डैरी
मोटवी कथा वाचप्याच्या मतिंत कशी सदांकाळ धोसून आसता म्हणतासतां, म्हज्या साहित्यीक सुर्वातेर हांवें वाचून आयिल्ल्यो कांय कथा यादिंत येतात. मुनशी प्रेमचंदाच्यो, शरतचंद्र चट्टोपाध्यायच्यो, सादत हासन मांटोच्यो, ओ हेनरोच्यो आनी हेर थोड्यांच्यो कथा..., पूण कोंकणिच्या संधर्भार सयत थोड्यो कथा म्हज्या यादिंत आसात आनी त्यो तवळ तवळ धोसून आसतात.
मोटवी कथा एका वाचप्याच्या मतिंत परत परत धोसता तर, ती त्या कथेची तांक म्हणून हांव लेक्तां. देकून अजीन पांतीस वर्सां’धीं हांवें वाचलली यशवंत चित्तालाची ’पयण’ कथा, केदनांय हांव पयणार आसताना, वा होटेलांत रावताना धोसता. विलफी रेबिंबसाची ’पिंत्रां’ कथा, एडवीन जे. एफ. डिसोजाची ’कागदाची स्त्री’, हेरोल्पियुसाच्यो थोड्यो कथा, सिरिवंत, जेमी बरोक्कास... उडास काडुंक गेल्यार असल्यो जायत्यो कथा मतिंत उदेतात. सद्द्याक म्हाका एक वाचपी जावन आवडलेली कथा जावनासा ’डैरी’, सुनंद लिखणेनांवार कथा बरंवचो नाम्नेचो ’ज्यो डिमेल्लोन बरयिल्ली ही कथा ’सेवक’ नेमाळ्याचेर फायस जाल्ली हांगासर दिल्या. ही कथा वाचून ह्या कथेक आपणावंक तुमकां उलो दितां. कथेचेर तुमची अभिपराय दिवंक विसर्नाकात.
डैरी
रायनाक आसल्ले तसलें उगडासाच्यें देणें, ताच्या भंवतीं काम कर्च्या सबारांक नातल्लें म्हणची गजाल कांय अतिशय न्हय.
वृत्तेन एकौंटेंट जावनासल्ल्या ताच्या मतिंत, अंके-संखे, तारिको, नांवां इत्यादी संग्ती, कंप्यूटरा बरी खंचोन उर्ताल्यो. दफ्तरांतल्यांचो जल्मादीस मात्र न्हय, तांच्या काजाराचो दीस सयत ताका उगडासांत आसतालो म्हणतना, सांगाती कामेल्यांनी ताच्या शातियेक पळेवन शेर्मेल्ल्यांत नवाल नातल्लें.
पूण एक दीस ताच्या पतिणेन, लिनान, ताका दाक्तेरालागीं या म्हणतना, रायनाक खरीच घुस्पड जाल्ली. दाक्तेरालागीं कसलेंय एपोंयटमेंट केल्लो ताका उगडास आयलोना.
"दाक्तेरालागीं? कित्याक? तूं हुषार नांय पुणी?" ताणे विचारल्लें, आकांतोन.
"रायन," लिना म्हणाली आनी त्या बराबर तिच्या दोळ्यांनी खंतिची साय दिसली ताका. "तुका कशें सांगचें म्हळ्ळें समजोंक ना म्हाका. आज-काल तुजो उगडास चिक्के उणो जाला..."
"उगडास उणो जाला?" तो कुत्त करून हासलो. "लिना डारलिंग, तूं म्हणताय तरी कितें?"
"पोयर म्हजो बर्थडे तूं विस्रालोय. तें आमी काजार जाल्ल्याक पयले पावटीं घडच्यें. आसों ती कांय व्हडली गजाल न्हय, पूण आदल्या म्हयन्यांत ईनकम ट्याक्स ओफिसा थावन लेटर आयिल्लें - तुंवें ट्याक्स फारीक करुंक नांय म्हणोन. एदोळ तुका तशें जाल्लें ना. त्या उपरांत, दफ्तराच्यें ʼझूम मीटिंगʼ विस्रालोय तूं म्हणोन ताणीं मोबायलार तुका कोल केल्लें. तितलेंच न्हय, आदल्या हप्त्यांत इगर्जेक वेचो सयत उगडास नातल्लो तुका..."
"छे-छे, तितल्या चिल्लर कारणांक दाक्तेरालागीं वेचेंवे तर? थोडी चुकामूक कोणाक जायना? तूं घडबडनाका, दफ्तरांत इल्ली राटावळ चड जाल्या, तितलेंच," रायन परत हासलो, तिचो हुसको बगल्येक वोंदावन.
