ಆಮಿಂ ಹೆರಾಂಕ್ ವಾಟ್ ದಾಖಂವ್ಚಿ ಏಕ್ ವಾತ್ ಜಾವ್ಯಾಂಗೀ?
ವರಸ್ : 2004
ಮಯ್ನೊ : ಜುಲಾಯ್
ಖಂಯ್ಚೀಯ್ ವಾತ್ ಆಪ್ಣಾಖಾತಿರ್ ಪೆಟಾನಾ, ಖಂಯ್ಚೇಯ್ ಫ಼ುಲ್ ಆಪ್ಣಾಖಾತಿರ್ ಫ಼ುಲಾನಾ. ಹ್ಯಾ ಸಂಸಾರಾಂತ್ ಆಸ್ಚೆಂ ಹರ್ಯೆಕ್ ದೆವಾಚೆಂ ರಚನ್ ತರ್ಯ್ ಹರ್ಯೆಕ್ ಜೀವಿ, ಹರ್ಯೆಕ್ ರಚ್ನಿ ಎಕಾಮೆಕಾ ಖಾತಿರ್ ದೆವಾನ್ ರಚ್ಲಾಂ.
ಸಂಸಾರಾಂತ್ ಆಯ್ಲೆವಾರ್ ಜಾಲ್ಲ್ಯಾ ಯಾ ಜಾವ್ನಾಸ್ಚಾ ಪ್ರಗತೆಂತ್ ಅಂತರ್ಜಾಳ್ ಏಕ್ ಭೋವ್ ಮಹತ್ವಾಚಿ ಪ್ರಗತಿ ಮ್ಹಣ್ಯೆತ್. ಹಾಂತುಂ ಜಾಯ್ತೆಂ ಪಾಡ್ ಘಡ್ಲಾಂಯ್ ಜಾವ್ಯೆತ್ ಪುಣ್ ಜಾಯ್ತೆಂ ಬರೇಂಯ್ ಘಡ್ಲಾಂ ಆನಿಂ ಘಡೊನ್ ಆಸಾ. ಪ್ರತ್ಯೇಕ್ ಜಾವ್ನ್ ಕೊಂಕ್ಣೆಕ್ ಹಿ ಏಕ್; ಬರೆಂಪಣ್ ಕರ್ಚಾಕ್ ಏಕ್ ವಾಟ್ ಕರ್ನ್ ದಿತಾ ಮ್ಹಳ್ಳೆಂ ಖಂಡಿತ್.
ಪೊಟಾಚಾ ಜೊಡಿಖಾತಿರ್ ಆಪ್ಲೊ ಗಾಂವ್ ಸೊಡ್ನ್ ಸಾತ್ ದರ್ಯೆ ಪಯ್ಸ್ ಆಸ್ಲ್ಯಾರ್ ಕಿತೆಂ ಜಾಲೆಂ? ಆಪ್ಲ್ಯಾ ಮಾಂಯ್ ಗಾಂವಾಂತ್ ಕಿತೆಂ ಘಡ್ತಾ? ಆಮ್ಚಾ ಸೆಜಾರಾಂತ್ ಕಿತೆಂ ಶಿಜ್ತಾ? ಹೆಂ ಸರ್ವ್ ಎಕಾಚ್ ಖಿಣಾನ್ ಹ್ಯಾ ಅಂತರ್ಜಾಳಾ ಮುಖಾಂತ್ರ್ ಸಮ್ಜೊನ್ ಘೆವ್ಯೆತ್. ಸಂಸಾರಾಚಾ ಖಂಚಾಯ್ ಕೊನ್ಶಾರ್ ಆಸೊನ್ಯ್ ಕೊಂಕ್ಣಿ ಭಾಸ್ ವಾಚುಂಕ್, ಕೊಂಕ್ಣೆಚೊ ಮೋಗ್ ಕಾಳ್ಜಾಂತ್ ಜಿವೊಚ್ ದವರುಂಕ್ ಹೆಂ ಅಂತರ್ಜಾಳ್ ಆವ್ಕಾಸ್ ಕರುನ್ ದಿತಾ ಮ್ಹಳ್ಳೆಂ ಖಂಡಿತ್.
