ಪುಸ್ತಕಾಂಚೆಂ ವಾಚನ್ ಆನಿ ಚಿಂತನ್ ಮನ್ಶಾಕ್ ಗಿರೆಸ್ತ್ ಕರ್ತಾ - ತೊಮಾಜೀನ್ ಕಾರ್ಡೊಜ್
"ವಿದ್ಯಾರ್ಥ್ಯಾಂನಿ ವಾಚನ್ ಕರ್ಚೆಂ ಗರ್ಜೆಚೆಂ ಆಸಾ. ವಾಚನಾಂತಲ್ಯಾನ್ ಮನೀಸ್ ಘಡಟಾ. ವಾಚನಾಂತಲ್ಯಾನ್ ಮನೀಸ್ ಚಿಂತನ್ ಆನಿ ಮಂಥನ್ ಕರ್ತಾ ಆನಿ ಬರೊ ಮನಿಸ್ ಘಡಟಾ. ಸೊಶಿಯಲ್ ಮಿಡೀಯಾಚ್ಯಾ ಜಗಾಂತ್ ಘುಸ್ಪೂನ್ ಉರ್ಚೆ ಪ್ರಾಸ್ ವಾಚನಾಚ್ಯಾ ವಿಶ್ವಾಂತ್ ಗೆಲೆ ಜಾಲ್ಯಾರ್ ಜಿವಿತ್ ಆನಿಕ್ಯೀ ಸೊಭಿತ್ ಜಾತಲೆಂ" ಅಶೆಂ ನಾಮ್ನೆಚೆ ತಿಯಾತ್ರೀಸ್ತ್ ಆನಿ ಧೆಂಪೆ ಮಹಾವಿದ್ಯಾಲಯಾಚೆ ಆಧ್ಲೆ ವಿದ್ಯಾರ್ಥಿ ತೊಮಾಜೀನ್ ಕಾರ್ಡೊಜ್ ಹಾಣಿಂ ಅಪ್ಲ್ಯಾ ಉಲವ್ಪಾಂತ್ ಮ್ಹಳೆಂ.
ಧೆಂಪೆ ಮಹಾವಿದ್ಯಾಲಯ್ (ಸ್ವಾಯತ್ತ್), ಆಶಾವಾದಿ ಪ್ರಕಾಶನ್ ಆನಿ ಸಂಜನಾ ಪಬ್ಲಿಕೆಶನ್ಸ್ ಹಾಂಚ್ಯಾ ಜೊಡ್-ಪಾಲವಾನ್ ಆಯೊಜೀತ್ ಕೆಲ್ಲ್ಯಾ ‘ಪುಸ್ತಕ್ ಪ್ರಕಾಶನ್ ಆನಿ ಅಣ್ಕಾರ್ ಕಾರ್ಯಶಾಳಾ’ ಹ್ಯಾ ಕಾರ್ಯಾವಳೀಂತ್ ಶೈಲೆಂದ್ರ ಮೆಹ್ತಾ ಹಾಂಚ್ಯಾ ‘ಲ ಪೆಸ್ತ್ (ಅಣಕಾರೀತ್ ಕಾದಂಬರಿ) ಆನಿ ‘ಆಲ್ಗೊರಿದಮಾಚ್ಯಾ ವಿಶ್ವಾಂತ್’ (ಕವಿತಾ ಸಂಗ್ರಹ್) ಹ್ಯಾ ಪುಸ್ತಕಾಂಚೆಂ ಲೊಕಾರ್ಪಣ್ ಜಾಲೆಂ. ಹ್ಯಾ ವೆಳಾರ್ ಮುಖೆಲ್ ಸಯ್ರೆ ತೊಮಾಜಿನ್ ಕಾರ್ಡೊಜ್, ಗೊವಾ ಕೊಂಕಣಿ ಅಕಾದೆಮೀಚೆ ಅಧ್ಯಕ್ಷ್ ಡೊ. ಪುರ್ಣಾನಂದ ಚ್ಯಾರೀ, ದಲ್ಗಾದೊ ಕೊಂಕಣಿ ಅಕಾದೆಮಿಚೆ ಅಧ್ಯಕ್ಷ್ ಬಾ. ಮಾಯ್ರನ್ ಬಾರೆಟೊ, ಲೇಖಕ್ ಶೈಲೆಂದ್ರ ಮೆಹ್ತಾ, ಸಂಜನಾ ಪಬ್ಲಿಕೆಶನ್ಸಚೆ ಪ್ರಕಾಶಕ್ ದಿನೆಶ್ ಮಣೆರಕಾರ್, ಪ್ರಾಚಾರ್ಯ್ ಪ್ರೊ.ಡೊ. ರಾಮು ಮೂರ್ತಿ ಆನಿ ವಿಭಾಗ್ ಮುಖೆಲಿ ಡೊ ವೈಶಾಲಿ ನಾಯಕ್ ವೆದಿಚೆರ್ ಹಾಜರ್ ಆಸ್ಲ್ಲಿಂ.
