ದಾರಾಕ್ ಥೊಡೊಚ್ ಅಂತರ್ ಆಸ್‌ಲ್ಲೊ. ಏಕ್ ಪಾವ್ಟಿಂ ಆಪುಣ್ ಭಾಯ್ರ್ ಪಾವ್ಲಿಂ ಜಾಲ್ಯಾರ್, ಉಪ್ರಾಂತ್....? ಚಿಂತಾನಾ ಅಭಿಲಾಶಾಚಾ ಶಿರಾಂನಿ ಥಂಡ್ಸಾಣ್ ಧಾಂವ್‌ಲ್ಲ್ಯಾ ಪರಿಂ ಜಾಲಿ. ಪುಣ್ ಆಲಿಯಾ ಹ್ಯಾ ಕಿತ್ಯಾಚಿಚ್ ಫಿಕಿರ್ ನಾಸ್ತಾಂ ಮುಕಾರ್ ಚಲ್ತಾಲೆಂ. ತಿತ್ಲೆಂಚ್! ’ಸಟ್ಟ್’ ಕರುನ್ ಅಭಿಲಾಶಾಚಾ ಮತಿಕ್ ಕಿತೆಂಗೀ ಜಳ್ಕಾಲ್ಲ್ಯಾ ಪರಿಂ ಜಾಲೆಂ. ತಾಚ್ಯೆ ಪಾಟ್ಲ್ಯಾನ್,

"ಆಜ್ ದೀಸ್ ಖಂಯ್ಚೊ......?"

"ಬ್ರೆಸ್ತಾರ್!" ಆಲಿಯಾಕ್ ಅಭಿಲಾಶಾಚೊ ಭರ್‍ತಾವ್ ಸಮ್ಜಾಲೊ ನಾ.

"ಥ್ಯಾಂಕ್ ಗಾಡ್!" ಅಭಿಲಾಶಾಚಾ ಮುಖಮಳಾರ್ ಕಸಲಿಗೀ ಖುಶಿ ಉಮಾಳುನ್ ಆಯ್ಲಿ. ತಾಚ್ಯಾ ಪಾಟ್ಲ್ಯಾನ್,

"ಆಲಿಯಾ....!" ಅಭಿಲಾಶಾನ್ ಆಲಿಯಾಚೊ ಹಾತ್ ಧರ್‍ಲೊ. "ಆಮಿ ಭಾಯ್ರ್ ವೆಚ್ಯಾ ಪಯ್ಲೆಂ ಆಮ್ಚಿ ಜಾಗ್ರುತ್ಕಾಯ್ ಕೆಲ್ಯಾರ್ ಬರೆಂ!" ಮ್ಹಳ್ಳೆಂ ಅಭಿಲಾಶಾ ಕಿತೆಂಗೀ ಚಿಂತ್‌ಲ್ಲೆಂ ತೆಂ,

"ಹಾಂಗಾ ಯೇ....!" ಮ್ಹಣೊನ್ ಆಲಿಯಾಚೊ ಹಾತ್ ಧರುನ್ ತೆಂ ತಾಂಚಾ ದಾವ್ಯಾ ಕುಶಿಕ್ ಪರ್‍ತಾಲೆಂ. ಅಭಿಲಾಶಾನ್ ಏರ್‍ಪೊರ್ಟಾಚಾ ಮುಕ್ಲ್ಯಾ ದಾರಾಚಿ ವಾಟ್ ಸೊಡ್ಲೆಲಿ ಪಳವ್ನ್ ಆಲಿಯಾಕ್ ಕಾಂಯ್ ಸಮ್ಜಾಲೆಂ ನಾ.

"ಖಂಯ್ ವೆತಾಯ್ ತುಂ?" ತಾಣೆಂ ಅಭಿಲಾಶಕ್ ವಿಚಾರ್‍ಲೆಂ.

"ಹಾಂವ್ ನಮಿತಾಕ್ ಏಕ್ ಪೋನ್ ಕರ್‍ತಾಂ!" ಸಾಂಗ್ಲೆಲ್ಯಾ ಅಭಿಲಾಶಾನ್ ಆಪ್ಲ್ಯಾ ವ್ಯಾನಿಟಿ ಬ್ಯಾಗಾಂತ್ಲೆಂ ಸೆಲ್‌ಪೋನ್ ಭಾಯ್ರ್ ಕಾಡ್ಲೆಂ.

"ನಮಿತಾ...!?" ಆಲಿಯಾನ್ ಹ್ಯಾ ನಾಂವಾಕ್ ಹಾಚ್ಯಾ ಪಯ್ಲೆಂ ಕೆದ್ನಾಂಯ್ ಆಯ್ಕಾಲ್ಲೆಂ ನಾ. "ಹೆಂ ನಮಿತಾ ಮ್ಹಳ್ಯಾರ್ ಕೋಣ್?" ಆಲಿಯಾಚಾ ತೊಂಡಾರ್ ಆಶ್ಚರ್ಯ್ ಉದೆಲೆಂ.