ಅಶೆಂ ಸುರ್ವಾತ್ ಜಾಲ್ಲ್ಯಾ ಹ್ಯಾ ಪ್ರಗತೆಂತ್ ಆಜ್ಕಾಲ್ ಜಾಯ್ತಿಂ ಸಾಯ್ಟಾಂ ಕೊಂಕ್ಣಿ ಸಾಹಿತ್ಯಾಕ್ ಹಜಾರೊಂ ಲೊಕಾಂಲಾಗಿಂ ಪಾವಯ್ತಾ. ಬರ್ಯಾ ಉದ್ದೇಶಾಂತ್, ಬರ್ಯಾ ಕಾಮಾಂ ಖಾತಿರ್ ಅಸಲಿ ಬರಿ ಸುರ್ವಾತ್ ಕರ್ಚಿ ಖಂಡಿತ್ ಜಾವ್ನ್ ಬರೆಂಚ್ ಮ್ಹಳ್ಳಿ ಮ್ಹಜಿ ಅಭಿಪ್ರಾಯ್.
ಕಿತ್ಯಾಕ್ ಮ್ಹಳ್ಯಾರ್ ಎಕಾ ವಾತಿ ಥಾವ್ನ್ ಹಜಾರ್ ವಾತಿಂ ಪೆಟವ್ಯೆತ್ ಆನಿಂ ಹಜಾರ್ ವಾತಿ ಪೆಟಯ್ಲ್ಯಾರೀ ತ್ಯಾ ಎಕಾ ವಾತಿಚೆಂ ಆವ್ಕ್ ಉಣೆಂ ಜಾಯ್ನಾಂ ಬಗಾರ್ ಉಜ್ವಾಡ್ ಚಡ್ತಾ. ಹೊಚ್ ಆಮ್ಚೊ ಶೆವೊಟ್ ಕೊಂಕ್ಣಿ ಸಾಹಿತಿಕ್ ಕೊನ್ಸೊ ’ದಾಯ್ಜ್’ ರೂಪಿಂ.
ಹೊಚ್ ಆಮ್ಚೊ ಶೆವೊಟ್. ಬರೆಂ ವಾಚಾಪ್, ಬರೆಂ ಸಾಹಿತ್ಯ್, ಬರೆ ವಿಚಾರ್ ದಿಂವ್ಚೊ. ತರ್ಯ್ ಚಡಾವತ್ ಜಾವ್ನ್ ಆಮಿಂ ಜಿಣ್ಯೆಚಾ ಪಾವ್ಲಾಂನಿ ಚಲ್ತಾನಾ ಜಾಯ್ತೆಪಾವ್ಟಿಂ ಆಮಿಂ ಶೆವೊಟ್ಚ್ ವಿಸ್ರತಾಂವ್.
