’tum boro vokil, boro dotor, vo boro ijner za punn poilem boro monis khonddit za’

Kuttam' Anim Kuttmachim Mouleam

de15

Voros : 2005

Moino : September

Ojik sumar chouda vorsandhim ghoddlelem ek ghoddit mhoza moticha podd'dear ozun khonchon aschem zaunasa;

Amcha ojekar firzojent ek pauttim karkoll varaddea hontacho khella spordho asa kel'lo anim tea spordheacho eklo prekxok zaun hamv‌y as‌l'lom. Spordho ascho kiteak? ekamekachim talenta, ekamekachim minot, ekamekachem porixrom' hem sorv mejcho dis, konn hem sorv chodd mapan kel'logi toch jikta.

Hea spordheant nokre firgojechim dogam cheddvam (bhobhoinneo) eka dhamvnnecha spordheant as‌l'lim. Ekli vhodd bhoinn dusri daktti bhoinn. Spordho suru zalo anim thoddea minuttamni okher zamvn yemvcha vellar daktti bhoinn oplea vhodd bhoinnichaki thoddea ontorar mukhar ason jikchar as‌l'li. Punn toxem zalemna, ti rauli anim aplea vhodd bhoinnin dhamvon mukhar yemvchak rakon rauli anim opli bhoinnin hi dhamvnni jikcheporim korilagli ani opunn dusrem sthan gheun dhados zali.

Hem ghoddit uddasak haddtana mhoza motint tea dakttea bhoinnin kel'lea sakrifisacho uddas yeta ani opapench tika favo zal'lo man mhoza kallzant udeun yeta.

Soval hanga konnem kel'lem sarkem konnem kel'lem nhoi mholl'llem nhoi, soval hem-i nhoi ki eka spordheant bhavukponnan/sintimentall zamvchem sarkengi vo nhoi mholl'llem. Bogar koxem ek bhoinn oplea bhoinnicha bhognnank somzonk sokonk sokta mholl'llem.

Monxak oplem ghor‌ch poilem iskol zaunastam, oplea ghoramni je vichar, jim chintnam chintun vhodd zatana, monis borem aschench vinchta.

Hi ek lhan kanni aicha somsarant ghoddcha/ghoddonascha ghodditank ulttich asa nhoi‌gi?

onyek kanni; oplea dogam-i kudd'ddea auy bapamyk oplea khandear bosoun vhauvn vel'lea xrounn kumarachi kannim lhan‌ponnar vach‌l'lo uddas tumkaim astolo mhonn mhojem chintap.

Punn az!

az vell bodol'la, monis bodol'la, vichar bodol'leat, monxachim chintnam bodol'leant monxachi kalet bodol'lea anim sohoz zaun monxache havo-bhavo, jinos, totvam, torkam, jinni soit bodol'lea. Punn vichar korcho tor monis kitlo bodol'lear‌y motin chintchem soddunk‌na, kallzan bhogchem soddunk na, dolleamni dekhchem soddunk‌na.

Monti saibhinnicha festak amim kuttmachem fest mhonntamv anim kuttmacha sandeancho uddas zorur kaddtamv. Aicha kallar eka kuttmache sandech ekamechachim masam khatat opaplea svarthi iradeankhatir toxench apaplim bollkim xizomvchak. Anim hea modhem xrounn‌kumar tosole put vo voir ul'lek kel'li daktti bhoinn aicha somsarant hor‍yeka gamvamni udenant.

Tor kuttmachim molamvixim hor‍yeka kuttman chintchem ovoxy, jednam ek natu, utor‌prayecha ajea-ojiechi chakri korcha oplea auy‌bapamyk polleta tednam to natu kuttmachim molam xikta. Anim him molam kaim khonchai bukamni, iskolamni vo kolejimni xikonk zainant. Ghoram bhandchamni ’ghorannem’ mhollear kitem mholl'llem somzazoi, kuttam' bhandchadhim ’kuttmachim molam’ kosolim mholl'llem somzazoi anim tednam matr hea kuttmacha festak khoro mohotv yetolo.

- vol'li kvaddros