ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಮೆಲ್ವಿನ್ ಜೆರಾಲ್ಡ್ ವಾಸ್: ಕೆಲರಾಯ್ ಫಿರ್ಗಜೆಜೊ, ಪಾಟ್ಲ್ಯಾ ಭಾರಾ ವರ್ಸಾಂ ಥಾವ್ನ್ ಕುವೆಯ್ಟಾಂತ್ ವಾವ್ರ್ ಕರುನ್ ಆಸಾ. ಚಡುಣೆಂ ಪಂದ್ರಾ-ಸೊಳಾ ವರ್ಸಾಧಿಂ ಸಾಹಿತ್ಯಾಚಿ ಸುರ್ವಾತ್ ಕರುನ್, 35 ಮಟ್ವ್ಯೊ ಕಾಣ್ಯೊ ಆನಿ ಏಕ್ ಕಾದಂಬರಿ ಬರಯಿಲ್ಲಿ ತರ್ಯೀ ಸಭಾರ್ ವರ್ಸಾಂನಿ ತಿ ಜಿವಾಳ್ ದವ್ರುಂಕ್ ಸಕಾನಾಸ್ತಾಂ ರಾವ್ಲೊ ತರ್ಯ್ ಕೊಂಕ್ಣಿ ಸಾಹಿತ್ಯಾಚೆರ್ ತೊಚ್ಚ್ ಮೋಗ್ ಆನಿ ಹುಸ್ಕೊ ಅಸೊನ್, ಆಯ್ಲೆವಾರ್ ಸರಾಗ್ ರಿತಿನ್ ವೆವೆಗ್ಳ್ಯಾ ಪ್ರಕಾರಾಚಿ ಸಾಹಿತಿಕ್ ಕೃಷಿ ಕರುನ್ ಕೊಂಕ್ಣಿ ವರ್ತುಲಾಂತ್ ನಾಂವಾಡ್ದಿಕ್ ಜಾಲಾ. ಕಾಣ್ಯಾಂಶಿವಾಯ್ 4 ನಾಟ್ಕುಳೆ, 75 ಕವಿತಾ, 10 ಲೇಖನಾಂ, 20 ವಿಮರ್ಶೆ/ಸಮೀಕ್ಶಾ ಬರಯ್ಲ್ಯಾತ್. ಹಾಚೊ ಸ್ವತಾಚೊ ( ಫುಡ್ಲದ್) ಕವಿತಾಜಮೊ ’ಆಟ್ವ್ಯಾ ರಂಗಾಚೊ ಧೊಣು’ ವೆಗಿಂಚ್ ’ಆಶಾವಾದಿ ಪ್ರಕಾಶನ್’ ಪರ್ಗಟ್ಚಾರ್ ಆಸಾ. ಹಾಚ್ಯಾಧಿಂ ಹಾಚಿಂ ಕವಿತಾಂ/ಲೇಕನಾಂ ’ಮೊತಿಯಾಂ ಆನಿ ತಾರಾಂ’, ’ಸಾಗೊರಾಚ್ಯಾ ವಾಟೆಚ್ಯೊ ಝರಿ’, ’ಕವಿತಾಪಾಠ್’ ಆನಿ ’ದರ್ಯಾಕ್ ಉದಾಕ್’ ಬುಕಾಂನಿ ಪರ್ಗಟ್ಲ್ಯಾಂತ್. ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ದಾಯ್ಜ್.ಕೊಮ್ ಸಾಯ್ಟಿಚೊ ಸಹ-ಸಂಪಾದಕ್ಯೀ ಹೊ ಜಾವ್ನಾಸಾ.
ಭ್ರಮಿದೆಂತ್ಲ್ಯೊ ಸಾವ್ಳ್ಯೊ: ಏಕ್ ಸಾಮಾಜಿಕ್ ಕಾದಂಬರಿ, ಪ್ರಮುಖ್ ಜಾವ್ನ್ ತೆಗಾಂಚ್ಯಾ ತೀನ್ ರಿತಿಚಾ ಸಂಭಂಧಾಂಚೆ ಎಕಾಮೆಕಾಚೆ ಗಾಂಚ್ ಮ್ಹಣ್ಯೆತಾ. ವಾಚ್ಪ್ಯಾಂಕ್ ಸಿಂತಿಮೆಂತಾಂ, ಚಿಂತಾಪ್, ಭಗ್ಣಾಂ, ಉಮಾಳೆ ಜಾಗಂವ್ಕ್ ಜರೂರ್ ಸಕ್ತೆಲಿ ಮ್ಹಳ್ಳೊ ಮ್ಹಜೊ ಭರ್ವಸೊ.
ಪುಸ್ತಕ್ ದೋನ್
ತುಜೆಂ ಜಿವಿತ್ ತುಜಿ ವಿಂಚವ್ಣ್
ನ್ಹಂಯ್
ಆವಸ್ವರ್ ಸೊಳಾ: ಮಿಶೇಲ್ ರಾಯನ್ ಆಲಿಯಾ
’ಆಲಿಯಾ ಖಾನ್’
"ಕಾಂಟ್ರೊವರ್ಶಿಯಲ್ ಡೈರೆಕ್ಟರ್ಸ್ ಬ್ರಾಂಡ್ ನಿವ್ ಫೇಸ್!" ಸಿನಿಬ್ಲಿಟ್ಜ್ ಮಹಿನ್ಯಾಳ್ಯಾಚೆಂ ಹೆಡ್ಲೈನ್ಸ್.
"ಆಲಿಯಾ ಖಾನ್! ಸೀಜ಼್ಲಿಂಗ್ ಸ್ಟಾರ್!" ಫಿಲ್ಮ್ ಸ್ಟಾರ್ ಮ್ಯಾಗಜ಼ೀನಾಚೆಂ ಹೆಡ್ಲೈನ್ಸ್ ಆನಿ ಆಲಿಯಾಚಿ ಫೋಜ಼್.
"ಇನ್ ಸರ್ಚ್ ಆಫ್ ಎ ಸ್ಟಾರ್!" ಫ್ರೈಡೇ ಟಾಯ್ಮ್ಸ್ ಚೆರ್ ಸಾವಂತಾಚಿ ಇಂಟರ್ವ್ಯೂ ಆನಿ ಆಲಿಯಾಚೆ ಫೋಟೊ ಗ್ರಾಫ್ಸ್.
"ಆಲಿಯಾ ಖಾನ್ ಡಿಸ್ಪ್ಲೇಸ್ಡ್ ಅಮೃತಾ ಇನ್ ಸಾವಂತ್ಸ್ ನಿವ್ ಫಿಲ್ಮ್!" ಸಿನಿ ಮ್ಯಾಗಜೀನಾಚೆರ್ ಆಲಿಯಾಚಿ ಫ್ರಂಟ್ ಪೇಜ್ ಫೋಟೊ.
ಹರ್ಯೆಕಾ ಪತ್ರಾಂನಿ ತಶೆಂ ಹರ್ಯೆಕಾ ಮ್ಯಾಗಜೀನಾಂನಿ ಆಲಿಯಾಚಿ ತಸ್ವೀರ್ ಛಾಪುನ್ ಆಯಿಲ್ಲಿ. ಹರ್ಯೆಕಾ ಫೊಟೊಗ್ರಾಫರಾಕ್ ಆಲಿಯಾನ್ ಎಕಾ ಥಾವ್ನ್ ಎಕಾಕ್ ವಿಂಗಡ್ಚ್ ಫೋಜ಼್ ದಿಲ್ಲಿ. ಆಲಿಯಾಕ್ಯ್ ಹೆಂ ಚಡ್ ಗರ್ಜೆಚೆಂ ತರ್ ತ್ಯಾ ಕುಶಿಂನ್ ರಾಯನಾಕ್ಯ್ ಆಲಿಯಾಚಿ ಚಡ್ ಆನಿ ಚಡ್ ಪಬ್ಲಿಸಿಟಿ ಜಾಂವ್ಕ್ ಜಾಯ್ ಆಸ್ಲ್ಲಿ.
ಆಲಿಯಾ!
ಥೊಡ್ಯಾಚ್ ದಿಸಾಂ ಭಿತರ್ ಆಲಿಯಾಚೆಂ ನಾಂವ್ ಸಗ್ಳ್ಯಾ ಗ್ಲಾಮರಾಚಾ ಸಂಸಾರಾಂತ್ ದಾಖಲ್ ಜಾಲ್ಲೆಂ.
ಬಾಲಿವುಡಾಕ್ ಆಲಿಯಾಚೆಂ ಯೆಣೆಂ ಅವ್ಚಿತ್ತ್ ಜಾಲ್ಲ್ಯಾ ವರ್ವಿಂ ಹ್ಯಾ ತಾಚ್ಯಾ ಯೆಣ್ಯಾಚೊ ಸಾವಂತಾನ್ ಸಂಪೂರ್ಣ್ ಫಾಯ್ದೊ ಜೊಡ್ಲೊ. ರಾಯನ್ ಹ್ಯಾ ಫಿಲ್ಮಾಚಾ ವಿಶಯಾ ಥಾವ್ನ್ ಸಂಪೂರ್ಣ್ ಭಾಯ್ರ್ ಆಸ್ಲ್ಲೊ.
"ಪಳೆ ಸಾವಂತ್! ಮ್ಹಕಾ ಹ್ಯಾ ಸ ಮಹಿನ್ಯಾಂ ಭಿತರ್ ಹೆಂ ಫಿಲ್ಮ್ ಕಂಪ್ಲೀಟ್ ಜಾವ್ನ್ ಪ್ರದರ್ಶನಾಕ್ ಉಭೆಂ ಕರುಂಕ್ ಜಾಯ್!" ರಾಯನಾನ್ ಆರ್ಡರ್ ದಿಲ್ಲೆಂ.
ರಾಯನ್ ಬಾಲಿವುಡಾಂತ್ ಆಪ್ಲಿ ಸಾಮರ್ಥಿ ದಾಖಂವ್ಕ್ ಸೊಧ್ತಾ ಮ್ಹಳ್ಳೆಂ ತೆಂ ಸಾವಂತ್ ಜಾಣಾಂ ಆಸ್ಲ್ಲೊ.
ಫಿಲ್ಮಾಚೆಂ ಭಾಯ್ಲ್ಯಾಂಗಣಾಚೆಂ ಚಿತ್ರೀಕರಣ್ ಪಯ್ಲೆಂ ಸಂಪಂವ್ಕ್ ಆಲಿಯಾನ್ ಸಲಹಾ ದಿಲ್ಲಿ. ಫಿಲ್ಮಾಚಾ ಚಿತ್ರೀಕರಣಾಚಾ ಬಾಬ್ತಿನ್ ಆಪುಣ್ ಹ್ಯಾ ಮುಂಬಯಿ ಥಾವ್ನ್ ಭಾಯ್ರ್ ರಾವೊಂಕ್ ಜಾಯ್ ಮ್ಹಳ್ಳೆಂಚ್ ಆಲಿಯಾಚೆಂ ಚಿಂತಾಪ್.
ಗಿಮ್ಶಿಲೆ ದೀಸ್ ಎದೊಳ್ಚ್ ಆರಂಭ್ ಜಾಲ್ಲೆಂ. ತೀನ್ ಮಹಿನ್ಯಾಂ ಭಿತರ್ ಪಾವ್ಸ್ ಪಡ್ಚ್ಯಾರ್ ಆಸ್ಲ್ಲೊ. ಸಾವಂತಾಕ್ಯ್ ಆಲಿಯಾಚೆಂ ಹೆಂ ಸೂಚನ್ ಬರೆಂ ಮ್ಹಣೊನ್ ದಿಸ್ಲೆಂ.
ಭಾಯ್ಲ್ಯಾಂಗಣಾಚೆಂ ಚಿತ್ರೀಕರಣ್ ಪಯ್ಲೆಂ ಜಾಲೆಂ ಜಾಲ್ಯಾರ್ ಭಿತರ್ಲ್ಯಾಂಗಣಾಚಾ ಚಿತ್ರೀಕರಣಾಕ್ ಕ್ಯಾಮರಾ ಫುಡೆಂ ರಾವೊಂಕ್ ಆಲಿಯಾಕ್ ಚಡ್ ಸಲೀಸ್ ಜಾತೆಲೆಂ. ಹೊ ಸಾವಂತಾಚೊ ತಾಂತ್ರಿಕ್ ಲೇಖ್ವಿಚಾರ್. ತಾಚ್ಯಾ ಸಮ್ಜಣೆ ಪ್ರಕಾರ್ ಆಲಿಯಾ ಅಜೂನ್ ಬಾಲಿವುಡಾಚಾ ಕ್ಯಾಮರಾ ಮುಕಾರ್ ನೆಣ್ತೆಂ ಚಲಿ!
ಆಲಿಯಾನ್ ಹ್ಯಾ ತಾಚ್ಯಾ ನೆಣ್ತ್ಯಾಪಣಾಕ್, ಫಿಲ್ಮಾಚಾ ಚಿತ್ರೀಕರಣಾಚ್ಯಾ ಆಪ್ಲ್ಯಾ ಪಯ್ಲ್ಯಾಚ್ ಟೇಕಾಂತ್ ಮಾರುನ್ ಜಡಯಿಲ್ಲೆಂ. ಆಲಿಯಾಕ್, ತಾಕಾ ಆಸ್ಚ್ಯಾ ಆಪ್ಣಾ ವಯ್ಲಾ ವಿಶ್ವಾಸಾಕ್ ಪಳವ್ನ್ ಸಾವಂತ್ ಮಾತ್ರ್ ನ್ಹಯ್ ರಾಯನ್ಯ್ ಆಜ್ಯಾಪ್ ಜಾಲ್ಲೊ.
"ಬಾಲಿವುಡಾಂತ್ ಹೆಂ ಚೆಡುಂ ಖಂಡಿತ್ ಕಾಂಯ್ ನಾ ತರ್ ಕಾಂಯ್ ಕರ್ತೆಲೆಂ!" ಸಾವಂತಾನ್ ಉದ್ಗಾರ್ ಸೊಡ್ಲ್ಲೊ.
ಆಲಿಯಾ ಜಾಲ್ಯಾರ್ಯ್ ಹ್ಯಾಚ್ ವಿಶಯಾಂತ್ ಚಿಂತಾಲೆಂ. ಕಶೆಂ ತರ್ಯ್ ತಾಕಾ ಜಾತಾ ತಿತ್ಲ್ಯಾ ವೆಗ್ಗಿಂ ಆಪ್ಣಾಚೆಂ ನಾಂವ್ ಬಾಲಿವುಡಾಂತ್ ದಾಖಲ್ ಕರುಂಕ್ ಜಾಯ್ ಆಸ್ಲ್ಲೆಂ. ಹ್ಯಾ ಖಾತಿರ್ ತಾಣೆಂ ಫಕತ್ತ್ ಆಪ್ಲ್ಯಾ ದಿಶಾ ವಿಶಿಂ ಮಾತ್ರ್ ಚಿಂತುನ್ ಆಪ್ಲ್ಯಾ ಕಾಮಾಂತ್ ಚಡ್ ಮೆತೆರ್ ಜಾಂವ್ಕ್ ಜಾಯ್ ಆಸ್ಲ್ಲೆಂ. ಆಲಿಯಾ ಲಾಗಿಂ ವೆಳಾಚೊ ಅಭಾವ್ ಆಸ್ಲ್ಲೊ. ತಾಣೆಂ ಖಂಯ್ಚಾಂಯ್ತ್ಯ್ ಗಳಾಯ್ ಕೆಲ್ಲ್ಯಾ ಪರಿಂ ನಾತ್ಲ್ಲೆಂ. ತೆಂ ಕಿತ್ಲೆಂ ಗಳಾಯ್ ಕರ್ತಾ ತಿತ್ಲೆಂ ತಾಕಾಚ್ ಆಪಾಯ್ ಆಸ್ಲ್ಲೊ. ಚಡ್ ಕರುನ್ ತಾಕಾ ಆಪ್ಣಾಚೊ ಘುಟ್ ರಾಯನಾಚಾ ಕಾನಾಕ್ ಪಡಾನಾತ್ಲ್ಲ್ಯಾ ಪರಿಂ ಪಳಂವ್ಕ್ ಜಾಯ್ ಆಸ್ಲ್ಲೆಂ. ತೆಂ ರಾಯನಾಕ್ ಜಾಣಾಂ. ಆಪುಣ್ ರಾಯನಾಚಾ ಫಿಲ್ಮಾ ಥಾವ್ನ್ ಆಪ್ಣಾಚೊ ಫಾಯ್ದೊ ಘೆತಾಂ ಮ್ಹಣೊನ್ ಜರ್ ರಾಯನ್ ಜಾಣಾಂ ಜಾಲೊ ಜಾಲ್ಯಾರ್ ತ್ಯಾ ಉಪ್ರಾಂತ್ ಆಲಿಯಾಚೆಂ ಕಿತೆಂ ಜಾತೆಲೆಂ ತೆಂ ತಾಚ್ಯಾನ್ ಚಿಂತುಂಕ್ ಸಾದ್ಯ್ ನಾತ್ಲ್ಲೆಂ. ರಾಯನ್ ಆಪ್ಲ್ಯಾ ಫಾಯ್ದ್ಯಾಂತ್ ಕಿತ್ಲೊ ಮೊವಾಳ್ ತಿತ್ಲೊಚ್ ತಾಚ್ಯಾ ರಾಗಾಂತ್ ತೊ ವಾಯ್ಟ್. ಆಶೆಂ ಆಸ್ತಾನಾ......!
ಆಲಿಯಾಕ್ ಆಪ್ಣಾಚೆಂ ಮಿಸಾಂವ್ ಸುಫಳ್ ಜಾಂವ್ಕ್ ಫಕತ್ತ್ ಏಕ್ ಫಿಲ್ಮ್ ಪುರೊ. ಎಕಾಚ್ಚ್ ಫಿಲ್ಮಾ ಥಾವ್ನ್ ಆಪ್ಣೆಂ ಮೊಳಾಬಾಚಾ ತಾರಾಂಕ್ ಆಪ್ಡುಂಕ್ ಜಾಯ್!
ತ್ಯಾ ಉಪ್ರಾಂತ್......!
ವ್ಹಯ್! ಆಲಿಯಾಚೆಂ ಚಿಂತಾಪ್ಚ್ ದುಸ್ರೆಂ ಆಸ್ಲ್ಲೆಂ.
ಎದೊಳ್ ಪಾಸೊನ್ ಆಲಿಯಾಕ್ ತಾಚ್ಯಾ ನಶೀಬಾನ್ ಸಾಂಗಾತ್ ದಿಲ್ಲೊ. ಫುಡಾರಾಕ್ಯ್ ಮೆಳ್ತಲೊ ಮ್ಹಳ್ಳೊ ತಾಕಾ ಭರ್ವಸೊ ಆಸಾ.
ಹ್ಯಾಚ್ ಭರ್ವಸ್ಯಾಕ್ ಪಾತ್ಯೆವ್ನ್ ಆಲಿಯಾ ಆಜ್ ಆಪ್ಲ್ಯಾ ಜಿವಿತಾಚಾ ಝುಜಾಂತ್ ಝುಜೊಂಕ್ ಆಯ್ತೆಂ ಜಾಲ್ಲೆಂ.
ಹ್ಯಾ ಝುಜಾಂತ್ ಎದೊಳ್ಚ್ ವಿಶು ಕುಮಾರ್ ಆಲಿಯಾಕ್ ಮುಖಾಮುಖಿ ಜಾಲ್ಲೊ. ಆಲಿಯಾನ್ ಚಿಂತುಂಕ್ ಪಾಸೊನ್ ನಾತ್ಲ್ಲೆಂ ಕೀ ಹೊ ವಿಶುಕುಮಾರ್ ಆಪ್ಣಾಚಾ ವಾಟೆರ್ ಆಪ್ಣಾಕ್ ಇತ್ಲ್ಯಾ ವೆಗ್ಗಿಂ ಭೆಟ್ತಲೊ. ಪುಣ್ ಆಲಿಯಾಕ್ ತಾಚ್ಯಾ ಭರ್ವಸ್ಯಾನ್ ಸಾಂಗಾತ್ ದಿಲ್ಲೊ. ತಾಚ್ಯಾ ವಿಶ್ವಾಸಾನ್ ಮುಕ್ಲಿ ವಾಟ್ ತಾಕಾ ದಾಖವ್ನ್ ದಿಲ್ಲಿ. ಹ್ಯಾ ವಿಶು ಕುಮಾರಾ ಥಾವ್ನ್ಚ್ ಆಪ್ಣಾಚಿ ಫುಡಾರಾಚಿ ವಾಟ್ ಸುಲಭ್ ಕರುಂಕ್ ಜಾಯ್ ಮ್ಹಳ್ಳ್ಯಾ ವಿಶಿಂ ಆಲಿಯಾನ್ ನಿರ್ಧಾರ್ ಘೆತ್ಲ್ಲೊ.
