’Somsarant vhoddlem atonkvad bonduk va gulle nhoi - mogachi sukidhadd ani aplinch porkim mhonn lekhchem’
Atonkvadache Guneamvkar Konn?
Voros : 2008
Moino : December
Atonkvad ani atonkvadi monogot somsarak novem nhoi, punn bodlon yemvchi monogot matr horyeka dexachea, horyeka zatichea, horyeka vorgachea lokanchea dispoddtea jinnyechem somodhan pidd'ddear korunk soklea mholl'llem oputt sot. Edoll poreant poisile pois osolim atonkvadi kamam cholchim ami dispoddtea khobrea madhyomamni vachun, aikon asl'leamv toryi atam hem atonkvad amchelagim, amcheach angnnak paulam mhonntoch ochanok amchi nid suttli ani ekameka vad-protivad, arop-protearop suru kele. Konn mhonnta hea korneank pakistan karann, oni konn mhonnta paxchaty raxttranchea prochodonank bud xikomvcheak thoddea dexanchi zokti zovab, ani konn mhonnta oni kitem. Punn hea sorv arop - protearopant ek sot matr suttavem zaun amkanch nagddem korun gel'lem zaunasa;
Somsarantlea panch progotipor dixen chomkon vechea dexam poikint ek zaunaschea amchea bharot dexachi porigot kitli lachar ani oskot mholl'llem amkam dislem. Az amchea dexacher koslyai ritir solisayen akromonn koryeta; zamv varyar, zamv udkant va zamv bhumyt.
Zom'mu kaxmirant kaim osole bomb futtche, ghoram laschim, moddim ras poddchim sodanchem zalam. Hea khobrancher sot sangchem tor choddtavo lok eka ghoddye vachta ani dusre ghoddye visorta. Thoddea vorsadhim irakant zamv, thoddea vorsandhim omerikachea sttok ekschenjicher zal'lea hol'leak, sobhar vorsam thaun isrel ani pealestinant zaunaschim, ailevar lebnanant zaunaschim atonkvadi kriteamni kitlexea amkam zagoilam?. Tim poisilim tor amchea dexachea bhomvarim nodor ghaleam; xrilonkant kitlexea vorsam thaun zaun aschem atonkvad, ofghanistanant, pakistanant zaunasche jiughati hol'lea modhem soit ami amkam surokxit des mholl'llea bhromident sukha sontosan jieun asleamv. Amchi jem' suttazoich tor bhailea raxttrank kiteak? amchea dexabhitor zaunaschem atonkvad kaim unnem? toriki ami dil'lem/diunaschem gomon zaunasa sochinacheo senchuri, saniacho tin inchacho gagro, mohendro singh dhoniche lamb kes, rakhi sauntak mikhan dil'lo kis, rahul mohazonacho ves, amchea choddtavo neaxonol ttivi madhyomamni choddtik akorxit vixoi soddlear amchea dexant veusthit ritir zaunaschea zaitea gotividhiancher amchea lokak gomon/guman'nch na.
Amchea ttivink ttiarpi labhonk bigbos, sas-bohu, az ka mukod'dom' karyim matr soktat xivai; provinn togaddian trixulam vanttchem zamv, raz tthakren biharink ugtean marchem, bhexttamvchem zamv, simi mholl'llea somstheak videxam thaun yemvchea duddvavixim zamv, motantor mholl'llem nib divn omaikank luttchem bhirankull korneo nhoi. Amchea dexant itlem sorv zalam, zaunasa toryi ozun amchi jem' suttl'lich na. Ami ozun bindrachea bhangra podokache khuxen, tti ttventti vorldd koppachea khuxen, yuvraz singhan eka ourant marl'lea so siksorachea khuxethaun ozun bhair yeunko namv. Ani amkam kaim jem' suttat konn'nna mholl'llea bhimyant porot gadd nident urounko pechaddchim khobre madhyomam soit.
