’Jinnyent Amim Nizaiki Axemvcheo Vostu Khonddit Zaun Boutik Nhoim’
Amim Khoim Asamv..?
Voros : 2006
Moino : July
Somsar progtecha paulamni dhamvon asa.
Az amchelagim boutik sukhacheo songteo soglleo asat - kar, bonglo, vevegollem nesap, somajent protixotta, kam', hud'do, ontosot ani beankamni punzaun dourololo duddu. Punn itlem sorv asonyo zor amim amcha ontosokrnak soval kelem;
"amchelagim somdhan asa? amim khorench sukhigi?"
Tor khonddit zaun koplar mirio poddtit, mot chintchem rauyt, kalliz uddchem rauyt punn sovalak zap labhchina. Zapcho natlear labhchi toryo koxi?
Az monis mit natlelea vegan, kollit natl'lea xevotta teuxin dhamvon asa. Kiteak mholl'llem khud'd tochch nennam toryo dhamvnni hanga kodd'ddayechi zaun kelea. Ravol'lo monis sompta dekhun dhamvnni.. Dhamvnni... Dhamvnni....
Hea dhamvnnent monis monxaponnachim molam visrola, sombondh visrola, sot-nit visrola, oplea sezaryak matr nhoim sobhar pauttim oplebhitor opunn'nch porkiso zala. Hea porigotent niz zaun monis dhobhivaleacha petteaporim zala - nhoim ghorcho, nhoim dhobicho.
Disandis sonkirnno zatechch ascha monxa chintpant khorench zaun monis chintunk vechaki moronk vechem posond korunk lagla. Hi progti? hi bodlaunn? hem bodlcha somsarachim khunnam? kalladhim hichch porza koxi asl'li? ek kuttam' koxem jietalem? ek firgoz somaz koxi asl'li? koslo to mayamog? koslim tim sombondhim mouleam, koslim tim kuttmachim mouleam?
Ekleachem borem falem zatana tacha sezarche matr nhoim sogllea vaddeache zomtale, firgoz somaz melltali. Firgojent ek morn zalem tor firgoz kuttam' ekouttotalem, konn fondd khonddtalo, konn mornachi pett sangtalo, konn mornachi gaddi sangtalo ani konn firgejeamni khobar ditalo. Boryant toxem vaittant sangat ditali. Tednam dubllikai zorur asl'li, punn mayamog asl'lo. Ekamekacho husko asl'lo, ekameka adhar dimvchem kalliz asl'lem. Firgoz kuttma thaun kazar zaun bhair vechem cheddum sogllea firgoz kuttmachancha dolleamni udka thembe udexem kortale.
Porgamvoche konnyo gamvak yetechch vechik putan pattim portol'leporim firgoz somaz titleach mayamogan melltali, suk-duk vanttun ghetali. Porgamvak pattim vecheadhim amcha ghora ek ghoddi bhett di mhonn add'dos magtalim. Him sorv mhoza bhurgeaponnachim pinturam..
Punn azkal yemvcha hafteant kazar toryo koslich gouz na, konnakcho koslechch tras nant, kazara disa igrjent ghantti vajteleo, vellar mis zatelem, misak char-panch boddam astit, uprant hottelamni risepoxon, kazarak ayil'lo konn oplo konn pelo mholl'llem konnakcho poddon vochonk na. Kan futt'ttasor avaz, pott futt'ttasor jeunk ani gollo futt'ttasor pieunk ani penkddachi khill chukta mhonnasor mankddanach. Konnak poddon gelam dadlo konnacho bail konnachi dhuv konnachi va auy konnachi mholl'llem? monischo ek monzat zal'lea hea ghoddye thoddeach voramni sogllem tirsalem.. Kazar zaun moinea bhitor ddoivors zait, vo konn konnak dourun ghet tem kitem-i ghoddonk sadhy..
Kuttma ekoutt fasall'lla, firgojeamni porgamvochank uzo lai, gamvchech ople konn pele konn mholl'llem poddon vochonk na. Mis zatechch konnachim baikam ani konnachim karam chalu zalinch sorvankyo amim vhoddlim/unchlim mhonn dhakomvcho horbhos. Monis monxak porkiso zala. Firgoz somaz soddeam, kuttmachem borem falem zatana hazor zaunk kuttmacha sandeak naka zalam. Konnakyo bagvonk naka.
