ಆಗುಂಬೆಚಿ ಘುಂವ್ಡಿ
ಹರ್ಯೆಕಾ ದಿಸಾ ಆಮ್ಚೆ ಭಂವ್ತೊಣಿಂ ಜಾಯ್ತಿಂ ಘಡಿತಾಂ, ಘಟನಾಂ ಘಡೊನ್ ಆಸ್ತಾತ್ ಆನಿ ಆಮಿಂ ತಿಂ ಸದಾಂಚಿಂ ಮ್ಹಳ್ಳೆ ನದ್ರೆನ್ ಗುಮಾನ್ ಕರಿನಾಂವ್. ಪುಣ್ ಕಥಾಕಾರ್ ಸಾಮಾನ್ಯ್ ಚಿಂತ್ಪಾಚೊ ನ್ಹಯ್, ಹಿಂ ಘಡಿತಾಂ ತಾಚ್ಯಾ ಮತಿಂತ್ ಎಕಾ ನಾ ಎಕಾ ರಿತಿನ್ ಧೊಸುಂಕ್ ಲಾಗ್ತಾತ್ ಆನಿ ಚಿಂತ್ಪಾಚೊ ಲೋಟ್ ಅಭಿವ್ಯಕ್ತೆಕ್ ವಾಟ್ ಕರುನ್ ದಿತಾ ಮ್ಹಣ್ಚ್ಯಾಕ್ ಹಿ ಕಥಾ ಗವಾಯ್ ದಿತಾ.
ಕೊಂಕಣಿಂತ್ ವಿಭಿನ್ನ್ ಮೊಟ್ವ್ಯೊ ಕಥಾ ಬರಂವ್ಚಾಂತ್ ಸ್ತ್ರೀ-ಕಥಾಕಾರಾಂನಿ ಸಯ್ತ್ ನಾಂವ್ ವೆಲಾಂ. ಕನ್ನಡ ಲಿಪಿಚ್ಯಾ ಸಾಹಿತ್ಯಾಂತ್ ಆಯ್ರಿನ್ ಪಿಂಟೊ (ಶರತ್), ಶಾಲಿನಿ ವಾಲೆನ್ಸಿಯಾ, ಗ್ಲೇಡಿಸ್ ರೆಗೊ, ಎವ್ಲಾಲಿಯಾ ಅಲ್ವಾರಿಸ್, ಲಿಲ್ಲಿ ಮಿರಾಂದಾ, ಕ್ಯಾಥರಿನ್ ರೊಡ್ರಿಗಸ್ ಆನಿ ಹೆರ್ ಥೊಡಿಂ ಹಾಂತುಂ ಪ್ರಮುಕ್. ಪುಣ್ ಪಾಟ್ಲ್ಯಾ ವೀಸ್-ಪಂಚ್ವೀಸ್ ವರ್ಸಾಂನಿ ಜೆಯಲ್ ಮಂಜರಪಲ್ಕೆ, ಮೊನಿಕ್ ಡೆಸಾ ಮಥಾಯಸ್, ಡೊ. ಜೀಟಾ ಲೋಬೊ, ಆನಿ ಲವಿ ಗಂಜಿಮಠ ಪ್ರಮುಕ್ ನಾಂವಾಂ. ಪುಣ್ ಹ್ಯೊ ಕಥಾ ಫಕತ್ ನೆಮಾಳ್ಯಾಂಚ್ಯಾ ಪಾನಾಂನಿ ವಾ ಪುಸ್ತಕಾಂನಿ ಮಾತ್ರ್ ಛಾಪೊನ್ ಆಸ್ಚ್ಯೊ ನ್ಹಯ್. ಹ್ಯೊ ಕಥಾ ಡಿಜಿಟಲ್ ಮಾಧ್ಯಮಾಚೆರ್ ಪಾವೊಂಕ್ ಜಾಯ್, ಹ್ಯಾ ಕಥೆಂಚಿ ತಾಂಕ್ ಸರ್ವ್ ಮೆರೊ ಉತ್ರೊನ್ ಕೊಂಕಣಿ ಲೊಕಾಕ್ ಸೊಧುನ್ ವಚೊಂಕ್ ಜಾಯ್ ಮ್ಹಳ್ಳ್ಯಾ ಇರಾದ್ಯಾನ್ ’ಆಗುಂಬೆಚಿ ಘುಂವ್ಡಿ’ ನಾಂವಾಚೆಂ ಆ-ಪುಸ್ತಕ್ (ಆಶಾವಾದಿ ಪ್ರಕಾಶನಾಚೆಂ ಅಟ್ರಾವೆಂ ಆಡಿಯೊ ಪುಸ್ತಕ್) ತಯಾರ್ ಜಾವ್ನ್ ಆಸಾ. ವೆಗಿಂಚ್ ಬಾಯ್ ಲವಿ ಗಂಜಿಮಠಚ್ಯೊ ಎಕಾಪ್ರಾಕ್ ಏಕ್ ವಿಭಿನ್ನ್ ಚಿಂತ್ಪಾಚ್ಯೊ ಮೊಟ್ವ್ಯೊ ಕಥಾ ತುಮ್ಚೆಲಾಗಿಂ ಯೆತಲ್ಯೊ. ಆತಾಂ ಹ್ಯಾ ಕಥೆಕ್ ವಾಚುನ್/ಆಯ್ಕೊನ್ ಆನಂದ್ ಭಗುಂಕ್ ತುಕಾ ಉಲೊ ದಿತಾಂ.
ಆಗುಂಬೆಚಿ ಘುಂವ್ಡಿ
ರಶ್ಮಿ ಕಾಲ್ ಸಕಾಳಿ ಥಾವ್ನ್ ನಾ ಕಂಯ್...,
ಹಿ ಖಬಾರ್ ಸಗ್ಳ್ಯಾ ಗಾಂವಾರ್ ವಾರ್‍ಯಾಬರಿ ವ್ಹಾಳೊನ್ ಆಸ್‌ಲ್ಲಿ.
