"Amcha koxttancher jikchi nhoim bogar heram amchevixeant kitem chintitgai mholl'llich vhoddli khont amchi"
Jezu Ballok ani Munnabai MBBS
Voros : 2007
Moino : Janer
Toklenamv vachun khonddit tumcha motint soval udeunko puro ’oxttomi porbek ani kasim' saibhak kosolo sombondh?’ mhonn. Ddan brounacha ’dda vinchi kodd’ porim hem kaim onyek vivadhatmok lekhon mhonnon kaim bhageuntamni uddi marchi gorz na. Va ’loge roho mun'nobhayi partt -3’ zauyet mhonn chintchemyi nhoim. Vorsan voros dosembracha ponchvis tariker zolmoncho ballok jezu, amcha jinnyent kosolo patr gheunko sokla va sokta mholl'lleacher ekoddo niall korcho.
Notalancha festa thaun novea vorsacha disaporyant amim horyeka vorsa sutt-butt neson misak vetamv. Ghoramni krismos ruk korun tacher zaitem ddekorexon ghaltamv, gordonacho gotto kortamv, tantum vevegllea thoracheo monzateo ani amchi srizonoxilota (Creativity) dhakhoitamv. Mis zatechch ghoramni kek khatortamv, ekameka pottlun dhorn vix kortamv, novi botl kaddtamv, songitacha nadan ratbhor nachtamv, kusvar ekameka vantt'tamv.
Hantum kosolench vaitt na - bhovo borem. Ojik don hozar ani so vorsadhim gotteant zolmal'lea devaputacha zononacho uddas kaddn tacha uddasan sontos pamvchem khorench vortem fest.
Thoddeach vorsadhim jednam hamv mumboyant aschevellar mhozo sezarcho hindvancho bhurgo amger krismos festacho kusvar khaunko ayil'lo. Tachea bapaiporinch to horyekant ’tem kiteak? hem kiteak? tem koxem? hem koxem?’ mholl'llim sovalam kortalo. Tannem kel'lim thoddim sovalam ozun mhojea motint zapi sodhun asat;
"Onkol - horyeka vorsa tumim hem sogllem kortat nhoimgi? tumkam devo melltagi?"
Soval bhovo sompem ani mhakai "vhoi" mhonn zap diun pilatan hat dhul'leporim hat dhuvyete. Punn kiteakgi hem soval mhojea motint ubhench ravon mhoza ontoskornachi khodd kaddta mholl'lleporim bhogta.
Ailevar ’logeroho mun'nobhayi’ pichchor bharich hitt zalem khoim. Hamvem-i pollelem. Gandhigiri tachem tirll - ani gandhigiri mhollear? ’tuza eka poleak konny thapadd marta tor tuzo dusro poloi taka dhakhoi’. Hem utar gandhin sanglelem vhoi, punn konnachem utar hem? jezuchem utar nhoimgi hem? jezuchi ’giri’ konnench kel'li disana. Hamv hoiskulant xikon astana hichch jezugiri (eka poleak marlear onyek polo dhakhomvchi) korunk amcha dotorn xikomvcha sisttoran sanglem dekhun hem pallunky solha dili, tiyi klaxintlea vhoddlea pokri zaunasl'lea mhakachch. Havem zait mhollem. Hem aikal'lea mhojea eka klasmettan mhojea eka kansulak dilench nhoimgi? havem mhozo dusro polo mukhar kelo ani tannem takai onyek vhazoilem. Don mar khel'lea uprant mhakai jezugiri visroli, sisttorichi dotorny visorli ani kaddn tacha muskorak ek mar ghalo - to az mhonnasor mhojelagim uloinam. Koxi gandhigiri? jezugiri?