"ಮ್ಹಜೆಂ ಪ್ರೆಂಡ್! ತೆಂ ಆತಾಂ ಇಂಟರ್‍ನ್ಯಾಶನಲ್ ಪ್ಲೈಟಾರ್ ಏರ್‍ಹೊಸ್ಟೆಸ್ ಜಾವ್ನ್ ಆಸಾ! ಪಯ್ಲೆಂ ಹಾಂವ್ ಆನಿ ತೆಂ ಸಾಂಗಾತಾಚ್ ಆಸ್‌ಲ್ಲ್ಯಾಂವ್. ಬರೆಂ

ಜಾಲೆಂ ಆಜ್ ತಾಕಾ ತಾಚಿ ಹಪ್ತ್ಯಾಚಿ ಸುಟಿ!"

ಆಲಿಯಾ ಲಾಗಿಂ ಉಲಯ್ತಾಂ ಉಲಯ್ತಾಂ ಅಭಿಲಾಶಾನ್ ನಮಿತಾಕ್ ಪೋನ್ ಡಯಲ್ ಕೆಲೆಂ.

"ಹಲೋ....!" ತ್ಯಾ ಕುಶಿನ್ ನಮಿತಾಚೊ ತಾಳೊ.

"ಹಾಯ್! ಕಶೆಂ ಆಸಾಯ್?"

"ಹಾಂವ್ ಬರಿಂ ಆಸಾಂ! ತುಂ ಕಶೆಂ ಆಸಾಯ್? ಸುಮಾರ್ ಥೆಂಪಾ ಉಪ್ರಾಂತ್....!"

"ಘರಾಲಾಗಿಂ ಥೊಡೆಂ ಬಿಜಿ ಆಸ್ತಾಂ. ತಶೆಂ....!"

ಅಭಿಲಾಶಾ ಉಲಯ್ತಾನಾ ಅಮ್ಸೊರ್‍ತಾಲೆಂ. ತಾಚೊ ಆಮ್ಸೊರ್ ತ್ಯಾ ಕುಶಿನ್ ಉಲಂವ್ಚ್ಯಾ ನಮಿತಾಕ್ ಕಳಾನಾಸ್ತಾನಾ ಗೆಲೊ ನಾ.

"ತುಂ ಖಂಯ್ ಥಾವ್ನ್ ಉಲಯ್ತಾಯ್.....?" ನಮಿತಾನ್ ವಿಚಾರ್‍ಲೆಂ.

"ಏರ್‍ಪೊರ್ಟಾ ಥಾವ್ನ್!"

"ಮಾಗಿರ್.... ಎಕ್ ಥರ್ ಆಸ್ಲೆಲ್ಯಾ ಪರಿಂ ದಿಸ್ತಾಯ್.....!"

"ಏಕ್ ಪ್ರಾಬ್ಲೆಮ್ ಜಾಲಾಂ ನಮಿತಾ!"

"ಕಿತೆಂ ಜಾಲಾಂ?"

"ಆಲಿಯಾ.....!" ಅಭಿಲಾಶಾ ಆತಾಂ ಆಲಿಯಾ ತೆವ್ಶಿಂ ಘುಂವ್ಲೆಂ. ಆಲಿಯಾಕ್‌ಯ್ ಅಭಿಲಾಶಾ ನಮಿತಾ ಲಾಗಿಂ ಕಿತೆಂ ಉಲಂವ್ಕ್ ಸೊಧ್ತಾ ತೆಂ ಕಾಂಯ್ ಸಮ್ಜಾಲೆಂ ನಾ.

"ಆಲಿಯಾ? ಕೋಣ್ ಆಲಿಯಾ?" ನಮಿತಾನ್ ಹ್ಯಾ ನಾಂವಾಕ್ ಪಯ್ಲ್ಯಾ ಪಾವ್ಟಿಂ ಆಯ್ಕೊಂವ್ಚೆಂ.

"ತೆಂ ಮ್ಹಜೆಂ ಪ್ರೆಂಡ್ ನಮಿತಾ. ಆಜ್ ಸಾಕಾಳಿಂಚಾ ಪ್ಲೈಟಾರ್......." ಅಭಿಲಾಶಾನ್ ಆಲಿಯಾ ಸಾಂಗಾತಾ ಪ್ಲೈಟಾರ್ ಸಾಕಾಳಿಂ ಘಡ್ಲೆಲೆಂ ಸಗ್ಳೆಂ ವಿವರುನ್ ಸಾಂಗ್ಲೆಂ. "ಇಕ್ಬಾಲ್ ಭಾಯಿಚೊ ಭಾವ್ ಖಂಯ್ ತೊ! ಮ್ಹಾಕಾ ಖಬಾರ್ ನಾ. ಆಲಿಯಾಕ್ ಏರ್‍ಪೊರ್ಟಾ ಥಾವ್ನ್ ಭಾಯ್ರ್ ಯೆತಾನಾ ಉಕೊಲ್ತಾಂ ಮ್ಹಣೊನ್

ಸಾಂಗ್ತಾಲೊ ಖಂಯ್. ತಾಂಕಾ ಪಾತ್ಯೆಂವ್ಕ್ ಜಾಯ್ನಾಂ ನಮಿತಾ. ಜಯರಾಜಕ್ ಸಾಂಗೊನ್ ಕಾಂಯ್ ಜಾತಾ ಜಾಲ್ಯಾರ್...!"

"ಜಯರಾಜಾಕ್? ಹಾಂವ್ ತಾಕಾ ಹ್ಯಾ ವಿಶಯಾಂತ್ ಕಶೆಂ ಸಾಂಗೊಂ ಅಭಿಲಾಶಾ?" ನಮಿತಾ ನರ್ಗಾಲೆಂ.