ಮಾನೆಸ್ತ್ ಸುಹಾಸ್ ಸಡೆಕಾರ್ ಆನಿ ಪ್ರಾ. ಗೌರಾಂಗ್ ಭಾಂಡಿಯೆ ಹಾಂಣಿ ಪುಸ್ತಕಾಂಚೆರ್ ಉಲೊವಪ್ ಕೆಲೆಂ. ಹ್ಯಾ ವೆಳಾರ್ ರೀಲ್ ಆನಿ ಪ್ರಸ್ನಮಾಚಿ ಸರ್ತೀಂತ್ ಜೈತೀವಂತ್ ಜಾಲ್ಲ್ಯಾ ವಿದ್ಯಾರ್ಥ್ಯಾಂಚೊ ಸನ್ಮಾನ್ ಜಾಲೊ. ಕೊಶಕಾರ್ ದಾಮೊದರ್ ಘಾಣೆಕಾರ್ ಆನಿ ಅಣಕಾರ್ಪಿ ಶೈಲೆಂದ್ರ ಮೆಹತಾ ಹಾಂಣಿ ‘ತಾಂತ್ರೀಕ್ ಅಣ್ಕಾರ್’ ಹ್ಯಾ ವಿಶಯಾಚೆರ್ ಕಾರ್ಯಶಾಳಾ ಘೆತಲಿ. ವಿದ್ಯಾರ್ಥ್ಯಾಂಕ್ ಅಣ್ಕಾರಾ ಸಂದರ್ಭಾಂತಲಿ ಆವ್ಹಾಂನಾಂ ಆನಿ ಉಪಾಯ್ ಹಾಂಚೆರ್ ಮಾರ್ಗದರ್ಶಕಾಂನಿ ಚರ್ಚಾ ಕೆಲಿ. ಹ್ಯಾ ವೆಳಾರ್ ಮುಖೆಲ್ ಸಯ್ರೆ ತೊಮಾಜಿನ್ ಕಾರ್ಡೊಜ್ ಹಾಂಕಾಂ ಕುಣಬಿ ಜಾಕೀಟ್, ತಶೆಂಚ್ ಹೆರ್ ಮಾನೆಸ್ತಾಂಚೊ ಗೊಂಯಚ್ಯಾ ಪರಂಪರೀಕ್ ಹಸ್ತಕಲೆಚೆಂ ಪ್ರತೀಕ್ ದಿವನ್ ಪ್ರಾಚಾರ್ಯಾಂನಿ ಸನ್ಮಾನ್ ಕೆಲೊ.
ಹೆ ಕಾರ್ಯಾವಳೀಕ್ ಸುಮಾರ್ ಶೆಂಬೊರ್ ಜಣಾಂನಿ ವಾಂಟೊ ಘೆತ್ಲೊ. ಕೊಂಕಣಿ ಸಾಹಿತ್ಯೀಕ್, ಸಂಘಟಕ್, ಮಹಾವಿದ್ಯಾಲಯಾಚೆ ಹೆರ್ ಪ್ರಾಧ್ಯಾಪಕ್ ಆನಿ ವಿದ್ಯಾರ್ಥಿ ಹಾಜರ್ ಆಸ್ಲ್ಲೆ.
ಪುರಾಯ್ ಕಾರ್ಯಾವಳೀಚೆಂ ಸುತ್ರಸಂಚಾಲನ್ ಪ್ರಾ. ವಿಧಿತಾ ಶೆಟ್, ಜಾಲ್ಯಾರ್ ಕಾರ್ಯಾವಳೀಚೆಂ ಸಂಯೊಜನ್ ಆನಿ ಉಪಕಾರಾಚೆಂ ಉಲೊವ್ಪ್ ಪ್ರಾ. ಅಂಜು ಸಾಖರದಾಂಡೆ ಹಾಂಣಿ ಕೆಲೆಂ.
