ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ದೋನ್
ತುಜೆಂ ಜಿವಿತ್ ತುಜಿ ವಿಂಚವ್ಣ್
ನ್ಹಂಯ್
ಆವಸ್ವರ್ ವೀಸ್: ಮಿಶೇಲ್ ರಾಯನ್ ಆಲಿಯಾ
"ಡಿಬಟ್ ಹೀರೋಯಿನ್ ಶಾಟ್ ಇನ್ ಹರ್ ರೆಸಿಡೆನ್ಸ್!"
"ಆಲಿಯಾ ಖಾನ್! ಫೌಂಡ್ ಲಾಯಿಂಗ್ ಇನ್ ಎ ಪೂಲ್ ಆಫ್ ಬ್ಲಡ್!"
"ಬಾಲಿವುಡ್ ಹಿಟ್ ಬೈ ಮುಂಬಯಿ ಅಂಡರ್ ವರ್ಲ್ಡ್!"
ಆಯ್ಚಾ ದಿಸಾಚಾ ಇಂಡಿಯನ್ ಎಕ್ಸ್ಪ್ರೆಸ್, ಡೆಕ್ಕನ್ ಹೆರಾಲ್ಡ್, ದಿ ಟಾಯ್ಮ್ಸ್ ಆಫ್ ಇಂಡಿಯಾ ದಿಸಾಳ್ಯಾ ಪತ್ರಾಂಚೆಂ ಹೆಡ್ಲೈನ್ಸ್ ಸಗ್ಳ್ಯಾ ಬಾಲಿವುಡಾಕ್ಚ್ ಹಾಲವ್ನ್ ಸೊಡ್ಚಾಂತ್ ಜಯ್ತೆವಂತ್ ಜಾಲ್ಲಿಂ.
ಆಯ್ಚಾ ದಿಸಾಚಿ ಸಣ್ಸಣಿ ಖಬಾರ್! ಆಲಿಯಾ ಖಾನಾ ವಯ್ರ್ ಗಂಭೀರ್ ಮರಣಾಂತಿಕ್ ಹಲ್ಲೊ ಜಾಲ್ಲೊ! ಅಖ್ಖ್ಯಾ ಮುಂಬಯಿಚಾ ಲೊಕಾನಿಂ ಆಪ್ಲ್ಯೊ ಆಸ್ಡ್ಯೊ ವಯ್ರ್ ಕೆಲ್ಲ್ಯೊ!
ಪರ್ತ್ಯಾಕ್ ಏಕ್ ಪಾವ್ಟಿಂ ಅಂಡರ್ ವರ್ಲ್ಡಾಚೆಂ ಕಾರ್ಬಾರ್ ಮುಂಬಯಿಚ್ಯಾ ಲೊಕಾ ಮುಕಾರ್ ಉಭೆಂ ಜಾಲ್ಲೆಂ!
ಹ್ಯಾ ಖಬ್ರೆನ್ ಉಟಾಉಟಿಂ ಅಂಡರ್ ವರ್ಲ್ಡಾಚ್ಯಾ ದಾರಾಕ್ ಠೊಕೆ ಮಾರ್ಲೆಲೆ ಆಸ್ತಾಂ ಮುಂಬಯಿ ಪೊಲಿಸ್ ಸ್ಪೆಶಲ್ ಸ್ಕ್ವಾಡಾಚೆ ಎನ್ಕಾಂವ್ಟರ್ ಸ್ಪೆಶಲಿಶ್ಟ್ ತಾಂಚಾ ಲಿಸ್ಟಾಚೆರ್ ಆಸ್ಲ್ಲ್ಯಾ ಸಭಾರಾಂಚಾ ದಾರಾರ್ ಉಭೆ ಜಾಲ್ಲೆ!
ಬಾಲಿವುಡಾಚಾ ಹೀರೋಯಿನಾ ವಯ್ರ್ ಹಲ್ಲೊ ಮ್ಹಳ್ಯಾರ್? ಸಗ್ಳಿ ಫಿಲ್ಮ್ ಇಂಡಸ್ಟ್ರಿಚ್ ಉಟೊನ್ ರಾವ್ಲ್ಲಿ!
ರಾತ್ ನಿತ್ಳೊನ್ ಫಾಲೆಂ ಜಾಂವ್ಚ್ಯಾ ಭಿತರ್ ಅಖ್ಖೆಂ ಮುಂಬಯಿ ಶ್ಹೆರ್ ಹಾಲ್ಲ್ಲೆಂ!
ಕಾಲ್ಚ್ಯಾ ಸಾಂಜೆರ್ ರಾಯನಾಕ್ ಆಲಿಯಾಚೆಂ ಪೋನ್ ಆಯ್ಲ್ಯಾ ಉಪ್ರಾಂತ್ ರಾಯನಾನ್ ವೇಳ್ ಕಾಡುಂಕ್ ನಾತ್ಲ್ಲೊ. ತೊ ಉಟಾಉಟಿಂ ಆಲಿಯಾಚಾ ಪ್ಲ್ಯಾಟಾಕ್ ಆಯಿಲ್ಲೊ.
ಆಲಿಯಾನ್ ಪೊನಾರ್ ಸಾಂಗ್ಲ್ಯಾ ಪರಿಂಚ್ ಘಡ್ಲ್ಲೆಂ! ತಾಚ್ಯಾ ವಯ್ರ್ ಹಲ್ಲೊ ಜಾಲೊ ಆನಿ ತೆಂ ತೆಂ ಮರ್ಣಾಕ್ ಭೋವ್ ಲಾಗಿಂ ಜಾಲ್ಲೆಂ.
ವೇಳ್ ವಿಭಾಡಿನಾಸ್ತಾನಾ ರಾಯನಾನ್ ಆಲಿಯಕ್ ಆಸ್ಪತ್ರೆಕ್ ವರುಂಕ್ ನಾತ್ಲ್ಲೆಂ ಜಾಲ್ಯಾರ್ "ಆಲಿಯಾ ಖಾನ್! ಬಾಲಿವುಡ್ ಹೀರೋಯಿನ್ ಶಾಟ್ ಡೆಡ್!" ಆಯ್ಚಾ ದಿಸಾಳ್ಯಾ ಪತ್ರಾಂನಿ ಹಿ ಖಬಾರ್ ವಾಚುಂಕ್ ಮೆಳ್ತಿ.
ಆಲಿಯಾ ಐ. ಸಿ. ಯು ಚಾ ದಾರಾ ಭಿತರ್ ಜೀವನ್ ಮರಣಾ ಮಧೆಂ ಉಡ್ಡಾತಾಲೆಂ. ತಾಚ್ಯಾ ಆಂಗಾಂತ್ಲೆಂ ಚಡ್ತ್ಶೆಂ ರಗಾತ್ ಗಳೊನ್ ಗೆಲ್ಲೆಂ. ತಾಚ್ಯಾ ಪೊಟಾಕ್ ದೋನ್ ಜಾಗ್ಯಾರ್ ಪಿಸ್ತುಲಾಚೆ ಪೈರಿಂಗ್ ಶಾಟ್ಸ್ ಜಾಲ್ಲೆ!
ಹ್ಯಾ ಸಗ್ಳ್ಯಾ ಘಟನಾಂತ್ ರಾಯನ್ ಪ್ರಮುಖ್ ಸಾಕ್ಶಿದಾರ್ ಜಾವ್ನ್ ಆಸ್ಲ್ಲೊ. ತಾಣೆಂಚ್ ಸಾಂಗ್ಲ್ಲ್ಯಾ ಪರಿಂ ಆಲಿಯಾ ನಿಮಾಣೆಂ ಉಲಯಿಲ್ಲೆಂ ಮ್ಹಳ್ಯಾರ್ ರಾಯನಾಲಾಗಿಂ! ತ್ಯಾ ಶಿವಾಯ್ ಆಲಿಯಾನ್ ಆಪ್ಣಾ ವಯ್ರ್ ಹಲ್ಲೊ ಕೆಲ್ಲ್ಯಾಚೆಂ ನಾಂವ್ ರಾಯನಾ ಲಾಗಿಂ ಉಚಾರ್ಲ್ಲೆಂ.
"ಇಕ್ಬಾಲ್ ಭಾಯೀ!"
ರಾಯನಾನ್ ಹ್ಯಾ ನಾಂವಾಕ್ ಆಲಿಯಾಚಾ ತರ್ಫೆನ್ ಪತ್ರ್ಕಾರಾಂಚಾ ಆನಿ ಪೊಲಿಸಾಂಚಾ ಮುಕಾರ್ ಉಗ್ಡಾಪೆಂ ಕೆಲ್ಲೆಂ. ಪುಣ್ ಪೊಲಿಸ್ ಮಾತ್ರ್ ಆಲಿಯಾಚಾ ತೊಂಡಾ ಥಾವ್ನ್ಚ್ ಹೆಂ ನಾಂವ್ ಆಯ್ಕೊಂಕ್ ಆಶೆತಾಲೆ.
ಹ್ಯಾ ಘಡಿತಾನ್ ಎಕಾಚ್ಚ್ ದಿಸಾ ಭಿತರ್ ಸಗ್ಳ್ಯಾ ಅಂಡರ್ ವರ್ಲ್ಡಾಕ್ ಆನಿ ಬಾಲಿವುಡಾಕ್ ಹಾಲವ್ನ್ ಸೊಡ್ಲ್ಲೆಂ. ಎಕಾ ಕುಶಿಂನ್ ಸಗ್ಳೆಂ ಬಾಲಿವುಡ್ ಆಲಿಯಾಚಾ ಪಾಟ್ಲ್ಯಾನ್ ತಾಕಾ ಹಾತಾಕ್ ಹಾತ್ ದೀವ್ನ್ ಸಾಂಗಾತ್ ದೀಂವ್ಕ್ ತಯಾರ್ ಜಾವ್ನ್ ರಾವ್ಲೆಂ ತರ್ ದುಸ್ರ್ಯಾ ಕುಶಿಂನ್ ಸಗ್ಳ್ಯಾ ಅಂಡರ್ ವರ್ಲ್ಡಾಚೆ ಮುಂಬಯಿ ಥಾವ್ನ್ ಪಲಾಯನಾಕ್ ಆಯ್ತೆ ಜಾಲ್ಲೆ.
ವಿಚಾರಣ್ ಆರಂಭ್ ಕೆಲ್ಲ್ಯಾ ಪೊಲಿಸಾಂಕ್ ಆಲಿಯಾಚೆಂ ಸೆಲ್ಪೋನ್ ಆನಿ ಟಿಪಾಯಿ ವಯ್ರ್ ಏಕ್ ಹ್ಯಾಂಡ್ ಗ್ಲೌಸ್ ಆನಿ ಆಲಿಯಾಕ್ ಶೂಟ್ ಕೆಲ್ಲೆಂ ತೆಂ ಪಿಸ್ತುಲ್ ಟೀಪಾಯಿಚ್ಯಾ ಲಾಗಿಂಚ್ ದೆಗೆನ್ ಪಡೊನ್ ಆಸ್ಲ್ಲೆಂ ಮೆಳ್ಳೆಂ.
ಹಲ್ಲೊ ಜಾಲ್ಲ್ಯಾ ಜಾಗ್ಯಾರ್ ಮೆಳ್ಲ್ಲ್ಯಾ ವಸ್ತುಂಕ್ ಪೊಲಿಸಾಂನಿ ಫಾರೆನ್ಸಿಕ್ ಲ್ಯಾಬಾಕ್ ಮುಕ್ಲ್ಯಾ ವಿಚಾರಣಾ ಖಾತಿರ್ ದಾಡುನ್ ದಿಲ್ಲೆಂ ತರ್ಯ್ ಆಲಿಯಾಚಾ ಸೆಲ್ಪೋನಾಂತ್ ಆಯಿಲ್ಲೆಂ ನಿಮಾಣೆಂ ಪೋನ್ ಕಾಲ್ ಆನಿ ತಾಚ್ಯಾ ನಂಬರಾ ವಯ್ರ್ ವಿಚಾರಣ್ ಚಲಯಿಲ್ಲ್ಯಾ ಪೊಲಿಸಾಂಕ್ ತೆಂ ಪೋನ್ ಕಾಲ್ ಇಕ್ಬಾಲಾಚೆಂಚ್ ಮ್ಹಣೊನ್ ಖಚಿತ್ ಜಾಲ್ಲೆಂ. ತ್ಯಾ ಶಿವಾಯ್ ಆಲಿಯಾಕ್ ಇಕ್ಬಾಲಾಚೆಂ ಪೋನ್ ಕಾಲ್ ಯೇವ್ನ್ ಫಕತ್ತ್ ಎಕಾ ವೊರಾ ಭಿತರ್ ಹೆಂ ಘಡಿತ್ ಘಡೊನ್ ಗೆಲ್ಲೆಂ.
ಆಲಿಯಾಚಾ ಪೋನಾನ್ ಹ್ಯಾ ಹಲ್ಲ್ಯಾಚಾ ವಿಚಾರಣಾಂತ್ ಪೊಲಿಸಾಂಕ್ ಚಡ್ಚ್ ಮಜತ್ ಕೆಲ್ಲಿ. ಆಲಿಯಾಚಾ ಪೋನ್ ಡೈರಿಂತ್ ಪೊಲಿಸಾಂಕ್ ಸಾಂಪಡ್ಲ್ಲಿಂ ಫಕತ್ತ್ ತೀನ್ ಪೋನ್ ನಂಬರಾಂ. ಏಕ್ ರಾಯನಾಚೆಂ. ದುಸ್ರೆಂ ಸಾವಂತಾಚೆಂ ಆನಿ ತಿಸ್ರೆಂ ಹೆಂ ಇಕ್ಬಾಲಾಚೆಂ. ರಾಯನ್ ಆನಿ ಸಾವಂತ್ ದೊಗ್ಯ್ ಪೊಲಿಸಾಂಚಾ ಮುಕಾರ್ ಹಾಜರ್ ಆಸ್ಲ್ಲೆ ಆಸ್ತಾಂ ಆಲಿಯಾಕ್ ಖುದ್ದ್ ರಾಯನಾನ್ ಆನಿ ಸಾವಂತಾನ್ ಆಲಿಯಾಚಾ ಪ್ಲ್ಯಾಟಾ ಥಾವ್ನ್ ತ್ಯಾ ತಾಣೆಂ ರಾಂವ್ಚ್ಯಾ ಆಪಾರ್ಟ್ಮೆಂಟಾಚಾ ವಾಚ್ಮ್ಯಾನಾಚಾ ಮಜತೆನ್ ಅಸ್ಪತ್ರೆಕ್ ಹಾಡ್ಲ್ಲೆಂ.
ರಾಯನಾ ಆನಿ ಸಾವಂತಾನ್ ಖುನ್ ಕರುಂಕ್ ಪ್ರಯತ್ನ್ ಕರುಂಕ್ ನಾ ಮ್ಹಳ್ಳ್ಯಾಕ್ ಸಾಕ್ಸ್ ಜಾವ್ನ್ ಆಪಾರ್ಟ್ಮೆಂಟಾಚೊ ವಾಚ್ಮ್ಯಾನ್ ಸಾರಂಗ್ ಭಳಾಧೀಕ್ ಸಾಕ್ಸ್ ಜಾವ್ನ್ ಉಭೊ ಆಸ್ಲ್ಲೊ.
ವಾಚ್ಮ್ಯಾನ್ ಸಾರಂಗಾಚಾ ಸಾಕ್ಶೆ ಪ್ರಕಾರ್ ಆಲಿಯಾ ವಯ್ರ್ ಹಲ್ಲೊ ಜಾಲ್ಲ್ಯಾ ವೆಳಾರ್ ಆಲಿಯಾಕ್ ತಾಚ್ಯಾ ಆಪಾರ್ಟ್ಮೆಂಟಾಂತ್ ತಾಕಾ ಮೆಳೊಂಕ್ ಏಕ್ ಮರ್ಸಿಡೀಸ್ ಕಾರ್ ಆಯಿಲ್ಲೆಂ. ತ್ಯಾ ಕಾರಾರ್ ಆಯಿಲ್ಲ್ಯಾಂಕ್ ಸಾರಂಗ್ ವಳ್ಕಾನಾತ್ಲ್ಲೊ. ತೆ ತಾಕಾ ಅಪರಿಚಿತ್. ಹ್ಯಾ ಕಾರಾರ್ ಆಯಿಲ್ಲೆ ತೆ ವ್ಯಕ್ತಿ ಅಲಿಯಾಚಾ ಪ್ಲ್ಯಾಟಾ ಥಾವ್ನ್ ದೆಂವೊನ್ ಗೆಲ್ಯಾ ಉಪ್ರಾಂತ್ಚ್ ತಾಕಾ ಬಿಲ್ಡಿಂಗಾಚಾ ಇಂಟರ್ಕೋಮಾಚೆರ್ ಆಲಿಯಾಚೆಂ ಪೋನ್ ಆಯಿಲ್ಲೆಂ. ಸಾರಂಗ್ ಇತ್ಲೆಂ ಮಾತ್ರ್ ಜಾಣಾಂ!
ಆಪ್ಣಾ ವಯ್ರ್ ಹಲ್ಲೊ ಕೆಲ್ಲ್ಯಾಚೆಂ ನಾಂವ್ ಆಲಿಯಾನ್ ಫಕತ್ತ್ ರಾಯನಾ ಲಾಗಿಂ ಮಾತ್ರ್ ಉಚಾರ್ಲ್ಲೆಂ ಶಿವಾಯ್ ತಾಣೆಂ ಸಾರಂಗಾ ಲಾಗಿಂ ಇಕ್ಬಾಲಾಚೆಂ ನಾಂವ್ ಕಾಡುಂಕ್ ನಾತ್ಲ್ಲೆಂ. ಹ್ಯಾ ವಿಶಯಾಂತ್ ಪೊಲಿಸಾಂಕ್ ಥೊಡೊ ದುಬಾವ್ ಆಸ್ಲ್ಲೊ ಜಾಲ್ಯಾರ್ಯ್ ಆಲಿಯಾಚಾ ಪೊನಾನ್ ತ್ಯಾ ದುಬಾವಾಕ್ ಪಯ್ಸ್ ಕೆಲ್ಲೆಂ. ಪುಣ್ ಪೊಲಿಸಾಂಕ್ ಖುದ್ದ್ ಆಲಿಯಾಚಾ ಸಾಕ್ಶೆಚಿ ರಾಕೊಣ್ ಆಸ್ಲ್ಲಿ.
ಹ್ಯಾ ಮಧೆಂ ಮುಂಬಯಿ ಅಂಡರ್ ವರ್ಲ್ಡಾಚಿಂ ಪೊನಾಂ ಕಾಮ್ ಕರುಂಕ್ ಲಾಗ್ಲ್ಲಿಂ.
ಐ. ಸಿ. ಯು. ಂತ್ ಜೀವನ್ ಮರಣಾ ಮಧೆಂ ಉಡ್ಡೊಂಚಾ ಆಲಿಯಾಕ್ ಮರಣ್ ತಾಕಾ ಸೊಡುನ್ ಧಾಂವ್ತಾನಾ ದೋನ್ ದೀಸ್ ಪಾಶಾರ್ ಜಾಲ್ಲೆ.
ಚವ್ತ್ಯಾ ದಿಸಾ ಆಲಿಯಾಚೊ ಉಚಾರ್ ಪೊಲಿಸಾಂ ಮುಕಾರ್ ಆಯ್ಲೊ!
ಇಕ್ಬಾಲ್ ಭಾಯಿ ಆನಿ ತಾಚೊ ಭಾವ್ ರಾಶಿದ್! ಆಲಿಯಾನ್ ಹ್ಯಾ ನಾಂವಾಂಕ್ ಉಚಾರ್ಲ್ಲೆಂ.
ಇಕ್ಬಾಲ್ ಆನಿ ರಾಶಿದಾಚೆಂ ಅರೆಸ್ಟ್ ವಾರಂಟ್ ಜ್ಯಾರಿ ಜಾಲೆಂ.
ಪೊಲಿಸಾಂನಿ ಜಾತಾ ತಿತ್ಲೆಂ ದೊಗಾಂಯ್ಚಿಂ ಸೊಧ್ನಾಂ ಕೆಲಿಂ ಜಾಲ್ಯಾರ್ಯ್ ತೆ ಯಶಸ್ವಿ ಜಾಲೆ ನಾಂತ್. ಇಕ್ಬಾಲ್ ಆನಿ ರಾಶಿದ್ ದೊಗ್ಯ್ ಅಂಡರ್ಗ್ರೌಂಡ್ ಜಾಲ್ಲೆ.
ರಾಯನಾನ್ ಆಪ್ಣಾ ತರ್ಫೆನ್ ಪೊಲಿಸಾಂಕ್ ಜಾಯ್ತಿ ಕುಮಕ್ ಕೆಲಿ. ತಾಕಾ ಕಶೆಂ ತರ್ಯ್ ಜಾತಾ ತಿತ್ಲ್ಯಾ ವೆಗ್ಗಿಂ ಇಕ್ಬಾಲಾಚಾ ಅರೆಸ್ಟಾ ವಿಶಿಂ ಆಯ್ಕೊಂವ್ಚಿ ಉಮೆದ್ ಆಸ್ಲ್ಲಿ. ರಾಯನ್ ಆಪ್ಲ್ಯಾ ದುಸ್ಮಾನಾಂಕ್ ಕೆದ್ನಾಂಚ್ ಭೊಗ್ಸುಂಚಾ ಸ್ವಭಾವಾಚೊ ನ್ಹಯ್! ತ್ಯಾ ಭಾಯ್ರ್ ಆಪ್ಣಾಕ್ ಜಾಯ್ ಆಸ್ಲೆಲ್ಯಾ ಸಾವಂತಾಚಾ ಬ್ಯಾನರಾಂತ್ ಕಾಮ್ ಕರ್ಚ್ಯಾ ಆಪ್ಣೆ ಬಾಲಿವುಡಾಕ್ ಪರಿಚಯ್ ಕರುನ್ ದಿಲ್ಲ್ಯಾ ಚಲಿಯೆ ವಯ್ರ್ ಅಚಾನಕ್ ಆಶೆಂ ಇಕ್ಬಾಲಾನ್ ಹಲ್ಲೊ ಕೆಲಾ ಮ್ಹಳ್ಯಾರ್! ರಾಯನಾಕ್ ಹೆಂ ತಡ್ವುಂಕ್ ಸಾದ್ಯ್ ನಾ ಮ್ಹಣ್ಚ್ಯಾ ತಸಲೆಂ!
ಇಕ್ಬಾಲಾನ್ ಆನಿ ಕುಲದೀಪನ್ ಮೆಳೊನ್ ಪಯ್ಲೆಂಚ್ ತ್ಯಾ ಅಮ್ರತಾಕ್ ಸಾವಂತಾಚಾ ಬ್ಯಾನರಾ ಥಾವ್ನ್ ನಿಕ್ಳಾವ್ನ್ ರಾಯನಾಕ್ ಮಸ್ತ್ ಲುಕ್ಸಾಣ್ ಕೆಲ್ಲೆಂ ಜಾಲ್ಯಾರ್ ಆತಾಂ ಆಲಿಯಾಕ್ ಜಿವೆಶಿಂ ಮಾರ್ಚೆಂ ಪ್ರಯತ್ನ್?
’ಯು ಮಸ್ಟ್ ಪೇ ಫಾರ್ ದಿಸ್!’ ರಾಯನಾನ್ ನಿರ್ಧಾರ್ ಕೆಲ್ಲೊ.
ಹ್ಯಾಚ್ ಖಾತಿರ್ ಆಜ್ ತೊ ಆಲಿಯಾಕ್ ಮೆಳೊಂಕ್ ಆಸ್ಪತ್ರೆಕ್ ಆಯಿಲ್ಲೊ. ಇಕ್ಬಾಲಾನ್ ಆಲಿಯಾ ವಯ್ರ್ ಹಲ್ಲೊ ಕರುನ್ ಫಕತ್ತ್ ಆಲಿಯಾ ವಯ್ರ್ ಮಾತ್ರ್ ನ್ಹಯ್ ಬಗಾರ್ ರಾಯನಾ ವಯ್ರ್ಯ್ ಝುಜ್ ಮಾಂಡ್ಲ್ಲೆಂ. ರಾಯನಾಕ್ಯ್ ಇಕ್ಬಾಲಾನ್ ಬರೊ ಆವ್ಕಾಸ್ ಒದಗ್ಸುನ್ ದಿಲ್ಲೊ. ಹ್ಯಾ ಅವ್ಕಾಸಾಕ್ ಬರೊಚ್ಚ್ ಗಳ್ಸುಂಕ್ ರಾಯನ್ ಚಿಂತಾಲೊ.
"ತುಂ ಕಾಂಯ್ ಭಿಯೆನಾಕಾ ಆಲಿಯಾ. ಹಾಂವ್ ಆಸಾಂ! ತುಜ್ಯೆ ಖಾತಿರ್ ಹಾವೆಂ ಎದೊಳ್ಚ್ ಲಾಯರಾಕ್ ಆಪಾಂಯ್ಟ್ ಕೆಲಾಂ! ವಿ ಮಸ್ಟ್ ಪನಿಶ್ ಹಿಮ್!" ಐ.ಸಿ.ಯು. ಚ್ಯಾ ಭಿತರ್ ರಾಯನಾನ್ ಅಲಿಯಾಚೊ ಹಾತ್ ಧರುನ್ ತಾಕಾ ಭರ್ವಸೊ ದಿಲೊ.
"ತೆದ್ನಾಂ ತುಂ ಆಶೆಂ ಮ್ಹಜ್ಯಾ ಲಾಗಿಂ ಆಸ್ಲ್ಲೊಯ್ ಜಾಲ್ಯಾರ್.....?" ರಾಯನಾಚಾ ಹಾತಾಕ್ ಆಪ್ಲ್ಯಾ ಹಾತಾನ್ ಘಟ್ಟ್ ಧರುನ್ ಆಲಿಯಾನ್ ದೊಳೆ ದಾಂಪ್ಲೆ. ಆಲಿಯಾ ಚಡ್ ಉಲಂವ್ಚ್ಯಾ ಸ್ಥಿತೆರ್ ನಾತ್ಲ್ಲೆಂ.
"ತುಕಾ ಕಾಂಯ್ ಜಾಂವ್ಚೆಂ ನಾ ಆಲಿಯಾ! ತುಂ ಬರೆಂ ಜಾತೆಲೆಂಯ್! ಇಕ್ಬಾಲಾಕ್ ಆನಿ ರಾಶಿದಾಕ್ ಕಶೆಂ ತರ್ಯ್ ಜೈಲಾಂತ್ ಕುಡಾಂವ್ಕ್ ಹಾಂವ್ ಸಂಪೂರ್ಣ್ ಪ್ರಯತ್ನ್ ಕರ್ತಲೊಂ!" ರಾಯನ್ ಆಲಿಯಾಕ್ ಸಮಾಧಾನ್ ಕರ್ತಾಲೊ. ಹ್ಯಾ ವಗ್ತಾರ್ ಆಲಿಯಾಕ್ ಕೊಣಾಚಾ ತರ್ಯ್ ಸಾಂಗಾತಾಚಿ ಗರ್ಜ್ ಆಸಾ ಮ್ಹಣೊನ್ ರಾಯನ್ ಜಾಣಾಂ. ಆಲಿಯಾಕ್ ರಾಯನಾ ಆನಿ ಸಾವಂತಾಚಾ ಬಗಾರ್ ದುಸ್ರೆಂ ಕೊಣ್ಯ್ ತಾಚೆಂ ಮ್ಹಳ್ಳೆಂ ನಾತ್ಲ್ಲೆಂ.
ಆಲಿಯಾ ಹ್ಯಾ ಆವ್ದೆಂತ್ ಸಂಪೂರ್ಣ್ ಬದ್ಲಾಲ್ಲೆಂ. ಜಿವಾಂತ್ ತೆಂ ಜಿರ್ಲ್ಲೆಂ ಜಾಲ್ಯಾರ್ ತಾಚಿ ಸೊಭಾಯ್ ದೆಂವ್ಲ್ಲಿ. ತೊಂಡಾರ್ ಕಾಳ್ಬಾಣ್ ಪಡ್ಲ್ಲಿ. ಕುಡಿಂತ್ಲೆಂ ಭಳ್ ನಿತ್ರಾಣ್ ಜಾಲ್ಲೆಂ. ಫಕತ್ತ್ ಸ ದಿಸಾಂ ಭಿತರ್!
"ಐ ಯಾಮ್ ಸಾರ್ರಿ ರಾಯನ್! ತುಜೆಂ ಫಿಲ್ಮ್.....!" ಆಲಿಯಾಚಾ ದೊಳ್ಯಾಂ ದಿಶ್ಟೆಂತ್ ಎಕಾ ರಿತಿಚೊ ಖಂತಿಚೊ ಪ್ರಕಾಸ್ ರಾಯನಾಚಾ ದೊಳ್ಯಾಂಕ್ ಝಳ್ಕಾಲೊ.
"ತುಂ ಫಿಲ್ಮಾಚೆಂ ಚಿಂತಿನಾಕಾ! .........ಇಟ್ಸ್ ಆಲ್ ಓವರ್! ತುಂ ವೆಗ್ಗಿಂ ಬರೆಂ ಜಾ. ತಿತ್ಲೆಂಚ್!"
"ಥ್ಯಾಂಕ್ಸ್ ರಾಯನ್!" ಆಲಿಯಾಚಾ ದೊಳ್ಯಾಂ ದಿಶ್ಟಿಂತ್ಲಿ ಖಂತ್ ತಾಣೆಂ ತಾಚ್ಯಾ ವೊಂಟಾಂ ವಯ್ಲ್ಯಾ ಮಂದ್ ಹಾಸ್ಯಾಂನಿ ಉಭಯ್ಲಿ. ತ್ಯಾ ಸವೆಂ ಆಲಿಯಾಚೆ ದೊಳೆ ತ್ಯಾ ತಾಚ್ಯಾ ಆಸ್ಡ್ಯಾಂ ಭಿತರ್ ವಿಶೆವಾಕ್ ದೆಂವ್ಲೆ.
ಆಲಿಯಾಕ್ ಭರ್ವಸೊ ಪಾಟವ್ನ್ ರಾಯನ್ ಐ.ಸಿ.ಯು. ಥಾವ್ನ್ ಭಾಯ್ರ್ ಆಯ್ಲೊ.
ಹ್ಯಾಚ್ ವಗ್ತಾರ್ ಐ. ಸಿ. ಯು. ಚ್ಯಾ ದಾರಾ ಮುಕಾರ್ ಆಲಿಯಾಚಾ ರಕ್ಶಣೆಕ್ ಉಭೆ ಆಸ್ಲ್ಲ್ಯಾ ಪೊಲಿಸಾಂ ಸವೆಂ ಎಕ್ಲೊ ವ್ಯಕ್ತಿ ಸಾದಾರ್ಣ್ ಪ್ರಾಯೆಚೊ ಕಿತೆಂಗೀ ವಿಚಾರ್ ವಿನಿಮಯ್ ಕರ್ತಾ ತೆಂ ದಿಸ್ತಾನಾ ರಾಯನಾಕ್ ಕಿತೆಂಗೀ ದುಬಾವ್ ಜಾಲೊ. ತೊ ತ್ಯಾ ಪೊಲಿಸಾಂ ತೆವ್ಶಿಂ ಚಮ್ಕಾಲೊ.
"ಕಿತೆಂ ಜಾಲೆಂ...? ಕಾಂಯ್ ಪ್ರಾಬ್ಲೆಮ್?" ರಾಯನಾಚ್ಯಾ ದೊಳ್ಯಾಂಚ್ಯೊ ಆಸ್ಡ್ಯೊ ವಯ್ರ್ ಗೆಲ್ಯೊ.
"ಸರ್!" ಎಕ್ಲೊ ಪೊಲಿಸ್ ಪೆದೊ ಉಲಯ್ಲೊ " ಹಾಕಾ ಆಲಿಯಾಕ್ ಪಳಂವ್ಕ್ ಜಾಯ್ ಖಂಯ್! ಆಲಿಯಾಕ್ ಕೊಣಾಯ್ಕ್ಯ್ ಪಳಂವ್ಕ್ ಸಾದ್ಯ್ ನಾ ಮ್ಹಳ್ಳೆಂಚ್ ಹಾಂವ್ ಹಾಕಾ ಸಮ್ಜಾಯ್ತಾಲೊ!" ತ್ಯಾ ಪೊಲಿಸ್ ಪೆದ್ಯಾನ್ ವಿವರ್ಸುನ್ ಸಾಂಗ್ಲೆಂ.
ರಾಯನಾಚೊ ದುಬಾವ್ ಆತಾಂ ವಾಡ್ಲೊ.
"ಆಲಿಯಾಕ್ ತುಕಾ ಕಿತ್ಯಾಕ್ ಮೆಳೊಂಕ್ ಜಾಯ್! ತಾಕಾ ಮೆಳೊಂಕ್ ಸಾದ್ಯ್ ನಾ!" ರಾಯನ್ ತ್ಯಾ ತಾಚ್ಯಾ ಮುಕ್ಲ್ಯಾ ವ್ಯಕ್ತಿಕ್ಚ್ ಪಳೆತಾಲೊ.
"ಕಿತ್ಯಾಕ್.......? ಹಾಂವ್ ಮ್ಹಜ್ಯಾ ಧುವೆಕ್ ಮೆಳೊಂಕ್ ಸಕಾನಾ......?"
ದಿಸಾಳ್ಯಾ ಪತ್ರಾರ್ ಆಲಿಯಾಚಿ ತಸ್ವೀರ್ ಆನಿ ತಾಚ್ಯಾ ವಯ್ರ್ ಜಾಲ್ಲ್ಯಾ ಹಲ್ಲ್ಯಾಚಿ ಖಬಾರ್ ವಾಚುನ್ ಆಲಿಯಾಕ್ ಸೊಧುನ್ ಶಬೀರ್ ಆಯಿಲ್ಲೊ.
"ಧುವ್......?" ರಾಯನ್ ಉಡೊನ್ ಪಡ್ಲೊ. "ಆಲಿಯಾ ತುಜೆಂ ಧುವ್.....?" ರಾಯನಾನ್ ತ್ಯಾ ವ್ಯಕ್ತಿಕ್ಚ್ ಪಳೆಲೆಂ.
"ಹಾಂ!"
"ಆಲಿಯಾ ಸಾಂಗ್ತಾಲೆಂ.... ಹ್ಯಾ ಸಂಸಾರಾಂತ್ ತಾಚಿಂ ಕೋಣ್ಯ್ ನಾಂತ್ ಮ್ಹಣೊನ್!" ರಾಯನಾಕ್ ಆಲಿಯಾಚಾ ಪಯ್ಲ್ಯಾ ಭೆಟೆಂತ್ಲೊ ಉಡಾಸ್ ಆಯ್ಲೊ.
ರಾಯನಾಚಿಂ ಉತ್ರಾಂ ಆಯ್ಕೊನ್ ಶಬೀರ್ ಎಕಾ ಖಿಣಾಕ್ ರಾವ್ಲ್ಲ್ಯಾ ಕಡೆಚ್ಚ್ ಹಾಲ್ಲೊ.
ಆಲಿಯಾನ್ ಆಪ್ಲ್ಯಾ ಕುಟ್ಮಾಕ್ ಜಿವಂತ್ ಆಸ್ತಾನಾಂಚ್ ಮರ್ಣಾಂತ್ ದಾಖಲ್ ಕೆಲಾಂ? ಶಬೀರಾಚೆಂ ಕಾಳಿಜ್ ಹಿಂವ್ಳೊನ್ ಗೆಲೆಂ. ಆಲಿಯಾನ್ ಆಶೆಂ ಕಿತ್ಯಾಕ್ ಕೆಲಾಂ? ಶಬೀರಾಕ್ ಕಾಂಯ್ ಸಮ್ಜಾಲೆಂ ನಾ.
" ಧುವ್ ಮ್ಹಳ್ಯಾರ್! ಥೊಡೆಂ ಪಯ್ಶಿಲ್ಯಾನ್......!" ಶಬೀರಾನ್ ಆಪ್ಣಾಕ್ಚ್ ಸಾಂಬಾಳ್ಳೆಂ. "ತೆಂ ಕಶೆಂ ಆಸಾ?" ಆಪ್ಲ್ಯಾ ಆನಿ ಆಪ್ಲ್ಯಾ ಧುವೆ ಮಧ್ಲೊ ಸಂಭಂಧ್ ಲಿಪವ್ನ್ ದವರುನ್ ಧುವೆಚ್ಯಾ ಭಲಾಯ್ಕೆ ವಿಶಿಂ ಆಯ್ಕೊಂಕ್ ತೊ ಆತುರ್ ಜಾಲೊ.
"ಬರೆಂ ಆಸಾ!" ರಾಯನಾನ್ ಶಬೀರಾಕ್ಚ್ ಪಳೆಲೆಂ.
"ಹಾಂವ್ ಆಲಿಯಾಕ್ ಪಳಂವ್ಕ್ ಸಕ್ತಾಂ.....?" ಆಪ್ಲ್ಯಾ ಆನಿ ಧುವೆ ಮಧ್ಲ್ಯಾ ಸಂಭಂಧಾಕ್ ತೊ ಲಿಪವ್ನ್ ದವರುಂಕ್ ಸಕ್ಲೊ ಜಾಲ್ಯಾರ್ಯ್ ಆಪ್ಣಾಚೆಂ ರಗಾತ್ ಆನಿ ಮಾಸ್ ಜಾವ್ನ್ ಆಸ್ಲ್ಲ್ಯಾ ಆಪ್ಲ್ಯಾ ಧುವೆ ವಯ್ರ್ ಏಕ್ ದೀಶ್ಟ್ ಘಾಲ್ಚಿ ತಾಚಿ ಆಶಾ ಮಾತ್ರ್ ತಾಚ್ಯಾ ಮತಿಂತ್ ಥಾವ್ನ್ ಗೆಲಿ ನಾ.
ಶಬೀರಾಚಾ ವಿನತೆಕ್ ಆಯ್ಕಾಲ್ಲೊ ರಾಯನ್, ಆತಾಂ ಥೊಡೆಂ ಚಿಂತ್ಲ್ಲೊ, "ತುಜೆಂ ನಾಂವ್ ಕಿತೆಂ? ಹಾಂವ್ ಆಲಿಯಾ ಲಾಗಿಂ ವಿಚಾರ್ತಾಂ. ತಾಣೆಂ ಜರ್ ತುಕಾ ಪಾರ್ಕಿಲೆಂ ಜಾಲ್ಯಾರ್ ತುವೆಂ ಆಲಿಯಾಕ್ ಪಳವ್ಯೆತ್! ನಾ ಜಾಲ್ಯಾರ್ ಸಾದ್ಯ್ ನಾ!"
ಶಬೀರಾಕ್ ಏಕ್ ಪಾವ್ಟಿಂ ಆಪ್ಲ್ಯಾ ಧುವೆಕ್ ಪಳಂವ್ಚೆಂ ಮನ್ ಜಾಲೆಂ. ಕಿತ್ಲೆಂ ಮ್ಹಳ್ಯಾರ್ಯ್ ತೊ ತಾಚೊ ಬಾಪಯ್. ತಾಣೆಂ ತಾಕಾ ಜಲ್ಮ್ ದಿಲಾ. ಆಪ್ಲ್ಯಾ ಉಸ್ಕ್ಯಾರ್ ತಾಕಾ ಖೆಳವ್ನ್ ಮೋಗ್ ದಿಲಾ.
ಆಲಿಯಾನ್ ಆಪ್ಣಾಕ್ ಮರ್ಣಾಂತ್ ದಾಖಲ್ ಕೆಲ್ಯಾರ್ ಕಿತೆಂ ಜಾಲೆಂ? ಆಪ್ಣೆ ತಾಕಾ ಮೊರೊಂಕ್ ದೀಂವ್ಕ್ ನಾ! ಶಬೀರ್ ಚಿಂತಾಲೊ.
"ಹಾಂವ್ ಶಬೀರ್! ಶಬೀರ್ ಅಹ್ಮದ್ ನಾಗ್ಪುರ್ ಥಾವ್ನ್ ಮ್ಹಣೊನ್ ಸಾಂಗ್ಲ್ಯಾರ್ ಆಲಿಯಾಕ್ ಕಳ್ತೆಲೆಂ!" ರಾಯನಾಕ್ಚ್ ಪಳವ್ನ್ ಶಬೀರ್ ಉಲಯ್ಲೊ.
"ಬರೆಂ! ತುಂ ರಾವ್. ಹಾಂವ್ ಆಲಿಯಾಕ್ ವಿಚಾರುನ್ ಯೆತಾಂ. ಬೆಜಾರ್ ಕರಿನಾಕಾ. ಹೆಂ ಆಲಿಯಾಚಾ ರಕ್ಶಣೆ ಖಾತಿರ್!" ರಾಯನ್ ಐ. ಸಿ. ಯು. ಚ್ಯಾ ಭಿತರ್ ಘೆಲೊ.
ರಾಯನಾನ್ ಸಾಂಗ್ಲ್ಲೆಂ ಆಯ್ಕೊನ್ ಜಾಯ್ತ್ ಮ್ಹಳ್ಳ್ಯಾ ಭಾಶೆನ್ ಶಬೀರಾನ್ ಆಪ್ಲಿ ತಕ್ಲಿ ಹಾಲಯ್ಲಿ.
ಆಪ್ಣಾಲಾಗಿಂ ಉಲವ್ನ್ ಭಾಯ್ರ್ ಗೆಲ್ಲೊ ರಾಯನ್ ಪರ್ತ್ಯಾಕ್ ಭಿತರ್ ಆಯಿಲ್ಲೊ ಪಳವ್ನ್ ಆಲಿಯಾಕ್ ಕಿತೆಂಗೀ ಭೊಗ್ಲೆಂ. ರಾಯನ್ ಕಾಂಯ್ ಹಾಂಗಾ ವಿಸ್ರಾಲಾ....? ಆಲಿಯಾಚಾ ಮತಿಂತ್ಚ್ ಚಿಂತ್ನಾಂ ಉದೆಲಿಂ.
"ಆಲಿಯಾ.... ಶಬೀರ್ ಅಹ್ಮದ್ ಮ್ಹಳ್ಯಾರ್ ಕೋಣ್?"
ತಿತ್ಲೆಂಚ್!
ರಾಯನಾಚಾ ತೊಂಡಾ ಥಾವ್ನ್ ಆಯ್ಕಾಲ್ಲ್ಯಾ ಸವಾಲಾನ್ ಆಲಿಯಾ ಎಕಾಚ್ಚ್ಫರಾ ಉಡೊನ್ ಪಡ್ಲೆಂ. ಆಪ್ಲ್ಯಾ ಬಾಪಾಯ್ಚೆಂ ನಾಂವ್ ರಾಯನಾಚಾ ತೊಂಡಾರ್? ತೆಂಯ್ ಹ್ಯಾ ವೆಳಾರ್... ಅಚಾನಾಕ್...? ಆಲಿಯಾಕ್ ಆಶ್ಚರ್ಯ್ ಜಾಲೆಂ. ರಾಯನ್ ಹೆಂ ಕಿತ್ಯಾಕ್ ವಿಚಾರ್ತಾ ಮ್ಹಳ್ಳೆಂ ಆಲಿಯಾಕ್ ಸಮ್ಜಾನಾ ಜಾಲೆಂ.
"ಶಬೀರ್ ಅಹ್ಮದ್.....? ಕೋಣ್.....?" ಆಲಿಯಾನ್ ಆಪ್ಲ್ಯಾ ತೊಂಡಾರ್ ನೆಗಾರ್ಪಣ್ ಹಾಡ್ಲೆಂ.
"ತುಂ ವಳ್ಕಾನಾಂಯ್? ತೊ ತುಕಾ ಪಳಂವ್ಕ್ ಆಯ್ಲಾ! ಆಪುಣ್ ನಾಗ್ಪುರ್ ಥಾವ್ನ್ ಮ್ಹಣೊನ್ ಸಾಂಗ್ತಾ! ನಾಗ್ಪುರಾಂತ್ ತುಜಿಂ ಕೋಣ್ ಆಸಾತ್ ಮ್ಹಣೊನ್ ತುವೆಂ ಸಾಂಗೊಂಕ್ ನಾಂಯ್!" ರಾಯನ್ ಆಶ್ಚರ್ಯ್ ಭರಿತ್ ದುಬಾವಾನ್ ಆಲಿಯಾಕ್ ಪಳೆತಾಲೊ.
"ನಾಗ್ಪುರಾಂತ್ ಮ್ಹಜಿಂ.....?" ಆಲಿಯಾನ್ ಪರ್ತ್ಯಾಕ್ ನೆಗಾರ್ ಕೆಲೆಂ.
"ತುಂ ಚಿಂತುಂಕ್ ವಚಾನಾಕಾ! ತೊ ದುಸ್ರ್ಯಾ ಕೊಣಾಯ್ಕ್ಯ್ ಸೊಧ್ತಾ ಆಸ್ತಲೊ! ತುಂ ರೆಸ್ಟ್ ಕರ್....!" ರಾಯನ್ ಪಾಟಿಂ ಪರ್ತಾಲೊ.
"ರಾಯನ್....?"
".........?" ರಾಯನ್ ಪಾಟಿಂ ಘುಂವ್ಲೊ.
"ತಾಕಾ ಜಸ್ಟ್ ಭಿತರ್ ದಾಡ್ ರಾಯನ್!"
"ತಶೆಂ ಕೋಣಾಯ್ಕ್ಯ್ ಭಿತರ್ ದಾಡುಂಕ್ ಜಾಯ್ನಾಂ ಆಲಿಯಾ. ಹೆಂ ಸೆಕ್ಯೂರಿಟಿಚೆಂ ಸವಾಲ್. ತುಕಾ ಕಾಂಯ್ ಕಿತೆಂಯ್ ಜಾಲ್ಯಾರ್....?" ರಾಯನಾಕ್ ಆಲಿಯಾಚೊ ಹುಸ್ಕೊ ಆಸ್ಲ್ಲೊ.
"ತುಂ ಆಸಾಯ್ ಮ್ಹಣ್ತಾನಾ ಮ್ಹಾಕಾ ಕಿತೆಂ ಜಾಂವ್ಕ್ ಸಕ್ತಾ ರಾಯನ್....!" ಆಲಿಯಾ ಮಂದ್ ಹಾಸೊ ಹಾಸ್ಲೆಂ. ರಾಯನಾ ಥಾವ್ನ್ ತೆಂ ಹೆಂಚ್ ಆಶೆತಾಲೆಂ.
"ಬರೆಂ..... ತುಂ ಸಾಂಗ್ತಾಯ್ ಜಾಲ್ಯಾರ್.....!" ರಾಯನ್ ಭಾಯ್ರ್ ಚಮ್ಕಾಲೊ.
ರಾಯನ್ ಭಾಯ್ರ್ ಗೆಲ್ಲ್ಯಾ ಕುಶಿಕ್ಚ್ ಆಲಿಯಾ ಪಳೆತಾಲೆಂ. ತಾಚ್ಯಾ ದೊಳ್ಯಾಂಕ್ ತಾಚ್ಯಾ ಬಾಪಾಯ್ಚಿ ರಾಕೊಣ್ ಆಸ್ಲ್ಲಿ.
ತಿತ್ಲ್ಯಾರ್!
ಆಲಿಯಾಚಾ ದೊಳ್ಯಾಂಕ್ ಆಪ್ಲೊ ಬಾಪಯ್ ಆಪ್ಣಾ ತೆವ್ಶಿಂ ಚಲೊನ್ ಯೆಂವ್ಚೊ ದಿಸ್ಲೊ. ತೆಂ ತಶೆಂಚ್ ಆಪ್ಲ್ಯಾ ಬಾಪಾಯ್ಕ್ ಪಳವ್ನ್ ರಾವ್ಲೆಂ.
ಆಲಿಯಾಕ್ ಪಳವ್ನ್ ಶಬೀರ್ ಕಾಂಯ್ ಉಲಯ್ಲೊ ನಾ. ತೊ ಆಪ್ಲ್ಯಾ ಧುವೆಚ್ಯಾ ದೊಳ್ಯಾಂಕ್ಚ್ ಪಳೆತಾಲೊ.
"ಹೆಂ ತೆಂಚ್ ಆಲಿಯಾ?" ಶಬೀರಾನ್ ಆಪ್ಣಾಕ್ಚ್ ಸವಾಲ್ ಕೆಲೆಂ.
ದೊಗಾಂಯ್ ಎಕಾಮೆಕಾ ಪಳಯ್ತಾಲಿಂ ಶಿವಾಯ್ ನಾ ಶಬೀರ್ ಉಲಯ್ಲೊ ನಾ ಆಲಿಯಾ ಉಲಯ್ಲೆಂ.
"ಕಶೆಂ ಆಸಾಯ್ ಆಲಿಯಾ? ಹೆಂ ಕಿತೆಂ ಕೆಲಾಂಯ್ ತುವೆಂ....?" ಶಬೀರ್ಚ್ ಮೌನ್ ಮೊಡುನ್ ಉಲಯ್ಲೊ.
ಆಪ್ಲ್ಯಾ ಬಾಪಾಯ್ಕ್ ಪಳಂವ್ಚ್ಯಾ ಆಲಿಯಾಚೆ ದೊಳೆ ತ್ಯಾ ತಾಚ್ಯಾ ದಿಶ್ಟೆಂತ್ಚ್ ಶಬೀರಾಲಾಗಿಂ ಮಸ್ತ್ ಉಲಯ್ತಾತ್ ತಶೆಂ ದಿಸ್ತಾಲೆ. ಜೆಂ ಕಿತೆಂ ಆಜ್ ಆಪ್ಲ್ಯಾ ಜಿಬೆನ್ ಉಲಂವ್ಕ್ ಜಾಯ್ ಆಸ್ಲ್ಲೆಂ ತೆಂ ಆಜ್ ಆಲಿಯಾಚೆ ದೊಳೆ ಉಲಯ್ತಾಲೆ. ತೆಂ ಆಪ್ಲ್ಯಾ ಬಾಪಾಯ್ ಲಾಗಿಂ ತಶೆಂಚ್ ಉಲವ್ನ್ ರಾವ್ಲೆಂ.
"ತುವೆಂ ಮ್ಹಾಕಾ ಮರ್ಣಾಂತ್ ದಾಖಲ್ ಕೆಲೆಂಯ್ ಆಲಿಯಾ.....? ಕಿತ್ಯಾಕ್...?" ಶಬೀರಾಚೊ ತಾಳೊ ಕಾಂಪ್ತಾಲೊ. ಆಪ್ಲ್ಯಾ ಧುವೆಲಾಗಿಂ ದೊಳ್ಯಾಂ ದಿಶ್ಟೆಂತ್ಚ್ ಉಲಯಿಲ್ಲ್ಯಾ ಶಬೀರಾಚೊ ಗಳೊ ಭರುನ್ ಆಯಿಲ್ಲೊ.
"ಹಾವೆಂ ತುಕಾ ಮಾರುಂಕ್ ನಾ ಅಬ್ಬೂ! ಹಾವೆಂ ತುಜ್ಯಾ ಆಲಿಯಾಕ್ ಮಾರ್ಲಾಂ! ತುಜೆಂ ಆಲಿಯಾ ಹ್ಯಾ ಸಂಸಾರಾಂತ್ ಜಿವಂತ್ ನಾ!" ಆಲಿಯಾಕ್ ಉಲಂವ್ಕ್ ಕಶ್ಟ್ ಮಾರ್ಲೆ.
"ಆಶೆಂ ಉಲಯ್ನಾಕಾ ಆಲಿಯಾ! ತುಂ ಕೆದ್ನಾಂಯ್ ಮ್ಹಜೆಂ ಧುವ್!"
"ನಾ ಅಬ್ಬೂ!" ಆಲಿಯಾನ್ ಆಪ್ಲೊ ತಾಳೊ ದ್ರಡ್ ಕೆಲೊ. "ಹ್ಯಾ ಉಪ್ರಾಂತ್ ತುಂ ಮ್ಹಾಕಾ ಪಳಂವ್ಕ್ ಯೇನಾಕಾ. ಮ್ಹಜ್ಯಾ ವಿಶಿಂ ಕೊಣಾಯ್ಕ್ಯ್ ಕಾಂಯ್ ಸಾಂಗಿನಾಕಾ. ಆಸ್ಪತ್ರೆ ಥಾವ್ನ್ ಭಾಯ್ರ್ ಆಯಿಲ್ಲಿಂಚ್ ಹಾಂವ್ ತುಕಾ ಮೆಳೊಂಕ್ ಯೆತಾಂ! ಹಾಂಗಾ ಹಾಂವ್ ತುಕಾ ಕಾಂಯ್ ಸಾಂಗೊಂಕ್ ಸಕಾನಾ!" ಆಲಿಯಾನ್ ಆಪ್ಲ್ಯಾ ಮತಿಕ್ ದ್ರಡ್ ಕೆಲೆಂ.
"ತುಂ ಆಶೆಂ ಕಿತ್ಯಾಕ್ ಕರ್ತಾಯ್ ಆಲಿಯಾ....?" ಶಬೀರಾಚ್ಯಾ ತಾಳ್ಯಾಂತ್ ಧುವೆಚಿ ಭಿರ್ಮತ್ ಆಸ್ಲ್ಲಿ.
"ತುಂ ವಚ್ ಅಬ್ಬೂ! ತುವೆಂ ಆಶೆಂ ಮ್ಹಜ್ಯೆ ಲಾಗಿಂ ಉಲಯ್ಲ್ಯಾರ್ ಕೊಣಾಯ್ಕ್ಯ್ ದುಬಾವ್ ಜಾಂವ್ಕ್ ಆಸಾ! ಹಾಂವ್ ತುಕಾ ಮೆಳೊಂಕ್ ಯೆತಾಂ!" ಆಲಿಯಾನ್ ಆಪ್ಲಿ ತಕ್ಲಿ ತೆವ್ಶಿಂ ಘುಂವ್ಡಾಯ್ಲಿ.
ಧುವೆಕ್ ಕಾಂಯ್ಚ್ ಸಮ್ಜೊಂಕ್ ಸಕಾನಾಸ್ಲಲೊ ಶಬೀರ್ ತಸೊಚ್ ಆಲಿಯಾಕ್ ಪಳವ್ನ್ ರಾವ್ಲೊ.
"ಅಜೂನ್ ತುಂ ತುಜೆಂ ಹಟ್ಟ್ ಸೊಡಿನಾಂಯ್ ಪುತಾ.....?"
".........." ಆಲಿಯಾನ್ ಆಪ್ಲಿ ತಕ್ಲಿ ಹೆವ್ಶಿಂ ಘುಂವ್ಡಾವ್ನ್ ಬಾಪಾಯ್ಕ್ ಪಳೆಲೆಂ ಮಾತ್ರ್ ಶಿವಾಯ್ ತಾಚಿ ಜೀಬ್ ಸುಟ್ಲಿ ನಾ.
ಥೊಡೊ ವೆಳ್ ದೊಗಾಂಯ್ ತಶಿಂಚ್ ಎಕಾಮೆಕಾ ಪಳವ್ನ್ ರಾವ್ಲಿಂ.
"ಅಮ್ಮಿ ಕಶಿ ಆಸಾ?" ತಡ್ವುಂಕ್ ತಾಂಕಾನಾಸ್ತಾನಾ ಆಲಿಯಾನ್ ಕಾಳ್ಜಾಂತ್ಲ್ಯಾ ಉಲ್ಯಾಕ್ ಭಾಯ್ರ್ ಕಾಡ್ಲೊ.
"ಬರಿ ಆಸಾ! ತಿಣೆಚ್ ಮ್ಹಾಕಾ ಹಾಂಗಾ ದಾಡ್ಲೊ!" ಶಬೀರಾಚಾ ದೊಳ್ಯಾಂನಿ ದುಖಾಂ ಉದೆಲಿಂ.
"ಅಬ್ಬೂ.....! ಪ್ಲೀಸ್.....! ತುಂ ವಚ್ ಹಾಂಗಾ ಥಾವ್ನ್!" ಆಲಿಯಾನ್ ಆಪ್ಲ್ಯಾ ಸಿಂತಿಮೆಂತಾಕ್ ದಾಂಬುನ್ ಧರ್ಲೆಂ.
ತಿತ್ಲೆಂಚ್!
ಹೆಂ ಖಳಿತ್ ಜಾಲ್ಲೊ ಶಬೀರ್ ಥಂಯ್ ಥಾವ್ನ್ ಪಾಟಿಂ ಘುಂವ್ಲೊ.
ಆಲಿಯಾ ತಶೆಂಚ್ ಆಪ್ಲೊ ಬಾಪಯ್ ಗೆಲ್ಲ್ಯಾ ಕುಶಿಕ್ಚ್ ಪಳವ್ನ್ ರಾವ್ಲೆಂ.
ಶಬೀರ್ ಭಾಯ್ರ್ ಯೆತಾನಾ ರಾಯನ್ ಮುಕಾರ್ಚ್ ಉಭೊ ಆಸ್ಲ್ಲೊ.
"ಥ್ಯಾಂಕ್ ಯು!" ಶಬೀರಾನ್ ತಾಚೊ ಉಪ್ಕಾರ್ ಬಾವುಡ್ಲೊ.
"ಆಲಿಯಾ ತುಕಾ ವಳ್ಕಾತಾ?" ರಾಯಾನಾಚಾ ತಾಳ್ಯಾಂತ್ ಆಶ್ಚರ್ಯ್ ಉಟೊನ್ ದಿಸ್ತಾಲೆಂ.
ತಿತ್ಲೆಂಚ್!
ರಾಯನಾಚಾ ಸವಾಲಾಕ್ ಶಬೀರಾನ್ ಪಾಟಿಂ ಹಾಸೊ ಪಾಟಯ್ಲ್ಯೊ.
"ನಾ! ತೆಂ ಹೆಂ ಆಲಿಯಾ ನ್ಹಯ್! ಹಾಂವ್ ಪೇಪರಾರ್ ಪಳವ್ನ್ ಭಿಯೆಲ್ಲೊಂ. ತಿತ್ಲೆಂಚ್! ಪುಣ್ ತಾಚ್ಯೆಲಾಗಿಂ ಉಲವ್ನ್ ಬರೆಂ ಲಾಗ್ಲೆಂ. ತೆಂ ವೆಗಿಂಚ್ ಬರೆಂ ಜಾತೆಲೆಂ. ತಾಚ್ಯೆ ಖಾತಿರ್ ಹಾಂವ್ ಖುದಾಲಾಗಿಂ ಮಾಗ್ತಲೊಂ!" ಶಬೀರಾನ್ ಹಾಸೊನ್ ಸಾಂಗ್ಲೆಂ.
ತಿತ್ಲೆಂಚ್!
ಹ್ಯಾ ಉಪ್ರಾಂತ್ ತೊ ಥಂಯ್ ರಾವ್ಲೊ ನಾ. ಕಾಳ್ಜಾಂತ್ ಉಮಾಳುನ್ ಯೆಂವ್ಚಾ ಸಿಂತಿಮೆಂತಾಂಕ್ ಕಶ್ಟಾಂನಿ ದಾಂಬುನ್ ಧರುನ್ ಥಂಯ್ ಥಾವ್ನ್ ತೊ ಚಲ್ತೆಚ್ ರಾವ್ಲೊ.
ದಿಸಾಳ್ಯಾ ಪತ್ರಾಂನಿ ಆಯಿಲ್ಲ್ಯಾ ಖಬ್ರೆನ್ ಆಲಿಯಾಚಾ ಕುಟ್ಮಾಕ್ ಅಚಾನಕ್ ಧಖೊ ದಿಲ್ಲೊ.
ಆಲಿಯಾ ಆನಿ ಬಾಲಿವುಡ್!
ಶಬೀರಾಕ್ ಪಾತ್ಯೆಂವ್ಕ್ ಸಾದ್ಯ್ ಜಾಲೆಂ ನಾ.
ನಾಂವಾ ಕಿತ್ಲಿಂಯ್ ಆಸೊಂಕ್ ಸಕ್ತಾತ್. ಪುಣ್ ಆಲಿಯಾಚೆಂ ರೂಪ್!
ಆಲಿಯಾಚಾ ರುಪಾಕ್ ತ್ಯಾ ದಿಸಾಳ್ಯಾ ಪತ್ರಾರ್ ಪಾರ್ಕುನ್ ಆಸ್ಪತ್ರೆಕ್ ಧುವೆಕ್ ಸೊಧುನ್ ಆಯಿಲ್ಲ್ಯಾ ಶಬೀರಾಕ್ ಆಪ್ಲೆಂ ಧುವ್ ಅತಾಂ ಸುರಕ್ಶಿತ್ ಆಸಾ ತೆಂ ಕಳ್ತಾನಾ ತೊ ಹ್ಯಾ ಉಪ್ರಾಂತ್ ಆಲಿಯಾನ್ ಸಾಂಗ್ಲ್ಲ್ಯಾಪರಿಂಚ್ ಆಲಿಯಾಕ್ ಮೆಳೊಂಕ್ ಆಶೆಲೊ ನಾ.
ಇಕ್ಬಾಲಾಕ್ ಆನಿ ರಾಶಿದಾಕ್ ತಾಂಚೆಂ ಅರೆಸ್ಟ್ ವಾರಂಟ್ ಇಶ್ಯೂ ಜಾಲ್ಲಿ ಖಬಾರ್ ಮೆಳ್ತಾನಾ ಇಕ್ಬಾಲಾನ್ ದುಬಾಯ್, ಥಾಯ್ಲ್ಯಾಂಡ್, ಹಾಂಗ್ಕಾಂಗ್ ಕಿತ್ಲಿಂ ಪೊನಾಂ ಕೆಲ್ಯಾರ್ಯ್ ಕಾಂಯ್ ಫಾಯ್ದೊ ಜಾಲೊ ನಾ. ಇಕ್ಬಾಲಾನ್ ಇತ್ಲಿ ವ್ಹಡ್ಲಿ ಚೂಕ್ ಆಧಾರ್ಲ್ಲಿ ಕೀ ಆಜ್ ಸಗ್ಳ್ಯಾ ದೇಶಾಚೆಂ ಮೀಡಿಯಾ ಆಲಿಯಾಚಾ ಪಾಟ್ಲ್ಯಾನ್ ತಾಚೊ ಸಾಂಗಾತ್ ದೀವ್ನ್ ಆಯಿಲ್ಲೆಂ. ತ್ಯಾ ಶಿವಾಯ್ ಬಾಲಿವುಡ್!
ಹ್ಯಾ ವಗ್ತಾರ್ ಇಕ್ಬಾಲಾಕ್ ಆನಿ ರಾಶಿದಾಕ್ ಬಚಾವ್ ಕರುಂಕ್ ಸಕ್ಚಿ ಎಕ್ಚ್ಚ್ ವ್ಯಕ್ತಿ ಮ್ಹಳ್ಯಾರ್ ಖುದ್ದ್ ಆಲಿಯಾ!
ಆಲಿಯಾನ್ ಆಪ್ಲ್ಯಾ ಉಚಾರಾಕ್ ಬದ್ಲಿಲ್ಯಾರ್ ಸಗ್ಳೆಂ ಸಾರ್ಕೆಂ ಜಾತಾ! ಇಕ್ಬಾಲಾಕ್ ಸಭಾರಾಂ ಥಾವ್ನ್ ಸಲಹಾ ಆಯಿಲ್ಲಿ.
ಪುಣ್ ಆಲಿಯಾ ಆಶೆಂ ಕರ್ತೆಲೆಂ? ತೆಂಯ್ ಆಪ್ಣಾ ಆನಿ ರಾಶಿದಾ ವಿರೋಧ್.....? ಕೆದಿಂಚ್ ನಾ!
ಹ್ಯಾ ವಾಟೆರ್ ಭರ್ವಸ್ಯಾಚೊ ಖಾಂಬೊ ಮ್ಹಳ್ಯಾರ್ ಫಕತ್ತ್ ರಾಯನ್ ಮಾತ್ರ್! ಇಕ್ಬಾಲಾಚಾ ಮತಿಂತ್ ಹಿಂ ಚಿಂತ್ನಾಂ ಆಯಿಲ್ಲಿಂ.
ರಾಯನಾಕ್ ಬನಾಯ್ಲೆಂ ಜಾಲ್ಯಾರ್ ಸಗ್ಳೆಂ ಸಾರ್ಕೆಂ ಜಾತಾ! ಪುಣ್ ಕಶೆಂ.....? ಇಕ್ಬಾಲ್ ರಾಯನಾಕ್ ಮೆಳೊಂಕ್ ಏಕ್ ವಾಟ್ ಸೊಧ್ತಾಲೊ.
*********
ಕ್ರಿಮಿನಲ್ ಲಾಯರ್ ರಾಮ್ ಪ್ರಸಾದ್!
ಮುಂಬಯಿಚಾ ಬಿಜ್ನೆಸ್ ಕಾರ್ಪರೇಟಾ ಭಿತರ್ ನಾಂವ್ ವೆಲ್ಲೊ ಲಾಯರ್! ಆಪ್ಣಾನ್ ಹಾತಿಂ ಘೆತ್ಲೆಲ್ಯಾ ಕೇಸಿಂಕ್ ಕಶೆಂ ತರ್ಯ್ ಕರುನ್ ಜಯ್ತಾಚಿ ವಾಟ್ ದಾಖಂವ್ಚೊ! ರಾಯನಾಚಾ ಭೋವ್ ಲಾಗ್ಸಿಲೊ. ರಾಯನಾನ್ ಆಲಿಯಾಚಿ ಕೇಸ್ ರಾಮ್ ಪ್ರಸಾದಾಕ್ ವಹಿಸುನ್ ದಿಲ್ಲಿ.
ಬಾಲಿವುಡಾ ತಸಲ್ಯಾ ಹೈ ಪ್ರೊಫೈಲಾಚಾ ಕೇಸಿಂತ್ ಮೆತೆರ್ ಜಾಲ್ಯಾರ್ ಮಾತ್ರ್ ಆಪ್ಲ್ಯಾ ನಾಂವಾಚಿ ಪಬ್ಲಿಸಿಟಿ ಜಾತಾ. ದಿಸಾಳ್ಯಾ ಪತ್ರಾಂನಿ ಆಪ್ಲೆಂ ನಾಂವ್ ಉಟೊನ್ ಯೆತಾ. ಪತ್ರ್ಕಾರ್, ಮೀಡಿಯಾಚೆ ಆಪ್ಣಾ ಭೊಂವಾರಿ ವೆಡೊ ಮಾರ್ತಾತ್. ಟಿ.ವಿ. ಪರ್ದ್ಯಾರ್ ಆಪ್ಣಾಕ್ ಸಗ್ಳೊ ಸಂಸಾರ್ ದೆಖೊಂಕ್ ಸಕ್ತಾ. ಆಪ್ಣಾಕ್ ಏಕ್ ಸ್ಥಾನ್ ಮಾನ್ ಮೆಳ್ತಾ. ಹ್ಯಾ ವರ್ವಿಂ ಆಪ್ಣಾಚೊ ಫುಡಾರ್ ಅಂತ್ರಳಾಕ್ ಚಡ್ತಾ! ಹೆಂ ರಾಮ್ ಪ್ರಸಾದ್ ಜಾಣಾಂ.
"ತುವೆಂ ಮ್ಹಜ್ಯೆರ್ ಭರ್ವಸೊ ದವರ್ಲಾಯ್ ಮ್ಹಣ್ತಾನಾ ತುವೆಂ ಹ್ಯಾ ಉಪ್ರಾಂತ್ ಕಾಂಯ್ಚ್ ಚಿಂತ್ಚಿ ಗರ್ಜ್ ನಾ! ತುಂ ಫಕತ್ತ್ ಪಳವ್ನ್ ರಾವ್ ರಾಯನ್. ಹ್ಯಾ ದೊಗಾಂಯ್ಕ್ ಹಾಂವ್ ಕಶೆಂ ಭಾಯ್ರ್ ವೊಡುನ್ ಹಾಡ್ತಾಂ ತೆಂ ತುಂ ಪಳೆ!" ರಾಮ್ ಪ್ರಸಾದಾನ್ ದಿಲ್ಲ್ಯಾ ಭರ್ವಸ್ಯಾಚೆರ್ ರಾಯನಾಕ್ ವಿಶ್ವಾಸ್ ಆಸ್ಲ್ಲೊ. ಮುಂಬಯಿಂತ್ ಕೊಣ್ಯ್ ಲಾಯರ್ ಜಿಕೊಂಕ್ ಸಕಾನಾಸ್ಲಲ್ಯಾ ಕೇಸಿಂಕ್ ಹಾತಿಂ ಘೆತ್ಲೆಲ್ಯಾ ರಾಮ್ ಪ್ರಸಾದಾನ್ ತಾಂಕಾ ಜೀಕ್ ಲಾಭಯ್ಲ್ಯಾ. ರಾಮ್ ಪ್ರಸಾದಾಚಾ ಬುದ್ವಂತ್ಕಾಯೆ ವಯ್ರ್ ರಾಯನಾಕ್ ವಿಶ್ವಾಸ್ ಆಸಾ.
"ಪುಣ್ ತುಂ ಜಾಣಾಂಯ್ ಪ್ರಸಾದ್....! ಹೆಂ ತುವೆಂ ಸಾಂಗ್ಚ್ಯಾ ತಿತ್ಲ್ಯಾ ಸುಲಾಭಾಯೆಚೆಂ ಕಾಮ್ ನ್ಹಯ್! ಇಕ್ಬಾಲ್ ಕಾಂಯ್ ವೊಗೊ ಬಸ್ಚೊ ಮನಿಸ್ ನ್ಹಯ್. ಎದೊಳ್ ತಾಚಿ ಕಾಂಯ್ ಖಬಾರ್ ನಾ. ಆಜ್ ಫಾಲ್ಯಾಂ ಮ್ಹಣ್ತಾನಾ ತೊ ಖಂಡಿತ್ ಪಬ್ಲಿಕಾ ಮುಕಾರ್ ಯೆತಲೊ!" ರಾಯನಾಕ್ ಇತ್ಲ್ಯಾ ವರ್ಸಾಂ ಥಾವ್ನ್ ಬಿಜ್ನೆಸ್ ಕರುನ್ ಆಯಿಲ್ಲೊ ಆನ್ಭೋಗ್ ಆಸಾ. ತ್ಯಾ ಭಾಯ್ರ್ ತೊ ಆಪ್ಲ್ಯಾ ಬಾಪಾಯ್ ಥಾವ್ನ್ ಹೆಂ ಪಳವ್ನ್ ಆನಿ ಆಯ್ಕೊನ್ ಶಿಕ್ಲಾ.
"ಆಲಿಯಾಚಾ ಹಲ್ಲ್ಯಾಂತ್, ಹ್ಯಾ ಹಲ್ಲ್ಯಾಚಾ ಭಂವ್ತಣಿಚೆಂ ಸಗ್ಳೆಂ ಪರಿಸರ್ ತ್ಯಾ ಇಕ್ಬಾಲಾಚಾ ವಿರುದ್ಧ್ ಆಸಾ ರಾಯನ್! ಹಾಂಗಾ ಸಾಕ್ಶ್ಯೊ ಪಾಸೊನ್ ಆಮ್ಚ್ಯಾಚ್ ಸಾಂಗಾತಾ ಆಸಾತ್!" ರಾಮ್ ಪ್ರಸಾದ್ ಕಿತ್ಯಾಕ್ಗೀ ಹ್ಯಾ ಆಲಿಯಾಚಾ ಕೇಸಿಕ್ ಭಾರಿಚ್ಚ್ ಸುಲಾಭಾಯೆರ್ ಘೆತಾ ಮ್ಹಳ್ಳ್ಯಾ ಪರಿಂ ರಾಯನಾಕ್ ದಿಸ್ಲೆಂ.
"ಪಳೆ ಪ್ರಸಾದ್! ಮ್ಹಾಕಾ ಹ್ಯಾ ಕೇಸಿಂತ್ ಸಲ್ವೊಂಕ್ ನಾಕಾ. ತುಕಾ ಕಿತೆಂ ಕರುಂಕ್ ಜಾಯ್ ತೆಂ ಕರ್! ತುಕಾ ಖಂಯ್ಚಿ ವಾಟ್ ವಿಂಚುಂಕ್ ಜಾಯ್ ತಿ ವಿಂಚ್! ಪುಣ್ ಮ್ಹಾಕಾ ಫಕತ್ತ್ ಜೀಕ್ ಜಾಯ್. ರಾಯನ್ ಆಪ್ಲ್ಯಾ ದುಸ್ಮಾನಾಂಕ್ ಕೆದ್ನಾಂಚ್ ಭೊಗ್ಸಿನಾ!" ರಾಯನಾಚಾ ದೊಳ್ಯಾಂನಿ ಫಕತ್ತ್ ಫಾರಿಕ್ಪಣ್ ಉಪ್ಯೆತಾಲೆಂ.
ರಾಯನ್ ಆಲಿಯಾಚ್ಯಾ ಹ್ಯಾ ಕೇಸಿಂತ್ ಇತ್ಲೆಂ ಕಿತ್ಯಾಕ್ ಮೆತೆರ್ ಜಾಲಾ ತೆಂ ರಾಮ್ ಪ್ರಸಾದಾಚಾ ಸಮ್ಜಣೆ ಭಾಯ್ರ್ ಆಸ್ಲ್ಲೆಂ. ಹಾಚ್ಯೆಂ ಕಾರಾಣ್ ತೊ ನೆಣಾಂ ಆಸ್ಲ್ಲೊ. ಪುಣ್ ಹ್ಯಾ ಕಾರಾಣಾಕ್ ಜಾಣಾಂ ಜಾಂವ್ಚಿ ತಾಕಾ ಉರ್ಭಾ ನಾತ್ಲ್ಲಿ. ಪ್ರಸಾದ್ ಫಕತ್ತ್ ಆಪ್ಲ್ಯಾ ಫಾಯ್ದ್ಯಾ ವಿಶಿಂ ಮಾತ್ರ್ ಚಿಂತಾಲೊ.
ರಾಯನಾನ್ ಆಲಿಯಾಚಿ ಕೇಸ್ ರಾಮ್ ಪ್ರಸಾದಾಕ್ ವಹಿಸುನ್ ದಿಲ್ಲ್ಯಾ ದುಸ್ರ್ಯಾ ದಿಸಾ!
ಆಸ್ಪತ್ರೆಂತ್ ಆಸ್ಲ್ಲ್ಯಾ ಆಲಿಯಾಕ್ ಪಳೆಂವ್ಕ್ ರಾಮ್ ಪ್ರಸಾದಾನ್ ಆಪ್ಲ್ಯಾ ಜ್ಯೂನಿಯರ್ ಲಾಯರಾಕ್ ದಾಡ್ಲೆಂ.
ಅಮೀನಾ! ಅಮೀನಾ ನಾಸಿರ್!
ಅಮೀನಾನ್ ದಿಸಾಳ್ಯಾ ಪತ್ರಾರ್ ಆಲಿಯಾಚಾ ಹ್ಯಾ ಹಲ್ಲ್ಯಾಚಾ ಖಬ್ರೆಕ್ ವಾಚ್ಲ್ಲೆಂ. ತಾಕಾ ಹ್ಯಾ ಖಬ್ರೆ ಥಾವ್ನ್ ಕಾಂಯ್ ಫರಕ್ ಪಡ್ಲೆಂ ನಾಂ. ಆಲಿಯಾ ಆತಾಂ ನಾಸಿರಾಚಾ ಕುಟ್ಮಾಚಾ ಸಂಭಂಧಾಂತ್ ನಾತ್ಲ್ಲೆಂ. ಅಮೀನಾಕ್ ಜಾಂವ್ ಯಾ ಹಿ ಖಬಾರ್ ಜಾಣಾಂ ಜಾಲ್ಲ್ಯಾ ನಾಸಿರಾಕ್ ಆನಿ ತಾಚ್ಯಾ ಕುಟ್ಮಾಕ್ ಜಾಂವ್ ಆಲಿಯಾ ವಯ್ರ್ ಕಾಂಯ್ ಭಿರ್ಮತ್ ದಿಸ್ಲಿ ನಾಂ. ಆಲಿಯಾ ಎದೊಳ್ಚ್ ತಾಂಚಾ ಜಿವಿತಾ ಥಾವ್ನ್ ವ್ಹಾಳೊನ್ ಘೆಲ್ಲೆಂ ಉದಾಕ್! ವ್ಹಾಳೊನ್ ಗೆಲ್ಲ್ಯಾ ಉದ್ಕಾಕ್ ಕೋಣ್ ಆಪ್ಲಿ ಭಿರ್ಮತ್ ಉಚಾರ್ತಾ? ಸುಲೇಮಾನಾನ್ ಆಪ್ಲ್ಯಾ ನವ್ಯಾ ಸುನೆಚಾ ಮುಕಾರ್ ಆಲಿಯಾಕ್ ವಿಸ್ರೊನ್ ಸೊಡ್ಲೆಂ. ಅಮೀನಾಚೊ ಸ್ವಭಾವ್ ಜಾಲ್ಯಾರ್ಯ್ ತಸೊಚ್! ತ್ಯಾ ವಯ್ರ್ ಆಪ್ಣಾಚೆಂ ಸುನ್ ಲಾಯರ್ ಮ್ಹಣ್ತಾನಾ ಸುಲೇಮಾನಾಚಾ ಬಿಜ್ನೆಸಾಚೆಂ ಲೀಗಲ್ ಕಾಮ್ ಆಲಿಯಾಚಾ ಖಾಂದಾರ್ ಆಸ್ಲ್ಲೆಂ. ಹ್ಯಾ ವರ್ವಿಂ ಸುಲೇಮಾನಾಚೆಂ ಸಗ್ಳೆಂ ಕುಟಾಮ್ ಅಮೀನಾ ಸಾಂಗಾತಾ ಖುಶ್ ಆಸ್ಲ್ಲೆಂ. ಖಂಯ್ ತೆಂ ಹಟ್ಟಿ ಆಲಿಯಾ ಆನಿಂ ಖಂಯ್ ಹೆಂ ಮಯ್ಪಾಸಿ ಅಮೀನಾ! ಖಂಯ್ ತೆಂ ಏರ್ಹೊಸ್ಟೆಸ್ ಆನಿ ಖಂಯ್ ಹೆಂ ಲಾಯರ್! ತ್ಯಾ ಪ್ಲೈಟಾರ್ ಪಯ್ಣಾರ್ಯಾಂಕ್ ತಾಂಚಿ ಸೆವಾ ದಿಂವ್ಚೆಂ ಆಲಿಯಾ ಆಮಿ ಹಾಂಗಾ ಕೊರ್ಟಾಂತ್ ಘಮಂಡಾನ್ ಉಭೆಂ ಜಾಂವ್ಚೆಂ ಅಮೀನಾ! ಹರ್ಯೆಕಾ ವಾಟೆನ್ ಅಮೀನಾನ್ ಸುಲೇಮಾನಾಚಾ ಕುಟ್ಮಾಚ್ಯಾಂಚೆಂ ಮನ್ ಜಿಕ್ಲ್ಲೆಂ.
ಆಲಿಯಾಚಾ ಹಲ್ಲ್ಯಾಚಿ ಕೇಸ್ ರಾಮ್ ಪ್ರಸಾದಾಚ್ಯಾ ಹಾತಾಕ್ ಯೆತಾನಾ ಮಾತ್ರ್ ಅಮೀನಾ ಕಾವ್ಜೆಲೆಂ.
ಏಕ್ ಪಾವ್ಟಿಂ ಸಗ್ಳೆಂ ಸಾಂಡುನ್ ಗೆಲ್ಲೆಂ ಆಲಿಯಾ ಪರ್ತ್ಯಾಕ್ ಕಾಂಯ್ ಆಪ್ಲ್ಯಾ ಕುಟ್ಮಾ ಸವೆಂ.....? ಥೊಡ್ಯಾಚ್ ತೆಂಪಾ ಪಯ್ಲೆಂ ಆಲಿಯಾಚಾ ಕಾಳ್ಜಾಂತ್ ಉಟ್ಲ್ಲೆಂ ಸವಾಲ್ ಆಜ್ ಅಮೀನಾಚಾ ಮತಿಂತ್ ಉಭೆಂ ಜಾಲ್ಲೆಂ. ತಾಕಾ ಪರ್ತ್ಯಾಕ್ ಆಲಿಯಾಚಾ ಜಿವಿತಾಂತ್ ಮೆತೆರ್ ಜಾಂವ್ಕ್ ಮನ್ ನಾತ್ಲ್ಲೆಂ. ಪುಣ್ ತೆಂ ಕರ್ತೆಲೆಂ ಕಿತೆಂ?
ರಾಮ್ ಪ್ರಸಾದಾನ್ ಅಮೀನಾಕ್ ಆಸ್ಪತ್ರೆಕ್ ದಾಡ್ಚೊ ವಿಚಾರ್ ಮುಕಾರ್ ದವರ್ತಾನಾ ಮಾತ್ರ್ ಅಮೀನಾಕ್ ಕಿತೆಂ ಕರ್ಚೆಂ ಕಾಂಯ್ ಸಮ್ಜಾಲೆಂ ನಾ. ಪುಣ್ ತಾಣೆಂ ಹ್ಯಾ ವಗ್ತಾರ್ ಏಕ್ ನಿರ್ಧಾರ್ ಘೆಂವ್ಕ್ ಆಸ್ಲ್ಲೊ. ಆಪ್ಣಾಚಾ ವಕಾಲತೆಚಾ ನಿಬಾನ್ ಆಲಿಯಾ ಪರ್ತ್ಯಾಕ್ ಆಪ್ಣಾಚಾ ಜಿವಿತಾಂತ್ ಆಯ್ಲ್ಯಾರ್....? ಥೊಡ್ಯಾ ತೆಂಪಾ ಪಯ್ಲೆಂ ಆಲಿಯಾಚಾ ಮತಿಂತ್ ರಾಜ್ ಕರುನ್ ಆಸ್ಲ್ಲೆಂ ಸವಾಲ್ ಆತಾಂ ಅಮೀನಾಚಾ ಮುಕಾರ್ ಉಭೆಂ ಜಾಲ್ಲೆಂ.
ತೆಂಚ್ ಜಿವಿತ್! ತಿಚ್ಚ್ ವಾಟ್! ತಿಂಚ್ ಮನಾಂ! ಪುಣ್....?
ತ್ಯಾ ದೀಸ್ ಚಲ್ಲ್ಲ್ಯಾ ವಾಟೆರ್ ಸಾಂಡ್ಲೆಲ್ಯಾ ಮೆಟಾಂನಿ ಆಜ್ ವೆಳಾ ಸಾಂಗಾತಾ ಸಂಭಂಧ್ ಜೊಡ್ಲ್ಲೊ!
ಆಲಿಯಾಕ್ ಚಿಂತುನ್ ಆಪ್ಲ್ಯಾ ಜಿವಿತಾ ವಿಶಿಂ ಭಿಯೆಲ್ಲ್ಯಾ ಅಮೀನಾನ್ ರಾಮ್ ಪ್ರಸಾದಾಚಾ ಉತ್ರಾಂಕ್ ಪಾಳುಂಕ್ ಇನ್ಕಾರ್ ಕೆಲೆಂ.
"ಸರ್! ತುಮಿಂ ಹ್ಯಾ ವಿಶಯಾಂತ್ ದುಸ್ರ್ಯಾ ಕೊಣಾಯ್ಕ್ಯ್ ಮೆತೆರ್ ಕೆಲ್ಯಾರ್ ಬರೆಂ ಆಸಾ!" ಅಮೀನಾನ್ ಆಪ್ಲ್ಯಾ ಜಿವಿತಾಚೆಂ ಸತ್ ಉಚಾರ್ಚ್ಯಾ ಪರಿಂ ನಾತ್ಲ್ಲೆಂ.
"ಕಿತ್ಯಾಕ್.....?"
"ಅವಿನಾಶ್ ಆಸಾ ಸರ್! ತ್ಯಾ ಭಾಯ್ರ್ ಹಾಂವ್ ಪಯ್ಲೆಂಚ್ ತ್ಯಾ ಬಾಂದ್ರಾ ಮರ್ಡರ್ ಕೇಸಿಂತ್ ಮೆತೆರ್ ಜಾಲ್ಲಿಂ ಆಸಾಂ ಮ್ಹಣ್ತಾನಾ!" ಅಮೀನಾಕ್ ಕಾಂಯ್ ತರ್ಯ್ ಕಾರಾಣ್ ದೀಂವ್ಕ್ ಜಾಯ್. ತೆಂ ಕಾರಾಣಾಂ ಸೊಧ್ತಾಲೆಂ. ಹ್ಯಾ ಖಾತಿರ್ ತಾಣೆಂ ಅವಿನಾಶಾಕ್ ಮುಕಾರ್ ಘಾಲೆಂ.
"ತಿ ಕೇಸ್ಯ್ ಹಾಚ್ಯಾ ಬರಾಬರ್ಚ್ ಚಲ್ತೆಲಿ ಅಮೀನಾ! ತುಂ ತಾಚ್ಯಾ ವಿಶಿಂ ಚಿಂತಿನಾಕಾ. ಹಿ ಆಲಿಯಾಚಿ ಕೇಸ್ ಚಡ್ ಪ್ರಾಮುಖ್ಯ್! ಚಲಿಯೆ ಆನಿ ಚಲಿಯೆ ಮಧೆಂ ಜಿತ್ಲೊ ಸಿಂತಿಮೆಂತಾಚೊ ಸಂಭಂಧ್ ಉಬ್ಜಾತಾ, ತಿತ್ಲೊ ಸಂಭಂಧ್ ದಾದ್ಲ್ಯಾ ಆನಿ ಬಾಯ್ಲೆ ಮಧೆಂ ಉದೆನಾ. ಆಮ್ಕಾಂ ಕಶೆಂ ತರ್ಯ್ ಹ್ಯಾ ಕೇಸಿಕ್ ಜಿಕೊಂಕ್ಚ್ ಜಾಯ್. ತಶೆಂಯ್ ತುಂ ಹ್ಯಾ ಕೇಸಿಂತ್ ಜಗ್ಡೊಂಕ್ ವಚಾನಾಂಯ್! ಫಕತ್ತ್ ತುವೆಂ ಕೇಸಿಕ್ ತಯಾರ್ ಕರುಂಕ್ ಜಾಯ್ ತಿತ್ಲೆಂಚ್!"
ಅಮೀನಾಕ್ ದುಸ್ರಿ ವಾಟ್ ನಾತ್ಲ್ಲಿ. ಹ್ಯಾ ಆಲಿಯಾಚಾ ಕೇಸಿ ಥಾವ್ನ್ ಪಯ್ಸ್ ರಾಂವ್ಚೆಂ ಕಾರಾಣ್ ತೆಂ ಕಿತೆಂ ದಿತೆಲೆಂ. ಆಪ್ಲ್ಯಾ ಸಾಂಗಾತಿ ಲಾಯರಾಚೆಂ ಅವಿನಾಶಾಚೆಂ ನಾಮ್ವ್ ತಾಣೆಂ ರಾಮ್ ಪ್ರಸಾದಾ ಮುಕಾರ್ ದವರ್ಲೆಂ ಜಾಲ್ಯಾರ್ಯ್ ಹೆಂ ಕಾರಾಣಾಂತ್ ವಜನ್ ನಾತ್ಲೆಲ್ಯಾನ್ ತೆಂ ಸಲ್ವಾಲೆಂ. ರಾಮ್ ಪ್ರಸಾದಾಚೆಂ ಆರ್ಡರ್ ಘೆವ್ನ್ ತೆಂ ಆಸ್ಪತ್ರೆಕ್ ಭಾಯ್ರ್ ಸರ್ಲೆಂ.
ಹ್ಯಾ ದಿಸಾಂನಿ ಆಲಿಯಾ ಜಿವಾಚಾ ಆಪಾಯಾ ಥಾವ್ನ್ ಸಂಪೂರ್ಣ್ ಭಾಯ್ರ್ ಆಯಿಲ್ಲೆಂ. ತಾಚ್ಯಾ ತೊಂಡಾರ್ ತಿ ಕಾಳ್ಬಾಣ್ ಅಜೂನ್ ರಾಜ್ ಕರ್ತಾಲಿ ಜಾಲ್ಯಾರ್ಯ್ ಆಲಿಯಾಕ್ ಹ್ಯಾ ಉಪ್ರಾಂತ್ ಕಾಂಯ್ ಅಪಾಯ್ ನಾ ಮ್ಹಣೊನ್ ದಾಕ್ತೆರಾಂನಿ ಧಯ್ರ್ ದಿಲೆಂ. ಆಲಿಯಾಕ್ ವಾಂಚಂವ್ಚ್ಯಾಂತ್ ರಾಯನಾಚೊಚ್ ಹಾತ್ ವ್ಹಡ್ಲೊ. ರಾಯಾನ್ ಜರ್ ನಾತ್ಲ್ಲೊ ಜಾಲ್ಯಾರ್ ಆಲಿಯಾ ತಾಚ್ಯಾ ಪ್ಲ್ಯಾಟಾಂತ್ಚ್ ಹ್ಯಾ ಸಂಸಾರಾಕ್ ಸೊಡುನ್ ವೆತೆಂ.
ಆಲಿಯಾಚೊ ಹಲ್ಲೊ ಜಾಲ್ಲ್ಯಾ ವಗ್ತಾರ್ ರಾಯನಾನ್ ಆಪ್ಲ್ಯಾ ಜಿವಾಕ್ ರಿಸ್ಕೆರ್ ಘಾಲುನ್ ಆಲಿಯಾಕ್ ಆಸ್ಪತ್ರೆಕ್ ಹಾಡುಂಕ್ ನಾತ್ಲ್ಲೆಂ ಜಾಲ್ಯಾರ್....!
"ಆಕ್ಟುವಲ್ಲೀ ರಾಯನ್.....! ಆಲಿಯಾಚೆಂ ನಶೀಬ್ ಬರೆಂ ಆಸಾ. ತಾಕಾ ಮಾರ್ಲೆಲ್ಯಾ ದೋನ್ ಗುಳ್ಯಾಂ ಪಯ್ಕಿ ಏಕ್ ಗುಳೊ ತಾಚ್ಯಾ ಕಿಡ್ನೆಚ್ಯಾ ಲಾಗ್ಶಿಲ್ಯಾನ್ ಪಾಶಾರ್ ಜಾಲಾ. ಮ್ಹಾಕಾ ದಿಸ್ತಾ ತೆಂ ಪಿಸ್ತುಲ್ ಮಸ್ತ್ ಲಾಗಿಂ ದರುನ್ ಆಲಿಯಾಚೆರ್ ಪೈರಿಂಗ್ ಕೆಲಾಂ. ಹ್ಯಾಚ್ ಖಾತಿರ್ ಏಕ್ ಬುಲೆಟ್ ಪಾಟಿಚಾ ಹಾಡಾಕ್ ಲಾಗೊನ್ ಆಲಿಯಾಚಾ ಆಂಗಾಂತ್ ಉರ್ಲ್ಲೊ!" ಆಲಿಯಾಚೆಂ ಆಪರೇಶನ್ ಕೆಲ್ಲ್ಯಾ ದಾಕ್ತೆರಾನ್ ಸಾಂಗ್ಲ್ಲೆಂ.
ದಾಕ್ತೆರಾನ್ ಸಾಂಗ್ತಾನಾ ರಾಯನ್ ನಿಜಾಯ್ಕ್ಯ್ ಭಿಯೆಲ್ಲೊ.
ಪುಣ್ ಆಜ್!
"ನೌ ಶಿ ಇಸ್ ಆಲ್ರೈಟ್!" ರಾಯನಾ ಮುಕಾರ್ ಆಲಿಯಾಚಾ ದಾಕ್ತೆರಾನ್ ಹಾಸೊನ್ ಸಾಂಗ್ತಾನಾ ಎಕಾ ಕುಶಿನ್ ಆಲಿಯಾ ಆಪ್ಣಾ ತಿತ್ಲ್ಯಾಕ್ ಹಾಸ್ಲ್ಲೆಂ ಜಾಲ್ಯಾರ್ ಆಲಿಯಾಚಾ ತೊಂಡಾ ವಯ್ಲ್ಯಾ ಹಾಸ್ಯಾಂಕ್ ಪಳವ್ನ್ ರಾಯನಾಚಾ ಮತಿಕ್ ಉಲ್ಲಾಸ್ ಜಾಲ್ಲೊ.
"ಆಲಿಯಾಕ್ ತಾಚ್ಯಾ ಭಲಾಯ್ಕೆಂತ್ ಪಯ್ಲೆಂಚಾ ಪರಿಂ ಜಾಂವ್ಕ್ ಮಸ್ತ್ ತೇಂಪ್ ಲಾಗ್ತಲೊ ರಾಯನ್!" ಚಾರ್ಚ್ ದಿಸಾಂನಿ ಸಗ್ಳೆಂಚ್ ದೆಂವ್ಲ್ಲ್ಯಾ ಆಲಿಯಾಕ್ ಹ್ಯಾ ಘಡಿತಾ ಥಾವ್ನ್ ಭಾಯ್ರ್ ಯೇಂವ್ಕ್ ತಿತ್ಲ್ಯಾ ಸುಲಾಭಾಯೆಚೆಂ ನ್ಹಯ್ ಆಸ್ಲ್ಲೆಂ. ಪರ್ತ್ಯಾಕ್ ಪಯ್ಲೆಂಚಾ ಪರಿಂ ಜಾಂವ್ಕ್ ಆಲಿಯಾಕ್ ಖಂಡಿತ್ ವೇಳ್ ಜಾಯ್ ಆಸ್ಲ್ಲೊ.
"ತೆಂ ವ್ಹಡ್ ನಾ ಡಾಕ್ಟರ್! ಪುಣ್ ತೆಂ ಸವ್ಕಾಸ್ ತರ್ಯ್ ಕಾಂಯ್ ಪ್ರಾಬ್ಲೆಮ್ ನಾಸ್ತಾನಾ ಪಯ್ಲೆಂಚಾ ಪರಿಂ ಜಾಲ್ಯಾರ್ ಪುರೊ. ತಿತ್ಲೆಂಚ್!" ರಾಯನಾಚಿಂ ಉತ್ರಾಂ ಆಯ್ಕೊಂಚಾ ಆಲಿಯಾಕ್ ಮತಿಕ್ ಸಮಾಧಾನ್ ಜಾತಾಲೆಂ. ತೆಂ ಆಪ್ಲ್ಯಾ ಕಾಳ್ಜಾಂತ್ಚ್ ಸಂತೊಸ್ ಭೊಗ್ತಾಲೆಂ. ತಾಚ್ಯಾ ಕಾಳ್ಜಾಂತ್ಲೊ ಸಂತೊಸ್ ತಾಚ್ಯಾ ವೊಂಟಾಂ ವಯ್ಲ್ಯಾ ಹಾಸ್ಯಾಂನಿ ಸ್ಪಶ್ಟ್ ಝಳ್ಕಾತಾಲೊ.
ತಿತ್ಲೆಂಚ್!
ಅಚಾನಕ್ ಆಲಿಯಾಚಾ ವೊಂಟಾಂಚ್ಯೊ ಹಾಸೊ ಜಿರೊನ್ ಗೆಲ್ಯೊ. ತಾಚ್ಯಾ ದೊಳ್ಯಾಂನಿ ಸವಾಲ್ ಉಟೊನ್ ಆಯ್ಲೆಂ. ತಾಚೆ ದೊಳೆ ರುಂದಾಲೆ.
"ಅಮೀನಾ.....?" ಆಲಿಯಾ ಆಪ್ಲ್ಯಾ ಮತಿಂತ್ಚ್ ಉದ್ಗಾರ್ಲೆಂ.
ತಿತ್ಲ್ಯಾರ್!
ಆಲಿಯಾಕ್ ಸೊಧುನ್ ರಾಮ್ ಪ್ರಸಾದಾಚ್ಯಾ ಜ್ಯೂನಿಯರ್ ಲಾಯರ್ ಅಮೀನಾನ್ ಐ.ಸಿ.ಯು. ಚ್ಯಾ ಭಿತರ್ ಪ್ರವೇಶ್ ಘೆತ್ಲೊ.
"ಅಮೀನಾ ಹಾಂಗಾ....?" ಆಲಿಯಾನ್ ಆಪ್ಣಾಕ್ಚ್ ಸವಾಲ್ ಕೆಲೆಂ. ಐ. ಸಿ. ಯು. ಚ್ಯಾ ಖಾಟಿಯೆರ್ ನಿದ್ಲೆಲ್ಯಾ ಆಲಿಯಾಕ್ ಪಯ್ಸ್ ಥಾವ್ನ್ ಅಮೀನಾ ಆಪ್ಣಾ ತೆಂವ್ಶಿಚ್ ಚಲೊನ್ ಯೆಂವ್ಚೆಂ ದಿಸ್ಲೆಂ. ತೆಂ ಆತಾಂ ಚತುರ್ ಜಾಲೆಂ. ತಾಚ್ಯಾ ಮತಿಂತ್ಲಿಂ ರಾಯನಾಚಿಂ ಚಿಂತ್ನಾ ಉಭೊನ್ ಧಾಂವ್ಲಿಂ. ಹ್ಯಾ ವೆಳಾರ್ ಆಪ್ಣಾಚ್ಯಾ ದೊಳ್ಯಾ ಮುಕಾರ್ ಅಚಾನಕ್ ಉದೆಲ್ಲೆಂ ಹೆಂ ಅಮೀನಾ ಆಲಿಯಾಕ್ ಏಕ್ ಮಿಸ್ತೆರ್ ಜಾಂವ್ಕ್ ಪಾವ್ಲೆಂ.
ಥೊಡಿಂಚ್ ಖಿಣಾಂ!
ಆಪ್ಲ್ಯಾ ತೊಂಡಾರ್ ಬದ್ಲಾಲ್ಲ್ಯಾ ಭಾವನಾಂಕ್ ರಾಯನಾಚಾ ದೊಳ್ಯಾ ಫುಡೆಂ ಸಾಂಪ್ದಾನಾಶೆಂ ಆಲಿಯಾನ್ ಆಪ್ಣಾಕ್ಚ್ ಸಾಂಬಾಳ್ಳೆಂ.
"ಎಕ್ಸ್ಕ್ಯೂಜ್ ಮಿ!" ಐ. ಸಿ. ಯು. ಭಿತರ್ ಆಯಿಲ್ಲ್ಯಾ ಅಮೀನಾಕ್ ಆಲಿಯಾಚಾ ಖಾಟಿಯೆ ಮುಕಾರ್ ರಾಯನ್, ಆಲಿಯಾಚೊ ದಾಕ್ತೆರ್ ಆನಿ ತಾಚೆ ಪಿ.ಜಿ. ರಾವೊನ್ ಆಸ್ಲ್ಲೆ ದಿಸ್ಲೆ.
"ಎಸ್!" ಅಚಾನಕ್ ಐ. ಸಿ. ಯು. ಭಿತರ್ ಹಾಜರ್ ಜಾಲ್ಲ್ಯಾ ಎಕಾ ಚಲಿಯೆಕ್ ಪಳವ್ನ್ ರಾಯನ್ ತಾಕಾಚ್ಚ್ ಪಳಂವ್ಚ್ಯಾರ್ ಪಡ್ಲೊ ಜಾಲ್ಯಾರ್ ದಾಕ್ತೆರಾನ್ ಉಲಂವ್ಚೆಂ ಧಯ್ರ್ ಕೆಲೆಂ.
"ಹಾಂವ್ ಅಮೀನಾ! ಅಮೀನಾ ನಾಸಿರ್! ಲಾಯರ್ ರಾಮ್ ಪ್ರಸಾದಾಚೆಂ ಜ್ಯೂನಿಯರ್! ಹಾಂವ್ ಮ್ಹಜ್ಯಾ ಕ್ಲಾಯಂಟಾಕ್ ಮೆಳೊಂಕ್ ಆಯ್ಲ್ಯಾಂ!" ಅಮೃಕ್ಯಾ ಹಾಸ್ಯಾಂ ಸವೆಂ ಅಮೀನಾನ್ ಆಪ್ಲಿ ವಳಕ್ ಕೆಲಿ.
***********
ಎಕಾ ಕುಶಿಕ್ ಆಲಿಯಾ ವಯ್ರ್ ಮರಣಾಂತಿಕ್ ಹಲ್ಲೊ! ದುಸ್ರ್ಯಾ ಕುಶಿಕ್ ಮಿಶೇಲಾಕ್ ಜಿವಿತಾಚಿ ಬೆಶ್ಟಾವ್ಣಿ!
ಮಿಶೇಲಾಕ್ ಆಪ್ಲ್ಯಾ ಜಿವಿತಾಂತ್ ಕಿತೆಂ ಜಾತಾ ತೆಂ ಕಾಂಯ್ ಸಮ್ಜಾಲೆಂ ನಾ. ತಾಚ್ಯಾ ಕಾಳ್ಜಾಂತ್ ಭಿರಾಂತ್ ಉಟೊನ್ ರಾವ್ಲಿ. ಭಾಯ್ರ್ ಭಿತರ್ ಯೆತಾನಾ, ಅಚಾನಕ್ ಕೊಣಾಯ್ಚಿ ಸಾವ್ಳಿ ಪಳೆಲ್ಯಾರ್ ಪಾಸೊನ್ ಮಿಶೆಲ್ ಭಿಯೆಂವ್ಕ್ ಲಾಗ್ಲೆಂ. ತೆಂ ಆಪ್ಲ್ಯಾ ಘರಾಕ್ ಸೊಡುನ್ ಭಾಯ್ರ್ ವಚೊಂಕ್ ತಯಾರ್ ಜಾಲೆಂ ನಾ. ತ್ಯಾ ದೀಸ್ ಶೀತಲಾಚಾ ಘರಾ ಕಿತೆಂ ಜಾಲ್ಲೆಂ ತೆಂ ಚಿಂತುನ್ ಚಿಂತುನ್ ಮಿಶೇಲ್ ಆಪ್ಣಾ ಭೊಂವಾರಿಂ ಭಿರಾಂತೆಚಿ ವೊಣೊದ್ ಉಭಾರ್ತಾಲೆಂ. ಹರ್ಯೆಕ್ ಘಡಿಯೆ ತಾಚ್ಯಾ ದೊಳ್ಯಾಂ ಮುಕಾರ್ ತೆಂ ಕಾಳ್ಯಾ ಆರ್ಶ್ಯಾಂಚೆಂ ಮೆರೂನ್ ರಂಗಾಚೆಂ ಮಹೀಂದ್ರ ಜೀಪ್ ಘಡಿಯೆ ಘಡಿಯೆ ಉದೆವ್ನ್ ಯೆತಾಲೆಂ.
ಆಲಿಯಾಚಾ ವಯ್ರ್ ಹಲ್ಲೊ ಜಾಲ್ಯಾ ಉಪ್ರಾಂತ್ ಶೀತಲ್ ದೋನ್ ದೀಸ್ ಮಿಶೇಲಾ ಸಾಂಗಾತಾ ಮಿಶೇಲಾಚಾ ಘರಾಚ್ಚ್ ರಾವ್ಲೆಂ. ತಾಕಾ ದೋನ್ ದಿಸಾಂ ಪರ್ಯಾಂತ್ ಅಪಾಯಾಚಿ ಕಾಂಯ್ಚ್ ಕುರ್ಹು ಆಪ್ಣಾ ಭೊಂವಾರಿ ಝಳ್ಕಾನಾಸ್ತಾನಾ ವೆತಾನಾ ತೆಂ ಪಾಟಿಂ ಆಪ್ಲ್ಯಾ ಘರಾ ಗೆಲೆಂ.
ಆಲಿಯಾಚಾ ವಯ್ರ್ ಜಾಲ್ಲ್ಯಾ ಹಲ್ಲ್ಯಾ ಥಾವ್ನ್ ಮಿಶೇಲಾಚಾ ಜಿವಿತಾಂತ್ ಮಸ್ತ್ ಬದ್ಲಾವಣ್ ಜಾಲಿ. ರಾಯನ್ ಹ್ಯಾ ದಿಸಾಂನಿ ಆಪ್ಲ್ಯಾ ಅಫೀಸಾಕ್ ಉಣೊ ಆನಿ ಆಸ್ಪತ್ರೆಕ್ ಚಡ್ ವೆತಾಲೊ. ತಾಚೊ ಆಲಿಯಾ ವಯ್ರ್ ಆಸ್ಚೊ ಹುಸ್ಕೊ ಮಿಶೇಲಾಕ್ ಚಿಂತುಂಕ್ ಲಾಯ್ತಾಲೊ. ಹ್ಯಾ ತಾಚ್ಯಾ ಚಿಂತ್ನಾಂಕ್ ಕಾರಾಣ್ ಶೀತಲ್! ಶೀತಲಾನ್ ತಾಚ್ಯಾ ಜಿವಿತಾಂತ್ಲೆಂ ಏಕ್ ಸತ್ ಮಿಶೇಲಾ ಮುಕಾರ್ ಉಗ್ಡಾಪೆಂ ಕೆಲ್ಲೆಂ. ಶೀತಲಾನ್ ವಿಶು ಆನಿ ಆಲಿಯಾ ಮಧ್ಲೊ ಸಂಭಂಧ್ ಮಿಶೇಲಾ ಮುಕಾರ್ ದವರ್ಲ್ಲೊ. ಹ್ಯಾ ಉಪ್ರಾಂತ್ ಮಿಶೇಲಾಕ್ ಆಲಿಯಾ ವಯ್ರ್ ದುಬಾವ್ ಉದೆಲ್ಲೊ.
"ಶೀತಲಾನ್ ಸಾಂಗ್ಲ್ಲ್ಯಾ ಪರಿಂ ಆಲಿಯಾ ಆಶೆಂ ಕರುಂಕ್ ಸಕ್ತಾ?" ಮಿಶೇಲಾಕ್ ಹೆಂ ಸವಾಲ್ ಭಳಾನ್ ದೊಸ್ತಾಲೆಂ. ಹ್ಯಾ ಸವಾಲಾಕ್ ತಾಚ್ಯೆಲಾಗಿಂ ಕಾಂಯ್ ಜವಾಬ್ ನಾತ್ಲ್ಲಿ. ಹ್ಯಾ ಸವಾಲಾಕ್ ಫಕತ್ತ್ ಆಲಿಯಾ ಆನಿ ವಿಶು ಮಾತ್ರ್ ಜವಾಬ್ ದೀಂವ್ಕ್ ಸಕ್ತಾತ್. ವಿಶು ಜಿವಂತ್ ನಾ. ಆಲಿಯಾ ಜಿವಂತ್ ಆಸೊನ್ಯ್ ಆಪ್ಣೆ ತಾಚ್ಯೆಲಾಗಿಂ ಹ್ಯಾ ವಿಶಯಾಂತ್ ವಿಚಾರ್ಚ್ಯಾ ಪರಿಂ ನಾ. ಶೀತಲ್ ಜಾಲ್ಯಾರ್ಯ್ ಕೊಣಾಚ್ಯಾಗೀ ಪೊನಾ ವಯ್ಲ್ಯಾ ಉತ್ರಾಂಕ್ ಪಾತ್ಯೆಲ್ಲೆಂ. ಹ್ಯಾ ದುಬವಾಕ್ ದ್ರಡ್ ಕರುಂಕ್ ಯಾ ಹ್ಯಾ ದುಬಾವಾಕ್ ಸತಾಂತ್ ಬದ್ಲುಂಕ್ ಶೀತಲಾ ಲಾಗಿಂ ಕಾಂಯ್ ರುಜ್ವಾತ್ ನಾತ್ಲ್ಲಿ.
ಸಭಾರ್ ಪಾವ್ಟಿಂ ಮಿಶೇಲಾನ್ ಹೊ ವಿಶಯ್ ರಾಯನಾ ಲಾಗಿಂ ವಿಚಾರುಂಕ್ ಚಿಂತ್ಲೆಂ ಜಾಲ್ಯಾರ್ಯ್ ವೆಳಾನ್ ಮಿಶೇಲಾಕ್ ಸಾಂಗಾತ್ ದಿಲೊ ನಾ. ಆಸ್ಪತ್ರೆಂತ್ ಆಲಿಯಾ ಆಪ್ಣಾ ವಯ್ರ್ ಹಲ್ಲೊ ಜಾಲ್ಲ್ಯಾ ಸ್ಥಿತೆರ್ ನಿದೊನ್ ಆಸ್ತಾನಾ ಆಪುಣ್ ಆನಿ ಶೀತಲ್ ಆಲಿಯಾ ವಯ್ರ್ ಹೊ ಆಪ್ರಾಧ್ ಮಾಂಡ್ತಾಂವ್ ಮ್ಹಣೊನ್ ರಾಯನಾಕ್ ಕಳಿತ್ ಜಾಲ್ಯಾರ್ ಆಪ್ಲೊ ರಾಯನ್ ಮ್ಹಜ್ಯಾ ವಿಶಿ ಕಿತೆಂ ಚಿಂತುಂಕ್ ಆಸಾ? ಆಪ್ಣಾ ವಯ್ರ್ ಇತ್ಲೊ ವಿಶ್ವಾಸ್ ಆನಿ ಆಪ್ಣಾಚೊ ಇತ್ಲೊ ಮೋಗ್ ಕರ್ಚೊ ರಾಯನ್ ಹ್ಯಾ ವಿಶಯಾಂತ್ ಆಯ್ಕಾತಾನಾ ಕಿತೆಂ ಚಿಂತಲೊ? ತೊ ಆಪ್ಣಾಚಾ ದುಬಾವಾಕ್ ಸಾಂಗಾತ್ ದಿತಲೊ ವಾ ಆಲಿಯಾ ಪರಿಸ್ಥಿತೆಕ್? ಮಿಶೇಲಾಕ್ ಕಾಂಯ್ಚ್ ಸಮ್ಜಾನಾತ್ಲ್ಲೆಂ.
ವಿಶುಚಾ ಮರ್ಣಾನ್ ಜಾಲ್ಯಾರ್ಯ್ ಕೊಣಾಯ್ಚಾ ಮತಿಂತ್ ಕಾಂಯ್ ದುಬಾವ್ ಉಟಯಿಲ್ಲೊ ನಾ. ತೆಂ ನಿಜಾಯ್ಕ್ಯ್ ಆಕ್ಸಿಡೆಂಟ್ ಜಾವ್ನ್ ಆಸ್ಲ್ಲೆಂ.
ಮಿಶೇಲಾಚಿಂ ಚಿಂತ್ನಾಂ ಮಿಶೇಲಾಕ್ ತಾಚ್ಯಾಂಚ್ ಸಂಸಾರಾಂತ್ ಬುಡಯ್ತಾಲಿಂ ಆಸ್ತಾನಾ ಆಲಿಯಚಾ ವಯ್ರ್ ಜಾಲ್ಲ್ಯಾ ಹಲ್ಲ್ಯಾ ಥಾವ್ನ್ ಆಲಿಯಾ ತಾಚ್ಯಾ ಅಭಿನಯಾಚೆಂ ಪಯ್ಲೆಂ ಫಿಲ್ಮ್ ಸಿನೆಮಾಂ ಮಂದಿರಾಂಚಾ ಪರ್ದ್ಯಾರ್ ಪಡ್ಚ್ಯಾ ಪಯ್ಲೆಂಚ್ ನಾಂವಾಡ್ದೀಕ್ ಜಾಲೆಂ. ಎದೊಳ್ ಪಾಸೊನ್ ಆಲಿಯಾಕ್ ನೆಣಾಂ ಆಸ್ಲ್ಲೊ ಸಯ್ತ್ ಆಲಿಯಾಕ್ ಆತಾಂ ಜಾಣಾಂ ಜಾಲ್ಲೊ. ಹ್ಯಾ ದಿಸಾಂನಿ ಸಗ್ಳ್ಯಾಂಚಾ ತೊಂಡಾರ್ ಆಲಿಯಾಚೆಂಚ್ ನಾಂವ್ ಖೆಳ್ತಾಲೆಂ. ದಿಸಾಂದೀಸ್ ಹರ್ಯೆಕಾ ಪತ್ರಾಂನಿ ತಾಚಿಚ್ ತಸ್ವೀರ್! ತಾಚಿಚ್ ಖಬಾರ್! ಟಿ.ವಿ. ಖಬ್ರೆಂತ್ ಆಲಿಯಾಚ್ ಉದೆವ್ನ್ ಯೆತಾಲೆಂ. ಥೊಡ್ಯಾಚ್ ದಿಸಾಂ ಭಿತರ್ ಆಲಿಯಾ ಲೊಕಾಮೊಗಾಳ್ ಜಾಲ್ಲೆಂ.
ಆಲಿಯಾನ್ ಆಶೆಲ್ಲಿ ಪಬ್ಲಿಸಿಟಿ ತಾಕಾ ತಾಚೆಂ ಫಿಲ್ಮ್ ರಿಲೀಜ್ ಜಾಂವ್ಚ್ಯಾ ಪಯ್ಲೆಂಚ್ ಲಾಭ್ಲ್ಲಿ!
ಆಲಿಯಾಚಾ ಹಲ್ಲ್ಯಾ ಉಪ್ರಾಂತ್ ಅಂಡರ್ಗ್ರೌಂಡ್ ಜಾಲ್ಲೊ ಇಕ್ಬಾಲ್ ಆಪ್ಣಾಕ್ಚ್ ಬಚಾವ್ ಕರುಂಕ್ ಉಪಾಯ್ ಸೊಧ್ತಾಲೊ. ತಾಚ್ಯೆ ವಯ್ರ್ ಅರೆಸ್ಟ್ ವಾರಂಟ್ ಜ್ಯಾರಿ ಜಾಲ್ಲೆಂ.
ಇಕ್ಬಾಲಾಕ್ ಹ್ಯಾ ತಾಚ್ಯಾ ಕಶ್ಟಾಂ ಥಾವ್ನ್ ತಾಕಾ ಸುಟ್ಕಾ ದಿವಂವ್ಕ್ ಸಕ್ಚೊ ಏಕ್ ಮಾತ್ರ್ ವ್ಯಕ್ತಿ ಮ್ಹಳ್ಯಾರ್ ರಾಯನ್ ಮಾತ್ರ್ ಮ್ಹಣೊನ್ ನಖ್ಖಿ ಜಾಲೆಂ. ಹ್ಯಾ ಖಾತಿರ್ ತಾಣೆಂ ರಾಯನ್ ಮೆಳೊಂಕ್ ಏಕ್ ಆವ್ಕಾಸ್ ಸೊಧ್ಲೊ.
"ರಾಯನ್! ತುಕಾ ತುಜ್ಯಾ ಆದ್ಲ್ಯಾ ಪ್ರಾಜೆಕ್ಟಾಂತ್ ಕಿತ್ಲೊ ದುಡು ಲುಕ್ಸಾಣ್ ಜಾಲಾ ತಾಚ್ಯಾ ದೊಡ್ಯನ್ ಹಾಂವ್ ತುಕಾ ದಿತಾಂ. ತುಂ ಫಕತ್ತ್ ಮ್ಹಾಕಾ ಹ್ಯಾ ಸಂಕಶ್ಟಾ ಥಾವ್ನ್ ಬಚಾವ್ ಕರ್! ತುವೆಂ ವಿಚಾರ್ಲ್ಲೆಂ ತುಕಾ ಹಾಂವ್ ದಿತಾಂ. ಜಾಯ್ ಜಾಲ್ಯಾರ್ ಕುಲ್ದೀಪಾಕ್ ಆನಿ ಅಮೃತಾಕ್ ಪಾಟಿಂ ಪ್ಂಜಾಬಾಕ್ ಧಾಂವ್ಡಾಯ್ತಾಂ!" ರಾಯನಾಕ್ ಖುಶ್ ಕರುಂಕ್ ಇಕ್ಬಾಲಾನ್ ಪಯ್ಲೆಂಚ್ ಸಗ್ಳಿ ತಯಾರಾಯ್ ಕೆಲ್ಲಿ.
"ಮ್ಹಜ್ಯಾ ಹಾತಾಂತ್ ಆತಾಂ ಕಾಂಯ್ ನಾ ಇಕ್ಬಾಲ್! ತುವೆಂ ಆಲಿಯಾ ವಯ್ರ್ ಹಾತ್ ಉಕ್ಲುನ್ ವ್ಹಡ್ಲಿ ಚೂಕ್ ಕೆಲ್ಯಾಯ್. ಹಿ ಚೂಕ್ ತುವೆಂ ಆಧಾರ್ಚ್ಯಾ ಪಯ್ಲೆಂಚ್ ತುವೆಂ ಚಿಂತುಂಕ್ ಜಾಯ್ ಆಸ್ಲ್ಲೆಂ!" ಇಕ್ಬಾಲಾನ್ ದಾಕಯಿಲ್ಲ್ಯಾ ಆಶೆ ಮುಕಾರ್ ರಾಯನ್ ಬಾಗ್ವಾಲೊ ನಾ.
"ಬರೆಂ! ಹಾಂವೆಂ ಸರೆಂಡರ್ ಜಾಂವ್ಕ್ ಜಾಯ್ ಜಾಲ್ಯಾರ್ ಜಾತಾಂ! ಜಾಯ್ ಜಾಲ್ಯಾರ್ ಚಾರ್ ದೀಸ್ ಜಯ್ಲಾಂತ್ಯ್ ಬಸ್ತಾಂ! ಪುಣ್ ತುಂ ಆಲಿಯಾಕ್ ತಾಣೆಂ ಪೊಲಿಸಾಂ ಮುಕಾರ್ ಕೆಲ್ಲೊ ಉಚಾರ್ ಬದ್ಲಿ ಕರುಂಕ್ ಸಾಂಗ್!" ಇಕ್ಬಾಲಾಚಾ ತಾಳ್ಯಾಂತ್ ಲ್ಹಾನ್ಪಣ್ ಸಾರ್ಕೆಂ ಝಳ್ಕಾತಾಲೆಂ. ಪುಣ್, ರಾಯನ್ ಮತಿಕ್ ಆನಿ ಕಾಳ್ಜಾಕ್ ಎಕ್ಚ್ಚ್ ಪಾವ್ಟಿಂ ಚಿಂತುಂಕ್ ಆವ್ಕಾಸ್ ಕರುನ್ ದೀನಾತ್ಲ್ಲೊ.
ಇಕ್ಬಾಲಾನ್ ರಾಯನಾಕ್ ಸಮ್ಜಾಂವ್ಕ್ ಕೆಲ್ಲಿಂ ಪ್ರಯತ್ನಾಂ ಸಗ್ಳಿಂ ವಿಫಲ್ ಜಾಲಿಂ. ರಾಯನ್ ದುಡ್ವಾ ಮುಕಾರ್ ಬಾಗ್ವಾನಾ ತೆಂ ಇಕ್ಬಾಲಾಕ್ ಕಳ್ಳೆಂ.
ಇಕ್ಬಾಲಾ ಮುಕಾರ್ ಆತಾಂ ಎಕ್ಚ್ಚ್ ವಾಟ್ ಆಸ್ಲ್ಲಿ.
ಸತಾಕ್ ಸ್ವೀಕಾರ್ ಕರ್ಚಿ! ಆನಿ ತೊ ಹ್ಯಾ ಸತಾಕ್ ಸ್ವೀಕಾರ್ ಕರುಂಕ್ ತಯಾರ್ ಜಾಲೊ.
"ಪಳೆ ರಾಯನ್.....! ಹಾಂವ್ ತುಕಾ ಸತ್ ಸಾಂಗ್ತಾ. ಹಾವೆಂ ಆಲಿಯಾ ವಯ್ರ್ ಪೈರಿಂಗ್ ಕರುಂಕ್ ನಾ. ಹಾಂವ್ಚ್ ನೆಣಾಂ ಆಲಿಯಾಕ್ ಕೊಣೆಂ ಶೂಟ್ ಕೆಲಾಂ ತೆಂ!"
ಇಕ್ಬಾಲಾಚಿಂ ಉತ್ರಾಂ ಆಯ್ಕೊನ್ ರಾಯನ್ ಹಾಸ್ಲೊ.
"ತುಂ ಆಸಾ ಪಳೆ ಇಕ್ಬಾಲ್.....!" ರಾಯನ್ ಮುಕಾರ್ ಉಲಯ್ಲೊ ನಾ.
"ಹಾಂವ್ ಸತ್ತ್ ಸಾಂಗ್ತಾಂ ರಾಯನ್! ಹಾವೆಂ ಆಲಿಯಾಕ್ ಪೋನ್ ಕೆಲ್ಲೆಂ ವ್ಹಯ್! ಪುಣ್, ಹಾವೆಂ ತಾಚ್ಯೆರ್ ಹಲ್ಲೊ ಕರುಂಕ್ ನಾ!" ರಾಯನಾ ಮುಕಾರ್ ಇಕ್ಬಾಲ್ ಎಕಾ ಭುರ್ಗ್ಯಾ ಪರಿಂ ವಿನತಿ ಕರ್ತಾಲೊ. ತಾಕಾ ನಖ್ಖಿ ಜಾಲ್ಲೆಂ ಕೀ ಆಪ್ಣಾಕ್ ಹ್ಯಾ ಭಂಧಡೆ ಥಾವ್ ಸುಟ್ಕಾ ದಿವಂವ್ಚೊ ಏಕ್ ಮಾತ್ರ್ ವ್ಯಕ್ತಿ ಮ್ಹಳ್ಯಾರ್ ರಾಯನ್ ಮಾತ್ರ್!
ರಾಯನಾನ್ ಇಕ್ಬಾಲಾಚಾ ಕಸಲ್ಯಾಯ್ ಉತ್ರಾಂಕ್ ಕಾನ್ ಹಾಲಯ್ಲೆ ನಾಂತ್. ಇಕ್ಬಾಲ್ ಆಪ್ಣಾಚ್ಯಾ ಫಾಯ್ದ್ಯಾ ಖಾತಿರ್ ಕಿತೆಂ ತರ್ಯ್ ಕರುಂಕ್ ತಯಾರ್ ಆಸಾ ಮ್ಹಳ್ಳೆಂ ರಾಯನ್ ಬರ್ಯಾನ್ ಜಾಣಾಂ.
"ಪಳೆ ಇಕ್ಬಾಲ್! ತುವೆಂ ಆಪ್ಣಾಕ್ಚ್ ಸರೆಂಡರ್ ಕೆಲ್ಯಾರ್ ಚಡ್ ಬರೆಂ ಆಸಾ! ತುಕಾ ಮುಂಬಯಿ ಸೊಡುನ್ ಧಾಂವೊಂಕ್ ಜಾಯ್ನಾಂ. ತುಕಾಚ್ಚ್ ತುಂ ಸರೆಂಡರ್ ಕರ್ಶಿ ಜಾಲ್ಯಾರ್ ತುಜೆಂ ಬರೆಂಪಣ್ ಜಾತೆಲೆಂ!" ರಾಯನ್ ಆಪ್ಲ್ಯಾ ನಿರ್ಧಾರಾ ವಯ್ರ್ ಅಚಲ್ ರಾವ್ಲ್ಲೊ.
ಇಕ್ಬಾಲ್ ಆಪ್ಣಾಕ್ಚ್ ಪೊಲಿಸಾಂಕ್ ಸರೆಂಡರ್ ಕರುಂಕ್ ಕೆದ್ನಾಂಚ್ ತಯಾರ್ ನಾತ್ಲ್ಲೊ. ಪೊಲಿಸಾಂಕ್ ಆಪ್ಣೆಂ ಸರೆಂಡರ್ ಕೆಲೆಂ ಜಾಲ್ಯಾರ್......? ಇಕ್ಬಾಲಾಕ್ ಆಪ್ಣಾಚೆಂ ಮುಕ್ಲೆಂ ಜಿವಿತ್ ದೊಳ್ಯಾಂ ಮುಕಾರ್ ದಿಸೊಂಕ್ ಲಾಗ್ಲೆಂ. ಪೊಲಿಸಾಂಕ್ ಸರೆಂಡರ್ ಜಾವ್ನ್ ಆಪುಣ್ ಜಯ್ಲಾ ಥಾವ್ನ್ ಭಾಯ್ರ್ ಯೆತಲೊಂ ಮ್ಹಳ್ಳೊ ಭರ್ವಸೊ ಇಕ್ಬಾಲಾಕ್ ನಾತ್ಲ್ಲೊ.
ರಾಯನ್ ಆಪ್ಣಾಚೆಂ ಕಾಂಯ್ ಆಯ್ಕಾನಾ ಮ್ಹಣ್ತಾನಾ ಆತಾಂ ಇಕ್ಬಾಲ್ಚ್ ಆಪ್ಲೊ ಮುಕ್ಲೊ ಖೆಳ್ ಖೆಳೊಂಕ್ ತಯಾರ್ ಜಾಲೊ. ತಾಕಾ ಕಶೆಂ ತರ್ಯ್ ಹ್ಯಾ ತಾಚ್ಯಾ ಸಂಕಶ್ಟಾಂ ಥಾವ್ನ್ ಭಾಯ್ರ್ ಯೇಂವ್ಕ್ ಜಾಯ್ ಆಸ್ಲ್ಲೆಂ.
ಹ್ಯಾ ತಾಚ್ಯಾ ವಾವ್ರಾಂತ್ ಇಕ್ಬಾಲಾನ್ ಏಕ್ ಸತ್ ಮಾತ್ರ್ ಉಗ್ಡಾಪೆಂ ಕೆಲ್ಲೆಂ. ದುದಾ ಸಾರ್ಕೆಂ ಅಪುಟ್ ಸತ್!
ಆಲಿಯಾ ವಯ್ರ್ ತಾಣೆಂ ಯಾ ತಾಚ್ಯಾ ಭಾವಾನ್ ಹಲ್ಲೊ ಕರುಂಕ್ ನಾತ್ಲ್ಲೊ!
****************
ರಾಯನಾಚೆಂ ಫಿಲ್ಮ್ ಸಂಪೂರ್ಣ್ ಜಾಲ್ಲೆಂ. ಆಲಿಯಾ ಆಸ್ಪತ್ರೆಂತ್ ಆಸ್ಲ್ಲ್ಯಾ ಪರಿಂಚ್ ಸಾವಂತಾನ್ ತಾಚ್ಯಾ ಫಿಲ್ಮಾಚೆಂ ಕಾಮ್ ಸಂಪಯ್ಲೆಂ. ಆಲಿಯಾಚೆಂ ಅಭಿನಯ್ ಸಗ್ಳೆಂ ಪಯ್ಲೆಂಚ್ ಸಂಪ್ಲ್ಲೆಂ ಜಾಲ್ಲ್ಯಾನ್ ಆತಾಂ ಆಲಿಯಾ ತಾಕಾ ಫಕತ್ತ್ ಡಬ್ಬಿಂಗಾಕ್ ಮಾತ್ರ್ ಗರ್ಜ್ ಆಸ್ಲ್ಲೆಂ. ಪುಣ್ ಹ್ಯಾ ಗರ್ಜೆಕ್ ಲಾಗೊನ್ ರಾಯನ್ ಆಲಿಯಾಚಿ ಭಲಾಯ್ಕಿ ಬರಿ ಜಾತಾ ಪಾಸೊನ್ ರಾಕೊನ್ ರಾವ್ಲೊ ನಾ.
"ಸಾವಂತ್...! ತುಂ ಆಲಿಯಾಚಾ ಆವಾಜಾಕ್ ಕೊಣಾಯ್ ಥಾವ್ನ್ ಡಬ್ ಕರಯ್. ಮ್ಹಾಕಾ ಜಾತಾ ತಿತ್ಲ್ಯಾ ವೆಗ್ಗಿಂ ಹೆಂ ಫಿಲ್ಮ್ ಪರ್ದ್ಯಾರ್ ಉಡಂವ್ಕ್ ಜಾಯ್! ಹೊಚ್ಚ್ ಜೊಕ್ತೊ ವೇಳ್!" ರಾಯನಾಚಾ ಆದೇಶಾ ಪರ್ಮಾಣೆಂ ಸಾವಂತಾನ್ ಆಲಿಯಾಚಿ ರಾಕೊಣ್ ಕೆಲಿ ನಾ. ತಾಚ್ಯಾ ಆವಾಜಾಕ್ ದುಸ್ರ್ಯಾ ಥಾವ್ನ್ ತಾಣೆಂ ಡಬ್ ಕರಯ್ಲೆಂ. ಆನಿ ಆತಾಂ ಆಯ್ತೆಂ ಜಾವ್ನ್ ಯೆತಾಲೆಂ ರಾಯನಾಚೆಂ ಅನ್ಯೇಕ್ ಫಿಲ್ಮ್ "ಪ್ರತಿಭಟನ್"
ಆಲಿಯಾನ್ ಅಭಿನಯ್ ಕೆಲ್ಲೆಂ ಪಯ್ಲೆಂ ಫಿಲ್ಮ್ ತಯಾರ್ ಜಾವ್ನ್ ಯೆತಾನಾ ಹ್ಯಾ ಕುಶಿನ್ ಇಕ್ಬಾಲಾನ್ ಆಲಿಯಾಕ್ ಖಬಾರ್ ದಾಡ್ಲಿ.
"ತುವೆಂ ಕಾಂಯ್ಚ್ ಕರ್ಚೆಂ ನಾಕಾ ಆಲಿಯಾ ತುಂ ಫಕತ್ತ್ ಆಪ್ಲೊ ಉಚಾರ್ ಬದ್ಲಿ ಕರ್! ತ್ಯಾ ಉಪ್ರಾಂತ್ ಪಳೆ ಇಕ್ಬಾಲ್ ತುಕಾ ಖಂಯ್ ಥಾವ್ನ್ ಖಂಯ್ ಪಾವಯ್ತಾ! ತುಜ್ಯೆ ಲಾಗಿಂ ನಿಖಾ ಕರುನ್ ತುಕಾ ಹ್ಯಾ ದೇಶಾ ಥಾವ್ನ್ ಭಾಯ್ರ್ ಜಾಲ್ಯಾರ್ಯ್ ಆಪವ್ನ್ ವರುಂಕ್ ತಯಾರ್ ಆಸಾ!" ಇಕ್ಬಾಲಾನ್ ಸಾಂಗೊನ್ ದಾಡ್ಲ್ಲಿ ಉತ್ರಾಂ ಆಸ್ಪತ್ರೆಚಾ ದಾಕ್ತೆರ್ ಮಾರಿಫಾತ್ ಆಲಿಯಾಚಾ ಕಾನಾಂಕ್ ಪಡ್ತಾನಾ ಆಲಿಯಾಕ್ ಆಪುಣ್ ಜಿಕ್ಲ್ಲೊ ಅನ್ಭೋಗ್ ಜಾಲೊ. ತೆಂ ಕಾಳ್ಜಾ ಮನಾಂತ್ ಸಂತೊಸ್ಲೆಂ. ಹಿ ತಾಚಿ ಪುರ್ತಿ ಜೀಕ್ ನ್ಹಯ್!
"ಹಿ ಖಬಾರ್ ಕೊಣಾಯ್ಕ್ಯ್ ಕಳಿತ್ ಜಾಂವ್ಚಿ ನಾ! ಫಕತ್ತ್ ತುವೆಂ ಉಚಾರ್ಚ್ಯಾ ಎಕಾಚ್ಚ್ ಎಕಾ ಉಚಾರಾ ವಯ್ರ್ ಸಗ್ಳೆಂ ತುಜೆಂ ಜಿವಿತ್ ಹೊಂದೊನ್ ಆಸಾ! ತಶೆಂಯ್ ಹ್ಯಾ ಬಾಲಿವುಡಾಚೊ ಕಸಲೊ ಭರ್ವಸೊ? ರಾಯನಾ ತಸಲೆ ಹಾಂಗಾ ಹರ್ಯೆಕ್ ಪಾವ್ಟಿಂ ನವ್ಯಾ ನವ್ಯಾಂಕ್ ಹಾಡುನ್ ನಾಚಯ್ತಾತ್! ತಾಂಕಾ ಹೆಂ ತಾಂಚೆಂ ಬಿಜ್ನೆಸ್! ಪುಣ್ ತುಕಾ ಹೆಂ ತುಜೆಂ ಜಿವಿತ್! ಚೀಂತ್ ಆಲಿಯಾ!" ದಾಕ್ತೆರ್ ಆಲಿಯಾಕ್ ಇಕ್ಬಾಲಾಚಿಂ ಉತ್ರಾಂ ಅದ್ಲಿ ಬದ್ಲಿ ಕರ್ತಾಲೊ.
ದಾಕ್ತೆರಾಚಾ ಉತ್ರಾಂ ವಯ್ರ್ ಅಲಿಯಾನ್ ಚಿಂತ್ನಾಂ ಆಟಯ್ಲಿಂ.
ರಾಯನ್ ಫಕತ್ತ್ ಏಕ್ ಬಿಜ್ನೆಸ್ಮ್ಯಾನ್ ಮ್ಹಣೊನ್ ತೆಂ ಜಾಣಾಂ. ತಾಣೆಂ ಆತಾಂ ಚಿಂತುಂಕ್ ಆರಂಭ್ ಕೆಲೆಂ. ಪುರ್ತೊ ಏಕ್ ದೀಸ್ ಆನಿ ಎಕ್ ರಾತ್ ಚಿಂತ್ಲೆಲ್ಯಾ ಆಲಿಯಾನ್ ನಿಮಾಣೊ ಏಕ್ ನಿಚೆವ್ ಕೆಲೊ.
ಆಪ್ಣಾಚಾ ಫಾಯ್ದ್ಯಾ ಖಾತಿರ್ ಆಪ್ಣೆ ಬಾಲಿವುಡಾಕ್ ಪ್ರವೇಶ್ ಘೆತ್ಲಾ ಜಾಲ್ಯಾರ್ಯ್ ಆಪ್ಣಾಚ್ಯಾ ಜಿವಿತಾಕ್ ರಾಯನಾನ್ ಜಾಂವ್ ಸಾವಂತಾನ್ ಜಾಂವ್ ಕೆದ್ನಾಂಚ್ ಚಿಂತುನ್ ಪಳೆಲ್ಲೆಂ ನಾ. ತಾಂಕಾ ಜಾಯ್ ಆಸ್ಲ್ಲೆಂ ಏಕ್ ಹೀರೋಯಿನ್ ಮಾತ್ರ್! ಜೆಂ ಹಿರೋಯಿನ್ ತಾಂಚ್ಯಾ ಹಿಶಾರ್ಯಾಂ ವಯ್ರ್ ನಾಚೊನ್, ತಾಂಚಾ ಜಿಜ್ನೆಸಾಕ್ ಜಯ್ತ್ ಹಾಡಂವ್ಚೆಂ! ರಾಯನಾಕ್ ಹಾಂವ್ ನ್ಹಯ್ ಜಾಲ್ಯಾರ್ ದುಸ್ರೆಂ ಕೊಣ್ಯ್ ಚಲಿ ಮೆಳ್ತೆಂ! ಬಾಲಿವುಡಾಂತ್ ಪ್ರವೇಶ್ ಘೆಂವ್ಕ್ ಕಿತ್ಲಿಂಶಿಂಗೀ ಚೆಡ್ವಾಂ ಆಪ್ಣಾಚೆಂ ಸರ್ವ್ ಆಡವ್ ದವರುಂಕ್ ಜಾಲ್ಯಾರ್ಯ್ ತಯಾರ್ ಆಸ್ಲ್ಲಿಂ ಸಭಾರ್ ಆಸಾತ್! ತಶೆಂ ಆಸ್ತಾನಾ ಅಮೃತಾಕ್ ಆನಿ ಕುಲದೀಪಾಕ್ ಆಪ್ಣಾಚಿ ಸಾಮರ್ಥಿ ದಾಖಂವ್ಕ್ ತಯಾರ್ ಜಾಲ್ಲ್ಯಾ ರಾಯನಾಕ್ ಕೊಣ್ಯ್ ಹಿರೋಯಿನ್ ಮೆಳ್ತೆಂ! ತರ್ ಹಾಂಗಾ ರಾಯನಾನ್ ಮ್ಹಾಕಾ ಯಾ ಹಾವೆಂ ರಾಯನಾಕ್ ಉದ್ದಾರ್ ಕೆಲ್ಲೆಂ ಕಾಂಯ್ ನ್ಹಯ್! ಹೆಂ ಏಕ್ ಬಿಜ್ನೆಸ್!
ಮ್ಹಾಕಾ ಜರ್ ತರ್ ರಾಯನಾಚಿ ವಳಕ್ ನಾತ್ಲ್ಲಿ ಜಾಲ್ಯಾರ್ ಮ್ಹಜ್ಯಾ ಹ್ಯಾ ವಾಂಟ್ಯಾಚಾ ಜಿವಿತಾಂತ್ ರಾಯನ್ ಯೆತೊಚ್ಚ್ ನಾ! ಹಾಂವ್ ದುಸ್ರ್ಯಾ ಕೊಣಾಯ್ ಥಾವ್ನ್ ಯಾ ಖುದ್ದ್ ಆಪ್ಣಾ ಥಾವ್ನ್ ಆಪ್ಣಾಚೊ ಫಾರಿಕ್ಪಣಾಚೊ ಖೆಳ್ ಖೆಳ್ತಿಂ! ತರ್.....! ಹೆಂಯ್ ಏಕ್ ಬಿಜ್ನೆಸ್!
ಇಕ್ಬಾಲಾನ್ಯ್ ತ್ಯಾ ದೀಸ್ ಪೊನಾರ್ ಸಾರ್ಕೆಂಚ್ ಸಾಂಗ್ಲ್ಲೆಂ. ರಾಯನಾಕ್ ಆಜ್ ಹಾಂವ್ ಏಕ್ ಸಾಬು ಮಾತ್ರ್! ಹ್ಯಾ ಸಾಬಾ ಥಾವ್ನ್ ಕಿತ್ಲೊ ಫೆಂಡ್ ಭಾಯ್ರ್ ಯೆತಾ ತಿತ್ಲೊ ರಾಯನಾಕ್ ಫಾಯ್ದೊ! ರಾಯನ್ಯ್ ಮ್ಹಜ್ಯಾ ಸವೆಂ ಬಿಜ್ನೆಸ್ ಕರ್ತಾ!
ವಿಶು ಕುಮಾರಾನ್ಯ್ ಮ್ಹಜ್ಯಾ ಸವೆಂ ಬಿಜ್ನೆಸ್ ಕೆಲ್ಲೆಂ. ಪುಣ್ ತಾಕಾ ಚಡ್ ಅಮ್ಚೊರ್ ಆಸ್ಲ್ಲೊ. ರಾಯನಾಚ್ಯಾಕ್ಯ್ ಚಡ್ ಪಯ್ಶೆ ತುರ್ತಾನ್ ಜೊಡ್ಚೊ ಅಮ್ಚೊರ್! ಹ್ಯಾಚ್ ಖಾತಿರ್ ತಾಣೆಂ ಆಪ್ಣಾಕ್ ಬಾನಾಯ್ಲೆಂ! ಹ್ಯಾಚ್ ಖಾತಿರ್ ತೊ ಆಪ್ಲ್ಯಾ ಬಾಯ್ಲೆಕ್ಯ್ ವಿಸ್ರಾಲ್ಲೊ!
ಸಾವಂತ್ ಜಾಲ್ಯಾರ್ಯ್ ತಸೊಚ್! ಮ್ಹಾಕಾ ಮ್ಹಜೆಂ ನಾಂವ್ ವಯ್ರ್ ಯೇಂವ್ಕ್ ಜಾಯ್ ಮ್ಹಳ್ಳ್ಯಾ ಎಕಾಚ್ ಎಕಾ ಮ್ಹಜ್ಯಾ ಲಾಚಾರ್ಪಣಾಕ್ ಸಮ್ಜಾಲ್ಲ್ಯಾ ಸಾವಂತಾನ್ ಸಗ್ಳ್ಯಾ ತಾಚ್ಯಾ ಫಿಲ್ಮಾಂತ್ ಆಪ್ಣಾಕ್ ಕಶೆಂ ಜಾಯ್ ತಶೆಂ ಮ್ಹಾಕಾ ಉಪಯೋಗ್ಸಿಲಾಂ. ಫಕತ್ತ್ ತಾಚ್ಯಾ ಬಿಜ್ನೆಸಾ ಖಾತಿರ್! ಫಾಲ್ಯಾಂ ತಾಕಾಯ್ ದೋನ್ ಚಾರ್ ಫಿಲ್ಮಾಂ ತಾಚ್ಯಾ ಘರ್ಚ್ಯಾ ದಾರಾರ್ ಉಭಿಂ ಜಾವ್ನ್ ತಾಂಚಾ ಡೈರೆಕ್ಷನಾಚೆಂ ಭಿಕ್ ಮಾಗ್ಚ್ಯಾಕ್!
ಹಾಂಗಾ ಸಗ್ಳೆಂಚ್ ಬಿಜ್ನೆಸ್!
ತರ್, ಆಪ್ಣೆ ಕಿತ್ಯಾಕ್ ಬಿಜ್ನೆಸ್ ಕರುಂಕ್ ನಜೊ?
ಆಪ್ಣಾಕ್ ಸೊಧುನ್ ಆಯಿಲ್ಲ್ಯಾ ಹ್ಯಾ ಸಂದರ್ಭಾಕ್, ದೋನ್ಯ್ ಕುಶಿನ್ ಥಾವ್ನ್ ಆಪ್ಣಾಕ್ಚ್ ಫಾಯ್ದೊ ಜಾಂವ್ಚ್ಯಾ ಪರಿಂ ಉಪಯೋಗ್ಸುಂಕ್ ಜಾಯ್!
ವ್ಹಯ್! ದೊನೀ ಕುಶಿಂನಿ ಆಪ್ಣಾಚೊಚ್ ಫಾಯ್ದೊ ಜಾಂವ್ಕ್ ಜಾಯ್! ಚಿಂತ್ಚ್ಯಾ ಆಲಿಯಾಚಾ ಮತಿನ್ ನಿಮಾಣೆಂ ಏಕ್ ನಿರ್ಧಾರ್ ಕೆಲೊ.
ದೊನ್ಯ್ ಕುಶಿಂನಿ ಆಪ್ಣಾಕ್ ಫಾಯ್ದೊ ಜಾಂವ್ಚ್ಯಾ ತಸಲೊ ನಿರ್ಧಾರ್!
ಆಲಿಯಾನ್ ಆಪ್ಲ್ಯಾ ಮತಿಂತ್ಲ್ಯಾ ನಿರ್ಧಾರಾಕ್ ತ್ಯಾ ಆಸ್ಪತ್ರೆಚಾ ದಾಕ್ತೆರಾ ಮಾರಿಫಾತ್ ಇಕ್ಬಾಲಾಕ್ ಪಾವಿತ್ ಕೆಲ್ಲೊಚ್ ತಡವ್.....!
ದುಸ್ರೆ ದಿಸಾಚಾ, ಸಾಂಜೆಚ್ಯಾ ಪ್ರಸಾರಾಚ್ಯಾ ಪತ್ರಾಂನಿ ಸಗ್ಳ್ಯಾ ಮುಂಬಯಿಕ್ಚ್ ಹಾಲವ್ನ್ ಸೊಡ್ಲೆಂ! ಸಾಂಜೆ ಪತ್ರಾಂನಿ ಪಾಯ್ಸ್ ಜಾವ್ನ್ ಆಯಿಲ್ಲ್ಯಾ ಸಣ್ಸಣೀತ್ ಖಬ್ರೆನ್ ಅಖ್ಖ್ಯಾ ಮುಂಬಯಿ ಶ್ಹೆರಾಕ್ಚ್ ಆಶ್ಚರ್ಯಾಂತ್ ಬುಡಯ್ಲೆಂ!
"ಇಕ್ಬಾಲ್ ಭಾಯಿ ಎಂಡ್ ಹಿಸ್ ಬ್ರದರ್ ರಾಶಿದ್ ಸರೆಂಡರ್ಡ್ ಟು ಬಾಂದ್ರಾ ಪೊಲಿಸ್!"
ಅಚಾನಕ್ ಆಯಿಲ್ಲ್ಯಾ ಹ್ಯಾ ಖಬ್ರೆನ್ ಸಾಂಜೆರ್ ಪ್ರಸಾರ್ ಜಾಂವ್ಚ್ಯಾ ಪತ್ರಾಂಕ್ ಜೀವ್ ಭರ್ಲ್ಲೊ.
ಆಲಿಯಾನ್ ಆಪ್ಲ್ಯಾ ಮತಿಂತ್ ಕಶೆಂ ಚಿಂತ್ಲ್ಲೆಂ ತಶೆಂಚ್ ಜಾಲ್ಲೆಂ.
"ಇಕ್ಬಾಲಾಕ್ ದುಸ್ರಿ ವಾಟ್ ನಾತ್ಲ್ಲಿ ಆಲಿಯಾ! ಕಿತ್ಲೊ ಥೇಂಪ್ ಮ್ಹಣೊನ್ ತೊ ಲಿಪೊನ್ ಬಸ್ತಲೊ? ಕಾಂಯ್ ಖಂಯ್ಚರ್ ಕೊಣಾಯ್ಚಾ ನದ್ರೆಕ್ ಸಾಂಪಡ್ಲೊ ಜಾಲ್ಯಾರ್ಯ್ ಎನ್ಕಾಂವ್ಟರಾಚೆಂ ತಾಕಾ ಭ್ಯೆಂ ಆಸ್ಲ್ಲೆಂ." ರಾಯನ್ ಇಕ್ಬಾಲಾಚಿ ಖಬಾರ್ ಹಾಡುನ್ ಆಸ್ಪತ್ರೆಕ್ ಆಯಿಲ್ಲೊ.
ರಾಯನ್ ಆಲಿಯಾಲಾಗಿಂ ಬಸೊನ್ ಉಲಯ್ತಾಂ ಉಲಯ್ತಾಂ ವ್ಹಳೂ ಉಟ್ಲ್ಲೊ ಆಲಿಯಾಚೊ ಹಾತ್ ರಾಯನಾಚಾ ಹಾತಾಕ್ ಸೊಧುನ್ ತ್ಯಾ ಹಾತಾಚಾ ಉಭೆಕ್ ವೆಂಗ್ಲೊ.
"ರಾಯನ್....?" ಆಲಿಯಾನ್ ಉತ್ರಾಂ ವಿಂಚ್ತಾನಾ ರಾಯನಾನ್ ಆಲಿಯಾಕ್ಚ್ ಪಳೆಲೆಂ. "ತುಂ ಮ್ಹಜ್ಯೆ ಸವೆಂ ಸದಾಂ ಆಶೆಂಚ್ ಆಸ್ತಲೊಯ್!?" ಆಲಿಯಾಚಾ ದೊಳ್ಯಾಂನಿ ಉಪ್ಯೆಂವ್ಚ್ಯಾ ಸಿಂತಿಮೆಂತಾಕ್ ರಾಯನ್ ಸಮ್ಜೊಂಕ್ ಸಕ್ಲೊ ನಾ. ತೆ ದೊಳೆ ಕಸಲ್ಯಾಗೀ ಸಿಂತಿಮೆಂತಾಂನಿ ಬುಡೊನ್ ತೆ ತಾಂಬ್ಡೆ ಜಾವ್ನ್ ಯೇಂವ್ಕ್ ಲಾಗ್ತಾನಾ ತ್ಯಾ ದೊಳ್ಯಾಂಚಾ ಮುಳಾಂ ಥಾವ್ನ್ ಉಭಾಳ್ ಝರ್ ಉಮಾಳುನ್ ಆಯ್ಲಿ. ಆಲಿಯಾನ್ ತಶೆಚ್ ದೊಳೆ ಧಾಂಪ್ಲೆ.
ಇಕ್ಬಾಲಾನ್ ಆನಿ ರಾಶಿದಾನ್ ಪೊಲಿಸಾಂಕ್ ಸರೆಂಡರ್ ಜಾವ್ನ್ ದುಸ್ರ್ಯಾ ದಿಸಾ ದೊಗಾಂಯ್ಕ್ಯ್ ಕೋರ್ಟಾ ಥಾವ್ನ್ ಬೇಯ್ಲ್ ಮೆಳ್ಳಿ.
ಬಾಂದ್ರಾ ಪೊಲಿಸ್ ಸ್ಟೆಶನಾಚಾ ಭಾಯ್ರ್ ಮೀಡಿಯಾಚ್ಯಾಂಕ್ ಇಕ್ಬಾಲಾನ್ ಆನಿ ರಾಶಿದಾನ್ ದಿಲ್ಲಿ ಖಬಾರ್ ರಾತಿಚಾ ನಿವ್ಸಾಚಿ ಹೆಡ್ ಲೈನ್ಸ್ ಜಾವ್ನ್ ಆಯ್ಲಿ.
"ಪಳೆಯಾ! ಹಾವೆಂ ಜಾಂವ್ ಮ್ಹಜ್ಯಾ ಭಾವಾನ್ ಜಾಂಯ್ ಆಲಿಯಾಚಾ ವಯ್ರ್ ಹಲ್ಲೊ ಕರುಂಕ್ ನಾ. ಆಮಿಂ ದೊಗ್ಯ್ ನಿರಫ್ರಾಧಿ. ಆಮ್ಚ್ಯಾ ನಿರಾಫ್ರಾಧ್ಪಣಾಕ್ ಆಮಿಂ ಥೊಡ್ಯಾಚ್ ದಿಸಾಂ ಭಿತರ್ ಕೋರ್ಟಾಂತ್ ರುಜು ಕರ್ತೆಲ್ಯಾಂವ್!" ಇಕ್ಬಾಲ್ ಭರ್ಮಾನ್ ಉಲಯ್ತಾಲೊ.
"ಪುಣ್ ಆಲಿಯಾ ಖಾನಾಚ್ಯಾ ಹಲ್ಲ್ಯಾಂತ್ ತುಮ್ಚೊ ಹಾತ್ ಆಸಾ ಮ್ಹಣೊನ್ ಸಗ್ಳೆಂ ಬಾಲಿವುಡ್ ಸಾಂಗ್ತಾ. ಖುದ್ದ್ ಜಾವ್ನ್ ಆಲಿಯಾನ್ ಪೊಲಿಸಾಂಕ್ ತಾಚ್ಯಾ ಉಚಾರಾಂತ್......"
"ಪಳೆಯಾ! ಆಲಿಯಾ ಖಾನಾಕ್ ಆನಿ ಮ್ಹಾಕಾ ಕಾಂಯ್ ಸಂಭಂಧ್ ನಾ! ತೆಂ ಕೋಣ್ ಮ್ಹಣೊನ್ಚ್ ಹಾಂವ್ ವಳ್ಕಾನಾ!"
"ತರ್, ತುಮಿಂ ತಾಕಾ ಪೋನ್ ಕೆಲ್ಲ್ಯಾ ವಿಶ್ಯಾಂತ್ ತುಮಿ ಕಿತೆಂ ಸಾಂಗ್ತಾತ್....?"
"ತೆಂ ರಾಂಗ್ ನಂಬರ್ ಡಯಲ್ ಜಾಲ್ಲೆಂ!"
"ತುಮ್ಕಾಂ ಆಲಿಯಾಚಾ ಅಪಾರ್ಟ್ಮೆಂಟಾಂತ್ ಪಳಯ್ಲಾಂ ಮ್ಹಣೊನ್ ತಾಚೊ ವಾಚ್ಮ್ಯಾನ್ ಸಾಂಗ್ತಾ!"
"ವಾಚ್ಮ್ಯಾನಾಕ್ ಪಯ್ಶೆ ದೀವ್ನ್ ಕೊಣ್ಯ್ ಮೊಲಾಕ್ ಘೆಂವ್ಕ್ ಸಕ್ತಾ!"
"ತರ್, ಇತ್ಲೆ ದೀಸ್ ತುಮಿ ಸರೆಂಡರ್ ಕಿತ್ಯಾಕ್ ಜಾಂವ್ಕ್ ನಾಂತ್.....?"
"ಪಳೆಯಾ! ಆಮಿಂ ಕುಟಾಮ್ ಆಸ್ಲ್ಲೆ ಮನಿಸ್! ಆಶೆಂ ಎಕಾನ್ಏಕ್ ಹಾಂವ್ ವಳ್ಕಾನಾತ್ಲ್ಲೆಂ ಕೋಣ್ಗೀ ತಾಚ್ಯಾ ವಯ್ರ್ ಜಾಲ್ಲ್ಯಾ ಹಲ್ಲ್ಯಾ ಖಾತಿರ್ ಆಪ್ಣಾಚೆಂ ನಾಂವ್ ಕಾಡ್ತಾ ಆನಿ ಆಪುಣ್ ವಚೊನ್ ಪೊಲಿಸಾಂಕ್ ಸರೆಂಡರ್ ಜಾಂವ್? ಆಲಿಯಾಚಾ ಹ್ಯಾ ಉಚಾರಾ ಥಾವ್ನ್ ಮ್ಹಾಕಾಚ್ ಧಖೊ ಬಸ್ಲಾ! ಥೊಡ್ಯಾಚ್ ದಿಸಾಂನಿ ಸತ್ ಕಿತೆಂ ತೆಂ ಸಗ್ಳ್ಯಾಂಕ್ ಕಳ್ತೆಲೆಂ!"
ಸಾಂಜೆಚಾ ಟಿ.ವಿ. ಖಬ್ರೆಂತ್ ಸಗ್ಳ್ಯಾ ದೇಶಾಚಾ ಲೊಕಾಂನಿ ಇಕ್ಬಾಲಾಚಾ ಆನಿ ಪತ್ರ್ಕಾರಾಂಚಾ ಹ್ಯಾ ಸಂಭಾಶಣಾಕ್ ಆಯ್ಕಾಲೆಂ.
ಖಂಯ್ ಕಿತೆಂ ಜಾತಾ ಮ್ಹಳ್ಳೆಂ ತೆಂ ಕೊಣಾಯ್ಕ್ಯ್ ಸಮ್ಜಾಲೆಂ ನಾ!
**********
ಕುಜ್ನಾಂತ್ ರಾಂದ್ಚ್ಯಾ ಕಾಮಾರ್ ಮೆತೆರ್ ಜಾಲ್ಲ್ಯಾ ಮಿಶೇಲಾಕ್ ಭಾಯ್ರ್ ಥಾವ್ನ್ ವ್ಯಾಕ್ಯೂಮ್ ಕ್ಲೀನಾರಾಚೊ ಆವಾಜ್ ಸಾರ್ಕೊ ಆಯ್ಕೊನ್ ಯೆತಾಲೊ. ಹ್ಯಾ ಆವಾಜಾ ಮಧೆಂಯ್ ಕುಕ್ಕಿಂಗ್ ರೇಂಜಿಚಾ ವಯ್ರ್ ದವರ್ಲ್ಲ್ಯಾ ಸ್ಟೀಲಾಚಾ ತೊಪ್ಲ್ಯಾಂತ್ ಖತ್ಕತೊನ್ ಯೆಂವ್ಚ್ಯಾ ಉದ್ಕಾಕ್ ಪಳೆತಾನಾ ಹಳ್ವಾಯೆರ್ ಮಿಶೇಲಾಚಾ ಹರ್ಧ್ಯಾಂತ್ ತಾಂಬ್ದ್ಯಾ ಉಜ್ಯಾಚೆಂ ಲಾವಾ ಉಮಾಳುನ್ ಯೆತಾ ಮ್ಹಳ್ಳ್ಯಾ ಪರಿಂ ಜಾಲೆಂ.
ಕಾಲ್ಚ್ಯಾ ಸಾಂಜೆರ್ ತೆಂ ಆನಿ ರಾಯನ್ ಆಲಿಯಾಚಾ ಪ್ಲ್ಯಾಟಾಕ್ ಗೆಲ್ಲ್ಯಾಚೊ ತಾಣೆಂ ಉಡಾಸ್ ಕೆಲೊ.
ಆಲಿಯಾಕ್ ಆಸ್ಪತ್ರೆ ಥಾವ್ನ್ ಡಿಸ್ಚಾರ್ಜ್ ಜಾವ್ನ್ ದೋನ್ ದೀಸ್ ಜಾಲ್ಲೆ. ತೆಂ ಆತಾಂ ಪರ್ತ್ಯಾಕ್ ಆಪ್ಲ್ಯಾ ಪ್ಲ್ಯಾಟಾಂತ್ ರಾವ್ತಾಲೆಂ. ಆಲಿಯಾಚಿ ಭಲಾಯ್ಕಿ ಪಯ್ಲೆಂಚಾ ಪ್ರಾಸ್ ಸಾರ್ಕಿ ಅರ್ಧಿ ದೆಂವ್ಲ್ಲಿ. ತ್ಯಾ ಆದ್ಲ್ಯಾ ಆಲಿಯಾಕ್ ಆನಿ ಹ್ಯಾ ಆಲಿಯಾಕ್ ರಾತ್ ಆನಿ ದಿಸಾಚೊ ಫರಕ್ ಆಸ್ಲ್ಲೊ. ತೆಂ ಪಯ್ಲೆಂಚಾ ತಿತ್ಲೆಂ ಸುಡ್ಸುಡೀತ್ ನಾತ್ಲ್ಲೆಂ.
ಆಲಿಯಾಚಾ ಆಶೆಕ್ ಆನಿ ಖುಶೆಕ್ ಲಾಗೊನ್ ರಾಯನಾನ್ ಆಪ್ಣಾ ಸವೆಂ ಮಿಶೇಲಾಕ್ ಆಲಿಯಚಾ ಪ್ಲ್ಯಾಟಾಕ್ ಆಪವ್ನ್ ವರ್ಚಿ ವತ್ತಾಯ್ ಕೆಲ್ಲಿ. ಮಿಶೇಲಾಕ್ ಜಾಲ್ಯಾರ್ಯ್ ಹೆಂ ಪಸಂದ್ ನಾತ್ಲ್ಲೆಂ. ಶೀತಲಾನ್ ತಾಚ್ಯಾ ಮತಿಂತ್ ದುಬಾವ್ ಕಿರ್ಲಾತ್ ಘಾಲ್ಯಾ ಉಪ್ರಾಂತ್ ಮಿಶೆಲಾಕ್ ಆಲಿಯಾ ಥಂಯ್ ಪಯ್ಲೆಂಚಿ ಉರ್ಭಾ ನಾತ್ಲ್ಲಿ. ಪುಣ್ ರಾಯನಾಚಾ ವತ್ತಾಯೆಕ್ ಲಾಗೊನ್ ಮಿಶೇಲಾಕ್ ಆಪ್ಲ್ಯಾ ಘೊವಾ ಸಾಂಗಾತಾ ಆಲಿಯಚಾ ಪ್ಲ್ಯಾಟಾಕ್ ಯೆಂವ್ಚೆಂ ಪಡ್ಲೆಂ.
ಆಲಿಯಾಕ್ ಮಿಶೆಲಾನ್ ಪಳಂವ್ಚೆಂ ಹೆಂ ಕಾಂಯ್ ಪಯ್ಲ್ಯಾ ಪಾವ್ಟಿಂ ನ್ಹಯ್! ಹಾಚ್ಯಾ ಪಯ್ಲೆಂ ತೆಂ ಪೋನಾರ್ ಆಲಿಯಾಲಾಗಿಂ ಉಲಯ್ಲಾಂ. ಆಲಿಯಾ ಆಸ್ಪತ್ರೆಂತ್ ಆಸ್ತಾನಾ ತೆಂ ರಾಯನಾ ಸಾಂಗಾತಾ ತಾಕಾ ಪಳವ್ನ್ ಆಯ್ಲಾಂ.
ಆಲಿಯಾ ಸಗ್ಳ್ಯಾಂ ಚಲಿಯಾಂ ಪರಿಂ ನ್ಹಯ್ ಮ್ಹಳ್ಳೆಂ ತೆಂ ಮಿಶೇಲಾಕ್ ತ್ಯಾ ಆಸ್ಪತ್ರೆಚ್ಯಾ ಖಟ್ಲ್ಯಾರ್ ಆಲಿಯಾಕ್ ಆಮ್ರುಕೆಂ ಹಾಸ್ಚೆಂ ಪಳೆತಾನಾಚ್ ಸಮ್ಜಾಲ್ಲೆಂ. ಆಲಿಯಾಚಾ ದೊಳ್ಯಾಂನಿ ಏಕ್ ವಿಶೇಶ್ ಆಕರ್ಶಣ್ ಆಸ್ಲ್ಲೆಂ. ತಾಚ್ಯೆರ್ ಜಾಲ್ಲ್ಯಾ ಹಲ್ಲ್ಯಾ ಥಾವ್ನ್ ತೆಂ ನಿತ್ರಾಣ್ ಜಾಲ್ಲೆಂ ಜಾಲ್ಯಾರ್ಯ್ ತಾಚ್ಯಾ ಉತ್ರಾಂನಿ ತೆಂ ಸುಡ್ಸುಡೀತ್ ಆಸ್ಲ್ಲೆಂ. ಪ್ರತ್ಯೇಕ್ ಜಾವ್ನ್ ಆಲಿಯಾಚೆಂ ಉಲೊಣೆ ಮಿಶೆಲಾಕ್ ಬರೆಂಚ್ ಪಸಂದ್ ಜಾಲೆಂ. ತಾಚ್ಯಾ ಉತ್ರಾಂನಿ ಮರ್ಯಾದ್ ಆಸ್ಲ್ಲಿ. ತ್ಯಾ ಉತ್ರಾಂನಿ ಸೊಭಾಯ್ ಆಸ್ಲ್ಲಿ. ಪುಣ್ ಆಲಿಯಾ ಖಂಯ್ಚರ್ಗೀ ಏಕ್ ಸಮ್ಜೊಂಕ್ ಸಾದ್ಯ್ ನಾತ್ಲ್ಲೊ ಮಿಸ್ತೆರ್ ಮ್ಹಳ್ಳ್ಯಾ ಪರಿಂ ಮಿಶೇಲಾಕ್ ದಿಸ್ಲೆಂ.
ತ್ಯಾ ಭಾಯ್ರ್ ಆಲಿಯಾಚೊ ರಾಯನಾ ಸವೆಂ ಭರ್ತಾವ್ ಪಳೆಲ್ಲ್ಯಾ ಮಿಶೇಲಾಕ್ ಆಲಿಯಾ ರಾಯನಾ ಥಂಯ್ ಚಡ್ಚ್ ಉತ್ಸಾಹಿತ್ ಜಾವ್ನ್ ಆಸ್ಲ್ಲ್ಯಾ ಪರಿಂ ದಿಸ್ಲೆಂ. ರಾಯನ್ಯ್ ಆಲಿಯಾ ಸವೆಂ ತ್ಯಾಚ್ ಭರ್ತಾವಾನ್ ಚಲ್ತಾಲೊ.
ಹ್ಯಾ ಆಲಿಯಾಚಾ ಭೆಟೆಂತ್ ಮಿಶೇಲ್ ಖುಶ್ ನಾತ್ಲ್ಲೆಂ.
ಶೀತಲಾನ್ ಮಿಶೇಲಾಚಿ ಮತ್ ಪಯ್ಲಿಚ್ ಕದ್ವಾಳಾಯಿಲ್ಲ್ಯಾನ್ ಮಿಶೇಲ್ ಆತಾಂ ಪಯ್ಲೆಂಚಾ ಪ್ರಾಸ್ ಚಡ್ ಕದ್ವಳ್ಳೆಂ.
ಆಲಿಯಾಚಾ ಪ್ಲ್ಯಾಟಾ ಥಾವ್ನ್ ಆಯ್ಲ್ಯಾ ಉಪ್ರಾಂತ್ ಮಿಶೇಲ್ ಪಯ್ಲೆಂಚಾ ತಿತ್ಲೆಂ ಖುಶ್ ನಾತ್ಲ್ಲೆಂ. ಸಭಾರ್ ಪಾವ್ಟಿಂ ತಾಣೆಂ ರಾಯನಾಕ್ ಆಪ್ಲ್ಯಾ ಮತಿಂತ್ಲ್ಯಾ ವಿಶುಚಾ ಆನಿ ಆಲಿಯಾಚಾ ಸಂಭಂಧಾ ವಿಶಿಂ ಉಲಂವ್ಕ್ ಚಿಂತ್ಲೆಂ ಜಾಲ್ಯಾರ್ಯ್ ತಾಕಾ ಸಾದ್ಯ್ ಜಾಲೆಂ ನಾ. ತೆಂ ಭಿತರ್ಲ್ಯಾ ಭಿತರ್ಚ್ ಮತಿಂತ್ಲ್ಯಾ ಚಿಂತ್ನಾಂಚಾ ಸುಳಿ ಗೊಂದೊಳಾಂತ್ ಶಿರ್ಕೊನ್ ಉಡ್ಡೊಂಕ್ ಲಾಗ್ಲೆಂ. ಆಲಿಯಾ ವಿಶಿಂ ತೆಂ ರಾಯನಾ ಲಾಗಿಂ ಉಲಂವ್ಕ್ ಆಶೆಲೆಂ ಜಾಲ್ಯಾರ್ಯ್ ತಾಕಾ ಸಂದರ್ಭ್ ಉದೆವ್ನ್ ಆಯ್ಲೊ ನಾ.
ರಾತ್ ಪಾಶಾರ್ ಜಾವ್ನ್ ಗೆಲ್ಲಿ. ಪುಣ್ ಆಜ್ ಕಶೆಂ ತರ್ಯ್ ಹ್ಯಾ ವಿಶಿ ರಾಯನಾ ಲಾಗಿಂ ಉಲಂವ್ಕ್ ಜಾಯ್. ರಾಯನಾಲಾಗಿಂ ಉಲಯ್ಲ್ಯಾ ಬಗಾರ್ ಹ್ಯಾ ಮತಿಕ್ ಜಾಂವ್ ತ್ಯಾ ಶೀತಲಾಚಾ ದುಬಾವಾಕ್ ಜಾಂವ್ ಶಾಂತಿ ಮೆಳ್ಚ್ಯಾ ಪರಿಂ ನಾ. ಖತ್ಕತೊನ್ ಯೆಂವ್ಚ್ಯಾ ತ್ಯಾ ಉದ್ಕಾಕ್ ಮಿಶೇಲಾನ್ ಬಸ್ಮತಿ ತಾಂದುಳ್ ದೆಂವಯ್ತಾನಾ ಆಪ್ಲ್ಯಾ ಮತಿಂತ್ ಘಟ್ ನಿರ್ಧಾರ್ ಕೆಲೊ. ಪುಣ್ ಹ್ಯಾ ನಿರ್ಧಾರಾಕ್ ಕಾರ್ಯಗತ್ ಕರ್ಚ್ಯಾಂತ್ ತೆಂ ಕಿತ್ಲೆಂ ಯಶಸ್ವಿ ಜಾತೆಲೆಂ ಮ್ಹಳ್ಳ್ಯಾಚೊ ತಾಕಾಚ್ಚ್ ಭರ್ವಸೊ ನಾತ್ಲ್ಲೊ.
ತಿತ್ಲ್ಯಾರ್!
ಭಾಯ್ಲ್ಯಾ ಸಾಲಾಂತ್ಲೆಂ ಪೋನ್ ರಿಂಗ್ ಜಾಂವ್ಕ್ ಲಾಗ್ಲೆಂ!
ಸ್ಟವಾಚೊ ಉಜೊ ಭಾರೀಕ್ ಕರುನ್ ತೆಂ ಆತಾಂ ಪೊನಾ ತೆವ್ಶಿಂ ಚಮ್ಕಾಲೆಂ.
ಪೊನಾಚೆರ್ ತ್ಯಾ ಕುಶಿಕ್ ಥಾವ್ನ್ ಶೀತಲ್ ಉಲಯ್ತಾಲೆಂ.
"ಹಾಂ ಶೀತಲ್ ಸಾಂಗ್!" ಮಿಶೇಲಾಚೊ ತಾಳೊ ಹರ್ಶೆಂಚಾ ಪರಿ ಸುಡ್ಸುಡೀತ್ ನಾತ್ಲ್ಲೊ.
"ಮಿಶೇಲ್.....? ತುಕಾ ಹಾಂಗಾ ಯೆವ್ಯೆತ್.....?" ಶೀತಲಾನ್ ವಿಚಾರ್ಲೆಂ.
"ನಾ ಶೀತಲ್! ಆಜ್ ಮ್ಹಜೆಂ ಮೂಡ್ ಸಾರ್ಕೆಂ ನಾ! ಫಾಲ್ಯಾಂ ಜಾಲ್ಯಾರ್ ಯೇಂವ್ಕ್ ಪಳೆತಾಂ!" ತ್ಯಾಚ್ ಉದಾಸ್ಭರಿತ್ ತಾಳ್ಯಾನ್ ಉಲಯಿಲ್ಲ್ಯಾ ಮಿಶೇಲಾನ್ ಪೋನ್ ಭಂಧ್ ಕೆಲೆಂ.
ಆಜ್ ನಿಜಾಯ್ಕ್ಯ್ ಮಿಶೆಲಾಚಾ ಮತಿಕ್ ಶಾಂತಿ ನಾತ್ಲ್ಲಿ. ತಾಚ್ಯಾ ಮತಿಂತ್ ಉಟ್ಲ್ಲ್ಯಾ ಸಭಾರ್ ಸವಾಲಾಂಕ್ ರಾಯನಾ ಲಾಗ್ಚಿ ಜವಾಬ್ ತಾಕಾ ಘೆಂವ್ಕ್ ಜಾಯ್ ಆಸ್ಲ್ಲಿ. ಪುಣ್, ಮಿಶೇಲ್ ಹೆಂ ಕಶೆಂ ಕರ್ತೆಲೆಂ?
ಫೊನಾಚಾ ರಿಸಿವರಾಕ್ ತಾಚ್ಯಾ ಕ್ರೆಡಲಾ ವಯ್ರ್ ದವರುನ್ ಮಿಶೇಲ್ ಪರ್ತ್ಯಾಕ್ ಕುಜ್ನಾಕ್ ವಚೊಂಕ್ ಘುಂವ್ಲೆಂ. ತಾಣೆಂ ಫಕತ್ತ್ ದೋನ್ ಮೆಟಾಂ ಕಾಡ್ಲ್ಯಾಂತ್ ಮಾತ್ರ್!
ತಿತ್ಲ್ಯಾರ್ ತೆಂಚ್ ಟೆಲಿಪೋನ್ ಪರ್ತ್ಯಾಕ್ ವ್ಹಾಜೊಂಕ್ ಲಾಗ್ಲೆಂ.
ಪರ್ತ್ಯಾಕ್ ಶೀತಲ್? ಮತಿಂತ್ಚ್ ಸವಾಲ್ ಕೆಲ್ಲ್ಯಾ ಮಿಶೇಲಾನ್ ಪೋನ್ ಕಾಡ್ಲೆಂ.
"ಹಲೋ......?" ಮಿಶೆಲ್ ಉಲಯ್ಲೆಂ.
"ಹಲೋ? ಹಾಂವ್ ಇಕ್ಬಾಲ್ ಉಲಯ್ತಾಂ! ಇಕ್ಬಾಲ್ ಭಾಯಿ.......!" ತ್ಯಾ ಕುಶಿಚೊ ತಾಳೊ ಉಲಯ್ಲೊ.
*************
ಲಾಯರ್ ರಾಮ್ ಪ್ರಸಾದಾಚೆಂ ಆಫೀಸ್!
"ಸರ್! ಮ್ಹಾಕಾ ಆಲಿಯಾ ಖಾನಾಚಾ ಹ್ಯಾ ಕೇಸಿಂತ್ ಮೆತೆರ್ ಜಾಂವ್ಕ್ ಜಾಯ್ನಾ!" ಅಮೀನಾಕ್ ಹೊ ನಿರ್ಧಾರ್ ಘೆಂವ್ಕ್, ಹ್ಯಾ ಉತ್ರಾಂಕ್ ಆಪ್ಲ್ಯಾ ವೊಂಟಾಂನಿ ಉಚಾರ್ಲ್ಲ್ಯಾ ತಿತ್ಲೆಂ ಸುಲಾಭಾಯೆಚೆಂ ನ್ಹಯ್ ಆಸ್ಲ್ಲೆಂ. ಅಮೀನಾಕ್ ಹೊ ನಿರ್ಧಾರ್ ಘೆಂವ್ಕ್ ತಾಕಾ ಮಸ್ತ್ ಕಶ್ಟ್ ಜಾಲ್ಲೆ. ಆಲಿಯಾಕ್ ತ್ಯಾ ಆಸ್ಪತ್ರೆಚ್ಯಾ ಖಾಟಿಯೆರ್ ಮೆಳ್ತಾ ಪಾಸೊನ್ ಅಮೀನಾಕ್ ಆಪ್ಣಾ ವಯ್ರ್ ಕಾಂಯ್ ತರ್ಯ್ ಧಯ್ರ್ ಆಸ್ಲ್ಲೆಂ. ಪುಣ್ ಆಲಿಯಾಕ್ ಮುಖಾ ಮುಖಿ ಮೆಳ್ಲ್ಲ್ಯಾ ಘಡಿಯೆ ಆಲಿಯಾಚಾ ತೊಂಡಾರ್ ಉಮಾಳ್ಚ್ಯಾ ತ್ಯಾ ಭಾವನಾಂಕ್ ವಾಚ್ಲ್ಲ್ಯಾ ಅಮೀನಾಚಾ ಶಿರಾಂ ಶಿರಾಂನಿ ಜಗ್ಲಾಣೆಂ ಧಾಂವ್ಲ್ಲ್ಯಾಚೊ ಆನುಭವ್ ಜಾಲ್ಲೊ. ಆಲಿಯಾಚಾ ದೊಳ್ಯಾಂನಿ ಅಮೀನಾಕ್ ಆಪ್ಣಾಚೆಂಚ್ ವಿನಾಶ್ ಪಳೆಲ್ಲ್ಯಾ ಪರಿಂ ಜಾಲ್ಲೆಂ. ಹಾಂಗಾಚ್ ಅಮೀನಾನ್ ಆಪ್ಣಾ ವಯ್ಲೆಂ ಧಯ್ರ್ ಸಾಂಡ್ಲ್ಲೆಂ.
ಪಯ್ಲೆಂಚೆಂ ತೆಂ ಸುಡ್ಸುಡೀತ್ ಆಲಿಯಾ ಆನಿ ಆಜ್ ಹ್ಯಾ ಖಾಟಿಯೆರ್ ನಿದ್ಲೆಲೆಂ ಹೆಂ ಆಲಿಯಾ ಎಕಾಮೆಕಾ ತದ್ವಿರುದ್ಧ್ ಮ್ಹಳ್ಳ್ಯಾ ಪರಿಂ ಅಮೀನಾಕ್ ಭೊಗ್ಲೆಂ. ಅಮೀನಾನ್ ಪಳೆಲ್ಲೆಂ ತೆಂ ಆದ್ಲೆಂ ಆಲಿಯಾ ತಾಚ್ಯಾ ಸ್ವಭಾವಾನ್ ಹಟ್ಟಿ ಜಾಲ್ಯಾರ್ಯ್ ಸಾಂಪ್ರದಾಯಿಕ್ ಸ್ವಭಾವಾಚೆಂ, ಆಪ್ಲ್ಯಾ ಚಲಿಯೆಪಣಾಚಾ ಸೊಭಾಯೆಕ್ ಹೆರಾಂ ಮುಕಾರ್ ಕೆದ್ನಾಂಚ್ ತೆಂ ಉಗ್ತೆಂ ಘಾಲ್ಲೆಂ ಚಲಿ ತೆಂ ನ್ಹಯ್! ಅಸಲೆಂ ಆಲಿಯಾ ತ್ಯಾ ಫಿಲ್ಮಾಚಾ ಸಂಸಾರಾಂತ್ ಕಶೆಂ ಪ್ರವೇಶ್ ಜಾಲೆಂ ಮ್ಹಳ್ಳೆಂಚ್ ಅಮೀನಾಕ್ ಜಿರಂವ್ಕ್ ಜಾಯ್ನಾತ್ಲ್ಲೆಂ ಸವಾಲ್ ಜಾಲ್ಲೆಂ ಜಾಲ್ಯಾರ್ ಹ್ಯಾ ಆಲಿಯಾಚಾ ನಿರ್ಧಾರಾ ಪಾಟ್ಲ್ಯಾನ್ ತಾಚೊ ಇರಾದೊ ಕಿತೆಂ ಆಸಾತ್ ತೆಂ ಚಿಂತುನ್ ತಾಚಿ ನೀದ್ ತಾಕಾ ಸೊಡುನ್ ಧಾಂವ್ಲ್ಲಿ. ಆಲಿಯಾ ಆಪ್ಲ್ಯಾ ಹಟ್ಟಾಕ್ ಲಾಗೊನ್ ಕಿತೆಂಯ್ ಕರುಂಕ್ ಸಕ್ತಾ. ತೆಂ ಆಪ್ಲ್ಯಾ ಜಿವಾಕ್ ಪಾಸೊನ್ ಕೆದ್ನಾಂಚ್ ಭಿಯೆಂವ್ಚೆಂ ಚಲಿ ನ್ಹಯ್! ಹಾಕಾ ಪ್ರಭಲ್ ಸಾಕ್ಸ್ ಜಾವ್ನ್ ತಾಚೊ ಘೊವ್ ನಾಸಿರ್ಚ್ ಅಮೀನಾಚಾ ಬಗ್ಲೆಕ್ ಉಭೊ ಆಸ್ಲ್ಲೊ.
"ಮ್ಹಾಕಾ ಹೆಂ ಪಾತ್ಯೆಂವ್ಕ್ ಜಾಯ್ನಾಂ ನಾಸಿರ್! ಹೆಂ ಕಶೆಂ ಸಾದ್ಯ್?" ಅಮೀನಾಕ್ ಅಜೂನ್ ಆಲಿಯಾಕ್ ಪಾತ್ಯೆಂವ್ಕ್ ಕಶ್ಟ್ ಮಾರ್ತಾಲೆ. ಖಂಯ್ಚೆಂಯ್ ಚಲಿ ಇತ್ಲೆಂ ಧಯ್ರಾಧೀಕ್ ಜಾಂವ್ಕ್ ಸಕ್ತಾ? ಅಮೀನಾಚಾ ಮತಿಂತ್ಲೆಂ ಸವಾಲ್ ಅಮೀನಾಕ್ ಹರ್ಯೆಕ್ ಘಡಿ ತಾಚೊ ಪಾಟ್ಲಾವ್ ಕರ್ತಾಲೆಂ.
ನಾಸಿರಾ ಸಾಂಗಾತಾ ಅಮೀನಾಚೆಂ ನಿಖಾ ಜಾಲ್ಯಾ ಉಪ್ರಾಂತ್ ಅಮೀನಾ ಆಲಿಯಾಚಾ ವಿಶ್ಯಾಂತ್ ಸಂಪೂರ್ಣ್ ಜಾಣಾಂ ಜಾಲ್ಲೆಂ. ಆಲಿಯಾಚಾ ಸಗ್ಳ್ಯಾ ಜಿವಿತಾ ವಿಶಿಂ ತೆಂ ಜಾಣಾಂ ಜಾಲ್ಲೆಂ. ಹ್ಯಾ ಸಮಾಜೆಂತ್ ಚಲಿ ಜಾವ್ನ್ ಜಲ್ಮಾಲ್ಲೊ ಏಕ್ ಜೀವ್ ಇತ್ಲೊ ಧಯ್ರಾಧೀಕ್ ಕಸೊ ಜಾಂವ್ಕ್ ಸಕ್ತಾ? ಹೆಂ ಅಮೀನಾಚಾ ಸಮ್ಜಣೆ ಭಾಯ್ರ್ ಆಸ್ಲ್ಲೆಂ.
"ಆಲಿಯಾನ್ ಆಪ್ಣಾಕ್ಚ್ ಸಂಪೂರ್ಣ್ ಬದ್ಲಿಲಾಂ ನಾಸಿರ್!" ಅಮೀನಾಚಾ ದೊಳ್ಯಾಂ ಮುಕಾರ್ ಅಜೂನ್ ತ್ಯಾ ಆಸ್ಪತ್ರೆಂತ್ ನಿದೊನ್ ಆಸ್ಲ್ಲೆಂ ಆಲಿಯಾ ದಿಸ್ತಾಲೆಂ. ಆಸ್ಪತ್ರೆಚ್ಯಾ ಖಾಟಿಯೆರ್ ಆಲಿಯಾನ್ ಅಮೀನಾಕ್ ವಳ್ಕಾತಾಂ ಮ್ಹಳ್ಳ್ಯಾ ವಿಶಿಂ ಕೊಣಾಯ್ಕ್ಯ್ ದಾಖಯಿಲ್ಲೆಂ ನಾ. ತೆಂ ಅಮೀನಾ ಸವೆಂ ಎಕಾ ಲಾಯರಾಲಾಗಿಂ ತಾಚೆಂ ಕ್ಲಾಯಂಟ್ ಉಲಂವ್ಚ್ಯಾ ಪರಿಂಚ್ ಉಲಯಿಲ್ಲೆಂ. ತ್ಯಾ ವಗ್ತಾರ್ ಥಂಯ್ಚರ್ ಹಾಜರ್ ಆಸ್ಲ್ಲ್ಯಾ ರಾಯನಾಕ್ ಜಾಂವ್ ಯಾ ತ್ಯಾ ದಾಕ್ತೆರಾಂಕ್ ಜಾಂವ್ ಆಲಿಯಾನ್ ಕಾಂಯ್ಚ್ ದುಬಾವಾಕ್ ಇಡೆಂ ದಿಲ್ಲೆಂ ನಾ. ಜಶೆಂ ಅಮೀನಾಕ್ ಆಲಿಯಾ ಪಯ್ಲ್ಯಾ ಪಾವ್ಟಿಂ ಆಜ್ ಪಳೆತಾ ಮ್ಹಳ್ಳ್ಯಾ ಪರಿಂ! ಪುಣ್ ಆಲಿಯಾಚೆ ದೊಳೆ ಮಾತ್ರ್ ಮಸ್ತ್ ಉಲಯ್ತಾಲೆ. ತ್ಯಾ ಉಲೊಣ್ಯಾಕ್ ಆಯ್ಕೊಂಕ್ ಅಮೀನಾಚೆಂ ಕಾಳಿಜ್ ದಡ್ದಡ್ತಾಲೆಂ. ಹೆಂ ತಾಚ್ಯೆ ಥಾವ್ನ್ ಸಾದ್ಯ್ ನಾತ್ಲ್ಲೆಂ. ಎಕಾ ಜಾಣಾಂ ಆಸ್ಲ್ಲ್ಯಾ ವ್ಯಕ್ತಿಕ್ ಆಪುಣ್ ನೆಣಾಂಚ್ ಮ್ಹಳ್ಳ್ಯಾ ಪರಿಂ ವರ್ತನ್ ಕರ್ಚೆಂ ತಿತ್ಲೆಂ ಸುಲಭ್? ತೆಂಯ್ ಆಪ್ಣಾಕ್? ಆಪ್ಣಾಕ್ ಆಲಿಯಾ ಕಶೆಂ ವಿಸ್ರಾತೆಲೆಂ? ತಾಚೆಂ ಜಿವಿತ್ ಆಪ್ಣೆಂ ಪಿಡ್ಡ್ಯಾರ್ ಕೆಲಾಂ ಮ್ಹಣೊನ್ ತಾಣೆಂ ಪಾತ್ಯೆಂವ್ಚ್ಯಾಂತ್ ಕಾಂಯ್ ದುಬಾವ್ ನಾ. ಆಶೆಂ ಆಸ್ತಾನಾ ....!
"ಖಂಯ್ ಥಾವ್ನ್ ಖಂಯ್ ಪಾವ್ಲೆಂ ಆಲಿಯಾ!" ನಾಸಿರಾನ್ ಉದ್ಗಾರ್ ಸೊಡ್ಲೊ.
ನಾಸಿರಾಚಾ ಉದ್ಗಾರಾನ್ ಥೊಡ್ಯಾ ಖಿಣಾಂಕ್ ಅಮೀನಾಕ್ ಚಿಂತುಂಕ್ ಬಲತ್ಕಾರ್ ಕೆಲೆಂ. ಆಲಿಯಾ ಖುದ್ದ್ ಆಪ್ಣಾಕ್ ಜಾಯ್ ಮ್ಹಣೊನ್ ಹ್ಯಾ ಪಾಂವ್ಡ್ಯಾರ್ ಪಾಸೊನ್ ಪಾವ್ಲೆಂ? ವಾ ತಾಕಾ ಕೊಣೆಂಯ್ ಹಾಂಗಾ ಪಾಸೊನ್ ಪಾವಯ್ಲೆಂ?
ಅಮೀನಾ ನಾಸಿರಾಚೆಂ ಬಾಯ್ಲ್ ಜಾವ್ನ್ ಆಯ್ಲ್ಯಾ ಉಪ್ರಾಂತ್ ತೆಂ ನಾಸಿರಾಕ್ ಆನಿ ತಾಚ್ಯಾ ಕುಟ್ಮಾಕ್ ಜಾಣಾಂ ಜಾಲ್ಲೆಂ.
"ಬೇಟಿ ತುಂ ಹ್ಯಾ ಆಲಿಯಾಚಾ ವಿಶಯಾಂತ್ ಮೆತೆರ್ ಜಾಯ್ನಾಕಾ! ತಾಣೆಂ ಪರ್ತ್ಯಾಕ್ ಆಮ್ಚ್ಯಾ ಜಿವಿತಾಂತ್ ಯೆಂವ್ಚೆಂ ಮ್ಹಾಕಾ ಪಸಂದ್ ನಾ!" ಸುಲೆಮಾನಾನ್ ಅಮೀನಾಕ್ ಸಲಹಾ ದಿಲ್ಲಿ ಜಾಲ್ಯಾರ್ಯ್ ಹಿ ತಾಕಾ ದಿಲ್ಲ್ಯಾ ಸಲಹಾಚ್ಯಾಕ್ಯ್ ಚಡ್ ಮಾಫಾನ್ ತಾಕಿದ್ ಜಾವ್ನ್ ಆಸ್ಲ್ಲಿ. ನಾಸಿರಾಚ್ಯಾ ಘರ್ಚ್ಯಾಂಚಾ ಹರ್ಯೆಕಾ ತಾಕಿದೆಕ್ ಅಮೀನಾನ್ ಆಪ್ಣಾಕ್ ಸಲಹಾ ಜಾವ್ನ್ ಘೆವ್ನ್ ತ್ಯಾ ತಾಕಿದೆಕ್ ಆಪ್ಲೊ ಮಾನ್ ಬಾಗಾಯ್ಲಾ. ಪುಣ್ ಆಲಿಯಾ?
ಅಸ್ಪತ್ರೆಂತ್ ಆಲಿಯಾಕ್ ಪಳಯಿಲ್ಲ್ಯಾ ಅಮೀನಾಕ್ ಪಯ್ಲೆ ಪಾವ್ಟಿಂ ಆಲಿಯಾ ವಯ್ರ್ ನಿಜಾಯ್ಕ್ಯ್ ಘಡೊಂಕ್ ನಜೊ ಜಾಲ್ಲೆಂ ಘಡ್ಲಾಂ ಮ್ಹಣೊನ್ ಸಮ್ಜಾಲೆಂ. ಎಕಾ ಕುಶಿನ್ ತಾಕಾ ಆಲಿಯಾಚಾ ಹ್ಯಾ ಕೇಸಿಕ್ ಝಗಡ್ಚೆಂ ಮನ್ ಆಯ್ಲೆಂ ಜಾಲ್ಯಾರ್ಯ್ ಆಪ್ಲ್ಯಾ ಘೊವಾಕ್ ಲಾಗೊನ್, ಕುಟ್ಮಾಚಾ ಶಾಂತೆಕ್ ಲಾಗೊನ್ ಆನಿ ತಾಚ್ಯಾಚ್ ಫುಡಾರಾಚ್ಯಾ ಬರ್ಯಾಕ್ ಲಾಗೊನ್ ತಾಣೆಂ ಆಲಿಯಾ ಥಾವ್ನ್ ಪಯ್ಸ್ ರಾಂವ್ಚೆಂಚ್ ಬರೆಂ ಮ್ಹಣೊನ್ ನಿರ್ಧಾರ್ ಕೆಲ್ಲೊ.
"ಕಿತ್ಯಾಕ್ ಅಮೀನಾ? ತುಕಾ ಕಾಂಯ್ ಪ್ರಾಬ್ಲೆಮ್....?" ಅಮೀನಾನ್ ಆಲಿಯಾಚಾ ಕೇಸಿಂತ್ ಮೆತೆರ್ ಜಾಂವ್ಚಾ ವಿಶ್ಯಾಂತ್ ನೆಗಾರ್ ಕರ್ತಾನಾ ರಾಮ್ ಪ್ರಸಾದ್ ವಿಜ್ಮಿತ್ ಜಾಲೊ.
"ಪ್ರಾಬ್ಲೆಮ್ ಕಾಂಯ್ ನಾ ಸರ್. ಪುಣ್.....!" ಅಮೀನಾಕ್ ಆಪ್ಲ್ಯಾ ಜಿವಿತಾಚೆಂ ಸತ್ ಉಗ್ಡಾಪೆಂ ಕರ್ಚೆಂ ಧಯ್ರ್ ಆಯ್ಲೆಂ ನಾ. ಆಪ್ಣಾಚೆಂ ಹೆಂ ಧಯ್ರ್ ಪರ್ತ್ಯಾಕ್ ಆಲಿಯಾಕ್ ಆಪ್ಲ್ಯಾ ಜಿವಿತಾಂತ್ ಹಾಡ್ಲ್ಯಾರ್?
"ತರ್ ಕಿತ್ಯಾಕ್ ತುಕಾ ಕಾಮ್ ಕರುಂಕ್ ನಾಕಾ?" ಅಮೀನಾಚೊ ಭರ್ತಾವ್ ರಾಮ್ ಪ್ರಸಾದಾಕ್ ಸಮ್ಜಾಲೊ ನಾ. ಎದೊಳ್ ಅಮೀನಾನ್ ಆಶೆಂ ತಾಚ್ಯಾ ಕಾಮಾಕ್ ಇನ್ಕಾರ್ ಕೆಲ್ಲೆಂ ನಾ.
"ಬೆಶ್ಟೆಂ ಅಶೆಂಚ್ ಸರ್!" ಅಮೀನಾಕ್ ರಾಮ್ ಪ್ರಸಾದಾ ಮುಕಾರ್ ದವರುಂಕ್ ಕಾಂಯ್ಚ್ ಕಾರಾಣ್ ಸುಸ್ತಾಲೆಂ ನಾ.
"ತುಂ ಜಾಣಾಂಯ್ ಅಮೀನಾ... ತುಂ ಕಿತೆಂ ಉಲಯ್ತಾಯ್ ತೆಂ?" ರಾಮ್ ಪ್ರಸಾದಾಕ್ ಕಾಂಯ್ ಸಮ್ಜಾಲೆಂ ನಾ. "ಆಲಿಯಾ ಖಾನ್ ಬಾಲಿವುಡಾಚೆಂ ಹೀರೋಯಿನ್!" ಆಪ್ಲ್ಯಾ ಬಸ್ಕೆಚೆರ್ ಸಾರ್ಕೊ ಬಸ್ಲಲೊ ರಾಮ್ ಪ್ರಸಾದ್, "ತುಂ ಜಾಣಾಂಯ್ ಹಿ ಕೇಸ್ ಆಮಿಂ ಜಿಕ್ಲ್ಯಾಂವ್ ಜಾಲ್ಯಾರ್ ಆಮ್ಚೆಂ ನಾಂವ್ ಖಂಯ್ ಪಾವ್ತೆಲೆಂ?"
"ವಿಶಯ್ ತೊ ನ್ಹಯ್ ಸರ್!"
"ಮಾಗಿರ್ ಕಿತೆಂ?"
"ಮ್ಹಾಕಾ ಕಾಂಯ್ ಸಾಂಗೊಂಕ್ ಜಾಯ್ನಾಂ ಸರ್!"
"ತುಕಾ ಏಕ್ ವಿಶಯ್ ಸಾಂಗೊಂ?" ರಾಮ್ ಪ್ರಸಾದ್ ಆತಾಂ ಆಪ್ಲ್ಯಾ ಬಸ್ಕೆಕ್ ವೊಣ್ಕಾಲೊ. ತಾಚ್ಯಾ ಜಡಾಯೆಕ್ ವಾ ತ್ಯಾ ಬಸ್ಕೆಚ್ಯಾ ಪರ್ನ್ಯಾಪಣಾಕ್, ತೊ ಬಸ್ಲೆಲೆಂ ಚೇರ್ ’ಕಿರ್ರ್’ ಕರುನ್ ಆವಾಜ್ ಕರುನ್ ಸ್ತಬ್ದ್ ಜಾಲೆಂ.
"ಕಿತೆಂ ಸರ್?" ಅಮೀನಾಚಾ ತೊಂಡಾರ್ ಕಾಂಯ್ ಬದ್ಲಾವಣ್ ದಿಸ್ಲಿ ನಾ.
"ತುಂ ರಾಯನಾಕ್ ಜಾಣಾಂಯ್?"
"ಕೋಣ್ ರಾಯನ್...?" ಅಮೀನಾಕ್ ಸಮ್ಜಾಲೆಂ ನಾ.
"ರಾಯನ್! ಆಲ್ಪ್ರೆಡ್ ರಾಯನ್!" ರಾಮ್ ಪ್ರಸಾದ್ ಪರ್ತ್ಯಾಕ್ ಉದ್ಗಾರ್ಲೊ.
"ನಾ ಸರ್!"
"ಹ್ಯಾಚ್ ಖಾತಿರ್ ತುಂ ಆಶೆಂ ಉಲಯ್ತಾಯ್!" ರಾಮ್ ಪ್ರಸಾದ್ ವ್ಹಳೂ ಹಾಸ್ಲೊ. ತಾಚ್ಯಾ ಹಾಸ್ಯಾಂಚೊ ಮತ್ಲಾಬ್ ಅಮೀನಾಕ್ ಸಮ್ಜಾಲೊ ನಾ. ತೆಂ ತಶೆಂಚ್ ರಾಮ್ ಪ್ರಸಾದಾಕ್ ಪಳವ್ನ್ ರಾವ್ಲೆಂ. "ರಾಯನಾನ್ ಜರ್ ಮನ್ ಕೆಲೆಂ ಜಾಲ್ಯಾರ್ ತುಜ್ಯಾ ತಸಲ್ಯಾ ಧಾ ಜಾಣಾಂಕ್ ತೊ ಖುದ್ದ್ ಲಾಯರ್ ಕರುಂಕ್ ಸಕ್ತಾ! ಆನಿ ತುಂ ತಾಕಾ ಇನ್ಕಾರ್ ಕರ್ತಾಯ್.....?"
"ಹೊ ರಾಯನ್ ಕೋಣ್ ಸರ್.....?" ಅಮೀನಾ ಹ್ಯಾ ರಾಯನಾ ವಿಶಿಂ ಆಯ್ಕೊಂಕ್ ಆತುರ್ ಜಾಲೆಂ.
"ಆಲಿಯಾಕ್ ಬಾಲಿವುಡಾಂತ್ ಹಾಡ್ಲ್ಲೆಂಚ್ ರಾಯನಾನ್! ತಾಚ್ಯಾಚ್ ಫಿಲ್ಮಾಂತ್ ತೆಂ ಕಾಮ್ ಕರ್ತಾ. ಆತಾಂ ತಾಚ್ಯಾಚ್ ಖುಶೇನ್ ಆಮಿಂ ಹಿ ಕೇಸ್ ಆಲಿಯಾಚಾ ತರ್ಫೆನ್ ಝಗಡ್ತಾಂವ್!" ರಾಮ್ ಪ್ರಸಾದ್ ರಾಯನಾಚೆ ಗುಣ್ಗಾನ್ ಕರುಂಕ್ ಲಾಗ್ಲೊ.
"ಜಾಲ್ಯಾರ್ಯ್ ಸರ್!"
"ಪಳೆ ಅಮೀನಾ ತುವೆಂ ಎದೊಳ್ಚ್ ಹ್ಯಾ ಆಲಿಯಾಚಾ ಕೇಸಿಂತ್ ಹಾತ್ ಗಾಲಾಯ್. ಆತಾ ಅರ್ಧ್ಯಾರ್ ತುಂ ಸೊಡ್ತಾಯ್ ಜಾಲ್ಯಾರ್ ತುಜಿ ಖುಶಿ! ಪುಣ್ ಹಾಚ್ಯೆ ಥಾವ್ನ್ ತುಜ್ಯಾ ಜಿವಿತಾಂತ್ ಕಾಂಯ್ ಚಡ್ ಉಣೆಂ ಜಾಲ್ಯಾರ್ ತಾಕಾ ತುಂಚ್ ಜವಾಬ್ದಾರ್!" ರಾಮ್ ಪ್ರಸಾದಾಚಾ ತಾಳ್ಯಾಂತ್ ತಾಕಿದ್ ಆಸ್ಲ್ಲಿ.
"ತುಮಿ ಮ್ಹಾಕಾ ಬೆಷ್ಟಾಯ್ತಾತ್?" ಅಮೀನಾಕ್ ಆಶ್ಚರ್ಯ್ ಜಾಲೆಂ.
"ಹಿ ಬೆಷ್ಟಾವ್ಣಿ ನ್ಹಯ್ ಅಮೀನಾ! ವ್ಹಡ್ಲೆ ಮನಿಸ್ ಸಗ್ಳೆ ಆಶೆ! ತಾಂತುಂಯ್ ಹೊ ರಾಯನ್.....? ಹಾಂವ್ ಜಾಣಾಂ ತಾಕಾ!"
ರಾಮ್ ಪ್ರಸಾದಾಚಿಂ ಉತ್ರಾಂ ಆಯ್ಕಾಲ್ಲೆಂ ಅಮೀನಾ ಥಯ್ಚ್ ತಾಚ್ಯಾ ಬಸ್ಕೆರ್ ಗಳ್ಳೆಂ. ತಾಕಾ ಆತಾಂ ಕಿತೆಂ ಕರ್ಚೆಂ ಮ್ಹಳ್ಳೆಂ ತೆಂ ಸಮ್ಜಾಲೆಂ ನಾ. ಎಕಾ ಕುಶಿನ್ ಆಪ್ಣಾಚೆಂ ಕಾಮ್. ಎಕಾಕುಶಿನ್ ಆಪ್ಣಾಚೆಂ ಕುಟಾಮ್! ಪುಣ್ ಅಮೀನಾನ್ ಆತಾಂ ಚಿಂತುನ್ ಬಸೊಂಕ್ ಸಾದ್ಯ್ ನಾತ್ಲ್ಲೆಂ. ತಾಣೆ ಏಕ್ ನಿರ್ಧಾರ್ ಘೆಂವ್ಕ್ ಆಸ್ಲ್ಲೊ. ಥೊಡೊ ವೇಳ್ ತೆಂ ಚಿಂತುಂಕ್ ಪಡ್ಲೆಂ. ಆಪುಣ್ ಹ್ಯಾ ಘಡಿಯೆರ್ ಕೊಣಾಚ್ಯಾ ತರ್ಫೆನ್ ನಿರ್ಧಾರ್ ಘೆಂವ್? ಆಪ್ಣಾಚ್ಯಾ ತರ್ಫೆನ್ ವಾ ಆಪ್ಣಾಚಾ ಕುಟ್ಮಾ ತರ್ಫೆನ್? ಆನಿ ಅಮೀನಾನ್ ಏಕ್ ನಿರ್ಧಾರ್ ಘೆತ್ಲೊ.
"ನಾ ಸರ್ ಮ್ಹಾಕಾ ಜಾಂವ್ಚೆಂ ನಾ!" ಅಮೀನಾನ್ ಆಪ್ಲ್ಯಾ ಕುಟ್ಮಾ ತರ್ಫೆನ್ಚ್ ಆಪ್ಲೊ ನಿರ್ಧಾರ್ ಘೆತ್ಲೊ.
"ತರ್ ತುಂ ತುಕಾ ಹೆಂ ಕಾಮ್ ಕರುಂಕ್ ಜಾಯ್ನಾ ಮ್ಹಣ್ತಾಯ್?" ಅಮೀನಾಚಾ ನಿರ್ಧಾರಾಕ್ ಆಯ್ಕಾಲ್ಲೊ ರಾಮ್ ಪ್ರಸಾದ್ ಥೊಡೊ ವೇಳ್ ತಸೊಚ್ ಚಿಂತುನ್ ಬಸೊನ್ ಉಪ್ರಾಂತ್ ಉಲಯ್ಲೊ.
"ಹ್ಯಾ ವಿಶಯಾಂತ್ ಹಾಂವ್ ಹೆಲ್ಪ್ಲೆಸ್ ಸರ್! ಪ್ಲೀಸ್...!" ಅಮೀನಾನ್ ವಿನತಿ ಕೆಲಿ.
"ತುಂ ಮ್ಹಾಕಾ ಹ್ಯಾ ತುಜ್ಯಾ ನಿರ್ಧಾರಾ ಪಾಟ್ಲ್ಯಾ ಕಾರಾಣಾಕ್ ಕಿತ್ಯಾಕ್ ಸಾಂಗಿನಾಂಯ್.....?" ಆಪ್ಣಾ ಮುಕ್ಲ್ಯಾ ಅಮೀನಾಕ್ ರಾಮ್ ಪ್ರಸಾದ್ ಸಮ್ಜೊಂಕ್ ಸಕ್ಲೊ ನಾ. ಪುಣ್ ಅಮೀನಾಚಾ ಹ್ಯಾ ನಿರ್ಧಾರಾ ಪಾಟ್ಲ್ಯಾನ್ ಕಾಂಯ್ ತರ್ಯ್ ಭಳಾಧೀಕ್ ಕಾರಾಣ್ ಆಸಾ ಮ್ಹಳ್ಳೆಂ ತಾಕಾ ಕಳಾನಾಸ್ತಾನಾ ಗೆಲೆಂ ನಾ.
ರಾಮ್ ಪ್ರಸಾದಾಚಾ ಸವಾಲಾಕ್ ಅಮೀನಾಚೆಂ ಮೌನ್ ಜವಾಬ್ ಜಾವ್ನ್ ಯೆತಾನಾ ರಾಮ್ ಪ್ರಸಾದಾನ್ ಹ್ಯಾ ವಿಶಯಾಕ್ ಮುಕಾರ್ ವೊಡ್ಚೆಂ ಪ್ರಯತ್ನ್ ಕೆಲೆಂ ನಾ.
ಅಮೀನಾನ್ ಆಲಿಯಾಚಾ ಕೇಸಿಂತ್ ಕಾಮ್ ಕರುಂಕ್ ಇನ್ಕಾರ್ ಕೆಲ್ಯಾ ಉಪ್ರಾಂತ್ ರಾಮ್ ಪ್ರಸಾದಾನ್ ಅವಿನಾಶಾಕ್ ಹ್ಯಾ ಕೇಸಿಚೆಂ ಕಾಮ್ ವಹಿಸುನ್ ದಿಲೆಂ. ಯೆಂವ್ಚ್ಯಾ ಹಪ್ತ್ಯಾಂತ್ ಹ್ಯಾ ಕೇಸಿಕ್ ಘೆವ್ನ್ ಕೊರ್ಟಾಂತ್ ಹಾಜರ್ ಜಾಂವ್ಕ್ ಆಸ್ಲ್ಲೆಂ. ತ್ಯಾ ಪಯ್ಲೆಂ ಸಭಾರ್ ಲೀಗಲ್ ಕಾಮಾಂ ಜಾಂವ್ಕ್ ಜಾಯ್ ಆಸ್ಲ್ಲಿಂ.
ಅಮೀನಾನ್ ಆಲಿಯಾಚಾ ಮೆತೆರ್ ಜಾಂವ್ಕ್ ಇನ್ಕಾರ್ ಕೆಲ್ಯಾ ಉಪ್ರಾಂತ್ ದೋನ್ ದೀಸ್ ಪಾಶಾರ್ ಜಾಲೆ. ಹ್ಯಾ ದೋನ್ ದಿಸಾಂನಿ ಅಮೀನಾನ್ ಮಸ್ತ್ ಚಿಂತ್ಲ್ಲೆಂ. ತಾಚ್ಯಾ ಘೊವಾಲಾಗಿಂ ತೆಂ ಮಸ್ತ್ ಉಲಯಿಲ್ಲೆಂ.
ಎಕಾ ವಾಟೆನ್ ಆಲಿಯಾ ನಾಸಿರಾಚಾ ಜಿವಿತಾ ಥಾವ್ನ್ ವ್ಹಾಳೊನ್ ಗೆಲ್ಲೆಂ ಉದಾಕ್. ತೆಂ ಪಾಟಿಂ ನಾಸಿರಾಚಾ ಜಿವಿತಾಕ್ ಯೇಂವ್ಕ್ ಸಕಾನಾ. ತಶೆಂ ಆಸ್ತಾನಾ ಆತಾಂ ಹೆಂ ಅಮೀನಾಕ್ ಲಾಭ್ಲ್ಲೆಂ ತೆಂ ಫಕತ್ತ್ ತಾಚೆಂ ಕಾಮ್. ತಾಚೆಂ ಕಾಮ್ ಜಾಲೆಂ ಸಂಭಂಧ್ ಕಾಬಾರ್ ಜಾಲೊ. ಪುಣ್ ಉದೆಲ್ಲೊ ಸಂಭಂಧ್ ಕಾಬಾರ್ ಜಾತಲೊ ವಾ ನಾ ತೆಂ ಕಸಲೊ ಭರ್ವಸೊ? ತ್ಯಾ ಶಿವಾಯ್ ನಾಸಿರಾನ್ ಹ್ಯಾ ಪಯ್ಲೆಂ ಆಲಿಯಾಕ್ ಲಾಗೊನ್ ತಾಚ್ಯಾಚ್ ಘರ್ಚ್ಯಾ ದಾರಾರ್ ತ್ಯಾ ರಾಶಿದಾಕ್ ಪಳೆಲ್ಲೆಂ. ತ್ಯಾ ದಿಸ್ ಥೊಡ್ಯಾಚ್ ಘಡಿಯಾಂಚಾ ಅಂತರಾನ್ ನಾಸಿರಾಚೊ ಜೀವ್ ಉರ್ಲ್ಲೊ ತೆಂ ಅಮೀನಾಕ್ ಉಡಾಸ್ ಆಸಾ. ಆತಾಂ ತಾಕಾ ಪರ್ತ್ಯಾಕ್ ಆಲಿಯಾಚಾ ಹಲ್ಲ್ಯಾಚಾ ಕೇಸಿಂತ್ ಮೆತೆರ್ ಜಾವ್ನ್ ದುಸ್ರ್ಯಾ ಸಂಕಶ್ಟಾಂತ್ ಪಡೊಂಕ್ ನಾಕಾ ಆಸ್ಲ್ಲೆಂ.
"ಪಳೆ ಅಮೀನಾ! ಮ್ಹಾಕಾ ಮ್ಹಜ್ಯಾ ಘರಾಚೆಂ ಸುಖ್, ಶಾಂತಿ, ಸಮಾಧಾನ್ ಚಡ್ ಮಹತ್ವಾಚೆಂ. ಹ್ಯಾ ಸುಖ್ ಶಾಂತೆಕ್ ಆನಿ ಸಮಾಧಾನೆಕ್ ತುಜೆಂ ಕಾಮ್ ಜರ್ ತರ್ ತುಕಾ ಅಡ್ಕಳ್ ಹಾಡ್ತಾ ಜಾಲ್ಯಾರ್ ತುವೆಂ ತ್ಯಾ ಲಾಯರಾಚಾ ಆಫೀಸಾಕ್ ವೆಚೆಂ ನಾಕಾ. ಅಬ್ಬೂನ್ಯ್ ಹೆಂಚ್ ಸಾಂಗ್ಲಾಂ!" ನಾಸಿರ್ ಖಡಾ ಖಂಡಿತ್ ಉಲಯಿಲ್ಲೊ.
"ಖುದ್ಧ್ ಜಾವ್ನ್ ತುಂಚ್ ಏಕ್ ವಿಂಚವ್ಣ್ ಕರುಂಕ್ ಸಕಾನಾಂಯ್ ನಾಸಿರ್? ಹರ್ಯೆಕಾ ತುಜ್ಯಾ ಜಿವಿತಾಚಾ ವಿಶಯಾಕ್ ಘೆವ್ನ್ ತುವೆಂ ಅಬ್ಬೂಚಾ ಮುಕಾರ್ ವೆಚೆಂ ಬರೆಂ ನ್ಹಯ್! ಆಪ್ಲ್ಯಾ ಬುದ್ವಂತ್ಕಾಯೆನ್ ತುಂ ಕೆದ್ನಾಂಯ್ ಏಕ್ ನಿರ್ಧಾರ್ ಕರುಂಕ್ ಸಕಾನಾಂಯ್.....?"
ಅಮೀನಾಕ್ ಆಪ್ಲ್ಯಾ ಘೊವಾಚ್ಯಾ ವಯ್ರ್ ರಾಗ್ಯ್ ಆಯಿಲ್ಲೊ. ನಾಸಿರಾ ಸಂಗಿಂ ತಾಚೆಂ ನಿಖಾ ಜಾಲ್ಯಾ ಉಪ್ರಾಂತ್ ತೆಂ ಸಂಪೂರ್ಣ್ ಥರಾನ್ ನಾಸಿರಾಕ್ ಜಾಣಾಂ ಜಾಲೆಂ. ನಾಸಿರ್ ಆಪ್ಲ್ಯಾ ಆವಯ್ ಬಾಪಯ್ ಶಿವಾಯ್ ಏಕ್ ಕುಸ್ಕುಟಾಚಿ ಕಾಡಿ ಹಾಲಂವ್ಕ್ಯ್ ಕಬೂಲ್ ನಾ ಮ್ಹಣೊನ್ ತೆಂ ಜಾಣಾಂ ಜಾತಾನಾ ಮಾತ್ರ್ ಆಲಿಯಾಕ್ ಆಪ್ಣಾ ಥಾವ್ನ್ ಜಾಲ್ಲ್ಯಾ ಆನ್ಯಾಯಾಕ್ ಅಮೀನಾ ವಳ್ಕೊಂಕ್ ಪಾವ್ಲೆಂ. ಪುಣ್ ತೆಂ ಆತಾಂ ಕಾಂಯ್ಚ್ ಕರುಂಕ್ ಸಕ್ಚಾ ಸ್ಥಿತೆರ್ ನಾತ್ಲ್ಲೆಂ. ಘೊವಾಚ್ಯಾ ಘರಾಕ್ ಜಾಯ್ ಜಾಲ್ಲ್ಯಾ ಪರಿಂ ತಾಣೆಂ ಜಿಯೆಂವ್ಕ್ ಜಾಯ್ ಆಸ್ಲ್ಲೆಂ. ಆನಿ ಅಮೀನಾ ಆಶೆಂಚ್ ಜಿಯೆಂವ್ಕ್ ತಯಾರ್ ಜಾಲೆಂ.
ಆಜ್ ಆಪ್ಲ್ಯಾ ಆಫೀಸಾಕ್ ಆಯಿಲ್ಲ್ಯಾ ಅಮೀನಾಕ್ ರಾಮ್ ಪ್ರಸಾದಾಚೆಂ ವರ್ತನ್ ಪಳವ್ನ್ ಕಿತ್ಯಾಕ್ಗೀ ದುಬಾವ್ ಜಾಲೊ. ಕಾಂಯ್ ಕಿತೆಂ ತರ್ಯ್ ವಾಯ್ಟ್ ಜಾಲಾಂ ಮ್ಹಳ್ಳ್ಯಾ ಪರಿಂ ತಾಕಾ ಭೊಗ್ಲೆಂ. ರಾಮ್ ಪ್ರಸಾದ್ ಆಪ್ಲ್ಯಾ ಕೋರ್ಟಾಕ್ ವೆಚ್ಯಾ ದಿಸಾ ಆಶೆಂ ಟೆನ್ಶನಾರ್ ಆಸ್ತಾ. ತ್ಯಾ ದೀಸ್ ತೊ ಫಕತ್ತ್ ತಾಣೆಂ ಕೊರ್ಟಾಂತ್ ಝುಜೊಂಕ್ ಆಸ್ಚ್ಯಾ ತಾಚ್ಯಾ ಕೇಸಿಚಾ ವಿಶಿಂ ಮಾತ್ರ್ ಚಿಂತಾ ಶಿವಾಯ್ ತೊ ಜಾವ್ನ್ ದುಸ್ರೆಂ ಚಿಂತಿನಾ ಆನಿ ದುಸ್ರ್ಯಾಂಕ್ಯ್ ದುಸ್ರ್ಯಾ ವಿಶಿಂ ಚಿಂತುಂಕ್ ಆವ್ಕಾಸ್ ದೀನಾ.
ಆಜ್ ರಾಮ್ ಪ್ರಸಾದಾಚೊ ಕೊರ್ಟಾಕ್ ವೆಚೊ ದೀಸ್ ನ್ಹಯ್! ತರ್ ರಾಮ್ ಪ್ರಸಾದ್ ಆಸೊ ಕಿತ್ಯಾಕ್? ಅಮೀನಾಕ್ ಕಾಂಯ್ ಸಮ್ಜಾಲೆಂ ನಾ. ತೆಂ ತಶೆಂಚ್ ಆಪ್ಲ್ಯಾ ಸದಾಂಚಾ ಕಾಮಾಂತ್ ಮೆತೆರ್ ಜಾಲೆಂ.
ತಿತ್ಲ್ಯಾರ್!
ಖುದ್ದ್ ರಾಮ್ ಪ್ರಸಾದ್ ಅಮೀನಾ ತೆವ್ಶಿಂ ಆಯ್ಲೊ. ತೊ ಮಸ್ತ್ ಖಂತಿನ್ ಆಸ್ಲ್ಲ್ಯಾ ಪರಿಂ ದಿಸ್ತಾಲೊ.
"ಎಸ್ ಸರ್!" ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟೊನ್ ಉಭೆಂ ಜಾಲೆಂ ಅಮೀನಾ.
ಆಪ್ಲ್ಯಾ ಹಾತಾನ್ಚ್ ಅಮೀನಾಕ್ ಬಸೊಂಕ್ ಹಿಶಾರೊ ಕೆಲ್ಲೊ ರಾಮ್ ಪ್ರಸಾದ್ ವ್ಹಳೂ ಅಮೀನಾಚಾ ಡೆಸ್ಕಾಚಾ ಮುಕಾರ್ ಆಸ್ಲ್ಲ್ಯಾ ಖಾಲಿ ಬಸ್ಕೆರ್ ಬಸ್ಲೊ. ಹಿ ತಾಚಿ ಸದಾಂಚಿ ಸವಯ್. ಥೊಡೊ ವೇಳ್ ತಸೊಚ್ ತೊ ಅಮೀನಾಚಾ ಕಾಮಾಕ್ ಪಳವ್ನ್ ಬಸ್ಲ್ಲೊ ತೊ ಉಪ್ರಾಂತ್ ಏಕ್ ಲಾಂಭ್ ಶ್ವಾಸ್ ಸೊಡುನ್,
"ಪಳೆ ಅಮೀನಾ!" ಉಲಯ್ಲೊ ರಾಮ್ ಪ್ರಸಾದ್. "ತುಕಾ ಹಾಂವ್ ಪಯ್ಲೆಂಚ್ ಸಾಂಗ್ತಾ! ತುವೆಂ ಎದೊಳ್ಚ್ ಹ್ಯಾ ಆಲಿಯಾಚಾ ಕೇಸಿಂತ್ ನೆಣಾಂ ಆಸೊನ್ ಹಾತ್ ಘಾಲಾಯ್. ಹಾಂವ್ ನೆಣಾಂ ಆತಾಂ ತುಂ ಕಿತ್ಯಾಕ್ ಹ್ಯಾ ಕೇಸಿಂತ್ ಮೆತೆರ್ ಜಾಂವ್ಕ್ ನೆಗಾರ್ ಕರ್ತಾಯ್ ತೆಂ. ಪುಣ್ ಏಕ್ ವಿಶಯ್ ಉಡಾಸ್ ದವರ್! ಆಲಿಯಾಚಿ ಕೇಸ್ ಝಗ್ಡೊಂಕ್ ಹಾಂವ್ ನ್ಹಯ್ ಜಾಲ್ಯಾರ್ ರಾಯನಾಕ್ ದುಸ್ರೆ ಕಿತ್ಲೆಯ್ ಲಾಯರ್ ಮೆಳ್ತಾತ್. ತಶೆಂಚ್ ಮ್ಹಾಕಾ ತುಂ ನ್ಹಯ್ ಜಾಲ್ಯಾರ್ ಸಭಾರ್ ಜ್ಯೂನಿಯರ್ ಲಾಯರಾಂಕ್ ಕಾಮಾಕ್ ದವರ್ಚಿ ಶಾಥಿ ಆಸಾ.. ಪುಣ್ ರಾಯನ್....! ಹಿ ಇಸ್ ಟೋಟಲ್ಲಿ ಎ ಬಿಜ್ನೆಸ್ಮ್ಯಾನ್! ತೊ ಫಕತ್ತ್ ತಾಚ್ಯಾ ಜಯ್ತಾಕ್ ಮಾತ್ರ್ ಪಳೆತಾ! ತಾಚ್ಯಾ ಜಯ್ತಾ ಮುಕಾರ್ ತೊ ಕೊಣಾಕ್ಯ್ ಪರ್ವಾ ಕರಿನಾ. ತುವೆಂ ಇನ್ಕಾರ್ ಕೆಲ್ಯಾ ಉಪ್ರಾಂತ್ ಅವಿನಾಶ್ ಬಿಜಿ ಆಸಾ ಮ್ಹಣೊನ್ ಹಾವೆಂ ರಘುಪತಿಕ್ ರಾಯನಾಚಾ ಅಫೀಸಾಕ್ ದಾಡ್ಲ್ಲೆಂ. ರಾಯನ್ ಆಮ್ಚ್ಯಾ ಕಾಮಾ ವಿಶಿಂ ಖುಶ್ ನಾ. ತೊ ರಘುಪತಿಲಾಗಿಂ ತುಜ್ಯಾ ವಿಶಿಂ ವಿಚಾರ್ತಾಲೊ ಖಂಯ್. ಯು ಮಸ್ಟ್ ಬಿ ಕೇರ್ಫುಲ್! ತುಜ್ಯಾ ಖಾತಿರ್ ಮ್ಹಾಕಾ ರಾಯನಾ ಲಾಗಿಂ ಪಾಡ್ ಜಾಂವ್ಕ್ ನಾಕಾ. ಹೆಂ ಮ್ಹಜೆಂ ಬಿಜ್ನೆಸ್! ದೆಕುನ್ ಮ್ಹಾಕಾ ಮಾಗಿರ್ ತುಕಾ ಕಾಂಯ್ಚ್ ಕುಮಕ್ ಕರುಂಕ್ ಸಾದ್ಯ್ ಜಾಂವ್ಚೆಂ ನಾ!" ಏಕ್ ಲಾಂಭ್ ಶೆರ್ಮಾಂವ್ ದೀವ್ನ್ ರಾಮ್ ಪ್ರಸಾದ್ ಆಪ್ಲ್ಯಾ ಬಸ್ಕೆಕ್ ವೊಣ್ಕಾಲೊ.
ರಾಮ್ ಪ್ರಸಾದಾಚೊ ಜಿನೊಸ್ ಆನಿ ತಾಚೊ ಭರ್ತಾವ್ ಪಳೆವ್ನ್ ಹಳ್ಟಾರ್ ಅಮೀನಾಚಾ ಕಾಳ್ಜಾಂತ್ ಭಿರಾಂತ್ ಉಟ್ಲಿ.
"ಸರ್! ಹಾಂವ್ ಹ್ಯಾ ರಾಯನಾ ಲಾಗಿಂ ಉಲಂವ್ಕ್ ಸಕ್ತಾಂ.....?" ಅಮೀನಾಚೊ ತಾಳೊ ಭಿಯೆಲ್ಲೊ. ತೆಂ ಸಗ್ಳೆಂಚ್ ಘುಸ್ಪಡ್ಲೆಂ.
"ಕಿತ್ಯಾಕ್...?" ರಾಮ್ ಪ್ರಸಾದಾನ್ ಆಪ್ಲ್ಯಾ ಖಾಡ್ಕೆಕ್ ಹಾತ್ ಧರ್ಲೊ. "ತೊ ಆಪ್ಲ್ಯಾ ಗರ್ಜೆ ಶಿವಾಯ್ ಕೊಣಾಯ್ ಲಾಗಿಂ ಸಂಭಂಧ್ ದವರಿನಾ!"
ತಿತ್ಲ್ಯಾರ್!
ಅಮೀನಾಚ್ಯಾ ಬ್ಯಾಗಾಂತ್ಲೆಂ ಸೆಲ್ಪೋನ್ ವ್ಹಾಜೊಂಕ್ ಶುರು ಜಾಲೆಂ.
"ಏಕ್ ಮಿನಿಟ್ ಸರ್!" ಆಲಿಯಾನ್ ಆಪ್ಲ್ಯಾ ಬ್ಯಾಗಾಂತ್ಲೆಂ ಪೋನ್ ಭಾಯ್ರ್ ಕಾಡ್ಲೆಂ.
ನಾಸಿರಾಚೆಂ ನಂಬರ್!
"ಹಲೋ....?" ಅಮೀನಾನ್ ಪೋನ್ ಆನ್ ಕೆಲೆಂ
"ಅಮೀನಾ......?" ತ್ಯಾ ಕುಶಿನ್ ನಾಸಿರಾಚೊ ತಾಳೊ ಘಾಬರ್ಲೆಲ್ಯಾ ಪರಿಂ ಭೊಗ್ಲೊ.
"ಹಾಂ ನಾಸಿರ್!" ಅಮೀನಾಚೆ ದೊಳೆ ಅಪ್ಲೆಸ್ತಕಿಂ ರುಂದಾಲೆ.
"ಇನ್ಕಮ್ ಟ್ಯಾಕ್ಸ್ ಡಿಪಾರ್ಟ್ಮೆಂಟಾ ಥಾವ್ನ್ ರೇಯ್ಡ್ ಜಾಲ್ಯಾ ಅಮೀನಾ......! ಪ್ಲೀಸ್ ಕಮ್ ಸೂನ್.......!" ನಾಸಿರಾಚೊ ಘಾಬರ್ಲಲೊ ತಾಳೊ. ತಾಚ್ಯಾ ಪಾಟ್ಲ್ಯಾನ್ ಪೋನ್ ದವರ್ಲ್ಲೊ ಆವಾಜ್.
"ಇನ್ಕಮ್ ಟ್ಯಾಕ್ಸ್!" ಅಮೀನಾ ಉದ್ಗಾರ್ಲೆಂ. ತಾಕಾ ಕಾಂಯ್ ಸಮ್ಜಾಲೆಂ ನಾ.
"ಸರ್! ಮ್ಹಾಕಾ ಅರ್ಜಂಟ್ ಘರಾ ವಚೊಂಕ್ ಜಾಯ್!" ಅಮೀನಾ ಬಸ್ಕೆರ್ ಥಾವ್ನ್ ಉಟೊನ್ ಉಭೆಂ ಜಾಲೆಂ.
"ಕಿತೆಂ ಜಾಲೆಂ......?" ಎಕಾಚ್ಚ್ ಫರಾ ಬದ್ಲಾಲ್ಲ್ಯಾ ಅಮೀನಾಚಾ ವರ್ತಾನಾಕ್ ಪಳವ್ನ್ ರಾಮ್ ಪ್ರಸಾದ್ ವಿಜ್ಮಿತ್ ಜಾಲೊ.
"ಇನ್ಕಮ್ ಟ್ಯಾಕ್ಸ್ ಡಿಪಾರ್ಟ್ಮೆಂಟಾನ್ ನಾಸಿರಾಚಾ ಆಫೀಸಾಕ್ ರೇಯ್ಡ್ ಕೆಲ್ಯಾ ಖಂಯ್!" ಅಮೀನಾ ಸಂಪೂರ್ಣ್ ಭಿಯೆಲ್ಲ್ಯಾ ಪರಿಂ ಜಾಲ್ಲೆಂ.
"ಆಫೀಸಾಕ್ ರೇಯ್ಡ್ ಕೆಲ್ಯಾ?" ರಾಮ್ ಪ್ರಸಾದ್ ಆಪ್ಲ್ಯಾ ಬಸ್ಕೆರ್ ನೀಟ್ ಜಾಲೊ. "ತರ್ ಘರಾಯ್ ರೇಯ್ಡ್ ಪಡ್ತೆಲಿ! ತುಂ ಜಾಣಾಂಯ್..... ಘರಾ ಕಾಂಯ್ ಪುಣಿಂ.....?" ರಾಮ್ ಪ್ರಸಾದಾಕ್ ದುಬಾವ್ ಜಾಲೊ.
ರಾಮ್ ಪ್ರಸಾದಾಚಾ ಸವಾಲಾಕ್ ಅಮೀನಾ ಕಾಂಯ್ ಉಲಯ್ಲೆಂ ನಾ. ಹೆಂ ಪಳೆಲ್ಲೊ ತೊ ಜಾಣಾಂ ಜಾಲೊ ಕೀ "ಕಾಂಯ್ ತರ್ಯ್ ಸೀರಿಯಸ್ ಪ್ರಾಬ್ಲೆಮ್ ಖಂಡಿತ್ ಜಾತೆಲೆ. ಬೋವ್ಶ್ಯಾ......!" ಆಪ್ಲ್ಯಾ ಚಿಂತ್ನಾಂಕ್ ತಶಿಂಚ್ ವಾರ್ಯಾರ್ ತಾಣೆಂ ಉಭಯ್ಲಿಂ.
"ಯು ಮೇ ಗೋ.....! ಟೇಕ್ ಕೇರ್!" ರಾಮ್ ಪ್ರಸಾದ್ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉತೊನ್ ಉಭೊ ಜಾಲೊ.
ತಿತ್ಲೆಂಚ್!
ಅಮೀನಾ ವೆವೆಗ್ಗಿಂ ಆಪ್ಲ್ಯಾ ವ್ಯಾನಿಟಿ ಬ್ಯಾಗಾಕ್ ಹಾತಿಂ ಘೆತ್ಲ್ಲೆಂ ಆಪ್ಲ್ಯಾ ಬಸ್ಕೆಕ್ ಪಾಟಿಂ ಲೊಟುನ್ ತಾಚ್ಯಾ ಡೆಸ್ಕಾರ್ ಥಾವ್ನ್ ಭಾಯ್ರ್ ಆಯ್ಲೆಂ. ತಾಕಾ ಜಾತಾ ತಿತ್ಲ್ಯಾ ವೆಗ್ಗಿಂ ಘರಾ ಪಾವೊಂಕ್ ಜಾಯ್ ಆಸ್ಲ್ಲೆಂ.
ತಿತ್ಲ್ಯಾರ್!
ಕಿತೆಂಗೀ ಚಿಂತ್ಲ್ಲೊ ರಾಮ್ ಪ್ರಸಾದ್ ಅಮೀನಾ ಗೆಲ್ಲ್ಯಾ ತೆವ್ಶಿಂ ಘುಂವ್ಲೊ.
"ಅಮೀನಾ.......?" ಆಪ್ಣಾಕ್ ಆಪಯಿಲ್ಲೆಂ ಆಯ್ಕೊನ್ ಅಮೀನಾ ರಾವೊನ್ ಪಾಟಿಂ ಘುಂವ್ಲೆಂ.
"ಕಾಂಯ್ ನಾ...... ವಚ್! ಆನಿ ಕಾಂಯ್ ಜಾಂವ್ಚ್ಯಾ ಪರಿಂ ನಾ!" ರಾಮ್ ಪ್ರಸಾದಾನ್ ಆಪ್ಲ್ಯಾ ಮಾತ್ಯಾರ್ ಹಾತ್ ಚರಯ್ಲೊ.
"ಎಸ್ ಸರ್!" ಅಮೀನಾ ತುರ್ತಾನ್ ಆಪ್ಲ್ಯಾ ಆಫೀಸಾ ಥಾವ್ನ್ ಭಾಯ್ರ್ ಪಡ್ಲೆಂ.
ಅಮೀನಾಕ್ ನಾಸಿರಾನ್ ಪೋನ್ ಕರುನ್ ಆಪಯ್ಲಾಂ ಮ್ಹಳ್ಯಾರ್ ಎದೊಳ್ಚ್ ರೇಯ್ಡ್ ಕಾಬಾರ್ ಜಾಲ್ಯಾ ಆಸ್ತೆಲಿ. ರೇಯ್ಡ್ ಜಾಂವ್ಚ್ಯಾ ವೆಳಾರ್ ಅಖ್ಖೆಂ ಆಫೀಸ್ ಸೀಲ್ ಜಾತಾ. ತ್ಯಾ ವೆಳಾರ್ ಕೊಣಾಯ್ ಲಾಗಿಂ ಪೊನಾರ್ ಉಲಂವ್ಕ್ ವಾ ಆಫೀಸಾ ಥಾವ್ನ್ ಕೊಣಾಯ್ಕ್ಯ್ ಭಾಯ್ರ್ ವಚೊಂಕ್ ಸಾದ್ಯ್ ನಾ. ಆಫೀಸಾಕ್ ರೇಯ್ಡ್ ಜಾಲ್ಯಾ ತರ್ ತ್ಯಾ ಕುಶಿನ್ ಘರಾ ರೇಯ್ಡ್ ಜಾತೆಲಿ. ಚಿಂತ್ಲೆಲ್ಯಾ ರಾಮ್ ಪ್ರಸಾದಾಕ್ ಅಮೀನಾ ಫಸ್ಲಲೊ ಆನ್ಭೋಗ್ ಜಾಲೊ. ’ತುವೆಂ ಘರಾ ವಚೊನ್ ಕಾಂಯ್ ಕರ್ಚ್ಯಾ ಪರಿಂ ನಾ ಅಮೀನಾ!’ ತೊ ಆಪ್ಲ್ಯಾ ಮನಾಂತ್ಚ್ ಉದ್ಗಾರ್ಲೊ.
***********
ಆಲಿಯಾಕ್ ಆಪ್ಲ್ಯಾ ಉಸ್ಕ್ಯಾರ್ ಘೆವ್ನ್ ಆಯಿಲ್ಲೆಂ ರಾಯನಾಚೆಂ ಟೊಯೊಟಾ ಲ್ಯಾಂಡ್ಕ್ರೂಸರ್ ಜೀಪ್ ಸವ್ಕಾಸ್ ಆಲಿಯಾನ್ ರಾಂವ್ಚ್ಯಾ ’ಬ್ರಂದಾವನ್’ ಅಪಾರ್ಟ್ಮೆಂಟಾ ಮುಕಾರ್ ಯೆವ್ನ್ ಥಾಂಬ್ಲೆಂ.
ಆಲಿಯಾಕ್ ಆಸ್ಪತ್ರೆ ಥಾವ್ನ್ ಡಿಸ್ಚಾರ್ಜ್ ಜಾವ್ನ್ ಆಯ್ಚೊ ಚವ್ತೊ ದೀಸ್!
ಆಲಿಯಾಚೊ ಆಜ್ ಚೆಕ್ಅಪಾಚೊ ದೀಸ್! ಆಲಿಯಾಕ್ ಹಾಸ್ಪಿಟಲಾಕ್ ಆಪವ್ನ್ ವರುನ್ ಗೆಲ್ಲೊ ರಾಯನ್ ತಾಕಾ ಚೆಕ್ ಅಫ್ ಕರವ್ನ್ ಘೆವ್ನ್ ಆಯಿಲ್ಲೊ. ದಾಕ್ತೆರಾನ್ ಸಾಂಗ್ಲ್ಲ್ಯಾ ಪರಿಂ ಆಲಿಯಾಕ್ ಚಾರ್ ದಿಸಾಂಕ್ ಏಕ್ ಪಾವ್ಟಿಂ ಆಸ್ಪತ್ರೆಕ್ ಯೇವ್ನ್ ಚೆಕ್ ಅಫ್ ಕರುನ್ ವಚೊಂಕ್ ಆಸ್ಲ್ಲೆಂ.
ಆಲಿಯಾಕ್ ಆತಾಂ ತಾಚೆ ವಯ್ರ್ ಹಲ್ಲೊ ಜಾಲ್ಯಾ ಉಪ್ರಾಂತ್ ಮಸ್ತ್ ಜಾಗ್ರುತ್ಕಾಯ್ ಆಪ್ಣಾಂವ್ಕ್ ಆಸ್ಲ್ಲಿ. ಹೆಂ ರಾಯನಾಚೆಂ ಚಿಂತಾಪ್! ಆಲಿಯಾ ರಾಯನಾ ಥಾವ್ನ್ ಹೆಂಚ್ ಆಶೆತಾಲೆಂ. ರಾಯನ್ ಕಿತ್ಲೆಂ ಆಪ್ಣಾ ವಿಶಿಂ ಚಿಂತಾ ತಿತ್ಲೆಂ ಆಪ್ಣಾಚೆಂ ಕಾಮ್ ಸುಲಾಭಾಯೆನ್ ಸಂಪ್ತೆಲೆಂ ಮ್ಹಳ್ಳಿ ಆಲಿಯಾಚಿ ಪಾತ್ಯೆಣಿ. ರಾಯನ್ ಕಿತ್ಲೆಂ ಆಪ್ಣಾ ವಿಶಿಂ ಚಿಂತಾ ತಿತ್ಲೆಂ ತೊ ಆಪ್ಣಾ ಸಂಗಿಂ ಅಸ್ತಲೊ. ನಾ ಜಾಲ್ಯಾರ್...? ರಾಯನಾ ಬಗಾರ್ ಆಲಿಯಾಚಿ ವಾಟ್ ತಿತ್ಲಿ ಸುಲಭ್ ನಾತ್ಲ್ಲಿ.
ಆಲಿಯಾಕ್ ಆಪ್ಲ್ಯಾ ಮತಿಂತ್ಲ್ಯಾ ಫಾರಿಕ್ಪಣಾಚಿ ಖಂತ್! ಹ್ಯಾ ತಾಚ್ಯಾ ಖಂತಿಕ್ ಲಾಗೊನ್ ತಾಕಾ ಆಜ್ ರಾಯನಾಚಿ ಗರ್ಜ್ ಆಸ್ಲ್ಲಿ. ಪುಣ್ ಆಲಿಯಾ ಆಜ್ ಸಮ್ಪೂರ್ಣ್ ಥರಾನ್ ಸುರಕ್ಶಿತ್ ಆಸಾ ಮ್ಹಣೊನ್ ತೆಂ ಜಾಣಾಂ. ತಾಚ್ಯಾ ವಯ್ರ್ ಹಲ್ಲೊ ಜಾಲ್ಯಾ ಉಪ್ರಾಂತ್ ತೆಂ ಪಯ್ಲೆಂಚಾ ಪ್ರಾಸ್ ಚಡ್ ಸುರಕ್ಶಿತ್ ಆಸ್ಲ್ಲೆಂ. ಹ್ಯಾ ಉಪ್ರಾಂತ್ ಜರ್ ತರ್ ತಾಕಾ ಕಿತೆಂಯ್ ವಾಯ್ಟ್ ಜಾಯ್ತ್ ಜಾಲ್ಯಾರ್ ತಾಕಾ ಕಾರಾಣ್ ಫಕತ್ತ್ ರಾಶಿದ್ ಆನಿ ಇಕ್ಬಾಲ್ ಜಾತೆಲೆ ಮ್ಹಳ್ಳೆಂ ಧಯ್ರ್ ತಾಕಾ ಆಸ್ಲ್ಲೆಂ. ಹ್ಯಾಚ್ ಧಯ್ರಾನ್ ತೆಂ ಆಪ್ಲ್ಯಾ ಮುಕ್ಲ್ಯಾ ಕಾಮಾಕ್ ಆಯ್ತೆಂ ಜಾಲ್ಲೆಂ.
ರಾಯನ್ ಜರೀ ಎಕ್ಸುರ್ಯಾ ಆಲಿಯಾಕ್ ಧಯ್ರಾಚೆಂ ಬದಿಕ್ ಜಾವ್ನ್ ಆಲಿಯಾಕ್ ಸಾಂಗಾತ್ ದಿಂವ್ಚ್ಯಾ ಉದ್ದೇಶಾನ್ ಯೆತಾಲೊ.
ಆಲಿಯಾ ರಾಯನಾಚಾ ಸಮ್ಜಣೆ ಭಾಯ್ರ್ ಆಸ್ಲ್ಲೆಂ!
ರಾಯಾನ್ ತಾಚ್ಯಾ ಜಲ್ಮಾ ಸ್ವಭಾವಾನ್ ಖಂಡಿತ್ ಜಾವ್ನ್ ಏಕ್ ಬಿಜ್ನೆಸ್ಮ್ಯಾನ್! ತಾಚ್ಯಾ ಜಿವಿತಾಕ್ ಆನಿ ತಾಚ್ಯಾ ಬಿಜ್ನೆಸಾಕ್ ತೊ ಭಿಲ್ಕುಲ್ ಲಾಗಿಂ ಹಾಡಿನಾತ್ಲ್ಲೊ. ಪುಣ್ ಆಲಿಯಾ?
ಆಲಿಯಾನ್ ತಾಚ್ಯಾ ಜಿವಿತಾಕ್ಚ್ ಬಿಜ್ನೆಸ್ ಜಾವ್ನ್ ಬದ್ಲಿಲ್ಲೆಂ! ಹ್ಯಾ ಸಮಾಜೆನ್ ತಾಚ್ಯಾ ಮುಕಾರ್ ಆತಾಂ ಹಿ ಎಕ್ಚ್ ವಾಟ್ ರಚ್ಲ್ಲಿ.
"ತುಂ ಪ್ಲ್ಯಾಟಾಕ್ ಯೇನಾಂಯ್ ರಾಯನ್.....?" ರಾಯನಾಚೆಂ ಜೀಪ್ ಆಲಿಯಾಚಾ ಆಪಾರ್ಟ್ಮೆಂಟಾಚಾ ಮುಕಾರ್ ಪಾವ್ತಾನಾ ಆಲಿಯಾ ಜಿಪಾರ್ ಥಾವ್ನ್ ಭಾಯ್ರ್ ಆಯ್ಲೆಂ. ಉಗ್ತೆಂ ಕೆಲ್ಲ್ಯಾ ಜಿಪಾಚಾ ದಾರಾಕ್ ತಶೆಂಚ್ ಆಪ್ಲ್ಯಾ ಹಾತಿಂ ಧರುನ್ ರಾಯನಾಕ್ ಪಳೆಲ್ಲ್ಯಾ ತಾಕಾ ತ್ಯಾ ಕುಶಿನ್ ಥಾವ್ನ್ ರಾಯನ್ ಜಿಪಾ ವಯ್ಲೊ ದೆಂವಾನಾ ತೆಂ ಕಳ್ಳೆಂ.
"ಮಿಶೇಲ್ ಘರಾ ರಾಕ್ತೆಲೆಂ ಆಲಿಯಾ. ಎದೊಳ್ಚ್ ಪಳೆ ವೇಳ್ ಜಾಲೊ! ಹಾಂವ್ ಯೆತಾ ಪಾಸೊನ್ ತೆಂ ಜೆವಾಣ್ಯ್ ಜೆವಿನಾ!" ರಾಯನಾನ್ ಆಪ್ಲ್ಯಾ ಹಾತಾಚಾ ವೊಚಾ ವಯ್ರ್ ನದರ್ ವೆಲಿ.
"ಹಾವೆಂ ಚಿಂತ್ಲೆಂ..... ಎದೊಳ್ಚ್ ಕಸೊಯ್ ವೇಳ್ ಜಾಲಾ! ಹಾಂಗಾಚ್ಚ್ ಜೆವಾಣ್ ಕರುನ್ ವಚ್ಯೆತ್! ತಶೆಂಯ್ ಮ್ಹಾಕಾ ಆತಾಂ ವಚೊನ್ ರಾಂದುನ್ ಜಾಯ್ಜಯ್!" ಆಲಿಯಾಚಾ ತೊಂಡಾರ್ ಬೆಜಾರಾಯ್ ಸ್ಪಶ್ಟ್ ಝಳ್ಕಾತಾಲಿ. ಥೊಡ್ಯಾಚ್ ವೆಳಾ ಪಯ್ಲೆಂ ತ್ಯಾ ತಾಚ್ಯಾ ತೊಂಡಾರ್ ಆಸ್ಲ್ಲೊ ಸಂತೊಸ್ ಆತಾಂ ಥೊಡ್ಯಾಚ್ ಖಿಣಾಂ ಭಿತರ್ ಉಭೊನ್ ಗೆಲ್ಲ್ಯಾ ಪರಿಂ ಜಾಲೊ.
"ತುವೆಂ ರಾಂದುಂಕ್ ಜಾಯ್.....?" ರಾಯನಾಕ್ ಆಶ್ಚರ್ಯ್ ಜಾಲೆಂ. "ಕಿತ್ಯಾಕ್? ಕಾಮಾಚೆಂ ಯೇನಾ.....?"
"ಮ್ಹಾಕಾ ತಾಣೆಂ ರಾಂದ್ಲ್ಲೆಂ ಬರೆಂ ಜಾಯ್ನಾಂ ರಾಯನ್! ಕಾಲ್ ಹಾವೆಂ ಭಾಯ್ಲೆಂ ಜೆವಾಣ್ ಹಾಡಯ್ಲೆಂ!" ಆಲಿಯಾನ್ ಆಪ್ಲೆಂ ಆಂಗ್ ಹಿಂವ್ಳಾಯ್ಲೆಂ.
"ಹೊಟೇಲಾಚೆಂ......?"
"ಕಾಂಯ್ ರೂಚ್ ಲಾಗಾನಾ ರಾಯನ್! ತೆಂ ಜೆವಾಣ್ಯ್ ತಶೆಂಚ್ ಫ್ರಿಜ್ಜಾಂತ್ ಉಡಯ್ಲಾಂ. ಹಿಂ ವಕ್ತಾಂ ಖಾವ್ನ್ ಜಿಬೆಕ್ ಖಾಣಾಚಿ ರೂಚ್ ಪಾಸೊನ್ ಯೆನಾ!ಮ್ಹಜ್ಯಾ ರುಚಿ ಪರ್ಮಾಣೆಂ ಹಾವೆಂ ರಾಂದ್ಲ್ಯಾರ್ ಕಾಂಯ್ ಥೊಡೆಂ ಪೊಟಾಕ್ ವೆತಾ. ನಾ ಜಾಲ್ಯಾರ್....!" ಆಲಿಯಾಚಾ ತೊಂಡಾರ್ ನಿರಾಶಾ ಆನಿಂ ಬೆಜಾರಾಯ್ ಸ್ಪಶ್ಟ್ ಝಳ್ಕಾತಾಲಿ.
"ಆರ್ ಯು ಗೋನ್ ಮ್ಯಾಡ್.......?" ರಾಯನಾಚಾ ಉತ್ರಾಂನಿ ಅಧಿಕಾರಾಚೊ ರಾಗ್ ಆಸ್ಲ್ಲೊ. "ದಾಕ್ತೆರಾನ್ ಸಾಂಗ್ಲ್ಲೆಂ ವಿಸ್ರಾಲಾಂಯ್? ಉಣ್ಯಾರ್ ಉಣೆಂ ತುಕಾ ಎಕಾ ಮಯ್ನ್ಯಾಚೊ ಆರಾಮ್ ಜಾಯ್. ಆನಿ ತುಂ ಭುರ್ಗ್ಯಾಂ ಪರಿಂ ಕರ್ತಾಯ್? ಹಾಂವ್ ಸ್ಮಿತಾಕ್ ಪೋನ್ ಕರುನ್ ತುಜ್ಯಾ ಜೆವ್ಣಾಚಿ ವಿಲೆವರಿ ಕರ್ತಾಂ!" ರಾಯನಾನ್ ಆಪ್ಲೆಂ ಸೆಲ್ಪೋನ್ ಕಾಡುನ್ ಏಕ್ ನಂಬರ್ ರಿಂಗ್ ಕೆಲೆಂ.
"ಆತಾಂ ನಾಕಾ ರಾಯನ್! ಮಾಗಿರ್ ಪಳೆಯಾಂ.....! ತುಂ ಆತಾಂ ವಚ್!" ಆಲಿಯಾನ್ ಜಿಪಾಚೆಂ ದಾರ್ ದಾಂಪ್ಚ್ಯಾ ಉದ್ದೇಶಾನ್ ಏಕ್ ಮೇಟ್ ದಾರಾ ಥಾವ್ನ್ ಪಾಟಿಂ ಕಾಡ್ಲೆಂ.
ತಿತ್ಲ್ಯಾರ್!
"ಸ್ವೀಟ್ ಹಾರ್ಟ್!" ಪೊನಾ ವಯ್ಲ್ಯಾ ರಾಯನಾಚಾ ಉತ್ರಾಂಕ್ ಆಯ್ಕೊನ್ ಆಲಿಯಾ ತಶೆಂಚ್ ಸ್ತಬ್ದ್ ಜಾಲೆಂ.
"ಕೋಣ್? ಸ್ಮೀತಾ....?" ಖಿಣಾ ಭಿತರ್ ಆಲಿಯಾಚಾ ಮತಿನ್ ನಾಂವ್ ಸೊಧ್ಲೆಂ.
"ಡಾರ್ಲಿಂಗ್! ಕಿತೆಂ ರಾಂದ್ಲಾಂಯ್.....?" ರಾಯನ್ ಹಾಸ್ತ್ಯಾ ಮುಖಮಳಾನ್ ಉಲಯ್ತಾಲೊ.
ಆಲಿಯಾನ್ ಆಪ್ಣೆಂ ಧಾಂಪುಂಕ್ ಅಂದಾಜ್ ಕೆಲ್ಲ್ಯಾ ದಾರಾಕ್ ತಶೆಂಚ್ ಧರುನ್ ರಾಯನಾಕ್ ಆಯ್ಕಾಲೆಂ.
"ನಾ ಡಾರ್ಲಿಂಗ್! ಏಕ್ ಗೆಸ್ಟ್ ಆಸಾ! ಜೆವ್ಣಾಕ್ ಆಪವ್ನ್ ಹಾಡುಂ.....?" ರಾಯನ್ ಆತಾಂ ಆಲಿಯಾ ತೆವ್ಶಿಂ ಘುಂವ್ಲೊ. ರಾಯನಾಚಿಂ ಉತ್ರಾಂ ಆಯ್ಕಾತಾನಾ ತಾಣೆಂ ಆಪ್ಣಾಕ್ಚ್ ವಿಚಾರ್ಲೆಂ ತಶೆಂ ಆಲಿಯಾಕ್ ದಿಸ್ಲೆಂ. ರಾಯನಾಚೊ ಭರ್ತಾವ್ಯ್ ತಸೊಚ್ ಆಸ್ಲ್ಲೊ.
"ಆಲಿಯಾ!" ರಾಯನ್ ಆಲಿಯಾಕ್ಚ್ ಪಳೆತಾಲೊ.
"ಥ್ಯಾಂಕ್ ಯು ಡಾರ್ಲಿಂಗ್!" ಹಾಸೊನ್ ಹಾಸೊನ್ ರಾಯನಾನ್ ಪೋನ್ ಭಂಧ್ ಕೆಲೆಂ.
ರಾಯನ್ ಆಪ್ಣಾಕ್ ಖಂಯ್ ಆಪವ್ನ್ ವರುಂಕ್ ಸೊಧ್ತಾ? ಆಲಿಯಾಚಾ ಮತಿಂತ್ ಸವಾಲ್ ಉದೆಲೆಂ.
"ಚಲ್ ಯೇ ಬಸ್!" ಹಾತಾಂತ್ಲ್ಯಾ ಪೊನಾಕ್ ಆಪ್ಣಾ ಲಾಗಿಂ ಸಿಟಾರ್ ಗಳಯಿಲ್ಲ್ಯಾ ರಾಯನಾನ್ ಆಲಿಯಾಕ್ ಪಳೆಲೆಂ.
ಆಲಿಯಾ ಫಕತ್ತ್ ರಾಯನಾಕ್ ಪಳವ್ನ್ ರಾವ್ಲೆಂ ಶಿವಾಯ್ ತೆಂ ಕಾಂಯ್ ಉಲಯ್ಲೆಂ ನಾ. ತೆಂ ತಶೆಂಚ್ ರಾಯನಾಕ್ ಪಳವ್ನ್ ರಾವ್ಲೆಂ.
"ಯೇ ಬಸ್ ಆಲಿಯಾ! ತುಕಾ ಆಜ್ ಘರಾ ಜೆವ್ಣಾಕ್ ಆಪವ್ನ್ ವರ್ತಾಂ!" ಆಪ್ಲ್ಯಾ ತೊಂಡಾರ್ ಕಾಂಯ್ಚ್ ಬದ್ಲಾವಣ್ ಹಾಡಿನಾಸ್ತಾನಾ ರಾವ್ಲೆಲ್ಯಾ ಕಡೆಚ್ ತೆಂ ಉಭೆಂ ಜಾಲೆಂ ಶಿವಾಯ್ ರಾಯನಾಚಾ ಉಲ್ಯಾಕ್ ತಾಣೆಂ ಪಾಳೊ ದಿಲೊ ನಾ.
ರಾಯನಾಚಾ ತೊಂಡಾ ಥಾವ್ನ್ ಭಾಯ್ರ್ ಆಯಿಲ್ಲ್ಯಾ ಉತ್ರಾಂಕ್ ಆಯ್ಕೊನ್ ಆಲಿಯಾಕ್ ಹೆಂ ಪಾತ್ಯೆಂವ್ಕ್ ಜಾಲೆಂ ನಾ. ತಾಣೆಂ ಹ್ಯಾ ದಿಸಾಚಿ ರಾಕೊಣ್ ಕೆಲ್ಲಿ. ಪುಣ್ ಹೊ ದೀಸ್ ಇತ್ಲ್ಯಾ ವೆಗ್ಗಿಂ ಉದೆವ್ನ್ ಯೆತಲೊ ಮ್ಹಳ್ಳ್ಯಾ ವಿಶಿ ತಾಣೆಂ ಚಿಂತುಂಕ್ ನಾತ್ಲ್ಲೆಂ. ಆಲಿಯಾಚಾ ಕಾಳ್ಜಾಕ್ ಧಖೊ ಬಸ್ಲ್ಲ್ಯಾ ಪರಿಂ ಜಾಲೆಂ.
"ನಾಕಾ ರಾಯನ್. ತುಂ ವಚ್! ಹಾವೆಂ ತುಜ್ಯಾ ಘರಾ ಯೆಂವ್ಚೆಂ ಮ್ಹಾಕಾ ಬರೆಂ ದಿಸಾನಾಂ!" ಆಲಿಯಾ ಆಪ್ಲೊ ತೀರ್ ಮಾರುಂಕ್ ವಿಸ್ರಾಲೆಂ ನಾ. ತಾಚ್ಯಾ ಹುಶಾರ್ ತಕ್ಲೆನ್ ತಾಕಾ ಖಿಣಾ ಭಿತರ್ ಜಾಗಯ್ಲೆಂ.
"ಓ...... ಕಮಾನ್ ಆಲಿಯಾ! ಪಯ್ಲೆಂಚ್ ವೇಳ್ ಜಾಲಾ!"
"ತುಂ ಸಾಂಗ್ಲ್ಲೆಂ ಆಯ್ಕ್ ರಾಯನ್! ತುಂ ವಚ್ ಹಾಂವ್ ಯೇನಾ!"
"ತುಂ ಯೆತಾಯ್ ಮ್ಹಣೊನ್ ಹಾವೆಂ ಮಿಶೆಲಾಕ್ ಸಾಂಗ್ಲಾಂ. ಯೇ ಯೇ ಬಸ್!"
"ಮ್ಹಾಕಾ ಬರೆಂ ಜಾಯ್ನಾಂ ರಾಯನ್!" ತಿತ್ಲ್ಯಾ ವೆಗ್ಗಿಂ ಆಲಿಯಾ ಕಬೂಲ್ ಜಾಲೆಂ ನಾ.
"ತುಂ ಮಿಶೆಲಾಕ್ ನೆಣಾಂಯ್! ಶಿ ಇಸ್ ನಾಟ್ ಎ ಜಸ್ಟ್ ಗರ್ಲ್! ಶಿ ಇಸ್......!" ರಾಯನಾನ್ ಆಪ್ಲ್ಯಾ ಬಾಯ್ಲೆಚೆಂ ವರ್ಣಾನ್ ಮುಖಾರ್ಸುನ್ ವರ್ಚ್ಯಾ ಪಯ್ಲೆಂ ಆಲಿಯಾ ಜಿಪಾರ್ ಚಡ್ಲೆಂ. ರಾಯನಾನ್ ಹ್ಯಾ ವಗ್ತಾರ್ ಮಿಶೆಲಾ ವಿಶಿಂ ಚಡಿತ್ ಉಲಂವ್ಚೆಂ ಆಲಿಯಾಕ್ ಪಸಂದ್ ನಾತ್ಲ್ಲೆಂ.
"ಲೆಟ್ಸ್ ಗೋ.....!" ಜಿಪಾರ್ ಬಸ್ಲೆಲ್ಯಾ ಆಲಿಯಾನ್ ಕ್ರತಕ್ ರಾಗ್ ದಾಕಯ್ಲೊ.
ಫಕತ್ತ್ ಪಂದ್ರಾ ಮಿನುಟಾಂಚಾ ಆವ್ದೆ ಭಿತರ್ ರಾಯನ್ ಆಲಿಯಾ ಸವೆಂ ಆಪ್ಲ್ಯಾ ಬೊಂಗ್ಲ್ಯಾ ಮುಕಾರ್ ಉಭೊ ಆಸ್ಲ್ಲೊ. ಜಿಪಾರ್ ಬಸ್ಲೆಲ್ಯಾ ಕಡೆನ್ ಥಾವ್ನ್ಚ್ ಆಲಿಯಾನ್ ತ್ಯಾ ಬೊಂಗ್ಲ್ಯಾ ವಯ್ರ್ ಆಪ್ಲಿ ನದರ್ ಮಾರ್ಲಿ. ಬೊಂಗ್ಲ್ಯಾಚಿ ಗೇಟ್ಚ್ ಇತ್ಲಿ ವ್ಹಡ್ ಆಸ್ಲ್ಲಿ ಕೀ ತಿ ತ್ಯಾ ರಾವ್ಳೆರಾಚ್ಯಾ ಗೇಟಿ ಪರಿಂ ತಾಕಾ ದಿಸ್ಲಿ. ತ್ಯಾ ಗೆಟಿಚಾ ಭಿತರ್ ತೊ ಸೊಭಿತ್ ಭೊಂಗ್ಲೊ. ಪಳೆಲ್ಲ್ಯಾ ಆಲಿಯಾಚಾ ಮತಿಕ್ ಆಪುಣ್ ಆಪ್ಲ್ಯಾ ಸುರಕ್ಶತೆಕ್ ಆಯ್ಲ್ಯಾಂ ಮ್ಹಳ್ಳ್ಯಾ ಪರಿಂ ಭೊಗ್ಲೆಂ.
ತಿತ್ಲ್ಯಾರ್!
ಬೊಂಗ್ಲ್ಯಾಚಿ ಗೇಟ್ ಉಗ್ತಿ ಜಾವ್ನ್ ರಾಯನಾನ್ ಜೀಪ್ ಹಾಡುನ್ ಗ್ಯಾರೇಜಿಂತ್ ರಾವಯ್ಲೆಂ.
"ಯೇ ಆಲಿಯಾ!" ರಾಯನ್ ಜಿಪಾರ್ ಥಾವ್ನ್ ಸಕಯ್ಲ್ ದೆಂವ್ಲೊ.
ಸವ್ಕಾಸ್ ಜಿಪಾಚೆಂ ದಾರ್ ಉಗ್ತೆಂ ಕೆಲ್ಲೆಂ ತೆಂ ಜಿಪಾರ್ ಥಾವ್ನ್ ಸಕಯ್ಲ್ ದೆಂವ್ಲೆಂ. ಗೇಟ್ ದಾಂಪ್ಲ್ಲೊ ವಾಚ್ಮ್ಯಾನ್ ಎಕಾ ಘಡಿಯೆಕ್ ನವ್ಯಾ ಸಯ್ರ್ಯಾಕ್ ಪಳವ್ನ್ ತೊ ತೆವ್ಶಿಂ ತಾಚ್ಯಾ ಕಾಮಾಕ್ ಲಾಗ್ಲೊ.
ಆಲಿಯಾಚಾ ಮುಕಾರ್ ಚಲೊನ್ ಗೆಲ್ಲ್ಯಾ ರಾಯನಾನ್ ಘರ್ಚ್ಯಾ ದಾರಾಚಿ ಕಾಂಪಿಣ್ ಮಾರ್ಲಿ.
ದಾರಾಚಿ ಕಾಂಪಿಣ್ ಮಾರ್ತಾನಾ ದಾರ್ ಉಗ್ತೆಂ ಜಾಲೆಂ.
ಉಗ್ತೆಂ ಜಾಲ್ಲ್ಯಾ ದಾರಾ ಮುಕಾರ್ ಸದಾಂಚಾ ಪರಿಂ ಆಜ್ ರಾಯನಾಕ್ ಮಿಶೇಲ್ ದಿಸ್ಲೆಂ ನಾ. ಶಮ್ಮಿನ್ ದಾರ್ ಉಗ್ತೆಂ ಕೆಲ್ಲೆಂ.
"ಮಿಶೇಲ್ ಖಂಯ್ ಆಸಾ.....?" ರಾಯನಾಚಾ ದೊಳ್ಯಾಂಕ್ ಮಿಶೇಲ್ ಜಳ್ಕಾನಾಸ್ತಾನಾ ವೆತಾನಾ ತಾಚ್ಯಾ ದೊಳ್ಯಾಂ ನದ್ರೆನ್ ಸವಾಲ್ ಕೆಲೆಂ.
"ಬೋವ್ಶ್ಯಾ ಆಲಿಯಾ ಯೆತಾ ಮ್ಹಣೊನ್ ಆಜ್ ಮಿಶೆಲ್ ಭಾಯ್ರ್ ಯೇಂವ್ಕ್ ನಾ ಆಸ್ತೆಲೆಂ!" ಮತಿನ್ ವಿಚಾರ್ಲ್ಲ್ಯಾ ಸವಾಲಾಕ್ ಮತಿಂತ್ಚ್ ರಾಯನಾನ್ ಜವಾಬ್ ದಿಲಿ.
ಆಲಿಯಾ ಅಜೂನ್ ಭಾಯ್ರ್ ಆಸ್ಲ್ಲೆಂ. ತೆಂ ಘರಾ ಮುಕ್ಲ್ಯಾ ಫುಲಾಂ ಝಡಾಂಕ್ಚ್ ಪಳವ್ನ್ ರಾವ್ಲ್ಲೆಂ. ತಿಂ ಫುಲಾಂ ಝಡಾಂ ತಾಕಾ ಸೊಭಿತ್ ದಿಸ್ಲಿಂ.
"ಆಲಿಯಾ.....?" ಆಪಯಿಲ್ಲೊ ರಾಯನ್, "ಭಿತರ್ ಯೇ...!" ಆಪ್ಲ್ಯಾ ಭೊಂಗ್ಲ್ಯಾ ಮುಕ್ಲ್ಯಾ ಫುಲಾಂ ಝಡಾಂಕ್ಚ್ ಪಳವ್ನ್ ರಾವ್ಲೆಲ್ಯಾ ಆಲಿಯಾಕ್ ತಾಣೆಂ ಆಪಯ್ಲೆಂ.
ರಾಯನಾನ್ ಆಪಯಿಲ್ಲೆಂ ಆಯ್ಕೊನ್ ಆಲಿಯಾ ಆತಾಂ ರಾಯನಾಚಾ ಘರಾಚಿಂ ಮೆಟಾಂ ಚಡಾಲಾಗ್ಲೆಂ.
ಆಲಿಯಾನ್ ಆತಾಂ ಘರಾ ಭಿತರ್ ಪಾಂಯ್ ದವರ್ಲೆ!
ಘರಾ ಭಿತರ್ ಪಾಂಯ್ ದವರ್ಲ್ಲೆಂ ಆಲಿಯಾ ಆಪ್ಲ್ಯಾ ದೊಳ್ಯಾಂಕ್ಚ್ ಪಾತ್ಯೆಲೆಂ ನಾ. ಭವ್ಯ್ ಸಾಲ್ ತೆಂ! ಭಿಲ್ಕುಲ್ ತ್ಯಾ ರಾವ್ಳೆರಾ ಭಾಶೆನ್! ಸಾಲಾಚಾ ಮಧೆಂ ಉಮ್ಕಾಳ್ಚೊ ವ್ಹಡ್ಲೊ ಸಯ್ತ್ ಕ್ರಿಸ್ಟಲ್ ಶಾಂಡಲೀಯರ್! ಆನಿ.... ತ್ಯಾ ಸಾಲಾಚ್ಯಾ ಸೊಭಾಯೆಕ್ ಮುಕಾರ್ ಚಾಕೊಂಕ್ ವೆಚ್ಯಾ ಆಲಿಯಾಚಿ ನದರ್ ಎಕಾಚ್ಚ್ ಫರಾ ಎಕಾ ಜಾಗ್ಯಾರ್ ಥಾಂಬ್ಲಿ! ತಾಚ್ಯಾ ದೊಳ್ಯಾಂಕ್ ತ್ಯಾ ಸಾಲಾ ಥಾವ್ನ್ ವಯ್ಲ್ಯಾ ತ್ಯಾ ಬೆಡ್ರೂಮಾಂಕ್ ವಚೊಂಕ್ ಆಸಾ ಕೆಲ್ಲ್ಯಾ ತ್ಯಾ ಸೊಭಿತ್ ರುಕಾಟಾಚ್ಯಾ ಮೆಟಾಂ ವಯ್ಲ್ಯಾನ್ ಮಿಶೇಲ್ ದೆಂವೊನ್ ಯೆಂವ್ಚೆಂ ದಿಸ್ಲೆಂ. ತಿಂ ಸೊಭಿತ್ ಮೆಟಾಂ ದೆಂವೊನ್ ಯೆಂವ್ಚ್ಯಾ ಮಿಶೇಲಾಕ್ ಪಳೆತಾನಾ ಎಕಾ ಘಡಿಯೆಕ್ ಮಿಶೇಲ್ ಆಪ್ಲ್ಯಾ ರಾಣಿಯೆ ಪಾಟಾರ್ ಥಾವ್ನ್ ದೆಂವೊನ್ ಯೆಂವ್ಚ್ಯಾ ರಾಣಿಯೆ ಪರಿಂ ಆಲಿಯಾಕ್ ದಿಸ್ಲೆಂ.
"ಬಸ್ ಆಲಿಯಾ!" ರಾಯನಾನ್ ಆಲಿಯಾಕ್ ಮುಕ್ಲೊ ಸೊಫಾ ದಾಕಯ್ಲೊ.
ಆಲಿಯಾ ಸೊಫಾರ್ ಬಸ್ತಾನಾ ಮಿಶೇಲ್ ಥಂಯ್ಚರ್ ಯೆವ್ನ್ ಪಾವ್ಲೆಂ.
"ಕಶೆಂ ಆಸಾಯ್ ಆಲಿಯಾ?" ಮಿಶೆಲಾಚಾ ತೊಂಡಾರ್ ತ್ಯೊಚ್ ನಿತಳ್ ನಿರ್ಮಳ್ ನಿಶ್ಕಳಂಕ್ ಮಂದ್ ಹಾಸೊ.
"ಬರಿಂ ಆಸಾಂ! ತುಂ ಕಶೆಂ ಆಸಾಯ್....?" ಆಲಿಯಾನ್ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡ್ಲ್ಯೊ.
"ತುಮಿ ಉಲಯಾ ಹಾಂವ್ ವಸ್ತುರ್ ಬದ್ಲುನ್ ಯೆತಾಂ! ಸಾಕಾಳಿಂ ಥಾವ್ನ್ ಹಿ ಟಾಯ್ ಗಳ್ಯಾಕ್ ಆಂರ್ದಾಲ್ಯಾ!" ಹಾಸೊನ್ ಸಾಂಗ್ಲ್ಲೊ ರಾಯನ್ ದೊಗಾಂಯ್ಕ್ಯ್ ಥಂಯ್ಚ್ ಸೊಡುನ್ ಭಿತರ್ ಗೆಲೊ.
"ಆತಾಂ ಕಶಿ ಆಸಾ ತುಜಿ ಭಲಾಯ್ಕಿ.....?" ಮಿಶೆಲಾನ್ಚ್ ಉಲೊಣ್ಯಾಕ್ ಬುನ್ಯಾದ್ ಘಾಲಿ.
***********
ಜಿವಿತಾಚ್ಯಾ ತ್ಯಾ ದಿಸಾಂನಿ......!
ದಿಸಾಚ್ಯಾ ಮೊದ್ಯಾನೆರ್ ತ್ಯಾ ವಿಶಾಲ್ ಮೊಳಾಬಾ ಪಂದಾ ಆಪ್ಣಾಚ್ಯಾ ಸಪ್ಣಾಂಕ್ ಸೊಧುನ್ ಸೊಧುನ್ ವ್ಹಡ್ ಜಾಲ್ಲೆಂ ಆಲಿಯಾ ಆತಾಂ ರಾತಿಚ್ಯಾ ಮೊದ್ಯಾನೆರ್ ತಿಂಚ್ ತಾಣೆಂ ಪಳೆಲ್ಲಿಂ ಸಪ್ಣಾಂ ಸೊಧುಂಕ್ ಲಾಗ್ಲ್ಲೆಂ.
ಪರಿಸ್ಥಿತೆನ್ ಆನಿ ಸಮಾಜೆಂತ್ ಜಿಯೆಂವ್ಚ್ಯಾ ಉಣ್ಯಾ ಚಿಂತ್ಪಾಚ್ಯಾ ಮನ್ಶ್ಯಾಂನಿ ಆಲಿಯಾಚಾ ಜಿವಿತಾಕ್ ದಿಸಾಚಾ ಉಜ್ವಾಡಾ ಥಾವ್ನ್ ರಾತಿಚಾ ಕಾಳೊಕಾಕ್ ಹಾಡುನ್ ಪಾವಯಿಲ್ಲೆಂ.
ಆಪ್ಣೆ ಆಪ್ಣಾಚಾ ಜಿವಿತಾಂತ್ ಆಶೆಂವ್ಕ್ ನಾತ್ಲ್ಲ್ಯಾ ಹ್ಯಾಚ್ ಪರಿಸ್ಥಿತೆಕ್ ಆನಿ ಹ್ಯಾಚ್ ಉಣ್ಯಾ ಚಿಂತ್ಪಾಚಾ ಮನ್ಶ್ಯಾಂಕ್ ಆಲಿಯಾನ್ ಆಜ್ ಆಶೆಂವ್ಕ್ ಶುರು ಕೆಲ್ಲೆಂ.
ಜಿವಿತಾಂತ್ ಉದೆಲ್ಲ್ಯಾ ನಿರಾಶೆಕ್ ಹ್ಯಾಚ್ ಆಶೆ ಥಾವ್ನ್ ಹುಮ್ಟುನ್ ಉಡಂವ್ಚೊ ತಾಚೊ ನಿರ್ಧಾರ್ ಆಸ್ಲ್ಲೊ!
ಎದೊಳ್ ಪಾಸೊನ್ ಆಲಿಯಾ ತಾಚ್ಯಾ ಹ್ಯಾ ಮಿಸಾಂವಾಂತ್ ಜಯ್ತೆವಂತ್ ಜಾಲ್ಲೆಂ. ಹ್ಯಾ ಫುಡೆಂಯ್ ಜಯ್ತ್ ತಾಚೆಂಚ್ ಜಾತೆಲೆಂ ಮ್ಹಳ್ಳೊ ತಾಕಾ ಭರ್ವಸೊ ಆಸ್ಲ್ಲೊ. ಆಲಿಯಾ ಹ್ಯಾಚ್ ಭರ್ವಸ್ಯಾನ್ ವಾಡ್ಲ್ಲೆಂ.
ಆಪ್ಲ್ಯಾ ಪ್ಲ್ಯಾಟಾಚಾ ಬಾಲ್ಕನಿಚೆರ್ ಚೇರ್ ದವರುನ್ ರಾತಿಚಾ ತ್ಯಾ ಮಂದ್ ಕಾಳೊಕಾಂತ್ ಮೊಳಾಬಾ ವಯ್ಲಿಂ ಆಪ್ಲಿಂ ನಿಸ್ರೊನ್ ಗೆಲ್ಲಿಂ ಸಪ್ಣಾಂ ಆಲಿಯಾ ತ್ಯಾ ತಾಚ್ಯಾ ಬಾಲ್ಕಾನಿರ್ ಬಸೊನ್ ಸೊಧ್ತಾಲೆಂ.
ತ್ಯಾ ಮೊಳಾಬಾ ವಯ್ಲೊ ಸಂಸಾರ್ಯ್ ವಿಚಿತ್ರ್!
ಕಾಂಯ್ ಥೊಡಿಂ ನೆಕೆತ್ರಾಂ ಆಪ್ಲ್ಯಾ ಆಂಗಾಂತ್ಲಿ ಊಭ್ ನಿಂವೊನ್ ಯೆತಾ ಮ್ಹಣ್ಚ್ಯಾ ಪರಿಂ ಮಿಣ್ಮಿಣ್ತಾಲಿಂ.
ಕಾಂಯ್ ಥೊಡಿಂ ನೆಕೆತ್ರಾಂ ಹಳ್ತಾರ್ ಹೆವ್ಶಿಂ ತೆವ್ಶಿಂ ಚಲೊನ್ ವೆಚ್ಯಾ ಪರಿಂ ವೆತಾಲಿಂ.
ಕಾಂಯ್ ಥೊಡಿಂ ನೆಕೆತ್ರಾ ಕಸಲ್ಯಾಗೀ ಸ್ಪಿರಿತಾನ್ ಮ್ಹಳ್ಳ್ಯಾಪರಿಂ ಪ್ರಕಸ್ಭರಿತ್ ಜಾವ್ನ್ ಚಡ್ಚ್ ಉಜ್ವಾಡ್ ಫಾಂಕಯ್ತಾಲಿಂ.
ತಾಂಚೆ ಮಧೆಂ!
ಅಪ್ರೂಫ್ ಎಕೇಕ್ ನೆಕೆತ್ರ್ ಚಡ್ಚ್ ವೇಗಾನ್ ಧಾಂವ್ತಾ ತಶೆಂ ದಿಸ್ತಾಲೆಂ.
ತ್ಯಾ ಧಾಂವ್ಚ್ಯಾ ನೆಕೆತ್ರಾ ವಯ್ರ್ ಆಲಿಯಾ ಆಪ್ಲ್ಯಾ ದಿಶ್ಟೆಕ್ ಕೇಂದ್ರೀಕ್ರತ್ ಕರುನ್ ತ್ಯಾ ನೆಕೆತ್ರಾ ಪಾಟ್ಲ್ಯಾನ್ ಆಪ್ಣಾಚಾ ದಿಶ್ಟೆಕ್ಯ್ ಧಾಂವ್ಡಾಯ್ತಾಲೆಂ.
ಹ್ಯಾ ಮಧೆಂ, ತವಳ್ ತವಳ್,
ಎಕಾಚ್ಚ್ಫರಾ ಏಕ್ ನೆಕೆತ್ರ್ ಮೊಳಾಬಾ ಥಾವ್ನ್ ತುಟೊನ್ ಪಡ್ಲೆಲ್ಯಾ ಪರಿಂ ಜಾವ್ನ್ ವೇಗಾನ್ ಧಾಂವೊನ್ ನಪಂಯ್ಚ್ ಜಾಂವ್ಚೆಂ ದಿಸೊನ್ ಆಲಿಯಾ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟೊನ್ ಉಭೆಂ ಜಾತಾಲೆಂ. ತ್ಯಾ ನೆಕೆತ್ರಾಕ್ ತೆಂ ಸೊಧುಂಕ್ ಲಾಗ್ತಾಲೆಂ.
ಆಜ್ಯ್ ತಶೆಂಚ್!
ಆಲಿಯಾ ಆಪ್ಲ್ಯಾ ಪ್ಲ್ಯಾಟಾಚಾ ಬಾಲ್ಕನಿಚೆರ್ ಬಸೊನ್ ಆಪ್ಲ್ಯಾ ನದ್ರೆಕ್ ತ್ಯಾ ಮೊಳಾಬಾರ್ ಖಂಚವ್ನ್ ರಾವ್ಲ್ಲೆಂ. ತಾಚ್ಯಾ ಎಕ್ಸುರ್ಪಣಾಂತ್ ತಾಕಾ ಹೊ ಮೊಳಾಬ್ ಆನಿ ಹಿಂ ತಾರಾಂಚ್ ಸಾಂಗಾತ್ ದಿತಾಲಿಂ. ಹ್ಯಾ ತಾರಾಂ ಸಾಂಗಾತಾ ಆಲಿಯಾ ಖುಶ್ ಆಸ್ಲ್ಲೆಂ.
ತೆ ಆದ್ಲೆ ದೀಸ್ಯ್ ಆಶೆ ಆಸ್ಲ್ಲೆ ಕೀ ಅಚಾನಕ್ ಪರಿಸ್ಥಿತೆಕ್ ಆಲಿಯಾನ್ ವಳಗ್ ಜಾಯ್ಶೆಂ ಕೆಲ್ಲೆ.
ಹೆ ಆತಾಂಚೆ ದೀಸ್ಯ್ ಆಶೆ ಕೀ ಖುದ್ಧ್ ಆಪ್ಣೆ ರಚ್ಲೆಲ್ಯಾ ಪರಿಸ್ಥಿತೆನ್ ಆಲಿಯಾಕ್ ತಾಚೆಂ ಮಿಸಾಂವ್ ಚಡ್ ಸುಫಳ್ ಜಾಯ್ಶೆಂ ಕರ್ಚೆ!
ಆಲಿಯಾನ್ ರಾಯನಾಚಾ ಘರಾ ಭಿತರ್ ಪಾಂಯ್ ದವರುಂಕ್ ಆಶೆಲ್ಲೆಂ ವ್ಹಯ್! ಪುಣ್ ಇತ್ಲ್ಯಾ ವೆಗ್ಗಿಂ ಆಪ್ಣಾಚಿ ಆಶಾ ಸುಫಳ್ ಜಾಯ್ತ್ ಮ್ಹಣೊನ್ ತಾಣೆಂ ಚಿಂತುಂಕ್ ನಾ. ತಾಣೆ ಖುದ್ಧ್ ಜಾವ್ನ್ ರಚ್ಲೆಲ್ಯಾ ಪರಿಸ್ಥಿತೆನ್ ತಾಕಾ ಹೊ ಭಾಂಗ್ರಾಳೊ ಆವ್ಕಾಸ್ ಲಾಭಯಿಲ್ಲೊ.
ಖುದ್ಧ್ ರಾಯನಾನ್ಚ್ ಆಲಿಯಾಕ್ ವತ್ತಾಯ್ ಕರುನ್ ಆಪ್ಣಾಚಾ ಘರಾ ಆಜ್ ಪ್ರವೇಶ್ ದಿಲ್ಲೊ.
ಹೊ ಪ್ರವೇಶ್ ತಾಕಾ ಆಜ್ ಚಡ್ ಗರ್ಜೆಚೊ! ಇಕ್ಬಾಲಾ ಫುಡೆಂ ಆಪ್ಣೆಂ ರಾವೊಂಕ್ ಜಾಯ್ ಜಾಲ್ಯಾರ್ ಆಪ್ಣಾಕ್ ರಾಯನಾಚಿ ಗರ್ಜ್ ಆಸಾ. ಆಪ್ಲ್ಯಾ ಝುಜಾಂತ್ ಆಪ್ಣಾಕ್ ಆಧಾರ್ ಜಾವ್ನ್ ಮಾತ್ರ್ ಆಪ್ಣಾಕ್ ರಾಯನ್ ಮ್ಹಾಕಾ ಜಾಯ್! ತ್ಯಾ ಉಪ್ರಾಂತ್...? ಏಕ್ ಪಾವ್ಟಿಂ ಆಪ್ಣಾಚೆಂ ಝುಜ್ ಕಾಬಾರ್ ಜಾಲೆಂ ಆಪ್ಣಾಕ್ ತ್ಯಾ ಉಪ್ರಾಂತ್ ರಾಯನಾಚಿ ಗರ್ಜ್ ನಾ. ಭೋವ್ಶ್ಯಾ ತ್ಯಾ ಉಪ್ರಾಂತ್ ಮ್ಹಾಕಾ ಹ್ಯಾ ಸಂಸಾರಾಚಿಚ್ ಗರ್ಜ್ ಪಡ್ಚಿ ನಾ! ಪುಣ್ ಹ್ಯಾ ದಿಸಾಂನಿ ರಾಯನ್ ಆಪ್ಣಾಕ್ ಕಿತ್ಲೊ ಸಾಂಗಾತ್ ದೀಂವ್ಕ್ ಸಕ್ತಾ ತಿತ್ಲೆಂ ಆಪ್ಣಾಚೆಂ ಭಳ್ ವ್ಹಾಡ್ತಾ. ರಾಯನ್ ಜರ್ ಆಪ್ಣಾ ಬರಾಬರ್ ನಾ ಮ್ಹಣೊನ್ ಇಕ್ಬಾಲಾಕ್ ಕಳಿತ್ ಜಾಲೆಂ ತರ್ ತ್ಯಾ ಉಪ್ರಾಂತ್ ಇಕ್ಬಾಲಾಚಾ ಭಳಾ ಮುಕಾರ್ ಆಪ್ಣಾಕ್ ರಾವೊಂಕ್ ಸಾದ್ಯ್ ಜಾತೆಲೆಂ......? ನಾ.
ಹ್ಯಾಚ್ ಖಾತಿರ್ ಆಜ್ ರಾಯನ್ ಆಪ್ಣಾಕ್ ಜಾಯ್! ಹ್ಯಾ ರಾಯನಾಕ್ ಆಪ್ಣಾಂವ್ಚ್ಯಾ ವಾಟೆರ್ ಆಜ್ ಆಪುಣ್ ರಾಯನಾಚಾ ಘರಾ ಪಾಸೊನ್ ಪಾವ್ಲಿಂ ಮ್ಹಣ್ತಾನಾ ಹ್ಯಾ ಉಪ್ರಾಂತ್ ಆಪ್ಣಾಕ್ ರಾಯನಾಚಾ ಘರಾ ಪಾಂಯ್ ದವರ್ಚೆ ಮಸ್ತ್ ಸುಲಭ್!
ಫಕತ್ತ್ ತ್ಯಾ ಇಕ್ಬಾಲಾಕ್ ಆನಿ ರಾಶಿದಾಕ್ ತಾಂಚ್ಯಾ ಹಂಕಾರಾಕ್ ಫಾವೊ ಜಾಲ್ಲಿ ವಾಟ್ ದಾಕಯ್ತಾ ಪಾಸೊನ್!
ವಿಶು ಕುಮಾರಾಚ್ಯಾ ಮರ್ಣಾಕ್ ಕಾರಾಣ್ ಜಾಲ್ಲ್ಯಾ ಹಾಂಕಾ ಮರ್ಣಾಚಿ ಶಿಕ್ಶ್ಯಾ ದಿತಾಂ ಪಾಸೊನ್!
ಮ್ಹಜ್ಯಾ ಜಿವಿತಾಚಿ ದಿಶಾ ಚುಕಯಿಲ್ಲ್ಯಾ ಹಾಂಚ್ಯಾ ಗಳ್ಯಾಕ್ ಗಳ್ಪಾಸ್ ವೊಡ್ತಾ ಪಾಸೊನ್!
ತ್ಯಾ ಪಾಸೊನ್ ಹೆಂ ಘರ್ ಆಪ್ಣಾಕ್ ಜಾಯ್. ತ್ಯಾ ಪಾಸೊನ್ ಹ್ಯಾ ಘರಾಂತ್ ಮಿಶೇಲ್ ಮಿಶೇಲಾಚಾ ಜಾಗ್ಯಾರ್ ಆನಿ ಹಾಂವ್ ಮ್ಹಜ್ಯಾ ಜಾಗ್ಯಾರ್!
ಎಕೇಕ್ಚ್ ಚಿಂತಾನಾ ಆಲಿಯಾಚಾ ತೊಂಡಾರ್ ಹಾಸೊ ಉದೆಲ್ಯೊ.
ಜಯ್ತಾಚೊ ಹಾಸೊ!
ತಿತ್ಲ್ಯಾರ್!
ಆಲಿಯಾಚಾ ಪ್ಲ್ಯಾಟಾಚಾ ದಾರಾಚಿ ಕಾಂಪಿಣ್ ವಾಜ್ಲಿ.
ಬೋವ್ಶ್ಯಾ ಆಲಿಯಾಕ್ ಆಜ್ ಕೊಣಾಚಿಗೀ ರಾಕೊಣ್ ಆಸ್ಲ್ಲಿ. ಆಪ್ಲ್ಯಾ ಪ್ಲ್ಯಾಟಾಚಾ ದಾರಾಚಿ ಕಾಂಪಿಣ್ ಆಯ್ಕೊನ್ ತಾಚಾ ತೊಂಡಾರ್ ಎಕಾಚ್ಚ್ ಫರಾ ಉಜ್ವಾಡ್ ಫಾಂಕ್ಲೊ. ತಾಚ್ಯಾ ದೊಳ್ಯಾಂನಿ ಪರ್ಜಳ್ ಉಮಾಳ್ಳೊ.
ತಿತ್ಲೆಂಚ್!
ಸವ್ಕಾಸ್ ತೆಂ ಬಾಲ್ಕನಿ ವಯ್ಲ್ಯಾ ಆಪ್ಲ್ಯಾ ಬಸ್ಕೆರ್ ಥಾವ್ನ್ ಉಟ್ಲೆಂ. ತಾಚಿ ನದರ್ ಏಕ್ ಪಾವ್ಟಿಂ ತ್ಯಾ ಮೊಳಾಬಾರ್ ಪರ್ತ್ಯಾಕ್ ಖಂಚ್ಲಿ. ಆಜ್ ತಾಚ್ಯಾ ದೊಳ್ಯಾಂಕ್ ತ್ಯಾ ಮೊಳಾಬಾರ್ ಏಕ್ಯ್ ನೆಕೆತ್ರ್ ತುಟೊನ್ ವೆಚೆಂ ದಿಸ್ಲೆಂ ನಾ. ತಶೆಂಚ್ ಏಕ್ ಭಳಾಧೀಕ್ ಲಾಂಭ್ ಸ್ವಾಸ್ ಸೊಡ್ಲ್ಲೆಂ ಆಲಿಯಾ ಆತಾಂ ಪ್ಲ್ಯಾಟಾಚಾ ಮುಕ್ಲ್ಯಾ ದಾರಾ ತೆವ್ಶಿಂ ಚಮ್ಕಾಲೆಂ.
ತಾಚ್ಯಾ ತೊಂಡಾರ್ ಕಾಂಯ್ಚ್ ಬದ್ಲಾವಣ್ ನಾತ್ಲ್ಲಿ.
ದಾರ್ ಉಗ್ತೆಂ ಕೆಲ್ಲ್ಯಾ ಆಲಿಯಾಕ್ ಆಶ್ಚರ್ಯ್ ಜಾಲೆಂ ನಾ.
ವ್ಹಯ್! ಆಲಿಯಾನ್ ರಾಕೊಣ್ ರಾವ್ಲ್ಲೊ ವ್ಯಕ್ತಿಚ್ ಆಪ್ಲ್ಯಾ ಬಾಯ್ಲೆ ಸವೆಂ ಆಲಿಯಾಚಾ ಪ್ಲ್ಯಾಟಾಚಾ ದಾರಾ ಮುಕಾರ್ ಉಭೊ ಆಸ್ಲ್ಲೊ.
ನಾಸಿರ್ ಆನಿ ಅಮೀನಾ!
"ಯೇ ಭಿತರ್ ಯೇ!" ಆಲಿಯಾನ್ ಆಪ್ಣೆಂ ಅರ್ಧೆಂ ಉಗ್ತೆಂ ಕರುನ್ ಧರ್ಲೆಲ್ಯಾ ದಾರಾಕ್ ಸಂಪೂರ್ಣ್ ಉಗ್ತೆಂ ಕೆಲೆಂ.
ಪಯ್ಲೆಂ ನಾಸಿರ್ ಪ್ಲ್ಯಾಟಾ ಭಿತರ್ ಸರ್ತಾನಾ ತಾಚ್ಯಾ ಪಾಟ್ಲ್ಯಾನ್ ಅಮೀನಾ ಭಿತರ್ ಸರ್ಲೆಂ. ತಾಂಚೆ ಪಾಟ್ಲ್ಯಾನ್ ಆಲಿಯಾನ್ ದಾರ್ ಭಂಧ್ ಕರುನ್ ತಾಚಿ ಖಿಳ್ ವೊಡ್ಲಿ.
"ಬಸ್ಯಾ!" ಆಲಿಯಾನ್ ಮುಕ್ಲ್ಯಾ ಸೊಫಾಕ್ ದಾಕಯ್ಲೆಂ.
ಲೆದರ್ ಕವರಾಚಾ ಕುಶನಾಚೆ ಸೊಫಾ ತೆ! ನಾಸಿರಾಕ್ ತ್ಯಾ ಸೊಫಾ ವಯ್ರ್ ಬಸ್ತಾನಾ ಖಂಯ್ಚರ್ಗೀ ಆಪ್ಣೆ ರಾಯಚಾ ಸಿಂಹಾಸನಾ ವಯ್ರ್ ಬಸ್ಲಲೊ ಅನುಭವ್ ಜಾಲೊ. ತಾಕಾ ಕಾಂಯ್ಚ್ ಉಲಂವ್ಕ್ ಜೀಬ್ ಸುಟ್ಲಿ ನಾ. ತೊ ಆಲಿಯಾಚಾ ಮುಕಾರ್ ಆಪ್ಣೆಂ ಉಲಂವ್ಕ್ ಆಯಿಲ್ಲ್ಯಾ ವಿಶಯಾಕ್ ಉಲಂವ್ಕ್ ಜಾಯ್ನಾಸ್ತಾನಾ ಮೌನ್ ಬಸ್ಲೊ.
"ಥೊಡೆಂ ಪಿಯೆಂವ್ಕ್ ಹಾಡ್ತಾಂ!" ಆಲಿಯಾ ಉಟೊನ್ ಉಭೆಂ ಜಾಲೆಂ.
"ನಾಕಾ ಆಲಿಯಾ!" ನಾಸಿರಾನ್ ಇನ್ಕಾರ್ ಕೆಲೆಂ.
ನಾಸಿರಾಕ್ ಪಳವ್ನ್ ಆಲಿಯಾ ಜಾಣಾಂ ಜಾಲೆಂ ಕೀ ನಾಸಿರ್ ಉಲಂವ್ಕ್ ಆಯಿಲ್ಲ್ಯಾ ವಿಶಯಾಕ್ ತೊ ಉಲಂವ್ಕ್ ಸಕಾನಾ. ಅಜೂನ್ ನಾಸಿರ್ ತಸೊಚ್ ಆಸ್ಲ್ಲೊ. ತಾಚ್ಯಾ ಸ್ವಭಾವಾಂತ್ ಕಾಂಯ್ಚ್ ಬದ್ಲಾವಣ್ ಜಾಂವ್ಕ್ ನಾತ್ಲ್ಲಿ.
"ಕಿತೆಂ ನಾಸಿರ್? ಇತ್ಲ್ಯಾ ರಾತಿಕ್ ತುಮಿಂ ಹಾಂಗಾ.....?" ಆಲಿಯಾನ್ಚ್ ಉಲವ್ಣ್ಯಾಕ್ ಬುನ್ಯಾದ್ ಘಾಲಿ. ನಾಸಿರಾಕ್ ಪಳವ್ನ್ ತಾಕಾ ಭಿರ್ಮತ್ ದಿಸ್ಲಿ. ತಾಚ್ಯಾ ತೊಂಡಾಚೊ ಛಾರೊ ಬದ್ಲಾಲ್ಲೊ.
"ತುಂ ಆಶೆಂ ಕಿತ್ಯಾಕ್ ಕರ್ತಾಯ್ ಆಲಿಯಾ....?" ನಾಸಿರಾನ್ ಕಸಲೆಂಗೀ ಧಯ್ರ್ ಆರಾಯ್ಲೆಂ.
"ಹಾಂವ್.....?" ಆಲಿಯಾನ್ ನಾಸಿರಾಕ್ಚ್ ಪಳೆಲೆಂ. "ಹಾಂವೆಂ ಕಿತೆಂ ಕೆಲೆಂ....?" ಆಲಿಯಾಚಾ ತೊಂಡಾರ್ ನೆಣಾರ್ಪಣ್ ಉಪ್ಯೆತಾಲೆಂ.
"ತುಂ ಸಗ್ಳೆಂ ಜಾಣಾಂಯ್ ಆಲಿಯಾ! ಸಗ್ಳೆಂ ಜಾಣಾಂಯ್! ಜಾಣಾಂ ಅಸೊನ್ಯ್ ನೆಣಾರ್ಪಣಾಚೊ ವೇಸ್ ಪಾಂಗುರ್ತಾಯ್. ಮ್ಹಜ್ಯಾ ಬಿಜ್ನೆಸಾಚೆ ಆನಿ ಮ್ಹಜ್ಯಾ ಕುಟ್ಮಾಚೆ ಸರ್ವ್ ಸೀಕ್ರೆಟ್ಸ್ ತುಂ ಜಾಣಾಂ ಆಸ್ಲ್ಲೆಂಯ್!" ನಾಸಿರ್ ಧಯ್ರಾನ್ ಉಲಯ್ಲೊ. ತಾಕಾ ಆಜ್ ಜಾಲ್ಲ್ಯಾ ಲುಕ್ಸಾಣೆನ್ ಹೆಂ ಧಯ್ರ್ ಹಾಡಯಿಲ್ಲೆಂ. ಪುಣ್ ಆಲಿಯಾಚಾ ದೊಳ್ಯಾಂಕ್ ದೊಳೆ ಮೆಳವ್ನ್ ಉಲಂವ್ಚೆಂ ಧಯ್ರ್ ನಾಸಿರಾಕ್ ಭಿಲ್ಕುಲ್ ನಾತ್ಲ್ಲೆಂ.
"ತರ್....?" ಆಲಿಯಾ ತಶೆಂಚ್ ನಾಸಿರಾಚಾ ಮುಕಾರ್ ತ್ಯಾ ಸೊಫಾಕ್ ವೊಣ್ಕಾಲೆಂ.
"ಹ್ಯಾ ಸಗ್ಳ್ಯಾ ಸೀಕ್ರೆಟ್ಸಾಂಕ್ ಉಗ್ತೆಂ ಕರುನ್ ತುವೆಂ ಮ್ಹಜ್ಯೆರ್ ಫಾರಿಕ್ಪಣ್ ಘೆತ್ಲೆಂಯ್!" ನಾಸಿರ್ ತಕ್ಲಿ ಬಾಗಾವ್ನ್ ಆಪ್ಲ್ಯಾ ಹಾತಾಂಕ್ ಪಳೆತಾಲೊ.
ಆಲಿಯಾ ಫಕತ್ತ್ ನಾಸಿರಾಕ್ ಪಳವ್ನ್ ರಾವ್ಲೆಂ ಶಿವಾಯ್ ತೆಂ ಆತಾಂ ಕಾಂಯ್ ಉಲಯ್ಲೆಂ ನಾ.
"ಅಬ್ಬೂ ಆಸ್ಪತ್ರೆಂತ್ ಆಸಾ! ತಾಕಾ ಹಾರ್ಟ್ ಎಟ್ಯಾಕ್ ಜಾಲಾಂ. ಸಗ್ಳಿಂ ಘರ್ಚಿಂ ಬೆಜಾರಾಯೆರ್ ಆಸಾತ್!" ನಾಸಿರ್ಚ್ ಪರ್ತ್ಯಾಕ್ ಉಲಯ್ಲೊ.
"ತರ್ ಹಾಂಗಾ ಕಿತ್ಯಾಕ್ ಆಯ್ಲಾಯ್? ತುವೆಂ ಆಸ್ಪತ್ರೆಕ್ ವಚೊಂಕ್ ಜಾಯ್! ತುಜ್ಯಾ ಘರ್ಚ್ಯಾಂಕ್ ತುವೆಂ ಧಯ್ರ್ ದೀಂವ್ಕ್ ಜಾಯ್!" ನಾಸಿರಾಚಾ ಉತ್ರಾಂನಿ ಆಲಿಯಾಚಾ ಸಿಂತಿಮೆಂತಾಕ್ ಜಾಗಯ್ಲೆಂ ನಾ. ತೆಂ ಆಪ್ಣಾಕ್ ಕಾಂಯ್ಚ್ ಪಡೊಂಕ್ ನಾ ಮ್ಹಳ್ಳ್ಯಾ ಪರಿಂ ಉಲಯ್ಲೆಂ.
"ಇಕ್ಬಾಲಾನ್ ಪೋನ್ ಕೆಲ್ಲೆಂ!" ನಾಸಿರ್ ಆಪ್ಲ್ಯಾ ಹಾತಾಚಿಂ ಬೊಟಾಂ ಚಿರ್ಡಿತ್ತ್ ಉಲಯ್ಲೊ.
"ಕೋಣ್ ಇಕ್ಬಾಲ್.....?" ಆಲಿಯಾನ್ ಜಾಣಾಂ ಆಸೊನ್ಯ್ ನೆಣಾಂ ಜಾಲ್ಲ್ಯಾ ಪರಿಂ ಕೆಲೆಂ.
"ತೊಚ್ಚ್! ತುಜ್ಯೆರ್ ಹಲ್ಲೊ ಕೆಲ್ಲೊ!"
"ಕಿತ್ಯಾಕ್.......?"
"ಮ್ಹಜೆಂ ಬಿಜ್ನೆಸ್ ತೊ ಘೆತಾ ಖಂಯ್!"
"ತೆಂ ತುಮ್ಚೆಂ ಡೀಲ್ ನಾಸಿರ್! ತೆಂ ತುಮಿಂ ಪಳವ್ನ್ ಘೆಯಾ!" ಆಲಿಯಾ ಕಾಂಯ್ಚ್ ಹಾಲ್ಲೆಂ ನಾ.
"ಹಾಂವ್ ಆತಾಂ ಸಾಂಪಡ್ಲಾಂ ಆಲಿಯಾ! ಇನ್ಕಮ್ ಟ್ಯಾಕ್ಸಾಚ್ಯಾಂನಿ ಸಗ್ಳೆಂ ಸೀಝ್ ಕೆಲಾಂ!" ನಾಸಿರ್ ಕಂಗಾಲ್ ಜಾಲ್ಲ್ಯಾ ಪರಿಂ ಉಲಯ್ಲೊ.
"ತರ್ ಬಿಜ್ನೆಸ್ ವಿಕುನ್ ಸೊಡ್!" ಆಲಿಯಾನ್ ಕಾಂಯ್ಚ್ ದಯಾ ದಾಕ್ಶೆಣ್ ದಾಕಯ್ಲಿ ನಾ.
"ತುಂ ಆಶೆಂ ಕಿತ್ಯಾಕ್ ಆಶೆತಾಯ್ ಆಲಿಯಾ......?" ನಾಸಿರ್ ಪಯ್ಲ್ಯಾ ಪಾವ್ಟಿಂ ಆಲಿಯಾ ಮುಕಾರ್ ದೀಣ್ಪಣಿಂ ಗಳ್ಳೊ.
"ಹಾಂವ್.....?" ಆಲಿಯಾಚಾ ತೊಂಡಾರ್ ವಿಲಕ್ಶಣ್ ಹಾಸೊ ಉದೆಲ್ಯೊ. ತ್ಯಾ ಹಾಸ್ಯಾಂಚಾ ಅರ್ಥಾಕ್ ಸಮ್ಜೊಂಚಾ ಸ್ಥಿತೆರ್ ನಾಸಿರ್ ನಾತ್ಲ್ಲೊ.
"ತುಂ ಜಾಣಾಂಯ್ ನಾಸಿರ್?" ಆಲಿಯಾ ಉಲಯ್ಲೆಂ. "ತ್ಯಾ ದಿಸಾಯ್ ಮ್ಹಜ್ಯಾ ಆಪ್ಲ್ಯಾಪಣಾಕ್ ತ್ಯಾ ಇಕ್ಬಾಲಾಚಾ ಭಾವಾನ್ ಲುಟುನ್ ವರ್ತಾನಾ ಹಾಂವೆ ಝುಜ್ಲ್ಲ್ಯಾ ಮ್ಹಜ್ಯಾ ಝುಜಾಂತ್ ತುಮಿಂ ಮ್ಹಾಕಾ ಎಕ್ಸುರೆಂ ಸಾಂಡ್ಲ್ಲೆಂ. ಎಕ್ಸುರೆಂ ಜಾಲ್ಯಾರ್ಯ್ ಹಾಂವ್ ಝುಜ್ತಾಲಿಂ. ಮ್ಹಾಕಾ ಧಯ್ರ್ ಜಾವ್ನ್ ತುವೆಂ ರಾಂವ್ಚ್ಯಾ ಬದ್ಲಾಕ್ ಮ್ಹಜ್ಯಾ ಧಯ್ರಾಕ್ ತ್ಯಾ ದೀಸ್ ತುವೆಂಯ್ ಹ್ಯಾ ಅಮೀನಾಚಾ ಹಾತಿಂ ವಿಕ್ಲ್ಲೆಂಯ್! ಆನಿ ಹಾಣೆಂ ಮ್ಹಜೆಂ ಜಿವಿತ್ ವಿಕ್ತೆಂ ಘೆತ್ಲ್ಲೆಂ!" ಆಲಿಯಾ ತ್ಯಾ ಆದ್ಲ್ಯಾ ಉಡಾಸಾನ್ ಸಿಂತಿಮೆಂತಾಳ್ ಜಾಲೆಂ. ಥೊಡ್ಯಾ ಘಡಿಯಾಂಕ್ ತಾಚ್ಯಾ ದೊಳ್ಯಾಂ ಮುಕಾರ್ ತ್ಯೊ ಆದ್ಲ್ಯೊ ಘಡಿಯೊ ತಾಕಾ ಸೊಧುನ್ ಆಯ್ಲ್ಯೊ.
"ಆಜ್ ತುಜೆಂ ಬಿಜ್ನೆಸ್ ಮಾತ್ರ್ ವಿಕ್ರ್ಯಾಕ್ ಪಡ್ಲಾಂ! ಪುಣ್ ತುವೆಂ ಮ್ಹಜೆಂ ಜಿವಿತ್ಚ್ ವಿಕ್ಲ್ಲೆಂಯ್! ತುಂ ಜಾಣಾಂಯ್? ಮ್ಹಜ್ಯಾ ಅಬ್ಬೂಚಾ ಘರಾ ಥಾವ್ನ್ ತುಜ್ಯೆ ಲಾಗಿಂ ನಿಖಾ ಜಾವ್ನ್ ಹಾಂವ್ ಯೆತಾನಾ ಹಾವೆಂ ತುಜ್ಯೆರ್ ಭರ್ವಸೊ ದವರ್ಲ್ಲೊ. ತ್ಯಾ ತೀನ್ ಪಾವ್ಟಿಂ ’ಕಬೂಲ್ ಹೇ’ ಮ್ಹಳ್ಳ್ಯಾ ಉತ್ರಾಂ ವಯ್ರ್ ಭರ್ವಸೊ ದವರ್ಲ್ಲೊ. ಕಿತ್ಲ್ಯಾ ಸುಲಾಭಾಯೆನ್ ತುವೆಂ ತೊ ಭರ್ವಸೊ ಕಾಂಯ್ಚ್ ನ್ಹಯ್ ಮ್ಹಳ್ಳ್ಯಾ ಪರಿಂ ಮೊಡ್ಲೊಯ್! ತುವೆಂ ತೆದ್ನಾಂ ತುಜ್ಯಾ ವಿಶಿಂ ಆನಿ ತುಜ್ಯಾ ಹ್ಯಾ ಅಮೀನಾ ವಿಶಿಂ ಮಾತ್ರ್ ಚಿಂತ್ಲ್ಲೆಂಯ್! ತುವೆಂ ಮ್ಹಜೆಂ ಚಿಂತ್ಲ್ಲೆಂಯ್?" ನಾಸಿರಾಕ್ಚ್ ಪಳವ್ನ್ ವಿಚಾರ್ಲ್ಲ್ಯಾ ಆಲಿಯಾನ್ ಆಪ್ಲ್ಯಾ ಉತ್ರಾಂಕ್ ಖಾಡುಂ ಘಾಲೆಂ. ತೆಂ ಮೌನ್ ಜಾಲೆಂ. ತಶೆಂಚ್ ಥೊಡ್ಯಾ ವೆಳಾಕ್ ಮೌನ್ ಜಾಲ್ಲೆಂ ಆಲಿಯಾ,
"ಆಜ್ ತುಂ ಹಾಂಗಾ ಆಯ್ಲಾಯ್ ಜಾಲ್ಯಾರ್ ತುಜೆಂಚ್ ಚಿಂತುನ್ ಆಯ್ಲಾಯ್! ತುಜ್ಯಾ ಬಾಪಾಯ್ಚೆಂ, ತುಜ್ಯಾ ಆವಯ್ಚೆಂ, ತುಜ್ಯಾ ಘರಾಚೆಂ, ತುಜ್ಯಾ ಬಿಜ್ನೆಸಾಚೆಂ! ಹಾಂಗಾ ಹಾಂವ್ ಕಶಿಂ ಆಸಾ ಮ್ಹಣೊನ್ ತುವೆಂ ಮ್ಹಾಕಾ ಏಕ್ ಸಬ್ದ್ ವಿಚಾರ್ಲೊಯ್....? ಥೊಡ್ಯಾ ದಿಸಾಂಕ್ ತರ್ಯ್ ಆಮ್ಚೆ ಮಧೆಂ ಸಂಭಂಧ್ ಆಸ್ಲ್ಲೊ ನಾಸಿರ್! ಹ್ಯಾ ಸಂಭಂಧಾಕ್ ತುಂ ವಿಸ್ರೊನ್ಚ್ ಗೆಲೊಯ್. ಪುಣ್ ಹಾಂವ್ ವಿಸ್ರೊಂಕ್ ನಾ!" ಆಲಿಯಾಚಿಂ ಉತ್ರಾಂ ನಾಸಿರಾಚಾ ಆನಿ ಅಮೀನಾಚಾ ಕಾನಾಂತ್ ಘಡ್ಗಡ್ಯಾ ಪರಿಂ ಮಾರ್ತಾಲಿಂ. ಆಲಿಯಾಚಾ ಉತ್ರಾಂನಿ ತಾಚ್ಯಾ ಜಿವಿತಾಚೆಂ ಸತ್ ಆಸ್ಲ್ಲೆಂ ಜ್ಯಾ ಸತಾಕ್ ನಾಸಿರಾನ್ ಆನಿ ತಾಚ್ಯಾ ಘರ್ಚ್ಯಾಂನಿ ಮೆಳೊನ್ ತಿರಸ್ಕಾರ್ ಕೆಲ್ಲೆಂ.
ನಾಸಿರ್ ಆತಾಂ ಸಂಪೂರ್ಣ್ ಮೌನ್ ಜಾಲೊ. ತಾಚ್ಯಾ ಮುಕಾರ್ ಕಾಂಯ್ಚ್ ಉಲಂವ್ಕ್ ಉತ್ರಾಂ ಮೆಳ್ಳಿಂ ನಾಂತ್. ತಾಕಾ ತಾಣೆಂ ಆಧಾರ್ಲ್ಲ್ಯಾ ಪಾತ್ಕಾಚಿ ವಳಕ್ ಜಾಲ್ಲಿ.
"ಐ ಯಾಮ್ ಸಾರ್ರಿ ಆಲಿಯಾ!" ಮೌನ್ ಮೊಡುನ್ ಅಮೀನಾ ಉಲಯ್ಲೆಂ. "ಮ್ಹಜ್ಯಾ ವಯ್ಲ್ಯಾ ಹಗ್ಯಾನ್ ತುಂ ಆಶೆಂ ಕರ್ತಾಯ್ ಜಾಲ್ಯಾರ್ ಆನಿ ಮ್ಹಜ್ಯೆ ಥಾವ್ನ್ ತುಜೆಂ ಜಿವಿತ್ ಪಿಡ್ಡ್ಯಾರ್ ಜಾಲಾಂ ಮ್ಹಣೊನ್ ತುಂ ಚಿಂತಾಯ್ ಜಾಲ್ಯಾರ್ ಐ ಯಾಮ್ ವೆರ್ರಿ ಸಾರ್ರಿ!" ಅಮೀನಾ ಖಾಲ್ತೆಪಣಿ ಆಲಿಯಾಕ್ ಪಳೆವ್ನ್ ರಾವ್ಲೆಂ.
ಥೊಡ್ಯಾ ವೆಳಾಕ್ ಆಲಿಯಾನ್ ಅಮೀನಾಕ್ಚ್ ಪಳೆಲೆಂ. ಆಲಿಯಾಚಾ ತ್ಯಾ ದಿಶ್ಟೆಕ್ ಆಪ್ಲಿ ದೀಶ್ಟ್ ಜೊಕುಂಕ್ ಅಮೀನಾಕ್ ಸಾದ್ಯ್ ಜಾಲೆಂ ನಾ. ತಾಣೆಂ ಆಪ್ಲಿ ದೀಶ್ಟ್ ನಾಸಿರಾ ತೆವ್ಶಿಂ ಘುಂವ್ಡಾಯ್ಲಿ.
"ಮ್ಹಾಕಾ ಜರ್ ತುಜ್ಯೆರ್ ಹಗೆಂ ತಿರ್ಸುಂಕ್ ಜಾಯ್ ಜಾಲ್ಲೆಂ ಜಾಲ್ಯಾರ್ ಆಜ್ಚ್ ಹಾಂವ್ ಪರ್ತ್ಯಾಕ್ ನಾಸಿರಾಚಾ ಜಿವಿತಾಂತ್ ಯೇಂವ್ಕ್ ಸಕ್ತಾಂ! ಹಾವೆಂ ಆಶೆಲ್ಲೆಂಯ್ ಹೆಂಚ್! ಪುಣ್ ಇತ್ಲ್ಯಾರ್ಚ್ ಜಿವಿತ್ ಸಂಪಂವ್ಕ್ ಹಾಂವ್ ಆಶೆನಾ. ಮ್ಹಜೆಂ ಮಿಸಾಂವ್ ಇತ್ಲ್ಯಾರ್ಚ್ ಕಾಬಾರ್ ಜಾಯ್ನಾ. ಮ್ಹಜ್ಯಾ ಚಲಿಯೆಪಣಾಚಾ ವಯ್ರ್ ಮಾಂಡ್ಲ್ಲೆಂ ಝುಜ್ ಹಾಂವೆ ಝುಜೊಂಕ್ ಆಸಾ. ತುಮ್ಚೆಂ ಜಿವಿತ್ ತುಮ್ಕಾಂ ಮುಬಾರಕ್! ತುಮ್ಕಾಂ ಕಿತೆಂ ಬರೆಂ ದಿಸ್ತಾ ತೆಂ ತುಮಿಂ ಕರ್ಯಾ. ಕಿತ್ಯಾಕ್, ಹೆಂ ತುಮ್ಚೆಂ ಜಿವಿತ್! ಮ್ಹಾಕಾ ಆನಿ ತುಮ್ಕಾಂ ಆತಾಂ ಕಾಂಯ್ಚ್ ಸಂಭಂಧ್ ನಾ!" ಆಲಿಯಾಚಾ ಉತ್ರಾಂನಿ ನಾಸಿರಾಕ್ ಆನಿ ಅಮೀನಾಕ್ ಕಾಂಯ್ಚ್ ಮೊವಾಳಾಯ್ ಝಳ್ಕಾಲಿ ನಾ.
"ತರ್, ತುಂ ಆಮ್ಚೆಂ ಸತ್ತ್ಯಾನಾಸ್ ಕರುಂಕ್ಚ್ ಆಶೆತಾಯ್....?" ನಾಸಿರಾನ್ ನಿಮಾಣೆಂ ಧಯ್ರ್ ಘೆತ್ಲೆಂ.
"ಹೆಂ ಹಾಂವ್ ನ್ಹಯ್.... ತುಂಚ್ ಸಾಂಗ್ತಾಯ್!" ಆಲಿಯಾಚಿಂ ತಿಂಚ್ ಧಾರುಣ್ ಉತ್ರಾಂ.
****************
ಮಿಶೇಲ್!
ಸದಾಂಚ್ ಸಂತೊಸಾನ್ ಆಸ್ಚೆಂ ಮಿಶೇಲ್ ಆಜ್ ಕಿತ್ಯಾಕ್ಗೀ ಕಸಲ್ಯಾಗೀ ಕಳ್ವಳ್ಯಾಂನಿ ಭರ್ಲಾಂ ಮ್ಹಣೊನ್ ರಾಯನಾಕ್ ಕಳ್ಲ್ಲೆಂಚ್ ಧನ್ಪರಾಂ. ಧನ್ಫರಾಚಾ ಜೆವ್ಣಾಕ್ ರಾಯನಾನ್ ಆಲಿಯಾಕ್ ಆಪ್ಲ್ಯಾ ಘರಾ ಆಪವ್ನ್ ಹಾಡ್ಲ್ಲೆಂ. ರಾಯನ್ ಆಫೀಸಾ ಥಾವ್ನ್ ಘರಾ ಪರ್ತೊಂಚಾ ವಗ್ತಾರ್ ಸದಾಂ ಮಿಶೇಲ್ ತಾಕಾ ಆಪ್ಲ್ಯಾ ಘರಾಚ್ಯಾ ದಾರಾರ್ ಸ್ವಾಗತ್ ದಿಂವ್ಚೆಂ ತೆಂ ಆಜ್ ರಾಯನಾನ್ ಅಲಿಯಾಕ್ ಆಪ್ಲ್ಯಾ ಘರಾ ಆಪವ್ನ್ ಹಾಡ್ಲ್ಲ್ಯಾ ವಗ್ತಾರ್ ಆಪ್ಲ್ಯಾ ಘರಾಚ್ಯಾ ದಾರಾರ್ ಉಭೆಂ ನಾತ್ಲ್ಲೆಂ. ಹಾಂಗಾಚ್ಚ್ ರಾಯನಾಕ್ ಮಿಶೇಲಾ ವರ್ಯ್ ದುಬಾವ್ ಉದೆಲ್ಲೊ. ಪುಣ್ ರಾಯನಾಚಾ ಹ್ಯಾ ದುಬಾವಾಕ್ ಮಿಶೇಲಾನ್ ಸತ್ ಕರುನ್ ದಾಖಂವ್ಚೆಂ ಪ್ರಯತ್ನ್ ಕೆಲ್ಲೆಂ ನಾ.
ಮಿಶೆಲಾನ್ ಆಲಿಯಾಕ್ ಬರೊಚ್ ಸತ್ಕಾರ್ ಕೆಲ್ಲೊ. ತಾಚ್ಯೆಲಾಗಿಂ ಮಿಶೆಲ್ ಸದಾಂಚಾ ಪರಿಂಚ್ ಆಪ್ಲ್ಯಾ ಹಾಸ್ತ್ಯಾ ಮುಖಮಳಾನ್ಚ್ ಉಲಯಿಲ್ಲೆಂ. ಆಶೆಂಚ್ ವೇಳ್ ಮೆಳ್ತಾಂ ಮೆಳ್ತಾಂ ಆಲಿಯಾಕ್ ಯೆವ್ನ್ ವಚೊಂಕ್ ಮಿಶೆಲಾನ್ಚ್ ಆಪವ್ಣೆಂ ದಿಲ್ಲೆಂ. ಮಿಶೇಲಾಚಾ ಹ್ಯಾ ವರ್ತನಾನ್ ರಾಯನಾಚಾ ಮತಿಂತ್ ಉದೆಲ್ಲ್ಯಾ ದುಬಾವಾಕ್ ಕಾಡುನ್ ಉಡಯ್ಲೆಂ ನಾ. ಆಪ್ಲ್ಯಾ ಬಾಯ್ಲೆಚ್ಯಾ ಸ್ವಾಭಾವಿಕ್ ಚಾಲ್ ಚಮ್ಕಾಣೆಕ್ ತೊ ಜಾಣಾಂ. ಹ್ಯಾ ಸ್ವಾಬಾವೀಕ್ ಪಣಾಂತ್ ಆಜ್ ಖಂಯ್ ತರ್ಯ್ ಉಣೆಂಪಣ್ ಆಸಾ ತೆಂ ರಾಯನಾಕ್ ಸಮ್ಜಾಲ್ಲೆಂ. ಹೆಂ ಉಣೆಂಪಣ್ ಖಂಯ್ ಆನಿ ಕಶೆಂ ಮ್ಹಳ್ಳೆಂ ತಾಚ್ಯಾ ಮತಿಕ್ ಗೆಲೆಂಚ್ ನಾ.
ಆಲಿಯಾ ಆಪ್ಲ್ಯಾ ಘರಾ ಭಿತರ್ ಆಸ್ತಾನಾ ಮಿಶೇಲಾ ಲಾಗಿಂ ಹಾ ವಿಶಯಾಂತ್ ಕಾಂಯ್ ಉಲಂವ್ಚ್ಯಾ ಪರಿಂ ನಾ. ಸಾಂಜ್ ಜಾತಾನಾ ಆಲಿಯಾಕ್ ತಾಚ್ಯಾ ಪ್ಲ್ಯಾಟಾಕ್ ಸೊಡುನ್ ರಾಯನ್ ಪಾಟಿಂ ಘರಾ ಪರ್ತಾತಾನಾ ಮಿಶೇಲ್ ನಿದೆಕ್ ವೆಂಗ್ಲ್ಲೆಂ. ಕೆದ್ನಾಂಯ್ ಮಿಶೇಲ್ ಆಶೆಂ ಆಪ್ಣಾಕ್ ಸೊಡುನ್ ನಿದ್ಲ್ಲೆಂ ನಾ. ತರ್ ಆಜ್! ತೆಂಯ್ ಹ್ಯಾ ಸಾಂಜೆಚ್ಯಾ ವೆಳಾರ್......? ಆಜ್ ಕಿತ್ಯಾಕ್ ಆಶೆಂ? ಮಿಶೇಲ್ ಖಂಡಿತ್ ಜಾವ್ನ್ ಕಾಂಯ್ ತರ್ಯ್ ಮತಿಂತ್ ಘೆವ್ನ್ ಬಸ್ಲಾಂ! ರಾಯನಾಚಾ ಮತಿನ್ ರಾಯನಾಕ್ ಜಾಗಯ್ಲೆಂ. ಪುಣ್ ಕಿತೆಂ.....? ಮಿಶೇಲ್ ಕಿತೆಂ ಮತಿಂತ್ ಘೆವ್ನ್ ನಿದ್ಲಾಂ.....? ರಾಯನ್ ಆಪ್ಲ್ಯಾ ಬಾಯ್ಲೆಚಾ ಚಿಂತ್ನಾಂನಿ ವಿರಾರ್ ಜಾಲೊ. ತಾಕಾ ಮಿಶೇಲಾ ಲಾಗಿಂ ಉಲಯ್ತಾಂ ಮ್ಹಣಾಸರ್ ಮತಿಕ್ ಸಮಾಧಾನ್ ನಾತ್ಲ್ಲೆಂ.
ಮತಿಕ್ ನಾತ್ಲ್ಲ್ಯಾ ಸಮಾಧಾನೆನ್ ರಾಯನಾಕ್ ವಿಶೆವ್ ಘೆಂವ್ಕ್ ಜಾಲೆಂ ನಾ. ತಾಚ್ಯಾ ಮತಿಂತ್ ಕಸಲಿಂ ಕಸಲಿಂ ಚಿಂತ್ನಾ ಉಟೊನ್ ಯೇಂವ್ಕ್ ಲಾಗ್ಲಿಂ. ಎಕಾ ಕುಶಿನ್ ತಾಕಾ ತಾಚೊ ಬಾಪಯ್ ದಿಸೊನ್ ಆಯ್ಲೊ ಜಾಲ್ಯಾರ್ ದುಸ್ರ್ಯಾ ಕುಶಿನ್ ತಾಚ್ಯಾ ಆವಯ್ಚೆಂ ಪ್ರತಿರೂಪ್ ಉದೆವ್ನ್ ರಾವ್ಲೆಂ.
ನಿದ್ಲೆಲ್ಯಾ ಮಿಶೆಲಾಕ್ ಉಟಂವ್ಕ್ ರಾಯನಾಕ್ ಮನ್ ಜಾಲೆಂ ನಾ. ಪುಣ್ ಮಿಶೇಲಾಕ್ ಎಕ್ಸುರೆಂ ಆಪ್ಲ್ಯಾ ಖಾಟಿಯೆರ್ ಸೊಡುನ್ ವಚೊಂಕ್ಯ್ ತಾಚಿ ಮತ್ ಕಬೂಲ್ ಜಾಲಿ ನಾ.
ಖಾಟಿಯೆರ್ ಮುರ್ಗೊಟೊನ್ ನಿದ್ಲೆಲ್ಯಾ ಮಿಶೇಲಾಚಾ ಕುಡಿಕ್ ಕಾಂಬೊಳ್ ವೊಡುನ್ ರಾಯನ್ ತಸೊಚ್ಚ್ ಥೊಡೊ ವೇಳ್ ಆಪ್ಲ್ಯಾ ಬಾಯ್ಲೆ ಲಾಗಿಂ ಖಾಟಿಯೆರ್ ಬಸ್ಲೊ. ಖಾಟಿಯೆರ್ ಬಸ್ಲೆಲ್ಯಾ ರಾಯನಾಚಿ ದೀಶ್ಟ್ ತಾಚ್ಯಾ ನಿದ್ಚ್ಯಾ ಕುಡಾಂತ್ ಹೆವ್ಶಿಂ ತೆವ್ಶಿಂ ಧಾಂವ್ತಾನಾ ಮಿಶೇಲಾಚಾ ವಾರ್ಡ್ರೋಬಾಚೆಂ ದಾರ್ ಥೊಡೆಂ ಉಗ್ತೆಂ ಆಸ್ಲ್ಲ್ಯಾ ಪರಿಂ ದಿಸ್ಲೆಂ. ಕಿತೆಂಗೀ ಚಿಂತ್ಲ್ಲೊ ರಾಯನ್ ಖಾಟಿಯೆ ವಯ್ಲೊ ಉಟೊನ್ ಹೆಂವ್ಶಿ ಆಯಿಲ್ಲೊ ಮಿಶೇಲಾಚಾ ವಾರ್ಡ್ರೋಬಾ ಲಾಗಿಂ ಯೇವ್ನ್ ತಾಣೆಂ ತ್ಯಾ ವಾರ್ಡ್ರೋಬಾಕ್ ಉಗ್ತೊ ಕೆಲೊ.
ಸದಾಂಚಾ ಪರಿಂ ವಾರ್ಡ್ರೋಬಾ ಭಿತರ್ ಮಿಶೆಲಾಚೆಂ ವಸ್ತುರ್ ಸೊಭಿತ್ ರಿತಿನ್ ಮಾಂಡುನ್ ದವರ್ಲ್ಲೆಂ. ಪುಣ್ ತ್ಯಾ ವಸ್ತುರಾ ಮಧೆಂ ರಾಯನಾಕ್ ಏಕ್ ವಸ್ತ್ ಮಾತ್ರ್ ಝಳ್ಕಾಲಿ.
ಮಿಶೇಲಾಚೆಂ ಪಿಂತುರ್!
ಹೆಂ ಪಿಂತುರ್ ಸದಾಂ ಮಿಶೇಲಾಚಾ ತ್ಯಾ ಆಲ್ಬಮಾ ಸಾಂಗಾತಾ ವಾರ್ಡ್ರೋಬಾಚಾ ತ್ಯಾ ಸಕಯ್ಲ್ಯಾ ಡ್ರಾವರಾಂತ್ ಆಸ್ತಾಲೆಂ. ಆಜ್ ಹೆಂ ವಯ್ರ್ ಹಾಂಗಾ ಕಶೆಂ ಆಯ್ಲೆಂ?
ರಾಯನಾನ್ ತ್ಯಾ ಪಿಂತುರಾಕ್ ಆಪ್ಲ್ಯಾ ಹಾತಿಂತ್ ಘೆತ್ಲೆಂ. ಜಿಮ್ಮಿನ್ ಮಿಶೇಲಾಕ್ ತಾಚ್ಯಾ ಕಾಜಾರಾ ಬಾಬ್ತಿನ್ ದಿಲ್ಲೆಂ ಗಿಪ್ಟ್ ತೆಂ! ಮಿಶೇಲಾನ್ ಹ್ಯಾ ಪಯ್ಲೆಂ ತ್ಯಾ ಗಿಫ್ಟಾಕ್ ರಾಯನಾ ಫುಡ್ಯಾನ್ ಉಗ್ತೆಂ ಕೆಲಾಂ. ಪುಣ್ ಆಜ್ ಮಿಶೆಲಾನ್ ಹೆಂ ಕಿತ್ಯಾಕ್ ಭಾಯ್ರ್ ಕಾಡ್ಲಾಂ. ಮತಿಂತ್ಲ್ಯಾ ಸವಾಲಾಕ್ ಜವಾಬ್ ಮೆಳಾನಾಸ್ತಾನಾ ವೆತಾನಾ ರಾಯನಾನ್ ಥೊಡ್ಯಾ ಘಡಿಯಾಂಕ್ ತ್ಯಾ ಪಿಂತುರಾಕ್ಚ್ ಪಳೆಲೆಂ. ತಾಚ್ಯಾ ಮತಿಕ್ ಕಾಂಯ್ ಸಮ್ಜಾಲೆಂ ನಾ. ತಶೆಂಚ್ ತೆಂ ಪಿಂತುರ್ ಪರ್ತ್ಯಾಕ್ ಮಿಶೆಲಾಚಾ ವಾರ್ಡ್ರೋಬಾ ಭಿತರ್ ದವರುನ್ ತಾಚೆಂ ದಾರ್ ಭಂಧ್ ಕೆಲ್ಲೊ ರಾಯನ್ ನಿದ್ಚ್ಯಾ ಕುಡಾ ಥಾವ್ನ್ ಭಾಯ್ರ್ ಆಯ್ಲೊ.
ನಿದ್ಚ್ಯಾ ಕುಡಾ ಥಾವ್ನ್ ಭಾಯ್ರ್ ಆಯಿಲ್ಲೊ ತೊ ತಿಂ ಮೆಟಾಂ ದೆಂವೊನ್ ಸಾಲಾಕ್ ಆಯ್ಲೊ. ಸಾಲಾಂತ್ಲ್ಯಾ ಸೊಫಾಚೆರ್ ಬಸ್ಲ್ಲ್ಯಾ ರಾಯನಾನ್ ಶಮ್ಮಿಕ್ ಕಾಫಿಯೆಕ್ ಆರ್ಡರ್ ಕೆಲೆಂ. ತಶೆಂಚ್ ರಾಯನಾನ್ ಸೊಫಾ ವಯ್ಲೊ ಟಿ.ವಿ. ಚೊ ರಿಮೋಟ್ ಕಂಟ್ರೋಲ್ ಹಾತಿಂ ಘೆವ್ನ್ ತಿ ಟಿ.ವಿ. ಚಾಲು ಕೆಲಿ. ಆಪ್ಲೆಸ್ತಕಿಂ ಟಿ.ವಿ. ಚಿಂ ಚ್ಯಾನಲಾಂ ವಯ್ರ್ ಸಕಯ್ಲ್ ಧಾಂವ್ದಾಂವ್ಚ್ಯಾ ರಾಯನಾಕ್ ’ಸ್ಟಾರ್ ಮೂವಿಸ್’ ಚ್ಯಾನೆಲಾರ್ ’ಸ್ಟಿಗ್ಮಾಟಾ’ ಫಿಲ್ಮ್ ಚಾಲು ಆಸ್ಲ್ಲೆಂ ಕಳ್ತಾನಾ ತೊ ತಶೆಂಚ್ ತ್ಯಾ ಫಿಲ್ಮಾಕ್ ಪಳವ್ನ್ ಬಸ್ಲೊ.
ಶಮ್ಮಿನ್ ಕಾಫಿ ಕರುನ್ ಹಾಡುನ್ ದಿಲಿ. ಕಾಫಿ ತೊಂಡಾಕ್ ತೆಂಕ್ತಾಂ ತೆಂಕ್ತಾಂ ರಾಯನ್ ವ್ಹಳೂ ತ್ಯಾ ಫಿಲ್ಮಾಚಾ ಸಂಸಾರಾಂತ್ ಘುಸ್ಪಾಲೊ.
ಥೊಡೆಂ ಫಿಲ್ಮ್ ಎದೊಳ್ಚ್ ಜಾವ್ನ್ ಗೆಲ್ಲೆಂ.
ಫಿಲ್ಮ್ ಆಖೇರ್ ಜಾತಾನಾ ಮುಕ್ಲ್ಯಾ ವೊಣೊದಿ ವಯ್ಲೆಂ ಗಡಿಯಾಳ್ ವೊರಾಂ ಸ ದಾಕಯ್ತಾಲೆಂ.
ಮಿಶೇಲ್ ಅಜೂನ್ ನಿದೆಂತ್ ಆಸಾ?
ಮಿಶೇಲಾಕ್ ಉಟಯ್ತಾಂ ಮ್ಹಣೊನ್ ಮತಿಂತ್ ಚಿಂತುನ್ ಸೊಫಾ ವಯ್ಲೊ ಉಟ್ಲ್ಲೊ ರಾಯನ್ ಆಪ್ಲ್ಯಾ ನಿದ್ಚ್ಯಾ ಕುಡಾಕ್ ವೆಚ್ಯಾಕ್ ಪಾಟಿಂ ಘುಂವ್ಲೊ.
ತಿತ್ಲೆಂಚ್!
ರಾಯನ್ ರಾವ್ಲ್ಲ್ಯ್ ಕಡೆಚ್ಚ್ ಸ್ತಬ್ದ್ ಜಾಲೊ!
ತಾಚ್ಯಾ ದೊಳ್ಯಾಂ ಮುಕಾರ್ ತ್ಯಾ ವಯ್ಲ್ಯಾ ನಿದ್ಚ್ಯಾ ಕುಡಾಕ್ ವೆಚ್ಯಾ ಮೆಟಾಂಚೆರ್ ಮಿಶೇಲ್ ಉಭೆಂ ಆಸ್ಲ್ಲೆಂ!
ರಾಯನಾಕ್ಚ್ ಪಳವ್ನ್ ರಾವ್ಲೆಲ್ಯಾ ಮಿಶೇಲಾಚೊ ಭರ್ತಾವ್ ರಾಯನಾಕ್ ಬರೊ ಲಾಗ್ಲೊ ನಾ. ಹ್ಯಾ ವೆಳಾರ್ ಮಿಶೆಲಾಚಾ ಮುಖಮಳಾಚೊ ಪರ್ಜಳ್ಚ್ ದುಸ್ರೊ ಮ್ಹಳ್ಳ್ಯಾ ಪರಿಂ ದಿಸ್ಲೊ. ತೊ ಆತಾಂ ಮಿಶೇಲಾ ತೆವ್ಶಿಂ ಚಲೊಂಕ್ ಲಾಗ್ಲೊ.
ಮೆಟಾಂ ಚಡೊನ್ ರಾಯನ್ ಮಿಶೇಲಾ ಲಾಗಿಂ ಆಯ್ಲೊ. ಮಿಶೇಲಾನ್ ಕಾಂಯ್ಚ್ ಆವಾಜ್ ಕೆಲೊ ನಾ.
"ಕಿತೆಂ ಮಿಶೇಲ್? ತುಜಿ ಭಲಾಯ್ಕಿ ಬರಿ ನಾ?" ಮಿಶೇಲ್ ರಾವ್ಲೆಲ್ಯಾ ಕಡೆಚ್ ರೂಕ್ ಜಾಲ್ಲೆಂ. ತಾಚ್ಯಾ ಬಾವ್ಳ್ಯಾಂಕ್ ರಾಯನಾನ್ ಆಪ್ಲ್ಯಾ ಹಾತಾಂನಿ ಧರ್ಲೆಂ.
ಮಿಶೇಲಾನ್ ರಾಯನಾಕ್ ಪಳಂವ್ಚೆಂಯ್ ಪ್ರಯತ್ನ್ ಕೆಲೆಂ ನಾ. ತೆಂ ತಶೆಂಚ್ ಅನಂತಾಂತ್ ಶೂನ್ಯತಾಕ್ ಸೊಧ್ತಾಲೆಂ.
ಮಿಶೇಲಾಚಾ ಮೌನ್ ಪಣಾ ಥಾವ್ನ್ ರಾಯನಾಚಿ ಮತ್ ವಿರಾರ್ ಜಾಲಿ.
"ಚಲ್.....! ಯೇ ಭಿತರ್ ಯೇ!" ರಾಯನಾನ್ ಮಿಶೆಲಾಚಾ ಬಾವ್ಳ್ಯಾಂಕ್ ಸೊಡುನ್ ತಾಚ್ಯಾ ಹಾತಾಕ್ ಧರ್ಲೆಂ. ತಶೆಂಚ್ ಮಿಶೇಲಾಚಾ ಹಾತಾಕ್ ಧರುನ್ ತಾಣೆಂ ತಾಕಾ ಪರ್ತ್ಯಾಕ್ ಆಪ್ಲ್ಯಾ ನಿದ್ಚ್ಯಾ ಕುಡಾ ಭಿತರ್ ಆಪವ್ನ್ ಹಾಡ್ಲೆಂ. ಮಿಶೇಲ್ ಯಾಂತ್ರಿಕ್ ರಿತಿನ್ ಮ್ಹಳ್ಳ್ಯಾ ಪರಿಂ ರಾಯನಾಚಾ ಪಾಟ್ಲ್ಯಾನ್ ಮೆಟಾಂ ಕಾಡ್ತಾಲೆಂ.
ಬೆಡ್ರೂಮಾಕ್ ಆಯಿಲ್ಲ್ಯಾ ರಾಯನಾನ್ ಬೆಡ್ರೂಮಾಚೆಂ ದಾರ್ ದಾಂಪ್ಲೆಂ. ದಾರ್ ದಾಂಪುನ್ ಮುಕಾರ್ ಪಳೆಲ್ಲ್ಯಾ ರಾಯನಾಚಿ ದೀಶ್ಟ್ ತಾಚ್ಯಾ ಖಾಟಿಯೆರ್ ಗೆಲಿ. ತ್ಯಾ ಖಾಟಿಯೆರ್ ಪಡೊನ್ ಆಸ್ಲ್ಲ್ಯಾ ವಸ್ತುಂಕ್ ಪಳೆವ್ನ್ ತೊ ಶೆರ್ಮೆಲೊ.
"ತುಂ ಕೆದಾಳಾ ಉಟ್ಲೆಂಯ್?" ಆಶ್ಚರ್ಯಾನ್ ರಾಯನಾನ್ ಮಿಶೆಲಾಕ್ ಪಳೆಲೆಂ. "ತುಂ ನಿದ್ಲಾಂಯ್ ತೆಂ ಚಿಂತುನ್ ಹಾಂವ್ ಟಿ.ವಿ. ಪಳವ್ನ್ ಬಸ್ಲೊಂ. ಐ ಯಾಮ್ ಸಾರ್ರಿ! ತುಂ ನಿದೊಂಕ್ ನಾತ್ಲ್ಲೆಂಯ್.....?" ರಾಯನಾನ್ ದುಬಾವಾನ್ ಮಿಶೇಲಾಕ್ ಪಳೆಲೆಂ.
"ಹಾಂಗಾ ಕಿತೆಂ ಜಾತಾ ರಾಯನ್?" ಮಿಶೇಲ್ ಶಾಂತ್ ಆಸ್ಲ್ಲೆಂ. ತಾಕಾ ರಾಯನಾಚಾ ಸವಾಲಾಚಿ ಪರ್ವಾ ನಾತ್ಲ್ಲಿ.
"ಖಂಯ್.....? ಕಿತೆಂ ಜಾಲಾಂ......?" ಮಿಶೇಲಾಚಾ ಭರ್ತಾವಾಕ್ ಸಮ್ಜೊಂಕ್ ರಾಯನಾಕ್ ಕಶ್ಟ್ ಮಾರ್ಲೆ. ತೊ ತಸೊಚ್ ತಾಚ್ಯಾ ಖಾಟಿಯೆಲಾಗಿಂ ಆಯ್ಲೊ.
ಖಾಟಿಯೆರ್ ಥಂಯ್ ಹಾಂಗಾ ಮಿಶೆಲಾಚೊ ತ್ಯೊ ಖಾಸ್ ವಸ್ತು ಶಿಂಪಡ್ಲೆಲ್ಯೊ ಆಸ್ಲ್ಲ್ಯೊ. ತಾಂಚೆ ಸಾಂಗಾತಾ ತೆಂ ತಾಚೆಂ ಪಿಂತುರ್ ತ್ಯಾ ಖಾಟಿಯೆರ್ ಉದಾರೆಂ ವಿಶೆವ್ ಘೆತಾಲೆಂ.
ಮಿಶೇಲಾನ್ ಆಜ್ ಪರ್ತ್ಯಾಕ್ ಹ್ಯಾ ತಾಚ್ಯಾ ಫೋಟೊ ಆಲ್ಬಮಾಕ್ ಉಸ್ತಿಲಾಂ?
ಮಿಶೇಲ್ ತೆದ್ನಾಂಚ್ ಹ್ಯಾ ಆಲ್ಬಮಾಕ್ ಉಸ್ತಿತಾ ಜೆದ್ನಾಂ ತೆಂ ಆಪ್ಣಾಕ್ಚ್ ಸೊಧ್ತಾ!
ಮಿಶೇಲಾನ್ ಆಜ್ ಆಪ್ಣಾಕ್ಚ್ ಪರ್ತ್ಯಾಕ್ ಸೊಧ್ಲಾಂ? ಹ್ಯಾ ತಸ್ವೀರೆ ಮಧೆಂ....? ಕಿತ್ಯಾಕ್.....?
ಕಾಂಯ್ ತರ್ಯ್ ಜಾಲಾಂ! ನಾಂ ಜಾಲ್ಯಾರ್......!
ರಾಯನಾನ್ ಖಾಟಿಯೆ ವಯ್ಲ್ಯಾ ಶಿಂಪಡ್ಲೆಲ್ಯಾ ಮಿಶೇಲಾಚಾ ತ್ಯಾ ತಸ್ವೀರೆಂಕ್ ದೆಗೆನ್ ವೊಂದಾಯ್ಲೆಂ.
"ಮಿಶೇಲ್! ತುಂ ಹಾಂಗಾ ಬಸ್!" ರಾಯನಾನ್ ಮಿಶೇಲಾಕ್ ಖಾಟಿಯೆರ್ ಬಸಯ್ಲೆಂ.
"ಕಿತೆಂ ಜಾಲೆಂ ಮಿಶೇಲ್?" ರಾಯನಾನ್ ಮಿಶೇಲಾಚಾ ದೊಳ್ಯಾಂಕ್ಚ್ ಪಳೆಲೆಂ. "ಹಾಂವ್ ಧನ್ಫಾರಾಂ ಥಾವ್ನ್ ತುಕಾ ಪಳೆತಾಂ. ತುಂ ಆಜ್ ಸಾರ್ಕೆಂ ನಾಂಯ್! ಕಿತ್ಯಾಕ್? ಕಿತೆಂ ಜಾಲೆಂ.....? ಮ್ಹಜ್ಯೆ ಥಾವ್ನ್ ಕಾಂಯ್ ಚೂಕ್ ಜಾಲ್ಯಾ....?"
ರಾಯನಾಚ್ಯಾ ತಾಳ್ಯಾಂತ್ ವಿನತಿ ಆಸ್ಲ್ಲಿ. ಪುಣ್ ಮಿಶೇಲ್ ಹಾಚ್ಯಾ ಭಾಯ್ರ್ ಆಪ್ಲ್ಯಾಚ್ ಸಂಸಾರಾಂತ್ ಆಸ್ಲ್ಲೆಂ.
"ಪ್ಲೀಸ್ ಮಿಶೇಲ್! ತುಂ ಉಲಯ್. ತುಜೆಂ ಹೆಂ ಮೌನ್ ಮ್ಹಾಕಾ ಪಳಂವ್ಕ್ ಜಾಯ್ನಾಂ! ಪಯ್ಲೆಂಚ್ ಮ್ಹಜಿ ಮತ್ ವಿರಾರ್ ಜಾಲ್ಯಾ! ಕಿತೆಂ ಜಾಲೆಂ? ಕಾಂಯ್ ಆಬಾನ್ ಪೋನ್ ಕೆಲ್ಲೆಂ?" ರಾಯನಾಚಾ ತಾಳ್ಯಾಂತ್ ಖಾಲ್ತೆಂ ಪಣ್ ಉಮಾಳ್ತಾಲೆಂ.
ಮಿಶೇಲಾಚೆಂ ತೆಂಚ್ ಮೌನ್.
"ಆಯ್ಕ್ ಮಿಶೇಲ್!" ರಾಯನಾನ್ ಆಲಿಯಾಚಾ ಹಾತಾಂಕ್ ಧರ್ಲೆಂ. "ತುಂ ಹಾಸೊನ್ ಖೆಳೊನ್ ಆಸ್ಲ್ಯಾರ್ ಮಾತ್ರ್ ಮ್ಹಾಕಾ ಸಂತೊಸ್. ತುಂ ಆಶೆಂ ಕಿತ್ಯಾಕ್ ಕರ್ತಾಯ್?"
ಮಿಶೆಲಾಚಾ ವರ್ತಾನಾಂತ್ ರಾಯನಾಕ್ ಕಾಂಯ್ ಬದ್ಲಾವಣ್ ದಿಸ್ಲಿ ನಾ.
"ಹಾವೆಂ ಆಲಿಯಾಕ್ ಆಪವ್ನ್ ಹಾಡ್ಲೆಂ ಮ್ಹಣೊನ್ ತುಕಾ ಬೆಜಾರ್ ಜಾಲೆಂ?" ರಾಯನಾನ್ ಮಿಶೆಲಾಚಾ ಹಾತಾಂಕ್ ಧರುನ್ ಹಾಲಯ್ಲೆಂ.
"ತುಕಾ ಜರ್ ತೆಂ ಪಸಂದ್ ನಾ ಜಾಲ್ಯಾರ್ ಹಾಮ್ವ್ ತಾಕಾ ಹ್ಯಾ ಉಪ್ರಾಂತ್ ಆಪವ್ನ್ ಹಾಡಿನಾ ಡಾರ್ಲಿಂಗ್. ಪ್ಲೀಸ್ ಟಾಕ್ ಟು ಮಿ!" ರಾಯನಾಚಾ ತಾಳ್ಯಾಂತ್ ತಗ್ಸಣಿ.
"............"
ಕಾಂಯ್ ಫಾಯ್ದೊ ನಾ. ಮಿಶೇಲಾನ್ ಅಪ್ಲೆ ತೋಂಡ್ ಉಗಡ್ಲೆಂ ನಾ.
"ಮಿಶೇಲ್....?" ರಾಯನ್ ಖಾಟಿಯೆರ್ ಥಾವ್ನ್ ಉಟ್ಲೊ.
"ಮಿಶೇಲ್.....?" ಆಪ್ಲ್ಯಾ ಹಾತಾಂನಿ ಮಿಶೆಲಾಚಾ ತೊಂಡಾಕ್ ಧರುನ್ ತ್ಯಾ ತಾಚ್ಯಾ ಮುಖಮಳಾಕ್ ರಾಯನಾನ್ ವ್ಹಳೂ ವಯ್ರ್ ಆಪ್ಣಾ ತೆವ್ಶಿಂ ಉಕೊಲ್ಲೆಂ.
"ಮಿಶೇಲ್ ಲಿಸನ್ ಟು ಮಿ!" ಮಿಶೇಲಾಚಾ ಪೊಲ್ಯಾಂಕ್ ಧರುನ್ ತಾಣೆಂ ಹಾಲಯ್ಲೆಂ.
ಮಿಶೆಲಾಚೆಂ ತೆಂಚ್ ಮೌನ್.
"ಮಿಶೇಲ್......?" ರಾಯನ್ ಮಿಶೇಲಾಚಾ ಮುಕಾರ್ ಧರ್ಣಿರ್ ಬಸ್ಲೊ.
"ತುಂ ಕಿತ್ಯಾಕ್ ಉಲಯ್ನಾಂಯ್ ಡಾರ್ಲಿಂಗ್?" ರಾಯನಾಚೊ ತಾಳೊ ರಡ್ಕುರೊ ಜಾಲೊ.
"ಡಾರ್ಲಿಂಗ್.....?" ಮಿಶೆಲಾಚಾ ಜಾಂಗ್ಯಾಂಕ್ ಧರುನ್ ರಾಯನಾನ್ ಹಾಲಯ್ಲೆಂ.
ಮಿಶೇಲ್ ಆತಾಂ ಫಕತ್ತ್ ರಾಯನಾಕ್ ಪಳಂವ್ಕ್ ಲಾಗ್ಲೆಂ.
"ತುಕಾ ಕಿತೆಂ ಜಾಲಾಂ ಮಿಶೇಲ್....?" ಮಿಶೆಲಾಚಾ ಹಾತಾ ತಾಳುವೆಕ್ ರಾಯನ್ ಪೊಶೆಂವ್ಕ್ ಲಾಗ್ಲೊ.
"ಲಿಸನ್ ಟು ಮಿ ಡಾರ್ಲಿಂಗ್!" ಮಿಶೇಲಾಚಾ ಹಾತಾಂಕ್ ಹೆವ್ಶಿಂ ವೊಡುನ್ ತ್ಯಾ ತಾಚ್ಯಾ ಹಾತಾಂಕ್ ರಾಯನಾನ್ ಆಪ್ಣಾಚಾ ಗಾಲಾಂಕ್ ದಾಂಬುನ್ ಧರ್ಲೆಂ. ತಶೆಂಚ್ ತ್ಯಾ ಹಾತಾಂನಿ ಆಪ್ಲ್ಯಾಚ್ ಗಾಲಾಂಚೆರ್ ರಾಯನಾನ್ ಮಾರ್ಲೆಂ. ಮಿಶೆಲ್ ರಾಯನಾಕ್ ಥೊಡೆಂ ಮುಕಾರ್ ಬಾಗ್ವಾಲೆಂ ಜಾಲ್ಯಾರ್ಯ್ ತಾಚ್ಯೆ ಥಾವ್ನ್ ಕಾಂಯ್ಚ್ ಪ್ರತಿಕ್ರಿಯಾ ಆಯ್ಲಿ ನಾ.
ರಾಯನ್ ಆತಾಂ ದಿಂಬಿಯೆರ್ ಪಡ್ಲೊ.
"ಐ ಲವ್ ಯು ಡಾರ್ಲಿಂಗ್! ಪ್ಲೀಸ್ ಟಾಕ್ ಟು ಮಿ!" ರಾಯನಾನ್ ಆಲಿಯಾಚಾ ಹಾತಾ ತಾಳುವೆಂಕ್ ಉಮೆ ಚರಯ್ಲೆ.
"ಡಾರ್ಲಿಂಗ್!" ಮಿಶೆಲಾಚಾ ಬಾವ್ಳ್ಯಾಂಕ್ ಧರುನ್ ಹಾಲಯ್ಲೆಂ.
ತ್ಯಾಚ್ ಮೌನತಾಂತ್ ತೆಂ ಸಗ್ಳೆಂಚ್ ಹಾಲ್ಲೆಂ ಜಾಲ್ಯಾರ್ಯ್ ಮಿಶೇಲಾನ್ ತೋಂಡ್ ಉಗ್ತೆಂ ಕೆಲೆಂ ನಾ.
"ಉಲಯ್ ಮಿಶೇಲ್! ಜಸ್ಟ್ ಟಾಕ್ ಟು ಮಿ!" ರಾಯನ್ ಲ್ಹಾನ್ ಭುರ್ಗ್ಯಾ ಪರಿಂ ರಡೊನ್ ಹುಳ್ವುಳೊಂಕ್ ಲಾಗ್ಲೊ.
"ಸ್ವೀಟ್ ಹಾರ್ಟ್!" ಮಿಶೆಲಾಚಾ ಹಾಂತಾಂಕ್ ಧರುನ್ ತೊ ಉಡ್ಡಾಲೊ.
"ಪ್ಲೀಸ್ ಟಾಕ್ ಟು ಮಿ! ಮಿಶೇಲ್.....?" ರಾಯನಾಕ್ ಕಿತೆಂ ಕರ್ಚೆಂ ತೆಂ ಸಮ್ಜಾಲೆಂ ನಾ. ತಾಚ್ಯಾ ದೊಳ್ಯಾಂನಿ ದುಖಾಂ ದೆಂವೊಂಕ್ ಲಾಗ್ಲಿಂ.
"ತುಂ ಉಲಯ್ನಾಂಯ್ ಜಾಲ್ಯಾರ್ ಹಾಂವ್ ಪಿಸೊ ಜಾಂವ್ಕ್ ಆಸಾಂ ಮಿಶೇಲ್! ಪ್ಲೀಸ್ ಮಿಶೇಲ್!" ಮಿಶೇಲಾಚಾ ದೊಳ್ಯಾಂಕ್ಚ್ ಪಳವ್ನ್ ಹುಳ್ವುಳ್ಳ್ಯಾ ರಾಯನಾಚಾ ದೊಳ್ಯಾಂಕ್ಚ್ ಮಿಶೇಲಾನ್ ಆಪ್ಲಿ ದೀಶ್ಟ್ ಜೊಕ್ಲಿ. ತ್ಯಾ ದೋನ್ ದಿಶ್ಟಿಂ ಮಧೆಂ ಕಸಲಿಂಗೀ ಗೂಂಡ್ ಸೊಧ್ನಾಂ ಚಲ್ಲಿಂ.
ತಿತ್ಲ್ಯಾರ್!
"ತುಜೊ ಡ್ಯಾಡಿ ಅಸೊಚ್ಚ್ ಪಿಸೊ ಜಾಲ್ಲೊ ರಾಯನ್.....?" ಮಿಶೇಲಾನ್ ಆತಾಂ ತೋಂಡ್ ಉಗಡ್ಲೆಂ.
ತಿತ್ಲೆಂಚ್!
ರಾಯನಾಚಾ ದೊಳ್ಯಾಂ ಮುಕಾರ್ ಜಗ್ಲಾಣೆಂ ಧಾಂವ್ಲೆಂ. ಕಾನಾಂಚಾ ಪರ್ದ್ಯಾರ್ ಘಡ್ಗಡೊ ವಾಜ್ಲೊ.
ಮಿಶೇಲಾಚಾ ಮುಕಾರ್ ದಿಂಬಿಯೆರ್ ಆಸೊನ್ ಮಿಶೇಲಾನ್ ಆಪ್ಣಾ ಲಾಗಿಂ ಉಲಂವ್ಚಾ ಪರಿಂ ಪ್ರಯತ್ನ್ ಕರ್ಚೊ ತೊ ತಸೊಚ್ಚ್ ಮಿಶೇಲಾಕ್ ಪಳವ್ನ್ ಆಸ್ಲ್ಲ್ಯಾ ಪರಿಂಚ್ ಮಿಶೇಲಾಚಾ ಮುಕಾರ್ ಮೌನ್ ಜಾಲೊ.
ತಾಚೆಂ ರಡ್ಣೆಂ, ತಾಚೆ ಹುಳ್ವುಳೆ, ತಾಚಿ ಉಡ್ಡೊಣಿ ಭಂಧ್ ಜಾಲಿ.
ತಾಚೆಂ ರಡ್ಣೆಂ ಭಂಧ್ ಜಾವ್ನ್ ತಾಣೆಂ ಆಪ್ಲೆ ದೊಳೆ ದಾಂಪ್ಲೆ.
ರಾಯನಾನ್ ಆಪ್ಲೆ ದೊಳೆ ಧಾಂಪ್ತಾನಾ ತ್ಯಾ ದೊಳ್ಯಾಂನಿ ಉಪ್ಯೆವ್ನ್ ಆಸ್ಲ್ಲಿಂ ದುಖಾಂ ತಾಚ್ಯಾ ದೊಳ್ಯಾಂ ಥಾವ್ನ್ ಗಳೊನ್ ತಾಚ್ಯಾ ಗಾಲಾಂಚೆರ್ ಥಾವ್ನ್ ವ್ಹಾಳೊನ್ ಮಿಶೇಲಾಚಾ ಉಸ್ಕ್ಯಾರ್ ಜಿರ್ಲಿಂ.
ತಿತ್ಲೆಂಚ್!
ಎದೊಳ್ ಮಿಶೇಲಾಚಾ ಮುಕಾರ್ ದಿಂಬಿಯೆರ್ ಆಸ್ಲ್ಲೊ ರಾಯನ್ ಆತಾಂ ಭಳ್ ನಾತ್ಲ್ಲ್ಯಾ ಪರಿಂ ದಿಂಬಿಯೆರ್ ಥಾವ್ನ್ ಗಳೊನ್ ಮಿಶೆಲಾಚಾ ಉಸ್ಕ್ಯಾರ್ ತಾಣೆಂ ಆಪ್ಲಿ ತಕ್ಲಿ ದವರ್ಲಿ.
ಆತಾಂ ವ್ಹಳೂ ಉಟ್ಲ್ಲೆ ಮಿಶೇಲಾಚೆ ಹಾತ್ ರಾಯನಾಚಾ ತಕ್ಲೆರ್ ಬಸ್ಲೆ. ತಶೆಂಚ್ ತಾಣೆಂ ರಾಯನಾಚಾ ಕೆಸಾಂನಿ ಆಪ್ಲಿಂ ಬೊಟಾಂ ಚರಯ್ಲಿಂ.
"ತುವೆಂ ಹೊ ವಿಶಯ್ ಮ್ಹಜ್ಯೆ ಥಾವ್ನ್ ಕಿತ್ಯಾಕ್ ಲಿಪವ್ನ್ ದವರ್ಲೊಯ್ ರಾಯನ್...?" ಮಿಶೇಲಾನ್ ವಿಚಾರ್ಲೆಂ.
ರಾಯನ್ ಲ್ಹಾನ್ ಭುರ್ಗ್ಯಾಪರಿಂ ಮಿಶೇಲಾಚಾ ಉಸ್ಕ್ಯಾರ್ ಹ್ಯಾ ಸಂಸಾರಾಂತ್ಲ್ಯಾ ಅಪ್ಲ್ಯಾ ಅತ್ಯುನ್ನತ್ ಸಮಾಧಾನೆಚಾ ಶಾಂತೆಕ್ ಭೊಗ್ತಾಲೊ.
"ಹಾಂವ್ ಸಗ್ಳೆಂ ಜಾಣಾಂ ಜಾಲ್ಯಾಂ ರಾಯನ್!" ಥೊಡೊ ವೇಳ್ ಮಿಶೇಲಾಚೆಂ ಮೌನ್. "ತುಜ್ಯಾ ಮಮ್ಮಿನ್ ಸೂಸೈಡ್ ಕೆಲ್ಲೆಂ....?"
ಮಿಶೇಲಾಚಿಂ ಉತ್ರಾಂ ಆಯ್ಕಾತಾನಾ ರಾಯನಾನ್ ತಶೆಂಚ್ ಆಪ್ಲ್ಯಾ ದೊಳ್ಯಾಂ ಆಸ್ಡ್ಯಾಂಕ್ ದಾಂಬುನ್ ಧರ್ಲೆಂ. ತಾಚೆ ದೊಳೆ ಪಿಳ್ಲ್ಲ್ಯಾ ಪರಿಂ ಜಾವ್ನ್ ತ್ಯಾ ದೊಳ್ಯಾಂನಿ ಉರ್ಲೆಲಿ ದುಖಾಂಚಿ ಶೆಳ್ ಪಾಸೊನ್ ತಾಚ್ಯಾ ದೊಳ್ಯಾಂ ಥಾವ್ನ್ ಗಳೊನ್ ಮಿಶೇಲಾಚಾ ಉಸ್ಕ್ಯಾರ್ ಗಳೊನ್ ಗೆಲಿ. ತಾಣೆಂ ತಶೆಂಚ್ ಮಿಶೆಲಾಚಾ ಪಾಂಯಾಂಕ್ ಭಳಾನ್ ಆರಾವ್ನ್ ಧರ್ಲೆಂ.
ಆಪ್ಣಾಚ್ಯಾ ಉಸ್ಕ್ಯಾರ್ ನೆಣ್ತ್ಯಾ ಭುರ್ಗ್ಯಾ ಪರಿಂ ವಿಶೆವಾಕ್ ದೆಂವ್ಲ್ಲ್ಯಾ ರಾಯನಾಕ್ ಪಳೆಲ್ಲ್ಯಾ ಮಿಶೇಲಾಚಾ ದೊಳ್ಯಾಂ ಮುಕಾರ್ ಸವ್ಕಾಸ್ ರಾಯನಾಚಿಂ ತಿಂ ಆದ್ಲಿಂ ರುಪಾಂ ಉದೆವ್ನ್ ಆಯ್ಲಿಂ.
ಶೀತಲಾಚಾ ಕಾಜಾರಾ ಪಾರ್ಟೆಂತ್ ಟೆಕ್ಸಡೊ ಸೂಟಾರ್ ಸೊಭ್ಚೊ ರಾಯನ್!
ಐ.ಸಿ.ಯು. ಚ್ಯಾ ದಾರಾ ಮುಕಾರ್ ದೊಳ್ಯಾಂಕ್ ರೇಬನ್ ನ್ಹೆಸಯಿಲ್ಲೊ ಗಂಭೀರ್ ರಾಯನ್!
ಫಾರ್ಮ್ ಹೌಸಾಂತ್ ಆಪ್ಣಾ ಸಾಂಗಾತಾ ಧರ್ಣಿರ್ ಬಸೊನ್ ಸಂಸಾರಾಕ್ ವಿಸ್ರಾಲ್ಲೊ ಜಾಣ್ತೊ ರಾಯನ್!
ಆನಿ ಆತಾಂ!
ಹ್ಯಾ ಸಂಸಾರಾಂತ್ ಆಪ್ಣೆ ಜಲ್ಮ್ ಘೆತ್ಲ್ಲ್ಯಾ ತಸಲ್ಯಾಚ್ ಉಸ್ಕ್ಯಾರ್ ಸಾಸ್ಣಾಚ್ಯಾ ಶಾಂತೆಕ್ ದೆಂವ್ಲ್ಲೊ ನೆಣ್ತೊ ರಾಯನ್!
ಮಿಶೆಲಾಚಾ ದೊಳ್ಯಾಂ ಮುಕಾರ್ ರಾಯನಾಚಿಂ ಎಕೇಕ್ಚ್ ರುಪಾಂ ಉದೆವ್ನ್ ಯೆತಾನಾ ಆಪ್ಲ್ಯಾ ಉಸ್ಕ್ಯಾರ್ ತಕ್ಲಿ ದವರುನ್ ಶಾಂತ್ ಜಾಲ್ಲ್ಯಾ ರಾಯನಾಕ್ ಪಳವ್ನ್ ಮಿಶೇಲಾಕ್ ಭಿರ್ಮತ್ ದಿಸ್ಲಿ. ತೆಂ ತಶೆಂಚ್ ರಾಯನಾಚೆಂ ಮಾತೆಂ ಪೊಶೆಂವ್ಕ್ ಲಾಗ್ಲೆಂ.
ಮಿಶೇಲಾಚ್ಯಾ ತ್ಯಾ ಮೊವಾಳ್ ಬೊಟಾಂಚ್ಯಾ ಪೊಶೆವ್ಣೆಂತ್ ರಾಯನಾಚಿ ಮತ್ ಸವ್ಕಾಸ್ ಶಾಂತೆಕ್ ವೆಂಗ್ತಾಲಿ.
ಮಿಶೇಲಾಚಾ ಮೊಗಾಚಿ ಸಕತ್ ತ್ಯಾ ತಾಚ್ಯಾ ಮತಿಂತ್ಲ್ಯಾ ಸ್ಪಂದನಾಕ್ ಆಪ್ಲ್ಯಾ ಬೊಟಾಂನಿ ವ್ಹಾಳಯಿತ್ತ್ ರಾಯನಾಚಾ ತಕ್ಲೆರ್ ಜಿರಯ್ತಾಲಿ. ಹಾಚ್ಯೆ ಸವೆಂ ರಾಯನಾಚಾ ದೊಳ್ಯಾಂ ಮುಕಾರ್ ತಾಣೆಂ ಮಿಶೇಲಾ ಥಾವ್ನ್ ಲಿಪೊನ್ ದವರ್ಲ್ಲೆಂ ತಾಚ್ಯಾ ಜಿವಿತಾಂತ್ಲೆಂ ಅಪುಟ್ ಸತ್ ತ್ಯಾ ದರ್ಯಾಂತ್ಲಿಂ ಲ್ಹಾರಾಂ ಹಾಲೊನ್ ಧಲೊನ್ ತಡಿಕ್ ವೆಂಗುಂಕ್ ಯೆಂವ್ಚ್ಯಾ ಪರಿಂ ರಾಯನಾಚಾ ದೊಳ್ಯಾಂ ಮುಕಾರ್ ಹಾಲೊನ್ ಧಲೊನ್ ಯೇಂವ್ಕ್ ಲಾಗ್ಲೆಂ.
"ಮ್ಹಾಕಾ ಹೆಂ ಪಸಂದ್ ನಾ ಜೆನ್ನಿ! ಇತ್ಲ್ಯಾ ರಾತಿಕ್ ತುಂ ಹ್ಯಾ ರಾಯನಾಕ್ ಸೊಡುನ್ ತುಜ್ಯಾ ಪಾರ್ಟೆಂತ್......" ರಾಯನಾಚಾ ಬಾಪಾಯ್ಚೊ ತಾಳೊ.
"ರಾಯನಾ ಖಾತಿರ್ ಮ್ಹಜೆಂ ಸಗ್ಳೆಂ ತ್ಯಾಗ್ ಕರುನ್ ಹಾವೆಂ ಘರಾ ಬಸಾಜಾಯ್ ಮ್ಹಣ್ಚೆಂ ತುಂವೆ.....? ರಾಯನಾಕ್ ಪಳಂವ್ಕ್ ಹಾಂಗಾ ಕಾಮಾಚೆಂ ಬಾಯ್ಲ್ ಆಸಾ!" ರಾಯನಾಚಾ ಆವಯ್ಚೊ ತಾಳೊ.
"ತೆಂ ಕಾಮಾಚೆಂ ಬಾಯ್ಲ್! ರಾಯನಾಚೆಂ ಆವಯ್ ನ್ಹಯ್ ಜೆನ್ನಿ!"
"ಮ್ಹಾಕಾ ಇತ್ಲ್ಯಾ ವೆಗ್ಗಿ ಆವಯ್ ಜಾಂವ್ಕ್ ನಾಕಾ ಆಸ್ಲ್ಲೆಂ. ತುಕಾ ಬಾಪಯ್ ಜಾಂವ್ಕ್ ಜಾಯ್ ಆಸ್ಲ್ಲೆಂ!" ರಾಯನಾಚ್ಯಾ ಆವಯ್ಚಿ ಘರ್ಜೊವ್ಣಿ.
’ಚಟಾಲ್ಲ್’ ಭಳಾಧೀಕ್ ಥಾಪ್ಡಾಚೊ ಆವಾಜ್!
ಕೊನ್ಶ್ಯಾಂತ್ ಬಸೊನ್ ರಾಯನಾಚೆಂ ರಡ್ಣೆಂ.
"ತುಂ ಆಜ್ ಸೊರೊ ಪಿಯೆವ್ನ್ ಆಯ್ಲಾಂಯ್!"
"ಹಾಂ!"
"ಘರಾಂತ್ಲ್ಯಾ ಸಂತೊಸಾಕ್ ಭಾಯ್ರ್ ಸೊಧುಂಕ್ ವಚಾನಾಕಾ ಜೆನ್ನಿ. ತೊ ತುಕಾ ಘರಾ ಭಾಯ್ರ್ ಭಿಲ್ಕುಲ್ ಮೆಳ್ಚೊನಾ!"
"ಹ್ಯಾ ಘರಾಂತ್ ಕಿತೆಂ ಆಸಾ?"
’ದಡ್ಡ್’ ಕರುನ್ ರಾಯನಾಚಿ ಆವಯ್ ಖಾಟಿಯೆರ್ ಪಡ್ಲ್ಲೊ ಆವಾಜ್!
"ರಾಯನ್? ರಾಯನ್....?" ರಾಯನಾಚ್ಯಾ ಆವಯ್ಚಿ ಬೊಬಾಟ್.
"ಮಮ್ಮಿ....!" ರಾಯನಾಚಿಂ ಕಾಂಪ್ಚಿಂ ಮೆಟಾಂ
’ಚಟಲ್ಲ್’ ರಾಯನಾಚ್ಯಾ ಕಾನ್ಸುಲಾಕ್ ಮಾರ್ಲ್ಲೊ ಆವಾಜ್!
"ತುವೆಂ ರಾಯನಾ ವಯ್ರ್ ಆಜ್ ಹಾತ್ ಉಕೊಲ್ಲೊಯ್...?" ರಾಯನಾಚಾ ಬಾಪಾಯ್ಚಿ ಘೊರಜ್.
"ತುವೆಂ ತಾಕಾ ಬಾಪಯ್ ಜಾಂವ್ಚ್ಯಾ ಪಯ್ಲೆಂ ತೊ ಮ್ಹಜೊ ಪೂತ್!"
"ರಾಯನಾಕ್ ಜಲ್ಮ್ ದಿಲ್ಲ್ಯಾ ಫರಾ ತುಂ ತಾಚೆಂ ಆವಯ್ ಜಾಲೆಂಯ್? ತುಜ್ಯಾ ಭುರ್ಗ್ಯಾಕ್ ತುಜೆಂ ದೂದ್ ಖಾವಂವ್ಕ್ ಪಾಸೊನ್ ತುಕಾ ಪುರ್ಸತ್ ನಾತ್ಲ್ಲಿ. ತಾಕಾ ದೂದ್ ಬೊರಯ್ಲಾಂ ತ್ಯಾ ವಿಮಲಾನ್!"
"ಫಳಾರ್ರ್!" ಮೆಜಾ ವಯ್ಲೊ ಗ್ಲಾಸ್ ಧರ್ಣಿಕ್ ಮಾರ್ಲ್ಲೊ ಆವಾಜ್!
"ಖಂಯ್ ಗೆಲ್ಲೆಂಯ್ ಜೆನ್ನಿ.....?" ರಾಯನಾಚಾ ಬಾಪಾಯ್ಚೊ ತಾಳೊ.
"ತುಕಾ ತುಜೆಂ ಬಿಜ್ನೆಸ್ ಸೊಡ್ಲ್ಯಾರ್ ಮ್ಹಜೆಂ ಕಾಂಯ್ ಪಡೊನ್ ಗೆಲಾಂ.....?"
"ಹ್ಯಾ ಘರಾಂತ್ ತುಕಾ ಕಿತೆಂ ನಾ ಜೆನ್ನಿ?"
"ಹ್ಯಾ ಘರಾಂತ್ ಕಿತೆಂ ಆಸಾ?"
"ಮಮ್ಮೀ....!" ರಾಯನಾಚಿ ಬೋಬ್.
"ಜೆನ್ನಿ.....!" ರಾಯನಾಚಾ ಬಾಪಾಯ್ಚಿ ಪಿಂರ್ಗೊವ್ಣಿ. ಪೊಲಿಸಾಂಚಾ ಮೊಚ್ಯಾಂಚೊ ಆವಾಜ್. ಉಮ್ಕಾಳ್ಚಿ ದೊರಿ. ತ್ಯಾ ದೊರಿಯೆಕ್ ಉಮ್ಕಾಳ್ಚಿ ತಾಚಿ ಆವಯ್. ವಾರ್ಯಾರ್ ಆಸ್ಲ್ಲ್ಯಾ ಆವಯ್ಚಾ ಪಾಯಾಂಕ್ ಧರುನ್ ರಡ್ಚೊ ರಾಯನ್. ಕಾಳೊಕಾಂತ್ ಬಸೊನ್ ಗುಪಿತ್ ರಡ್ಚೊ ರಾಯನಾಚೊ ಬಾಪಯ್. ಬಾಪಾಯ್ನ್ ಉಚಾರ್ಚಿಂ ಬೂದ್ಬಾಳಿಚಿಂ ಉತ್ರಾಂ. ಬಾಪಾಯ್ಚೊ ಹಾಸೊ. ಗುಪಿತ್ತ್ ಆಟವ್. ಎಕ್ಸುರ್ಪಣಾಂತ್ ಭಾಯ್ಲ್ಯಾ ಅಂದ್ಕಾರಾಂತ್ ಆಪ್ಲ್ಯಾ ಬಾಯ್ಲೆ ಲಾಗಿಂ ತಾಚೆಂ ಉಲೊಣೆಂ. ತಕ್ಲೆಂತ್ ಅಸ್ಕತ್ಕಾಯ್, ದಾಕ್ತೆರ್. ಭಲಾಯ್ಕಿ. ಆಸ್ಪತ್ರ್. ಕರ್ಗೊಣಿ. ರಾಯನಾಚೆಂ ತರ್ನಾಟ್ಪಣ್. ಕರ್ಗೊಣೆಂತ್ ಬಾಪಾಯ್ಚೆಂ ಮರಣ್!
ಮಿಶೇಲಾಚಾ ಉಸ್ಕ್ಯಾರ್ ರಾಯನಾಚಾ ದೊಳ್ಯಾಂ ಮುಕಾರ್ ತಾಚೆಂ ಜಿವಿತ್ ತ್ಯಾ ದರ್ಯಾಂತ್ ಲಾರಾಂ ವ್ಹಾಳೊನ್ ಆಯಿಲ್ಲ್ಯಾ ಪರಿಂ ವ್ಹಾಳೊನ್ ಯೇವ್ನ್ ಗೆಲೆಂ.
"ಮ್ಹಾಕಾ ಆತಾಂ ಸಮ್ಜಾಲಾಂ ರಾಯನ್!" ಮಿಶೇಲ್ ಮೌನ್ ಮೊಡುನ್ ಉಲಯ್ಲೆಂ. "ತುಜ್ಯಾ ಆವಯ್ ಬಾಪಾಯ್ಚೆಂ ಜಿವಿತ್ ಪಳೆಲ್ಲೊ ತುಂ ತುಜ್ಯಾ ಜಿವಿತಾಕ್ ಭಿಯೆಲ್ಲೊಯ್. ತುಕಾ ತುಜ್ಯಾ ಜಿವಿತಾ ಖಾತಿರ್ ಆಸಲ್ಯಾ ಚಲಿಯೆಚಿ ಗರ್ಜ್ ಆಸ್ಲ್ಲಿ ಕೀ ಜ್ಯಾ ಚಲಿಯೆಕ್ ಸಂಸಾರಾಚಿ ಆಶಾ ನಾ ತಸಲಿ. ಹ್ಯಾ ಖಾತಿರ್ ತುವೆಂ ಮ್ಹಾಕಾ ವಿಂಚ್ಲೆಂಯ್. ಮ್ಹಜ್ಯಾಚ್ ಸಂಸಾರಾಂತ್ ಮ್ಹಾಕಾ ತುವೆಂ ಖುಶ್ ದವರುಂಕ್ ಪ್ರಯತ್ನ್ ಕೆಲೆಂಯ್. ತುಂ ಜಾಣಾಂ ಆಸ್ಲ್ಲೊಯ್ ತುಜ್ಯಾ ಆವಯ್ನ್ ಕಿತೆಂ ಕೆಲ್ಲೆಂ ತೆಂ. ಹ್ಯಾಚ್ ಖಾತಿರ್ ತುಂ ಹರ್ಯೆಕ್ ವಗ್ತಾರ್ ಮ್ಹಜಿ ಚತ್ರಾಯ್ ಘೆತಾಲೊಯ್. ತುಜ್ಯಾ ಆವಯ್ಚೆಂ ಚಿಂತುನ್ ತುಂ ತ್ಯಾ ದೀಸ್ ಭಿಯೆಲ್ಲೊಯ್ ಆನಿ ತ್ಯಾ ಉಪ್ರಾಂತ್ ತುಂ ಮ್ಹಾಕಾ ಸದಾಂ ತುಜ್ಯಾ ಆಫೀಸಾ ಥಾವ್ನ್ ಯೆಂವ್ಚ್ಯಾ ವಗ್ತಾರ್ ಮುಕ್ಲ್ಯಾ ದಾರಾರ್ ಪಳಂವ್ಕ್ ಆಶೆಲೊಯ್. ತುಜ್ಯಾ ಮತಿಂತ್ ಆಜೂನ್ ತುಜ್ಯಾ ಆವಯ್ನ್ ಜೀವ್ಘಾತ್ ಕೆಲ್ಲಿ ಭಿರಾಂತ್ ಆಸಾ. ತುಜ್ಯಾ ಬಾಪಾಯ್ಚಾ ಕರ್ಗೊವ್ಣೆಂತ್ ತಾಣೆಂ ಸಾರ್ಲ್ಲ್ಯಾ ವರ್ಸಾಂಚೊ ಹುಸ್ಕೊ ತುಜ್ಯಾ ಕಾಳ್ಜಾಂತ್ ಆಸಾ. ಹ್ಯಾ ಖಾತಿರ್ ತುಂ......!" ಮಿಶೇಲಾಚಿಂ ಉತ್ರಾಂ ರಾಯನಾಕ್ ಆಯ್ಕಾತಾಲಿಂ. ತಾಣೆಂ ಆಪ್ಲಿ ತಕ್ಲಿ ಉಕಲ್ಚೆಂ ಪ್ರಯತ್ನ್ ಕೆಲೆಂ ನಾ. ಮಿಶೇಲಾಚಾ ಉಸ್ಕ್ಯಾರ್ ತಾಚ್ಯಾ ಮತಿಕ್ ಕಿತ್ಲ್ಯಾಗೀ ವರ್ಸಾಂ ಥಾವ್ನ್ ತಾಣೆಂ ಆಶೆಲ್ಲಿ ಶಾಂತಿ ಆಸಾ ಮ್ಹಳ್ಳೆಂ ಸ್ಪಶ್ಟ್ ಜಾಲ್ಲೆಂ.
"ತುಂ ಮ್ಹಜೊ ಘೊವ್ ರಾಯನ್! ತುಜ್ಯಾ ಮತಿಂತ್ಲ್ಯಾ ಭಿರಾಂತೆಕ್ ಮ್ಹಜ್ಯೆಲಾಗಿಂ ಸಾಂಗೊಂಕ್ ತುಂ ಇತ್ಲೊಯ್ ಭಿಯೆಲೊಯ್?" ಮಿಶೇಲ್ ಆಪ್ಲ್ಯಾ ಹಾತಾಚ್ಯಾ ಬೊಟಾಂಕ್ ರಾಯನಾಚಾ ಕೆಸಾಂ ಮಧೆಂ ಚರಯಿತ್ತ್ ತಾಕಾಚ್ ಪಳಯ್ತಾಲೆಂ.
"ಐ ಯಾಮ್ ಸಾರ್ರಿ ಮಿಶೇಲ್! ಹಾಂವ್ ಭಿಯೆಲ್ಲೊಂ!" ರಾಯನಾನ್ ವ್ಹಳೂ ಆಪ್ಲಿ ತಕ್ಲಿ ಉಕೊಲ್ಲಿ.
ದೊಳೆ ಉಭಾರುನ್ ತಾಣೆಂ ಮಿಶೇಲಾಕ್ ಪಳೆಲೆಂ.
ರಾಯನಾಚಾ ದೊಳ್ಯಾಂಕ್ಚ್ ಪಳೆಲ್ಲ್ಯಾ ಮಿಶೇಲಾಕ್ ಆಪ್ಲೊ ಘೊವ್ ಲ್ಹಾನ್ ಭುರ್ಗ್ಯಾ ಪರಿಂ ದಿಸ್ಲೊ.
ಬಾಲಿವುಡಾಂತ್ ಆಪ್ಲೆಂಚ್ ನಾಂವ್ ಆಸ್ಲ್ಲೊ, ಪಯ್ಶ್ಯಾಂಚಾ ಭಳಾಂತ್ ಭಳ್ವಂತ್, ಬಾಲಿವುಡಾಕ್ ಆಪ್ಣಾಚಾ ಖಾಸ್ಗಿ ಸಕ್ತೆಚ್ಯಾ ಆಧಾರಾನ್ ಸಭಾರ್ ನವ್ಯಾ ಕಲಾಕಾರಾಂಕ್ ಹಾಡ್ಲ್ಲೊ, ಮುಂಬಯಿಚ್ಯಾ ಕಾರ್ಪೊರೇಟ್ ಸಂಸಾರಾಂತ್ ಉಟೊನ್ ಬಸ್ಚೊ, ಸದಾಂಚ್ ಜಿಕೊಂಕ್ ಆಶೆಂವ್ಚೊ, ಸಲ್ವೊಣೆಕ್ ಮಾಂದುನ್ ಘೆಂವ್ಕ್ ತಯಾರ್ ನಾತ್ಲ್ಲೊ, ಜಿಕ್ಚ್ಯಾ ಖಾತಿರ್ಚ್ ಜಲ್ಮಾಲ್ಲೊ, ರಾಯನ್.....! ಆಲ್ಫ್ರೆಡ್ ರಾಯನ್! ಎಕಾ ನೆಣ್ತ್ಯಾ ಭುರ್ಗ್ಯಾ ಪರಿಂ, ಸಮಾಧಾನೆಕ್ ಆಶೆಂವ್ಚ್ಯಾ ಲ್ಹಾನ್ ಭುರ್ಗ್ಯಾ ಪರಿಂ ಮಿಶೆಲಾಚಾ ಉಸ್ಕ್ಯಾರ್ ಶೆವ್ಟಾಲ್ಲೊ!
ಆಪ್ಲ್ಯಾ ಜಿವಿತಾಚಾ ನಿಮಾಣ್ಯಾ ಸಮಾಧಾನೆಚಾ ಉಸ್ಕ್ಯಾರ್!
ಖಂಯ್ ಆಲ್ಫ್ರೆಡ್ ರಾಯನ್!? ಖಂಯ್ ಮಿಶೇಲ್ ಆಂಡ್ರಿಯಾ!?
"ರಾಯನ್......?" ಮಿಶೆಲಾಚಾ ದೊಳ್ಯಾಂನಿ ವಿಚಿತ್ರ್ ಪ್ರಕಾಸ್ ಫಾಂಕ್ತಾಲೊ.
"ತುಜ್ಯಾ ಆವಯ್ ಬಾಪಯ್ ಸವೆಂ ಕಿತೆಂ ಘಡ್ಲಾಂ ತೆಂ ಆಮ್ಚೆ ಸವೆಂ ಘಡೊಂಕ್ ನಜೊ ಮ್ಹಣೊನ್ ತುವೆಂ ಹೊ ವಿಶಯ್ ಮ್ಹಜ್ಯೆ ಥಾವ್ನ್ ಲಿಪೊನ್ ದವರ್ಲೊಯ್ ಜಾಂವ್ಕ್ ಪುರೊ. ಪುಣ್ ಹೆಂ ಮುಂಬಯಿ ಶ್ಹೆರ್ ತುವೆಂ ಚಿಂತ್ಚ್ಯಾ ಪರಿಂ ನ್ಹಯ್ ರಾಯನ್. ಹಾಂವ್ ಮುಂಬಯಿ ಆಯಿಲ್ಲ್ಯಾ ಥಾವ್ನ್ ಕೋಣ್ಗೀ ಮ್ಹಜೊ ಪಾಟ್ಲಾವ್ ಕರ್ತಾ ತಶೆಂ ಮ್ಹಾಕಾ ಭೊಗ್ತಾ. ಶೀತಲಾಚೊ ಘೊವ್ ಆಕ್ಸಿಡೆಂಟ್ ಜಾವ್ನ್ ಮೊರೊಂಕ್ ನಾ. ತಾಕಾ ಖಂಡಿತ್ ಕೊಣೆಂ ತರೀ ಮಾರ್ಲಾಂ! ತಾಚಿ ಖುನ್ ಕೆಲ್ಯಾ! ಶೀತಲಾಚಾ ಘರಾ ತ್ಯಾ ದಿಸಾ ಆಮ್ಚೆರ್ ಬೆಶ್ಟಾವ್ಣಿ! ತೆಂ ಕಾಳ್ಯಾ ಆರ್ಶ್ಯಾಂಚೆಂ ಜೀಪ್! ಹಾಂವ್ ನೆಣಾಂ ಆಶೆಂ ಕಿತ್ಯಾಕ್ ಜಾತಾ?" ಉಲಂವ್ಚೆಂ ಮಿಶೇಲ್ ಥೊಡೊ ವೇಳ್ ಮೌನ್ ಜಾಲೆಂ.
"ತುಕಾ ಅನ್ಯೇಕ್ ವಿಶಯ್ ಸಾಂಗ್ತಾಂ ರಾಯನ್! ಹಾವೆಂ ಆಶೆಂ ಸಾಂಗ್ಲೆಂ ಮ್ಹಣೊನ್ ರಾಗಾರ್ ಜಾಯ್ನಾಕಾ! ಮ್ಹಾಕಾ ಕೊಣಾಯ್ಚೆರ್ ದುಬಾವ್ ನಾ. ಆಲಿಯಾಕ್ ತುವೆಂ ಆಮ್ಚ್ಯಾ ಘರಾ ಆಪವ್ನ್ ಹಾಡ್ಲೆಂಯ್. ಮ್ಹಾಕಾ ಕಾಂಯ್ ಬೆಜಾರ್ ನಾ. ಹಾವೆಂ, ತುಜ್ಯಾ ಎಕಾ ಸಯ್ರ್ಯಾ ಪರಿಂಚ್ ತಾಚೊ ಸತ್ಕಾರ್ ಕೆಲಾ. ಪುಣ್ ಶೀತಲಾಕ್ ಕೊಣೆಂಗೀ ಪೋನ್ ಕರುನ್ ಸಾಂಗ್ಲೆಲ್ಯಾ ಪರಿಂ ಆಜ್ ಮ್ಹಾಕಾ ತ್ಯಾ ಆಲಿಯಾಕ್ ಪಳೆತಾನಾ.....!" ಮಿಶೆಲಾನ್ ಆತಾಂ ಆಪ್ಲಿ ತಕ್ಲಿ ಉಕ್ಲುನ್ ಆಪ್ಲ್ಯಾ ದಿಶ್ಟಿಕ್ ಥೊಡ್ಯಾ ವೆಳಾಕ್ ರಾಯನಾ ಥಾವ್ನ್ ಪಯ್ಸ್ ತ್ಯಾ ಬೆಡ್ರೂಮಾಚಾ ಜನೆಲಾ ತೆವ್ಶಿಂ ಧಾಂವ್ಡಾಯ್ಲಿ.
"ಆಲಿಯಾಕ್ ಆನಿ ವಿಶುಕ್ ಕಾಂಯ್ ಸಂಭಂಧ್ ಆಸ್ಲ್ಲೊ ರಾಯನ್....?" ಮಿಶೇಲಾಚಿ ತಕ್ಲಿ ಪರ್ತ್ಯಾಕ್ ರಾಯನಾ ತೆವ್ಶಿಂ ಘುಂವ್ಲಿಂ.
ತಿತ್ಲೆಂಚ್!
’ಸಟ್ಟ್’ ಕರುನ್ ಪಾಟಿಂ ಬಾಗ್ವಾಲ್ಲೊ ರಾಯನ್ ಮಿಶೇಲಾ ಮುಕಾರ್ ಉಟೊನ್ ಉಭೊ ಜಾಲೊ.
ಮಿಶೇಲ್ ಹೆಂ ಸರ್ವ್ ಕಶೆಂ ಜಾಣಾಂ ಜಾಲೆಂ? ರಾಯನಾನ್ ಆಶ್ಚರ್ಯಾನ್ ಆಪ್ಲ್ಯಾ ಬಾಯ್ಲೆಕ್ ಪಳೆಲೆಂ.
"ಹೊ ವಿಶಯ್ ತುಕಾ ಕಸೊ ಕಳಿತ್ ಜಾಲೊ.....?"
"ಇಕ್ಬಾಲಾನ್ ಮ್ಹಾಕಾ ಪೋನ್ ಕೆಲ್ಲೆಂ! ತಾಣೆಂಚ್ ಮ್ಹಾಕಾ ತುಜ್ಯಾ ಜಿವಿತಾ ವಿಶಿಂಯ್ ಸಾಂಗ್ಲ್ಲೆಂ!" ಮಿಶೇಲ್ ಸವ್ಕಾಸ್ ಖಾಟಿಯೆರ್ ಬಸ್ಲೆಲ್ಯಾ ಥಾವ್ನ್ ಉಟೊನ್ ಉಭೆಂ ಜಾಲೆಂ.
************
ರಾಯನಾಚೆಂ ಆಯ್ಚೆಂ ವರ್ತನ್ ಆಲಿಯಾಕ್ ತಾಚ್ಯಾ ಫುಡಾರಾ ವಿಶಿಂ ಪರ್ತ್ಯಾಕ್ ಪರ್ತ್ಯಾಕ್ ನಿಯಾಳುಂಕ್ ಲಾಯ್ತಾಲೆಂ.
ರಾಯನಾಚಾ ಮತಿಂತ್ ಹೊ ದುಬಾವ್ ಉದೆಲೊ ಜಾಲ್ಯಾರ್ಯ್ ಕಸೊ? ಆಲಿಯಾಕ್ ಕಾಂಯ್ಚ್ ಸಮ್ಜಾನಾತ್ಲ್ಲೆಂ.
ರಾಯನಾಚಾ ಮತಿಂತ್ ಆಜ್ ಆಪ್ಣಾ ವಿರೋಧ್ ದುಬಾವ್ ಉದೆಲಾ ಮ್ಹಣ್ತಾನಾ ಖಂಯ್ ತರ್ಯ್ ಆಪ್ಣಾಚ್ಯಾ ಗುಣಾಕಾರಾಂತ್ ಘಡ್ವಡ್ ಜಾಲ್ಯಾ. ರಾಯನ್ಯ್ ಹ್ಯಾ ಫುಡೆಂ ವೊಗೊ ಬಸ್ಚೊ ಮನಿಸ್ ಖಂಡಿತ್ ನ್ಹಯ್! ತೊ ಖಂಡಿತ್ ಖಬಾರ್ ಕಾಡ್ತಲೊ. ಖಂಯ್ ತರ್ಯ್ ಆಪ್ಣಾಕ್ ಆನಿ ವಿಶುಕ್ ಆಸ್ಲ್ಲ್ಯಾ ಸಂಭಂಧಾಚಿ ಖಬಾರ್ ತಾಕಾ ಮೆಳಾತ್ ಜಾಲ್ಯಾರ್....! ಆಲಿಯಾಚಿ ಮತ್ ವಿಪರೀತ್ ಚಿಂತಾಲಿ.
ಇತ್ಲ್ಯಾ ಆಪುರ್ಭಾಯೆನ್ ಚಲೊನ್ ಆಸ್ಲ್ಲೆಂ ಆಪ್ಣಾಚೆಂ ಕಾಮ್ ಅಶೆಂ ಎಕಾನ್ ಏಕ್ ರಾಯನಾಕ್ ಆಪ್ಣಾ ವಯ್ರ್ ದುಬಾವಾಕ್ ಇಡೆಂ ದಿತಾ ಮ್ಹಳ್ಯಾರ್...?
ಕಾಂಯ್ ಮಿಶೇಲ್?
ಛೇ! ಮಿಶೇಲಾಚೆ ನಾಂವ್ ರಾಯನಾನ್ ಕಾಡುಂಕ್ ನಾತ್ಲ್ಲೆಂ. ತಶೆಂಯ್ ಕಾಲ್ ಆಪ್ಣೆಂ ಮಿಶೇಲಾಚಾ ಘರಾ ಆಸ್ತಾನಾ ಮಿಶೇಲಾಚಾ ಉಲೊಣ್ಯಾಂತ್ ಜಾಂವ್ ಮಿಶೇಲಾಚಾ ಸತ್ಕಾರಾಂತ್ ಜಾಂವ್ ಆಪ್ಣಾಕ್ ಕಾಂಯ್ ದುಬಾವ್ ಮಾರ್ಲ್ಲೊ ನಾ. ತೆಂ ಕಾಂಯ್ಚ್ ನೆಣಾಂ ಆಸ್ಲ್ಲೆಂ ಸತ್ತಿ ಚೆಡುಂ! ತರ್ ರಾಯನಾಕ್ ಹೊ ದುಬಾವ್ ಕಸೊ ಉದೆಲೊ?
ಕಾಂಯ್ ಸಾವಂತ್?
ಸಾದ್ಯ್ ನಾ! ಸಾವಂತಾ ಮುಕಾರ್ ವಿಶುಲಾಗಿಂ ಹಾಂವ್ ಬರೆಂ ಮರ್ಯಾದಿನ್ ಉಲಯ್ಲ್ಯಾಂ ಮಾತ್ರ್ ಶಿವಾಯ್ ಆಪ್ಣಾಕ್ ಆನಿ ವಿಶುಕ್ ಸಂಭಂಧ್ ಆಸಾ ಮ್ಹಳ್ಳ್ಯಾಚೊ ದುಬಾವ್ ತಾಚ್ಯಾ ಮತಿಕ್ ಯೆಂವ್ಚ್ಯಾ ಪರಿಂ ಚಲೊಂಕ್ ನಾ. ತಶೆಂಯ್ ವಿಶು ಮೊರೊನ್ ಇತ್ಲ್ಯಾ ಥೆಂಪಾ ಉಪ್ರಾಂತ್ ಹೊ ದುಬಾವ್ ರಾಯನಾಕ್ ಆಯ್ಲಾ ಮ್ಹಳ್ಯಾರ್....?
ಕಾಂಯ್ ಇಕ್ಬಾಲ್....?
ಜಾಂವ್ಕ್ ಪುರೊ! ಪುಣ್ ಹಾವೆಂ ಹೊ ದುಬಾವ್ ದವರುನ್ ಬಸೊಂಕ್ ಜಾಯ್ನಾಂ. ಜಾತಾ ತಿತ್ಲ್ಯಾ ವೆಗ್ಗಿಂ ಹಾವೆಂ ಆತಾಂ ಸೊಧುನ್ ಕಾಡುಂಕ್ ಜಾಯ್.
ಚಿಂತ್ಲ್ಲ್ಯಾ ಆಲಿಯಾನ್ ಇಕ್ಬಾಲಾಕ್ ಪೋನ್ ರಿಂಗ್ ಕೆಲೆಂ. ಆಪ್ಣಾಕ್ ಆಸಲಿಂ ಕಾಮಾ ಕರುಂಕ್ಚ್ ಮ್ಹಣೊನ್ ಆಲಿಯಾನ್ ನವೆಂ ಸೆಲ್ಪೋನ್ ಘೆತ್ಲ್ಲೆಂ. ಆಪ್ಲ್ಯಾ ತ್ಯಾ ಸದಾಂಚಾ ಪೊನಾಕ್ ತೆಂ ಆಶೆಂ ಉಪಯೋಗ್ಸಿನಾತ್ಲ್ಲೆಂ. ಹ್ಯಾಚ್ ಪೊನಾ ಥಾವ್ನ್ ತಾಣೆಂ ಇಕ್ಬಾಲಾಚಾ ಮಜತೆನ್ ನಾಸಿರಾಚಾ ವಯ್ರ್ ಫಾರಿಕ್ಪಣ್ ಘೆತ್ಲ್ಲೆಂ.
ಇಕ್ಬಾಲಾಕ್ ತಾಣೆಂ ಹೊಟೇಲ್ ಒಬೇರಾಯ್ ಇಂಟರ್ನ್ಯಾಶನಲಾಂತ್ ಆಪ್ಣಾಕ್ ಮೆಳೊಂಕ್ ಯೇಂವ್ಕ್ ಸಾಂಗ್ಲೆಂ.
ಆಲಿಯಾನ್ ಸಾಂಗ್ಲ್ಲ್ಯಾ ಪರಿಂಚ್ ಇಕ್ಬಾಲ್ ಹೊಟೆಲಾಕ್ ಆಯಿಲ್ಲೊ. ತಾಕಾಯ್ ಸಮ್ಜಾಲ್ಲೆಂ ಕೀ ಕಾಂಯ್ ತರ್ಯ್ ಪ್ರಾಬ್ಲೆಮ್ ಆಸಾತ್!
ಆಲಿಯಾನ್ ಸಾಂಗ್ಲ್ಲ್ಯಾ ವೆಳಾಕ್ಚ್ ಇಕ್ಬಾಲ್ ಹೊಟೆಲಾಕ್ ಪಾವ್ಲೊ.
"ತುವೆಂ ರಾಯನಾಕ್ ಪೋನ್ ಕೆಲ್ಲೆಂಯ್?" ಆಲಿಯಾಚೆಂ ಶೀದಾ ಸವಾಲ್.
"ರಾಯನಾಕ್?" ಇಕ್ಬಾಲಾಕ್ ಕಾಂಯ್ ಸಮ್ಜಾಲೆಂ ನಾ. "ಖಂಯ್ಚಾ ವಿಶಯಾಂತ್.....?" ತಾಣೆಂ ವಿಚಾರ್ಲೆಂ.
"ಪಳೆ ಇಕ್ಬಾಲ್! ಪೊರ್ವಾಂ ಸುಕ್ರಾರಾ ಹೈ ಕೋರ್ಟಾಂತ್ ಆಮಿಂ ಹಾಜರ್ ಜಾಂವ್ಕ್ ಆಸಾ!" ಇಕ್ಬಾಲಾಕ್ ಆಲಿಯಾನ್ ಉಡಾಸ್ ದಿಲೊ.
"ತರ್.....?"
"ತಾಚ್ಯಾ ಪಯ್ಲೆಂ ಮ್ಹಾಕಾ ಮ್ಹಜೆಂ ಕಾಮ್ ಸಂಪಯಿಲ್ಲೆಂ ಜಾಯ್!"
"ಆನಿಕ್ಯ್ ಚಾರ್ ದೀಸ್ ಆಸಾತ್ ಆಲಿಯಾ!"
"ಚಾರ್ ದೀಸ್ ಆಸೊಂದಿತ್! ಪುಣ್ ರಾಯನಾಕ್ ಹ್ಯಾ ವಿಶಿಂ ಕಳಿತ್ ಜಾಲಾಂ!"
"ಹಾವೆಂ ಮಸ್ತ್ ಪ್ರಯತ್ನ್ ಕೆಲಾಂ! ಸಗ್ಳೆಂ ತುವೆಂ ಸಾಂಗ್ಚ್ಯಾ ತಿತ್ಲೆಂ ಸುಲಭ್ ನ್ಹಯ್! ತ್ಯಾ ಮಧೆಂ ತುವೆಂ ನಾಸಿರಾಚೆಂ ಕಾಮ್ ದಿಲೆಂಯ್!"
"ನಾಸಿರಾಚೆಂ ಕಾಮ್ ಕಾಂಯ್ ವ್ಹಡ್ಲೆಂ ನಾತ್ಲ್ಲೆಂ! ತಾಚ್ಯೆ ವಿಶಿಂ ಹಾಂವ್ ಸಗ್ಳೆಂ ಜಾಣಾಂ ಆಸ್ಲ್ಲಿಂ. ತಶೆಂ ಕಾಮ್ ಸಗ್ಳೆಂ ಮ್ಹಜ್ಯೆ ಥಾವ್ನ್ ಜಾಲಾಂ!"
"ಹೆಂಯ್ ಜಾತೆಲೆಂ! ತೆಂ ಮಿಶೆಲ್ ಘರ್ಚ್ ಭಾಯ್ರ್ ಸರಾನಾ! ತಾಕಾ ಬೋವ್ಶ್ಯಾ ಆಮ್ಚ್ಯಾ ವಯ್ರ್ ದುಬಾವ್ ಉದೆಲಾ ಆಸ್ತಲೊ!"
"ತುಮ್ಚೆ ವಯ್ರ್ ದುಬಾವ್.....? ಮಿಶೇಲಾಕ್ ತುಮ್ಚೆ ವಯ್ರ್ ದುಬಾವ್ ಕಸೊ.....?" ಆಲಿಯಾಕ್ ಖಂಯ್ಚರ್ಗೀ ಘುಸ್ಪಡ್ ಜಾಲ್ಲ್ಯಾಪರಿಂ ಜಾಲೆಂ.
"ಸಗ್ಳೆಂ ತುವೆಂ ಸಾಂಗ್ಚ್ಯಾ ತಿತ್ಲೆಂ ಸುಲಭ್ ನಾ ಆಲಿಯಾ!"
"ಪಳೆ.....! ದೋನ್ ದಿಸಾಂನಿ ಫಿಲ್ಮಾಚೆಂ ಪ್ರೀಮಿಯರ್ ಆಸಾ. ತುಕಾ ಆವ್ಕಾಸ್ ಲಾಭ್ತಲೊ!"
"ಹಾಂವ್ ಪ್ಲ್ಯಾನ್ ಕರ್ತಾಂ. ಪುಣ್ ಮ್ಹಜೆ ವಿರೋಧ್ ತುವೆಂ ಪೊಲಿಸಾಂಕ್ ದಿಲ್ಲ್ಯಾ ಉಚಾರಾಕ್ ತುಂ ಕೆದ್ನಾಂ ಬದ್ಲಿ ಕರ್ತೆಲೆಂಯ್....?"
"ತುಂ ಫಾಲ್ಯಾಂ ಮ್ಹಜೆಂ ಕಾಮ್ ಕರ್ತಾಯ್ ಜಾಲ್ಯಾರ್ ಪೊರ್ವಾಂ!" ಆಲಿಯಾನ್ ಸಾಂಗ್ತಾನಾ ಇಕ್ಬಾಲ್ ಥೊಡೊ ವೇಳ್ ಚಿಂತುಂಕ್ ಪಡ್ಲೊ.
"ಏಕ್ ಸವಾಲ್ ವಿಚಾರುಂ......?’
"ಕಿತೆಂ.....?"
"ಹಾಂವ್ ಜಾಣಾಂ ಆನಿ ತುಂಯ್ ಜಾಣಾಂಯ್ ಕೀ ಹಾವೆಂ ತುಜ್ಯೆರ್ ಹಲ್ಲೊ ಕರುಂಕ್ ನಾ. ತರ್ ತುಜ್ಯೆ ವಯ್ರ್ ಹಲ್ಲೊ ಕೆಲ್ಲೊ ತೊ ಕೋಣ್.....?"
"ತುಕಾ ತೆಂ ಪೊರ್ವಾಂ ಕಳ್ತೆಲೆಂ!"
ದ್ರಡಾತಾಯೆಚಾ ತಾಳ್ಯಾಂತ್ ಉಲಯಿಲ್ಲ್ಯಾ ಆಲಿಯಾಚೆಂ ಸೆಲ್ಪೋನ್ ವಾಜ್ಲೆಂ. ತಾಚ್ಯಾ ಡಿಸ್ಪ್ಲೇ ವಯ್ಲ್ಯಾ ನಂಬರಾಕ್ ಪಳವ್ನ್ ಆಲಿಯಾಚಾ ತೊಂಡಾರ್ ಕಾಂಯ್ ಬದ್ಲಾವಣ್ ಜಾಲಿ ನಾ.
"ಹಲೋ....?" ಆಲಿಯಾ ಉಲಯ್ಲೆಂ.
"ಆಲಿಯಾ! ಅಬ್ಬೂ....." ತ್ಯಾ ಕುಶಿಚೊ ತಾಳೊ ಕಾಂಪ್ತಾಲೊ.
"ಹಾಂ.....!" ಆಲಿಯಾಚಾ ತೊಂಡಾ ಥಾವ್ನ್ ಉತಾರ್ ಸುಟ್ಲೆಂ.
"ಅಬ್ಬೂ ಹ್ಯಾ ಸಂಸಾರಾಕ್ ಅಂತರ್ಲೊ!" ನಾಸಿರಾಚೊ ದುಖಾ ಭರಿತ್ ತಾಳೊ.
*****************
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: 1, 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
