ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್, ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಮರ್ಶ್ಯಾ ಲೇಖನ್ - 6
2003 - 2004 ವರ್ಸಾ ಕೊಂಕ್ಣೆಂತ್ ಪರ್ಗಟ್ ಜಾಲ್ಲ್ಯಾ ಪ್ರಮುಕ್ ಚ್ಯಾರ್ ಕವಿತಾ ಸಂಗ್ರಹಾಂಚೆರ್ ’ವಾಟ್’ (ಮೆಲ್ವಿನ್ ರೊಡ್ರಿಗಸ್); ’ಕಯ್ದ್ಯಾಚ್ಯೊ ಕವಿತಾ’ (ಎಚ್ಚೆಮ್); ’ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ’ (ಆಂಡ್ರ್ಯೂ ಎಲ್. ಡಿ’ಕುನ್ಹಾ) ಆನಿ ’ಕಟ್ಪುತ್ಳಿ’ (ವಲ್ಲಿ ಕ್ವಾಡ್ರಸ್) ಬುಕಾಂಚೆರ್ ವಿಮರ್ಶಾತ್ಮನ್ ನದರ್ ಭಂವ್ಡಾವ್ನ್ ಕೆಲ್ಲೆಂ ವಸ್ತುನಿಷ್ಟ್ (objective) ಲೇಖನ್.
ಮೆಲ್ವಿನ್ ಪಿಂಟೊ, ನೀರುಡೆ
ಆಯ್ಚೆಂ ಕೊಂಕ್ಣಿ ಕವಿತಾ ಶೆತ್ - ಏಕ್ ದೀಷ್ಟ್
ಥೊಡ್ಯಾ ತೆಂಪಾ ಆದಿಂ ಸಾಹಿತಿ ಎಡ್ವರ್ಡ್ ನಜ್ರೆತಾನ್, ಸದ್ದ್ಯಾಕ್ ಕೊಂಕ್ಣಿ ಭಾಷೆಕ್ ಆನಿ ಸಾಹಿತ್ ಶೆತಾಕ್ ಹೊ ಸುಗ್ಗೆಚೊ ಕಾಳ್ ಮ್ಹಳ್ಳೆಂ ಥರಾವಳ್ ರಿತಿಂನಿ ಸಾರ್ಕೆಂ. ಎಕೆ ರಿತಿಚಿ ಕ್ರಾಂತಿಚ್ ಕೊಂಕ್ಣೆಂತ್ ಆಜ್ ಚಲೊನ್ ಆಸಾ ಮ್ಹಳ್ಯಾರ್ ಚೂಕ್ ಜಾಂವ್ಚಿನಾ. ಕೊಂಕ್ಣಿ ಕಾರ್ಯಿಂ, ಸಂವಾದ್, ಭಾಸಾಭಾಸ್ ಚಡ್ಲ್ಯಾತ್. ಸಭಾರ್ ವರ್ಸಾಂನಿ ಪರ್ಗಟ್ ಜಾಂವ್ಕ್ ನಾತ್ಲ್ಲೆ ತಿತ್ಲೆ ಬೂಕ್ ಪಾಟ್ಲ್ಯಾ ಥೊಡ್ಯಾ ವರ್ಸಾಂನಿ ಪರ್ಗಟ್ ಜಾಲ್ಯಾತ್. ಕೊಂಕ್ಣೆಚ್ಯಾ ಫುಡಾರಾವಿಶಿಂ ಖಂತ್, ಅಕ್ಲಾಸ್ ಆಸ್ಲ್ಲ್ಯಾಬರಿಚ್ ಕೊಂಕ್ಣೆಂತ್ ಚಡಿತ್ ಪತ್ರಾಂ, ಚಡಿತ್ ಕೆಸೆಟಿ, ನಾಟಕ್ ಆನಿ ಫಿಲ್ಮ್ ಸಯ್ತ್ ಯೇವ್ನ್ ಆಸಾ!
ಕೊಂಕ್ಣಿ ಕವಿತಾ ಶೆತಾಕ್ಯ್ ಹೊ ಏಕ್ ಸುಗ್ಗೆಚೊ ಕಾಳ್ಚ್ ಸಯ್. ಕವಿತಾ ಪಾಠ್, ಕವಿಗೋಷ್ಟಿ ಚಡೊನ್ ಆಸಾತ್. ಗಲ್ಫಾಂತ್ ಕವಿತಾ ಶೆತಾವಿಶಿಂ ಚಡಿತ್ ಹುಸ್ಕೊ ಆನಿ ಮೋಗ್ ದಿಸೊನ್ ಯೆತಾ. ಚಡ್ ಕವಿತಾ ಸಂಗ್ರಹ್ ಪರ್ಗಟ್ ಜಾಲ್ಯಾತ್. ಪಾಟ್ಲ್ಯಾ ತೀನ್ ವರ್ಸಾಂನಿ ಕನ್ನಡ್ ಲಿಪಿಯೆಂತ್ಲೆ ಕೊಂಕ್ಣೆಂತ್ ಸುಮಾರ್ ಬಾರಾ ಕವಿತಾ ಸಂಗ್ರಹ್ ಭಾಯ್ರ್ ಆಯ್ಲ್ಯಾತ್ - ಮ್ಹಳ್ಯಾರ್ ವರ್ಸಾಕ್ ಚ್ಯಾರ್.
