"sangonk solis punn pallunk koxtt - tum poilem pallunk xik, tujem sangchem kam' urtelem"

Amcho Dhorm' Ani Mukheli

de32

Voros : 2007

Moino : Febrer

Ailevar mumboyant chol‌l'lea eka grestancha kazarak apounnem nastam ek zoddem riglem. Punn kazarak ayil'lea thoddea lokamni tankam dhorn, tankam marlem, zhollcha sigrettint dagun dourlem, thoddeamni tea bailek ordhem nagddem korn ticheo tosvir‍yo kaddleo. Thoddeamni tankam jivexim marchi dhomki dili, oni thoddeamni tea bailecher samuhik bholotkar korchi dhomki soit dili, thoddeachch vellan lokamni tankam dhorn polisancha tabent dilem. Polisamni okhrek ghutt soddoitana tim mhonnalim; "ek borem jevann jeunko ami axel'leamv. Amkam poixe diun tem jevann jeunko sadhy nat‌l'li dekhun kazarant don jeunnant forok poddchona mholl'llem chintun amim apounneavinnem thoim rigleamv". Bhovo borem kam' tea lokamni kel'lem. Ekekleak dhorn bharot‌rotn puroskar va vixv xantecho nobel puroskar divyet.

Hem ghoddit ojik logbog tis vorsadhim ayil'lea ’divar’ pinturantlea eka ghodditacho niall korun dita, novoch polis ins‌pekttor zaun ayil'lo rovi (xoxikopur), chori korn dhamvchea eklea bhurgeak dhamvddaun vorta ani oplea pistulechea gulleant marn tacha aspotrechea khottleak pauyta. Tannem kel'li chori itlich; ’aplea ghorant bhuken vhollvollcha auyk, lhan bhoinnik ani rittairdd mestri bapaik khamvchak thodde undde’.

Hem pinturamni matr nhoim, amcha chaltea jinnyent lagu zainangi?

Hea somsarant ’chuk/oprad’ mholl'llo choddaut zaun lagu zala va zata tor to oskoteancher matr, kosolich voxilai natleleank va pramannikant matr. Voxilai aschank, (ti voxilai kosli-i zamv; zamv poixeanchi, zamv podvechi, zamv sthanachi va odhikarachi) oprad kelear‌yi koxem hea apradha thaun suttka ghemvchi mholl'llem kollit asa. Ani osoleank rakonk amche kanun rakvoli mozot‌y dorobost kortat.

Mhojea bhurgeaponnar amcha gamvcho eklo bonnko amcha gamvant matr nhoim, lagxilea sut'turant bhovo vollkecho - lok tachem namv aikotananch kamptalo. Tannem kel'lem sadhon itlench, eka kombea kattant tacha sangatin tachelagim varjik kel'leak taka thoim‌ch churi ghaln logadd kadd‌l'lo. Polis ayil'le, haka kuddayil'lem tor‌yi tachea kuttmacha voxilayen to bhair ayil'lo. Mel'lo to melo, tachea lachar vidhou bailen ani dogam bhurgeamni konnalagim zhujchem? oplea dispoddtea grasak zhujchengi va aplea potichea khunigarasovem? tea xivai tea khunigar bonttacha kuttman tankam duddu diun tancho tallo bondh koroilo.

Punn teachch amcha gamvant va gamvcha sut'turant az‌kal churi ghalchi sodd, rosteamni konnem konnem khatorn ghal'le hat/pam-i sodanchim, amcha somajent nibam-i hozarom asat. Konnacha ghora luttkar rigle, konnachi khun zali, konnacha bailancher, dhuvancher ot'teachar...... Konnachim ghoram hulpailim konnacheo gaddeo hulpaileo, konnachim bossam pitto kelim.. Bondh kelem....

Amcha somajent jiemvcha hor‍yekleak ek nhoim ek dhorm' asa. Punn soval hem - khonchea dhormant hem xikoilam va xikoitat ki khun kora, mara, chora, pura mhonn? amchelagim asa monxaponn??dekhun

Zaizoi amchelagim itlem sorv ason‌y ami rite, amcha gamvant jieun ason‌yi ami pordexi. Amcha somajent, disan‌dis tutton vechea kuttmank porot futt haddomvche dorobost asat, punn tankam zoddunk korche mukheli khoim asat? kitem kortat? konnem hem korizai? kiteak korizai? koxem korizai? kednam korizai? sovalanchi xinkholl lambat't veta.

