"जिण्येक सुफळ कर्चें सूत्र - हेरांक आमी कितलें समजल्यांव म्हळ्ळ्याचेर न्हंय, बगार आमकां आमी कितलें समजल्यांव"
स्त्रीयांक न्याय मेळ्ळो?
वरस : २००६
मयनो : नवेंबर
अख्ख्या भारत देशाचा लोकाचा आंगाची लोंव उभी केल्ल्या घडितां पयकी दोन घडितांचें फयसल कोर्टान दिलेंच! एक - प्रियदर्शिनी मट्टूक जिवेशीं मारल्ल्याचेर तर अन्येक ग्रेम स्ट्रेयन आनी ताचां भुर्ग्यांक जिवेंच हुल्पायिल्ल्या दारा सिंघाक ताणें मांडल्ल्या हेर अपराधां पयकी एकाक. हेच्चपरीं जेस्सिका लाल हिचा खुन्येगाराक परत शिक्षा लाभचार आसा आनी वेगिंच हाचें फयसलय कोर्ट दिंवचार आसा. अशें म्हणतच आमचा देशांत स्त्रीयांक मान मेळ्ळो आनी जोक्तो न्याय मेळ्ळो म्हण जालें?
एक घराणें उभें कर्चांत जांव, एक कुटाम सांभाळच्यांत जांव, कश्टा संकषटांचा दिसांनी जांव संसाराक फूड कर्चांत स्त्रीयांनी महत्वाचो पात्र घेतला म्हळ्ळें अपूट सत कोणय नेगार करिचोना. हांगा शेकड्या शेकड्यांनी बदलोन आयिल्ल्या संसारांत ती स्त्री अजून एक धूव, इश्टीण, भयण, बायल, आवय, आजी जावन वेवेगळ्या रितीर कुटमाचा वोज्याक खांद मार्ता. घोव बेब्दो जावन आपल्या जवाब्धारे थावन चुकारी मार्न धांवोंक सक्ता पूण एक स्त्री - अपल्या भुर्ग्यां खातीर हरयेका रितिचो साक्रिफीस करुंक केदिंच पाटीं सराना म्हळ्ळें अपूट सत जावनासा. आनी हाका चरित्राच रुज्वात दिता.
पाटल्या धा वर्सांनी आमचा देशांत असल्यो थोड्यो संग्त्यो घडल्यात म्हळ्यार संसाराचा खंच्याय देशा मुखार आमकां लजेक घाल्चे तसल्यो. कोणे अपल्या बायलेन जिवशीं मार्न कुडके कुडके कर्न तंदूरिंत भाजलें. कोणे धर्माचा नांवान नीदल्ल्या नेणारी भुर्ग्यांक जिवेंच लासलें. धर्माचा नांवान भुर्गीं बायलांक घरा भितर कुडावन तांकां घरासमेत हुल्पायलीं. आनी आमीं मंगळूरगारांनी आमचा गांवांत असलें कांय जावंक ना म्हण मिशियो वोळावंक चिंतचा घड्ये आयलेवार जाल्लीं धर्माचीं अनाहुतां मिशियो वोळांवचें सोड - मिशियो तासचे तसलीं. कित्याक आमचा देशांत आमकां स्वातंत्र आसा - कितेंय उलवंक, कितेंय करुंक, कशेंय जियेवंक. आमचा देशाचे कानून लाखांनी आसतीत पूण ते लागू जांवचें कोणाक? आनी कशे? कानुनां जितलीं आसात तांतलें सुटवंक विधानांय तितलिंच. भळ आसचांचेंच अजून बोळकें, कित्याक आमचा देशांत शेंभोर अपराधीं पयकी सगळे शेंभोर सुटतीत जाल्यारयी व्हड न्हंय, पूण एका निरपराधीक शिक्षा लाभानाये म्हळ्ळें आमचा संविधानाचें मूळ तत्व.