"ಪ್ಲೀಸ್ ನಮಿತಾ. ಮ್ಹಾಕಾ ಕಿತ್ಯಾಕ್‌ಗೀ ಭಿರಾಂತ್ ದಿಸ್ತಾ. ತಾಣೆ ಆಲಿಯಾಕ್ ಏರ್‍ಪೊರ್ಟಾಚಾ ಭಾಯ್ರ್ ಥಾವ್ನ್ ಉಕೊಲ್ತಾಂ ಮ್ಹಣೋನ್ ಧಮ್ಕಿ ದಿಲ್ಯಾ ಮ್ಹಣ್ತಾನಾ.... ಪ್ಲೀಸ್ ಕಾಂಯ್ ಜಾತಾ ಜಾಲ್ಯಾರ್ ಪಳೆ."

"ಹಾಂವ್ ಪಳೆತಾಂ. ಥೊಡ್ಯಾ ವೆಳಾನ್ ತುಕಾ ಪೋನ್ ಕರ್‍ತಾಂ. ಪುಣ್ ತುಂ ಮಾತ್ರ್ ಕೊಣಾಯ್‌ಲಾಗಿಂ ತೋಂಡ್ ಸೊಡಿನಾಕಾ. ಹ್ಯಾ ವಿಶಯಾಂತ್ ಭಾರಿಚ್ ಜಾಗ್ರುತ್ ಆಸೊಂಕ್ ಜಾಯ್ ಪಡ್ತಾ!" ನಮಿತಾನ್ ಆಪ್ಲೆಂ ಪೋನ್ ಭಂಧ್ ಕೆಲೆಂ.

"ಥೊಡೊ ವೇಳ್ ಆಮಿ ಹಾಂಗಾಚ್ ರಾವ್ಯಾಂ ಆಲಿಯಾ! ನಮಿತಾ ಕಿತೆಂ ಸಾಂಗ್ತಾ ತೆಂ ಪಳವ್ಯಾಂ!"

"ತುಂ ಇತ್ಲೆಂಯ್ ಕಿತ್ಯಾಕ್ ಭಿಯೆತಾಯ್ ಅಭಿಲಾಶಾ? ಹಾಂವ್‌ಚ್ ಕಾಂಯ್ ಭಿಯೆನಾ ಮ್ಹಳ್ಯಾ ಉಪ್ರಾಂತ್... ಚಲ್ ಚಲ್! ಯಾ ಆಮಿ! ಹ್ಯಾ ಗೂಂಡಾಂಕ್ ಆಶೆಂ ಭಿಯೆಲ್ಯಾರ್.....!"

ಅಭಿಲಾಶಾ ಜಾಣಾಂ ಆಲಿಯಾ ಕಿತ್ಲೆಂ ಧಯ್ರಾಧೀಕ್ ಚೆಡುಂ ಮ್ಹಳ್ಳೆಂ ತೆಂ. ಪುಣ್ ತಾಚೆಂ ಧಯ್ರ್ ಹ್ಯಾ ಗೂಂಡಾಂಚಾ ಮುಕಾರ್ ಕಿತ್ಲೆಂ ಧಯ್ರಾನ್ ರಾವೊಂಕ್ ಸಕ್ತೆಲೆಂ ಮ್ಹಳ್ಳ್ಯಾ ವಿಶಿಂ ಅಭಿಲಾಶಾಕ್ ದುಬಾವ್ ಆಸ್‌ಲ್ಲೊ.

"ತುಕಾ ಪಾಂಚ್ ಮಿನುಟಾಂ ರಾವ್ಲ್ಯಾರ್ ಕಿತೆಂ ಜಾತಾ?" ಅಭಿಲಾಶಾಚಾ ಸವಾಲಾಕ್ ಮಾನ್ ದೀವ್ನ್, ದುಸ್ರೊ ಉಪಾಯ್ ನಾಸ್ತಾಂ ಆಲಿಯಾ ಮೌನ್ ರಾವ್ಲೆಂ.

ನಮಿತಾ ಕಿತೆಂ ತರ್‍ಯ್ ಕರ್‍ತೆಲೆಂ ಮ್ಹಳ್ಳೆಂ ಅಭಿಲಾಶಾ ಜಾಣಾಂ. ಜಯ್‌ರಾಜ್, ನಮಿತಾಚೊ ಸೈರೊ. ತಾಕಾ ಅಭಿಲಾಶಾ ಬರೆಂ ವಳ್ಕಾತಾಲೆಂ. ಜಯ್‌ರಾಜಾಕ್ ಆನಿ ಅಂಡರ್‍ವರ್ಲ್ಡಾಕ್ ಸಂಭಂಧ್ ಆಸಾ ಮ್ಹಳ್ಳೆಂ ತೆಂ ಜಾಣಾಂ. ಜಯರಾಜಾಕ್ ಬಾಂದ್ರಾ ಕ್ರಾಪಾರ್ಡ್ ಮಾರ್‍ಕೆಟಿಂತ್ ಬೂಟಿಕ್ ಆಸ್‌ಲ್ಲೆಂ. ತೊ ತ್ಯಾ ಅಂಡರ್‍ವರ್ಲ್ಡಾಂತ್ ಮೆತೆರ್ ನಾತ್‌ಲ್ಲೊ. ಪುಣ್ ಕಾಲೇಜಿಚ್ಯಾ ವೆಳಾರ್ ತಾಕಾ ಜಾಲ್ಲ್ಯಾ ಇಶ್ಟಾಗತೆ ವರ್ವಿಂ ಅಂಡರ್‍ವರ್ಲ್ಡಾಂತ್ ರಾಜ್ವಟ್ ಚಲಂವ್ಚಾ ಮನ್ಶಾಂ ಸಾಂಗಾತಾ ತಾಚಿ ವಳಕ್ ಭಳ್ ಜಾಲ್ಲಿ. ಆಪ್ಲ್ಯಾ ಬಿಜ್ನೆಸಾಕ್ ಲಾಗೊನ್‌ಯ್ ತಾಣೆಂ ಹಿ ವಳಕ್ ಚಾಲು ದವರ್‍ಲ್ಲಿ. ಹ್ಯಾ ಪಯ್ಲೆಂಯ್ ನಮಿತಾನ್ ಅಭಿಲಾಶಾಕ್ ತಾಚೆ ಥಾವ್ನ್ ಉಪ್ಕಾರ್ ಕೆಲಾ. ತಶೆಂ ಅಭಿಲಾಶಾ ಜಯರಾಜಾಕ್ ಜಾಣಾಂ.