ಕವಿಂಚೊ ಸಂಕೋಯ್ ಚಡ್ಲಾ. ನವೆ ನವೆ, ಸಿಂತಿಮೆಂತಾಳ್ ತಿತ್ಲೆಚ್ ತಾರ್ಕಿಕ್, ಮಾರ್ಮಿಕ್ ಆನಿ ಸೂಕ್ಷ್ಮ್, ಆಶಾವಾದಿ ಆನಿ ನಿರಾಶಾವಾದಿ; ಪುಣ್ ಚಡ್ತಾವ್ ಗಂಭೀರ್, ಕವಿ ಕೊಂಕ್ಣೆಂತ್ ಫುಲೊನ್ ಆಸಾತ್. ಕನ್ನಡ್ ಭಾಷೆಂತ್ ಪಳೆಯಾ - ಥಂಯ್ಸರ್ ಆಜ್ಯ್ ಕವಿ ಮ್ಹಳ್ಯಾರ್ ಲಕ್ಷ್ಮೀ ನಾರಾಯಣ ಭಟ್ಟ, ಜಿ.ಎಸ್. ಶಿವರುದ್ರಪ್ಪ, ವೆಂಕಟೇಶ್ ಮೂರ್ತಿ ಆನಿ ಚೆನ್ನವೀರ್ ಕಣವಿ. ಹಾಂಚಿ ಸರ್ವಾಂಚಿ ಪ್ರಾಯ್ ಪಾಂಚಾಟಾಂಕ್ ಉತರ್ಲ್ಯಾ. ತರ್ನೆ ಕುಳಿಯೆಂತ್ ಹ್ಯಾ ಕವಿಂಕ್ ಸಮಾನ್ ರಾಂವ್ಚೆ ಭರ್ವಶ್ಯಾಚೆ ಕವಿ ಕೊಣ್ಯ್ ದಿಸನಾಂತ್. ಸಿದ್ಧಲಿಂಗಯ್ಯ, ಬರಗೂರು ತಸಲೆ ದಲಿತ್-ಬಂಡಾಯ್ ಕವಿ ಆಜ್ ರಾಜಕೀಯ್ ಕವಿ ಜಾಲ್ಯಾತ್. ತಾಂಚ್ಯಾ ಕವನಾಂನಿ ಅಧಿಕಾರ್ಶಾಹಿ ವೆವೆಸ್ತೆಕ್ ಫುಗಾರ್ನ್ ಘೆಟೆ ಜಾಲ್ಲಿಂ ಭೊಗ್ಣಾಂಚ್ ದಿಸ್ತಾತ್ ಶಿವಾಯ್ ದಣ್ಸಲ್ಲ್ಯಾಂಚೆಂ ದೂಕ್ ವ್ಹಾಳ್ಚೆಂ ದಿಸನಾ. ಇಂಗ್ಲಿಷ್ ಭಾಷೆಚಿ ಗತ್ಯ್ ತಿಚ್! ಇಂಗ್ಲಿಷಾಂತ್ ಲಿಕ್ಚೆ ಆಯ್ಚೆ ಪ್ರಬುದ್ಧ್ ಕವಿ ಕೋಣ್ ಮ್ಹಣ್ ವಿಚಾರ್ಲ್ಯಾರ್ ಬೋಟ್ ಜೊಕುಂಕ್ಯ್ ಕೋಣ್ಯ್ ನದ್ರೆಕ್ ಪಡನಾ. ಎಜ್ರಾ ಪಾಂವ್ಡ್, ಟಿ.ಎಸ್. ಇಲಿಯೆಟ್ ತಸಲೆ ನಾಂವ್ ವೆಲ್ಲೆ ಕವಿ ಮರೊನ್ ಆತಾಂ 20-30 ವರ್ಸಾಂ ಜಾಲಿಂ. ತಾಂಚೆ ಉಪ್ರಾಂತ್ ಪ್ರಬುದ್ಧ್ ಮ್ಹಣ್ಚೊ ಕವಿ ಇಂಗ್ಲಿಷಾಂತ್ ದಿಷ್ಟಿಕ್ ಪಡನಾ.
ದೆಕುನ್ಚ್ ಕೊಂಕ್ಣಿ ಕವಿತಾ ಶೆತಾಕ್ ಹೊ ಸುಗ್ಗೆ ಕಾಳ್ ಮ್ಹಣ್ ಸಾಂಗ್ಲ್ಲ್ಯಾಂತ್ ವ್ಹಡ್ಪಣ್ ಕಾಂಯ್ ನಾ. ಕೊಂಕ್ಣೆಚೆ ವ್ಹಡ್ ಅಮರ್ ಕವಿ ಲುವಿಸ್ ಮಸ್ಕರೇಞ್, ಚಾಫ್ರಾ, ಮರಿದಾಸ್, ರಾನ್ ಉದ್ಯಾವರ್ ಆನಿ ಆಜೂನ್ ಲಿಕ್ಚೆ ಮ್ಹಾಲ್ಘಡೆ ಕವಿ ಜೆ.ಬಿ. ಮೊರಾಯಸ್ ಆನಿ ಜೆ.ಬಿ. ಸಿಕ್ವೇರಾ ಹಾಂಣಿ ಝರಯಿಲ್ಲಿ ವಾಟ್ ಧರ್ನ್ಚ್ ಚಮ್ಕಲ್ಲ್ಯಾ ನವೆ ಪಿಳ್ಗೆಚ್ಯಾ ಕೊಂಕ್ಣಿ ಕವಿಂನಿ ಆಜ್ ತಾಂಚ್ಯಾಚ್ ಖಾಶೆಲೆಪಣಾಂತ್ ಅಸ್ಮಿತಾಯೆಚೆಂ ಕಾವ್ಯೆಂ ಭಾಯ್ರ್ ಹಾಡ್ಚೆಂ ದೆಕೊನ್ ಹರ್ಎಕಾ ಕೊಂಕ್ಣಿ ಕವಿತಾ ಮೊಗಿನ್ ದಾಧೊಸ್ ಜಾಂವ್ಚೆಂ ವಾಜ್ಬಿ.
