ಯದಾಹಾಂ ಜೀವಮಿ, ಅಹಮಾಶಂಸೆ (ಜೀವ್ ಆಸ್ತಾಸರ್ ಭರ್ವಸ್ತಾಂ)
ಕಲ್ ಔರ್ ಆಎಂಗೆ ನಗಮೊಂ ಕೀ ಖಿಲತೀ ಕಲಿಯಾಂ ಚುನನೆ ವಾಲೆ
ಮುಝಸೆ ಬೆಹತರ್ ಕಹನೆ ವಾಲೆ ತುಮಸೆ ಬೆಹತರ್ ಸುನನೆ ವಾಲೆ
ಕಲ್ ಕೊಈ ಮುಝಕೊ ಯಾದ್ ಕರೆ
ಕ್ಯೂಂ ಕೊಈ ಮುಝಕೊ ಯಾದ್ ಕರೆ
ಮಸರೂಫ಼್ ಝಮಾನಾ ಮೆರೆ ಲಿಯೆ
ಕ್ಯೂಂ ವಖ್ತ್ ಅಪನಾ ಬರಬಾದ್ ಕರೆ
ಸಾಹಿರ್ ಲುಧ್ಯಾನ್ವಿಚ್ಯಾ ಕವಿತೆಚ್ಯೊ ಥೊಡ್ಯೊ ವಳಿಚಿ ಯಾದ್ ಕರುನ್ ಹ್ಯಾ ಬರವ್ಪಾಚಿ ಸುರ್ವಾರ್ ಕರ್ತಾಂ. ಪಯ್ಲೆಂ ದಾಯ್ಜ್.ಕೊಮ್, ಉಪ್ರಾಂತ್ ಪಯ್ಣಾರಿ.ಕೊಮ್ ಆನಿ ಆತಾಂ ಆಶಾವಾದಿ.ಕೊಮ್. ಪುಣ್ ಸಂಪಾದಕೀಯ್ ಬರಂವ್ಚಿ ಸುರ್ವಾತ್ 1987-88 ಇಸ್ವೆಂತ್ಚ್ ಕೆಲ್ಲಿ. ಪಯ್ಲೆಂ ’ಕಾಣಿಕ್’ ನೆಮಾಳ್ಯಾಚೊ ಸಹ-ಸಂಪಾದಕ್ ಜಾವ್ನ್ ವಾವ್ರ್ ಕರ್ತಾಸ್ತಾಂ, ತಶೆಂಚ್ ಮ್ಹಜೆಸವೆಂ ಮಂಗ್ಳುರಾಂತ್ ರಾವೊನ್ ’ಉಮಾಳೊ’ ನೆಮಾಳ್ಯಾಚೊ ಸಂಪಾದಕ್ ಜಾವ್ನ್ ಸುರ್ವಾತ್ ಕೆಲ್ಲ್ಯಾ ಮಾವ್ರಿಸ್ ಶಾಂತಿಪುರ್-ಕ್ ಮಜತ್ ದಿಂವ್ಚೆಂ ’ಸಂಪಾದಕಿಯ್’ ಸಯ್ತ್ ಬರಯಿಲ್ಲೆಂ. ಹ್ಯಾ ಸರ್ವ್ ಕಾಳಾಂತ್ ಹಾಂವ್ ಪಯ್ಣಾರಿ ಜಾವ್ನ್ ವೆವೆಗ್ಳ್ಯಾ ಪರಿಸರಾಂತ್ ವಸ್ತಿ ಕರುನ್ ಆಸ್ಚೆಂ ಕಾಂಯ್ ಆಕಸ್ಮಿಕ್ ಮ್ಹಣುಂ? ಸುರ್ವಾತ್ ಕೆಲ್ಲಿ ಮಂಗ್ಳುರಾಂತ್, ದಾಯ್ಜ್.ಕೊಮ್ ಚಲಯ್ತಾಸ್ತಾಂ ಕುವೆಯ್ಟಾಂತ್, ಪಯ್ಣಾರಿ.ಕೊಮ್ ಚಲಯ್ತಾಸ್ತಾಂ ಮುಂಬಂಯ್ತ್ ಆನಿ ಆತಾಂ ಪುಣೆಂಚ್. ಪುಣ್ ಹ್ಯಾ ಸರ್ವ್ ಕಾಳಾಂತ್ ಏಕ್ ಸಪಣ್ ಮತಿಂತ್ ಆಸ್ಲೆಂ.