ಆಪ್ಣಾಚಿ ವಳಕ್ ನಾಸ್ತಾಂ ಜರ್ ಹೊ ವಿಶು ಕುಮಾರ್ ಆಪ್ಣಾಕ್ ಆಪ್ಲ್ಯಾ ಏರ್ವೇಸಾಚಾ ಕಾಮಾ ಥಾವ್ನ್ ಟರ್ಮಿನೇಟ್ ಕರಂವ್ಕ್ ಸಕ್ತಾ ತರ್ ಆಪ್ಣಾಕ್ ಹೊ ಚಡ್ ಫಾಯ್ದ್ಯಾಚೊ ಮನಿಸ್. ವಿಶು ಕುಮಾರಾಕ್ ಜರ್ ಆಪ್ಣೆಂ ಕಶೆಂಯ್ ಕರುನ್ ಆಪ್ಣಾಚಾ ಲಾಗಿಂ ಕೆಲೊ ಜಾಲ್ಯಾರ್ ತಾಚ್ಯೆ ಥಾವ್ನ್ ಆಪ್ಣೆಂ ಆಪ್ಣಾಕ್ ಜಾಯ್ ಜಾಲ್ಲಿ ಕಾಮಾಂ ಸುಲಾಭಾಯೆನ್ ಕರವ್ಯೆತ್. ಉದ್ದೇಶ್ ಮ್ಹಜೊ! ಕಾಮ್ ತಾಚೆಂ! ಪುಣ್ ತೊ ಕರ್ತಲೊ....? ಆಲಿಯಾಚಾ ಮತಿಂತ್ ಹೆಂ ದುಬಾವಿ ಸವಾಲ್ ಉದೆಲ್ಲೆಂ.
ಮತಿಂತ್ ಉದೆಲ್ಲ್ಯಾ ದುಬಾವಿ ಸವಾಲಾಕ್ ತಶೆಂಚ್ ಆಪ್ಲ್ಯಾ ಮತಿಂತ್ ರಾಜ್ವಟ್ಕಾಯ್ ಚಲಂವ್ಕ್ ಆಲಿಯಾನ್ ಸೊಡ್ಲೆಂ ನಾ. ತ್ಯಾ ದುಬಾವಾಕ್ ಪಯ್ಸ್ ಕರ್ಚ್ಯಾ ಖಾತಿರ್ ಆನಿ ವಿಶು ಕುಮಾರಾಕ್ ಲಾಗಿಂ ಕರ್ಚ್ಯಾ ಖಾತಿರ್ ತೆಂ ಕಿತೆಂಯ್ ಕರುಂಕ್ ತಯಾರ್ ಜಾಲೆಂ.
ವಿಶು ಕುಮಾರಾ ಥಾವ್ನ್ ಆಪ್ಣೆ ಕಿತೆಂ ಕಿತೆಂ ಕಾಮಾಂ ಕರಂವ್ಕ್ ಜಾಯ್ ತೆಂ ಸಗ್ಳೆಂ ಆಲಿಯಾನ್ ಚಿಂತುನ್ ದವರ್ಲೆಂ. ತೊ ಕೋಣ್? ಕಿತೆಂ ಕರ್ತಾ? ಖಂಯ್ ವೆತಾ? ಕೊಣಾಕ್ ಮೆಳ್ತಾ? ತಾಚೆಂ ಘರಾಣೆಂ ಕಿತೆಂ? ತಾಚೆಂ ಬಿಜ್ನೆಸ್ ಕಿತೆಂ? ಸಗ್ಳೆಂಚ್ ಆಲಿಯಾ ಜಾಣಾಂ ಜಾಲೆಂ.
ಹ್ಯಾ ಜಾಣಾಂ ಜಾಂವ್ಚ್ಯಾ ಕಾಮಾಂತ್ ಆಲಿಯಾಕ್ ಮಜತ್ ದಿಲ್ಲಿ ತಾಚ್ಯಾ ಮೇಕಪ್ಮ್ಯಾನಾನ್!
ಪಯ್ಶೆ ಮನ್ಶ್ಯಾಕ್ ಕಸಲೆಂಯ್ ಕಾಮ್ ಕರಯ್ತಾ! ಆಲಿಯಾ ಹೆಂ ಬರ್ಯಾನ್ ಜಾಣಾಂ.
ಮೇಕಪ್ಮ್ಯಾನ್ ರಾಜುಕ್ ಪುಸ್ಲಾವ್ನ್ ತಾಚ್ಯೆ ಥಾವ್ನ್ ವಿಶು ಕುಮಾರಾಚಿ ಸಗ್ಳಿ ಚರಿತ್ರಾ ಆಲಿಯಾನ್ ಆಪ್ಣಾಚಿ ಕರುನ್ ಘೆತ್ಲಿ.
ಹ್ಯಾ ಮಾಹೆತ್ ಆರಾಂವ್ಚ್ಯಾ ಕಾಮಾಂತ್ ಆಲಿಯಾಕ್ ಚಡ್ ಕಾಂಯ್ ತ್ರಾಸ್ ಜಾಂವ್ಕ್ ನಾಂತ್. ವಿಶು ಕುಮಾರ್ ಆಲಿಯಾಚಾ ಫಿಲ್ಮ್ ಲಾಂಚಿಂಗಾಚಾ ಪಾರ್ಟೆಂತ್ ಆಯಿಲ್ಲೊ ಮ್ಹಣ್ತಾನಾ ತೊ ಖಂಡಿತ್ ರಾಯನಾಚಾ ಸವೆಂ ಯಾ ಸಾವಂತಾ ಸವೆಂ ಲಾಗ್ಶಿಲೊ ಸಂಭಂಧ್ ದವರ್ತಾ ಮ್ಹಳ್ಳೆಂ ತೆಂ ಜಾಣಾಂ. ಪುಣ್ ಮತಿಂತ್ ದುಬಾವ್ ಮಾತ್ರ್ ದೊಸ್ತಾಲೊ. ಹ್ಯಾ ದುಬಾವಾಕ್ ಆಪ್ಲ್ಯಾ ಚಾಲಾಕ್ ಉತ್ರಾಂನಿ ಸಾವಂತಾ ಥಾವ್ನ್ಚ್ ಆಲಿಯಾನ್ ಪಯ್ಸ್ ಕೆಲ್ಲೆಂ.
ವಿಶು ಕುಮಾರ್ ರಾಯನಾಚೊ ಲಾಗ್ಶಿಲೊ ಇಶ್ಟ್!
ಹೆಂ ಕಳಿತ್ ಜಾಲ್ಲೆಂ ಆಲಿಯಾ ಆತಾಂ ಪಯ್ಲೆಂಚಾ ಪ್ರಾಸ್ ಚಡ್ ಚತುರ್ ಜಾಲೆಂ.
ಖಂಯ್ಚರ್ಯ್ ಆಪ್ಣೆಂ ಲ್ಹಾನ್ ಚೂಕ್ ಕೆಲ್ಯಾರ್ಯ್ ರಾಯನಾಕ್ ವಿಶಯ್ ಕಳ್ತಲೊ! ರಾಯನಾಕ್ ವಿಶಯ್ ಕಳಿತ್ ಜಾಲ್ಯಾರ್ ತೊ ಅಮೃತಾಕ್ ಕೆಲ್ಲ್ಯಾ ಪರಿಂಚ್ ಮ್ಹಾಕಾಯ್ ಕಾಡುನ್ ಭಾಯ್ರ್ ಮಾರ್ತಲೊ. ಆನಿ ಆಪುಣ್.......!
ಆಲಿಯಾ ಸಗ್ಳೆಂ ಜಾಣಾಂ ಜಾಲ್ಲೆಂ!
ಎಕಾ ಕುಶಿನ್ ತಾಚೆಂ ಜಿವಿತ್ ಪಿಡ್ಡ್ಯಾರ್ ಕೆಲ್ಲ್ಯಾಂಚಾ ಮುಕಾರ್ ಭರ್ಮಾನ್ ರಾವೊಂಕ್ ಆಪ್ಣಾಕ್ಚ್ ತಾಣೆಂ ಹ್ಯಾ ಸಮಾಜೆಂತ್ ಎಕಾ ಉಂಚ್ಲ್ಯಾ ಪಾಂವ್ಡ್ಯಾಕ್ ಪಾವಂವ್ಕ್ ಜಾಯ್ ಆಸ್ಲ್ಲೆಂ.
ದುಸ್ರ್ಯಾ ಕುಶಿನ್, ತ್ಯಾ ಪಾಂವ್ಡ್ಯಾಕ್ ಪಾವ್ತಾ ಪಾಸೊನ್ ಆಪ್ಣಾಕ್ಚ್ ಸುರಕ್ಶಿತ್ ದವರುಂಕ್ ಜಾಯ್ ಆಸ್ಲ್ಲೆಂ.
ಹ್ಯಾ ದೊನಾಂ ಮಧೆಂ ವೇಳ್ ಭಿಲ್ಕುಲ್ ನಾತ್ಲ್ಲೊ!
ಹೊ ವೇಳ್ ಖಂಯ್ಚಾಯ್ ವಗ್ತಾರ್ ತಾಚೊ ಹಾತ್ ಸೊಡುಂಕ್ ಸಕ್ತಾ. ಜಶೆಂ ಹ್ಯಾಚ್ ವೆಳಾನ್ ಹಾಚ್ಯಾ ಆದಿಂ ತಾಚೊ ಹಾತ್ ಸೊಡ್ಲ್ಲೊ. ಹ್ಯಾಚ್ ಖಾತಿರ್ ಆಲಿಯಾಕ್ ವೆಳಾಚೆರ್ ಭರ್ವಸೊ ನಾತ್ಲ್ಲೊ.
ಎಕಾಚ್ ವೆಳಾಂತ್ ಆಲಿಯಾನ್ ಆತಾಂ ಸಭಾರ್ ಕಾಮಾಂ ಕರುಂಕ್ ಆಸಾತ್. ರಾಯನಾಕ್ ಕಾಂಯ್ ದುಬಾವ್ ಜಾಯ್ನಾತ್ಲ್ಲ್ಯಾ ಪರಿಂ ಸಾಂಭಾಳುಂಕ್ ಆಸಾ. ಸಾವಂತಾಕ್ ತಾಚ್ಯಾ ಫಿಲ್ಮಾಂತ್ ತಾಕಾ ಜಾಯ್ ಜಾಲ್ಲ್ಯಾ ಪರಿಂ ಆಪ್ಣೆ ಸಹಕಾರ್ ದೀಂವ್ಕ್ ಆಸಾ. ವಿಶು ಕುಮಾರಾಕ್ ಲಾಗಿಂ ಕರುಂಕ್ ಆಸಾ. ಆಪ್ಣಾಕ್ ತ್ಯಾ ಏರ್ಹೊಸ್ಟೆಸಾಚಾ ಕಾಮಾ ಥಾವ್ನ್ ಕಾಡುನ್ ಉಡಂವ್ಕ್ ಕಾರಾಣ್ ಜಾಲ್ಲ್ಯಾ ವ್ಯಕ್ತಿ ಥಾವ್ನ್ ಆಪ್ಣಾಕ್ಚ್ ಬಚಾವ್ ಕರುಂಕ್ ಆಸಾ. ಹ್ಯಾ ಭಿತರ್ಲ್ಯಾಂತ್ ಖಂಯ್ಚಾಂತ್ ಎಕಾಂತ್ ಆಪುಣ್ ಸಲ್ವಾಲಿಂ ಜಾಲ್ಯಾರ್ ಆಪ್ಣಾಚೆಂ ಮಿಸಾಂವ್ ನಿರ್ಫಳ್ ಜಾಲ್ಲ್ಯಾ ಪರಿಂಚ್!
ಫಕತ್ತ್ ಸ ಮಹಿನೆ! ಜಶೆಂ ಫಿಲ್ಮಾಚೆಂ ಚಿತ್ರೀಕರಣ್ ಸಂಪ್ಲೆಂ ತಶೆಂ ಆಲಿಯಾಚೆಂ ಝುಜ್ ಆರಂಭ್ ಜಾಲೆಂ!
ಆಲಿಯಾ ಆನಿ ತಾಣೆಂ ಆರಂಭ್ ಕರ್ಚ್ಯಾ ಝುಜಾಕ್ ಫಕತ್ತ್ ಸ ಮಹಿನ್ಯಾಂಚೊ ಅಂತರ್!
ಎಕಾ ವಾಟೆನ್ ಹೆ ಸ ಮಹಿನೆ! ದುಸ್ರ್ಯಾ ವಾಟೆನ್ ವಿಶು ಕುಮಾರ್!
ಆಪ್ಲ್ಯಾ ಜಿವಿತಾಂತ್ ಕೋಣ್ ಪಯ್ಲೆಂ ಯೆತಾ?
ಆಲಿಯಾ ರಾಕೊನ್ ರಾವ್ಲೆಂ.
ತೆಂ ಘಡಿಯೊ ಮೆಜ್ತಾಲೆಂ. ತೆಂ ದೀಸ್ ಮೆಜ್ತಾಲೆಂ ತೆಂ ಹಪ್ತೆ ಮೆಜ್ತಾಲೆಂ.
ದಿಸಾ ಪಾಟ್ಲ್ಯಾ ಉದೆವ್ನ್ ಯೆಂವ್ಚ್ಯಾ ರಾತಿಕ್ ರಾಕೊನ್ ಬಸೊನ್ ತ್ಯಾ ಮೊಳಾಬಾರ್ ಉದೆವ್ನ್ ಯೆಂವ್ಚ್ಯಾ ಉಜ್ವಳ್ಚ್ಯಾ ತಾರಾಂಕ್ ಪಳವ್ನ್ ಆಪ್ಣಾಚಿಯ್ ತಿ ರಾತ್ ಕೆದ್ನಾಂ ಯೆತೆಲಿ? ಆಲಿಯಾ ತ್ಯಾ ಮೊಳಾಬಾ ವಯ್ಲ್ಯಾ ತಾರಾಂ ಮಧೆಂ ಆಪ್ಣಾಕ್ ಪಳಂವ್ಕ್ ಆಶೆಂವ್ಕ್ ಲಾಗ್ಲೆಂ.
ರಾತಿ ಪಾಟ್ಲ್ಯಾನ್ ಉದೆವ್ನ್ ಯೆಂವ್ಚ್ಯಾ ದಿಸಾಕ್ ನದ್ರೆಂತ್ ಸೊಭವ್ನ್ ತ್ಯಾ ಮೊಳಾಬಾರ್ ರಾಜ್ ಕರ್ಚ್ಯಾ ಕಾಳ್ಬಾಣೆಕ್ ಉಡಂವ್ಕ್ ಉದೆವ್ನ್ ಯೆಂವ್ಚ್ಯಾ ನಿಳ್ಶ್ಯಾ ರಂಗಾಕ್ ಪಳವ್ನ್ ಆಪ್ಣಾಚೊಯ್ ತೊ ದೀಸ್ ಕೆದ್ನಾಂ ಯೆತಲೊ? ಆಲಿಯಾ ತ್ಯಾ ಮೊಳಾಬಾ ವಯ್ಲ್ಯಾ ನಿಳ್ಶ್ಯಾ ರಂಗಾಂತ್ ಆಪ್ಣಾಚೆಂ ನಾಂವ್ ಪರ್ಜಳ್ಚೆಂ ದೆಖೊಂಕ್ ಆಂವ್ಡೆತಾಲೆಂ.
ತೊ ದೀಸ್ ಮಂಗ್ಳಾರ್!
ಕಾಲ್ಚ್ಯಾ ದಿಸಾಚಾ ಸಾಂಜೆರ್ ಪದಾಚೆಂ ಚಿತ್ರೀಕರಣ್ ಚಲ್ಲ್ಲೆಂ!
ಸಿಮ್ಲಾಂತ್ಯ್ ಪೃಕೃತಿಚಾ ವಯ್ರ್ ಭರ್ವಸೊ ದವರುಂಕ್ ಹ್ಯಾ ದಿಸಾಂನಿ ಸಾದ್ಯ್ ನಾತ್ಲ್ಲೆಂ. ಎಕೇಕ್ ದೀಸ್ ಅಖ್ಖೊ ದೀಸ್ ದಾಟ್ ದುಂವ್ರಿ ತರ್ ಎಕೇಕ್ ದೀಸ್ ಅಖ್ಖೊ ದೀಸ್ಭರ್ ಬಿರ್ಬಿರೊ ಪಾವ್ನ್!
ಹ್ಯಾ ಮಧೆಂ ಕಶೆಂ ತರ್ಯ್ ಚಿತ್ರೀಕರಣ್ ಸಂಪಂವ್ಕ್ ಜಾಯ್. ಜಶೆಂ ವೆಳಾಚೊ ಅಭಾವ್ ತಶೆಂ ಕಾಮಾಚೆಂ ತುರ್ತ್!
ಆಲಿಯಾಕ್ ಜಾಲ್ಯಾರ್ಯ್ ಕಿತ್ಲ್ಯಾ ವಾಂವ್ಟಿನ್ ತರ್ಯ್ ಫಿಲ್ಮ್ ವೆಗಿಂಚ್ ಸಂಪೊನ್ ಆಪ್ಣೆ ತ್ಯಾ ಮೊಳಾಬಾ ವಯ್ಲೆಂ ನೆಕೆತ್ರ್ ಜಾಂವ್ಕ್ ಜಾಯ್ ಮ್ಹಳ್ಳಿ ಆಶಾ. ಹ್ಯಾ ಆಶೆ ವರ್ವಿಂ ತಾಣೆಂ ಸಾವಂತಾಕ್ ಆಪ್ಣಾಚೊ ಸಂಪೂರ್ಣ್ ಸಹಕಾರ್ ದಿಲ್ಲೊ. ಹ್ಯಾಚ್ ಆಲಿಯಾಚಾ ಸಹಕಾರಾ ಥಾವ್ನ್ ಕಾಲ್ಚ್ಯಾ ರಾತಿಚೆಂ ಚಿತ್ರೀಕರಣ್ ಸಂಪಯ್ತಾನಾ ವೇಳ್ ಸುಮಾರ್ ಉತಾರ್ಲ್ಲೊ.
ರಾತಿಚೆಂ ಚಿತ್ರೀಕರಣ್ ಜಾವ್ನ್ ನಿದೆಕ್ ವೆಂಗ್ಲ್ಲೆಂ ಆಲಿಯಾ ಸಂಸಾರ್ ವಿಸ್ರೊನ್ ಗೆಲ್ಲೆಂ. ತಾಕಾ ಸಾಕಾಳಿಂ ಜಾಗ್ ಜಾಲ್ಲಿಚ್ ತಾಚೆಂ ಸೆಲ್ಪೋನ್ ವ್ಹಾಜ್ತಾನಾ!
ಆಲಿಯಾನ್ ಆಪ್ಲ್ಯಾ ಪೊನಾಚೆಂ ಸಿಮ್ ಕಾರ್ಡ್ ಬದ್ಲಿ ಕೆಲ್ಲೆಂ. ಹ್ಯಾ ನವ್ಯಾ ನಂಬರಾಕ್ ತಾಣೆಂ ರಾಯನ್ ಆನಿ ಸಾವಂತಾ ಶಿವಾಯ್ ಕೊಣಾಯ್ಕ್ಯ್ ದಿಲ್ಲೆಂ ನಾ. ಆಪ್ಣಾಚ್ಯಾ ಫಿಲ್ಮಾಚೆಂ ಚಿತ್ರೀಕರಣ್ ಕಾಬಾರ್ ಜಾವ್ನ್ ಫಿಲ್ಮ್ ಪ್ರದರ್ಶನಾಕ್ ದೆಂವ್ತಾ ಪಾಸೊನ್ ಆಲಿಯಾ ಹ್ಯಾ ತಾಚ್ಯಾ ಸಂಸಾರಾ ಥಾವ್ನ್ ಪಯ್ಸ್ ರಾವೊಂಕ್ ಆಶೆತಾಲೆಂ. ಪುಣ್ ಆತಾಂ...? ಆಲಿಯಾಚೆಂ ಸೆಲ್ಪೋನ್ ವಾಜ್ತಾಲೆಂ.
ಆಂಗಾ ವಯ್ಲಿ ದಾಟ್ ಕಾಂಬೊಳ್ ಪಯ್ಸ್ ಲೊಟುನ್ ಲಾಗಿಂಚ್ ಉಶ್ಯಾಚಾ ಲಾಗಿಂ ದವರ್ಲೆಲ್ಯಾ ಪೊನಾಕ್ ಹಾತಾನ್ಚ್ ಸಾಸ್ಪುನ್ ತೆಂ ಪೋನ್ ಹಾತಾಕ್ ಲಾಗ್ತಾನಾ,
"ಹಲೋ....?" ಆಲಿಯಾನ್ ಪೊನ್ ಆನ್ ಕೆಲೆಂ.
"ಹಾಯ್! ಗುಡ್ ಮಾರ್ನಿಂಗ್!" ತ್ಯಾ ಕುಶಿಚೊ ಪರ್ಕಿ ತಾಳೊ.
"ಗುಡ್ ಮಾರ್ನಿಂಗ್...!" ಆಲಿಯಾಚಿ ಜೆಮ್ ತಾಚ್ಯಾ ದೊಳ್ಯಾಂ ಥಾವ್ನ್ ಪಾಕಾಟೆ ಪಾಪುಡ್ನ್ ಧಾಂವ್ಲಿ. ತೆಂ ಎಕಾಚ್ಚ್ ಫರಾ ಖಾಟಿಯೆರ್ ಉಟೊನ್ ಬಸ್ಲೆಂ.