2003 - 2004 ವರ್ಸಾ ಕೊಂಕ್ಣೆಂತ್ ಪರ್ಗಟ್ ಜಾಲ್ಲ್ಯಾ ಪ್ರಮುಕ್ ಚ್ಯಾರ್ ಕವಿತಾ ಸಂಗ್ರಹಾಂಚೆರ್ ’ವಾಟ್’ (ಮೆಲ್ವಿನ್ ರೊಡ್ರಿಗಸ್); ’ಕಯ್ದ್ಯಾಚ್ಯೊ ಕವಿತಾ’ (ಎಚ್ಚೆಮ್); ’ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ’ (ಆಂಡ್ರ್ಯೂ ಎಲ್. ಡಿಕೂನ್ಹಾ) ಆನಿ ’ಕಟ್ಪುತ್ಳಿ’ (ವಲ್ಲಿ ಕ್ವಾಡ್ರಸ್) ಖೊಲಾಯೆನ್ ದೀಷ್ಟ್ ಘಾಲ್ನ್ ಪ್ರಸ್ತುತ್ ಕೊಂಕ್ಣಿ ಕವಿತಾ ಶೆತಾಚಿ ಪರಿಗತ್ ಕಸಲಿ, ಫುಡಾರ್ ಕಸಲೊ ತೆಂ ತಜ್ವೀಜ್ ಕರ್ಚೆಂ ಪ್ರೇತನ್ ಹ್ಯಾ ಲೇಕನಾಂತ್ ಕರ್ತಾಂ.
ನವೋದಯ್, ನವ್ಯ್, ನವ್ಯೋತ್ತರ್ ಪ್ರಭಾವ್:
ಆಮ್ಚ್ಯಾ ಕವಿಂಕ್ ಹೆರ್ ಭಾಸಾಂಚ್ಯಾ ವಿಶೇಸ್ ಕರ್ನ್ ಇಂಗ್ಲಿಷ್ ಆನಿ ಕನ್ನಡ್, ಸಾಹಿತ್ಯಾಸವೆಂ ಸಂಪರ್ಕ್ ಆಸಾ ಮ್ಹಳ್ಳೆಂ ತಾಂಚೆರ್ ತ್ಯಾ ಸಾಹಿತ್ಯಾಚೊ ಪಡ್ಲಾ ತೊ ಪ್ರಭಾವ್ ದೆಕ್ತಾನಾ ಕಳ್ತಾ. ನೀಜ್ ಜಾವ್ನ್ ಪಳೆಲ್ಯಾರ್ ಕನ್ನಡ್ ಕವಿತಾ ಶೆತಾಕ್ ಇಂಗ್ಲಿಷ್ ಸಾಹಿತ್ಯಾಚೊ, ಥಂಯ್ಚ್ಯಾ ಚಳ್ವಳೆಂಚೊ ಪ್ರಭಾವ್ ಬರ್ಪೂರ್ ಪಡ್ಲಾ. ಇಂಗ್ಲಿಷಾಚ್ಯಾ ’ರಿನೆಸಾನ್ಸ್’ ಚಳ್ವಳೆಚೊ ಪ್ರಭಾವ್ ಕನ್ನಡಾಂತ್ ’ನವೋದಯ್’ ಚಳ್ವಳೆಕ್ ಕಾರಣ್ ಜಾಲೊ ತರ್, ’ಮೊಡರ್ನಿಸಮ್’ ಆನಿ ಅಸ್ತಿತ್ವ್ವಾದ್ ’ನವ್ಯ್’ ಕ್ರಾಂತೆಕ್ ಮೂಳ್ ಜಾಲೊ. ಜಾಲ್ಯಾರಿ ಪ್ರಗತಿಶೀಲ್ ಆನಿ ದಲಿತ್-ಬಂಡಾಯ್ ಕವಿಂನಿ ಆಪ್ಲೆ ಮಾತಿಯೆಚಿ ಮೂರ್, ಆಪ್ಲ್ಯಾ ಮನ್ಶಾಂಚಿಂ ಭೊಗ್ಣಾಂ, ಸಿಂತಿಮೆಂತಾಂ ವೆಕ್ತ್ ಕರ್ಚೆಂ ಪ್ರೇತನ್ ಕೆಲೆಂ.
ಮೆಲ್ವಿನ್ ರೊಡ್ರಿಗಸಾಚ್ಯಾ ’ವಾಟ್’ ಆನಿ ಎಚ್ಚೆಮ್ಮಾಚ್ಯಾ ’ಕಯ್ದ್ಯಾಚ್ಯೊ ಕವಿತಾ’ ಸಂಗ್ರಹಾಂನಿ ಅಸಲ್ಯಾ ಚಳ್ವಳೆಂಚೊ ಬಳ್ವಂತ್ ಪ್ರಭಾವ್ ದಿಷ್ಟಿಕ್ ಪಡ್ತಾ. ತರಿಕೀ ಕವಿ ಮೆಲ್ವಿನ್ ರೊಡ್ರಿಗಸ್ ಆಪ್ಲಿ ವಿಮರ್ಶಾ ನದರ್ ಬೋವ್ಚ್ ಚಡ್ ಪ್ರಯೋಗ್ ಕರ್ತಾ. ನವ್ಯೋತ್ತರ್ ಪ್ರಭಾವ್ ತಾಚೆರ್ ಪಡ್ಲ್ಲ್ಯಾ ತಿತ್ಲೊಚ್ ತೊ ನವ್ಯೋತ್ತರ್ ರಿತಿ-ರಿವಾಜಿಂಚಿ ಠಿಕಾ ಕರ್ತಾ. ಆಜ್ ಜಾಗತೀಕರಣ್ ಆನಿ ನವ್ಯೋತ್ತರ್ ಚಿಂತ್ಪಾ ಲಾಗ್ಶಿಲೊ ಬಾಂಧ್ ಆಸಾ. ನವ್ಯೋತ್ತರ್ ಚಿಂತಪ್ - ಜಾಗತೀಕರಣಾ ಧರ್ಮಾನ್ ಘಡೊನ್ ಆಸಾತ್ ತ್ಯಾ ಅನಾಹುತಾಂಚಿ ಖರಿ ಠಿಕಾ ಕರಿನಾಸ್ತಾಂ, ಖಾವ್ಗೆ ಸಂಸ್ಕೃತೆಕ್ ಇಂಬು ದಿಂವ್ಚೆಬರಿ ಆಸಾ. ದೆಕುನ್ಚ್ ಕವಿ ಮೆಲ್ವಿನ್ ರೊಡ್ರಿಗಸ್ ಹೆ ವಾಟೆಥಾವ್ನ್ ಆಡ್ ವಚೊನ್ ಆಪ್ಲಿಚ್ ವಾಟ್ ಝರಂವ್ಚೆಂ ಪ್ರೇತನ್ ಕರ್ತಾ ಆನಿ ತೆ ದಿಶಿಂ ಸುಫಳ್ಯ್ ಜಾಲಾ.
