Amkam Kostt Kiteak Yetat?

ded8

Voros : 2005

Moino : Febrer

Choritrechim panam ustilear amkam ailevar okhkhea somsarak thorthorayil'lea ’sunami’ porim ghodd‌l'lim sobhar ghodditam/onvaram vachunk melltat.

Ti choritra zauyeta novo sol'lo, porno sol'lo ya her itihas. Tantlea thoddeancho nihall korcho tor sodom' anim gomor xerant poddlolo ujeacho paus zauyet, somsarak buddoyil'lea auracho zauyet, toull toull somsarant yeun vecho borgal zauyet ya buddt‌gol zauyet.

Him prakritik ghodditam tor pidda xidden soit somsarar edoll zaiteank luttun velam. Pidda zauyeta khevad, keansor, kallza-ghat, mendvacho tap, ya prostut kallachi edds pidda. Hea sorv onvarank tea tea vorgacha lokamni tantanchoch mholl'llo orth dila. Vigeanan tachem karonn dilam, bhageuntamni devan kel'li porikxa ya dil'li xikxa mhollam.

Sot kitem-i tem asom punn hantum ek songot soman zaunasa ani ti zaunasa hantum zal'lem luksann monxanchench. Anim hor‍yeka osolea khunnamni monxank ekek lisamv xikonk zorur asa.

Atam ubhzota ek soval ’amkam kostt kiteak yetat?’

Hench soval pornea sol'leant obrohamvan kel'lem. Zobacha patriorkan kel'lem. Anim ailevar havem aikal'li ek lhan kanni bhouxa hea sovalak zap diunko sokat;

Pott'tta retirek sobhar geleat, sobhar irade ghevun, sobhar boremponn zoddun aileat. Boremponn zoddunk sokanastam ayil'le ya vochon poilenchaki pastt zal'le tantancha souyamni xivai hantum pott'ttacho zamv ya her pun‌xetancho kosoloch guneamv hantum na.

Osolech sobhar irade ghevun gel'leantlo eklo bhoktik as‌l'lo anim tacho irado fokot ek - tacha hatachem ek bott ovchit ritin vankddem zal'lem. Duk nat‌l'li tor‌yi tea bottacho xiro bilkul kam' korinat‌l'leo. Tannem sobhar voktam kel'lim tor‌yi tachem bott toxench as‌l'lem.

So disanchi retir bor‍ya ritin keli tor khonddit zaun devo opnnachem bott borem korit mholl'lli patyenni ghevun gel'lo bhoktik bor‍ya ritir retirent vantto gheunko laglo. Disan‌dis tacho otregacho ghoddeo taka novo bhorvoso haddoitalo. Oxem poilo, dusro, tisro, chouto, panchvo oxem panch dis somple tor‌yi tacha bottak kosloch porihar labhlona.

Atam okhrecha disa to bhoktik chintunk poddlo, opnnan retir itlea opurbhayen keli tor‌yi kiteak devan oplem bott borem korunk‌na? bhouxa devan mhaka dil'lea kosttank kaim motlob asa? oxem chintun to tache bhomvarim ascha herank pollelaglo. Konn keppo, konnak pixem tor konn kudd'ddo, konnak keansor, tor konnak edds.

Okhrecho dis udelo tor‌yi tachem bott borem zalench na - anim to bhoktik devak orgam dilaglo - opnnachem jivit itlem borem kel'lea khatir. Devan opnnak bori bholaiki dil'li, borem chintap dil'lem. Anim opnnak bottarupar kostt dhaddn heram thoim aschi opnnachi zovabdharecho uddas kaddun dilo. Anim khorem somodhan taka thoim‌ch labhlem.

Kostt ek lisamv haddun yeta, dolle sodd mholl'llem lisamv. Disan‌dis monis progotecha paulamni itlo sonkirnn zatech asa mhollear tachem chintap soit oxir zatech veta.

Dekun'nch malghodde sangtat - jen'na sontos ekameka vantun ghetat tednam to vaddta. Jednam duk ekamekalagim vanttun ghetat tednam tem duk unnem zata. Bhouxa somsari chintpak hem chintap ulttem disonk puro, tor‌yi mhoza motin vopun ghemvchem somodhanechem chintap hem;

"kostt mhollear kitem mholl'llem somzonk fokot opnnak pollenaka - bogar herank polle

sontos vanttunk herancho sontos poilo vinchinaka - tuzo sontos poilo vinch"

- Valley Quadros, Ajekar