ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ಬೂಕ್ ಸಮೀಕ್ಶಾ - 16
ದರ್ಯಾಕ್ ಉದಾಕ್
ಬೂಕ್: ದರ್ಯಾಕ್ ಉದಾಕ್
ಸಂ: ವಲ್ಲಿ ಕ್ವಾಡ್ರಸ್, ಅಜೆಕಾರ್
ಪ್ರಸ್ತಾವನ್: ರೆಗಾಮ್ ತಾಕೊಡೆ, ಮೆಲ್ವಿನ್ ಪಿಂಟೊ, ಕಿಶೂ, ಬಾರ್ಕುರ್.
ಛಾಪ್ಲ್ಲಿ ಲಿಪಿ: ಕಾನಡಿ.
ಪಾನಾಂ: 100
ಮೋಲ್: ರು. 50
ಪ್ರಕಾಶಕ್: ಆಶಾವಾದಿ ಪ್ರಕಾಶನ್.
ಪರ್ಗಟ್ ಜಾಲ್ಲಿ ಇಸ್ವಿ: 2006
ಸಮೀಕ್ಶಾ ಚಲಯ್ಣಾರ್: ಮೆಲ್ವಿನ್ ಜೆ. ವಾಸ್
ತಾರಿಕ್: 15 ಸಪ್ತೆಂಬರ್ 2006
ಜಾಗೊ: ಸಾಲ್ಮಿಯಾ, ಕುವೇಯ್ಟ್
ಮೆಲ್ವಿನ್ ಜೆ. ವಾಸ್
ವಲ್ಲಿ ಕ್ವಾಡ್ರಸ್
ವಿಮರ್ಶೆ/ಸಮೀಕ್ಶಾ ಲೇಖನ್ - ಮೆಲ್ವಿನ್ ಜೆ. ವಾಸ್, ಕೆಲರಾಯ್
ಕೊಂಕಣಿ ಸಾಹಿತ್ಯ್ ಆನಿ ವಿಮರ್ಸೊ
ಪುಸ್ತಕ್: ದರ್ಯಾಕ್ ಉದಾಕ್
ಮಿಸಾಂವ್: ಕವಿತಾಪಾಠ್
ಭಾಗ್: 2
ಸಾಹಿತ್ಯ್: ಅಧ್ಯಯನ್ ಲೇಖನಾಂ
’ದರ್ಯಾಕ್ ಉದಾಕ್’ ಪುಸ್ತಕಾಂತ್ ಪಾಂಚ್ ವಿಂಚ್ಣಾರ್ ಕವಿಂಚಾ
ಪಾಂಚ್ ಕೊಂಕ್ಣಿ ಕವಿತಾಂಚೆರ್ ಅಧ್ಯಯನ್ ಕೆಲ್ಲಿಂ ಲೇಖನಾಂ
ವ ವಿಚಾರ್, ಚರ್ಚಾ ವಿಮರ್ಶಾಚಿಂ ಲೇಖನಾಂ ಪರ್ಗಟ್ ಜಾಲ್ಯಾಂತ್ ಆಸ್ತಾಂ
ಹ್ಯಾ ಲೇಖನಾಂ ವಯ್ರ್ ಯಾ ದರ್ಯಾಕ್ ಉದಾಕ್ ಮ್ಹಳ್ಳ್ಯಾ ಶಿರೋನಾಂವಾಚೆರ್
ಹಾಂವ್ ಹಾಂಗಾ ಪರತ್ ವಿಚಾರ್ ವಿಮರ್ಶ್ಯಾಕ್ ದೆಂವಾನಾ. ಕಿತ್ಯಾಕ್ ಮ್ಹಳ್ಯಾರ್
ಹೊ ಏಕ್ ಸ್ವತಂತ್ರ್ ವಾವ್ರ್. ಸಮಾಜೆಂತ್ ಜಿವಿತ್ ಘೆವ್ನ್ ಆಯಿಲ್ಲಿ
ಹರ್ಯೆಕ್ ಜೀವಿ ಕಶೆಂ ಸ್ವತಂತ್ರ್ ತಶೆಂ ಹೊ ವಾವ್ರ್ಯೀ
ಸ್ವತಂತ್ರ್. ಹ್ಯಾ ವಾವ್ರಾ ಥಾವ್ನ್ ಕೊಣಾಕ್ ಕಿತ್ಲೊ ಫಾಯ್ದೊ ಮ್ಹಳ್ಳ್ಯಾ
ಸ್ವಾರ್ಥಾಚಾ ಚಿಂತ್ಪಾವಿಶಿಂ ದಾಯ್ಜ್ ಪಂಗ್ಡಾನ್ ಚಿಂತ್ಲಾಂ ಮ್ಹಣೊನ್
ಹಾಂವ್ ಸಾಂಗಾನಾ. ಪುಣ್ ಹೆಂ ಖಂಡಿತ್ ಸಾಂಗೊಂಕ್ ಖುಶಿ ವರ್ತಾಂಕಿ
ಹ್ಯಾ ವಾವ್ರಾ ಥಾವ್ನ್ ಕೊಂಕ್ಣಿ ಸಾಹಿತ್ಯಾಕ್ ಆನಿ ತಾಂತ್ಲ್ಯಾ ಸಾಹಿತ್ಕಾರಾಂಕ್,
ಪ್ರತ್ಯೇಕ್ ಜಾವ್ನ್ ಕವಿಂಕ್ ಖಂಡಿತ್ ಫಾಯ್ದೊ ಜಾತಲೊ ಮ್ಹಳ್ಳೊ ಆಮ್ಚೊ ಭರ್ವಸೊ.
ಹಾಚ್ ಖಾತಿರ್ ಹ್ಯಾ ಮಿಸಾಂವಾಕ್ ಹಾವೆಂ ’ವಾವ್ರ್’ ಮ್ಹಣ್
ವೊಲಾಯಿಲ್ಲೆಂ. ನಾ ಜಾಲ್ಯಾರ್ ಹ್ಯಾ ಉದಾಕ್ ಝಳ್ಚಾ ರೆಂವೆಂಚಾ ಗಾಂವಾಂತ್ ಉದ್ಕಾಕ್ ತೇಲ್ ಭರ್ಸುನ್ ಝಳಂವ್ಚೊ
ವಾವ್ರ್ ಕೆಲ್ಲೊ ತರ್ ಗಾಂವ್ಚಾ ಪಾಕ್ಯಾಚಾ ಕೊಲ್ವಾಕ್ ನಳೆ
ಬಸಂವ್ಕ್ ಜಾತೆ. ತೆಂ ಆಸೊಂ.
ಹೊ ವಾವ್ರ್ ಕೊಣಾಯ್ಕೀ ಕಿತೆಂಯ್ ದಿಸ್ತಾ ಜಾಂವ್ಕ್ ಪುರೊ. ಯಾ ಚ್ಯಾರ್ ಜಣಾಂ ದರ್ಯಾಕ್ ಉದಾಕ್
ವ್ಹಾವಂವ್ಚೆಂ ಪ್ರೇತನ್ ಕರ್ತಾತ್ ಮ್ಹಣ್ ಹಾಸೊಂಕ್ಯ್
ಪುರೊ. ಅಶೆಂ ಹಾಸ್ಲ್ಲೆ ಮನಿಸ್ ಅಜೂನ್ ಕೊಂಕಣಿಈ ಸಾಹಿತ್ಯಾಕ್ ಫಕತ್ತ್ ಏಕ್
ಶೆತ್ ಮ್ಹಣೊನ್ ಮಾಂದುನ್ ಘೆತಾತ್ ತಾಂಕಾಂ ದರ್ಯೊ ಮ್ಹಳ್ಯಾರ್ ವಿಜ್ಮಿತ್ ಜಾತಾ.
