ಚ್ಯಾರ್ ಸರೊನ್ ಪಾಂಚ್ ಲಾಗ್ತಾನಾ

^{”ಹ್ಯಾ ಸಂಸಾರಾಂತ್ ಭೋವ್ ಆಮಾಲಾಚೆಂ ವ್ಹಕಾತ್ ಝಾವ್ನಾಸಾತ್ - ಉತ್ರಾಂ!’ - ರುಡಿಯಾರ್ಡ್ ಕಿಪ್ಲಿಂಗ್}

ಚ್ಯಾರ್ ಸರೊನ್ ಪಾಂಚ್ ಲಾಗ್ತಾನಾ

ವರಸ್ : 2008

ಮಯ್ನೊ : ಮಾಯ್

ಮನಿಸ್ ಜಾವ್ನ್ ಜಲ್ಮಾಲ್ಲ್ಯಾ ಹರ್ಯೆಕ್ಲ್ಯಾಕ್ ಅಪ್ಲಿಚ್ ಮ್ಹಳ್ಳಿ ಜಿಣ್ಯೆರೀತ್ ಆಸ್ತಾ, ಜಾಂವ್ ತಿ ರೀತ್ ತೊ ಕಸೋಯ್ ಗಳ್ಸುಂ. ಹಾಕಾ ಜಾಯ್ತೊ ಭಾಯ್ಲೊ ಪ್ರಭಾವ್ ಆಸೊಂಕ್ ಪುರೊ, ಜಾವ್ಯೆತ್ ತಾಣೆಂ ಸಮ್ಜೊಂಚಿ ರೀತ್, ತಾಣೆಂ ಜೊಡ್‌ಲ್ಲೆಂ ಶಿಕಾಪ್, ತಾಣೆಂ ವಸ್ತಿ ಕರ್ಚೆಂ ಪರಿಸರ್, ತಾಣೆಂ ವಾಡೊನ್ ಆಯಿಲ್ಲಿ ರೀತ್ ವಾ ತಾಚ್ಯಾ ಸಳಾವಳೆಚೆ ಮನಿಸ್. ಆನಿ ಹ್ಯಾ ಸರ್ವ್ ಭಾಯ್ಲ್ಯಾ ಪ್ರಭಾವಾಂಕ್ ಸರಿ ಜಾವ್ನ್ ಅಪ್ಲ್ಯಾ ಚಿಂತ್ಪಾಚ್ಯಾ ಶ್ಯಾಥಿಯೆನ್ ತೊ ಮನಿಸ್ ಅಪ್ಲಿ ಜಿಣ್ಯೆರೀತ್ ರುತಾ ಕರ್ತಾ.

ಎಕ್ಲ್ಯಾಚಿ ಜಿಣ್ಯೆ ರೀತ್ ಹೆರ್ ಕೋಣ್ ಪಸಂದ್ ಕರುಂ ವಾ ಕರಿನಾಸ್ತಾಂ ರಾವೊಂ. ಪುಣ್ ಲೋಕ್ ತೀಕ್ ಮ್ಹಣ್ತಾ ಮ್ಹಣ್ ಮಿರ್ಸಾಂಗೆ ಝಡಾಚೆರ್ ಮಿರ್ಸಾಂಗ್ ಆಂಬೊಟ್ ಜಾಯ್ನಾ, ಲೋಕ್ ಆಂಬೊಟ್ ಮ್ಹಣ್ತಾ ಮ್ಹಣೊನ್ ಚಿಂಚೆ ರುಕಾರ್ ಚೀಂಚ್ ಕೊಡ್ಹು ಜಾಯ್ನಾ. ಹರ್ಯೆಕ್ಲೊ ಮನಿಸ್ ಪಯ್ಲೊ ಜಿಯೆತಾ ಅಪ್ಣಾಖಾತಿರ್, ಉಪ್ರಾಂತ್ ಮಾತ್ರ್ ತಾಕಾ ಹೆರಾಂ ಖಾತಿರ್ ಜಿಯೆಂವ್ಕ್ ಸಾಧ್ಯ್.

ಆತಾಂ ಹ್ಯಾಚ್ ಮನ್ಶಾ ವರ್ಗಾಂತ್ಲ್ಯಾ ಆಮ್ಕಾಂಯ್ ಆಮ್ಚೆಂಚ್ ಮ್ಹಳ್ಳೆಂ ಚಿಂತಾಪ್ ಆಸಾ ತರ್ ಕಾಂಯ್ ವಿಚಿತ್ರ್ ಆಸಾ?