Borem atam kumbear thaun ambeak pattim yemvchem tor tea bhurgeachea sovalant aschem tory kitem? kaim sonkirnn imajeo (Abstract Images) jeo kovitapatthacher echchemacha kovitentlea ekeka sobdhamni tillchetosoleo? voilebhar pollelem tor (zoxem amim choddaut zaun korcheporim) hea sovalant kaim na mat'ti gobor. Punn koxedd'dak hat dourun pollelem tor zaitem asa;
Notalancha kallar amim retiryo kortamv, kumsar zatamv, misak vetamv, vix kortamv sogllem borem punn amcha jinnyent jezu khoremponni yetagi? va ailagi? ballkak ami umo ditamv, gotteantlea ballkak ami vhoddlo nott ditamv, igorjent ijmolak vhoddlo nott ditamv, kusvar vantt'tamv punn - jezu kiteak ayil'lo? mholl'llem somzotamv?
Bhukel'leacha mukhar ubhim ravon zor ami masam pokvanam khamvchak festa mhonntamv tor hea somsarant ’kheast’ mhollear kitem? ami khomvcha masa pokvanantlem kaim il'lem tea bhukel'leank dil'lem tor?
Amcha gamvamni kitlexeant gordonacho gotto korunk tank na, konnak rat-dis kam' korn vell mellana tor konnak hem osadhy. Konnak sarkem nesonk sadhy na ascha sondorbhar notalanchem fest zamv her koslem-i fest zamv kosolench forok disana - kiteak hea khonchai festamni tancha jinnyent kosolich bodlaunn yena.
Amcha gamvcha vhoddlea vhoddlea firgojemni krismos gotteak hozaramni kiteak lakhamni soit khorchunk pattim vochanant - techch duddvant dubllea furgojentlea eka nirgotikak pakem ubhem zainangi? vhoddlea firgojecha eka misacha ijmolant hozaramni zomtat - itle poixe thoddea firgojent moineant soit zomanant. Tor amim amchem kuttam', amchim soirim, amchi firgoz matr mholl'llem sonkirnn chintap kednam moddn amche bhomvarim ek nodor bhomvddaunko soktamv?
Niz notalancho motlob hochch - dubllikai, lhanvikai ani mayamog. Jednam poryant hem amim korunk sokanamv tedoll poryant ami achoronn korcha festant jezuchi kirt nhoim bogar tacher khellkullam kortamv, don hozar vorsadhim tacher thukl'lea zudevank ani amkam osoloch forok na. Amim-i fokot't tea farijevamporim borem nesap neson misak vetamv ani amcho dobazo gazoitamv ani sokkodd asony bhitorle bhitor ami pokoll. Nesap asa tory nagdde, khaunko asa tory bhukel'le, duddu asa tory ami gorib.
"Amcha jinnyent porivorton gorz" mholl'lle vorangottle xermamv amim aikon aikon amche kan dadd'dd zaleat khorem. Punn amchem koxedd'dy dadd'dd zalam? borem eka disa hi bodlaunn sadhy na, bodlaunn zalear heram piso mhonnonk asat mholl'llem bhyem amkam dhosta. Amkam amcher amcheaki chodd heranchi bhirant.
Atam vorsan voros yemvcheporim novem voros ailam - hea vorsa opunn opnnacheo korneo khonddit kortolom - punn tachesovem ek nirdhar bhovo gorjecho ani korunk hamv bod'd. Mhojea sobhar dusmanank poiki ekleak hamv kallzathaun bhogsitam, havem dukhoyil'lea sobharam poiki ekleak punnim vochon kallzathaun mafi magtam. Havem achoronnak khorchuncha hozaramni thodde rupoi uroun hamv firgojecha goribank pamvomvchak vaur korcha sam. Vixent paul sobhek dhaddtam.
Oxem kelear matr bhouxa notalam festacha ani novea vorsacha hea bhagi sondorbhar jezu amcha jinnyent yet.
Tor hi ’jezugiri’chi survat amchethaun amcha koxedd'dak khal zaun koryangi?
Konnak punnim atam onyek soval dhostelem ’koxedd'd mhollear kitem?’
Dev Borem Korum,
- Valley Quadros, Ajekar