ಚಿಂತ್ಪಾಚೆಂ ಉಣೆಂಪಣ್ ಆಸ್ಲ್ಲ್ಯಾಂಕ್ ಆನಿ ಶೆತಾಕ್ ಮಾತ್ರ್ ಪಳೆಂವ್ಕ್ ವಳ್ಕೊಂಚಾಂಕ್ ಭಾಟ್ ಮ್ಹಳ್ಯಾರ್ ಕಶೆಂ
ಸಮ್ಜೊಂವ್ಚೆಂ? ಜೆಂ ಕೊಣಾಚೆಂ ಚಿಂತಾಪ್ ಲ್ಹಾನ್ ಆಸಾ ತೆ ಲ್ಹಾನ್ಚ್ ಜಾವ್ನ್ ಉರ್ತಾತ್. ಆನಿ ಅಪ್ಣಾಕ್ಚ್
ವ್ಹಡ್ಲೊ ಮ್ಹಣೊನ್ ಪಾಚಾರ್ತಾತ್. ಅಪ್ಣಾಚಾ ಶೆತಾಂತ್ ಪಿಕ್ಲ್ಲೆಂ
ಮಾತ್ರ್ ’ಭಾತ್’, ಘಾಟಾರ್ ಪಿಕ್ಲ್ಲೆಂ ಸಗ್ಳೆಂ ’ಪೊಲ್ಲು’
ಮ್ಹಳ್ಳೆಪರಿಂ. ತೆಂ ಘಾಟ್ ಮ್ಹಳ್ಯಾರ್ ಕಿತೆಂ ಮ್ಹಳ್ಳಿ ಜಾಣ್ವಾಯ್
ನಾತ್ಲ್ಲೆ ಸಯ್ತ್. ಪುಣ್ ಹಾಂಚಾ ತಾಂಚಾ ತೊಂಡಾ ಥಾವ್ನ್ ಆಯ್ಕಲ್ಲ್ಯಾ
ವರ್ಣನಾಕ್ ಅಪ್ಣಾಚೆಂಚ್ ಕಲ್ಪನ್ ದೀವ್ನ್ ತುರಂತ್ ಏಕ್ ನವೊ ಘುಟ್ ರಚುಂಕ್ ಆನಿ ತೆಂ
ಪ್ರಸ್ತುತ್ ಕರುಂಕ್ ತೆ ಹುಶಾರ್. ಘಾಟಾಚೊ ಏಕ್ ಭಂವಾಡೊ
ಹಾಂಕಾ ಮಾರಯ್ಲ್ಯಾರ್ ಮಾತ್ರ್ ಹಾಂಚೆ ನಾಕ್ ಅಪ್ಲೊ
ಸ್ವಾಸ್ ವಿಸ್ರೊನ್ ತೆಂ ಕಾಮ್ ತೊಂಡಾಕ್ ಕರುಂಕ್ ಪಡ್ತಾ.
ಸ್ರಜಾನಾತ್ಮಕ್ ಯಾ Creative literature
ಂತ್ ಕೊಂಕ್ಣಿ ಸಾಹಿತ್ಯ್ ಕಿತ್ಲೆಂ
ಮುಖಾರ್ ಆಸಾ ಯಾ ಪಾಟಿಂ ಆಸಾ ಮ್ಹಳ್ಳೆಂ ಧಾಖವ್ನ್ ದಿಂವ್ಚೆಂ
ಹೆಂ ಪ್ರೇತನ್ ಭಿಲ್ಕುಲ್ ನ್ಹಂಯ್. ಸಾಹಿತ್ಯಾಕ್ ಸಾಹಿತ್ಯಾಚಾ ಖರ್ಯಾ
ವಳ್ಕೆನ್ ಹರ್ಯೆಕಾ ಸಾಹಿತ್ಕಾರಾನ್ ವಳ್ಕೊನ್ ಘೆಂವ್ಚೆಂ
ಹೆಂ ಮಿಸಾಂವ್.
ಹ್ಯಾಚ್ ಖಾತಿರ್ ಹಾವೆಂ ಸಾಂಗ್ಚೆಂ ಕೊಂಕಣಿ ಸಾಹಿತ್ಯಾಕ್ ಶೆತಾಚಾ
ನದ್ರೆನ್ ಪಳೆಯಾ ಯಾ ವಿಶಾಲ್ ಪಾಚ್ವ್ಯಾ ಮಯ್ದಾನಾಚಾ
ನದ್ರೆನ್ ಪಳೆಯಾ. ತಳ್ಯಾಚಾ ನದ್ರೆನ್ ಪಳೆಯಾ ಯಾ ದರ್ಯಾಕ್
ಸರಿ ಕರಾ - ತಾಂತುಂ ಫರಕ್ ಕಾಂಯ್ ನಾ.
ಆಪ್ಲ್ಯಾ ವಿಜಿಟಿಂಗ್ ಕಾರ್ಡಾಚೆರ್ ಲಾಂಬ್ ಲಾಂಬ್ ಡಿಗ್ರಿ ಛಾಪ್ಲ್ಲ್ಯಾಫರಾಂ
ಮನಿಸ್ ಶಿಕ್ಪಿ ಯಾ Educated ಜಾಯ್ನಾಂ ತೊ Literal
ಮಾತ್ರ್ ಜಾತಾ. ಜೆದ್ನಾಂ ತೊ ಜಾಣ್ವಾಯೆಕ್ Prune
ಕರ್ತಾ ತೆದ್ನಾಂ ತೊ ಆಪ್ಲ್ಯಾ ಜಾಣ್ವಾಯೆಕ್ ಜಾಣಾಂ ಜಾತಾ. ಅಶೆಂ ಆಸ್ತಾಂ ತಳ್ಯಾಂತ್ ರಾವೊನ್ ತಿಚ್ಚ್ ಜಾಣ್ವಾಯ್ ಜೊಡುಂಕ್ ಯೆತಾ ದರ್ಯಾಕ್ ದೆಂವೊನ್ಯೀ ತಿಚ್ಚ್ ಜಾಣ್ವಾಯ್ ಜೊಡುಂಕ್ ಯೆತಾ. ಫಕತ್ತ್ ತಾಣೆಂ ಆಪ್ಲ್ಯಾ ಜಿವಿತಾ
ವರ್ತುಲಾಚಿ ಪರಿಮಿತಿ ವ್ಹಾಡಂವ್ಕ್ ಜಾಯ್ ತಿತ್ಲೆಂಚ್.
ಕೊಂಕಣೀ ಸಾಹಿತ್ಯ್ ವಾ ಸಂಸ್ಕೃತಿವಿಶಿಂ ಆಜ್ ಖಂಯ್ಚೆಂ ಕಾರ್ಯೆಂ ಜಾಯ್ತ್ ಜಾಲ್ಯಾರ್ಯೀ ಆಮ್ಚಾ
ಮಾನೆಸ್ತಾಂಚಿ ಏಕ್ಚ್ ಬೋಬ್! ಕೊಂಕ್ಣೆಕ್ ಕಾಂಯ್ ಫುಡಾರ್
ನಾ. ಕೊಂಕ್ಣಿ ಆಳ್ವತಾ. ಕೊಂಕ್ಣಿ ಸಾಹಿತ್ಯ್ ರುಚಾನಾ, ತಾಂತುಂ
ವೈವಿಧ್ಯತಾ ನಾ, ಕೊಂಕಣೀ ಸಾಹಿತ್ಯ್ ಖಾಯ್ಸ್ ಜಾಯ್ನಾಂ. ಖರೆಂಚ್
ಹೊ ಆವಾಜ್ ಸಾರ್ಕೊ? ಯಾ ಹೆಂ ಪೊಕೊಳ್ಪಣ್?