"रायन, ही फकत म्हजी अभिपराय न्हय, तुज्या बोसानयी तुका कामालागीं संग्ती विस्रोंकलागल्यात म्हळां आनी दाक्तेरालागीं वेचें बरें म्हण एक सलहा दिल्या. हांवें दाक्तेरालागीं एपोंयटमेंट केलां, खंडीत वचाजेच्च," तिणे हट धरलें. त्या हटाक लागून, मन नातल्ल्या मनान, रायन दाक्तेरालागीं पावल्लो.
तांच्या दाक्तेरान थोड्यो तपासण्यो करवन, एका हप्त्यान ताका पाटीं आपयलो.
"म्हाका माफ कर, मिसटर डीʼ कोसता, खबर तितली बरी ना," दाक्तेर म्हणालो, कपलार मिरिय्यो घालून.
"खबर कितें ती सांग, डोकटर," रायनान हासोन म्हळें तरी, लिनाच्या तोंडावयली गंभीराय पळेवन, ताच्यो हासो माज्वाल्यो आनी दोळ्या बोंवार्यो वयर गेल्यो.
"तुज्ये थंय डिमेंच्याचीं (Dementia) खुणां दिसोन येतात, मिसटर कोसता," दाक्तेर म्हणालो, मोवाळ उत्रांनी. त्या बराबर ताणे आपले कोंपोर मेजाच्येर तेंकले. "ह्या पिडेची वाडावळ जातां-जाताना, तुका उगडास दवर्च्यें कषटांचें जातेलें. ही एक गंभीर संगत जाल्ल्यान, तुंवें म्हज्या उत्रांक मात्र पात्येंवच्यें न्हय, खंचेंय सार्कें वरवन पळेवंक एका न्यूरोलोजिसटाक (Neurologist) भेट दिंवची बरी."
** ** **
न्यूरोलोजिसटाच्या भेटेंत, चडीत गुंडायेन ताची तपासण चल्ली तरी, फलितांश मात्र तेंच आयलें.
"मिसटर, डीʼ कोसता," स्पेशलिसट दाक्तेर म्हणालो, आपली अभिपराय दीवन. "व्हय, तुज्या दाक्तेरान सांगल्ली संगत सार्की. तुका डिमेंच्या सुरू जाल्या. ह्या पिडेक ओकत ना म्हणची संगत बेजारायेची तरी, तुंवें ह्या उपरांत एका डैरिंत सधांच्यो संग्ती बरवन दवर्ची सवय केल्यार, गर्जेक कोणायलागीं विचार्च्ये बांदपास निवार्येत. ऐ एम सोर्री, पाड खबर दीवंक बेजार जाता तरी, गजाल आसातशी सांगच्यें काम कोणे पुणी करिजेच न्हय?"
रायनाक एदोळी डिमेंच्याचो प्रभाव अर्थ जावंक नातल्लो जाल्ल्यान, तो हासलो. ʼसंग्ती बरवन दवर्च्यो?ʼ तो कंप्यूटरार अंके-संखे बरंवचो मनीस. साध्या जिणियेंतल्यो संग्ती बरवन दवर्ची गर्ज एदोळ पडोंक नातल्ली ताका. पूण दाक्तेर आनी लिनाचीं सावळेल्लीं तोंडां पळेवन, ताच्या हास्यांक खाडूं पडलें.
** ** **
मार्च ३, २०२६.
दाक्तेर म्हणता, हांवें डैरी बरयजे कंय! दाक्तेरांक एकच काम, पिडेसतांक भेषटांवचें! आसों, लिनाक संतोस कर्च्या खातीर पुणी हांवें डैरिंत बरंवचें बरें. आज कितें बरंव? व्हय, आज लिनान रुचिच्यें दुक्रा मास रांदल्लें. कोणे रांदल्लें खेल्यारी, लिनान रांदल्ल्या मासाबरी जायना. आपांयी केल्लीं. बियरी बराबर, पोटबर जेवल्ल्यान कोण्णां, सांजेर भूकच लागोंक ना! एमिलीन अमेरिका थावन फोन केल्लें. लीनान, ताका सांगल्लें आसतेलें. हीं कित्याक ही गजाल तितली व्हडली कर्तात म्हळ्ळें समजना म्हाका!
** ** **
आरंभार, डैरिंत बरंवच्यो संग्ती मटव्यो आसल्ल्यो. लिना आपली डैरी वाचुंक पुरो म्हण दुबाव आसल्ल्या ताणे, लिनाक खूश कर्च्ये तसल्यो संग्ती मात्र बरयल्यो. हातान बरंवची सवय विस्रोन आयिल्ल्या ताका, हातान बरवंक बरें लागलें जाल्ल्यान, उपरांतल्या दिसांनी ताच्या डैरिंत चड संग्ती झळकोंकलागल्यो.