ಅಭಿಲಾಶಾನ್ ಚಿಂತ್ಲೆಲ್ಯಾ ಪರಿಂಚ್ ಪಂದ್ರಾ ಮಿನುಟಾಂನಿ ತಾಚೆಂ ಪೋನ್ ವ್ಹಾಜ್‌ಲ್ಲೆಂ. ಹ್ಯಾ ಪಂದ್ರಾ ಮಿನುಟಾಂಚಾ ಆವ್ದೆಂತ್ ನಮಿತಾನ್ ಜಯರಾಜಕ್, ಜಯರಾಜಾನ್ ಅಂದೇರಿ, ಅಂದೇರಿ ಥವ್ನ್ವಾರ್ಸೋವಾ, ವಾರ್ಸೋವಾ ಥಾವ್ನ್ ದುಬಾಯಿ, ದುಬಾಯಿ ಥಾವ್ನ್ ಪರ್‍ತ್ಯಾಕ್ ಅಂದೇರಿ, ಅಂದೆರಿ ಥಾವ್ನ್ ಮಸ್ಗಾಂವ್, ಮಸ್ಗಾಂವ್ ಥಾವ್ನ್ ಇಕ್ಬಾಲಾಕ್ ಪೋನಾಂ ಘುಂವ್ಲಿಂ.

"ಹಾಂ ನಮಿತಾ ಕಿತೆಂ ಜಾಲೆಂ?" ಅಭಿಲಾಶಾಕ್ ಆತುರಾಯ್ ಆಸ್‌ಲ್ಲಿ.

"ತೊ ಇಕ್ಬಾಲಾಚೊ ಭಾವ್ ಮ್ಹಣೊನ್ ತಾಕಾ ಖಬಾರ್ ನಾತ್‌ಲ್ಲಿ?" ನಮಿತಾನ್ ಸವಾಲ್ ಕೆಲೆಂ.

"ಆಲಿಯಾಕ್ ಕಳಿತ್ ನಾತ್‌ಲ್ಲೆಂ ನಮಿತಾ!"

"ಪಳೆ! ಏರ್‍ಪೊರ್ಟಾ ಭಾಯ್ರ್ ಕಿತೆಂಯ್ ಜಾಲೆಂ ಜಾಲ್ಯಾರ್‍ಯ್ ತುಮಿ ರಾವಾನಾಕಾತ್. ಟ್ಯಾಕ್ಸಿ ಧರುನ್ ನಿಟ್ಟ್ ಘರಾ ವಚಾ! ಆನಿ ತಾಕಾ ಎಕ್ಲ್ಯಾಕ್ ಸೊಡಿನಾಕಾ. ಬೋವ್ಶ್ಯಾ ಏರ್‍ಪೊರ್ಟಾ ಭಾಯ್ರ್ ತೆ ತಾಕಾ ರಾಕೊಣ್ ಆಸೊಂಕ್ ಪುರೊ. ಪುಣ್ ತುಮ್ಕಾಂ ಕಾಂಯ್ ಜಾಂವ್ಚೆ ಪರಿಂ ನಾ! ಜಯರಾಜನ್ ಸಗ್ಳಿ ವಿಲೆವರಿ ಕೆಲ್ಯಾ. ಪ್ರಾಬ್ಲೆಮ್ ಕಿತ್ಲೆಂ ವ್ಹಡ್ಲೆಂ ಜಾಲಾಂ ತೆಂ ತುಮಿ ನೆಣಾಂತ್! ಬೀ ಕೆರ್ ಫುಲ್! ಕಾಂಯ್ ಜಾಲ್ಯಾರ್ ಪೋನ್ ಕರ್ ಜಾಯ್ತೆ!" ನಮಿತಾನ್ಪೋನ್ ದವರ್‍ಲೆಂ.

ಅಭಿಲಾಶಚೆಂ ಕಾಳಿಜ್ ಆತಾಂ ದಡ್ದಡೊಂಕ್ ಲಾಗ್ಲೆಂ.