ಕೊಂಕಣಿಂತ್ ಅಪುಣ್ ಸಾಃಇತ್ಯ್ಕಾರ್ ಅಪುಣ್ ಮಾಲ್ಘಡೊ ಅಪ್ಣಾನ್ ’ಹಿ’ ಆನಿ ’ತಿ’
ಪ್ರಶಸ್ತಿ ಆಪ್ಣಾಯ್ಲ್ಯಾ ಮ್ಹಣೊನ್ ಅಪ್ಲೆಂ ಹರ್ಧೆಂ ಬಡವ್ನ್
ಸಾಂಗ್ಚಾ ಸಾಹಿತಿಕ್ ಅಶೆಂಚ್ ಸಾಹಿತ್ಯಾಚಾ ವಿಶಿಂ ವಿಚಾರ್ಸಾತೆಂ ಜಾತಾನಾ
ಹಾವೆಂ ವಿಚಾರ್ಲೆಂ ’ಮ್ಹಜ್ಯಾ ತ್ಯಾ ಲೇಖನಾಕ್ ತುವೆಂ ವಾಚ್ಲಾಂಯ್?’
ಸಟ್ಟ್ ಕರುನ್ ತಾಣೆಂ ಜವಾಬ್ ದಿಲಿ ’ನಾ..
ಮ್ಹಾಕಾ ವಾಚುಂಕ್ ಪುರ್ಸತ್ ನಾ. ಅಸಲೆ ಸಾಹಿತಿ ಕಸಲ್ಯಾ ಆಧಾರಾನ್
ಸಾಹಿತ್ಯ್ ರಚ್ತಾತ್? ಹ್ಯಾ ಕುಶಿನ್ ಇಲ್ಲೆಂ ಚಿಂತ್ಲೆಂ ತ್ಯಾ ಕುಶಿನ್ ಇಲ್ಲೆಂ ಖಿರಯ್ಲೆಂ,
ಹೆಣೆಚೆಂ ಇಲ್ಲೆಂ ಆರಾಯ್ಲೆಂ ತೆಣೆಚೆಂ ಇಲ್ಲೆಂ ನೆರಾಯ್ಲೆಂ,
ಹ್ಯಾ ಕುಶಿನ್ ಥೊಡ್ಯಾ ಸಿಂತಿಮೆಂತಾಕ್ ಜಾಗಯ್ಲೆಂ ತ್ಯಾ ಕುಶಿನ್ ಥೊಡ್ಯಾ ದುಃಖಾಂಕ್ ಗಳಯ್ಲೆಂ.
ಮಧೆಂ ಹಾಡ್ಲೆಂ ಜಿವಿತಾಚೆಂ ಕಾಂಯ್ ಥೊಡೆಂ ಅಪ್ಲ್ಯಾ ಭಗ್ಣಾಂಚೆರ್ ಬರಯ್ಲೆಂ ಜಾಲ್ಯಾರ್ ತ್ಯಾ ತಾಚ್ಯಾ
ಮುಖ್ಲ್ಯಾ ಸಾಹಿತ್ಯಾಂತ್ ತಾಚೆಂ ಫಾರಿಕ್ಪಣ್ ಘೆವ್ನ್ ಅಪ್ಲ್ಯಾಚ್
ಸಾಲಾಂತ್ ಅಪುಣ್ ನಾಚ್ಲೆ. ಹಾಂಗಾಸರ್ ನಾಚ್ಪಿಯ್ ತೊಚ್ಚ್ ಆನಿ ಉತ್ರಾಂನಿ
ಮಾತ್ರ್ ಕೊಂಕ್ಣಿ ಸಾಹಿತ್ ಶೆಳೆಂ ಯಾ ತಳೆಂ ಹಿ ಆಮ್ಚಿ ಪರಿಗತ್. ಆಮ್ಚಿ
ಪರಿಗತ್ ಅಶಿ ಆಸ್ತಾನಾ ’ದಾಯ್ಜ್’ ಪಂಗಡ್ ಅಸಲ್ಯಾ ವಾವ್ರಾಕ್ ದೆಂವೊಂಕ್
ನಾ. ಕಾಂಯ್ ಥೊಡೊ ಅಪ್ರೂಪ್ ಮೆಳ್ಚೊ ವಾವ್ರ್ ಕೊಂಕಣಿ
ಮಾಯೆಚಾ ಸಾಹಿತ್ಯಾಕ್ ಸಮ್ಜೊಂವ್ಚಾ ಪ್ರೇತ್ನಾಂತ್ ಖರ್ಚಿತಾ.
ಸಜಾಜೆಂತ್ ಜಿಯೆಂವ್ಚೊ ಮನಿಸ್ಯ್ ಆಜ್ ನಿರಾಸೆಚಾ ವಾದಾಳಾಂತ್ ಶಿರ್ಕೊನ್ ಉಡ್ಡಾತಾನಾ ತಾಕಾ
ಮನೋರಂಜನ್ ದಿಂವ್ಚೆಂ ತೆಂ ಕಸಲೆಂಯ್ ಸಾಹಿತ್ಯ್ ಜಾಂವ್ ಚಡ್ ಬರೆಂ
ಲಾಗ್ತಾ. ಕಿತ್ಯಾಕ್ ಮ್ಹಳ್ಯಾರ್ ತೊ ಖುಶಿ ಆನಿ ಸುಖ್ ಆಶೆತಾ.
ಹ್ಯಾ ಸುಖಾಕ್ ಲಾಗೊನ್ ಜರ್ತರ್ ಕೊಣ್ಯ್ ’ಅಬ್ದುಲ್ಲಾ ಇಸಾಬೆಲ್ಲಾ’
ಮ್ಹಣೊನ್ ಗಾಯ್ತಾ ಜಾಲ್ಯಾರ್ ಆಯ್ಕಾಲ್ಲೊ ವ್ಹಾ ವ್ಹಾ ಕರ್ತಾ.
ಪುಣ್ ಹೆಂಚ್ ವ್ಹಾ ವ್ಹಾ ಸಮಾಜೆಕ್ ಕಿತ್ಲೆಂ ಬರೆಂ ಆನಿ ಕಿತ್ಲೆಂ
ವಾಯ್ಟ್ ಹಾಡುಂಕ್ ಸಕ್ತಾ ಮ್ಹಳ್ಳ್ಯಾವಿಶಿಂ ಕೊಣ್ಯ್ ತಕ್ಲಿ ಆಟಯ್ಲ್ಯಾರ್ ತಾಚಾ
ಪಾಂಯಾ ಪಂದ್ಲಿ ಧರ್ಣ್ ಕೊಸ್ಳೊನ್ ವಚೊಂಕ್ ಆಸಾ.
ವಾಸ್ತವಿಕ್ ಜಿವಿತಾಂತ್ ಹರ್ಯೆಕಾ ಕ್ರಿಯೆಚಿ ಪ್ರತಿಕ್ರಿಯಾ ತಿತ್ಲ್ಯಾಚ್
ಮಾಪಾನ್ ಹ್ಯಾ ಸಮಾಜೆವಯ್ರ್ ಪಡ್ತಾ ಜಾಲ್ಯಾರ್ಯ್ ತಾಚೆಂ ತೂಕ್
ಮಾತ್ರ್ ಜಿವಿತಾ ವಯ್ರ್ ಚಡ್ ಅಧಿಕ್ ಮಾಪಾನ್ ಪಡ್ತಾ.
ಹೆಂ ಚಿಂತುಂಕ್ ಕೊಣ್ಯ್ ವಚಾನಾ. ದೆಖುನ್ಂಚ್ ಆಮ್ಚೆ ಸಾಹಿತಿ ಅಜೂನ್ ತಳ್ಯಾಂತ್ ಯಾ
ಶೆತಾಂತ್ಚ್ ಉರ್ಲ್ಯಾತ್ (ಹೆಂ ತಾಂಚಾ ಉಣ್ಯಾ ಚಿಂತ್ಪಾಪ್ರಕಾರ್).
ದರ್ಯಾಕ್ ಯೆಂವ್ಚೆಂ ತೆಂ ಉದಾಕ್ ಹರ್ಯೆಕಾ ಕುಶಿನ್ ನಿತಳ್ ಉದಾಕ್
ಮ್ಹಣೊಂಕ್ ಜಾಯ್ನಾ. ಮೊರಿಯಾಂನಿಂ ವ್ಹಾಳಯಿಲ್ಲೆಂ
ನೆಣ್ತ್ಯಾ ಪಿಂಪ್ಯಾಚೆಂ ರಗಾತ್ ಪಾಸೊನ್ ಹ್ಯಾ ದರ್ಯಾಕ್ಚ್
ವೆತಾ. ಆನಿ ದರ್ಯಾಂತ್ ತೆಂ ಅಪ್ಲೆಂಪಣ್ ಸಾಂಡುನ್ ಏಕ್ ವಿಶಾಲ್
Universal ರೂಚ್ ಘೆತಾ.