** ** **
एपरील १९.
आज आयतार. विलफी आनी देलफिनान आमकां जेवणाक आपयिल्लें. लीना आनी देलफीन तांच्यो राटावळी उलयतना, हांव, विलफी आनी आमचीं भुर्गीं इंडिया आनी इंगलेंडा मधलें क्रिकेट म्याच पळेवंक बसल्यांव. विलफी क्रिकेटाचो पिसो. इंडियाच्या टीमान मात्र जिकजे म्हण आशेंवचो आशावादी. पांच दिसांच्या म्याचाचो आज आक्रेचो दीस. ताच्या नशिबाक, इंडिया सलवलें आनी विलफिच्यें कर्पाल्लें तोंड पळेवन आमचीं बायलां बरिंच हासलीं!
** ** **
मे ८.
आज लिनान म्हाका कितेंगी विसरलेल्या वेळार, "व्हड ना रायन डियर, उगडास करुंक हांव आसांने," म्हळें. तें आसल्यार देव आसल्लेबरी म्हाका.
** ** **
जूनायितल्याक, डैरी म्हळ्यार, व्हाळांत व्हाळोन वेच्या वेळार नशिबान धरुंक मेळच्या फांट्या तितली आधाराची जाल्ली ताका. ताणे जाता तितलें त्या डैरिंत सोंबयलें. पूण बरयतां-बरयताना, ताका गर्जेच्या उत्रांची, फावोत्या सब्दांची विसर पडोंक सुरू जाली. डैरिच्या पाटल्या पानांनी सोधताना, थंयसर बरयिल्ल्या नांवांक लग्ती जाल्लीं मुखमळां, ताच्या मतिंत घयऱ्या रितीर उदेलीं.
** ** **
जून २१.
दफ्तरांतल्या जोनी संगीं काफी पियेल्लो उगडास. ताच्या नव्या कारा विश्यांत उलयतालो तो. पूण ताच्यें नवें कार खंच्यें ब्रांड म्हळ्ळो उगडासाक येना.
** ** **
पिडेन दिस्पडत्या जिण्येंत, खबरेविणेंच पाळां विसतारायलीं. दफ्तराक वचोंक भायर सरल्लो रायन, टोसटरांत उंड्या कापां चेपिलागलो.
"तुंवें ब्रेकफासट केलायने, पर्तून भूक लागलिगी कितें?" लिना म्हणाली, ताच्या भुजाच्येर हात दवरून.
"तूं एक कालें म्हणताय लिना, हांव आत्तां भायर सरोन आयलों मात्र, एक ग्लास कोफी दी पळेव्यां."
काफियेचो ग्लास ताच्या मुकार दवरल्ल्या लिनाच्या दोळ्यांनी दुकांची साय पळेवन, रायनाक कितेंगी चूक जाल्या तें समजलें तरी, चूक कसली तें मतीक आयलेंना.
** ** **
जुलै ६.
हांवें आज दोन पावटीं ब्रेकफासट केलो म्हळें लिनान. पूण म्हाका उगडास ना. तें कांय फटी मार्च्यें न्हय. पूण...
** ** **
आन्येका दिसा, रायनाक न्हाणी खंय आसा म्हळ्ळो उगडास विसरलो. घुस्पडच्या ताका, लिनान न्हाणियेक व्हरून पावयताना, रायनाच्या दोळ्यांनी दुकां भरल्ल्यान, लिनाचीं दुकां ताका दिसलिंनांत.
** ** **
जुलै १४.
म्हजें वोकल मेळनातल्ल्याक, लिनाक दुर्सालों हांव. पूण पाटीं उलंवच्या बदलेक, ताणे म्हज्या मात्यावयर आसल्लें वोकल काडून दिलें म्हाका. हासचेंगी रडचें? आसों, प्राय जाताना अशेंच जाता जायजे.
** ** **
दीस वेतां-वेतां, रायनाच्यें स्वतंत्र ताच्या मुटिंतलें चुकोन वेतालें. ताच्या उगडासाक लागोन, ताणे कार चलंवचें राववंक पडल्लें. एक दीस इगर्जेक वेताना, ताका वाट चूकल्लेंच हाका कारण.
त्या सांजेर, कारांत बसोन काराच्यें अट्टें हातांत धरून, तो चिंतूनंच बसलो - आपूण कितें चिंत्तां तें कळीत नासतां. त्या रातीं डैरिंत ताणे बरयलें:
अगसत २.