"ಪಳೆಲೆಂಯ್.....? ಆನಿ ತುಂ ಸಾಂಗ್ತಾಯ್..... ತೆಂ ವ್ಹಡ್ಲೆಂ ಕಾಂಯ್ ನಾ! ಆಯ್ಕ್!" ಅಭಿಲಾಶನ್ ಆಲಿಯಾಚಾ ಹಾತಾಕ್ ಧರುನ್ ತಾಕಾ ಆಪ್ಣಾ ತೆವ್ಶಿಂ ವೊಡ್ಲೆಂ. "ಆಮಿಂ ಭಾಯ್ರ್ ವೆತಾನಾ ಕಾಂಯ್ ಕಿತೆಂಯ್ ಜಾಲ್ಯಾರ್‍ಯ್ ತುಂ ಮಾತ್ರ್ ವೊಗೆಂಚ್ ರಾವ್ ಹಾಂ...! ತ್ಯಾ ದಳ್ದಿರ್‍ಯಾಂಲಾಗಿಂ ಉಲಂವ್ಕ್ ವಚೊನ್ ಕಾಂಯ್ ಜಾಯ್ನಾ!" ಅಭಿಲಾಶಾ, ಆಲಿಯಾಕ್ ಸಮ್ಜಾಯ್ತಾಲೆಂ

ಆಲಿಯಾ, ಅಭಿಲಾಶಾಚಾ ಉತ್ರಾಂಕ್ ಆಯ್ಕಾತಾಲೆಂ ಮಾತ್ರ್ ಶಿವಾಯ್ ತಾಚಿ ನದರ್ ಮಾತ್ರ್ ಏರ್‍ಪೋರ್ಟಾ ಥಾವ್ನ್ ಭಾಯ್ರ್ ಧಾಂವ್‌ಲ್ಲಿ.

"ಸಮ್ಜಾಲೆಂ ತುಕಾ....?" ಅಭಿಲಾಶಾಚಿ ಪರ್ತ್ಯಾಕ್ ಜಾಗವ್ಣಿ.

"ಚಲ್! ಯಾ ಆತಾಂ!" ಆಲಿಯಾನ್ ಆಪ್ಲಿ ದೀಶ್ಟ್ ಹೆವ್ಶಿಂ ಘುಂವ್ಡಾವ್ನ್ ಅಭಿಲಾಶಾಕ್ ಪಳೆಲೆಂ.

ದೊಗಾಂಯ್ ಆತಾಂ ಏರ್‍ಪೊರ್‍ಟಾ ಥಾವ್ನ್ ಭಾಯ್ರ್ ಆಯ್ಲಿಂ. ಅಭಿಲಾಶಾಚೆಂ ಕಾಳಿಜ್ ದಡ್ದಡ್ತಾಲೆಂ. ತಾಣೆಂ ಹೆವ್ಶಿಂ ತೆವ್ಶಿಂ ಪಳೆಲೆಂ. ಖಂಯ್ಚರ್‍ಯ್ ಆಪ್ಣಾಕ್ ಆಪಾಯ್ ರಾಕೊನ್ ಆಸಾ ಮ್ಹಳ್ಳ್ಯಾ ಪರಿಂ ತಾಕಾ ದಿಸ್ಲೆಂ ನಾ.

ವೇಳ್ ಪಾಡ್ ಕರಿನಾಸ್ತಾನಾ ಟ್ಯಾಕ್ಸಿ ಸ್ಟ್ಯಾಂಡಾರ್ ವಚೊನ್ ತಿಂ ಟ್ಯಾಕ್ಸಿಚೆರ್ ಬಸ್ತಾನಾ ದೊಗಾಂಯ್ಕ್‌ಯ್ ಘೆತ್ಲೆಲಿ ಟ್ಯಾಕ್ಸಿ ರಸ್ತ್ಯಾಕ್ ಧರುನ್ ಮುಕಾರ್ ಧಾಂವೊಂಕ್ ಲಾಗ್ಲಿ.

ತಿತ್ಲ್ಯಾರ್!

ಆಲಿಯಾಕ್‌ಚ್ ರಾಕೊನ್ ರಾವ್ಲೆಲೆಂ ಏಕ್ ನಿಳ್ಶ್ಯಾ ರಂಗಾಚೆಂ ಕಾರ್, ತ್ಯಾ ಟ್ಯಾಕ್ಸಿ ಸ್ಟ್ಯಾಂಡಾ ಮುಕ್ಲ್ಯಾ ಪಬ್ಲಿಕ್ ಪಾರ್‍ಕಿಂಗಾರ್ ಥಾವ್ನ್ ಹೆವ್ಶಿಂ ಆಯಿಲ್ಲೆಂ ತೆಂ ಆಲಿಯಾನ್ ಬಸ್ಲೆಲ್ಯಾ ಟ್ಯಾಕ್ಸಿಚೊ ಪಾಟ್ಲಾವ್ ಕರುಂಕ್ ಲಾಗ್ಲೆಂ. ಆಲಿಯಾಕ್ ಹಾಚಿ ಖಬಾರ್‍ಚ್ ನಾತ್‌ಲ್ಲಿ. ಟ್ಯಾಕ್ಸೆರ್ ಬಸ್ಲೆಲ್ಯಾ ಕಡೆನ್ ತಾಕಾ ಪರ್ತ್ಯಾಕ್ ಸಕಾಳಿಂಚೆಂ ತೆಂ ಘಟನ್‌ಚ್ ಉಡಾಸ್ ಯೇಂವ್ಕ್ ಲಾಗ್ಲೆಂ.

