’khonchea dhormak vengum? ghoram bhandun diteleancho va ghoram lasteleancho?’
Tuzo Dhorm' Kosolo?
Voros : 2008
Moino : Oktobor
Pattlea sobhar vorsam amchea dexant kristamvacher hol'lo cholon asl'lo. Zoxem reddeachea patticher betant martana reddean bhogl'leporim amim chintl'lem. Poilo mar poddtana reddeak khobarch na. Dusro mar poddtana koslogi ospoxtt avaz aikalo. Tisro mar poddtana ho avaz lagxilean aikol'leporim zalem. Chouto mar poddtana kaim ho mar apnnak poddtagi mholl'llo dubhavo zalo. Panchvo mar poddtana koll'llem ho - ho mar apnnakchch poddon asa mhonn.
Hechchporim desbhor kristamvacher zal'lea, zatechch aschea hol'leacher amkam monglluri kristamv porjek kitench poddon gel'lem na. Eka vatter dusmanak bhogsuncho mog, dusre vatter bhitorle bhitor lipon aschem bhivkurponn. Tisrem amchea somajent voir veteleank sokla voddn holk korn jiemvchea kurleanchea khastachea kullientlea amchea oskotkayecho bhorpur faido zoddun amcheach angnnak demvon amcher hol'lo chol'lo. Amchea bailancher, bhurgeancher mar poddle. Punn zokti zovab diunko amcho lok zorur pattim sorlona. Hi khobar khinnan porgamvani vistarli ani somsarbhor hea kirkoll korneank virod kelo.
Punn hea sondorbhar sobhar sotam ugddapim zalim. Amchea thoddea pranti-i khobra potranchem khorem rup ugtem zalem. Sotak pattimbho dizoi aschim him potram bezovabhdariponnan osolea komuvadinchea korneank horsunchim borpam porgottonk laglim. Hankam khursacher umkallayil'lea jezuchi imaz moddl'li zamv, igorjechea khurisacher hancho bautto bhandl'lo dislochch na. Zorthor hichch got zor hanchea honumanachea imajechi ximtti khatoril'li va hanchea trixulacher khuris va chandnem bhandl'lem tor kitem zatem mholl'llem chintap hanchea kott'tteant udel'lem kiteak na?. Hea bezovabhdarichea, pokxpati disalleamvixim khorench zaun okhkhea kristamv porjen niall korchi gorz asa. Dekun horyeklea kristamvan osolea potrak pattimbho dimvchem bondh zaizoi. Zor osolem bezovabdhariponnachem potrikodhyom' konnim kristamvam kortim tor edollchch potram hulpaitim mholl'llem oputt sot.
Mongllurant choll'lea hol'leachi khobramni, khobra madhyomamni porgotton ayil'leo tosviro polletana nizaiki kalliz koddoita matr nhoi rogat koddta, punn ho vell rogat koddoun getto korcho nhoi, fuddem yeunko aschea onvarank koxem fudd korchem mholl'lleacher niall korchi gorz asa. Amchea somajecho husko aschea amchea mukhelink add pam-i dil'lo kitlo marog poddlo mholl'llem atam toryi amchea kott'tteant gelear borem. Khobra madhyomamni porgotton ayil'lea tosviremni polisanche mar khamvche baudde tornatte, bailam, konnachea tokler rogat, konnachi mustaiki pinjlea. Monxeaponnachem chintap aschea khonchyai dhormacheak, he mar khaun, loz bhogchea lokak polletana spoxtt kollta him nirdox mhonn. Punn ek sot matr spoxtt ucharizoi - je konnem mar kheleat, va loz-ovman mhonn bhoglam, zoilak geleant - osolea sorvank nizaiki man favo.
Az amchem raxttr somsarantlea promukh raxttram poikint ek zaunko paulam kaddchea sondhorbhar, ami, somsarachea nodrent xikpi, projnaunt, zannari, az khoinchea pamvddar asamv mholl'llem ovolokon korchi bhovo chodd gorz asa. Azkal somsarant disanatl'lea devakhatir, disteleancho ekamekacho dori voddcho spordho cholon asa. Ani hi dori voddn voddn konnachea hatam pamyanchi kat veta, konnacho prann veta. Tor dhormantor mholl'llo ek itlo vhodd somosso tor hea somosseacher ekoddo niall zorur koream. Dhorm' procharacher choritra kitem sangta tem polleveam;
Jezu Krist oxem mhonnta; "vocha ani hi bori suvarta sorv zonangak porgott kora" - kristamv dhorm' israyela thaun yurop, omerikak vistarlo.
