’Somzoteleak somzamvchi gorz na, somzanatl'leak somzaun faidoi na’
Bodlon Vechea Somsarant Konknni ’Sahiti’ Khoim Asat?
Voros : 2008
Moino : Novembor
Disan-dis kiteak ghoddyen ghoddi bodlon aschea somsarant amcho desy ek dekun amchea desantyi ailevarlea disamni utton dischi bodlaunn kaim vichitr nhoi, punn bodlaunn zamvchi rit matr vichitr mhollear chuk zamvchina. Protyek zaun ailevarlea disamni amchea desachea horeka konxeamni zamvche tosoli bodlaunn fuddilea disamni amkam khonchea dixent cholounko sokteli, va amchea desacho fuddar khonchea dixen chomkotolo mholl'llem ek vhoddlem soval;
Maharastra-nt Em'menes parttechea lokam thaun ut'tor bharotiancher; protyek zaun biharincher zamvcho on'nyai, kaxmirant kedinch nimvanatl'lo uzo, ossamant, molegamvant futtl'le bomb, orissant toxench her rajeamni dhormachea namvamni zamvchi vid-vaull, bangladexi lokanchi dhuspott, song-porivarancheo dhoxi hea sorvank pattlavo korun ovchit ubhi zal'li somsarachi arthik divalli khorench zaun fuddem yeunko aschea bhirankull disanchim khunnam dhakhoita.
Oxem mhonnon khonchoi des bhageunt ritin jieun na. Horyeka dexant tantanche mholl'llech antorik somosse asat. Atonkvad asyet, zagotikoronn asyet, pidda-xidda asyet, prakritik luksann asyet va her ritir asyet. Punn amchea desant aschea somosseam pattim aschi monogot matr hea sorvancheaki choddit akant sadea monxeanchea kallzant ubhzaita mholl'llem khorem.
Somsarant jietelea lokanchea monant aschem chintap, kallzant aschim bhognnam, tonddacho jinos ani dhakhoup - bhilkul ekameka ulttim. Azkal choddtavo lok fokot't dhakhoupak bhulta. Dekhun bhailem rup sozomvchear poddla xivai bhitorle bhitor pokorn vechetosolem ’pokoll jivit’ jieun asa.
Hem vastou amchea dexachi hokigot tor, amchea somajent, amchea konknni somajent ami khoim asamv? kitle pattim urleamv mholl'lleacher ekoddi nodor marli tor, amchea konknnentyi osoli monogot utton yemvchi bhovo niraxadaik mhonnyeta. Choddtavo thokleat, choddtavo pikleat ani thodde asokt sust zaun lokleat ani pattim urleat - dekun mukar asche sorv mukheli zaleat. Hichch porigot sorvyi dixemni; dekun vedicher choddl'le sorv nott, vedi pattim asche sorv nirdexok, moika hatim dhorl'le sorv gaupi, tinter hatim dhorl'le sorv boroinnar, tonddak ayil'lem ulttem uloitele vimorxok - hanche modhem khoncheagi muleant, konnacheagi dakxennen, konnacheagi bhimyan va kitench naka mholl'llem bezoubhdari chintapgi va kiteak dusmankai mholl'llem chintpacho pangrun konxeant ghoremvchea sahitim somor veustit ritin cholchem ’potrikodhyom'’ mholl'llo dondo.
’Boroinnar ani sahiti modhem koslo forok?’ mhonn mhaka soval kel'lo eklo opnnak mohan konknni sahiti (svo-ghoxit) mhonn dhangro marchean. Punn hamvem zap diunko na. Kiteak mhollear zapi magtolo sahiti zal'leporinch na, zapi sodhtolo matr sahiti zaunko sokta. Somzoteleak somzamvchi gorz na, somzanatl'leak somzaun faidoi na - asom.
Punn hokigotent konknnent novodacheaki choddit tthokke boroinnar fokot't boroinnar zaun urleat. Dekun teachch kalponik kanneank oplo somsar korun asat xivai aplea ghora poltoddi konn mela, konn asa mholl'llem tankam poddon gel'lem na. Tankam fokot't potramni apli tosvir ailear puro, ani apnnan boroyil'lem (koslem-i tem asom) - porgotton ailear puro. Techch potrache vitorok, techch potrache procharok, techch potrache poxok ani techch potrache prayozok kiteak - tanchinch onkonnam, tancheoch kanneo, tanchinch kovita. Konnem-i vaitt uloinaye, uloilear tosoleancher ked uddomvcheak, va tankam holk korcheak hanchinch viddombonam - vha! kitli bhagi konknni nhoi?
