’खंच्या धर्माक वेंगूं? घरां भांदून दितेल्यांचो वा घरां लासतेल्यांचो?’
तुजो धर्म कसलो?
वरस : २००८
मयनो : अक्तोबर
पाटल्या सभार वर्सां आमच्या देशांत क्रिसतांवाचेर हल्लो चलोन आसल्लो. जशें रेड्याच्या पाटिचेर बेतांत मार्ताना रेड्यान भगल्लेपरीं आमीं चिंतल्लें. पयलो मार पडताना रेड्याक खबारच ना. दुस्रो मार पडताना कसलोगी अस्पषट आवाज आयकालो. तिस्रो मार पडताना हो आवाज लागशिल्यान आयकल्लेपरीं जालें. चोवतो मार पडताना कांय हो मार आपणाक पडतागी म्हळ्ळो दुभाव जालो. पांचवो मार पडताना कळ्ळें हो - हो मार आपणाकच्च पडोन आसा म्हण.
हेच्चपरीं देसभर क्रिसतांवाचेर जाल्ल्या, जातेच्च आसच्या हल्ल्याचेर आमकां मंगळुरी क्रिसतांव पर्जेक कितेंच पडोन गेल्लें ना. एका वाटेर दुस्मानाक भगसुंचो मोग, दुस्रे वाटेर भितरले भितर लिपोन आसचें भिवकूरपण. तिस्रें आमच्या समाजेंत वयर वेतेल्यांक सकला वोडन हल्क कर्न जियेंवच्या कुरल्यांच्या खासताच्या कुळियेंतल्या आमच्या असकत्कायेचो भर्पूर फायदो जोडून आमच्याच आंगणाक देंवोन आमचेर हल्लो चल्लो. आमच्या बायलांचेर, भुर्ग्यांचेर मार पडले. पूण जोक्ती जवाब दीवंक आमचो लोक जरूर पाटीं सरलोना. ही खबार खिणान पर्गांवानी विसतारली आनी संसारभर ह्या किर्कोळ कर्न्यांक विरोद केलो.
पूण ह्या संदर्भार सभार सतां उगडापीं जालीं. आमच्या थोड्या प्रांतीय खबरा पत्रांचें खरें रूप उग्तें जालें. सताक पाटिंभो दीजय आसचीं हीं पत्रां बेजवाभदारिपणान असल्या कोमुवादिंच्या कर्न्यांक हर्सुंचीं बर्पां पर्गटोंक लागलीं. हांकां खुर्साचेर उमकाळायिल्ल्या जेजुची इमाज मोडल्ली जांव, इगर्जेच्या खुरिसाचेर हांचो बावटो भांदल्लो दिसलोच्च ना. जरथर हिच्च गत जर हांच्या हनुमानाच्या इमाजेची शिमटी खातरिल्ली वा हांच्या त्रिशूलाचेर खुरीस वा चांदनें भांदल्लें तर कितें जातें म्हळ्ळें चिंताप हांच्या कट्ट्यांत उदेल्लें कित्याक ना?. ह्या बेजवाभदारिच्या, पक्षपाती दिसाळ्यांविशीं खरेंच जावन अख्ख्या क्रिसतांव पर्जेन नियाळ कर्ची गर्ज आसा. देकून हऱ्येकल्या क्रिसतांवान असल्या पत्राक पाटिंभो दिंवचें बंध जायजय. जर असलें बेजवाब्धारिपणाचें पत्रिकोध्यम कोणीं क्रिसतांवां कर्तीं तर एदोळच्च पत्रां हुल्पायतीं म्हळ्ळें अपूट सत.