ಯದಾಹಾಂ ಜೀವಮಿ, ಅಹಮಾಶಂಸೆಚೊ ತಾತ್ವಿಕ್ ಮತ್ಲಬ್ ಹಾಂವ್ ಜಿವಂತ್ ಆಸ್ತಾಸರ್, ಮ್ಹಾಕಾ ಏಕ್ ಧ್ಯೇಯ್ ಸೊಂಪೊಂವ್ಕ್ ಆಸಾ (As long as I live, I have a purpose to fulfil). ಮ್ಹಜ್ಯಾ ಕೊಂಕಣಿ ಸಾಹಿತ್ಯಿಕ್ ಸುರ್ವಾತೆರ್ ಥಾವ್ನ್ ಆಜ್ ಪರ್ಯಾಂತ್ ಆಸ್ಲೊ ಧ್ಯೇಯ್ ಕೊಂಕಣಿಂಚ್. ವೆಳಾಕಾಳಾನುಸಾರ್ ತಾಂತ್ರಿಕತೆಂತ್ ಸಯ್ತ್ ಜಾಯ್ತಿ ಬದ್ಲಾವಣ್ ಹಾಡುನ್ ದಿಲ್ಯಾ. ದಾಯ್ಜ್.ಕೊಮ್, ಡಿಜಿಟಲ್ ಕಾಳಾಚ್ಯಾ ಸುರ್ವಾತೆರ್ ಕೆಲ್ಲೊ ಜಾಳಿಜಾಗೊ. ಡಿಜಿಟಲ್ ಮಾಧ್ಯಮಾಂತ್ ’ಕನ್ನಡ ಲಿಪಿ’ ವಾಚ್ಪ್ಯಾಂಕ್ ವಾಚುಂಕ್ ಸಲೀಸ್ ಜಾಯ್ಶೆಂ ಕರ್ಚ್ಯಾಕ್ ಇ.ಒ.ಟಿ. (EOT) ಫಾಯ್ಲ್ ರಚುಂಕ್ ಪಡ್ತಾಲೆಂ. ಚಡ್ತಾವ್ ವಾಚ್ಪ್ಯಾಂನಿ ಲ್ಯಾಂಡ್ ಲಾಯ್ನ್ ವ್ಹಾಪಾರ್ನ್, ಮೋಡೆಮಾಂತ್ ಇಂಟರ್ನೆಟಾಕ್ ಕನೆಕ್ಟ್ ಕರ್ಚಿ ಗರ್ಜ್ ಪಡ್ತಾಲಿ. ನೆಟ್ವರ್ಕ್ ಬ್ಯಾಂಡ್ವಿಡ್ತ್ ಉಣಿ ಆಸ್ತಾಲಿ ಜಾಲ್ಲ್ಯಾನ್ ದಾಯ್ಜ್.ಕೊಮ್ಚೆರ್ ಪರ್ಗಟ್ ಕೆಲ್ಲ್ಯೊ ತಸ್ವೀರೊ ಸಯ್ತ್ ಲ್ಹಾನ್ (ಲೊ ರಿಸಲ್ಯೂಶನಾರ್). ಪುಣ್ ದಾಯ್ಜ್.ಕೊಮ್ ಚೆರ್ ಚಡುಣೆಂ ಧಾ ವರ್ಸಾಂತ್ ಪರ್ಗಟ್ ಕೆಲ್ಲೆಂ ಕೊಂಕಣಿ ಸಾಹಿತ್ಯಾಚಿಂ ದೋನ್ ಹಜಾರ್ ಫಾಯ್ಲಾಂನಿ ಕಾಂಯ್ ಧಾ-ಭಾರಾ ಹಜಾರ್ ಪಾನಾಂಚೆಂ ಸಾಹಿತ್ಯ್ ಆಸ್ಲೆಂ ಪುಣ್ ’ಕನ್ನಡ’ ಲಿಪಿಂತ್. ದಾಯ್ಜ್.ಕೊಮ್ ಡೊಮೆಯ್ನ್ ವೆಳಾರ್ ರಿನೀವ್ ಕರುಂಕ್ ಸಕ್ಲೊಂ ನಾ. ತೆದ್ನಾಂ ಹಾಂವ್ ಐಬಿಎಮ್ ಸ್ವೀಡನಾಂತ್ ಕಾಮ್ ಕರ್ನ್ ಆಸ್ಲೊಂ.
