"jinnyek sufoll korchem sutr - herank ami kitlem somzoleamv mholl'lleacher nhoim, bogar amkam ami kitlem somzoleamv"
Osturi-ank Nyai Mell'llo?
Voros : 2006
Moino : Novembor
Okhkhea bharot dexacha lokacha angachi lomv ubhi kel'lea ghodditam poiki don ghodditanchem foisol korttan dilench! ek - priyodorxini mott'ttuk jivexim marl'leacher tor onyek grem' sttreyn ani tacham bhurgeank jivench hulpayil'lea dara singhak tannem manddl'lea her opradham poiki ekak. Hechchporim jessika lal hicha khunyegarak porot xikxa labhchar asa ani veginch hachem foisoly kortt dimvchar asa. Oxem mhonntoch amcha dexant striyank man mell'llo ani zokto nyai mell'llo mhonn zalem?
Ek ghorannem ubhem korchant zamv, ek kuttam' sambhallcheant zamv, koxtta sonkoxttancha disamni zamv somsarak fudd korchant striyamni mohotvacho patr ghetla mholl'llem oputt sot konny negar korichona. Hanga xekddea xekddeamni bodlon ayil'lea somsarant ti stri ozun ek dhuv, ixttinn, bhoinn, bail, auy, aji zaun vevegllea ritir kuttmacha vojeak khand marta. Ghovo bebdo zaun aplea zovabdhare thaun chukari marn dhamvonk sokta punn ek stri - oplea bhurgeam khatir horyeka riticho sakrifis korunk kedinch pattim sorana mholl'llem oputt sot zaunasa. Ani haka choritrach rujvat dita.
Pattlea dha vorsamni amcha dexant osoleo thoddeo songteo ghoddleat mhollear somsaracha khonchyai dexa mukhar amkam lojek ghalche tosoleo. Konne oplea bailen jivxim marn kuddke kuddke korn tondurint bhajlem. Konne dhormacha namvan nidl'lea nennari bhurgeank jivench laslem. Dhormacha namvan bhurgim bailank ghora bhitor kuddaun tankam ghorasomet hulpailim. Ani amim mongllurgaramni amcha gamvant osolem kaim zaunko na mhonn mixio vollaunko chintcha ghoddye ailevar zal'lim dhormachim onahutam mixio vollamvchem sodd - mixio tasche tosolim. Kiteak amcha dexant amkam svatontr asa - kitem-i ulounko, kitem-i korunk, koxem-i jieunko. Amcha dexache kanun lakhamni astit punn te lagu zamvchem konnak? ani koxe? kanunam jitlim asat tantlem suttounko vidhanam-i titlinch. Bholl aschanchench ozun bollkem, kiteak amcha dexant xembhor opradhim poiki soglle xembhor sutt'tit zalearyi vhodd nhoim, punn eka niropradhik xikxa labhanaye mholl'llem amcha somvidhanachem mull totv.
Bhirankull kriteank hokigot dil'leank soit zaite rakonn bhoddve - kednam dhormachem nib, kednam paddtichem nib ani kednam her nibam modhem porot porot oddchota matr ’monxaponn’. Hangasory osolim kriteam korchank techchporim xikxa laizai mhonnche sobhar. Hechch karonnank lagon ek pauttim nirapradhi mholl'llem korttachem tirp aikal'le guneamvkarank soit porot kuddaun tancher guneamv manddchar asa. Jessika lal zamv, va korim' lal telgi zamv..
Namvadd'dik zoil/polis odhikarinn kironn beddi hea vadak matxem vegllem sangta - "monis soitani korneo korta tor taka faxi ekch vatt nhoim, bogar tachebhitor ascha monxak zagomvchench borem". Ani hea vadak pattimbo dimvchi zaitim songhottonam asat. Ani osolea songhottonamni edollch zaitim borim kamam keleant ani zor az bholl ason guneamv adharn kanuna thaun suttka zoddleleank porot dhorn kanuna hujrim haddlam tory osoleach songhottonamni ani madhyomani mholl'llem visronaye. Punn hangasor porot utt'ta tench soval;
Amcha dexant striyank man/nyai mell'llo??
Hem soval amim amkam poilem kelem tor bhovo borem!!
Aicha disa zor amcha ghoramni, amcha sezara, amcha gamvant nodor bhomvddaili tor kitem polleunko mellta? mamv aplea sunecher, bapui aplea dhuvecher opradh manddta, ghorcha vonnodeamni porot porot addaunko ayil'lea/yemvcha bailancha kuddichem rogat usallta. Tichch khinkratt aikota ani hi konnacheach kanank pavana. Dadlo kamak veta, zoddta. Hafteacha choddaut disamni to ghollta tor bail? tika eka sokallim utton tichem kam' suru zata aplea potichi, aplea bhurgeanchi chakri korn, tancha pottak jevann korunk, tanchi mhelli mustaiki nitoll korunk, randunk mhonntana ratichem nidonk veta mhonnasor tika hea kamathaun suttka na. Ham! hika hafteacho rojecho dis mhonn na! hafteak sodd - vorsak ek dis soit rojecho mhonn na. Hika ourttaim' na, bonos na - vorsak kiteak jinnyent ek dis punnim rojecho mhonn na. Tor osolea striyenk somajent zulum' sosunk matr zolmailam?
Voir ul'lek kel'lea don ghodditamni kaim korttan guneamvkarank xikxa dili va dimvchear asa punn hea khatir tea kuttmachamni kaddl'li vamvtt kitli? vhalloyil'lo duddu kitlo? nid nastam khorchil'leo rati kitleo? tor guneamvkarank tancher guneamv ruzu korunk dubllea daktteank kitem korunk poddtelem? hea amcha ghorantlea, amcha sezarcha, amcha gamvcha striyanchi bob konnak aikota?
Hea sorv sovalam modhem utton rauta onyek soval - ’aikolearyi konnak fikir asa?!’
Dev Borem Korum,
- Valley Quadros, Ajekar
