ಕೊಂಕ್ಣೆಚಾ ವಿಂಚ್ಣಾರ್ ಸಾಹಿತ್ಯಾಚೊ ಕೊನ್ಸೊ - ’ದಾಯ್ಜ್’ - ಫಕತ್ತ್ ಕೊಂಕಣಿ ಥಾವ್ನ್ ಕೊಂಕಣಿ ಪರ್ಯಾಂತ್, ಕೊಂಕಣಿ ಖಾತಿರ್.
ವಿಲ್ಸನ್ ಕಟೀಲ್
ವಿಲ್ಸನ್ ಕಟೀಲ್ ಲಿಖ್ಣೆ ನಾಂವಾರ್ ದಿಸಾನ್ ದೀಸ್ ಲೊಕಾಮೊಗಾಳ್ ಜಾವ್ನ್ ಯೆಂವ್ಚೊ ವಿಲ್ಸನ್ ಸಿಕ್ವೇರಾ ಕೊಂಕ್ಣೆಚೊ ಫುಡಾರಾಚೊ ಏಕ್ ಪ್ರಭುದ್ದ್ ಸಾಹಿತಿ, ಚಿಂತ್ಪಿ, ಕವಿ, ವಿಮರ್ಶಕ್, ಕಾಣ್ಯೆಗಾರ್ ಜಾಂವ್ಚಿಂ ಲಕ್ಶಣಾಂ ಮ್ಹಾಕಾ ದಿಸೊನ್ ಯೆತಾತ್. ಕೊಂಕ್ಣಿ ಸಾಹಿತ್ಯಾಚೆಂ ಮಟ್ಟ್ ಜರ್ ಚಡಾಜಯ್, ತರ್ ಅಸಲೆಂ ಸಾಹಿತ್ಯ್ ಭೋವ್ ಗರ್ಜೆಚೆಂ ಮ್ಹಳ್ಳಿ ಆಮ್ಚಿ ಅಭಿಪ್ರಾಯ್. ಹ್ಯಾ ಅಂಕಣಾಚೆರ್ ತುಮ್ಚೆ ಉಗ್ತ್ಯಾಮನಾಚೆ ವಿಚಾರ್ ಆಮಿ ಅಶೆತಾಂವ್.
ಬುಕಾಚೆಂ ನಾಂವ್: ’ತಿಂ ದುಖಾಂ ಉಲಯ್ತಾನಾ’
ಕವಿ: ಆರ್ಥರ್ ರೋಶನ್ ಪಿರೇರಾ, ಒಮ್ಜೂರ್
ಪ್ರಸ್ತಾವನಾಂ: ಆಂಡ್ರು ಡಿ’ಕುನ್ಹಾ ಆನಿ ವಲ್ಲಿ ಕ್ವಾಡ್ರಸ್
ಹೆಂ ಅಂಕಣ್ ಮಿತ್ರ್ ಹಾಫ್ತ್ಯಾಳ್ಯಾಚೆರ್ ಪರ್ಗಟ್ ಜಾತೆಲೆಂ - ಮಿತ್ರ್ ಆಮ್ಚೆಂ ಪತ್ರ್ - ಆಜ್ಚ್ ವರ್ಗಣ್ದಾರ್ ಜಾಯಾ. ಕೊಂಕ್ಣಿ ಪತ್ರಾಂಕ್ ಪಾಟಿಂಬೊ ದಿಯಾ.
ತಿಂ ದುಕಾಂ ಉಲಯ್ತಾನಾ.....