"ಕಿತೆಂ ಚಿಂತಾಯ್ ಆಲಿಯಾ?" ಆಲಿಯಾ ಚಿಂತ್ನಾಂನಿ ಬುಡ್ಲೆಲೆಂ ಪಳವ್ನ್ ಅಭಿಲಾಶನ್ ಆಲಿಯಾ ವಯ್ರ್ ನದರ್ ಮಾರ್‍ಲಿ.

"ಕಿತ್ಲೊ ಅಶಿಕ್ಪಿ ಲೋಕ್ ಆಮ್ಚ್ಯಾ ಹ್ಯಾ ದೇಶಾಂತ್ಲೊ....! ವಿಮಾನಾರ್ ಉಭ್ತಾತ್... ಪಯ್ಶೆ ಆಸಾತ್... ಸಗ್ಳೆಂ ಆಸಾ... ತರ್‍ಯ್ ಕ್ಯಾರೆಕ್ಟರ್ ಸಾರ್‍ಕೆ ನಾಂತ್. ಖಂಯ್ ಕಿತೆಂ, ಕೊಣಾಲಾಗಿಂ ಕಶೆಂ, ಚಲೊಂಕ್ ಜಾಯ್ ಮ್ಹಳ್ಳೆಂ ನೆಣಾಂತ್!" ಆಲಿಯಾ ವ್ಹಳೂ ಉಲಯ್ಲೆಂ.

"ತೆಂ ಸೊಡ್ ಆಲಿಯಾ! ಜಾಲ್ಲೆಂ ಜಾವ್ನ್ ಗೆಲೆಂ. ತುವೆಂ ಹ್ಯಾ ವಿಶಯಾಂತ್ ಜಾಗ್ರುತ್ ರಾವೊಂಕ್ ಜಾಯ್. ಎಕೇಕ್ ಪಾವ್ಟಿಂ ತುಂ ತುಜ್ಯಾ ಘರಾಚಾ ಟೆನ್ಶನಾರ್ ಆಸ್ತಾಯ್. ತೆದ್ನಾಂ ತುಕಾ... ತುಂ ಕಿತೆಂ ಕರ್‍ತಾಯ್ ಮ್ಹಳ್ಳೆಂಚ್ ಕಳಾನಾ!"

ಆಲಿಯಾಕ್ ಸಮ್ಜಾಂವ್ಚ್ಯಾ ಅಭಿಲಾಶಾಚಿ ನದರ್ ಟ್ಯಾಕ್ಸೆಚಾ ಡ್ರೈವರಾ ವಯ್ರ್ ಗೆಲಿ. ತೊ ಘಡ್ಯೆ ಘಡ್ಯೆ ಆಪ್ಲ್ಯಾ ಟ್ಯಾಕ್ಸೆಚ್ಯಾ ಮಿರರಾಂತ್ ಪಳೆತಾಲೊ. ಹೆಂ ಪಳೆಲ್ಲ್ಯಾ ಅಭಿಲಾಶಾಕ್ ತ್ಯಾ ಟ್ಯಾಕ್ಸಿಚಾ ಡ್ರೈವರಾ ವಯ್ರ್ ದುಬಾವ್ ಉದೆಲೊ. ಆಪ್ಲ್ಯಾ ದುಬಾವಾಕ್ ಪಾರ್‍ಕುಂಚಾ ಖಾತಿರ್ ಕಿತ್ಯಾಕ್‌ಗೀ ತಾಕಾ ಪಾಟಿಂ ಪಳಂವ್ಚೆಂ ಮನ್ ಜಾಲೆಂ.

ತಿತ್ಲೆಂಚ್!

ಅಭಿಲಾಶಾ ಪಾಟಿಂ ಘುಂವ್ಲೆಂ. ಆಲಿಯಾಕ್ ಕಾಂಯ್ ಖಬಾರ್ ನಾತ್‌ಲ್ಲಿ. ತೆಂ ಆಪ್ಲ್ಯಾಚ್ ಸಂಸಾರಾಂತ್ ಆಸ್‌ಲ್ಲೆಂ.

ಪಾಟಿಂ ಘುಂವ್ಲೆಲ್ಯಾ ಅಭಿಲಾಶಾಕ್ ತಾಣಿಂ ಪಯ್ಣ್ ಕರ್‍ಚ್ಯಾ ಟ್ಯಾಕ್ಸೆಚಾ ಪಾಟ್ಲ್ಯಾನ್ ಯೆಂವ್ಚೆಂ ಏಕ್ ನಿಳ್ಶ್ಯಾ ರಂಗಾಚೆಂ ಕಾರ್ ಆನಿ ಹೆವ್ಶಿಂ ತೆವ್ಶಿಂ ದುಸ್ರಿಂ ವಾಹನಾ ದಿಸ್ಲಿಂ ಶಿವಾಯ್ ತಾಚ್ಯಾ ದುಬಾವಾಕ್ ಇಡೆಂ ದಿಂವ್ಚಾ ತಸಲೆಂ ಕಾಂಯ್ ದಿಸ್ಲೆಂ ನಾ.

ಥೊಡ್ಯಾ ವೆಳಾನ್!

ಆಲಿಯಾನ್ ಸಾಂಗ್ಲೆಲ್ಯಾ ಪರಿಂ ಟ್ಯಾಕ್ಸಿ ಸಿಗ್ನಲಾರ್ ಉಭಿ ಜಾಲಿ.