ರಶ್ಮಿ ಆಪ್ಲ್ಯಾ ಧುವೆ ಸಂಗಿಂ ಸೂರ್ಯನಗರಾಂತ್ಲ್ಯಾ ಎಕಾ ಪ್ರತಿಷ್ಠಿತ್ ಲೆ‌ಔಟಾಂತ್ ಸ್ವತಃಚ್ಯಾ ಘರಾಂತ್ ರಾವ್ತಾಲಿ. ಸೂರ್ಯನಗರ ವ್ಹಡ್ಲಿ ಪೇಂಟ್ ನ್ಹಯ್ ತರೀ ಹಳ್ಳಿಯ್ ನ್ಹಯ್ ಆಸೊನ್ ಏಕ್ ವಾಡೊನ್ ಯೆಂವ್ಚಿ ಪೇಂಟ್ ಮ್ಹಣ್ಯೆತ್. ದೋನ್ ಮೈಲಾಂಚ್ಯಾ ಆಸ್‌ಪಾಸಾಂತ್ ಪ್ರತಿಷ್ಠಿತ್ ವಿದ್ಯಾ ಸಂಸ್ಥೆ, ಇಗರ್ಜ್, ಮಾರ್ಕೆಟ್, ಪಂಚಾಯತ್ ಕಛೇರಿ, ಅನಿ ಹೆರ್ ಗರ್ಜೆಚ್ಯೊ ಸರ್ವ್ ವ್ಯವಸ್ಥಾ ಆಸೊನ್ ರಾಜ್ಯ್ ರಸ್ತ್ಯಾಚ್ಯಾ ಬಗ್ಲೆನ್ಂಚ್ ಲೇ‌ಔಟ್ ಆಸ್‌ಲ್ಲೆಂ.
ರಶ್ಮಿಚೊ ಪತಿ ನವೀನ್ ದುಬಾಯಾಂತ್ ಕಾಮಾರ್ ಆಸೊನ್ ತಾಚಿ ಜೋಡ್ ಬರಿ ಆಸ್‌ಲ್ಲಿ. ತಶೆಂ ಮ್ಹಣೊನ್ ತಾಂಚಿ ಎಕ್ಲಿಚ್ ಧುವ್ ನತಾಶಾಚಿ ಬರಾವಿ ಜಾತಾ ಪರ್ಯಾಂತ್ ಹೆಂ ಕುಟಾಮ್ ಭಾಯ್ಲ್ಯಾ ಗಾವಾಂತ್‌ಚ್ ಆಸ್‌ಲ್ಲೆಂ. ರಶ್ಮಿಯ್ ಥಂಯ್ಸರ್ ವಾವ್ರ್ ಕರ್ತಾಲಿ. ನತಾಶಾಚ್ಯಾ ಮುಕ್ಲ್ಯಾ ಶಿಕ್ಪಾಬಾಬ್ತಿನ್ ಮಂಗ್ಳುರಾಂತ್ ಶಿಕಾಪ್ ಮುಕಾರ್‍ಸುಂಚೆ ಬರೆಂ ಮ್ಹಣ್ ಜಾಯ್ತ್ಯಾನಿ ದಿಲ್ಲ್ಯಾ ಸಲಹಾಪರ್ಮಾಣೆಂ, ನತಾಶಾಕ್ ಮಂಗ್ಳುರಾಂತ್ಲ್ಯಾ ಬರ್‍ಯಾ ಎಕಾ ಕೊಲೆಜಿಕ್ ಭರ್ತಿ ಕೆಲ್ಲೆಂ.
ರಶ್ಮಿ ಭಾರಿಚ್ ಸೊಭಿತ್ ಸ್ತ್ರೀ. ವೀಸ್ ವರ್ಸಾಂಚ್ಯಾ ಚಲಿಯೆಚಿ ಆವಯ್ ತರೀ ತಿಚ್ ಖುದ್ ಅಟ್ರಾ ವರ್ಸಾಂ ಪ್ರಾಯೆಚ್ಯಾ ಚಲಿಯೆಬರಿ ದಿಸ್ತಾಲಿ. ಪಯ್ಶಾನಿ ಕಾಂಯ್ ಉಣೆಂ ನಾತ್‌ಲ್ಲೆಂ ತರೀ ಸಾಧಿ ಅನಿ ಕೊಣಾಯ್‌ಲಾಗಿಂ ಬರೆಂ ಕರ್ನ್ ಉಲವ್ನ್ ಭರ್ಸೊನ್ ವೆಚಿ ಸ್ತ್ರೀ. ತಶೆಂ ಮ್ಹಣೊನ್ ಕೊಣೀ ಯೆತ್ಯಾಂ ವೆತ್ಯಾಂಕ್ ಆಪ್ಲ್ಯಾ ಘರಾಂತ್ ಸಳ್ಗಿ ದಿಂವ್ಚ್ಯಾ ಕಾಸ್ತಾಚಿಯ್ ನ್ಹಯ್. ತಸಲ್ಯಾ ಕಡೆನ್ ರಶ್ಮಿ ಆಸ್‌ಲ್ಲ್ಯಾ ಬರಿಚ್ ನಪಂಯ್ಚ್ ಜಾಲ್ಲೊ ವಿಷಯ್ ಗಾಂವ್ಕಾರಾಂಕ್ ಮಿಸ್ತೆರಾಚೊ ಜಾಲ್ಲೊ ಮಾತ್ರ್ ನ್ಹಯ್ ಆಸ್ತಾಂ ಎಕಾ ನಮೂನ್ಯಾಚ್ಯಾ ಭಿರಾಂತೆಕೀ ಕಾರಣ್ ಜಾಲ್ಲೊ.
ಆತಾಂ ಭಲಾಯ್ಕೆಂತ್ ಆಸ್ಲಲ್ಯಾ ವ್ಯಕ್ತಿಂಕ್ ಅಶೆಂಚ್ ಅಪಹರಣ್ ಕರ್ನ್ ಅಂಗಾಂಕ್ ಕಾಡ್ನ್ ವಿಕ್ತಾತ್ ಕಂಯ್
ಸೊಭಿತ್ ಚಲಿಯಾಂಕ್ ಸ್ತ್ರೀಯಾಂಕ್ ಜಿಹಾದಿ ಅಪಹರಣ್ ಕರ್ತಾತ್ ಕಂಯ್
ತಿ ಚಿಕ್ಕೆಶೆ ತಸಲ್ಯಾಚ್ ಕಸ್ತಾಚಿ ಮ್ಹಣ್ಚ್ಯಾಬರಿ ದಿಸ್ತಾಲಿ..., ಕಾಂಯ್ ಕೊಣಾಯ್ ಸಾಂಗಾತಾ....
ಅಶೆಂ ಲೋಕ್ ತಕ್ಲೆಕ್ ಏಕ್ ನಮೂನ್ ಉಲಯ್ತಾಲೊ. ನತಾಶಾ ಭಿರ್ಮತ್ ಸಗ್ಳೆಂ ಪಿಸಾಂತುರ್ ಜಾಲ್ಲೆಂ. ನವೀನ್ ಕೊರೋನಾ ವರ್ವಿಂ ಅಂತರಾಷ್ಟ್ರೀಯ್ ವಿಮಾನ್ ಯಾನ್ ಪ್ರಾರಂಭ್ ಜಾಯ್ನಾತ್ಲೆಲೆವರ್ವಿಂ ಅಸಲ್ಯಾ ಪರಿಸ್ಥಿತೆರೀ ಗಾಂವಾಕ್ ಯೇಂವ್ಕ್ ಸಾಧ್ಯ್ ಜಾಯ್ನಾಸ್ತಾನಾ ಒದ್ದಾಡ್ತಾಲೊ. ತಾಚಿ ಮಾನಸಿಕ್ ಸ್ಥಿತಿಯ್ ನತಾಶಾಚ್ಯಾ ವರ್ನಿಂ ಕಾಂಯ್ ವಿಭಿನ್ನ್ ನಾತ್‌ಲ್ಲಿ.
