Konkani Beyond Scripts (- Andrew L Dcunha)
Monxak monxaponn samballunk oni ani taka rutam korunk bhas zai, punn tea monxak apli khas asmitai rakhunk mamybhas zai. Hi bhas ubzal'li bhaxa pondditanchea niymaullim thaun nhoi, hi ubhzal'li sadea monxanchea kallzant thaun, tanchea dispott'ttea jivitachea songhrxa thaun oni ekamekacho mog samballunk kel'lea sadea avazant.
Heach drixttikonantlean jednam ami konknni bhaxek polloitat, toull lipichea bhair ascho avazacho vixal somsar amkam mellta; hoch asa amchea ’konknni biondd skriptt’ (KonkanI Beyond Scripts) mhollear lipibhaili konknni) misamvacho prann.
Lokanchea vonttancher, kaveant, voveo-versamni ani kanniamni ti lipi nastanach pillgipillgek progot zaun vhall'lli. Survek avaz utram zaun vhall'llo, ani somajechea bodlaunnea tekit chintap choddtana lipi ani borop ailem. Somajent zal'lea bodlaunne tekit hi bhas bodlot geli. Chintap choddtana bhas vaddli ani hea vaddaullint aplea chintpak kaim rup diunko monxan poilem chitrokola ubzaili. Uprant chitram oni lipin borop ailem. Razam oni somddt ubzatana borvn ghalchem choddon ailem oni soukas borop chintpachem, vicharanche, progtechem sadon zalem. Punn hea sokkodd lipi progtechea poilem, avazacho madhyom' zaun asl'lem tem sahiteachem mullrup amchea motint samballunk zai.
Konknni bhaxecho itihas polloilear, ti zonmadim thaun ’biondd skriptt’; mhollear lipicheo goddi utron asl'li. Amcho patoll'llo konknni somaz vingodd-vingodd bhuprodexamni aplea asmitaye sovem jietana, tankam ekach sutran bandun dourl'lem sadhon mhollear avaz ani utrancho sado sangat. Konknni toxem pollelear survatek thaun lipichea sanklle thaun pois asl'li. Mhozo ponnzo konknni jielo. Taka ’lipi’ mholl'llea eka sahetachi ollok asl'li mhonn mhaka kollit na. Tache thaun hi bhas mhozo ozo piad ddi’kunha haka pauli. Toyi khoinchyai lipichea sankllek xirkanastam aplea jivitant konknnicho mukt xvas seun jielo.
Tachye uprant mhozo bapoi; zannem fokot tisri klas poreant xikop kel'lem, to konknni nemallim vhachtalo. Punn mhoji auy fokot poili klas xikl'lean tika vhachunk yenasolem. Mhozo bapoi sanjer aplea gineanantlean magjinantleo kannio, lekhnam ani kovita mhojye auy mukhar vhorn vhoddlean vachtalo ani ami bhurgim oturayen aikotaleamv. Hangasor mhozo konknni sahiteacho poilo obheas suru zalo; vhachun nhoi, tor fokot aikun!
hamvem mukhar mhojem sahity rochon korunk kon'nodd lipicho adhar ghetlo. Un'not sahity ghoddunk lipichi goroz asa sot, lipi khonddit zai. Lipi fokot bhaxek samballchem ek sahet vo aidan. Lipi mhollear svota bhas nhoi.
Ailevar hamve boryil'lem viddombon mhojea potinnek barich posond zalem. Ti mhonnali, zor mhojea mauxen aikalear khuxi zait. Hamve vachun rekordd kelem. Tea uprant tem viddombon kitlexea konknni lokak paulem tanka vachunk yena. Punn konknni lok to.
Amcho fuddaroyi heach vatten choltolo. Amchi mukhli pillgi xikop astolem, punn tim khoinchyai eka lipint masttor (Provinn) zatlim mhonn sangunk zaina. Tankam aplea jivitachye gorjetekit sahiteacho otreg astolo. Tantum tim mhojea bapai borich astolim; ji lipi zannat ti vachunk ani thoddem borounko soktolim, punn sahiteacho vhallo avaza mukhantr mukhar vhortolim. Aichea ddijittol yugant, monxean lipi sodhun kaddche poilem ji moukhik porompora asli, tich az novea rupan omchea mukhar ubi asa. Oxem mhonntana boromvchem unnem kochench nhoi. Punn omchea sahitimni kitem yedolloch boroilam tem lipichea sanklle thaun suttvn baxechea bandhan bandhunk zai. Sankoll (Chain) oni bandha (Bond) modhem forok osa. Sankhlleo bhailean astat. Teo ekant haddtat. Az konknni hea ekantant koxttota. Bandh bitlo. Bandh atmiyotak bandta. Konknni uraje oni fulaje tor sanklleo uddvn ho bandh ghott kocho gorjecho. Ho bandh ghoddchem misamv konknni biondd schriptt.
Punn hea misamvant gorjechi vhodd gozal mhollear; vanttun ghemvchem (Sharing). Ami zor amchem sahity saroutrik zaun vanttun gheunko na tor, amchem misamv nirfoll zatlem. Haka ugtem-mon (Open-mind) bhovo gorjechem. Ugtem mon natlear kitem zata mholl'lleak amchem songitoch ek vhodd udahoronn. Amchem konknni songit ani kantaranchea utrank lipi goroz asli punn uprant tanchem poinn utramni oni kanam mukhantr. Tim ekameka pavonk lipichi goroz natl'li. Toxem asleari tim fokot aplea nirdixtt prodexamnich simit urlim. Kiteak? karonn lokam ott'ttare aplo onbhog vanttunk aschi allsai oni omchea prodexa bhailem svikar korchem ugtem mon natl'lench. Ami hem bodlaije poddta. Amkam ek mukt mon zai jem sokkodd lipianchea sahiteak avaza mukhatr apnnaita. Amchea sahiteak mogacho sagor korchi goroz asa. Mhaka khoyan somzana oychea ddijittol kallar eka klikar omkam vachon kel'li kanni va kovita onyekleak dhaddunk zata zaleari ami kiteak hem borem kam' korinamv. Az hor loka lagim smartt fon asat. Tim magnnim aikatat. Tor konknni kannim-i aikonk soktat nhoi? konknni ovy khatir itlem-i ami kiteak korinamv? mogan omi vantteam. Konknnik mukt xvasan jieunko soddchench konknni biondd skriptt
Konknni fokot lipint na. Konknni kallzachea talleant asa. Ani tacho ho tallo; pillgim thaun pillgim poreant; nirontor gazot ravum.
Andrew L Dcunha
Solha Somiticho Sando- K.B.S. (Konkani Beyond Scripts)