ನವ್ಯ್ ಆನಿ ನವೋದಯ್ ಚಿಂತ್ಪಾಚೊ ಚಡಿತ್ ಪ್ರಭಾವ್ ಕವಿ ಎಚ್ಚೆಮ್ಮಾಚೆರ್ ಪಡ್ಲಾ. ಚಿಂತ್ಪಾ ಗುಂಡಾಯೆಂತ್ ಮೆಲ್ವಿನ್ ರೊಡ್ರಿಗಸ್ ಆನಿ ಎಚ್ಚೆಮ್ ಎಕಾಚ್ ಸ್ತರಾರ್ ರಾವ್ತಾತ್. ಪುಣ್ ಎಚ್ಚೆಮ್ ಸಂಸಾರಾಚಿಂ ’ಪಾತ್ಕಾಂ’ ಚಡಿತ್ ವೆಯುಕ್ತಿಕ್ ರಿತಿನ್ ಘೆತಾ ತರ್ ಮೆಲ್ವಿನ್ ಏಕ್ ಮೇಟ್ ಪಯ್ಸ್ ರಾವೊನ್ಚ್ ಠಿಕಾ ಕರ್ತಾ. ’ವಿನತಿ’ ಕವನಾಂತ್ ಎಚ್ಚೆಮ್ ಅಸೊ ರಡ್ತಾ:
"ಕೆನ್ನಾಂಯ್
ಅಸೊ ಉಜೊ ಪೆಟಯ್ನಾಕಾತ್
ಮಾಸಾಂ ಭಾಜ್ತಾತ್, ರಗ್ತಾಂ ಪೆಟ್ಟಾತ್
- ಬೊಬೆಕ್
ಶೆರ್ ಲುಟ್ತಾನಾ, ಪಿರಾಣ್ ಲಜ್ ಸಾಂಗಾತಾ
ಲುಟ್ತಾತ್"
ಎಚ್ಚೆಮಾಚೊ ಜಿವೊ ಜಿವೊ ಅನ್ಭೋಗ್ ಹಾಂಗಾ ಭಾಜೊನ್ ವಾಸ್ ಉಟಯ್ತಾ.
ತಾಚೊ ’ಮೋಗ್ಯ್ ಪ್ರಬುದ್ಧ್. ತ್ಯಾ ಮೊಗಾಂತ್ ಜಡಾಯ್ ಆಸಾ, ಜವಾಬ್ದಾರಿ ಆಸಾ. ಬೇಂದ್ರೆ, ಕೆ.ಎಸ್.ನ. - ಚ್ಯಾ ಕವನಾಂನಿ ವ್ಹಾಳ್ತಾ ತಸಲೊ ಮೋಗ್ ತೊ:
"ಶಿತಾಚ್ಯಾ
ಹರ್ ಘಾಸಾಂತ್ಗೊ ಸ್ವಾದ್ ತುಜ್ಯಾ
ಹಾತಾಚೊ
ಆಮೊರೆಚೆ ಘಾಂಟಿಂತ್ ನಾದ್ ತುಜ್ಯಾ ಪಾಚ್ವ್ಯಾ
ಕಾಂಕ್ಣಾಂಚೊ
ಮೆಜಾ ಕೊನ್ಶಾರ್ ತುಟೊನ್ ಪಡ್ಲ್ಲೊ
ಬಾಜ್ವೆ ಬುತಾಂವ್ ತುಜೊ
ಸಾಕ್ಷೆಕ್ ಉರ್ಲ್ಯಾ ಅಳ್ಣಿ ಪೆಜೆ ನೀಸ್
ಮೊಡ್ಕೆ ಥಳಾಂತ್" (ತುಜೆವೀಣ್)
ನವ್ಯೋತ್ತರ್ ಪ್ರಭಾವ್ ಆಂಡ್ರ್ಯೂ ಎಲ್. ಡಿ’ಕುನ್ಹಾಚೊ ಕವಿತಾ ಸಂಗ್ರಹ್, ’ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ’ಂತ್ ದಿಷ್ಟಿಕ್ ಪಡ್ತಾ. ನವ್ಯೋತ್ತರ್ ಸಂಸ್ರಾಚಿ ಅಸಹಜತಾ, ಆದರ್ಶ್ವಾದ್ ಇತ್ಯಾದಿಂಚಿ ಝಳಕ್ ಥಂಯ್ಚ್ಯಾ ಥೊಡ್ಯಾ ಕವನಾಂನಿ ಆಮಿ ದೆಕ್ಯೆತ್. ತರಿಕಿ ಸೂಕ್ಷ್ಮ್ ಸಂವೇದನ್ ಆಂಡ್ರ್ಯೂಚಿ ಸಕತ್.