ನವೀನಾಚೊ ಭಾವ್ ಪ್ರಕಾಶ್ ಶಿವಮೊಗ್ಗಾಂತ್ ಪೊಲಿಸ್ ಇಲಾಖ್ಯಾಂತ್ ಎಸ್.ಪಿ. ಹುದ್ದ್ಯಾರ್ ಆಸ್ಲೆಲ್ಯಾನ್, ತಾಚ್ಯಾ ವಶೀಲಾಯೆನ್ ಹ್ಯೆ ಕೇಜಿ ವಿಷ್ಯಾಂತ್ ಚಡಿತ್ ಆಸಕ್ತ್ ಘೆತ್‌ಲ್ಲಿ. ಪೊಲಿಸ್ ಚಿಂತಿನಾತ್ಲೆಲ್ಯಾ ವೆಳಾರ್ ವಿಚಾರಣಾಖಾತಿರ್ ಘರಾಂತ್ ಯೆತಾಲೆ ಆಸ್ತಾಂ, ದುಖೇಸ್ತ್ ನತಾಶಾನ್ ಘರ್ ಸೊಡ್ನ್ ಕೊಣಾಯ್ ಸಯ್ರ್ಯಾಂಗೆರ್ ವೊಚೊನ್ ರಾಂವ್ಚ್ಯಾಬರಿಯ್ ನಾತ್‌ಲ್ಲೆಂ. ತಶೆಂ ಜಾವ್ನ್ ತಾಚಿ ಎಕ್ಲಿಚ್ ಮಾವ್ಶಿ ಮ್ಹಣ್ಜೆ ರಶ್ಮಿಚಿ ಭಯ್ಣ್ ರೇಖಾ ಯೇವ್ನ್ ನತಾಶಾಸವೆಂ ರಾವ್‌ಲ್ಲಿ.
ದೋನ್ ದಿಸಾಂಚ್ಯಾ ನಿರಂತರ್ ಸೊಧ್ನೆ ಉಪ್ರಾಂತ್ ರಶ್ಮಿಚಿ ನಿರ್‍ಜೀವ್ ಕೂಡ್ ಆಗುಂಬೆಚ್ಯಾ ರಾನಾಂತ್ ಎಕಾ
ಪಾಜೆ ಫಾತ್ರಾಚ್ಯಾ ಇಡ್ಯಾಂತ್ ಮೆಳ್‌ಲ್ಲಿ. ಆಂಗ್‌ಭರ್ ಹಳದ್ ಅನಿ ಕುಂಕುಮಾಚೊ ಲೇಪ್ ಕಾಡ್‌ಲ್ಲೊ.
ಕಪಲಾಕ್ ಗಂದ್ ಸಾರಯಿಲ್ಲೊ, ಗಳ್ಯಾ ಭಂವ್ತಿಂ ಗೊಂಡ್ಯಾಂಚೊ ಹಾರ್ ಆಸ್‌ಲ್ಲೊ. ಅನಿ ಕುಡಿಚೆ ಭೊಂವ್ತೊಣಿ ಕಾತರ್‍ಲೆಲೆ ಲಿಂಬೆ ಆಸ್‌ಲ್ಲೆ. ತಕ್ಲೆ ವಯ್ಲ್ಯಾನ್ ಕಾತರ್‌ಲ್ಲೊ ಕುವಾಳೊ ಅನಿ ಫೊಡ್‌ಲ್ಲೊ ನಾರ್ಲ್ ಆಸ್‌ಲ್ಲೊ. ಸರ್ಶಿನ್ಂಚ್ ಇಟ್ಯಾನಿಂ ಕೆಲ್ಲ್ಯಾ ರಾಂದ್ನಿಂತ್ ನಿಂವ್‌ಲ್ಲೊ ಗೊಬೊರ್ ಆಸ್‌ಲ್ಲೊ. ರಶ್ಮಿಚೆ ಹಾತ್ ಪಾಂಯ್ ಬಾಂದ್‌ಲ್ಲೆ ಸ್ಥಿತೆರ್ ಆಸ್‌ಲ್ಲೆ ಅನಿ ಗಳೊ ಕಾಪ್‌ಲ್ಲೊ.
ಪೊಲಿಸಾಂನಿ ಕುಡಿಚೆಂ ಪೋಸ್ಟ್‌ಮೊರ್ಟಮ್ ಕರಯ್ಲೆಂ. ವರ್ದೆ ಪರ್ಮಾಣೆ ಲೈಂಗಿಕ್ ಅತ್ಯಾಚಾರ್ ಜಾಲ್ಲೆವಿಶಿಂ ಕಿತೆಂಚ್ ಖುಣಾಂ ನಾತ್‌ಲ್ಲಿಂ. ಪೊಲಿಸಾಂನಿ ಹ್ಯೆ ದಿಶೆನ್ ಆಪ್ಲಿ ತನ್ಕಿ ವಿವಿಧ್ ಆಯಾಮಾನಿ ಮುಕಾರುಂಕ್ ತಯಾರಾಯ್ ಚಲಯ್ಲಿ. ಪೂಣ್ ವಾರ್‍ಯಾವೆಗಾನ್ ಫೊಟೊ ಅನಿ ಖಬ್ರೊ ವಿವಿಧ್ ಸಾಮಾಜಿಕ್ ಮಾಧ್ಯಮಾನಿ ವ್ಹಾಳೊಂಕ್ ಲಾಗ್ಲ್ಯೊ. ವಾಮಾಚಾರಾಕ್ ಸ್ತ್ರೀಯೆಚಿ ಬಲಿ ಮಾತಾಳ್ಯಾರ್ ಮಾಧ್ಯಮಾಂನಿ ಖಬಾರ್ ಘಾಜಯ್ಲಿ. ಹಾಣಿಂ ತಾಂಚೆರ್ ಅನಿ ತಾಣಿಂ ಹಾಂಚೆರ್ ಬೋಟ್ ಜೊಕ್ಲೆಂ. ಗಾಂವಾರ್ ತರ್ನಾಟ್ಯಾ ಸ್ತ್ರೀ-ಚಲಿಯಾಂ ಥಂಯ್ ಅನಿಕೀ ಭಿರಾಂತ್ ಚಡ್ಲಿ. ಹಿ ಮಾರೆಕಾರ್ ಖ್ಯಾಸ್ತ್ ಆಮ್ಚ್ಯಾ ಗಾಂವಾಕೀ ಯೇವ್ನ್ ಪಾವ್ಲಿಗಾಯ್ ಅಶೆಂ ಸಭಾರಾಂನಿ ಅಕಾಂತ್ ಉಚಾರ್ಲೊ. ಹ್ಯೆವಿಶಿಂ ಸಾರ್ಕಿ ತನ್ಕಿ ಜಾಂವ್ಕ್ ಜಾಯ್ ಅನಿ ಆಮ್ಚ್ಯಾ ಗಾಂವ್ಚ್ಯಾ ಸ್ತ್ರೀ-ಚಲಿಯಾಂಕ್ ಸುರಕ್ಷಾ ಲಾಭಜಯ್ ಗ್ರಾಮ್ ಪಂಚಾಯತ್ ಅಧ್ಯಕ್ಷಾನ್ ಮಾಧ್ಯಮಾ ಮುಕಾರ್ ಒತ್ತಾಯ್ ಕೆಲಿ.