ದಾಯ್ಜ್.ಕೊಮ್ ಮಿಸಾಂವಾಕ್ ಚ್ಯಾರ್ ವರ್ಸಾಂ ಸಂಪೊನ್ ಆತಾಂ ಪಾಂಚ್ವೆಂ ವರಸ್. ಹ್ಯಾ ಸಂಪೊನ್ ಗೆಲ್ಲ್ಯಾ ಚ್ಯಾರ್ ವರ್ಸಾಂನಿ ಆಮಿ ಚಲೊನ್ ಆಯಿಲ್ಲಿ ವಾಟ್ ಪಳೆತಾನಾ ಎಕಾ ರಿತಿಚೊ ಅಥ್ವೊಚ್ಚ್ ಅನ್ಭೋಗ್ ಜಾತಾ. ಹೊ ಅನ್ಭೋಗ್ ಎದೊಳ್‌ಚ್ ಮ್ಹಜ್ಯಾ ಜಿಣ್ಯೆ ಅನ್ಭೋಗಾಚೊ ವಾಂಟೊ ಜಾವ್ನ್ ಗೆಲಾ ತರ್‌ಯೀ, ಎಕೇಕ್ ಅನ್ಭೋಗ್ ಅಜೂನ್ ಜಿವೊ ಆಸಾ. ತಾಂತ್ಲಿಂ ಥೊಡಿಂ ಘಡಿತಾಂ ನಿಯಾಳ್ಚಿಂ ತರ್;

ಥೊಡ್ಯಾಚ್ ಮಯ್ನ್ಯಾಧಿಂ ಮ್ಹಜ್ಯಾ ಥೊಡ್ಯಾ ಖಾಸ್ಗಿ ಖಂತಿಕ್ ಲಾಗೊನ್ ರಾತಿಕ್ ನೀದ್ ಪಡ್ಲಿನಾ ಮ್ಹಣೊನ್ ಉಟೊನ್ ಇಮೇಯ್ಲಾಂ ಚೆಕ್ ಕರ್ತಾನಾ, ತಾಂತುಂ ಮ್ಹಜ್ಯಾ ಎಕಾ ಖಾಸ್ ಸಾಹಿತಿ ಮಿತ್ರಾಚೆಂ ಇಮೇಯ್ಲ್ ಆಸ್ಲೆಂ. ಕೊಣಾಯ್ಚ್ಯಾಯ್ ಇಮೇಯ್ಲಾಕ್ ತೆದ್ನಾಂಚ್ ಜಾಪ್ ಬರಂವ್ಚ್ಯಾ ಮ್ಹಜ್ಯಾ ಪಿಶ್ಯಾ ಸವಯೆಕ್ ಲಾಗೊನ್ ’ವಲ್ಲಿಕ್ ದುಸ್ರೆಂ ಕಾಂಯ್ ಕಾಮ್ ನಾ’ ಮ್ಹಣ್ ಜಾಯ್ತ್ಯಾಂನಿ ಅಣ್ಕಿಲ್ಲಿಂ ಉತ್ರಾಂ ಮ್ಹಾಕಾ ಸದಾಂಚಿಂ ಜಾಲ್ಯಾಂತ್. ಹಾಂಗಾಯ್ ಹಾಂವೆ ತಶೆಂಚ್ ಕೆಲೆಂ.

ದುಸ್ರೆ ದಿಸಾ ಮ್ಹಜ್ಯಾ ತೆಚ್ಚ್ ಮಿತ್ರಾಚಿ ಲಾಂಬಾಯೆಚಿ ಜಾಪ್ ಆಯ್ಲಿಚ್. ತಾಂತುಂ ಮ್ಹಾಕಾ ಸಭಾರ್ ಸವಾಲಾಂ ಆಸ್ಲಿಂ - "ವಲ್ಲಿ, ತುಜಿ ಜಾಪ್ ಮ್ಹಾಕಾ ರಾತಿಚ್ಯಾ ಸಾಡೆ ತೀನ್ ವೊರಾರ್ ಆಯ್ಲಿ. ತುಂ ರಾತಿಚೆಂ ಸಾಡೆ ತೀನ್ ವೊರಾರ್ ಕಿತೆಂ ಕರ್ನ್ ಆಸ್ಲೊಯ್? ದಾಯ್ಜ್.ಕೊಮ್ ಸಾಯ್ಟ್ ಅಪ್‌ಡೇಟ್ ಕರುನ್ ಆಸ್ಲೊಯ್? ನಿದ್ ಖಳೊನ್ ಕೊಂಕ್ಣಿ ವಾವ್ರ್ ಕರ್ತಾಲೊಯ್? ಕಿತ್ಯಾಕ್ ಅಶೆಂ ಕರ್ನ್ ತುಜಿ ಭಲಾಯ್ಕಿ ಭಿಗಡ್ತಾಯ್? ಕೊಂಕ್ಣಿ ಸೆವಾ? ಕಾಂಯ್ ಥೊಡೊ ಲೋಕ್ ತುಕಾ ವ್ಹಾ ವ್ಹಾ ಮ್ಹಣ್ ತಾರಿಫೊ ಕರ್ತಲೊ ಮ್ಹಣೊನ್? ಕೊಂಕ್ಣಿ ಮಾಂಯ್ ತುಜ್ಯಾ ಹ್ಯಾ ನಿಸ್ವಾರ್ಥಿ (?) ವಾವ್ರಾಂತ್ ಗಿರೇಸ್ತ್ ಜಾತೆಲಿ ಮ್ಹಣೊನ್?......"