ದುಕಾಂ ಸಬಾರ್ ಕಾರಂಣಾಂಕ್ ಲಾಗೊನ್ ದೆಂವ್ತಾತ್. ಫುಟ್ಲ್ಲ್ಯಾ ಸಪ್ಣಾಂಚ್ಯೊ ಖೊಂವ್ಚ್ಯೊ ದೊಳ್ಯಾಂಕ್ ತೊಪ್ಲ್ಯಾರ್; ಫಾಲ್ಯಾಚ್ಯಾ ಖಂತಿನ್ ಆಸ್ಡ್ಯೊ ಧಾಂಪ್ಲ್ಯಾರ್... ಥೊಡೆ ಪಾವ್ಟಿಂ ಅಸ್ಪಶ್ಟ್ ಭೊಗಾಪ್ ಮತಿಂ ಕುಪಾಂ ದಾಳ್ತಾನಾ ವೊರೆ ವಿಂಗಡ್ ಬಸೊನ್ ರಡ್ಯಾಂಶೆಂ ಜಾತಾ. ಆನಿ ಕೆನ್ನಾ ಕೆನ್ನಾ ಲೆಕಾವರ್ತೆಂ ಹಾಸ್ಲ್ಯಾರೀ ದೂಕ್ ಫುಟ್ತಾ. ಹ್ಯಾ ಸರ್ವ್ ದುಕಾಂ ಪಾಟ್ಲ್ಯಾನ್ ಜಾಯ್ತೆ ಮಾನಸಿಕ್ ಆಟೆವಿಟೆ ಆಸ್ತಾತ್. ಅಸಲೆ ಅಟೆವಿಟೆ ನಾಸ್ತಾನಾಂಯ್ ಥೊಡೆಪಾವ್ಟಿಂ ದುಕಾಂ ಗಳೊಂಕ್ ಸಾಧ್ಯ್ ಆಸಾ- ದಾಕ್ಲ್ಯಾಕ್ ಪಿಯಾವಾಚ್ಯಾ ಹರ್ದ್ಯಾಕ್ ಸುರಿ ರಿಗಯ್ತಾನಾ.
ಆಯ್ಲೆವಾರ್ ಪರ್ಗಟ್ ಜಾಲ್ಲ್ಯಾ ಕವಿ ಅರ್ಥರ್ ಪಿರೇರಿಚೊ ಕವಿತಾಪುಂಜೊ ’ತಿಂ ದುಕಾಂ ಉಲಾಯ್ತಾನಾ’ ವಿಶಿಂ ಥೊಡೆಂ ಲಿಕ್ಚೆಂ ಗರ್ಜೆಚೆಂ ಮ್ಹಣ್ ಭೊಗ್ತಾ. ’ಕವಿತಾಪುಂಜೊ ಪರ್ಗಟ್ ಕರ್ಚೆಂ ಮ್ಹಳ್ಯಾರ್ ಉಬಾರಾಯೆಥಾವ್ನ್ ಏಕ್ ಗುಲೊಬಾ ಪಾಕ್ಳಿ ಸಕ್ಲಾ ಗಳವ್ನ್ ಪ್ರತಿಧ್ವನಿಕ್ ರಾಕೊನ್ ರಾಂವ್ಚೆಂ’ -ಮ್ಹಣ್ತಾ ಡೋನ್ ಮಾರ್ಕ್ವಿಸ್. ಪುಣ್ ಅಶೆಂ ಗುಲೊಬಾ ಪಾಕ್ಳೆಚಿ ಪ್ರತಿಧ್ವನಿ ಆಯ್ಕಜೆ ತರ್ ಮಾವ್ನ್ ಭೋವ್ ಗರ್ಜೆಚೆಂ. ಹ್ಯಾ ಮೌನಾಂತ್ ಆಪ್ಲ್ಯಾ ಕವಿತೆಚೆಂ ಎಕೇಕ್ ಉತರ್ಯೀ ರಸಿಕಾಚ್ಯಾ ಕಾಳ್ಜಾಕ್ ಆಪ್ಟಾತಾನಾ ಉಟ್ಚ್ಯಾ ಲ್ಹಾರಾಂಚೊ ಪುಸ್ಪುಸೊ ಆಯ್ಕೊಂವ್ಚೊ. ಪುಣ್ ತಿತ್ಲೆಂ ಸಯ್ರಾಣ್ ಕೊಣಾಕ್ ಆಸಾ? ಆಮ್ಚೆ ಬೂಕ್ ಆಜ್ ಫಾಯ್ಸ್ ಜಾಲ್ಯಾರ್ ಫಾಲ್ಯಾ ಭಿತರ್ ಅಕಾಡೆಮಿಚ್ಯೊ ವಾ ಹೆರ್ ಪ್ರಶಸ್ತ್ಯೊ ಆಪ್ಣಾಂವ್ಚೊ ಏಕ್ ಮಾತ್ರ್ ಶೆವೊಟ್. ಗುಲೊಬಾ ಪಾಕ್ಳೆಂಚಿ ಪ್ರತಿಧ್ವನಿ ಸೊಡ್ಯಾಂ ಆಮ್ಚ್ಯಾ ತಾಳಿಯಾಂಚ್ಯಾ ಆವಾಜಾಂತ್ ಖಜ್ನೆ ಫುಟ್ಲ್ಯಾರೀ ಆಯ್ಕೊಂವ್ಚೆ ನಾಂತ್.