ಜಾಯ್ತ್ಯಾ ದಿಸಾಂಕ್ ತನ್ಕಿ ಲಾಂಬ್ಲಿ ತರೀ ಆರೋಪಿ ಶಿರ್ಕೊನ್ ಪಡ್ಲೆ ನಾಂತ್. ನವೀನಾಕ್ ಗಾಂವಾಕ್ ಯೆಂವ್ಕ್‌ಚ್ ಜಾಲೆಂನಾ. ಪೊಲಿಸಾಂಚ್ಯಾ ತನ್ಕೆ ಪಾಟ್ಲ್ಯಾನ್ ವೊಚೊಂಕ್ ನತಾಶಾಕ್ ಸಾದ್ಯ್ ನಾತ್‌ಲ್ಲೆಂ. ನಿಮಾಣೆಂ ಮೆಲ್ಲೆಂ ಮೆಲೆಂ..., ತಾಚ್ಯಾ ನಶಿಬಾಂತ್ ತಸಲೆಂಚ್ ಮರಣ್ ಬರಯಿಲ್ಲೆಂ ಕೊಣ್ಣಾ ಮ್ಹಣ್ ಚಿಂತುನ್ ನವೀನಾನ್ ಕೇಜ್ ಪಾಟಿಂ ಕಾಡುಂಕ್ ನಿರ್ಧಾರ್ ಕೆಲೊ. ಪೋಲೀಸ್ ಇಲಾಖ್ಯಾಚಿ ವಿಫಲತಾ, ಘಳಾಯೆವರ್ವಿಂ ಬೆಜಾರ್ ಪಾವೊನ್ ಕೇಜ್ ಪಾಟಿಂ ಕಾಡ್ಲಿ ಅಶೆಂ ಮಾಧ್ಯಮಾನಿ ಪರತ್ ಘಾಂಟ್ ವ್ಹಾಜಯ್ಲಿ.
ವೇಳ್ ಕಸಲ್ಯಾಚ್ ಹೆಳ್ಕೆವಿಣೆಂ ಧಾಂವ್ತಾಲೊ...! ರಶ್ಮಿಚ್ಯಾ ಮರ್ಣಾ‌ಉಪ್ರಾಂತ್ ಸಾತ್ ಮಹಿನೆ ಉತ್ರಾಲ್ಲೆ. ಕೇಜ್ ಪಾಟಿಂ ಕಾಡ್ಲ್ಯಾ ಉಪ್ರಾಂತ್ ನತಾಶಾ ಆಪ್ಲ್ಯಾ ಮೌಶೆಗೆರ್ ರಾವ್ಲೆಂ. ತೆಂ ಅನಿಕೀ ಮಾನಸಿಕ್ ಸ್ಥಿಮಿತಾರ್ ಯೇಂವ್ಕ್ ನಾತ್‌ಲ್ಲೆಂ. ಭಿರಾಂಕುಳ್ ಏಕಾಂತ್ಪಣ್ ತಾಕಾ ಧೊಸ್ತಾಲೆಂ. ಉಚಾರ್‍ನ್ ಸಾಂಗೊಂಕ್ ಕೊಣ್ಂಚ್ ತಾಚೆಲಾಗಿಂ ನಾತ್ಲಲಿಂ. ಕೊಲೆಜ್ ಆಸ್‌ಲ್ಲಿ ತರ್ ಸಾಂಗಾಂತ್ಯಾಂಸಂಗಿಂ ಭರ್ಸೊನ್ ಪುಣೀ ತಾಚೊ ವೇಳ್ ಪಾಶಾರ್ ಜಾತೊ. ಪೂಣ್ ಕೊಲೆಜಿ ಧಾಂಪ್ಲೆಲ್ಯಾನ್ ಹೊ ಆವ್ಕಾಸ್‌ಯಿ ತಾಕಾ ನಾ ಜಾಲ್ಲೊ.
ತೊ ದೀಸ್ ಸನ್ವಾರ್. ನತಾಶಾ ದೊನ್ಪಾರಾಂಚೆಂ ಜೆವಾಣ್ ತಿರ್‍ಸುನ್ ಸಿಟ್‌ಔಟಾರ್ ಬೊಸೊನ್ ಆಸ್‌ಲ್ಲೆಂ. ದೊನ್ಪಾರಾಂಚೆಂ ಥೊಡೊ ವೇಳ್ ಆಡ್ ಪಡ್ ಮ್ಹಣ್ ಮೌಶೆನ್ ಒತ್ತಾಯ್ ಕೆಲ್ಯಾರೀ ಮಾಗಿರ್ ರಾತಿಕ್ ನೀದ್ ಪಡಾನಾ ಮ್ಹಳ್ಳೆಂ ನೀಬ್ ದೀವ್ನ್ ತೆಂ ಬೊಸೊನ್ಂಚ್ ವೇಳ್ ಪಾಶಾರ್ ಕರ್ತಾಲೆಂ. ತಿತ್ಲ್ಯಾರ್ ಪ್ರಕಾಶ್ ಆಪ್ಲ್ಯಾ ಖಾಸ್ಗಿ ಕಾರಾರ್ ಯೇವ್ನ್ ಘರಾ ಮುಕಾರ್ ಥಾಂಬ್ಲೊ. ಬಾಪ್ಲ್ಯಾಕ್ ಪಳೆವ್ನ್ ಎಕಾ ಘಡ್ಯೆಕ್ ಅಜ್ಯಾಪ್ ಜಾಲೆಂ ತರೀ ದುಸ್ರೆ ಘಡ್ಯೆ ನತಾಶಾ ಉಭೆಂ ಜಾಲೆಂ. ತಾಚ್ಯಾ ದೊಳ್ಯಾನಿ ದುಖಾಂ ಫುಟ್ಲಿಂ.
ರಡಾನಾಕಾ ಪ್ರಕಾಶಾನ್ ತಾಚಿ ಪಾಟ್ ಧಾಪುಡ್ಲಿ.
