"tum jednam boutik sukhacho pattlavo kortai tednam duk tuzo pattlavo korta, jednam tum somzonnecho pattlavo kortai tednam boutik sukh tuzo pattlavo korta"

Jednam Gaddamv Ghoddo Zatana

de33

Voros : 2007

Moino : March

Porgamvantlea konknni somajek ddoyan ddi’sozachi vollok korn dimvchi gorz na, hachim kamam, somaz‌sevachch hachi vollok korn ditat. Konn haka razoki-i monis mhonnondi, konn haka namva khatir hem korta mhonnondi, punn ho matr hea somajent monxa rupar jiemvcha ekeka onixtt vorgacha monxeancho podd'do ughoddn'nch veta...

Ailevar put'tur‌chea eka kristamv bailek, emiliak kamak dourn khonchea ritichem manosik toxem doihik ritin koxtt dil'lem ghoddit vachunk mell'llem. Az‌kal khobro korchea spordheant middian khellchea sorkosak xembhor tthokke patyeunko zaina, ’su’ aschak ’sukurundde’ kortat! punn uzo nastam dhumvor uttonk‌y sadhy na dekhun hem ghoddit sot mhonncheant kaim dubhavo na. Punn vijmitayechi gozal khoinchigi mhollear hika kamak dourlelim soit kristamvam, timyi amchim mongllurchim kristamvam - vha! aicha disa sorv monglluri kristamvamni hordem pettun amim kristamvam mhonncho dis porot udela...

Oxem mhonntana mhojea motik onyek songot zhollkota - amchi monglluri somaz udenticha romachi devachi vinchun kaddleli porza, amkam zolma thaun morta por‍yant mis-mas, kumsar-kumgar, dan-dhorm' hem chintap amcha xiram xiramni vhallta. Baptijmacha disa thaun mornacha fonddak veta por‍yant ami vascho vanjel, amim aikomvchim misam, amim gamvchim kantaram, hor‍yeka korejmavellar amim retiro kortamv, vorsak kiteak, moinea moineak kumsar zaun patkam korchem loisons rinivo kortamv. Amcha bhageunt‌ponnacho, ani dan dhormacho kuruH amcha firgojentlea bhandpamni ascha dudafatracher polleya, soviniyoramni polleya, amcha somajentlea axreamni polleya - amchim namvam kitli jhillmilltat mholl'llem. Porgamvant ason gamvak gel'levellar porot retirenk vochonk disan dis retir‍yanchim mondiram ubhim zatat. Itlim bhageunt ami osoli jinni jietamv? hea amcha jinnyecher amim amchem hordem pettinamv tor ani konnem pettchem nhoim‌gi?

Ek lhan soval; igorjent vhodd vhodd bhandpam ubharcha padrink tanchea firgojent kitlim porgamvant asat? konn konn khonchea khonchea kamar asat mholl'llem kollit asa. Fokot gaddi bonglo aschanger matr vochonk hankam futtvata? emilia tosolim goribam khonchea sthiter asat? tanchim dhoneam kosolim? sarko sambhall melltagi? hem sorv konnaik‌yi poddon gelam? va heavixim konn‌y chintunk gelam? amkaim zai fokot't bhandpam - moron kuson vechea kuddik pur‌l'lea fonddacher‌yi bhandunk axa - bhandpam!!

Jezuche pattlaudar ami - punn jezun aplea jinnyent khonchim-i bhandpam bandhunk gel'lem konnem-i aikolam? tor fokot't konkrettechim bhandpam bhandcho horbhos lag‌l'lea padrink ho horbhos khonchea devan dil'lo?

Thoddeach disadhim onyekli gamvchi bail - eka vil‌cheracher opnnak cholonk sadhy na dekhun mhoji mozot kora mhonn porgott ritin roddchem drixy polleunko/vachunk mell'llem. Hantum kitlem sot asa ani kitlem khobre madhyoman fonn'nn ghalam tem nennam tor‌yi hem vachun lokank khorench zaun hea somsarant monxaponnachem mol ugddapem zalem. Ailevar kovi anddrun boroyil'lea kovitechim okhrechim utram uloilim;

"Zageachim molam dhorunk
mollbak chodda
monxeachim molam sodhunk
choronddemni sodha"

Mhollear - mollbak choddonk sokteleank zorur zageachim molam melltit tor‌y choronddemni monxeachim molam melltit mholl'lli khatri na - dekhun sodha!

Vha! - devar roch‌l'lea rochnepoiki monis kitli vorti rochnam nhoim‌gi? hea khatir porot ek pauttim ami amchem hordem pettuyangi?

Hea somajeche sande amim sorvam, amchi jinni itli povitr‌ki - osoly kitlexea omaik monxeank lipoun asa amchi somaz mholl'llem konn zanna? ddoyana tosole chear mukheli amcha somajent udeun yetit tor - khorench zaun amchi somaz onik‌yi il'li sudharti.

Oxem mhonntana mhaka karvar‌chea bhispan ojik vis vorsadhim sang‌l'lem utar uddasak yeta; "hamv konnachyai ghora gelear tea ghorcheanchi kaleti somzonk tanchea ghorchea khakusak vetam" - bhovo orthabhorit utram him. Mhonnje - monxeak somajent khoro man favo, tachem ghor, tacho bonglo, tachi mustaiki, tachem kam' polleun nhoim, to oplea lhanank khonchea nodrent polleta mholl'lleacher zaunasa.

Atam mhaka uddas yeta eka gamvcho ek piso moddvoll aplea gaddvak gheun eka nomycha deger vochon tea gaddvak eka fatrant ghasilaglo kom-i. Sokallim thaun ghasun ghasun tea gaddvachi kat futton rogat demvonk laglem tor‌y ho moddvoll ghasilaglo.. Gaddvak bhandun ghalam dekhun tem gaddamv ravon bob ghaltalem tor‌yi moddvollan gaddvak ghaschem rauylemna.

Gaddvachi bob aikal'lo thoddo lok nom-i‌lagim yeun moddvollalagim soval korilaglo kom-i;

"kiteak tea gaddvak tum osoi ghastai?"

Moddvollan zap dili kom-i

"haka hamv atam goddo kortam"

Amcha somajent gollear kont bentonneo ghaln, hafteak sorag misak vochon, korejmak retiro korn osoli jinni jieteleank kitlem-i ghaslear sudhartit?

Monxeaponnacho bhongostoll korchea osoleank khorench dhorn tanchea gomtteak danteacho fator bhandun gunddiek lottun ghalizai.

Punn vhoddlem soval hem;

"Oxem kelem tor amcha somajent baki urchim kitlim?"

- Valley Quadros, Ajekar