Svami vivekanondo sangta "tumim tumcho dhorm' vistarunk bhailea raxttrank vocha, surya pondlea sorv raxttrank ho dhorm' porgotta" - hindhu dhorm' exiantlea raxttramni matr nhoi, molai peninsula, kamboddia, on'nom', sumotra, zava, bali toxench nornio dexank vistarlo.
Hindhvanchea povitr grinthamni soit dhorm' porgott koromvcho ulo dimvchim utram vachunk melltat;
"je kriall zaunasche devak horsundit, ani sorvank lagim haddundit" (rigved: 9.63.5)
"hamv him sontosbhorit utram amchea lokak toxench porkeam somor uloitolom" (yozurved: 26. 1-2)
Goutom' Bud'da oxem sangta; "vocha tumi sorv raxttrank ani hi suvarta porgotta. Sanga tankam - dubllim ani nirgotikam, grestam anim unchlim sorv ek" - bud'do dhorm' choina, koria, zopan, xri lonka, ttibett, moyanmar, thaileandd toxench viettnam' raxttrank vistarlo.
Muslim' dhorm' orob raxttra thaun esia toxench afrikak vistarlo.
Guru Govind Singh mhonnta; "hechch iradea pason hamv zolmal'lom, ani ho dhorm' vistarunk devan mhaka nomearlo" - sikhkh dhorm' bharota thaun yurop, asttreliak toxench omerikak soit vistarla.
Zor horyek dhorm' aplea dhormacho sar herank porgottunk ulo dita tor koxem konnai ekleak va dogank guneamvkar korchem?
Amim choritra pollemvchi naka tor soddeam, ti amkam naka - sotakch vengeam. Pattlea challis vorsamni bharotantlea kristamv lokancho sonkho polleya;
1971 isvent bharotantlea kristamvacho sonkho 2.59%
1981 isvent bharotantlea kristamvacho sonkho 2.43%
1991 isvent bharotantlea kristamvacho sonkho 2.32%
2001 isvent bharotantlea kristamvacho sonkho 2.04%
Tor kristamv mixinori gorib lokak konvoddtor korta mholl'llea bodnamacher kitlem sot asa? ho bodnam' sot asto tor, amchea dexacho kaim 78% cheaki choddit lok gorib asa, zo kristamv zaun bodloto nhoi?
Az somsarachea horyeka konxeamni dhorm', devo, kat, zat, kulli, rong, vorg oxem vevegllea nibhamni zhogddim zhuzam zate asat. Soironn, sosnnikai mholl'lle fokot't sobdh zaun urleat va bukamni soit aplem osthitv hogddaunko pauleat tor soval udeta hem - monxeaponnacheaki vorto dhorm'?
Kristamv mixinori goribank vevegllea ritir bhexttaun, puslaun, konvoddtor kortat mhonnon konnak jivo laslo, konnachem ghor hulpailem, igorjeo lasleo, bailam-cheddvancher samuhik ot'teachar choloilo, purxamv kaddlo. Konnacho dispoddto gras nas kelo. Somajent donnsoteleank, nirgotikank him kristamv mixinorim yeun konvoddtor kortat mholl'lle nare ghalteleanchea vadacher ekoddo niall koryam. Ek ghoddi hamv hea somsarant kosolochch dhorm' natl'lom mhonn chintam ani zori tori mhaka aplea dhormachi vinchounn korunk poddti tor mhoje somor ascheo vinchounneo kosoleo?
Ghoram bhandun diteleanchea dhormak vengo va ghoram lasteleanchea dhormak vengom?
Nhesonk pangrunk diteleanchea dhormak vengom va vinngem korun ot'teachar korn purxamv kaddteleanchea dhormak vengom?
Kamam divoiteleanchea dhormank vengom va dispoddto gras nas koroiteleanchea dhormank vengom?
Ghayel'leank vhokat pusteleanchea dhormak vengom va hat pam-i moddteleanchea dhormank vengom?
Ekamekacho mog korunk xikoiteleanchea dhormak vengom va ekameka dhvex pacharteleanchea dhormank vengom?
Auy bapui nastam onath zal'lea burgeank vinchun jivit diteleanchea dhormak vengo va auy bapaik jivexim marun onath korteleancheam dhormak vengum?
Hea sovalank koxedd'd mholl'llem astem tor him zovab ditelim? osolea monxeank aplea dhormank asteleancho devo khoremponni asot tor, az to soit lojen doddonk asa ani oplestokim vicharunk asa ’ho kosolo dhorm'?’.
Punn koxedd'd mholl'llem asl'lem tor heo korneo toryi koxeo zateo nhoi? atam onyek korum tor - sang mhaka, tuzo dhorm' kosolo?
Khalteponnim,
- Valley Quadros