ಸತ್ ಸಾಂಗ್ಚೆಂ ತರ್ ಹಿ ಜಾಪ್ ವಾಚುನ್ ಏಕ್ ಘಡಿ ಮ್ಹಜೆಂ ಕಾಳಿಜ್ ಕೊಚಾಯಿಲ್ಲೊ ಅನ್ಭೋಗ್ ಜಾಲೊ ಆನಿ ಕಳಾನಾಸ್ತಾಂಚ್ ಮ್ಹಜ್ಯಾ ಧಾರುಣ್ ದೊಳ್ಯಾಂನಿ ಥೊಡೆ ಥೆಂಬೆ ದುಃಖಾಂ ಗಳ್ಳಿಂ. ಪುಣ್ ಕಿತೆಂ ಕರ್ಯೆತ್? ತೊ ಮಿತ್ರ್ ಮ್ಹಜೊ ಖಾಸ್ ದೆಕುನ್ ತಾಕಾ ಸುಟಾವೆಂ ಸತ್ ಸಾಂಗ್‌ಲ್ಲೆಶಿವಾಯ್ ನಿರ್ವೋಗ್ ನಾತ್ಲೊ.

ತೆಂ ಕಾರಣ್ ಹಾಂಗಾ ಗರ್ಜೆಭಾಯ್ಲೆಂ ತರ್‌ಯೀ ತಾಕಾ ಬರಯಿಲ್ಲಿಂ ಥೊಡಿಂ ಉತ್ರಾಂ ಹಿಂ; "ಹಿ ಭಿಲ್ಕುಲ್ ಪಿಸಾಯ್ ಶಿವಾಯ್ ಹೆರ್ ಕಿತೆಂಚ್ ನ್ಹಯ್. ಹಾಂವ್ ಹಾಂಗಾಸರ್ ಯೆತಾನಾ ಜಾಲ್ಯಾರ್‌ಯೀ ಕಿತೆಂಚ್ ಅಪೇಕ್ಶುನ್ ಯೇಂವ್ಕ್ ನಾ. ಆತಾಂಯ್ ತಿ ಅಪೇಕ್ಶಾ ನಾ, ಫುಡೆಂಯ್ ಕಸಲಿಚ್ ಅಪೇಕ್ಶಾ ಆಸ್ಚಿನಾ".

ಅನ್ಯೇಕ್ ಘಡಿತ್ ನಿಯಾಳ್ಚೆಂ ತರ್;

ಅಜೀಕ್ ಕಾಂಯ್ ದೋನ್ ವರ್ಸಾಧಿಂ ಹಾಂವ್ ರಜೆರ್ ಮಾಂಯ್‌ಗಾಂವಾಕ್ ಗೆಲ್ಲೆವೆಳಾರ್ ಮ್ಹಜ್ಯಾ ಎಕಾ ಖಾಸ್ ಸಾಹಿತಿ ಮಿತ್ರಾಕ್ ಭೆಟೊಂಕ್ ಗೆಲ್ಲೊಂ. ತವಳ್ ತಾಣೆಂ ಮ್ಹಜಿ ಕಠೀಣ್ ತನ್ಕಿ ಕೆಲಿ. "ವಲ್ಲಿ ತುಂ ಕರ್ತಾಯ್ - ಬರೆಂ. ಪುಣ್ ಕಿತ್ಯಾಕ್ ಚಡಿತ್ ಕರ್ತಾಯ್? (You are doing, fine! But why you are over doing?)". ಮ್ಹಜೆಲಾಗಿಂ ಜಾಪ್ ಆಸ್ಲಿ; "ಆಜ್, ಮ್ಹಾಕಾ, ಮ್ಹಜಿ ಕಾಲ್ಚಿ/ಪೊರ್ಚಿ ವಾಟ್ ಪಳೆತಾನಾ, ಹಾವೆಂ ಕರ್ಯೆತ್ ಆಸ್ಲಿಂ ಪುಣ್ ಕರುಂಕ್ ನಾತ್‌ಲ್ಲಿಂ ಥೊಡಿಂ ಕಾಮಾ ದಿಶ್ಟಿಕ್ ಪಡ್ತಾನಾ, ಮ್ಹಜಿ ಮತ್ ಪಶ್ಚಾತಾಪಾನ್ ಕಡ್ತಾ. ದೆಕುನ್ ಫಾಲ್ಯಾಂ/ಪೊರ್ವಾಂ ಹಾವೆಂ ತಶೆಂ ಪಶ್ಚಾತಾಪ್ ಕರುಂಕ್ ನ್ಹಜೊ ದೆಕುನ್ ಆಜ್ ಮ್ಹಜ್ಯಾ ತಾಂಕಿಚೆಂ ಜ್ಯೆ ಕಿತೆಂ ಕರುಂಕ್ ಜಾತಾ ತೆಂ ಕರಿಜಾಯ್ ಮ್ಹಣೊನ್ ಇಲ್ಲೊ ಚಿಲ್ಲರ್ ವಾವ್ರ್ ಕರ್ಚೊ ಶಿವಾಯ್ ಹೆರ್ ಕಾಂಯ್ ಇರಾದ್ಯಾನ್ ನ್ಹಯ್".