ಸಿಗ್ನಲಾರ್‍ಯ್ ಟ್ಯಾಕ್ಸಿಚಾ ಡ್ರೈವರಾನ್ ಆರ್‍ಶ್ಯಾಂತ್ ಪಾಟಿಂ ಪಳಯ್ತಾನಾ, ಪರ್‍ತ್ಯಾಕ್ ಅಭಿಲಾಶಾ ಪಾಟಿಂ ಘುಂವ್ಲೆಂ.

ಪಾಟ್ಲ್ಯಾನ್ ತೆಂಚ್ ನಿಳ್ಶ್ಯಾ ರಂಗಾಚೆಂ ಕಾರ್ ರಾವೊನ್ ಆಸ್‌ಲ್ಲೆಂ.

ಸಿಗ್ನಲ್ ಉಗ್ತೆಂ ಜಾವ್ನ್ ಟ್ಯಾಕ್ಸಿ ದಾವ್ಯಾ ಕುಶಿಕ್ ಘುಂವ್ಲಿ. ತ್ಯಾ ಕಾರಾನ್‌ಯ್ ಟ್ಯಾಕ್ಸೆಚೊ ಪಾಟ್ಲಾವ್ ಕೆಲೊ. ಅಭಿಲಾಶಾಕ್ ಆತಾಂ ಟ್ಯಾಕ್ಸೆಚಾ ಡ್ರೈವರಾ ವಯ್ರ್ ದುಬಾವ್ ಉದೆಲೊ. ಹೊ ಟ್ಯಾಕ್ಸಿಚೊ ಡ್ರೈವರ್ ಕಾಂಯ್ ತಾಂಚೆ ಸಾಂಗಾತಾ......? ಅಭಿಲಾಶಾಚಾ ಮತಿನ್ ಜಾಗಯ್ಲೆಂ.

ತಿತ್ಲ್ಯಾರ್!

ಅಚಾನಕ್ ಆಯ್ಕೊನ್ ಆಯಿಲ್ಲ್ಯಾ ಆವಾಜಾ ಥಾವ್ನ್ ಅಭಿಲಾಶಾ ಉಡೊನ್ ಪಡ್ಲೆಂ.

ತಾಚೆಂ ಸೆಲ್‌ಪೋನ್ ವ್ಹಾಜೊಂಕ್ ಲಾಗ್‌ಲ್ಲೆಂ.

"ಹಾಂ ನಮಿತಾ!" ಅಭಿಲಾಶಾನ್ ಆಪ್ಲ್ಯಾ ವ್ಯಾನಿಟಿ ಬ್ಯಾಗಾಂತ್ಲೆಂ ಪೋನ್ ಭಾಯ್ರ್ ಕಾಡ್ಲೆಂ.

"ಖಂಯ್ ಆಸಾಯ್ ತುಂ? ಕಾಂಯ್ ಪ್ರಾಬ್ಲೆಮ್...?"

"ನಾಂ ಕಾಂಯ್ ನಾಂ!" ಅಭಿಲಾಶಾನ್ ಸಾಂಗ್ತಾನಾ ಟ್ಯಾಕ್ಸಿ ಪರ್‍ತ್ಯಾಕ್ ದುಸ್ರ್ಯಾ ಸಿಗ್ನಲಾರ್ ರಾವ್ಲಿ. ತೆಂ ನಿಳ್ಶೆಂ ಕಾರ್ ಅಜೂನ್‌ಯ್ ಆಲಿಯಾನ್ ಬಸ್ಲೆಲ್ಯಾ ಟ್ಯಾಕ್ಸಿಚೊ ಪಾಟ್ಲಾವ್ ಕರ್‍ತಾಲೆಂ. ತಿತ್ಲ್ಯಾರ್, ಕಿತೆಂಗೀ ಚಿಂತ್ಲೆಲೆಂ ಅಭಿಲಾಶಾ, ಹೊಚ್ ಬರೊ ಆವ್ಕಾಸ್ ಮ್ಹಣೊನ್ ಚಿಂತುನ್, ಪಾಟಿಂ ಫುಡೆಂ ಪಳಯ್ನಾಸ್ತಾನಾ,

"ಹಾಂವ್ ತುಕಾ ಉಪ್ರಾಂತ್ ಪೋನ್ ಕರ್‍ತಾಂ! ಬಾಯ್ ಬಾಯ್!"

ಅಭಿಲಾಶಾನ್ ಫಟಾಫಟ್ ಆಪ್ಲೆಂ ಸೆಲ್‌ಫೋನ್ ಭಂಧ್ ಕೆಲೆಂ. ತಾಚ್ಯಾ ಪಾಟ್ಲ್ಯಾನ್ ವ್ಯಾನಿಟಿ ಬ್ಯಾಗಾಂತ್ಲ್ಯಾ ಪರ್ಸಾಕ್ ಭಾಯ್ರ್ ಕಾಡುನ್ ತಾಂತ್ಲೊ ಶೆಂಭರ್ ರುಪಿಯಾಂಚೊ ನೋಟ್ ಭಾಯ್ರ್ ಕಾಡ್‌ಲ್ಲೊಚ್ ಎಕಾ ಹಾತಾನ್ ಟ್ಯಾಕ್ಸಿಚೆಂ ದಾರ್ ಉಘಡುನ್ ದುಸ್ರ್ಯಾ ಹಾತಾನ್ ತೊ ಶೆಂಭರ್ ರುಪಿಯಾಂಚೊ ನೋಟ್ ಡ್ರೈವರಾಕ್ ವೊಡ್ಡಾವ್ನ್,