मंगळुरांत चलल्ल्या हल्ल्याची खबरांनी, खबरा माध्यमांनी पर्गटोन आयिल्ल्यो तस्वीरो पळेताना निजायकी काळीज कडयता मात्र न्हय रगात कडता, पूण हो वेळ रगात कडवन गेटो कर्चो न्हय, फुडें येवंक आसच्या अन्वारांक कशें फूड कर्चें म्हळ्ळ्याचेर नियाळ कर्ची गर्ज आसा. आमच्या समाजेचो हुसको आसच्या आमच्या मुखेलिंक आड पांय दिल्लो कितलो मारग पडलो म्हळ्ळें आतां तरयी आमच्या कट्ट्यांत गेल्यार बरें. खबरा माध्यमांनी पर्गटोन आयिल्ल्या तस्वीरेंनी पोलिसांचे मार खांवचे बावडे तर्नाटे, बायलां, कोणाच्या तकलेर रगात, कोणाची मुसतायकी पिंजल्या. मनश्यापणाचें चिंताप आसच्या खंच्याय धर्माच्याक, हे मार खावन, लज भगच्या लोकाक पळेताना स्पश्ट कळता हीं निर्दोश म्हण. पूण एक सत मात्र स्पश्ट उचारिजय - जे कोणें मार खेल्यात, वा लज-अवमान म्हण भगलां, जैलाक गेल्यांत - असल्या सर्वांक निजायकी मान फावो.
आज आमचें राश्ट्र संसारांतल्या प्रमूख राश्ट्रां पयकिंत एक जावंक पावलां काडच्या संधर्भार, आमी, संसाराच्या नद्रेंत शिकपी, प्रजनावंत, जाणारी, आज खंयच्या पांवडार आसांव म्हळ्ळें अवलोकन कर्ची भोव चड गर्ज आसा. आजकाल संसारांत दिसानातल्ल्या देवाखातीर, दिसतेल्यांचो एकामेकाचो दोरी वोडचो स्पर्धो चलोन आसा. आनी ही दोरी वोडन वोडन कोणाच्या हातां पांयांची कात वेता, कोणाचो प्राण वेता. तर धर्मांतर म्हळ्ळो एक इतलो व्हड समस्सो तर ह्या समस्स्याचेर एकोडो नियाळ जरूर कऱ्यां. धर्म प्रचाराचेर चरित्रा कितें सांग्ता तें पळेव्यां;
जेजू क्रीसत अशें म्हणता; "वचा आनी ही बरी सुवार्ता सर्व जनांगाक पर्गट करा" - क्रिसतांव धर्म इस्रायेला थावन युरोप, अमेरिकाक विसतारलो.
स्वामी विवेकानंद सांग्ता "तुमीं तुमचो धर्म विसतारुंक भायल्या राश्ट्रांक वचा, सूरया पंदल्या सर्व राश्ट्रांक हो धर्म पर्गटा" - हिंधू धर्म एशियांतल्या राश्ट्रांनी मात्र न्हय, मलाय पेनिन्सुला, कांबोडिया, अन्नम, सुमत्रा, जावा, बाली तशेंच नोर्नियो देशांक विसतारलो.
हिंध्वांच्या पवित्र गृंथांनी सयत धर्म पर्गट करंवचो उलो दिंवचीं उत्रां वाचुंक मेळतात;
"जे क्रियाळ जावनासचे देवाक हर्सुंदीत, आनी सर्वांक लागीं हाडुंदीत" (ऋगवेद: ९.६३.५)
"हांव हीं संतोसभरीत उत्रां आमच्या लोकाक तशेंच पर्क्यां समोर उलयतलों" (यजूरवेद: २६. १-२)
गौतम बुद्दा अशें सांग्ता; "वचा तुमी सर्व राश्ट्रांक आनी ही सुवार्ता पर्गटा. सांगा तांकां - दुबळीं आनी निर्गतिकां, ग्रेसतां आनीं उंचलीं सर्व एक" - बुद्द धर्म चैना, कोरिया, जपान, श्री लंका, टिबेट, मयानमार, थायल्यांड तशेंच वियेटनाम राश्ट्रांक विसतारलो.
मुसलीम धर्म अरब राश्ट्रा थावन एसिया तशेंच आफ्रिकाक विसतारलो.
गुरू गोविंद सिंघ म्हणता; "हेच्च इराद्या पासोन हांव जल्माल्लों, आनी हो धर्म विसतारुंक देवान म्हाका नम्यारलो" - सिख्ख धर्म भारता थावन युरोप, आसट्रेलियाक तशेंच अमेरिकाक सयत विसतारला.
जर हऱ्येक धर्म आपल्या धर्माचो सार हेरांक पर्गटुंक उलो दिता तर कशें कोणाय एकल्याक वा दोगांक गुन्यांवकार कर्चें?
आमीं चरित्रा पळेंवची नाका तर सोड्यां, ती आमकां नाका - सताकच वेंग्यां. पाटल्या चाळीस वर्सांनी भारतांतल्या क्रिसतांव लोकांचो संखो पळेया;
१९७१ इस्वेंत भारतांतल्या क्रिसतांवाचो संखो २.५९%
१९८१ इस्वेंत भारतांतल्या क्रिसतांवाचो संखो २.४३%
१९९१ इस्वेंत भारतांतल्या क्रिसतांवाचो संखो २.३२%
२००१ इस्वेंत भारतांतल्या क्रिसतांवाचो संखो २.०४%
तर क्रिसतांव मिशिनरी गरीब लोकाक कन्वडतर कर्ता म्हळ्ळ्या बदनामाचेर कितलें सत आसा? हो बदनाम सत आसतो तर, आमच्या देशाचो कांय ७८% च्याकी चडीत लोक गरीब आसा, जो क्रिसतांव जावन बदलतो न्हय?
आज संसाराच्या हऱ्येका कोनश्यांनी धर्म, देव, कात, जात, कुळी, रंग, वर्ग अशें वेवेगळ्या निभांनी झगडीं झुजां जाते आसात. सयरण, सोसणिकाय म्हळ्ळे फकत्त सब्ध जावन उरल्यात वा बुकांनी सयत आपलें अस्थित्व होगडावंक पावल्यात तर सवाल उदेता हें - मनश्यापणाच्याकी वर्तो धर्म?
क्रिसतांव मिशिनरी गरिबांक वेवेगळ्या रितीर भेश्टावन, पुसलावन, कन्वडतर कर्तात म्हणोन कोणाक जिवो लासलो, कोणाचें घर हुल्पायलें, इगर्ज्यो लासल्यो, बायलां-चेडवांचेर सामूहीक अत्त्याचार चलयलो, पुर्शांव काडलो. कोणाचो दीस्पडतो ग्रास नास केलो. समाजेंत दणसतेल्यांक, निर्गतिकांक हीं क्रिसतांव मिशिनरीं येवन कन्वडतर कर्तात म्हळ्ळे नारे घाल्तेल्यांच्या वादाचेर एकोडो नियाळ करयां. एक घडी हांव ह्या संसारांत कसलोच्च धर्म नातल्लों म्हण चिंतां आनी जरी तरी म्हाका आपल्या धर्माची विंचवण करुंक पडती तर म्हजे समोर आसच्यो विंचवण्यो कसल्यो?
घरां भांदून दितेल्यांच्या धर्माक वेंगो वा घरां लासतेल्यांच्या धर्माक वेंगों?
न्हेसोंक पांग्रुंक दितेल्यांच्या धर्माक वेंगों वा विणगें करून अत्त्याचार कर्न पुर्शांव काडतेल्यांच्या धर्माक वेंगों?
कामां दिवयतेल्यांच्या धर्मांक वेंगों वा दीस्पडतो ग्रास नास करयतेल्यांच्या धर्मांक वेंगों?
घायेल्ल्यांक व्हकात पुसतेल्यांच्या धर्माक वेंगों वा हात पांय मोडतेल्यांच्या धर्मांक वेंगों?
एकामेकाचो मोग करुंक शिकयतेल्यांच्या धर्माक वेंगों वा एकामेका ध्वेश पाचार्तेल्यांच्या धर्मांक वेंगों?
आवय बापूय नासतां अनाथ जाल्ल्या बुर्ग्यांक विंचून जिवीत दितेल्यांच्या धर्माक वेंगो वा आवय बापायक जिवेशीं मारून अनाथ कर्तेल्यांच्यां धर्माक वेंगूं?
ह्या सवालांक कोशेडद म्हळ्ळें आसतें तर हीं जवाब दितेलीं? असल्या मनश्यांक आपल्या धर्मांक आसतेल्यांचो देव खरेंपणी आसत तर, आज तो सयत लजेन दोडोंक आसा आनी अपलेसतकीं विचारुंक आसा ’हो कसलो धर्म?’.
पूण कोशेडद म्हळ्ळें आसल्लें तर ह्यो कर्न्यो तरयी कश्यो जात्यो न्हय? आतां अन्येक करूं तर - सांग म्हाका, तुजो धर्म कसलो?
खाल्तेपणीं,
- वल्ली क्वाड्रस, अजेकार