ಅಶೆಂ ಪಯ್ಲ್ಯೊ ತಾಳಿಯೊ ಪಾಟಯಿಲ್ಲ್ಯೊ ನಾ.ಡಿಸೋಜಾನ್. ಬುಕಾಂತ್ ಸುರ್ವಿಲಿಂ ಉತ್ರಾಂ ಬರಯಿಲ್ಲ್ಯಾ ತಾಣೆ ಅತಿರೇಕಾಚಿ ಹೊಗ್ಳಿಕ್ ಉಚಾರ್ಲ್ಯಾ. ನಾ. ಡಿಸೋಜಾ ಕೊಂಕ್ಣೆಕ್ ಸಯ್ರೊ. ಸಯ್ರೊ ಮ್ಹಣ್ತಾನಾ ಇಲ್ಲಿ ದಾಕ್ಷೆಣ್ ಆಸ್ತಾಚ್. ತಶೆಂ ಆಮ್ಸೊರಾನ್ ಮ್ಹಳ್ಳೆಬರಿ ಥೊಡ್ಯೊ ವೊಳಿ ವಿಂಚುನ್ ಹೊಗ್ಳಿಕ್ ಉಚಾರ್ಲ್ಯಾ ತಾಣೆ. ಕನ್ನಡಾಂತ್ ಪ್ರಸ್ತಾವನ್ ಮ್ಹಳ್ಯಾರ್ ಎಕಾ ನಮ್ನೆಚಿ ಝಡ್ತಿ. ಕೊಂಕ್ಣೆಕ್ ಮಾತ್ರ್ ಫಕತ್ ಹೊಗ್ಳಿಕೆಚಿಂ ಉತ್ರಾಂ ಜಾವ್ನ್ಚ್ ಉರ್ಲಾಂ. ಆಂಡ್ರು ಡಿ’ಕುನ್ಹಾನ್ ಬರಯಿಲ್ಲ್ಯಾ ಪ್ರಸ್ತಾವನಾಚೆಂ ಪಯ್ಲೆಂ ಪಾನ್ ಕಾಂಯ್ ಧಾದೊಸ್ಕಾಯ್ ದಿತಾ. ಆತಾಂ ಕವಿತೆವಿಶಿಂ ನದರ್ ಮಾರ್ಲ್ಯಾರ್...
ಆಪುಣ್ ಕವಿ ನ್ಹಂಯ್ ಮ್ಹಣ್ ಸುರ್ವೆರ್ ಸಾಂಗ್ತಾ ಅರ್ಥರ್. ಹಿಂ ಉತ್ರಾಂ ಫಟ್ ಕರುಂಕ್ ತಾಂಕ್ ಆಸ್ಚಿಂ ಆಖ್ಯಾ ಬುಕಾಂತ್ ಪಾಂಚ್-ಸ ವೊಳಿಂಕ್ ಮಾತ್ರ್.
