"Jinnyek sufoll korchem sutr - herank ami kitlem somzoleamv mholl'lleacher nhoim, bogar amkam ami kitlem somzoleamv"
Amche Songh-Somsthe Ani Ami!
Voros : 2006
Moino : December
Ailevar kuveyttak bhett diunko ayil'lea melki hospettak (Ma|V.J.Menezes-ank) ami amcha kovitagoxttik amontrit korun sonman kel'leavellar tannem ucharl'lim thoddim utram khorinch zaun kallzantlim mhonnchant kaim dubhavo na. Ojik tis ani so vorsandhim bombomyt hachea mukhelponnakhal ghoddl'lea ’Somaz Sudharonn’ songhachi survat kortana hachea motint asl'lem chintap nizaikyi mandhche tosolem. Ho ek konknni boroupi, yazoki dikxa ghetl'lo ek devacho seuk punn monxeacha mogan toulolo ek zovabdharecho sahiti mhonnchant kosoloch dubhavo na.
Songh somsthe amkam nove nhoim, protyek zaun porgamvchank - konnak gorjek ani konnak morjek tor thoddeank khorjek. Konnak oplem bollkem bhorunk ek veustit vedi tor ani konnak heram mukhar oplem xenkarem fulounko ek madhyom'. Hanga sobhar turupache ekke - konnak ’konknni’ turupacho ekko tor konnak firgojecho mog ani konnak dublleancho mog. Ani veustit ritin cholcho ho sorkos ami sodam-i polletamv. Punn khonchoi somstho hea ’somaz sudharonn’ songhachem preronn gheun kaim kel'lem asa? amkam ek rupoi dan diunko char mittingam apounko asat, potramni/saittamni vordi dhaddunk asat ani gamvchank amchem vhoddponn (??) gazounko asa - ani mon zatana ami kel'lea nisvarthi sevekhatir man gheunko asa... Vha! kitle bhagi ami nhoimgi?
hamv songh somstheank virodh bhilkul nhoim. Punn mhojem soval fokot ek - bhovo lhanxem - ’amkam nizaikyi heranchem boremponn korunk mon asa?’ - asa tor asche aukas dharall. Amcha somajent thoraull gorzamni aschim sobhar asat, konnachem ghor hulpalam, konnachem ghor portalam. Konnacha ghorant praivont piddestam, ani konnacha burgeank xikap na, ani konnak nesonk borem vostur nam. Itlench kiteak konnacha ghorant borim aidanam sodd - xizounko ek mutt tandull soit haddunk disbhor thoim hanga kot'te chakri korizai poddta. Sanga - him konnachim soirim? hanchi mozot korchi konnem? borem! amkam osoleank sodhun vochonk sadhy na - bhovo borem.
Sion axromant kitlexim piddestam jieun asat? tanka odhar diveam. Chodd kiteak? choddaut firgojemni osolim kamam sam|vixent paul sobhechim kortat, dekhun tankam kumok koryam. Punn amkam layikancher bhorvoso na? borem! amcha somajent osoleank adhar ditelim zaitim dhorm' bhavo-bhoinnim asat nhoimgi? modor terezachem axromant got adhar natl'lim zaitim bhurgim asat, manosik vikasonak pavonk natl'leank xikap dimvcha orunnodoi tosolea iskolank ami kumok koryet nhoimgi? konn sangta ’amkam khonchyai somstheacha � va hud'dedaramni matr kumok korizai xivai sadeamni nhoim’?
’Tor heranchem boremponn korunk kosoleach songh somstheachi onivaryota na mholl'llem nighontt nhoimgi?’ - ho! visralom! oxem kelear konne tosvir kaddchi? konne vordi boromvchi? konne chhapchi? osoli vordi chhapta konn? nhoimgi? vordi chhapunkyi lokancho zomo gorjecho xivai zomatecho mull irado kosoloi asom tem poddonk na. Pott'ttu bamyt poddlelea eklea nirgotikak voir kaddlear ti vordi zaina - bogar vis-ponchvis ekttam-i zaun kaim partti-piknik kelear ti bhovo vhodd (Exclusive report) vordi.