ಹಾಂವ್ ಕೊಂಕ್ಣಿ ಸಾಹಿತ್ಯಾಕ್ ಯೇವ್ನ್ ಕಾಂಯ್ ವೀಸ್-ಪಂಚ್ವೀಸ್ ವರ್ಸಾಂ ಜಾತಿತ್. ಪುಣ್ ಹ್ಯಾ ವರ್ಸಾಂನಿ ಹಾಂವೆಂ ಏಕ್ ಸಾರ್ಕೆಂ ಕಾಮ್ ಕರುಂಕ್ ಮ್ಹಾಕಾ ಜಾಂವ್ಕ್ ನಾ, ಜಶೆಂ ಹೆಂ ಕೊಣಾಚ್ಯಾನೀ ಸಾಧ್ಯ್ ನಾ. ಕುವೇಯ್ಟ್ ಯೆಂವ್ಚ್ಯಾಧಿಂ ಕಾಂಯ್ ಆಟ್ ವರ್ಸಾಂ ಬೊಂಬೊಯಾಂತ್ ಆಸ್ಲೊಂ. ತ್ಯಾ ಆಟ್ ವರ್ಸಾಂನಿ ಹಾವೆಂ ಬರಯಿಲ್ಲ್ಯೊ ಕಾಣ್ಯೊ ಕಾಂಯ್ ತೀನ್. ಪುಣ್ ತಾಚ್ಯಾಕೀ ಪಯ್ಲೆಂ ಹಾವೆಂ ಸಭಾರ್ ಕಾಣ್ಯೊ ಬರಯಿಲ್ಲ್ಯೊ. ಪುಣ್ ಹಾಂವ್ ಕುವೇಯ್ಟಾಕ್ ಯೆತಾಸ್ತಾಂ, ಮ್ಹಜ್ಯಾ ಮತಿಂತ್ ಕಾಂಯ್ ಧಾ-ಭಾರಾ ವರ್ಸಾಧಿಂ ಜಿವಿ ಆಸೊನ್, ಆತಾಂ ಭೋವ್ಶಾ ಮೊರೊನ್ ಪಡ್ಲೆಲಿ ಏಕ್ ಆಶಾ ಆಸ್ಲಿ. ಮ್ಹಜೆಂಚ್ ಮ್ಹಳ್ಳೆಂ ಏಕ್ ಪ್ರಕಾಶನ್ ಆಸಾಜಯ್ ಮ್ಹಳ್ಳಿ ತಿ ಆಶಾ. ಆನಿ ಕುವೆಯ್ಟಾಕ್ ಪಾವ್ತಚ್ಚ್ ಹ್ಯಾ ಮ್ಹಜ್ಯಾ ಆಶೆಚಿ ಆಂಖ್ರಿ ಪಾಲೆಲಿ.

ಫುಡೆಂ?

ಹಿ ಆಂಖ್ರಿ ಪಾಲೆಲ್ಲ್ಯಾಂತ್ ಮ್ಹಜೊ ಸ್ವಾರ್ಥ್ ಕಿತ್ಲೊ ಮ್ಹಳ್ಳೆಂ ಮಾಪುಂಕ್ ತುಮ್ಕಾಂಚ್ ಸೊಡ್ತಾಂ. ತುಮ್ಚ್ಯಾ ತುಮ್ಚ್ಯಾ ಮತಿಂತ್ಲ್ಯಾ ತಾಕ್ಡೆಕ್ ಸರಿ ಜಾವ್ನ್ ಮಾಪಾ ಆನಿ ಫಯ್ಸಲ್ ದಿಯಾ.

ಉಪ್ರಾಂತ್ ಮ್ಹಜ್ಯಾ ಮತಿಂತ್ ನವ್ಯೊ ನವ್ಯೊ ಆಶೆಚ್ಯೊ ಆಂಖ್ರ್ಯೊ ಫುಟ್ಲ್ಯೊ, ಮ್ಹಜೆಪರಿಂಚ್ ಜರ್ ಹೆರಾಂಚ್ಯೋಯ್ ಆಶಾ ಮೊರೊನ್ ಪಡ್ಲ್ಯಾತ್ ತರ್ ತಾಂಕಾಂ ಇಲ್ಲೊ ಜೀವ್ ದಿವ್ಯಾಂ ಮ್ಹಳ್ಳಿ ಆಶಾ. ತಶೆಂಚ್ ಕೆಲೆಂ - ಮ್ಹಜ್ಯಾ ಲಾಗ್ಸಿಲ್ಯಾ, ವಳ್ಕಿಚ್ಯಾಂಕ್ ಮೆಳೊನ್, ತಾಂಚಿಂ ಬರ್ಪಾಂ ಎಕ್ಟಾವ್ನ್, ಬೂಕ್ ಪರ್ಗಟೊನ್, ತೆ ಬೂಕ್ ತಾಕಾಚ್ ದಿಂವ್ಚಿ ಆಶಾ.