ಉಪ್ರಾಂತ್ ಆಮ್ಚ್ಯಾ ದೆಶಾಕ್ ಯೆತಚ್ ದಾಯ್ಜ್.ಕೊಮ್ ಡೊಮೆಯ್ನ್ ನಾತ್ಲೆಂ. ದೆಕುನ್ ಪಯ್ಣಾರಿ.ಕೊಮ್ ಡೊಮೆಯ್ನ್ ಘೆವ್ನ್ ಕನ್ನಡ, ನಾಗರಿ ತಶೆಂಚ್ ರೊಮಿ ಲಿಪಿಂತ್ ಕೊಂಕಣಿ ಪರ್ಗಟುಂಕ್ ಧರ್ಲೆಂ. ಪುಣ್ ಆಶಾವಾದಿ.ಕೊಮ್ ಆನಿ ಪಯ್ಣಾರಿ.ಕೊಮ್ ದೊನ್ಯೀ ಡೊಮೇಯ್ನ್ ವರ್ಸಾನ್ ವರಸ್ ರಿನೀವ್ ಕರ್ಚಿ ಜವಾಭ್ದಾರಿ ಆಸ್ಲಿ. ತೆದ್ನಾಂಚ್ ’ದಾಯ್ಜ್.ಕೊಮ್’ ಚೆಂ ಸಾಹಿತ್ಯ್ ಸಯ್ತ್ ಆಶಾವಾದಿ.ಕೊಮ್ಚೆರ್ ಹಾಡ್ಚೆಂ ಚಿಂತಪ್ ಆಸ್ಲೆಂ ಪುಣ್ ಜೊಕ್ತೊ ವೇಳ್ ಮ್ಹಜ್ಯಾನ್ ದಿಂವ್ಕ್ ಜಾಲೆಂ ನಾ. ದಾಯ್ಜ್.ಕೊಮ್ ಆನಿ ಪಯ್ಣಾರಿ.ಕೊಮ್ ದೊನಾಂಕ್ ತುಲನ್ ಕರ್ತಾಸ್ತಾಂ, ಪಯ್ಣಾರಿ.ಕೊಮ್ ಚಡಿತ್ ತಾಂತ್ರಿಕತೆಂತ್ ಡಿಜಾಯ್ನ್ ಕೆಲ್ಲೆಂ. ಪುಣ್ ತಾಂತ್ರಿಕತಾ ಆತಾಂ ಕಿತ್ತುನ್ ಪಾವ್ಲ್ಯಾ ಮ್ಹಳ್ಯಾರ್, ಆಜ್ಕಾಲ್ ಡೆಸ್ಕ್ಟೊಪ್/ಲ್ಯಾಪ್ಟೊಪಾಚೆರ್ ವಾಚ್ತೆಲ್ಯಾಂಚ್ಯಾಕಿ ಚಡಿತ್ ಮೊಬಾಯ್ಲಾಚೆರ್ ವಾಚ್ತಲೆ ಆಸಾತ್ ಜಾಲ್ಲ್ಯಾನ್ ಆಶಾವಾದಿ.ಕೊಮ್ ಚೆರ್ ದಾಯ್ಜ್.ಕೊಮ್ ತಶೆಂಚ್ ಪಯ್ಣಾರಿ.ಕೊಮ್ ಚೆರ್ ಆಯಿಲ್ಲೆಂ ಪುರ್ತೆಂ ಸಾಹಿತ್ಯ್ ಮಾತ್ರ್ ನ್ಹಯ್. ಆಶಾವಾದಿ.ಕೊಮ್ ಏಕ್ ಸಂವಾದಾತ್ಮಕ್ (Interactive) ವೆಬ್ಸಾಯ್ಟ್. ಪಾರಂಪರಿಕ್ ಮೊನೊ ಸಾಹಿತ್ಯಾಸವೆಂ ಡಿಜಿಟಲ್ (ಇ; ಇಲೆಕ್ಟ್ರೊನಿಕ್, ಆ;ಆಡಿಯೊ ತಶೆಂವ್ ವಿ; ವಿಡಿಯೊ ಸಾಹಿತ್ಯ್) ಸಯ್ತ್ ಆಮಿ ಉಲಲಬ್ಧ್ ಕೆಲಾಂ. ಆಮ್ಚೆಂ ಚಿಂತಪ್ ಸುಟಾವೆಂ ಆಸಾ. ಆಮಿ ಕೊಂಕಣಿಚ್ಯಾ ಸರ್ವ್ ಲಿಪಿಂಕ್ ಮಾನ್ ದಿಂವ್ಚೊ ವಾವ್ರ್ ಕರ್ನ್ ವೆತಲ್ಯಾಂವ್. ಲಿಪಿಚೆ ಭಾಸಾಂದ್ಳೆ ಕಾಂಯ್ ಹೆಂ ಸೊಸ್ಚೆನಾಂತ್ ಪುಣ್ ಆಮ್ಚೊ ಇರಾದೊ ಸುಡಾಳ್ ಆಸಾ. ಮೆರೊ ಖಾತರ್ನ್, ದೊರೆ ಕೊಸ್ಳಾವ್ನ್ ಆಮಿ ಕೊಂಕಣಿ ಸಾಹಿತ್ಯಾಚೊ ವಾವ್ರ್ ಕರ್ನ್ ಫುಡೆಂ ವೆತಲ್ಯಾಂವ್. ಆಮ್ಚೊ ಇರಾದೊ ಕೆದಿಂಚ್ ’ಕಮಾಂವ್ಚೊ’ ವಾ ’ಪುಂಜಾಂವ್ಚೊ’ ಜಾಂವ್ಕ್ ನಾತ್ಲೊ. ಆಮ್ಚ್ಯಾ ಕಾಮಾಕ್ ಕೊಣಾಯ್ಚೀ ಶಿಫಾರಸ್ ಸಯ್ತ್ ಆಮಿ ಅಪೇಕ್ಷಾ ಕರುಂಕ್ ನಾಂವ್, ಕರ್ಚೆಯ್ ನಾಂವ್.
ಕೊಂಕಣಿ ಬಿಯೊಂಡ್ ಸ್ಕ್ರಿಪ್ಟ್ ಮಿಸಾಂವ್ ಭೊವ್ಶಾ ಕೊಂಕಣಿಂತ್ಲೆ ಭೋವ್ ತ್ರಾಸಾಚೆಂ ಮಿಸಾಂವ್. ಪಯ್ಲೆಂ ಮಹತ್ವಾಚೆಂ ಉಣೆಂಪಣ್ ಮ್ಹಳ್ಯಾರ್ ’ಅಪ್ಲಿ ನದರ್ ಅಪ್ಲೊ ತಳ್ಹಾತ್ ಉತ್ರೊನ್ ಚಿಂತುಂಕ್ ಸಕಾನಾಸ್ಚೆ ಚಡ್ತಾವ್ ಬರವ್ಪಿ’, ಫಕತ್ ಅಪುಣ್, ಅಪ್ಣಾಚೆಂ ನಾಂವ್, ಅಪ್ಣಾಚೊ ಮಾನ್. ಕೊಂಕಣಿ ಏಕ್ ವಿಸ್ತಾರ್ ಭಾಸ್, ಚ್ಯಾರ್ ಪ್ರಮುಕ್ ರಾಜ್ಯಾಂನಿ ಪನ್ನಾಸಾಂ ವಯ್ರ್ ಸಮುದಾಯಾಂನಿ ಉಲಂವ್ಚಿ, ಪಾಂಚ್ ಪ್ರಮುಕ್ ಲಿಪಿಂನಿ ಬರಂವ್ಚಿ ಭಾಸ್. ಪುಣ್ ಹಕೀಗತೆಂತ್ ಲಿಪಿ-ಭಿತರ್ ಸಯ್ತ್ ಲ್ಹಾ-ಲ್ಹಾರ್ ಬಾಂಯ್ ಆನಿ ಹೆ ಮಾಣ್ಕೆ/ಬೆಬೆ ಆನಿ ತಾಂಚೊಚ್ ’ಅಂಧ್-ಭಕ್ತಾಂಚೊ ಎಕ್ತಾರ್’, ಪರಿಪಕ್ವ್ ಜಾಂವ್ಕ್ ನಾಸ್ಚೆಂ (ಪ್ರಿ-ಮೆಚ್ಯೂರ್) ಆಣ್ವೆಂ ಚಿಂತಪ್, ತೀನ್ ಕಾಸಾಚ್ಯೊ ಬುದಿ. ಆನಿ ಹ್ಯಾ ಪರಿಸ್ಥಿತೆಂಚ್ ’ಮತ್ ನಾತ್ಲೆಲ್ಯಾ ಬರವ್ಪ್ಯಾಂಚೆ ಗತ್ ನಾತ್ಲೆ ಸಂಪಾದಕ್’.