ತೆಂ ಹೆಂ ಉಲವ್ನ್ ಜಾತಚ್ ಪ್ರಕಾಶ್ ಆಪ್ಣೆಂ ಆಯಿಲ್ಲೊ ಉದ್ದೇಶ್ ಸಾಂಗಿಲಾಗ್ಲೊ.
ಹಾಂವೆಂ ತೀನ್ ದಿಸಂಚಿ ರಜಾ ಕಾಡ್ಲ್ಯಾ ಆಸ್ತಾಂ, ನತಾಶಾ ಕಶೆಂಯ್ ಘರಾಚ್ ಆಸ್ತಾ ನ್ಹಂಯ್ ತಶೆಂ ತಾಕಾ ಮ್ಹಜೆ ಬರಾಬರ್ ಶಿವಮೊಗ್ಗ ಆಪವ್ನ್ ವ್ಹರ್ಯಾಂ ಮ್ಹಣ್ ಆಯ್ಲೊಂ.
ನತಾಶಾನ್ ಪಯ್ಲ್ಯಾನ್ ಬಾಪ್ಲ್ಯಾಸಂಗಿಂ ವೊಚೊಂಕ್ ನಕಾರ್‍ಲೆಂ ತರೀ, ಮೌಶೆಚ್ಯಾ ಒತ್ತಾಯೆಕ್ ತೆಂ ಭಾಯ್ರ್ ಸರ್ಲೆಂ.
ವಾಟೆರ್ ಜಾಯ್ತೆಂ ಉಲವ್ಣೆಂ ಪ್ರಕಾಶ್ ಅನಿ ನತಾಶಾ ಮಧೆಂ ಜಾಲೆಂ ತರೀ ತೆಂ ಅಜೂನ್ ಅಂತರ್ಮುಖಿ ಆಸಾ ತೆಂ ಪ್ರಕಾಶಾಚ್ಯಾ ಗುಮಾನಾಕ್ ವೊಚಾನಾಸ್ತಾನಾ ರಾವ್ಲೆಂನಾ. ತಾಂಚೆಂ ಕಾರ್ ಆಗುಂಬೆಚಿ ಘಾಟಿ ಚಡ್ತಾಲೆಂ. ಆಗುಂಬೆಕ್ ಚಿಂತಾನಾ ನತಾಶಾಚ್ಯಾ ಆಂಗಾಂತ್ ಶಿರ್ಶಿರೊ ಧಾಂವ್‌ಲ್ಲೊ ಅನ್ಭೋಗ್ ಜಾತಾಲೊ.
ಆಗುಂಬೆಚ್ಯಾ ತ್ಯಾ ಅಶೀರ್ ಘುಂವ್ಡೆರ್ ಪ್ರಕಾಶಾಚೆಂ ಕಾರ್ ಥಾಂಬ್ತಾನಾ ಎಕಾಚ್ಛಾಣೆಂ ನತಾಶಾ ಅಕಾಂತ್ಲೆಂ. ’ಹ್ಯಾ ನಿರ್ಜನ್ ಸುವಾತೆರ್ ಕಿತ್ಯಾಕ್ ಕಾರ್ ಥಾಂಬ್ಲೆಂ...?’ ಸವಾಲ್ ನತಾಶಾಚ್ಯಾ ಮತಿಪಡ್ದ್ಯಾರ್ ಉಠ್ಲೆಂ.
ತುಕಾ ಹೊ ಜಾಗೊ ಉಗ್ಡಾಸ್ ಆಸಾ...?
ವ್ಹಯ್ ಅಂಕಲ್, ಮಾಮ್ಮಿಚ್ಯಾ ಕುಡಿಚಿ ವಳಕ್ ಧರುಂಕ್ ಮ್ಹಾಕಾ ಪೊಲಿಸಾಂನಿ ಹಾಂಗಾ ಆಪವ್ನ್ ಹಾಡ್‌ಲ್ಲೆಂ.
ಪ್ರಕಾಶಾಚ್ಯಾ ಸವಾಲಾಕ್ ದುಖೇಸ್ತ್ ಜವಾಬ್ ದಿಲಿ ನತಾಶಾನ್.
ಚಲ್ ಆಮಿಂ ಪರತ್ ಏಕ್ ಪಾವ್ಟಿಂ ಥಂಯ್ಸರ್ ವೊಚೊನ್ ಯೆವ್ಯಾಂ..., ಮ್ಹಜ್ಯಾ ವ್ಹೊನಿಯೆನ್ ಧರ್ಮಾಕ್ ಕೊಣಾಯ್ಚ್ಯಾ ಹಾತಿಂ ಅಸೊ ಜೀವ್ ದಿಂವ್ಚೊ ಅನಿ ಆಮಿಂ ಕೇಜ್ ಪಾಟಿಂ ಕಾಡ್ಚಿ ಮ್ಹಾಕಾ ಸಮಾಧಾನ್ ನಾ.
ನಾಕಾ ಅಂಕಲ್ ಮ್ಹಾಕಾ ಭಿರಾಂತ್ ದಿಸ್ತಾ. ಅನಿ ಥೊಡ್ಯಾಚ್ ವೆಳಾನ್ ಸುರ್ಯೊ ಬುಡ್ತೊಲೊ. ಅತಾಂಚ್ ಇತ್ಲೊ ಕಾಳೊಕ್ ಆಸಾ ಹಾಂಗಾಸರ್ ನತಾಶಾ ಕಾವ್ಜೆಲೆಂ.
ಕಾಂಯ್ ಭಿಯೆಜಾಯ್ ಮ್ಹಣ್ ನಾ ನತಾಶಾ, ಹಾಂವ್ ಆಸಾಂ ನೆ. ಅನಿಕೀ ಚಡ್ ಭ್ಯೆಂ ದಿಸ್ತಾ ತರ್ ಪಳೆ ಹಾಂಗಾಸರ್ ಮ್ಹಜೆಲಾಗಿಂ ರಿವೋಲ್ವರ್ ಆಸಾ... ಪ್ರಕಾಶಾನ್ ಧಯ್ರ್ ದೀವ್ನ್ ನತಾಶಾಕ್ ಕಾರಾವಯ್ಲೆಂ ಸಕಯ್ಲ್ ದೆಂವಯ್ಲೆಂ.