ಹ್ಯಾ ವಾವ್ರಾಮಧೆಂ ಮ್ಹಾಕಾ ಅಂತರ್‌ಜಾಳಿಚೆರ್ ಸಾಹಿತ್ಯ್ ರಸ್ಚಿ ಆಶಾ ಉದೆಲಿ. ಕೊಂಕ್ಣೆಂತ್ಲೆಂ ಪಯ್ಲೆಂ ಅಪುಣ್ ಕೊಂಕ್ಣಿ ಅಂತರ್‌ಜಾಳ್ ಮಾಯ್‌ಭಾಸ್.ಕೊಮ್ ಉದೆತಚ್ಚ್ ಮ್ಹಜ್ಯಾ ಆಶೆಕ್ ನವೆ ಕೊಂಬ್ರೆ ಫುಟ್ಲೆ. ಮ್ಹಜೊ ವಾವ್ರ್ ಮ್ಹಾಕಾ ಕಳಾನಾಸ್ತಾಂಚ್ ಚಡ್ಲೊ. ಭಿಲ್ಕುಲ್ ಪಿಸಾಯ್ ಶಿವಾಯ್ ಹೆರ್ ಕಿತೆಂಚ್ ನ್ಹಯ್. ಹ್ಯಾ ಸರ್ವ್ ವಾವ್ರಾಂತ್ ಮ್ಹಾಕಾ ಕಿತ್ಲೊ ಲಾಭ್ ಆನಿ ಕಿತ್ಲೆಂ ಲುಕ್ಸಾಣ್ ಮ್ಹಳ್ಳೆಂ ಹಾವೆಂ ಲೇಖ್ ಘಾಲ್ಲೆಂಚ್ ನಾ.

ಅಶೆಂ ಸುರು ಜಾಲ್ಲೆಂ ಮಿಸಾಂವ್ ದಾಯ್ಜ್.ಕೊಮ್.

ಪುಣ್ ವರ್ಸಾನ್ ವರಸ್, ನವೆ ನವೆ ಸಾಂದೆ ದಾಯ್ಜ್ ಪಂಗ್ಡಾಕ್ ಮೆಳ್ಳೆ. ಜಶೆಂ ಜಿಣಿ ಮ್ಹಳ್ಳಿ ಏಕ್ ಪಯ್ಣ್ ತಶೆಂಚ್ ಹ್ಯಾ ಆಮ್ಚ್ಯಾ ಪಯ್ಣಾರ್ ಸಭಾರ್ ಪಯ್ಣಾರಿ ಮೆಳ್ಳೆ. ಹರ್ಯೆಕ್ಲ್ಯಾಂಕ್ ತಾಂಚಿಂಚ್ ವೊಜಿಂ ಆನಿ ಶೆವೊಟ್. ಥೊಡೆ ಪಯ್ಣಾರಿ ಪರ್ಕಿ ತರ್‌ಯೀ ವಳ್ಕೆಚೆ ಜಾಲೆ, ಆಮಿ ಸಾಂಗಾತಾ ಥೊಡಿಂ ಪಾವ್ಲಾಂ ಚಲ್ಲ್ಯಾಂವ್. ಉಪ್ರಾಂತ್ ಆಮ್ಚ್ಯೊ ವಾಟೊ ವೆವೆಗ್ಳ್ಯಾ ಕುಶಿಚ್ಯೊ ದೆಖುನ್ ವೆಗ್ಳಾಚಾರ್ ಅನಿವಾರ್ಯ್.

ಉಪ್ರಾಂತ್ ದಾಯ್ಜ್ ಸಾಹಿತಿಕ್ ಸ್ಪರ್ಧೆ, 2004 ಇಸ್ವೆ ಥಾವ್ನ್ ಆಮಿ ಎದೊಳ್‌ಚ್ ಏಕ್ ಲಾಖಾಚ್ಯಾಕೀ ಚಡಿತ್ ರುಪಯ್ ಇನಾಮಾ ರುಪಾರ್ ದಿಲ್ಯಾಂತ್. ಸಾಂಗೊಂಕ್ ಗೆಲ್ಯಾರ್ ಲಜ್, ಪೊಟಾಕ್ ನಾ ಪೇಜ್ ಮ್ಹಳ್ಳೆಪರಿಂ, ಸತ್ ಸಾಂಗ್ಚೆಂ ತರ್ ಆಜ್ ಪಾಸೊನ್ ದಾಯ್ಜ್.ಕೊಮ್ ಹಾಕಾ ಏಕ್ ಪೋಶಕ್ ನಾ!. ತರ್‌ಯೀ ಆಮಿ ಕೊಂಕ್ಣೆಂತ್ ಪೊಯ್ಸೊ ಕೆಲಾ ಮ್ಹಳ್ಳೆಂ ದುರ್ಸೊಣೆಂ ಆಮಿ ಆಯ್ಕಲಾಂ.

ಪುಣ್ ಆಮ್ಚ್ಯಾ ಹ್ಯಾ ಎದೊಳ್ಚ್ಯಾ ಮಿಸಾಂವಾಂತ್ ಏಕ್ ಸತ್ ಆಮಿ ಸಮ್ಜಲ್ಯಾಂವ್ - ಹ್ಯಾ ಸಂಸಾರಾಂತ್ ಭೋವ್ ಸಲೀಸಾಯೆಚೆಂ ಕಾಮ್ ಮ್ಹಳ್ಯಾರ್, ಕಿತೆಂಚ್ ಕರಿನಾಸ್ತಾನಾ ಹಾತ್ ಭಾಂದುನ್ ಬೊಸ್ಚೆಂ ಆನಿ ಕಾಂಯ್ ಕರ್ತೆಲ್ಯಾಂಚೆರ್ ಕೇದ್ ಉಡಂವ್ಚೊ, ತಾಂಕಾಂ ಹಲ್ಕ್ ಕರ್ಚೆಂ ಆನಿ ತಾಂಚೆರ್ ಖೊಡಿ ಕಾಡ್ಚೆಂ. ಹ್ಯೊ ಖೊಡಿ ತಾಂಚ್ಯಾ ವಾವ್ರಾಚೆರ್ ಜಾವ್ಯೆತ್, ತಾಂಚ್ಯಾ ಚಿಂತ್ಪಾಚೆರ್ ಜಾವ್ಯೆತ್ ವಾ ತಾಂಚ್ಯಾ ವೆಕ್ತಿತ್ವಾಚೆರ್ ಜಾವ್ಯೆತ್.

ಹಾವೆಂ ಸುರ್ವಾಟೆರ್‌ಚ್ಚ್ ಸಾಂಗ್ಲಾಂ - ಹರ್ಯೆಕ್ಲೊ ಮನಿಸ್ ಜಿಯೆತಾ ಪಯ್ಲೊ ಆಪ್ಣಾಖಾತಿರ್. ತುಮಿಂ ತುಮ್ಚ್ಯಾ ಮತಿಚ್ಯಾ ತಾಕ್ಡೆಕ್ ಸರಿ ಜಾವ್ನ್ ಹೆಂ ಮಾಪಾ.

ಹ್ಯಾ ಮಧೆಂ ಹಾಂವ್ ಏಕ್ ಪ್ರಕಾಶಕ್ ಜಾವ್ನ್ ಆಸ್ತಾಂ, ಮ್ಹಜ್ಯೊ ಥೊಡ್ಯೊ ಜವಾಭ್ದಾರ್‍ಯೊ ಆಸಾತ್ - ಜೊ ಕೋಣ್ ಸ್ಪರ್ಧ್ಯಾಕ್ ಬೂಕ್ ವಿಚಾರ್ತಾ, ತಾಂಕಾಂ ಬೂಕ್ ಧಾಡ್ಚಿ ವಿಲೇವಾರಿ ಹಾವೆಂ ಕರಿಜಾಯ್. ಮ್ಹಾಕಾ ವೆಕ್ತಿಗತ್ ಜಾವ್ನ್ ಕೊಣಾ ಥಾವ್ನ್‌ಯೀ ಕಿತೆಂಚ್ ನಾಕಾ ಆಸ್ಯೆತಾ, ಪುಣ್ ಜೆ ಬೂಕ್ ಹಾವೆಂ ಪರ್ಗಟ್ ಕೆಲ್ಯಾತ್, ತೆ ಸರ್ವ್ ಮ್ಹಜೆಚ್ಚ್ ಮ್ಹಳ್ಳೆಪರಿಂ ದೆಖುನ್ ಹಾಂವ್ ಚಡ್ತಾವ್ ಸ್ಪರ್ಧ್ಯಾಂಕ್, ಹಾವೆಂ ಪರ್ಗಟ್ ಕೆಲ್ಲೆ ಬೂಕ್ ಧಾಡ್ಲ್ಯಾತ್. ಹೆಂ ಆಯ್ಕಲ್ಲ್ಯಾ/ಪಳೆಲ್ಲ್ಯಾ ಥೊಡ್ಯಾಂನಿ, ಹೆ ಪುರಸ್ಕಾರಾಚ್ಯಾ ಪಾಟ್ಲ್ಯಾನ್ ಧಾಂವ್ಲ್ಯಾತ್ ಮ್ಹಳ್ಳೊ ಬದ್ನಾಮ್ ಘಾಲಾಯ್ ಆಸ್ಯೆತ್. ಪುಣ್ ಸತ್ ಸಾಂಗ್ಚೆಂ ತರ್ - ಆಜ್ ಪಾಸೊನ್ ಆಮಿ ಕಸಲ್ಯಾಯ್ ಪುರಸ್ಕಾರಾಕ್ ಆಶೆವ್ನ್ ವಚೊಂಕ್ ನಾಂವ್ ವಾ ವೆಚೆಯ್ ನಾಂವ್. ಹೆಂ ಆಮ್ಚೆಂ ಚಿಂತಾಪ್ ಆನಿ ಆಮ್ಚಿ ಜಿಣ್ಯೆರೀತ್.