भिरांकूळ कृत्यांक हकीगत दिल्ल्यांक सयत जायते राकण भडवे - केदनां धर्माचें नीब, केदनां पाडतिचें नीब आनी केदनां हेर निबां मधें परत परत अडचता मात्र ’मनशापण’. हांगासरय असलीं कृत्यां कर्चांक तेच्चपरीं शिक्षा लायजाय म्हणचे सभार. हेच्च कारणांक लागोन एक पावटीं निरापराधी म्हळ्ळें कोर्टाचें तीर्प आयकाल्ले गुन्यांवकारांक सयत परत कुडावन तांचेर गुन्यांव मांडचार आसा. जेस्सिका लाल जांव, वा करीम लाल तेल्गी जांव..
नांवाडदीक जयल/पोलीस अधिकारीण किरण बेडी ह्या वादाक मातशें वेगळें सांग्ता - "मनीस सयतानी कर्न्यो कर्ता तर ताका फाशी एकच वाट न्हंय, बगार ताचेभितर आसचा मनशाक जागंवचेंच बरें". आनी ह्या वादाक पाटिंबो दिंवची जायतीं संघटनां आसात. आनी असल्या संघटनांनी एदोळच जायतीं बरीं कामां केल्यांत आनी जर आज भळ आसोन गुन्यांव आधार्न कानुना थावन सुटका जोडलेल्यांक परत धर्न कानुना हुज्रीं हाडलां तरय असल्याच संघटनांनी आनी माध्यमानी म्हळ्ळें विस्रनाये. पूण हांगासर परत उटता तेंच सवाल;
आमचा देशांत स्त्रीयांक मान/न्याय मेळ्ळो??
हें सवाल आमीं आमकां पयलें केलें तर भोव बरें!!
आयचा दिसा जर आमचा घरांनी, आमचा सेजारा, आमचा गांवांत नदर भंवडायली तर कितें पळेवंक मेळता? मांव आपल्या सुनेचेर, बापूय आपल्या धुवेचेर अपराध मांडता, घर्चा वोणद्यांनी परत परत आडावंक आयिल्ल्या/येंवचा बायलांचा कुडिचें रगात उसाळता. तिच्च खिंक्राट आयकता आनी ही कोणाच्याच कानांक पावाना. दादलो कामाक वेता, जोडता. हाफ्त्याचा चडावत दिसांनी तो घोळता तर बायल? तिका एका सकाळीं उटोन तिचें काम सुरू जाता आपल्या पतिची, आपल्या भुर्ग्यांची चाक्री कर्न, तांचा पोटाक जेवाण करुंक, तांची म्हेळी मुसतायकी नितळ करुंक, रांदुंक म्हणताना रातिचें निदोंक वेता म्हणासर तिका ह्या कामाथावन सुटका ना. हां! हिका हाफ्त्याचो रजेचो दीस म्हण ना! हाफ्त्याक सोड - वर्साक एक दीस सयत रजेचो म्हण ना. हिका ओवरटायम ना, बोनस ना - वर्साक कित्याक जिण्येंत एक दीस पुणीं रजेचो म्हण ना. तर असल्या स्त्रीयेंक समाजेंत जुलूम सोसुंक मात्र जल्मायलां?
वयर उल्लेक केल्ल्या दोन घडितांनी कांय कोर्टान गुन्यांवकारांक शिक्षा दिली वा दिंवच्यार आसा पूण ह्या खातीर त्या कुटमाचांनी काडल्ली वांवट कितली? व्हाळयिल्लो दुडू कितलो? नीद नासतां खर्चिल्ल्यो राती कितल्यो? तर गुन्यांवकारांक तांचेर गुन्यांव रुजू करुंक दुबळ्या दाकट्यांक कितें करुंक पडतेलें? ह्या आमचा घरांतल्या, आमचा सेजार्चा, आमचा गांवचा स्त्रीयांची बोब कोणाक आयकता?
ह्या सर्व सवालां मधें उटोन रावता अन्येक सवाल - ’आयकल्यारयी कोणाक फिकीर आसा?!’
देव बरें करूं,
- वल्ली क्वाड्रस, अजेकार