ಎಕಾಮೆಕಾ ಸ್ಪರ್ಧೊ ಎಕಾ ಬರ್ಯಾ ಉದ್ದೇಶಾನ್, ಬರಿಂ ಕಾಮಾಂ ಕರ್ಚೆಪಾಸತ್ ಆಸಾ ತರ್, ತಸಲೆ ಸ್ಪರ್ಧೆ ಆಯ್ಚಾ ಕಾಳಾಕ್ ಭೋವ್ ಗರ್ಜೆಚೆ ಆನಿಂ ಅಸಲೆ ಸ್ಪರ್ಧೆ ಧಾರಾಳ್ ಜಾಂವ್. ಪುಣ್ ಕುರ್ಲ್ಯಾಂಚಾ ಸ್ವಭಾವಾಣ್ ಭರೊನ್ ಎಕಾಮೆಕಾಚೆಂ ಉಣೆಂಪಣ್ ಕರುನ್, ಹೆರಾಂಕ್ ಹಲ್ಕುನ್, ಖೆಳ್ಕುಳಾಂ ಕರುನ್, ಆಮ್ಚಾಚ್ ಸಮಾಜೆಮುಖಾರ್ ನಾಲಿಸಾಯ್ ಕರುನ್, ಹಾಂವ್೦ಚ್ ಶ್ರೇಷ್ಟ್ ಮ್ಹಳ್ಳೊ ಅಹಂಭಾವ್ ಆತಾಂ ತರ್ಯ್ ಸೊಡುನ್ ಎಕಾಮೆಕಾ ಸಾಂಗಾತಾ ವಾವ್ರುಂಕ್ ಆಮಿಂ ಸರ್ವಾಂನಿ ಎಕಾ ಶೆವೊಟಾತೆವ್ಶಿನ್ ಪಾವ್ಲಾಂ ಕಾಡ್ತಾನಾ ಭಂವ್ತೊಣಿಚೊ ಕಾಳೊಕ್ ಧಾಂವ್ಡಾಂವ್ಕ್ ಏಕ್ ವಾತ್ ಜಾವ್ನ್ ಪೆಟ್ಯಾಂಗೀ?
ಕಶೆಂ ಎಕಾ ಕಿಟಳಾಚೊ ಬರ್ಯಾ ಉದ್ದೇಶಾನ್ ವಾಪರ್ ಕೆಲೊ ತರ್ ರಾಂದ್ಣಿಂತ್ ಶಿತ್/ಪೇಜ್ ಶಿಜವ್ಯೆತ್. ತಶೆಂಚ್ ಪಾಡ್ ವಾಪರ್ ಕೆಲೊ ತರ್ ಕೊಣಾಯ್ಚೇಂಯ್ ಘರ್ ಹುಲ್ಪಾವ್ಯೆತ್. ತಶೆಂಚ್ ಏಕ್ ವಾತ್ ಜಾವ್ನ್ ಆಮಿಂ ಪೆಟ್ತಾನಾ ಪಾಡ್ ಉದ್ದೇಶಾನ್ ಹೆರಾಂಕ್ ಹುಲ್ಪಾಂವ್ಕ್ ವೆಚೆಂ ನಾಕಾ, ಬಗಾರ್ ಅಪ್ಣಾಕ್ಚ್ ಹುಲ್ಪಾವ್ನ್ ಘೆವ್ನ್ ಫ಼ಕತ್ ಹೆರಾಂಕ್ ಉಜ್ವಾಡ್ ಜಾವ್ಯಾಂ ನ್ಹಯ್ಗೀ?
’ದಾಯ್ಜ್’ ಖಂಡಿತ್ ಜಾವ್ನ್ ಏಕ್ ಕೊಂಕ್ಣಿ ಸಾಹಿತಿಕ್ ಕೊನ್ಸೊ, ಹಾಂತುಂ ಫ಼ಾಯ್ಸ್ ಜಾಂವ್ಚಿಂ ವಿಂಚ್ಣಾರ್ ಬರ್ಪಾಂ ತುಕಾ ಕಶಿಂ ಭೊಗ್ತಾತ್? ಮ್ಹಳ್ಳೆಂ ತುಕಾ ಉಗ್ತ್ಯಾನ್ ಸಾಂಗೊಂಕ್ ಆವ್ಕಾಸ್ ಆಸಾ. ಆನಿಂ ಖಂಡಿತ್ ಜಾವ್ನ್ ’ದಾಯ್ಜ್’ ಕೊಂಕ್ಣಿ ಸಾಹಿತಿಕ್ ಸಂಸಾರಾಂತ್ ಏಕ್ ಮೊಲಾಧಿಕ್ ’ದಾಯ್ಜ್’ ಜಾತೆಲೆಂ ಮ್ಹಳ್ಳೊ ಆಮ್ಚೊ ಭರ್ವಸೊ.
ಭೋವ್ ಖಾಲ್ತೆಪಣಿಂ,
- ವಲ್ಲಿ ಕ್ವಾಡ್ರಸ್, ಅಜೆಕಾರ್