ಆತಾಂ ಹ್ಯಾ ಚ್ಯಾರ್ ವರ್ಸಾಂನಿ ಆಮಿ ಆಮ್ಚ್ಯಾ ತಾಂಕಿಚೊ ವಾವ್ರ್ ಕೆಲಾ - ಭರ್ಪೂರ್ ಮೊಗಾನ್ ಆನಿ ಅಭಿಮಾನಾನ್ ಕೆಲಾ. ಆಮಿಂ ಎಕೇಕ್ ಬರಾಪ್ ತಿದ್ವುನ್, ಟೈಪ್ ಕೆಲಾಂ - ಆಮ್ಚ್ಯಾ ಕಾಮಾ ಉಪ್ರಾಂತ್ ಮೆಳ್‌ಲ್ಲ್ಯಾ ವೆಳಾಂತ್. ಆತಾಂ ಆಮ್ಚಿಂ ಮಿಸಾಂವಾಂ ಹೆರಾಂ ನಕ್ಕಲ್ ಕರ್ತಾತ್ - ತೆಂ ಸಂತೊಸ್‌ಚ್ ಮ್ಹಣ್ಯೆತ್. ಪುಣ್ ದುರ್ಭಾಗ್ಪಣಾಂತ್ ಆಮ್ಚ್ಯಾ ಮೊಡ್ಕೆಂತ್ ಶಿಜ್‌ಲ್ಲೆಂ ಚೋರ್ನ್ ಥೊಡೆ ದಂದೊ ಚಲಯ್ತಾತ್. ಆಮ್ಚೆಂ ಚೋರ್ನ್ ಅಪ್ಲೆಂ ಕರ್ಚೆ ಥೊಡೆ ಆಮ್ಚೆ ಮಧೆಂ ಆಸಾತ್. ಕೊಂಕ್ಣೆಂತ್ ಆಸ್ಚಿಂ ಚಾರ್ ಬೊಡಾಂ. ಕಿತ್ಲೆಶ್ಯಾಂಕ್ ಬೇಕೂಫ್ ಕರ್ತಿತ್ ಹೆ? ಸಭಾರ್ ಲೇಖಕಾಂನಿ (ಸ್ವಾಭಿಮಾನ್ ಆಸ್ಚ್ಯಾ) ಮ್ಹಾಕಾ ಬರವ್ನ್ ವಿಚಾರ್ಲಾಂ ’ವಲ್ಲಿ ಮ್ಹಜಿ ಕಾಣಿ ತುಕಾ ಧಾಡ್ಲೆಲಿ ತುವೆಂ ಕಶೆಂ ಹೆರ್ ಪತ್ರಾಕ್ ವಾ ಸಾಯ್ಟಿಕ್ ಧಾಡ್ಲಿಯ್?’. ಪುಣ್ ಹಾವೆಂ ತಾಕಾ ಸಮ್ಜಾಯ್ಲೆಂ, ಜೆದ್ನಾಂ ಕೊಲೆ ವಾಗಾಚೊ ವೇಸ್ ಘಾಲ್ನ್ ರಾಜ್ವಟ್ಕಿ ಚಲಯ್ತಾನಾ ಕೊಣೆಂ ಕಿತೆಂ ಕರ್ಯೆತಾ?. ಆನಿ ಅಸಲ್ಯಾ ಬುರ್ನಾಸ್ ಕಾಮಾಕ್ ಪತ್ರಿಕೋಧ್ಯಮ್ ಮ್ಹಣ್ತಾತ್ ಹೆ! ವ್ಹಾ ವ್ಹಾ!