ಹ್ಯಾ ರುಚಿಂತ್ ತೆಂ ಸದಾಂಚ್ ನಿತಳ್ ಉರ್ತಾ ಆನಿ ಸದಾಂಕಾಳ್ ಬಾಳ್ವತಾ
ಹೆಂ ದರ್ಯಾಕ್ ಉದಾಕ್.
ಆಮ್ಚೊ ಉದ್ದೇಶ್ಯ್ ಹ್ಯಾ ದರ್ಯಾಚಾ ಉದ್ಕಾಪರಿಂ ತಿತ್ಲೊಚ್ ರುಚಿಕ್ ಆನಿ ಸದಾಂಕಾಳ್ ಬಾಳ್ವೊಂವ್ಚೊ ಕೊಂಕಣ್
ಸಾಹಿತ್ಯಾಚೆಂ ಗ್ರೇಸ್ತ್ಪಣ್! ತೆಂ ಶೆತಾಚೆಂ ಜಾಂವ್, ತಳ್ಯಾಚೆಂ ಜಾಂವ್
ಬಾಂಯ್ತ್ಲೆಂ ಜಾಂವ್ ಯಾ ಕಸಲೆಂಯ್ ಜಾಂವ್.
ವಿಮರ್ಸೊ ಮ್ಹಳ್ಯಾರ್ ಕಿತೆಂ? ತೊ ಕಸೊ ಆಸೊಂಕ್ ಜಾಯ್? ತ್ಯಾ
ವರ್ವಿಂ ಸಾಹಿತ್ಯಾಕ್ ಕಶೆಂ ಬರೆಂಪಣ್ ಲಾಭ್ತಾ? ವಿಮರ್ಸೊ
ಸಾಹಿತ್ಯಾಕ್ ಗರ್ಜೆಚೊಗೀ? ವಾ ನಾ? ಮ್ಹಳ್ಳೆವಿಶಿಂ ಹ್ಯಾ ದರ್ಯಾಕ್ ಉದಾಕ್
ಪುಸ್ತಕಾಚಾ ಪ್ರಸ್ತಾವನಾಂತ್ ರೆಗಾಮ್ ತಾಕೊಡೆ ಹಾಣೆಂ
ವಿವರಾತ್ಮಕ್ ಸಮ್ಜಣಿ ದಿಲ್ಯಾ ಆಸ್ತಾಂ ಹ್ಯಾವಿಶಿಂ ಪರತ್
ಹಾಂವ್ ಬರಂವ್ಕ್ ವಚಾನಾ. ಪುಣ್ ಏಕ್ ವಿಶಯ್ ಮಾತ್ರ್ ಜರೂರ್
ಸಾಂಗೊಂಕ್ ಆಶೆತಾಂ ಕೀ ಜೆದ್ನಾಂ ಎಕಾ ಸಾಹಿತಿನ್ ರಚ್ಲ್ಲೆಂ ಸಾಹಿತ್ಯ್
ವಾಚ್ಪ್ಯಾಚಾ ಹಾತಾಕ್ ಪಾವ್ತಾನಾ ತೆಂ ಸರ್ವ್ ಬಂಧನಾ ಥಾವ್ನ್
ಸ್ವತಂತ್ರ್ ಜಾವ್ನ್ ಎಕಾ ಸ್ವತಂತ್ರ್ ಚಿಂತ್ಪಾಚಾ ರುಪಾನ್ ಆನಿ
Universal ವಿಚಾರಾಂಚಾ ಆಧಾರಾನ್ ತೆಂ
ಸಮಾಜೆಂತ್ ವಾಚ್ಪ್ಯಾ ಸಾಮ್ಕಾರ್ ಹಾಜರ್ ಜಾತಾ. ಅಶೆಂ ಆಸ್ತಾನಾ ತೆಂ
ಸಾಹಿತ್ಯ್ ಫಕತ್ತ್ ಎಕಾ ವೆಳಾಕ್ ಆನಿ ಎಕಾ ಕಾಳಾಕ್ ಮಾತ್ರ್ ಸೀಮಿತ್ ಕರುಂಕ್ ಜಾಯ್ನಾಂ. ಯಾ ತೆಂ
ಸಾಹಿತ್ಯ್ ಬರಯ್ಲೆಲ್ಯಾ ಸಾಹಿತ್ಯ್ಕಾರಾಚಾ ತ್ಯಾ ವೆಳಾಚಾ ಸಮಾಜೆ
ಸಾಂಗಾತಾ ತಾಚಾ ಆರ್ಥಿಕ್ ಪರಿಗತೆಕ್ ವೊರಾವ್ನ್ ಪಳೆಂವ್ಕ್ ಜಾಯ್ನಾಂ. ಚಾಲ್ತ್ಯಾ ಖಂಯ್ಚಾಯ್ ಘಡಿತಾಂ
ವಯ್ರ್ ಜರ್ತರ್ ಸಾಹಿತ್ಯ್ ರಚ್ಲೆಂ ಜಾಲ್ಯಾರ್ ತ್ಯಾ ಸಾಹಿತ್ಯಾಕ್ ತ್ಯಾಚ್ ಕಾಳಾಕ್ ಆನಿ ವೆಳಾಕ್ ಸೀಮಿತ್ ಕರುಂಕ್ ಜಾಯ್ ಜಾಲ್ಯಾರ್
ಸ್ರಜನಾತ್ಮಕ್ ಸಾಹಿತ್ಯ್ಚ್ ತಾಕಾ ವಾಟ್ ನ್ಹಂಯ್. ಹೆಂ ಸಾಹಿತ್ಯ್ಕಾರಾನ್
ಪಯ್ಲೆಂ ಸಮ್ಜೊಂಕ್ ಜಾಯ್.
ಕೊಂಕಣಿ ಸಾಹಿತ್ಯಾಂತ್ ವಿಮರ್ಸೊ ಕೊಣಾಯ್ಕ್ಯ್ ಪಸಂದ್ ಜಾಯ್ನಾಂ ಮ್ಹಳ್ಳೆವಿಶಿಂಚ್
ಹಾವೆಂ ಚಡ್ ಆನಿ ಚಡ್ ಆಯ್ಕಾಲಾಂ. ಹೆಂ ಸಾಹಿತ್ಯ್ಕಾರಾಚೆಂ ರುದಾನ್ ಜಾಲ್ಯಾರ್ ಕೊಂಕಣಿಂತ್ ಬರೆಂ
ಸಾಹಿತ್ಯ್ ಖಂಯ್ ಆಸಾ? ತೆಂಚ್ ಪಾರಂಪರಿಕ್! ತಿಂಚ್ ಫುಲಾಂ ಆನಿ ತಿಂಚ್ ಫಳಾಂ. ತಿಚ್ಚ್
ಮಾತಿ ಆನಿ ತೆಂಚ್ ವರ್ಣನ್ - ನವೆಸಾಂವ್ ಕಾಂಯ್ ನಾ? ಅಶೆಂ ಆಸ್ತಾನಾ ಆಶಾವಾದಿ ತರ್ಫೆನ್
ಪುಸ್ತಕಾಂ ಪರ್ಗಟ್ಚೆಂ ಮೇಟ್ಯ್ ಧಯ್ರಾಧಿಕ್!