ಕೊಂಕಣಿ ಬಿಯೊಂಡ್ ಸ್ಕ್ರಿಪ್ಟ್ ಮಿಸಾಂವಾಂತ್ ಆಮಿ ಕೊಂಕಣಿಂತ್ಲೆಂ ಬರೆಂ ಸಾಹಿತ್ಯ್ ಎಕಾ ಲಿಪಿಥಾವ್ನ್ ಅನ್ಯೆಕಾ ಲಿಪಿಕ್ ಲಿಪ್ಯಂತರಣ್ ಕರ್ತೆಲ್ಯಾಂವ್, ಡಿಜಿಟಲ್ ಇ-ಪುಸ್ತಕ್, ಆ-ಪುಸ್ತಕ್ ವ ವಿ-ಪುಸ್ತಕಾ ರುಪಾರ್ ಹೆಂ ಕಾಮ್ ಫುಡ್ಲ್ಯಾ ಜನಾಂಗಾಂತ್ ಆಸಕ್ತ್ ಆಸ್ಚ್ಯಾಂಕ್ ಕಾಂಯ್ ತೆಂಕೊ ದಿತಲೊ ಮ್ಹಳ್ಳ್ಯಾ ಚಿಂತ್ಪಾನ್. ಕೊಣ್ ಸಮ್ಜತಾ ಆನಿ ಕೊಣ್ ಸಮ್ಜೊಂಕ್ ಸಕಾನಾ ವಾ ಸಮ್ಜೊಂಕ್ ವಚಾನಾ ತಾಚಿ ಕಸ್ಲಿಚ್ ಪರ್ವಾ ಕರಿನಾಸ್ತಾಂ ಹೆಂ ಮಿಸಾಂವ್ ಹಾತಿಂ ಘೆತ್ಲಾಂ. ಕೊಣಾಯ್ ಥಾವ್ನ್ ಕಸ್ಲೊಚ್ ಪ್ರತಿಫಳ್ ಅಪೆಕ್ಷಾ ಕರಿನಾಸ್ತಾಂ.