Amim progotecha daulent chomkon asamv, uddkannam ghalun asamv - punn amchem chintap disan dis kitlem oxir ani kill zaun yeta nhoimgi? amkam piknikam zai - vatter veteleank, got-mot natleleank voddn vorun aminch vhoddle mhonn xenkarem fulounko zai. Amkam heramni fulam ghalunk zai, amkam vijitting karddam chhapunk zai ani tantum amcha mohan korneanchi pott'tti asonk zai. Amkam heramni vakhonn'nnunk zai. Ani hea khatir kosolo ddong korunkyi ami toyar. Amchelagim sorv hikmoteo asat, konnak kedalla ani koxem vaparchem? sogllem amkam kollit asa - kiteak ami hea ’dondheant’ mahir. Amcha vatter khantte ghalteleank koxem tanchem namv padd korchem? pokoll namvamni koxem tancher ked uddomvcho? koxem tankam thondd korchem - soglleo vidhea amkam yetat, amim koiramni gamvchim bhageuntam dekhun mazar dolle dhampun dud pietana somsar apnnak pollena mhonn chintcheporim amim bhageuntancho ves ghalun jietamv! vha! kitlim bhageuntam - lusiferak soit lojek ghalchim!!
Itloch nhoim - amkam achoronn korunky asa, amcho somstho kaim tin kasank upkarchim kamam korinatlearyi vhodd na - punn amkam panch vorsanchem, dha vorsanchem achoronn bhovo gorjechem. Porot vordeo yeunko osat - gamvant gazounko asa, apli podvi pacharunk asa - kiteak ami mohan. Punn hea panch-dha vorsamni kel'lea nalisayent herank zal'lea bhongostollak konn somzonk sokat?
Zori tori borem kam' korcho khoro irado aslear itlim songhottonam-somsthe nizaikyi gorz? ani itlea songhottonank ekameka kitlo boro ekvott asa? haka polletana taka zainam, taka polletana haka zainam, hanchemodhem kusatt spordho ani nalisai. Fokot't voir yeunko zai - dekhun kurleamporim konna konnacha hordhear pam-i dourun toryi voir ailear zalem. Hanche modhem thodde, ascha kodvollant nhamvn dhuvn aschem onikyi ghann korn oplim kamam koromvche kutontri - vha! hacheakyi dusrem yemkondd asot?
Songh somstheant asteleamni jednam pieunko ek thembo nis vicharteleak to thembo nis dimvchadhim dha zomateo gorjecheo tor osole songh-somstheank favo zal'legi mholl'llem vhoddlem soval. Amcha songhan hem kelam tem kelam mholl'lli boddai ucharcheadhim poilem opnnan oplea tankichem kitem kelam mholl'llem opnnak vicharl'lem tor?
Krismasacho kall aila - kristacho uddas kaddcho ek sondorbh. Krist somsarak rochl'lea devacho put toryi hea somsarant taka zolmonk zokti suvat nastam gorvancha gotteant got adhar natleleamporim zolmon ayil'leacho mohotv kosolo? krismos fokot't ek dobazo korn ghetl'leamni hem soval korchem bhovo gorjechem - amchean heranchem boremponn sadhygi?.
Heranchem boremponn mhollear kitem? herank ravonk rauller bhandhun dimvchem, herank bhomvonk ghoddea gaddi dimvchi va herank nesonk sutt-butt dimvchench nhoim. Poilem opunn herancha gorzank kitlem aikotam mholl'llem.
Punn tacheadhim utt'ta vhoddlem soval - heranchi gorz aikonk pamvche amche kan ugte aslear nhoimve?
Dev Borem Korum,
- Valley Quadros, Ajekar
