आमीं हेरांक वाट दाखंवची एक वात जाव्यांगी?
वरस : २००४
मयनो : जुलाय
खंयचीय वात आपणाखातीर पेटाना, खंयचेय फ಼ूल आपणाखातीर फ಼ुलाना. ह्या संसारांत आसचें हरयेक देवाचें रचन तरय हरयेक जीवी, हरयेक रचनी एकामेका खातीर देवान रचलां.
संसारांत आयलेवार जाल्ल्या या जावनासचा प्रगतेंत अंतरजाळ एक भोव महत्वाची प्रगती म्हण्येत. हांतूं जायतें पाड घडलांय जाव्येत पूण जायतें बरेंय घडलां आनीं घडोन आसा. प्रत्येक जावन कोंकणेक ही एक; बरेंपण करचाक एक वाट करन दिता म्हळ्ळें खंडीत.
पोटाचा जोडिखातीर आपलो गांव सोडन सात दरये पयस आसल्यार कितें जालें? आपल्या मांय गांवांत कितें घडता? आमचा सेजारांत कितें शिजता? हें सरव एकाच खिणान ह्या अंतरजाळा मुखांत्र समजोन घेव्येत. संसाराचा खंचाय कोनशार आसोनय कोंकणी भास वाचुंक, कोंकणेचो मोग काळजांत जिवोच दवरुंक हें अंतरजाळ आवकास करून दिता म्हळ्ळें खंडीत.
अशें सूरवात जाल्ल्या ह्या प्रगतेंत आजकाल जायतीं सायटां कोंकणी साहित्याक हजारों लोकांलागीं पावयता. बरया उद्देशांत, बरया कामां खातीर असली बरी सूरवात करची खंडीत जावन बरेंच म्हळ्ळी म्हजी अभिपराय.
कित्याक म्हळ्यार एका वाती थावन हजार वातीं पेटव्येत आनीं हजार वाती पेटयल्यारी त्या एका वातिचें आवक उणें जायनां बगार उज्वाड चडता. होच आमचो शेवोट कोंकणी साहितीक कोन्सो ’दायज’ रूपीं.
होच आमचो शेवोट. बरें वाचाप, बरें साहित्य, बरे विचार दिंवचो. तरय चडावत जावन आमीं जिण्येचा पावलांनी चल्ताना जायतेपावटीं आमीं शेवोटच विस्रतांव.
एकामेका स्पर्धो एका बरया उद्देशान, बरीं कामां करचेपासत आसा तर, तसले स्पर्धे आयचा काळाक भोव गर्जेचे आनीं असले स्पर्धे धाराळ जांव. पूण कूरल्यांचा स्वभावाण भरोन एकामेकाचें उणेंपण करून, हेरांक हल्कून, खेळकुळां करून, आमचाच समाजेमुखार नालिसाय करून, हांव्०च श्रेषट म्हळ्ळो अहंभाव आतां तरय सोडून एकामेका सांगाता वावरुंक आमीं सरवांनी एका शेवोटातेवशीन पावलां काडताना भंवतोणिचो काळोक धांवडावंक एक वात जावन पेट्यांगी?
कशें एका किटळाचो बरया उद्देशान वापर केलो तर रांदणिंत शीत/पेज शिजव्येत. तशेंच पाड वापर केलो तर कोणायचेंय घर हुल्पाव्येत. तशेंच एक वात जावन आमीं पेटताना पाड उद्देशान हेरांक हुल्पावंक वेचें नाका, बगार अपणाकच हुल्पावन घेवन फ಼कत हेरांक उज्वाड जाव्यां न्हयगी?
’दायज’ खंडीत जावन एक कोंकणी साहितीक कोन्सो, हांतूं फ಼ायस जांवचीं विंचणार बरपां तुका कशीं भोग्तात? म्हळ्ळें तुका उग्त्यान सांगोंक आवकास आसा. आनीं खंडीत जावन ’दायज’ कोंकणी साहितीक संसारांत एक मोलाधीक ’दायज’ जातेलें म्हळ्ळो आमचो भरवसो.
भोव खाल्तेपणीं,
- वल्ली क्वाड्रस, अजेकार