"ನಿದ್ಲ್ಲೆಂಯ್....? ಮ್ಹಜ್ಯೆ ಥಾವ್ನ್ ತುಕಾ ಕಾಂಯ್ ಡಿಸ್ಟರ್ಬ್ ಜಾಲೆಂ?"
ಖಾಟಿಯೆರ್ ಉಟೊನ್ ಬಸ್ಲ್ಲೆಂ ಆಲಿಯಾ ತ್ಯಾ ಕುಶಿಚ್ಯಾ ತಾಳ್ಯಾಕ್ ಪಾರ್ಕುಂಕ್ ಪ್ರಯತ್ನ್ ಕರ್ತಾಲೆಂ.
ಕೋಣ್....? ಕೋಣ್ ಜಾವ್ಯೆತ್......? ಆಲಿಯಾಚಿ ಮತ್ ತಾಚ್ಯಾ ಉಡಾಸಾಂತ್ ಉಪ್ಯೆವ್ನ್ ಭೊಂವ್ಲಿ.
ತಿತ್ಲೆಂಚ್!
ಎಕಾ ಕೊನ್ಶ್ಯಾಂತ್ಲೊ ತಾಚೊ ಉಡಾಸ್ ತಾಚಾ ಮತಿಚಾ ಜಾಳಾಂತ್ ಸಾಂಪಡ್ಲೊ.
"ವಿಶು ಕುಮಾರ್!?" ಆಲಿಯಾ ಉದ್ಗಾರ್ಲೆಂ.
*************
ಆಪ್ಲ್ಯಾ ಕಾಜಾರಾಚಾ ದಿಸಾಂ ಥಾವ್ನ್ ಇತ್ಲ್ಯಾ ಖುಶಿಯೆರ್ ಆಸ್ಲ್ಲೆಂ ಮಿಶೇಲ್ ಹ್ಯಾ ದಿಸಾಂನಿ ಕಿತ್ಯಾಕ್ಗೀ ಹಾಲ್ಲ್ಲ್ಯಾ ಪರಿಂ ರಾಯನಾಕ್ ದಿಸ್ತಾಲೆಂ. ಪಯ್ಲೆಂ ಸದಾಂಚ್ ಆಪ್ಲ್ಯಾ ಹಾಸ್ತ್ಯಾ ಮುಖಮಳಾಂತ್ ಘರಾಂತ್ ಸದಾಂಚ್ ಖುಶಾಲಿ ಜಾವ್ನ್ ಆಸ್ಚೆಂ ಮಿಶೇಲ್ ಆತಾಂತಾಂ ಆಪ್ಲ್ಯಾ ಮತಿ ಭಿತರ್ಚ್ ಕರ್ಗಾತಾ ಮ್ಹಳ್ಳ್ಯಾ ಪರಿಂ ದಿಸ್ತಾಲೆಂ. ಹ್ಯಾ ತಾಚ್ಯಾ ಕರ್ಗೊಣೆಕ್ ಕಾರಾಣ್ ಕಿತೆಂ ಜಾವ್ಯೆತ್ ಮ್ಹಣೊನ್ ರಾಯನಾನ್ ಮಸ್ತ್ ಸೊಧುಂಕ್ ಪ್ರಯತ್ನ್ ಕೆಲೆಂ ಜಾಲ್ಯಾರ್ಯ್ ತಾಕಾ ಸಾದ್ಯ್ ಜಾಂವ್ಕ್ ನಾ. ಆಪ್ಣಾಚೆಂ ಮಿಶೇಲ್ ಮತಿನ್ ಆನಿ ಕಾಳ್ಜಾನ್ ಚಡ್ಚ್ ನಾಜೂಕ್ ಮ್ಹಳ್ಳೆಂ ತೊ ಜಾಣಾಂ. ಹ್ಯಾಚ್ ಖಾತಿರ್ ರಾಯನ್ ಆಪ್ಲ್ಯಾ ಘರ್ಚ್ಯಾ ವಿಶಯಾಂತ್ ತೆಂಯ್ ಪ್ರತ್ಯೇಕ್ ಜಾವ್ನ್ ಮಿಶೇಲಾಚಾ ವಿಶಯಾಂತ್ ಚಡ್ಚ್ ಜಾಗ್ರುತ್ಕಾಯ್ ಸಾಂಬಾಳ್ತಾಲೊ. ಮಿಶೇಲಾಚಾ ಮತಿಕ್ ಕಿಚಿಂತ್ ಬೆಜಾರಾಯ್ ಯೇನಾತ್ಲ್ಲ್ಯಾ ಪರಿಂ ತೊ ತಾಕಾ ಸದಾಂಚ್ ಖುಶ್ ದವರುಂಕ್ ಪ್ರಯತ್ನ್ ಕರ್ತಾಲೊ.
ರಾಯನಾಕ್ ತಾಚ್ಯಾ ಜಿವಿತಾನ್ ಸಗ್ಳೆಂ ಲಿಸಾಂವ್ ಶಿಕಯಿಲ್ಲೆಂ. ಜಿವಿತಾನ್ ಶಿಕಯಿಲ್ಲ್ಯಾ ಲಿಸಾಂವಾಕ್ ಶಿಕೊನ್ ಶಿಕೊನ್ ತೊ ವ್ಹಡ್ ಜಾಲ್ಲೊ. ಹ್ಯಾ ತಾಚ್ಯಾ ವ್ಹಾಡಾವಳಿಂತ್ ತಾಚ್ಯಾಚ್ ಕುಟ್ಮಾನ್ ತಾಚ್ಯಾ ವಯ್ರ್ ಘಾಲ್ಲೊ ಪ್ರಭಾವ್ಯ್ ಮುಖ್ಯ್ ಜಾವ್ನ್ ಕಾರಾಣ್ ಜಾಲ್ಯಾರ್ ತಾಚ್ಯಾ ಭೊಂವಾರಿ ಘಡ್ಲೆಲ್ಯಾ ಸಂಗ್ತಿ ಥಾವ್ನ್ ರಾಯನ್ ಆಪ್ಲ್ಯಾ ಜಿವಿತಾಕ್ ಗರ್ಜ್ ಪಡ್ಚೆಂ ಕಿತೆಂ ಆಸಾ ತೆಂ ಸೊಧುನ್ ತ್ಯಾ ಸಂಗ್ತೆ ಥಾವ್ನ್ ಮೆಳ್ಚ್ಯಾ ಶಿಕೊವ್ಣೆಕ್ ಆಪ್ಣಾಚೆಂ ಜಿವಿತ್ ಸೊಭಿತ್ ರಿತಿನ್ ಸಾರ್ಚ್ಯಾ ರಿತಿಂನಿ ಗಳ್ಸಿತಾಲೊ.
ಹ್ಯಾಚ್ ತಾಚ್ಯಾ ಜಾಣ್ವಾಯೆ ಥಾವ್ನ್ ರಾಯನಾನ್ ಮಿಶೇಲಾ ಲಾಗಿಂ ಕಾಜಾರ್ ಜಾಂವ್ಕ್ ನಿರ್ಧಾರ್ ಘೆತ್ಲ್ಲೊ. ರಾಯನಾಕ್ ಕಾಜಾರ್ ಜಾಂವ್ಚ್ಯಾಕ್ ಹ್ಯಾ ಮುಂಬಯಿಂತ್ ಚಲಿಯಾಂಚೆಂ ಕಾಂಯ್ ಉಣೆಂಪಣ್ ನಾತ್ಲ್ಲೆಂ. ಪುಣ್ ರಾಯನಾಕ್ ಎಕಾ ನೆಣ್ತ್ಯಾ ಚಲಿಯೆಚಿಂ ಸೊಧ್ನಾಂ ಆಸ್ಲ್ಲಿಂ. ಜ್ಯಾ ಚಲಿಯೆಚೊ ಸ್ವಭಾವ್ ಮುಗ್ದ್ ಆಸೊನ್ ಫಕತ್ತ್ ತೆಂ ಆಪ್ಣಾಚ್ಯಾ ವಿಶಯಾಂತ್ ಚಿಂತ್ಚೆಂ ಸೊಡ್ಲ್ಯಾರ್ ತೆಂ ದುಸ್ರ್ಯಾ ಕಸಲ್ಯಾಯ್ ಸಂಗ್ತ್ಯಾನಿಂ ಮೆತೆರ್ ಜಾಯ್ನಾ ತಸಲೆಂ. ಹ್ಯಾಚ್ ಖಾತಿರ್ ರಾಯನಾಕ್ ಮಿಶೇಲ್ ಪಸಂದ್ ಜಾಲ್ಲೆಂ. ಪುಣ್ ರಾಯನಾನ್ ಮಿಶೇಲಾಕ್ಚ್ ಪಸಂದ್ ಕರುಂಕ್ಯ್ ಕಾರಾಣ್ಚ್ ವಿಶು ಕುಮಾರ್!
ಜೆದ್ನಾಂ ವಿಶು ಕುಮಾರಾನ್ ಆಪ್ಣೆಂ ಕಾಜಾರ್ ಜಾಂವ್ಕ್ ಆಸ್ಚ್ಯಾ ಚಲಿಯೆಚಿ ತಸ್ವೀರ್ ರಾಯನಾಕ್ ದಾಖಯಿಲ್ಲ್ಯಾ ವೆಳಿಂ ರಾಯನಾನ್ ಪಯ್ಲ್ಯಾ ಪಾವ್ಟಿಂ ಮಿಶೇಲಾಕ್ ಪಳೆಲ್ಲೆಂ. ವಿಶು ಕುಮಾರಾನ್ ತಾಕಾ ಜಾಂವ್ಚ್ಯಾ ಹೊಕ್ಲೆಚ್ಯಾ ತಸ್ವೀರೆಂಕ್ ದಾಖಯಿಲ್ಲ್ಯಾ ಚಾರ್ ತಸ್ವೀರೆಂ ಪಯ್ಕಿ ದೋನ್ ತಸ್ವೀರೆಂನಿ ಮಿಶೇಲ್ ಆಸ್ಲ್ಲೆಂ.
ಪಯ್ಲೆಂ ಜರ್ಯ್ ರಾಯನಾನ್ ಮಿಶೇಲಾಕ್ ತಸ್ವೀರೆಚೆರ್ ಪಳೆತಾನಾ ತಾಕಾ ಎಕಾ ಬಿಜ್ನೆಸ್ಮ್ಯಾನಾಚಾ ನದ್ರೆನ್ಚ್ ಪಳೆಲ್ಲೆಂ. ಪುಣ್ ಮಿಶೇಲಾ ವಿಶಿಂ ತಾಣೆಂ ಶೀತಲಾಚಾ ಬಾಪಾಯ್ಚಾ ತೊಂಡಾ ಥಾವ್ನ್ ಆಯ್ಕಾತಾನಾ ಆನಿ ಮಿಶೇಲ್ ಮ್ಯಾಂಚೆಸ್ಟರಾ ಥಾವ್ನ್ ಮಂಗ್ಳುರಾಕ್ ಕಶೆಂ ಪಾವ್ಲೆಂ ತೆಂ ಆಯ್ಕಾತಾನಾ ತೊ ನಿಜಾಯ್ಕ್ಯ್ ಮಿಶೇಲಾ ವಯ್ರ್ ಉತ್ಸಾಹಿತ್ ಜಾಲೊ.
ಮ್ಯಾಂಚೆಸ್ಟರಾಂತ್ ಜಲ್ಮಾಲ್ಲೆಂ! ತೆಂಯ್ ಎಕಾ ಸ್ಕಾಟಿಶ್ ಆವಯ್ಕ್ ಜಲ್ಮಾಲ್ಲೆಂ ಮಿಶೇಲ್ ಆಶೆಂ ತ್ಯಾ ಮಂಗ್ಳುರ್ಚಾ ಗಾಂವಾಂತ್....? ಕಶೆಂ ಸಾದ್ಯ್? ತ್ಯಾ ಭಾಯ್ರ್ ಇಂಡಿಯಾಚಾ ಸಂಸ್ಕ್ರತೆಕ್ ವೆಂಗುನ್......? ಹೆಂ ಕೊಣಾಯ್ಕ್ಯ್ ಮಾಂದುನ್ ಘೆಂವ್ಕ್ ಜಾಯ್ತ್?
ಖಂಡಿತ್ ಸಾದ್ಯ್ ನಾ!
ಮಿಶೇಲಾಚಾ ರುಪಾಕ್ ಆನಿ ತಾಚ್ಯಾ ಜಲ್ಮಾಕ್ ಮಿಶೇಲಾಚ್ಯೊ ಹ್ಯೊ ತಸ್ವೀರ್ಯೊ ತಾಕಾ ಸಾಂಗಾತ್ ದೀನಾತ್ಲ್ಲ್ಯೊ. ದುಸ್ರ್ಯಾ ಕೊಣಾಯ್ಕ್ಯ್ ಹೆಂ ಕಳೊಂಕ್ ನಾ ಜಾಲ್ಯಾರ್ಯ್ ರಾಯನಾಚಾ ಮತಿಕ್ ಹೆಂ ಗೆಲ್ಲೆಂ.
ರಾಯನ್ ಜಲ್ಮಾ ಥಾವ್ನ್ ಬಿಜ್ನೆಸ್ಮ್ಯಾನ್! ಆಪ್ಣಾ ಮುಕಾರ್ ಯೆಂವ್ಚ್ಯಾ ಹರ್ಯೆಕಾ ರುಪಾಕ್ ತೊ ಫಕತ್ತ್ ಆಪ್ಲ್ಯಾ ಬಿಜ್ನೆಸ್ಮ್ಯಾನಾಚಾ ನದ್ರೆನ್ ಪಳಯ್ತಾಲೊ. ತಶೆಂಚ್ ಆಜ್ ಹ್ಯಾ ವಿಶು ಕುಮಾರಾನ್ ದಾಖಯಿಲ್ಲ್ಯಾ ತಸ್ವೀರೆಕ್ಯ್ ರಾಯನಾನ್ ಆಪ್ಲ್ಯಾ ತ್ಯಾಚ್ ಬಿಜ಼ಿನೆಸ್ಮ್ಯಾನಾಚಾ ನದ್ರೆನ್ ಪಳಯಿಲ್ಲೆಂ. ಹ್ಯಾ ತಾಚ್ಯಾ ನದ್ರೆಕ್ ಹ್ಯಾ ತಸ್ವೀರೆಂತ್ಯ್ ಆಪ್ಣಾಚ್ಯಾ ಫಾಯ್ದ್ಯಾಚೆಂ ಆಸಾ ಮ್ಹಳ್ಳೆಂ ತಾಚ್ಯಾ ಮತಿನ್ ತಾಕಾ ಜಾಗಯಿಲ್ಲೆಂ. ಮಿಶೇಲ್!
ಹಾಂಗಾ ಥಾವ್ನ್ ರಾಯನಾನ್ ಮಿಶೇಲಾ ವಿಶಿಂ ಸಗ್ಳಿ ಜಾಣ್ವಾಯ್ ಜೊಡ್ಲಿ.
ಇಂಡಿಯಾಚಾ ಗಲ್ಲೆ ಗಲ್ಲೆಂತ್ ಜಲ್ಮಾಲ್ಲಿಂ ಭುರ್ಗಿಂ ಪಾಶ್ಚಾತ್ಯ್ ಸಂಸ್ಕ್ರತೆಕ್ ಆಪ್ಣಾಯ್ತಾನಾ ಹೆಂ ಜಲ್ಮಾನ್ ಪಾಶ್ಚಾತ್ಯ್ ಜಾವ್ನ್ಯ್ ಮಿಶೇಲ್ ಇಂಡಿಯಚಾ ಸಂಸ್ಕ್ರತೆಚ್ಯಾ ನ್ಹೆಸ್ಣಾರ್ ತ್ಯಾ ಫೋಟೋಂತ್ ಪಯ್ಲೆ ಪಾವ್ಟಿ ರಾಯನಾಚಾ ದೊಳ್ಯಾಂಕ್ ಸೊಭಿತ್ ದಿಸ್ಲೆಂ. ಇಂಡಿಯಾಚಾ ಸಂಸ್ಕ್ರತೆಂತ್ ಬ್ರಿಟಿಶ್ ಜೀವ್! ಹಿ ಸಂಸ್ಕ್ರತಿ ತ್ಯಾ ಜಿವಾಕ್ ಭಿಲ್ಕುಲ್ ಸಾಂಗಾತ್ ದೀಂವ್ಕ್ ಸಕಾನಾ ಮ್ಹಳ್ಳೆಂ ತೆಂ ತ್ಯಾ ತಸ್ವೀರೆಂತ್ಲ್ಯಾ ಮಿಶೇಲಾಚಾ ತೊಂಡಾಕ್ ಪಳೆತಾನಾಚ್ ರಾಯನಾಕ್ ಸಮ್ಜಾಲ್ಲೆಂ. ತರ್ ಹೆಂ ಮಿಶೇಲ್ ಹಾಂಗಾ ಕಿತ್ಯಾಕ್? ರಾಯನ್ ಉತ್ಸಾಹಿಕ್ ಜಾಲ್ಲೊ. ಪಯ್ಲ್ಯಾ ಪಾವ್ಟಿಂ ತಾಕಾ ಆಪ್ಲ್ಯಾ ಬಾಪಾಯ್ಚೆಂ ಸಪಾಣ್ ಸತ್ ಜಾತಾ ತಶೆಂ ಜಾಲೆಂ. ತಾಚೊ ಬಾಪಯ್ ತಾಚ್ಯೆ ಖಾತಿರ್ ಆಸಲ್ಯಾಚ್ ಚಲಿಯೆಕ್ ಆಪ್ಲ್ಯಾ ಘರಾಚಿ ಸುನ್ ಕರುನ್ ಹಾಡುಂಕ್ ಆಶೆಲ್ಲೊ! ಜೆಂ ಚಲಿ ಆಪ್ಣಾಚೆಂ ನ್ಹಯ್ ಆಸೊನ್ಯ್ ಆಪ್ಣಾಚೆಂ ಜಾವ್ನ್ ಉರೊಂಕ್ ಸಕ್ತಾ ತಸಲೆಂ! ತಶೆಂ ಮಿಶೇಲ್ ಸೊಭಾಯೆಂತ್ ಕಾಂಯ್ ಉಣೆಂ ನಾತ್ಲ್ಲೆಂ. ಪುಣ್ ತಾಚ್ಯಾ ಸೊಭಾಯೆಕ್ ತಾಚಿ ಸಂಸ್ಕ್ರತಿ ತಾಕಾ ಸಾಂಗಾತ್ ದಿಂವ್ಚ್ಯಾಂತ್ ಸಲ್ವಾಲ್ಯಾ ಮ್ಹಳ್ಳೆಂ ತೆಂ ಮಿಶೇಲಾಚಿ ತಸ್ವೀರ್ ಪಳೆತಾನಾಚ್ ರಾಯನಾಕ್ ಕಳ್ಲ್ಲೆಂ. ರಾಯನಾಕ್ಯ್ ಹೆಂಚ್ ಜಾಯ್ ಆಸ್ಲ್ಲೆಂ! ಹಾಂಗಾ ಥಾವ್ನ್ ರಾಯನಾಕ್ ಮಿಶೇಲಾ ವಯ್ರ್ ವೊಡ್ಣಿ ಆಯಿಲ್ಲಿ. ಹಿಚ್ಚ್ ವೊಡ್ಣಿ ಘೆವ್ನ್ ರಾಯನ್ ವಿಶು ಕುಮಾರಾಚಾ ಕಾಜಾರಾಕ್ ಮಂಗ್ಳುರಾಕ್ ದೆಂವ್ಲ್ಲೊ!
ಜಶೆಂ ರಾಯನಾಚೊ ಬಾಪಯ್ ಹರ್ಯೆಕಾ ತಾಚ್ಯಾ ವಾಟೆಂತ್ ಬಿಜ್ನೆಸ್ ಸೊಧುನ್ ವೆತಾಲೊ ತಶೆಂ ರಾಯನ್ ಆಪ್ಲ್ಯಾ ಬಾಪಯ್ ಪರಿಂ ತ್ಯಾಚ್ ಬಿಜ್ನೆಸಾಕ್ ಸೊಧುನ್ ಮಂಗ್ಳುರಾಕ್ ದೆಂವ್ಲ್ಲೊ!
ರಾಯನಾನ್ ಆತಾಂ ಮಿಶೇಲಾ ಸವೆಂ ಸಂಭಂಧ್ ಜೊಡುಂಕ್ ಆಸ್ಲ್ಲೊ. ಹ್ಯಾ ಸಂಭಂಧ್ ಜೊಡ್ಚ್ಯಾ ವಾಟೆರ್ಯ್ ತಾಚ್ಯಾ ನಶಿಬಾನ್ ತಾಕಾ ಸಾಂಗಾತ್ ದಿಲೊ. ಆಪ್ಲ್ಯಾ ಬಾಪಾಯ್ನ್ ಚಿಕ್ಮಂಗ್ಳುರ್ಚೆಂ ಎಸ್ಟೇಟ್ ಮಾಧವಾಚಾ ವಳ್ಕೆರ್ ಜೆರೊಮಾ ಥಾವ್ನ್ ಘೆತ್ಲ್ಲೆಂ ಆನಿ ಹೊ ಜೆರೊಮ್ ದುಸ್ರೊ ಕೊಣ್ಯ್ ನ್ಹಯ್ ಬಗಾರ್ ಮಿಶೇಲಾಚೊ ಆಜೊ ಮ್ಹಣೊನ್ ತಾಕಾ ಕಳ್ತಾನಾ ಮಿಶೇಲಾಕ್ ಮೆಳೊಂಕ್ ಆತ್ರೆಗ್ಚ್ಯಾ ರಾಯನಾಕ್, ತಾಚ್ಯಾ ಆತ್ರೆಗಾಕ್ ಸಾಕಾರ್ ಕರ್ಚಿ ಸುಲಭ್ ವಾಟ್ ಅಪ್ಲೆಸ್ತಕಿಂ ಸೊಧುನ್ ಆಯಿಲ್ಲಿ.
