’budhvont lok choritrechem lisamv xikta anim bekuf lok choritrek niallun vogochch rauta’

Aiche Ani Adhle Dis

de14

Voros : 2005

Moino : August

Amim zaitepauttim hem chintlam ya heramni ulomvchem aikolam asyet;

’Kitlo boro as‌l'lo adhlo kall’, aiche dis kitle bhirankull nhoi‌gi?

va ’adhlea kallacha filmantlim podam kitlim opurbhayechim as‌l'lim, atanchim podam bekar..’

Soval hanga adhlem borengi ya atanchem borengi mholl'llem nhoi bogar ek ghoddye adhlea disancho ani atancha disamvixim ek nihall korcho. Aicha disa amim vhodd zaleamv, hea somsaracha riti nemam prokar jieunko lagleamv, borem vaitt vixeant amkam bori mahet asa, ek ghoddi uddas kor‍yam bhurgeaponnar aikal'lea thoddea podam/kontarancho;

’Amorecha vellar.. Amori rozar kor‍yam.. Anzam-bhoddveank sangata gheun.. Moriek nomoskar kor‍yam...’ hem kontar amim bhurgeaponnant sanjer amorechi ghantt vajtoch gaunko as‌l'lem.

’Sokkodd sangata melleam.. Sokkodd lagim sor‍yam....’ hor‍yeka vorsacha monti festacha sondorbhamni gaunko as‌l'lem atam-i gaitat.

Him kontaram aikatastana eka thoracho boro onbhog zamvcho sohoz nhoi‌gi? fokot kontaram kiteak? podanchoi uddas kaddeam;

’Ami dogi sezara vetamv kazarak.. Bail bhurgim tim rosak gelim yeunant tim ghora..’

Vo ’ekkosoko ekkosoko ekkosokkola’ az‌kalcha disamni him podam zamv kontaram zamv asat? asat tor khointor‌yi konnoichim-i noklam kaddunk matr mhonn mhoji obhiprai.

Aicha kallar him podanch asazoi mhonn sangcho mhozo irado nhoi, somsar bodol'la. Adhlea kallachim saikolam atam nant, atam monis gaddiamni bhomvta. Adhlea kallar sezarcha konnaiki apounko ’ku’ mhonn kuvo ghaltalim atam fonacher/mobailacher ek miss‌kal vo essemes korunk soktat. Anim haka progoti vo novemsamv mhonntamv.

Hea adhlea anim atancha disam modhem monis jieta kiteak hea yugam yugamni kitem-i bodlonk nat‌l'lem asa tor ti bhuk, loz anim tan.

Ho moino ogostacho - svatontracho. Anim amkam ascha svatontracho uddas kaddeam;

Az‌kal amcha pelean khonchem khaizoi (gayechem mas khateleank vixvo hindu porixod addaita), khoinchem piezai (skach piemvchem amcha bharoti-i somskritechi rivaz nhoi mhonnta svodexi zagoronn monch), kitem nesazoi (sutt-kott brittixanchi mustaiki mhonnon ar‌esses sangta), kitem uloizai? (ailevar thodde konknni komyunistt/nastik konknni bhasek‌ch nirnam' korizai mhonntat) khoincha bhasent uloizai? (bijepicho ek vantto amcha desant fokot hindi bhas urazoi ani ti hindhustani bhas zaun asazoi mhonnta) khoncha dhorman jiezai? (bharot des hindvancho des mhonnta aresses/bhozorong doll) koxem jiezai? (xiv‌senachamni sangcheprokar febrer chouda tariker premincho dis achoronn korchi rivaz bharoti-i rivaz nhoi) konnachi puza korizai? konnak man dizai mholl'llem soit nirdhar korchem konnengi. Anim sukxm' ritin pollelem tor somsarant zamvchim zhogddim-zhuzam ya monostap hechch karannank lagon. Zamv tem israyel pealestinachem, zamv tem bharot - pakistanachem, zamv tem bharotabhitorlem antorik zhuz.

Atam hench zhuz konknnent udelam - boli-lipiecha rupar. Tor progotecha disamni jeyemvcha hea disamni amim svotontr mhonn uddas kaddcha vellar adhlea disancho uddas kaddlo tor eka ghoddyek tor‌y borench nhoi‌gi?

- Valley Quadros