ಸಾಂಕೇತಿಕತಾ:
ಕೊಂಕ್ಣಿ ಕವಿತಾ ಶೆತ್ ಆಜ್ ಚಡಿತ್ ಗಿರೆಸ್ತ್ ದಿಸೊಂಕ್ ಆನ್ಯೇಕ್ ಕಾರಣ್, ಥಂಯ್ಸರ್ ವಾಪರ್ ಜಾಲ್ಲೊ ಪ್ರತಿಮಾಂ, ಸಂಕೇತ್, ರೂಪಕಾಂಚೊ ಪ್ರಯೋಗ್. ಏಕ್ ಕವಿತಾ ಆಮ್ಕಾಂ ಆವಡ್ಚೆ ಥಂಯ್ ಹಾಂಚೊ ಪಾತ್ರ್ ವಿಶೇಸ್ ಆಸಾ. ನವ್ಯ್, ನವ್ಯೋತ್ತರ್ ಸಾಹಿತ್ಯಾಂತ್ಯ್ ಪ್ರತಿಮಾಂ, ಸಂಕೇತಾಂಚೊ ವಾಪರ್ ಚಡ್. ಅಶೆಂ ತೊ ಪ್ರಭಾವ್ ಕವಿಂಕ್ ಬರ್ಯಾಕ್ಚ್ ಪಡ್ಲಾ. ಮೆಲ್ವಿನ್ ರೊಡ್ರಿಗಸ್ ಬಳ್ವಂತ್ ಸಂಕೇತ್ ವಾಪರ್ನ್ ಜೊಕ್ತೊ ಅರ್ಥ್ ಭಾಯ್ರ್ ಹಾಡ್ಚ್ಯಾಂತ್ ಶಾಣೊ. ’ವಾಟ್’ ಕವನಾಚಿಂ ’ಟಯರಾಂ’, ’ಜೋಗ್ಫೊಲ್ಸ್’, ’ರೆಂವೆಚೆ ಕಣ್’, ’ಝುಜ್’ ತಾಣೆ ವಾಪರ್ಲ್ಲೆ ಮಜ್ಬೂತ್ ಸಂಕೇತ್. ’ದೆವಾ ಮ್ಹಜ್ಯಾ’ ಕವನಾಂತ್ಲ್ಯೊ ಥೊಡ್ಯೊ ಪಂಕ್ತಿ ಅಶ್ಯೊ ವ್ಹಾಳ್ತಾತ್:
"ಮನ್ಶಾ
ಉತರ್ ಕೊಡು ಘರೊ
ಕಾಳೀಜ್ ಫಾತ್ರಾ ಮುರೊ
ಘೆಂವ್ಚೆಂ ಜಾಲ್ಯಾರ್ ಸಗ್ಳೇಂಯ್ ಆಸಾ
ಮಾಯಾಮೊಗಾಕ್ ಮೆರೊ"
ಫಕತ್ ತೀನ್ ಪ್ರತಿಮಾಂ ವಾಪರ್ನ್ ಕಾಂಟ್ಭರ್ ಅರ್ಥ್ ಉಸ್ಕಾಯ್ತಾ ತೆಂ!
’ಕಾಂಕ್ಣಾಂ ಗಲ್ಲೆಂತ್’ ಕವನಾಂತ್ ಎಚ್ಚೆಮ್ ’ಕಾಂಕಣ್’ ಏಕ್ ಮಾರ್ಮಿಕ್ ಸಂಕೇತ್ ಕಸೊ ಕರ್ತಾ. ’ಕಟ್ಪುತ್ಳಿ’ ಸಂಗ್ರಹಾಂತ್ ವಲ್ಲಿ ಕ್ವಾಡ್ರಸಾನ್ ಬೊಂಬಿಂ, ಸರ್ಕಸ್ ಅಸಲೆ ಬಳ್ವಂತ್ ಸಂಕೇತ್ ವಾಪರ್ನ್ ತೀಕ್ಷ್ಣ್ ಕವನಾಂ ಗುಂತ್ಲ್ಯಾಂತ್. ಆಂಡ್ರ್ಯೂನ್ ವಾಪರ್ಲ್ಲೊ ’ನೀದ್’ ಸಂಕೇತ್ ಚಡಿತ್ ಚಿಂತ್ಪಾಕ್ ಇಡೆಂ ಕರ್ನ್ ದಿತಾ.
ಅಸ್ತಿತ್ವ್ವಾದ್:
ಕೊಂಕ್ಣಿ ಕವಿತಾ ಶೆತಾಂತ್ ಸದ್ದ್ಯಾಕ್ ವ್ಹಾಳೊ ಆಸಾ ತ್ಯಾ ನವೀನ್ ಲ್ಹಾರಾಚೆಂ ಆನ್ಯೇಕ್ ಮುಕೆಲ್ ಲಕ್ಷಣ್, ಕವಿನ್ ಆಪ್ಣಾಕ್ಚ್ ಸೊಧುಂಕ್ ಕರ್ಚೆಂ ಪ್ರೇತನ್! ಎಕೆ ರಿತಿಂ ಅಸ್ತಿತ್ವ್ವಾದಾಚೊ ಪ್ರಭಾವ್ ಹೊ. ಕವಿ ಚಡ್ ಆನಿ ಚಡ್ ಆಪ್ಣಾಭಿತರ್ ವೆತಾ; ಆಪ್ಲ್ಯಾ ಅಸ್ತಿತ್ವಾಕ್, ಜಿಣ್ಯೆಕ್ ಅರ್ಥ್, ಶೆವೊಟ್ ಸೊಧುಂಕ್ ಚಡ್ಪಡ್ತಾ.
’ಹಾಂವ್ ಆನಿ ತೊ’ ಕವನಾಂತ್ ಕವಿ ಆಂಡ್ರ್ಯೂ ಆಪ್ಣಾ ಭಿತರ್ಚ್ ಎಕಾ ಆದರ್ಶ್ ವೆಕ್ತಿಕ್ ರಚ್ತಾ. ಆಪುಣ್ ತ್ಯಾ ಆದರ್ಶ್ ವೆಕ್ತಿಪರಿಂ ಜಾಂವ್ಕ್ ನಾ ತೆಂ ದೂಕ್ ಎಕೆ ವಾಟೆನ್ ತರ್ ತಾಚೆ ಉಂಚಾಯೆಕ್ ಪಾವಜೆ ಮ್ಹಳ್ಳೆಂ ಹಟ್ಯ್ ಕವಿಲಾಗಿಂ ಆಸಾ. ಪುಣ್ ಆಪ್ಣಾಕ್ಚ್ ಆಪ್ಣೆಂ ಆಜೂನ್ ಸಂಪೂರ್ಣ್ ದೆಕೊಂಕ್ ನಾ ತೆಂ ಆಡೂಕ್ ಸತ್ಯ್ (’ಗುಂಡಾಯೆಥಾವ್ನ್’) ತಾಕಾ ಕಳಿತ್ ಆಸಾ.