Amcha somajek uzo ghal, amcha bhageunt/kurpeunt kristamv somajek dhora; konn asat? amche doivik mukheli bhandpam bhandchim nibam sodhun asat. Bhandpam bhandcheadhim firgoz kuttmam bhandchim bhovo gorjechem mholl'llem hanchea kott'tteak kiteak rigana?

Ailevar eka firgojechea padreaban ek vinoti dhaddli, tantum tea dubllea firgojechi mottvi vordi as‌l'li; amcha firgojent itlim bhavarthi kuttmam jietat, hantum itlea kuttmacheancha ghoramni khakus nant, itlim ghoram portomvcha sthiter asat, itlexea bhurgeank xikpachi got na, itlexea bhurgeank pidda asa vokhtat got na, itlexim tornattim bekar asat.. Bhouxo thodde yazok tor‌yi oplea bhesachi zavabdhari bor‍yan somzotat. Punn osole asat khoinchor mholl'llem vhoddlem soval.

Thoddea vorsadhim kedinch dekhonk nat‌l'lea eka malghoddea padreaban ek vinoti dhaddli, eka bhovo dubllea gamvant to onath bhurgeank zomo korn tankam xikap dita, kotthinn dubllim, piddent aschank to khoroch ek devo zala. Notalam festacha sondorbhar tea bhurgeank ek zoddi novem vostur xivomvchak, tankam il'lim voktam molak ghemvchak, tantlea konnak xikxonn labhlam tankam opli jinni suru korunk kaim mozot korchea iradean ayil'li ti vinoti vachtam dolleamni duHkham demvtat. Asat! amcha somajent bhovo thodde tor‌y osole mukheli asat, punn hankam choddtavo vollkana, kiteak he bilddor nhoim, karamni bhomvanant, potramni oplem vhoddponn gazoinant, hankam bhoddve-xis nant, hanchelagim moche sodd, nesonk ek zoddi bor‍yo vhannoi ascheonant. Kitem-i asa tor - bhorpur monxea mog ani doya.

Dhorm' mhollear pulputrar choddon ’ekamekacho mog kora, tumchea dusmanank bhogsia’ mhonn tallo pinzun bobattchem nhoim. Poilem ti jinni jieun dhakhomvchi. Morn pavo‌l'lea firgojechea eka dublleak purunk vecheadhim onvol dia ani pura mhonnchem nhoim, chuk kel'leank polis xikxa labhomvn va korttachem nottis dhaddn nit korchi nhoim. Osole mukheli astit tor matr amche pattlaudari bore zatit.

Punn tacheadhim mhaka choddunnem sotra vorsadhim ’amcho yuvok’ potrant vachpeancha sovalank zapi dimvchea ech. Ar. Allvon dil'li hi zap uddasak yeta;so:

amcha firgojechea hor‍yeka bor‍ya kamamni padri add pam-i dita kiteak?
ech.Ar.Allvochi zap: to add dil'lo pam-i moddche amcha somajent nant dekhun.

Bhovo opurbhayechi zap. Amcha somajent padrincher kosoloi on'nyai zalo tor, bhokt zomle purxamvak - ore bhava, amcha bhoinneank, amcha bailank, amcha lokancher konnem-i marlem, chirlem va purlem tor - padreabancho purxamv khoim tor‌yi zal'lo tumi aikola? ho amcho dhorm'?ailevar

Mhojesovem seminorik vochon yazok zal'lo mhozo mitr yazok mhaka oxem vicharilaglo; "vol'li - tujea choddtavo kanneamni padreabank ek kutt zorur asa, kiteak?"
havem taka mogan zap dili; "mhaka dongott khoinchor‌y disanam'mu?"

Hamv padrink bhilkul virodh nhoim, punn padricho ves ghaln lokank xoxit korcheank devo mhonn mandhchantlo hamv bhilkul nhoim.

Divllacha pattlean ascho gu polleun eklean vicharlem kom-i "ho konnacho gu?"
dusro zap dita kom-i "gu mhonnanakare, bhott mam' hag‌l'lo zaunko puro"mhollear

Hannim hag‌l'lo gu nhoim? prosad?

Prosad mhonnchey zaite asat. Asondi, mhonnondi ani to prosad semvdit. Punn mhaka to prosad naka.

Vecheadhim fokot't ek soval tuka;"tum

Haka prosad mhonncheantlogi?"

Dev borem korum,
- Valley Quadros, Ajekar