ವಿಶು ಕುಮಾರಾಚಾ ಕಾಜಾರಾಕ್ ಮಂಗ್ಳುರಾಕ್ ಆಯಿಲ್ಲೊ ರಾಯನ್ ಚಾರ್ ದಿಸ್ ಮುಂಬಯಿ ಥಾವ್ನ್ ಪಯ್ಸ್ ರಾವ್ಲ್ಲೊ ಜಾಲ್ಯಾರ್ ಹಾಕಾ ಕಾರಾಣ್ ಫಕತ್ತ್ ಮಿಶೇಲ್! ಮಿಶೇಲಾಕ್ ಪಳಯಿಲ್ಲ್ಯಾ ಪಯ್ಲ್ಯಾ ನದ್ರೆಂತ್ಚ್ ತೊ ಮಿಶೇಲಾಚೆರ್ ಪಿಸ್ವಾಲ್ಲೊ. ಪುಣ್ ಮಿಶೇಲಾಕ್ ತಾಣೆಂ ಪಾರ್ಕುನ್ ಪಳಂವ್ಕ್ ಆಸ್ಲ್ಲೆಂ. ಫಕತ್ತ್ ಮಿಶೇಲಾಚಾ ಲಿಪ್ಲೆಲ್ಯಾ ಸೊಭಾಯೆಕ್ ಲಾಗೊನ್ ಆನಿ ತ್ಯಾ ತಾಚ್ಯಾ ಜಿವಿತಾಕ್ ಜಿಯೆವ್ನ್ ಆಯಿಲ್ಲ್ಯಾ ವಿಚಾರಾಂಕ್ ಲಾಗೊನ್ ತೊ ಮಿಶೇಲಾಕ್ ಆಪ್ಣಾಚೆಂ ಕರುನ್ ಘೆಂವ್ಕ್ ತಯಾರ್ ನಾತ್ಲ್ಲೊ. ತಾಚ್ಯಾ ಕಾಳ್ಜಾಂತ್ ತಾಚ್ಯಾ ಬಾಪಾಯ್ನ್ ಮೊರ್ಚ್ಯಾ ಪಯ್ಲೆಂ ಪಿಂತ್ರಾಯಿಲ್ಲ್ಯಾ, ತಾಚ್ಯಾ ಬಾಪಾಯ್ನ್ ಆಶಾ ಕೆಲ್ಲ್ಯಾ ಗೂಣಾಂಚಾ ಚಲಿಯೆಕ್ ಮಾತ್ರ್ ತೊ ಆಪ್ಲ್ಯಾ ಘರಾಚಿ ರಾಣಿ ಕರುನ್ ಹಾಡುಂಕ್ ಚಿಂತಾಲೊ. ಹ್ಯಾಚ್ ಖಾತಿರ್ ರಾಯನ್ ಚಾರ್ ದೀಸ್ ಮಂಗ್ಳುರಾಂತ್ ರಾವ್ಲ್ಲೊ. ಆಪ್ಣೆಂ ಆಶೆಂವ್ಚ್ಯಾ ಪರಿಂಚ್ ಮಿಶೇಲ್ ತಾಕಾ ಮೆಳ್ತಾನಾ ಮಾತ್ರ್ ತಾಣೆಂ ಮಿಶೇಲಾ ಸಾಂಗಾತಾ ಸಂಭಂಧ್ ರಚ್ಲೊ.
"ಹೆಂ ಮಿಶೇಲ್ ಪಯ್ಲೆಂ ಕಿತ್ಯಾಕ್ ಮ್ಹಾಕಾ ಮೆಳೊಂಕ್ ನಾ?" ರಾಯನಾಚಾ ಮತಿಂತ್ ಎಕ್ಚ್ ಸವಾಲ್ ಉದೆಲ್ಲೆಂ! ಮಿಶೇಲ್ ಮ್ಹಾಕಾ ಹ್ಯಾ ಪಯ್ಲೆಂ ಮೆಳ್ಲ್ಲೆಂ ಜಾಲ್ಯಾರ್......?
ವ್ಹಯ್! ಆಜ್ ಮ್ಹಜೊ ಬಾಪಯ್ ಮೊರ್ತೊ ನಾ ಆಸ್ಲ್ಲೊ! ತೊ ಅಜೂನ್ ಜಿವಂತ್ ಆಸ್ತೊ! ಹ್ಯಾ ಮಿಶೇಲಾಕ್ ಪಳವ್ನ್ ತೊ ಮ್ಹಜ್ಯಾ ಆವಯ್ಕ್ ವಿಸ್ರಾತೊ! ತಾಕಾ ಸಾಂಡುನ್ ಗೆಲ್ಲ್ಯಾ ತಾಚ್ಯಾ ಬಾಯ್ಲೆಕ್ ಮ್ಹಜ್ಯಾ ಆವಯ್ಕ್ ತೊ ವಿಸ್ರಾತೊ! ಆಶೆಂ ಕಿತ್ಯಾಕ್ ಜಾಂವ್ಕ್ ನಾ.....?
ಆಪುಣ್ ಮಿಶೇಲಾ ಸವೆಂ ಸಂಭಂಧ್ ಜೊಡ್ತಾನಾ ಆಪ್ಲ್ಯಾ ಬಾಪಾಯ್ಚೊ ಉಡಾಸ್ ಕಾಡುನ್ ರಾಯನ್ ಮಸ್ತ್ ದುಖಿ ಜಾಲ್ಲೊ. ತಾಚ್ಯಾ ಬಾಪಾಯ್ಚೊ ತಾಣೆಂ ಮಸ್ತ್ ಉಡಾಸ್ ಕಾಡ್ಲ್ಲೊ. ಬಾಪಾಯ್ಚಾ ಆಶೆ ಆನಿ ಖುಶೆ ಪರ್ಮಾಣೆಂ ರಾಯನಾನ್ ಮಿಶೇಲಾ ಸವೆಂ ನವೊ ಸಂಭಂಧ್ ಜೊಡ್ಲ್ಲೊ.
ಹ್ಯಾ ಸಂಭಂಧಾಂತ್ ತೊ ಮಸ್ತ್ ಖುಶಿ ಆಸ್ಲ್ಲೊ.
ರಾಯನಾಚಿ ಆವಯ್ ಹ್ಯಾ ಸಂಸಾರಾಂತ್ ತಾಕಾ ಅಂತರ್ಲ್ಯಾ ಸಭಾರ್ ಥೆಂಪಾ ಉಪ್ರಾಂತ್ ರಾಯನಾಚಾ ಘರಾ ಎಕಾ ಚಲಿಯೆಚೆಂ ಯೆಣೆಂ ಜಾಲ್ಲೆಂ. ಆಪ್ಲ್ಯಾ ಆವಯ್ಕ್ ಆಪ್ಣೆ ಹೊಗ್ಡಾವ್ನ್ ಘೆತ್ಲ್ಲ್ಯಾ ಪರಿಂ ಮಿಶೇಲಾಕ್ ಹೊಗ್ಡಾವ್ನ್ ಘೆಂವ್ಕ್ ರಾಯನ್ ಭಿಲ್ಕುಲ್ ತಯಾರ್ ನಾತ್ಲ್ಲೊ.
"ಹೆಂ ಘರ್, ಆಜ್ ನಿಜಾಯ್ಕ್ಯ್ ಏಕ್ ಬಿಡಾರ್ ಜಾಲೆಂ ಮಿಶೇಲ್! ಹ್ಯಾ ಘರಾಂತ್ ಕಿತ್ಲ್ಯಾ ವರ್ಸಾಂ ಥಾವ್ನ್ ಎಕಾ ಚಲಿಯೆಚಾ ಪಾಂಯಾಂಚೊ ಆವಾಜ್ ನಾತ್ಲ್ಲೊ. ತಿಚ್ಯಾ ತಾಳ್ಯಾಚೊ ಉಲೊ ನಾತ್ಲ್ಲೊ. ತಿಚ್ಯಾ ಕಾಂಕ್ಣಾಂಚೊ ಮಧುರ್ ನಾದ್ ನಾತ್ಲ್ಲೊ. ತಿಚ್ಯಾ ಮಾಗ್ಣ್ಯಾಚೊ ತಾಳೊ ನಾತ್ಲ್ಲೊ. ತಿಚ್ಯಾ ಉತ್ರಾಂಚೊ ಘಾಜ್ ನಾತ್ಲ್ಲೊ. ಆಜ್ ತುಂ ಆಯ್ಲಾಂಯ್. ತುಂ ಯೇವ್ನ್ ಹೆಂ ಘರ್ ನಿಜಾಯ್ಕ್ಯ್ ಬಿಡಾರ್ ಜಾಲೆಂ. ಆಜ್ ಡ್ಯಾಡಿ ಆಸ್ಲ್ಲೊ ಜಾಲ್ಯಾರ್ ಕಿತ್ಲೊ ಖುಶ್ ಜಾತೊ.....? ತೊ ಸದಾಂಚ್ ತುಜ್ಯೆ ತಸಲ್ಯಾ ಚಲಿಯೆಕ್ ಆಪ್ಣಾಚಿ ಸುನ್ ಕರುನ್ ಹಾಡುಂಕ್ ಆಶೆತಾಲೊ ಆನಿ ತುಜ್ಯಾ ಆವಾಜಾಂತ್ ತೊ ಮ್ಹಜ್ಯಾ ಆವಯ್ಕ್ ವಿಸ್ರೊಂಕ್ ತೊ ಆಶೆಲ್ಲೊ....!" ಮಿಶೇಲ್ ಪಯ್ಲ್ಯಾ ಪಾವ್ಟಿಂ ಮಂಗ್ಳುರ್ ಥಾವ್ನ್ ಮುಂಬಯಿ ಆಯಿಲ್ಲೆಂ ತೆಂ ರಾಯನಾಚಾ ಘರಾಚಿಂ ಮೆಟಾಂ ಚಡೊನ್ ದಾರ್ವಟೊ ಉತ್ರೊನ್ ಭಿತರ್ ಯೆತಾನಾ ರಾಯನ್ ಉದ್ಗಾರ್ಲ್ಲೊ.
"ಜಿವಿತಾಂತ್ ಹಿ ಏಕ್ ಹಾವೆಂ ವ್ಹಡ್ಲಿ ಚೂಕ್ ಕೆಲಿ ರಾಯನ್! ತುಂ ಆಶೆಂ ಕರಿನಾಕಾ!" ರಾಯನಾಚಾ ಬಾಪಾಯ್ನ್ ಸಾಂಗ್ಲ್ಲಿ ಉತ್ರಾಂ ಸದಾಂ ತಾಚ್ಯಾ ಮತಿಂತ್ ಹುಳ್ವುಳ್ತಾಲಿಂ. ತೊ ಆಪ್ಲ್ಯಾ ಬಾಪಾಯ್ಕ್ ಮತಿಂತ್ಚ್ ಭುಜಯ್ತಾಲೊ.
"ಮಿಶೇಲ್! ಆಜ್ ಥಾವ್ನ್ ಹ್ಯಾ ಘರಾಂತ್ ತುಜ್ಯಾ ಹಾಸ್ಯಾಂಚೊ ಆವಾಜ್ ಆಯ್ಕೊನ್ ಯೆತಲೊ! ಹ್ಯಾ ಘರಾಂತ್ ತುಂ ಫಕತ್ತ್ ಹಾಸ್ತೆಲೆಂಯ್ ಶಿವಾಯ್ ತುಕಾ ಹಾಂವ್ ಕೆದ್ನಾಂಚ್ ರಡೊಂಕ್ ದಿಂವ್ಚೊ ನಾ. ತುಕಾ ಸದಾಂ ಹಾಂವ್ ಜಿವಂತ್ ಆಸ್ತಾ ಪಾಸೊನ್ ಸುಖಾನ್ ಆನಿ ಸಂತೊಸಾನ್ ದವರುಂಕ್ ಪ್ರಯತ್ನ್ ಕರ್ತಾಂ!" ಮಿಶೇಲ್ ಮುಂಬಯಿ ಆಯಿಲ್ಲ್ಯಾ ಪಯ್ಲ್ಯಾ ರಾತಿಂ ರಾಯನಾನ್ ಮಿಶೇಲಾಚಾ ಉಸ್ಕ್ಯಾರ್ ನಿದೊನ್ ತಾಕಾ ಭಾಸಾವ್ಣಿ ಕೆಲ್ಲಿ.
"ಸುಖ್ ಆನಿ ಸಂತೊಸ್ ಹ್ಯಾ ಚಾರ್ ವೊಣೊದಿ ಭಿತರ್ ಕಯ್ದ್ ಜಾವ್ನ್ ನಾ ರಾಯನ್! ಮತಿಚಿ ಶಾಂತಿ ಆನಿ ಕಾಳ್ಜಾಕ್ ಸಂತೊಸ್ ಆಸ್ಲ್ಯಾರ್ ಮನಿಸ್ ಖಂಯ್ಚರ್ಯ್ ಸುಖಾನ್ ಆನಿ ಸಂತೊಸಾನ್ ರವೊಂಕ್ ಸಕ್ತಾ!" ರಾಯನಾಚ್ಯಾ ಭಾಸಾವ್ಣೆಕ್ ಮಿಶೇಲಾನ್ ಸಾದಿ ತಶಿ ಭೋವ್ ಜಾಣ್ವಾಯೆಚಿ ಜವಾಬ್ ದಿಲ್ಲಿ.
ಹ್ಯಾಚ್ ಮತಿಚಾ ಶಾಂತೆನ್ ಆನಿ ಕಾಳ್ಜಾಚಾ ಸಂತೊಸಾನ್ ಮಿಶೇಲ್ ರಾಯನಾಚಾ ಘರಾ ಸಂತೊಸಾನ್ ಆಸ್ಲ್ಲೆಂ.
ಮಿಶೇಲಾಚೊ ಸಗ್ಳ್ಯಾಂ ಪ್ರಾಸ್ ವರ್ತೊ ಗೂಣ್ ಮ್ಹಳ್ಯಾರ್ ಮಿಶೇಲಾಕ್ ವ್ಹಡ್ಪಣ್ ನಾತ್ಲ್ಲೆಂ. ತೆಂ ಅಜೂನ್ ಆಪ್ಣಾಕ್ ಸಂಸಾರಾ ಮುಕಾರ್ ನೆಣ್ತೆಂ ಮ್ಹಣೊನ್ಚ್ ಮಾಂದ್ತಾಲೆಂ. ಜರೀ ಎಕೇಕ್ ಪಾವ್ಟಿಂ ತಾಣೆಂ ಉಲಂವ್ಚಿಂ ತಿಂ ಜಾಣ್ವಾಯೆಚಿಂ ಉತ್ರಾಂ ತಾಕಾ ಜಿವಿತಾಕ್ ಜಿಯೆಲ್ಲೊ ಮಸ್ತ್ ಆನ್ಭೋಗ್ ಆಸಾ ಮ್ಹಣೊನ್ ದಾಖಯ್ತಾಲಿಂ ತರೀ ತೆಂ ತಾಚ್ಯಾ ತ್ಯಾ ಚಿಂತ್ಪಾಚಾ ಸಂಸಾರಾ ಥಾವ್ನ್ ಭಾಯ್ರ್ ಯೆತಾನಾ ಏಕ್ ಸಾದೆಂ ಚಲಿ ಮ್ಹಳ್ಳ್ಯಾ ಪರಿಂಚ್ ದಿಸ್ತಾಲೆಂ. ಪುಣ್ ಹ್ಯಾ ದಿಸಾಂನಿ....?
ಹ್ಯಾ ದಿಸಾಂನಿ ಮಿಶೇಲಾಚೆಂ ವರ್ತನ್ ಬದ್ಲಾಲ್ಲೆಂ. ತೆಂ ಕಸಲ್ಯಾಗೀ ಮತಿಚಾ ನಾ ಸಮಾಧಾನೆಂತ್ ಆನಿ ಕಾಳ್ಜಾಚಾ ಆಟಾವಿಟ್ಯಾಂನಿ ಜಿವಿತ್ ಸಾರ್ತಾ ತಶೆಂ ರಾಯನಾಕ್ ಭೊಗ್ಲ್ಲೆಂ.
ಮಿಶೇಲ್ ಆಶೆಂ ಕಿತ್ಯಾಕ್ ಕರ್ತಾ? ತಾಕಾ ಮ್ಹಾಜ್ಯಾ ಘರಾಂತ್ ಕಿತೆಂ ಉಣೆಂ ಜಾಲಾಂ? ರಾಯನಾನ್ ಮಿಶೇಲಾಕ್ ಸಮ್ಜೊನ್ ಘೆಂವ್ಚೆಂ ಪ್ರಯತ್ನ್ ಕೆಲೆಂ ತರ್ಯ್ ರಾಯನಾಚಾ ಮತಿಕ್ ಕಾಂಯ್ಚ್ ಜಳ್ಕಾಲೆಂ ನಾ. ಮಿಶೇಲ್ ಆಪ್ಣಾ ತಿತ್ಲ್ಯಾಕ್ ಆಪ್ಲೆ ಕಶ್ಟ್ ಆಪ್ಲ್ಯಾ ಮತಿಂತ್ ಧರುನ್ ಕರ್ಗಾತೆಲೆಂ ಶಿವಾಯ್ ಆಪ್ಲ್ಯಾ ಮತಿಂತ್ಲೆಂ ತೆಂ ಕಾಂಯ್ ಆಪ್ಣಾಲಾಗಿಂ ಸಾಂಗ್ಚೆಂ ನಾ! ರಾಯನ್ ಮಿಶೇಲಾಕ್ ಜಾಣಾಂ. ತರ್ ಮಿಶೇಲಾಕ್ ಆಪುಣ್ ಕಶೆಂ ಸಮ್ಜೊನ್ ಘೆಂವ್....?
ಆಜ್ ಆಪ್ಲ್ಯಾ ಆಫೀಸಾಕ್ ಆಯಿಲ್ಲ್ಯಾ ರಾಯನಾಕ್ ತಾಚ್ಯಾ ಮಿಶೇಲಾ ಶಿವಾಯ್ ತಾಕಾ ದುಸ್ರೆಂ ಕಾಂಯ್ಚ್ ಮತಿಕ್ ಆಯ್ಲೆಂ ನಾ. ಮಿಶೇಲಾಚಾ ಚಿಂತ್ನಾಂನಿ ರಾಯನಾಚಾ ಮತಿ ಪಡ್ದ್ಯಾರ್ ತಾಚ್ಯಾ ಬಾಪಯ್ಚ್ಯಾ ಉತ್ರಾಂಕ್ ಪರತ್ ಪರತ್ ಉಡಾಸ್ ಹಾಡಯ್ಲೆಂ.
"ಜಿವಿತಾಂತ್ ಹಿ ಏಕ್ ಹಾವೆಂ ವ್ಹಡ್ಲಿ ಚೂಕ್ ಕೆಲಿ ರಾಯನ್! ತುಂ ಆಶೆಂ ಕರಿನಾಕಾ!" ರಾಯನಾಚಾ ಬಾಪಾಯ್ಚಿಂ ಉತ್ರಾಂ ಕಿತ್ಯಾಕ್ಗೀ ತಾಚ್ಯಾ ಕಾಳ್ಜಾಕ್ ಭಾಲಿಯೆ ಪರಿಂ ತೊಪ್ಲಿಂ. ವ್ಹಳೂ ತಾಕಾ ಕಿತೆಂ ಕಿತೆಂ ಉಡಾಸ್ ಆಯ್ಲೆಂ. ತಾಚ್ಯಾ ಪಾಟ್ಲ್ಯಾನ್ ತೊ ಪಿಸಾಂತುರ್ ಜಾಲ್ಲ್ಯಾ ಪರಿಂ ಜಾತಾನಾ ಆಫೀಸಾಂತ್ ರಾವೊಂಕ್ ತಾಕಾ ಜಾಲೆಂ ನಾ.
ರಾಯನ್ ಆತಾಂ ಆಪ್ಲ್ಯಾ ಕ್ಯಾಬಿನಾಂತ್ ಉಟೊನ್ ಉಭೊ ಜಾಲೊ. ಆಪ್ಲ್ಯಾ ಬಸ್ಕೆರ್ ಥಾವ್ನ್ ಹೆವ್ಶಿಂ ಆಯಿಲ್ಲ್ಯಾ ತಾಣೆಂ ತ್ಯಾ ತಾಚ್ಯಾ ಕ್ಯಾಬಿನಾಂತ್ ಉಮ್ಕಾಳ್ಚ್ಯಾ ತಾಚ್ಯಾ ಬಾಪಾಯ್ಚಾ ತಸ್ವೀರೆಕ್ ಆಪ್ಲ್ಯಾ ದೊಳ್ಯಾಂನಿ ಜೊಕುನ್ ಪಳೆಲೆಂ.
"ರಾಯನ್, ಚಲಿ ಘರಾಚಿ ದಿವ್ಟಿ! ತಿಚ್ಯಾ ಉಜ್ವಾಡಾಂತ್ ಸಗ್ಳೆಂ ಘರ್ ಉಜ್ವಾಡಾಂತ್ ಭರ್ತಾ! ತಿ ನಾ ಜಾಲ್ಯಾರ್ ಕಾಂಯ್ಚ್ ನಾ. ಉಜ್ವಾಡ್ಚ್ ನಾತ್ಲ್ಲ್ಯಾಪರಿಂ. ಜಶೆಂ ಆಜ್ ತುಜಿ ಆವಯ್ ನಾಸ್ತಾನಾ.....!"
ಆಪ್ಣಾಚೊ ಬಾಪಯ್ ತ್ಯಾ ತಸ್ವೀರೆ ಥಾವ್ನ್ ಆಪ್ಣಾ ಲಾಗಿಂ ಉಲಯ್ತಾ ತಶೆಂ ರಾಯನಾಕ್ ಜಾಲೆಂ.
ತಿತ್ಲೆಂಚ್!
ಲಾಗಿಂಚ್ ಹ್ಯಾಂಗರಾಕ್ ಉಮ್ಕಾಳ್ಚ್ಯಾ ಆಪ್ಲ್ಯಾ ಕೋಟಾಕ್ ಕಾಡುನ್ ತೊ ತಾಣೆಂ ಹಾತಿಂ ಧರ್ಲೊ. ತ್ಯಾ ಕೋಟಾಕ್ ಆಪ್ಲ್ಯಾ ಆಂಗಾರ್ ವೊಡುಂಕ್ ತಾಕಾ ಮನ್ ಆಯಿಲ್ನಾಂ. ಥಂಡ್ ಏರ್ಕಂಡೀಶನಾಚಾ ಹವ್ಯಾಂತ್ಯ್ ತಾಚೆಂ ಆಂಗ್ ಉಭೆತಾ ಮ್ಹಳ್ಳ್ಯಾ ಪರಿಂ ತಾಕಾ ಜಾಲೆಂ.
ಮೆಜಾ ವಯ್ಲೆಂ ಗಾಗಲ್ ದೊಳ್ಯಾಂಕ್ ವೊಡುನ್ ಥಂಯ್ಚರ್ಚ್ ಆಸ್ಲ್ಲೆಂ ಸೆಲ್ಪೋನ್ ಹಾತಿಂ ಘೆವ್ನ್ ರಾಯನ್ ಆಪ್ಲ್ಯಾ ಕ್ಯಾಬಿನಾ ಥಾವ್ನ್ ಭಾಯ್ರ್ ಆಯ್ಲೊ.
"ಸ್ಮಿತಾ.....? ಕಾರ್ಗೋ ಕನ್ಸೈನ್ಮೆಂಟ್ ಕ್ಲಿಯರ್ ಜಾಲ್ಯಾ ಉಪ್ರಾಂತ್ ಜಸ್ಟ್ ಗಿವ್ ಮಿ ಅ ಪೋನ್ಕಾಲ್!"
ಆಪ್ಲ್ಯಾ ಸೆಕ್ರೆಟರಿಚಾ ಜವಾಬೆಕ್ಯ್ ತೊ ರಾವ್ಲೊ ನಾ. ತೊ ಚಲ್ತೆಚ್ ರಾವ್ಲೊ.
"ಎಸ್ ಸಾರ್!" ಸ್ಮೀತಾ ರಾಯನಾಚಾ ಪಾಟಿಕ್ಚ್ ಪಳೆತಾಲೆಂ.
ಆಫೀಸ್ ಬಿಲ್ಡಿಂಗಾ ಥಾವ್ನ್ ಲಿಫ್ಟ್ ಧರುನ್ ಸಕಯ್ಲ್ ಆಯಿಲ್ಲೊ ರಾಯನ್ ಆಪ್ಲೆಂ ಕಾಳೆ ಚವರ್ಲೆಟ್ ಜೀಪ್ ಪಾರ್ಕಿಂಗಾರ್ ಥಾವ್ನ್ ಭಾಯ್ರ್ ಕಾಡುನ್ ಘರ್ಚ್ಯಾ ವಾಟೆಕ್ ಲಾಗ್ಲೊ.
ಶಾಂತಿ ನಾತ್ಲ್ಲ್ಯಾ ಮತಿ ವರ್ವಿಂ ತೊ ವೆಗಿಂಚ್ ಆಪ್ಲ್ಯಾ ಬೊಂಗ್ಲ್ಯಾ ಸಾಮ್ಕಾರ್ ಉಭೊ ಜಾಲ್ಲೊ.
ಜಿಪಾಕ್ ಗ್ಯಾರೆಜಿಂತ್ ದವರುನ್ ತಾಚೆಂ ಇಂಜಿನ್ ಭಂಧ್ ಕರುನ್ ಆನಿ ಕಿತೆಂ ಜಿಪಾರ್ ಥಾವ್ನ್ ದೆಂವೊಂಕ್ ತಾಣೆಂ ಜಿಪಾಚಾ ದಾರಾ ಹ್ಯಾಂಡಲಾಕ್ ಆಪ್ಲ್ಯಾ ಹಾತಾನ್ ಧರ್ಲಾಂ ಮಾತ್ರ್!
ತಿತ್ಲ್ಯಾರ್!
ರಾಯನಾಚೆಂ ಸೆಲ್ಪೋನ್ ವ್ಹಾಜೊಂಕ್ ಲಾಗ್ಲೆಂ.
"ಹಾಂ ಆಲಿಯಾ ಸಾಂಗ್!" ರಾಯನ್ ಉಲಯ್ಲೊ.
"ತುಂ ಬಿಜ಼ಿ ಆಸಾಯ್?" ಆಲಿಯಾಕ್ ರಾಯನಾಚಾ ತಾಳ್ಯಾರ್ ದುಬಾವ್ ಜಾಲೊ.
"ವ್ಹಯ್!"
"ಖಂಯ್.... ಆಫೀಸಾಂತ್....?"
"ನಾ! ಘರಾ ಆಸಾಂ!"
"ಆನಿ... ಬಿಜಿ ಆಸಾಂ ಮ್ಹಣಾಲೊಯ್?" ಆಲಿಯಾನ್ ಆಪ್ಲ್ಯಾ ಉತ್ರಾಂನಿ ತಾಳೊ ವೊಡ್ಲೊ.
"ಸಾಂಗ್! ಕಾಂಯ್ ಪ್ರಾಬ್ಲೆಮ್......?"
"ಕಾಂಯ್ ನಾ! ಆಶೆಂಚ್ ತುಕಾ ಪೋನ್ ಕರ್ಯಾಂ ಮ್ಹಣೊನ್ ಮನ್ ಜಾಲೆಂ. ಕಸೊ ಆಸಾಯ್.....?"
"ಆಲಿಯಾ...., ಹಾಂವ್ ತುಕಾ ಉಪ್ರಾಂತ್ ಪೋನ್ ಕರ್ತಾಂ!"
ಆಲಿಯಾಚಾ ಸವಾಲಾಕ್ ಜವಾಬ್ ದೀನಾಸ್ತಾನಾ ಪೋನ್ ಭಂಧ್ ಕೆಲ್ಲೊ ರಾಯನ್ ಜಿಪಾರ್ ಥಾವ್ನ್ ಭಾಯ್ರ್ ಯೇವ್ನ್ ನಿಟ್ಟ್ ಆಪ್ಲ್ಯಾ ಘರಾಚಿಂ ಮೆಟಾಂ ಚಡೊಂಕ್ ಲಾಗ್ಲೊ.
ಇತ್ಲ್ಯಾ ವೆಗ್ಗಿಂ ಆಫೀಸಾ ಥಾವ್ನ್ ಪಾಟಿಂ ಆಯಿಲ್ಲ್ಯಾ ರಾಯನಾಕ್ ಪಳವ್ನ್ ವಾಚ್ಮ್ಯಾನಾಕ್ಯ್ ವಿಜ್ಮಿತ್ ಜಾಲೆಂ. ತೊ ತಾಚ್ಯಾ ಸಾಯ್ಬಾಕ್ ಪಳಯಿತ್ತ್ ರಾವ್ಲೊ.
ಆಮ್ಸೊರಾನ್ ಮ್ಹಳ್ಳ್ಯಾಪರಿಂ ಆಪ್ಲ್ಯಾ ಘರಾಚಿಂ ಮೆಟಾಂ ಚಡ್ಲ್ಲ್ಯಾ ರಾಯನಾನ್ ಆತಾಂ ದಾರಾಚಿ ಕಾಂಪಿಣ್ ಮಾರ್ಲಿ.
ಹ್ಯಾ ವಗ್ತಾರ್ ರಾಯನ್ ಆಪ್ಲ್ಯಾ ಮಿಶೇಲಾಕ್ ದಾರಾ ಮುಖಾರ್ ಪಳಂವ್ಕ್ ಆಶೆಲೊ. ತಾಚ್ಯಾ ಕಾಳ್ಜಾಂತ್ ಸವ್ಕಾಸ್ ದಡ್ದಡೆ ಉಮಾಳುಂಕ್ ಲಾಗ್ಲೆ.
ದಾರಾಚಿ ಕಾಂಪಿಣ್ ಮಾರ್ಲ್ಲ್ಯಾ ಥೊಡ್ಯಾ ವೆಳಾನ್ ಕಾಮಾಚಾ ಚೆಡ್ವಾನ್ ಯೇವ್ನ್ ದಾರ್ ಉಗ್ತೆಂ ಕೆಲೆಂ. ಆಪ್ಣಾ ಮುಕಾರ್ ದಾರ್ ಉಗ್ತೆಂ ಜಾತಾನಾ ಮಿಶೇಲಾನ್ಚ್ ದಾರ್ ಉಗ್ತೆಂ ಕೆಲೆಂ ಮ್ಹಣೊಣ್ ಚಿಂತ್ಲ್ಲ್ಯಾ ರಾಯನಾಕ್ ಆಪ್ಣಾ ಮುಕಾರ್ ಕಾಮಾಚಾ ಚೆಡ್ವಾಕ್ ಪಳವ್ನ್ ಮತಿ ಭಿತರ್ ಕಸಲಿಗೀ ಭಿರಾಂತ್ಶಿ ಉಟೊನ್ ಆಯಿಲ್ಲ್ಯಾ ಪರಿಂ ಜಾಲೆಂ.
ತಿತ್ಲೆಂಚ್!
ಘರಾ ಭಿತರ್ ಆಯಿಲ್ಲ್ಯಾ ರಾಯನಾನ್, ಘರ್ಚ್ಯಾ ಸಾಲಾಂತ್ ಸಗ್ಳ್ಯಾಂನ್ಯ್ ಆಪ್ಲಿ ದೀಶ್ಟ್ ಭೊಂವ್ಡಾಯ್ಲಿ. ತಾಕಾ ಮಿಶೇಲ್ ಖಂಯ್ಚರ್ಯ್ ದಿಸ್ಲೆಂ ನಾ. ತಾಚ್ಯಾ ಆಯ್ಚಾ ವರ್ತನಾಂತ್ ಕಸಲೊಗೀ ತಾಕಾಚ್ಚ್ ಕಳಿತ್ ನಾತ್ಲಲೊ ಆತುರ್ ಆಸ್ಲ್ಲೊ.
ರಾಯನಾಚಾ ಹ್ಯಾ ಆತುರಾಯೆಕ್ ಪಳೆಲ್ಲೆಂ ಘರ್ ಕಾಮಾಚೆಂ ಚೆಡುಂ ಶಮ್ಮಿ ಆಶ್ಚರ್ಯ್ ಜಾವ್ನ್ ತಾಚ್ಯಾ ಸಾಯ್ಬಾಕ್ಚ್ ಪಳಂವ್ಕ್ ಪಡ್ಲೆಂ. ತಾಕಾ ಜಾಲ್ಯಾರ್ಯ್ ತಾಚ್ಯಾ ಸಾಯ್ಬಾಚ್ಯಾ ಹ್ಯಾ ವರ್ತನಾಚೊ ಮಿಸ್ತೆರ್ ಸಮ್ಜಾಲೊ ನಾ.
"ಮಿಶೇಲ್....?" ಬಾಯ್ಲೆಕ್ ಆಪಯಿಲ್ಯಾ ರಾಯನಾನ್ "ಮ್ಯಾಡಮ್ ಖಂಯ್ ಆಸಾ ಶಮ್ಮಿ....?" ತೊ ಆತಾಂ ಶಮ್ಮಿ ತೆವ್ಶಿಂ ಘುಂವ್ಲೊ. ತಾಚೊ ತಾಳೊ ಭಿಯೆಲ್ಲ್ಯಾ ಪರಿಂ ಜಾಲ್ಲೊ.
"ಮ್ಯಾಡಮ್ ವಯ್ರ್ ಆಸಾ ಸರ್! ಬೆಡ್ ರುಮಾಂತ್......!" ಶಮ್ಮಿ ಆಪ್ಲ್ಯಾ ಸಾಯ್ಬಾಚಾ ಸಮ್ಜಾನಾತ್ಲೆಲ್ಯಾ ಆತುರಾಯೆಕ್ಚ್ ಪಳೆತಾಲೆಂ.
"ಮಿಶೇಲ್...., ಬೆಡ್ರೂಮಾಂತ್.....?" ರಾಯನ್ ಆಪ್ಲೆಸ್ತಕಿಂ ಉದ್ಗಾರ್ಲೊ.
ಹ್ಯಾ ಉಪ್ರಾಂತ್ ತೊ ಥಂಯ್ಚರ್ ರಾವ್ಲೊ ನಾ.
ಸಾಲಾ ಥಾವ್ನ್ ವಯ್ಲ್ಯಾ ಬೆಡ್ರೂಮಾಂಕ್ ಚಲೊನ್ ವಚೊಂಕ್ ಆಸ್ಚ್ಯಾ ತ್ಯಾ ಮೆಟಾಂ ತೆವ್ಶಿಂ ರಾಯನಾನ್ ಧಾಂವ್ ಮಾರ್ಲಿ. ಧಾಂವೊನ್ಚ್ ಮೆಟಾಂ ಚಡ್ಲ್ಲೊ ತೊ ಬೆಡ್ರುಮಾಚಾ ದಾರಾ ಮುಕಾರ್ ಉಭೊ ಜಾಲೊ.
ಆಪ್ಲ್ಯಾ ಧನಿಯಾಚೆಂ ಆಯ್ಚೆಂ ವರ್ತನ್ ಶಮ್ಮಿಕ್ ವಿಚಿತ್ರ್ ಮ್ಹಳ್ಳ್ಯಾಪರಿಂ ದಿಸ್ಲೆಂ. ತೆಂ ರಾಯನ್ ಚಮ್ಕಾಲ್ಲ್ಯಾ ಕುಶಿಕ್ಚ್ ಪಳೆತಾಲೆಂ. ತಾಕಾ ಕಾಂಯ್ ಸಮ್ಜಾಲೆಂ ನಾ.
ರಾಯನ್ ಆತಾಂ ಬೆಡ್ರೂಮಾಚಾ ದಾರಾ ಮುಖಾರ್ ಉಭೊ ಜಾಲ್ಲೊ!
ಬೆಡ್ರೂಮಾಚೆಂ ದಾರ್ ದಾಂಪ್ಲ್ಲೆಂ!
ಎಕಾ ಕ್ಷಣಾಕ್ ರಾಯನಾಚಾ ದೊಳ್ಯಾಂ ಮುಕಾರ್ ತಾಚ್ಯಾ ಆವಯ್ಚೆಂ ಪಿಂತುರ್ ಉದೆವ್ನ್ ಮಾಯಾಗ್ ಜಾಲೆಂ!
ತಿತ್ಲೆಂಚ್!
ಕಸಲ್ಯಾಗೀ ಅವ್ಚಿತ್ತ್ ಭಗ್ಣಾಂನಿ ಉಮಾಳುನ್ ಮ್ಹಳ್ಳ್ಯಾಪರಿಂ ರಾಯನಾನ್ ಜ್ಯೋರಾನ್ ಬೆಡ್ರೂಮಾಚೆಂ ದಾರ್ ಭಿತರ್ ಲೊಟ್ಲೆಂ!
’ದಡ್ಡ್’ ಆವಾಜ್ ಕರುನ್ ಉಗ್ತೆಂ ಜಾಲ್ಲೆಂ ದಾರ್ ಬೆಡ್ರೂಮಾ ಭಿತರ್ಲ್ಯಾ ದೆಗೆಚ್ಯಾ ವೊಣೊದಿಕ್ ಮಾರುನ್ ಪಾಟಿಂ ದಾಂಪುಂಕ್ ಯೆತಾನಾ ತ್ಯಾ ದಾರಾಕ್ ಆಪ್ಲ್ಯಾ ಹಾತಾಂನಿ ದರುನ್ ರಾಯನಾನ್ ಮುಕಾರ್ ಪಳೆಲೆಂ. ತಾಚ್ಯಾ ಪಾಟ್ಲ್ಯಾನ್,
"ಮಿಶೇಲ್!?" ಏಕ್ ಭಳಾಧೀಕ್ ಕಿಂಕ್ರಾಟ್ ರಾಯನಾಚಾ ತಾಳ್ಯಾ ಥಾವ್ನ್ ಉಮಾಳುನ್ ಆಯ್ಲಿ.
ತಿತ್ಲ್ಯಾರ್!
ಆಪ್ಲ್ಯಾ ಬೆಡ್ರೂಮಾಚೆಂ ದಾರ್ ಅಚಾನಕ್ ಕೊಣೆಗೀ ಲೊಟುನ್ ಆಯಿಲ್ಲ್ಯಾ ಆವಾಜಾಕ್ ಭಿಯೆಲ್ಲೆಂ ಮಿಶೇಲ್ ಎಕ್ಚ್ಚ್ ಪಾವ್ಟಿಂ ಪಾಟಿಂ ಘುಂವ್ಲೆಂ. ಆಪ್ಣಾಚಾಚ್ ಸಂಸಾರಾಂತ್ ಆಸ್ಲ್ಲ್ಯಾ ಮಿಶೇಲಾಕ್ ಕಾಳ್ಜಾಕ್ ಧಖೊ ಬಸ್ಲ್ಲ್ಯಾ ಪರಿಂ ಜಾವ್ನ್ ತಾಚ್ಯಾ ಹಾತಾಂತ್ ಆಸ್ಲ್ಲಿ ಏಕ್ ವಸ್ತ್ ಸಕಯ್ಲ್ ಪಡ್ಲಿ.
ತಿತ್ಲೆಂಚ್!
ಆಪ್ಣಾಕ್ಚ್ ಕಳಿತ್ ನಾಸ್ತಾನಾ ಆಪ್ಲ್ಯಾ ತಾಳ್ಯಾ ಥಾವ್ನ್ ಉಟೊನ್ ಆಯಿಲ್ಲ್ಯಾ ಕಿಂಕ್ರಾಟೆಕ್ ಥಾಂಬಂವ್ಚೆಂ ಸಂಪೂರ್ಣ್ ಪ್ರಯತ್ನ್ ರಾಯನಾನ್ ಕೆಲೆಂ ತರೀ ತಾಕಾ ಸಾದ್ಯ್ ಜಾಲೆಂ ನಾ.
"ಮಿಶೇಲ್!"
ರಾಯನಾಚಾ ತಾಳ್ಯಾ ಥಾವ್ನ್ ಉತಾರ್ ಭಾಯ್ರ್ ಪಡ್ಲ್ಲೆಂ. ಪುಣ್ ಥೊಡೆಂ ಹಳ್ವಾಯೆರ್.
ರಾಯನಾಕ್ ಪಳೆಲ್ಲೆಂ ಮಿಶೇಲ್ ಆತಾಂ ಭಿಯೆಲೆಂ. ತ್ಯಾ ಭಾಯ್ರ್ ಅಚಾನಕ್ ರಾಯನಾಚೆಂ ಯೆಣೆಂ.
ನಿದ್ಚ್ಯಾ ಕುಡಾಂತ್ಲ್ಯಾ ಖಾಟಿಯೆರ್ ಬಸೊನ್ ಆಸ್ಲ್ಲೆಂ ತೆಂ ಆತಾಂ ಸವ್ಕಾಸ್ ಉಭೆಂ ಜಾಲೆಂ. ತಾಚ್ಯಾ ಹಾತಾ ಥಾವ್ನ್ ಗಳ್ಲ್ಲ್ಯಾ ತ್ಯಾ ವಸ್ತುಕ್ ಮಿಶೇಲ್ ವಿಸ್ರೊನ್ಚ್ ಗೆಲ್ಲೆಂ.
"ಮಿಶೇಲ್....?"
ತಶೆಂಚ್ ಚಲೊನ್ ಆಯಿಲ್ಲ್ಯಾ ರಾಯನಾನ್ ಮಿಶೇಲಾಕ್ ವೆಂಗೆಂತ್ ಆರಾಯ್ಲೆಂ. ಪುಣ್ ಅಚಾನಕ್ ಆಘಾತಾನ್ ಮ್ಹಳ್ಳ್ಯಾ ಪರಿಂ ಮಿಶೇಲಾಚೆ ಹಾತ್ ರಾಯನಾಕ್ ವೆಂಗುಂಕ್ ಉಟ್ಲೆ ನಾಂತ್.
"ಮಿಶೇಲ್! ಐ ಲವ್ ಯು!"
ಮಿಶೇಲಾಕ್ ತಶೆಂಚ್ ವೆಂಗೆಂತ್ ಧರ್ಲ್ಲೊ ರಾಯನ್ ವ್ಹಳೂ ಪುಸ್ಪುಸ್ಲೊ.
ತಿತ್ಲೆಂಚ್!
ಮಿಶೇಲಾಚಾ ಮತಿಕ್ ಆತಾಂ ಥೊಡೆಂ ಧಯ್ರ್ ಮೆಳ್ಲ್ಲ್ಯಾಪರಿಂ ಜಾಲೆಂ. ಅಚಾನಕ್ ರಾಯನಾಚಾ ಯೆಣ್ಯಾ ಥಾವ್ನ್ ತಾಕಾ ಜಾಲ್ಲೊ ಆಘಾತ್ ಸವ್ಕಾಸ್ ನಿಂವೊನ್ ಯೆತಾನಾ ವ್ಹಳೂ ಉಟ್ಲ್ಲ್ಯಾ ತಾಚ್ಯಾ ಹಾತಾಂನಿ ರಾಯನಾಕ್ ವೆಂಗ್ಲೆಂ.
"ಐ ಲವ್ ಯು ಟೂ!" ಮಿಶೇಲ್ ಪುಸ್ಪುಸ್ಲೆಂ.
ಥೊಡೊ ವೇಳ್ ತಶೆಂಚ್ ಮಿಶೇಲಾಕ್ ವೆಂಗುನ್ ಧರ್ಲ್ಲೊ ರಾಯನ್ ಆಪ್ಲ್ಯಾ ಕಾಳ್ಜಾಕ್ ಸಮಾಧಾನ್ ಮೆಳ್ಳ್ಯಾ ಉಪ್ರಾಂತ್ ತೊ ಮಿಶೇಲಾ ಥಾವ್ನ್ ಪಯ್ಸ್ ಜಾಲೊ.
"ಪಳೆಯಾಂ..... ಹಾಂಗಾ ಬಸ್!"
ಮಿಶೇಲಾಚ್ಯಾ ಬಾವ್ಳ್ಯಾಂಕ್ ಆಪ್ಲ್ಯಾ ಹಾತಾಂನಿ ಧರ್ಲ್ಲ್ಯಾ ರಾಯನಾನ್ ತಶೆಂಚ್ ತಾಕಾ ಮುಕ್ಲ್ಯಾ ಖಾಟಿಯೆರ್ ಬಸಯ್ಲೆಂ.
"ತುಂ ಕಿತೆಂ ರಾಯನ್..... ಆಫೀಸಾ ಥಾವ್ನ್ ಇತ್ಲ್ಯಾ ವೆಗ್ಗಿಂ!?" ರಾಯನಾಚೊ ಆತಾಂಚೊ ಭರ್ತಾವ್ ಪಳವ್ನ್ ಮಿಶೇಲಾಚೆಂ ಎದೊಳ್ಚೆಂ ಭ್ಯೆಂ ಪಯ್ಸ್ ಧಾಂವ್ಲೆಂ.
"ಆಜ್ ಥಾವ್ನ್......!" ರಾಯನ್ ಮಿಶೇಲಾ ಮುಕಾರ್ ದಿಂಬಿಯೆರ್ ಪಡ್ಲೊ. ಆಪ್ಲ್ಯಾ ಬಾಯ್ಲೆಚೆ ದೊನ್ಯ್ ಹಾತ್ ತಾಣೆಂ ಆಪ್ಲ್ಯಾ ಹಾತಿಂತ್ ಘೆತ್ಲೆ. ಥೊಡೊ ವೇಳ್ ತಸೊಚ್ಚ್ ತೊ ತ್ಯಾ ಮಿಶೆಲಾಚ್ಯಾ ಹಾಂತಾಂಕ್ಚ್ ಪಳವ್ನ್ ಉಪ್ರಾಂತ್ ಸವ್ಕಾಸ್ ಆಪ್ಲಿ ತಕ್ಲಿ ಉಕ್ಲುನ್ ಮಿಶೇಲಾಚಾ ದೊಳ್ಯಾಂಕ್ ಆಪ್ಲಿ ದೀಶ್ಟ್ ಜೊಕುನ್ "ಆಜ್ ಥಾವ್ನ್ ಆಸಾ ಪಳೆ ಮಿಶೇಲ್..... ಹಾಂವ್ ಕೆದ್ನಾಂ ಹ್ಯಾ ಘರಾ ಭಿತರ್ ಸರ್ತಾಂ ತೆದ್ನಾಂ ಹ್ಯಾ ಘರ್ಚ್ಯಾ ದಾರಾರ್ ತುಂ ಮ್ಹಾಕಾ ಮ್ಹಜ್ಯಾ ದೊಳ್ಯಾಂಕ್ ಪಯ್ಲೆಂ ಪಳಂವ್ಕ್ ಮೆಳೊಂಕ್ ಜಾಯ್!" ರಾಯನಾನ್ ಥೊಡೊ ವೇಳ್ ಮಿಶೇಲಾಕ್ ತಶೆಂ ತಾಚೆ ದೊಳೆಭರ್ ಪಳೆಲೆಂ. ಮಿಶೇಲಾಕ್ಚ್ ಪಳಂವ್ಚ್ಯಾ ತಾಚ್ಯಾ ಕಾಳ್ಜಾಕ್ ತೃಪ್ತಿ ಭೊಗ್ಲಿ. ಪುಣ್ ಮಿಶೇಲಾಕ್ ಮಾತ್ರ್ ಆಜ್ ಅಪ್ಣಾಚಾ ಭೊಂವಾರಿ ಕಿತೆಂ ಜಾತಾ ಮ್ಹಳ್ಳ್ಯಾಚಿ ಖಬಾರ್ ನಾತ್ಲ್ಲಿ. ತಾಕಾ ಕಾಂಯ್ಚ್ ಸಮ್ಜಾಲೆಂ ನಾ.
ರಾಯನ್ ಆತಾಂ ತಸೊಚ್ಚ್ ಮುಕಾರ್ ಬಾಗಾಲೊ. ಮಿಶೇಲಾಚಾ ಉಸ್ಕ್ಯಾರ್ ತಾಣೆ ಆಪ್ಲಿ ತಕ್ಲಿ ದವರ್ಲಿ.
"ತುವೆಂ ಮ್ಹಾಕಾ ನಿಜಾಯ್ಕ್ಯ್ ಬೆಶ್ಟಾಯ್ಲೆಂಯ್ ಡಾರ್ಲಿಂಗ್!" ರಾಯನಾಚಿ ತಕ್ಲಿ ಮಿಶೇಲಾಚಾ ಉಸ್ಕ್ಯಾರ್ ವಿಶೆವ್ ಘೆತಾಲಿ.
ಮಿಶೇಲಾಕ್ ಕಾಂಯ್ಚ್ ಸಮ್ಜಾಲೆಂ ನಾ.
ಥೊಡ್ಯಾಚ್ ವೆಳಾ ಪಯ್ಲೆಂ ತೆಂ ದುಸ್ರ್ಯಾಚ್ ಸಂಸಾರಾಂತ್ ಆಸ್ಲ್ಲೆಂ. ಆತಾಂ ರಾಯನಾನ್ ಆವ್ಚಿತ್ತ್ ಯೇವ್ನ್ ತಾಕಾ ಅನ್ಯೇಕಾ ದುಸ್ರ್ಯಾಚ್ ಸಂಸಾರಾಕ್ ವೆಲ್ಲೆಂ.
ಥೊಡ್ಯಾಚ್ ಖಿಣಾಂ ಭಿತರ್ ಮಿಶೇಲ್ ಎಕಾ ಸಂಸಾರಾ ಥಾವ್ನ್ ದುಸ್ರ್ಯಾ ಸಂಸಾರಾಕ್!
"ಹೆಂ ಕಿತೆಂ ಮಿಶೇಲ್?" ಥಂಯ್ಚ್ ಮಿಶೇಲಾಚಾ ಹಾತಾ ಥಾವ್ನ್ ಜಡೊನ್ ಪಡ್ಲೆಲ್ಯಾ, ಮಿಶೇಲಾನ್ ಪಯ್ಲೆಂ ಪಳವ್ನ್ ಆಸ್ಲ್ಲ್ಯಾ ತ್ಯಾ ವಸ್ತುಚಾ ವಯ್ರ್ ರಾಯನಾಚಿ ನದರ್ ಗೆಲಿ.
"ಆಲ್ಬಮ್! ಮ್ಹಜೊ ಫೋಟೋ ಆಲ್ಬಮ್!" ಮಿಶೇಲಾನ್ ಆಪ್ಲ್ಯಾ ತೊಂಡಾರ್ ಹಾಸೊ ಹಾಡ್ಲ್ಯೊ.
"ತುಜೊ ಆಲ್ಬಮ್.....?" ತೊ ಆಲ್ಬಮ್ ವಿಂಚ್ಲ್ಲ್ಯಾ ರಾಯನಾನ್ ತಾಚೆರ್ ಆಪ್ಲಿ ನದರ್ ಮಾರ್ಲಿ.
"ಹ್ಯೊ ತಸ್ವೀರ್ಯೊ ಕೊಣಾಚ್ಯೊ.....?"
"ಮ್ಹಜ್ಯೊ!"
"ತುಜ್ಯೊ?" ರಾಯನಾಕ್ ಅಜ್ಯಾಪ್ ಜಾಲೆಂ.
"ಮ್ಯಾಂಚೆಸ್ಟರಾಂತ್ಲ್ಯೊ! ಮಮ್ಮಿ, ಡ್ಯಾಡಿ, ಕ್ಯಾಥರೀನ್, ಸೈಮನ್, ಕ್ರಿಸ್ಟಿನಾ, ಅಲೆಕ್ಸ್, ಸಗ್ಳಿಂ ಜಿವಂತ್ ಆಸ್ತಾನಾ ಮ್ಹಜ್ಯಾ ಭುರ್ಗ್ಯಾಪಣಾರ್ ಕಾಡ್ಲ್ಲ್ಯೊ!"
ರಾಯನ್ ಎಕೇಕ್ಚ್ ತಸ್ವೀರೆಕ್ ಪಳೆತಾಲೊ.
ಮಿಶೇಲಾಚಾ ಆವಯ್ ಬಾಪಾಯ್ಚಿ ತಸ್ವೀರ್ ತಾಣೆಂ ಜೆರೊಮಾಚಾ ಘರಾ ಪಳೆಲ್ಲಿ. ಪುಣ್ ಹ್ಯೊ ತಸ್ವೀರ್ಯೊ ತಾಣೆಂ ಪಳಂವ್ಕ್ ನಾತ್ಲ್ಲ್ಯೊ.
ಮಿಶೇಲಾಚೆಂ ಆವಯ್ ವಿವಿಯಾನಾ ಮಿಶೇಲಾ ಪರಿಂಚ್ ಮುಗ್ದ್ ಸ್ವಭಾವಾಚೆಂ ಮ್ಹಳ್ಳ್ಯಾ ಪರಿಂ ರಾಯನಾಕ್ ದಿಸ್ಲೆಂ.
"ಹಿ ಕ್ಯಾಥರೀನ್....., ಹೊ ಸೈಮನ್....., ಹೊ ಅಲೆಕ್ಸ್....., ಹೆಂ ಕ್ರಿಸ್ಟಿನಾ......!" ಮಿಶೇಲ್ ಎಕೇಕ್ಲ್ಯಾಕ್ಚ್ ಆಪ್ಲ್ಯಾ ಬೊಟಾನ್ ದಾಖವ್ನ್, ರಾಯನಾಕ್ ತಾಂಚಿ ವಳಕ್ ಕರುನ್ ದಿತಾಲೆಂ.
"ಆನಿ ಹೆಂ.....?" ಕ್ಯಾಥರೀನಾ ಸವೆಂ ಆಸ್ಲ್ಲ್ಯಾ ಎಕಾ ಚಲಿಯೆಕ್ ರಾಯನಾನ್ ದಾಖಯ್ಲೆಂ.
"ತಿ ಲಾರಾ! ಮ್ಹಜಿ ಗ್ರ್ಯಾಂಡ್ ಮದರ್!" ತ್ಯಾ ತಸ್ವೀರೆಕ್ಚ್ ಆಪ್ಲಿ ದೀಶ್ಟ್ ಜೊಕುನ್ ಮಿಶೇಲ್ ಹಾಸ್ಲೆಂ.
ಆಲ್ಬಮ್ ಪಳವ್ನ್ ಜಾವ್ನ್ ರಾಯನಾನ್ ತೊ ಖಾಟಿಯೆರ್ ದವರ್ಲೊ. ತೊ ಆತಾಂ ದಿಂಬಿಯೆರ್ ಪಡೊನ್ ಬಸ್ಲೆಲ್ಯಾ ಕಡೆನ್ ಥಾವ್ನ್ ಉಟೊನ್ ಮಿಶೇಲಾಚಾ ಬಗ್ಲೆಕ್ ಬಸ್ಲೊ.
"ತುಕಾ ಘರ್ಚೊ ಉಡಾಸ್ ಆಯ್ಲೊ?" ರಾಯನಾನ್ ವಿಚಾರ್ಲೆಂ.
ಆಪ್ಣಾ ಥಾವ್ನ್ ಇತ್ಲ್ಯಾ ದಿಸಾಂ ಪಾಸೊನ್ ಲಿಪವ್ನ್ ದವರ್ಲ್ಲ್ಯೊ ತಸ್ವೀರ್ಯೊ ಆಜ್ ಮಿಶೆಲ್ ಭಾಯ್ರ್ ಕಾಡುನ್ ಪಳೆತಾ ಮ್ಹಳ್ಯಾರ್....! ತೆಂಯ್ ತಾಚ್ಯಾ ಭುರ್ಗ್ಯಾಪಣಾಚ್ಯೊ ತಸ್ವೀರ್ಯೊ ಪಳಂವ್ಕ್ ಲಾಗ್ಲಾಂ ತರ್ ಮಿಶೆಲಾಕ್ ಖಂಡಿತ್ ತಾಚ್ಯಾ ಘರ್ಚ್ಯಾಂಚೊ ಉಡಾಸ್ ಆಯ್ಲಾ ಆಸ್ತಲೊ. ಹ್ಯಾ ಘರಾಂತ್ ತಶೆಂ ಕಿತೆಂ ಉಣೆಂಪಣ್ ಮಿಶೇಲಾಕ್ ಭೊಗ್ಲೆಂ? ಜ್ಯಾ ಕಾರಾಣಾಕ್ ಲಾಗೊನ್ ತಾಣೆಂ ಆಜ್ ಹೊ ಆಲ್ಬಮ್ ಭಾಯ್ರ್ ಕಾಡ್ಲೊ?
ರಾಯನಾಕ್ ಕಾಂಯ್ಚ್ ಸಮ್ಜಾನಾತ್ಲ್ಲೆಂ. ಪುಣ್ ತೊ ಖಂಡಿತ್ ಜಾಣಾಂ ಆಸ್ಲ್ಲೊ ಕೀ ಮಿಶೇಲಾಕ್ ಕಾಂಯ್ ನಾ ತರ್ ಕಾಂಯ್ ಪ್ರಾಬ್ಲೆಮ್ ಆಸಾತ್! ನಾ ತರ್ ಇತ್ಲೆ ದೀಸ್ ಸುಖಾ ಸಂತೊಸಾನ್ ಆಸ್ಲ್ಲೆಂ ಮಿಶೇಲ್ ಅಚಾನಕ್ ಥೊಡ್ಯಾ ದಿಸಾಂ ಥಾವ್ನ್ ಆಶೆಂ......?
"ಮಿಶೇಲ್?" ರಾಯನಾನ್ ಮಿಶೇಲಾಚಾ ಖಾಂದಾರ್ ಆಪ್ಲೊ ಹಾತ್ ಘಾಲೊ. "ತುಂ ಕಾಂಯ್ ಮ್ಹಜ್ಯೆ ಥಾವ್ನ್ ಲಿಪವ್ನ್ ದವರಿನಾಂಯ್....?
"ಕಿತೆಂ?" ಮಿಶೇಲಾನ್ ರಾಯನಾಕ್ಚ್ ಪಳೆಲೆಂ.
"ಕಿತೆಂ ಜಾಲಾಂ ಮಿಶೇಲ್? ಹಾಂವ್ ಹ್ಯಾ ಪಾಟ್ಲ್ಯಾ ದಿಸಾಂ ಥಾವ್ನ್ ಪಳೆತಾಂ. ತುಂ ಕಿತ್ಯಾಕ್ಗೀ....." ರಾಯನಾನ್ ಮಿಶೇಲಾಕ್ ಆಪ್ಣಾ ತೆವ್ಶಿಂ ವೊಡ್ಲೆಂ. ".....ಕಿತೆಂ ಜಾಲಾಂ ಮಿಶೆಲ್? ಮ್ಹಜ್ಯೆ ಲಾಗಿಂ ಸಾಂಗ್ ತುಂ. ತುಕಾ ಗಾಂವಾಕ್ ವಚೊಂಕ್ ಜಾಯ್? ತುಕಾ ಗಾಂವ್ಚೊ ಉಡಾಸ್ ಯೆತಾ? ಯಾ ತುಜ್ಯಾ ಆಬಾಕ್ ಆನಿ ತುಜ್ಯಾ ಮಾಂಯ್ಕ್ ಹಾಂಗಾ ಆಪವ್ನ್ ಹಾಡುಂಕ್ ಜಾಯ್? ತುಂ ಜಸ್ಟ್ ಮ್ಹಾಕಾ ಸಾಂಗ್! ತುಕಾ ಕಿತೆಂ ಜಾಯ್? ತುಜೆಂ ಪ್ರಾಬ್ಲೆಮ್ ಕಿತೆಂ? ತುಜೆಂ ಚಿಂತುನ್ ಹಾಂವ್ ಸಗ್ಳೊಂಚ್ ಭಿಯೆಲ್ಲೊಂ. ತುಕಾ ಸಾಂಡುಂಕ್ ಹಾಂವ್ ತಯಾರ್ ನಾ ಡಾರ್ಲಿಂಗ್!" ಸಾಂಗ್ಲೆಲ್ಯಾ ರಾಯನಾನ್ ಉಜ್ವ್ಯಾ ಹಾತಾನ್ ಮಿಶೇಲಾಚಾ ಹಾತಾಕ್ ಧರ್ಲೆಂ.
ಮಿಶೇಲ್ ಆಪ್ಲಿ ನದರ್ ತಗ್ಸಾವ್ನ್ ಆಪ್ಲ್ಯಾ ಉಸ್ಕ್ಯಾರ್ ಆಪ್ಲ್ಯಾ ಹಾತಾಕ್ ಧರ್ಲೆಲ್ಯಾ ರಾಯನಾಚಾ ಹಾತಾಕ್ಚ್ ಪಳೆತಾಲೆಂ.
"ಮ್ಹಕಾ ಪಳೆ ತುಂ!" ಮಿಶೇಲಾಚಾ ಹಾತಾಕ್ ಸೊಡುನ್ ತ್ಯಾ ಹಾತಾನ್ ಮಿಶೇಲಾಚಾ ಖಾಡ್ಕೆಕ್ ಧರುನ್ ತಾಣೆಂ ಮಿಶೇಲಾಕ್ ಆಪ್ಣಾ ತೆವ್ಶಿಂ ಘುಂವ್ಡಾಯ್ಲೆಂ. "ಸಾಂಗ್ ಡಾರ್ಲಿಂಗ್! ವಾಟ್ ಇಸ್ ದಿ ಪ್ರಾಬ್ಲೆಮ್?" ರಾಯನಾಚಾ ತೊಂಡಾ ವಯ್ಲೊ ಖಾಲ್ತ್ಯಾ ವಿನತೆಚೊ ಛಾರೊ ಮಿಶೇಲಾಕ್ ಸ್ಪಶ್ಟ್ ಝಳ್ಕಾಲೊ.
"ಶೀತಲ್!" ವ್ಹಳೂ ಮಿಶೆಲಾಚಾ ಜಿಬೆರ್ ಥಾವ್ನ್ ಉತ್ರಾಂ ಸುಟ್ಲಿಂ.
"ಶೀತಲ್.....? ಕಿತೆಂ ಜಾಲಾಂ ತಾಕಾ?" ರಾಯನಾಕ್ ಆಶ್ಚರ್ಯ್ ಜಾಲೆಂ.
"ತೆಂ ತಾಚ್ಯಾ ಘೊವಾ ಸಾಂಗಾತಾ ಖುಶ್ ನಾ!"
"ಖುಶ್ ನಾ? ತುಕಾ ಕಶೆಂ ಕಳ್ಳೆಂ?" ರಾಯನಾಕ್ ಮಿಸ್ತೆರ್ ಮ್ಹಳ್ಳ್ಯಾಪರಿಂ ದಿಸ್ಲೊ. ಮಿಶೇಲ್ ಶೀತಲಾ ಖಾತಿರ್ ಇತ್ಲ್ಯಾ ಖಂತಿನ್ ಆಸಾ?
"ಶೀತಲಾನ್ ಸಾಂಗ್ಲೆಂ!"
"ಬಟ್ ವೈ....?"
"ತುಂ ಆನಿ ತಾಚೊ ಘೊವ್ ಕರುನ್ ಬಿಜ್ನೆಸಾಂತ್ ಸಂಭಂಧ್ ದವರ್ತಾತ್....?"
"ವ್ಹಯ್! ವಿಶು ಥೊಡ್ಯಾ ವಿಶಯಾಂನಿ ಮಾತ್ರ್ ಮ್ಹಜ್ಯಾ ಸಂಗಿಂ ಪಾರ್ಟನರ್ಶಿಪಾಂತ್ ಆಸಾ!"
"ಕಿತೆಂ ವಿಶು ಪರಿಂಚ್ ತುಜೆಂ ಬಿಜ್ನೆಸ್ಯ್ ಚಲ್ತಾ?"
"ಮ್ಹಳ್ಯಾರ್? ಮ್ಹಾಕಾ ಸಮ್ಜೊಂಕ್ ನಾ!" ರಾಯನಾಕ್ ಮಿಶೇಲ್ ಖಂಯ್ಚಾ ವಿಶಯಾಂತ್ ಉಲಯ್ತಾ ಮ್ಹಳ್ಳೆಂ ತೆಂ ಕಳ್ಳೆಂ ನಾ.
"ಕಾನೂನಾ ಭಾಯ್ಲೆಂ! ಇಲ್ಲೀಗಲ್.....!"
"ಖಂಯ್ಚೆಂ ಇಲ್ಲೀಗಲ್ ಬಿಜ್ನೆಸ್ ಮಿಶೇಲ್?" ರಾಯನಾಕ್ ಆತಾಂ ನಿಜಾಯ್ಕ್ಯ್ ಶಾಕ್ ಲಾಗ್ಲ್ಲ್ಯಾ ಪರಿಂ ಜಾಲೆಂ.
"ತೆಂ ತುಂ ಜಾಣಾಂಯ್! ತುಜ್ಯಾ ಬಿಜ್ನೆಸಾ ವಿಶಿಂ ಹಾಂವ್ ನೆಣಾಂ!"
"ಬರೆಂ!" ರಾಯನಾನ್ ಮಿಶೇಲಾಚಾ ಖಾಂದಾ ವಯ್ಲೊ ಆಪ್ಲೊ ಹಾತ್ ಕಾಡ್ಲೊ. "ತುಂ ನೆಣಾಂಯ್ ದೆಕುನ್ ಸಾಂಗ್ತಾಂ!"
ಥೊಡೊ ವೇಳ್ ರಾಯನ್ ಮೌನ್ ಜಾಲೊ.
"ಬಿಜ್ನೆಸಾಂತ್ ಮ್ಹಜೊ ಆನಿ ವಿಶುಚೊ ಸಂಭಂಧ್ ಆಸಾ. ತೊ ಫಕತ್ತ್ ಬಾಲಿವುಡಾಚಾ ಫಿಲ್ಮಾಂನಿ ಮಾತ್ರ್! ತಾಣೆಂ ನಿರ್ಮಾಣ್ ಕರ್ಚ್ಯಾ ಫಿಲ್ಮಾಂಕ್ ಸಾಟ್ ಪರ್ಸಂಟ್ ಫೈನಾನ್ಸ್ ಹಾಂವ್ ಕರ್ತಾಂ! ತಿತ್ಲೆಂಚ್! ರಾಯನಾನ್ ಆಪ್ಲ್ಯಾ ಆನಿ ವಿಶು ಕುಮಾರಾ ಮಧ್ಲ್ಯಾ ಸಂಭಂಧಾಕ್ ಮಿಶೇಲಾಚಾ ಮುಕಾರ್ ದವರ್ಲೊ.
"ತ್ಯಾ ಭಾಯ್ರ್....?" ಮಿಶೇಲಾಕ್ ಸಮಾಧಾನ್ ಜಾಲ್ಲ್ಯಾ ಪರಿಂ ದಿಸ್ಲೆಂ ನಾ.
ರಾಯನ್ ಆತಾಂ ಮಿಶೇಲಾಚಾ ಬಗ್ಲೆ ಥಾವ್ನ್ ಉಟೊನ್ ಉಭೊ ಜಾಲೊ.
ಥೊಡೆಂ ಹೆವ್ಶಿಂ ಆಯಿಲ್ಲೊ ತೊ, "ತರ್ ತುಂ ಸಗ್ಳೆಂ ಜಾಣಾಂಯ್!" ರಾಯನಾನ್ ಮಿಶೇಲಾಕ್ಚ್ ಪಳೆಲೆಂ. ತೊ ಆತಾಂ ಮಿಶೇಲ್ ಆಪ್ಣಾ ವಿಶಿಂ ಕಿತೆಂ ಜಾಣಾಂ ಜಾಲಾಂ ತೆಂ ಆಯ್ಕೊಂಕ್ ಆಶೆಲೊ.
"ಸಾಂಗ್ ಮ್ಹಾಕಾ ತುಂ ಮ್ಹಜ್ಯಾ ವಿಶಿಂ ಕಿತೆಂ ಜಾಣಾಂ ಜಾಲಾಂಯ್.....?" ರಾಯನ್ ತಸೊಚ್ಚ್ ಮಿಶೇಲಾಕ್ ಪಳವ್ನ್ ರಾವ್ಲೊ.
"ರಾಯನ್...!" ಉದ್ಗಾರ್ಲ್ಲ್ಯಾ ಮಿಶೇಲಾನ್ ಏಕ್ ಲಾಂಭ್ ಶ್ವಾಸ್ ಸೊಡ್ಲೊ.
"ಹಾವೆಂ ಕೆದ್ನಾಂಯ್ ತುಜ್ಯಾ ಬಿಜ಼ಿನೆಸಾ ವಿಶಿಂ ಜಾಣಾಂ ಜಾಂವ್ಚೆಂ ಪ್ರಯತ್ನ್ ಕರುಂಕ್ ನಾ. ಮ್ಹಾಕಾ ತಿ ಆಶಾಯ್ ನಾ. ಹಾಂವ್ ತುಕಾ ಮೊಗಾಂತ್ ಮಾತ್ರ್ ತುಕುನ್ ಪಳೆತಾಂ ಶಿವಾಯ್ ಪಯ್ಶ್ಯಾಂನಿ ನ್ಹಯ್! ಮ್ಹಾಕಾ ತುಜ್ಯೆ ಪಯ್ಶ್, ತುಜಿ ಆಸ್ಥ್ ಅಂತಸ್ಥ್ ನಾಕಾ!" ಮಿಶೇಲ್ ಉಲಯ್ತಾಲೆಂ. ತಾಕಾ ರಾಯನಾಕ್ ದೀಶ್ಟ್ ಜೊಕುನ್ ಉಲಂವ್ಚೆಂ ಧಯ್ರ್ ನಾತ್ಲ್ಲೆಂ. ಆಪ್ಲಿ ತಕ್ಲಿ ಪಂದಾ ಘಾಲುನ್ ತೆಂ ಉಲಯ್ತಾಲೆಂ.
"ಹಾಂವ್ ಜಾಣಾಂ ಮಿಶೇಲ್! ಹ್ಯಾಚ್ ಖಾತಿರ್ ಹಾಂವ್ ತುಜ್ಯಾಲಾಗಿಂ ಕಾಜಾರ್ ಜಾಲ್ಲೊಂ! ಹ್ಯಾಚ್ ಖಾತಿರ್ ತುಕಾ ಹಾವೆಂ ಪಸಂದ್ ಕೆಲ್ಲೆಂ! ತುಜ್ಯಾ ತಸಲ್ಯಾ ಚಲಿಯೆಕ್ ಮ್ಹಜ್ಯಾಕ್ಯ್ ಚಡ್ ಜಾವ್ನ್ ಮ್ಹಜ್ಯಾ ಡ್ಯಾಡಿನ್ ಮ್ಹಜ್ಯಾ ಖಾತಿರ್ ತಾಚಿ ಜಿಣಿಭರ್ ಸೊಧ್ನಾಂ ಕೆಲ್ಲಿಂ. ತೊ ತುಜ್ಯೆ ತಸಲ್ಯಾ ಚೆಡ್ವಾಕ್ ಹ್ಯಾ ಘರಾಂತ್ ತಾಚಿ ಸುನ್ ಜಾವ್ನ್ ಹಾಡುಂಕ್ ಆಶೆಲ್ಲೊ. ಆಪ್ಲ್ಯಾ ಮೊರ್ಣಾ ಪಯ್ಲೆಂ ತೊ ತುಕಾ ಪಳೆಂವ್ಕ್ ಆಶೆಲ್ಲೊ! ಪುಣ್ ತಾಚಿ ಆಶಾ ಸುಫಳ್ ಜಾಲಿ ನಾ. ಹೆಂ ದೂಖ್ ಮ್ಹಾಕಾ ಆಜ್ ಪಾಸೊನ್ ದೊಸ್ತಾ! ಜಾಲ್ಯಾರ್ಯ್ ತುಜ್ಯಾ ಯೆಣ್ಯಾ ಉಪ್ರಾಂತ್ ಹಾಂವ್ ಹ್ಯಾ ದುಖಾಕ್ ವಿಸ್ರಾಲೊಂ. ನಿಮಾಣೆಂ ತರ್ಯ್ ಮ್ಹಜ್ಯಾ ಡ್ಯಾಡಿಚಿ ಆಶಾ ತುಜ್ಯೆ ಥಂಯ್ ಪೂರ್ಣ್ ಜಾಲಿ ಮ್ಹಳ್ಳಿ ತೃಪ್ತಿ ಮ್ಹಾಕಾ. ಹ್ಯಾಚ್ ಖಾತಿರ್ ಹಾವೆಂ ತುಕಾ ಮ್ಹಜ್ಯಾ ಬಿಜ್ನೆಸಾ ವಿಶಿಂ ಕಾಂಯ್ ಸಾಂಗ್ಲ್ಲೆಂ ನಾ!" ಮಿಶೇಲಾಚಿಂ ಉತ್ರಾಂ ಆಖೇರ್ ಜಾಂವ್ಚ್ಯಾ ಪಯ್ಲೆಂಚ್ ರಾಯನ್ ಉಲಯ್ಲೊ.
"ಆತಾಂಯ್ ಹಾಂವ್ ಹೆಂ ಜಾಣಾಂ ಜಾಂವ್ಕ್ ಖುಶಿ ವರಿನಾ!" ಮಿಶೇಲಾನ್ ಆಪ್ಲಿ ತಕ್ಲಿ ವಯ್ರ್ ಉಕೊಲ್ಲಿ ನಾ. ತೆಂ ತಾಚ್ಯಾ ಉಸ್ಕ್ಯಾರ್ ಆಸ್ಲ್ಲ್ಯಾ ತಾಚ್ಯಾ ಹಾತಾಕ್ಚ್ ಪಳೆತಾಲೆಂ. ತಾಚ್ಯಾ ಹಾತಾಚಿಂ ಬೊಟಾಂ ಎಕಾಮೆಕಾಕ್ ಚಿರ್ಡಿತಾಲಿಂ. ಥಂಯ್ ಹಾಂಗಾ ತ್ಯಾ ನಾಕ್ಶ್ಯಾಂಚಾ ಘೆಶ್ಟೊಣೆಕ್ ಲಾಗೊನ್ ತಿಂ ಬೊಟಾಂ ತಾಂಬ್ಡಿಂ ಜಾವ್ನ್ ಯೆತಾಲಿಂ. ತಾಂಚೊ ರಂಗ್ ಬದಾಲ್ತಾಲೊ.
"ಜಿಮ್ಮಿ ಸಾಂಗ್ತಾಲೊ ರಾಯನ್......!" ಮಿಶೇಲಾನ್ ಆತಾಂ ಆಪ್ಲಿ ತಕ್ಲಿ ಉಕ್ಲುನ್ ಹೆವ್ಶಿಂ ತೆವ್ಶಿಂ ತಕ್ಲಿ ಘುಂವ್ಡಾವ್ನ್ ಪಳೆಲೆಂ. ರಾಯನಾಕ್ ಪಳಂವ್ಚೆಂ ತಾಕಾ ಧಯ್ರ್ ಆಯ್ಲೆಂ ನಾ. ತೆಂ ಸವ್ಕಾಸ್ ಎಕಾ ಕುಶಿಕ್ ಘುಂವ್ಲೆಂ. ತಾಚ್ಯಾ ದೊಳ್ಯಾಂ ಮುಕಾರ್ ವ್ಹಳೂ ಜಿಮ್ಮಿಚೆಂ ರೂಪ್ ಉದೆವ್ನ್ ಆಯ್ಲೆಂ.
"ಜಿಮ್ಮಿ ಸಾಂಗ್ತಾಲೊ.....? ಕಿತೆಂ....?" ಅಚಾನಕ್ ಮಿಶೇಲಾಚಾ ತೊಂಡಾ ಥಾವ್ನ್ ಜಿಮ್ಮಿಚೆಂ ನಾಂವ್ ಆಯ್ಕೊನ್ ರಾಯನಾಕ್ ಆಶ್ಚರ್ಯ್ ಜಾಲೆಂ.
"ಜಿಮ್ಮಿನ್ ಶೀತಲಾಕ್ಯ್ ಹೆಂಚ್ ಸಾಂಗ್ಲ್ಲೆಂ!" ಮಿಶೇಲ್ ಉಲಯ್ಲೆಂ. "ಆಮಿಂ ಬಿಜ್ನೆಸ್ ಕಸಲೆಂಯ್ ಕರುಂಕ್ ಯೆತಾ. ಕಸಲ್ಯಾಯ್ ಬಿಜ್ನೆಸಾ ಥಾವ್ನ್ ಆಮಿಂ ಫಾಯ್ದೊ ಜೊಡುಂಕ್ ಯೆತಾ. ಪುಣ್ ತ್ಯಾ ಬಿಜ್ನೆಸಾ ಥಾವ್ನ್ ಕೊಣಾಯ್ಕ್ಯ್ ವಾಯ್ಟ್ ಜಾಯ್ನಾಯೆ. ಕೊಣಾಚೊ ಘೊವ್, ಕೊಣಾಚೆಂ ಬಾಯ್ಲ್, ಕೊಣಾಚೆಂ ಭುರ್ಗೆಂ, ಕೊಣಾಚೊ ಭಾವ್, ಕೊಣಾಚೆಂ ಭಯ್ಣ್, ಕೊಣಾಚಿ ಆವಯ್, ಕೊಣಾಚೊ ಬಾಪಯ್ ತ್ಯಾ ಬಿಜ್ನೆಸಾ ವರ್ವಿಂ ದುಖಾಂ ಗಳಂವ್ಚ್ಯಾ ಪರಿಂ ಜಾಯ್ನಾಯೆ. ಆಮ್ಚ್ಯಾ ಫಾಯ್ದ್ಯಾ ಖಾತಿರ್ ಕೊಣಾಯ್ಚ್ಯಾ ಜಿವಿತಾಕ್ ಆಂದ್ಕಾರಾಂತ್ ಲೊಟ್ಚೆಂ....!"
ಮಿಶೇಲ್ ಆತಾಂ ಮೌನ್ ಜಾಲೆಂ. ಆಪ್ಲೆಂ ಮಿಶೇಲ್ ಕಸಲ್ಯಾ ವಿಶಯಾ ವಿಶಿಂ ಉಲಯ್ತಾ ಮ್ಹಳ್ಳೆಂ ತೆಂ ರಾಯನಾಕ್ ಕಳಾನಾಸ್ತಾನಾ ಗೆಲೆಂ ನಾ. ತೊ ತಶೆಂಚ್ ಮಿಶೇಲಾಕ್ ಪಳವ್ನ್ ರಾವ್ಲೊ ಶಿವಾಯ್ ಕಾಂಯ್ಚ್ ಉಲಯ್ಲೊ ನಾ. ಥೊಡೊ ವೇಳ್ ಮೌನ್ ಜಾಲ್ಲೆಂ ಮಿಶೇಲ್,
"ದುಖಾಂಚೊ ಶಿರಾಪ್ ಆನಿ ರಗ್ತಾಚಿ ಬೋಬ್ ಆಮ್ಚೆರ್ ನ್ಹಯ್ ತರ್ ಆಮ್ಕಾಂ ಜಲ್ಮೊಂಚಾ ಭುರ್ಗ್ಯಾಂಚೆರ್ ಭೆಜ್ತಾ!" ಮಿಶೇಲಾನ್ ಆತಾಂ ಆಪ್ಣಾ ಲಾಗಿಂ ಖಾಟಿಯೆರ್ ಪಡೊನ್ ಆಸ್ಲ್ಲ್ಯಾ ಆಲ್ಬಮಾಕ್ ಹಾತಾನ್ ಆರಾಯ್ಲೆಂ.
"ಹೆಂಯ್ ತುಕಾ ಜಿಮ್ಮಿನ್ ಸಾಂಗ್ಲ್ಲೆ........?" ರಾಯನಾನ್ ಆಪ್ಲ್ಯಾ ತೊಂಡಾರ್ ಹಾತ್ ಚರಯ್ಲೊ. ತಸೊಚ್ಚ್ ತೊ ಡ್ರೆಸ್ಸಿಂಗ್ ಟೇಬಲಾ ತೆವ್ಶಿಂ ಚಮ್ಕಾಲೊ. ತ್ಯಾ ಆರ್ಶ್ಯಾಂತ್ ಪಳವ್ನ್ ಆಪ್ಲ್ಯಾ ಗಳ್ಯಾಚಿ ಅಂರ್ದಾಲ್ಲಿ ಟೈ ತಾಣೆಂ ಸದಿಳ್ ಕರುನ್ ತಿ ಗಳ್ಯಾ ಥಾವ್ನ್ ಸುಟವ್ನ್ ತಿಕಾ ತ್ಯಾ ಡ್ರೆಸ್ಸಿಂಗ್ ಟೇಬಲಾರ್ ದವರ್ಲಿ.
ಆಪ್ಣಾಲಾಗಿಂ ಉಲಂವ್ಚೆಂ ಸೊಡುನ್ ರಾಯನ್ ಆಪ್ಲ್ಯಾ ದುಸ್ರ್ಯಾ ಕಾಮಾಕ್ ಲಾಗ್ಲ್ಲೊ ಪಳವ್ನ್ ಮಿಶೇಲಾಕ್ ಆಪ್ಣಾ ವಯ್ರ್ಚ್ ದುಬಾವ್ ಜಾಲೊ.
"ಕಾಂಯ್ ಆಪುಣ್ ಚಡ್ತಾವ್ ಉಲಯ್ಲಿಂ....?" ತಾಣೆಂ ಅಪ್ಣಾಕ್ಚ್ ಸವಾಲ್ ಕೆಲೆಂ.
ಮತಿಚಾ ಪಡ್ದ್ಯಾರ್ ಆಪ್ಲ್ಯಾ ಸವಾಲಾಕ್ ಕಾಂಯ್ ಜವಾಬ್ ಉದೆವ್ನ್ ಆಯ್ಲಿ ನಾ ಆಸ್ತಾಂ ಬಸ್ಲೆಲ್ಯಾ ಕಡೆನ್ ಥಾವ್ನ್ಚ್ ರಾಯನಾಕ್ ಪಳೆಲ್ಲೆಂ ಮಿಶೇಲ್ ಆಪ್ಲ್ಯಾ ಹಾತಾಂತ್ಲ್ಯಾ ಆಲ್ಬಮಾಕ್ ಥಂಯ್ಚ್ ಖಾಟಿಯೆರ್ ದವರುನ್ ಉಟ್ಲ್ಲೆಂ ತೆಂ ಆಪ್ಲ್ಯಾ ತೊಂಡಾರ್ ದೆಂವ್ಲ್ಲ್ಯಾ ಕೆಸಾಂಕ್ ಹಾತಾನ್ ಪಾಟಿಂ ಕರೀತ್ತ್ ರಾಯನಾ ತೆವ್ಶಿಂ ಚಮ್ಕಾಲೆಂ.
"ಐ ಯಾಮ್ ಸಾರ್ರಿ ರಾಯನ್!" ಮಿಶೇಲ್ ವ್ಹಳೂ ರಾಯನಾಚಾ ಬಗ್ಲೆಕ್ ವಚೊನ್ ರಾವ್ಲೆಂ.
"...........!" ರಾಯನಾನ್ ಫಕತ್ತ್ ಮಿಶೇಲಾಕ್ ತಕ್ಲಿ ಘುಂವ್ಡಾವ್ನ್ ಪಳೆಲೆಂ ಶಿವಾಯ್ ತೊ ಕಾಂಯ್ ಉಲಯ್ಲೊ ನಾ.
"ಐ ಯಾಮ್ ಸಾರ್ರಿ!" ಮಿಶೇಲಾನ್ ತ್ಯಾ ಡ್ರೆಸ್ಸಿಂಗ್ ಟೇಬಲಾ ವಯ್ಲ್ಯಾ ಆರ್ಶ್ಯಾಂತ್ ಥಾವ್ನ್ ಆಪ್ಲ್ಯಾ ಘೊವಾಕ್ಚ್ ಪಳೆಲೆಂ.
"ಫಾರ್ ವಾಟ್?" ರಾಯನ್ ಆತಾಂ ಮಿಶೇಲಾಚಾ ಕುಶಿಕ್ ಘುಂವ್ಲೊ.
ತಿತ್ಲೆಂಚ್!
ಎಕಾಚ್ಚ್ಫರಾ ಮಿಶೇಲಾನ್ ಆಪ್ಲಿ ನದರ್ ತಗ್ಸಾಯ್ಲಿ.
ಆಪ್ಣಾ ಮುಖಾರ್ ಆಪ್ಲಿ ನದರ್ ತಗ್ಸಾವ್ನ್ ರಾವ್ಲೆಲ್ಯಾ ಆಪ್ಲ್ಯಾ ಮಿಶೇಲಾಕ್ ಪಳೆಲ್ಲ್ಯಾ ರಾಯನಾಚಾ ತೊಂಡಾರ್ ಸವ್ಕಾಸ್ ಹಾಸೊ ಉದೆಲ್ಯೊ. ತಾಣೆಂ ಆಪ್ಲ್ಯಾ ಹಾತಾಂನಿ ಮಿಶೇಲಾಚಾ ಬಾವ್ಳ್ಯಾಂಕ್ ಧರ್ಲೆಂ.
ಮಿಶೇಲಾಚಿ ನದರ್ ಅಜೂನ್ ತಗ್ಸಾಲ್ಲಿ.
"ಮ್ಹಾಕಾ ಪಳೆ ಮಿಶೇಲ್!"
ಮಿಶೇಲಾಕ್ ರಾಯನಾಕ್ ಪಳಂವ್ಚೆಂ ಧಯ್ರ್ ಆಯ್ಲೆಂ ನಾ.
"ಮಿಶೇಲ್....?"
ತಗ್ಸಾಲ್ಲಿ ಮಿಶೇಲಾಚಿ ನದರ್ ವಯ್ರ್ ಉಟ್ಲಿಚ್ ನಾ.
ರಾಯನಾನ್ ಆತಾಂ ಮಿಶೇಲಾಚಾ ಬಾವ್ಳ್ಯಾಂಕ್ ಸೊಡ್ಲೆಂ. ತಶೆಂಚ್ ತ್ಯಾ ಹಾತಾಂನಿ ತಾಣೆಂ ಮಿಶೇಲಾಚಾ ತೊಂಡಾಕ್ ಆರಾವ್ನ್ ಧರುನ್ ತ್ಯಾ ತಾಚ್ಯಾ ತೊಂಡಾಕ್ ಆಪ್ಣಾ ತೆವ್ಶಿಂ ಉಕೊಲ್ಲೆಂ.
"ಮಿಶೇಲ್ ಮ್ಹಾಕಾ ಪಳೆ!"
ನಾ! ಮಿಶೇಲಾಕ್ ಸಾದ್ಯ್ ಜಾಂವ್ಕ್ ನಾ! ರಾಯನಾನ್ ತಾಚ್ಯಾ ಮುಖಮಳಾಕ್ ಉಕ್ಲುನ್ ಧರ್ಲ್ಲೆಂ ಜಾಲ್ಯಾರ್ಯ್ ಮಿಶೇಲಾಚಿ ನದರ್ ಅಜೂನ್ ತಾಚ್ಯಾ ದೊಳ್ಯಾಂ ದಿಶ್ಟೆ ಭಾಯ್ಲ್ಯಾ ಆಸ್ಡ್ಯಾ ಮಧೆಂ ತಗ್ಸಾಲ್ಲಿ.
"ಮಿಶೇಲ್.....? ತುಂ ಮ್ಹಜೆಂ ಬಾಯ್ಲ್ ಮಿಶೇಲ್! ಲುಕ್ ಎಟ್ ಮಿ!" ರಾಯನಾಚೊ ತಾಳೊ ಚಿಕ್ಕೆ ಸಾದ್ಲೊ.
ಆತಾಂ ಮಿಶೇಲಾನ್ ರಾಯನಾಕ್ ಪಳೆಲೆಂ.
"ಡಾರ್ಲಿಂಗ್.... ತುಂ ಮ್ಹಜೆಂ ಬಾಯ್ಲ್! ತುಂ ಕಿತ್ಯಾಕ್ ಇತ್ಲೆಂ ಭಿಯೆತಾಯ್? ಹಾಂವ್ ಮ್ಹಾಕಾಚ್ ತುಜ್ಯೆ ಥಂಯ್ ಪಳೆತಾಂ! ಮ್ಹಜ್ಯಾ ಡ್ಯಾಡಿಕ್ ತುಜ್ಯೆ ಥಂಯ್ ಪಳಯ್ತಾಂ! ಐ ಲವ್ ಯು ಸ್ವೀಟ್ ಹಾರ್ಟ್!" ಮಿಶೇಲಾಕ್ ಪಳವ್ನ್ ಆಸ್ಲ್ಲೆ ರಾಯನಾಚೆ ದೊಳೆ ಭರೊನ್ ಆಯ್ಲೆ. ತಾಣೆಂ ಮಿಶೇಲಾಕ್ ವೆಂಗುನ್ ಧರ್ಲೆಂ.
ಥೊಡೊ ವೇಳ್ ತಶೆಂಚ್ ಮಿಶೇಲಾಕ್ ವೆಂಗುನ್ ರಾವ್ಲ್ಲ್ಯಾ ರಾಯನಾನ್ ಕಾಂಯ್ ಉಲಂವ್ಚೆಂ ಧಯ್ರ್ ಕೆಲೆಂ ನಾ. ಆಪ್ಲ್ಯಾ ಕಾಳ್ಜಾಕ್ ಭುಜವಣ್ ಜಾಲ್ಯಾ ಉಪ್ರಾಂತ್ ಹಳ್ವಾಯೆರ್ ತೊ ಉಲಯ್ಲೊ.
"ಪಳೆ ಮಿಶೇಲ್! ತುವೆಂ ಹ್ಯಾ ಘರಾಂತ್ ಕಸಲ್ಯಾಯ್ ವಿಶಯಾಕ್ ಲಾಗೊನ್ ಭಿಯೆಂವ್ಚಿ ಕಾಂಯ್ ಗರ್ಜ್ ನಾ. ಹೆಂ ಘರ್ ಮ್ಹಜೆಂ ನ್ಹಯ್! ಹೆಂ ಮ್ಹಜ್ಯಾ ಬಾಪಾಯ್ಚೆಂ. ತಾಣೆಂ ತುಜ್ಯಾ ಖಾತಿರ್ ದವರ್ಲ್ಲೆಂ. ತುಕಾ ಹಿ ತಾಚಿ ಕಾಣಿಕ್! ಹ್ಯಾ ಘರಾಂತ್ ಮ್ಹಜ್ಯಾಕ್ಯ್ ಚಡ್ ತುಕಾ ಹಕ್ಕ್ ಆಸಾ! ಹ್ಯಾ ಘರಾ ಖಾತಿರ್ ತುಂ ಕಿತೆಂ ಬರೆಂ ಆಶೆತಾಯ್ ತೆಂ ಕರ್ಚೆಂ ತುಕಾ ಸಂಪೂರ್ಣ್ ಹಕ್ಕ್ ಆಸಾ! ತುಂ ಕಶೆಂ ಆಶೆತಾಯ್ ಪಳೆ ತಶೆಂ ಹಾಂಗಾ ಚಲ್ತೆಲೆಂ! ಹಾಂವ್ ತುಕಾ ಪ್ರಾಮಿಸ್ ಕರ್ತಾಂ. ತುವೆಂ ಹಾಂಗಾ ಕಾಂಯ್ಚ್ ಭಿಯೆಂವ್ಚಿ ಗರ್ಜ್ ನಾ!"
ರಾಯನಾಚೊ ಗಳೊ ಭರೊನ್ ಯೆತಾಲೊ. ತೊ ಮೌನ್ ಜಾಲೊ. ಮಿಶೇಲಾನ್ ಕಾಂಯ್ ಉಲಂವ್ಚೆಂ ಪ್ರಯತ್ನ್ ಕೆಲೆಂ ನಾ. ತೆಂ ತಶೆಂಚ್ ರಾಯನಾಚಾ ವೆಂಗೆಂತ್ ಆಸ್ಲ್ಲೆಂ.
"ಐ ಲವ್ ಯು ಡಾರ್ಲಿಂಗ್! ....... ಇತ್ಲೆ ದೀಸ್ ತುಜೆ ಸವೆಂ ಸಾರುನ್ ಆತಾಂ ಮ್ಹಾಕಾ ತುಜ್ಯಾ ಸಾಂಗಾತಾಚಿ ಸವಯ್ ಜಾಲ್ಯಾ ಡಾರ್ಲಿಂಗ್! ತುಕಾ ಸೊಡುನ್ ಹಾಂವ್ ಜಿಯೆಂವ್ಕ್ ಸಕ್ಚೊಂ ನಾ. ಹಾಂವ್ ಸತ್ತ್ ಸಾಂಗ್ತಾ ಡಾರ್ಲಿಂಗ್!" ಥೊಡ್ಯಾ ವೆಳಾನ್ ಕುಡ್ಕ್ಯಾ ಕುಡ್ಕ್ಯಾ ಉತ್ರಾಂನಿ ಕಸಲ್ಯಾಗೀ ಭಾವನಾಂನಿ ಭರೊನ್ ಮ್ಹಳ್ಳ್ಯಾಪರಿಂ ರಾಯನ್ ಉಲಯ್ಲೊ.
"ಹಾಂವ್ ಜಾಣಾಂ ರಾಯನ್.....!" ಮಿಶೇಲ್ ವ್ಹಳೂ ಉಲಯ್ಲೆಂ. "......ಪುಣ್?"
"ಹಾಂ....! ಉಲಯ್ ಮಿಶೇಲ್. ಮ್ಹಾಕಾ ದಿಸ್ತಾ ಆಜ್ ಹಾವೆಂ ತುಕಾ ಆಯ್ಕೊಂವ್ಚಿ ಚಡ್ ಗರ್ಜ್ ಆಸಾ!"
"ತುಂಯ್ ಏಕ್ ಬಿಜ್ನೆಸ್ಮ್ಯಾನ್ ರಾಯನ್! ಬಿಜ್ನೆಸ್ಮ್ಯಾನ್ ಪಯ್ಶೆ ಥಂಯ್ಚರ್ ವೊಂಪ್ತಾ ಖಂಯ್ಚರ್ ತಾಕಾ ಲುಂವಣ್ ಬರಿ ಮೆಳ್ತಾ! ಹ್ಯಾ ಲುಂವಣೆಂತ್ ಪಯ್ಶ್ಯಾಂಕ್ಚ್ ಲುಂವ್ಲ್ಯಾರ್ ಬರೆಂ ಆಸಾ. ತ್ಯಾ ಪಯ್ಶ್ಯಾ ಸವೆಂ ಖಂಯ್ಚರ್ಯ್ ದೂಖ್ ಆನಿ ರಗಾತ್ ಲುಂವಣ್ ಗೆಲ್ಯಾರ್...." ಮಿಶೇಲ್ ಮುಕಾರ್ ಉಲಯ್ಲೆಂ ನಾ. ತೆಂ ಆತಾಂ ಆಪ್ಲೆ ದೊಳೆ ಉಭಾರುನ್ ರಾಯನಾಕ್ಚ್ ಪಳೆಲೆಂ. ಥೊಡ್ಯಾಚ್ ವೆಳಾ ಪಯ್ಲೆಂ ರಾಯನಾನ್ ಉಚಾರ್ಲ್ಲ್ಯಾ ಉತ್ರಾಂ ಥಾವ್ನ್ ತಾಚ್ಯಾ ಮತಿಕ್ ಧಯ್ರ್ ಮೆಳ್ಲ್ಲೆಂ.
"ತುಕಾ ಶೀತಲಾನ್ ಕಾಂಯ್ ಸಾಂಗ್ಲೆಂ?" ರಾಯನಾನ್ ಥೊಡ್ಯಾ ವೆಳಾಚೆಂ ಮೌನ್ ಮೊಡ್ಲೆಂ.
"ತುಜ್ಯಾ ವಿಶಿಂ ನ್ಹಯ್ ರಾಯನ್!"
"ಮ್ಹಜ್ಯಾ ವಿಶಿಂ ನ್ಹಯ್ ತರ್ ಮ್ಹಜಾ ಬಿಜ್ನೆಸಾ ವಿಶ್ಯಾಂತ್.....?"
"ನ್ಹಯ್....!"
"ನ್ಹಯ್.....?"
"ವಿಶು ವಿಶಿಂ!"
"ವಿಶು ವಿಶಿಂ....? ವಿಶು ವಿಶಿಂ ಕಿತೆಂ?"
"ಶೀತಲ್ ತಾಚ್ಯಾ ಘೊವಾ ವಿಶಿಂ ಸಗ್ಳೆಂ ಜಾಣಾಂ!"
"ತಾಂತುಂ ಕಿತೆಂ ಆಸಾ?"
"ವಿಶು ಕಾನೂನಾ ಭಾಯ್ಲ್ಯಾ ಬಿಜ್ನೆಸಾಂತ್ ಮೆತೆರ್ ಆಸಾ ಮ್ಹಣೊನ್ ತಾಕಾ ದುಬಾವ್!"
"ಬಿಜ್ನೆಸಾಂತ್ ಹೆಂ ಕರುಂಕ್ ಪಡ್ತಾ ಡಾರ್ಲಿಂಗ್!"
"ತುಕಾಯ್ ......?" ಮಿಶೇಲಾನ್ ರಾಯನಾಕ್ಚ್ ಪಳೆಲೆಂ.
"ಮ್ಹಾಕಾ....? ತರ್ ತುಕಾ ಮ್ಹಜ್ಯಾ ವಯ್ರ್ ದುಬಾವ್ ಆಸಾ?"
"ಮ್ಹಾಕಾ ತುಜ್ಯಾ ವಯ್ರ್ ದುಬಾವ್ ನಾ ರಾಯನ್! ಪುಣ್ ಶೀತಲಾನ್ ತಾಚ್ಯಾ ಘೊವಾ ವಿಶಿ ಸಾಂಗ್ತಾನಾ....!"
"ಶೀತಲ್! ಶೀತಲ್! ಶೀತಲ್! ಮ್ಹಾಕಾ ಸಮ್ಜಾನಾ ಆಜ್ ತುಕಾ ಜಾಲಾಂ ಕಿತೆಂ?" ರಾಯನಾಕ್ ಥೊಡೊ ರಾಗ್ ಆಯ್ಲೊ. ತಾಣೆಂ ಮಿಶೇಲಾಕ್ ಆಪ್ಲ್ಯಾ ವೆಂಗೆ ಥಾವ್ನ್ ಪಯ್ಸ್ ಕೆಲೆಂ. ತಶೆಂಶ್ ತೊ ಪಯ್ಸ್ ಥಾವ್ನ್ ಮಿಶೇಲಾಕ್ ಪಳವ್ನ್ ರಾವ್ಲೊ.
ಆತಾಂ ಪರ್ತ್ಯಾಕ್ ಮಿಶೇಲಾಚಿ ನದರ್ ತಗ್ಸಾಲಿ. ತೆಂ ಧರ್ಣಿಕ್ ಪಳಂವ್ಕ್ ಲಾಗ್ಲೆಂ.
"ಮಿಶೇಲ್?" ಥೊಡ್ಯಾ ವೆಳಾನ್ ರಾಯನ್ಚ್ ಉಲಯ್ಲೊ. "ತುಜ್ಯಾ ಮತಿಂತ್ ಆನಿ ಕಾಳ್ಜಾಂತ್ ಕಿತೆಂ ಆಸಾ ತೆಂ ಸಾರ್ಕೆಂ ಸಾಂಗೊನ್ ಸೊಡ್ ಮಿಶೇಲ್!" ರಾಯನಾಕ್ ಹ್ಯಾ ವಿಶಯಾಕ್ ಜಾತಾ ತಿತ್ಲ್ಯಾ ವೆಗ್ಗಿಂ ಇತ್ಯರ್ಥ್ ಕರುಂಕ್ ಜಾಯ್ ಆಸ್ಲ್ಲೊ.
"ತುಕಾ ರಾಗ್ ಯೆತಾ!" ತಾಣೆಂ ತಗ್ಸಾಲ್ಲ್ಯಾ ಆಪ್ಲ್ಯಾ ನದ್ರೆಕ್ ಉಭಾರ್ಚೆಂ ಧಯ್ರ್ ಕೆಲೆಂ ನಾ.
ತಕ್ಲಿ ಪಂದಾ ಘಾಲ್ಲೆಂ ಮಿಶೇಲ್ ತಕ್ಲಿ ಉಕಲಿನಾಸ್ತಾನಾಂಚ್ ಸಾಂಗ್ತಾನಾ ರಾಯನಾನ್ ಆಪ್ಲಿ ದೀಶ್ಟ್ ಜೊಕುನ್ ಮಿಶೇಲಾಕ್ಚ್ ಪಳೆಲೆಂ.
ಭಿಲ್ಕುಲ್ ಭುರ್ಗ್ಯಾ ಸಾರ್ಕೊ ಸ್ವಭಾವ್!
ತೆಂಚ್ ನಟನ್!
ತೆಂಚ್ ನೆಣ್ತ್ಯಾ ಭುರ್ಗ್ಯಾಚೆಂ ವ್ಯಕ್ತಿತ್ವ್!
ಆಪ್ಣೆ ಆಪ್ಲ್ಯಾ ಬಾಯ್ಲೆ ವಯ್ರ್ ರಾಗ್ ಕೆಲ್ಲ್ಯಾ ಪಾಸೊನ್ ರಾಯನ್ ಆಪ್ಣಾ ವಯ್ರ್ಚ್ ಶಿಣ್ಲೊ.
"ಸಾರ್ರಿ ಡಾರ್ಲಿಂಗ್!" ಮಿಶೇಲಾಚಾ ಲಾಗಿಂ ಆಯಿಲ್ಲ್ಯಾ ರಾಯನಾನ್ ಪರ್ತ್ಯಾಕ್ ಮಿಶೇಲಾಚಾ ಭೊಂವಾರಿ ಹಾತ್ ವೆಲೊ. "ಐ ಯಾಮ್ ಸಾರ್ರಿ ಡಾರ್ಲಿಂಗ್!" ಹಾಸ್ಲೊ ತೊ.
"ಪಳೆ ಮಿಶೇಲ್! ಹಾಂವ್ ತುಕಾ ಸತ್ ಸಾಂಗ್ತಾ! ತುವೆಂ ಚಿಂತ್ಚ್ಯಾ ತಸಲೆಂ ಕಸಲೆಂಯ್ ಕಾಮ್ ಹಾವೆಂ ಕರುಂಕ್ ನಾ. ಮ್ಹಾಕಾ ತಾಚಿ ಗರ್ಜ್ಯ್ ನಾ. ತುಂ ಮ್ಹಜ್ಯಾ ವಯ್ರ್ ವಿಶ್ವಾಸ್ ದವರ್. ಆನಿ ಶೀತಲಾಚೊ ವಿಶಯ್....? ತೊ ತಾಚ್ಯಾ ಆನಿ ತಾಚ್ಯಾ ಘೊವಾ ಮಧ್ಲೊ ವಿಶಯ್!. ಹ್ಯಾ ವಿಶಯಾಂತ್ ಆಮಿಂ ಮಧೆಂ ಪಡೊಂಕ್ ಜಾಯ್ನಾಂ. ಜಾಲ್ಯಾರ್ಯ್ ಹಾಂವ್ ಪಳೆತಾಂ ಮ್ಹಜ್ಯೆ ಥಾವ್ನ್ ಕಾಂಯ್ ವಿಶು ಥಾವ್ನ್ ಬರೆಂಪಣ್ ಜಾತಾ ಜಾಲ್ಯಾರ್! ಪುಣ್ ಹೆಂ ಫಕತ್ತ್ ತುಜ್ಯಾ ಖಾತಿರ್! ಬಿಕಾಸ್ ಐ ಲವ್ ಯು!" ರಾಯನಾನ್ ಮಿಶೇಲಾಕ್ ತಶೆಂಚ್ ವೆಂಗುನ್ ಧರ್ಲೆಂ.
*****************
[ಫುಡೆಂ ಕಿತೆಂ ಜಾತಾ ಮ್ಹಳ್ಳೆಂ ವಾಚುಂಕ್ ರಾಕೊನ್ ರಾವಾ....]
ಕಾದಂಬರಿಕಾರಾಚಿಂ ಉತ್ರಾಂ: 1, 2, 3, 4, 5, 6, 7, 8, 9, 10, 11, 12, 13, 14, 15
About us | Feedback
| Contact us
Copyright © 2005
DAAIZ.COM All rights reserved.
Page concept, designed and maintained by Ashawadi
Publications