ड्रैविंग करुंक नजो म्हण दाक्तेरान म्हळां. ताणे सांगचें हांव न्हय म्हणाना, पूण दफ्तराक कशें वेच्यें?
** ** **
कामाक राजिनाम दिंवची गर्ज उदेल्ली आनी रायनान प्रतिभटन केल्लें. पूण आतां, आपणें कामाक वेच्यें रावयलां म्हळ्ळें सयत ताका विस्रोन गेल्लें.
इगर्जेक गेल्ल्या रायनान, मिसा उपरांत ओळकिच्या सकडांच्ये हात हालयले तरी, तांचीं एकल्याचिंयी नांवां ताच्या मतीक आयलिंनांत. त्याच दिसा, ताच्या युनिवर्सिटिंत शिकच्या पुतान, रोनीन, आपल्या प्रोजेकटा विश्यांत हर्शेंच्येबरी विवर दिलो पूण रायनाक सगळ्यो संग्ती समजजे तर, दोदोन पावटीं सांगाजे पडलें. अमेरिकांत आसच्या धुवेन, एमिलीन, फोन केल्लें. पूण ताच्यें नांव डैरिंत बरयताना, तें नांव पयले पावटीं बरंवच्येबरी भोगलें ताका.
** ** **
लिनाची सोसणिकाय पार्कुंच्ये दीस ते. एदोळ हासोन-हासोन ताका कुमक कर्च्या लिनाच्या वोंटावयल्यो हासो सावळेवन आयिल्ल्यो. तवळ-तवळ तें तस्वीर्यो दाकवन, ताच्या भंवतिंच्यांची वोळोक उराशें कुमक कर्तालें तरी, कराळ दीस उदेलोच.
आपल्या मेजार काफियेचो ग्लास दवर्न, रायनान डैरी उग्ती केली. डैरिंतलीं पानां पर्तून, उगडास उर्च्या खातीर पंदाक गीट वोडल्लीं नांवां, परत-परत वाचलीं ताणे - पीटर, जोनी, एमिली, रोनी, धेलफीन, विलफी, फादर फिलीप.
हर्येक नांव ताका अत्वेंच म्हण भोगलें. सुक्षिमायेन बरयिल्लीं वाक्यां ताचिंच तरी, तीं ताणेंच बरयिल्लीं म्हळ्ळें सयत ताका विसरल्लें. आपल्या बोटांनी कपाल घसटून, ताणे एक पुणी मुखमळ उगडासाक हाडुंक हर प्रेतन केलें.
** ** **
सेपटेंबर १४.
हीं नांवां म्हाका कळीत नांत. कोण हीं मनश्यां? हीं कित्याक ह्या डैरिंत आसात?
** ** **
लिना भितर आयली. तिचो हात रायनाच्या भुजार थांबलो. ताणे मुखमळ उबार्न. लिनाच्या दोळ्यांक पळेलें. त्या दोळ्यांनी मोवाळाय आनी बिर्मत आसल्ली म्हणच्याक खंडीत दुभाव नातल्लो. तिच्या हाताच्या उबेंत, समजणी आसल्ली आनी तिचो सांगात ताका बरो लागलो.
"कितें वाचून आसल्लोय?" लिनान विचारलें.
"हांव नेणां," रायन म्हणालो भुजां हालवन. "कोणाच्यागी जिणिये विश्यांत ह्या बुकांत बरयलां."
लिना ताच्या बगलेन कदेल वोडून बसली. ती दोळ्यांतलीं दुकां पुसुंक गेलिना. ताका डैरी विश्यांत विवरुंच्यें प्रेतनयी तिणे केलेंना. फकत ताचो एक हात आपल्या दोनी हातां मधें तिणे धरलो. आन्येका हातान रायनान डैरी धांपली.
** ** **
सेप्तेंबर ३०.
ʼम्हजें नांव रायन. आज मासळे कडियेच्यें जेवण बरें आसल्लें. हांवें पयलें ती मासळी सबार पावटीं खेल्या म्हण, जेवण वाडल्ली स्त्री म्हणाली. उगडासाक येना. म्हाका वाडल्ल्या स्त्रीयेच्यें नांव विस्रालों. ती आतां निदल्या, फाल्यां विचारिजे.ʼ
ताणे आपणे बरयिल्ल्या वाक्यांक दोळे व्हड करून पळेलें. तीं आपणेंच बरयिल्लीं उत्रां म्हळ्ळो उगडास आसल्लो ताका. पूण तो उगडास कितलो वेळ उरात म्हळ्ळें मात्र तो नेणासल्लो.
(कुर्पा: कुटमाचो सेवक)
Comments
No comments yet. Be the first to say what you thought of it.
Leave a comment