Dekun ozun ami riakttiv/protikria (Reactive) posond kortamv xivai proakttiv/purvtoyarai (Proactive) nhoi. Amchem kanun veusta polleya; bhroxttacharacho bapui mhonn okhkho des vollkonchea mulaim' singhak soit sibioi tosleamni klin chitt ditana, nottvor singh, chondrosvami tosolim ozun hordhem fuloun jietana, poppu yadou, razo bhoyea, orunn gauli tosle elisamv jiktana benkachem lon kaddl'lo bauddo, kaim ek moineachem kont bhandunk visorlo tor tacher kanuni krom' ghetat. Korentt bil'l bhandunk tank nam tor fyuz kaddtat. Ttelifonachem bil baki asa tor ttelifon konekxon katortat. Amche polis polleya; rosteachea signolacher ramvcheaki, il'lem pois vochon ruka iddeak va addosak lipon bostat, kaim soni lagl'le ekle-dog signol moddn yetitgai mhonnon. Ani ayil'le te konnyi poddcha, hozarancho poddko. Kaide kanun hea polisanchi ast-vost.
Dekun ami atonkvadi yeun amcher gulleancho paus vot'tana amchi jem' suttli. Amche polis, amche rakonn kitle oskot ani lachar mholl'llem tea atonkvadimni amkam dhakhoilem. Amche razoki-i mukheli soit ’zhodd plos’ sekyurittint asche, tonddak ayil'leporim pakistanacher bobattle. Thoddeamni aple hud'de sanddle tor ani thoddeank hud'dean kaddlo. Lokank bekuf korchi vidhea. Lokamni bottam zoklim dekun atam amche razoki-i mukheli zage zale?
Punn ek ghoddi razoki-i mukhelincher bottam zokcheadhim gorjecho niall koryangi? amchea dexant horyeka pranteant vevegllear ritichem vikrit kam' korcho lok ozun nangi? fokot't pamyxi rupeamni rexon karddam korn dil'le kitle dhakhle amim polleunko nant? eka hozaramni kolejicheo ddigreo mellcheo amim kitlem aikonk namv? nokli nott ordhea molak gheun ami choloitele kitlexeank vollkonamv? nokli pasportt korn ditele kitle yezontt amim vollkonamv? ani osoleancho faido uttomvn bharoti-i nagorik mholl'lleporim jiemvcho banglacho, pakistani toxench her raxttrancho kitlo lok jieun na?. Tor osolea korneamni amchea dexak sonchikar mholl'lli projna kitlexeank amkam ayil'li asa? tea atonkvadimni vhaparl'lim sim' karddam amche poikintleamnich nhoigi tankam dil'lim? tor atam ami osurokxit mhonnon arabbayo dimvchim aminch eka ritin hea sorvank karonn nhoi?
Disan-dis bodlon vechea somsarant, jitlem borem bodoltagi, titlench va tacheaki choddit mapan vaittyi bodolta. Amim poilem xikxit zamvchi bhovo gorz asa. Xikxit mhollear iskolam-kolejik vochon ddigreo ghemvchench nhoi. Dekun amche zaite xikpi vorgachea lokani korcheo nalisayecheo korneo, oxikpim chintunk soit sokchimnant. Dekun azkal omerika toslea raxttrant amche xikpi lok duddu ekttam-i korun amchea dexantlea vi.Ech.Pi, simi tosolea somstheank dhaddta ani hea duddvant amchea dexa bhitorli surokxa disan dis bigddon veta. Kaim ami somsarachea dolleancher mati ghalunk ami ekvottit mhonn dhakhounko preton keleari, amche bhitor ominch fasallcho dis, ekameka chyuran chyuro zamvcho vell kaim pois na. Az amkam bottam zokunk bhailo raxttr asa, va amche razoki-i mukheli asat. Punn tea disamni bottam zokunk tim bottam urchimnant mholl'llem sot ami somzonchem preton kelear amkanch borem.
Atam tuminch sangam - atonkvadache guneamvkari konn?
Khalteponnim,
- Valley Quadros, Ajekar