ಹೆಂಯ್ ಸಭಾರಾಂನಿ ಆಮ್ಕಾಂ ಸಾಂಗ್ಲಾಂ. ಹ್ಯಾ ಫಿರ್ಯಾದೆಕ್ ಆನಿ
ಪರ್ಯಾಯ್ ಫಿರ್ಯಾದೆಕ್ ಕಾರಾಣ್ ಭೋವ್ಶಾ ದೊಳ್ಯಾಂ ಮುಖಾರ್ಚ್ ರೂಪ್ ರೂಪ್
ದಿಸ್ತಾನಾ ಚೂಡ್ ಪೆಟವ್ನ್ ಸೊಧ್ಚಿ ಗರ್ಜ್ ನಾ. ಜವಾಬ್ ಸಗ್ಳಿಂ ಜಾಣಾಂತ್ ಜಾಲ್ಯಾರ್ಯ್ ಅಪ್ಣಾಕ್ ಕಿತೆಂ ಗರ್ಜ್
ಮ್ಹಣೊನ್ ಪಾಟಿಂ ನಿಸ್ರೊಂಚಿಂ ಚಡ್ ಆಸಾತ್.
ವಿಮರ್ಸೊ ಮ್ಹಣ್ತಾನಾ ಹಾವೆಂ ಕಾಂಯ್ ವಿಮರ್ಶಕ್ ಕಸಬ್ ಕರುನ್ ಘೆಂವ್ಕ್
ನಾ. ವಿಮರ್ಶಾಕ್ ದೆಂವ್ಚಾ ಪಯ್ಲೆಂ ಹಾಂವ್ ಸಾಃಇತಿ ಆಸ್ಲ್ಲೊಂ. ಆಪ್ಣಾಚಾ
ಸಾಹಿತ್ಯಾಚೊ ವಿಮರ್ಸೊ ಹಾವೆಂ ಪಯ್ಲೆಂ ಕೆಲಾ. ಹ್ಯಾಚ್ ಖಾತಿರ್
ಸಭಾರಾಂತ್ಲೆಂ ಸಭಾರ್ ಮ್ಹಜೆಂ ಸಾಹಿತ್ಯ್ ಹಾವೆಂ ಸಮಾಜೆಕ್ ದಿಂವ್ಚಾಕ್ಯ್
ಮಾತಿ ಖಾಂವ್ಚಾ ವ್ಹಾಳಯೆಕ್ ಖಾಣ್ ಜಾವ್ನ್ ದಿಲಾಂ. ಹಾಂತುಂ
ಮ್ಹಾಕಾ ಲಜ್ ಯಾ ಬೆಜಾರಾಯ್ ಕಾಂಯ್ ನಾ. ದೇವ್ ಬರೆಂ ಕರುಂ ಎಚ್ಚೆಮಾಕ್. ತಾಚಾ
ಮಿಸಾಂವಾಚೊ ಹೊ ಫಳ್ ಮ್ಹಣೊನ್ ಮಾಂಧ್ತಾಂ ಹಾಂವ್.
ಹ್ಯಾ ಮಿಸಾಂವಾಕ್ ಏಕ್ ವಾಟ್ ರುತಾಂ ಕರುಂಕ್ ಖಳ್ಮಿತ್ ನಾಸ್ತಾಂ
ವಾವ್ರ್ ಚಲಂವ್ಚಾ, ಕೊಂಕಣಿ ಅಪ್ಲೆಂ ಸರ್ವಸ್ವ್ ಮ್ಹಣೊನ್
ಮಾಂಧುನ್ ಘೆತ್ಲ್ಲ್ಯಾ ವಲ್ಲಿ ಕ್ವಾಡ್ರಸಾಕ್ ಹಾಂಗಾಸರ್ ಖಂಡಿತ್ ಶಾಭಾಸ್ಕಿ ಫಾವೊ. ದೇವ್ ಬರೆಂ ಕರುಂ ತುಮ್ಕಾಂ
ಸಮೇಸ್ತಾಂಕ್ - ಕೊಂಕಣಿ ಸಾಹಿತ್ಯಾಂತ್ ವಿಮರ್ಶಾಚಿ ಗರ್ಜ್ ಆಸಾ
ಮ್ಹಣೊನ್ ಪಾಟಿಂಬೊ ದಿಂವ್ಚಾಂಕ್ ತಶೆಂಚ್ ಗರ್ಜ್ ನಾ ಮ್ಹಣೊನ್
ವಾದ್ ಮಾಂಡ್ತೆಲ್ಯಾಂಕ್.
ಆಮ್ಚಾ ಮಿಸಾಂವಾಕ್ ಆಮ್ಕಾಂ ಹೆ ದೊನ್ಯ್ ವರ್ಗ್ ಚಡ್ಚ್ ಗರ್ಜೆಚೆ. ಉದಾಕ್ ತೆಂ ಕಸಲೆಂಯ್ ಜಾಂವ್, ತೆಂ ಖಂಯ್ ಥಾವ್ನ್ ಕಂಯ್ ಜಾಲ್ಯಾರ್ಯಿ ವ್ಹಾಳೊಂ. ಕೊಂಕಣಿ
ಸಾಹಿತ್ಯಾಕ್ ತೆಂ ಸದಾಂಚ್ ಜೀವ್ ಭರುಂ.
ದೇವ್ ಬರೆಂ ಕರುಂ,
ಮೆಲ್ವಿನ್ ಜೆ. ವಾಸ್ ಕೆಲರಾಯ್/ಕುವೇಯ್ಟ್
ಪ್ರಸ್ತಾವನ್ 1: ದರ್ಯಾಕ್ ಉದಾಕ್ ಕಸಲಿ ಗರಜ್? - ರೆಗಾಮ್ ತಾಕೊಡೆ
ಪ್ರಸ್ತಾವನ್ 2: ಮನ್ಶಾಚಿ, ಸೃಷ್ಟೆಚಿ ಸ್ವಾಭಾವಿಕ್ ಸ್ಥಿತಿ ಕವಿತಾ - ಮೆಲ್ವಿನ್ ಪಿಂಟೊ ನೀರುಡೆ
ಪ್ರಸ್ತಾವನ್ 3: ಮೊಗಾಚಿಂ ದೋನ್ ಉತ್ರಾಂ - ಕಿಶೂ ಬಾರ್ಕುರ್
ಕವಿ, ಕವಿತಾ ಆನಿ ಪಾಠ್
ಮ್ಹಜಾ ಮತಿಂತ್ ಏಕ್ ಚಿಂತಾಪ್ ಆಸ್ಲ್ಲೆಂ, ಪಾಟ್ಲ್ಯಾ ಲಗ್ಬಗ್ ವೀಸ್ ವರ್ಸಾಂ ಥಾವ್ನ್ ಹಾಂವ್ ಕೊಂಕ್ಣಿ ಕಾಣ್ಯೊ, ಕಾದಂಬರಿ ಬರಯ್ತಾಲೊಂ. ಥೊಡಿಂ ರಜಿಸ್ತ್ರ್ ಕವಿತಾಯ್ ಬರಯಿಲ್ಲಿಂ ತರ್ಯ್ ತಾಂಕಾಂ ಪೋರ್ ಮ್ಹಣಾಸರ್ ಕವಿತಾಚ್ ಮ್ಹಣ್ ವೊಪುನ್ ಘೆತ್ಲ್ಲಿಂ ತರ್ಯ್ ಕವಿತಾಂಕ್ ಚಡಿತ್ ಸಮ್ಜಾಜಾಯ್ ಮ್ಹಳ್ಳಿ ಆಶಾ ಆಸ್ಲ್ಲಿ ಪುಣ್ ವಾಟೊ ನಾತ್ಲ್ಲ್ಯೊ. ಹ್ಯಾ ಖಾತಿರ್ ಕಸಲ್ಯಾಯ್ ಸಾಹಿತಿಕ್ ಸಂಸ್ಥ್ಯಾಂನಿ ಯಾ ಸಂಚಾಲನಾನಿ ಮುಖೇಲ್ಪಣ್ ಘೆತ್ಲ್ಲೆಂಯ್ ನೆಣಾಂ, ಘೆತ್ಲಾಂಯ್ ತರ್ ಫಕತ್ತ್ ವರ್ಸಾಕ್ ಎಕಾ ದಿಸಾಚೆಂ ಶಿಭಿರ್ ಕರುನ್ ಏಕ್/ದೋನ್ ವೊರಾಂಭಿತರ್ ಕಾಣ್ಯೊ, ಕವಿತಾ, ವಿಡಂಬನಾಂ, ಸಂಪಾದಕಾಂಕ್ ಪತ್ರಾಂ, ಪತ್ರಾಂಕ್ ವರ್ಧ್ಯೊ ಬರಂವ್ಚೆವಿಶಿಂ ರೈಲಾಂ ಸೊಡ್ನ್ ಬುಟ್ಟಿ ಚಾಕ್ರಿ ಕರ್ಚಾ ಶಿಭಿರಾಂನಿ ಮ್ಹಾಕಾ ಕಿತ್ಯಾಕ್ಗೀ ಪಾತ್ಯೆಣಿಂಚ್ ನಾತ್ಲ್ಲಿ. ಪಯ್ಲೆಂ ಅಸಲ್ಯಾ ಶಿಭಿರಾಂನಿ ಸಂಸ್ಥ್ಯಾಚೊ ಖರೊ ಇರಾದೊ ಕಸಲೊಯ್ ಆಸೊಂ, ಹಾಂತುಂ ಭಾಗ್ ಘೆತೆಲ್ಯಾಂಕ್ ಹಾಂತುಂ ಚಾರ್ ಸಾನ್ನಾಂ ಆನಿ ದೋನ್ ಪೊಡಿ ದುಕ್ರಾಮಾಸಾಚೆಂ ಮಂಗ್ಳುರಿ ರುಚಿಕ್(?) ಜೆವ್ಣಾಶಿವಾಯ್ ಹೆರ್ ಕಿತೆಂಯ್ ಮೆಳ್ತಾಗೀ ಮ್ಹಳ್ಳೊ ದುಭಾವ್ ಮ್ಹಜಾ ಮತಿಂತ್ ಆಸ್ಲ್ಲೊ. ಆನಿ ಹಾಕಾಚ್ಚ್ ಕೊಂಕ್ಣಿ ಸೆವಾ ಕೆಲಿ ಮ್ಹಣ್ ದಾಂಗ್ರೊ ಮಾರ್ಚೊ. ತಿತ್ಲೆಂಚ್ ಕಿತ್ಯಾಕ್ ಹಾಕಾ ವ್ಹಯ್ ಮ್ಹಣ್ ಹೂಂ ಕುಟ್ಟುಂವ್ಚಿಂಯ್ ಧಾರಾಳ್..!!.
ಕವಿ ಮಿರ್ಜಾ ಘಾಲಿಬಾನ್ ಖರೆಂಚ್ ಸಾಂಗ್ಲಾಂ ’ದುನಿಯಾಮೆ
ಬೇವಕೂಫೊಂಕಿ ಕಮಿ ಹೆ ಕ್ಯಾ, ಏಕ್ ಕೊ ಡೂಂಡೊ, ಹಜಾರ್
ಮಿಲ್ತೆ ಹೈ’. ಆಸೊಂ! ಗೊಂಗೊ ವರುಂ ತ್ಯಾ ಮಿರ್ಜಾ ಘಾಲಿಬಾಕ್.
ಆಮಿ ಆಮ್ಚಾ ಕೊಂಕ್ಣಿ ಸೆವೆಕ್ ಪಾಟಿಂ ಯೆವ್ಯಾಂ;
’ಗತ್ ನಾತ್ಲ್ಲ್ಯಾಕ್ ಮತ್
ನಾತ್ಲ್ಲೊ ಬರೊ’ ಮ್ಹಳ್ಳೆಪರಿಂ, ಅಸಲೆಂ ಗತಿಗಟ್ಟಚೆಂ ಕಾಮ್ಯ್
ಜಾಯ್ನಾತ್ಲ್ಲ್ಯಾ ಹ್ಯಾ ಸುಡ್ಕಾಡಾಂತ್ ಕೊಂಕ್ಣಿ ಫುಲಂವ್ಚಿ
ಸೊಡ್, ಆಮ್ಚಿ ಕೊಂಕ್ಣಿ ಉರಂವ್ಚಿಯ್ ತಿತ್ಲಿ ಸಲೀಸ್ ನ್ಹಯ್.
ತರ್ಯ್ ಹಾಂವ್ ಕಾಂಯ್ ಕಾಳೊಕಾಕ್ ದುರ್ಸೊಂವ್ಚೊ
ಆನಿ ಅಪ್ಲೆ ಹಾತ್ ಭಾಂದುನ್ ಬೊಸ್ಚೊಂ ನ್ಹಯ್, ಮ್ಹಜಾ
ತಾಂಕಿಫರ್ಮಾಣೆ ಜ್ಯೆ ಕಿತೆಂ ಆಸಾ ತೆಂ ಕರುಂಕ್ ಪ್ರೇತನ್
ಕರ್ಚೊಂ. ಬೊಂಬೊಂಯ್ತ್ ಪಾಂಚ್-ಸ ವರ್ಸಾಂ ಶಿಕ್ಶಕ್
ಜಾವ್ನ್ ವಾವ್ರ್ ಕೆಲ್ಲ್ಯಾಂತ್ ಜಾವ್ಯೆತ್, ಸಾಂಗಾತಾ ಶಿಕ್ಚೆಂ
ಕಿತ್ಯಾಕ್ಗೀ ಮ್ಹಾಕಾ ಪಸಂದ್. ’ಕಾಳೊಕಾಕ್ ದುರ್ಸನಾಕಾ
ಬಗಾರ್ ವಾತ್ ಪೆಟಯ್’ ತತ್ವ್ ಕಿತ್ಯಾಕ್ಗೀ ಮ್ಹಾಕಾ ಚಡ್
ಆಂವಡ್ತಾ, ದೆಕುನ್ಂಚ್ ಹಾಂವ್ ತವಳ್ ತವಳ್ ಫೊಂಡಾಂತ್
ಪಡೊನ್ ಆಸಾಂ ಆನಿ ಹ್ಯಾ ಖಾತಿರ್ ರಾಖೊನ್ ಆಸ್ಚಾಂಕ್ ತಾಳಿಯೊ
ಪೆಟುನ್ ತಾಂಚಾ ದರ್ಭಾರಾಂನಿ ಹಾಸೊಂಕ್ ನೀಬ್ ಜಾಯ್
ಪಳೆ.
ಆಸೊಂ! ತಾಂಚೆಂ ದರ್ಭಾರ್ ಅಶೆಂಚ್
ಆಸೊಂ. ಮ್ಹಾಕಾ ಮ್ಹಜೆಂ ಕಾಮ್ ಕರುನ್ ಗೆಲ್ಯಾರ್ ಜಾಲೆಂ,
ಕವಿತಾಪಾಠ್ - ಅಸಲೆಂಚ್ ಚಿಂತಾಪ್ ಮ್ಹಜಾ ಮತಿಂತ್ ಕಿರ್ಲೊನ್
ಯೇಂವ್ಕ್ ಪ್ರೇರಣ್ ದಿಲ್ಲೆಂ ಜಾವ್ನಾಸಾ ಈಶ್ಟ್ ಎಚ್ಚೆಮಾನ್.
ತಾಣೆಂ ಫಕತ್ ಮ್ಹಜಾ ಮತಿಕ್ ಎಕಾ ಚಿಂತ್ಪಾಚೆಂ ಭಿಂ ವೊಂಪ್ಲೆಂ
ಮಾತ್ರ್. ಆನಿ ತೆಂ ಭಿಂ ಮ್ಹಜಾ ಮತಿನ್ ವೊಪುನ್ ಘೆತ್ಲ್ಲೆಪ್ರಕಾರ್
ಮುಖಾರುನ್ ವರುಂಕ್ ಪ್ರೇತನ್ ಕೆಲೆಂ. ಆಜ್ ಎಕಾ ವರ್ಸಾಕ್
ಸಂಪವ್ನ್ ದುಸ್ರ್ಯಾ ವರ್ಸಾಕ್ ಪಾಂಯ್ ತೆಂಕ್ತಾನಾ ಆಮಿಂ
ಕವಿತಾಪಾಠಾಂತ್ ಕಿತೆಂ ಸಾಧನ್ ಕೆಲಾಂ ಮ್ಹಳ್ಳೆಂ ಆಮ್ಚೆಲಾಗಿಂ
ಸವಾಲಾಂ ಕರ್ಚಿ ಗರ್ಜ್ ಉದೆಲ್ಯಾ.