"ದರ್ಯಾಕ್ ತುಂ ಮೆಜುನ್ ಕಾಡ್ಶಿ
ಲ್ಹಾರಾಂ ಮೆಜುಂಕ್ ಕೊಣಾಕ್ ಸಾಂಗ್ಶಿ?"(ಜಿಣಿಯೆಚೊ ಮಿಸ್ತೆರ್)
"ತುಂ ದೊರಿ ಹಾಂವ್ ಪಾಳ್ಣೆಂ
ಹಾಂತುಂ ಧಲ್ತಾ ಮೊಗಾ ರಡ್ಣೆಂ" (ವ್ಹಳೂ ವ್ಹಳೂ ಕಾಳ್ಜಾಕ್ ಲಾಗ್)
ಅಸಲ್ಯೊ ವೊಳಿ ಭಾರಿಚ್ ಆಪ್ರೂಪ್. ’ಆಬಾಚೆ ಮಾರ್ ಚಾರ್ ಪಾಟಿರ್’ ಕವಿತೆಂತ್ ವಿಚಾರ್ ಆಸಾ. ಪುಣ್ ಚಡ್ತಾವ್ ಕವಿತೆಂನಿ ಅಭಿವೆಕ್ತಿಚೊ ಊಣ್ ಧರ್ ಧರ್ ಮ್ಹಣ್ ಉಟೊನ್ ದಿಸ್ತಾ. ’ಉತರ್ ದಿವ್ಯಾಂ’ ಆನಿ ’ಯೆ ತೂಂ ಪಾಟಿಂ ಮಾಂಯ್’ ಕವಿತೆಂತ್ ಕವಿಕ್ ಆನಿ ಪತಿಣ್ ವಾ ಮಾಂಯ್ಕ್ ಆಸ್ಚಿಂ ಸಿಂತಿಮೆಂತಾಂ ವ್ಯಕ್ತ್ ಜಾಲ್ಯಾಂತ್. ಪುಣ್ ಕಸಲ್ಯಾಚ್ ಥರಾನ್ ವಾಚ್ಪ್ಯಾಂಕ್ ಹಿಂ ಸಿಂತಿಮೆಂತಾಂ ಪಾವಂವ್ಕ್ ಸಲ್ವಲ್ಯಾಂತ್. ’ಭಾರತ್ ಮಹಾನ್’ ಕವಿತಾ ಘೆಂವ್ಚಿ ತರ್ ಹಾಂತುಂ ಕವಿನ್ ದೆಸಾಚಿ ಕುರ್ಡಿ ಪುಜಾ ಕೆಲ್ಯಾ. ಕವಿ ಸಾಂಗ್ತಾ- ಮ್ಹಜ್ಯಾ ದೆಶಾಂತ್ ದುದಾ ಝರಿ ವ್ಹಾಳ್ತಾತ್, ಹಿಂದೂ ಮುಸ್ಲಿಮ್ ಕಿರಿಸ್ತಾಂವ್ ಗೊಪಾಂತ್ ಆಸಾತ್, ಗಿರೇಸ್ತ್ ಭಾಸೊ ಆಸಾತ್. ಅಸಲೆಂ ಭಾರತ್ ಸರ್ಗ್ಚ್ ಮ್ಹಣ್ ಪಿಂತ್ರಾಯ್ಲಾಂ. ಅಶೆಂ ಮ್ಹಣ್ಚ್ಯಾ ಕವಿಕ್ ಬೋಮ್ ಫುಟವ್ಣಿ, ಎನ್ಕೌಂಟಾರಾಂ, ರಗ್ತಾಚೆಂ ವ್ಹಾಳ್, ಜಾತಿಕಾತಿ ಮಧೆಂ ಉಜೊ, ಕರ್ಪಂವ್ಚೊ ಗಾಂವ್.... ಹೆಂ ಪೂರಾ ದಿಸನಾಂಗಿ? ಕವಿ ಜಾಲ್ಲ್ಯಾಕ್ ಇಲ್ಲಿ ತರೀ ವಾಸ್ತವಚಿ ಪ್ರಜ್ಞಾ ಆಸೊಂಕ್ ಜಾಯ್.