ಅರೇ ತುಜ್ಯಾ ಪಾಂಯಾಂನಿ ಹೀಲ್ಡ್ ವ್ಹಾಣೊ ಆಸಾತ್. ಹ್ಯೊ ವ್ಹಾಣೊ ಘಾಲ್ನ್ ತುಕಾ ಹ್ಯಾ ರಾನಾಂತ್ ದೆವೊಂಕ್ ಜಾಂವ್ಚೆಂನಾ. ಹಾಂವ್ ತುಕಾ ಮ್ಹಜೆಲಾಗಿಂ ಡಿಕ್ಕೆಂತ್ ಪ್ಲ್ಯಾಟ್ ವ್ಹಾಣೊ ಆಸಾತ್ ತ್ಯೊ ದಿತಾಂ
ನತಾಶಾನ್ ಪಾಂಯಾಂಚ್ಯೊ ವ್ಹಾಣೊ ನಿಕ್ಳಾಯ್ಜಾಯ್ ತರ್ ಪ್ರಕಾಶ್ ಏಕ್ ಜೊಡಿ ವ್ಹಾಣೊ ಘೆವ್ನ್ ನತಾಶಾ ಮುಕಾರ್ ಉಭೊ ಜಾಲೊ.
ಘೆ ಹ್ಯೊ ಘಾಲ್ ತುಜ್ಯೊಚ್ ವ್ಹಾಣೊ ಮ್ಹಣ್ ಚಿಂತಾಂ...
ಹಾಂ....,ನ್ಹಯ್.... ಅಂಕಲ್ ಹ್ಯೊ ಮ್ಹಜ್ಯೊ ವ್ಹಾಣೊ ನ್ಹಂಯ್...! ನತಾಶಾ ಕಾಲುಬುಲೆಂ ಜಾಲೆಂ.
ತುಜ್ಯೊಚ್ ಪುತಾ, ತುಟೊನ್ ಪಡ್ಲಲ್ಯೊ ಹಾಂಗಾಚ್ ಬೊಲ್ಯಾಂತ್ ಮ್ಹಾಕಾ ವ್ಹೊನಿಯೆಚಿ ಕೂಡ್ ಮೆಳ್‌ಲ್ಲ್ಯಾ ದಿಸಾಚ್ ಮೆಳ್‌ಲ್ಲ್ಯೊ. ಹಾಂವೆಂ ತ್ಯೊ ತುಕಾ ಜಾಯ್ ಪಡ್ತಿತ್ ಮ್ಹಣ್ ಚಾಮ್ಗಾರಾಲಾಗಿಂ ಶಿಂವಯ್ಲ್ಯೊ
ಹಾಂ ವ್ಹಯ್ ಅಂಕಲ್ ತ್ಯಾ ದಿಸಾ ಪೊಲೀಸಾಂ ಸಂಗಿಂ ಯೆತಾನಾ ಘಾಲ್ನ್ ಆಯಿಲ್ಲಿಂ ಪಾಟಿಂ ಯೆತಾಸ್ತಾನಾ ರುಕಾಚ್ಯಾ ಕುತ್ಯೆಕ್ ದಾಂಟೊನ್ ತುಟ್ಲ್ಯೊ ಮ್ಹಣೊನ್ ಹಾಂಗಾಚ್ ಸೊಡ್ನ್ ಗೆಲ್ಲಿಂ ನತಾಶಾನ್ ಉಗ್ಡಾಸ್ ಕೆಲೊ.
ಪೂಣ್ ತ್ಯಾ ದಿಸಾ ಘರಾ ಪಾಟಿಂ ವೆತಾ ಪರ್ಯಾಂತೀ ತುಜ್ಯಾ ಪಾಂಯಾಂಕ್ ವ್ಹಾಣೊ ಆಸ್‌ಲ್ಲ್ಯೊ ಹಾವೆಂ ಪಳೆಲ್ಯಾತ್.
ತರ್ ಬಹುಶಃ ಹ್ಯೊ ವ್ಹಾಣೊ ಮಾಮ್ಮಿಚ್ಯಾ ಪಾಂಯಾಂಕ್ ಆಸ್‌ಲ್ಲ್ಯೊ ಜಾಯ್ಜಯ್. ಮ್ಹಜೆಂ ಅನಿ ಮಾಮ್ಮಿಚೆಂ ವ್ಹಾಣಾಂಚೆಂ ಸೈಜ್ ಏಕ್‌ಚ್ ಜಾಲ್ಲ್ಯಾನ್ ಆಮಿಂ ವ್ಹಾಣೊ ಬದ್ಲುನ್ ಘಾಲ್ತೆಲ್ಯಾಂವ್.
ನಾ..., ಮಾಮ್ಮಿಚ್ಯೊ ವ್ಹಾಣೊ ಥಂಯ್ಚ್ ಸಕಯ್ಲ್ ಪಡೊನ್ ಆಸ್‌ಲ್ಲ್ಯೊ
ಮುಕಾರ್ ಉತ್ರಾಂ ನಾಸ್ತಾನಾ ನತಾಶಾ ವೊಗೆಂ ಜಾಲೆಂ.
ಘಡ್‌ಲ್ಲೆಂ ಕಿತೆಂ ತೆಂ ಸಾರ್ಕೆಂ ಸಾಂಗ್ ಪ್ರಕಾಶಾನ್ ನತಾಶಾಕ್ ಪರತ್ ಕಾರಾರ್ ಬಸಯ್ಲೆಂ.