ಪುಣ್ ಆಮ್ಕಾಂ ಏಕ್ ಸಮಧಾನ್ ಆಸಾ. ಆಮಿ ಕೊಣಾಯ್ಚೆಂಯ್ ಚೊರುಂಕ್ ನಾ, ಫಾರುಂಕ್ ನಾ, ಕೊಣಾಯ್ಕೀ ನಾಗಂವ್ಕ್ ನಾ, ಬನಾಂವ್ಕ್ ನಾ. ಆಮಿ ಭುರ್ಗ್ಯಾಂಕ್ ಮಿಟಾಯ್ ವಾಂಟ್‌ಲ್ಲೆಪರಿಂ ಪುರಸ್ಕಾರ್ ವಾಂಟುಂಕ್ ನಾಂತ್ ವಾ ಮತ್-ಗತ್ ನಾತ್ಲೆಲ್ಯಾಂಚೊ ಪಂಗಡ್ ಭಾಂದುಂಕ್ ನಾ. ಆಮಿ ಕಸ್ಲೆಚ್ಚ್ ಹುದ್ದೆ ದವರುಂಕ್ ನಾಂತ್, ವಿಜಿಟಿಂಗ್ ಕಾರ್ಡಾಂ ಛಾಪುಂಕ್ ನಾಂತ್, ಫೆಸ್ತಾಂ ಆಚರಣ್ ಕರುಂಕ್ ನಾಂತ್, ಧಾಂಗ್ರೊ ಮಾರುಂಕ್ ನಾ, ಮೆಲ್ಲ್ಯಾಂಚ್ಯಾ ನಾಂವಾರ್ ಪೊಯ್ಸೊ ಎಕ್ಟಾಂಯ್ ಕರುನ್ ಗಿಳುಂಕ್ ನಾ, ಕೊಣಾ ಕೊಣಾಕ್ ಹಲ್ಕ್ ಕರುನ್ ಇಮೇಯ್ಲಾಂ ಧಾಡುಂಕ್ ನಾಂತ್, ಆಮ್ಚೆಂಚ್ ಹೆರಾಂನಿ ವೆಲಾಂ, ಖೆಲಾಂ. ಪುಣ್ ಆಮಿ ಆಮ್ಚೊ ವಾವ್ರ್ ನಿತಿನ್ ಕೆಲಾ. ಆಮಿ ನಾಂವಾ ಖಾತಿರ್, ಮಾನಾ ಖಾತಿರ್, ಪುರಸ್ಕಾರಾ ಖಾತಿರ್ ಕೊಣಾ ಕೊಣಾಕ್ ಧುಂಪಂವ್ಕ್ ವಚೊಂಕ್ ನಾಂವ್. ಬರೆಂ ಯಾ ವಾಯ್ಟ್ - ಶೀದಾ ತೊಂಡಾರ್‌ಚ್ಚ್ ಸಾಂಗ್ಲಾಂ ಆನಿ ಹ್ಯಾ ಖಾತಿರ್ ಥೊಡೆ ಅಜೂನ್ ದುಸ್ಮಾನ್ ಜಾಲ್ಯಾತ್. ಪುಣ್ ಮ್ಹಾಕಾ ತಾಚೆರ್ ಕಸ್ಲೊಚ್ ಪಶ್ಚಾತಾಪ್ ನಾ - ಕೊಣಾ ಕೊಣಾಚ್ಯಾ ಸುಕ್ಯಾ ಸಯ್ಲಾಪಾ ಖಾತಿರ್ ಆಮಿ ಆಮ್ಚ್ಯಾ ತತ್ವಾಂಸವೆಂ ರಾಜಿ ಕರುನ್ ಜಿಯೆವ್ನಾಂವ್. ಮಾಫ್ ಕರಾ - ತುಮ್ಕಾಂ ಹಿಂ ಉತ್ರಾಂ ಹಾಂಕಾರಿ ದಿಸ್ತಿತ್ ತರ್.

ಪರತ್ ತುಮ್ಚಿ ತಾಕ್ಡಿ ಧರ್ನ್ ಹೆ ಮಾಪಾ. ಕೊಣಾಚ್ಯಾ ತಕ್ಲೆರ್ ಶೆಣ್ ಭರ್ಲಾಂ - ತೊ ತೆಚ್ಚ್ ತೆಕಿದ್ ಮಾಪುಂದಿ. ಕೊಣಾಚ್ಯಾ ಕಟ್ಟ್ಯಾಂತ್ ಕಾಂಯ್ ಇಲ್ಲೊ ಅಕ್ಕಲ್ ಆಸಾ, ತೊ ವೊರಾವ್ನ್ ಮಾಪುಂದಿ.

ಅಖೇರ್ ಕರ್ಚ್ಯಾಧಿಂ,

ಕಾಂಯ್ ಥೊಡ್ಯಾ ಮಯ್ನ್ಯಾ ಥಾವ್ನ್ ಕಿತೇಂಯ್ ಬರಂವ್ಚೆಂ ಮ್ಹಳ್ಯಾರ್ ಕಸಲೆಗೀ ಕರ್ಕರೆ ಯೆತಾಲೆ. ತ್ಯಾ ತೆಕಿದ್ ಹ್ಯಾ ವರ್ಸಾಂತ್ ಕಾಮಾನಿಮ್ತಿಂ ಮ್ಹಜಿ ಸಂಸಾರ್ ಭಂವ್ಡಿ ಚಡ್ಲಿ ಮ್ಹಣ್ತಾತಾ ಆಸ್‌ಲ್ಲಿ ಇಲ್ಲಿ ಆಶಾ ಪರತ್ ಬಾವೊನ್ ವೆತಾಲಿ.

ಪುಣ್ ಹೆಂ ಮಿಸಾಂವ್ ಮುಖಾರುನ್ ವಚಾಜಯ್. ಉಪ್ರಾಂತ್ಲೆಂ ವೆಳಾಕಾಳಾಚೆ ಅಧೀನ್ ಆಸಾ!

ಸಾಂಗ್‌ಲ್ಲೆಪರಿಂ ತುಜ್ಯಾ ತಾಕ್ಡೆಚೆಂ ಮಾಪ್ ಕಿತ್ಲೆಂ ಮ್ಹಣ್ ಬಿಂದಾಸ್ ಸಾಂಗೊಂಕ್ ದಾಕ್ಶೆನಾಕಾ!

ಖಾಲ್ತೆಪಣಿಂ,

- ವಲ್ಲಿ ಕ್ವಾಡ್ರಸ್, ಅಜೆಕಾರ್