"ಕಮಾನ್ ಅಲಿಯಾ ಗೆಟ್ ಡೌನ್ ಕ್ವಿಕ್!" ಆಲಿಯಾಕ್ ಟ್ಯಾಕ್ಸೆರ್ ಥಾವ್ನ್ ಅಭಿಲಾಶನ್ ಭಾಯ್ರ್ ವೊಡ್ಲೆಂ. ಟ್ಯಾಕ್ಸಿ ಡ್ರೈವರಾಕ್ ಕಿತೆಂ ಜಾತಾ ತೆಂ ಕಳ್ಚೊ ಸಂಭವ್‌ಚ್ ನಾತ್‌ಲ್ಲೊ. ಎಕಾಚ್ ಖಿಣಾ ಭಿತರ್ ಸಗ್ಳೆಂ ಜಾವ್ನ್ ಗೆಲ್ಲೆಂ. ಅಭಿಲಾಶಾನ್ ವೊಡ್ಡಾಯಿಲ್ಲೊ ಶೆಂಭರ್ ರುಪಿಯಾಂಚೊ ನೋಟ್ ತಾಚ್ಯಾ ಹಾತಾಕ್ ಪಾಸೊನ್ ಯೇಂವ್ಕ್ ನಾತ್‌ಲ್ಲೊ. ತೊ ಥಂಯ್ಚ್ ತಾಚ್ಯಾ ಬಗ್ಲೆಕ್ ಮುಕ್ಲ್ಯಾ ಬಸ್ಕೆರ್ ಗಳ್‌ಲ್ಲೊ.

"ಕಮಾನ್ ಆಲಿಯಾ ಕ್ವಿಕ್!" ಆಲಿಯಾಕ್ ವೊಡುನ್ ವರುನ್ ಗೆಲ್ಲೆಂ ಅಭಿಲಾಶಾ ಮುಕಾರ್ ಸಿಗ್ನಲಾಕ್ ರಾವ್ಲೆಲ್ಯಾ ವಾಹನಾ ಮಧ್ಲ್ಯಾನ್ ಜಾವ್ನ್ ರಸ್ತೊ ಉತ್ರೊಂಚಾ ಲೊಕಾಂ ಮಧೆಂ ಘುಸ್ಲೆಂ. ಹೆಂ ಪಳೆಲ್ಲೆ ತ್ಯಾ ಟ್ಯಾಕ್ಸಿಚಾ ಪಾಟ್ಲ್ಯಾ ನಿಳ್ಶ್ಯಾ ಕಾರಾ ವಯ್ಲೆ ಜಾಗೆ ಜಾವ್ನ್ ತೆ ಕಾರಾರ್ ಥಾವ್ನ್ ದೆಂವ್ಚ್ಯಾ ವಗ್ತಾರ್ ಸಿಗ್ನಲಾಕ್ ರಾಕೊನ್ ರಾವ್‌ಲ್ಲೊ ಲೋಕ್ ಸಿಗ್ನಲ್ ಕ್ರಾಸ್ ಕರುಂಕ್ ಲಾಗ್ಲೊ. ತಾಂಚೆ ಮಧೆಂ ಆಲಿಯಾ ಆನಿ ಅಭಿಲಾಶಾ ಖಿಣಾ ಭಿತರ್ ಬರ್ಸುನ್ ಗೆಲಿಂ. ಕೊಣಾಯ್ಚಾ ದೊಳ್ಯಾಂಕ್ ಆಲಿಯಾ ಆನಿ ಅಭಿಲಾಶಾ ಖಂಯ್ ಗೆಲಿಂ ಮ್ಹಳ್ಳೆಂ ತೆಂ ದಿಸ್ಲೆಂ ನಾ.

ಸಿಗ್ನಲ್ ಆನ್ ಜಾವ್ನ್ ಪಾಟ್ಲ್ಯಾನ್ ವಾಹನಾಂಚೆಂ ಹಾರನ್ ವ್ಹಾಜೊಂಕ್ ಲಾಗ್ತಾನಾ ಕಾಂಯ್ಚ್ ವಾಟ್ ನಾತ್ಲೆಲ್ಯಾ ತ್ಯಾ ಟ್ಯಾಕ್ಸೆನ್ ಆನಿ ತ್ಯಾ ನಿಳ್ಶ್ಯಾ ಕಾರಾನ್ ಆಪ್ಣಾಚೊ ವೇಗ್ ಆರಾಯ್ಲೊ.

******************

[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]

ಕಾದಂಬರಿಕಾರಾಚಿಂ ಉತ್ರಾಂ: ಅವಸ್ವರ್ 1, ಅವಸ್ವರ್ 2, ಅವಸ್ವರ್ 3, ಅವಸ್ವರ್ 4, ಅವಸ್ವರ್ 5, ಅವಸ್ವರ್ 6, ಅವಸ್ವರ್ 7

ಕಥಾಝರ್ ಪಾನಾಕ್

ದಾಯ್ಜ್ ಪಾನಾಕ್

About us | Feedback | Contact us
Copyright © 2005 DAAIZ.COM All rights reserved. Page concept, designed and maintained by Ashawadi Publications