Dekun atam porigot oxi asa mhollear, barant boson konnacheagi duddvant pieun, konnakgi yettun tum boroire, hamv ghalta, tum soddoire hamv chhaptam mholl'llem potrikodhyom' zalam. Hanga sompadokyi techch, prokaxokyi techch, boroinnaryi techch, ani hechch monogoteche onkonnkar. Kosolichch orhota gorz na - tinter dhorunk koll'llear puro. Bhasechi ginean zamv, noitik molam zamv, zovabhdarechi nodor zamv natleari cholta. Hi porigot polleun kantthallon sobharam konknnek uzo poddondi mhonn pois rautana, hanga thoddeach moineamni, vo thoddeach vorsamni hi konknni oplich khasgi ast-vost mhonnon he chintunk lagtat, itlench nhoi, hem vhoi patyemvche soit asat. Uprant hanchench konknni sahit, hechch voroinnar, hechch vimorxok, hechch ponddit ani hanchich konknni. Konnem-i akxep korunk na - kelo tor hanchim namvam padd korchim essemessam, ani kitem bhongostoll. Sanga - hea monogotek ani bhozorong dollachea monogotek kaim forok asa?
Bodlaunn zai - bhilkul zai. Punn horyekak ek vell asa, sthan asa, man moread mholl'lli asa. Kazarachea sombhromar mornacheo kontigo gamvcheo sobhta?, baptijma vellar ’zonogonnomono’ sobhta? mhaka toryi sobhana. Dekhun az amim boroyil'lench sarkem ani vortem - heranchem sorv sarem va xenn. Amkam ami kel'lem sarkem nhoi mhonn konnem-i mhonnonk nhozo. Zorthor eka vimorxokak hem svikar korunk sadhy na tor taka heranchea borpancher vimorso korunkyi yogyota na.
Dekun somsar kitlo mukhar paula toryi amchea konknnent amche boroupi ozun thoimch asat va pattim yetat, zoxem kanoddint ek sangap asa ’boru borut'ta rairo kudure kot'teyayitu’ mhonncheporim.
Hea porigotemodhem konknnent udel'li ’xenn chollvoll’ kaim novo bhorvoso haddounko sokta mhonnon fokot't hat bhandun bosleamv tor - amche title bekuf hea somsarant konnim aschenant. Hi chollvoll fokot't konnachem sahity ’xenn’ konnachem ’ghann’ mholl'lleak simit zainastam novim misamvam suru zaizoi. Nove proyog zaizoi. Punn hangasor zaleari udeta tench soval - konnem korchem? kedalla korchem? koxem korchem? ani ekadhavella keleari konnak hachi gorz poddlea?
Konknnecho itlo lok budhvont, vachpi vorgacho asa toryi konknni potram vachteleancho sonkho fokot't 3% matr. Hangasor choddtavo potram hechch 3% vachpeank motint dhorun potram choloita ani techch paromporik sahit (va sonkpaxonn) dita xivai, bakicho 97% lok kitem axeta? to kiteak pason konknni potram vachinant mholl'llem somzonche preton soit kel'lem disana. Konknnent ami panch, dha, vis, pon'nas vorsanchem potrikodhyom' choloun onbhog asa mhonnteleamni gõyttam-i udexem kel'lemna mholl'llem oputt sot. Kanoddi lipient novod tthokke sahity asa mhonn dangro marteleamni az konknni sahiteak ar marcheporim kelam tor osoleachch mohan potrikodhyomimni(?) mholl'llem oputt sot somzonchi gorz asa.
Amchea vachpeank allxi kel'leant amchea sorv sompadokanchem bezoubhdariponn poilem asa mholl'llem nixttur sot poilem mandun ghezoi. Xenn chollvollen soit hye dixen chintap attounko na. Zor tor porgottcho sompadok yogy asa tor, osolem boroyil'lem porgott korcheadhim voraun polleto nhoi? punn hangasor oxem kortele konn asat? ani hea modhem borem sahit dimvchi xeathi aslele az khoim asat? amche boroinnar, kovi soit osoleach pokoll chintpant opunn bhagi mholl'llem chintap chintunk lagleat. Dekun kedallagi, khoimgi, koxengi, moron gel'leanchea yadin sukea soilapachim, kritok bhognnanchi kovita boroitat punn, omchech poikintlo kovi az koso jieta? khoim asa? mholl'llem chintunk soit vochanant - hem hokigot.
Sahitik asazoi zal'lim poilim lokxonnam - dixtt, zovabhdari, opnnank heram thoim dekhchi xeathi, somajent zamvchea horyeka onitechem ugtean khonddon korchem dhoir ani koslich mulaz natl'lem chintap. Ani bhovo gorjechem - namvacho, manacho, proxostecho, puroskaracho kosloch ongalap natl'lem chintap.
Sangl'leporim atam utt'ta vhoddlem soval - tosole konknnent ozun jivo asat?
Khalteponnim,
- Valley Quadros, Ajekar