ಕವಿ ರಾಜೆಂದ್ರ ಕೃಷ್ಣಚ್ಯೊ ಹ್ಯೊ ವಳಿ ಸದಾಂಚ್ ಯಾದಿಂತ್ ಆಸಾತ್;
ಭೂಲ್ ಜಾ ಅಬ್ ವೊ ಮಸ್ತ್
ಹವಾ ವೊ ಉಡಾನಾ ಡಾಲೀ ಡಾಲೀ
ಜಗ್ ಕೀ ಆಂಖ್ ಕಾ ಕಾಟಾ ಬನ್ ಗಈ ಚಾಲ್ ತೆರೀ ಮತವಾಲೀ
ಕೌನ್ ಭಲಾ ಉಸ್ ಬಾಗ್ ಕೊ ಪೂಛೆ
ಕೌನ್ ಭಲಾ ಉಸ್ ಬಾಗ್ ಕೊ ಪೂಛೆ ಹೊ ನಾ ಜಿಸಕಾ ಮಾಲಿ
ತೆರೀ ಕಿಸ್ಮತ್ ಮೆಂ ಲಿಖಾ
ಹೈ ಜೀತೆ ಜೀ ಮರ್ ಜಾನಾ
ಚಲ್ ಉಡ಼್ ಜಾ ರೆ ಪಂಛೀ
ಕೀ ಅಬ್ ಯೆ ದೆಶ್ ಹುಆ ಬೆಗಾನಾ
ಚಲ್ ಉಡ್ ಜಾ ರೆ ಪಂಛೀ
ಹಾಂವ್ ಜಾಣಾಂ, ಹಾಂವ್ ಹ್ಯಾ ಕಾಳಾಕ್ ಪ್ರತಿನಿಧಿತ್ವ್ ಕರ್ತಾಸ್ತಾಂ, ಮ್ಹಾಕಾಯ್ ಏಕ್ ಜವಾಭ್ದಾರಿ ಆಸಾ, ಹಾಂವೆಂಯ್ ಹೆರಾಂಕ್ ಬೊಟ್ ಜೊಕುನ್ ಕಿತೆಂಚ್ ಕರಿನಾಸ್ತಾಂ ಕರ್ತೆಲ್ಯಾ ಹೆರಾಂಚ್ಯೊ ಖೊಡಿ ಕಾಡ್ಚೆಪ್ರಾಸ್, ಮ್ಹಜ್ಯಾ ತಾಂಕಿಚೆಂ ಕಿತೆಂ ಆಸಾ ತೆಂ ಕರ್ನ್ಚ್ ವೆಚೆಂ. ತೆಂ ಕಿತ್ಲೆಂ ಪರಿಪೂರ್ಣ್ ವಾ ನ್ಹಯ್ ತೆಂ ಕಾಳ್ ಜಾಪ್ ದಿಂವ್ದಿ. ಫುಡೆಂ ಹೆಂಚ್ ಮಿಸಾಂವ್ ಹಾಚ್ಯಾಕೀ ಬರೆ ರಿತಿನ್ ಕರುಂದಿತ್.
ಅಖೆರ್ ಕರ್ಚ್ಯಾಧಿಂ ಪರತ್ ರಾಜೆಂದ್ರ ಕೃಷ್ಣಚ್ಯಾ ಕವಿತೆಚ್ಯೊಚ್ ವಳಿ ಯಾದ್ ಕರ್ತಾಂ;
ತೂನೆ ತಿನಕಾ-ತಿನಕಾ ಚುನ್ ಕರ್, ನಗರೀ ಎಕ್ ಬಸಾಈ
ಬಾರಿಶ್ ಮೆಂ ತೆರೀ ಭೀಗೀ ಕಾಯಾ, ಧೂಪ್ ಮೆಂ ಗರಮೀ ಛಾಈ
ಗಮ್ ನಾ ಕರ್ ಜೊ ತೆರೀ ಮೆಹನತ್ ತೆರೆ ಕಾಮ್ ನಾ ಆಈ
ಅಚ್ಛಾ ಹೈ ಕುಛ್ ಲೆ ಜಾನೆ ಸೆ ದೆಕರ್ ಹೀ ಕುಛ್ ಜಾನಾ
ಚಲ್ ಉಡ್ ಜಾ ರೆ ಪಂಛೀ ...
ಆಶಾವಾದಿ.ಕೊಮ್ ವೆಬ್ಸಾಯ್ಟಿಚೆರ್ ಆಸ್ಚೆಂ ಸಾಹಿತ್ಯ್ ವಾಚುಂಕ್, ತುಜಿ ಪ್ರತಿಕ್ರಿಯಾ/ಸಲ್ಹಾ-ಸುಚಾವ್ ದಿಂವ್ಕ್ ಉಲೊ ದಿವುನ್ ಮ್ಹಜಿಂ ಸುರ್ವಿಲಿಂ ದೊನ್ ಉತ್ರಾಂ ಸಂಪಯ್ತಾಂ,
ವೆಗಿಂಚ್ ಪರತ್ ಮೆಳ್ಯಾಂ
- ವಲ್ಲಿ ಕ್ವಾಡ್ರಸ್
(ಕೊಂಕಣಿ ಚಾಕೊರ್)