Az monis xikpi zala, tachelagim poixe asat, monxasktechi taka gorz na.
Dakddeadhim eka xibhiravellar mhoza mitran sangl'lem ek utar uddasak yeta; "gamvant aur yetana kodvoll udak sorv opnnasovem vhallon vortana vhodd vhodd ruk zhoddank soit portun veta punn lhan lhan zhoddam matr vanchon urtat koxi?" anim tachi zapyo tochch dita;
"kiteak mhollear ruk bagvonk nennant, zhoddam bagvonk zannant"
monis opnnan khonddl'lea fonddak opnnan'nch poddazoi zal'lea hea porigotechi boli zaun jiemvcho monis sorv thorancha piddent volloullota, kuddichi, motichi, kallzachi pidda. Jinnyent sadhy zal'letitolem gollsun okhrek sogllem hogddaun ghetl'lo onbhog. "kitem upkar jinnyent sorv jikon jivo hogddaun?" mholl'lleporim..
Punn hem sorv kiteak ani koxem?
amcho purvoz oxikopi zaun jiel'lo, disak ek jevann soit kosttanchem zal'li porigot pollel'lo. Sogllo dis thoim hanga kot'te chakri korun oplea burgeank vhodda koxttamni tannim vhodd kelam. Fuddle disamni hannim kaddl'lea vamvtticho foll mellonk laglo, putan oplea bhurgeank tannim opnnan koxtt kaddl'leprim koxtt kaddinaye mhonnon borem xikap dilem, zai zal'lem sorv dilem. Adhunik ritichem sogllem dilem, nesap, xikap, duddu....
Ani him bhurgim vhodda mojen vhodd zalim. Tankam sogllem mell'llem punn kuttmachim molam mell'llimnant, ixtt mell'lle punn sombondhachim molam koll'llimnant, sonod mell'lli punn xikap mell'llemna, duddu mell'llo punn sukh mell'llemna. Dekhun sorv thorancheo soveo, amal pionnem, ddrogos.. Ani pidda.. Auy bapuy oplea burgeank boro fuddar labhlo tor amcha purvojeamni kaddl'le koxtt amcha pillgek yenatlear puro mholl'llim sorv svopnnam hulpaun, prayesot auy bapam-i vorn axreant ghalon tim golfak, omerika, asttrelia, kendda vo yu.Kent opli jinni sarunk gelim.
Voir votl'lem udak eka disa punnim sokla demvtach - somsari douloten uddi marchim eka disa dhornnir ople pam-i dourtelinch. Punn tea disavixim matr konnakcho chintunk naka. Amkam siriyls asat, amkam inttornett asa, amkam piknikam, partteo, gom'motam asat, amkam festam asat, amkam gom'mot korunk asa.. Amkam vell na... Dekhun amkam sogllem lekachem. Lekachem magnnem, lekacho ters, lekachem mis.
Punn ozun bhovo oprupayen toryi thoddekodde amcho thoddo lok, zamv dubllo - punn amcha somsokritek ozun zogsannen sambhallun asa, oplea burgeank techch porim mayamogan vhaddoita, tichch devo bhirant, monxa bhirant, koxtt oplea bhurgeank xikoita.. Boro dotor, boro ijner, boro vokil vo boro .. Magir zaya, punn poilem.. Boro monis zaya mholl'llem lisamv opurbhayen him pachartat.
Hanchim konnakyo vollok ascheporim na. Kiteak hancheo tosviryo potramni-saittamni yenant, hankam somajent kaim sthan-man na. Hancha ghoramni kolu asonk puro. Hennem tennenchem rinn asonk puro.. Him mitt mirsangent jeutit, hanchelagim friz zamv, esi zamv, fean zamv aschem na.. Bhouxa igrjechem onvol dimvchi tankyo asot mhonn hamv patyena. Punn kaim asot tor bhorpur mayamog, xegunn, khaltemponn, ani monxaponnachim mouleam..
Amim khoim asamv mhonn ek ghoddi chinteangi?
Dev Borem Korum,
- Valley Quadros, Ajekar