ಮಹಾಭಾರತಾಂತ್ಲಿ ಏಕಲವ್ಯಚಿ
ಕಾಣಿ ತುಮಿಂ ಆಯ್ಕಲ್ಯಾ ಜಾವ್ಯೆತಾ, ತೊ ತವಳ್ಚಾ ಶ್ರೇಷ್ಟ್
ಮೆಸ್ತ್ರಿ ಜಾವ್ನಾಸ್ಲ್ಲ್ಯಾ ಧ್ರೋಣಾಚಾರ್ಯಲಾಗಿಂ ಅಪ್ಣಾಕ್
ಧೊಣ್ವಿ(ಬಿಲ್ಲು) ವಿಧ್ಯಾ ಶಿಕ್ಚಿ ಆಶಾ ವೆಕ್ತ್ ಕರ್ತಾ ತರ್ಯ್
ಧ್ರೋಣಾಚಾರ್ಯ ಏಕಲವ್ಯಕ್ ಶಿಕಂವ್ಕ್ ಕಬೂಲ್ ಜಾಂವ್ಕ್
ನಾ ದೆಕುನ್ ಏಕಲವ್ಯ ಕಿತೆಂ ಕರ್ತಾ? ಅಪ್ಲ್ಯಾ ಘರ್ಚಾ ಆಂಗ್ಣಾಂತ್
ಧ್ರೋಣಾಚಾರ್ಯಚಿ ಪುತ್ಳಿ ದವ್ರುನ್ ತಾಚೆಮುಖಾರ್ ತಿ
ವಿಧ್ಯಾ ಶಿಕ್ತಾ ಆನಿ ಎಕಾ ದಿಸಾ ತ್ಯಾಚ್ ಧ್ರೋಣಾಚಾರ್ಯಚಾ ಅತ್ತ್ಯುತ್ತಮ್
ವಿಧ್ಯಾರ್ಥಿ ಜಾವ್ನಾಸ್ಲ್ಲ್ಯಾ ಅರ್ಜುನಾಕ್ ಸಲ್ವಾಯ್ತಾ.
ಹಿ ಏಕ್ ಕಾಣಿ - ಚಡಾವತಾಂಕ್ ಕಾಂಯ್
ಏಕ್ ಪೊಟ್ಟು ಕಾಣಿ ಮ್ಹಳ್ಳೆಪರಿಂ ದಿಸೊಂಕ್ ಪುರೊ. ಪುಣ್
ಹ್ಯಾ ಕಾಣ್ಯೆಕ್ ಆನಿ ಕವಿತಾಪಾಠಾಕ್ ಕಸಲೊ ಸಂಬಂಧ್? ಅಶ್ಟಮಿ
ಪರ್ಬೆಕ್ ಆನಿ ಕಾಸಿಮ್ ಸಾಯ್ಭಾಕ್ ಸಂಭಂದ್ ನಾ - ಖರೆಂ.
ಹ್ಯಾ ಕಾಣ್ಯೆಥಾವ್ನ್ ಮ್ಹಜೆ ವಿಚಾರ್ ಹೆ - ಶಿಕ್ಚಿ ಉರ್ಭಾ ಆಸ್ಲ್ಯಾರ್,
ಶಿಕ್ಚೆಂ ಸಾಧನ್ ಕರುಂಕ್ ಮನ್ ಆಸ್ಲ್ಯಾರ್ ವಾಟೊ ಸಭಾರ್
ಆಸಾತ್ ಮ್ಹಣ್ ಸಾಂಗ್ಚೊ. ಶಿಕ್ಚಿ ಉರ್ಭಾ ನಾತ್ಲ್ಲ್ಯಾಕ್ ಕೊಣೆಂಯ್
ಶಿಕಂವ್ಕ್ ಜಾತಾವೆ ತರ್? ಭೋವ್ಶಾ ಕವಿತಾಪಾಠ್ ಅಸಲ್ಯಾಚ್
ಕಾಣ್ಯೆಕ್ ಲಾಗ್ಸಿಲ್ಯಾನ್ ತಾಳ್ ಪಡ್ತಾ. ಅಶೆಂ ಮ್ಹಣ್ ಮ್ಹಾಕಾ
ಕಾಂಯ್ ಅಸಲ್ಯಾ ಖಂಚಾಯ್ ಧ್ರೋಣಾಚಾರ್ಯನ್ ಇನ್ಕಾರ್
ಕೆಲೆಂ ಮ್ಹಳ್ಳೊ ಮ್ಹಜೊ ಅರ್ಥ್ ನ್ಹಯ್, ಜೆದ್ನಾಂಯ್
ಮ್ಹಜಿಂ ಕವಿತಾ ವಾಚುನ್ ತಾಚೆರ್ ಅಪ್ಲಿ ಪ್ರತಿಕ್ರಿಯಾ ದಿಂವ್ಚಾಂತ್
ಮಿತ್ರಾಂನಿ ಎಚ್ಚೆಮ್ ಜಾಂವ್, ಆಂಡ್ರು ಜಾಂವ್, ಮೆಲ್ವಿನ್
ರೊಡ್ರಿಗಸ್ ಜಾಂವ್ ಹಾಣಿಂ ಕೆದ್ನಾಂಯ್ ಇನ್ಕಾರ್ ಕರುಂಕ್
ನಾ. ತರ್ಯ್ ಅಪ್ಣಾಕ್ ಏಕ್ ಅಸಲೆಂ ಏಕ್ ಸಂವಾದಾಚಿ ಗರ್ಜ್
ಆಸ್ಲ್ಲಿ, ಆಮಿಂ ರಚ್ಲ್ಲ್ಯಾ ಸಾಹಿತ್ಯಾಚೆರ್ ಎಕಾಮೆಕಾ ಸಂವಾದ್
ಕರ್ಚೊ, ಎಕಾಮೆಕಾ ಸಂವಾದ್ ಕರುನ್ ಎಕಾಮೆಕಾಚಾ ಸಾಹಿತಿಕ್
ವಾಡಾವಳೆಕ್ ಕಾರಾಣ್ ಜಾಂವ್ಚೊ. ಆನಿ ಹ್ಯಾ ಇರಾದ್ಯಾನ್ ಉದೆಲ್ಲೆಂಚ್
ಹೆಂ ಕವಿತಾಪಾಠ್.
ಮ್ಹಾಕಾ ಹಾಂತುಂ ಕೊಣ್ ಆಯ್ಲಿಂ
ಆನಿ ಕೊಣ್ ಗೆಲಿಂ ಮ್ಹಳ್ಳೆ ಚುರ್ಚುರೆ ನಾಂತ್, ಬಗಾರ್ ಸಂತೊಸ್
ಆಸಾ, ಕಿತ್ಯಾಕ್ ಮ್ಹಳ್ಯಾರ್ ಅಸಲ್ಯಾ ಚಿಂತ್ಪಾಚಿಂ ಮಾತ್ರ್ ಹಾಂತುಂ
ಉರೊಂಕ್ ಸಕ್ತಾತ್, ಲಂಕ್ಡಾಕ್ ಲಂಕಡ್ ಮಾತ್ರ್ ಧರ್ತಾ
ಪ್ಲಾಸ್ಟಿಕ್ ನ್ಹಯ್, ಭಾಂಗಾರಾಕ್ ಭಾಂಗಾರ್ ಮಾತ್ರ್ ಧರ್ತಾ
ಲಂಕಡ್ ನ್ಹಯ್. ಹಾಂತುಂ ಕಸಲೆಚ್ ಹುದ್ದೆ ನಾಂತ್ ತರ್ಯ್
ಜವಾಬ್ಧಾರಿ ಆಸಾತ್, ಹಾಂತುಂ ಕೊಣಾಕ್ಯ್ ಕಸಲಿಚ್ ಬಂದಡ್
ನಾಂ ತರ್ಯ್ ಕಾಮಾಂ ಕರ್ತೆಲ್ಯಾಂಕ್ ಜಾಯ್ತಿಂ ಕಾಮಾಂ
ಆಸಾತ್.