ಅಂಕಲ್, ಮಾಮ್ಮಿಕ್ ದುಬಾಯ್ ಆಸ್ತಾನಾಂಚ್ ತಿಚ್ಯಾ ಬೊಸಾಲಾಗಿಂ ಅಫೇರ್ ಆಸ್‌ಲ್ಲೆಂ. ಹೆಂ ಡಾಡಾಕ್ ಕಳಿತ್‌ನಾತ್‌ಲ್ಲೆಂ ಪೂಣ್ ಮ್ಹಾಕಾ ಕಳಿತ್ ಆಸ್‌ಲ್ಲೆಂ. ಡಾಡಾಲಾಗಿಂ ಕಶೆಂ ಸಾಂಗ್ಚೆಂ ಮ್ಹಣ್ ಸಮ್ಜಾನಾಸ್ತಾನಾ ಹಾಂವ್ ಕಷ್ಟಾತಾಲಿಂ. ಮ್ಹಜಿ ಬಾರಾವಿ ಜಾತಚ್ ಹಾಂವೆಂಚ್ ಗಾಂವಾಂತ್ ಶಿಕಾಪ್ ಮುಕಾರ್‍ಸಿತಾಂ ಮ್ಹಣ್ ಒತ್ತಾಯ್ ಕೆಲ್ಲಿ. ಕಿತ್ಯಾಕ್ ಶಿಕ್ಪಾ ಖಾತಿರ್ ಹಾಂವ್ ಗಾಂವಾಕ್ ಗೆಲ್ಯಾರ್ ಮಾಮ್ಮಿ ಮ್ಹಜೆಸಂಗಿಂ ಗಾಂವಾಂಕ್ ಯೆತೆಲಿ ಅನಿ ತಿಚೊ ಹೊ ಅಕ್ರಮ್ ಸಂಬಂಧ್ ತುಟ್ತೊಲೊ ಮ್ಹಣ್ ಹಾಂವೆಂ ಲೆಕ್‌ಲ್ಲೆಂ. ಪೂಣ್ ಆಮಿಂ ಘರ್ ಕಾಣ್ಗೆಲ್ಲೆಂ ಸೂರ್ಯನಗರ ಲೇ‌ಔಟ್‌ಚ್ ತಿಚ್ಯಾ ಬೊಸಾಚೆಂ ಮ್ಹಣ್ ಹಾಂಗಾಸರ್ ಆಯ್ಲ್ಯಾ ಉಪ್ರಾಂತ್‌ಚ್ ಕಳಿತ್ ಜಾಲೆಂ. ಹ್ಯಾ ಮಧೆಂ ಸೈಟಾಂಚ್ಯಾ ವಹಿವಾಟಾಖಾತಿರ್ ಗಾಂವಾಂಕ್ ಆಯಿಲ್ಲೊ ತಿಚೊ ಬೊಸ್ ಲೊಕ್‌ಡೌನಾ ವರ್ವಿಂ ಗಾಂವಾಂತ್ ಉರ್ಲೊ ಅನಿ ತಾಚೆಂ ಕುಟಾಮ್ ದುಬಾಯಾಂತ್. ಹೆಣೆಂ ಡ್ಯಾಡಿಯ್ ದುಬಾಯಾಂತ್‌ಚ್ ಉರ್‍ಲೆಲ್ಲ್ಯಾನ್ ಹಾಂಕಾಂ ದೊಗಾಂಯ್ಕಿ ಹೊ ಭಾಂಗ್ರಾಳೊ ಆವ್ಕಾಸ್ ಲಾಭ್ಲೊ. ಲೊಕ್‌ಡೌನಾ ವರ್ವಿಂ ಹಾಂವ್ ಘರಾಂತ್‌ಚ್ ಆಸ್ಲ್ಯಾರಿ ಕಿತೆಂಚ್ ಮಾನ್ ಮರ್ಯಾದ್ ನಾಸ್ತಾಂ ತಿಂ ಕುಡಾಚೆಂ ಬಾಗಿಲ್ ಧಾಂಪ್ತಾನಾ ಮ್ಹಾಕಾ ಕುಡಿಂತ್ ಉಜೊ ಪೆಟ್ತಾಲೊ. ತಡ್ವಾನಾಸ್ತಾನಾ ತ್ಯಾ ದಿಸಾ ಹಾಂವ್ ಸರ್ವ್ ಡಾಡಾಕ್ ಸಾಂಗ್ತಾಂ ಮ್ಹಣ್ ದೊಗಾಂಯ್ ಮುಕಾರ್ ಗಲಾಟೊ ಕೆಲ್ಲ್ಯಾಕ್ ತಾಣಿಂ ಮ್ಹಜೆರ್ ಹಲ್ಲೊ ಕೆಲೊ. ಏಕ್ ಆವಯ್ ಮ್ಹಣ್ ಲೆಕಿನಾಸ್ತಾನಾ ತಿಣೆಂ ಮ್ಹಾಕಾ....,ತುಂಯ್ ಜಾಯ್ ತರ್ ಕೊಣಾಯ್ಕಿ ಘೆವ್ನ್ ಯೆ ಹಾಂವ್ ತುಕಾ ಆಡಯ್ನಾ ಪೂನ್ ಮ್ಹಜ್ಯಾ ವಾಟೆಕ್ ಆಡ್ ಯೇನಾಕಾ ಮ್ಹಣ್ತಾನಾ ಮ್ಹಾಕಾ ತಿಚೆರ್ ಕಾಂಠಾಳೊ ಆಯ್ಲೊ. ಅಶೆಂಚ್ ಮುಕಾರುನ್ ಗೆಲ್ಯಾರ್ ಹಿಂ ಮ್ಹಾಕಾ ಲಗಾಡ್ ಕಾಡ್ತಿತ್ ಅನಿ ಮ್ಹಜ್ಯಾ ಡ್ಯಾಡಿಕೀ ಸೊಡಿಶಿಂನಾಂತ್ ಮ್ಹಳ್ಳೆಂ ಸ್ಪಷ್ಟ್ ಜಾತಾನಾ, ಹಾಂವೆಂ ಮ್ಹಾಕಾ ಜಾಯ್ ಜಾಲ್ಲ್ಯಾ ದೊಗಾಂ ವ್ಯಕ್ತಿಸಂಗಿಂ ಮೆಳೊನ್ ಮಾಮ್ಮಿಕ್ ಭೆಷ್ಟಾಂವ್ಕ್ ಚಿಂತ್ಲೆಂ. ಆಮ್ಚೊ ಇರಾದೊ ಫಕತ್ ತಿಚೆ ಥಂಯ್ ಭ್ಯೆಂ ಉಠಂವ್ಚೊ ಆಸ್‌ಲ್ಲೊ ಸೊಡ್ಲ್ಯಾರ್, ತಿಕಾ ಲಗಾಡ್ ಕಾಡ್ಚೊ ನಾತ್‌ಲ್ಲೊ. ಪೂಣ್ ಉರ್ಡಾ‌ಉರ್ಡಿ ಜಾತಾನಾ ಫರಾಮಶೆನ್ ಮಾಮ್ಮಿಚೊ ಗಳೊ ಕಾಪೊನ್ ಗೆಲೊ. ಭಿಯೆಲ್ಲ್ಯಾ ಅಮಿಂ ಚುಕೊನ್ ಘೆಂವ್ಚೆ ಖಾತಿರ್ ಖಂಚಾಗಿ ಎಕಾ ಟಿ.ವಿ.ಸೀರಿಯಲಾಂತ್ ಪಳೆಲ್ಲ್ಯಾಬರಿ ವಾಮಾಚಾರಾಚೊ ನಾಟಕ್ ಘಡ್ಲೊ
ಮಾಮ್ಮಿಚಿ ಖುನಿ ಜಾಲ್ಲಿ ಖಂಯ್...?
ಘರಾಚ್ಚ್...!
ಮಾಗಿರ್ ಹಾಂಗಾ ಮ್ಹಣಾಸರ್ ಕೊಣೆಂ ಹಾಡ್ಲೆಂ!?
ಹಾಂವೆಂ ಅನಿ ತ್ಯಾ ದೊಗಾಂನಿ
ತೆ ದೋಗ್ ಪವನ್ ಅನಿ ಪ್ರಥ್ವಿ ವ್ಹಯ್‌ಮೂ...?
ಪೂಣ್ ಅಂಕಲ್ ತುಕಾ ಹೆಂ ಕಶೆಂ ಕಳಿತ್ ಜಾಲೆಂ...?