ವಲ್ಲಿ ಕ್ವಾಡ್ರಸಾಚೆಂ ’ಹಾಂವ್, ಹಾಂವ್ ನ್ಹಂಯ್’ ಕವನ್ಯ್ ಹೆಚ್ ಕಾಲೆತಿಚೆಂ. ಹ್ಯಾ ಕ್ರೂರ್ ಸಂಸಾರಾಂತ್ ಆಪುಣ್ ಕೃತಕ್ ಜಿಣಿ ಜಿಯೆತಾಂಗಾಯ್, ಪರಿಗತಿಥಾವ್ನ್ ಪೊಳಾಪೊಳ್ ಘೆಂವ್ಚ್ಯಾ ಖಾತೀರ್ ವಿವಿಧ್ ರುಪಾಂ ಘೆತಾಂಗಾಯ್ ಮ್ಹಳ್ಳೆ ದುಭಾವ್ ಕವಿಲಾಗಿಂ ಆಸ್ಲ್ಲ್ಯಾನ್ ತೊ ಅಶೆಂ ಆಪ್ಲ್ಯಾಚ್ ಅಸ್ತಿತ್ವಾಕ್ ಸವಾಲ್ ಘಾಲುನ್ ’ಹಾಂವ್, ಹಾಂವ್ ನ್ಹಂಯ್’ ಮ್ಹಣ್ತಾ!
ಎಕ್ಸುರ್ಪಣಾಂತ್ ಅರ್ಥ್ ಸೊದ್ಚ್ಯಾ ಕವಿ ಎಚ್ಚೆಮ್ಮಾನ್ ಲಿಕ್ಲ್ಲ್ಯಾ ಥೊಡ್ಯಾ ಕವನಾಂನಿ ಆಪ್ಣಾ ಭಿತರ್ಚ್ ದೆವೊಂಕ್ ಕೆಲ್ಲೆಂ ಪ್ರೇತನ್ ದಿಸೊನ್ ಯೆತಾ. ಮೆಲ್ವಿನ್ ರೊಡ್ರಿಗಸಾಚ್ಯಾ ಥೊಡ್ಯಾ ಸ್ವಗತ್ ಕವನಾಂನ್ಯ್ ಕವಿ ಸ್ವ-ವಿಮರ್ಸೊ ಕರ್ತಾ; ಆಪ್ಣೆಂ ಚಮ್ಕಲ್ಲ್ಯೊ ವಾಟೊ ಸಾರ್ಕ್ಯೊಗಿ ಮ್ಹಳ್ಳೆಂ ತಜ್ವೀಜ್ ಕರ್ತಾ!
ಆಪಾಪ್ಲೆ ಜಿಣಿಯೆಕ್, ಅಸ್ತಿತ್ವಾಕ್ ಸವಾಲಾಂ ಘಾಲ್ನ್ ವಿಮರ್ಸೊ ಕೆಲ್ಲ್ಯಾ ಕವಿಂನಿ ಆಪ್ಲೆ ಜಿಣಿಯೆ ಧೋರಣ್ ಸ್ಪಷ್ಟ್ ಕೆಲಾಂ. ಅಸ್ತಿತ್ವ್ವಾದಾಚ್ಯಾ ವಾಯ್ಟ್ ಪರಿಣಾಮಾಂಕ್ ವೊಳಗ್ ಜಾಯ್ನಾತ್ಲ್ಲೆಬರಿ ತೆ ಜಾಗ್ರುತ್ ರಾವ್ಲ್ಯಾತ್. ತೆಂಚ್ ತಾಂಚೆಂ ವ್ಹಡ್ಪಣ್!
ಸಾಮಾಜಿಕ್ ಹುಸ್ಕೊ:
ಹಾಂಗಾಚ್ಯಾ ಚಾರ್ಯೀ ಕವಿಂ ಥಂಯ್ ಸಾಮಾಜಿಕ್ ಹುಸ್ಕೊ ಭರೊನ್ ವೊಮ್ತಾತಾ. ಕವಿ ಜಾಲ್ಲ್ಯಾಕ್ ಆಸಜೆ ಜಾಲ್ಲಿ ಜವಾಬ್ದಾರಿ ತಿ. ತಾಣೆ ಫಕತ್ ಅಸಂಗತ್ ಉರೊನ್, ಸಿಂತಿಮೆಂತಾಳ್ ಜಾವ್ನ್ ಎಕ್ಸುರೊಚ್ ಆಸ್ಲ್ಯಾರ್ ತಸಲ್ಯಾ ಕವಿಂದ್ವಾರಿಂ ವಾಚ್ಪೀಯ್ ಚಡ್ ಸಿಂತಿಮೆಂತಾಳ್ ಜಾವ್ನ್ ವಿಮರ್ಶಾತ್ಮಕ್ ನದರ್ ಆಪ್ಣಾಯ್ನಾಸ್ತಾಂ ಉರ್ಚೊ ಆಪಾಯ್ ಆಸಾ.