ಕವಿ ಎಚ್ಚೆಮಾನ್ ಸಾಂಗ್ಚೆಪರಿಂ ’ಆಮ್ಚೆ ಚಡ್ತಾವ್ ಕವಿ ಫೆಸ್ತಾಚೆ ಕವಿ. ನತಾಲಾಂ ಫೆಸ್ತ್ ಆಯ್ಲೆಂ ಮ್ಹಣ್ತಚ್- ಪರತ್ ಯೇನಾಕಾ ಜೆಜೂ..., ಗೊಟ್ಯಾಂತ್ ಜಲ್ಮಲೊಯ್; ಪಾಸ್ಕಾಂ ಫೆಸ್ತಾಕ್- ಆಜ್ ಜೆಜು ಜಿವಂತ್ ಉಟ್ಲಾ.., ಸಂಸ್ರಾರ್ ಪ್ರಕಾಸ್ ಫಾಂಕ್ಲಾ; ಆನಿ ಮೊಂತಿ ಫೆಸ್ತಾ ವೆಳಿಂ- ಸಾಂತ್ ಆನ್ನಾ ಉದಾರಿಂ ಜಲ್ಮೊನ್ ಆಯ್ಲಿ ಆಂಕ್ವಾರ್ ಮರಿ’ :- ಅಸಲಿಂ ಉತ್ರಾಂ ಆನಿ ಚಿಂತ್ಪಾಂ ಕಿತ್ಲ್ಯಾಗೀ ವರ್ಸಾಂ ಥಾವ್ನ್ ಝರಯ್ತೆ ಆಸಾಂವ್ ಆಮಿ. ಆನಿ ತಶೆಂಚ್ ಗಾಂವಾ ವಿಶ್ಯಾಂತ್ ಆಯಿಲ್ಲ್ಯಾ ಕವಿತೆಂಕ್ಯೀ ಲೇಕ್ ನಾ. ಆತಾಂಚ್ಯಾ ಕವಿಂನಿ ಹೆಂ ಪೂರಾ ಉತ್ರೊನ್ ವಚಾಜೆ. ಕವಿತೆಂನಿ ನವೆ ನವೆ ವಿಶಯ್ ಹಾಡಿಜೆ. ಸಾಂಪ್ರದಾಯಿಕ್ ಚಿಂತ್ಪಾಂ ಮೊಡಿಜೆ. ಹಾಕಾ ಪೂರಾ ಹೆರ್ ಭಾಶೆಚೆಂ ಕಾವ್ಯೆಂ ವಾಚ್ಚೆಂ ಗರ್ಜೆಚೆಂ.
ಸೊಭಾಯ್ ಮ್ಹಳ್ಳ್ಯಾ ಕವಿತೆಚ್ಯೊ ಹ್ಯೊ ವೊಳಿ ಘೆತ್ಲ್ಯಾರ್;
"ತಾಚೆಂ ನಾಂವ್ ಮೊನ್ನಾ
ತಾಕಾ ಲಾಗ್ಚೆಂ ಸೊಭಿತ್ ಮೊನಾ
ಸುರ್ವೆರ್ ಆಪಯ್ತಲೊ ಮೊಗಾನ್ ಮಾನಾ
ಚಡ್ಲೊ ಮೋಗ್ ಆಪಂವ್ಕ್ ಲಾಗ್ಲೊ ಮಾಯ್ನಾ...."
ನೆಂಟ್ಯಾ ಭುರ್ಗ್ಯಾಂನಿ ಲಿಕ್ಲ್ಲೆ ಬರಿ ಪ್ರಾಸಾಂಚ್ಯಾ ಪಾಂಯಾಂಕ್ ಪಡೊನ್ ಚಿರ್ಡೊನ್ ಗೆಲ್ಯಾ ಕವಿತಾ. ಹೆಂ ಪೂರಾ ವಾಚ್ಪ್ಯಾಕ್ ಕಾಂಟಾಳೊ ಹಾಡಾಯ್ತಾತ್.
