ಸಾಹಿತ್ಯಿಕ್ ಲಿಖ್ಣಿ ಅಂತರಾಶ್ಟ್ರೀಯ್ ಕಾರ್ಯಾಗಾರ್ ಆನಿ ಆಶಾವಾದಿ.ಕೊಮ್ ಲೊಕಾರ್ಪಣ್
18 ಸಪ್ಟೆಂಬರ್ (ಮಂಗ್ಳುರ್): ಮಂಗ್ಳುರ್ ವಿಶ್ವ ವಿದ್ಯಾಲಯ್ ಕೊಂಕಣಿ ಅಧ್ಯಯನ ಪೀಠ ಆನಿ ಸಾಂ.ಲೂವಿಸ್ ಪರಿಗಣಿತ್ ವಿಶ್ವವಿದ್ಯಾಲಯಚ್ಯಾ ಜೋಡ್ ಆಸ್ರ್ಯಾಖಾಲ್ ಎಕಾ ದಿಸಾಚೆಂ ಅಂತರಾಶ್ಟ್ರೀಯ್ ಸ್ಥರಾಚೆಂ ಕಾರ್ಯಾಗಾರ್ ’ಸಾಹಿತ್ಯಿಕ್ ಲಿಖ್ಣಿ’ ಸಾಂ ಲುವಿಸ್ ವಿಶ್ವವಿದ್ಯಾಲಯಚ್ಯಾ ಸಭಾಂಗಣಾಂತ್ ಮಾಂಡುನ್ ಹಾಡ್ಲೆಂ.
ಮುಖೇಲ್ ಸಯ್ರೆ ಜಾವ್ನ್ ದೊ.ಆಸ್ಟಿನ್ ಡಿಸೋಜ ಪ್ರಭು ಇಲಿನೊಯ್ ಥಾವ್ನ್ ಹಾಜರ್ ಆಸೊನ್ ಲಿಖ್ಣಿ ಅನಿ ವೀಜ್ ಡಿಜಿಟಲ್ ನೆಮಾಳ್ಯಾವಿಶಿಂ ಅಪ್ಣಾಚಿಂ ಭೊಗ್ಣಾಂ ಅನಿ ಅನ್ಬೋಗ್ ವಾಂಟುನ್ ಘೆತ್ಲೊ. ವಿಶ್ವವಿದ್ಯಾಲಯಚೆ ಕುಲಪತಿ ಮಾ.ದೊ.ಕ. ಪ್ರವೀಣ್ ಮಾರ್ಟಿಸ್ ಜೆ.ಸ. ಕೊಂಕಣಿ ಬಾವ್ಟೊ ಉಭಾರ್ನ್ ಕೊಂಕಣಿ ಮಾಯೆಕ್ ವಂದನ್ ಕರ್ನ್, ಕೊಂಕಣಿ ವಿಶ್ವವಿದ್ಯಾಲಯ ಭಿತರ್ ಜಿವಾಳ್ ಆನಿಂ ಕ್ರಿಯಾಳ್ ಮ್ಹಳ್ಳೆಂ ದೃಶ್ಟಾಂತ್ ದೀವ್ನ್, ಸಂದೇಶ್ ದಿಲೊ.