ಕವಿ ಮೆಲ್ವಿನ್ ಆನಿ ಆಂಡ್ರ್ಯೂ ಝುಜಾಚಿಂ, ಜಾಗತೀಕರಣಾಚಿಂ ಕ್ರೂರ್ ದೃಶ್ಯಾಂ ದೆಕೊನ್ ತಾಂಚೆದ್ವಾರಿಂ ಜಾಲ್ಲಿಂ ಅನಾಹುತಾಂ ದೆಕೊನ್ ಕಳ್ವಳ್ತಾತ್ ಆನಿ ಬಳ್ವಂತ್ ಹಂಕಾರಿ ರಾಶ್ಟ್ರಾಂ ವಯ್ರ್ ಉತ್ರಾಂಚೆಂ, ಭೊಗ್ಣಾಂಚೆಂ ’ಝುಜ್’ ಮಾಂಡ್ತಾತ್. ಕವಿ ವಲ್ಲಿ ಕ್ವಾಡ್ರಸ್ ಆಪ್ಲ್ಯಾ ಭೊಂವ್ತಿಂಚ್ಯಾ ಹಿಪೊಕ್ರಿತಾಂ ವಯ್ರ್ ಝುಜ್ ಮಾಂಡ್ತಾ ಆನಿ ಎಚ್ಚೆಮ್ಮಾಕ್ ಶ್ಹೆರಾಂನಿ ಪಳಯಿಲ್ಲ್ಯಾ ಭಿರಾಂಕುಳ್ ದೃಶ್ಯಾಂನಿ ಧಕೊ ಜಾತಾ, ಸಂಸ್ಕೃತೆಚೆರ್ಯ್ ಜಾವ್ನ್ ಆಸ್ಚೊ ಹಲ್ಲೊ ಪಳೆವ್ನ್ ತೊ ಕಳ್ವಳ್ತಾ.
ಹೆ ಚಾರ್ಯ್ ಕವಿ ಪ್ರಬುದ್ಧ್ ಜಾವ್ನ್ ಫುಲ್ಲ್ಯಾತ್. ಎಕಾ ತೆಂಪಾರ್ ಕೊಂಕ್ಣಿ ಕವಿತಾ ಮ್ಹಳ್ಯಾರ್ ತೆಲ್ತ್ಯಾ ಮೊಗಾನ್ ಘೆಟೆ ಜಾಲ್ಲಿಂ ಭೊಗ್ಣಾಂ ಮಾತ್ರ್ ತರ್, ಆಜ್ ಕವಿಂಚಿ ದೀಷ್ಟ್ ವಿಶಾಲ್ ಜಾಲ್ಯಾ. ತಶೆಂ ಮ್ಹಣ್ ’ಮೋಗ್’ ನಾ ಮ್ಹಣ್ ನ್ಹಂಯ್. ತಾಚಿ ವ್ಯಾಪ್ತ್ ವಿಸ್ತಾರ್ಲ್ಯಾ. ಹಾಂಗಾಚೊ ಮೋಗ್ ಪರಿಪಿಕಾಯೆಚೊ, ಜವಾಬ್ದಾರಿಚೊ ಮೋಗ್. ಸಾಮಾಜಿಕ್ ಹುಸ್ಕೋಯ್ ಎಕೆ ರಿತಿಚೊ ಮೋಗ್.
ಪುಣ್ ಆಮ್ಚೆ ಕವಿ ನಿರಾಸ್ ಕಿತ್ಯಾಕ್?
ಹೆ ಚಾರ್ಯ್ ಕವಿತಾ ಸಂಗ್ರಹ್ ಎಕಾ ಉಸ್ವಾಸಾನ್ ವಾಚುನ್ ಕಾಡ್ಲ್ಯಾ ಉಪ್ರಾಂತ್ ಹೆಂ ಸವಾಲ್ ಸಹೃದಯಿಕ್ ಧೊಸ್ತಾ. ಹರ್ಎಕಾ ಸಂಗ್ರಹಾಂತ್ ನಿರಾಸ್ ಭೊಗ್ಣಾಂ ವಿಶೇಸ್ ಆಸಾತ್ ಯಾ ಕರುಣ್ ರಸ್ಚ್ ಚಡ್ತಾವ್ ಕವನಾಂನಿ ಉಸ್ಕೆತಾ. ನವ್ಯ್, ನವ್ಯೋತ್ತರ್ ಲ್ಹಾರಾಂಚೊ ವಾಯ್ಟ್ ಪ್ರಭಾವ್ ಹೊಗೀ ಕಳನಾ. ಆಮ್ಚೆ ಕವಿ ಚಡ್ತಾವ್ ಜಿಣ್ಯೆಚಿ ಏಕ್ಚ್ ಕೂಸ್ ಪಳಯ್ತಾತ್ಗಿ ಮ್ಹಳ್ಳಿ ಭಿರಾಂತ್ಯ್ ದಿಸ್ತಾ.
’ವಾಟ್’ ಸಂಗ್ರಹಾಂತ್ ಕಿತ್ಲಿ ಗುಂಡಾಯ್ ಆಸಾಗಿ, ತೆ ಗುಂಡಾಯೆ ಥಾವ್ನ್ಚ್ ದೂಕ್ ಉಟೊನ್ ಯೆಂವ್ಚೆಂ ದಿಸ್ತಾ. ಜಾಂವ್ಕ್ ಪುರೊ, ಕವಿಕ್ ಜಾಲ್ಲೆ ಅನ್ಭೋಗ್ಚ್ ತಸಲೆ ಆನಿ ಕವಿತಾ ಮಾಧ್ಯಮಾ ದ್ವಾರಿಂ ತಾಣೆ ಆಪ್ಲ್ಯಾ ದುಕಾಳ್, ವಿಕಾಳ್ ಅನ್ಭೋಗಾಂಕ್ ಉತ್ರಾಂ, ಭೊಗ್ಣಾಂ ಭರ್ಶಿಲ್ಯಾಂತ್. ಜಾಲ್ಯಾರಿ ಹಾಂಗಾಸರ್ ನಿರಾಶೆಂತ್ ಕವಿ ಭರ್ವಸೊ ದೆಕ್ಚೆಂ ಪ್ರೇತನ್ ಕರ್ತಾ ಮ್ಹಳ್ಳಿ ಗಜಾಲ್ ಸಮಾಧಾನಾಚಿ.
’ಕಯ್ದ್ಯಾಚ್ಯೊ ಕವಿತಾ’ ಸಂಗ್ರಹಾಂತ್ ಚಡ್ತಾವ್ ಕವನಾಂ ಚಡ್ ದುಕಾಳ್ ಆನಿ ನಿರಾಶಾದಾಯಕ್ ದಿಸ್ತಾತ್. ಪುಣ್ ಕವಿನ್ ತ್ಯೊಚ್ ಸಂಗ್ತಿ ಕವನಾಂಚೆಂ ಬಳ್ ಕಶೆಂ ಕೆಲ್ಲ್ಯಾನ್ ಕವಿ ಜಿಕ್ಲಾ.