ದುಕಾಂಚ್ಯಾ ಭಾಶೆಂತ್ಚ್ ಸಾಂಗ್ಚೆಂ ತರ್, ಕಾವ್ಯಾನ್ ವಾಚ್ಪ್ಯಾಚೊ ಹಾಸೊ ಏಕ್ ಖಿಣ್ಭರ್ ಧರ್ನ್ ಹಾಲವ್ನ್ ಸೊಡಿಜೆ. ತಿತ್ಲಿ ತಾಂಕ್ ತ್ಯಾ ದುಕಾಂಕ್ ಆಸಾಜೆ. ಎಕಾಚ್ಛಾಣೆ ದೊಳ್ಯಾಂಕ್ ಸಾಂಪಡ್ಲ್ಲ್ಯಾ ಎಕಾ ವೊಳಿನ್ ಮತಿರ್ ಅತ್ತ್ಯಾಚಾರ್ ಕರಿಜೆ. ತೆನ್ನಾ ಬೂಕ್ ಧಾಂಪುನ್ ಥೊಡೊ ವೇಳ್ ವಿಲಕ್ಶಣ್ ಸುಖ್ ಭೊಗಾಜೆ. ತಿ ವೋಳ್ ಕಾಣಿಯೆಚ್ಯಾ ಮಧೆಂ ಆಸೊಂ ವಾ ಕಾದಂಬರಿಚ್ಯಾ ಕೊಂನ್ಶಾಂತ್. ತಾಕಾ ಕಾವ್ಯೆಂ ಮ್ಹಣ್ಯೆತ್. ಪೂಣ್ ಕವಿತೆಚ್ಯಾ ಸಗ್ಳ್ಯಾ ಆಂಗಾಕ್ ಆನಿ ಅತ್ಮ್ಯಾಕ್ಯೀ ಅಸೊ ಏಕ್ ಪರ್ಮಳ್ ಆಸಾಜೆ ಪಡ್ತಾ. ತಶೆಂ ಪಳಯ್ಲ್ಯಾರ್ ಹಾಂತ್ಲ್ಯೊ ಚಡ್ತಾವ್ ಕವಿತಾ ಸಲ್ವಲ್ಯಾತ್. ಮುಖ್ಯ್ ಮ್ಹಣ್ ದಿಸ್ಚಿ ’ತಿಂ ದುಕಾಂ ಉಲಯ್ತಾನಾ’ ಕವಿತಾಯ್ ಸಲ್ವಲ್ಯಾ.