ಮ್ಹಾಕಾ ಭೋವ್ ಸಂತೊಸ್
ಆನಿ ಅಭಿಮಾನ್ ಭೊಗ್ತಾ ಜೆದ್ನಾಂ ಮೆಲ್ವಿನ್ ಜೆ ವಾಸ್ ಕೆಲರಾಯ್
ತಸಲ್ಯಾಕ್ ಎಕಾ ವಿಮರ್ಶಕಾಚಾ ನದ್ರೆನ್ ಹೆರಾಂ
ವಳ್ಕತಾನಾ, ಜೊಮೆಲಾಕ್ ಎಕಾ ಕವಿಚಾ ನದ್ರೆಂತ್ ಹೆರಾಂ
ಮಾನ್ ದಿತಾನಾ, ಪ್ರಿಯಾಚಾ ಕವಿತಾ ಬರಂವ್ಚಾ, ಉಲವ್ಪಾಚಾ
ತಾಲೆಂತಾಚೆರ್ ಹೆರಾಂ ಗುಣ್-ಗಾನಾಂ ಗಾಯ್ತಾನಾ, ವೀಣಾಚಾ,
ಲೆಸ್ಲಿಚಾ ಉಲವ್ಪಾವಿಶ್ಯಾಂತ್ ಹೆರಾಂ ಹೊಗ್ಳಿಕ್ ದಿತಾನಾ ಆಂಟನಿಚಾ
ಮಟ್ವ್ಯಾ ಕಾಣ್ಯೆವಿಶ್ಯಾಂತ್ ಯಾ ಹೆರಾಂಚಾ ಎಕೆಕಾ ರಿತಿಚಾ ದೆಣ್ಯಾಂಚೆ
ಉಲ್ಲೇಕ್ ಕರ್ತಾನಾ. ಪುಣ್ ಹಾಚೊ ಅರ್ಥ್ ಹೊ ನ್ಹಯ್ಕೀ
ಕವಿತಾಪಾಠಾಂತ್ ಆಯಿಲ್ಲೆವರ್ವಿಂ ಹಾಂಕಾಂ ಹಿಂ ದೆಣಿಂ ಫಾವೊ
ಜಾಲಿಂ ಮ್ಹಣ್. ಕವಿತಾಪಾಠ್ ಏಕ್ ಮಾಧ್ಯಮ್, ಏಕ್ ಆವ್ಕಾಸ್,
ಜೊ ದೆಣಿಂ ಆಸ್ಚಾಂಕ್ ಆಸಾ ಕೆಲ್ಲೊ. ಹಾಂತುಂ ಕೊಣ್ಂಚ್ ವ್ಹಡ್/ಲ್ಹಾನ್
ನ್ಹಯ್, ಸಗ್ಳಿಂ ಏಕ್.
ಸರ್ವಾಂ ಎಕಾಚ್ಚ್ ರಿತಿನ್ ಚಿಂತುಂಕ್
ಸಕಾನಾಂತ್, ಸಗ್ಳ್ಯಾಂನಿ ಚಿಂತ್ಚಿ ರೀತ್ ವೆಗ್ಳಿ, ಸಮ್ಜೊಂವ್ಚಿ
ರೀತ್ ವೆಗ್ಳಿ. ಹಿ ಶಿಕ್ಚಿ ಪ್ರಕ್ರಿಯಾ, ಸದಾಂಚ್ ಚಾಲು ಆಸೊಂದಿ
ಮ್ಹಳ್ಳೆಂ ಮ್ಹಜೆಂ ಚಿಂತಾಪ್. ಚಡ್ ಲೊಕ್ ಯೇವ್ನ್ ಥೊಡೊ
ತೇಂಪ್ ಚಲ್ಚಿ ನ್ಹಯ್ ಬಗಾರ್ ಥೊಡೊ ಲೋಕ್ ಆಯ್ಲ್ಯಾರ್ಯ್
ಚಡ್ ತೇಂಪ್ ಹೆಂ ಅಭ್ಯಾಸ್ ಚಲೊಂದಿ ಮ್ಹಳ್ಳಿಚ್ ಮ್ಹಜಿ
ಆಶಾ ಆನಿ ಅತ್ರೆಗ್ ಜಾವ್ನಾಸಾತ್, ಮ್ಹಾಕಾ ಕವಿತಾಪಾಠಾಚೆರ್ ಜಾಯ್ತೆಂ
ಶಿಕೊಂಕ್ ಮೆಳ್ಳಾಂ ಮ್ಹಣ್ತಾನಾ ಎಕಾ ಸತಾಕ್ ಆಮಿಂ ಮಾಂದುನ್
ಘೆಂವ್ಚೆಂ ಭೋವ್ ಗರ್ಜೆಚೆಂ;
*. ಕವಿತಾಪಾಠ್ ಕೊಣಾಯ್ಚಿಯ್ ಆಸ್ತ್-ವಸ್ತ್ ನ್ಹಯ್,
ಬಗಾರ್ ಕೊಂಕ್ಣಿ ಕವಿತಾಂಕ್ ಲಗ್ತಿ ಜಾಲ್ಲ್ಯಾ ಸಂಗ್ತ್ಯಾಂಚೆರ್
ಏಕ್ ಸಂವಾದ್ ಮಾತ್ರ್.
*. ಕವಿತಾಪಾಠಾಂತ್ ಅಪ್ಣಾಚಿ ಹಾಜ್ರಿ ಶಿಕ್ಚಿ ಶಿವಾಯ್ ಶಿಕಂವ್ಚಿ ನ್ಹಯ್.
ಸರ್ವಾಂಕ್ ಚಿಂತ್ಪಾಸಕತ್ ದೆವಾನ್ ದಿಲ್ಯಾ ಮ್ಹಣ್ತಾನಾ ಆಮ್ಚೆ
ವಿಚಾರ್ ಹೆರಾಂಕ್ ಶಿಕೊಂಕ್ ಪ್ರೇರಣ್ ದಿಲ್ಯಾರ್ ತೆಂಚ್ ಪುರೊ,
ಪುಣ್ ಕಸಲಿಂಚ್ ಪಿಸಾಂಟ್ ಸಿಂತಿಮೆಂತಾಂ ಹಾಂಗಾ ಚಲ್ಚಿನಾಂತ್.
*. ಕವಿತಾಪಾಠ್ ಏಕ್ ಉಗ್ತೆಂ ಅಧ್ಯಯನ್ ದೆಕುನ್ ಆಪ್ಲೆಂ
ಚಿಂತಾಪ್ ವಿಸ್ತಾರ್ ಕರುಂಕ್ ಹರ್ಯೆಕ್ಲ್ಯಾಕ್ ಆವ್ಕಾಸ್ ಆಸಾ,
ಹಾಂತುಂ ಎಕ್ಲ್ಯಾನ್ ಉಲಂವ್ಚೆಂ ಆನಿ ಹೆರಾಂನಿ ಬಸ್ವಾಪರಿಂ ತಕ್ಲಿ
ಹಾಲಂವ್ಚಿ ನ್ಹಯ್, ಸಗ್ಳ್ಯಾಂನಿ ಅಪಾಪ್ಲೆ ವಿಚಾರ್ ವೆಕ್ತ್
ಕರ್ಚೆ.
- ವಲ್ಲಿ ಕ್ವಾಡ್ರಸ್
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications
