’konknni auy konnager asa? konn tika posta? konn tiche svotache/ poske put? khonchea gamvant ti vosti korn asa?’
Amchi Bhageunt Jinni Ani Pojddemponn
Voros : 2007
Moino : August
Edoll mhonnasor jemeun, ghoreun asl'lea thoddeank vilson kottilan ailevar aplea ’kovik khoim purla’ mholl'llea lekhonant uttoyil'lench thoddim nidentchch uloilim, bobattlim ani kedant denklle uddi marcheporim uddi marilaglim toryi horxencheporim amim polleunko matr soktamv xivai voraunko, parkunk va tojviz korunk sokanamv mhonn porot ruzu kelem.
Bhovo borem lekhon tem zaunaslem toryi konnem mhollem tem lekhon boroyil'lea kovin thoddea tempadim vachlelem kovita ’pojddem’ mhonn. Hangasor soval konn voir ani konn koir mhonn nhoim. Konn opvont ani konn fott'tting mhonn nhoim. Soval itlench;
Pojddemponn mhollear kitem? ani khoncheak pojddem mhonnchem?
Thoddeachch tempadim aicha kallar filmamni dison yemvcha krur drixeancher bhasabhas chol'li. Tantum konnem mhollem mel gibsonachem ’do peaxon af kroistt’ khorench ek krur himsek pintramvchem mhonn. Punn tem pintur bhageunt mhonnchey titleach mapan asle. Oxem bhasabhas zatastam modhench ek soval udelem; khoncheak himsa mhonnchi? krurota mhonnchi? hat khatorcheak? pam-i moddcheak? gomtti khatorcheak? va churi ghalcheak?
Hechchporim mikmeaks jivont astana eka konknni kareavixim mhaka sangon oxem mhonnalo, songit samratt henrichim thoddim podam; ’ye ye katrina’, ’ami dogi sezari’, ’chondrem' udeun ailo’..... Punn hea kareant lokan porot porot ’vons mor’ mholl'llem pod ’amxem ani tikxem.. Lonnchem...’ podak. Kiteak mhollear tankam okhrecho sobdh pojddea sobhdaporim aikalo kom-i. Dekun lokancho bobochch bobo kom-i. Hangasor soval to sobdh pojddo vhoi va nhoim mholl'llo nhoim.
Techchporim amcho konknni lok kovitank kitlo somzota vo orth korta mholl'llem sorvank kollit asa. Amcho lok prithve thaun chondremak uddchi vatt kitli lamb asa mholl'lli mezunk sokta punn adamv khel'lem foll khonchea rukachem mhonn somzonk sokana. Sureacha votachi sokot mapunk sokta punn yevek naddl'lo to sorop khoncho mhonn somzonk sokana. Bibisi ntlea hardd ttokachem varjik somzonk sokta punn kovita somzonk sokana. Tem preton korunkyi vochana - asom.
Osolea porigotent eka kovin oplem kovita vachtana thoddi zovabhdari ghemvchi ovoxy. Kiteak mhollear tachi kovita aikotolo lok ponddit va vedant zannari nhoim. Bogar sado lok. Tankam tujeo imajeo somzoncheaki, tantlea utrancho doddo orth jikun dhorta. Hem borengi va vaittgi mhonn hamv sangana - punn hi hokigot. Atam tuminch sanga, kovitagoxttint echchemachim kovita kitleank somzotat? tachye bodlak sijyes takoddechim kovita aikonk lok oplo jivoch kan korn ravanangi?. Hantum lokank durson faido na. Punn zor osolim kovita zor kovinchea kamasallamni vachun sanglim tor ti bhovo sobhta.
Ek poti ani potinn sangata nidchem kaim pojddem nhoim - khorem. Punn tim poti potinn ugtea rosteacher nidtit tor taka pollemvcha lokamni somzazoi mhonnchem sarkem? hem chintap amcha kovincha toklek rigana tor bhovo durbhagponn amchem. Kiteak e.Tti lobachea eka kovitent sangl'leporim;
’zor rukachim panam suktit - tantum niras kaim na
punn zor rukachim pallam suktit - to ruk vanchon faido na’
Hangasoryi hench chintap motik yeta. Vachpi/lok kovitank somzanam tor rukachim panam sukl'leporim. Punn kovink zor somzana tor rukachim pallam sukl'leporim. Hi zovabhdari horyeka kovichi zaunasa. Opunn khonchea suvater, kosolem kovita vachtam mholl'llem kovin somzon ghemvchi gorz. Kiteak mhollear amcho lok bhageunt. Ami jiemvchi somaz hipokret somaz, sangonk ek korunk onyek. Hostiporim; dhakhounko asche dant veglle, chabonk asche dant veglle. Amcha jinnyent ami kitlem-i pojddem ulounko, pojddi jinni jieunko ami pattim soranamv toryi amkam amchem sahity bhageuntch zai.
Hem sangtastam mhaka ojik vis-bhavis vorsadhim ’ubbo muddbidri’n ’jhelo’ potracher boroyil'lea eka mottvea kannyecho uddas yeta. Tea kannyent paxchaty somskriticher arso dhorchem sobhit chintap aslem. Sodamnit eka kuttmachim ekeklinch zaun ghora bhair vetat, partti, klob mhonnon piounneant, amalant tanchem tanchem sukh bhogun ratim pattim yetat. Hea modhem eka disa fantear eka auyk, adhlea patti ghora yetana tika klobbant tichesovem loingik sukh bhogl'lea dadleachi pors oplea begant aschi dista. Ti suttoun polletana tantum ticheach putachi tosvir dison yeta.
Hi kanni pojddi va nhoim mholl'llem soval hamv hangasor korina - tem gorjebhailem. Punn hea kannyen bhovo vhodd vivad ubhzailo. Bhouxa potrak tochch vivad zai aslo zaizoi. Konnem mhollem boroupeachem mullavem chintap pojddem mhonn, ani konnem mhollem kanni pojddi mhonn.
Oxem polleunko gelear hea somsarant borem ani vaitt mhonn devan khonchench rochunk na. Tem monxean oplea svartha khatir, somajik kaide kanunam rochleant. Ani tea tea monxeak oplea motint ascheporim khonchem pojddem, kitlem pojddem mhonn dista. Zaunko puro hem heranchi oskotkai. Punn prozaprobhutvant jiemvcha amkam horyeka svatontr zorur asa. Punn tacho motlob ho nhoimki, kitem-i ulouyot va koxem-i ulouyet mholl'llo.
Mhojea jinnyent polleyil'lem mhojeachch eka vollkichea vektichem jivit pintraunko havem ’pattim gamvak’ kadombori boroyil'li. Hi ekleachi matr nhoim, sobharanchi jinni zal'li kanni toryi, amche thodde hipokret bhageunt thodde mhonnale ’chorbel'li bail’, ani kitem oni kitem. Hem hipokretponn nastam ani kitem? kiteak mhollear hi zaunasli ek kanni matr. Punn sot sangchem tor hantum hamv xikl'lem lisamv itlench; jednam ek ’bekuf’ pondditanche somor vad manddun va ek ’vidhvan’ bekufam somor vadak demvlear donamychoi porinnam' ekchch.
Osolea porigotent uddi marn amchach penkddachi khill moddn gheunko poddtelem xivai somaz sodhronchina. Ham! fuddem kovitevixim ulounko lok onikyi bhemyeunko asa. Ani osolea porigotent osolea unnea bhavaddtachea lokank somzaunko vechem nizaiki bekufponn xivai her kitench nhoim. Ani hea bekufponnak demvleamv tor kitem zata mholl'llem, mirza ghalibachea utramni sangtam;
’Somsarant bekufanchi kaim unnemponn nam
Ekleak sodhun gelear hozar melltat’
Hangasor amim khonchem pojddem khonchem nhoim mhonn uddi marchank ek soval kortam; amcha somajent vevegllea ritir vaitt, onit zatana ami kiteak ghoreun jietamv? tednam amchi likhnni kiteak zhorana? ti amchi nid kiteak suttana?
Tea nident khott marchim konnim nastamna?
- Valley Quadros, Ajekar