ಮೊಬೈಲ್ ಟ್ರೇಸಿಂಗಾರ್ ಮ್ಹಾಕಾ ತುವೆಂ ಆಗುಂಬೆಕ್ ಭೆಟ್ ದಿಲ್ಲಿ ಕಳಿತ್‌ಜಾಲಿ. ವ್ಹೊನಿ ನಪಂಯ್ಚ್ ಜಾಲ್ಲ್ಯಾ ಆದ್ಲ್ಯಾ ದಿಸಾ ಪವನ್ ಅನಿ ಪ್ರಥ್ವಿ ಸೂರ್ಯನಗರಾಕ್ ಆಯಿಲ್ಲೆ ಜಾಲ್ಲ್ಯಾನ್ ಪ್ರಥ್ವಿಚೆಂ ಮೊಬಾಯ್ಲ್ ತ್ಯಾಚ್ ವೆಳಾರ್ ಆಗುಂಬೆಚೆಂ ಲೊಕೇಶನ್ ದಾಕಾಯ್ತಾಲೆಂ. ತಶೆಂ ದುಭಾವೊನ್ ಆಗುಂಬೆಚೆರ್ ಸೊಧ್ನಾಂ ಚಲಯ್ತಾನಾ ವ್ಹೊನಿಯೆಚಿ ಕೂಡ್ ಮೆಳ್ಳಿ. ಪವನ್ ಅನಿ ಪ್ರಥ್ವಿಕ್ ಜ್ಯೋರ್ ಕರ್ನ್ ವಿಚಾರ್‍ತಾನಾ ಆತಾಂ ತುವೆಂ ಸಾಂಗ್‌ಲ್ಲಿ ಸಗ್ಳಿ ಕಾಣಿ ತಾಣಿಂ ಮ್ಹಾಕಾ ಸಾಂಗ್ಲಿ. ಕೂಡ್ ಮಾತ್ಯೆಕ್ ಪಾಂವ್ಚ್ಯಾ ಪಯ್ಲೆಂ ಹಿ ಕೇಜ್ ಪತ್ತೊ ಜಾಲ್ಯಾ ತರೀ, ಜೀವ್ ಗೆಲಾ ತೊ ಗೆಲಾ, ತ್ಯಾ ಖಾತಿರ್ ಜಿವಂತ್ ಆಸ್ಚ್ಯಾ ಮ್ಹಜ್ಯಾ ಪುತಾಂನಿ ಅನಿ ತುವೆಂ ಕಿತ್ಯಾಕ್ ಆಪ್ಲೊ ಫುಡಾರ್ ಹೊಗ್ಡಾಯ್ಜಾಯ್, ಮ್ಹಜ್ಯಾ ಬಾವಾನ್ ಕಿತ್ಯಾಕ್ ಮರ್ಯಾದ್ ಹೊಗ್ಡಾವ್ನ್ ಘೆಜಾಯ್ ಮ್ಹಳ್ಯಾ ಜಿಜ್ಞಾಸೆನ್ ಹಾಂವೆಂ ಇಲಾಖ್ಯಾಕ್ ಕೇಜ್ ಅಸ್ಕತ್ ಕರುಂಕ್ ತಾಕಿತ್ ದಿಲಿ. ಅನಿ ಆಸ್‌ಲ್ಲೊ ವಿಷಯ್ ನವೀನಾಕ್ ಕಳವ್ನ್ ಕೇಜ್ ಪಾಟಿಂ ಕಾಡುಂಕ್ ಕಳಯ್ಲೆಂ
ತರ್ ಸರ್ವ್ ಕಳಿತ್ ಆಸ್ಲ್ಯಾರ್‌ಯಿ ಆಜ್ ತುವೆಂ ಮ್ಹಾಕಾ ಹಾಂಗಾಸರ್ ಆಪವ್ನ್ ಹಾಡ್ನ್ ಪರತ್ ಕಿತ್ಯಾಕ್ ಮ್ಹಜೊ ವಿಚಾರ್ ಕೆಲೊಯ್?
ತುಂ ತುಜ್ಯಾ ಮತಿಂತ್ಲಿಂ ಭೊಗ್ಣಾಂ ಅನಿ ಅಪ್ರಾಧಿ ಚಿಂತಾಪ್ ಕೊಣಾಯ್‌ಲಾಗಿಂ ವಾಂಟುನ್ ಘೆಂವ್ಕ್ ಜಾಯ್ನಾಸ್ತಾನಾ ಕರ್ಗಾತಾಯ್ ತೆಂ ತುಕಾ ಪಳೆತಚ್ ಕಳಿತ್ ಜಾತಾಲೆಂ. ತುಜ್ಯಾ ತೊಂಡಾಂತ್ ಥಾವ್ನ್ ತೊ ವಿಷಯ್ ಬಾಯ್ರ್ ಕಾಡ್ನ್ ಮತಿಚ್ಯಾ ತಳ್ಮಳ್ಯಾಂತ್ಲೆಂ ತುಕಾ ಹಾಳು ಕರಿಜಾಯ್ ಮ್ಹಣ್ಚ್ಯಾ ಇರಾದ್ಯಾನ್ ಆಜ್ ತುಕಾ ಹಾಂವೆಂ ಹಾಂಗಾ ಹಾಡ್ಲೆಂ.
ಅಂಕಲ್ ಆಮ್ಕಾಂ ಶಿಕ್ಷಾ ಜಾತೆಲಿಗಿ...? ಮ್ಹಾಕಾ ಶಿಕ್ಷಾ ಜಾಲ್ಯಾರೀ ತೊಂದ್ರೆ ನಾಂತ್, ಪಾಪ್ ಪವನ್ ಅನಿ ಪ್ರಥ್ವಿಕ್ ಸೊಡ್...!
ಜಯ್ಲಾಚಿಂ ಸರಳಾಂ ಚಿಂತುನ್ ನತಾಶಾ ಸಗ್ಳೆಂಚ್ ಗಳೊನ್ ಗೆಲ್ಲೆಂ.
ಆಗುಂಬೆಚ್ಯಾ ಘಾಟ್ಯೆಕ್ ಜಾಯ್ತ್ಯೊ ಫುಂವ್ಡ್ಯೊ ಆಸಾತ್ ಪುತಾ..., ಘುಂವ್ಡೆರ್ ಥಾವ್ನ್ ಪಾಟಿಂ ಪಳೆಲ್ಯಾರ್ ವೊರೊಡ್ ಯೆತಾತ್..., ದೆಕುನ್ ಕೆದಿಂಕ್‌ಚ್ ಪಾಟಿಂ ಪಳೆಂವ್ಚೆಂನಾಕಾ...!
ಪ್ರಕಾಶಾನ್ ಕಾರ್ ಸ್ಟಾರ್ಟ್ ಕೆಲೆಂ. ಬಗ್ಲೆಚ್ಯಾ ಸಿಟಿರ್ ಬೊಸುನ್ ರಶ್ಮಿನ್ ದೊಳೆ ಧಾಂಪ್ಲೆ.
Comments
No comments yet. Be the first to say what you thought of it.
Leave a comment