ಕವಿತೆಂಚಿ ಪಯ್ಲಿ ವಿಂಚವ್ಣ್ ಜಾಂವ್ಚಿ ಸಂಪಾದಕಾ ಥಾವ್ನ್. ಪೂಣ್ ಆಜ್ ಕಾಲ್ ಕೊಂಕ್ಣೆಂತ್ ಸಂಪಾದಕ್ಚ್ ವಿಚಾರುನ್ ವಿಚಾರುನ್ ಫಾಯ್ಸ್ ಕರ್ತಾತ್. ಆಮ್ಚ್ಯಾ ಕವಿಂನಿ ಬರವ್ನ್ ದಿಲ್ಲೆಂ ಪೂರಾ ಸಂಪಾದಕ್ ಛಾಪ್ತಾತ್. ಚಡಾವತ್ ಸಂಪಾದಕಾಂಕ್ ವಿಮರ್ಶಾತ್ಮಕ್ ದೀಶ್ಟ್ಚ್ ನಾ. ದೆಕುನ್ ವಿಂಚವ್ಣ್ ಜಾಯ್ನಾ. ಆಮ್ಚ್ಯಾ ಕವಿಂನಿ ಆಪ್ಲಿ ಬೂಕ್ ಕಾಡ್ಚಿ ವೊಡ್ಣಿ ಥೊಡೊ ತೇಂಪ್ ಧಾಂಬುನ್ ದವರ್ಚಿ ಬೋವ್ ಬರಿ. ಥೊಡೊ ವೇಳ್ ಬರಂವ್ಚೆಂ ರಾವಯ್ಲ್ಯಾರೀ ಕಾಂಯ್ ವಡ್ ನಾ. ಪುಣ್ ದಯಾ ಕರುನ್ ಹೆರ್ ಭಾಶೆಂಚ್ಯೊ ಕವಿತಾ ವಾಚಾ. ತಾಂತ್ಲೆಂ ಸಂಪೂರ್ಣ್ ಅರ್ಥ್ ಸೊಧುಂಕ್ ವಾ ತೆಂ ಕಾವ್ಯೆಂ ಭೊಗುಂಕ್ ಶಿಕಾ. ತೆನ್ನಾ ಕವಿತಾ ಬರಂವ್ಕ್ ಜಾಯ್ ತಿ ಗುಂಡಾಯ್ ಮೆಳ್ಚಿ ಸಾದ್ಯತಾಯ್ ಆಸಾ. ಹಾಚ್ಯಾಕೀ ವರ್ತ್ಯಾನ್ ತುಮಿಂಚ್ ಬರಯಿಲ್ಲೆಂ ವರವ್ನ್ ಪಳಂವ್ಚಿ ತಾಂಕ್ ಜರೂರ್ ಮೆಳ್ತಾ.
’ವಾಚ್ಪ್ಯಾಂಕ್ ಧರ್ನ್ ಹಾಲಯ್ನಾತ್ಲೆಂ ಕಾವ್ಯೆಂ ಕಿತೆಂಚ್ ಕರುಂಕ್ ಸಕಾನಾ’ ಮ್ಹಣ್ತಾ ಬೋದಿಲೇರ್. ಆಮ್ಚ್ಯಾ ಬೂಕ್ ಕಾಡ್ತೆಲ್ಯಾಂಚೊ ವಾ ಕವಿತಾ ಲಿಕ್ತೆಲ್ಯಾಂಚೊ ಶೆವೊಟ್ ಹೊಚ್ ಆಸಾಜೆ. ಆಮ್ಚ್ಯಾ ಲೊಕಾಕ್ ಚಿಂತ್ಚಿ ಸಕತ್ ನಾ. ತಾಂಕಾ ಸಾದೊ ಸಾದೊ ಮ್ಹಣ್ ಆದಿಂ ಥಾವ್ನ್ ಮುಟಿ ಭಿತರ್ ದವರ್ಲಾಂ. ಹಿ ಮೂಟ್ ಸೊಡಂವ್ಚೆಂ ಪ್ರೇತನ್ ಆಮ್ಚ್ಯಾ ಬುಕಾಂನಿ ಕರುಂಕ್ ಜಾಯ್. ವಾಚ್ಪ್ಯಾಂಚಿ ರೂಚ್ ವಾಡೊಂಕ್ ಜಾಯ್. ಇತ್ಲೆಂ ಕರುಂಕ್ ತಾಂಕ್ ನಾತ್ಲ್ಲೆ ಬೂಕ್ ಕಾಡುನ್ ಕಸಲೇಯ್ ಪುರಸ್ಕಾರ್ ಜೊಡ್ಚ್ಯಾಂತ್ ಕಾಂಯ್ ಫಾಯ್ದೊ ನಾ, ತೋಯ್ ಕೊಂಕ್ಣೆಕ್ ಭಿಲ್ಕುಲ್ ಫಾಯ್ದೊ ನಾ.
About us | Feedback | Contact us
Copyright ©
2005 DAAIZ.COM All rights reserved.
Page concept, designed and maintained by Ashawadi Publications