ಆಂಡ್ರ್ಯೂಚೊ ’ವ್ಹಾಳೊ’ಯ್ ಕರುಣ್ ರಸಾನ್ ಭರೊನ್ ವ್ಹಾಳ್ತಾ. ನವೋದಯಾಚೊ ಜಾಯ್ ಪುರ್ತೊ ಪ್ರಭಾವ್ ತಾಚೆರ್ ಆಸ್ಲ್ಯಾರಿ ತಾಣೆ ಚಡಿತ್ ಸಂಭ್ರಮ್ ಕವನಾಂನಿ ಆಚರುಂಕ್ ನಾ. ಪುಣ್ ’ವ್ಹಳೂ ವ್ಹಳೂ ವ್ಹಾಳ್ ವ್ಹಾಳ್ಯಾ’ ಕವನಾಂತ್ ಪ್ರಕೃತೆಚೊ ವಿಶಿಷ್ಟ್ ಸಂಭ್ರಮ್ ಆಸಾ.
ವಲ್ಲಿ ಕ್ವಾಡ್ರಸಾಚ್ಯಾ ಬಂಡಾಯಾಕ್ ಮೂಳ್ ಕಾರಣ್ ನಿರಾಸ್ ಶಿವಾಯ್ ಹೆರ್ ಕಿತೆಂಚ್ ನ್ಹಂಯ್. ತಾಚ್ಯಾ ಭೊಂವ್ತಿಂ ಘಡ್ಚಿಂ ಅತರ್ವಣಾಂ ಪಳೆವ್ನ್ ಕವಿ ಧಂಡಳ್ಳಾ, ನಿರಾಶಿ ಜಾಲಾ ಆನಿ ಅಶೆಂ ಬಂಡಾಯ್ ಚಿಂತಪ್ ತಾಚೆ ಥಂಯ್ ಜಾಗೆಂ ಜಾಲಾಂ. ತರಿಕಿ ತಾಚ್ಯಾ ಕವನಾಂಚ್ಯಾ ನಿರಾಶೆ ಮಧೇಂಯ್ ತಾಚೊ ಏಕ್ ’ಹುಸ್ಕೋ’ಯ್ ಜಾಹಿರ್ ಜಾಲಾ.
ವಯ್ರ್ ಉಲ್ಲೇಕ್ ಕೆಲ್ಲ್ಯಾ ಕವಿತಾ ಸಂಗ್ರಹಾಂನಿ ಸಂಭ್ರಮಾಚಿಂ, ಸಂತೊಸಾಚಿಂ ಕವನಾಂ ನಾಂತ್ಚ್ ಮ್ಹಣ್ಚೆಂ ನ್ಹಂಯ್ ಹಾಂವೆಂ. ಥಂಯ್ಸರ್ ಜಿಣಿಯೆಚ್ಯೊ ದೋನ್ಯ್ ಖುಶಿ ಸಮಾನ್ ರಿತಿಂ ವೆಕ್ತ್ ಜಾವ್ನಾಂತ್ ಮ್ಹಳ್ಳೊ ಆಕ್ಶೇಪ್ ಮ್ಹಜೊ. ಕವಿ ಜಾಲ್ಲ್ಯಾನ್ ಹರ್ ಏಕ್ ಘಡಿ ಜಾಗ್ರುತ್ ರಾವಜೆ ಜಾಲ್ಲಿ ಗರ್ಜ್ ಆಸಾ. ನಾಂತರ್, ಎಕೆಚ್ ಕುಶಿಕ್ ಮಾಲ್ವೊನ್ ಥಂಯ್ಸರ್ಚ್ ವಿಶೇಸ್ ತ್ರಪ್ತಿ ಜೊಡುಂಕ್ ಅತ್ರೆಗೊನ್ ಸಂಸಾರ್ ವಿಸರ್ಚೊ ಯಾ ಚಡ್ ಆನಿ ಚಡ್ ನಿರಾಶಾವಾದಿ ಜಾಂವ್ಚೊ ಅಪಾಯ್ ಆಸಾ.
ಕನ್ನಡ
ಕವಿ ಬೇಂದ್ರೆ ಸಾಂಗ್ತಾ:
’ರಸವೆ ಜನನ
ವಿರಸ ಮರಣ
ಸಮರಸವೇ ಜೀವನ"
ರಸ, ವಿರಸ ದೋನ್ಯ್ ಮೆಳ್ಳ್ಯಾರ್ ಮಾತ್ರ್ ಸಮರಸ. ’ಏಕ್ ಘುಟ್: ನವರಸ್ಯ್ ಮೆಳ್ತಿತ್ ತರ್ ಸಮರಸ ಬೋವ್ಶ್ಯಾ ಕಷ್ಟಾಂಚೆಂ ಜಾಂವ್ಚೆಂ ನಾ. ಕೊಂಕ್ಣಿ ಕವಿತಾ ಶೆತಾಕ್ ಬರೊಚ್ ಫುಡಾರ್ ಆಸಾ. ಪುಣ್ ಆಮ್ಚ್ಯಾ ಕವಿಂನಿ ಸಂಸಾರ್ ವಸ್ತುನಿಷ್ಟ್ (objective) ರಿತಿನ್ ಪಳೆಂವ್ಚೆಂ ಪ್ರೇತನ್ ಮಾತ್ಶೆಂ ಚಡಯ್ಜೆ. ಆಮ್ಚ್ಯಾ ಕವಿಂಚೆಂ ಬರೆಂ ಜಾಂವ್!
[ಹೆಂ ವಿಮರ್ಶ್ಯಾ ಲೇಖನ್ ’ರಾಕ್ಣೊ’ ಹಾಫ್ತ್ಯಾಳ್ಯಾಚೆರ್ ಪರ್ಗಟ್ಲಾಂ]
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