ಹೆಚ್ ಸಂದರ್ಭಾರ್ ದೊ.ಚಾರ್ಲ್ಸ್ ಲೊಬೊನ್ ಕೊಂಕಣಿ ಡಿಜಿಟಲ್ ಕಾಳಾಚ್ಯಾ ಸುರ್ವಾತೆರ್ ಆಶಾವಾದಿ ಪ್ರಕಾಶನಾನ್ ಕೆಲ್ಲ್ಯಾ ವಾವ್ರಾಚಿ ಮೊಟ್ವಿ ಒಳೊಕ್, ದಾಯ್ಜ್.ಕೊಮ್, ಪಯ್ಣಾರಿ.ಕೊಮ್ ಆನಿ ಕೆ.ಬಿ.ಎಸ್. (ಕೊಂಕಣಿ ಬಿಯೊಂಡ್ ಸ್ಕ್ರಿಪ್ಟ್) ಮಿಸಾಂವಾವಿಶಿಂ ವಿವರ್ ಆಟಾಪ್ಚೆಂ ಪ್ರೆಸೆಂಟೆಶನ್ ದಿಲೆಂ. ಆಶಾವಾದಿ ಪ್ರಕಾಶನಾಚಿ ತ್ರಿಲಿಪಿಚಿ (ಕನ್ನಡ, ನಾಗರಿ ಆನಿ ರೊಮಿ ಲಿಪಿಂತ್ ಆಸ್ಚಿ) ವೆಬ್ಸಾಯ್ಟ್ ಆಶಾವಾದಿ.ಕೊಮ್ ಲೊಕಾರ್ಪಣ್ ಕೆಲ್ಲೊ; ಸಾಂ.ಲೂವಿಸ್ ವಿದ್ಯಾ ಸಂಸ್ಥೆಚ್ಯಾ ವ್ಹಡಿಲ್ ರೆಕ್ಟರ್ ಮಾ.ಬಾ. ಬ್ರಾಯನ್ ಪಿರೇರಾ ಅಪ್ಲ್ಯಾ ಉಲವ್ಪಾಂತ್ ಜೆಜ್ವಿತಾಂಚೊ ವಾವ್ರ್ ಕೊಂಕಣಿ ಖಾತಿರ್ ಕಸೊ ಊರ್ಜಿತ್ ಜಾಲಾ ಮ್ಹಳ್ಳ್ಯಾ ವಿಶಿಂ ಮಾಹೆತ್ ದಿಲಿ. ಕೊಂಕ್ಣಿ ಸಂಸ್ಥ್ಯಾಚೆ ನಿರ್ದೇಶಕ್ ಮಾ.ಬಾ.ಪ್ರಶಾಂತ್ ಮಾಡ್ತಾ, ಕೊಂಕಣಿ ಸಂಘಾಚಿ ಕಾರ್ಯದರ್ಶಿ ಶನನ್ ಪಿಂಟೊ ಆನಿಂ ಆರೋನ ಪಿಂಟೊ ವೆದಿರ್ ಹಾಜರ್ ಆಸ್ಲ್ಲೆ.
ಅಂತರಾಶ್ಟ್ರೀಯ್ ಕಾರ್ಯಾಗಾರಾಕ್ ಮಂಗ್ಳುರ್ ವಿಶ್ವ ವಿದ್ಯಾಲಯ್ ಕೊಂಕಣಿ ಅಧ್ಯಯನ ಪೀಠಚಿ ಸಂಯೋಜಕಿ ದೊ,ಪ್ರೀತಿ ಕೀರ್ತಿ ಡಿಸೊಜಾನ್ ಯೆವ್ಕಾರ್ ಮಾಗ್ಲೊ, ಮಾನೆಸ್ತಿಣ್ ಫ್ಲೋರಾ ಕ್ಯಾಸ್ತೆಲಿನೊ (ಕೊಂಕಣಿ ವಿಭಾಗಾಚಿ ಮುಖೆಸಿಣ್) ಧಿನ್ವಾಸ್ ಪಾಠಯ್ಲೆ.
ದೆವಾಧಿನ್ ಮಿಕ್-ಮ್ಯಾಕ್ಸಾವಿಶಿಂ ಪರಿಸಂವಾದ್ ಮಾನೆಸ್ತಿಣ್ ಜ್ಯೂಲಿಯೆಟ್ ಮೊರಾಸ್ ಆನಿಂ ಹೇಮಚಾರ್ಯನ್ ಭಾಗ್ ಘೆವ್ನ್ ವಿವಿಧ್ ಗಾವ್ಪ್ಯಾಂ ಮಾರಿಫಾತ್ ತಾಚಿ ಗಾಣಾಂ ಮಾನೆಸ್ತ್ ಸಂಜಯ್ ರೊಡ್ರಿಗಾಸಚ್ಯಾ ಸಂಗೀತ ನಿರ್ದೇಶನಾದ್ವಾರಿಂ ಸಾದರ್ ಕೆಲಿಂ. ಹ್ಯಾ ಸಂದರ್ಭಾರ್ ಕೊಂಕ್ಣಿ ಫಿಲ್ಮ್ ’ನಾಚುಯಾಂ ಕುಂಪಾಸರ್’ ಮ್ಹಳ್ಳೆಂ ಪ್ರದರ್ಶಿತ್ ಜಾಲೆಂ.
ಭಾತ್ಮಿ ಆನಿ ತಸ್ವಿರೊ: ಫ್ಲೋರಾ ಕ್ಯಾಸ್ತಲಿನೊ
