’jinnyent kitem gollsilam tem promukh nhoi, bogar jye kitem gollsilam tantum kitlo jivo bhorla tem promukh’

Aicho Dis Subhagi Dis

de16

Voros : 2005

Moino: October

Konkonni thoim mogachamno,

Aicho dis mhoza jinnyent edoll udeun ayil'lea subhagi disampoiki ek mhonn mhojem kalliz-koxedd'd opun gheta. Bhurgeaponnar khoincha konknni suputrancha vevegllea prokarachem sahity vachun hamv vhodd zal'longi, az tanchesovem vedicher ubhom asam, tem-i ek boroupi zavun mhonntana mhoza kallzacha uddkecho khorokhor ondaz tumim kor‍yeta. Ani tea khatir sorvespor devacho upkar hamv bavuddtam.

Sahity mhollear kitem?

Somajek kitem zai tench dimvchaki, oplea koxedd'dak khal zal'lem pramannik borap opunn kitlem diunko soktam? anim soktam tor mhojeprokar tench khorem sahity. Sahity ek misamv, sahity ek zovabdhari, sahity ek poinn. Anim hea poinnant ek sahiti zaun fokot't diunko astelem xivai gheunko nhoi. Fokot't mukhar opli vatt dhorun cholonk astelem xivai opnnan chol‌l'li vatt pattim pollemvchi nhoi.

Az konknni sahity mhollear somajent othvoch vorg zaun rutam zala, sahity fokot't ekameka khoddi kaddchem madhyom' zalam, poiloch unno zaun yemvcho ekvott disan‌dis bigddon gela, az konknni konnakonnacha turupacho ekko zala ani konnem-i koxem-i khellyet mholl'lleporim zal'lea vogtam ’birudo’ ’puroskar’ fokot bazari zaun ayil'lea hea kallar amchebhitor poilem aminch niz konknni spiritak sodhunk disak chachar dive pettoun sodhizai poddlam. Boroupeanchi ekamekamodhli monogot bodol'lea, spordheacho khoro motlob bodlon konknnechaki vekti promukh zaunko lagla. Lipi, boliamni boroupeank kott‌putlleo keleat anim amchoch tomaso aminch polleunko poddlam. Konknnekhatir vaur korcha iradeache songh-somsthe opaple dorech ubhar korchar poddleat. Heramni korcha bor‍ya kamank vollkomvchi dixtt kudd'ddi zalea.

Maf kora mhozo irado konnaik‌y protyokx ritin zamv va porokx ritin zamv khonkcho va topcho nhoi, hem mhoza motin somzal'lim sotam. Zaunko puro hamv sobhar‌kodde fotton poddlam. Konknnekhatir tokli bagaunko konnak‌ch naka zal'lea hea porigotent konknnent sahity roschem dhoir ya pisai aschank ’piso’ nastana her khoinchem namv sobhot?

tor‌y amcha konknnent ozun zhuzari asat tench somodhan! tim zhuzari ozun konknnekhatir jietat anim zhuz manddtat. Mhojemukhar lisamvam xikonk zaitim lisamvam asat, konknni sahity rochun got adhor nastana, oplea baile-burgeank poschi got nastana, vik gheun moronk vik ghemvchi tank‌y nastana dis lott‌l'le sahiti zamv, bukanchi porgottnni korun hat matr nhoi soglli jinninch hulpon kanngel'le porgottnnar zamv konknni potrikodhyomant oplem auk, somodhan, ast zhoroyil'le zamv.

Zaitea malghoddea sahitimni mhaka mogan heavixim somzailam, somzaitat tor‌y mhoji mot tem sot opun gheunko kobul asa tor‌yi mhojem kalliz kiteak‌gi kobul na. Tachemodhem adhurinch ubhim aschim sovalam. Hea odhur‍ya sovalam modhem soit bhor‍voxeacha paulamni cholchem kam' aminch korunk asa. Hem zor tumkam niras‌vad mhonn bhogta tor mhaf kora, kiteak niras‌vad pacharchem axavadi prokaxonak ek guneamv, konknnent edoll nat‌l'lem kiteak nam mhonn fokot't soval korunk hamv vochana, bogar opunn zaun korunk preton kortam.

Hamv kitem kortam? kiteak kortam? mholl'llem havem somsarak ruzu korizai mhonn na, fokot oplea ontoskornak sori zalem tor zalem. Sahity mhojeprokar ek zovabdhari xivai her kitench nhoi. Anim hem mhojem chintap hea dixen vallonk zaitea mhoza sahitik mitramni protyokx ya porokx ritin mhojer probhavo ghala anim tanchoi hamv az upkar bauddunk favo;

Koxem visrom kevin ddi’mel'losovem disangottlean kel'lea sahitik somvadak? koxem visrom ponchu bonttvallasovem, mouris xantipurosovem khorchil'lea zaitea sahitik ghoddiank? koxem visrom anddru ddi’kunhacha sahitik zotnek? koxem visrom echchemacha vicharank? koxem visrom ddolfi kassian dil'lea ut'tezonak? koxem onupkari zamv hamv ovil roskinhak?

Itlench nhoi, koxem visrom ’tum boro za’ mholl'llea ettyelak? va ’bhangar monis cha.Frak?’, koxem visrom konknni sahiteacho chokrourti ’vasu’ cha kanneank? koxem visrom virocha ’rogtacha bobattek?’ koxem visrom herolpiyusak? sirivontacha sallkak? ddolfi kassiacha punovek? jeri kulxekoracha ’ghorcha diveak?’ koxem visrom vilficha talleak ani podank?

Hea sorvamni mhojer, mhoza chintpacher, mhoza vicharancher ek nhoi ek ritin probhavo ghala anim mhoza kallzant zor konknnechem bhim vaddta tor tem osoleach probhavant mhonn porgott korunk mhoka obhiman bhogta. Hea probhavant vellakallacho vanttoi vixes asa. Vellakallan‌y mhoka zaitem xikoilam.

Konknnent zor itlem sorv havem zoddlam tor konknnek techch‌porim dimvchem-i kam' mhojem. Mhojem falem hamv nennam dekun aicha disa mhaka il'lem kam' korunk asa, jem konknnek upkarak poddchem. Hench mhojem misamv, jinnyent havem kitlem gollsilam mholl'llem mhaka promukh nhoi, bogar jyem kitem-i gollsilam tantum havem kitlo jivo bhorla tem mhaka promukh. Jinni ek xikchi prokria ani mhojem sahity‌y mhaka xikchi prokria, ji xikon'nch asazoi, xikon'nch asam anim fuddem-i xikon'nch uronk devalagim magtam.

Khaltea nomanasovem,

- Valley Quadros

[September 24 ver mongllurant zal'lea panch bukancha mokllik kar‍yavellar uloyil'lem uloup]